TTDL-ZABTER-15-BA-011

Previous Text Back to Volume PageNext Text

Wylie title
Location	bdud 'joms gling pa zab gter Volume 15, Text 11, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་སྒྲུབ་ཐབས་ཐུགས་ཀྱི་མེ་ལོང་བཞུགས༔ ༠༠༠༠བརྡ་ཡིག༥༠ན་མོ་གུ་རུ་པདྨ་ཀ་ར་ཡེ༔ རྨོངས་པའི་མུན་པ་སེལ་བའི་ཕྱིར༔ འཇམ་དཔལ་གསང་བ་འདུས་པ་ཡི༔ ཐུགས་སྒྲུབ་ཟླ་རྒྱས་གྲུབ་བྲལ་ཉིད༔ སྐལ་བཟང་སྐྱེས་བུ་མཆོག་ལ་གདམས༔ སྐྱབས་སུ་འགྲོ་བ་ནི༔ ཨཿབདེ་གཤེགས་སྙིང་པོ་སྐུ་གསུམ་དབྱིངས༔ འདི་འབྲལ་མེད་པར་སྐྱབས་སུ་མཆི༔ དེ་ནས་སེམས་བསྐྱེད་པ་ནི༔ སེམས་དང་སེམས་བྱུང་ཁམས་གསུམ་འགྲོ༔ དག་མཉམ་ངང་ཐོབ་བྱང་ཆུབ་སེམས༔ དེ་ནས་བགེགས་བསྐྲད་པ་ནི༔ ཧཱུྃ༔ མ་རིག་གཟུང་འཛིན་རྣམ་རྟོག་བགེགས༔ བདག་མེད་ཆེན་པོར་དེངས་ཤིག་ཕཊ༔ དེ་ནས་སྲུང་འཁོར་བསྒོམ་པ་ནི༔ ཧཱུྃ༔ སྲིད་གསུམ་ཡེ་ནས་སངས་རྒྱས་ལ༔ བགེགས་དང་བར་ཆད་མིང་ཡང་མེད༔ དེ་ནས་བྱིན་ཆེན་འབེབས་པ་ནི༔ ཨཿསྤྲོས་བྲལ་རྣམ་ཐར་གསུམ་ལྡན་མཁར༔ མཁྱེན་གཟིགས་ཡེ་ཤེས་དབང་བྱིན་ཕོབ༔ དེ་ནས་མཆོད་རྫས་བྱིན་བརླབས་ལ༔ ཧཱུྃ༔ གདོད་ནས་ལྷུན་གྲུབ་བདེ་ཆེན་དབྱིངས༔ མ་སྤེལ་མཆོད་སྤྲིན་ཟད་མི་ཤེས༔ མ་ཧཱ་སུ་ཁ་པཱུ་ཛ་ཧོ༔ དེ་ནས་ལྷ་བསྐྱེད་པ་ནི༔ ཨ༔ སྐྱེ་མེད་རྣམ་དག་མཁའ་དབྱིངས་སུ༔ ཡེ་ཤེས་དྭངས་མ་འོད་ལྔའི་སྣོད༔ དྭངས་མའི་ཡང་བཅུད་དཔའ་བོ་དང་༔ དཔའ་མོའི་རྣམ་རོལ་ངོམས་པ་ཡིས༔ བདེ་ཆེན་འགྱུར་མེད་ཞིང་ཁམས་སུ༔ ཟིལ་གནོན་སེང་ཆེན་སྔོན་པོ་དང་༔ མ་ཆགས་སྐྱོན་བྲལ་པད་ཟླའི་སྟེང་༔ ཧྲཱི༔ ལས་རང་རིག་འཇམ་པའི་དབྱངས༔ དམར་གསལ་མཛེས་སྒེག་མཚན་དཔེས་སྤྲས༔ ཞི་འཛུམ་རྡོ་རྗེ་སྐྱིལ་ཀྲུང་བཞུགས༔ ཕྱག་གཡས་རལ་གྲི་འབར་བ་དང་༔ གཡོན་པས་བརྒྱད་སྟོང་གླེགས་བམ་བསྣམས༔ ཅོད་པན་སྟོད་གཡོགས་སྨད་དཀྲིས་དང་༔ སྐེ་རག་པང་ཁེབ་དར་གྱི་ཆས༔ དབུ་རྒྱན་སྙན་ཆ་ཕྲེང་བ་དང་༔ དོ་ཤལ་དཔུང་རྒྱན་ཕྱག་གདུབ་དང་༔ སོར་གདུབ་ཞབས་གདུབ་རིན་ཆེན་ཆས༔ ཡེ་ཤེས་མེ་དཔུང་ཀློང་དུ་བསྐྱེད༔ དབྱངས་ཅན་ལྷ་མོ་ཡུམ་གྱིས་འཁྱུད༔ སྔོན་མོ་རབ་མཛེས་རལ་གྲི་དང་༔ གཡོན་པས་ཨུཏྤལ་སྔོན་པོ་བསྣམས༔ ཞབས་གཉིས་ཡབ་ཀྱི་སྐེད་ལ་འཁྱུད༔ དར་དང་རིན་ཆེན་རྒྱན་རྫོགས་ཤིང་༔ བདེ་དང་སྟོང་པའི་ཡེ་ཤེས་འབར༔ ཡབ་ཡུམ་གཉིས་སུ་མེད་པ་ཡི༔ ཐུགས་ཀར་པདྨ་ཟླ་གདན་ལ༔ ཧྲཱི༔ དམར་དང་ནི་དྷཱི༔ ཡིག་ལས༔ སྔགས་ཀྱི་ཕྲེང་བས་བསྐོར་བར་བསྒོམ༔ བཟླས་པས་འཁོར་འདས་ཐམས་ཅད་ཀྱི༔ དཔལ་ཡོན་བསྡུས་ནས་ཧྲཱིཿལ་བསྟིམ༔ ཤེས་རབ་ཡེ་ཤེས་འབར་བར་བསྒོམ༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམ༔ དེ་ནས་སྤྱན་འདྲེན་པ་ནི༔ ཧྲཱི༔ ཆོས་དབྱིངས་སྐྱེ་མེེད་གཞལ་ཡས་ནས༔ མཁྱེན་དང་གཟིགས་པའི་ཡེ་ཤེས་དཔལ༔ མངོན་གྱུར་ཆེན་པོར་དབྱིངས་ནས་བཞེངས༔ ཡེ་ནས་ཡེ་ཤེས་རང་ཞལ་སྤྲོད༔ ཛཿཧཱུྃ་བཾ་ཧོ་ས་མ་ཡ༔ དེ་ནས་བཞུགས་སུ་གསོལ་བ་ནི༔ ཧྲཱི༔ དབྱིངས་ནས་ཡེ་ཤེས་མཉམས་བརྡལ་བའི༔ རྣམ་མཁྱེན་ཆེན་པོར་བརྟན་བཞུགས་གསོལ༔ ས་མ་ཡ་སྟྭཾ༔ དེ་ནས་ཕྱག་འཚལ་བ་ནི༔ ཨ༔ འཁོར་འདས་དག་མཉམ་ཡེ་སངས་རྒྱས༔ ཁྱབ་བདག་གདོད་མའི་དབྱིངས་ལ་འདུད༔ ན་མོ་དྷརྨ་དྷརྟུ་ཨ༔ དེ་ནས་མཆོད་པ་འབུལ་བ་ནི༔ ཨོཾ༔ ཨཱ༔ ཧཱུྃ༔ གདོད་ནས་མ་བྱུང་མ་སྐྱེས་པའི༔ ལྷུན་གྲུབ་རོལ་པ་འཕྲུལ་མོ་ཆེ༔ མཆོད་ཡུལ་བྲལ་ཞིང་མཆོད་དུ་མེད༔ རང་བྱུང་མཆོད་པའི་མཆོག་ཆེན་པོ༔ མ་ཧཱ་པཉྩ་པུ་ཛ་ཧོ༔ དེ་ནས་བསྟོད་པ་བྱ་བ་ནི༔ ཨཱཿགཞོམ་གཞིག་བྲལ་བ་ཆོས་ཀྱི་དབྱིངས༔ ཇི་ལྟ་མཁྱེན་ཅིང་ཇི་སྙེད་གཟིགས༔ ཡེ་ཤེས་སྤྱན་གཅིག་དྲི་མ་མེད༔ ཡེ་ཤེས་མངོན་བྱེད་ཁྱོད་ལ་འདུད༔ འཁོར་བ་ཡོངས་སྒྲོལ་ཁྱོད་ལ་འདུད༔ བྱང་ཆུབ་ཆེན་པོ་ཁྱོད་ལ་འདུད༔ སྐུ་དང་ཡེ་ཤེས་ཁྱོད་ལ་འདུད༔ དཔལ་དང་ཡོན་ཏན་ཁྱོད་ལ་འདུད༔ ཐམས་ཅད་ཐམས་ཅད་ཁྱོད་ལ་འདུད༔ དེ་ནས་གསོལ་བ་འདེབས་པ་ནི༔ ན་མོ༔ ཀ་དག་མཐའ་བྲལ་ཆོས་ཀྱི་སྐུ༔ མ་འགགས་བདེ་ཆེན་ལོངས་སྤྱོད་རྫོགས༔ ཀུན་ཁྱབ་ཐུགས་རྗེ་སྤྲུལ་པའི་སྐུ༔ ཡོངས་རྫོགས་དག་དབྱིངས་ཤེས་རབ་ཆེ༔ འཇམ་པའི་དབྱངས་ལ་གསོལ་བ་འདོབས༔ བདག་རྟོག་མ་རིག་མུན་ཁམས་སུ༔ བདག་རྒྱུད་འཁོར་བར་འཆིང་བའི་སྒྲིབ༔ ཤེས་རབ་ཡེ་ཤེས་མེ་བོ་ཆེས༔ བསྲེག་ཅིང་བསལ་བར་མཛད་དུ་གསོལ༔ ཨོཾ་ཧྲཱི་དྷི་མ་མི་དྷི་པཾ་མཉྫུ་ཤྲཱི་མུཾ་ཧྲཱི་པྲཛྙཱ་ཝརྡྷ་ནི་ཧྲཱི་དྷི་སྭཱ་ཧཱ༔ སྒྲུབ་པའི་འཛབ་དམིགས་ལ༔ རང་ཉིད་སྨྲ་བའི་སེང་གེ་ཡི༔ ཐུགས་ཀར་པདྨ་ཟླ་གདན་ལ༔ རལ་གྲི་སོར་བཞི་ཧྲཱི༔ ཡིག་མཚན༔ སྔགས་ཀྱི་ཕྲེང་བས་བསྐོར་བ་དང་༔ ཡུམ་གྱི་ཐུགས་ཀར་པདྨ་དང་༔ ཉི་སྟེང་ཡི་གེ་ཧྲཱིཿཡིག་ལ༔ འོད་ཟེར་གཡོན་དུ་འཁོར་བར་བསྐྱེད༔ འོད་དང་འོད་ཟེར་རབ་འཕྲོས་པས༔ ཉི་ཟླ་ནོར་བུ་འབྱུང་བཞིའི་བཅུད༔ ལྷ་དང་དྲང་སྲོང་རིག་འཛིན་དང་༔ ཡེ་ཤེས་ཡོན་ཏན་ཚེ་བསོད་དཔལ༔ པཎྜི་ཏ་ཡི་ཤེས་རབ་ཀུན༔ བསྡུས་ཏེ་རང་གི་སྙིང་གར་བསྟིམ༔ ཨོཾ་ཧྲཱི་དྷི་སོགས༔ དེ་ནས་ལས་ལ་སྦྱོར་བ་ནི༔ ཡབ་ཡུམ་ཐུགས་ཀའི་སྔགས་ཕྲེང་ལས༔ ཤེས་རབ་ཡེ་ཤེས་མེ་དཔུང་འབར༔ མི་ཤེས་མ་རིག་རྨོངས་པའི་སྒྲིབ༔ བག་ཆགས་དང་བཅས་བསྲེགས་པར་བསྒོམ༔ ཨོཾ་ཧྲཱི་དྷི་སོགས༔ དམིགས་པ་གནད་དང་ལྡན་པས་བཟླ༔ ཉམས་ཆགས་བསྐང་ཞིང་ཚོགས་རྫོགས་ཕྱིར༔ ཚོགས་དང་བསྐང་བའི་རིམ་པ་ལ༔ དེ་ནས་ཚོགས་རྫས་བྱིན་བརླབས་ལ༔ རཾ་ཡཾ་ཁཾཿཚོགས་ཀྱི་དངོས་འཛིན་དྲི་མ་སྦྱངས༔ ཡེ་ཤེས་བདུད་རྩིར་བྱིན་རླབས་པའི༔ འདོད་རྒུར་འཆར་བའི་ཆོ་འཕྲུལ་ཅན༔ མི་ཟད་རྒྱན་གྱི་འཁོར་ལོར་སྤེལ༔ ཨོཾ་ཨཱཿཧཱུྃ༔ དེ་ནས་སྤྱན་འདྲེན་པ་ནི༔ ཧཱུྃ༔ རང་བཞིན་དག་པའི་ཞིང་ཁམས་ནས༔ བརྒྱུད་གསུམ་བླ་མ་རྒྱ་མཚོ་དང་༔ བདེ་ཆེན་པདྨ་བཀོད་ཞིང་ནས༔ འཇམ་དཔལ་སྨྲ་སེང་ཡབ་ཡུམ་དང་༔ ནོར་སྟེར་ལྷ་མོ་དཔོན་གཡོག་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ མཆོད་བཞེས་དམ་སྐོང་དངོས་གྲུབ་སྩོལ༔ བཛྲ་ས་མ་ཡ་ཛ་ཛ༔ དེ་ནས་ཚོགས་ཕུད་འབུལ་བ་ནི༔ ཧཱུྃ༔ རིག་འཛིན་རྩ་བརྒྱུད་བླ་མ་དང་༔ འཇམ་དཔལ་ཡབ་ཡུམ་འཁོར་བཅས་ལ༔ བདེ་སྟོང་ཟག་མེད་བདུད་རྩི་དང་༔ ཞལ་ཟས་ཚོགས་ཀྱི་མཆོད་པ་འབུལ༔ ག་ཎ་ཙཀྲ་པཱུ་ཛ་ཁཱ་ཧི༔ དེ་ནས་ཐུགས་དམ་བསྐང་བ་ནི༔ ཨོཾ་ཨཱ་ཧཱུྃ༔ བསྐང་རྫས་མི་ཟད་འདོད་རྒུའི་གཏེར༔ ཕྱི་ནང་གསང་མཆོད་བླ་ན་མེད༔ དཔག་ཡས་ནམ་མཁའི་ཁམས་གང་གྱུར༔ ཧཱུྃ༔ རྣམ་དག་ཆོས་དབྱིངས་ཞིང་ཁམས་ནས༔ དགོངས་བརྒྱུད་བླ་མའི་ཐུགས་དམ་བསྐང་༔ ལྷུན་གྲུབ་བདེ་ཆེན་གཞལ་ཡས་ནས༔ བརྡ་བརྒྱུ་བླ་མའི༴རང་བཞིན་དག་པའི་གནས་མཆོག་ནས༔ སྙན་བརྒྱུད་བླ་མའི༴ཤེས་རབ་ཡེ་ཤེས་དཀྱིལ་འཁོར་ནས༔ སྨྲ་བའི་སེང་གེའི༴ཐབས་ཤེས་གཉིས་སུ་མེད་པའི་ཕྱིར༔ སྒྲ་དབྱངས་ལྷ་མོའི༴ལོངས་སྤྱོད་ནོར་གྱི་རྒྱུན་སྩོལ་ཕྱིར༔ འདོད་སྟེར་ལྷ་མོའི༴ཉམས་ཆག་ཉེས་ལྟུང་ཅི་མཆིས་པ༔ བཤགས་སོ་དག་པར་མཛད་དུ་གསོལ༔ རྡོ་རྗེ་གསུམ་གྱི་དབང་དངོས་གྲུབ༔ མ་ལུས་བདག་ལ་སྩོལ་བ་དང་༔ ཚེ་འདིར་རྣམ་གྲོལ་ས་རུ་སྐྱོལ༔ དེ་ནས་བཤགས་པ་བྱ་བ་ནི༔ ཧོཿདཔང་གྱུར་རིག་འཛིན་བླ་མ་དང་༔ འཇམ་དཔལ་ཡབ་ཡུམ་སྤྱན་སྔ་རུ༔ བདག་ནི་མ་རིག་དབང་གྱུར་པས༔ ཉེས་བྱས་ཉམས་ཆག་རྟོག་སྒྲིབ་ཀུན༔ ཞལ་ཟས་ཚོགས་ཀྱིས་བསྐང་ཞིང་བཤགས༔ ག་ན་ཙཀྲ་སཏྭ་ས་མ་ཡ༔ སོགས་དང་དེ་ནས་བསྒྲལ་བ་ལ༔ ཧཱུྃ༔ མ་རིག་ཉོན་ཤེས་སྒྲིབ་པའི་གདངས༔ བདག་རྟོག་གཉིས་འཛིན་རཱུ་ཏྲ་ཀུན༔ བདག་མེད་རོལ་པའི་སྟོབས་ཀྱིས་བསད༔ འཁྲུལ་མི་ཤེས་པའི་ས་རུ་བསྒྲལ༔ ཕུང་ཁམས་སྐྱེ་མཆེད་དབང་ཡུལ་བཅས༔ འཇམ་དཔལ་སྒྱུ་འཕྲུལ་རོལ་པའི་ལྷའི༔ ཞལ་དུ་བསྟབ་བོ་ཁ་རཾ་ཁཱ་ཧི༔ ཚོགས་ཀྱི་དངོས་གྲུབ་རོལ་པ་ལ༔ གཙང་རྨེ་གཉིས་འཛིན་བྲལ་བ་ཡི༔ ཟག་མེད་བདེ་ཆེན་བཅུད་ལ་རོལ༔ ཨ་ལ་ལ་སྟེ་བདེ་བ་ཆེ༔ ཛྙཱ་ན་པཉྩ་སིདྡྷི་ཧོ༔ དེ་ནས་ལྷག་མ་བཏང་བ་ནི༔ ཨོཾ་ཨཱ༔ ཧཱུྃ༔ སྔོན་གྱི་བསྐལ་པ་དང་པོ་ལ༔ དཔལ་གྱི་སྤྱན་སྔར་ཁས་བླངས་པའི༔ ལྷག་ལ་དབང་བའི་ལྷག་སྐྱོང་ཚོགས༔ དེ་འཁོར་ཡང་འཁོར་བྲན་འབངས་བཅས༔ འདིར་གཤེགས་ལྷག་མའི་གཏོར་མ་རོལ༔ ཕྲིན་ལས་རབ་འབྱམས་ཡོངས་གྲུབ་མཛོད༔ དེ་ནས་བསྐུལ་བ་ནི༔ ཧཱུྃ༔ བསྐུལ་ལོ་འཇམ་དཔལ་སྒྱུ་འཕྲུལ་ལྷ༔ བཞེངས་ཤིག་གཤིན་རྗེ་གཤེད་དམར་ནག༔ མ་གཡེལ་ཐུགས་དམ་དུས་ལ་བབས༔ སྡང་བའི་དགྲ་དང་གནོད་པའི་བགེགས༔ བྱད་མ་རྦོད་གཏོང་ལྷ་དང་བཅས༔ གནོད་གདུག་དྲག་ཤུལ་སེམས་ལྡན་པ༔ མ་ལུས་ཐལ་བའི་རྡུལ་དུ་རློག༔ དུས་ལ་བབ་བོ་ས་མ་ཡ༔ བདུད་རྩི་སྐྱེམས་གཏོར་མཆོད་འབུལ་བཞེས༔ མངོན་སྤྱོད་ཕྲིན་ལས་གྲུབ་པར་མཛོད༔ དེ་ནས་ཆད་མདོ་བཏང་བ་ལ༔ འགུགས་གཞུག་བྱས་མཐར་ཤ་ཁྲག་གི༔ རི་དང་རྒྱ་མཚོ་དམིགས་པས་བསྒྱུར༔ ཧཱུྃ་བྷྱོ༔ ཆད་དོན་དམ་ཅན་སྲུང་མའི་ཚོགས༔ འདིར་བྱོན་དམར་གྱི་གཏོར་མ་ལོངས༔ རྣལ་འབྱོར་སྒྲུབ་པའི་སྡོང་གྲོགས་མཛོད༔ ཕྱི་ནང་བར་ཆད་དབྱིངས་སུ་བཟློག༔ དགྲ་གེགས་གནོད་བྱེད་ཆོམ་ལ་ཕོབ༔ བཅོལ་བའི་ཕྲིན་ལས་གྲུབ་པར་མཛོད༔ དེ་ནས་བརྟན་མ་སྐྱོང་བ་ལ༔ ཆད་དོན་གཏོར་མ་བཏང་བ་ནི༔ ཧཱུྃ་བྷྱོ༔ འཇིག་རྟེན་བོད་ཁམས་སྐྱོང་མཛད་པའི༔ བསྟན་སྲུང་མ་སྲིང་བརྟན་མའི་ཚོགས༔ བཤལ་ཆུའི་གཏོར་མ་འདི་ལོངས་ལ༔ རབ་འབྱམས་ཕྲིན་ལས་ཡོངས་གྲུབ་མཛོད༔ མ་མ་ཧྲཱིཾ་ཧྲཱིཾ་ཨེ་དཾ་བ་ལིང་ཏ་ཁཱ་ཧི༔ དེ་ནས་རྟ་བྲོ་བརྡུང་བ་ལ༔ ཧཱུྃ༔ བསྒྲུབ་ལ་བར་དུ་གཅོད་པ་ཡི༔ གནོད་བྱེད་དམ་སྲི་རྒབ་འདྲེ་ཀུན༔ རིམ་དགུ་ས་ཡི་འོག་ཏུ་མནན༔ མ་ཤོར་ཐེག་པ་རིམ་དགུའི་རྒྱ༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སུཾ་ལཾ༔ སྟྭཾ་བྷ་ཡ་ནན༔ དེ་ནས་དངོས་གྲུབ་བླང་བ་ལ༔ ཧཱུྃ༔ འཇམ་དཔལ་སྨྲ་བའི་སེང་གེ་ཡི༔ སྐུ་གསུང་ཐུགས་ཡོན་ཕྲིན་ལས་ཀྱི༔ དབང་དང་དངོས་གྲུབ་ཅི་མཆིས་པ༔ མ་ལུས་བདག་ལ་ཐོབ་པར་སྩོལ༔ སརྦ་སིདྡྷི་ཕ་ལ་ཧཱུྃ༔ དེ་ནས་བཤགས་པ་བྱ་བ་ལ༔ འཇམ་དཔལ་ཡབ་ཡུམ་སྤྱན་སྔ་རུ༔ བདག་གི་ཚེ་རབས་སྡིག་ལྟུང་ཀུན༔ གནོང་འགྱོད་དྲག་པོས་མཐོལ་ཞིང་བཤགས༔ བྱང་ཞིང་དག་པར་མཛད་དུ་གསོལ༔ ཡི་གེ་བརྒྱ་པ་བརྗོད༔ དེ་ནས་བསྔོ་བ་སྨོན་ལམ་ནི༔ ཧཱུྃ༔ བདག་གིས་དུས་གསུམ་བསགས་པའི་དགེ༔ འགྲོ་ཀུན་སངས་རྒྱས་ཐོབ་ཕྱིར་བསྔོ༔ སྡུག་བསྔལ་གྱིས་བཅིང་སེམས་ཅན་རྣམས༔ ཕྱམ་ཅིག་སངས་རྒྱས་ཐོབ་པར་ཤོག༔ དེ་ནས་བཀྲ་ཤིས་བྱ་བ་ལ༔ ཧཱུྃ༔ འདི་བསྒྲུབ་དགེ་བའི་བསོད་ནམས་ཀྱི༔ བདག་ཅག་འཁོར་དང་བཅས་རྣམས་ཀུན༔ འདི་ཕྱིའི་དགེ་ལེགས་ཡོན་ཏན་ཀུན༔ གོང་འཕེལ་བསྟན་རྒྱས་བཀྲ་ཤིས་ཤོག༔ རྟག་ཆད་ཀྱི་མཐའ་བསལ་བ་ནི༔ ཧཱུྃ༔ དབྱིངས་ལས་སྤྲུལ་པ་སྒྱུ་མའི་ལྷ༔ ཡེ་ཤེས་རོལ་པའི་དབྱིངས་སུ་ཨ༔ མཁའ་ལ་འཇའ་ཚོན་ཤར་བ་བཞིན༔ རྗེས་ཐོབ་སྒྱུ་མའི་ལྷ་སྐུར་བཞེངས༔ སྔགས་ཅུང་ཟད་བཟླས༔ བསྐྱེད་དང་བསྒོམ་བཟླས་གནད་ལྡན་པས༔ འདི་ལྟར་བསྒྲུབ་ལ་དབང་ཐོབ་པས༔ རྣལ་འབྱོར་དམ་ལྡན་གང་སུ་དག༔ ཤེས་རབ་ཡེ་ཤེས་རྩལ་འབར་ཏེ༔ རྣམ་གྲོལ་འབྲས་བུ་ཐོབ་པར་འགྱུར༔ བཀའ་སྲུང་ཁྱབ་འཇུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ གུ་ཧྱ༔ ཞེས་པ་འདི་ཉིད་རིགས་སྲས་དྲི་མེད་འོད་ཟེར་གྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ༔ དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།