TTDL-ZABTER-08-NYA-047

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=08 |volumeLetter=NYA |textnuminvol=047 |pdflink=File:TTDL-ZABTER-08-NYA-047.pdf |InitCategories=Dudjom Tersar Project; TTDL-ZABTER-Volume-08-NYA }}

Tibetan Text

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་དམར་ནག་གི་སྲོག་དབང་འཁོར་ལོས་སྒྱུར་བ་བཞུགས་སོ༔ བརྡ་ཡིག་༠༠༠༠༠༠༤༣༠༔ ན་མོ་གུ་རུ་པདྨ་ཀ་ར་ཡེ༔ གནོད་སྦྱིན་ཤན་པ་ཆེན་པོ་འདི༔ བསྒྲུབ་པའི་སྐྱེས་བུ་གང་སུ་དག༔ དང་པོ་དབང་འདི་མ་ཐོབ་ན༔ བསྒྲུབ་ཀྱང་འགྲུབ་པར་མི་འགྱུར་གྱི༔ དེ་ཕྱིར་དབང་འདི་མཆོག་ཏུ་གཅེས༔ མ་འོངས་དུས་ཀྱི་བརྒྱུད་འཛིན་རྣམས༔ དང་པོ་ཡི་དམ་ལྷ་བསྒྲུབ་ཅིང་༔ བསྙེན་སྒྲུབ་ལས་སྦྱོར་ཚད་རྫོགས་མཐར༔ དྲེགས་པ་སྲོག་ལེན་དམར་པོ་འདི༔ བསྒྲུབ་པར་འདོད་པའི་སྐྱེས་བུ་རྣམས༔ དབང་མཆོག་ཟབ་མོ་འདི་ཐོབ་གནད༔ དེ་ནས་བླ་མས་སློབ་བུ་ལ༔ དབང་བསྐུར་བྱེད་པའི་ལག་ལེན་ནི༔ སྔོན་དུ་ཡི་དམ་ལྷ་གཞུང་བསྲང་༔ དེ་ནས་དབང་གི་ཆས་རྣམས་ཀུན༔ གཞུང་བཞིན་ལེགས་པར་ཚང་བྱས་ཏེ༔ ལས་གཞུང་བསྲངས་ཏེ་བསྙེན་སྒྲུབ་འབུངས༔ དེ་ནས་བསྐུར་བའི་རིམ་པ་ནི༔ དང་པོ་ཁྲུས་བྱས་བགེགས་བསྐྲད་ནས༔ སློབ་མས༔ ཀྱཻ༔ སངས་རྒྱས་ཀུན་འདུས་བླ་མ་རྗེ༔ བདག་ཅག་སྐལ་ལྡན་བུ་མཆོག་ལ༔ གནོད་སྦྱིན་ཤན་པ་དམར་ནག་གི༔ སྲོག་དབང་ཡོངས་རྫོགས་བསྐུར་དུ་གསོལ༔ ལན་གསུམ༔ དེ་ནས་བླ་མས༔ ཀྱཻ་ཧོ་སྐལ་ལྡན་རིགས་ཀྱི་བུ༔ དབང་མཆོག་ཟབ་མོ་ལེགས་བསྐུར་བགྱི༔ དྲེགས་པ་འདི་ནི་རྟག་བསྟེན་ཅིང་༔ བསྟན་དགྲའི་སྲོག་ལ་རྒོལ་མཛོད་ཅིག༔ དེ་ནས་སློབ་མ་གནོད་སྦྱིན་དམ་ཚིག་པར་བསྒོམ༔ གནོད་སྦྱིན་ཆེན་པོའི་སྐུ་གཏད་ལ༔ ཧོཿསྐལ་ལྡན་རིགས་ཀྱི་བུ་ཁྱོད་ལ༔ གནོད་སྦྱིན་ཆེན་པོའི་དབང་བསྐུར་རོ༔ སྐུ་ལ་དབང་བསྒྱུར་དབང་ཐོབ་སྟེ༔ བསྟན་དགྲ་མ་ལུས་སྒྲོལ་བར་ཤོག༔ ཡེ་ཤེས་པ་སྤྱི་བོར་ཐིམ་པས་དམ་ཡེ་གཉིས་སུ་མེད་པར་གྱུར༔ བརྣག་པ་ཙམ་གྱིས་བསྟན་དགྲ་སྒྲོལ་བའི་ཕྲིན་ལས་ལ་དབང་བསྒྱུར་བར་བསམ༔ ཨེ་ཧེ་རྨ་རུ་རྩེ་གུ་ཎ་ཧྲཱིཿཏྲི་ས་མ་ཡ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་མི་ལྤགས་གཡང་གཞི་བསྐོན་ལ༔ ཧཱུྃ༔ མི་སྲུན་དྲག་པོའི་སྐུ་མཆོག་ལ༔ ཞིང་ཆེན་གཡང་གཞི་འདི་བསྐོན་པས༔ ཁམས་གསུམ་དབང་དུ་སྡུད་པ་དང་༔ བསྟན་དགྲ་སྒྲོལ་བའི་དབང་ཐོབ་ཤོག༔ མ་ཏྲཾ་རཱུ་ཏྲ་ཧཱུྃ༔ དེ་ནས་གླང་ཆེན་ཀོ་རློན་བསྐོན་ལ༔ ཧཱུྃ༔ མི་སྲུན་འཇིགས་བྱེད་དྲག་པོ་ལ༔ གླང་ཆེན་ཀོ་རློན་འདི་བསྐོན་པས༔ སྲིད་གསུམ་ཟིལ་གྱིས་གནོན་པ་དང་༔ དགྲ་བགེགས་ཀུན་སྒྲོལ་མཐུ་ཐོབ་ཤོག༔ ཧ་ལ་ཏི་ར་ཙ་ཧཱུྃ༔ དེ་ནས་སྟག་ལྤགས་ཤམ་ཐབས་བསྐོན་ལ༔ ཧཱུྃ༔ འཇིགས་བྱེད་དྲག་ཤུལ་བདག་པོ་ལ༔ སྟག་ལྤགས་ཤམ་ཐབས་འདི་བསྐོན་པས༔ དྲེགས་པ་ཀུན་གྱི་སྲོག་འཕྲོག་ཅིང་༔ ཞིང་བཅུ་ཡོངས་སྒྲོལ་དབང་ཐོབ་ཤོག༔ རཀྵ་སིདྡྷི་ཧཱུྃ༔ དེ་ནས་དཔྲལ་བར་ཐལ་ཚོམ་བྱུག་ལ༔ ཧཱུྃ༔ སྲོག་བདག་མི་སྲུན་དྲག་པོ་ལ༔ ཐལ་ཆེན་ཚོམ་བུ་འདི་བཀོད་པས༔ ལྟ་ལོག་མི་སྲུན་སྲོག་གཅོད་ཅིང་༔ བསྟན་པ་བསྲུང་བའི་དབང་ཐོབ་ཤོག༔ ཡཀྵ་ཀྲོ་ཏ་ཧཱུྃ༔ མཁུར་ཚོས་ལ་རཀྟ་བྱུག་ཅིང་༔ ཧཱུྃ༔ འཇིགས་བྱེད་ཡཀྴ་དམར་ནག་ལ༔ རཀྟའི་ཐིག་ལེ་འདི་བྱུག་པས༔ མུ་སྟེགས་བདུད་སྡེ་ཆོམ་གྱུར་གྱིས༔ ཕྲིན་ལས་ཐོགས་མེད་དབང་ཐོབ་ཤོག༔ ཀ་ལ་རཱུ་པ་མཱ་ར་ཡ་ཕཊ༔ དེ་ནས་ཞག་གི་ཟོ་རིས་གཏད་ལ༔ ཧཱུྃ༔ མི་ཟན་སྲོག་བདུད་ཆེན་པོ་ལ༔ ཞག་གི་ཟོ་རིས་འདི་བྱུག་པས༔ བསྟན་དགྲའི་སྲོག་དབུགས་ཤ་ཁྲག་རོལ༔ རྣམ་དག་ས་ལ་འདྲོང་ནུས་ཤོག༔ ཤ་ཏྲུཾ་ཨ་མུ་ཀཱ་མཱ་ར་ཡ་ཧཱུྃ༔ དེ་ནས་སྦྲུལ་ཆུན་གཏད་ལ༔ ཧཱུྃ༔ དམར་ནག་དབང་དྲག་གཏུམ་པོ་ལ༔ སྦྲུལ་ལྔའི་ཆུན་པོ་འདི་གཏད་པས༔ ཀླ་ཀློ་བདུད་ཀྱི་སྡེ་བཅོམ་ཞིང་༔ དགྲ་རྣམས་མ་ལུས་བརླག་གྱུར་ཅིག༔ ཧ་ལ་ཧ་ལ་དགྲ་བོ་མཱ་ར་ཡ་རྦད༔ དེ་ནས་ཐོད་ཕྲེང་གཏད་ལ༔ ཧཱུྃ༔ དམར་ནག་རབ་འཇིགས་ཆེན་པོ་ལ༔ ཐོད་པའི་ཕྲེང་བ་འདི་གཏད་པས༔ ཐོགས་བཅས་ཐོགས་མེད་དགྲ་དང་བགེགས༔ ལྷ་ཡང་རུང་སྟེ་སྒྲོལ་ནུས་ཤོག༔ བིགྷྣན་ཤ་ཏྲུཾ་མཱ་ར་ཡ་རྦད༔ དེ་ནས་གསང་ཡུམ་གཏད་ལ༔ ཧཱུྃ༔ དབང་དྲག་གཏུམ་རྔམས་ཆེན་པོ་ལ༔ གསང་བ་ཡུམ་གྱི་དབང་བསྐུར་བས༔ མ་མོ་གསོད་བྱེད་སྙིང་འཕྲོག་མའི༔ སྲོག་ལ་དབང་བསྒྱུར་དབང་ཐོབ་ཤོག༔ གྷྲཾ་བྷྱོ་ཨ་བྷྱོ་ཨ་བྷི་ཥིཉྩ་ཧཱུྃ༔ མེ་ཁྱུང་དམར་པོ་གཏད་ལ༔ ཧཱུྃ༔ སྟོང་གསུམ་དབང་བྱེད་ཆེན་པོ་ལ༔ མེ་ཁྱུང་རླུང་གཤོག་འདི་གཏད་པས༔ སྟོང་གསུམ་སྐད་ཅིག་བསྐོར་བ་དང་༔ ས་བདག་ཀླུ་གཉན་ཀུན་འཇོམས་ཤོག༔ ཁྲོཾ་ག་རུ་ཌ་ཧཱུྃ༔ དེ་ནས་རལ་གྲི་གཏད་ལ༔ ཧཱུྃ༔ སྲོག་བདག་འཇིགས་བྱེད་ཆེན་པོ་ལ༔ རལ་གྲི་ཟངས་ཡག་འདི་གཏད་པས༔ དགྲ་དཔུང་རྡུལ་དུ་བརླག་པ་དང་༔ བགེགས་དཔུང་ཚར་གཅོད་དབང་ཐོབ་ཤོག༔ བཛྲ་སྤུ་གྲི་ཛ་ཧཱུྃ༔ དེ་ནས་གྲི་གུག་གཏད་ལ༔ ཧཱུྃ༔ སྲོག་བདག་མི་སྲུན་དྲག་པོ་ལ༔ དབང་གི་གྲི་གུག་འདི་གཏད་པས༔ ཁམས་གསུམ་དབང་དུ་སྡུད་པ་དང་༔ དགྲ་བགེགས་བཀུག་བསྒྲལ་དབང་ཐོབ་ཤོག༔ བཛྲ་ཏྲི་ཤུ་ཙིཏྟ་ཧཱུྃ༔ དེ་ནས་སྙིང་དང་རྒྱུ་ཞགས་གཏད་ལ༔ ཧཱུྃ༔ སྲོག་བདུད་མི་སྲུན་འཇིགས་བྱེད་ལ༔ སྙིང་དང་རྒྱུ་ཞགས་འདི་གཏད་པས༔ དགྲ་བགེགས་མ་ལུས་བཀུག་ཅིང་བསྡུས༔ སྲོག་སྙིང་མངོན་སུམ་འབྱིན་ནུས་ཤོག༔ ཙིཏྟ་སྤུ་གྲི་ཛ་ཧཱུྃ༔ དེ་ནས་ཐོད་ཕྲེང་དང་ཐོད་ཁྲག་ཐོགས་ལ༔ ཧཱུྃ༔ དབང་དྲག་མངོན་སྤྱོད་བདག་པོ་ལ༔ ཐོད་ཕྲེང་བྷན་ཁྲག་འདི་གཏད་པས༔ སྐད་ཅིག་སྟོང་གསུམ་རྩིས་འདེབས་ཤིང་༔ དགྲ་བགེགས་སྙིང་ཁྲག་འདྲེན་པར་ཤོག༔ མ་ཧཱ་རཀྟ་ལ་ཁཱ་ཧི༔ དེ་ནས་སྤྲུལ་འཁོར་བརྒྱད་གཏད་ལ༔ ཧཱུྃ༔ འཇིགས་བྱེད་དྲག་ཤུལ་བདག་པོ་ལ༔ སྤྲུལ་འཁོར་བརྒྱད་ཀྱི་དབང་བསྐུར་བས༔ དྲི་ཟ་གཤིན་རྗེ་ཀླུ་གནོད་སྦྱིན༔ མེ་ལྷ་སྲིན་པོ་རླུང་ལྷ་དང་༔ དབང་ལྡན་སྡེ་ཚོགས་འཁོར་བཅས་ཀྱི༔ སྲོག་ལ་དབང་བསྒྱུར་དབང་ཐོབ་ཤོག༔ སརྦ་ཨ་བྷི་ཥིཉྩ་ཧཱུྃ༔ ལྷ་ཆེན་དབང་ཕྱུག་ཆེན་པོ་དང་ས་བདག་འཁོར་ལོ་བསྒྱུར་རྒྱལ་གཉིས་ཀྱི་སྐུ་གཏད་ལ༔ ཧཱུྃ༔ མངོན་སྤྱོད་ལས་ཀྱི་བདག་པོ་ལ༔ ལྷ་ཆེན་དབང་ཕྱུག་ཆེན་པོ་དང་༔ ས་བདག་འཁོར་ལོས་སྒྱུར་རྒྱལ་གྱི༔ དབང་འདི་བསྐུར་རོ་འཁོར་འདས་ཀྱི༔ སྲོག་ལ་དབང་བསྒྱུར་དབང་ཐོབ་ཤོག༔ སརྦ་ཨ་བྷི་ཥིཉྩ་ཧཱུྃ༔ དེ་ནས་ནོར་བདག་ཨ་པ་རའི་སྐུ་གཏད་ལ༔ ཧཱུྃ༔ ཁམས་གསུམ་སྲོག་གི་བདག་པོ་ལ༔ ནོར་བདག་ཆེན་པོའི་སྐུ་གཏད་དོ༔ གནོད་སྦྱིན་གཏེར་བདག་ཐམས་ཅད་ཀྱི༔ སྲོག་ལ་དབང་བསྒྱུར་དབང་ཐོབ་ཤོག༔ ཨ་པ་ར་ཙིཏྟ་རྨ་རུ་རྩེ་ཨ་བྷི་ཥིཉྩ་ཧཱུྃ༔ དེ་ནས་ལྷ་སྲིན་སྡེ་བརྒྱད་ཀྱི་སྐུ་གཏད་ལ༔ ཧཱུྃ༔ སྣང་སྲིད་ཡོངས་ཀྱི་དབང་པོ་ལ༔ སྡེ་བརྒྱད་འཁོར་བཅས་དབང་བསྐུར་རོ༔ ཀུན་གྱི་སྲོག་ལ་དབང་ཐོབ་ནས༔ བསྟན་དགྲའི་སྡེ་དཔུང་འཇོམས་པར་ཤོག༔ ཨཿཡཿམཿདུཿརུཿཙཿཤཿནཿསརྦ་ཨ་བྷི་ཥིཉྩ་ཧཱུྃ༔ དེ་ནས་ཐུན་རྫས་སྣ་ཚོགས་གཏད་ལ༔ ཧཱུྃ༔ མི་སྲུན་གསོད་བྱེད་ཆེན་པོ་ལ༔ དྲག་པོའི་ཐུན་རྫས་འདི་གཏད་པས༔ འགུགས་བསྒྲལ་ལས་ལ་བརྩོན་ཙམ་གྱིས༔ དགྲ་བོ་སྒྲོལ་བའི་དབང་ཐོབ་ཤོག༔ སརྦ་ཨ་མུ་ཀ་ཀཱ་ལ་རཱུ་པ་མཱ་ར་ཡ་རྦད་སོད༔ དེ་ནས་ཟོར་ཀོང་གཏད་ལ༔ ཧཱུྃ༔ ཕུང་བྱེད་དྲག་ཤུལ་བདག་པོ་ལ༔ དྲག་པོའི་ཟོར་ཆེན་འདི་གཏད་དོ༔ དགྲ་བགེགས་ལོག་འདྲེན་གང་ཡང་རུང་༔ ཟོར་འཕང་ཙམ་གྱིས་བརླག་གྱུར་ཅིག༔ མཱ་ར་ཡ་ཕཊ༔ མེ་ཧོམ་གཏད་ལ༔ ཧཱུྃ༔ འཇིགས་བྱེད་མེ་འབར་ཆེན་པོ་ལ༔ དྲག་པོའི་ཞལ་ཧོམ་འདི་གཏད་པས༔ དགྲ་བགེགས་ལོག་འདྲེན་གང་ཡང་རུང་༔ ལྷ་ཡང་རུང་སྟེ་བསྲེག་ནུས་ཤོག༔ ཨ་མུ་ཀ་ཤ་ཏྲུཾ་མཱ་ར་ཡ་ཛྭ་ལ་རཾ༔ དེ་ནས་རི་རབ་གཏད་ལ༔ ཧཱུྃ༔ འཇིགས་བྱེད་སྟོབས་ལྡན་ཆེན་པོ་ལ༔ རི་རབ་འབར་བ་འདི་གཏད་པས༔ དགྲ་བགེགས་ལོག་འདྲེན་གནོད་བྱེད་ཀུན༔ འགུགས་བསྒྲལ་མནན་གཏད་དབང་ཐོབ་ཤོག༔ ཤ་ཏྲུཾ་ཨ་མུ་ཀ་མཱ་ར་ཡ་ཕཊ༔ དེ་ནས་གཏོར་མ་གཏད་ལ་གནོད་སྦྱིན་ཡེ་ཤེས་པ་འཁོར་དང་བཅས་པ་ཡོངས་སུ་རྫོགས་པར་བསམ་ཞིང་༔ ཧཱུྃ༔ རིག་འཛིན་སྔགས་འཆང་དམ་པ་ལ༔ དཀྱིལ་འཁོར་ཡོངས་རྫོགས་གཏོར་མའི་དབང་༔ བསྐུར་རོ་བསྒྲུབ་ལ་དབང་ཐོབ་ནས༔ སྐད་ཅིག་མི་འབྲལ་གྲོགས་བྱེད་ཅིང་༔ ཕྲིན་ལས་རབ་འབྱམས་ཡོངས་འགྲུབ་ཤོག༔ མཎྜ་ལ་བ་ལིང་ཏ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་སློབ་བུའི་ལག་ཏུ་གཏད༔ དམ་ཆུ་ལྕེ་ལ་བཞག་ཅིང་གཏོར་མ་ལ་བྲན༔ ཧོཿའདི་ནི་རྒྱལ་བ་སྲས་བཅས་ཀྱིས༔ ཞལ་གྱིས་ཕྱོགས་ལ་སྤྱན་གྱིས་གཟིགས༔ འདུན་པ་ཆེན་པོ་བླ་ན་མེད༔ སྔགས་འཆང་དམ་པ་ཁྱོད་ཉིད་དང་༔ གནོད་སྦྱིན་ཤན་པ་དམར་ནག་གཉིས༔ སྐད་ཅིག་འབྲལ་བར་མ་བྱེད་ཅིག༔ རྣལ་འབྱོར་ཁྱོད་ཀྱིས་གསོལ་མཆོད་མཛོད༔ བཀའ་སྲུང་གཉན་པོས་ཕྲིན་ལས་སྒྲུབས༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ མནའ་ཐོ་གྱིས་ཤིག་ལྷ་མི་གཉིས༔ ས་མ་ཡ་ན་ར་ཀན༔ ཞེས་བསྐྱལ་བཅུག་ལ༔ སྙིང་གར་ཡི་དམ་གྱི་ལྷ་བསྐྱེད་དུ་གཞུག་ལ༔ མི་འགྱུར་བའི་རྒྱས་གདབ་བོ༔ དེ་ནས་སྔགས་འཁོར་གཏད་ལ༔ ཧཱུྃ༔ རིག་འཛིན་སྔགས་ཀྱི་སྐྱེས་བུ་ལ༔ རྩ་བའི་སྔགས་ཀྱི་དབང་བསྐུར་རོ༔ བཟླས་པ་ཙམ་གྱིས་འགྲུབ་གྱུར་ནས༔ ཕྲིན་ལས་རབ་འབྱམས་ཡོངས་འགྲུབ་ཤོག༔ གནོད་སྦྱིན་ཤན་པ་དམར་ནག་འཁོར་དང་བཅས་པའི་གསུང་སྔགས་རྣམས་ལ་དབང་ཐོབ་པར་གྱུར་ཅིག༔ རྩ་སྔགས༔ ཝཱཀ་ཨ་བྷི་ཥིཉྩ་ཨཱཿདེ་ནས་ཕ་འོང་ལོང་བུ་ལ་སྲོག་སྙིང་བྲིས་ཏེ་དབུས་སུ་གཞུག་པའི་སྲོག་འཁོར་གཏད་ལ༔ ཧཱུྃ༔ གནོད་སྦྱིན་ཤན་པ་འཁོར་བཅས་ཀྱི༔ ཐུགས་གསང་འདུས་པ་སྲོག་གི་རྟེན༔ སྐལ་ལྡན་ཁྱོད་ལ་གཏད་པ་ཡིས༔ ཐུགས་ལ་དབང་བསྒྱུར་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་མདོས་གཟུགས་གཏད་ལ༔ ཧཱུྃ༔ གནོད་སྦྱིན་ཤན་པ་འཁོར་བཅས་ཀྱི༔ རྟེན་དང་བརྟེན་པའི་དཀྱིལ་འཁོར་འདི༔ སྐལ་ལྡན་ཁྱོད་ལ་གཏད་པ་ཡིས༔ དཀྱིལ་འཁོར་དང་ནི་ལས་རྣམས་ཀུན༔ དྲན་པ་ཙམ་གྱིས་འགྲུབ་པ་ཡི༔ དབང་མཆོག་ཡོངས་སུ་རྫོགས་ཐོབ་ཤོག༔ རྩ་སྔགས༔ སརྦ་ཨ་བྷི་ཥིཉྩ་ཧཱུྃ༔ དེ་ནས་སྨོན་ལམ་བཏབ་ཅིང་བཀྲ་ཤིས་བརྗོད༔ དབང་འདི་ཐོབ་པའི་རྣལ་འབྱོར་གྱིས༔ བསྒྲུབ་ཅིང་གསོལ་མཆོད་ལ་བརྩོན་ན༔ ནོར་དང་ལོངས་སྤྱོད་ཀུན་འཕེལ་ཞིང་༔ སྣང་སྲིད་ཐམས་ཅད་དབང་དུ་འདུ༔ དགྲ་བགེགས་ལོག་འདྲེན་ཚར་གཅོད་ཅིང་༔ མཐུ་ཡི་གྲགས་པས་ས་སྟེང་ཁྱབ༔ བཀྲ་ཤིས་དགེ་ལེགས་དཔལ་རྒྱས་གྱུར༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་སྲིན་མོ་ལྗོངས་ཀྱི་ཤྭ་བྲག་རྡོ་རྗེ་ནས་གདན་དྲངས་ཏེ་མི་ལོ་ཉི་ཤུའི་བར་དུ་བཀའ་རྒྱ་བྱས་ཏེ་མཐར་རྟེན་འབྲེལ་དུས་ལ་བབ་པ་ས་ཕོ་སྟག་གི་ལོར་སྨར་མདོ་བཀྲ་ཤིས་འཁྱིལ་ཁུག་ཏུ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།