TTDL-ZABTER-09-TA-016

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=09 |volumeLetter=TA |textnuminvol=016 |pdflink=File:TTDL-ZABTER-09-TA-016.pdf |InitCategories=Dudjom Tersar Project; TTDL-ZABTER-Volume-09-TA }}

Tibetan Text

[edit]

༠༠༠༠བརྡ་ཡིག༩༡ཟབ་གསང་མཁའ་འགྲོའི་སྙིང་ཐིག་ལས༔ དམ་ཅན་རྡོ་རྗེ་ལེགས་པའི་བསྐང་གསོལ་འདོད་ཡོན་སྤྲིན་དཔུང་བཞུགས་སོ༔ ༠༠༠༠བརྡ་ཡིག༩༢ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༩༢རྡོ་རྗེ་ལེགས་པ་སྒྲུབ་པ་ཡི༔ རྣལ་འབྱོར་གང་དག་སུ་ཡང་རུང་༔ བསྐང་གསོལ་འདིར་བརྩོན་དམ་བསྲེ་བྱ༔ ཉམས་ཆག་མ་ལུས་བསྐང་བཤགས་བྱ༔ དེ་ལ་མཁར་ཐབས་རིམ་གསུམ་པའི༔ རྩེ་ལ་ར་ཡི་རྒྱལ་མཚན་བཙུགས༔ རིམ་གསུམ་གཏོར་མ་བརྒྱད་བརྒྱད་བསྐོར༔ གཞན་ཡང་མཆོད་རྫས་ཅི་འབྱོར་བཤམས༔ སྭ་བྷཱ་ཝ་ཡིས་སྦྱངས་ནས་སུ༔ ནམ་མཁའ་མཛོད་སྔགས་བདུན་གྱིས་སྤེལ༔ སླར་ཡང་ར་གསུར་བཏང་ནས་སུ༔ ཧཱུྃ་ཛཿསྔོན་གྱི་བསྐལ་པ་དང་པོ་ལ༔ རི་བོ་མ་ལ་ཡ་ཡི་རྩེར༔ གསང་བདག་ཕྱག་ན་རྡོ་རྗེ་ཡིས༔ དམ་བཏགས་དབང་བསྐུར་བཀའ་བསྒོས་མཛད༔ བར་དུ་བསྐལ་པའི་དུས་ཚིགས་ལ༔ བཅོམ་ལྡན་ཤཱཀྱ་ཐུབ་པ་ཡིས༔ དམ་བཏགས་བཀའ་བསྒོས་བྱིན་རླབས་མཛད༔ རིག་འཛིན་དགའ་རབ་རྡོ་རྗེ་ཡིས༔ གསང་སྔགས་བསྟན་པའི་སྲུང་མར་བསྐོས༔ རིག་འཛིན་ཤྲཱི་སིང་ཧ་ཡིས༔ རྫོགས་ཆེན་བཀའ་ཡི་སྲུང་མར་བསྐོས༔ ཕུང་བྱེད་ཤཱནྟིཾ་གརྦྷ་ཡིས༔ མངོན་སྤྱོད་ལས་ཀྱི་ཕོ་ཉར་བསྐོས༔ དེ་འོག་བསྐལ་པའི་ཐ་མ་ལ༔ རིག་འཛིན་པདྨ་འབྱུང་གནས་ཀྱིས༔ དམ་བཏགས་དབང་བསྐུར་བཀའ་བསྒོས་མཛད༔ དེ་འོག་བསྐལ་བའི་སྙིགས་མ་ལ༔ རིག་འཛིན་གྲུབ་ཐོབ་རྣལ་འབྱོར་ཚོགས༔ ཡང་གསང་དཀྱིལ་འཁོར་ཆེན་པོར་བཞུགས༔ རང་རྩལ་སྲུང་མ་དམ་ལ་བཏགས༔ བསྟན་དགྲ་བསྒྲལ་བའི་ལས་གཉེར་གཏད༔ དམ་ཚིག་གཉན་པོ་དེ་དག་ནི༔ གཏའ་རུ་འཇོག་ཅིང་དཔང་དུ་བཙུགས༔ གཙུག་ཏུ་ཁུར་ཏེ་ལྷ་ཁྱོད་བསྒྲུབ༔ འབོད་དོ་གཤེགས་སོ་དམ་ཚིག་ཅན༔ རྡོ་རྗེ་ལེགས་པ་གཤེགས་སུ་གསོལ༔ མགར་བ་ནག་པོ༴མོན་པ་ཕོ་མོ༴སྡེ་བརྒྱད་དམག་དཔོན༴དྲེགས་པའི་གཙོ་མཆོག༴ཡུལ་ལྷའི་རྒྱལ་པོ༴སྲིད་པའི་ལྷ་ཆེན༴བཙན་བདུད་ཀླུ་སྡེ༴ཐེའུ་རང་དམག་ཚོགས༴མ་ལུས་འཁོར་བཅས༴དམ་ཚིག་དབང་གིས་གཤེགས་སུ་གསོལ༔ བསྐང་གསོལ་གནས་འདིར་བཞུགས་སུ་གསོལ༔ བཛྲ་ས་མ་ཡ་ཛ་ཛཿཏིཥྛ་ལྷན༔ ཧོཿརྡོ་རྗེ་ལེགས་པ་འཁོར་བཅས་དགོངས༔ དོ་ནུབ་ཆད་དོན་ཁྲིམས་ལ་བྱོན༔ དོ་ནུབ་མནའ་ཐོ་དམ་ལ་དགོངས༔ དོ་ནུབ་ལས་ཀྱི་གཉེར་ཆེན་ལོངས༔ དོ་ནུབ་མནའ་དང་ཆད་ལ་དགོངས༔ དོ་ནུབ་དམ་ཚིག་གཉན་པོ་ལོངས༔ ཀྱཻ༔ བཀའ་སྲུང་རྡོ་རྗེ་ལེགས་པ་ཁྱོད༔ རྗེ་བོར་བསྟེན་ནོ་དབང་མ་ཆེ༔ གྲོགས་ལྟར་བསྟེན་ནོ་གཞུང་མ་ངན༔ མཛའ་ལྟར་བསྟེན་ནོ་ཕྲག་མ་དོག༔ བྲན་ལྟར་བསྟེན་ནོ་རྒྱུ་མ་ངན༔ འབངས་ལྟར་བསྟེན་ནོ་ལས་མ་གཡེལ༔ ལུས་དང་གྲིབ་མ་འགྲོགས་པ་ལྟར༔ ཁྱོད་དང་བདག་གཉིས་མི་འབྲལ་ལོ༔ ཁ་དང་ལག་པ་འགྲོགས་པ་བཞིན༔ ཁྱོད་དང་བདག་གཉིས་མི་འབྲལ་ལོ༔ ལྗོན་ཤིང་ཡལ་ག་འགྲོགས་པ་བཞིན༔ ཁྱོད་དང་བདག་གཉིས་མི་འབྲལ་ལོ༔ མཁར་དང་བ་གམ༴ཁྱོད་དང་བདག་གཉིས་མི་འབྲལ་ལོ༔ ཉ་མོ་ཆུ་དང༴ཁྱོད་དང་བདག་གཉིས་མི་འབྲལ་ལོ༔ དེང་བཟུང་ཇི་སྲིད་འཚོ་ཡི་བར༔ དམ་ཅན་ཁྱོད་དང་རྣལ་འབྱོར་བདག༔ སྐད་ཅིག་འབྲལ་བར་མི་བྱའོ༔ དཀོན་མཆོག་གསུམ་གྱི་སྤྱན་སྔ་རུ༔ དམ་བཅའ་ཡིན་ནོ་དམ་མ་ཉམས༔ ཆད་དོན་ཡིན་ནོ་འདའ་མ་བྱེད༔ ཀྱཻ༔ གསང་བདག་རྡོ་རྗེ་འཆང་དབང་དང་༔ ཤཱཀ་ཐུབ་པད་འབྱུང་ལ་སོགས་པའི༔ བརྒྱུད་གསུམ་བླ་མ་རིག་འཛིན་གྱི༔ བཀའ་དམ་དཔང་དུ་བཞག་ནས་སུ༔ རྣལ་འབྱོར་ང་ཡིས་མནའ་ཐོ་བྱ༔ གདོད་ནས་འཁོར་འདས་གཉིས་མེད་ཕྱིར༔ ཁྱོད་ཀྱི་མནའ་བོར་ངས་སེམས་པས༔ གཉིས་སུ་མེད་པར་མཉམ་པའི་མནའ༔ མ་ཟ་བཀའ་སྲུང་དམ་ཚིག་ཅན༔ ཉི་མ་དེ་རིང་ནས་བཟུང་སྟེ༔ ཇི་སྲིད་འཚོ་ཡི་བར་ཚུན་ཆད༔ ཁྱོད་དང་བདག་གཉིས་མི་འབྲལ་འགྲོགས༔ ང་ཡིས་སྲུང་མའི་མཆོག་ཏུ་བསྒྲུབ༔ ཁྱོད་ཀྱང་བྱམས་བརྩེས་འབྲལ་མེད་སྐྱོངས༔ ང་ཡིས་རྒྱབ་བསྟེན་དཔུང་གཉེན་བྱེད༔ ཁྱོད་ཀྱང་མ་གཡེལ་མ་འགྱངས་བར༔ ཕྲིན་ལས་གཉན་པོ་མྱུར་དུ་སྒྲུབས༔ བསྟན་ལ་སྡང་བའི་དགྲ་དར་ཚེ༔ སྒྲོལ་གིང་ཆེན་པོ་ཁྱོད་རྦད་བསྐུལ༔ དེ་ཚེ་སྐད་ཅིག་ཕྲིན་ལས་སྒྲུབས༔ དེ་ལྟར་ང་དང་ཁྱོད་ཀྱི་དམ༔ ད་ནི་མི་འདའ་དམ་བཅའོ༔ ད་ནི་མི་འགལ་འགལ་རེ་ཀན༔ མནའ་ཐོ་ཡིན་ནོ་མནའ་མ་ཟ༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ ངས་ནི་དུས་གསུམ་རྒྱལ་ཀུན་གྱི༔ བཀའ་དམ་དཔང་དུ་བཙུགས་ནས་སུ༔ བཀའ་སྲུང་ཁྱོད་ལ་མནའ་དམ་བྱས༔ གལ་ཏེ་འདི་ལས་འགལ་གྱུར་ན༔ ཁྱོད་ཀྱི་མགོ་འགས་བརླག་འགྱུར་ཏེ༔ རྡོ་རྗེ་དམྱལ་བར་ཤི་ཀ་རེ༔ དེ་བས་མནའ་དམ་དེར་གནས་མཛོད༔ མ་གཡེལ་མ་འདའ་ས་མ་ཡ༔ ཀྱཻ༔ དམ་ཅན་རྡོ་རྗེ་ལེགས་པ་ཁྱོད༔ མཆེད་འཁོར་སུམ་བརྒྱ་དྲུག་ཅུར་བཅས༔ ང་ཡི་སྲུང་མར་མངའ་གསོལ་ལོ༔ ང་ཡི་གྲོགས་པོར་མངའ་གསོལ་ལོ༔ ང་ཡི་དཔུང་དུ༴ང་ཡི་བྲན་དུ༴ང་ཡི་འབངས་སུ༴དཀོར་གྱི་སྲུང་མར༴ཕྱུགས་ཀྱི་གཡང་དུ༴ནོར་གྱི་ལྷ་རུ༴ཟས་ཀྱི་ཀླུ་རུ༴དགྲ་ཡི་གཤེད་དུ༴བགེགས་ཀྱི་གཉེན་པོར་མངའ་གསོལ་ལོ༔ མངའ་གསོལ་བཞིན་དུ་ཕྲིན་ལས་སྒྲུབས༔ མ་གཡེལ་མ་འགྱངས་ས་མ་ཡ༔ ཀྱཻ༔ དམ་ཅན་རྡོ་རྗེ་ལེགས་པ་ཁྱོད༔ མཆེད་འཁོར་སུམ་བརྒྱ་དྲུག་ཅུར་བཅས༔ དད་པ་དང་ནི་དམ་ཚིག་གིས༔ བསྟེན་ནོ་བསྒྲུབ་བོ་བསྐང་ཞིང་གསོལ༔ འབོད་པའི་དམ་རྫས་ཡིན་པའི་ཕྱིར༔ གཡབ་དར་དམར་པོས་ཐུགས་དམ་བསྐང་༔ བསྟེན་པའི་དམ་རྫས་ཡིན་པའི་ཕྱིར༔ ཕྱར་དར་སྨུག་པོས༴སྒྲུབ་པའི་དམ་རྫས༴མདའ་དར་ལྷབ་ལྷུབ་ཐུགས་དམ་བསྐང་༔ ཀྱཻ༔ རྟག་ཏུ་མི་འབྲལ་འགྲོགས་པའི་ཕྱིར༔ གཏའ་གཏོར་ཆེན་པོས་ཐུགས་དམ་བསྐང་༔ བསྟེན་ནས་རྟེན་དང་དབྱེར་མེད༴བླ་རྡོ་སྲོག་འཁོར༴རྒྱུན་དུ་ཕྲིན་ལས་བཅོལ་བའི༴རྒྱུན་གཏོར་ནར་མས༴ཞི་བའི་ཕྲིན་ལས་མཛད་པའི༴བདུད་རྩི་སྨན་གྱི༴རྒྱས་པའི་ཕྲིན་ལས་མཛད་པའི༴རིན་ཆེན་སྣ་ཚོགས༴དབང་གི་ཕྲིན་ལས་མཛད་པའི༴དར་གོས་གཅན་གཟན་ཚོགས་ཀྱིས༴དྲག་པོའི་ཕྲིན་ལས་མཛད་པའི༴མདའ་དུང་གོ་མཚོན་ཚོགས་ཀྱིས༴དམ་ཉམས་དགྲ་བགེགས་བསྒྲལ་བའི༴ཐུན་མཚོན་ཟོར་གྱིས༴ཤ་ཆེན་ཟས་སུ་རོལ་པའི༴དགྲ་ཤ་དྲོན་མོས༴རཀྟ་སྐོམ་དུ་འཐུང་བའི༴དགྲ་ཁྲག་དྲོན་མོས༴རིགས་ཀྱི་མཐུན་རྫས་ཡིན་པའི༴ར་ཤ་ཁྲག་དང་གསུར་གྱིས༴དཀོར་སྲུང་གཉན་པོ་འཁོར་བའི༴ཀ་ཆ་དཀོར་ཆས༴ཕྱུགས་ཀྱི་གཡང་དུ་འཁོར་བའི༴གཟུགས་འགྲོས་ཚོགས་ཀྱིས༴ཕུག་ལྷ་དགྲ་ལྷར་བསྟེན་པའི༴མཁར་ཐབས་བཤོས་བུས༴ཡུལ་ལྷ་གཉན་པོ་འཁོར་བའི༴རླུང་རྟ་ལ་བཙས༴ནོར་ལྷ་གཡང་ལྷར་འཁོར་བའི་ཕྱིར༔ འདོད་ཡོན་དུ་མས་ཐུགས་དམ་བསྐང་༔ འབྱོར་ཚོགས་ཆུང་དང་རྫས་མ་རྙེད༔ ཉམས་ཆག་འགལ་འཁྲུལ་བསྐང་བཤགས་ཕྱིར༔ ཞལ་ཟས་ཚོགས་ཀྱིས་ཐུགས་དམ་བསྐང་༔ བརྩེ་དགོངས་བྱམས་དང་དགྱེས་ལྡན་ཕྱིར༔ སུ་ར་ཆང་དང་འོ་སྐྱེམས་དང་༔ ཇ་སྐྱེམས་གསེར་སྐྱེམས་ཚོགས་ཀྱིས་བསྐང་༔ གདུགས་དང་རྒྱལ་མཚན་བླ་རེ་འཕན༔ ནམ་མཁའ་མཛེས་པའི་རྒྱན་དུ་འབུལ༔ གསོལ་ལོ་མཆོད་དོ་ཐུགས་དམ་བསྐང་༔ དྲྭ་ཕྱེད་ཕྲེང་བ་དར་ཟབ་ཚོགས༔ འཇའ་དང་འོད་ཀྱི་རིས་སུ་བྲིས༔ བར་སྣང་མཛེས་པའི་རྒྱན་དུ་འབུལ༔ གསོལ་ལོ་མཆོད་དོ་ཐུགས་དམ་བསྐང་༔ གཅན་གཟན་གསོབ་དང་མདོས་དཀྱིལ་འཁོར༔ ས་གཞི་མཛེས་པའི་རྒྱན་དུ་འབུལ༔ གསོལ་ལོ་མཆོད་དོ་ཐུགས་དམ་བསྐང་༔ ཀྱཻ༔ དམ་ཅན་ཡོངས་ཀྱི་གཙོ་ཆེན་པོ༔ རྡོ་རྗེ་ལེགས་པའི་ཐུགས་དམ་བསྐང་༔ ཆོས་སྐྱོང་ཡོངས་ཀྱི་རྒྱལ་པོ་ཆེ༔ བཛྲ་ཐིག་ལེའི༴གཞི་བདག་ཡོངས་ཀྱི་གཙོ་ཆེན་པོ༔ མགར་བ་ནག་པོའི༴སྲིད་པ་ལྷ་ཡི་སྤྱི་རྗེ་མཆོག༔ ཚངས་པ་དཀར་པོའི༴དམར་པོ་བཙན་གྱི་སྤྱི་རྗེ་མཆོག༔ བཙན་རྒོད་འབར་བའི༴འཆི་བདག་གཤིན་རྗེའི་སྤྱི་རྗེ༴ཡ་མ་རཱ་ཛའི༴སྲོག་བདག་རྒྱལ་པོའི་སྤྱི་རྗེ༴པེ་ཧར་དགྲ་ལྷའི༴སྲིད་པ་མ་མོའི་དེད་དཔོན་མཆོག༔ རེ་མ་ཏཱི་ཡི༴མི་སྲུན་གནོད་སྦྱིན་དེད་དཔོན༴ཀཱ་ལ་ཡཀྴའི༴ནག་པོ་བདུད་ཀྱི་དེད་དཔོན༴བསྐོས་རྗེ་བྲང་དཀར༴གཏུམ་པོ་ཀླུ་ཡི་དེད་དཔོན༴ཀླུ་བདུད་ནག་པོའི༴ཁྲ་བོ་གཟའ་ཡི་དེད་དཔོན༴ཁྱབ་འཇུག་ཆེན་པོའི༴སྣང་སྲིད་ལྷ་འདྲེའི་དེད་དཔོན་མཆོག༔ བི་ན་ཡ་ཀའི་ཐུགས་དམ་བསྐང་༔ ཀུན་ཀྱང་ཁྱོད་ཀྱི་རྫུ་འཕྲུལ་ཏེ༔ ཐམས་ཅད་འདུས་པའི་བདག་ཉིད་དཔལ༔ རྡོ་རྗེ་འབར་བའི་ཐུགས་དམ་བསྐང་༔ ནམ་མཁའི་ཁམས་ནས་རྒྱུ་བའི་ཚེ༔ སེང་ལྕམ་དཀར་མོ་ཆིབས་སུ་ཆིབས༔ འཁོར་དུ་རང་འདྲ་ཉི་ཤུ་འགྱེད༔ གནམ་ལྷ་ཁྲི་འབུམ་དམག་གིས་བསྐོར༔ དགྲ་ལ་གནམ་ནད་དལ་ཡམས་གཏོང་༔ གནམ་ལྷ་དཀར་པོའི་ཐུགས་དམ་བསྐང་༔ བར་སྣང་ཁམས་སུ་རྒྱུ་བའི་ཚེ༔ བྱ་ཁྱུང་ནག་པོ་བཅིབས་པ་ལ༔ རང་འདྲ་བརྒྱ་དང་ཉི་ཤུ་འགྱེད༔ སྡེ་བརྒྱད་ཁྲི་འབུམ་དམག་གིས་བསྐོར༔ དགྲ་ལ་དལ་ཡམས་སྣ་ཚོགས་འབེབ༔ བར་ལྷ་ཁྲ་བོའི་ཐུགས༴ས་གཞིའི་ཁམས་སུ་རྒྱུ་བའི་ཚེ༔ ར་རྒོད་དཀར་སྔོ་ཆིབས་ཤིང་རྒྱུ༔ རང་འདྲ་བརྒྱ་དང་ཉི་ཤུ་འགྱེད༔ ཐེའུ་བྲང་མོན་པ་འབུམ་གྱིས་བསྐོར༔ དགྲ་ལ་གློ་བུར་ཧུར་ཐུམ་འབེབས༔ ས་ལྷ་ནག་པོའི་ཐུགས༴རྡོ་རྗེ་ལེགས་པའི་ཐུགས༴ཚོང་དཔོན་ཆེན་པོའི་ཐུགས༴དམག་དཔོན་ཆེན་པོའི་ཐུགས༴ཇག་དཔོན་ཆེན་པོའི་ཐུགས༴དགྲ་ལྷ་ཆེན་པོའི་ཐུགས༴ནོར་ལྷ་ཆེན་པོའི་ཐུགས༴ཆོས་སྐྱོང་ཆེན་པོའི་ཐུགས༴བཀའ་སྲུང་ཆེན་པོའི་ཐུགས༴དམ་ཅན་ཆེན་པོའི་ཐུགས༴དཀོར་སྲུང་ཆེན་པོའི་ཐུགས་དམ་བསྐང་༔ ཐུགས་དམ་བསྐང་ངོ་ཉམས་ཆག་བཤགས༔ མཆོད་པ་ཆུང་ཞིང་སེར་སྣས་སྦག༔ རྫས་མ་འབྱོར་དང་ཡོ་བྱད་ཉུང་༔ ཚོགས་མཆོད་འདི་ཡིས་བསྐང་ཞིང་བཤགས༔ དམ་ཚིག་མ་དག་སྡོམ་པ་ཉམས༔ དམ་ཅན་གཡེལ་བའི་རྒྱུ་ཡིན་པས༔ དོ་ནུབ་ཚོགས་མཆོད་འདི་ཡིས་བཤགས༔ སྔགས་མ་དག་ཅིང་བསྒོམ་བཟླས་ཉམས༔ སྲུང་མ་འཁུ་ལྡོག་རྒྱུ་ཡིན་པས༔ བསྟན་པ་སྤྱི་ཡི་སྙིང་པོས་བཤགས༔ ཨ་ཨཱཿཨི་ཨཱི༔ སོགས་དང་༔ ཀ་ཁ་ག་གྷ་ང་༔ སོགས་བརྗོད༔ བླ་མར་འགལ་ཞིང་ཆོས་ལ་གཤེ༔ ལྷ་སྲུང་རིང་བའི་རྒྱུ་ཡིན་པས༔ ན་རག་དོང་སྤྲུགས་སྙིང་པོས་བཤགས༔ བུ་དང་ཆུང་མ་སྲོག་བཅས་ཀུན༔ བློ་དང་ཡིད་ཀྱིས་དོར་ནས་བཤགས༔ ཨོཾ་བཛྲ་སཏྭ་ས་མ་ཡ༔ སོགས༔ མཆོད་པའི་ཡོ་བྱད་མ་ཚང་དང་༔ འབྱོར་ཆུང་དབང་གིས་མ་ཚང་ཀུན༔ སྙིང་པོ་སྔགས་ཀྱི་ནུས་སྟོབས་ཀྱིས༔ མི་ཟད་ནམ་མཁའ་མཛོད་དུ་གྱུར༔ ན་མཿསརྦ་ཏ་ཐཱ་ག་ཏ་སོགས༔ ཀྱཻ༔ དམ་ཅན་རྡོ་རྗེ་ལེགས་པ་དང་༔ སྤྲུལ་འཁོར་བཀའ་སྡོད་བཅས་པ་དགོངས༔ བདག་ནི་མ་རིག་དབང་གྱུར་པས༔ སྐུ་དང་འགལ་བའི་ཉེས་པ་ཀུན༔ རྡོ་རྗེ་སྐུ་ཡི་དབྱིངས་སུ་བཤགས༔ གསུང་དང་འགལ་བའི་ཉེས་བྱས་ཀུན༔ རྡོ་རྗེ་གསུང་གི་དབྱིངས་སུ་བཤགས༔ ཐུགས་དམ་འགལ་བའི་ཉེས་བྱས་ཀུན༔ རྡོ་རྗེ་ཐུགས་ཀྱི་དབྱིངས་སུ་བཤགས༔ རྩ་བ་དང་ནི་ཡན་ལག་གི༔ ཉེས་བྱས་ཉམས་ཆག་ཐམས་ཅད་ཀུན༔ མི་འཆབ་མི་སྦེད་མཐོལ་ལོ་བཤགས༔ བཟོད་པར་བཞེས་ལ་དགྱེས་དགོངས་འཚལ༔ ཕ་མ་བུ་ཚ་ཇི་བཞིན་དུ༔ བྱམས་དང་བརྩེ་བས་བདག་སྐྱོངས་ལ༔ སྐད་ཅིག་མི་འབྲལ་སྲུང་སྐྱོབ་མཛོད༔ བདག་ལ་སྡང་བའི་དགྲ་དང་ནི༔ གནོད་པར་བྱེད་པའི་བགེགས་བྱུང་ཚེ༔ རྦད་བསྐུལ་དུས་སྒུག་མ་བྱེད་པར༔ དེ་མ་ཐག་ཏུ་མངོན་སྤྱོད་ཀྱི༔ ཕྲིན་ལས་གཉན་པོས་ཚར་ཆོད་ཅིག༔ ནམ་གྱི་ཕར་མ་ཚུར་ཕྱེད་དུས༔ དགྲ་བོའི་བླ་འཁྱམས་ཟུངས་ལ་སྒྲོལ༔ སྒྲུབ་པའི་རྣལ་འབྱོར་བདག་ཉིད་ལ༔ མྱུར་དུ་འགྲུབ་པའི་རྟགས་དང་ནི༔ དགྱེས་པའི་ཞལ་བཟང་བསྟན་དུ་གསོལ༔ འབད་མེད་ཕྲིན་ལས་ཡོངས་གྲུབ་མཛོད༔ དམ་ལ་མ་འདའ་ས་མ་ཡ༔ དེ་ལྟར་བསྐང་གསོལ་ལ་བརྩོན་ན༔ ཉམས་ཆག་བསྐང་ནས་ཕྲིན་ལས་འགྲུབ༔ བཀའ་སྲུང་གཉན་པོ་བྲན་འཁོར་ནས༔ མཐུ་ཡི་གྲགས་པས་ས་སྟེང་ཁྱབ༔ བཀའ་སྲུང་ཁྱབ་འཇུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་ལྔའི་བར་དུ་བཀའ་རྒྱ་བྱས་མཐར་རང་སློབ་དམ་པ་ཨོ་རྒྱན་རྡོ་རྗེས་བསྐུལ་ངོར་ཕབ་པའི་ཡི་གེ་པའང་དེ་ཉིད་དོ།།དགེའོ།།སརྦ་མངྒ་ལཾ།།