DJYD-KABUM-17-TSA-032

Previous Text Back to Volume PageLast text in volume.

Wylie title	gsol mchod skong phrin sna tshogs pa'i skor dgos 'byung nor bu'i gru char
Location	bdud 'joms rin po che bka' 'bum Volume 17, Text 32, Pages 413-489 (Folios 1a1 to 38a4)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Gsol mchod skong phrin sna tshogs pa'i skor dgos 'byung nor bu'i gru char. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 17: 413-489. Kalimpong: Dupjung Lama, 1979-1985.
Side notes	Recto: gsol mchod   Verso: skong phrin sna tshogs
More details More details
Genre	Activity Practices - las tshogs  ·  Mending Rituals - bskang chog  ·  Protector Rituals - gsol mchod

Tibetan Text

[edit]

༄༅། །གསོལ་མཆོད་སྐོང་ཕྲིན་སྣ་ཚོགས་པའི་སྐོར་དགོས་འབྱུང་ནོར་བུའི་གྲུ་ཆར་ཞེས་བྱ་བ་བཞུགས་སོ། །

༄༅། །（ལེགས་ལྡན་ཚོགས་ཀྱི་བདག་པོའི་གཏོར་ཆོག་སྙིང་པོར་དྲིལ་བ་བཞུགས།） ༈ ཨོཾ་སྭ་སྟི། （རྒྱུད་མགོན་ལེགས་ལྡན་ཚོགས་ཀྱི་བདག་པོའི་གཏོར་ཆོག་བྱ་བར་འདོད་པས། གཙང་མའི་སྣོད་དུ་བཤོས་བུ་གྲུ་གསུམ་བརྗིད་ལྡན། མདུན་དུ་ཡུམ་དང་ཕྱོགས་བཞིར་བཀའ་སྡོད་བཞི་རྣམས་ལ་བཤོས་ཕྲན་རེ་བཅས་མཐེབ་ཀྱུས་བསྐོར། །སྨན་རཀ་ཉེར་སྤྱོད་སོགས་མཆོད་རྫས་རྣ）རཾ་ཡཾ་ཁཾ་（གིས་བསང་སྦྱང་།） སྟོང་པའི་ངང་ལས་རླུང་མེ་ཐོད་སྒྱེད་སྟེང་། །བྷནྡྷའི་སྣོད་དུ་ཤ་ལྔ་བདུད་རྩི་ལྔ། །བསྐོལ་ཞིང་འོད་ཞུ་ཟག་མེད་བདུད་རྩིའི་བཅུད། །འདོད་ཡོན་རྒྱ་མཚོའི་སྤྲིན་ཕུང་（2ན）འཕྲོ་བར་གྱུར། །ཨོཾ་ཨཱཿཧཱུྃ་（གིས་བྱིན་བརླབ།） མདུན་རྟེན་སྭ་བྷཱ་ཝ（ས་སྦྱང་།） མདུན་དུ་རབ་འཇིགས་དུར་ཁྲོད་གཞལ་ཡས་དབུས། །པད་ཉི་མི་རོ་རྟ་རོའི་གདན་གྱི་སྟེང་། །ཧཱུྃ་ལས་ལེགས་ལྡན་ཚོགས་ཀྱི་བདག་པོ་ནི། །མཐིང་ནག་ཐུང་ཞིང་སྦོམ་ལ་ཡན་ལག་རགས། །ཁྲོས་འཁྲུགས་རྔམ་བརྗིད་གྲི་ཐོད་སྟེང་འོག་འཛིན། །མཆན་གཡས་བེང་གཟིར་ལྷ་བདུད་དམག་དཔུང་འགྱེད། །དར་ནག་འཇོལ་བེར་དུར་ཁྲོད་ཆས་ཀྱིས་བརྒྱན། །སག་ཏིའི་ལྷམ་གསོལ་གཡོན་བརྐྱང་སྟབས་ཀྱིས་འགྱིང་། །བསྐལ་མེའི་ཀློང་དུ་ཁམས་གསུམ་（2བ）ཟིལ་གནོན་སྐུའི། །སྤྱི་བོར་བྱ་ཁྱུང་སྟ་ཟུར་སེངྒེ་དང་། །རྩིབས་ལོགས་འཕར་དྲེད་ཞབས་ལས་སྟག་མོ་འཕྲོ། །ཡུམ་ཆེན་ཀྲོ་ངྷི་ཤྭ་རི་མ་དང་རྩེ། །ལས་མགོན་བཀའ་སྡོད་དྲེགས་པ་སྡེ་བཞི་དང་། །ཕོ་ཉ་ཡང་སྤྲུལ་དམག་ཚོགས་བསམ་མི་ཁྱབ། །ཀུན་ཀྱང་ཕྲིན་ལས་འདོད་རྒུར་བསྒྱུར་བའི་ཚུལ། །གནས་གསུམ་འོད་ཀྱིས་ཡེ་ཤེས་སྤྱན་དྲངས་གྱུར། །（ཞེས་གསལ་བཏབ་ལ།） ཧཱུྃ། ལང་ཀ་ཡུལ་གྱི་གྲོང་བརྡལ་གྱི། །དབུས་ཀྱི་རི་བོ་མ་ལ་ཡ། །ཀོ་ཀ་ཐང་མར་རྒྱ་མཚོའི་དོ། །དྲག་ཤུལ་ཡོད་པའི་རྩེ་མོ་རུ། །དཔལ་ཆེན་རྡོ་རྗེ་སྲིན་པོ་ཡིས། །བདུད་ཀྱི་སྡེ་རྣམས་བཏུལ་ནས་ཀྱང་། །གསང་སྔགས་འཁོར་ལོ་བསྐོར་བའི་ཚེ། །མིང་གི་དབང་བསྐུར་བྲན་དུ་ཁས་བླངས་པ། །རྡོ་རྗེ་རོ་ལངས་དུར་ཁྲོད་ཚོགས་ཀྱི་བདག །མགོན་པོ་ནག་པོ་ཆེན་པོ་དང་། །ཉེ་གནས་ཀྲོ་ངྷི་ཤྭ་རི་མ། །ཡབ་ཡུམ་གཉིས་སུ་མེད་པའི་འཁོར། །ལང་ཀའི་བདག་པོ་ལ་སོགས་དང་། །སླས་དང་བྱི་མོ་བྲན་མོའི་ཚོགས། །འདུས་པ་ཆེན་པོའི་རྣལ་འབྱོར་པ། །ཕོ་མོ་འཁོར་དང་བཅས་པ་རྣམས། །སངས་རྒྱས་བསྟན་པ་བསྲུང་བའི་ཕྱིར། །གནས་འདིར་སྤྱན་འདྲེན་གཤེགས་（3ན）སུ་གསོལ། །ཨོཾ་ཨེ་ཧྱེ་ཧི་ཤྲཱི་མ་ཧཱ་ཀཱ་ལ་ག་ཎ་པ་ཏིས་པ་རི་ཝཱ་ར་མ་ཧཱ་ཀ་རུ་ཎི་ཀ་དྲི་ཤྱ་ཧོ་ས་མ་ཡ་སྟྭཾ་ཨཱ་ཀཪྴ་ཡ་ཧཱུྃ་ཛཿ ཨེ་ཨཱ་རལླི་ཧྲཱིཾ་ཧྲཱིཾ་ཛ་ཛཿ （ཞེས་སྤྱན་དྲངས།） ས་མ་ཡ་སྟྭཾ་ཏིཥྠ་བཛྲ་（ཞེས་བཞུགས་སུ་གསོལ།） ཨ་ཏི་པཱུ་ཧོཿ པྲ་ཏཱིཙྪ་ཧོཿ（ས་ཕྱག་བྱ།） ཨོཾ་ཤྲཱི་མ་ཧཱ་ཀཱ་ལ་ག་ཎ་པ་ཏི་ས་པ་རི་ཝཱ་ར་ཨརྒྷཾ་（སོགས་ནས་）ཤཔྡ་པཱུ་ཛ་ཧོཿ（འི་བར་གྱིས་ཕྱི་མཆོད་དང་།） མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། （ཞེས་སྨན་རཀ་སྟོབ།） ཨོཾ་བྷུ་རུ་ཀུ་རུ་ཨི་ཙི་ཀི་བྱི་ཨུ་ཙུསྨ་ཀྲོ་ངྷ་ཧཱུྃ་ཕཊ། ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱཧི་ཁཱ་ཧི། （ཞེས་ལན་གསུམ་མམ་བདུན་གྱིས་གཏོར་མ་ཕུལ་ལ།） ཧཱུྃ། ལྷ་ཡི་སྡེ་དཔོན་ཚོགས་ཀྱི་བདག །ལེགས་ལྡན་ནག་པོ་མཐུ་བོ་ཆེ། །ཉེ་གནས་ཀྲོ་ངྷཱི་ཤྭ་རི་མ། །གིང་དང་གནོད་སྦྱིན་སྲིན་པོ་དང་། །མ་མོ་མཁའ་འགྲོ་ཕོ་ཉ་དང་། །སྤྲུལ་པ་ཡང་སྤྲུལ་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཟག་མེད་འདོད་ཡོན་བདུད་རྩི་ཡི། །དམ་རྫས་མཆོད་གཏོར་འདི་བཞེས་ལ། །དེང་འདིར་བཅོལ་བའི་ཕྲིན་ལས་མཛོད། །སངས་རྒྱས་བསྟན་པ་ཁྱོད་ཀྱིས་སྲུངས། །དཀོན་མཆོག་དབུ་འཕང་ཁྱོད་ཀྱིས་བསྟོད། །སློབ་དཔོན་སྐུ་（3བ）དགྲ་ཁྱོད་ཀྱིས་ཐུལ། །སྒྲུབ་པ་པོ་ཡི་སྡོང་གྲོགས་མཛོད། །（ཅེས་བསྟོད་ཅིང་ཕྲིན་ལས་བཅོལ། གཏོར་མ་སྟོབ་ལ་ནོངས་པ་བཟོད་པར་གསོལ། ཡེ་ཤེས་པ་རྟེན་ལ་བསྟིམ་ཞིང་དམ་ཚིག་པ་རང་ལ་བསྡུ། དགེ་བསྔོ་དང་ཤིས་པ་བརྗོད་པས་བདེ་ལེགས་སུ་བྱའོ། །ཞེས་པའང་རྒྱུན་གྱི་གཏོར་ཆོག་འཇུག་པ་བདེ་བའི་ཆེད་དུ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ཛ་ཡནྟུ།། །།） ༈ （གཟའ་མཆོག་རཱ་ཧུ་ལའི་གཏོར་ཆོག་སྙིང་པོར་དྲིལ་བ་བཞུགས་སོ། །） ༈ ཨོཾ་སྭསྟི། （བཀའ་སྲུང་ཁྱབ་འཇུག་ཆེན་པོའི་གཏོར་ཆོག་བྱ་བར་འདོད་པས། གཙང་མའི་སྣོད་དུ་དམར་གཏོར་གྲུ་གསུམ་གཡས་དཀྱུས་འཁོར་རང་འདྲ་བརྒྱད་ཀྱིས་བསྐོར་བ་མཐུན་རྫས་ཀྱིས་གཏམས་པ་དང་། སྨན་རཀ་ཉེར་སྤྱོད་སོགས་མཆོད་རྫས་སུ་འོས་པ་ཅི་འབྱོར་བཤམ་ལ། བདག་གི་རྣལ་འབྱོར་སྔོན་དུ་འགྲོ་བས། མཆོད་གཏོར་རྣམས་）རཾ་ཡཾ་ཁཾ་（གིས་བསང་སྦྱང་།） སྟོང་པའི་ངང་ལས་རླུང་མེ་ཐོད་སྐྱེད་སྟེང་། །བྷནྡྷའི་སྣོད་དུ་ཤ་ལྔ་བདུད་རྩི་ལྔ། །བསྐོལ་ཞིང་འོད་ཞུ་ཟག་མེད་བདུད་རྩིའི་བཅུད། །འདོད་ཡོན་རྒྱ་མཚོའི་སྤྲིན་ཕུང་འཕྲོ་བར་གྱུར། །ཨོཾ་ཨཱཿཧཱུྃ་（གིས་བྱིན་བརླབ།） མདུན་རྟེན་སྭ་བྷཱ་（ཝས་སྦྱང་།） མདུན་དུ་དུར་ཁྲོད་མེ་རླུང་ཁྲག་མཚོའི་དབུས། །གཟའ་མཆོག་ཆེན་པོ་མི་བཟད་དུང་ཁའི་མདོག །དབུ་དགུ་སྟེང་ཞལ་བྱ་（4ན）རོག་གདོང་གིས་མཚན། །ཁྲོས་འཁྲུགས་རྔམས་བརྗིད་ལུས་ཀུན་མིག་གིས་གང་། །ཕྱག་བཞིས་ཆུ་སྲིན་རྒྱལ་མཚན་སྦྲུལ་ཞགས་དང་། །རྭ་ཡི་མདའ་གཞུ་འགེང་ཞིང་དགྲ་སྙིང་གཟིར། །སྐུ་སྨད་སྦྲུལ་མཇུག་དུར་ཁྲོད་ཆས་ཀྱིས་བརྒྱན། །སྤྲུལ་པའི་གཟའ་བརྒྱད་སྲིང་བཞི་རྒྱུ་སྐར་སོགས། །འཇིགས་བྱེད་དྲེགས་པའི་ཚོགས་ཀྱི་དབུས་ན་རོལ། །གནས་གསུམ་འོད་ཀྱིས་ཡེ་ཤེས་སྤྱན་དྲངས་གྱུར། །（ཞེས་གསལ་བཏབ་ལ།） ཧཱུྃ། སྔོན་ཚེ་རྡོ་རྗེ་འཆང་གི་སྤྱན་སྔ་རུ། །ཁས་བླངས་དམ་བཅས་ནག་པོ་མཐུ་བོ་ཆེ། །གཟའ་ཆེན་སྡེ་བརྒྱད་སྲིང་བཞི་རྒྱུ་སྐར་བཅས། །ཚུར་སྤྱོན་ཚུར་སྤྱོན་གནས་འདིར་བཞུགས་སུ་གསོལ། །བཛྲ་ས་མཱ་ཛཿ （ཞེས་སྤྱན་དྲངས།） ས་མ་ཡ་ཏིཥྠ་ལྷན་（གྱིས་བཞུགས་སུ་གསོལ།） ཧཱུྃ། སྤོས་དང་མེ་ཏོག་སྣང་གསལ་ལ་སོགས་དང་། །ཛ་གད་ཕུད་དང་པཉྩ་ཨ་མྲྀ་ཏ། །ཕྱི་ནང་གསང་བའི་མཆོད་སྤྲིན་རྒྱ་མཚོ་དང་། །དངོས་འབྱོར་ཏིང་འཛིན་དགོངས་ཀློང་དག་པས་མཆོད། །ཨོཾ་རཱ་ཧུ་ལ་ས་པ་རི་ཝཱ་ར་བྷྱཿ ཨརྒྷཾ་（ནས་）ཤཔྡ་པྲ་ལྷའི་ཏཱིཙྪ་སྭཱ་ཧཱ། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། （ཞེས་ཉེར་（4བ）སྤྱོད་དང་སྨན་རཀ་སྟོབ།） ཧྲཱི་ཤག་རུ་རག་རཾ་ནཱ་ག་ཙིཏྟ་ཏྲཾ་མ་མ་ཡོ་ཟ་འགྲམ་ཧ་ཧ་ག་ཤ་ལ་ཛཿཛཿ ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། （ཞེས་ལན་བདུན་ནམ་གསུམ་གྱིས་གཏོར་མ་ཕུལ་ལ།） ཧཱུྃ། སྲིན་པོའི་གཟུགས་ཀྱི་གདུག་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །མཚན་གསོལ་གཟའ་མཆོག་རཱ་ཧུ་ལ། །དམ་ཚིག་ཅན་ལ་བདག་བསྟོད་དོ། །རིག་འཛིན་སྲོག་ཤིང་གཏེར་གྱི་བདག །གཙུག་ལག་གཉན་སྲུང་མཐུ་བོ་ཆེ། །རྣལ་འབྱོར་དགྲ་ལྷ་ཐུགས་དམ་ཅན། །དམ་ཉམས་སྲོག་གཅོད་གཙོ་ལ་བསྟོད། །ཁྱོད་ཀྱི་བཀའ་ཉན་གདོང་མོ་བཞི། །རྫུ་འཕྲུལ་རི་རབ་ཐལ་བར་རློག །ནད་དང་མཚོན་གྱི་བདག་མོ་སྟེ། །མཐུ་སྟོབས་ཅན་ལ་བདག་བསྟོད་དོ། །མི་བཟད་དྲག་གཏུམ་རྔམས་པའི་ཚོགས། །གཟའ་བརྒྱད་ལྷ་སྲིན་སྡེ་བརྒྱད་དང་། །རྒྱུ་སྐར་ཉི་ཤུ་རྩ་བརྒྱད་སོགས། །ཕོ་ཉ་ཡང་སྤྲུལ་ཚོགས་ལ་བསྟོད། །（ཅེས་བསྟོད་ཅིང་།） སློབ་དཔོན་པདྨ་འབྱུང་གནས་ཀྱིས། །སིནྡྷུ་རྒྱ་མཚོའི་མཚོ་གླིང་དུ། །ནམ་མཁའི་གཟའ་རྣམས་དམ་ལ་བཏགས། །ཁས་བླངས་བཞིན་དུ་ཕྲིན་ལས་མཛོད། །སྒྲུབ་པ་པོ་ལ་དངོས་གྲུབ་སྩོལ། །གསང་（5ན）སྔགས་བཀའ་ཡི་བསྟན་པ་སྲུངས། །དགྲ་བགེགས་དཔུང་རྣམས་རྡུལ་དུ་རློག །མངོན་སྤྱོད་ཕྲིན་ལས་མྱུར་འགྲུབ་མཛོད། །（ཅེས་ཕྲིན་ལས་གསོལ། མཐར་གཏོར་མ་སྟོབ་པ་སོགས་རྗེས་ཀྱི་བྱ་བ་སྤྱི་དང་མཐུན་པར་བྱའོ། །ཞེས་པའང་རྒྱུན་གྱི་གཏོར་ཆོག་འཇུག་པ་བདེ་བའི་ཆ་རྐྱེན་དུ་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （དམ་ཅན་རྡོ་རྗེ་ལེགས་པའི་གཏོར་ཆོག་སྙིང་པོར་དྲིལ་བ་བཞུགས་སོ། །） ༈ ཨོཾ་སྭ་སྟི། （དམ་ཅན་སྐྱེས་བུ་ཆེན་པོའི་གཏོར་ཆོག་བྱ་བར་འདོད་པས། གཙང་མའི་སྣོད་དུ་གཏོར་མ་གྲུ་བཞི་མཁར་ཐབས་བ་གམ་ཅན་གྱི་ཁར་བཙན་བཤོས་ར་མགོས་བརྒྱན་ཅིང་། རྩ་བར་དཀར་བཤོས་བཅུ་གཉིས། མཐར་སྐོར་དུ་མཐེབ་ཀྱུ་བཅོ་ལྔས་བསྐོར་བ་མཐུན་རྫས་ཀྱིས་གཏམས་པ་དང་། སྨན་རཀ་ཉེར་སྤྱོད་སོགས་མཆོད་རྫས་སུ་འོས་པ་ཅི་འབྱོར་བཤམ་ལ། བདག་གི་རྣལ་འབྱོར་སྔོན་དུ་འགྲོ་བས། མཆོད་གཏོར་）རཾ་ཡཾ་ཁཾ་（གིས་བསང་སྦྱང་།） སྟོང་པའི་ངང་ལས་རླུང་མེ་ཐོད་སྒྱེད་སྟེང་། །བྷནྡྷའི་སྣོད་དུ་ཤ་ལྔ་བདུད་རྩི་ལྔ། །བསྐོལ་ཞིང་འོད་ཞུ་ཟག་མེད་བདུད་རྩིའི་བཅུད། །འདོད་ཡོན་རྒྱ་མཚོའི་སྤྲིན་ཕུང་འཕྲོ་བར་གྱུར། །ཨོཾ་ཨཱཿཧཱུྃ་（གིས་བྱིན་བརླབ།） མདུན་རྟེན་སྭ་བྷཱ་ཝ（ས་སྦྱང་།） མདུན་དུ་རཀྟའི་རྒྱ་མཚོ་འཁྲུགས་པའི་ཀློང་། །ཕ་ཝཾ་ལོང་བུའི་སྐུ་མཁར་（5བ）མཐོ་བརྗིད་དབུས། །སྐྱེས་བུ་ཆེན་པོ་དམར་ནག་འཇིགས་པའི་གཟུགས། །ཕྱག་གཉིས་རྡོ་རྗེ་དང་ནི་དགྲ་སྙིང་འཛིན། །དར་བེར་སག་ཞུ་སྟག་རལ་གཟིག་ཤུབ་བཅང་། །ཁྲོ་གཏུམ་རྔམས་ཚུལ་རྩལ་ལྡན་སེང་གེ་ཆིབས། །གིང་ཆེན་སྡེ་བཞི་བརྟན་མ་བཅུ་གཉིས་དང་། །མཆེད་འཁོར་དགེ་བསྙེན་སུམ་བརྒྱ་དྲུག་ཅུ་སོགས། །ཟ་བྱེད་ལས་མཁན་དྲགས་པའི་དབུས་ན་རོལ། །གནས་གསུམ་འོད་ཀྱིས་ཡེ་ཤེས་སྤྱན་དྲངས་གྱུར། །（ཞེས་གསལ་བཏབ་ལ།） ཀྱེེ། རྒྱལ་བ་ཤཱཀྱའི་བསྟན་པ་ལ། །རྡོ་རྗེ་འཛིན་པའི་བཀའ་བཞིན་དུ། བསྟན་པ་སྲུང་བའི་མཐུ་རྩལ་ཅན། །རྡོ་རྗེ་ལེགས་པ་གཤེགས་སུ་གསོལ། །གཙུག་ལག་ཆོས་འཁོར་དབེན་གནས་དང་། །གནས་མཆོག་དམ་པ་གར་བཞུགས་ཀྱང་། །གདུང་བའི་ཡིད་ཀྱིས་སྤྱན་འདྲེན་ནོ། །དམ་ཚིག་དབང་གིས་གཤེགས་སུ་གསོལ། །བཛྲ་སཱ་ངྷུ་ཏྲི་ཤཱུ་ལ་ཛ་ཧཱུྃ་བཾ་ཧོཿ ས་མ་ཡ་ཛཿཛཿ （ཞེས་པས་སྤྱན་དྲངས།） ཧཱུྃ། དམ་ཅན་སྐྱེས་བུ་འཁོར་དང་བཅས། །དེང་གི་གནས་མཆོག་དམ་པ་འདིར། །དགྱེས་པའི་ཚུལ་གྱིས་བཞུགས་སུ་གསོལ། །ཕྱག་འཚལ་མཆོད་པ་སྣ་ཚོགས་འབུལ། །དམ་རྫས་སྨན་（6ན）གཏོར་རཀྟ་དང་། །ཕྱི་ནང་གསང་བའི་མཆོད་པ་རྣམས། །དམ་ཅན་འཁོར་དང་བཅས་ལ་འབུལ། །སྐྱེས་མཆོག་ཐུགས་དམ་སྐོང་གྱུར་ཅིག །བཛྲ་སཱ་ངྷུ་ས་མ་ཡ་ཏྲི་ཤཱུ་ལ་ས་པ་རི་ཝཱ་ར་ཨརྒྷཾ་（ནས་）ཤཔྡ་པྲ་ཏཱིཙྪ་སྭཱ་ཧཱ། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། （ཞེས་ཕྱི་ནང་གི་མཆོད་པ་དང་།） ཨོཾ་བཛྲ་སཱ་ངྷུ་ས་མ་ཡ་བྷག་ཏྲཾ་ཤེ་ནི་ཀྲ་མ་ནི་ས་མ་ཡ་སཱ་ངྷུ་ཏྲི་ཛཿ ཛ་ཧཱུྃ་བཾ་ཧོ་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། （ཞེས་ལན་བདུན་ནམ་གསུམ་གྱིས་གཏོར་མ་ཕུལ་ལ།） ཀྱེ། ཉི་མ་ནུབ་ལ་མངའ་མཛད་ཅིང་། །གནམ་ས་ཕྱེད་ཀྱི་བདག་པོ་སྟེ། །འཛམ་བུ་གླིང་གི་སྐྱེས་གཅིག་པུ། །དགྲ་ལྷ་ཆེན་པོ་ཁྱོད་ལ་བསྟོད། །མངོན་ཤེས་རྫུ་འཕྲུལ་སྟོབས་ཀྱི་བདག །མཆེད་འཁོར་སུམ་བརྒྱ་དྲུག་ཅུས་བསྐོར། །སྐྱེས་བུ་ཆེན་པོ་འཁོར་བཅས་ལ། །རབ་གུས་དང་བས་བདག་བསྟོད་དོ། །བཅོམ་ལྡན་ཕྱག་ན་རྡོ་རྗེ་དང་། །སློབ་དཔོན་པདྨ་འབྱུང་གནས་ཀྱིས། །བཀའ་དང་དམ་ལ་བཏགས་ནས་ཀྱང་། །དབང་བསྐུར་གསང་བའི་མཚན་ཡང་བཏགས། །གསང་སྔགས་བཀའ་ཡི་སྲུང་མར་བཅོལ། །གཏེར་སྲུང་ཆེན་པོ་ཁྱོད་ལ་བསྟོད། །（6བ）སྔོན་ཚེ་ཞལ་བཞེས་དམ་བཅས་བཞིན། །མཆོད་གཏོར་བཤོས་བུ་འདི་བཞེས་ལ། །རྣལ་འབྱོར་བདག་གི་བསམ་པ་སྒྲུབས། །བཅོལ་བའི་ཕྲིན་ལས་འགྲུབ་པར་མཛོད། །（ཅེས་བསྟོད་ཅིང་ཕྲིན་ལས་གསོལ། མཐར་གཏོར་མ་སྟོབ་པ་སོགས་རྗེས་ཀྱི་བྱ་བ་སྤྱི་དང་མཐུན་པར་བྱའོ། །ཞེས་པའང་རྒྱུན་གྱི་གཏོར་ཆོག་ལ་འཇུག་པ་བདེ་བའི་ཆ་རྐྱེན་དུ་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （རྩ་གསུམ་དམ་ཅན་རྒྱ་མཚོའི་གསོལ་མཆོད་ཉུང་བསྡུས་ནི།） རཾ་ཡཾ་ཁཾ། གསེར་སྐྱེམས་གཏོར་མ་འདོད་རྒུའི་དཔལ་ཡོན་ཕུན་སུམ་ཚོགས་པ་ཟད་མི་ཤེས་པའི་ལོངས་སྤྱོད་ཀྱི་གཏེར་དུ་གྱུར། །ཨོཾ་ཨཱཿཧཱུྃ། རྒྱལ་བ་དགོངས་པ་བརྡ་དང་སྙན་ནས་བརྒྱུད། །སྨོན་ལམ་དབང་བསྐུར་ལས་འཕྲོ་གཏེར་བརྒྱུད་སོགས། །རིག་འཛིན་རྩལ་འཆང་རྩ་བརྒྱུད་བླ་མ་རྣམས། །གསོལ་ལོ་མཆོད་དོ་བྱིན་རླབས་ཆར་དུ་ཕོབ། །རྒྱུད་སྡེ་བཞི་དྲུག་ཐེག་རིམ་དགུར་འབྲེལ་བའི། །རབ་འབྱམས་ཡི་དམ་ཞི་དང་ཁྲོ་བོའི་ལྷ། །གནས་གསུམ་དཔའ་པོ་མཁའ་འགྲོ་རྒྱ་མཚོ་རྣམས། །གསོལ་ལོ་མཆོད་དོ་དངོས་གྲུབ་རྣམ་གཉིས་སྩོལ། །དཔལ་མགོན་ལེགས་ལྡན་ཚོགས་བདག་ལྷ་ཆེན་པོ། །ཁྱབ་འཇུག་དམ་ཅན་བཙན་རྒོད་（7ན）འབར་བ་ཆེ། །ཨེ་ཀ་ཛ་ཊཱི་ལྷ་མོ་རང་བྱུང་རྒྱལ། །དུར་ཁྲོད་བདག་མོ་ཚེ་རིང་མཆེད་ལྔ་སོགས། །རྩ་བརྒྱུད་བླ་མའི་སྤྱན་སྔར་དམ་ནོས་པའི། །ཕོ་རྒྱུད་མོ་རྒྱུད་བསྟན་སྲུང་དྲེགས་པའི་སྡེ། །གནོད་སྦྱིན་ནོར་ལྷ་གཏེར་འཆང་གཞི་ཡི་བདག །མ་ལུས་ལུས་པ་མེད་པ་ཐམས་ཅད་ལ། །སོ་སོའི་དགྱེས་རྒུར་འཆར་བའི་འདོད་ཡོན་སྤྲིན། །དམ་རྫས་བདུད་རྩིའི་གསེར་སྐྱེམས་འདི་འབུལ་ལོ། །བྱང་ཆུབ་བར་དུ་སྲུང་སྐྱོབ་མི་གཡེལ་བར། །འགལ་རྐྱེན་ཀུན་སོལ་མཐུན་རྐྱེན་ཡིད་བཞིན་སྤེལ། །བདག་ཅག་རྣམས་ཀྱིས་ཇི་ལྟར་གསོལ་བའི་དོན། །ཐོགས་མེད་ལྷུན་གྱིས་འགྲུབ་པའི་ཕྲིན་ལས་མཛོད། །（ཅེས་པའང་མ་ཧཱ་ཀོ་ཊིའི་ཆོས་གྲྭར་རིན་ཆེན་གཏེར་མཛོད་དབང་ལུང་སྐབས་རྒྱུན་གསོལ་འདི་ལྟར་དགོས་ཞེས་གཏེར་སྟོན་མཆོག་གི་བཀས་བསྐུལ་ངོར་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ། །།） ༈ （པད་གླིང་མགོན་པོ་སྡེ་བརྒྱད་ཀྱི་རྒྱུན་གསོལ་ནི།） ཧཱུྃ། བཅོམ་ལྡན་ཁྲག་འཐུང་ཧེ་རུ་ཀ་ཡབ་ཡུམ། །བསྟན་པ་བསྲུང་ཞིང་མི་བསྲུན་འདུལ་བའི་ཕྱིར། །རབ་འཇིགས་འབར་བའི་སྐུར་བཞེངས་བསྟན་སྲུང་གཙོ། །དཔལ་མགོན་སྡེ་བརྒྱད་སྤྲུལ་འཁོར་བཀའ་སྡོད་（7བ）བཅས། །དམ་ཚིག་གནས་འདིར་སྤྱན་འདྲེན་དགྱེས་པར་བཞུགས། །ཕྱི་ནང་གསང་བ་མཐུན་རྫས་མཁོ་རྒུའི་སྤྲིན། །དངོས་འབྱོར་ཡིད་སྤྲུལ་ནམ་མཁའི་ཁམས་གང་བས། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །གུས་པས་བསྟོད་དོ་མི་འབྲལ་བརྩེ་བས་སྐྱོངས། །འགལ་རྐྱེན་ཀུན་སེལ་མཐུན་རྐྱེན་ཡིད་བཞིན་སྒྲུབས། །གདུག་ཅན་དགྲ་བགེགས་ཐལ་བའི་རྡུལ་དུ་རློག །བཅོལ་བའི་ཕྲིན་ལས་དུས་འདིར་མྱུར་འགྲུབ་མཛོད། །（ཅེས་པའང་སྔགས་བཙུན་འཇམ་དཔལ་རྡོ་རྗེས་བསྐུལ་བའི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཀྱེ། དཔལ་ལྡན་ཡེ་ཤེས་མགོན་པོ་ལེགས་ལྡན་ནག །སྤྲུལ་པ་དགྲ་བླ་ཕྱག་བརྙན་འཁོར་ཚོགས་བཅས། །འདིར་གཤེགས་དམ་རྫས་བདུད་རྩིའི་མཆོད་པ་བཞེས། །རྟག་ཏུ་སྲུང་སྐྱོབ་སྡོང་གྲོགས་མི་གཡེལ་བར། །འགལ་རྐྱེན་ཀུན་སོལ་བསམ་དོན་ཡིད་བཞིན་སྒྲུབས། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །ཅེས་པའང་བྱང་ཆུབ་ཆོས་འཕེལ་གྱི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །། ༈ （སྔགས་སྲུང་མའི་གསོལ་ཕྲིན་དམ་ལྡན་རེ་སྐོང་བཞུགས།） ༈ ཧཱུྃ། སྣང་སྲིད་གདོད་ནས་ཀུན་བཟང་མོ། །བདེ་ཆེན་ཡུམ་གྱི་（8ན）མཁའ་དབྱིངས་ཆེ། །ཀ་དག་སྤྲོས་པ་བྲལ་བའི་གདངས། །འགགས་མེད་ཟུང་འཇུག་ལྷུན་གྲུབ་རྩལ། །ཀུན་ཁྱབ་ཐུགས་རྗེ་སྒྱུ་མའི་འཕྲུལ། །ཤེས་རབ་ཕྱག་རྒྱའི་གར་བསྒྱུར་བ། །སྔགས་སྲུང་རྡོ་རྗེ་རལ་གཅིག་མ། །སྤྲུལ་འཁོར་མ་མོའི་ཚོགས་དང་བཅས། །དོན་དམ་འདུ་འབྲལ་མི་དམིགས་ཕྱིར། །གཤེགས་བྱོན་བཞུགས་པ་ལས་འདས་ཀྱང་། །ཀུན་རྫོབ་བརྡ་ཡི་ཚུལ་ཙམ་དུ། །དམ་ཚིག་གནས་འདིར་སྤྱན་འདྲེན་གྱི། །རང་སྣང་དགྱེས་རྒུའི་ཞིང་ཀུན་ནས། །བརྩེ་བས་དགོངས་ཏེ་ད་ཚུར་བྱོན། །ཏིང་འཛིན་རོལ་མོའི་ཆོ་འཕྲུལ་ལས། །ནམ་མཁའ་མཛོད་དུ་འཆར་བའི་སྤྲིན། །འདོད་ཡོན་ལྔ་ཡི་ལོངས་སྤྱོད་གཏེར། །མཐུན་པའི་དམ་རྫས་མ་ཚང་མེད། །ཤེས་རབ་སྟོང་ཆེན་བྷ་ག་རུ། །ཐབས་མཆོག་རིག་པའི་རྡོ་རྗེ་ཆེ། །མཉམ་སྦྱོར་བྱང་སེམས་བདེ་བའི་རྒྱུན། །དགའ་བཞིའི་ཟིལ་དངར་གྱིས་སྦྲན་པས། །གཉིས་སྣང་འཁྲུལ་རྟོག་རུ་དྲའི་དཔུང་། །བདག་མེད་ཆེན་པོར་ཡོངས་བསྒྲལ་བ། །འཁོར་གསུམ་སྤྲོས་པ་ལས་འདས་པའི། །བདེ་ཆེན་རྡོ་རྗེའི་དམ་ཚིག་འདིས། །ཐུགས་དམ་གཉན་པོ་དབྱིངས་སུ་（8བ）བསྐང་། །གློ་བུར་མ་རིག་དབང་གྱུར་པའི། །ཉེས་བྱས་འགལ་འཁྲུལ་དྲི་མའི་ཚོགས། །ཆོས་དབྱིངས་མཁའ་ལྟར་དག་པའི་ཀློང་། །བཟོད་བཞེས་ཚངས་པའི་དངོས་གྲུབ་སྩོལ། །གཡར་དམ་མཉན་པོ་ཇི་བཞིན་དུ། །དགྱེས་པ་ཆེན་པོས་རྟག་དགོངས་ལ། །སྒྲུབ་མཆོག་རྣལ་འབྱོར་བུ་ལྟར་སྐྱོངས། །ཕྱི་ནང་འབྱུང་བའི་གཡོ་འཁྲུགས་སོགས། །མི་མཐུན་བར་ཆད་ཐམས་ཅད་སོལ། །ཉམས་དང་རྟོགས་པའི་ཡེ་ཤེས་སྐྱེད། །ཚེ་བསོད་འཁོར་སློབ་འདུ་བ་སྤེལ། །ཆེ་བཙན་ལྷ་འདྲེ་མི་ནོར་ཟས། །ཕུན་ཚོགས་དཔལ་ཀུན་དབང་དུ་སྡུས། །གནོད་ཅིང་འཚེ་བའི་བདུད་དགྲའི་དཔུང་། །ལྷ་ཡང་རུང་སྟེ་རྡུལ་དུ་རློག །སྣང་སྲིད་མ་མོ་འཁྲུགས་པ་ཡི། །ཆོ་འཕྲུལ་ལྟས་ངན་དགྲ་ལ་སྒྱུར། །ཟབ་གསང་ཐེག་མཆོག་སྙིང་པོ་འདིའི། །བསྟན་པ་ཕྱོགས་མཐར་རྒྱས་ནས་ཀྱང་། །གདུལ་བྱ་སྨིན་གྲོལ་ཕྲིན་ལས་མཛོད། །（ཅེས་པའང་རང་ཉིད་ཀྱིས་མངོན་པར་འདོད་པའི་ཕྲིན་ལས་བསྐུལ་བར་སྐབས་སུ་བབས་པའི་དུས་ཤིག་ཏུ་འཇིགས་བྲལ་ཡེ་ཤེས་རྡོ་རྗེས་བྲིས་པའོ།། །།） ༈ （མ་གཟའ་རྡོར་གསུམ་གྱི་གསོལ་མཆོད་ཉེ་བར་བསྡུས་པ་བཞུགས།） ༈ ཧཱུྃ་བྷྱོ། ཀུན་ཏུ་བཟང་མོ་དབྱིངས་ཀྱི་ཡུམ། །སྔགས་（9ན）སྲུང་ཆེན་མོ་རལ་གཅིག་མ། །སྣང་སྲིད་མ་མོ་འབུམ་སྡེར་བཅས། །འདིར་གཤེགས་དམ་རྫས་མཆོད་གཏོར་བཞེས། །གསང་སྔགས་རྫོགས་པ་ཆེན་པོ་ཡི། །བསྟན་པའི་གཉེར་ཁ་སྐྱོང་བ་ལ། །ཐུགས་རྗེ་ཐུགས་དམ་མ་གཡེལ་བར། །དུས་འདིར་ཕྲིན་ལས་སྒྲུབས་པར་མཛོད། ཧཱུྃ། འཇིགས་བྱེད་གཟའ་བདུད་རཱ་ཧུ་ལ། །སྤྲུལ་པའི་གཟའ་བརྒྱད་གདོང་མོ་བཞི། །རྒྱུ་སྐར་ཉེར་བརྒྱད་དམག་ཚོགས་བཅས། །འདིར་བྱོན་ཤ་ཁྲག་གཏོར་མ་རོལ། །མ་གཡེལ་ཕྲིན་ལས་རྩལ་ཕྱུངས་ལ། །བསྟན་དགྲ་དམ་ཉམས་མྱུར་དུ་སྒྲོལ། །སྒྲུབ་མཆོག་རྣལ་འབྱོར་བུ་བཞིན་སྐྱོངས། །དམ་ལས་མ་འདའ་ལས་མཛོད་ཅིག །ཧཱུྃ། སྐྱེས་བུ་ཆེན་པོ་རྡོ་རྗེ་ལེགས། །དགྱེས་སྡེ་ཀོང་བཙུན་བརྟན་མའི་ཚོགས། །སྤྲུལ་འཁོར་བྱེ་བ་འབུམ་ཕྲག་བཅས། །འདིར་བྱོན་མཐུན་རྫས་མཆོད་གཏོར་བཞེས། །གསང་ཆེན་བསྟན་དང་བསྟན་འཛིན་གྱི། །མངའ་ཐང་སྤེལ་ལ་མཐུ་མ་ཆུང་། །རྟག་ཏུ་སྡོང་གྲོགས་མ་གཡེལ་བར། །ལས་བཞིའི་ཕྲིན་ལས་མྱུར་སྒྲུབ་མཛོད། །（ཅེས་པའང་བང་རིའི་མཆོག་སྤྲུལ་ཀུན་བཟང་བསྟན་པའི་རྒྱལ་མཚན་གྱི་གསུང་（9བ）གི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （མ་གཅིག་དཔལ་ལྡན་ལྷ་མོའི་སྐོང་བ་འདོད་རྒུའི་སྙེ་མ་ཞེས་བྱ་བ་བཞུགས།） ༈ ན་མོ་པདྨ་སམྦྷ་ཝ་ཡ། （དམ་རྫས་མཆོད་གཏོར་བཤམས་པ་ནམ་མཁའ་མཛོད་ཀྱི་རང་བཞིན་དུ་སྤེལ་ལ།） བྷྱོ། བདེ་ཆེན་སྤྲོས་དང་བྲལ་བའི་ཡེ་ཤེས་དབྱིངས། །ཟུང་འཇུག་སྒྱུ་མའི་ཉམས་བརྒྱར་རོལ་པ་ལས། །བསྟན་སྲུང་ཡོངས་ཀྱི་རྗེ་མོའི་སྐུར་བཞེངས་པ། །དཔལ་ལྡན་ལྷ་མོ་འཁོར་བཅས་ད་ཚུར་བྱོན། །ཏིང་འཛིན་རོལ་མོའི་བཀོད་པ་འབྱམས་ཀླས་པས། །ངོ་མཚར་དགྱེས་རྒུར་འཆར་བའི་འདོད་ཡོན་སྤྲིན། །འཛད་མེད་ནམ་མཁའ་མཛོད་ཀྱི་གཏེར་ཆེན་པོས། །མ་གཅིག་ལྷ་མོ་འཁོར་བཅས་ཐུགས་དམ་བསྐང་། །ཉེར་སྤྱོད་འདོད་ཡོན་སྨན་རཀ་བདུད་རྩིའི་བཅུད། །བཟའ་བཅའི་གཏོར་མ་དཀར་མངར་གཙང་སྦྱར་སྐྱེམས། །རྨད་བྱུང་སྦྱོར་སྒྲོལ་ཕྱི་ནང་གསང་མཆོད་ཀྱིས། །མ་གཅིག་ལྷ་མོ་འཁོར་བཅས་ཐུགས༴ ། ནལ་བུའི་ཤ་ཁྲག་རྒྱལ་མཚན་གྲི་རྒོད་སྙིང་། །འཁྲུལ་མེད་སྲོག་གི་འཁོར་ལོ་བླ་རྡོ་སོགས། །མཐུན་ཅིང་བརྟེན་པའི་དམ་རྫས་སྣ་ཚོགས་པས། །མ་གཅིག་ལྷ་མོ་འཁོར་བཅས་ཐུགས༴ ། གསལ་སྣང་སྒོམ་པ་སྐུ་ཡི་བསྐྱེད་（10ན）རིམ་དང་། །བཟླས་བརྗོད་སྙིང་པོ་གསུང་གི་གནད་ནས་དྲངས། །རིག་སྟོང་ཀ་དག་ཐུགས་ཀྱི་ལྟ་བ་ཡིས། །མ་གཅིག་ལྷ་མོ་འཁོར་བཅས་ཐུགས་དམ་བསྐང་། །རྣམ་པ་འཁོར་འདས་དབང་མོའི་ཚུལ་སྣང་ཡང་། །དོན་དམ་འགྱུར་མེད་ཀུན་བཟང་གདོད་མའི་གཤིས། །ཡེ་ནས་འདུ་འབྲལ་མེད་པའི་དམ་ཚིག་གིས། །ཐུགས་དམ་བདེ་བ་ཆེན་པོར་ཡོངས་བསྐང་ནས། །སྒྲུབ་པའི་རིག་འཛིན་རྣལ་འབྱོར་བདག་ཅག་ལ། །རྟག་ཏུ་བརྩེར་དགོངས་སྡོང་གྲོགས་མ་གཡེལ་བར། །མངོན་པར་འདོད་པའི་དོན་རྣམས་མ་ལུས་པ། །གེགས་མེད་དུས་འདིར་འགྲུབ་པའི་ཕྲིན་ལས་མཛོད། །（ཅེས་ཐུགས་དམ་བསྐང་ཞིང་ཕྲིན་ལས་ཀྱི་གཉེར་གཏད་པར་བྱའོ། །ཞེས་པའང་རྡོ་རྗེའི་མཆེད་པོ་འགྱུར་མེད་བསྟན་འཛིན་རྡོ་རྗེའི་གསུང་བསྐུལ་ངོར་འཇིགས་བྲལ་ཡེ་ཤེས་རྡོ་རྗེས་ཤར་མར་དྲིས་པ་ཛ་ཡནྟུ།། །།） ༈ ཀྵཿ དད་པ་དང་ནི་དམ་ཚིག་གཉན་པོ་ཡིས། །གནོད་སྦྱིན་ཤན་པ་འཁོར་བཅས་གནས་འདིར་གཤེགས། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །གང་བསམ་འདོད་དོན་བཅོལ་བའི་ཕྲིན་ལས་མཛོད། །（ཅེས་པའང་ཛྙཱ་ནས་སོ༎ །） （10བ）༈ ཉམས་པའི་སྙིང་ཁྲག་དྲོན་མོས་རབ་མྱོས་གཏུམ་ཆེན་ཁོངས་ནས་འཁྲུགས་པའི་གཟུགས། །སྲིད་པའི་རླུང་ནག་གཡོ་བའི་བང་ལྡན་མཁའ་ལྡིང་ལ་ཞོན་སྟོང་ཁམས་ཉུལ། །དམ་ཉམས་སྲོག་གི་གཤེད་མ་གཅིག་པུ་ཕུང་བྱེད་ཤན་པ་དམར་ནག་ཅེས། །རྣལ་འབྱོར་ཅི་བགྱིའི་ཕོ་ཉར་སྙིང་ཉེ་སྡེ་བརྒྱད་དམག་དཔོན་ཁྱོད་ལ་བསྟོད། （ཛྙཱ་ནས་སོ༎ ། །） ༈ མི་བཟད་བསྐལ་པའི་རླུངནག་འཚུབས་མ་འཁྱོག་པོར་གཡོ་བའི་རྟར་ཆིབས་ཤིང་། །བརླང་པོར་སྤྱོད་པའི་གདུག་ཅན་གློ་སྙིང་ཟས་སུ་བགྱིད་ལ་ཆེར་རྔམས་པས། །རེག་གཅོད་སྤུ་གྲི་རྣོན་པོའི་འཁྲུལ་འཁོར་ཀུན་ཏུ་བསྐོར་མཛད་བཤན་པ་མོ། །སྲོག་སྒྲུབ་མར་གྲགས་སྙིང་ཐིག་བཀའ་ཡི་གཉེར་འཛིན་མཐུ་ཆེན་དབང་མོར་བསྟོད། །（ཛྙཱ་ནས་སོ༎ ། །） ༈ （ཕུར་སྲུང་གསོལ་མཆོད་བསྡུས་པ་ནི། མཆོད་གཏོར་བྱིན་གྱིས་བརླབས་ཏེ།）རང་ཉིད་དཔལ་ཆེན་པོའི་ཐུགས་ཀའི་ཧཱུྃ་གི་འོད་ཟེར་གྱིས་ཕུར་སྲུང་དམ་ཅན་བཅུ་དྲུག་འཁོར་བཅས་བཛྲ་ས་མཱ་ཛཿ（ས་སྤྱན་དྲངས།） ས་མ་ཡ་ཧཱུྃ་（གིས་དམ་ལ་བཞག །）ཨོཾ་བཛྲ་ཀཱི་ལི་ཀཱི་ལ་ཡ་སརྦ་ངྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁཱ་ཧི། （ཞེས་ལན་བདུན་གྱིས་གཏོར་མ་ཕུལ།） ཨརྒྷཾ་（11ན）（སོགས་ནས） ཤཔྡའི་（བར་གྱིས་མཆོད།） ཧཱུྃ། ཁྲག་འཐུང་རྡོ་རྗེ་གཞོན་ནུ་ཡི། །བཀའ་ཉན་སྲུང་མ་དམ་ཚིག་ཅན། །ཤྭ་ན་བདག་ཉིད་ས་བདག་མ། །སྐྱེས་བུ་གིང་བཞི་བཀའ་སྡོད་བཅས། །དམ་རྫས་མཆོད་གཏོར་འདི་བཞེས་ལ། །སྔོན་གྱི་ཐ་ཚིག་མ་བསྙེལ་བར། །རྡོ་རྗེ་ཕུར་བའི་བསྟན་པ་སྲུངས། །བདག་ཅག་རྣལ་འབྱོར་འཁོར་བཅས་ཀྱི། །འགལ་རྐྱེན་སོལ་ལ་མཐུན་རྐྱེན་སྤེལ། །བཅོལ་བའི་ཕྲིན་ལས་འགྲུབ་པར་མཛོད། །（ཅེས་ཕྲིན་ལས་བཅོལ། འདིའང་རྒྱུན་ཁྱེར་ཕྱིར་དུ་ཛྙཱ་ནས་སོ།། །།） ༈ （བྱིས་པ་ལྷ་ལྔའི་གསོལ་མཆོད་ནི། མཆོད་གཏོར་）རཾ་ཡཾ་ཁཾ་（གིས་བསང་སྦྱང་།） ཨོཾ་ཨཱཿཧཱུྃ་（གིས་བྱིན་བརླབས་ཏེ།） ཛཿ དཔལ་ཆེན་རྡོ་རྗེ་གཞོན་ནུའི་ཕྲིན་ལས་གར། །སྲིད་གསུམ་མངའ་བདག་བགེགས་འདུལ་ཁྲོ་བོའི་རྒྱལ། །དབང་ཕྱུག་ཆེན་པོ་བྱིས་པ་ལྷ་ལྔའི་ཚོགས། །ཐུགས་དམ་གནད་ནས་བསྐུལ་ལོ་གནས་འདིར་གཤེགས། །དམ་ཚིག་རྟེན་དང་དབྱེར་མེད་རྟག་བཞུགས་གསོལ། །ཕྱི་ནང་གསང་མཆོད་བཞེད་རྒུའི་དམ་རྫས་སྤྲིན། །དངོས་འབྱོར་ཡིད་སྤྲུལ་ནམ་མཁའི་ཁམས་བཀང་ནས། །གསོལ་ལོ་མཆོད་དོ་（11བ）ཐུགས་དམ་གཉན་པོ་བསྐང་། །གུས་པས་བསྟོད་དོ་རྟག་ཏུ་གཡེལ་མེད་སྐྱོངས། །གནོད་བྱེད་ཆུང་སྲི་བགེགས་རིགས་རྡུལ་དུ་རློག །བྱིས་པའི་ཚེ་སྲོག་བསྐྱེད་ལ་རིགས་བརྒྱུད་སྤེལ། །འདོད་དོན་བཅོལ་བའི་ཕྲིན་ལས་མྱུར་འགྲུབ་མཛོད། །（ཅེས་པའང་ཟུར་རིགས་མི་རྗེ་ཨོ་རྒྱན་རྡོ་རྗེའི་གསུང་གི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཀྱེ། བརྒྱུད་གསུམ་རིན་འཛིན་བཀའ་ཉན་དམ་ཚིག་ཅན། །བསྟན་སྲུང་དགྲ་བླའི་རྗེ་བཙུན་མཐུ་བོ་ཆེ། །ཇག་པ་མེ་ལེན་སྤྲུལ་འཁོར་ཕོ་ཉར་བཅས། །འདིར་གཤེགས་དམ་རྫས་བདུད་རྩིའི་མཆོད་པ་བཞེས། །བདག་སོགས་འཁོར་བཅས་སྲུང་སྐྱོབ་མི་གཡེལ་བར། །འགལ་རྐྱེན་ཀུན་སོལ་བསམ་དོན་ཡིད་བཞིན་སྒྲུབས། །རྟག་རུ་སྡོང་གྲོགས་མེལ་ཚེ་གཉན་པོས་སྐྱོངས། །འདོད་དོན་བཅོལ་བའི་ཕྲིན་ལས་མྱུར་འགྲུབ་མཛོད། །（ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ བྷྱོཿ དབྱིངས་ཀྱི་ཡུམ་ཆེན་གནས་གསུམ་ཌཱ་ཀིའི་གཙོ། །སྔགས་སྲུང་མ་མོ་འཁོར་བཅས་གནས་འདིར་གཤེགས། །ཕྱི་ནང་གསང་བ་དམ་ཚིག་རྫས་ཀྱིས་མཆོད། །ཐུགས་དམ་གཉན་བསྐང་བཅོལ་བའི་ཕྲིན་ལས་（12ན）མཛོད། །（ཅེས་པའང་དམ་ཆོས་སྒྲོལ་མའི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཀྱེ། སློབ་དཔོན་པདྨ་ཐོད་ཕྲེང་གི ། བཀའ་ཉན་གནས་གཏེར་སྐྱོང་བའི་གཙོ། །དགྲ་བླའི་རྒྱལ་པོ་མཐུ་བོ་ཆེ། །སྐྱེས་བུ་ཆེན་པོ་རྡོ་རྗེ་ལེགས། །དགྱེས་སྡེ་ཀོང་བཙུན་དེ་མོ་སྨན། །འཁོར་ཚོགས་སྤྲུལ་པ་རྒྱ་མཚོར་བཅས། །དམ་ཚིག་དབང་གིས་གནས་འདིར་གཤེགས། །གཙང་མའི་མཆོད་གཏོར་གསེར་སྐྱེམས་བཞེས། །དབུ་འཕང་གཉན་པོ་ཡར་ལ་བསྟོད། །རྣལ་འབྱོར་བདག་ཅག་འཁོར་བཅས་ལ། །རྟག་ཏུ་སྡོང་གྲོགས་མ་གཡེལ་བར། །འགལ་རྐྱེན་བར་ཆད་ཐམས་ཅད་སོལ། །དགྲ་འདྲེ་གནོད་བྱེད་རྡུལ་དུ་རློག །སྣོད་བཅུད་ལེགས་ཚོགས་དབང་དུ་སྡུས། །ཆོས་སྲིད་མངའ་ཐང་གོང་དུ་སྤོར། །བསམ་དོན་མྱུར་འགྲུབ་ཕྲིན་ལས་མཛོད། །（ཅེས་པའང་འཁྲུལ་ཞིག་རྡོ་རྗེས་བསྐུལ་བ་ལས་གར་དབང་འགྲོ་འདུལ་གླིང་པས་མཚོ་རྫོང་དབང་དྲག་འབར་བའི་ཕོ་བྲང་དུ་ཤར་མར་བྲིས་པ་ཛནྟུ།། །།） ༈ （ཚེ་རིང་མའི་གཏོར་ཆོག་རྒྱུན་ཁྱེར་ནི།） རཾ་ཡཾ་ཁཾ། ཨོཾ་ཨཱཿཧཱུྃ། （ལན་གསུམ།） རང་གི་ཐུགས་ཀའི་འོད་ཟེར་གྱིས་སྨན་བཙུན་འཁོར་བཅས་སྤྱན་（12བ）དྲངས། བཛྲ་ས་མཱ་ཛཿ ཛཿཧཱུྃ་བཾ་ཧོཿ ཨོཾ་བཛྲ་ངྷཱ་ཀི་ནཱི་ཨ་ཡུ་ཥེ་ཤྭ་རི་ཧྲཱིས་པ་རི་ཝཱ་ར་ཨརྒྷཾ་（སོགས་ནས།） ཤཔྡའི་（བར་དང་།） མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། ཨོཾ་བཛྲ་ངྷཱ་ཀི་ནཱི་ཨ་ཡུ་ཥེ་ཤྭ་རི་ཧྲཱི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁཁཱ་ཧི་ཁཱ་ཧི། （ལན་གསུམ།） འོད་གསལ་རྡོ་རྗེ་བཙུན་མོ་དབྱིངས་ཀྱི་ཡུམ། །རྣམ་འགྱུར་ཐབས་མཁས་ཞིང་སྐྱོང་སྨན་མོའི་ཚུལ། །བདེ་ཆེན་ཡེ་ཤེས་སྐྱེད་མཛད་ཌཱ་ཀི་མ། །ཚེ་རིང་མཆེད་ལྔ་སྤྲུལ་འཁོར་བཅས་ལ་བསྟོད། །སྨན་བཙུན་ཆེན་མོ་འཁོར་བཅས་ཀྱིས། །མཆོད་སྦྱིན་གཏོར་མ་འདི་བཞེས་ལ། （སོགས་ཀྱིས་ཕྲིན་ལས་བཅོལ། མགྲོན་མི་དམིགས་པར་བཞག་གོ ། ཞེས་པའང་ཛྙཱ་ནས་སོ།། །།） ༈ ཀྱེ། ཉི་མ་ཤར་ཕྱོགས་ཀོང་པོའི་ཡུལ། །ལྗོན་པ་ལུང་གི་སྐྱེད་ཚལ་ནས། །པདྨའི་བཀའ་ཉན་སྨན་བཙུན་ཆེ། །རྡོ་རྗེ་དེ་མོ་བོད་ཁམས་སྐྱོང་། །མཆེད་འཁོར་སྨན་ཕྲན་བྱེ་བར་བཅས། །འདིར་གཤེགས་ཟག་མེད་བདུད་རྩིའི་སྐྱེམས། །འདོད་རྒུར་འཆར་བའི་མཆོད་པ་བཞེས། །དགྱེས་ཤིང་བརྩེ་བས་རྟག་འགྲོགས་ཏེ། །འགལ་རྐྱེན་ཉེས་པ་ཐམས་ཅད་སོལ། །མཐུན་རྐྱེན་བསམ་རྒུ་མ་ལུས་（13ན）སྒྲུབས། །བསྐུལ་ལོ་གཉེར་རོ་དམ་ཚིག་ཅན། །ཕྲིན་ལས་མཛོད་ཅིག་ས་མ་ཡ། །（ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ༎ ། །） ༈ ཀྱེ། ཤར་ཕྱོགས་བུ་ཆུ་ལྗོན་པའི་ལྗོངས། །རིག་འཛིན་དགའ་བའི་སྐྱེད་ཚལ་གྱི། །ཡུལ་བདག་སྨན་བཙུན་མཐུ་མོ་ཆེ། །རྡོ་རྗེ་ཀུན་བཟང་གཡུ་ཡི་སྒྲོན། །མཆེད་འཁོར་བཀའ་ཉན་རྒྱ་མཚོར་བཅས། །འདིར་གཤེགས་མཐུན་པའི་དམ་ཚིག་རྫས། །དགྱེས་རྒུར་འཆར་བའི་མཆོད་ཚོགས་བཞེས། །གནས་མགྲོན་དཔོན་སློབ་རྟེན་འབྲེལ་སྒྲིགས། །སྡེ་འདིའི་བསྟན་པའི་སྦྱིན་བདག་གྱིས། །འགལ་རྐྱེན་ཀུན་སོལ་མཐུན་རྐྱེན་སྒྲུབས། །འདོད་དོན་གཉེར་དུ་གཏད་པའི་ལས། །ཐོགས་མེད་མྱུར་དུ་འགྲུབ་པར་མཛོད། །（ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཀྱེ། དབང་ཆེན་བཀའ་ཡི་ཕོ་ཉ་མཐུ་བོ་ཆེ། །ཐང་ལྷ་ཡར་བཞུད་གཉན་པོ་འཁོར་དང་བཅས། །འདིར་གཤེགས་གཙང་མའི་ཕུད་ཀྱི་མཆོད་པ་བཞེས། །རྟག་ཏུ་གཡེལ་མེད་སྡོང་གྲོགས་ཕྲིན་ལས་མཛོད། །（ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། ༎） （13བ）༈ ཀྱེ། པདྨའི་བཀའ་ཉན་གཏེར་སྲུང་དམ་ཚིག་ཅན། །རྔ་རོལ་སྟག་རྩེ་སྤྲུལ་འཁོར་ཕོ་ཉར་བཅས། །འདིར་གཤེགས་དམ་རྫས་མཆོད་གཏོར་འདི་བཞེས་ལ། །ཟབ་གཏེར་བསྟན་པ་རྒྱས་པའི་ཕྲིན་ལས་མཛོད། །（ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （རྟ་ལྷའི་རྒྱལ་པོ་རེ་མནྟའི་མཆོད་ཕྲིན་ཅང་ཤེས་ཆར་འབེབས་ཞེས་བྱ་བ་བཞུགས་སོ། །） ༈ ཧཱུྃཿ ལྷོ་ཡི་ཕྱོགས་ཀྱི་ཕ་ཀི་ན༔ རྟ་ལྷའི་རྒྱལ་པོ་རེ་མནྟ༔ གཡས་ན་ནོར་བུ་འབར་བ་འཛིན༔ གཡོན་ན་བ་དན་རྩེ་གསུམ་ཕྱར༔ སྐུ་ལ་བསེ་ཁྲབ་དམར་པོ་གསོལ༔ རིན་ཆེན་རྒྱན་གྱིས་རབ་ཏུ་བརྒྱན༔ རྟ་སྔོན་ཉྭ་བཞི་ནག་པོ་ཆིབས༔ མེ་ཏོག་ཕྲེང་བས་དོ་ཤལ་བྱས༔ ལྕགས་ཀྱི་བྱ་ཁྲ་གཡས་གཡོན་ལྡིང་༔ རྒྱ་སྟག་གཉིས་ནི་སྔོན་ལ་འགྲོ༔ སེང་གེ་གཉིས་ནི་ཕྱི་ནས་འབྲང་༔ སྤྱི་གཙུག་བྱ་ཁྱུང་སྔོན་པོ་ལྡིང་༔ ཉི་མ་ཤར་རོ་དཔལ་ཤར་རོ༔ དཔལ་རབ་འཆང་བའི་མགོན་པོ་སྟེ༔ ལམ་ལྷའི་རྒྱལ་པོ་བདེ་མཛད་པ༔ དགྲ་ལྷའི་མཆོག་སྟེ་ཉི་མའི་སྲས༔ གཟི་ལྡན་ཁྱོད་ལ་ཕྱག་འཚལ་ལོ༔ དེ་རིང་བཀྲ་ཤིས་གནས་འདིར་བྱོན༔ དགྱེས་རྒུའི་མཆོད་པ་སྣ་ཚོགས་ཀྱིས༔（14ན）མཆོད་དོ་གསོལ་ལོ་ལྷ་ཡི་ཚོགས༔ འགྲོ་བ་ཉམ་ཐག་དོན་སླད་དུ༔ ཐུགས་རྗེའི་དབང་གིས་མགོན་གྱུར་ཅིང་༔ ལམ་གྱི་དགྲ་དང་འཇིགས་པ་སེལ༔ ཁྱུ་མཆོག་རྟ་རྣམས་སྤེལ་མཛད་པ༔ མངའ་མཛད་ཐུབ་དབང་ལྷ་ཡི་ལྷ༔ ཕྱག་འཚལ་གཞོན་ནུ་ར་མནྟ༔ གནོད་གྱུར་དགྲ་ལས་རྒྱལ་བ་དང་༔ ལམ་གྱི་དཔག་ཚད་ཐམས་ཅད་དུ༔ སྐྱོང་ཞིང་རྟ་ནོར་བསྲུང་བ་དང་༔ བདག་གི་རྟ་རྣམས་ཐམས་ཅད་ལ༔ སྲུང་ཞིང་སྐྱོང་དང་སྤེལ་བར་མཛོད༔ སྐྱེས་རབ་མཆོག་ལ་དད་པ་ཡིས༔ རེ་བའི་སེམས་ཀྱིས་ཕྱག་འཚལ་ལོ༔ མགོན་པོ་ཐུགས་རྗེ་ཅན་རྣམས་ཀྱིས༔ རྟ་རྣམས་སྲུང་ཞིང་བསྐྱབ་ཏུ་གསོལ༔ གོད་འདྲེ་གོད་ཡམས་རྡུལ་དུ་རློག༔ དཔལ་དང་གཟི་བརྗིད་འཕེལ་བ་དང་༔ འདོད་རྒུའི་དངོས་གྲུབ་སྩལ་དུ་གསོལ༔ ཨོཾ་ཨཪྻ་རེ་མནྟ་ཧཱུྃ་ཕཊ༔ སྭ་སྟི་སིདྡྷི་བྷྲཱུྃ༔ （ཅེས་པའང་ཆོས་དབང་གཏེར་བྱོན་པདྨ་གཡང་འབུམ་ཡིད་བཞིན་ནོར་བུའི་གཞུང་ལས་བཏུས་ཤིང་སྐབས་སུ་བབས་པའི་ཚིག་སྣོན་ཕྲན་བུ་དང་བཅས་འཇིགས་བྲལ་ཡེ་ཤེས་རྡོ་རྗེས་སྤེལ་བ་ཛ་ཡནྟུ༎ ། །） ༈ （ཨ་ཕྱིའི་གསོལ་མཆོད་རྒྱུན་ཁྱེར་ནི།） རཾ་ཡཾ་ཁཾ་（གིས་（14བ）བསང་སྦྱང་།） ཨོཾ་ཨཱཿཧཱུྃ་（གིས་བྱིན་བརླབ།） རང་གི་ཐུགས་ཀའི་འོད་ཀྱིས་སྨན་བཙུན་ཆེན་མོ་ཨ་ཕྱི་ཆོས་ཀྱི་སྒྲོན་མ་འཁོར་བཅས་བཛྲ་ས་མཱ་ཛཿ（ས་སྤྱན་དྲངས།） ཛཿཧཱུྃ་བྃ་ཧོཿ ཨོཾ་བཛྲ་ཨརྒྷཾ་པཱདྱཾ་（སོགས་ནས།） ཤཔྡའི་（བར་དང་།） ཨོཾ་ཧྲཱིཿམ་མ་ཙཀྲ་སྭཱ་ཧཱ། མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། （ལན་གསུམ་གྱིས་གཏོར་མ་སྨན་རཀ་ཕུལ་ལ།） ཧྲཱིཿ དོན་དམ་ཀུན་བཟང་ཡུམ་གྱི་མཁའ་དབྱིངས་ལས། །རྣམ་འགྱུར་སྨན་བཙུན་ཌཱ་ཀིའི་རྣམ་རོལ་གྱིས། །ངེས་དོན་བསྟན་པ་སྐྱོང་བའི་མཐུ་སྟོབས་ཅན། །ཨ་ཕྱི་ཆོས་སྒྲོན་འཁོར་དང་བཅས་ལ་བསྟོད། །དམ་རྫས་བདུད་རྩིའི་མཆོད་གཏོར་འདི་བཞེས་ལ། །རྣལ་འབྱོར་བདག་ལ་མ་ཡིས་བུ་བཞིན་སྐྱོངས། །འགལ་རྐྱེན་ཀུན་སོལ་མཐུན་རྐྱེན་ཡིད་བཞིན་སྒྲུབས། །འདོད་དོན་བཅོལ་བའི་ཕྲིན་ལས་མྱུར་འགྲུབ་མཛོད། །（ཅེས་པའང་བློ་གྲོས་རྒྱ་མཚོ་དང་པདྨ་བཛྲ་གཉིས་ཀྱི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཀྱེ། རིགས་གསུམ་གཅིག་འདུས་པདྨ་ཐོད་ཕྲེང་རྩལ། །སྙིགས་དུས་ནག་ཕྱོགས་འཇོམས་ཕྱིར་དགྲ་བླའི་ཚུལ། །སྐྱེས་མཆོག་སེང་ཆེན་ནོར་བུ་དགྲ་འདུལ་རྩལ། །སྤྲུལ་འཁོར་ཝེར་མ་བྱེ་བའི་ཚོགས་དང་བཅས། །འདིར་（15ན）གཤེགས་དམ་རྫས་མཆོད་པས་ཐུགས་དམ་བསྐང་། །རྟག་ཏུ་མི་འབྲལ་བྱིན་རླབས་སྲུང་སྐྱོབ་གྱིས། །སྡོང་གྲོགས་ཕྲིན་ལས་གཉན་པོ་མ་གཡེལ་བར། །གང་བསམ་འདོད་དོན་ཐོགས་མེད་མྱུར་འགྲུབ་མཛོད། །（ཅེས་པའང་མྱོས་སྟོན་ཚེ་དབང་དཔལ་འབྱོར་གྱི་ངོར་འཇིགས་བྲལ་ཡེ་ཤེས་རྡོ་རྗེས་སོ༎ ། །） ༈ （སྡེ་བརྒྱད་གསེར་སྐྱེམས་སྐབས་འདོད་སོགས་ཁ་བསྒྱུར་དམིགས་བསལ་སྤྲོ་ན།） གསེར་སྐྱེམས་གཙང་མ་འདི་བཞེས་ལ། །མི་ཕྱུགས་འགོ་བའི་ནད་རིམས་ཀུན། །མྱུར་དུ་ཞི་བའི་ཕྲིན་ལས་མཛོད། །（དེ་བཞིན་དུ་སྦྱར་ཏེ།） ལོ་ཉེས་བཙའ་ཐན་སད་སེར་ཀུན། །མྱུར་དུ་ཞི་བའི་ཕྲིན་ལས༴ ཁེངས་ལོག་ཆོ་འཕྲུལ་གནོད་པ་ཀུན། །མྱུར་དུ་ཞི་བའི་ཕྲིན༴ ། རྨི་ལམ་མཚན་ལྟས་ངན་པ་ཀུན། །མྱུར་དུ་ཞི་བའི༴ ། གློ་བུར་ཀེག་རྐྱེན་སྲི་ངན་ཀུན། །མྱུར་དུ་ཞི་བའི༴ ། གོང་འདྲེ་གོད་ཁ་མ་ལུས་པ། །མྱུར་དུ་ཞི་བའི༴ ། ས་བདག་ཁྲོས་འཁྲུགས་ཉེས་པ་ཀུན། །མྱུར་དུ་ཞི་བའི༴ ། དུས་མིན་ཁ་ཆར་བུ་ཡུག་ཀུན། །མྱུར་དུ་ཞི་བའི༴ ། མི་ཁ་གླེང་གཞི་ངན་པ་ཀུན། །མྱུར་དུ་ཞི་བའི༴ ། ཡུལ་འདིར་ས་བཅུད་རབ་འཕེལ་ནས། །ལོ་ཏོག་ཕུན་ཚོགས་ཕྲིན༴ ། （15བ）ཡུལ་འདིའི་ལེགས་ཚོགས་མ་ལུས་པ། །བདག་གི་དབང་འདུས་ཕྲིན་ལས་མཛོད། །དགྲ་ཇག་ཆོམ་རྐུན་གནོད་འཚེ་ཀུན། །མྱུར་དུ་ཆར་གཅོད་ཕྲིན༴ ། གདོན་བགེགས་བྱད་ཕུར་རྦོད་གཏོང་ཀུན། །མྱུར་དུ་ཕྱིར་བཟློག་ཕྲིན་ལས་མཛོད། །（ཅེས་སྐབས་ཐོབ་བཞིན་སྦྱར་རོ། །ཞེས་པའང་དབང་རི་མཆོག་སྤྲུལ་ཀུན་བཟང་བསྟན་པའི་རྒྱལ་མཚན་གྱི་གསུང་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཨོཾ་ཨཱཿཧཱུྃ། རྩ་གསུམ་ཆོས་སྐྱོང་གཏེར་གྱི་བདག །ཡུལ་འདིའི་གཞི་བདག་འཁོར་བཅས་ལ། །བསང་མཆོད་བདུད་རྩིའི་མཆོད་པ་འབུལ། །འགལ་རྐྱེན་བར་ཆད་ཞི་བ་དང་། །བསམ་དོན་མྱུར་འགྲུབ་ཕྲིན་ལས་མཛོད། །（ཅེས་པའང་ཛྙཱ་ནས་སོ།། །།） ༈ རཾ་ཡཾ་ཁཾ། ཨོཾ་ཨཱཿཧཱུྃ། མཆོག་གསུམ་རྩ་གསུམ་དམ་ཅན་ཆོས་སྐྱོང་ཚོགས། །དགྲ་བླ་ཝེར་མ་གཞི་བདག་འཁོར་བཅས་རྣམས། །འདིར་གཤེགས་བདུད་རྩིའི་བསང་མཆོད་འདི་བཞེས་ལ། །འགལ་རྐྱེན་ཀུན་ཞི་བསམ་དོན་ལྷུན་གྲུབ་མཛོད། །（ཅེས་པའང་ཛྙཱ་ནས་སོ།། །།） ༈ ཀྱེ། བླ་མ་ཡི་དམ་མཁའ་འགྲོ་ཆོས་སྐྱོང་དང་། །ཡུལ་ལྷ་གཞི་བདག་གནས་གཏེར་སྲུང་མའི་ཚོགས། །འདིར་གཤེགས་བདུད་（16ན）རྩི་བསང་གི་མཆོད་པ་བཞེས། །རླུང་རྟ་སྐྱེད་ལ་ཅི་འདོད་ཕྲིན་ལས་མཛོད། །（ཅེས་པའང་ཛྙཱ་ནས་སོ།། །།） ༈ པདྨའི་བཀའ་ཉན་ཟབ་གཏེར་གནས་ཀྱི་བདག །དམ་ཅན་སྐྱེས་བུ་སྨན་བཙུན་གཡུ་ཡི་སྒྲོན། །འཁོར་བཅས་འདིར་གཤེགས་དམ་རྫས་མཆོད་པ་བཞེས། །འགལ་རྐྱེན་ཀུན་སོལ་བསམ་དོན་ལྷུན་འགྲུབ་མཛོད། །（ཛྙཱ་ནས་སོ།། །།） ༈ （སྨན་བཙུན་གཡུ་སྒྲོན་མའི་གསོལ་མཆོད་མདོར་བསྡུས་བཞུགས།） ༈ ན་མོ་པདྨ་ཀཱ་ར་ཡེ། （དམ་རྫས་མཆོད་གཏོར་བཤམ།） རཾ་ཡཾ་ཁཾ། ཨོཾ་ཨཱཿཧཱུྃ་（གིས་བྱིན་བརླབ།） ཀྱེེ། ཀུན་ཁྱབ་སྤྲོས་བྲལ་ཆོས་སྐུ་ལས། །རྩལ་སྣང་མ་འགག་སྒྱུ་མའི་གར། །བདེ་ཆེན་ཡེ་ཤེས་ཌཱ་ཀི་ནཱིའི། །རྣམ་རོལ་སྨན་བཙུན་མཆེད་སྡེ་ལྔ། །སྤྲུལ་འཁོར་སྨན་ཕྲན་འབུམ་ཕྲག་བཅས། །རྣལ་འབྱོར་གདུང་བས་སྤྱན་འདྲེན་ན། །བརྩེ་བའི་ཐུགས་ཀྱིས་གཤེགས་ནས་ཀྱང་། །དམ་ཚིག་རྟེན་དང་དབྱེར་མེད་བཞུགས། །ཕྱི་མཆོད་ཉེར་སྤྱོད་འདོད་ཡོན་ལྔ། །ནང་མཆོད་བདུད་རྩི་སྨན་གཏོར་རཀ ། གསང་མཆོད་བདེ་སྦྱོར་དགའ་བཞིའི་རོ། །བརྟེན་སྒྲུབ་མཆོད་སྐོང་མཐུན་པའི་རྫས། །དངོས་འབྱོར་ཡིད་སྤྲུལ་ནམ་མཁའ་མཛོད། །（16བ）མཁོ་རྒུའི་ལོངས་སྤྱོད་སྤྲིན་ལྟར་གཏིབས། །དགྱེས་རྒུར་འཆར་བའི་དམ་རྫས་ཀྱིས། །གསོལ་ལོ་མཆོད་དོ་ཐུགས་དམ་བསྐང་། །རྨོངས་དང་མ་རིག་བག་མེད་པས། །འགལ་འཁྲུལ་ནོངས་པ་བཟོད་པར་བཞེས། །རྩེ་གཅིག་སྒྲུབ་པའི་རྣལ་འབྱོར་ལ། །དགྱེས་པའི་ཞལ་སྟོན་ཕྲིན་ལས་སྒྲུབས། །བསླུ་མེད་པྲ་ཡི་དངོས་གྲུབ་ཀྱིས། །སྣང་སྲིད་གསལ་བའི་རྣོ་མཐོང་སྟོན། །དོན་གཉིས་ལྷུན་གྲུབ་འདོད་རྒུ་ཡིས། །རེ་བ་ཡིད་བཞིན་སྐོང་བར་མཛོད། །（ཅེས་མཆོད་གཏོར་གཙང་སར་འབུལ་ལོ། །ཞེས་པའང་ཡེ་ཤེས་རྒྱལ་པོའི་གསུང་བསྐུལ་ངོར། འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ། །།） ༈ （སྟག་ཚང་གཏེར་སྲུང་གསོལ་མཆོད་ནི། མཆོད་གཏོར་）རཾ་ཡཾ་ཁཾ་（གིས་བསང་།） ཨོཾ་ཨཱཿཧཱུྃ་（གིས་བྱིན་བརླབས།） ཀྱེ། གཏེར་གྱི་བདག་པོ་དམ་ཚིག་ཅན། །སེང་གེ་བསམ་འགྲུབ་མཐུ་བོ་ཆེ། །བཀའ་སྡོད་སྤྲུལ་པ་ཕོ་ཉར་བཅས། །འདིར་བྱོན་དམ་རྫས་མཆོད་གཏོར་བཞེས། །ཐུགས་དམ་སྐོང་ལ་ཉམས་ཆག་བཤགས། །རྣལ་འབྱོར་གྲོགས་མཛོད་བསམ་དོན་སྒྲུབས། །ཟབ་གཏེར་ཕྲིན་ལས་ཕྱོགས་བཅུར་སྤེལ། །སྙན་གྲགས་མངའ་ཐང་གོང་དུ་སྤོར། །སྲིད་ཞིའི་དགེ་མཚན་དབང་དུ་སྡུས། །སྡང་（17ན）བའི་དགྲ་དཔུང་རྡུལ་དུ་རློག །མདོར་ན་ཅི་འདོད་གང་བརྩམ་ལས། །ཐོགས་མེད་མྱུར་དུ་སྒྲུབས་པས་མཛོད། །（ཅེས་པའང་འདི་ལྟར་དགོས་པའི་མཚན་མ་མཐོང་ནས་འཇིགས་བྲལ་ཡེ་ཤེས་རྡོ་རྗེས་བརྗོད་པ་ཛ་ཡནྟུ།། །།） ༈ （བླ་མ་དྲག་པོ་གྲོ་ལོད་དང་ཕུར་པ་སྤུ་གྲོ་རེག་ཕུང་གི་གཏེར་བདག་སྤ་གྲོ་སྟག་ཚང་གི་གནས་སྲུང་གསོལ་མཆོད་ནི། མཆོད་གཏོར་བྱིན་བརླབ་ལ།） ཀྱེ། སློབ་དཔོན་པདྨ་ཐོད་ཕྲེང་གི ། བཀའ་ཉན་གནས་དང་གཏེར་གྱི་བདག །ལྷ་ཡི་དགེ་བསྙེན་མཐུ་བོ་ཆེ། །སེང་གེ་བསམ་འགྲུབ་འཁོར་དང་བཅས། །འདིར་གཤེགས་དམ་རྫས་མཆོད་གཏོར་བཞེས། །འགལ་རྐྱེན་སོལ་ལ་མཐུན་རྐྱེན་སྒྲུབས། །ཟབ་གཏེར་བསྟན་པ་ཕྱོགས་བཅུར་སྤེལ། །གདུལ་བྱ་སྨིན་གྲོལ་ཕྲིན་ལས་མཛོད། །（ཅེས་པའང་གཏེར་སྲུང་གི་དྲིན་ལན་དུ་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཧཱུྃ། སློབ་དཔོན་པདྨ་ཐོད་ཕྲེང་གི ། བཀའ་ཉན་སྦས་ཡུལ་སྲུང་མཛད་པ། །རྡོ་རྗེ་བྲག་བཙན་མཆེད་འཁོར་བཅས། །འདིར་གཤེགས་དམ་རྫས་གསེར་སྐྱེམས་བཞེས། །ནད་ཡམས་མཚོན་འཁྲུགས་མུ་གེ་སོགས། །མི་འདོད་ཕྱོགས་རྣམས་ཞི་བ་དང་། །མཐུན་（17བ）རྐྱེན་རབ་འབྱམས་ཕྲིན་ལས་ཀུན། །ཐོགས་མེད་མྱུར་དུ་འགྲུབ་པར་མཛོད། །（ཅེས་པའང་རང་གཞན་རྣམས་རྒྱུན་དུ་འཇུག་བདེའི་ཆེད་དུ་ཡེ་ཤེས་རྡོ་རྗེས་བྲིས།། །།） ༈ ཧཱུྃ། སྦས་ཡུལ་པདྨ་བཀོད་ཀྱི་འཁོར་ལོ་ལྔའི། །ཕྱི་ནང་གསང་བའི་གནས་སྲུང་གཏེར་བདག་རྣམས། །མཆོད་གཏོར་འདི་བཞེས་མི་མཐུན་ཞི་བ་དང་། །བསམ་དོན་ལྷུན་གྱིས་འགྲུབ་པའི་ཕྲིན་ལས་མཛོད། །（ཅེས་པའང་ཡེ་ཤེས་རྡོ་རྗེས་སྤེལ་བ་དགེ། །།） ༈ ཨོཾ་ཨཱཿཧཱུྃ། བླ་མ་ཡི་དམ་མཁའ་འགྲོ་ཆོས་སྐྱོང་དང་། །འགོ་བའི་ལྷ་ལྔ་དགྲ་ལྷ་གཉན་པོ་རྣམས། །བསང་མཆོད་བདུད་རྩིའི་ཕུད་ཀྱིས་དགྱེས་པར་བསྐང་། །བདག་གི་རླུང་རྟ་དར་བའི་ཕྲིན་ལས་མཛོད། །（ཅེས་པའང་ཛྙཱ་ནས་སོ།། །།） ༈ ཀྱེེ། སྨན་གཅིག་རྡོ་རྗེ་དེ་མོ་རྩལ། །འཁོར་བཅས་གནས་འདིར་མྱུར་དུ་བྱོན། །དགྱེས་པའི་མཆོད་གཏོར་འདི་བཞེས་ལ། །བརྩེ་བའི་སྡོང་གྲོགས་མ་གཡེལ་བར། །བདག་གི་ཇི་ལྟར་བསམ་པའི་དོན། །གེགས་མེད་མྱུར་འགྲུབ་ཕྲིན་ལས་མཛོད། །（ཅེས་པའང་ཛྙཱ་ནས་སོ།། །།） ༈ （རྡོ་རྗེ་རབ་བརྟན་མའི་གསོལ་མཆོད་མདོར་བསྡུས་ནི། མཆོད་གཏོར）རཾ་ཡཾ་ཁཾ་（གིས་བསང་སྦྱང་།） ཨོཾ་ཨཱཿཧཱུྃ་（གིས་（18ན）རྒྱ་ཆེར་སྤེལ་ལ།） ཀྱེེ། རྒྱལ་བ་ཤཱཀྱ་སེང་གེ་ཡི། །བཀའ་ཡི་བསྟན་སྐྱོང་མཐུ་མོ་ཆེ། །མ་གཅིག་དཔལ་ལྡན་རེ་མ་ཏཱི། །རྡོ་རྗེ་རབ་བརྟན་སྤྲུལ་འཁོར་བཅས། །འདིར་གཤེགས་དགྱེས་པའི་གདན་ལ་བཞུགས། །དངོས་འབྱོར་ཡིད་སྤྲུལ་མཆོད་པའི་སྤྲིན། །ཕྱི་ནང་གསང་བ་བླ་མེད་རྫས། །བཞེད་རྒུར་འཆར་བའི་ལོངས་སྤྱོད་ཀྱིས། །གསོལ་ལོ་མཆོད་དོ་ཐུགས་དམ་བསྐང་། །གུས་པས་ཕྱག་འཚལ་བསྟོད་པར་བགྱི། །རྨོངས་དང་བག་མེད་དབང་གྱུར་པས། །འགལ་འཁྲུལ་ཉམས་ཆག་ཅི་མཆིས་བཤགས། །ཐུགས་དམ་ཆེན་པོས་རབ་དགོངས་ལ། །སངས་རྒྱས་བསྟན་དང་བསྟན་འཛིན་སྐྱོངས། །སྣོད་བཅུད་འཇིག་རྟེན་ཕན་བདེ་སྤེལ། །བསྟན་དགྲ་འབྱུང་པོ་རྡུལ་དུ་རློག །ཁྱད་པར་བདག་ཅག་འཁོར་བཅས་ལ། །རྟག་ཏུ་སྲུང་སྐྱོབ་མ་གཡེལ་བར། །འགལ་རྐྱེན་ཉེས་པ་སྟོང་དང་བསྣོལ། །མཐུན་རྐྱེན་ལེགས་པ་བརྒྱ་དང་སྤྲོད། །ཚེ་སྲིངས་དཔལ་སྐྱེད་འཁོར་ཕྱུགས་སྤེལ། །འགལ་བྱེད་དགྲ་བགེགས་ཆམ་ལ་ཕོབ། །མདོར་ན་ཇི་ལྟར་བསམ་པའི་དོན། །ཐོགས་མེད་མྱུར་དུ་སྒྲུབ་པར་（18བ）མཛོད། །（ཅེས་མཆོད་གཏོར་གཙང་སར་འབུལ་ལོ། །ཞེས་པའང་སྒེར་དབང་ལྡན་བར་མཚོ་བའི་རིགས་སྲས་རྡོ་རྗེ་དོན་གྲུབ་ཀྱི་གསུང་བསྐུལ་ངོར་འཇིགས་བྲལ་ཡེ་ཤེས་རྡོ་རྗེས་བྲིས་པ་ཛ་ཡནྟུ༎ ། །） ༈ ཀྵཿ མཐུ་ཆེན་གནོད་སྦྱིན་ཤན་པ་འཁོར་དང་བཅས། །དམ་ཚིག་དབང་གིས་འདིར་གཤེགས་མཆོད་འབུལ་རོལ། །བདག་གི་ཡིད་ལ་བརྣག་པའི་བསྟན་འགྲོའི་དོན། །གེགས་མེད་དུས་འདིར་འགྲུབ་པའི་ཕྲིན་ལས་མཛོད། །（ཅེས་པའང་ཛྙཱ་ནས་སོ༎ ། །） ༈ ཧཱུྃ། འཇིགས་བྱེད་དྲག་ཤུལ་དབང་པོ་འཁོར་བཅས་ལ། །དམ་རྫས་ཕྱི་ནང་གསང་བའི་མཆོད་པ་འབུལ། །བར་གཅོད་རྒྱལ་འགོང་འབྱུང་པོ་ཚར་ཆོད་ལ། །མཐུན་རྐྱེན་བསམ་དོན་མ་ལུས་མྱུར་འགྲུབ་མཛོད། །（ཅེས་པའང་སྐལ་བཟང་རྣམ་རྒྱལ་ངོར་ཛྙཱ་ནས་སོ།། །།） ༈ ཀྱེ། འོག་མིན་ས་སྤྱོད་གྲོང་ཁྱེར་པདྨ་བཀོད། །སྤྱན་འབྲུག་ཡེ་ཤེས་འཁོར་ལོའི་བྷུ་ལུང་གི ། ཞིང་སྐྱོང་ཚངས་པ་དུང་གི་ཐོར་ཚུགས་ཅན། །ཡབ་ཡུམ་སྤྲུལ་འཁོར་དགྲ་ལྷའི་དཔུང་ཚོགས་བཅས། །འདིར་བྱོན་ཟག་མེད་བདུད་རྩིའི་མཆོད་གཏོར་བཞེས། །ཐུགས་དམ་གཉན་བསྐང་རྣལ་འབྱོར་བདག་ཅག་ལ། །རྟག་ཏུ་མགོན་སྐྱོབ་སྡོང་གྲོགས་（19ན）མ་གཡེལ་བར། །གང་བསམ་ཕྲིན་ལས་ཐོགས་མེད་མྱུར་སྒྲུབ་མཛོད། །（ཅེས་པའང་སྔགས་བཙུན་དཀོན་ཅོག་ཚེ་དབང་གི་ངོར་ཛྙཱ་ནས་སོ།། །།） ༈ ཧཱུྃ། དབྱིངས་ཀྱི་ཡུམ་ཆེན་སྔགས་སྲུང་རལ་གཅིག་མ། །སྣང་སྲིད་མ་མོ་བྱེ་བའི་ཚོགས་དང་བཅས། །འདིར་གཤེགས་དམ་རྫས་བདུད་རྩིའི་མཆོད་གཏོར་བཞེས། །འགལ་འཁྲུལ་ཉམས་ཆག་བཤགས་སོ་བཟོད་པར་གསོལ། །མ་མོ་འཁྲུགས་པའི་ཆོ་འཕྲུལ་ཞི་བ་དང་། །རྟག་ཏུ་དགྱེས་དགོངས་བཅོལ་བའི་ཕྲིན་ལས་མཛོད། །（ཅེས་པའང་ཁམས་སྤྲུལ་འཇིགས་མེད་ཕྲིན་ལས་རྡོ་རྗེའི་གསུང་བསྐུལ་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཧྲཱིཿཀྵཿརཿ མཐུ་ཆེན་དབང་ཕྱུག་ཤན་དམར་གཟའ་བདུད་རྒྱལ། །འཁོར་བཅས་འདིར་གཤེགས་དམ་རྫས་དགྱེས་མཆོད་འབུལ། །ཐུགས་དམ་བསྐང་ངོ་འགལ་འཁྲུལ་བཟོད་པར་བཞེས། །རྣལ་འབྱོར་བཅོལ་བའི་ཕྲིན་ལས་མྱུར་སྒྲུབ་མཛོད། །（ཅེས་པའང་པདྨ་དབང་ཆེན་ངོར་ཛྙཱ་ནས་སོ།། །།） ༈ རཾ་ཡཾ་ཁཾ། ཨོཾ་ཨཱཿཧཱུྃ། ཧཱུྃ། ཡེ་ཤེས་དབྱིངས་ལས་འབར་བའི་སྐུར་བཞེངས་པ། །དཔལ་མགོན་ཕྱག་བཞི་མ་ནིང་བེར་ནག་ཅན། །（19བ）སྔགས་སྲུང་མ་མོ་རེ་ཏི་དུད་སོལ་མ། །ཁྱབ་འཇུག་རྡོར་ལེགས་ལས་གཤིན་རྣམ་ཐོས་སྲས། །ཚེ་རིང་མཆེད་ལྔ་གཡུ་སྒྲོན་ནོར་རྒྱུན་མ། །སྐྱེས་བུ་ལུང་བཙན་བྲག་བཙན་ཀླུ་བདུད་ནག །འཛམ་གླིང་གེ་སར་དགྲ་ལྷ་རྟ་ཐུལ་དཀར། །འགོ་བའི་ལྷ་ལྔ་གནས་གཏེར་གཞི་བདག་སོགས། །མཆོད་པར་འོས་པའི་སྲུང་མ་ཁྱེད་རྣམས་ཀྱིས། །གཙང་སྦྱར་བདུད་རྩིའི་མཆོད་པ་འདི་བཞེས་ལ། །བདག་ཅག་དཔོན་སློབ་འཁོར་དང་བཅས་པ་རྣམས། །རྟག་ཏུ་ཁ་འཛིན་སྡོང་གྲོགས་མ་གཡེལ་བར། །སྡང་བའི་དགྲ་ཐུལ་གནོད་པའི་བགེགས་དཔུང་ཆོམ། །ཉེས་པ་སྟོང་བསྣོལ་ལེགས་པ་བརྒྱ་དང་སྤྲོད། །དཔལ་འབྱོར་ལོངས་སྤྱོད་རླུང་རྟ་ཡར་ལ་བསྐྱེད། །བསམ་དོན་མྱུར་དུ་འགྲུབ་པའི་ཕྲིན་ལས་མཛོད། །（ཅེས་པའང་དྲག་ཤོས་ཀརྨ་དགེ་ལེགས་ཀྱི་གསུང་ངོར་འཇིགས་བྲལ་ཡེ་ཤེས་རྡོ་རྗེས་བྲིས་པའོ།། །།） ༈ （པདྨ་བཀོད་ཀྱི་གནས་སྲུང་གསོལ་མཆོད་མདོར་བསྡུས་བསམ་དོན་ལྷུན་གྲུབ་བཞུགས་སོ། །） ༈ ན་མོ་པདྨ་ཀཱ་ར་ཡེ། （གནས་སྲུང་གསོལ་མཆོད་བྱ་བར་འདོད་པས་གཏོར་མ་དཀར་དམར་རྒྱན་ལྡན་མཆོད་རྫས་གསེར་སྐྱེམས་སྨན་ཕུད་ཀྱིས་བྲན་པ་བཤམ་ལ།） རཾ་ཡཾ་ཁཾ། ཨོཾ་ཨཱཿཧཱུྃ་（གིས་བྱིན་བརླབས་ཏེ།） ཧཱུྃ། རང་（20ན）སྣང་རྣམ་དག་འོག་མིན་ས་སྤྱོད་ཞིང་། །སྦས་པའི་གནས་མཆོག་བདེ་ཆེན་པདྨ་བཀོད། །འཆི་མེད་ཡང་གསང་ཌཱ་ཀིའི་གྲོང་ཁྱེར་ཆེ། །རྟག་ཏུ་སྐྱོང་ཞིང་དགྱེས་པར་རོལ་མཛད་པ། །ལེགས་ལྡན་མ་ཧཱ་ཀཱ་ལ་ཚོགས་ཀྱི་བདག །ཙ་ཏུར་བྷུ་ཛ་བེར་ཅན་ཕྱག་བཞི་པ། །ཕྱག་དྲུག་ཞལ་བཞི་ཏྲཀྴད་མ་ནིང་ནག །དབྱིངས་ཡུམ་ཨེ་ཀ་ཛ་ཊི་མུ་ཁ་ལེ། །ཕག་གདོང་མཆེད་ལྔ་ལྷ་མོ་འབར་གདོང་མ། །སྲོག་སྒྲུབ་ནག་མོ་རེ་ཏཱི་དུད་སོལ་ཅན། །དུར་ཁྲོད་བདག་མོ་ཤ་ཟ་ཁ་མོ་ཆེ། །དབང་ཕྱུག་ཆེན་པོ་ཁྱབ་འཇུག་རཱ་ཧུ་ལ། །ཤན་པ་དམར་ནག་ཀ་ལ་ཡཀྵ་ཆེ། །སེང་གདོང་ཡབ་ཡུམ་བམ་རོ་བདུད་དམག་འབུམ། །ཇོ་བོ་དཔལ་ལྷ་ལས་གཤིན་འཆི་བདག་ནག །བདུད་རྒྱལ་སྦྲུལ་མིག་སྲིན་པོ་ངྷ་ར་ངྷི། །གནུབས་རྗེ་གདོང་བཙན་ཀླུ་བདུད་ཡཀྴ་ནག །སྲོག་བདག་པེ་ཧར་ཞང་བློན་ཨ་གྷོ་ར། །འབར་བ་སྤུན་བདུན་རྡོ་རྗེ་བྲག་བཙན་ཆེ། །ཐང་ལྷ་ཡར་བཞུད་རྨ་རྒྱལ་སྤོམ་ར་གཉན། །རྡོ་རྗེ་གཡུ་སྒྲོན་བརྟན་མ་བཅུ་གཉིས་སོགས། །མདོར་ན་མིང་དང་མཚན་དུ་མ་ཐོན་པའི། །གནས་གཏེར་བསྟན་སྲུང་མཐུ་རྩལ་（20བ）གཡར་དམ་ཅན། །མ་ལུས་འཁོར་དང་བཅས་པ་ཐམས་ཅད་ལ། །རང་རང་མཁོ་རྒུའི་ལོངས་སྤྱོད་མི་ཟད་གཏེར། །དམ་རྫས་འདོད་ཡོན་རྒྱ་མཚོའི་མཆོད་པ་འདིས། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །མ་རིག་དབང་གྱུར་འགལ་འཁྲུལ་བཟོད་པར་བཞེས། །རྟག་ཏུ་བརྩེར་དགོངས་ཐུགས་དམ་ཞལ་བཞེས་བཞིན། །ངོ་མཚར་གནས་ཀྱི་དགེ་མཚན་རབ་སྤེལ་ཞིང་། །མཐའ་དམག་འགོང་པོ་ཀླ་ཀློའི་རྒྱུ་ལམ་ཆོད། །དད་ལྡན་སྐལ་བཟང་མཐུན་པའི་ལམ་སྣ་དྲོངས། །སྦས་ཡུལ་འགྲིམ་པའི་འགལ་རྐྱེན་ཀུན་ཞི་ནས། །མཐུན་རྐྱེན་མ་ལུས་ལྷུན་གྱིས་འགྲུབ་པ་དང་། །གསང་ཆེན་སྙིང་པོའི་སྨིན་གྲོལ་ཟབ་མོའི་བསྟན། །དར་རྒྱས་ཡུན་དུ་གནས་པའི་ཕྲིན་ལས་མཛོད། །（ཅེས་པའང་མཁན་ཆེན་བླ་མ་རྡོ་རྗེ་འདུལ་རྩལ་གྱིས་བཞེད་པ་བཞིན་འཇིགས་བྲལ་དཔའ་བོ་འགྲོ་འདུལ་གླིང་པས་སྤེལ་བ་ཛ་ཡནྟུ།། །།） ༈ རཾ་ཡཾ་ཁཾ། ཨོཾ་ཨཱཿཧཱུྃ། ཀྱེེ། པདྨའི་བཀའ་སྡོང་གཏེར་སྲུང་ཡོངས་ཀྱི་གཙོ། །མཁའ་སྤྱོད་དཔལ་གྱི་གྲོང་ཁྱེར་འབྲས་མོ་གཤོངས། །མཛོད་ལྔའི་བདག་པོ་གནོད་སྦྱིན་བྱེ་བའི་དཔོན། །དངོས་གྲུབ་ཆར་འབེབས་（21ན）རྣམ་སྲས་མདུང་དམར་ཅན། །བཙུན་མོ་བློན་འཁོར་སྤྲུལ་པ་ཡང་སྤྲུལ་བཅས། །གནས་གཏེར་གཞི་ཡི་བདག་པོ་ཁྱེད་རྣམས་ལ། རོ་མཆོག་བརྒྱ་ལྡན་ལྷ་ཡི་ཞལ་ཟས་དང་། །གཙང་སྦྱར་འབྲུ་བཅུད་བདུད་རྩིའི་སྐྱེམས་བཟང་པོ། །ཟག་མེད་འདོད་རྒུར་འཆར་བའི་མཆོད་སྤྲིན་འདིས། །གསོལ་ལོ་མཆོད་དོ་དབུ་འཕང་དགུང་དུ་བསྟོད། །རྟག་ཏུ་ཁྱོད་གསོལ་ཁྱོད་མཆོད་ཁྱོད་བསྙེན་ན། །ཐུགས་དམ་མ་གཡེལ་རྣལ་འབྱོར་བདག་ཅག་གི ། ལུས་དང་གྲིབ་བཞིན་གྲོགས་ཤིང་བསྐྱངས་ནས་ཀྱང་། །ཉེས་པ་སྟོང་བསྣོལ་ལེགས་པ་བརྒྱ་དང་སྤྲོད། །མདོར་ན་བསམ་པའི་རེ་བ་མ་ལུས་པ། །འབད་མེད་ལྷུན་གྱིས་འགྲུབ་པའི་ཕྲིན་ལས་མཛོད། །（ཅེས་པའང་བསྟན་འཛིན་གྱི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈（སྦས་ཡུལ་མཁན་པ་ལྗོངས་ཀྱི་གནས་སྲུང་གི་གསོལ་ཕྲིན་འདོད་པའི་རེ་སྐོང་ཞེས་བྱ་བ་བཞུགས་སོ། །） ༈ ན་མོ་པདྨ་ཀཱ་ར་ཡེ། （མཁན་པ་ལྗོངས་ཀྱི་གནས་སྲུང་ཆེན་པོ་འཁོར་བཅས་མཆོད་པར་འདོད་པས་གཙང་མའི་སྣོད་དུ་དམར་གྱི་བཤོས་བུ་གྲུ་གསུམ་ར་མགོས་མཚན་པ་འཁོར་བཤོས་ཕྲན་བརྒྱ་དང་མཐེབ་ཀྱུ་གང་མང་གིས་བསྐོར་བ་རྒྱན་ལྡན་མཐུན་རྫས་ཀྱིས་གཏམས་（21བ）པ་དང་། ཕྱི་ནང་གི་མཆོད་པ་གསེར་སྐྱེམས་ཕྱེ་མར་བསང་དུད་སོགས་ཅི་འབྱོར་པ་བཤམ་ལ། རང་ཉིད་གུ་རུ་ཞི་དྲག་སོགས་ཡི་དམ་གང་ཡང་རུང་བའི་རྣལ་འབྱོར་ལ་གནས་པས། མཆོད་གཏོར་རྣམས།） རཾ་ཡཾ་ཁཾ་（གིས་བསང་སྦྱང་།） སྟོང་པའི་ངང་ལས་རིན་པོ་ཆེ་དང་ཐོད་པ་ལ་སོགས་པའི་སྣོད་ཡངས་ཤིང་རྒྱ་ཆེ་བར། ལྷ་རྫས་གཙང་མའི་ཉེར་སྤྱོད་འདོད་ཡོན་རང་བྱུང་སྨན་རཀ་བདུད་རྩིའི་རྒྱ་མཚོ། གཏོར་མ་ཟག་མེད་འདོད་ཡོན་གྱི་ཕུང་པོ། དགྲ་བགེགས་བསྒྲལ་བའི་ཤ་རུས་ཀྱི་ལོངས་སྤྱོད། སྤྱན་གཟིགས་དཀོར་ཆ་མཐུན་པའི་དམ་རྫས་སོགས་དགྱེས་རྒུར་འཆར་བའི་མཆོད་སྤྲིན་ནམ་མཁའ་རབ་འབྱམས་གང་བ་རྣམས་སུ་གྱུར། ཨོཾ་ཨཱཿཧཱུྃ། （ལན་གསུམ་གྱི་བརླབ། མགྲོན་སྤྱན་འདྲེན་པ་ནི།） ཧཱུྃ། ཆོས་དབྱིངས་བདེ་ཆེན་སྤྲོས་དང་བྲལ་བ་ལས། །རྣམ་འགྱུར་མ་འགགས་སྒྱུ་འཕྲུལ་དྲྭ་བའི་གར། །མཐུ་ཆེན་དྲེགས་པའི་རྗེ་བོའི་ཚུལ་སྟོན་པ། །བདུད་མགོན་སྐྱེས་བུ་ཟོ་ར་ར་སྐྱེས་ཆེ། །སྨན་བཙུན་ཁྲག་མིག་མཁའ་རི་ལྕམ་དྲལ་དང་། །དམ་ཅན་རྡོར་ལེགས་གནོད་སྦྱིན་རྒོད་མ་ཁ། །ཁྱུང་བདུད་ནག་པོ་རོང་བཙན་རིན་ཆེན་མགོན། །རིག་འཛིན་བཟང་པོ་ཟླ་བའི་གདོང་ཅན་སོགས། །（22ན）མདོར་ན་མིང་དང་མཚན་དུ་མ་ཐོན་པའི། །མཁན་ལྗོངས་ཕྱི་ནང་གསང་བ་ཡང་གསང་གི ། གནས་གཏེར་སྐྱོང་བའི་དབང་པོ་འཁོར་དང་བཅས། །བདག་སོགས་རྩེ་གཅིག་གདུང་བས་སྤྱན་འདྲེན་ན། །ཐོགས་མེད་སྟོབས་ཀྱིས་གནས་འདིར་མྱུར་དུ་གཤེགས། །དུ་རཱ་ཛ་ཀྵེ་ཏྲ་ནི་ངྷི་པ་ཏི་ས་པ་རི་ཝཱ་ར་བཛྲ་ས་མཱ་ཛཿཧཱུཾ་བཾ་ཧོཿ （བཞུགས་སུ་གསོལ་ཞིང་ཕྱག་བྱ་བ་ནི།） ཧཱུྃ། ངོ་མཚར་སྒྲུབ་པའི་གནས་མཆོག་ཉམས་དགའ་འདིར། །རང་རང་མཐུན་པའི་གདན་ཁྲི་ཇི་སྙེད་པར། །འཁོར་བཅས་དགྱེས་པས་བརྟན་པར་བཞུགས་སུ་འཚལ། །བསྟན་པ་བསྲུང་ཕྱིར་གུས་པས་ཕྱག་བགྱིའོ། །ས་མ་ཡ་ཏིཥྛ་ལྷན། ཨ་ཏི་པཱུ་ཧོཿ （མཆོད་པ་ནི།） ཧཱུྃ། དངོས་འབྱོར་ཡིད་སྤྲུལ་ལས་བྱུང་མཆོད་པའི་སྤྲིན། །ཕྱི་ནང་གསང་བའི་ལོངས་སྤྱོད་དཔག་ཏུ་མེད། །རྨད་དུ་བྱུང་བའི་མཆོད་པ་རྒྱ་ཆེན་པོས། །དམ་ཅན་འཁོར་བཅས་མཉེས་ཤིང་ཚིམ་པར་མཛོད། །ཨོཾ་བཛྲ་ཨརྒྷཾ་པཱ་དྱཱཾ་（སོགས་）ཤཔྡ་པྲ་ཏཱིཙྪ་ཧོཿ མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། （ཞེས་དང་།） དུ་རཱ་ཛ་ཀྵེ་ཏྲ་ནི་ངྷི་པ་ཏི་ས་པ་རི་ཝཱ་ར་ཨི་དཾ་བ་ལིཾ་（22བ）ཏ་ཁ་ཁ་ཁཱ་ཧི་ཁཱ་ཧི། （ཞེས་ལན་གསུམ་མམ་བདུན་གྱིས་གཏོར་མ་ཕུལ། བསྟོད་པ་ནི།） ཧཱུཾ། དོན་དམ་དབྱིངས་ལ་སྤྲོས་པ་མི་དམིགས་ཀྱང་། །རྟེན་འབྲེལ་སྒྱུ་མའི་སྣང་ཆ་གང་གདུལ་དུ། །ཡོངས་ཤར་འཇིགས་བྱེད་དྲེགས་པའི་ཚུལ་སྟོན་པ། །བདུད་རྗེ་ཟོ་ར་ར་སྐྱེས་ཁྱོད་ལ་བསྟོད། །སྨུག་ནག་སྒེག་དཔའ་འཇིགས་སུ་རུང་བའི་གཟུགས། །མི་སྲུན་ཁོངས་ནས་འཁྲུགས་པའི་རྣམ་འགྱུར་ཅན། །ཨམ་གཙིགས་ཁྲོ་གཉེར་སྡང་མིག་གློག་དམར་འཁྱུག །རལ་པ་དུས་ཀྱི་མུན་ལྟར་གཏིབས་ལ་བསྟོད། །ཕྱག་གཡས་བདུད་ཀྱི་དར་ནག་ལྷབ་ལྷུབ་ཏུ། །རབ་གཡོ་འབར་བའི་རུ་མཚོན་རྣོན་པོ་ནི། །བསྟན་དགྲའི་སྙིང་ལ་འཕེན་ཅིང་སྡུད་ལ་བརྩོན། །ཉམས་པའི་སྲོག་དབུགས་ཡུད་ཀྱིས་ལེན་ལ་བསྟོད། །ཕྱག་གཡོན་རིན་ཆེན་ཡུ་བ་ལ་བརྟེན་པའི། དར་ཟབ་ནོར་བུའི་རྒྱན་ཕྲེང་འཕྱང་འཕྲུལ་དུ། །གཡོ་ལྡན་ར་ཡི་རྒྱལ་མཚན་སྒྲེང་བ་ཡིས། །བསྟན་པའི་མངའ་ཐང་སྤེལ་བར་མཛད་ལ་བསྟོད། །ཆུ་དར་ནག་པོའི་བར་ཆེན་བརྗིད་པ་ནི། །སྟག་ལྤགས་རློན་པའི་གོང་སླག་ཅན་བགོས་ཤིང་། །གསེར་སྐེད་རིན་ཆེན་འབར་བས་མཛེས་པར་སྤྲས། །མི་སྡུག་（23ན）དཔའ་གཏུམ་ཉམས་འགྱུར་རྫོགས་ལ་བསྟོད། །གནམ་ལྕགས་རྭ་དང་རྨིག་བཞིའི་འཕྲུལ་འཁོར་གྱིས། །ལོག་འདྲེན་བརྒྱལ་འབོག་ཁྲག་ཏུ་སྐྱུག་བྱེད་པའི། །གནག་བརྗིད་གཡག་རྒོད་ངར་མ་ཡོངས་བཅིབས་ཏེ། །སྟོང་གསུམ་སྐད་ཅིག་ཡུད་ཀྱིས་ཉུལ་ལ་བསྟོད། །གསང་བའི་དགྱེས་སྡེ་སྦལ་མགོ་ཁྲག་མིག་མ། །གཅེར་མོ་སྐྲ་གྲོལ་སྦྲུལ་ནག་འཕྱང་འཕྲུལ་བརྒྱན། །ལྕགས་ཀྱུས་འགུགས་ཤིང་དགྲ་སྙིང་ཟས་སུ་ཟ། །སྲིད་པའི་རླུང་ནག་ཞོན་ནས་རྒྱུག་ལ་བསྟོད། །བཀའ་ཉན་ལས་བྱེད་མྱུར་མགྱོགས་དྲག་རྩལ་ཅན། །སྐྱེས་བུ་རྡོར་ལེགས་དགེ་བསྙེན་མཁའ་རི་ཆེ། །ཁྱུང་བདུད་ནག་པོ་གནོད་སྦྱིན་རྒོད་མ་ཁ། །རོང་བཙན་རིན་ཆེན་མགོན་གཡག་རིག་འཛིན་བཟང་། །ལས་ཀྱི་ཕོ་ཉ་ཟླ་བའི་གདོང་ཅན་སོགས། །སྦས་པའི་གནས་དང་ཟབ་གཏེར་སྐྱོང་མཛད་པའི། །དམ་ཅན་སྲུང་མ་གཞི་བདག་འཁོར་བཅས་ལ། །གུས་པས་བསྟོད་དོ་བཅོལ་བའི་ཕྲིན་ལས་མཛོད། །（ཐུགས་དམ་སྐོང་བ་ནི།） ཧཱུཾ། རྣམ་དག་ཡེ་ཤེས་སྒྱུ་མའི་རོལ་པ་ལས། །རང་བྱུང་མཆོད་པའི་སྤྲིན་དུ་ཡོངས་ཤར་བ། །ལྷ་རྫས་（23བ）ཉེར་སྤྱོད་འདོད་ཡོན་ཚར་དུ་དངར། །སྨན་རཀ་བདུད་རྩིའི་རྫིང་བུ་ཞག་ཏུ་བསྐྱིལ། །དམ་རྫས་བ་ལིཾ་གཏོར་ཚོགས་རི་བོར་བརྩེགས། །བསྒྲལ་བའི་དབང་ལྔ་ཤ་རུས་གྲམ་ཁྲོད་བརྡལ། །སྙིང་ཁྲག་རྒྱ་མཚོ་ཀླད་ཞག་ལྦུ་ཕྲེང་འཁྲིགས། །ཚིལ་ཆེན་གསུར་དུད་སྤྲིན་ཕུང་བར་སྣང་ཁེངས། །གཏུམ་རྔམས་བྱ་གཅན་སྣ་ཚོགས་རླུང་ལྟར་འཚུབས། །སྲ་བརྟན་གོ་མཚོན་སྤྱན་གཟིགས་ནམ་མཁའ་དང་། །མཐུན་རྫས་དཀོར་ཆ་ལོངས་སྤྱོད་མ་ཚང་མེད། །བླ་མེད་དགྱེས་པ་སྐོང་བའི་དམ་ཚིག་འདིས། །དཔལ་ལྡན་བསྟན་སྲུང་དབང་པོའི་ཐུགས་དམ་བསྐང་། །མཐུ་ཆེན་གནས་ཀྱི་བདག་པོའི་ཐུགས༴ ཟབ་གསང་གཏེར་གྱི་སྲུང་མའི་ཐུགས༴ སྦས་ཡུལ་གཞི་ཡི་བདག་པོའི༴ འཁོར་བཅས་ཐུགས་དམ་གཉན་པོ་རབ་བསྐང་ཞིང་། །འགལ་འཁྲུལ་ནོངས་པའི་ཚོགས་ཀུན་བཟོད་བཞེས་ལ། །རྟག་ཏུ་བརྩེ་བའི་སྡོང་གྲོགས་མ་གཡེལ་བར། །འདོད་པའི་དོན་ཀུན་མྱུར་དུ་སྒྲུབ་པར་མཛོད། །（དེ་ནས་ཕུད་སྐོང་དང་འབྲེལ་བར་ཕྲིན་ལས་བཅོལ་བ་ནི། ཛ་གད་ཁྲག་སྐྱེམས་དང་སྦྱར་བ་སྦྲེང་ཞིང་།） ཧོ། ཁྲག་འཐུང་དཔལ་ཆེན་བཀའ་ཡི་ལས་མཁན། གསང་（24ན）སྔགས་ཟབ་གཏེར་གཉན་གྱི་སྲུང་མ། བསྟན་དགྲ་སྒྲོལ་བའི་ཤན་པ་ཆེན་པོ། བསྟན་འཛིན་བུ་བཞིན་སྐྱོང་བའི་དམ་ཅན། སྦས་ཡུལ་ཕྱི་ནང་ཡོངས་ཀྱི་བདག་པོ། བདུད་རྗེ་སྐྱེས་བུ་ཟོ་ར་ར་སྐྱེས། དགྱེས་སྡེ་ཀླུ་སྨན་སྦལ་མགོ་ཁྲག་མིག་མ། བཀའ་ཉན་ལས་བྱེད་སྲུང་མ་དྲེགས་པའི་དམག་ཚོགས་ཁྱེད་འཁོར་དང་བཅས་པ་རྣམས་ལ། ཟག་མེད་བདུད་རྩིའི་མཆོད་པ་ཛ་གད་དཔའ་བོའི་ངར་ཆུ་དམར་ཆེན་ཁྲག་གི་ཨརྒྷཾ་དང་སྦྱར་བ་འདི་འབུལ་ལོ། གསོལ་ལོ། མཆོད་དོ། དགྱེས་པ་ཆེན་པོས་བཞེས་ཤིང་རོལ་ལ། དཔལ་ཆེན་ཁྲག་འཐུང་པདྨ་ཐོད་ཕྲེང་རྩལ་གྱི་བཀའ་དང་དམ་ལས་མ་འདའ་བར། སྤྱིར་གསང་སྔགས་ཀྱི་བསྟན་པ་སྲུངས། བསྟན་འཛིན་གྱི་ཕྲིན་ལས་སྒྲུབས། བསྟན་པའི་མངའ་ཐང་སྤེལ། བསྟན་དགྲ་རྣམས་ཆམ་ལ་ཕོབ། ཁྱད་པར་དུའང་སྦས་ཡུལ་ལྗོངས་འདིའི་མཐའི་སོ་ཁ་སྲུང་། རྒྱ་འདྲེ་འགོང་པོའི་རྒྱུ་ལམ་ཆོད། དད་ལྡན་རྣམས་ཀྱི་ལམ་སྣ་དྲོངས། གནས་མགྲོན་གྱི་རྟེན་འབྲེལ་སྒྲིགས། སྣོད་བཅུད་ཀྱི་རྒུད་པ་སོལ། བསྟན་པའི་གཞི་རྩ་（24བ）ཚུགས། ཆོས་སྲིད་ཀྱི་དཔལ་འབྱོར་སྤེལ། འདིར་གནས་སྒྲུབ་པ་པོ་རྣམས་ལ་སྙིང་མ་རིང་། ཉེས་པ་ཕྲ་མོ་ལ་འཁུ་ལྡོག་མ་མཛད། བྱ་བ་གང་བརྩམ་པ་ལེགས་ཕྱོགས་སུ་སྒྱུར། ནད་ཡམས་མཚོན་འཁྲུགས་མུ་གེ་སོགས་དུས་ངན་གྱི་ཡོ་ལང་ཐམས་ཅད་ཕྱིར་ལ་ཟློག །གནས་ཀྱི་དགེ་མཚན་གོང་ནས་གོང་དུ་འཕེལ་ཞིང་རྒྱས་པ་སོགས། མདོར་ན་བདག་གིས་ཅི་བཅོལ་བའི་ཕྲིན་ལས་ཐམས་ཅད་ཐོགས་མེད་མྱུར་དུ་སྒྲུབ་པར་མཛོད་ཅིག །（ཅེས་རོལ་མོ་དང་བཅས་ཕུད་མཆོད་གཏོར་མ་གཙང་སར་གཤེགས། མགྲོན་རྟེན་ལ་བསྟིམས་པའང་རང་གནས་སུ་གཤེགས་ལ་ཤིས་པ་བརྗོད་པས་བདེ་ལེགས་སུ་བྱའོ། །ཞེས་པའང་སྦས་ཡུལ་མཁན་པ་ལྗོངས་ཀྱི་གནས་འཛིན་སློབ་དཔོན་བསོད་ནམས་བཟང་པོའི་གསུང་གི་ངོར། ཟིལ་གནོན་པདྨའི་ཕོ་ཉ་འཇིགས་བྲལ་ཡེ་ཤེས་རྡོ་རྗེས་སྦྱར་བའི་ཡི་གེ་པ་ནི་མོན་སྔགས་ཆོས་གྲགས་རྒྱ་མཚོས་བགྱིས་པ་ཛ་ཡནྟུ།། །།） ༈ （མ་གཅིག་གཡུ་སྒྲོན་མའི་མཆོད་ཕྲིན་བསམ་དོན་རེ་སྐོང་ཞེས་བྱ་བ།） ༈ ན་མོ་པདྨ་ཀཱ་ར་ཡེ། （དམ་རྫས་མཆོད་གཏོར་དཀར་ཆོལ་སོགས་མཐུན་རྫས་སུ་འོས་པ་བཤམ་ལ།） རཾ་ཡཾ་ཁཾ། ཨོཾ་ཨཱཿཧཱུྃ་（གིས་བྱིན་བརླབས་ཏེ།） ཀྱེེ། མི་འགྱུར་ཀ་དག་དབྱིངས་ཀྱི་རྩལ། །ཡེ་ཤེས་སྒྱུ་འཕྲུལ་ཌཱ་ཀི་ལྔ། །སྤྲུལ་（25ན）སྐུ་ཞིང་སྐྱོང་སྨན་མོའི་ཚུལ། །མ་གཅིག་རྡོ་རྗེ་གཡུ་སྒྲོན་མ། །རིགས་ཀྱི་ཚོམ་བུ་དང་བཅས་པ། །གནས་འདིར་འབོད་དོ་ད་ཚུར་བྱོན། །བཛྲ་ས་མཱ་ཛཿ ཛཿཧཱུཾ་བཾ་ཧོཿ ཀྱེ། དགྱེས་པས་བྱོན་པ་ངོ་མཚར་ཆེ། །དགའ་ཞིང་གུས་པས་ཕྱག་བགྱིའོ། །མེ་ཏོག་ཕྲེང་མཛེས་ལ་སོགས་པ། །ཕྱི་ཡི་མཆོད་པ་ཚར་དུ་དངར། །བཟའ་བཅའི་གཏོར་མ་ལ་སོགས་པ། །ནང་གི་མཆོད་ཚོགས་ལྷུན་དུ་སྟུག །གཉིས་མེད་བྱང་སེམས་བདེ་བའི་རྒྱུན། །གསང་བའི་དམ་ཚིག་བླ་ན་མེད། །མདོར་ན་སྣང་སྲིད་མཆོད་པའི་སྤྲིན། །འཁོར་གསུམ་གཟུང་འཛིན་བྲལ་བའི་ངང་། །དག་མཉམ་ཆེན་པོར་བདག་འབུལ་ན། །དགྱེས་པ་ཆེན་པོས་ཁྱེད་བཞེས་ཤིག །མ་ཧཱ་སརྦ་པཱུ་ཛ་ཧོཿ ཀྱེ། ཆོས་དབྱིངས་ཡུམ་གྱི་མདངས་རྩལ་ལས། །རྣམ་འགྱུར་རྗེས་ཆགས་སྨན་མོའི་ཚུལ། །ཐོགས་མེད་ཕྲིན་ལས་དངོས་གྲུབ་བདག །གནས་གཏེར་བསྟན་སྐྱོང་གཙོ་ལ་བསྟོད། །སྔོན་གྱི་ཐུགས་དམ་མ་གཡེལ་བར། །གསང་ཆེན་བསྟན་དང་བསྟན་འཛིན་སྡེ། །སྤྱི་དང་ཁྱད་པར་དགོན་གནས་འདིའི། །ཆོས་འཁོར་མཆོད་ཡོན་འདུས་（25བ）པར་བཅས། །རྟག་ཏུ་སྲུང་སྐྱོབ་མ་གཡེལ་བར། །འགལ་རྐྱེན་ཉེས་པ་ཐམས་ཅད་སོལ། །མཐུན་རྐྱེན་ལེགས་ཚོགས་མ་ལུས་སྤེལ། །མདོར་ན་བསམ་པའི་དོན་རྣམས་ཀུན། །དུས་འདིར་འགྲུབ་པའི་ཕྲིན་ལས་མཛོད། །（ཅེས་མཆོད་གཏོར་གཙང་སར་གཤེགས་སོ། །ཞེས་པའང་གར་ན་སྲིན་མོའི་གླིང་གི་གནས་བདག་གཉན་པོའི་གསོལ་མཆོད་ངག་དོན་དུ་འཇིགས་བྲལ་ཡེ་ཤེས་རྡོ་རྗེས་སོ།། །།） ཀྱེ། གསོན་ཅིག་དགོངས་ཤིག་ཆོས་སྐྱོང་དྲེགས་པའི་ཚོགས། །སྔོན་གྱི་ཐ་ཚིག་གཉན་པོ་མ་གཡེལ་བར། །དེང་འདིར་བདག་གིས་གདུང་བས་འབོད་བསྐུལ་ན། །བཅོལ་བའི་ལས་འདི་ད་ལྟ་ཉིད་དུ་སྒྲུབས། །གསང་ཆེན་བསྟན་པའི་ཆོས་སྲིད་མངའ་ཐང་ལ། །ལོག་པར་ཁུ་བའི་སྡིག་ཅན་ཚོགས་རྣམས་ཀྱིས། །བསམ་སྦྱོར་གདུག་པའི་འདུན་གྲོས་ངན་ཤོམ་ཀུན། །སྐད་ཅིག་ཙམ་ལ་ཕྱིར་སྒྱུར་གཏོར་བཤིག་ཐོངས། །ལས་ཀྱི་འབྲས་བུ་ཉམས་ཕུང་བརླག་ཏུ་ཆུག །སྔགས་འཆང་ཆེ་བའི་ཡོན་ཏན་དུས་འདིར་བསྐྱེད། །མི་མཐུན་སྡང་དགྲའི་གཡུལ་ལས་རྒྱལ་བར་མཛོད། །ཐུགས་དམ་དུས་ལ་བབ་བོ་ས་མ་ཡ། །（ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།） （26ན）༈ ཀྱེ། དགོངས་ཤིག་དམ་ཅན་རྒྱ་མཚོའི་ཚོགས། །མཆོད་དོ་བསྐུལ་ལོ་མཐུ་རྩལ་ཅན། །བརྒྱུད་གསུམ་རིག་འཛིན་རྒྱ་མཚོ་ཡི། །བཀའ་དམ་གཉན་ལས་མ་འདའ་བར། །གསང་སྔགས་བསྟན་དང་བསྟན་འཛིན་ལ། །ལོག་པར་འཁུ་བའི་དགྲ་བགེགས་དང་། །ཁྱད་པར་རྣལ་འབྱོར་བདག་ཅག་གི ། ཚེ་སྲོག་ཆོས་དང་དཔལ་འབྱོར་ལ། །བར་དུ་གཅོད་པའི་དགྲ་བོ་རྣམས། །ད་ལྟ་ཉིད་དུ་ཚར་ཆོད་ཅིག །ཕུན་ཚོགས་ཆོས་སྲིད་མངའ་ཐང་དཔལ། །ཕྱོགས་ལས་རྣམ་པར་རྒྱལ་བར་མཛོད། །གཞན་ཡང་ནད་གདོན་རྐྱེན་ངན་སོགས། །མི་མཐུན་ཕྱོགས་ཀུན་ཞི་བ་དང་། །ཚེ་བསོད་དཔལ་འབྱོར་སྙན་གྲགས་སོགས། །ལེགས་ཚོགས་ཐམས་ཅད་གོང་དུ་སྤེལ། །བསྐུལ་ཡང་ཕྲིན་ལས་མི་མཛད་ན། །གསོལ་མཆོད་བྱས་པ་དོན་རེ་ཆུང་། །རྦད་ཀྱང་རྟགས་མཚན་མི་སྟོན་ན། །མཐུ་རྩལ་ཡོད་པ་རྫུན་དུ་འགྱུར། །དེ་བས་དམ་ཅན་སྲུང་མ་རྣམས། །གཙང་མའི་ཕུད་ཀྱིས་ཁྱེད་མཆོད་དོ། །གདུང་བའི་ཡུས་ཀྱིས་ཁྱེད་སྦྲན་ནོ། །བརྩེ་བའི་ཐུགས་ཀྱིས་ཁྱེད་དགོངས་ཤིག །རྟག་ཏུ་ལུས་དང་གྲིབ་བཞིན་（26བ）འགྲོགས། །སྡོང་གྲོགས་མེལ་ཚེ་མ་གཡེལ་བར། །འདོད་པའི་དོན་རྣམས་མ་ལུས་པ། །ཐོགས་མེད་མྱུར་དུ་སྒྲུབ་པར་མཛོད། །（ཅེས་གཏེར་ཆེན་རྡོ་རྗེ་གླིང་པའི་རིགས་ཆོས་ཀྱི་མྱུ་གུ་ཨོ་རྒྱན་དབང་འདུས་ཀྱི་བཞེད་སྐོང་དུ་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （སྲུང་མའི་ཕྲིན་བཅོལ་ཁ་སྐོང་ནི།） རྒྱལ་བསྟན་སྤྱི་དང་གསང་ཆེན་སྔ་འགྱུར་བའི། །རིང་ལུགས་དྲི་མེད་དབྱར་གྱི་ཆུ་གཏེར་བཞིན། །མི་ཉམས་གོང་འཕེལ་མངའ་ཐང་དཔལ་འབྱོར་སྟོབས། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །ཁྱད་པར་རིགས་བདག་འཁོར་ལོའི་མགོན་པོ་ཡི། །གསང་གསུམ་རྟག་པ་དམ་པར་འཚོ་གཞེས་ཤིང་། །རླབས་ཆེན་ཐུགས་ཀྱི་བཞེད་དོན་མ་ལུས་པ། །གེགས་མེད་མྱུར་དུ་འགྲུབ་པའི་ཕྲིན་ལས་མཛོད། །རྣལ་འབྱོར་བདག་གི་ཚེ་དང་བསྒྲུབ་པ་ལ། །བར་གཅོད་མི་མཐུན་ཉེར་འཚེ་ཀུན་ཞི་ནས། །མཐུན་རྐྱེན་འབད་མེད་ལྷུན་གྱིས་འགྲུབ་པ་ཡི། །ལྷག་བསམ་མཐའ་རུ་ཕྱིན་པའི་ཕྲིན་ལས་མཛོད། །（ཅེས་པའང་མཆོག་སྤྲུལ་འཇིགས་མེད་ཀུན་ཁྱབ་རྡོ་རྗེའི་གསུང་གི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ ཧྲཱིཿ སྤྱན་རས་གཟིགས་དབང་ཐུགས་རྗེའི་སྒྱུ་（27ན）འཕྲུལ་ལས། །འདོད་པ་ཁམས་ཀྱི་དབང་ཕྱུག་སྐུར་བཞེངས་པ། །ལྷ་ཆེན་ཚོགས་ཀྱི་བདག་པོ་འཁོར་དང་བཅས། །གནས་འདིར་གདུང་བས་འབོད་དོ་ད་ཚུར་བྱོན། །དངོས་འབྱོར་ཡིད་སྤྲུལ་ཏིང་འཛིན་ནམ་མཁའི་མཛོད། །ཟག་མེད་འདོད་ཡོན་བདུད་རྩིའི་མཆོད་སྤྲིན་གྱིས། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །འགལ་འཁྲུལ་མཐོལ་བཤགས་གུས་པས་བདག་བསྟོད་དོ། །རྟག་ཏུ་མི་འབྲལ་བརྩེ་བས་རྟག་འགྲོགས་ལ། །སྣོད་བཅུད་ཕུན་ཚོགས་མ་ལུས་དབང་དུ་སྡུས། །ལོངས་སྤྱོད་མི་ཟད་གཏེར་ལ་དབང་འབྱོར་ནས། །དོན་གཉིས་ཡིད་བཞིན་འགྲུབ་པའི་མཆོག་སྩོལ་ཅིག །ག་ཎ་པ་ཏི་སརྦ་སིདྡྷི་ཧོ། （ཞེས་པའང་ཀཿཐོག་དཔོན་སྤྲུལ་རིན་པོ་ཆེའི་བཞེད་པ་བཞིན་འཇིགས་བྲལ་ཡེ་ཤེས་རྡོ་རྗེས་བྲིས་པ་སིདྡྷི་རསྟུ།། །།） ༈ （ཚེ་རིང་མའི་རྒྱུན་གསོལ་མདོར་བསྡུས་ནི། མཆོད་རྫས་གསེར་སྐྱེམས།） རཾ་ཡཾ་ཁཾ། ཨོཾ་ཨཱཿཧཱུྃ། （ལན་གསུམ་གྱིས་བྱིན་བརླབ་ལ།） ཧྲཱིཿ འོད་གསལ་རྡོ་རྗེ་བཙུན་མོ་དབྱིངས་ཀྱི་ཡུམ། །རྣམ་འགྱུར་ཐབས་མཁས་ཞིང་སྐྱོང་སྨན་མོའི་ཚུལ། །བདེ་ཆེན་ཡེ་ཤེས་སྐྱེད་མཛད་ཌཱ་ཀི་མ། །ཚེ་རིང་མཆེད་ལྔ་འཁོར་བཅས་གནས་（27བ）འདིར་བྱོན། །དངོས་བཤམས་ཡིད་སྤྲུལ་དམ་རྫས་འདོད་ཡོན་གཏེར། །ཟད་མེད་ནམ་མཁའ་མཛོད་ཀྱི་ལོངས་སྤྱོད་འདིས། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །འགལ་འཁྲུལ་བཟོད་བཞེས་རྟག་ཏུ་དགྱེས་དགོངས་ཏེ། །བདག་ཅག་རྣམས་ལ་སྡོང་གྲོགས་མ་གཡེལ་བར། །འགལ་རྐྱེན་ཀུན་སོལ་མཐུན་རྐྱེན་ཡིད་བཞིན་སྒྲུབས། །ཇི་ལྟར་བསམ་པའི་དོན་རྣམས་འབད་མེད་དུ། །ཐོགས་མེད་མྱུར་དུ་འགྲུབ་པའི་ཕྲིན་ལས་མཛོད། །（ཅེས་འབུལ་ལོ། །ཞེས་པའང་རྨ་བྱ་བ་ཚེ་དབང་འགྱུར་མེད་བཟང་པོའི་གསུང་གི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （རྩ་གསུམ་སྲུང་མའི་གསོལ་བསྡུས་ཕྲིན་ལས་རེ་སྐོང་བཞུགས།） ༈ （མཆོད་གཏོར་གསེར་སྐྱེམས་ཨོཾ་ཨཱཿཧཱུྃ་གིས་བྱིན་བརླབ་ལ།） ཧཱུྃ། སྐུ་གསུམ་བརྒྱུད་པ་དྲུག་ལྡན་རིག་པ་འཛིན། །རྩ་བརྒྱུད་བླ་མ་ཁྱབ་བདག་ཐོད་ཕྲེང་རྩལ། །སྐུ་ལྔ་མཚན་བརྒྱད་གུ་རུ་ཞི་དྲག་ཚོགས། །གསོལ་ལོ་མཆོད་དོ་བྱིན་རླབས་ཆར་ཆེན་ཕོབ། །འདུས་པ་སྒྱུ་འཕྲུལ་སྒྲུབ་ཆེན་བཀའ་བརྒྱད་ལྷ། །ཚེ་དཔག་མེད་མགོན་གསང་འདུས་ཧེ་བཛྲ། །བདེ་མཆོག་དུས་འཁོར་ལ་སོགས་ཡི་དམ་ཚོགས། །གསོལ་ལོ་མཆོད་དོ་མཆོག་ཐུན་དངོས་གྲུབ་སྩོལ། །（28ན）རྡོ་རྗེ་རྣལ་འབྱོར་ཕག་མོ་ཁྲོས་མ་ནག །སྒྲོལ་མ་ཀུ་རུ་ཀུལླེ་སེང་གདོང་མ། །གསང་ཡེ་མཚོ་རྒྱལ་ལ་སོགས་མཁའ་འགྲོའི་ཚོགས། །གསོལ་ལོ་མཆོད་དོ་བདེ་ཆེན་ཡེ་ཤེས་སྩོལ། །ལེགས་ལྡན་ཕྱག་བཞི་ཕྱག་དྲུག་མ་ནིང་ནག །དཔལ་མགོན་སྡེ་ལྔ་ལས་མགོན་བྱ་རོག་གདོང་། །གུར་མགོན་ཞལ་བཞི་རྡོ་རྗེ་བེར་ནག་ཅན། །གསོལ་ལོ་མཆོད་དོ་བཅོལ་བའི་ཕྲིན་ལས་མཛོད། །ཨེ་ཀ་ཛཱ་ཊི་དཔལ་ལྡན་རང་བྱུང་རྒྱལ། །སྲོག་སྒྲུབ་ནག་མོ་དཔལ་ལྷ་དུད་སོལ་མ། །རི་ཏི་མཆེད་བཞི་ཤྭ་ན་ས་བདག་ཚོགས། །གསོལ་ལོ་མཆོད་དོ་བཅོལ་བའི་ཕྲིན་ལས་མཛོད། །ལྷ་ཆེན་དབང་ཕྱུག་ཤན་དམར་རཱ་ཧུ་ལ། །དམ་ཅན་རྡོར་ལེགས་ཞིང་སྐྱོང་སེང་གེའི་གདོང་། །རྡོ་རྗེ་བདུད་འདུལ་ལས་གཤིན་དུར་ཁྲོད་བདག །གསོལ་ལོ༴ དུར་ཁྲོད་ལྷ་མོ་ཚེ་རིང་མཆེད་སྡེ་ལྔ། །སྨན་བཙུན་གཡུ་སྒྲོན་ཤ་ཟ་ཁ་མོ་ཆེ། །ཨ་ཕྱི་ཆོས་སྒྲོན་མ་མོ་བརྟན་མའི་ཚོགས། །གསོལ་ལོ༴ རྣམ་མང་ཐོས་སྲས་ཛམ་ལ་ཚོགས་ཀྱི་བདག །ཨ་པར་ཛི་ཏ་ཨཱརྱ་རེ་མནྟ། །རྟ་བདག་བརྒྱད་སོགས་ནོར་ལྷ་བྱེ་བའི་ཚོགས། །གསོལ་ལོ༴ པེ་ཧར་སྐུ་ལྔ་ལས་མཁན་ཙིཏྟ་（28བ）དམར། །འབར་བ་སྤུན་བདུན་རྡོ་རྗེ་བྲག་སྐྱེས་བཙན། །ཇག་པ་མེ་ལེན་ཐང་ལྷ་རྨ་སྦོམ་ར། །གསོལ་ལོ༴ སྡེ་དཔོན་སུམ་ཆུ་སྔགས་བདག་བཅོ་བརྒྱད་དང་། །དྲེགས་པ་སྡེ་བརྒྱད་དགེ་བསྙེན་ཉི་ཤུ་གཅིག །ལྷ་ཀླུ་གཟའ་སྐར་ཕྱོགས་སྐྱོང་རྒྱལ་ཆེན་ཚོགས། །གསོལ་ལོ༴ ཕྱི་ནང་གི་གསང་བ་གབ་སྦས་བཏགས་ཆགས་ཀྱི། །སྡེ་བརྒྱད་རིགས་གྱུར་གནས་གཏེར་གཞི་ཡི་བདག །འགོ་བའི་ལྷ་ལྔ་དགྲ་ལྷ་གཉན་པོ་རྣམས། །གསོལ་ལོ༴ གཞན་ཡང་མིང་དང་མཚན་དུ་མ་ཐོན་པའི། །དཀར་ཕྱོགས་སྐྱོ་ཞིང་ནག་ཕྱོགས་ཕམ་མཛད་པ། །རྡོ་རྗེའི་སྲུང་མ་འཁོར་དང་བཅས་པ་རྣམས། །གསོལ་ལོ༴ རང་རང་ཐུགས་མཐུན་འདོད་རྒུའི་དམ་ཚིག་རྫས། །དངོས་འབྱོར་ཡིད་སྤྲུལ་ནམ་མཁའི་ཁམས་གང་བས། །ཐུགས་དམ་གཉན་བསྐང་འགལ་འཁྲུལ་བཟོད་བཞེས་ལ། །རྟག་ཏུ་བརྩེར་དགོངས་སྲུང་སྐྱོབ་སྡོང་གྲོགས་མཛོད། །མི་མཐུན་ཀུན་སོལ་མཐུན་རྐྱེན་ཡིད་བཞིན་སྤེལ། །སྡང་བའི་དགྲ་ཐུལ་གནོད་པའི་བགེགས་དཔུང་ཆོམས། །གསང་ཆེན་རིང་ལུགས་དར་རྒྱས་ཡུན་གནས་སོགས། །བདག་གི་（29ན）འདོད་དོན་ཕྲིན་ལས་མྱུར་སྒྲུབ་མཛོད། །（ཅེས་པའང་སློབ་དཔོན་ཆོས་ཀྱི་རྡོ་རྗེས་བསྐུལ་ངོར་འཇིགས་བྲལ་ཡེ་ཤེས་རྡོ་རྗེས་བྲིས་པ་ཛ་ཡནྟུ།། །།） ༈ （སྨན་བཙུན་བཀྲ་ཤིས་ཚེ་རིང་མའི་མཆོད་ཕྲིན་དམ་ལྡན་རེ་སྐོང་ཞེས་བྱ་བ།） ༈ ཨོཾ་སྭ་སྟི། （མཐུན་རྫས་མཆོད་གཏོར་བཤམ་པ་）རཾ་ཡཾ་ཁཾ་（གིས་བསང་།） ཨོཾ་ཨཱཿཧཱུྃ་（གིས་བྱིན་བརླབས་ཏེ།） ཀྱེེ། འབོད་དོ་བཀྲ་ཤིས་ཚེའི་དབང་ཕྱུག །བསྐུལ་ལོ་སྨན་བཙུན་མཆེད་སྡེ་ལྔ། །རྣལ་འབྱོར་གདུང་བས་སྤྱན་འདྲེན་ན། །མཐོན་མཐིང་གངས་ཀྱི་རི་བོ་ནི། །སྤྲིན་དཀར་བརྩེགས་པའི་ལྡིང་ཁང་སོགས། །རང་བཞིན་དགྱེས་པར་བསྟི་བ་ཡི། །ངོ་མཚར་འཕྲུལ་གྱི་གྲོང་ཁྱེར་ནས། །བརྩེ་ཞིང་གདུང་བས་རབ་དགོངས་ཏེ། །སྤྲུལ་འཁོར་སྨན་ཕྲན་འབུམ་དང་བཅས། །མ་ཐོགས་མྱུར་དུ་ད་ཚུར་གཤེགས། །བཛྲ་སམ་ཡ་ཛཿ ཀྱེེ། སྨན་གཅིག་དགྱེས་པས་བྱོན་ལགས་སམ། །མཛའ་བས་དགོངས་ཤིག་གཡར་དམ་ཅན། །རིག་འཛིན་བདག་གི་གྲོགས་ཉིད་དུ། །མཐུན་པའི་གནས་འདིར་བག་ཕོབ་ཅིག །ས་མ་ཡ་ཏིཥྠནྟུ། ཀྱེེ། ཁྱེད་ལ་དགྱེས་པའི་ལོངས་སྤྱོད་ནི། །ཏིང་འཛིན་ནམ་མཁའ་མཛོད་ཀྱི་སྒོ། །གཏན་པ་མེད་（29བ）པར་ཕྱེས་པ་ལས། །ཕྱི་མཆོད་ཉེར་སྤྱོད་ཚར་དུ་དངར། །ནང་མཆོད་འདོད་ཡོན་སྤྲིན་དུ་གཏིབས། །གསང་མཆོད་གཏོར་ཚོགས་ལྷུན་པོར་སྤུངས། །སྨན་ཕུད་བདུད་རྩི་རྒྱ་མཚོར་བསྐྱིལ། །ཆགས་ཆེན་ཁྲག་མཚོ་ལྦུ་ཕྲེང་གཡོ། །གཉིས་སྣང་བསྒྲལ་བའི་བམ་ཆེན་བརྗིད། །བདེ་སྟོང་མཉམ་སྦྱོར་བྱང་སེམས་རྒྱུན། །ཟག་མེད་ཡེ་ཤེས་སིམ་པ་བསྐྱེད། །བཞེད་རྒུའི་དམ་རྫས་མ་ཚང་མེད། །ཟད་མི་ཤེས་པའི་ལོངས་སྤྱོད་འདི། །མོས་ཤིང་གདུང་བས་བདག་འབུལ་གྱི། །དགྱེས་ཤིང་བརྩེ་བས་ཁྱེད་བཞེས་ནས། །ངོམས་ཤིང་ཚིམ་པའི་མདངས་སྟོན་ཅིག །མ་ཧཱ་སརྦ་པཱུ་ཛ་ཧོཿ ཀྱེེ། འོད་གསལ་དབྱིངས་ཀྱི་ཡུམ་ཆེན་མོ། །རྣམ་འགྱུར་ཞིང་སྐྱོང་སྨན་མོའི་ཚུལ། །སྒྲུབ་ལ་བདེ་ཆེན་མཆོག་སྟེར་བའི། །ཌཱ་ཀིའི་དབང་ཕྱུག་ཁྱོད་ལ་བསྟོད། །དཀར་གསལ་ཡིད་འོང་མཚར་སྡུག་ཞལ། །འཇོ་སྒེག་ཉམས་འགྱུར་ཅིར་ཡང་ངོམས། །ལྷ་རྫས་དར་གོས་རིན་ཆེན་རྒྱན། །མཛེས་བརྗིད་ཆ་ལུགས་རྫོགས་ལ་བསྟོད། །ཕྱག་གཡས་རྡོ་རྗེ་མདའ་དར་གྱིས། །སྲིད་ཞིའི་ཚེ་བསོད་ཐོགས་མེད་སྡུད། །གཡོན་པས་ཚེ་ཡི་བུམ་བཟང་གིས། །སྒྲུབ་པོར་འཆི་མེད་སྟེར་ལ་བསྟོད། །མི་（30ན）འཇིགས་རྩལ་ལྡན་གདོང་ལྔ་པ། །བཅིབས་ཏེ་སྟོང་ཁམས་ཡུད་ཀྱིས་བསྐོར། །དམ་ཚིག་རྗེས་གཅོད་དམ་ལྡན་སྐྱོང་། །ཕྲིན་ལས་མངའ་བདག་ཁྱོད་ལ་བསྟོད། །རང་རྩལ་མ་འགག་སྒྱུ་མའི་གར། །མཐིང་གི་ཞལ་བཟང་པྲ་ཡི་བདག །མི་གཡོ་ཀློང་བཟང་ཟས་ཀྱི་བདག །ཅོད་པན་མགྲིན་བཟང་ནོར་གྱི་བདག །ཏལ་དཀར་འགྲོ་བཟང་ཕྱུགས་ཀྱི་བདག །ཡང་སྤྲུལ་སྨན་མོ་འབུམ་ཕྲག་བཅས། །མ་ངེས་རྣམ་འགྱུར་ཅིར་ཡང་སྣང་། །སྲིད་གསུམ་དབང་སྒྱུར་མ་ལ་བསྟོད། །ཁྱོད་བསྟེན་ཁྱོད་བསྒྲུབ་ཁྱོད་མཆོད་ན། །ཡལ་ཡོལ་བཏང་སྙོམས་མ་མཛད་པར། །བརྒྱུད་གསུམ་བླ་མའི་སྤྱན་སྔ་རུ། །ཁས་བླངས་ཐ་ཚིག་ཇི་བཞིན་དུ། །སངས་རྒྱས་བསྟན་དང་བསྟན་འཛིན་སྐྱོང་། །དཀོན་མཆོག་གསུམ་གྱི་དབུ་འཕང་བསྟོད། །སྣོད་བཅུད་འཇིག་རྟེན་རྒུད་པ་སོལ། །ཕན་བདེའི་ལེགས་ཚོགས་གོང་དུ་སྤོར། །ཁྱད་པར་རྣལ་འབྱོར་བདག་ཅག་ལ། །ལུས་དང་གྲིབ་བཞིན་འགྲོགས་ནས་ཀྱང་། །ནད་གདོན་རྐྱེན་ངན་བར་ཆད་སོགས། །མི་མཐུན་ཉེས་པའི་ཚོགས་རྣམས་སོལ། །ཚེ་བསོད་གདུལ་བྱ་སྙན་གྲགས་སོགས། །མཐུན་རྐྱེན་དཔལ་འབྱོར་ཀུན་ནས་སྤེལ། །ཡིད་（30བ）ཅན་ལྷ་འདྲེ་མི་གསུམ་གྱི། །བློ་སེམས་སྣང་བ་དབང་དུ་སྡུས། །མི་སྲུན་བདུད་དགྲ་དམ་སྲིའི་རིགས། །ལོག་འདྲེན་དཔུང་ཚོགས་ཆམ་ལ་ཕོབ། །བསྟན་དང་འགྲོ་ལ་སྨན་པའི་དོན། །རྟེན་འབྲེལ་ལེགས་པའི་ཕྱོགས་སུ་སྒྲིགས། །ཁྱད་པར་ཕོ་ཉའི་ལམ་གྱི་གྲོགས། །མཛད་དེ་དགའ་བཞིའི་ཡེ་ཤེས་ཀྱི། །ཉམས་རྟོགས་ཡོན་ཏན་གོང་སྤེལ་ནས། །བདེ་ཆེན་ཆོས་སྐུའི་རྒྱལ་སར་སྐྱོལ། །མདོར་ན་རིག་འཛིན་བདག་ཅག་ལ། །སྡོང་གྲོགས་ཕྲིན་ལས་མ་གཡེལ་བར། །འདོད་པའི་དོན་ལ་གཉེར་གཏད་པའི། །ལས་ཀྱི་འབྲས་བུ་འདིར་མཆིས་མཛོད། །（ཅེས་གསོལ་མཐར་མགྲོན་རྟེན་ལ་བསྟིམ་པའམ་མི་དམིགས་པའི་ངང་དུ་མཉམ་པར་བཞག་གོ ། ཞེས་པའང་ཁྲ་རིགས་མཆོག་སྤྲུལ་དཔལ་ལྡན་བློ་གྲོས་སེང་གེས་གསུང་བསྐུལ་གནང་བའི་བཞེད་སྐོང་དུ། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་བྲིས་ཏེ་ཕུལ་བ་ཛ་ཡནྟུ།། །།） ༈ （བཀྲ་ཤིས་ཚེ་རིང་མའི་གསོལ་མཆོད་མདོར་བསྡུས་ནི། མཆོད་རྫས་）རཾ་ཡཾ་ཁཾ་（གིས་བསང་།） ཨོཾ་ཨཱཿཧཱུྃ་（གིས་བྱིན་བརླབས་ལ།） རང་གི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་སྨན་བཙུན་ཚེ་རིང་མཆེད་ལྔ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བྃ་ཧོཿ（ས་རྟེན་ལ་བསྟིམ།） ཨོཾ་བཛྲ་ཨརྒྷཾ་པཱདྱཱཾ་པུཥྤེ་（སོགས་ནས་）ཤཔྡ་པྲ་ཏཱིཙྪ་སྭཱ་ཧཱ། （ཞེས་ཉེར་སྤྱོད་དང་།） མ་ཧཱ་པཉྩ་ཨ་མྲྀ་ཏ་རཀྟ་ཁཱ་ཧི། （ཞེས་སྨན་རཀ་སྟོབ།） ཨོཾ་བཛྲ་ངྷ་ཀི་ནི་ཨ་ཡུ་ཥེ་ཁྭ་རི་ས་པ་རི་ཝཱ་ར་ཨེ་དཾ་བ་ལིཾ་ཏ་ཁ་ཁཁཱ་ཧི་ཁཱ་ཧི། （གསུམ་མམ་（31ན）བདུན་གྱི་གཏོར་མ་ཕུལ་ལ།） ཧྲཱིཿ འོད་གསལ་རྡོ་རྗེ་བཙུན་མོ་དབྱིངས་ཀྱི་ཡུམ། །རྣམ་འགྱུར་ཐབས་མཁས་ཞིང་སྐྱོང་སྨན་མོའི་ཚུལ། །བདེ་ཆེན་ཡེ་ཤེས་བསྐྱེད་མཛད་ཌཱ་ཀི་མ། །ཚེ་རིང་མཆེད་ལྔ་སྤྲུལ་འཁོར་བཅས་ལ་བསྟོད། །རྩེ་གཅིག་གདུང་བས་ཁྱོད་མཆོད་ཁྱོད་བསྟེན་ན། །ཕྲིན་ལས་རྣམ་བཞིའི་སྡོང་གྲོགས་མི་གཡེལ་ཞིང་། །ཁྱད་པར་བརྟག་བྱའི་དོན་འདི་མ་འཁྲུལ་བར། །ལྐོག་གྱུར་མངོན་གསུམ་གསལ་བའི་ལུང་སྟོན་ཅིག །（ཅེས་སམ་ཡང་ན།） ཁྱད་པར་ཡིད་ལ་བརྣག་པའི་དོན་འདི་ཉིད། །གེགས་མེད་མྱུར་དུ་འགྲུབ་པའི་ཕྲིན་ལས་མཛོད། །（ཅེས་སོགས་གང་དང་འདོད་གསོལ། རྗེས་མགྲོན་རྟེན་ལ་བསྟིམ་པའམ་གཤེགས་སུ་གསོལ་ལ་མཆོད་གཏོར་གཙང་སར་འབུལ་ལོ། །འདིའང་བདེ་ཕུག་རིན་པོ་ཆེ་ཀློང་ཆེན་ཡེ་ཤེས་རྡོ་རྗེའི་བཞེད་སྐོང་དུ་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （བཀའ་སྲུང་སྤྱིའི་གསོལ་མཆོད་མདོར་བསྡུས་འདོད་རྒུ་ཆར་འབེབས་བཞུགས།） ༈ ན་མོ་པདྨ་ཀཱ་ར་ཡེ། （མཆོད་གཏོར་གསེར་སྐྱེམས་སོགས་གཙང་ཞིང་མཛེས་པར་བཤམས་ལ།） རཾ་ཡཾ་ཁཾ་（གིས་བསང་སྦྱང་།） སྟོང་པའི་ངང་ལས་རིན་པོ་ཆེ་ལ་སོགས་པའི་སྣོད་དུ་ཨོཾ་ཨཱཿཧཱུྃ་ལས་མཆོད་གཏོར་གསེར་སྐྱེམས་བཟའ་བཅའ་བཏུང་བའི་ལོངས་སྤྱོད་ལྷ་ཚོགས་རྣམས་རང་རང་གི་ཐུགས་དང་མཐུན་པའི་དམ་རྫས་ནམ་མཁའ་མཛོད་ཀྱི་གཏེར་ཆེན་པོར་གྱུར། ཨོཾ་ཨཱཿཧཱུྃ། （ལན་གསུམ།） ཧཱུྃ། བྱིན་རླབས་རྩ་བ་རྩ་བརྒྱུད་བླ་མ་དང་། །དངོས་གྲུབ་ཀུན་སྩོལ་ཡི་དམ་ཞི་ཁྲོའི་ལྷ། །ཕྲིན་ལས་（31བ）ཐོགས་མེད་དཔའ་བོ་མཁའ་འགྲོའི་ཚོགས། །གསོལ་ལོ་མཆོད་དོ་མཆོག་ཐུན་དངོས་གྲུབ་སྩོལ། །ཨེ་ཝཾ་བདེ་སྟོང་རོལ་རྩལ་ཀུན་ཏུ་བཟང་། །དགྲ་དང་བགེགས་ལ་ཁྲོས་པའི་རྣམ་འགྱུར་ཅན། །དཔལ་མགོན་མ་ནིང་ནག་པོ་ཤན་ནག་མོ། །གསོལ་ལོ་མཆོད་དོ་བཅོལ་བའི་ཕྲིན་ལས་མཛོད། །འོག་མིན་ན་ལེནྡྲ་སོགས་ཕོ་བྲང་ནས། །དཔལ་ལྡན་ཡེ་ཤེས་མགོན་པོ་ཕྱག་བཞི་པ། །ཆོས་དབྱིངས་དབང་ཕྱུག་དྲག་མོ་ཙནྜི་ཀ ། གསོལ་ལོ་མཆོད་དོ༴ ། བསིལ་བའི་ཚལ་སོགས་བདེ་ཆེན་ཕོ་བྲང་ནས། །འཇིགས་རྟེན་དབང་ཕྱུག་མགོན་དཀར་ཡིད་བཞིན་ལྷ། །ཁམས་གསུམ་དབང་སྡུད་གསང་བ་ཡེ་ཤེས་མ། །གསོལ་ལོ་མཆོད་དོ༴ ། རྒྱལ་ཀུན་ཐུགས་རྗེ་གཅིག་བསྡུས་སྤྱན་རས་གཟིགས། །སྲིད་གསུམ་ཡོངས་ཀྱི་བྱེད་པོའི་སྐུར་ཤར་བ། །ལྷ་ཆེན་དབང་ཕྱུག་ཡུམ་ཆེན་ཨུ་མ་དཱེ། །གསོལ་ལོ་མཆོད་དོ༴ ། ཆོས་སྐུའི་ཞིང་ན་རྒྱལ་ཡུམ་རྣལ་འབྱོར་མ། །རྡོ་རྗེའི་གྲོང་ན་མཆོག་གི་ཙནྜ་ལཱི། །མུ་ལེ་མཐིང་གི་དམག་ཟོར་རྒྱལ་མོ་ལ། །གསོལ་ལོ་མཆོད་དོ༴ ། ཆོས་དབྱིངས་ཀུན་ཏུ་བཟང་མོ་ཁྲོ་མོའི་ཚུལ། །གདུག་པ་འདུལ་ཕྱིར་སྲིད་པའི་རྒྱལ་མོར་བཞེངས། །གསང་བ་སྔགས་ཀྱི་བསྟན་སྲུང་རལ་གཅིག་མ། །གསོལ་ལོ་མཆོད་（32ན）དོ༴ ། ཤཱཀྱའི་བསྟན་སྲུང་འདོད་པ་ཁམས་ཀྱི་བདག །མ་གཅིག་དུད་སོལ་ལྷ་མོ་དཔལ་ལྷ་མོ། །རྡོ་རྗེ་རབ་བརྟན་ཚེ་རིང་མཆེད་སྡེ་ལྔ། །གསོལ་ལོ་མཆོད་དོ༴ དབང་དྲག་ཧེ་རུ་ཀ་དཔལ་གནོད་སྦྱིན་ཚུལ། །མི་སྲུན་བསྟན་དགྲའི་སྲོག་གི་གཤེད་པ་ཆེ། །ཤན་པ་དམར་ནག་ལས་མཁན་སྡེ་བརྒྱད་བཅས། །གསོལ་ལོ༴ ། རྡོ་རྗེ་འཆང་དབང་ཐུགས་ཀྱི་ཡང་སྤྲུལ་ནི། །རྔམས་པའི་སྐུར་སྟོན་སྡེ་བརྒྱད་ཡོངས་ཀྱི་རྗེ། །འཇིགས་བྱེད་དྲང་སྲོང་གཟའ་མཆོག་རཱ་ཧུ་ལ། །གསོལ་ལོ༴ མི་འཇིགས་རྩལ་ལྡན་གདོང་ལྔའི་ཁྲི་སྟེང་ན། །སྒེག་མཛེས་རབ་བརྗིད་ཤཱཀྱའི་བསྟན་སྲུང་གཙོ། །ནོར་བདག་བྱེ་བའི་སྡེ་དཔོན་རྣམ་ཐོས་སྲས། །གསོལ་ལོ༴ ། གསང་བདག་པདྨའི་བཀའ་ཉན་མཐུ་བོ་ཆེ། །དགྲ་ལྷའི་རྒྱལ་པོ་སྟོབས་རྩལ་རྫུ་འཕྲུལ་བདག །སྐྱེས་མཆོག་རྡོ་རྗེ་ལེགས་པ་མགར་བ་ནག །གསོལ་ལོ༴ ། ཆོས་དབྱིངས་ངང་ལས་སྙིང་རྗེ་ཁྲོས་པའི་སྐུ། །མཐུ་སྟོབས་མི་བཟད་བསྟན་དགྲའི་སྲོག་གི་བདག །ཆོས་འཁོར་སྐྱོང་བའི་རྒྱལ་པོ་ལི་བྱིན་ཧར། །གསོལ་ལོ༴ ། རང་བཞིན་ལྷུན་གྲུབ་ཆོས་དབྱིངས་ཕོ་བྲང་ན། །སྙན་བརྒྱུད་བསྟན་སྲུང་དཔལ་ལྡན་བྱང་གི་བདུད། །ཡུམ་（32བ）མཆོག་མ་མོ་ཟངས་ཀྱི་རལ་པ་ཅན། །གསོལ་ལོ༴ ། སྤྲིན་དཀར་གཡོ་འདྲའི་རྟ་མཆོག་རྒྱན་ལྡན་སྟེང་། །མཛེས་པའི་སྐུ་མཆོག་སྒྲུབ་ལ་འདོད་རྒུ་སྟེར། །དམ་ལྡན་ཡོངས་ཀྱི་བཀའ་སྲུང་ཕྱིང་དཀར་བ། །གསོལ་ལོ༴ འཛམ་གླིང་རྣམ་དག་པདྨོ་བཀོད་པའི་ཞིང་། །གནས་མཆོག་དེ་ཝཱི་ཀོ་ཊི་ལ་སོགས་པའི། །ཡུལ་ཆེན་ཉེར་བཞིའི་གནས་སྲུང་རིན་ཆེན་བཟང་། །གསོལ་ལོ༴ ། ངོ་མཚར་དཔལ་གྱི་མཁན་ལུང་ཡ་མཚན་ནང་། །སྒྲུབ་ལ་གྲོགས་མཛད་དམ་ཉམས་དགྲ་བགེགས་སྒྲོལ། །སྦས་ཡུལ་གཏེར་བདག་བདུད་པོ་མཆེད་གསུམ་པོ། །གསོལ་ལོ༴ ། པདྨའི་བཀའ་ཉན་དམ་ལྡན་རྣལ་འབྱོར་སྐྱོང་། །མཐུ་རྩལ་ཐོགས་མེད་རྣམ་བཞིའི་ཕྲིན་ལས་སྒྲུབ། །དམ་ཅན་སྐྱེས་བུ་ལུང་བཙན་འཁོར་བཅས་ལ། །གསོལ་ལོ༴ ། སྲིད་པའི་ལྷ་རབས་མགུར་ལྷ་བཅུ་གསུམ་དང་། །བརྟན་མ་བཅུ་གཉིས་འགོ་བའི་ལྷ་ལྔ་དང་། །ཕྱི་ནང་གསང་བའི་ལྷ་སྲིན་སྡེ་བརྒྱད་རྣམས། །གསོལ་ལོ༴ ། གཞན་ཡང་མིང་དང་མཚན་དུ་མ་ཐོན་པའི། །ཡུལ་ལྷ་གཞི་བདག་གཉུག་གནས་གློ་བུར་ལྷགས། །སྤར་སྨེ་ལོ་ཟླ་ཞག་དུས་རྒྱུ་བའི་ལྷ། །གསོལ་ལོ༴ ། དེ་ལྟར་གསོལ་ཞིང་（33ན）མཆོད་པས་རབ་མཉེས་ཏེ། །བདག་ཅག་འཁོར་བཅས་གར་འགྲོ་གར་གནས་ཀྱང་། །རྟག་ཏུ་མི་འབྲལ་ལུས་དང་གྲིབ་བཞིན་དུ། །འགྲོགས་ནས་སྡོང་གྲོགས་ཕྲིན་ལས་མ་གཡེལ་ཅིག །ཉིན་གྱི་བྱ་ར་མཚན་གྱི་མེལ་ཚེ་མཛོད། །ཉེས་པ་སྟོང་བསྣོལ་ལེགས་པ་བརྒྱ་དང་སྤྲོད། །བསྟན་པའི་སྤྱི་དགྲ་རྣལ་འབྱོར་སྒོས་དགྲ་སྒྲོལ། །ཁ་སྨྲས་གླེང་གཞི་དགྲ་ཇག་ཆོམ་རྐུན་ཟློག །ཚེ་བསོད་དབང་ཐང་རླུང་རྟའི་སྟོབས་ཤུགས་སྤེལ། །ཆེ་བཙན་འགྲོ་རྣམས་དབང་མེད་དབང་དུ་སྡུས། །ཇི་ལྟར་བསམ་པ་ཡིད་བཞིན་འགྲུབ་ནས་ཀྱང་། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །（ཅེས་མཆོད་གཏོར་གཙང་སར་འབུལ་ལོ། །ཞེས་པ་འདིའང་དྲག་ཤོས་ཀརྨ་དགེ་ལེགས་ཀྱི་གསུང་བསྐུལ་ངོར་སྔར་གྱི་གསོལ་ཕྲིན་རྒྱས་པའི་དོན་གྱི་བཅུད་ཕྱུངས་ཏེ་འཇིགས་བྲལ་ཡེ་ཤེས་རྡོ་རྗེས་ཁྱེར་བདེ་དོན་ཚང་དུ་སྦྱར་བ་ཛ་ཡནྟུ།། །།） ༈ བྷྱོཿ དཔལ་ལྡན་སྔགས་ཀྱི་སྲུང་མ་ཆེ། །ཁྲག་འཐུང་ཡུམ་གཅིག་ཁྲོ་གདོང་མ། །དམ་ཚིག་གནས་འདིར་སྤྱན་འདྲེན་གཤེགས། །མཐུན་པའི་རྫས་ཀྱིས་ཐུགས་དམ་བསྐང་། །འགལ་འཁྲུལ་ཉམས་ཆག་བཟོད་པར་བཞེས། །རྟག་ཏུ་སྡོང་གྲོགས་མ་གཡེལ་བར། །ཞི་རྒྱས་དབང་དང་མངོན་སྤྱོད་ཀྱི། །ཕྲིན་ལས་（33བ）སྒྲུབས་ཤིག་ས་མ་ཡ། །（ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （མཆོད་རྟེན་བྱ་རུང་ཁ་ཤོར་གྱི་ཞིང་སྐྱོང་མ་མོ་པུཀྐ་སིའི་གསོལ་མཆོད་མདོར་བསྡུས་བཞུགས།） ༈ ན་མོ་པདྨ་ཀཱ་ར་ཡེ། （གཙང་མའི་མཆོད་གཏོར་བཤམས་པ་）རཾ་ཡཾ་ཁཾ་（གིས་བསང་སྦྱང་།） ཨོཾ་ཨཱཿཧཱུྃ་（གིས་བྱིན་བརླབ་ལ།） ཧཱུྃ། ཡུལ་གྱི་མིང་ནི་བལ་པོའི་ཡུལ། །དུར་ཁྲོད་མིང་ནི་ལྷུན་གྲུབ་བརྩེགས། །མཆོད་རྟེན་བྱ་རུང་ཁ་ཤོར་གྲགས། །མ་མོའི་མཚན་ནི་པུཀྐ་སི། །གནས་ཡུལ་སྐྱོང་བའི་མཐུ་མོ་ཆེ། །དོན་ལ་དབྱིངས་ཀྱི་ཡུམ་ཆེན་ཡང་། །རྣམ་པ་ཞིང་སྐྱོང་མ་མོའི་ཚུལ། །གང་འདུལ་རྣམ་འགྱུར་ཅིར་ཡང་སྟོན། །སྔོན་ཚེ་ཁྲག་འཐུང་ཧེ་རུ་ཀས། །དབང་དུ་བསྡུས་ནས་གྲོགས་སུ་བཀོལ། །དཀྱིལ་འཁོར་ཆེན་པོ་གཉེར་དུ་གཏད། །བཀའ་ཡི་བསྟན་པ་སྐྱོང་བར་བསྐོས། །གཡར་དམ་ཇི་བཞིན་ཐ་ཚིག་ལས། །མི་འདའ་རྡོ་རྗེའི་རྣལ་འབྱོར་མ། །རང་རྩལ་མ་མོ་འབུམ་སྡེར་བཅས། །གནད་ནས་བསྐུལ་ལོ་ད་ཚུར་གཤེགས། །དགྱེས་ཤིང་བརྩེ་བས་མྱུར་བྱོན་ལ། །སྒྲུབ་ཅིང་མཆོད་པའི་གནས་འདིར་བཞུགས། །ཕྱི་མཆོད་ཉེར་སྤྱོད་ཚར་དུ་དངར། །ནང་མཆོད་འདོད་ཡོན་སྤྲིན་དུ་གཏིབས། །གསང་མཆོད་（34ན）སྨན་རཀ་གཏོར་ཚོགས་སྤུངས། །ཡང་གསང་སྦྱོར་སྒྲོལ་བདེ་བ་ཆེ། །ཟད་མི་ཤེས་པའི་ལོངས་སྤྱོད་ཀྱིས། །གསོལ་ལོ་མཆོད་དོ་ཐུགས་དམ་བསྐང་། །འགལ་འཁྲུལ་ནོངས་པ་བཟོད་པར་གསོལ། །ཡོན་ཏན་དཔལ་ལ་མངོན་པར་བསྟོད། །མི་འབྲལ་སྲུང་མར་མངའ་གསོལ་ལོ། །སྔོན་གྱི་ཐུགས་དམ་ཞལ་བཞེས་དགོངས། །གསང་ཆེན་བསྟན་དང་བསྟན་འཛིན་སྡེ། །ཆོས་འཁོར་མཆོད་རྟེན་གཡེལ་མེད་སྐྱོངས། །མི་མཐུན་ཉེས་པའི་ཚོགས་རྣམས་སོལ། །མཐུན་རྐྱེན་ལེགས་ཚོགས་གོང་དུ་སྤོར། །སྐྱེ་འགྲོའི་སྣང་བ་དགེ་ལ་སྒྱུར། །གནོད་བྱེད་འབྱུང་པོ་ཚར་ཆོད་ཅིག །མདོར་ན་བདག་ཅག་རྣལ་འབྱོར་གྱི། །ཅི་བསམ་འགྲུབ་པའི་ཕྲིན་ལས་མཛོད། །（ཅེས་མཆོད་གཏོར་གཙང་སར་འབུལ་ལོ། །ཞེས་པའང་སྔགས་བན་པདྨ་ཐར་ལམ་གྱིས་བསྐུལ་ངོར། སྔོན་གྱི་མཆོད་ཕྲིན་ཡིག་རྙིང་འགའ་ཞིག་གི་དོན་བསྡུས་ཁྱེར་བདེར་བཀོད་པ་སྟེ་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （གཉན་ཆེན་ཐང་ལྷའི་གསོལ་མཆོད་ནི།） ཧཱུྃ་ཧྲཱིཿ པདྨའི་བཀའ་སྡོད་བོད་ཡུལ་ཞིང་སྐྱོང་གཙོ། །གཉན་ཆེན་ཐང་ལྷ་ཡར་བཞུད་འཁོར་དང་བཅས། །འདིར་གཤེགས་དམ་རྫས་བདུད་རྩིའི་མཆོད་པ་བཞེས། །གསོལ་ལོ་མཆོད་དོ་ཐུགས་（34བ）དམ་གཉན་པོ་བསྐང་། །རྟག་ཏུ་སྲུང་སྐྱོབ་སྡོང་གྲོགས་མ་གཡེལ་བར། །འགལ་རྐྱེན་ཀུན་སེལ་མཐུན་རྐྱེན་ཡིད་བཞིན་སྒྲུབས། །དགྲ་འདྲེ་ཚར་གཅོད་འགྲོ་ཁམས་དབང་དུ་སྡུས། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །（ཅེས་པའང་དཔལ་འབྱོར་ཚེ་རིང་གི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ རཾ་ཡཾ་ཁཾ། ཨོཾ་ཨཱཿཧཱུྃ། ཧཱུྃ། དཔལ་གྱི་བཀའ་སྡོད་མཐུ་ཆེན་དྲག་རྩལ་ཅན། །དྲེགས་པ་སྡེ་བརྒྱད་ཕོ་ཉ་ཡང་འཁོར་བཅས། །འདིར་གཤེགས་མཐུན་པའི་དམ་རྫས་དགྱེས་བཞེས་ལ། །ཇི་ལྟར་བཅོལ་བའི་ཕྲིན་ལས་མྱུར་སྒྲུབ་མཛོད། །（ཅེས་པའང་ཛྙཱ་ནས་སོ།། །།） ༈ ཧྲཱིཿཛཿ ལྷ་ཆེན་དབང་ཕྱུག་ཆེན་པོ་འཁོར་དང་བཅས། །དམ་རྫས་བདུད་རྩིའི་མཆོད་གཏོར་འདི་བཞེས་ལ། །འགྲོ་ཀུན་མོས་པ་རྣམ་བཞིའི་དབང་བསྡུས་ཏེ། །གསང་བསྟན་མངའ་ཐང་རྒྱས་པའི་ཕྲིན་ལས་མཛོད། །（ཅེས་པའང་ཛྙཱ་ནས་སོ།། །།） ༈ ཛཿ དྲང་སྲོང་གཟའ་བདུད་ཆེན་པོ་འཁོར་དང་བཅས། །མཐུན་རྫས་དམར་གྱི་མཆོད་གཏོར་འདི་བཞེས་ལ། །བསྟན་དགྲ་དམ་ཉམས་སྐད་ཅིག་ཉིད་ལ་སྒྲོལ། །ཐོགས་མེད་མངོན་སྤྱོད་ཕྲིན་ལས་མྱུར་འགྲུབ་མཛོད། །（ཅེས་པའང་ཛྙཱ་ནས་སོ།། །།） ༈ རཾ་ཡཾ་ཁཾ། ཨོཾ་ཨཱཿཧཱུྃ། རིན་ཆེན་བྷནྡྷ་（35ན）འབར་བའི་སྣོད་ཡངས་པར། །གཏོར་མ་ཤ་ལྔ་བདུད་རྩི་འདོད་ཡོན་ལྔ། །རྟེན་སྒྲུབ་སྐོང་བའི་དམ་རྫས་མ་ཚང་མེད། །ཟག་མེད་ནམ་མཁའ་མཛོད་ཀྱི་འཁོར་ལོ་འདིས། །རྩ་བརྒྱུད་བླ་མ་ཡི་དམ་མཁའ་འགྲོའི་ཚོགས། །དཔལ་མགོན་མ་ནིང་དྲེགས་པ་སྡེ་བརྒྱད་དང་། །ཕོ་རྒྱུད་མོ་རྒྱུད་བཀའ་སྲུང་གཏེར་གྱི་བདག །ཡུལ་ལྷ་གཞི་བདག་དགྲ་ལྷ་གཉན་པོ་སོགས། །མདོར་ན་རིག་འཛིན་པདྨ་གླིང་པ་ཡི། །ཆོས་དང་རིགས་ཀྱི་སྲུང་མ་དམ་ཚིག་ཅན། །མ་ལུས་འཁོར་དང་བཅས་པ་ཐམས་ཅད་ལ། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །རྟག་ཏུ་བརྩེར་དགོངས་སྡོང་གྲོགས་མ་གཡེལ་བར། །ཉེས་པ་སྟོང་བསྣོལ་ལེགས་པ་བརྒྱ་དང་སྤྲོད། །འདོད་དོན་བཅོལ་བའི་ལས་རྣམས་མ་ལུས་པ། །ཐོགས་མེད་མྱུར་དུ་འགྲུབ་པའི་ཕྲིན་ལས་མཛོད། །（ཅེས་པའང་བསོད་ནམས་རྒྱ་མཚོས་བསྐུལ་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།） ༈ （དམར་པོ་ལྷ་གསུམ་གྱི་གསོལ་ཕྲིན་དབང་དྲག་འབར་བའི་གད་རྒྱང་ཞེས་བྱ་བ།） ༈ ཧྲཱིཿཛཿ སྣང་སྲིད་དབང་མཛད་ལྷ་ཆེན་དབང་ཕྱུག་ཆེ། །མཐུ་རྩལ་ཐོགས་མེད་གནོད་སྦྱིན་ཤན་པ་དམར། །བསྟན་（35བ）དགྲའི་སྲོག་ལེན་བཙན་རྒོད་འབར་བ་སྟེ། །ཁྱེད་གསུམ་རང་རང་སྤྲུལ་འཁོར་ཕོ་ཉར་བཅས། །དམ་ཚིག་གནས་འདིར་འབོད་དོ་སྤྱན་འདྲེན་གཤེགས། །མི་འབྲལ་གཏན་གྱི་སྲུང་མར་མངའ་གསོལ་ལོ། །ཕྱི་ནང་གསང་མཆོད་དགྲ་བགེགས་ཤ་ཁྲག་སོགས། །མཐུན་རྫས་འདོད་ཡོན་མི་ཟད་ལོངས་སྤྱོད་འདིས། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །བག་མེད་འགལ་འཁྲུལ་ཅི་མཆིས་བཟོད་པར་བཞེས། །བསྟེན་ཅིང་སྒྲུབ་པའི་རྣལ་འབྱོར་བདག་ཅག་ལ། །རྟག་ཏུ་སྲུང་སྐྱོབ་སྡོང་གྲོགས་མ་གཡེལ་བར། །ནད་གདོན་ལ་སོགས་འགལ་རྐྱེན་ཐམས་ཅད་སོལ། །ཆོས་སྲིད་ཕྲིན་ལས་མངའ་ཐང་དགུང་དུ་སྤོར། །མི་དང་མི་མིན་སྣང་སེམས་དབང་དུ་སྡུས། །ལོག་པར་འཁུ་བའི་བསྟན་དགྲ་ཆམ་ལ་ཕོབ། །བླ་མའི་སྐུ་དགྲ་རྣལ་འབྱོར་སྒོས་དགྲ་སྒྲོལ། །སྲུང་མ་གཉན་པོའི་མཐུ་དང་རྩལ་ཤུགས་ཕྱུངས། །སྔགས་འཆང་ཆེ་བའི་ཡོན་ཏན་དུས་འདིར་སྐྱེད། །བཀའ་དང་དམ་ལས་མ་འདའ་ས་མ་ཡ། །（ཞེས་པའང་སྔགས་སྟོན་པདྨ་དབང་ཆེན་གྱིས་བསྐུལ་བའི་ངོར་འཇིགས་བྲལ་ཡེ་ཤེས་རྡོ་རྗེས་སོ། །འདི་སུ་བྱུང་གི་བཏོན་ན་ང་ལ་འཁུ་ལྡོག་འབྱུང་ངོ་།། །།） ༈ （པེ་ཧར་གསོལ་བསྡུས་ནི།） ཀྱེ། སྲིད་གསུམ་（36ན）དབང་བསྒྱུར་མཐུ་བོ་ཆེ། །ལྷ་ཡི་གིང་ཆེན་པེ་ཧ་ར། །མཆེད་ལྔ་བློན་འཁོར་ཕོ་ཉར་བཅས། །དམ་ཚི་གནས་འདིར་སྤྱན་འདྲེན་གཤེགས། །དངོས་འབྱོར་ཡིད་སྤྲུལ་མཆོད་པའི་སྤྲིན། །ནམ་མཁའ་མཛོད་ཀྱི་ལོངས་སྤྱོད་འདིས། །གསོལ་ལོ་མཆོད་དོ་ཐུགས་དམ་བསྐང་། །དགྱེས་ཤིང་ཚིམ་པར་རོལ་ནས་ཀྱང་། །སྔོན་ཚེ་པདྨའི་སྤྱན་སྔ་རུ། །ཁས་བླངས་ཐ་ཚིག་ཇི་བཞིན་དུ། །གསང་ཆེན་བསྟན་དང་བསྟན་འཛིན་གྱི། །དབུ་འཕང་བསྟོད་ལ་ཆོས་འཁོར་སྐྱོངས། །མངའ་ཐང་འདུ་བ་རྒྱས་པར་སྤེལ། །དཀོར་རྐུན་འབྱུང་པོ་རྩད་ནས་ཆོད། །ལོག་པར་ལྟ་བའི་བསྟན་དགྲ་སྒྲོལ། །སྒྲུབ་པའི་རྣལ་འབྱོར་བདག་ཅག་ལ། །གནོད་པའི་འགལ་རྐྱེན་མ་ལུས་སོལ། །ཕན་པའི་སྡོང་གྲོགས་ལས་མ་གཡེལ། །གང་བསམ་འདོད་དོན་ཡིད་བཞིན་སྒྲུབས། །ཕྱོགས་ལས་རྣམ་རྒྱལ་ཕྲིན་ལས་མཛོད། །（ཅེས་པའང་ཉིང་འཁྲུལ་དུ་ཆོས་སྐྱོང་རང་ཉིད་ཀྱིས་དྲན་བསྐུལ་བྱུང་བའི་སྣང་བ་ལ་བརྟེན་ནས་འཇིགས་བྲལ་ཡེ་ཤེས་རྡོ་རྗེས་ཤར་མར་བྲིས་པའོ།། །།） ༈（དགེ་བསྙེན་ཇག་པ་མེ་ལེན་གྱི་མཆོད་གསོལ་འདོད་པའི་རེ་སྐོར་བཞུགས།） ༈ ཧཱུྃ། རིག་འཛིན་པདྨ་ཐོད་ཕྲེང་གི ། བཀའ་ཉན་（36བ）བཙན་རྒོད་དམ་ཚིག་ཅན། །ཇག་པ་མེ་ལེན་འཁོར་དང་བཅས། །རྣལ་འབྱོར་གདུང་བས་དེང་འབོད་དོ། །ཐིམ་ཡུལ་བདེ་ཆེན་ཕུག་ལ་སོགས། །རང་བཞིན་གར་བཞུགས་གནས་མཆོག་ནས། །སྐད་ཅིག་ཉིད་ལ་འདིར་གཤེགས་ཤིག །དངོས་བཤམས་ཡིད་སྤྲུལ་མཆོད་པའི་སྤྲིན། །དགྱེས་རྒུའི་དམ་རྫས་མ་ཚང་མེད། །གདུག་ཅན་བསྒྲལ་བའི་ཤ་ཁྲག་རུས། །མི་ཟད་འདོད་ཡོན་ནམ་མཁའ་མཛོད། །ཁྲག་འཐུང་རྔམས་པའི་དགའ་སྟོན་འདིས། །གསོལ་ལོ་མཆོད་དོ་ཐུགས་དམ་བསྐང་། །རྨོངས་དང་མ་རིག་དབང་གྱུར་པའི། །འགལ་འཁྲུལ་ཉམས་ཆག་བཟོད་པར་བཞེས། །མི་འབྲལ་གྲོགས་སུ་མངའ་གསོལ་ལོ། །དབུ་འཕང་གཉན་པོ་དགུང་དུ་བསྟོད། །བདག་ཅག་རྣལ་འབྱོར་སྒྲུབ་པ་པོ། །ཆོས་འཁོར་མངའ་རིས་སྡེ་དང་བཅས། །རྟག་ཏུ་སྲུང་སྐྱོབས་མ་གཡེལ་བར། །འགལ་རྐྱེན་ཉེས་པ་ཐམས་ཅད་སོལ། །མཐུན་རྐྱེན་བསམ་རྒུ་ཡིད་བཞིན་སྒྲུབས། །ཁྱད་པར་བསྟན་དང་བསྟན་འཛིན་ལ། །གནོད་འཚེའི་བསམ་སྦྱོར་འཆང་བའི་རིགས། །གང་ཡིན་ཁྱོད་ལ་ཟས་སྐལ་དུ། །གཏད་པ་ཡིན་ནོ་ཤོར་ཏ་རེ། །མཐུ་སྟོབས་ནུས་པའི་རྩལ་ཤུགས་ཕྱུང་། །ལོ་ཟླར་འགྱངས་སུ་（37ན）མ་ཤོར་བར། །སྲོག་རྩ་ཆོད་ལ་སྙིང་ཁྲག་རྔུབས། །མཐའ་རྩ་སྐྱེ་རྒྱུད་ལྷག་མེད་ཐོངས། །མིང་ཙམ་མེད་པར་ཚར་ཆོད་ཅིག །དུས་ལ་བབ་པོ་ས་མ་ཡ། །མདོར་ན་བདག་གིས་བཅོལ་བའི་ལས། །སྐད་ཅིག་ཉིད་ལ་བསྒྲུབ་ནས་ཀྱང་། །བསྟན་པའི་མངའ་ཐང་དགུང་དུ་སྤོར། །ཕྱོགས་ལས་རྣམ་རྒྱལ་ཕྲིན་ལས་མཛོད། །（ཅེས་པའང་གྲུབ་མཆོག་བླ་མ་དམ་པ་བསོད་ནམས་བཟང་པོའི་གསུང་གི་ངོར་འཇིགས་བྲལ་ཡེ་ཤེས་རྡོ་རྗེས་ཤར་མར་སྦྱར་བ་ཛ་ཡནྟུ།། །།） ༈ ཧཱུྃ། རྒྱལ་བ་ཀུན་གྱི་མཁྱེན་བརྩེ་ནུས་པའི་སྟོབས། །གཅིག་བསྡུས་སྣང་སྲིད་ཟིལ་གནོན་པདྨ་འབྱུང་། །སྙིགས་དུས་བདུད་འགོང་དཔུང་ཚོགས་འདུལ་བའི་ཕྱིར། །སྐྱེས་བུ་དགྲ་བླའི་སྐུར་བཞེངས་སེང་ཆེན་རྒྱལ། །བདག་ཉིད་རྩེ་གཅིག་མོས་པའི་གདུང་ཤུགས་ཀྱིས། །ཁྱེད་བསྒྲུབ་ཁྱེད་མཆོད་ཁྱེད་བསྟོད་ཁྱེད་བསྐུལ་ན། །མཐུ་རྩལ་མ་ཆུང་རྟག་ཏུ་བརྩེར་དགོངས་ལ། །འཇིགས་དབང་བར་ཆད་ཉེས་པའི་ཚོགས་ལས་སྐྱོབས། །ཚེ་བསོད་དཔལ་འབྱོར་སྙན་གྲགས་གོང་དུ་སྤོར། །སྐྱེ་འགྲོའི་སྣང་བ་ཐོགས་མེད་དབང་དུ་སྡུས། །ཕས་རྒོལ་དགྲ་དཔུང་མ་ལུས་རྡུལ་དུ་རློག །ཕྱོགས་ལས་རྣམ་（37བ）པར་རྒྱལ་བའི་ཕྲིན་ལས་མཛོད། །（ཅེས་པའང་རྦ་ཁ་སྤྲུལ་སྐུ་པདྨ་བསྟན་འཛིན་གྱིས་ལྷ་རྫས་རིན་པོ་ཆེའི་སྐྱེས་དང་བཅས་ཏེ་གསུང་གིས་བསྐུལ་བ་བཞིན་འཇིགས་བྲལ་ཡེ་ཤེས་རྡོ་རྗེས་བྲིས་པ་ཛ་ཡནྟུ།། །།） ༈ （ཞིང་བསང་མདོར་བསྡུས་ནི། བཟང་ཤིང་ཕྱེ་མར་བསྲེག་ལ།） རཾ་ཡཾ་ཁཾ། ཨོཾ་ཨཱཿཧཱུྃ། （ལན་གསུམ།） སྟོང་ཉིད་དབྱིངས་ལས་འབར་བའི་མེ། །དུད་སྤྲིན་དྲི་བཟང་འོད་དུ་འཕྲོ། །འདོད་རྒུའི་ལོངས་སྤྱོད་ཆར་འབེབས་པའི། །ནམ་མཁའམཛོད་ཀྱི་འཁོར་ལོར་ཤར། །སྐྱབས་གནས་དཀོན་མཆོག་རྣམ་གསུམ་བསང་། །བརྒྱུད་གསུམ་རིག་འཛིན་བླ་མ་བསང་། །གུ་རུ་པདྨ་འབྱུང་གནས་བསང་། །ཆེ་མཆོག་རྡོ་རྗེ་གྲོ་ལོད་བསང་། །ཡི་དམ་ཞི་ཁྲོ་རབ་འབྱམས་བསང་། །གནས་གསུམ་དཔའ་བོ་མཁའ་འགྲོ་བསང་། །ཆོས་སྐྱོང་དམ་ཅན་རྒྱ་མཚོ་བསང་། །ནོར་ལྷ་གཏེར་བདག་གཞི་བདག་བསང་། །ཁྱད་པར་ལྷ་མོ་བརྟན་མ་སོགས། །སྟོང་གསུམ་འཇིག་རྟེན་ས་བདག་དང་། །ཡུལ་ཕྱོགས་འདིར་གནས་ལྷ་ཀླུ་གཉན། །སྡེ་བརྒྱད་འབྱུང་པོ་ཐམས་ཅད་བསང་། །འགལ་འཁྲུལ་ནོངས་པ་ཅི་མཆིས་བཤགས། །རང་རང་ཐུགས་དམ་བསྐང་ནས་ཀྱང་། །བདག་ཅག་（38ན）ཡོན་མཆོད་འཁོར་བཅས་ཀྱི། །ནད་གདོན་གནོད་པ་ཞི་བ་དང་། །བྱ་རིགས་གཅན་གཟན་འབུ་སྲིན་སོགས། །ཞིང་ལ་འཚེ་བའི་རིགས་རྣམས་བཟློག །ས་ལ་ས་ཡི་བཅུད་འཕེལ་ནས། །ལོ་ལེགས་འབྲུ་གཡང་རྒྱས་པར་མཛོད། །འགྲོ་ཀུན་བཀྲེས་ཕོངས་སྡུག་བསྔལ་ཞི། །སྦྱིན་པའི་ཕ་རོལ་ཕྱིན་རྫོགས་ཤོག །（ཅེས་པའང་རང་གཞན་ལ་ཕན་པའི་སེམས་ཀྱིས་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ། །།） ༈ （གནས་སྲུང་ཆེན་པོ་རྡོ་རྗེ་བྲག་བཙན་གྱི་གསོལ་མཆོད་ཕྲིན་ལས་ཆེ་བཙན་གྱི་ང་རོ་ཞེས་བྱ་བ།）

༈ ན་མོ་མ་ཧཱ་ཀྲོ་ངྷ་ཡེ། （དམར་གྱི་གཏོར་མ་དགྲ་བགེགས་ཀྱི་ཕུང་པོར་སྤེལ་ལ།） ཧཱུྃ་ཛཿ ཁྲག་འཐུང་པདྨ་དྲག་པོ་ཡི། །བཀའ་ཉན་གཏེར་བདག་དམ་ཚིག་ཅན། །སྐྱེས་བུ་རྡོ་རྗེ་བྲག་བཙན་ཆེ། །དགྲ་ལྷའི་རྒྱལ་པོ་དམ་ལ་དགོངས། །ཁྱེད་ཀྱི་སྤྲུལ་པའི་མཆེད་ཟླ་ནི། །འབར་བ་སྤུན་བདུན་འཇིགས་པའི་གཟུགས། །མི་དམར་རྟ་དམར་རྔམས་པའི་ཆས། །སྣང་སྲིད་བཙན་དམག་ཕོ་ཉར་འགྱེད། །གཙུག་ལག་ཆོས་འཁོར་མ་ལུས་དང་། །ཁྱད་པར་སྦས་ཡུལ་ཕྱི་ནང་གི ། རྫོང་མཁར་ཆེན་པོ་བཅོ་བརྒྱད་ནས། །འདིར་གཤེགས་དགྱེས་པའི་གདན་ལ་བཞུགས། །（38བ）ཁྱོད་དང་མཐུན་པའི་དམ་རྫས་ནི། །ཉེར་སྤྱོད་བདུན་དང་འདོད་ཡོན་ལྔ། །བདུད་རྩི་སྨན་ཕུང་རཀྟའི་མཚོ། །དམར་གྱི་གཏོར་མ་ལྷུན་པོར་སྤུང་། །དམ་ཉམས་དགྲ་བགེགས་བསྒྲལ་བ་ཡི། །ཤ་རུས་དོན་སྙིང་ནང་རོལ་དང་། །ཁྲག་ཞག་དྲོན་མོ་རྦ་ཀློང་འཕྱོ། །སྲ་བའི་གོ་དང་རྣོ་བའི་མཚོན། །མཛེས་པའི་རྒྱན་དང་བརྗིད་པའི་གོས། །སྤྱན་གཟིགས་རོལ་མོའི་བྱེ་བྲག་སོགས། །དངོས་འབྱོར་ཡིད་ལས་བྱུང་བ་ཡི། །མཛེས་པའི་རྒྱན་དང་བརྗིད་པའི་དཀོར། །དགྱེས་རྒུའི་ལོངས་སྤྱོད་དཔག་མེད་འདིས། །འཇིགས་བྱེད་ཆེན་པོའི་ཐུགས་དམ་བསྐང་། །བྲག་བཙན་ཆེན་པོའི་ཐུགས༴ ཨ་ཕོ་ཆེན་པོའི་ཐུགས༴ དགྲ་ལྷ་ཆེན་པོའི༴ སྲོག་གི་བདག་པོའི༴ འབར་བ་སྤུན་བདུན༴ རུ་འདྲེན་དམག་ཚོགས་ཐུགས༴ སྣང་སྲིད་དྲེགས་པའི༴ ཐུགས་དང་འགལ་བ་གྱུར་པའི་ལས། །བསྐང་ངོ་བཤགས་སོ་བཟོད་པར་བཞེས། །འཁུ་ལྡོག་གདུག་རྩུབ་མ་མཛད་ཅིག །དགྱེས་པའི་ཞལ་དང་འགྲུབ་རྟགས་ཐོན། །ཁྱེད་སྔོན་སློབ་དཔོན་ཆེན་པོ་ཡིས། །ཆོས་འཁོར་ཡོངས་ཀྱི་སྲུང་མར་བསྐོས། །སྦས་ཡུལ་ཆེན་པོ་གཉེར་དུ་གཏད། །དེ་ལྟའི་ཐ་ཚིག་མ་གཡེལ་（39ན）བར། །སྦས་ཡུལ་སྒོ་དང་ལམ་འཕྲང་བསྲུང་། །མི་བསྲུན་དགྲ་བོའི་རྒྱུ་ལམ་ཆོད། །སྐལ་བཟང་མཐུན་པའི་ལམ་སྣ་དྲོངས། །ངོ་མཚར་གནས་ཀྱི་དགེ་མཚན་སྟོན། །བསྟན་དང་འགྲོ་ལ་འཚེ་བ་ཡི། །གཟུགས་ཅན་མི་དང་མི་མིན་སྡེ། །མ་ལུས་ཁྱོད་ཀྱི་ཟས་སྐལ་གྱིས། །སྲོག་རྩ་ཆོད་ལ་དོན་སྙིང་ཕྱུང་། །རྗེས་ཤུལ་མེད་པར་རྡུལ་དུ་རློག །མདོར་ན་རྣལ་འབྱོར་བདག་ཅག་གིས། །བསམ་པའི་རེ་བ་གང་ཡིན་པ། །མྱུར་དུ་འགྲུབ་པའི་ཕྲིན་ལས་མཛོད། །（ཅེས་སྦས་པའི་ཡུལ་དུ་ལས་འཕྲོ་ཅན་གྱི་སྐྱེས་སུ་གནས་རྟེན་འཆའ་བའི་ཆ་རྐྱེན་དུ་རིག་པ་འཛིན་པ་འཇིགས་བྲལ་ཡེ་ཤེས་རྡོ་རྗེས་སྤེལ་བ་ཛ་ཡནྟུ།། །།）