TTDL-ZABTER-01-KA-068

Previous Text Back to Volume PageNext Text

Wylie title
Location	bdud 'joms gling pa zab gter Volume 1, Text 67, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ དཔལ་དགུ་གཅིག་དྲིལ་གྱི་ངོ་བོ་

ནག་པོ་ཏི་པ་ར་ཛ་ལ་བརྟེན་ནས་འཆི་བ་བསླུ་བའི་མན་ངག་གཤིན་རྗེའི་ ཞགས་པ་གཅོད་པའི་སྤུ་གྲི་བཞུགས་སོ༔

༠༠༠༠༠༠བརྡ་ཡིག༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠༠བརྡ་ཡིག༦༡༦༔ འཆི་བ་བསླུ་བའི་མན་ངག་ལ༔ དུག་ཁྲག་བག་ཟན་ཁམ་ས་རྣམས༔ བསྲེས་པའི་སྡིག་པ་ར་ཙ་ནི༔ མགོ་དགུ་རྭ་ནི་བཅོ་བརྒྱད་པ༔ ལུས་པོ་མིག་གིས་གང་བ་བཅའ༔ འབུལ་རྫས་ཕོ་ཏང་མོ་ཏང་དང་༔ མདའ་འཕང་ཆངས་གླུད་ཤ་དུམ་སོགས༔ འབྲས་ཆན་དར་ཟབ་མང་དུ་བསགས༔ དེ་ནས་བདག་མདུན་ཡི་དམ་ལྷ༔ རྟེན་དང་བརྟེན་པ་ཡོངས་རྫོགས་སུ༔ བསྐྱེད་ཅིང་བསྒོམ་པའི་གནད་ལྡན་ཏེ༔ སྐད་ཅིག་གིས་མདུན་གྱི་སྡིག་གཟུགས་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་བདག་མདུན་གྱི་དཀྱིལ་འཁོར་ལྷ་ཚོགས་ཐམས་ཅད་ཀྱི་ཐུགས་ཀ་ནས་འོད་ཕུང་ཁ་དོག་ལྔ་ལྡན་འཇའ་སྤྲིན་འཐིབས་པ་ལྟ་བུའི་རྣམ་པར་བྱུང་ནས་མདུན་དུ་འདུས་པར་བསམ༔ ཁམས་གསུམ་སྣོད་བཅུད་ཐམས་ཅད་ཀྱི་ངོ་བོ་ཧཱུྃ་མཐིང་གཅིག་ཏུ་དྲིལ་ཏེ་མདུན་གྱི་འོད་ཕུང་དང་འདྲེས་པ་ལས་ལྕགས་ཀྱི་སྡིག་པ་ནག་པོ་ཁ་དགུ་མགོ་དགུ་རྭ་བཅོ་བརྒྱད་ཡོད་པ་མགོ་ལུས་མེད་པར་མིག་དང་གཉེར་མས་གང་བ་ཁམས་གསུམ་ཧུབ་ཀྱིས་འདེབས་ཤིང་སྲིད་གསུམ་ཟས་སུ་ཟ་བ་འཆི་བདག་གཤིན་རྗེ་ལ་སོགས་པ་སྣང་ཞིང་སྲིད་པའི་ལྷ་འདྲེ་ཐམས་ཅད་ཀྱི་སྲོག་སྙིང་ནུས་མཐུ་ཐམས་ཅད་ཀྱི་ངོ་བོ་གཅིག་ཏུ་དྲིལ་བའི་བདག་ཉིད་དུ་བསྐྱེད་དོ༔ དེ་ལས་འོད་དང་འོད་ཕུང་དཔག་ཏུ་མེད་པ་འཕྲོས་པས་དུས་གསུམ་གྱི་རྒྱལ་བ་ཞི་ཁྲོ་རབ་འབྱམས་ཐམས་ཅད་དང་༔ ཡེ་ཤེས་དང་འཇིག་རྟེན་གྱི་བཀའ་སྲུང་དམ་ཅན་རྒྱ་མཚོ་མ་ལུས་ཤིང་ལུས་པ་མེད་པའི་ཕྲིན་ལས་མཐུ་སྟོབས་ནུས་པ་ཐམས་ཅད་འོད་ཕུང་གི་རྣམ་པར་བསྡུས་ཏེ་སྡིག་པ་ལ་ཐིམ༔ ཡང་འོད་འཕྲོས་པས་འཆི་བདག་ལས་ཀྱི་གཤིན་རྗེ་ལ་སོགས་པའི་སྣང་ཞིང་སྲིད་པའི་ལྷ་འདྲེ་ཐམས་ཅད་ཀྱི་སྲོག་སྙིང་ནུས་མཐུ་ཐམས་ཅད་བསྡུས་ཏེ་ཐིམ་པར་གྱུར༔ དེ་ནས་སྤྱན་འདྲེན་པ་ནི༔ ཧཱུྃ༔ སྔོན་གྱི་བསྐལ་པ་དང་པོ་ལ༔ ཀུན་ཏུ་གསལ་བའི་ཉིན་སྣང་ལས༔ མུན་པ་ནག་པོའི་བསྐལ་པ་བྱུང་༔ དཀར་ནག་འཐབ་པའི་ཆོ་འཕྲུལ་ལས༔ དག་དང་མ་དག་སྣ་ཚོགས་པའི༔ སྣ་ཚོགས་སྣང་བ་ཅིར་ཡང་སྣང་༔ མ་རིག་འཁོར་བའི་སྡུག་བསྔལ་དང་༔ འཁྲུལ་སྣང་དབྱིངས་སུ་གཞིག་པའི་ཕྱིར༔ ཡེ་ཤེས་སྒྱུ་འཕྲུལ་དྲྭ་བ་ཡི༔ རྟེན་དང་བརྟེན་པའི་འཁོར་ལོར་ཤར༔ དེ་འོག་བར་གྱི་བསྐལ་པ་ལ༔ མ་རིག་གསུམ་དང་ཉོན་མོངས་ལྔ༔ འཁྲུལ་པའི་སྣང་སྲིད་ལྷ་འདྲེ་སྲིད༔ འདུལ་ཕྱིར་དྲག་པོ་རིགས་ལྔ་དང་༔ སྒྲུབ་སྡེ་བརྒྱད་ཀྱི་དཀྱིལ་འཁོར་ཤར༔ དེ་འོག་བསྐལ་པའི་ཐ་མ་ལ༔ ཡེ་ཤེས་དབྱིངས་ཀྱི་སྒྱུ་འཕྲུལ་ལྷའི༔ སྤྲུལ་པ་འགོང་པོ་སྤུན་དགུའི་སྡེ༔ དབང་བསྒྱུར་འཇོམས་ཤིང་འདུལ་བྱེད་པ༔ ཟ་བྱེད་ལྕགས་སྡིག་ནག་པོ་ཡི༔ ཕྲིན་ལས་མངོན་སྤྱོད་དཀྱིལ་འཁོར་ཤར༔ བཞེངས་ཤིག་བཞེངས་ཤིག་སྐུ་བཞེངས་ཤིག༔ དབྱིངས་ནས་སྐུར་བཞེངས་དུས་ལ་བབ༔ ཕྲིན་ལས་མཛད་པའི་དུས་ལ་བབ༔ ཁམས་གསུམ་དབང་དུ་བསྒྱུར་བ་དང་༔ ཐོགས་མེད་ཕྲིན་ལས་རྩལ་ཤུགས་སྐྱེད༔ གདུག་པའི་དགྲ་བགེགས་གནོད་བྱེད་ཀྱི༔ བློ་ཡིད་སེམས་གསུམ་དབང་བསྒྱུར་ལ༔ བར་ཆད་དབང་གྱུར་སེམས་ཅན་འདི༔ འཆི་བདག་ཁ་ནས་འཕྲོག་པ་དང་༔ གཤེད་མའི་ལག་ནས་བསླུ་བར་མཛོད༔ མ་གཡེལ་མ་འགྱངས་སྐུ་བཞེངས་ཤིག༔ མ་ཐོགས་མྱུར་དུ་གཤེགས་སུ་གསོལ༔ སརྦ་མ་ཧཱ་གུ་རུ་དྷེ་ཝ་ཌཱ་ཀི་ནཱི་ཛྙཱ་ན་དྷཱ་ཏུ་ནག་པོ་ཏི་པ་ར་ཙ་ས་མ་ཡ་ཛ་ཛཿདེ་ནས་བཞུགས་སུ་གསོལ་བ་ནི༔ ཧཱུྃ༔ དུས་གསུམ་རྒྱལ་བའི་ཕྲིན་ལས་བདག༔ ཁམས་གསུམ་འཁོར་བའི་དབང་ཕྱུག་ཆེ༔ སྣང་སྲིད་ལྷ་འདྲེ་ཡོངས་ཀྱི་བླ༔ འདིར་གཤེགས་འདིར་བཞུགས་གསན་ཅིང་དགོངས༔ བདག་ཅག་སྔགས་འཆང་རྣལ་འབྱོར་གྱིས༔ མཆོད་སྦྱིན་བཞེས་ལ་བསྒོ་བའི་བཀའ༔ ཉན་ཅིང་ཅི་བཞིན་སྒྲུབ་པར་གྱིས༔ དེ་ནས་གླུད་དུ་འབུལ་བ་ནི༔ ཧཱུྃ༔ ཞི་ཁྲོ་སྤྲུལ་པའི་ཕོ་ཉ་གསོན༔ བཀའ་སྲུང་ཡོངས་ཀྱི་རྒྱལ་པོ་ཉོན༔ སྡེ་བརྒྱད་ཡོངས་ཀྱི་དབང་ཕྱུག་ཉོན༔ སྣང་སྲིད་ལྷ་འདྲེའི་སྤྱི་དཔལ་ཉོན༔ མཐོང་ལྡན་ཀུན་གྱི་མིག་གིས་ལྟོས༔ ཀུན་གྱིས་མ་རིག་མ་སྨྲ་ཞིག༔ ཐོས་ལྡན་རྣ་བའི་དབང་པོས་ཉོན༔ ཀུན་གྱིས་མ་ཚོར་མ་སྨྲ་ཞིག༔ ཕམ་རྒྱལ་འཐབ་རྩོད་མེད་པར་ལོངས༔ སུས་ཀྱང་མ་ཐོབ་མ་སྨྲ་ཞིག༔ ཧཱུྃ༔ ང་ནི་ཀུན་ཏུ་བཟང་པོ་སྟེ༔ ང་ནི་སྤྱི་དཔལ་ཆེན་པོའི་མཆོག༔ ང་ནི་པདྨ་དྲག་པོ་རྩལ༔ འཁོར་འདས་ཡོངས་ཀྱི་ཆེ་བཙན་མཆོག༔ འཁོར་འདས་ཡོངས་ཀྱི་དབང་ཕྱུག་ལགས༔ མི་གནས་ཆོས་ཀྱི་དབྱིངས་ནས་བཞེངས༔ མི་འགྱུར་ནམ་མཁའི་རྡོ་རྗེ་སྟེ༔ ཆོས་ཀྱི་དབྱིངས་ནས་བཞེངས་པའི་དོན༔ གང་དང་ཅི་ཡི་དོན་ཕྱིར་ན༔ རྒྱུ་སྦྱོར་སྦྱིན་པའི་བདག་པོ་དང་༔ སྣང་ཞིང་སྲིད་པའི་ལྷ་འདྲེ་རྣམས༔ འཁོན་དང་རྩོད་པ་འཐབ་འཁྲུགས་རྣམས༔ བསྡུམ་དང་དབྱེ་དང་བྱེ་བྲལ་གྱི༔ ཐབས་སུ་བུ་ལོན་འཇལ་བ་དང་༔ ལན་ཆགས་གསོད་ཅིང་མཁོན་པ་བསྡུམ༔ ཕན་ཚུན་བྱམས་བརྩེ་མཐུན་པར་བཅོས༔ དེ་ཕྱིར་ཀུན་ཀྱང་དམ་ལ་འདུས༔ ཀུན་ཀྱང་བཀའ་ལ་ཉན་པར་གྱིས༔ ཀྱཻ༔ འཆི་བདག་ལས་ཀྱི་གཤིན་རྗེ་སོགས༔ སྣང་ཞིང་སྲིད་པའི་ལྷ་འདྲེ་ལ༔ འདོད་རྒུའི་དཔལ་ཡོན་ནམ་མཁའ་མཛོད༔ མི་ཟད་རྒྱན་གྱི་འཁོར་ལོར་འབུལ༔ ཅེས་འབུལ་རྫས་རྣམས་བྲན་ཏེ༔ ཨོཾ་སྭ་བྷཱ་ཝ་སོགས་གླུད་རྫས་རྣམས་སྟོང་པ་ཉིད་དུ་གྱུར༔ སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཁྱོན་དཔག་ཏུ་མེད་པའི་སྣོད་དུ་ཨོཾ་ཨཱཿཧཱུྃ་གསུམ་འོད་དུ་ཞུ་བ་ལས་བྱུང་བའི་སྣང་ཞིང་སྲིད་པའི་ལྷ་འདྲེ་ལན་ཆགས་བདག་པོ་བདག་མོ་ཐམས་ཅད་ཀྱི་དབང་པོ་སོ་སོའི་སྤྱོད་ཡུལ་དུ་གཟུགས་མཛེས་ཤིང་ཡིད་དུ་འོང་བ༔ སྒྲ་སྙན་པ་སྣ་ཚོགས་ཀྱིས་ཡིད་འཕྲོག་པ༔ དྲི་ཞིམ་པ་སྣ་ཚོགས་ཀྱིས་རྨུག་པ་དྭངས་ཤིང་༔ འཐུམ་བརྒྱལ་སངས་པ༔ རོ་བརྒྱ་ནུས་པ་སྟོང་དང་ལྡན་པའི་ཁ་ཟས་ཕུན་སུམ་ཚོགས་པས་བློ་ཡིད་ཚིམ་ཞིང་ཟག་མེད་ཀྱི་བདེ་བའི་རོས་རྟག་ཏུ་མྱོས་པར་བྱེད་པ༔ མདོར་ན་ཡིད་ལ་གང་ཤར་ཞིང་སེམས་ལ་གང་བསམ་པ་ཐམས་ཅད་སྐད་ཅིག་གིས་འབྱུང་ཞིང་རྒྱས་པར་བྱེད་པའི་བདག་ཉིད་ཅན་དུ་གྱུར༔ ཨོཾ་ཨ་ཀཱ་རོ་སོགས་ལན་གསུམ་དང་ནམ་མཁའ་མཛོད་སྔགས་ལན་བདུན༔ ཀྱཻ༔ ཚེ་རབས་འཁོར་བ་ཐོག་མེད་ནས༔ ལས་ཀྱིས་འབྲེལ་བའི་ཕ་དང་མར༔ སྣང་ཞིང་སྲིད་པའི་ལྷ་འདྲེ་ལ༔ སྦྱིན་བདག་མི་ནོར་འཁོར་བཅས་ཀྱི༔ ཤ་ཡི་རིན་དང་ཁྲག་གི་ཚབས༔ བླ་ཡི་གླུད་དང་སྲོག་གི་ཚབས༔ ཕུང་ཁམས་སྐྱེ་མཆེད་དབང་པོ་ཡི༔ རིན་དང་ཚབས་སུ་འབུལ་བ་ནི༔ ཕོ་ཏང་དཔའ་བོའི་འགྱིང་སྟབས་ཅན༔ སྐྱེས་པ་ཕོ་ཡི་གླུད་དུ་འབུལ༔ མོ་ཏང་མཛེས་སྡུག་ལྡེམ་པ་འདི༔ ཟ་མ་མོ་ཡི་གླུད་དུ་འབུལ༔ ཉག་ཕྲན་མདའ་དར་མཛེས་ལྡན་འདི༔ བྱིས་པ་ཆུང་ངུའི་གླུད་དུ་འབུལ༔ འཕང་ཕྲན་གྲུ་གུས་བརྒྱན་པ་འདི༔ བུད་མེད་དར་མའི་གླུད་དུ་འབུལ༔ གོས་ཕྲུག་དར་ཟབ་སྟག་གཟིག་རས༔ ལོངས་སྤྱོད་ནོར་གྱི་གླུད་དུ་འབུལ༔ རྒྱུ་སྦྱོར་སྦྱིན་པའི་བདག་པོ་འདི༔ འཆི་བདག་གཤིན་རྗེའི་ལག་ནས་བསླུ༔ སྣང་སྲིད་ལྷ་འདྲེའི་ལག་ནས་བསླུ༔ བཟུང་བ་ཐོངས་ལ་བཅིངས་པ་ཁྲོལ༔ བསྡམ་པ་ཀློད་ལ་མནན་པ་ཐེག༔ དགའ་མགུ་ཡི་རང་ཚིམས་གྱུར་ཅིག༔ མཚན་བཞིའི་སྔགས་དང་བཅས་པས་ཅི་མང་ཕུལ་མཐར༔ ན་མོ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་བདེན་པ་དང་༔ དོན་དམ་ཆོས་ཉིད་ངོ་བོ་གདོད་ནས་དག་ཅིང་༔ ཀུན་རྫོབ་རྟེན་འབྲེལ་བསླུ་བ་མེད་པ་རྒྱུ་འབྲས་ཟབ་མོའི་བདེན་པའི་མཐུ་བྱིན་གྱིས་བདག་ཅག་དཔོན་སློབ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་ཕོ་གདོན་མོ་གདོན་ཀླུ་གདོན་གཤིན་རྗེའི་བྱད་ཁ་ཆག་ཆེ་ཉམ་ང་༔ ཉིན་གྱི་ལྟས་ངན་པ༔ མཚན་གྱི་རྨི་ལམ་ངན་པ༔ མོ་དང་རྩིས་ངན་པ༔ སྔོན་གྱི་ལས་ངན་པ་དང་༔ འཕྲལ་གྱི་རྐྱེན་ངན་པ་དང་༔ མདོར་ན་མི་མཐུན་པའི་སྲོག་དང་མི་འདོད་པའི་ཉེ་བར་འཚེ་བ་ཐམས་ཅད་ཞི་བར་གྱུར་ཅིག༔ དུས་མ་ཡིན་པའི་འཆི་བ་དང་༔ འཇིགས་པ་དང་སྡུག་བསྔལ་དང་གཤིན་རྗེའི་ཞགས་པ་དང་བདུད་ཀྱི་རྩིས་དང་བཙན་གྱི་ཤྭ་རྡེལ་དང་མ་མོའི་ནད་ཡམས་ལ་སོགས་པའི་ནད་དང་གནོད་པ་རྐྱེན་དང་བར་ཆད་འཇིགས་པ་དང་སྡུག་བསྔལ་བཀྲ་མི་ཤིས་པའི་དངོས་པོ་ཐམས་ཅད་ཞི་ཞིང་དག་པར་གྱུར་ཅིག༔ བསྒྱུར་ཞིང་བཟློག་པར་གྱུར་ཅིག༔ ལན་ཆགས་བྱང་བར་གྱུར་ཅིག༔ བུ་ལོན་སོད་པར་གྱུར་ཅིག༔ ཤ་མཁོན་དྭངས་པར་གྱུར་ཅིག༔ ཕན་ཚུན་བྱམས་བརྩེས་གནས་ལ་འཁོད་ཅིང་བདེ་ལེགས་སུ་གྱུར་ཅིག༔ ཀྱཻ༔ ཕོ་གླུད་ངར་མི་མཛེས་ལྡན་དང་༔ འབྲུ་ཆན་འབྲས་བུ་སྣ་ཚོགས་པ༔ སྦྱིན་བདག་ཕོ་ཡི་གླུད་དུ་འབུལ༔ མོ་གླུད་ངར་མི་རལ་པ་ཅན༔ མཛེས་སྡུག་ཡིད་འཕྲོག་ལྡེམས་པ་འདི༔ སྦྱིན་བདག་མོ་ཡི་གླུད་དུ་འབུལ༔ ཤ་ཡི་རིན་དུ་ཤ་དུམ་དང་༔ ཁྲག་གི་ཚབས་སུ་ཁྲག་སྐྱེམས་འབུལ༔ རྒྱུ་སྦྱོར་སྦྱིན་བདག་ཕོ་མོ་འདི༔ སྡེ་བརྒྱད་གཤིན་རྗེའི་ལག་ནས་བསླུ༔ སྣང་སྲིད་ལྷ་འདྲེའི་ལག་ནས་བསླུ༔ བཟུང་བ་ཐོངས་ལ་སོགས་གོང་ལྟར་འགྲེའོ༔ དེ་ལྟར་བརྒྱ་རྩ་ཕུལ་སྔགས་བདེན་བརྗོད་དང་བཅས་པ་རྫོགས་མཐར༔ ཀྱཻ༔ འཆི་བདག་ལས་ཀྱི་གཤིན་རྗེ་དང་༔ སྣང་སྲིད་སྡེ་བརྒྱད་ལྷ་འདྲེ་ལ༔ སྦྱིན་བདག་མི་ཕྱུགས་དཀོར་བཅས་ཀྱི༔ ཤ་ཡི་རིན་དང་ཁྲག་གི་ཚབས༔ སྲོག་དང་དབུགས་ཀྱི་སྐྱིན་བླའི་གླུད༔ ཆངས་བུ་ཤ་དུམ་འབྲས་ཆན་འབུལ༔ སྦྱིན་པའི་བདག་པོའི་མི་ཕྱུགས་དཀོར༔ ལུས་ངག་ཡིད་གསུམ་བླ་ཡིད་སེམས༔ འཆི་བདག་གཤིན་རྗེའི་ལག་ནས་བསླུ༔ སྣང་སྲིད་ལྷ་འདྲེའི་ལག་ནས་བསླུ༔ བཟུང་བ་སོགས་མཚན་བཞིའི་སྔགས་ཀྱིས་མང་དུ་ཕུལ་མཐར་བདེན་སྟོབས་བརྗོད༔ ཀྱཻ༔ འཆི་བདག་གཤིན་རྗེའི་ལག་ནས་བསླུ༔ སྣང་ཞིང་སྲིད་པའི་ལྷ་འདྲེ་ལ༔ སྦྱིན་བདག་མི་ནོར་འཁོར་བཅས་ཀྱི༔ ཚེ་སྐྱིན་བླ་གླུད་ཤ་ཁྲག་གི༔ རིན་དང་གླུད་དུ་འབུལ་བ་ནི༔ མི་ངན་ཚབས་སུ་གླུད་བཟང་འབུལ༔ བུད་མེད་གླུད་དུ་ངར་གཟུགས་བསྔོ༔ རྟ་ཡི་གླུད་དུ་རྟ་མཆོག་བསྔོ༔ ཕྱུགས་ཀྱི་གླུད་དུ་འབྲི་གཡག་མཛོ༔ བ་གླང་མཛོ་མོའི་གཟུགས་རྣམས་འབུལ༔ གསེར་དངུལ་ཟངས་ལྕགས་ལ་སོགས་པ༔ རིན་པོ་ཆེ་ཡི་རིགས་བྱེད་རྣམས༔ རིན་ཆེན་ནོར་གྱི་གླུད་བཟང་འབུལ༔ དཀར་གསུམ་མངར་གསུམ་འབྲུ་སྣ་དང་༔ ཤིང་ཏོག་འབྲས་བུ་སྣ་ཚོགས་པ༔ བཟའ་བ་ཟས་ཀྱི་གླུད་བཟང་འབུལ༔ ཇ་ཆང་འོ་སྐྱེམས་བཏུང་བའི་རིགས༔ དངོས་འབྱོར་ཡིད་ཀྱིས་རྣམ་སྤྲུལ་པ༔ བཏུང་བ་སྐོམ་གྱི་གླུད་བཟང་འབུལ༔ མཁར་ཐབས་རིས་དང་རེས་བྱང་རྣམས༔ ཁང་ཁྱིམ་གནས་ཀྱི་གླུད་བཟང་འབུལ༔ བདག་དང་རྒྱུ་སྦྱོར་ཡོན་བདག་གི༔ མི་ནོར་དཀོར་དང་བཅས་པ་ལ༔ གནོད་ཅིང་འཚེ་བར་མ་བྱེད་ཅིག༔ འཁུ་ཞིང་སྡང་བར་མ་བྱེད་ཅིག༔ སྐབས་འཚོལ་གླག་ལྟ་མ་བྱེད་ཅིག༔ ནད་རྣམས་ལྷ་འདྲེ་རང་ལ་བསྡུ༔ བཟུང་བ༴བསྡམས་པ༴ཕྱིན་ཆད་ལྡང་བར་མ་བྱེད་ཅིག༔ མཚན་བཞི་བརྗོད་ཅིང་སྔགས་ཅི་མང་གིས་གླུད་རྣམས་འབུལ༔ དེ་ནས་རྫོང་འདེབས་པ་ནི༔ ཀྱཻ༔ གསོན་ཅིག་དགོངས་ཤིག་སྟོབས་ལྡན་རྣམས༔ པེ་ཧར་རྒྱལ་པོ་ཤིང་བྱ་ཅན༔ ཁྱོད་སྣང་སྲིད་ལྷ་འདྲེའི་དེད་དཔོན་ཏེ༔ ཁམས་གསུམ་སྲོག་གི་བདག་པོ་དང་༔ འགྲོ་བའི་དབུགས་ཀྱི་བདག་པོ་ཡིན༔ དཔལ་ཨོ་རྒྱན་ཆེན་པོའི་དཔང་བཙུགས་ཏེ༔ ཁྱོད་ལ་ཕྲིན་ལས་བཅོལ་བ་ནི༔ བདག་དང་རྒྱུ་སྦྱོར་སྦྱིན་པའི་བདག༔ མི་ནོར་དཀོར་དང་བཅས་པ་ལ༔ གནོད་ཅིང་འཚེ་བར་བྱེད་པ་ཡི༔ མི་སྲུན་གདོན་བགེགས་དྲེགས་པ་ཅན༔ བཀའ་དང་དམ་ལ་མི་གནས་པ༔ མ་ལུས་ལུས་པ་མེད་པ་ཀུན༔ མདུན་དུ་བཀུག་ཅིང་བསྡུས་བཟུང་ལ༔ བཀའ་དམ་གཉན་པོའི་ཁྲིམས་སུ་ཆུག༔ ཡུལ་གླིང་གཞན་དུ་དེད་ཅིང་སོང་༔ ཕྱིར་མི་ལྡོག་པའི་བཀའ་ནན་ཐོབ༔ ཀྱཻ༔ ས་བདག་འཁོར་ལོའི་བསྒྱུར་རྒྱལ་ཉོན༔ ཁྱོད་ཀླུ་གཉན་ས་བདག་ཀུན་གྱི་གཙོ༔ དུས་གསུམ་རྒྱལ་བ་དཔང་གཙུགས་ཏེ༔ ཁྱོད་ལ་ཕྲིན་ལས་བཅོལ་བ་ནི༔ བདག་དང་རྒྱུ་སྦྱོར་ཡོན་བདག་ལ༔ གནོད་ཅིང་འཚེ་བར་བྱེད་པ་ཡི༔ ས་བདག་ཀླུ་གཉན་ཆེ་འབྲིང་ཆུང་༔ མ་ལུས་ལུས་པ་མེད་པ་རུ༔ མདུན་དུ་བཀུག་ཅིང་སྡུད་པར་གྱིས༔ ཁོ་ཡི་སྦྱོར་ངན་ནད་སྡུག་བསྔལ༔ ཁོ་རང་རྣམས་ལ་བསྡུ་རུ་ཆུག༔ བཟུང་བ༴བསྡམས་པ༴ས་ཡུལ་གཞན་དུ་དེད་ལ་སོང་༔ ཕྱིར་མི་ལྡོག་པའི་བཀའ་ཉན་ཐོབ༔ ཀྱཻ༔ མ་མོ་སྲིད་པའི་རྒྱལ་མོ་གསོན༔ ཁྱོད་མོ་གདོན་ཀུན་གྱི་རྒྱལ་མོ་སྟེ༔ དུས་གསུམ་རྒྱལ་བ་དཔང་བཙུགས་ནས༔ ཁྱོད་ལ་ཕྲིན་ལས་བཅོལ་བ་ནི༔ བདག་དང་རྒྱུ་སྦྱོར་ཡོན་བདག་གི༔ མི་ནོར་ལོངས་སྤྱོད་དཀོར་བཅས་ལ༔ གནོད་ཅིང་འཚེ་བར་བྱེད་པ་ཡི༔ མོ་སྲི་མོ་འདྲེ་མོ་གདོན་རྣམས༔ མདུན་དུ་ཁུག་ལ་མྱུར་དུ་བསྡུས༔ སྦྱོར་ངན་ནད་དང་གནོད་པ་ཀུན༔ མོ་གདོན་རང་ལ་སྡུད་དུ་ཆུག༔ བཟུང་བ༴བསྡམས་པ༴ས་ཡུལ་གཞན་དུ༴ཕྱིར་མི༴ཀྱཻ༔ དེད་དཔོན་ཕོ་མོ་ཁྱེད་རྣམས་ལ༔ སྟོན་པ་རྫོགས་པའི་སངས་རྒྱས་དང་༔ གསང་བའི་བདག་པོ་རྡོ་རྗེ་ཅན༔ རྗེ་བཙུན་པདྨ་ཐོད་ཕྲེང་སོགས༔ དུས་གསུམ་རྒྱལ་བ་སྲས་བཅས་ཀྱིས༔ བཀའ་དང་དམ་ཚིག་གཉན་པོ་དེ༔ གཏའ་རུ་བཞག་སྟེ་དཔང་དུ་བཙུགས༔ བདག་གིས་བཅོལ་བའི་ལས་དེ་དག༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ བཅོལ་བའི་ཕྲིན་ལས་མྱུར་འགྲུབ་མཛོད༔ ཀྱཻ༔ སོངས་ཤིག་སོངས་ཤིག་ད་སོངས་ཤིག༔ ཆོས་ཤིག་ཆོས་ཤིག་ད་ཆོས་ཤིག༔ རྒྱུག་ཅིག་རྒྱུག་ཅིག་ད་རྒྱུག་ཅིག༔ ཕོ་ཏོང་སྟག་རས་བརྒྱན་པ་འདི༔ ལྷ་འདྲེ་རྣམས་ལ་རྫོངས་སུ་འདེབས༔ ཕོ་གླུད་མདའ་མཚོན་རྒྱན་ཅན་འདི༔ ལྷ་འདྲེ་རྣམས་ལ་རྫོངས་སུ་འདེབས༔ མོ་གླུད་འཕང་བཀྲ་ཐོགས་པ་འདི༔ ལྷ་འདྲེ་རྣམས་ལ་རྫོངས་སུ་འདེབས༔ རྟ་ཕྱུགས་ར་ལུག་བོང་དྲེལ་གཟུགས༔ ལྷ་འདྲེ་རྣམས་ལ་རྫོགས་སུ་འདེབས༔ སྦྲ་ཁང་མཁར་ཐབས་གུར་ཁྱིམ་གཟུགས༔ ལྷ་འདྲེ་རྣམས་ལ་རྫོངས་སུ་འདེབས༔ ཀ་ཆ་དཀོར་ཆ་དུ་མའི་ཚོགས༔ དངོས་སུ་འབྱོར་དང་ཡིད་ཀྱིས་སྤྲུལ༔ འདོད་ཡོན་ནམ་མཁའ་མཛོད་དུ་སྤེལ༔ ལྷ་འདྲེ་རྣམས་ལ་རྫོངས་སུ་འདེབས༔ དཀར་གསུམ་མངར་གསུམ་ཤ་ཁྲག་རུས༔ འབྲུ་སྣ་ཤིང་ཏོག་ཟས་ཀྱི་རིགས༔ ལྷ་འདྲེའི་ཚོགས་ལ་རྫོངས་སུ་འདེབས༔ ཇ་ཆང་འོ་སྐྱེམས་བཏུང་བའི་རིགས༔ ལྷ་འདྲེའི་ཚོགས་ལ་རྫོངས་སུ་འདེབས༔ དར་ཟབ་བལ་ཚོན་གོས་དར་རིགས༔ ལྷ་འདྲེའི་ཚོགས་ལ་རྫོངས་སུ་འདེབས༔ གཅན་གཟན་ཆེ་མ་ཆུང་རྒུའི་རིགས༔ ལྷ་འདྲེའི་ཚོགས་ལ་རྫོངས་སུ་འདེབས༔ གསེར་དངུལ་ཟངས་ལྕགས་ནོར་གྱི་རིགས༔ ལྷ་འདྲེའི་ཚོགས་ལ་རྫོངས་སུ་འདེབས༔ ཁལ་བཀོལ་ཁུར་བོར་པང་པས་ཐོབ༔ སྐད་ཅིག་ཉིད་ལ་ཕྱིར་དེངས་ཤིག༔ གལ་ཏེ་མི་འགྲོ་འདུག་གྱུར་ན༔ ཡེ་ཤེས་དབྱིངས་ལས་སྤྲུལ་པ་ཡི༔ སྟོབས་ལྡན་སྡིག་པ་ནག་པོ་ཁྱོད༔ བཞེངས་ཤིག་བཞེངས་ཤིག་ད་བཞེངས་ཤིག༔ ཆོས་ཤིག་ཆོས་ཤིག་ད་ཆོས་ཤིག༔ ཁ་ནས་མེ་མདའ་འཕེན་ཞིང་སོང་༔ སྣ་ནས་ཐོག་ཆར་འབེབ་ཅིང་སོང་༔ ཁུང་ནས་འབྲུག་སྟོང་ལྡིར་ཞིང་སོང་༔ མིག་ནས་གློག་སྟོང་འཁྱུག་ཅིང་སོང་༔ བསྐལ་པའི་མེ་ལྟར་འབར་ཞིང་སོང་༔ སྤུ་གྲིའི་རླུང་ལྟར་གཡོ་ཞིང་སོང་༔ སྤྲུལ་པས་ས་སྟེང་འགེང་ཞིང་སོང་༔ བརྒྱལ་བྱེད་དྲི་ངན་འཕྱོ་ཞིང་སོང་༔ བདག་དང་རྒྱུ་སྦྱོར་ཡོན་བདག་གི༔ ནད་རྣམས་ཧུབ་ཀྱིས་རོལ་ལ་སོང་༔ གནོད་པའི་གདོན་བགེགས་མ་ལུས་པ༔ བསད་བཅད་ཟ་ཞིང་དེད་ལ་སོང་༔ ཕོ་བདུད་དལ་ཁ་གཡས་སུ་བསྒྱུར༔ མོ་བདུད་དལ་ཁ་གཡོན་དུ་བསྒྱུར༔ སྤྱི་བདུད་དལ་ཁ་མཁའ་ལ་བསྒྱུར༔ སྤྲུལ་པ་སྟོབས་ལྡན་སྡིག་པའི་ཚོགས༔ ལ་ལ་ཤར་གྱི་ཕྱོགས་སུ་ཆོས༔ དྲི་ཟའི་རིགས་གྱུར་གནོད་བྱེད་ཟློག༔ ལ་ལ་ཤར་ལྷོའི་མཚམས་སུ་ཆོས༔ མེ་ལྷའི་རིགས་གྱུར་གནོད་བྱེད་ཟློག༔ ལ་ལ་ལྷོ་ཡི་ཕྱོགས་སུ་ཆོས༔ གཤིན་རྗེའི་རིགས་གྱུར་གནོད་བྱེད་ཟློག༔ ལ་ལ་ལྷོ་ནུབ་མཚམས༴སྲིན་པོའི༴ལ་ལ་ནུབ་ཀྱི༴འཆི་བདག་རིགས༴ལ་ལ་ནུབ་བྱང་མཚམས༴རླུང་ལྷའི་རིགས༴ལ་ལ་བྱང་གི༴གནོད་སྦྱིན་རིགས༴ལ་ལ་བྱང་ཤར་མཚམས༴དབང་ལྡན་རིགས༴ལ་ལ་སྟེང་གི༴ལྷ་གདོན་རིགས༴ལ་ལ་འོག་གི༴ས་བདག་གཉན་རིགས༴ལ་ལ་བར་གྱི་ཕྱོགས་སུ་རྒྱུག༔ སྡེ་བརྒྱད་མི་མིན་ལྷ་འདྲེའི་ཚོགས༔ གསོད་ཅིང་བརླག་ཅིང་ཟ་ཞིང་རྒྱུག༔ རྗེས་ཤུལ་ཙམ་ཡང་མ་བཞག་པར༔ རི་རབ་ཆེན་པོའི་ཟོམས་སུ་ཁྱེར༔ གླིང་བར་མུན་པའི་ཁྲོད་དུ་སྐྲོད༔ ཕྱིར་མི་ལྡོག་པར་མཚམས་ཆོད་ཅིག༔ ཨོཾ་ཨཱཿཧཱུྃ༔ ཨརྩིག་ནིརྩིག་ན་མོ་བྷ་ག་ཝ་ཏེ་བུདྡྷ་བཛྲ་རཏྣ་པདྨ་ཀརྨ་སརྦ་མ་ཧཱ་གུ་རུ་ཤྲཱི་ཧེ་རུ་ཀ་ཧཱུྃ་ཕཊ༔ ཨོཾ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃ༔ བི་ཛ་ཡ་ཧཱུྃ༔ ནཱི་ལ་དཎྜ་ཧཱུྃ༔ ཡ་མཱནྟ་ཀ་ཧཱུྃ༔ ཨཱཪྻ་ཨ་ཙ་ལ་ཧཱུྃ༔ ཧྱ་གྲཱི་ཝ་ཧཱུྃ༔ ཨ་པ་རཱ་ཛི་ཏ་ཧཱུྃ༔ ཨ་མྲྀ་ཏ་ཀུཎྜ་ལཱི་ཧཱུྃ༔ ཏྲཻ་ལོཀྱ་བི་ཛ་ཡ་ཧཱུྃ༔ མ་ཧཱ་བ་ལ་ཧཱུྃ༔ ཛཿཧཱུྃ་བྃ་ཧོཿནག་པོ་ཏི་པ་ར་ཙ་ས་མ་ཡ་ཀ་ལ་རཱུ་པ༔ གརྫ་གརྫ་ཧཱུྃ་ཕཊ༔ ཧ་ན་ཧ་ན་ཧཱུྃ་ཕཊ༔ ད་ཧ་ད་ཧ་ཧཱུྃ་ཕཊ༔ པ་ཙ་པ་ཙ་ཧཱུྃ་ཕཊ༔ བྷནྡྷ་བྷནྡྷ་ཧཱུྃ་ཕཊ༔ ཧུ་ལུ་ཧུ་ལུ་ཧཱུྃ་ཕཊ༔ ཏིཥྛ་ཏིཥྛ་ཧཱུྃ་ཕཊ༔ ཚིནྡྷ་ཚིནྡྷ་ཧཱུྃ་ཕཊ༔ བྷིནྡྷ་བྷིནྡྷ་ཧཱུྃ་ཕཊ༔ སྥོ་ཊ་སྥོ་ཊ་ཧཱུྃ་ཕཊ༔ སྙིང་རྩ་ལ་རྦད་རྦད༔ སྲོག་རྩ་ལ༴བླ་ལ༴ཤ་ལ༴ཁྲག་ལ༴རུས་པ་ལ༴མཱ་ར་ཡ་རྦད་རྦད་བྷྱོ་བྷྱོ༔ ཨུ་ཙ་ཏ་ཡ་ཕཊ༔ ཧཱུྃ་བཞིའི་སྔགས་བརྗོད་ཅིང་ཐུན་གྱིས་བྲབ༔ རྣམ་པར་འཇོམས་པའི་གཟུངས་བརྗོད་ཅིང་སྦྲ་ཁྱིམ་ལ་ཁྲུས་བྱ༔ སྲུང་བའི་གུར་ཁང་བསྒོམ༔ མེ་ཏོག་འཐོར་ཅིང་ཤིས་པ་བརྗོད་པས་རྫོགས་སོ༔ ས་མ་ཡ༔ བསྐྱེད་རྫོགས་གདིང་ལྡན་རྣལ་འབྱོར་གྱིས༔ དེ་ལྟར་ཚུལ་བཞིན་རྫོགས་གྱུར་ན༔ རྐྱེན་ངན་བར་ཆད་ཀུན་ཟློག་ཅིང་༔ ཕྲིན་ལས་འགྲུབ་པར་གདོན་མི་ཟ༔ བཀྲ་ཤིས་བདེ་ལེགས་དཔལ་འཕེལ་རྒྱས༔ བཀའ་སྲུང་དྲེགས་པ་སྡེ་དགུས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ གུ་ཧྱ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་སུམ་ཅུ་རྩ་བདུན་བར་དུ་བཀའ་རྒྱས་བཏབ་སྟེ་མཐར་ཡེ་ཤེས་ཉི་མ་མཐའ་རྒྱས་པས་བསྐུལ་ངོར་བརྡར་ཚང་སྐལ་བཟང་དགོན་དུ་གཏན་ལ་ཕབ་པའོ།།དགེའོ།།ལེགས་སོ།།སརྦ་མངྒ་ལཾ།།།།