TTDL-ZABTER-01-KA-054

Previous Text Back to Volume PageNext Text

Wylie title
Location	bdud 'joms gling pa zab gter Volume 1, Text 53, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ ཆེ་མཆོག་བདུད་འཇོམས་

རྡོ་རྗེ་ཡི༔ བསྐུལ་བ་སེངྒེའི་ང་རོ་བཞུགས༔

༠༠༠༠༠བརྡ་ཡིག༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག༥༡༤༔ ཆེ་མཆོག་བདུད་འཇོམས་རྡོ་རྗེ་ཡི༔ བསྐུལ་བ་སེང་གེའི་ང་རོ་འདི༔ ལག་ཏུ་ལེན་པའི་རིམ་པ་ནི༔ དང་པོ་དུས་ཉིད་བསྟན་པ་ནི༔ དུས་ནི་གདོན་བགེགས་ལྡང་བའམ༔ ཡང་ན་དགྲ་རྣམས་སྡང་བ་དང་༔ ཡང་ན་ནད་ཡམས་འབྱུང་བའམ༔ ཡང་ན་བྱད་མའི་དམོད་སྦྱོར་རམ༔ ཡང་ན་བསྟན་པ་སྤྱི་དོན་ལ༔ མི་མཐུན་རྒོལ་ངན་བྱུང་བའི་དུས༔ དྲག་པོའི་དམོད་བསྐུལ་ལས་བརྩོན་བྱ༔ གཉིས་པ་དམོད་ལས་ཆོ་ག་ནི༔ དམར་གཏོར་ཤ་ཁྲག་སྐྱེམས་ཀྱིས་བྲན༔ དགུག་གཞུག་བསྒྲལ་བའི་དམིགས་གནད་གཟིར༔ ཤ་ཁྲག་རུས་པའི་ཕུང་པོར་བསྐྱེད༔ ཧ་ཧོ་ཧྲཱིཿཡིས་བྱིན་བརླབ་བྱ༔ གསུམ་པ་དམིགས་པའི་རིམ་པ་ནི༔ རང་ཉིད་ཡི་དམ་དཀྱིལ་འཁོར་དུ༔ གསལ་བའི་གནས་གསུམ་འབྲུ་གསུམ་ལས༔ འོད་འཕྲོས་རྒྱལ་བའི་དཀྱིལ་འཁོར་རྣམས༔ ཆར་སྤྲིན་རླུང་གིས་བསྐྱོད་པ་ལྟར༔ སྤྱན་དྲངས་ནམ་མཁའི་ཁམས་ཀུན་ཏུ༔ བཀའ་བརྒྱུད་བླ་མ་སྐར་ལྟར་འཁྲིགས༔ བར་སྣང་ཡི་དམ་མཁའ་འགྲོའི་ཚོགས༔ སྤྲིན་ཕུང་ལྟ་བུར་གཏིབས་པར་བསམ༔ ས་གཞིར་སྲུང་མ་དམ་ཅན་རྣམས༔ ན་བུན་རླུང་ལྟར་འཚུབས་གྱུར་ཏེ༔ ཤ་ཁྲག་གཏོར་མ་ལ་རོལ་ནས༔ མཚོན་ཐུན་སྣ་ཚོགས་ཐོགས་ནས་སུ༔ མངོན་སྤྱོད་ལས་ལ་ཆས་པར་བསམ༔ སྣང་སྲིད་མ་ལུས་ཐམས་ཅད་ཀུན༔ རྩ་གསུམ་སྲུང་མ་དམ་ཅན་གྱིས༔ བར་མེད་ཉི་རྡུལ་བཞིན་འགེངས་ནས༔ དགྲ་བགེགས་འགུག་ཅིང་བསྒྲལ་བར་བསྐྱེད༔ བཞི་པ་ལྷ་ཚོགས་བསྐུལ་བ་ནི༔ ཧཱུྃ་ཧཱུྃ་ཧཱུྃ་ཛཿབདེ་ཆེན་དབང་དྲག་རོལ་པའི་དཀྱིལ་འཁོར་དུ༔ ཆོས་འབྱུང་དམར་ནག་གྲུ་གསུམ་གདེངས་པའི་དབུས༔ པདྨ་ཉི་མ་སྡེ་བརྒྱད་བརྩེགས་པའི་ཁྲིར༔ ཟ་བྱེད་རྔམ་པ་སྟག་མོ་གྲུས་མའི་སྟེང་༔ བླ་མ་དྲག་པོ་དམར་ནག་མེ་ཕྲེང་ཅན༔ ཡང་ཁྲོས་གཏུམ་དྲག་དམར་ནག་འཆོལ་བར་ཁྲོས༔ ཆེ་བའི་ཆེ་མཆོག་རྡོ་རྗེ་གྲོ་བོ་ལོད༔ དམར་ནག་འབར་བ་ཞལ་གཅིག་ཕྱག་གཉིས་པ༔ ཟ་བེར་ཐང་ཤམ་ཆོས་གོས་མགོ་ཕྲེང་གསོལ༔ ཁམས་གསུམ་འཁོར་བ་བདེ་ཆེན་ཀློང་དུ་འཇིག༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ སྐུ་མདོག་དམར་ནག་ཉི་མ་འབུམ་འོད་འབར༔ མ་རིག་མུན་པའི་སྒྲིབ་ཚོགས་དྲུང་ནས་འབྱིན༔ སྤྱན་གསུམ་དམར་ཟླུམ་སྡང་མིག་ནམ་མཁར་གཟིགས༔ དུག་གསུམ་འཁྲུལ་འཁོར་སྐུ་གསུམ་ངང་དུ་བཤིག༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ ཁྲོ་གཉེར་རབ་འཁྲུགས་མཆེ་བ་མན་དུ་གཙིགས༔ བདུད་སྲིན་སྡེ་བརྒྱད་མ་ལུས་ཚར་གཅོད་མཛད༔ སྨ་ར་སྨིན་མ་དམར་སེར་མེ་ཞགས་འཕྲོ༔ བར་ཆད་རྒོལ་ངན་ཚོགས་རྣམས་མ་ལུས་གཞོམ༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ དབུ་སྐྲ་དམར་སེར་སྣུམ་པོ་ཝང་མིག་འཁྱིལ༔ འཁོར་འདས་མ་ལུས་མཉམ་ཉིད་ཐུགས་སུ་སྡུད༔ སྙན་གཉིས་དུང་གི་རྒྱན་ཆ་ཝང་མིག་མཛེས༔ ཐབས་ཤེས་ཟུང་འཇུག་ཆེན་པོའི་རོལ་གར་ངོམས༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ ཕྱག་གཡས་གནམ་ལྕགས་རྡོ་རྗེ་ནམ་མཁར་གསོར༔ དགྲ་བགེགས་གདུག་པའི་མགོ་བོ་ཚལ་པར་འགེམ༔ གཡོན་པས་གནམ་ལྕགས་ཕུར་པ་འོག་གཞིར་གཟིར༔ གནོད་བྱེད་དགྲ་བགེགས་གཟུགས་ཕུང་དུམ་བུར་གཏོར༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ ཞབས་གཉིས་འདོར་སྟབས་བགྲད་ཅིང་རབ་ཏུ་འགྱིངས༔ སྣང་སྲིད་མ་ལུས་དབང་སྡུད་ཟིལ་གནོན་མཛད༔ ཡེ་ཤེས་མེ་དཔུང་རབ་འབར་ཀློང་དུ་བཞུགས༔ བདུད་སྡེ་ནད་རིམས་ཐམས་ཅད་བསྲེགས་པར་བྱེད༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ སྐུ་ལ་རྒྱལ་བའི་དཀྱིལ་འཁོར་མ་ལུས་རྫོགས༔ དུག་ལྔའི་དགྲ་བགེགས་མ་ལུས་རྩད་ནས་འཇོམས༔ སྤྲུལ་པ་ཟ་བྱེད་ཁྱུང་སྡིག་དྲི་ངན་འཕྲོ༔ རྒྱལ་བསེན་ཀླུ་གཉན་ས་བདག་འབྱུང་པོ་འཇོམས༔ ཐུགས་དམ་བསྐུལ་ལོ་མངོན་སྤྱོད་ལས་ལ་བཞེངས༔ ཤར་ཕྱོགས་མེ་ལོང་ཡེ་ཤེས་དཀྱིལ་འཁོར་ནས༔ རྡོ་རྗེ་མཁའ་འགྲོའི་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ལྷོ་ཕྱོགས་མཉམ་ཉིད་ཡེ་ཤེས་དཀྱིལ་འཁོར་ནས༔ རིན་ཆེན་མཁའ་འགྲོའི་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ནུབ་ཕྱོགས་སོར་རྟོག་ཡེ་ཤེས་དཀྱིལ་འཁོར་ནས༔ པདྨ་མཁའ་འགྲོའི་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ བྱང་ཕྱོགས་བྱ་གྲུབ་ཡེ་ཤེས་དཀྱིལ་འཁོར་ནས༔ ལས་ཀྱི་མཁའ་འགྲོའི་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ཧཱུྃ་ཛཿཤར་ལྷོ་ཞི་བ་ལྷུན་གྲུབ་ཕོ་བྲང་ནས༔ རྡོ་རྗེ་གིང་ཆེན་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ལྷོ་ནུབ་རྒྱས་པ་ལྷུན་གྲུབ་དཀྱིལ་འཁོར་ནས༔ རཏྣ་གིང་ཆེན་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ནུབ་བྱང་དབང་སྡུད་ལྷུན་གྲུབ་དཀྱིལ་འཁོར་ནས༔ པདྨ་གིང་ཆེན་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ བྱང་ཤར་མངོན་སྤྱོད་ལྷུན་གྲུབ་གཞལ་ཡས་ནས༔ ཀརྨ་གིང་ཆེན་ཐུགས་དམ་གནད་ནས་བསྐུལ༔ མི་མངོན་ཆོས་ཀྱི་དབྱིངས་ལས་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ཧཱུྃ་ཛཿསྟེང་ཕྱོགས་འདོད་ཁམས་ལྷ་ཡི་ཕོ་བྲང་ནས༔ དབང་ཕྱུག་ཆེན་པོའི་ཐུགས་དམ་གནད་ནས་བསྐུལ༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ སངས་རྒྱས་བསྟན་པ་སྲུང་བའི་ཕོ་བྲང་ནས༔ དཔལ་མགོན་ལེགས་ལྡན་ནག་པོའི་ཐུགས་དམ་བསྐུལ༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ འཁོར་འདས་བྱང་ཆུབ་ཆེན་པོའི་མཁའ་ཀློང་ནས༔ སྔགས་སྲུང་ཨེ་ཀ་ཙ་ཏིའི་ཐུགས་དམ་བསྐུལ༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ སྲིད་པ་ཀློང་དུ་འདུས་པའི་དབྱིངས་ཆེན་མོ༔ མ་མོ་སྲིད་པའི་རྒྱལ་མོའི་ཐུགས་དམ་བསྐུལ༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ བཻ་ཛཿཤར་ཕྱོགས་རིན་ཆེན་དུང་གི་སྐུ་མཁར་ནས༔ ཐུགས་དམ་བསྐུལ་ལོ་རྒྱལ་ཆེན་ཡུལ་འཁོར་སྲུང་༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ལྷོ་ཕྱོགས་རིན་ཆེན་གསེར་གྱི་སྐུ་མཁར་ནས༔ ཐུགས་དམ་བསྐུལ་ལོ་རྒྱལ་ཆེན་འཕགས་སྐྱེས་པོ༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ནུབ་ཕྱོགས་རིན་ཆེན་ཟངས་ཀྱི་སྐུ་མཁར་ནས༔ ཐུགས་དམ་བསྐུལ་ལོ་རྒྱལ་ཆེན་སྤྱན་མི་བཟང་༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ བྱང་ཕྱོགས་རིན་ཆེན་གཡུ་ཡི་སྐུ་མཁར་ནས༔ ཐུགས་དམ་བསྐུལ་ལོ་རྒྱལ་ཆེན་རྣམ་ཐོས་སྲས༔ དྲག་པོ་མངོན་སྤྱོད་ལས་ལ་སྐུར་བཞེངས་ཤིག༔ དགྲ་བགེགས་གནོད་བྱེད་འགུགས་སྒྲོལ་ཕྲིན་ལས་མཛོད༔ ཧཱུྃ་ཛཿཆེ་མཆོག་བདུད་འཇོམས་རྡོ་རྗེ་གྲོ་ལོད་ཀྱིས༔ བཀའ་བསྒོས་དམ་བཞག་དབང་བསྐུར་གཉེར་གཏད་པའི༔ བཀའ་སྲུང་ཆོས་སྐྱོང་སྡེ་བརྒྱད་ལྷ་འདྲེའི་ཚོགས༔ དམ་ཚིག་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ དགྲ་བགེགས་བཀུག་བསྒྲལ་མངོན་སྤྱོད་ཕྲིན་ལས་མཛོད༔ ཧཱུྃ་བྷྱོ་ཛཿསྐྱབས་གནས་དམ་པ་བླ་མ་དཀོན་མཆོག་གསུམ༔ འགྲོ་བའི་མགོན་པོ་བླ་མ་རྡོ་རྗེ་འཆང་༔ གདན་གསུམ་དཀྱིལ་འཁོར་ཡི་དམ་མཁའ་འགྲོའི་ཚོགས༔ དམ་ཚིག་དབང་གི་ལས་བྱེད་སྲུང་མར་བཅས༔ མ་ལུས་ལུས་པ་མེད་པ་བདག་ལ་དགོངས༔ དེང་སང་བསྐལ་པ་སྙིགས་མའི་སྙིགས་མ་འདིར༔ སྐྱེ་འགྲོ་སེམས་ཅན་སྡུག་བསྔལ་དྲག་པོས་གདུངས༔ རྒྱལ་བསྟན་ཉི་མ་ནུབ་ལ་ཉེ་རུ་མཆིས༔ ཐུགས་རྗེས་བརྩེ་བ་ཆེན་པོས་སྐྱོང་རེ་རན༔ ནག་ཕྱོགས་བདུད་བགེགས་དམ་སྲི་ཁ་དར་ནས༔ ཆོས་བཞིན་སྤྱོད་པའི་རྣལ་འབྱོར་བློ་ཡིད་བསླུས༔ བདུད་སྤྲུལ་སྡིག་རྗེས་འབངས་དཀྲུགས་དམེ་འཁྲུགས་འགྱེད༔ བསྟན་དང་འགྲོ་ལ་མི་བདེའི་ལ་ཡོག་འདོར༔ རྒྱལ་བ་རྒྱ་མཚོས་མཐུ་ནུས་དབྱུང་རེ་རན༔ གསལ་འགྲིབ་མེད་པའི་མཁྱེན་གཟིགས་གང་ན་བཞུགས༔ བདུད་སྡེ་ཀླ་ཀློས་ཕྱི་ཡི་ཆོས་ཁྲིམས་བཤིགས༔ དམ་ལོག་སློབ་མས་ནང་གི་ཆོས་ཁྲིམས་བཤིགས༔ དམ་སྲི་བྱུར་འདྲེས་གསང་བའི་ཆོས་ཁྲིམས་བཤིགས༔ རྩ་གསུམ་སྲུང་མ་རྣམས་ཀྱིས་མ་གཟིགས་སམ༔ ཐོགས་མེད་མཐུ་ནུས་རྩལ་ཤུགས་ཕྱུངས་རེ་རན༔ བདག་ཅག་རྣལ་འབྱོར་མ་ཉེས་ཆོས་ལ་བརྩོན༔ གཏན་གྱི་བདེ་བ་ལྷུར་ལེན་བྱེད་པ་ལ༔ དགྲ་འདྲེའི་རྒོལ་བ་ངན་པས་ཁྲིམས་ཀྱིས་བཅིང་༔ རེ་སའི་སྐྱབས་གནས་རྩ་གསུམ་སྲུང་མར་འབོད༔ དཔུང་དང་ར་མདའ་དྲག་པོ་ད་མཛོད་ཅིག༔ བདག་གིས་བློ་ཕུག་དམ་པའི་ཆོས་ལ་གཏད༔ བྱ་བྱེད་ཆམ་བཞག་དགེ་བའི་ལས་ལ་བརྩོན༔ དཀའ་བ་དང་བླངས་སླ་བ་རྒྱབ་ཏུ་བོར༔ མི་ཚེའི་ལྷག་མ་ཆོས་ལ་དྲིལ་སྙམ་ཡང་༔ བར་ཆད་རྒོལ་བ་ངན་པའི་འཚུབས་མས་བཅོམ༔ ད་ནི་དཔུང་གཉེན་ར་མདའ་མགོན་པོར་སྦྲན༔ བསླུ་འམ་མི་བསླུ་རྩ་གསུམ་སྲུང་མ་རྣམས༔ བརྒྱུད་འཛིན་ཐུགས་རྗེས་འདོར་རམ་ཁྱོད་ཀྱིས་ཤེས༔ བསྐུལ་ནི་དད་དང་དམ་ཚིག་གཉན་པོས་བསྐུལ༔ སྤྱིར་ནི་སངས་རྒྱས་བསྟན་པ་གཉན་པོའི་དོན༔ སྒོས་ཀྱི་དགེ་འདུན་ཆོས་བཞིན་སྤྱོད་པའི་ཆེད༔ ཡང་སྒོས་བསྟན་གཞི་དགོན་གནས་ཆོས་འཁོར་དོན༔ ཁྱད་པར་གསང་སྔགས་བསྟན་པའི་ཆེ་མངོན་ཕྱིར༔ ལྷག་བསམ་རྣམ་པར་དག་པའི་མཐུས་བསྐུལ་ལོ༔ ཧཱུྃ་ཧཱུྃ་ཛཿཆེ་མཆོག་རྡོ་རྗེ་གྲོ་ལོད་སྐུར་བཞེངས་ཤིག༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿབདུད་འདུལ་པདྨ་རྒྱལ་པོ་སྐུར་བཞེངས་ཤིག༔ འགྲོ་བའི་དོན་མཛད་ཞལ་བཞེས་ཅི་བཞིན་དུ༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿཡུམ་མཆོག་རྡོ་རྗེ་ཕག་མོ་སྐུར་བཞེངས་ཤིག༔ འགྲོ་དོན་དགོངས་མཛད་རང་དམ་བཅས་པ་བཞིན༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿཤར་ཕྱོགས་རྡོ་རྗེ་མཁའ་འགྲོ་སྐུར་བཞེངས་ཤིག༔ འགྲོ་དོན་དགོངས་མཛད་རང་དམ་བཅས་པ་བཞིན༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿལྷོ་ཕྱོགས་རིན་ཆེན་མཁའ་འགྲོ་སྐུར་བཞེངས་ཤིག༔ འགྲོ་དོན་དགོངས་མཛད་རང་དམ་བཅས་པ་བཞིན༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿནུབ་ཕྱོགས་པདྨ་མཁའ་འགྲོ་སྐུར་བཞེངས་ཤིག༔ འགྲོ་དོན་དགོངས་མཛད་རང་དམ་བཅས་པ་བཞིན༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿབྱང་ཕྱོགས་ལས་ཀྱི་མཁའ་འགྲོ་སྐུར་བཞེངས་ཤིག༔ འགྲོ་དོན་དགོངས་མཛད་རང་དམ་བཅས་པ་བཞིན༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཡིད་ལ་བརྣག་པའི་དགྲ་བགེགས་དམ་ཉམས་ལ༔ མངོན་སྤྱོད་དྲག་པོའི་ཕྲིན་ལས་ད་མཛོད་ཅིག༔ ཧཱུྃ་ཛཿརྣམ་པར་སྨིན་པའི་རིག་འཛིན་ཡབ་ཡུམ་རྣམས༔ དཔའ་བོ་རྡོ་རྗེ་གིང་གི་སྐུར་བཞེངས་ཤིག༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཞེ་སྡང་ལས་གྱུར་དགྲ་བགེགས་རྡུལ་དུ་རློག༔ ཚེ་ལ་དབང་བའི་རིག་འཛིན་ཡབ་ཡུམ་རྣམས༔ དཔའ་བོ་རཏྣ་གིང་གི་སྐུར་བཞེངས་ཤིག༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ང་རྒྱལ་ལས་གྱུར་དགྲ་བགེགས་རྡུལ་དུ་རློག༔ ཕྱག་རྒྱ་ཆེན་པོའི་རིག་འཛིན་ཡབ་ཡུམ་རྣམས༔ དཔའ་བོ་པདྨ་གིང་གི་སྐུར་བཞེངས་ཤིག༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ འདོད་ཆགས་ལས་གྱུར་དགྲ་བགེགས་རྡུལ་དུ་རློག༔ ལྷུན་གྱིས་གྲུབ་པའི་རིག་འཛིན་ཡབ་ཡུམ་རྣམས༔ དཔའ་བོ་ཀརྨ་གིང་གི་སྐུར་བཞེངས་ཤིག༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཕྲག་དོག་ལས་གྱུར་དགྲ་བགེགས་རྡུལ་དུ་རློག༔ ཧཱུྃ་ཛཿལྷ་ཆེན་དབང་ཕྱུག་ཆེན་པོ་འཁོར་བཅས་རྣམས༔ བཀའ་དང་དམ་ཚིག་གཉན་པོས་ཐུགས་དམ་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ དགྲ་བགེགས་གདུག་པ་ཅན་རྣམས་ཚར་གཅོད་མཛོད༔ ཧཱུྃ་ཛཿདཔལ་མགོན་ལེགས་ལྡན་ནག་པོ་འཁོར་དང་བཅས༔ བསྐུལ་ལོ་དད་དང་དམ་ཚིག་གཉན་གྱིས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བསྟན་དགྲ་དམ་ཉམས་མ་ལུས་རྡུལ་དུ་བརློག༔ སྔགས་སྲུང་མ་མོ་ཨེ་ཀ་ཛ་ཊཱི་མ༔ བསྐུལ་ལོ་དད་དང་དམ་ཚིག་གཉན་གྱིས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བསྟན་དགྲ་རྩད་ནས་བརླག་པའི་ཕྲིན་ལས་མཛོད༔ མ་མོ་དབྱིངས་ཀྱི་རྗེ་མོ་རེ་མ་ཏི༔ བསྐུལ་ལོ་དད་དང་དམ་ཚིག་གཉན་གྱིས་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བསྟན་དགྲའི་སྡེ་དཔུང་འཇོམས་པའི་ཕྲིན་ལས་མཛོད༔ ཧཱུྃ་བཻ༔ ཤར་ཕྱོགས་རྒྱལ་ཆེན་ཡུལ་འཁོར་སྲུང་༔ དྲི་ཟའི་ཁམས་ལ་མངའ་དབང་བསྒྱུར༔ དམ་ཚིག་ཐུགས་དམ་གནད་ནས་བསྐུལ༔ དམ་རྫས་རྒྱན་གྱི་གཏོར་མ་བཞེས༔ དགྲ་བགེགས་བརླག་པའི་ལས་མཛོད་ཅིག༔ ལྷོ་ཕྱོགས་རྒྱལ་ཆེན་འཕགས་སྐྱེས་པོ༔ གཤིན་རྗེའི་ཁམས་ལ་མངའ་དབང་བསྒྱུར༔ དམ་ཚིག་ཐུགས་དམ་གནད་ནས་བསྐུལ༔ དམ་རྫས་རྒྱན་གྱི་གཏོར་མ་བཞེས༔ དགྲ་བགེགས་བརླག་པའི་ལས་མཛོད་ཅིག༔ ནུབ་ཕྱོགས་རྒྱལ་ཆེན་སྤྱན་མི་བཟང་༔ ཀླུ་ཡི་ཡུལ་ལ་མངའ་དབང་བསྒྱུར༔ བསྐུལ་ལོ་ཐུགས་དམ་གནད་ནས་བསྐུལ༔ དམ་རྫས་རྒྱན་གྱི་གཏོར་མ་བཞེས༔ དགྲ་བགེགས་བརླག་པའི་ལས་མཛོད་ཅིག༔ བྱང་ཕྱོགས་རྒྱལ་ཆེན་རྣམ་ཐོས་སྲས༔ གནོད་སྦྱིན་ཡུལ་ལ་མངའ་དབང་བསྒྱུར༔ བསྐུལ་ལོ་ཐུགས་དམ་གནད་ནས་བསྐུལ༔ དམ་རྫས་རྒྱན་གྱི་གཏོར་མ་བཞེས༔ དགྲ་བགེགས་བརླག་པའི་ལས་མཛོད་ཅིག༔ ཧོཿརྗེ་བཙུན་པདྨ་བདུད་འདུལ་གྱིས༔ བཀའ་བསྒོས་དམ་བཞག་གཉེར་གཏད་པའི༔ བཀའ་ཡི་ཆོས་སྐྱོང་སྲུང་དམ་རྣམས༔ དམ་ཚིག་གཉན་པོས་རྒྱུད་བསྐུལ་ལོ༔ ཁྱོད་ཅག་ཐུགས་དམ་དུས་ལ་བབ༔ ཡིད་ལ་བརྣག་པའི་དགྲ་བགེགས་ཀྱི༔ ཤ་ཁྲག་སྲོག་ལ་རྔམ་པར་གྱིས༔ ཤ་ཁྲག་གཏོར་མ་འདི་ལོངས་ལ༔ མ་ཐོགས་མྱུར་དུ་དགྲ་ལ་རྒྱུག༔ དགྲ་བོའི་མི་ནོར་འཁོར་དང་བཅས༔ མ་ལུས་ཐལ་བའི་རྡུལ་དུ་རློག༔ བླ་སྲོག་དོན་སྙིང་ནང་རོལ་བཅས༔ མ་ལུས་སྤར་གྱིས་ཐོབ་ལ་ཤོག༔ གཟུགས་བྱང་རཱུ་པ་འདི་ལ་ཁུག༔ མ་ཤོར་བཀའ་དང་ཐ་ཚིག་དཔང་༔ རྒྱུག་རྒྱུག་གནོད་པའི་བགེགས་ལ་རྒྱུག༔ སྣང་ཞིང་སྲིད་པའི་ཁམས་འདི་ན༔ བདག་ཅག་རྣམས་ལ་འཚེ་བའི་བགེགས༔ སྣ་འདྲེན་རྒྱབ་བརྟེན་དཔུང་གཉེན་བཅས༔ ཁམས་གསུམ་སྲིད་པ་གར་གནས་ཀྱང་༔ སྐད་ཅིག་རང་དབང་མེད་པ་རུ༔ སོད་རྒྱོབ་དྲག་པོའི་སྒྲ་དང་བཅས༔ མི་བཟད་མཚོན་གྱི་ཆར་ཕོབ་ལ༔ རང་དབང་མེད་པར་ཁུག་ལ་ཤོག༔ གཟུགས་བྱང་ལིང་ག་འདི་ལ་ཁུག༔ མ་བཏང་མ་ཤོར་མཐུ་རྩལ་ཕྱུངས༔ བཀའ་དང་ཐ་ཚིག་གཉན་པོ་དཔང་༔ ཁྱད་པར་ཡིད་ལ་བརྣག་པ་ཡི༔ དགྲ་བགེགས་དམ་ཉམས་ལས་ངན་འདི༔ རི་བོའི་རྩེ་དང་རྒྱ་མཚོའི་གཏིང་༔ དཀོན་མཆོག་སྐྱབས་འོག་སྔགས་པའི་ཁྱིམ༔ སྒྲུབ་པའི་གནས་དང་སྲུང་བའི་གུར༔ ཉི་ཟླའི་ཁྱིམ་དང་སྤྲིན་གྱི་ཀློང་༔ སྣང་སྲིད་ལྷ་འདྲེས་སྲུང་བའི་གནས༔ གང་ན་གནས་ཀྱང་ཁུག་ལ་ཤོག༔ གཟུགས་བྱང་རཱུ་པ་འདི་ལ་ཁུག༔ མིང་ཡིག་བྱང་བུ་འདི་ལ་བསྟིམ༔ མཐུ་སྟོབས་དྲག་པོས་བརླག་པར་གྱིས༔ བཀའ་དང་ཐ་ཚིག་གཉན་པོས་བསྐུལ༔ མ་འདའ་བཛྲ་ས་མ་ཡ༔ བཅོལ་བའི་ཕྲིན་ལས་འགྲུབ་པར་མཛོད༔ འདི་ནི་ཤིན་ཏུ་གཉན་པའི་ཕྱིར༔ གང་ལ་བྱས་ཀྱང་ཐོག་དང་འདྲ༔ ཟབ་གསང་བསྒྲུབ་པའི་སྐལ་ལྡན་ལ༔ ལས་ཀྱི་མཚོན་ཆར་བསྔགས་ནས་བཞག༔ བདུད་སྡེས་བསྟན་འགྲོ་དཀྲུག་པ་དང་༔ བགེགས་ཀྱི་བར་ཆད་དྲག་པོ་དང་༔ མདོར་ན་ཟོལ་མེད་རྣལ་འབྱོར་པར༔ ཕྱི་ནང་བར་ཆད་འབྱུང་བའི་ཚེ༔ དྲག་པོའི་རྦད་ལས་འདིར་བརྩོན་བྱ༔ བདག་འདྲ་པདྨ་ཐོད་ཕྲེང་ངས༔ མོས་པའི་བརྒྱུད་འཛིན་རྣམས་ཀྱི་དོན༔ རྦད་བསྐུལ་ཟབ་མོ་མཐར་ཐུག་འདི༔ ཏིང་འཛིན་ཆེན་པོའི་གཟེར་གྱིས་བརླབས༔ སྨོན་ལམ་དག་པའི་རྒྱས་བཏབ་ནས༔ ལས་འཕྲོ་ཅན་གྱི་དཔལ་དུ་བཞག༔ ཉམས་སུ་ལེན་པའི་དམ་ལྡན་རྣམས༔ མཐུ་རྩལ་ནམ་མཁའི་ཐོག་ལས་ཆེ༔ གྲགས་པས་ས་སྟེང་ཐམས་ཅད་ཁྱབ༔ བུད་མེད་ཡེ་ཤེས་མཚོ་རྒྱལ་ཁྱོད༔ བཀའ་འདི་བརྡ་ཡི་རིས་སུ་ཐོབ༔ དབང་ཕྱུག་ལེགས་ལྡན་ཨེ་ཀ་ཛ༔ མ་མོ་སྲིད་པའི་རྒྱལ་མོ་བཅས༔ ནང་གི་སྲུང་མར་གཉེར་གཏད་དོ༔ གནོད་སྦྱིན་ཤན་པ་དམར་ནག་དང་༔ དྲང་སྲོང་གཟའ་བདུད་འཁོར་དང་བཅས༔ ཕྱི་ཡི་སྲུང་མས་གཉེར་མཛོད་ཅིག༔ གཡུ་ཡི་ཕྲེང་བ་ཅན་གྱིས་སྲུངས༔ བཀའ་དང་ཐ་ཚིག་གཉན་པོའི་རྒྱ༔ དམ་ལྡན་བུ་ལ་བུ་བཞིན་སྐྱོངས༔ དམ་ཉམས་སྲོག་གི་གཤེད་མ་མཛོད༔ བསྟན་པས་ས་སྟེང་ཡོངས་ཁྱབ་མཛོད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ༠༠༠༠༠བརྡ་ཡིག༥༢༩༔ ཞེས་པ་འདི་ཡང་སྦས་པའི་རྣལ་འབྱོར་ཆེན་པོ་བདུད་འཇོམས་རྡོ་རྗེ་གྲོ་ལོད་རྩལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་ཤྭ་བྲག་རྡོ་རྗེ་ནས་གདན་དྲངས་ཏེ་མི་ལོ་བཅོ་ལྔའི་བར་དུ་བཀའ་རྒྱས་བཏབ་ནས་མཐར་རྟེན་འབྲེལ་དུས་ལ་བབ་ཚེ་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་རང་སློབ་དམ་པ་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།