TTDL-ZABTER-21-AA-004

Previous Text Back to Volume PageLast text in volume.

Wylie title	ma hA a ti yo ga'i chos skor las/ myur lam 'pho ba chen po'i gdams pa ma bsgoms sangs rgyas kyi don 'grel dpal ldan bla ma'i zhal lung kun tu bzang po'i thugs bcud brgyud 'dzin 'od skur grol ba'i man ngag brjed byang du bkod pa/
Location	bdud 'joms gling pa zab gter Volume 21, Text 4, Pages 465-639 (Folios 1a1 to 88a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Ma hA a ti yo ga'i chos skor las myur lam 'pho ba chen po'i gdams pa ma bsgoms sangs rgyas kyi don 'grel dpal ldan bla ma'i zhal lung kun tu bzang po'i thugs bcud brgyud 'dzin 'od skur grol ba'i man ngag brjed byang du bkod pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 21: 465-639. Thimphu, Bhutan: Lama Kuenzang Wangdue, 2004.
Side notes	Recto: thod rgal don 'grel   Verso: bdud 'joms myur lam 'pho chen
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Commentary on Content - don 'grel
Colophon	།ཅེས་པ་འདིའང་དུས་རིང་མོ་ནས་རྡོ་རྗེའི་སྤུན་གྲོགས་བླ་མ་མཐའ་ཡས་ཀྱི་ཡང་སྲིད་སྤྲུལ་པའི་སྐུ་ཀུན་བཟང་བསྟན་པའི་ཉི་མ་དང་། རང་སློབ་དམ་པ་ཤཱཀྱའི་དགེ་བཙུན་བྱ་བྲལ་བ་ཤེས་རབ་འོད་ཟེར་ནས་རིན་ཆེན་གཉིས་པའི་སྐྱེས་བཅས་བཀའ་བསྐུལ་སྤྱི་བོར་ཕེབས་པ་དང་། ཁྱད་པར༧སྐྱབས་རྗེ་ཐམས་ཅད་མཁྱེན་པའི་དངོས་སློབ་ལམ་འདིར་མོས་པ་ཤིན་ཏུ་ཆེ་བའི་ཤཱཀྱའི་དགེ་བཙུན་དམ་པ་སྟོབས་ལྡན་ནས་ཀྱང་ཆོས་མིན་གྱི་བྱ་བ་རྒྱང་ནས་སྤངས་ཏེ་མྱུར་ལམ་འདི་ཉིད་ལ་སྒྲུབ་པ་ལྷུར་ལེན་བྱེད་པའི་དམ་བཅའ་བཅས་ཏེ་བསྐུལ་བ་ཟབ་པ་དང་། གཞན་ཡང་རང་སློབ་དམ་པ་ཤཱཀྱའི་དགེ་བཙུན་སངས་རྒྱས་དང་། ཕན་བདེ། ཉེ་ཆར་པདྨའི་ལུང་ཟིན་ཡི་གེའི་འདུ་བྱེད་དགེ་བཙུན་ཚུལ་ཁྲིམས་རྡོ་རྗེ་དང་། རིགས་ཀྱི་མྱུ་གུ་ཆོས་དབྱིངས་སྒྲོན་མ་སོགས་ཀྱིས་ཡང་ཡང་ནན་ཆེར་བསྐུལ་བ་ལ་བརྟེན་ནས༦སྐྱབས་རྗེ་ཐམས་ཅད་མཁྱེན་པ་ཡིད་བཞིན་ནོར་བུས་དངོས་དང་རྨི་ལམ་ལྟ་བུར་གསུངས་པའི་ཞལ་རྒྱུན་རྣམས་མདོར་བསྡུས་ཙམ་བརྗེད་བྱང་གི་ཚུལ་དུ། གསེར་དགོན་དབེན་གནས་མཚམས་ཁྲོད་འོད་གསལ་ལྗོངས་ཀྱི་ཉེ་འདབས་སུ། རྗེ་ཉིད་ཀྱི་གཟུངས་མའི་ཆ་ཙམ་འཛིན་པ་སློབ་འབངས་ཀུན་གྱི་ཐ་ཤལ་བ་ཀུན་བཟང་ཆོས་ཉིད་བདེ་སྐྱོང་དབང་མོས་ཟླ༤ཚེས༢༥དགེ་བར་ཟིན་ཐོ་རུ་བཀོད་པ། ཡི་གེའི་རིས་བྱེད་ཤཱཀྱའི་དགེ་བཙུན་རང་གི་ཉེ་གནས་སྐྱེས་མཆོག་ཚུལ་ཁྲིམས་རྡོ་རྗེས་བགྱིས་པའོ། །དགེའོ། །དགེའོ། །དགེའོ།།
	/ces pa 'di'ang dus ring mo nas rdo rje'i spun grogs bla ma mtha' yas kyi yang srid sprul pa'i sku kun bzang bstan pa'i nyi ma dang /__rang slob dam pa shAkya'i dge btsun bya bral ba shes rab 'od zer nas rin chen gnyis pa'i skyes bcas bka' bskul spyi bor phebs pa dang /__khyad par7skyabs rje thams cad mkhyen pa'i dngos slob lam 'dir mos pa shin tu che ba'i shAkya'i dge btsun dam pa stobs ldan nas kyang chos min gyi bya ba rgyang nas spangs te myur lam 'di nyid la sgrub pa lhur len byed pa'i dam bca' bcas te bskul ba zab pa dang /__gzhan yang rang slob dam pa shAkya'i dge btsun sangs rgyas dang /__phan bde/__nye char pad+ma'i lung zin yi ge'i 'du byed dge btsun tshul khrims rdo rje dang /__rigs kyi myu gu chos dbyings sgron ma sogs kyis yang yang nan cher bskul ba la brten nas6skyabs rje thams cad mkhyen pa yid bzhin nor bus dngos dang rmi lam lta bur gsungs pa'i zhal rgyun rnams mdor bsdus tsam brjed byang gi tshul du/__gser dgon dben gnas mtshams khrod 'od gsal ljongs kyi nye 'dabs su/__rje nyid kyi gzungs ma'i cha tsam 'dzin pa slob 'bangs kun gyi tha shal ba kun bzang chos nyid bde skyong dbang mos zla4tshes25dge bar zin tho ru bkod pa/__yi ge'i ris byed shAkya'i dge btsun rang gi nye gnas skyes mchog tshul khrims rdo rjes bgyis pa'o/__/dge'o/__/dge'o/__/dge'o//

Tibetan Text

[edit]

༄༅། །མ་ཧཱ་ཨ་ཏི་ཡོ་གའི་ཆོས་སྐོར་ལས། མྱུར་ལམ་འཕོ་བ་ཆེན་པོའི་གདམས་པ་མ་བསྒོམས་སངས་རྒྱས་ཀྱི་དོན་འགྲེལ་དཔལ་ལྡན་བླ་མའི་ཞལ་ལུང་ཀུན་ཏུ་བཟང་པོའི་ཐུགས་བཅུད་བརྒྱུད་འཛིན་འོད་སྐུར་གྲོལ་བའི་མན་ངག་བརྗེད་བྱང་དུ་བཀོད་པ་བཞུགས་སོ། །

༄༅། །ན་མོ་གུ་རུ་བྷྱ།ཀུན་བཟང་རྡོར་སེམས་དགའ་རབ་ཤྲཱི་སིང་། །འཇམ་དཔལ་བཤེས་གཉེན་ཛྙཱ་ན་སཱུ་ཏྲ་དང་། །བི་མ་པད་འབྱུང་ཡེ་ཤེས་མཚོ་རྒྱལ་སོགས། །བརྒྱུད་གསུམ་བླ་མ་རྣམས་ལ་་ཕྱག་བགྱིའོ། །ཐེག་མཆོག་སྙིང་པོའི་ཤིང་རྟ་ཀློང་ཆེན་པ། །མདོ་སྔགས་བསྟན་པའི་ཉི་མ་འཇིགས་མེད་གླིང་། །གཏེར་སྟོན་རྒྱ་མཚོའི་འཁོར་བསྒྱུར་བདུད་འཇོམས་རྗེ། །སྐྱབས་མཆོག་རྣམ་གསུམ་བདེ་ཆེན་འཁོར་ལོར་བསྙེན། །ཆོས་དབྱིངས་མཐའ་བྲལ་དྭངས་མའི་མཁའ་ཀློང་ནས། །ལྷུན་གྲུབ་སྐུ་དང་ཡེ་ཤེས་བདག་ཉིད་དཔལ། །གང་འདུལ་ཐབས་ཀྱི་སྒྱུ་འཕྲུལ་སྤྲུལ་པ་ངོམས། །རིགས་ཀུན་ཁྱབ་བདག་གཏེར་ཆེན་ཆོས་ཀྱི་རྗེ། །པདྨ་ལས་འབྲེལ་རྩལ་ལ་གུས་པས་འདུད། །འབྲལ་མེད་སྙིང་དབུས་མི་འགྱུར་ཐིག་ལེའི་ཀློང་། །རྟག་བཞུགས་ཤེས་རབ་གསུམ་གྱི་སྣང་བ་སྩོལ། །བདག་རྒྱུད་སྨིན་ཅིང་གྲོལ་བར་མཛད་དུ་གསོལ། །ཐེག་བརྒྱད་བློ་ཡིས་མ་རིག་རྩེ་རྒྱལ་ཆོས། །འབྲས་བུ་ཚེ་འདིར་སྦྱོར་བའི་མྱུར་ལམ་མཆོག།ཁྱད་པར་བདུན་གྱིས་འཕགས་པའི་ཐོད་རྒལ་ལམ། །འཇའ་ལུས་མངོན་བྱེད་འོད་གསལ་མཐར་ཐུག་གི། །ལམ་སྣང་ཇི་ལྟར་ཉམས་སུ་བླང་བའི་ཚུལ། །འཆད་ཚུལ་སྐྱབས་རྗེ་བླ་མའི་ཞལ་གསུངས་བཞིན། །ཡིད་ངོར་གང་ཟིན་བརྗེད་བྱང་ཚུལ་དུ་ནི། །རང་གཞན་དོན་དུ་ཡི་གེའི་རིས་སུ་འགོད། །བླ་མ་ཡི་དམ་ལྷ་དང་མཁའ་འགྲོའོ་ཚོགས། །ཆོས་བདག་དང་ནི་གཏེར་སྲུང་རྒྱ་མཚོ་ཡིས། །གནང་བ་སྩོལ་ལ་བདག་རྒྱུད་བྱིན་གྱིས་རློབས། །དགོངས་དོན་ཟབ་བརླིང་དོན་རྣམས་འབྱེད་མཁས་པའི། །སོར་རྟོག་ཡེ་ཤེས་མཆོག་དུ་འབར་བར་མཛོད། །ཅེས་མཆོད་པར་བརྗོད་པ་དང་གནང་བ་ཞུས་པའི་ཚིག་གིས་མདུན་བསུས་ཏེ།དེ་ལ་འདིར་རྒྱལ་བ་ཐབས་མཁས་ལ་ཐུགས་རྗེ་ཆེ་བ་རྣམས་ཀྱིས།གདུལ་བྱའི་ཁམས་དབང་མོས་པ་དང་མཐུན་པའི་མདོ་སྔགས་ཆོས་ཀྱི་སྒོ་ཇི་སྙེད་ཅིག་བསྟན་པ་རྣམས་ཀྱི་དོན་པོ།འབྲས་བུ་བླ་ན་མེད་པའི་ཡེ་ཤེས་མཐར་ཐུག་པ་ཐེག་བརྒྱད་བློ་ཡི་གྲུབ་མཐས་མ་རེག་པའི་འོད་གསལ་མྱུར་ལམ་ཐོད་རྒལ་གྱི་ལམ་སྣང་ཇི་ལྟར་ཉམས་སུ་བླང་བའི་ཚུལ་གྱི་གདམས་པ་འདི་ཉིད་འཆད་པར་བྱེད་པ་ལ།བཤད་བྱའི་ཡན་ལག་བཤད་པ་དང་།བཤད་བྱའི་གཞུང་དོན་དངོས་བཤད་པ་གཉིས་ལས།བཤད་བྱའི་ཡན་ལག་བཤད་པ་དེ་ཉིད་སྔོན་དུ་གྲུབ་ཟིན་པའི་དབང་དུ་བཏང་སྟེ།གཉིས་པ་བཤད་བྱའི་གཞུང་དོན་དངོས་བཤད་པར་བྱེད་པ་ལའང་།ཐོག་མར་དགེ་བ་ཀླད་ཀྱི་དོན།བར་དུ་དགེ་བ་གཞུང་གི་དོན།ཐ་མར་དགེ་བ་མཇུག་གི་དོན་དང་གསུམ་ལས།དེ་ལ་དང་པོ་ཐོག་མར་དགེ་བ་ཀླད་ཀྱི་དོན་ལའང་།མཚན་དོན་སྨོས་པ།མཆོད་པར་བརྗོད་པ།བརྩམ་པར་དམ་བཅའ་བ་དང་གསུམ་དུ་ཡོད་པ་ལས།དང་པོ་མཚན་དོན་སྨོས་པ་ནི།མ་ཧཱ་ཨ་ཏི་སོགས་ཀྱིས་བསྟན་ཏེ།མ་ཧཱ་ནི་ཆེན་པོ།ཨ་ཏི་རྫོགས་པ།ཡོ་ག་རྣལ་འབྱོར་ཆེན་པོའི་དགོངས་བཅུད་མཐར་ཐུག་པ་རྫོགས་པ་ཆེན་པོའི་ཐེག་པ།དཔེར་ན་ནམ་མཁའི་དབྱིངས་ལྟ་བུ།རྒྱ་མཚོའི་གཏིང་ལྟ་བུ།ཟབ་ཅིང་རྒྱ་ཆེ་བའི་ཆོས་ཕུན་སུམ་ཚོགས་པ་འདི་ཉིད་བསླབ་པ་དང་སྦྱངས་པའི་རྐྱེན་ལ་མ་ལྟོས་པར།ཆོས་ཉིད་དེ་བཞིན་ཉིད་ཀྱི་གནས་ལུགས་མངོན་དུ་གྱུར་ནས་དུས་གསུམ་གྱི་རྒྱལ་བ་ཐམས་ཅད་ཀྱི་དགོངས་པ་མཐར་ཐུག་གི་དོན་ཐུགས་གསང་དགོངས་པའི་ཀློང་ནས་བརྡ་རང་རྡོལ་དུ་བྱུང་བ་ལས།ཐེག་པ་རིམ་དགུའི་ཆོས་བཅུད་སྙིང་པོར་དྲིལ་བ་ཡིན་པས་ན་ཟབ།གསང་ཆེན་གཉིས་དང་ལྡན་པས་གསང་།འཁོར་བའི་ཆོས་ཕུང་པོ་ཁམས་དང་སྐྱེ་མཆེད་ཐམས་ཅད་རྫོགས་པས་གཞི་རྫོགས་པ།ལམ་ཐེག་པ་རིམ་པ་དགུ་འབྲས་བུའི་ཆ་དང་བཅས་པ་རྫོགས་པས་ལམ་རྫོགས་པ།བསམ་གྱིས་མི་ཁྱབ་པའི་སྐུ་དང་ཡེ་ཤེས་ཡོན་ཏན་ཐམས་ཅད་རྫོགས་པས་འབྲས་བུ་རྫོགས་པ་སྟེ་རྫོགས་པ།རྫོགས་པ་གཞན་གྱིས་འགྲན་ཟླ་དང་བྲལ་བའི་ཐེག་པ་རིམ་དགུའི་སྤྲོ་བསྡུའི་གཞི་རི་གྱུར་པས་ན་ཆེན་པོ།དེ་ལའང་ཕྱི་སེམས་སྡེ།ནང་ཀློང་སྡེ།གསང་བ་མན་ངག་གི་སྡེ་དང་གསུམ་ལས།མན་ངག་སྡེ་ལའང་།ཕྱི་སྐོར།ནང་སྐོར།གསང་སྐོར།ཡང་གསང་བླ་ན་མེད་པའི་སྐོར་དང་བཞི་ཡོད་པ་ལས།འདིར་ཡང་གསང་བླ་ན་མེད་པའི་སྐོར་ཡིན་པས་ཡང་ཟབ།དཔེར་ན་སའི་སྙིང་པོ་གསེར།ཆུའི་སྙིང་པོ་ལན་ཚྭ།འོ་མའི་སྙིང་པོ་མར།མར་གྱི་ཡང་ཞུན་མར་ཁུ་ལྟ་བུ།ཡེ་ཤེས་མཆོག་ཏུ་གསང་བ་ཆོས་ཐམས་ཅད་ཀྱི་སྙིང་པོར་གྱུར་པས་ན་བཅུད་ཀྱི།ལམ་འདི་ལ་བརྟེན་ནས་མ་དག་སྙིགས་མའི་སྣང་བ་ཐམས་ཅད་སྐད་ཅིག་དང་པོར་དྭངས་མ་འོད་ལྔའི་རང་བཞིན་དུ་བཤིག་པར་བྱེད་པས་ན་དྭངས་མ།མདོ་ལམ་གྱིས་གྲངས་མེད་གསུམ་གྱི་དམ་བཅའ།སྔགས་ཀྱིས་སྐྱེ་བ་གསུམ་མམ་བདུན་གྱི་དམ་བཅའ།རྫོགས་པ་ཆེན་པོ་གཞི་ཀ་དག་ཁྲེགས་ཆོད་ཀྱིས་ཚེ་གཅིག་གི་དམ་བཅའ།ཐོད་རྒལ་གྱིས་མི་ལོ་བདུན་ནམ་བཅུ་གསུམ་ནས་ཟུང་འཇུག་རྡོ་རྗེ་འཆང་གི་གོ་འཕང་ལ་མིག་འཕྲུལ་ལྟ་བུར་བསྒྱུར་བའི་ལམ་མྱུར་ལ་ཆོད་ཆེ་བ་ཡིན་པས་ན་མྱུར་ལམ།མ་དག་སྙིགས་མའི་སེམས་དང་སེམས་བྱུང་སྣོད་བཅུད་ཀྱི་ཞེན་རྟོག་ཐམས་ཅད་བཙན་ཐབས་ཉིད་དུ་སྐུ་དང་ཡེ་ཤེས་ཀྱི་དབྱིངས་སུ་འཕོ་བར་བྱེད་པས་ན་འཕོ་བ་ཆེན་པོའི།རྐྱེན་དགེ་བའི་བཤེས་གཉེན་དང་།ཐབས་བྱུང་མན་ངག་ཟབ་མོ་ལ་བརྟེན་ནས།ཡུལ་ཚོགས་སྨོན་ལས་འཕྲོ་དང་ལྡན་པའི་སྐྱེས་བུ་གསུམ་རྒྱུ་རྐྱེན་ཕུན་སུམ་ཚོགས་པའི་རྟེན་འབྲེལ་དུས་འཛོམ་པའི་ཚེ་ན།རིག་པ་རང་བྱུང་གི་ཡེ་ཤེས་གདམས་པའི་རྣམ་པར་ཤར་ནས།རྗོད་བྱེད་ཚིག་ལ་བརྟེན་ནས་བརྗོད་བྱའི་དོན་ཟབ་མོ་ཁོང་དུ་ཆུད་པས་ན་གདམས་པ།གཞིར་གནས་ཀྱི་ཆོས་སྐུ་ངོ་རང་ཐོག་དུ་འཕྲོད་དེ།གཞི་སྣང་འོད་གསལ་ཆེན་པོའི་ལམ་མངོན་དུ་བྱས་པ་ཙམ་གྱིས་འབད་མེད་དུ་གྲོལ་བས་ན་མ་བསྒོམ།མ་རིག་པའི་གཉིད་འཐུག་པོ་ལྟ་བུ་ལས་སངས་ཤིང་།སྐུ་དང་ཡེ་ཤེས་ཡོན་ཏན་གྱི་ངང་རྒྱས་པས་ན་སངས་རྒྱས།དེ་ལྟ་བུའི་མ་རིག་པའི་དྲི་མ་ཐམས་ཅད་རིག་པའི་ངང་དུ་སངས་ཤིང་ཡེ་ཤེས་ཡོན་ཏན་ཐམས་ཅད་ཀྱི་ངང་རྒྱས་པར་བྱེད་པའི་མན་ངག་ཟབ་མོ་འདི་ན་ཡོད་དོ་ཅེས་པ་ནི་བཞུགས་སོ། །གཉིས་པ་མཆོད་པར་བརྗོད་པ་ནི།རྡོ་རྗེ་ཕུང་པོའི་སོགས་ཀྱིས་བསྟན།དེ་ལའང་དུས་གསུམ་ཀུན་ཏུ་རང་རིག་པའི་ངོ་བོ་གཞན་དུ་འགྱུར་བ་མེད་པར་གནས་པ་ནི་བརྟན་པ་དང་།འཁོར་འདས་ཀྱི་ཆོས་ཐམས་ཅད་རང་བྱུང་ཡེ་ཤེས་ཀྱི་ངང་ལས་མ་གཡོས་ཤིང་རིག་པའི་རོལ་རྩལ་ལས་འདའ་བ་མེད་པ་ནི་བསྡུས་པ་དང་།གནས་ལུགས་མངོན་དུ་གྱུར་ཚེ་མ་དག་སྣོད་བཅུད་ཀྱི་སྣང་ཞེན་ཐམས་ཅད་དག་པ་ཆོས་ཉིད་ཀྱི་འཁོར་ལོར་ཡེ་ནས་གཉིས་སུ་མེད་པར་རོ་གཅིག་ཏུ་གྱུར་པ་ནི་རྟོགས་པ་སྟེ།བརྟན་བསྡུས་རྟོགས་གསུམ་གྱི་ངོ་བོར་ཡེ་ནས་བཞུགས་པས་ན་རྡོ་རྗེ།གཞི་སྣང་ལྷུན་གྲུབ་ཀྱི་འཁོར་ལོ་ཤར་བའི་ཚེ་ན།མ་སྨིན་པའི་རིག་པ་ལྷན་སྐྱེས་ཀྱི་མ་རིག་པས་བསླད་ནས་རྒྱུ་གསུམ་རྐྱེན་བཞིའི་དབང་གིས།ཕྱི་འབྱུང་བ་ལྔ། །ནང་ཕུང་པོ་ལྔ།གསང་བ་སེམས་དང་སེམས་བྱུང་གི་རྣམ་པར་ལམ་གྱིས་བྱུང་ནས།གཉུག་མ་མི་འགྱུར་བའི་རྡོ་རྗེ་གསུམ་ལུས་ངག་ཡིད་གསུམ་དུ་བསྒྲིབ་པའི་ཚེ་ན།རྩ་རླུང་ཐིག་ལེའི་ཁམས་ཐམས་ཅད་ཀྱང་གདོད་ནས་སྐུ་གསུམ་གྱི་རང་བཞིན་དུ་བཞུགས་པའི་ལྷ་ཚོགས་རྣམས་ཀྱང་།ཏིལ་གྱི་གོང་བུ་རྒྱས་པ་ལྟ་བུར་རྡོ་རྗེ་ཕུང་པོའི་ལུས་ལ་བརྟེན་ནས་གནས་པ་ཡིན་ཏེ།དེའི་ཕྱིར་མང་དུ་བསགས་པའམ་ཚོགས་པ་ལ་གྲོང་ཁྱེར་གྱི་སྒྲར་བརྗོད་པ་ཡིན།དེ་ཡང་སྒྱུ་ཡེ་ཤེས་ལྔ་ལ།འཕྲུལ་སྐུ་ལྔ་ཞིང་ལྔ་སོགས་སུ་རྣམ་པར་འཕྲུལ་པའི་བཀོད་པ་ཐམས་ཅད་ཀྱང་མ་བཙལ་འབད་མེད་དུ་གཞི་རང་གི་རོལ་པར་རང་བྱུང་དུ་ཤར་བ་ཡིན་ཏེ།དེ་ཡང་གཞི་དུས་སུ་སྙིང་གར་ཞི་བ་བཞི་བཅུ་རྩ་གཉིས་དང་།ཞི་བའི་གདངས་ལས་དུང་ཁང་དུ་ཁྲག་ཐུང་ཁྲོ་བོ་ལྔ་བཅུ་རྩ་བརྒྱད་ཀྱི་རྣམ་པར་བཞུགས་ཤིང་།གཞན་ཡང་ཕུང་ཁམས་གཤེགས་པ་གཤེགས་མ།དབང་ཡུལ་སེམས་དཔའ་སེམས་མ།ཡན་ལག་སྒོ་སྐྱོང་ཕོ་མོ་སོགས་གདན་གསུམ་ཚང་བ་ལྷའི་འཁོར་ལོ་རྡོ་རྗེ་དབྱིངས་ཀྱི་ལྷ་ཚོགས་ཐམས་ཅད་མ་བཙལ་ལྷུན་གྲུབ་ཏུ་གནས་ཤིང་རྫོགས་པ་ལ།ངེས་ཤེས་ཁྱད་པར་ཅན་འཁྲུངས་ནས་ལྷ་དང་རང་སྣང་དབྱེར་མེད་དུ་མཐོང་བར་སྒོ་གསུམ་མི་ཕྱེད་གཅིག་ཏུ་འདུམ་པའི་དད་པའི་སྒོ་ནས་གུས་པ་ཆེན་པོས་སྤང་བླང་ཞེན་འཛིན་དང་བྲལ་བར་གཉིས་མེད་རིག་པའི་ཆོ་འཕྲུལ་ཙམ་དུ་ཕྱག་འཚལ་བའོ། །བརྡ་ཡིག༠༠༠༠༤༧༤བརྡ་ཡིག་འདི་རྣམས་ནི་ཆོས་འདི་འབྱུང་བའི་ཁུངས་ཡིན་ནོ། །གསུམ་པ་བརྩམ་པར་དམ་བཅའ་བ་ནི།བདག་འདྲ་རིག་འཛིན་སོགས།འདི་བསྟན་བྱ༔ ཞེས་པས་བསྟན་ཏེ།དེ་ལ་འདིར་དུས་གསུམ་གྱི་རྒྱལ་བ་ཐམས་ཅད་ཀྱི་ཕྲིན་ལས་གཅིག་ཏུ་བསྡུས་པའི་བདག་ཉིད་ཆེན་པོ་དོན་གཉིས་ཀྱི་མཛད་པ་མཐར་ཕྱིན་ནས།རང་དོན་དུ་ཆོས་ཀྱི་སྐུ་བརྙེས་ཟིན་ཀྱང་།གདུལ་བྱའི་ལས་སྨོན་གྱི་དབང་གིས་གང་འདུལ་གྱི་སྤྲུལ་པའི་སྐུར་བཞེངས་པ་བདག་འདྲ་ལྷུན་གྱིས་གྲུབ་པའི་རིག་འཛིན་གྱི་རྣམ་པར་གནས་ཤིང་།རྡོ་རྗེ་ལྟ་བུའི་སྐུ་སྐྱེ་འཆི་བསྒྲེས་རྒུད་དང་བྲལ་བ།འཇའ་ལུས་སྒྱུ་མའི་སྐུར་སྣང་པད་འབྱུང་གཤོག་རྒོད་རྩལ་ངས་སམ་བདག་གིས།ཚེ་རབས་མང་པོའི་སྔོན་རོལ་ནས་ཚོགས་གཉིས་ཀྱི་འཇུག་སྒོ་རྣམ་པར་དག་པའི་མཐུ་ཚད་མེད་པ་དང་ལྡན་ཞིང་།སྨོན་ལམ་བཟང་པོས་ཉིང་མཚམས་སྦྱར་ནས།རང་བཞིན་རྫོགས་པ་ཆེན་པོའི་ཆོས་དང་བླ་མར་འཕྲད་ཅིང་།ཐེག་མཆོག་སྙིང་པོའི་དོན་ལ་འབྲེལ་བ་བཞག་པའི་ལས་འཕྲོ་རྣམས་ད་ལྟ་དུས་འཛོམ་པའི་སྐལ་བ་བཟང་པོའི་སྐྱེས་བུ་དད་པ་དང་ལྡན་ཞིང་དམ་ཚིག་གཙང་བ་ཁོ་ནའི་ཟ་ཐང་ངམ་སྐལ་བ་རུ།ཐེག་པ་གཞན་གྱིས་འགྲན་ཟླ་དང་བྲལ་བའི་མྱུར་ལམ།མ་དག་སྣོད་བཅུད་སྙིགས་མའི་སྣང་ཞེན་ཐམས་ཅད་འཕོ་ཆེན་དྭངས་མའི་དབྱིངས་སུ་བཙན་ཐབས་ཉིད་དུ་བཤིག་པར་བྱེད་པའི་གདམས་པ་ཟབ་མོ་འདི་བསྟན་པར་བྱའོ་ཞེས་ཁུར་དུ་བཞེས་པ་ཡིན་ནོ། །གཉིས་པ་བར་དུ་དགེ་བ་གཞུང་གི་དོན་ལའང་།སྔོན་འགྲོ་དང་།དངོས་གཞི།རྗེས་དང་གསུམ་ལས།དང་པོ་ཁྲེགས་ཆོད་ཀྱི་ལྟ་བས་གཞི་བཟུང་བ།ཐུན་མོང་གི་སྔོན་འགྲོ་སྤྱིར་བསྟན་པ།ཐུན་མོང་མ་ཡིན་པའི་སྔོན་འགྲོ་བྱེ་བྲག་ཏུ་བཤད་པའོ། །དང་པོ་ཁྲེགས་ཆོད་ཀྱི་ལྟ་བས་གཞི་བཟུང་བ་ནི།སྒོ་འདི་ཉམས་སུ་སོགས།བརྟན་ཐོབ་མཐར༔ ཞེས་པས་བསྟན་ཏེ།དེ་ལྟ་བུའི་འོད་གསལ་ཐོད་རྒལ་གྱི་སྒོ་ཟབ་མོ་འདི་ཉིད་ཉམས་སུ་ལེན་པར་འདོད་པའི་སྐྱེས་བུ་ལས་སྨོན་དང་ལྡན་པ་དག་གིས།དང་པོ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་བདག་མེད་པ་ལ་བདག་གི་གདགས་གཞི།དངོས་པོ་མེད་པ་ལ་དངོས་པོའི་སྣང་གཞི།འཁོར་འདས་སུ་རང་རྒྱུད་པར་མེད་པ་ལ་རང་རྒྱུད་བདེན་གྲུབ་ཏུ་བལྟ་བའི་གཞི་འཛིན་པ་གང་ཟག་གི་བདག་དང་།དེ་ལས་མཆེད་པ་གཟུང་བ་ཆོས་ཀྱི་བདག་གཉིས་ཀྱི་རང་བཞིན་ཡེ་ནས་བདེན་པར་མ་གྲུབ་ཅིང་སྐྱེ་འགགས་གནས་གསུམ་དང་བྲལ་བའི་སྟོང་ཉིད་དབུ་མ་ཆེན་པོའི་བདག་ཉིད་དུ་གཏན་ལ་ཕབ་ནས།འཁོར་འདས་མཉམ་ཉིད་ཆོས་སྐུའི་ངང་དུ་འུབ་ཏུ་འདུས་ཤིང་ཡོངས་སུ་ཆུབ་པའི་གནས་ལུགས་ཇི་བཞིན་པར་རྟོགས་ཤིང་།སྣང་སྲིད་སྣོད་བཅུད་འཁོར་འདས་ཀྱི་ཆོས་སོ་ཅོག་ཐམས་ཅད་རིག་པའི་རོལ་པ་ལས་མ་འདས་ཤིང་།རིག་སྟོང་ཁྱབ་བརྡལ་ཆེན་པོར་ངེས་ནས་གཉིས་མེད་མཉམ་པ་ཉིད་དུ་རྫོགས་པའི་དོན་ལ་མངའ་དབང་བསྒྱུར་བས་ལྟ་བའི་དོན་གཤིས་ཐོག་ཏུ་ཕེབས་པ་དང་།ཇི་ལྟ་བ་མཁྱེན་པའི་ཡེ་ཤེས་ཀྱི་གཞི་ལ་དབང་བསྒྱུར་བས་དག་པ་གཞིའི་བཞུགས་ཚུལ་དང་།ཇི་སྙེད་པ་གཟིགས་པའི་ཡེ་ཤེས་ཀྱི་ལམ་ལ་དབང་བསྒྱུར་ཏེ།ལམ་གྱི་བཞག་ཐབས་དང་ས་ལམ་གྱི་རིམ་པ་རྣམས་གཅིག་ཅར་དུ་རྟོགས་པའི་ཤེས་རབ་ཆེན་པོ་དེ་ཡི་སྟོབས་ཀྱིས་གནས་ལུགས་རྫོགས་པ་ཆེན་པོའི་ཡིན་ལུགས་ཇི་ལྟ་བ་བཞིན་དུ་ཡེ་བབ་སོར་བཞག་གི་ཏིང་འཛིན་གྱིས་མངོན་དུ་བྱེད་ཅིང་ངང་ལས་གཡོ་བ་མེད་པའི་བརྟན་པ་ཐོབ་པའི་མཐར།ཤིན་ཏུ་མྱུར་ལམ་ཐོད་རྒལ་གྱི་གདམས་པ་འདི་ཉིད་ཉམས་སུ་བླངས་ན་གེགས་དང་གོལ་ས་ཐམས་ཅད་ཤུགས་ལ་ཆོད་དེ་ལམ་མཐར་ཕྱིན་པའི་མན་ངག་ཟབ་མོ་ཡིན་ནོ། །གཉིས་པ་ཐུན་མོང་གི་སྔོན་འགྲོ་ལའང་།སྤྱི་དང་བྱེ་བྲག་གཉིས་ལས།དང་པོ་སྤྱིར་བསྟན་པ་བློ་ལྡོག་རྣམ་པ་བཞི་སྟེ།དེ་ལ་འདིར་དལ་འབྱོར་རྙེད་པར་དཀའ་བ་ལ་བསམ་ནས་ཚེ་འདིའི་བྱ་བ་དགྲ་འདུལ་གཉེན་སྐྱོང་ཆགས་སྡང་ལ་སོགས་པ་ཐམས་ཅད་སྤང་ཞིང་།སྒོ་གསུམ་གྱི་བྱ་བ་དམ་པའི་ཆོས་ཁོ་ནར་བློ་ཕུག་གཏད་ནས་ཆོས་མིན་གྱི་བྱ་བ་རྒྱང་ནས་སྤང་བ་དང་།འདུས་བྱས་ཀྱི་ཆོས་ཐམས་ཅད་མི་རྟག་པའི་ངང་ཚུལ་ཤེས་བཞིན་དུ།ཆོས་བསྒྲུབ་བློ་ཙམ་དང་ཕྱི་བཤོལ་དུ་མི་འཇོག་པར།དཔེར་ན་སྒེག་མོའི་མགོ་ལ་མེ་ཤོར་བ་ལྟ་བུར་ལེ་ལོ་དང་གཡེང་བ་མེད་པར་དམ་པའི་ཆོས་ལ་བརྩོན་ཞིང་སྙིང་པོ་ལོན་པར་བྱེད་པ་གལ་ཆེའོ། །འཁོར་བ་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་ཤིང་།བྱ་བ་དང་བྱེད་པ་ཐམས་ཅད་འཁོར་བའི་གཞི་མ།སྡུག་བསྔལ་གྱི་ས་བོན།དཔེར་ན་མི་གཙང་བའི་འདམ་གྱི་ཁྲོད་ན་དྲི་ཞིམ་མེད་པ་ལྟ་བུ།འཁོར་བའི་གནས་སུ་བདེ་བའི་གོ་སྐབས་སྐད་ཅིག་ཀྱང་མེད་པའི་དོན་ཤེས་བཞིན་དུ།ད་རེས་དལ་འབྱོར་གྱི་ལུས་རྟེན་བཟང་པོ་འདི་ལ་བརྟེན་ནས་རྣམ་མཁྱེན་རྒྱལ་བའི་གོ་འཕང་དོན་དུ་གཉེར་བ་ལ་འབད་པར་བྱའོ། །ལས་འབྲས་ལ་ཡིད་ཆེས་རྙེད་ནས་བླང་དོར་གྱི་གནད་མ་ནོར་བར་ལས་འབྲས་ཕྲ་ཞིང་ཞིབ་པར་མ་བསྲུང་ན།རང་བྱས་ལས་ཀྱི་རྣམ་སྨིན་བསླུ་བ་མེད་པར་རང་ཐོག་ཏུ་མྱོང་དགོས་པའི་རྒྱུ་མཚན་ལ་བསམ་ཞིང་།ལྟ་བ་མཐོ་སྐད་དང་ཐོས་རྒྱ་ཆེ་བར་རློམས་ནས་ལས་འབྲས་ཁྱད་དུ་མི་བསད་པར།དགེ་སྡིག་བླང་དོར་གྱི་གནས་ལ་མ་རྨོངས་པར་ཚུལ་བཞིན་ཤེས་པར་བྱས་ཏེ།གནས་ངན་འཁོར་བའི་རྒྱ་མཚོ་ལས་བརྒལ་བའི་ཕྱིར་དུ།དཔལ་ལྡན་བླ་མ་དམ་པའི་ཞབས་སུ་བཏུད་དེ།གཏན་གྱི་བདེ་བ་རྣམ་མཁྱེན་རྒྱལ་བའི་གོ་འཕང་རིན་པོ་ཆེ་འདི་ཉིད་ཚེ་ལུས་གཅིག་གིས་ཐོབ་པའི་ཕྱིར་དུ་མི་ཚེ་ཆོས་ལ་དྲིལ་ནས་བློ་གཏད་བླ་མ་དང་དཀོན་མཆོག་གསུམ་ལ་བཅའ།སྒྲུབ་གནས་དབེན་ཁྲོད་ལ་བྱེད།གྲོགས་རིག་པའི་ཡེ་ཤེས་དང་གྲོགས།གོས་ལྷག་སྐྱོབ་ཙམ་དང་།ཟས་སྲོག་འཚོ་ཙམ་ལ་བརྟེན་ནས་ཆོས་བརྒྱད་ཀྱི་འདུ་སྒོ་རྒྱལ་ནས་སྤངས་ཏེ་སྒྲུབ་པ་ལྷུར་ལེན་གྱི་གོ་ཆ་མི་དམན་པར་བྱ་བ་ནི་གནད་གལ་པོ་ཆེ་ཡིན་ནོ།བྱེ་བྲག་ཐུན་མིན་ནང་གི་སྔོན་འགྲོ་ལ་འཁོར་འདས་རུ་ཤན་དབྱེ་དགོས་ཏེ།ཐལ་འགྱུར་ལས།འཁོར་འདས་རུ་ཤན་མ་ཕྱེ་ན། །ཁམས་གསུམ་ལུས་ངག་ཡིད་ཀྱི་ཡང་། །འབྲེལ་བ་ཆོད་པར་མི་འགྱུར་བས། །འཁོར་འདས་རུ་ཤན་དབྱེ་བར་བྱ།ཞེས་གསུངས་པས།དེས་ན་སེམས་ཅན་རྣམས་ཀྱི་ལུས་ངག་ཡིད་གསུམ་གྱི་ཆོས་ཉིད་ཡེ་ནས་རང་བཞིན་རྣམ་པར་དག་ཀྱང་།གནས་སྐབས་འཁྲུལ་པ་སྣང་ཞེན་གྱིས་བསྒྲིབ་པས་ཐོག་མ་མེད་པ་ནས་ད་ལྟ་ཡན་ཆད་དུ་རིགས་དྲུག་གི་གནས་རྣམས་སུ་བར་མེད་དུ་འཁོར་སྡུག་བསྔལ་མྱོང་བས་ན།ད་རེས་སྒོ་གསུམ་འཁོར་འདས་རུ་ཤན་དབྱེ་བར་བྱས་ཏེ།ཕྱིན་ཆད་འཁོར་བར་སྐྱེ་བའི་གཞི་རྩ་ཆོད་པ་ཞིག་བྱ་དགོས་པའི་ཕྱིར་དུ་རུ་ཤན་དབྱེ་དགོས་པས།དང་པོ་རུ་ཤན་དབྱེ་བ་ལའང་།གནས་ཀྱི་ཁྱད་པར་དང་།ཕྱི་ནང་གསང་གསུམ་གྱི་རུ་ཤན་དབྱེ་བ་བསྟན་པ་གཉིས་ལས།དང་པོ་གནས་གྱི་ཁྱད་པར་ནི།སྒོ་གསུམ་མངོན་ཞེན་སོགས།གུ་ཧྱ༔ ཞེས་པའི་བར་གྱིས་བསྟན་ཏེ།དེ་ལ་འདིར་མ་དག་པའི་སྒོ་གསུམ་གྱི་མངོན་པར་ཞེན་པ་བཟློག་པའི་ཕྱིར་དུ།གནས་དབེན་པའི་སར་བསམ་གཏན་གྱི་ཚེར་མ་མེད་པ།ཉིན་མོ་མི་ཡི་རྒྱུ་འགྲུལ་དང་མཐོང་ཚོར་མེད་པ།མཚན་མོ་དགྲས་གླགས་ཅོར་མེད་པའི་ས་རུ་ཕྱིན་ཏེ།གཏོར་མ་ཆ་གསུམ་དུ་བྱས་ནས་སྦྱངས་སྤེལ་བསྒྱུར་གསུམ་གྱི་སྔགས་དང་ཕྱག་རྒྱ་ཏིང་ངེ་འཛིན་གྱིས་མི་ཟད་པའི་གཏེར་དུ་བྱིན་གྱིས་བརླབས་ཏེ།དཔལ་མགོན་བདུན་ཅུ་རྩ་ལྔ་ལ་སོགས་པའི་དཀར་ཕྱོགས་སྐྱོང་བ་རྣམས་དང་།ལྷ་སྲིན་སྡེ་བརྒྱད་ཡུལ་ལྷ་གཞི་བདག་ཟོ་དོར་དྲེགས་པ་ཅན་རྣམས་དཀོན་མཆོག་གསུམ་གྱི་བདེན་པའི་སྟོབས་ཀྱིས།ལྷ་སྔགས་དང་ཕྱག་རྒྱ་ཏིང་ངེ་འཛིན་གྱིས་བཀུག་ནས།གསེར་སྐྱེམས་གཡུ་སྐྱེམས་དང་གཏོར་མ་རྣམ་འདོད་རྒུའི་དཔལ་ཡོན་ཕུན་སུམ་ཚོགས་པ་འབྱུང་བའི་བདག་ཉིད་ཅན་དུ་བསྒྱུར་ཏེ་ཕུལ་ཞིང་།གསང་སྤྱོད་ཟབ་མོའི་ལམ་ལ་བར་དུ་གཅོད་པའི་འགལ་རྐྱེན་བཟློག་ཅིང་མཐུན་རྐྱེན་ལེགས་ཚོགས་ཐམས་ཅད་སྒྲུབ་པ་དང་།ས་དང་ལམ་གྱི་རྐྱེན་ངན་བར་ཆད་ཐམས་ཅད་སེལ་བའི་སྡོང་གྲོགས་སུ་བསྐུལ་བས་ཁས་བླངས་པར་བསམ་པ་དང་།གླུད་དང་ལན་ཆགས་འབྲས་ཆན་ཐམས་ཅད་སྦྱངས་བསྒྱུར་སྤེལ་གསུམ་གྱི་སྔགས་དང་ཕྱག་རྒྱ་ཏིང་ངེ་འཛིན་གྱིས་བརླབས་ཤིང་མི་ཟད་པའི་གཏེར་དུ་བསྒྱུར་ཏེ།བདག་ཉིད་པདྨ་ཧེ་རུ་ཀའི་ང་རྒྱལ་དང་ལྡན་པའི་ངང་ནས་སྦྱིན་ཡུལ་ཐམས་ཅད་མདུན་དུ་བཀུག་ཅིང་གཏོར་མ་བཏང་ནས་ཚིམས་པར་བྱས་ཏེ།གནས་སྐབས་སུ་གསང་སྤྱོད་ཟབ་མོ་བསྒྲུབ་པ་ལ་བར་དུ་གཅོད་པར་བྱེད་པའི་བགེགས་དང་ལོག་འདྲེན་བར་ཆད་བྱེད་པ་ཐམས་ཅད་བསྐྲད་ཅིང་རང་གནས་སུ་སོང་བར་བསམ་པ་དང་།གང་དག་གདུག་ཅིང་སྡང་བའི་སེམས་དང་ལྡན་པ་ཐམས་ཅད་ཡེ་ཤེས་སྒྱུ་འཕྲུལ་གྱི་རྩལ་སྣང་ཁྲོ་ཚོགས་ཐུན་མཚོན་མེ་དཔུང་འབར་བས།མཐའི་རྒྱ་མཚོ་ཆེན་པོའི་ཕ་རོལ་གླིང་བར་མུན་པའི་སྨག་རུམ་རི་རབ་ཀྱི་ཟོམ་དུ་བསྐྲད་ཅིང་རྨོངས་པར་བྱས་ཏེ་ཕྱིར་མི་ལྡོག་པར་བསམ་པ་དང་།མཚམས་གཅོད་ཀྱི་མེ་རི་མ་གཏོགས་ཁྲོ་ཚོགས་ཐུན་མཚོན་རྣམས་ཚུར་འདུས་པ་ལས།ཡེ་ཤེས་ལྔའི་རང་གདངས་འཁོར་ལོ།རྡོ་རྗེ།རིན་ཆེན།པདྨ།རྒྱ་གྲམ་ལ་སོགས་སྲུང་བའི་འཁོར་ལོ་རིམ་པ་ལྔ་རུ་བསྐྱེད་པའི་ནང་དུ་ཚུད་པས།བགེགས་དང་ལོག་པར་འདྲེན་པའི་ཚོགས་ཐམས་ཅད་ཉེ་མི་ནུས་པར་བསམ་པའོ། །དེ་དག་གིས་གནས་ཀྱི་ཁྱད་པར་བསྟན་པ་སྟེ།སྔོན་དུ་འགྲོ་བའི་རིམ་པའི་ལེའུ་སྟེ་དང་པོའོ། །ས་མ་ཡ་དམ་ཚིགས་གི་རྒྱ།གུ་ཧྱ་ནི་སྐལ་མེད་ལོག་ལྟ་ཅན་ལ་གསང་རྒྱས་བཏབ་པའི་དོན་ནོ། །གཉིས་པ་ཕྱི་ནང་གསང་གསུམ་གྱི་རུ་ཤན་དབྱེ་བ་བསྟན་པ་ནི།དེ་ནས་འཁོར་འདས་སོགས།དབྱེ་བ་ལ༔ ཞེས་པས་བསྟན་ཏེ།དེ་ནས་འཁོར་འདས་རུ་ཤན་འབྱེད་པར་བྱེད་པ་དེ་ལ།ཕྱིའི་རུ་ཤན་རིགས་དྲུག་གི་སྤྱོད་པའི་རྣམ་འགྱུར་དང་།ནང་གི་རི་ཤན་གནས་དྲུག་གི་ས་བོན་བསྲེགས་སྦྱངས་བྱེད་པ་དང་།གསང་བའི་རུ་ཤན་ལུས་རྡོ་རྗེར་བསྒོམ་པར་བྱེད་པ་དང་རྣམ་པ་གསུམ་ལས།དང་པོ་ཕྱི་ལྟར་རུ་ཤན་དབྱེ་བར་བྱེད་པ་དེ་ལའང་།ཀུན་སློང་གི་ཁྱད་པར་དང་།ཇི་ལྟར་བྱ་བའི་ཚུལ་དངོས་དང་།ཇི་ཙམ་སྦྱང་བའི་ཚད་དང་དེ་ལྟར་བྱས་པའི་ཕན་ཡོན་དང་བཞི་ལས།དང་པོ་ཀུན་སློང་གི་ཁྱད་པར་བསྟན་པ་ནི།བླ་མ་སྤྱི་བོར་བསྒོམས་ཤིང་སོགས།སེམས་མཆོག་བསྐྱེད༔ ཅེས་པས་བསྟན་ཏེ།འདི་ལྟར་འཁོར་བ་ན་གནས་པའི་སེམས་ཅན་རྣམས་ཀྱི་མ་རིག་པའི་སྒྲིབ་པ་དབྱིངས་སུ་སངས་ཏེ།གཟུང་འཛིན་འཁྲུལ་པའི་འཕྱང་བ་ཐད་ཀར་ཞིག་ནས་རང་གནས་ཡེ་ཤེས་ཆེན་པོ་མངོན་དུ་གྱུར་ཅིང་།ཆོས་ཅན་གྱི་སྣང་བ་ཆོས་ཉིད་ཀྱི་ཀློང་དུ་ཟད་ནས་སྐུ་གསུམ་མཉམ་བརྡལ་གྱི་དབྱིངས་ཆེན་པོ་འབྱམས་ཀླས་པར་བྱའོ་སྙམ་དུ།དོན་དམ་བྱང་ཆུབ་ཀྱི་སེམས་རིན་པོ་ཆེས་རང་རྒྱུད་ཆོས་ལ་བསྐུལ་ནས།ཟབ་མོའི་ལམ་གྱི་གཙོ་བོར་གྱུར་པ་བླ་མའི་རྣལ་འབྱོར་བསྒོམ་པ་ལ་འབད་དགོས་པ་གལ་ཆེ་སྟེ།དགྱེས་པ་རྡོ་རྗེ་ལས།གཞན་གྱིས་བརྗོད་མིན་ལྷན་ཅིག་སྐྱེས། །གང་ཏུ་ཡང་ནི་མི་རྙེད་དེ། །བླ་མས་དུས་ཐབས་བསྟན་པ་དང་།བདག་གི་བསོད་ནམས་ལས་ཤེས་བྱ། །ཞེས་དང་།དམ་ཚིག་བཀོད་པ་ལས།མཚན་དང་དཔེ་བྱད་ལྡན་པའི་་ལྷ། །བསྐལ་པ་འབུམ་དུ་བསྒོམས་པ་བས། །བླ་མ་དྲན་པ་འབུམ་ཆར་མིན། །བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་མཆོག།ཅེས་གསུངས་པའི་ཕྱིར་ན།རང་ལ་བཀའ་དྲིན་གསུམ་ལྡན་གྱི་སྒོ་ནས་རྗེས་སུ་འཛིན་ཅིང་།སྨིན་གྲོལ་རིམ་གཉིས་ཀྱི་མྱུར་ལམ་ཟབ་མོ་སྟོན་པར་བྱེད་བའི་བླ་མ་དམ་པ་དེ་ཉིད་ནི་མཆོག་གསུམ་རྩ་གསུམ་ཀུན་འདུས་ཀྱི་ངོ་བོ་ཡིན་པ་དང་།གསང་སྔགས་ཟབ་མོའི་ལམ་གྱི་ཡེ་ཤེས་དང་ཡོན་ཏན་ལ་སོགས་པ་ཅི་སྐྱེ་བ་ཐམས་ཅད་བླ་མ་ཚུལ་བཞིན་བསྟེན་པ་ལ་རག་ལས་ཤིང་རིམ་པ་གཉིས་ཀྱི་དངོས་གྲུབ་ཐམས་ཅད་ཀྱང་བླ་མ་དག་ལ་བརྟེན་ནས་འབྱུང་བ་ཡིན་པས་ན།ཨ་ཏི་བཀོད་པ་ཆེན་པོ་ལས།གང་གི་བླ་མ་རྡོ་རྗེ་འཆང་། །སྙིང་གི་དཀྱིལ་དང་སྤྱི་བོའི་གཙུག།ཡན་ལག་མཐིལ་སོགས་གང་བསྒོམས་པ། །སངས་རྒྱས་སྟོང་གི་ཡོན་ཏན་ཏེ། །གང་ཟག་དེ་ཡིས་འཛིན་པར་འགྱུར། །ཞེས་གསུངས་སོ། །དེའི་ན་གསོལ་བ་འདེབས་པའི་རྟེན་དུ་བླ་མ་བསྒོམ་པར་བྱེད་པ་ལ།རང་གནས་ཀྱི་ཡུལ་དག་པ་མཁའ་སྤྱོད་ཀྱི་ཞིང་ཁམས་རྒྱ་ཆེ་ལ་ཁྱོན་ཡངས་པ་རྣམ་པར་དག་པའི་བཀོད་པ་ཕུན་སུམ་ཚོགས་པར་གསལ་གདབ།རང་གི་སྤྱི་བོའི་གཙུག་གི་མདུན་གྱི་ནམ་མཁར་ཡེ་ཤེས་ལྔའི་རང་མདངས་འཇའ་དང་འོད་ཕུང་ཐེག་ལེའི་དབུས་སུ་རང་གི་རྩ་བའི་བླ་མ་དེ་ཉིད་ཀྱི་སྐུ་མདོག་ཕྱག་མཚན་སོགས་བླ་མའི་རྣམ་པ་རང་རང་གི་གཞུང་བཞིན་བསྒོམས་ནས།ཐ་མལ་ཀུན་རྟོག་གི་བློ་ངན་སྤངས་ཤིང་།སྐུ་མཚན་དང་དཔེ་བྱད་བཟང་པོས་སྤྲས་པ།འོད་དང་འོད་ཟེར་འཕྲོ་བའི་ཀློང་ན་ལྷམ་མེར་བཞུགས་པ།གསུང་དབྱངས་ཡན་ལག་དྲུག་ཅུའི་ཆོས་ཀྱི་སྒྲ་བསམ་གྱིས་མི་ཁྱབ་པ་སྒྲོགས་པ།ཐུགས་ཏིང་ངེ་འཛིན་གྱི་སྒོ་བརྒྱ་ཕྲག་དུ་མ་ལ་མཉམ་པར་བཞག་པ་དེ་ལྟ་བུའི་རྒྱལ་བ་ཀུན་གྱི་སྤྱི་གཟུགས་མཁྱེན་བརྩེ་ནུས་པའི་བདག་ཉིད་ཅན་དུ་གསལ་གདབ་སྟེ།བླ་མའི་ཡོན་ཏན་དང་བཀའ་དྲིན་དྲན་པའི་ངང་ནས་མོས་གུས་གདུང་ཤུགས་དྲག་པོ་བསྐྱེད་པ་དང་ཆབ་གཅིག་ཏུ།ལུས་གུས་པའི་སྒོ་ནས་ཕྱག་འཚལ།ངག་གུས་པའི་སྒོ་ནས་གསོལ་འདེབས་ལ་འབུངས་ཤིང་།ཡིད་གུས་པའི་སྒོ་ནས་ཐུགས་ཡིད་རོ་གཅིག་དུ་བསྲེས་ནས་དབང་བཞི་བླངས་ཏེ།བླ་མའི་ཐུགས་རྣམ་པར་མི་རྟོག་པའི་ཡེ་ཤེས་ཆེན་པོའི་བྱིན་རླབས་རྣམ་བདག་དང་མཁའ་ཁྱབ་ཀྱི་སེམས་ཅན་ཐམས་ཅད་ལ་ཕོག་པས།དབང་བཞི་ཡེ་ཤེས་ཀྱི་ཆུ་བོས་རྒྱུད་སྨིན་ཅིང་གྲོལ་བར་མཛད་དུ་གསོལ་སྙམ་དུ།བླ་མའི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་ནས་རང་གི་གནས་གསུམ་ཏུ་ཐིམ་པས་སྒོ་གསུམ་གྱི་ལས་ཉོན་སྡིག་སྒྲིབ་བག་ཆགས་དང་བཅས་པ་བྱང་སྟེ་དབང་དང་དངོས་གྲུབ་མ་ལུས་པ་ཐམས་ཅད་གཅིག་ཆར་དུ་ཐོབ་ཅིང་སྐུ་བཞི་ཡེ་ཤེས་ལྔ་མངོན་དུ་གྱུར་པར་བསམ་མོ། །སླར་ཡང་བླ་མ་ཉིད་འོད་ལྔའི་གོང་བུར་གྱུར་ནས།རང་གི་སྒོ་གསུམ་བླ་མའི་སྐུ་གསུང་ཐུགས་རྡོ་རྗེ་གསུམ་དང་དབྱེར་མེད་མཉམ་པ་ཉིད་སྤྲོས་བྲལ་བདེ་བ་ཆེན་པོའི་ངང་དུ་ཅི་གནས་སུ་མཉམ་པར་བཞག་གོ།དེས་བརྒྱུད་ལྡན་བླ་མ་དམ་པའི་དོན་རྒྱུད་ཀྱི་བྱིན་རླབས་ཐམས་ཅད།རབ་བུམ་པ་གང་བྱོས་དང་།འབྲིང་བརྐོས་ཕོར་ནས་སཱཙྪ་ཐོན་པ་ལྟ་བུ་དང་།ཐ་ནའང་ཚོན་གྱིས་ཁ་དོག་བསྒྱུར་བ་ལྟར།བླ་མའི་དགོངས་རྒྱུད་ཀྱི་བྱིན་རླབས་དངོས་སུ་འབེབས་ཤིང་།ཉམས་དང་རྟོགས་པའི་ཡོན་ཏན་ཐམས་ཅད་འབད་པ་དང་རྩོལ་བ་མ་དགོས་པར།བརྒྱུད་ལྡན་བླ་མ་དམ་པར་གསོལ་འདེབས་དང་མོས་གུས་ཁོ་ནར་བརྟེན་ནས་རང་རྒྱུད་ལ་རྟོགས་པ་ཤུགས་ལ་འཆར་ཞིང་སྐྱེ་བ་དང་།ས་དང་ལམ་གྱི་གེགས་དང་གོལ་ས་ཐམས་ཅད་ཀྱང་ངང་གིས་གྲོལ་ཏེ།བདེ་བར་གཤེགས་པ་རྣམས་ཀྱིས་ཀྱང་བྱིན་གྱིས་བརླབས་ཤིང་།རིག་འཛིན་དང་མཁའ་འགྲོའི་ཚོགས་རྣམས་ཀྱིས་ལུང་བསྟན་ཅིང་དབུགས་དབྱུང་བ་སོགས་ཡོན་ཏན་ཁྱད་པར་ཅན་མང་པོ་འབྱུང་བའི་གཞིར་གྱུར་པས་ན།རྗེ་བཙུན་རིན་པོ་ཆེའི་ཞལ་ནས་བླ་མ་ལ་གདུང་བ་སྐྱེས་ཙ་ན། །ཉྭམས་དང་བྱིན་རླབས་སྐྱེ་བར་ངེས། །ཞེས་དང་། །ཇི་སྐད་དུ།བླ་མ་རྟག་ཏུ་བརྟེན་པའི་མིས། །མཁའ་འགྲོའི་གཟུགས་རྣམས་མཐོང་བ་དང་། །དེ་ཡི་བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། །སྐྱེ་ཤི་གཉིས་ལ་དབང་ཐོབ་འགྱུར། །ཞེས་གསུངས་སོ། །མདོར་ན་བླ་མ་དགེ་བའི་བཤེས་གཉེན་ནི།འདས་པའི་སངས་རྒྱས་རྣམས་ཀྱི་གདུང་འཚོབ།མ་འོངས་རྒྱལ་བ་རྣམས་ཀྱི་འབྱུང་གནས།ད་ལྟའི་སངས་རྒྱས་རྣམས་ཀྱི་ཕྲིན་ལས་གཅིག་ཏུ་འདུས་པའི་རང་གཟུགས་རིགས་དང་དཀྱིལ་འཁོར་ཐམས་ཅད་ཀྱི་འབྱུང་གནས་དམ་པར་གྱུར་པས་ན་མདོ་ལས།དེ་བཞིན་གཤེགས་པ་ནི་སེམས་ཅན་རྣམས་ལ་ཡོངས་སུ་སྣང་བའང་མ་ཡིན་ལ།དགེ་བའི་བཤེས་གཉེན་ནི་ཡོངས་སུ་སྣང་ཞིང་ཆོས་སྟོན་པས་དེ་བཞིན་གཤེགས་པ་ལས་དགེ་བའི་བཤེས་གཉེན་ལྷག་པར་ཟུངས་ཤིགཅེས་གསུངས་པས་ན།རིམ་གཉིས་ཀྱི་ལམ་སོགས་ཆོས་ཅི་དང་ཅི་ཉམས་སུ་བླང་ནའང་།ཐོག་མར་ལམ་ཐམས་ཅད་ཀྱི་གཞུངས་ཤིང་ལྟ་བུ་བླ་མའི་རྣལ་འབྱོར་ཡིན་པས་ན་དེ་ཚུལ་བཞིན་དུ་ཉམས་སུ་བླངས་ཏེ།དམ་ཚིག་ལ་མངོན་ལྐོག་མིི་བྱེད་པར་བླ་མ་ལ་གསོལ་བ་རྩེ་གཅིག་དུ་བཏབ་ཅིང་།བདག་དང་མཐའ་ཡས་པའི་འགྲོ་བ་སེམས་ཅན་ཐསམ་ཅད་རྣམ་པར་གྲོལ་བའི་ས་རུ་འགོད་པར་མཛད་དུ་གསོལ་སྙམ་ཞིང་རང་དོན་ཡིད་བྱེད་ཀྱི་བློ་ངན་དྲུང་ནས་སྤངས་ཏེ།སེམས་ཅན་ཐམས་ཅད་ཀྱི་དོན་དུ་འཁོར་འདས་རུ་ཤན་ཕྱེ་སྟེ།ཕྱིན་ཆད་རང་གཞན་རྣམས་འཁོར་བར་མི་འཇུག་པར་བྱའོ་སྙམ་ནས།བྱང་ཆུབ་ཀྱི་སེམས་མཆོག་རིན་པོ་ཆེ་ཡང་དག་པར་བསྐྱེད་པར་བྱ་བ་ནི་གནད་དམ་པའོ། །གཉིས་པ་ཇི་ལྟར་བྱ་བའི་ཚུལ་དངོས་ནི།ཚེ་རབས་དུ་མའི་སོགས།སྤྱོད་པ་སྤྱོད༔ ཅེས་པའི་བར་གྱིས་བསྟན་ཏེ།དེ་ལ་འདིར་རང་གཞན་རྣམས་ཀྱི་ལས་དང་བག་ཆགས་ཐམས་ཅད་སྐྱེད་པར་བྱེད་པའི་སྒོ་གསུམ་གྱི་བྱ་བ་རྣམས་ལ་མངོན་ཞེན་ལོག་ཅིང་།ཕྱིས་ནས་འགགས་པར་བྱ་བའི་ཕྱིར་དུ་གདམས་པ་ཉམས་སུ་ལེན་ཚུལ་ལ།འདིར་ཚེ་རབས་དུ་མར་འཁོར་བ་ཐོག་མ་མེད་པའི་དུས་ནས་ད་ལ་ཐུག་གི་བར་དུ་ལས་ངན་པ་བསགས་པ་དང་བག་ཆགས་ངན་པའི་སྟོབས་ཀྱིས།རྒྱུ་མ་རིག་པ་ཉོན་མོངས་དུག་ལྔ་དུག་གསུམ་དུ་འཁྲུལ་པའི་དབང་གིས་འབྲས་བུ་ངན་སོང་གསུམ་གྱི་སྡུག་བསྔལ་མྱོང་འགྱུར་ཐམས་ཅད་ད་ལྟ་ཉིད་དུ།གཉིད་བཙན་ཐམས་སུ་སད་པའི་རྨི་ལམ་དབྱིངས་སུ་ཞིག་པ་ལྟར།མྱོང་དང་མྱོང་འགྱུར་གྱི་སྡུག་བསྔལ་མཐའ་དག་ཀུན་སྦྱངས་ཏེ།རྣམ་པ་ཐམས་ཅད་མཁྱེན་པའི་ས་རུ་རང་གཞན་སེམས་ཅན་ཐམས་ཅད་སྐད་ཅིག་མྱུར་བ་ཉིད་དུ་བགྲོད་པའི་ཐབས་ལ་བརྩོན་པར་བྱའོ་སྙམ་ཞིང་སེམས་བསྐྱེད་པ་དང་བཅས་ཏེ།རིགས་དྲུག་སོ་སོའི་ལུས་ཀྱི་རྣམ་འགྱུར།ངག་གི་སྨྲ་བརྗོད།སེམས་ཀྱི་རྟོག་དཔྱོད་དང་སྡུག་བསྔལ་གྱི་མྱོང་ཚུལ་རྣམས་བསམ་པར་བྱ་བ་ནི་དམྱལ་བ་ཚ་གྲང་གི་སྡུག་བསྔལ།ཡི་དྭགས་བཀྲེས་ཤིང་སྐོམ་པའི་སྡུག་བསྔལ།དུད་འགྲོ་རྣམས་ལ་བཀོལ་སྤྱོད་ཀྱི་སྡུག་བསྔལ་བསམ་པ་སོགས་ངན་སོང་གསུམ་གྱི་ལུས་ཀྱི་རྣམ་འགྱུར་དང་།ངག་གི་བརྗོད་པ།སེམས་ཀྱི་སྡུག་བསྔལ་རྣམས་རིམ་པར་བསམ་པ་དང་། །ཡང་མཐོ་རིས་གསུམ་ལའང་།ལྷ་མིན་རྣམས་ལ་འཐབ་རྩོད་ཀྱི་སྡུག་བསྔལ་མྱོང་བ་དང་།ལྷ་རྣམས་ལ་འཆི་འཕོ་ལྟུང་བྱེད་ཀྱི་སྡུག་བསྔལདང་།མི་ལ་སྐྱེ་རྒ་ན་འཆིའི་སྡུག་བསྔལ་དང་། །གཞན་ཡང་འགྱུར་བའི་སྡུག་བསྔལ་ལ་སོགས་པ།མདོར་ན་མཐོ་རིས་རྣམ་པ་གསུམ་གྱི་བསམ་སྤྱོད་སྡུག་བསྔལ་ཐམས་ཅད་རང་གི་བློ་ཐོག་ལ་བླང་ནས།དང་པོ་ཡས་རིམ་བཞིན་དུ་དེ་དག་གི་གནས་དང་།ཡུལ་གྱི་མཐོ་དམན་དང་།མྱོང་འགྱུར་གྱི་སྡུག་བསྔལ་མཐའ་དག་རྣམས་རང་གིས་ཡིད་ལ་བྱས་ཏེ།སྡུག་བསྔལ་བློ་ཐོག་ཏུ་བླང་ཞིང།ལུས་ཀྱིས་རིགས་དྲུག་སོ་སོའི་རྣམ་འགྱུར་གྱིས་འགྲོ་བ་དང་།འདུག་པ་དང་།གཅུད་པ་དང་།ཡན་ལག་ཕར་འཕེན་པ་དང་།ཚུལ་སྡུད་པ་དང་།ངག་གིས་ཀྱང་འགྲོ་དྲུག་སོ་སོའི་རྣམ་འགྱུར་གྱི་སྒྲ་སྐད་སྣ་ཚོགས་བརྗོད་པ་སོགས།མདོར་ན་བྱ་སྤྱོད་རྣམ་པ་སྣ་ཚོགས་རིམ་བཞིན་འགྲོ་དྲུག་གཟུགས་ཀྱི་སྤྱོད་པ་ཐམས་ཅད་སེམས་ཀྱིས་བླངས་ཏེ་ལུས་ཀྱིས་ཡང་ཡང་སྦྱངས།སླར་ཡང་མས་རིམ་དུ་ལྷ་དང་ལྷ་མིན་དང་དུད་འགྲོ་ཡི་དྭགས་དམྱལ་བ་རྣམས་ཀྱི་ལུས་ཀྱི་རྣམ་འགྱུར་སེམས་ཀྱི་སྡུག་བསྔལ་སོགས་སྔར་བཞིན་དེ་ལྟར་ཡང་ཡང་བསྐྱར་ནས་རང་རྒྱུད་ལ་ལོན་ངེས་བྱ་ཞིང་།ལུས་དཀའ་ཚེགས་དང་སྐྱོ་ངལ་ཇི་ལྟར་བྱུང་ཡང་གཅེས་འཛིན་གྱི་ཞེན་པ་བཅད། །ཆོས་ཀྱི་ཕྱིར་དུ་དཀའ་བ་ཁྱད་དུ་བསད་དེ་ངལ་བ་དང་དུ་ལེན་ཅིང་ལུས་ཀྱི་མཆོང་རྒྱུག་དང་འགྲེ་ལྡོག་སོགས་བྱ་བ་དང་།གཞན་ཡང་རྣམ་འགྱུར་སྣ་ཚོགས་པར་རྩོན་པ་གནད་ཡིན་ཏེ།རྩ་རྒྱུད་ལས།ལུས་ནི་འགྲོ་དང་འདུག་པ་དང་། །གཅུད་ཅིང་འཁྲུལ་འཁོར་སྣ་ཚོགས་དང་། །ཡན་ལག་འཕེན་ཅིང་སྡུད་པ་དང་། །བྱ་བྱེད་རྣམ་པ་སྣ་ཚོགས་བསྟན། །དྲན་པའི་སེམས་ཀྱིས་མངོན་བླངས་ཏེ། །འགྲོ་དྲུག་གཟུགས་ཀྱི་སྤྱོད་པ་རྣམས། །སེམས་ཀྱིས་བླངས་ཏེ་ལུས་ཀྱིས་བྱ། །ཞེས་དང་། །ཐལ་འགྱུར་ལས།མདོར་ན་འགྲོ་བ་དྲུག་གི་སྐད། །སེམས་ཀྱིས་དྲན་བསམ་ངག་གིས་བརྗོད། །ཅེས་གསུངས་པ་བཞིན་དུ།ངག་གིས་ཀྱང་ཀྭི་བསྭོ་དང་འགྲོ་དྲུག་སོ་སོའི་སྒྲ་སྐད་ཅ་ཅོ་སྣ་ཚོགས་པ་བླང་དོར་མེད་པར་སྒྲོགས་པ་དང་། །ཡིད་ཀྱིས་ཀྱང་དེ་དག་གི་སྡུག་བསྔལ་མཐའ་དག་རང་གི་རྒྱུད་ཐོག་ཏུ་བླང་བ་དང་།དུག་ལྔ་དུག་གསུམ་གྱི་རྣམ་པར་རྟོག་ཚོགས་ཐམས་ཅད་བཙན་ཐབས་ཉིད་དུ་སློང་བར་བྱ་བ་སོགས།མདོར་ན་སེམས་ཀྱི་རྟོག་པ་ཐམས་ཅད་ཡིད་ལ་གང་དྲན་དུ་སྤྱོད་པ་དང་། །གཞན་ཡང་ལུས་དང་ངག་གིས་འགྲོ་བ་དྲུག་གི་སྒྲ་སྐད་དང་། །ལུས་ཀྱི་རྣམ་འགྱུར་སོགས་རང་རང་གི་སྤྱོད་པ་སྤྱད་པར་བྱས་པས།ཅི་ཞིག་ནས་སྒོ་གསུམ་ངལ་དུབ་ཀྱི་རྣམ་པས་ལུས་ངལ་ཞིང་ཆད།ངག་འགག་ཅིང་འཛེར།སེམས་འགྱུ་དྲན་གྱི་སྤུན་ཐག་ཆད་དེ།སྒོ་གསུམ་གྱི་མངོན་ཞེན་རང་འགག་ལ་སོང་ནས་སེམས་གཏད་མེད་དུ་འགྲོ།དེའི་རྗེས་ཤེས་བསམ་བརྗོད་དང་བྲལ་བའི་གཤིས་ལ་རང་ངོ་བསྐྱངས་ཏེ་ངལ་གསོའོ། །དེ་ལྟར་རིག་དྲུག་སོ་སོའི་སྡུག་བསྔལ་བཤད་པ་ཐམས་ཅད་ཀྱང་ཡུལ་གཞན་ཞིག་ཏུ་ཡོད་པའི་ཚུལ་རྣམས་བཤད་པ་ཙམ་དུ་མ་བསམ་པར།འདིའི་དོན་རང་གི་རྒྱུད་ལ་བཀལ་ནས་སྣ་ཚོགས་གཟུགས་ཀྱི་རྣམ་འགྱུར་ཡང་ཡང་སྦྱངས་པའི་ཚེ།ལུས་ལ་ཚ་གྲང་བཀྲེས་སྐོམ་གྱི་ཆགས་སྡང་མེད་པ་དང་།ངག་བླ་མའི་གདམས་ངག་ལ་ཡིད་ཆེས་ཤིང་ཆོས་ཀྱི་མཚན་ཉིད་ཐམས་ཅད་རང་ཤེས་སུ་འབྱུང་བ་དང་།སེམས་སྟོང་གསལ་འདུས་མ་བྱས་པའི་ཡེ་ཤེས་འཆར་བའང་འབྱུང་ཞིང་།ཁྱད་པར་བར་དོ་སྦྱངས་པའི་ཚད་འཁྱོལ་ཏེ།མཐར་ཐུག་འཁོར་བ་དོང་ནས་སྤྲུག་པའི་རྒྱུ་བྱེད་པར་འགྱུར་རོ། །འདི་ཡན་ཆད་འཁོར་བའི་རུ་ཤན་ཡིན་ནོ།ད་འདས་པའི་རུ་ཤན་དབྱེ་བ་ལ།མཐར་ཡང་རང་ཉིད་སོགས།འདོན་པར་བྱ༔ ཞེས་པས་བསྟན་ཏེ།སླར་ཡང་རང་གི་སྣང་བ་ཐམས་ཅད་སྐད་ཅིག་ལ་གནས་འགྱུར་ཏེ།ཕྱི་ནང་སྣོད་བཅུད་ཕུང་པོ་ཁམས་དང་བཅས་པ་ཐམས་ཅད་སྟོང་ཉིད་སྤྲོས་བྲལ་བསམ་བརྗོད་ལས་འདས་པའི་དབྱིངས་སུ་ཞིག་པར་བསམ།སྟོང་ཆེན་དེའི་ངང་ལས་མཁའ་ལ་འཇའ་ཚོན་ཤར་བ་བཞིན་དུ།སྐད་ཅིག་གི་ཡུལ་སྣང་ཞིང་ཁམས་རྒྱ་ཁྱོན་ཆོས་ཀྱི་དབྱིངས་དང་མཉམ་པ།ངོས་འཇམ་ཞིང་ཁོད་སྙོམས་པ།གཞོན་ནུ་མའི་ལག་མཐིལ་ལྟར་ནེན་པ།གསེར་གྱི་ས་གཞི་ལ་རིན་པོ་ཆེ་སྣ་ཚོགས་གཅལ་དུ་བཀྲམ་པ།སྨན་གྱི་སྤངས་རི་ལ་དྲི་བཟང་གི་ན་བུན་འཐུལ་བ།ཡན་ལག་བརྒྱད་ལྡན་གྱི་ཆུ་མཚོ་དང་།མེ་ཏོག་པདྨ་ཁ་དོག་སྣ་ཚོགས་བཞད་པ།བྱང་ཆུབ་ཀྱི་ཤིང་ལ་སོགས་པའི་ལྗོན་ཤིང་རབ་ཏུ་རྒྱས་པའི་སྟེང་དུ་བྱ་རིགས་སྣ་ཚོགས་པས་ཆོས་ཀྱི་སྒྲ་སྒྲོགས་པ་ལ་སོགས་ས་གཞི་མཛེས་པའི་རྒྱན་དང་།ནམ་མཁའ་ལ་འཇའ་འོད་ལྔ་ལྡན་མིག་མང་རིས་སུ་བྲིས་པ་དང་དྲྭ་བ་དང་དྲྭ་བ་ཕྱེད་པའི་ཀློང་དུ།འདོད་ཡོན་གྱི་ལྷ་མོ་རྣམས་མཆོད་པའི་རིགས་བསམ་གྱིས་མི་ཁྱབ་པ་ཐོགས་ནས་སྤྲུལ་བཞིན་གཏིབས་ཏེ།ལྷ་ཚོགས་རྣམས་ལ་མཆོད་པ་ཕུལ་བར་བྱེད་པ་སོགས་ནམ་མཁའ་མཛེས་པའི་རྒྱན་དང་།བར་སྣང་ལ་ལྷའི་བུ་དང་བུ་མོ་མང་པོས་སྙན་པའི་སྒྲ་དབྱངས།ཕྱག་རྒྱ་གར།བཤུད་པའི་གླུ།དཀྲོལ་བའི་རོལ་མོ་སྣ་ཚོགས།མཛེས་པའི་འཕན་གདུག་སྣ་ཚོགས་ཐོགས་པ་རྣམས་ནི་བར་སྣང་མཛེས་པའི་རྒྱན་ཏེ།དེ་ལྟ་བུའི་ཞིང་ཁམས་ཀྱི་བཀོད་པ་ཕུན་སུམ་ཚོགས་པའི་དབུས་སུ།རིན་པོ་ཆེ་སྣ་ཚོགས་ཀྱི་ཁྲི་དཔངས་མཐོ་བའི་སྟེང་དུ།རང་ཉིད་བཅོས་ལྡན་འདས་རྒྱལ་བ་ཤཱཀྱ་ཐུབ་པ་སྐུ་མདོག་གསེར་གྱི་རི་བོ་ལ་ཉི་མ་འབུམ་གྱི་འཁྱུད་པ་ལྟ་བུ་འོད་དང་འོད་ཟེར་རབ་ཏུ་འབར་བ།ཕྱག་གཡས་ས་གནོན་དང་གཡོན་མཉམ་གཞག་མཛད་ཅིང་།ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པ།ཞལ་ཞི་ཞིང་འཛུམ་པའི་མདངས་དང་ལྡན་ཞིང་སྐུ་ལ་ཆོས་གོས་རྣམ་གསུམ་ཀླུབས་པ།མཚན་བཟང་སོ་གཉིས་དང་། །དཔེ་བྱད་བརྒྱད་ཅུས་སྤྲས་ཤིང་།སྐུའི་བ་སྤུའི་བུ་ག་རེ་རེའི་རྩེ་ནས་ཀྱང་འོད་ཟེར་དཔག་ཏུ་མེད་པ་འཕྲོས་པས།འགྲོ་བ་དྲུག་གི་གནས་རིགས་ཐམས་ཅད་ལ་ཁྱབ་པས།དཔེར་ན་བ་མོ་ལ་ཉི་ཟེར་ཕོག་པ་བཞིན་དུ།རིགས་དྲུག་གི་སེམས་ཅན་རྣམས་ཀྱི་རྒྱུ་ལས་ཉོན་བག་ཆགས་ཡུལ་སྣང་དང་བཅས་པ་སྦྱང་ནས།འགྲོ་དྲུག་གི་སེམས་ཅན་རྣམས་གཅིག་ཀྱང་མ་ལུས་པར།བྱང་ཆུབ་སེམས་དཔའ་དང་སེམས་མ་ཉན་ཐོས་དང་རང་རྒྱལ་གྱི་ཚུལ་དུ་འཁོར་གྱི་རིམ་པར་བྱ་ཞིང་།ཐམས་ཅད་ཀྱང་རང་རང་དང་མཐུན་པའི་ཆོས་ཀྱིས་རྒྱུད་གྲོལ་ཏེ།སླར་ཡང་བདག་གི་བཀོད་པའི་ཞིང་དེར་ལྷགས་ནས་རྒྱལ་བ་རྣམས་ཀྱི་ཞལ་མཇལ།དབང་བསྐུར་ལུང་བསྟན།དབུགས་དབྱུང་ནས་དགོངས་པ་དབྱེར་མེད་དུ་གྱུར་ཏེ།གདོད་མའི་ཡེ་གཞི་ཀུན་ཏུ་བཟང་པོའི་དབྱིངས་སུ་སྒྱུ་མའི་འཁྲུལ་འཁོར་དབྱིངས་སུ་ཞིག་པ་ལྟར་སངས་རྒྱས་པར་བསམ་ལ་ཡང་ཡང་མཉམ་པར་བཞག་པས།རང་བཞིན་སྤྲུལ་པའི་ཞིང་དུ་བགྲོད་པའི་རྒྱུ་རུ་འགྲོ་བ་དང་།དཀོན་མཆོག་གསུམ་གྱི་སྤྱོད་པ་སྤྱད་པས་སེམས་ཅན་གྱིས་སྟོན་པར་མཐོང་ཞིང་ཕྱི་ནང་གསང་བའི་བར་ཆད་ཞི།མཐར་ཐུག་དོན་གཉིས་ཀྱི་མཛད་པ་ཤུགས་ལ་འབྱུང་བར་འགྱུར་རོ། །གསུམ་པ་ཇི་ཙམ་སྦྱང་བའི་ཚད་ནི།ཁམས་གསུམ་འཁོར་བའི་སོགས།འབྱོངས་པའི་ཚད། །ཅེས་པའི་བར་གྱིས་བསྟན་ཏེ།དེ་ལྟ་བུའི་སྒོ་གསུམ་གྱི་རུ་ཤན་གྱི་ཚད་རབ་ཞག་བརྒྱད་ཅུ།འབྲིང་ཟླ་ཕྱེད།ཐ་ནའང་ཞག་བཅུའམ་བདུན་ལས་མི་ཉུང་བར་སྦྱངས་ཏེ།སྒོ་གསུམ་གྱི་ཞེན་པ་ལྡོག་ཅིང་ཁམས་གསུམ་འཁོར་བའི་གནས་ཡུལ་སྣང་བ་ཐམས་ཅད་ཀུན་ཀྱང་བདེན་པར་མ་གྲུབ་པ་སྒྱུ་མ་ལྟ་བུ་དང་།དངོས་པོ་མཚན་འཛིན་དང་བྲལ་བ་སྨིག་རྒྱུ་ལྟ་བུ།གང་སྣང་ལ་དགག་སྒྲུབ་སྤང་བླང་ཞེན་ཆགས་བྲལ་བ་རྨི་ལམ་ཇི་བཞིན་དུ་ཤེས་ནས། །སྒོ་གསུམ་གྱི་མངོན་ཞེན་ལྡོག་པའི་ཚེ་ན་རུ་ཤན་འབྱོངས་པའི་ཚད་ཡིན་ནོ། །བཞི་པ་དེ་ལྟར་བྱས་པའི་ཕན་ཡོན་ནི།དེ་ལྟར་ཚུལ་བཞིན་སྦྱངས་པས་ཐུན་མོང་དུ་ལུས་ངག་ཡིད་གསུམ་གྱི་སྒྲུབ་པ་དག་ཅིང་བར་ཆད་ཞི་བ་དང་། །སྒོ་གསུམ་གྱི་འཛིན་ཞེན་ཞིག་པས་འཁྲུལ་པའི་བྱ་བ་ལ་མི་འཇུག།མཐར་ཐུག་རྒྱལ་བའི་སྐུ་གསུང་ཐུགས་རྡོ་རྗེ་དང་གཉིས་སུ་མེད་པར་འཚང་རྒྱ་བའི་དགོས་པ་ཡོད་དེ།ཉེ་བར་རྟོགས་པ་ལས།རུ་ཤན་གང་གི་དབྱེ་བ་ཉིད། །ཁམས་གསུམ་ལྡོག་པ་མ་ཡིན་ནོ། །ཞེས་གསུངས་སོ། །དེ་ལྟར་ཕྱི་ལྟར་དུ་རུ་ཤན་ལེགས་པར་དབྱེ་བའི་སྐབས་བསྟན་པའི་ལེའུ་སྟེ་གཉིས་པའོ། །ས་མ་ཡ་ཞེས་དམ་ཚིག་གི་རྒྱ་དང་།གུཧྱ་ཞེས་སྣོད་མིན་རྣམས་ལ་གསང་རྒྱས་བཏབ་པའི་དོན་ནོ། །གཉིས་པ་ནང་ལྟར་དུ་རུ་ཤན་དབྱེ་བ་ལ།སྦྱང་བྱ་རིགས་དྲུག་གི་ས་བོན་བཤད་པ།སྦྱོང་བྱེད་རྡོ་རྗེ་གསུམ་གྱི་ཡི་གེ་བསྟན་པ།ཇི་ལྟར་སྦྱོང་ཚུལ།སྦྱངས་པའི་ཚད།དེའི་ཕན་ཡོན་དང་ལྔ་ལས།དང་པོ་སྦྱང་བྱ་རིགས་དྲུག་གི་ས་བོན་བཤད་པ་ནི། །དེ་ནས་ནང་ལྟར་སོགས།རྣམས་ལ་བསྟིམ༔ ཞེས་པས་བསྟན་ཏེ།དེ་ནས་ནང་ལྟར་རུ་ཤན་དབྱེ་བར་བྱེད་པ་ལའང་།སྦྱང་གཞི་འགྲོ་བའི་གནས་དྲུག་ཏུ།སྦྱང་བྱ་ཡི་གེ་དྲུག་གི་རྣམ་པར་གནས་པ་ནི།བག་ཆགས་ཀྱི་ལུས་འདི་གྲུབ་ཕྱིན་ཆད་རིགས་དྲུག་སོ་སོར་འཕེན་བྱེད་ཀྱི་ས་བོན་རྣམས་རྒྱུན་ཆགས་སུ་གནས་ཏེ།དེའི་སྟེང་དུ་ལས་སྔ་མའི་རྗེས་ཆགས་ཤིང་ཕྱི་མ་ཉེ་བར་ལེན་པའི་རྐྱེན་བྱེད་པས།སླར་འཆི་བའི་ཚེ་ནའང་ཡི་གེའི་རྩ་ཁམས་དེ་རྣམས་གང་དུ་རླུང་སེམས་འདུས་པ་ལས་དེ་དང་དེར་འཕེན་པའི་རྒྱུ་བྱེད་པའི་ཕྱིར་ན།ད་ལྟ་ལམ་གྱི་གནས་སྐབས་སུ་སྦྱོང་ཚུལ་ཁྱད་པར་ཅན་འདི་ནི།གསང་སྔགས་ཐབས་མང་ལ་དཀའ་བ་མེད་པ་བླ་ན་མེད་པའི་ཐེག་པ་འདིའི་ཁྱད་ཆོས་ཡིན་ཏེ། །དེའི་ཕྱིར་ན་རང་ཉིད་ཐ་མལ་དུ་གནས་པའི་སྤྱི་བོ་ལྷ་ཡི་ས་བོན་ཨ་དཀར་པོ་མགོ་གྱེན་དུ་བསྟན་ཅིང་རང་མདོག་གི་བག་ཆགས་ཀྱི་ཐིག་ལེའི་ཀློང་དུ་གནས་པར་བསམ་པ་དང་། །མགྲིན་པའི་གནས་སུ་ལྷ་མིན་གྱི་ས་བོན་སུ་སེར་པོ་བག་ཆགས་ཀྱི་འོད་ཐིག་བཀྲག་མེད་པའི་ཀློང་དུ་མགོ་གྱེན་བསྟན་དུ་གནས་པར་བསམ།སྙིང་གར་མིའི་ས་བོན་ནྲྀ་ལྗང་གི་རང་མདོག་གི་ཐིག་ལེ་བཀྲག་མེད་པའི་ཀློང་དུ་མགོ་གྱེན་བསྟན་དུ་གནས་པར་བསམ་པ་དང་།ལྟེ་བར་དུད་འགྲོའི་ས་བོན་ཏྲི་དམར་ནག་བག་ཆགས་ཀྱི་འོད་ཐིག་བཀྲག་མེད་པའི་དཀྱིལ་དུ་ཡི་གེ་མགོ་འཕྲེད་བསྟན་དུ་གནས་པར་བསམ་པ་དང་།གསང་གནས་སུ་ཡི་དྭགས་ཀྱི་ས་བོན་པྲེ་ཡིག་ཐལ་སྐྱ་རང་མདོག་གི་བག་ཆགས་ཀྱི་འོད་ཐིག་བཀྲག་མེད་པའི་དཀྱིལ་དུ་མགོ་ཐུར་བསྟན་དུ་བསྒོམ།རྐང་པ་གཡས་གཡོན་གྱི་མཐིལ་དུ་དམྱལ་བའི་ས་བོན་དུ་ཡིག་ནག་པོ་བག་ཆགས་ཀྱི་འོད་ཐིག་ཁམ་ནག་བཀྲག་མེད་པའི་དཀྱིལ་དུ་ཡིག་མགོ་ཐུར་དུ་བསྟན་ནས་གནས་པར་བསམ་པ་དང་།ས་བོན་དེ་དག་ལས་འོད་ཟེར་འཕྲོས་པས་འགྲོ་བ་རིགས་དྲུག་གི་ཁམས་རྣམས་སུ་ཕོག་པས།རང་གཞན་སེམས་ཅན་ཐམས་ཅད་རིགས་དྲུག་སོ་སོར་སྐྱེ་བའི་རྒྱུ་ལས་དང་ཉོན་མོངས་པ་དང་།དེས་སྐྱེད་པའི་སྡུག་བསྔལ་དང་།གཞན་ཡང་འཁོར་ཚེ་ཐོག་མ་མེད་པ་ནས་བསགས་དང་བསགས་འགྱུར་གྱི་སྡིག་པ་དང་སྒྲིབ་པ་ལས་དང་བག་ཆགས་ཐམས་ཅད་དང་།འཁྲུལ་པ་སྣང་ཞེན་གྱི་དབང་གིས་གནས་དང་ཡུལ་དུ་འཛིན་པ་དང་བཅས་པ་ཐམས་ཅད་མ་ལུས་པར་འོད་ཟེར་ས་བོན་རང་རང་གི་ཁ་དོག་དང་མཐུན་པར་བཀྲག་མདངས་མེད་པའི་རྣམ་པར་བསྡུས་ཏེ།གནས་དྲུག་གི་ས་བོན་རྣམས་ལ་བསྟིམ་ཞིང་འདུས་པར་བསམ་པ་ནི་སྦྱང་བྱ་ཡིན་ཏེ།འདས་རྗེས་ལས།ལུས་འདི་ལ་མ་རིག་རྒྱུས་སྐྱེད་ཕྱིར། །རིགས་དྲུག་ས་བོན་ཉིད་དུ་གནས།ཞེས་སོ། །གཉིས་པ་སྦྱོང་བྱེད་རྡོ་རྗེ་གསུམ་གྱི་ཡི་གེ་བསྟན་པ་ནི།སྦྱོང་བྱེད་རྡོ་རྗེ་སོགས།ལ་ཐིམ་པས༔ ཞེས་པའི་བར་གྱིས་བསྟན།དེ་ལ་འདིར་སྦྱོང་བྱེད་སངས་རྒྱས་ཐམས་ཅད་དང་གཉིས་སུ་མེད་པ་རིག་པའི་ཡེ་ཤེས་རྡོ་རྗེ་གསུམ་གྱི་རང་བཞིན་ས་བོན་ཡིག་འབྲུའི་རྣམ་པར་ཤར་བ་ཡིན་ཏེ།འདས་རྗེས་ལས།རིག་པ་སྐུ་གསུམ་དངོས་ཡིན་ཕྱིར། །སྐུ་གསུམ་ཡི་གེ་གསུམ་དུ་ཤར། །ཡི་གེ་རྩལ་སྦྱང་རུ་ཤན་དབྱེ། །ཞེས་པ་ལྟར།རང་གི་དཔྲལ་བ་ན་དུས་གསུམ་རྒྱལ་བ་རྣམས་ཀྱི་སྐུའི་ངོ་བོ་ཡི་གེ་ཨོཾ་དཀར་པོ་བཀྲག་མདངས་འོད་དུ་འབར་བ་དཀར་ལ་འཚེར་བ།མགྲིན་པར་རྒྱལ་ཀུན་གསུང་གི་ངོ་བོ་ཨཱཿདམར་པོ་པདྨ་རཱ་གའི་མདོག་ལྟར་དམར་ལ་སྣུམ་པ་འོད་ཟེར་འབར་བ།སྙིང་གར་རྒྱལ་དང་རྒྱལ་སྲས་ཐམས་ཅད་ཀྱི་ཐུགས་ཀྱི་ངོ་བོ་ཡི་གེ་ཧཱུྃ་མཐིང་གསལ་ནམ་མཁའི་མདོག་ལྟ་བུ།དྭངས་ལ་གསལ་བ་བཀྲག་མདངས་གཟི་བརྗིད་འོད་དུ་འབར་བའི་རྣམ་པར་བསྒོམ་མོ། །དེ་ལྟར་གསལ་བ་ལས་ནི་འོད་ཟེར་དཀར་དམར་མཐིང་གའི་རྣམ་པར་ཕྱོགས་བཅུའི་ཞིང་ཁམས་རབ་འབྱམས་ན་འཕྲོས་པས།བདེ་བར་གཤེགས་པ་རྣམས་དང་བླ་མ་རྒྱལ་བ་སྲས་དང་བཅས་པ་རྣམས་ཀྱི་སྐུ་མི་ཟད་པ་རྒྱན་གྱི་འཁོར་ལོའི་ཡེ་ཤེས་དང་ཡོན་ཏན་ཐམས་ཅད་དང་།གསུང་མི་ཟད་པ་རྒྱན་གྱི་འཁོར་ལོའི་ཡེ་ཤེས་ཡོན་ཏན།ཐུགས་མི་ཟད་པ་རྒྱན་གྱི་འཁོར་ལོའི་ཡེ་ཤེས་དང་ཡོན་ཏན་མཛད་པ་ཕྲིན་ལས་ལ་སོགས་པ་ཐམས་ཅད་ཀུན་ཀྱང་འོད་ཟེར་དཀར་དམར་མཐིང་གསུམ་གྱི་རྣམ་པར་བསྡུས་ཏེ།རང་གི་གནས་གསུམ་གྱི་ཡི་གེ་འབྲུ་གསུམ་ལ་ཐིམ་པར་བསམ་པའི་དམིགས་པ་ཡང་ཡང་བསྐྱར་བར་བྱ་བ་གནད་ཡིན་ནོ། །གསུམ་པ་ཇི་ལྟར་སྦྱང་བའི་ཚུལ་ནི།འོད་དང་འོད་ཕུང་སོགས།རྒྱ་ཡིས་བཏབ༔ ཅེས་པས་བསྟན་ཏེ།དེ་ལྟར་གནས་གསུམ་དུ་རྡོ་རྗེ་གསུམ་གྱི་སྙིང་པོ་འབྲུ་གསུམ་གསལ་ནས་དམིགས་པ་དང་བཅས་ངག་གི་བཟླས་པའི་རྐྱེན་གྱིས།དེ་ལས་འོད་དང་འོད་ཕུང་དཀར་དམར་མཐིང་གསུམ་གྱི་རྣམ་པར་བསྐལ་པ་དུས་མཐའི་མེ་ལྕེ་ལྟར་ཆེས་ཆེར་གཟི་བྱིན་འབར་བཞིན་དུ་འོད་འཕྲོས་ནས་རང་གི་གནས་དྲུག་ཏུ་ཕོག་སྟེ།འཁོར་བ་ལུགས་ལྡོག་གི་ཚུལ་དུ་དམྱལ་བའི་ས་བོན་དང་རྒྱུ་ལས་ཉོན་བག་ཆགས་དང་བཅས་པ།ཡི་དྭགས་ཀྱི་ས་བོན་དང་རྒྱུ་ལས་ཉོན་བག་ཆགས།དུད་འགྲོའི་ས་བོན་དང་རྒྱུ་ལས་ཉོན་བག་ཆགས།མིའི་ས་བོན་དང་རྒྱུ་ལས་ཉོན་བག་ཆགས།ལྷ་མིན་གྱི་ས་བོན་དང་རྒྱུ་ལས་ཉོན་བག་ཆགས།ལྷ་རུ་སྐྱེ་བའི་ས་བོན་དང་རྒྱུ་ལས་ཉོན་བག་ཆགས་དང་བཅས་པ་ཐམས་ཅད་ལྷག་མེད་དུ།དཔེར་ན་རྩྭ་སྦུར་ཕྲ་མོ་ལ་མེ་ལྕེ་ཕོག་པ་ལྟར།འབྲུ་གསུམ་རྡོ་རྗེ་གསུམ་གྱི་འོད་ཟེར་བསྐལ་པ་དུས་མཐའི་མེ་ལྕེའི་རྣམ་པར་མཆེད་བཞིན་དུ།གནས་དྲུག་གི་རྒྱུ་ལས་ཉོན་བག་ཆགས་ས་བོན་དང་བཅས་པ་ལུགས་ལྡོག་གི་ཚུལ་དུ་རིམ་པ་བཞིན་དུ་བསྲེགས་ཏེ།རྗེས་ཤུལ་ལྷག་མེད་དུ་སོང་བར་བསམ་ལ་འབྲུ་གསུམ་བཟླས་པ་མ་ཡེངས་པར་བཟླ།མཐར་ཡེ་ཤེས་ཀྱི་འོད་ཕུང་མེ་ཡི་རང་བཞིན་ཅན་དེ་ཉིད་ཆེར་མཆེད་ནས།ཕྱི་སྣང་བ་སྣོད་ཀྱི་འཇིག་རྟེན།ནང་སྲིད་པ་བཅུད་ཀྱི་སེམས་ཅན།བར་འདོད་ཡོན་ལྔའི་ལོངས་སྤྱོད།རང་ལུས་ཕུང་ཁམས་སྐྱེ་མཆེད་དང་བཅས་པ་ཐམས་ཅད་དངོས་མེད་དུ་བསྲེག་ནས།རང་ལུས་འཇའ་ཚོན་ལྟ་བུ་སྣང་སྟོང་ཆུ་ཟླ་ཇི་བཞིན་དུ་གསལ་བ་དང་།ཁམས་གསུམ་སྲིད་པ་ཐམས་ཅད་ཀུན་ཀྱང་འདོད་ཁམས་སྐུའི་དབྱིངས་དང་།གཟུགས་ཁམས་གསུང་གི་དབྱིངས་དང་།གཟུགས་མེད་ཁམས་ཐུགས་ཀྱི་དབྱིངས་ཏེ།སྐུ་གསུམ་མཉམ་ཉིད་བརྡལ་ཁྱབ་ཆེན་པོའི་རོལ་པར་ཡེ་ཤེས་འོད་ཕུང་གི་མེས་བསྲེགས་པར་བྱས་ཏེ།འཁྲུལ་མི་ཤེས་པའི་དབྱིངས་སུ་བརྟན་པ་ཐོབ་པར་བསམ་མོ། །མཐར་ནི་དམིགས་བསམ་གྱི་སྤྲོས་པ་ཐམས་ཅད་ཆམ་གྱིས་བཞག་ནས།རིག་སྟོང་བརྗོད་པ་དང་བྲལ་བའི་དབྱིངས་སུ་ཅི་གནས་སུ་མཉམ་པར་བཞག་ཅིང་། །ཐུན་མཐར་བསྔོ་བ་དང་ནི་སྨོན་ལམ་རྣམ་པར་དག་པས་མཐའ་བརྒྱན་པར་བྱ་བ་ནི་རྒྱ་ཡིས་བཏབ་པའི་དོན་ནོ། །བཞི་པ་སྦྱངས་པའི་ཚད་ནི།འབྲི་གསུམ་རྡོ་རྗེའི་བཟླས་པ་བདུན་འབུམ་བསྐྱལ༔ ཞེས་པས་བསྟན་ཏེ།དེ་ལྟར་སྦྱང་གཞི་ས་བོན་དྲུག་ལ་དམིགས་ནས།སྦྱོང་བྱེད་འབྲུ་གསུམ་རྡོ་རྗེའི་སྙིང་པོ་བཟླ་ཞིང་རྣམ་གཡེངས་ཀྱི་རྐྱེན་དུ་མ་བསྐུར།ངག་འཁྱལ་གྱི་ཚིག་དང་མ་འདྲེས་པར།སྦྱང་བྱ་ས་བོན་རེ་བཞིན་འབྲུ་གསུམ་བཟླས་པ་འབུམ་ཕྲག་རེ་རེ་དང་།ཡང་དེ་དག་གི་ཁ་སྐོང་བཅས་ཁྱོན་བདུན་འབུམ་གྲངས་ཚད་དུ་བསྐྱལ་བ་ནི་གནད་དུ་ཤེས་པར་བྱའོ། །ལྔ་པ་ཕན་ཡོན་བསྟན་པ་ནི།ནམ་མཁའ་གཡའ་དག་སོགས།ལྟས་སུ་འབྱུང་༔ ཞེས་པས་བསྟན་ཏེ།དེ་ལྟར་སྦྱང་བའི་ལམ་ཉམས་སུ་བླངས་པའི་སྟོབས་ཀྱིས་གནས་སྐབས་སྡིག་པ་དག་པའི་རྟགས་རབ་དངོས་དང་།འབྲིང་ཉམས།ཐ་མ་རྨི་ལམ་རྣམས་སུ།ཕྱིའི་ནམ་མཁའ་གཡའ་དག་ཅིང་སྐྱོན་གསུམ་དང་བྲལ་བ་ཉི་ཟླ་གཉིས་ཟུང་འབྲེལ་དུ་ཤར་བ་དང་།རྫུ་འཕྲུལ་གྱིས་ནམ་མཁའ་ལ་བྱ་བཞིན་འཕུར་ནས་འགྲོ་བ་དང་།ཆོས་ཀྱི་དུང་ལྷ་ཡི་རོལ་མོའི་སྒྲ་སྒྲོགས་པ་ཐོས་ཤིང་།གོས་དཀར་པོ་གྱོན་ནས་རི་བོའི་རྩེར་སླེབས་པ།བདུད་རྩིའི་ཁྲུས་ལ་ཞུགས་པ་སོགས་འབྱུང་ཞིང་།ཁྱད་པར་གྱི་རྟགས་སུ་ཉམས་སྣང་ལ་ཞིང་ཁམས་མང་པོ་ཉུལ་ཞིང་བྱང་སེམས་འཕགས་པའི་ཚོགས་ཀྱི་ཞལ་མཇལ་བ་དང་།ལྷ་དང་བླ་མས་རྗེས་སུ་བཟུང་ནས་ཉམས་དང་རྟོགས་པའི་ཡོན་ཏན་ཐམས་ཅད་རང་རྒྱུད་ལ་གསར་དུ་སྐྱེ་བ་སོགས་འོང་བ་དེ་དག་ནི་ལུས་ཀྱི་ནད་གདོན་དང་ཡིད་གྱི་སྒྲིབ་པ་དག་པའི་ལྟས་མཚན་དངོས་སུ་འབྱུང་ཞིང་།ཐ་མལ་གྱི་ཞེན་འཛིན་རང་སར་གྲོལ་བ་སོགས།མདོར་ན་དེ་ལྟར་ཉམས་སུ་བླངས་པས་གནས་སྐབས་ན་སྒོ་གསུམ་གྱི་སྡིག་སྒྲིབ་དག་ཅིང་བར་ཆད་ཞི།མཐར་ཐུག་རྡོ་རྗེ་གསུམ་དུ་སྨིན་རུང་གི་ནུས་པ་རྒྱུད་ལ་བཞག་ནས་གྲོལ་བ་ཐོབ་པར་འགྱུར་ཏེ།ཀློང་གསལ་ལས། །རུ་ཤན་ནང་ལྟར་སུས་དབྱེ་བ། །འཁྲུལ་རྒྱུ་འཁོར་བའི་ས་བོན་སྟོང་།ཞེས་གསུངས་སོ། །དེ་ལྟར་རུ་ཤན་ནང་ལྟར་དབྱེ་བར་བསྟན་པའི་ལེའུ་སྟེ་གསུམ་པའོ། །ས་མ་ཡ་ཞེས་དམ་ཚིག་གིས་རྒྱུས་བཏབ་ཅིང་།གུ་ཧྱ་ཞེས་པ་གསང་བར་གཉེར་གཏད་པའི་དོན་ནོ། །གསུམ་པ་གསང་བ་ལྟར་དུ་རུ་ཤན་དབྱེ་བ་ལ་གསུམ་ལས།དང་པོ་སྒོ་གསུམ་གྱི་སྔོན་འགྲོའི་ཐོག་མ་ལུས་རུ་ཤན་དབྱེ་བ་ལ།ལུས་གནད་ཀྱི་ཁྱད་པར་དང་།དམིགས་པའི་ཁྱད་པར་དང་།ཚུལ་བཞིན་ཉམས་སུ་བླང་བའི་ཕན་ཡོན་བཤད་པ་དང་གསུམ་ལས།དང་པོ་ལུས་གནད་ཀྱི་ཁྱད་པར་ནི།ལུས་ཀྱི་བྱ་བ་སོགས།རེས་མོས་བསྐྱར༔ ཞེས་པས་བསྟན་ཏེ།དེ་ལ་འདིར་ལུས་ཀྱི་བྱ་བ་རྡོ་རྗེར་སྦྱང་བ་ནི།ཐལ་འགྱུར་ལས།ལུས་ཀྱི་སྔོན་དུ་འགྲོ་བ་ལ།སོ་སོས་བྱེད་པའི་རྒྱུ་འགགས་པ།རྡོ་རྗེ་སྐྱིལ་ཀྲུང་དང་བཅས་ཏེ།ལུས་སྦྱང་སེམས་ལ་ཕན་པའོ། །ཞེས་གསུངས་པ་ལྟར།དང་པོ་ལུས་སྦྱང་བ་ལ་རང་ཉིད་བདེ་བའི་ས་ལ་འཁོད་དེ།སེམས་ཅན་ཐམས་ཅད་རྣམ་མཁྱེན་ཐར་པའི་ལམ་ལ་འགོད་པར་བྱ་བའི་ཕྱིར་དུ།བདག་གིས་ལམ་ཟབ་མོ་རྡོ་རྗེ་ཐེག་པའི་འཇུག་སྒོ་ཉམས་སུ་ལེན་པར་བྱའོ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་པ་དང་ཆབ་གཅིག་ཏུ།དབྱིངས་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་བྱིན་རླབས་ཡེ་ཤེས་ཀྱི་འོད་ཟེར་ཁ་དོག་ལྔ་ལྡན་གྱི་རྣམ་པར་ཐིབ་ཀྱིས་འདུས་ནས་རང་ལ་ཐིམ་པའི་སྟོབས་ཀྱིས།སྔོན་ལས་འཕྲལ་རྐྱེན་ལས་འབྱུང་བའི་ལས་ཉོན་དང་།དེ་བསྐྱེད་པའི་སྡིག་སྒྲིབ་སྡུག་བསྔལ་བག་ཆགས་གདོས་བཅས་ཀྱི་ཕུང་པོ་དང་བཅས་པ་ཐམས་ཅད་ཆོས་ཉིད་སྟོང་པ་ཆེན་པོའི་དབྱིངས་སུ་ཐར་གྱིས་ཞིག་པར་བསམ་ལ།འོད་གསལ་བརྗོད་བྲལ་གྱི་ངང་དུ་དར་ཅིག་མཉམ་པར་བཞག་སྟེ།དེ་ལས་སྐད་ཅིག་གིས་མཁའ་ལ་འཇའ་ཚོན་ཤར་བ་བཞིན་དུ་རང་ལུས་གནམ་ལྕགས་ལས་གྲུབ་པའི་རྡོ་རྗེ་རྩེ་གསུམ་པ་ཡེ་ཤེས་ཀྱི་མེ་འབར་བ་ཞིག་ཏུ་བསྒོམ་མོ། །མཚོན་དོན་ནི།རྩེ་གསུམ་གྱི་ཡར་རྩེ་གཡས་པ་ལོངས་སྐུ།གཡོན་པ་སྤྲུལ་སྐུ།དབུས་མ་ཆོས་སྐུ་སྟེ།སྐུ་གསུམ་གྱི་མཚོན་བྱེད་ཡིན་ལ།མར་གྱི་རྩེ་གསུམ་ནི་དབུས་མ་ངོ་བོ་སྟོང་པའི་ཡེ་ཤེས།གཡས་པ་རང་བཞིན་གསལ་བའི་ཡེ་ཤེས།གཡོན་པ་ཐུགས་རྗེ་ཀུན་ཁྱབ་ཀྱི་ཡེ་ཤེས་ཏེ།ནང་གསལ་སྐུ་གསུམ་གྱི་མཚོན་བྱེད་དང་།སྐེད་པ་གཅིག་ཏུ་ཟླུམ་ཞིང་འཁྱིར་བ་ནི།ཀ་དག་དང་ལྷུན་གྲུབ་གཉིས་ཐབས་སྣང་བའི་འོད་གསལ་དང་།ཤེས་རབ་སྟོང་པའི་འོད་གསལ་ཏེ་གཉིས་མེད་ཟུང་དུ་འཇུག་པའི་མཚོན་བྱེད་རྣམས་སུ་གསལ་ཞིང་།རང་གི་ལག་པ་གཉིས་ཀྱི་ཐལ་མོ་མགོ་ལ་མ་རེག་ཙམ་དུ་སྤྱི་བོར་ཁ་སྦྱར་བར་བྱེས་ཏེ་གྲུ་མོ་གཉིས་ཀ་ཡོ་འཁྱོག་མེད་པར་ཐད་གར་བསྒྲེང་ཞིང་ལུས་དྲང་པོར་བསྲངས་དེ།མགྲིན་པས་ཨོལ་མདུད་མནན།རྐང་པའི་མཐིལ་གཉིས་ཁ་སྦྱར་བའི་ཚུལ་དུ་རྟིང་པ་གཉིས་ཀྱི་རྩེ་སྤྲད་དེ།པུས་མོ་གཉིས་ཕྱིར་བསྒྲད་ཅིང་སོར་མོའི་རྩེ་རྣམས་སར་བཙུག་ནས།རྡོ་རྗེའི་ལུས་རྒྱ་བཅའ་བཞིན་ཤེས་པ་བཞན་དུ་མ་ཡེངས་པར་བྱས་ཏེ།དམིགས་པའི་གནད་ནི་རང་ལུས་རྡོ་རྗེ་རྩེ་གསུམ་པ་ཡེ་ཤེས་ཀྱི་མེ་འབར་བ་ཞིག་ཏུ་བསྒོམས་ལ།ལུས་ཀྱི་གནད་རྡོ་རྗེའི་རྒྱ་མ་འཆུག་པར་བྱས་ཏེ་འབད་ཅིང་གསལ་གདབ་པར་བྱའོ། །དེས་མ་དག་པའི་སྒོ་གསུམ་གྱི་མངོན་ཞེན་རང་སར་ཞི་ནས།ཕྲ་བའི་སྒོ་གསུམ་གྱི་བག་ཆགས་སྦྱངས་ཤིང་།དག་རྫོགས་སྨིན་བྱེད་ཀྱི་དགོངས་དོན་རྒྱུ་ལ་འཕོས་ཏེ།མཐར་ཐུག་སྐུ་གསུམ་གྱི་སར་གྲོལ་བ་ཐོབ་པའི་རྒྱུ་བྱེད་དོ། །དེ་ལྟར་བྱས་ཚེ་དཀའ་ཞིང་ངལ་དུབ་ཀྱིས་རྐང་ལག་སྦྲིད་ཅིང་ལངས་སྟབས་སུ་སྡོད་མི་ཚུགས་པ་བྱུང་བའི་དུས་ན།མཉམ་པ་ཉིད་ཀྱི་འདུག་ལུགས་ཞེས་ལུས་གན་རྐྱལ་དུ་ལོག་སྟེ།རྐང་མཐིལ་གཉིས་ཁ་སྦྱར་ཞིང་རྟིང་པ་གསང་བར་གཏད་པ་དང་།ལག་གཉིས་སྔར་ལྟར་ཐལ་མོ་སྤྱི་བོར་སྦྱར་བཞིན།རང་ལུས་གནམ་ལྕགས་ཀྱི་རྡོ་རྗེ་རྩེ་གསུམ་པ་ཡེ་ཤེས་ཀྱི་མེའི་ཚྭ་ཚྭ་འཕྲོ་བ་ཞིག་ཏུ་དམིགས་པས་གསལ་བཏབ་ནས་འབད་པར་བྱའོ། །ཡང་དེ་ལས་ལྡང་ཞིང་ཙོག་པུར་མི་འགྱུར་རྡོ་རྗེའི་འདུག་སྟངས་བྱ་སྟེ།མ་ཡེངས་པར་བྱའོ།ལག་གཉིས་སྔར་བཞིན་སྤྱི་གཙིག་ཏུ་ཁ་སྦྱར་ནས།རྟིང་པ་གསང་བར་གཏད།སོར་མོ་རྣམས་སར་བཙུག་ལུས་ཅུང་ཟད་ཕྱིར་དགྱེ་ཞིང་རྡོ་རྗེའི་ཕྱག་རྒྱ་དང་བཅས་དམིགས་པའི་གནད་བཟུང་སྟེ་མ་ཡེངས་བར་བྱའོ། །དེ་ལྟ་བུའི་ལུས་སྦྱང་གི་ཉམས་ལེན་ཟབ་མོ་དེ་དག་རེས་མོས་སུ་ཡང་ཡང་བསྐྱར་བའི་དགོས་པ་ནི།རྡོ་རྗེ་ལྟ་བུའི་འདུག་སྟངས་ཀྱི་ལུས་སྤྱི་དྲང་པོར་བསྲང་བས་འགྱུ་བྱེད་ཀྱི་རླུང་འགག།རྐང་མཐིལ་ཁ་སྦྱར་བར་ཕོ་མོ་མ་ནིང་གི་རླུང་སྟོང་སྟེ་འོད་གསལ་མངོན་དུ་བྱེད།རྟིང་པ་གཉིས་གསང་བར་གཏད་པས་འདོད་ཆགས་ཀྱི་གཞི་སྟོང་སྟེ་ཉོན་མོངས་པའི་བག་ཆགས་དག།ལག་གཉིས་ཐལ་མོ་སྤྱི་བོར་སྦྱར་བས་ལུས་ཀྱི་གནད་འབྱོངས་པས་རྩ་རླུང་རང་སར་ཆུད་པར་བྱེད་དོ། །གཉིས་པ་དམིགས་པའི་ཁྱད་པར་ནི།རྡོ་རྗེའི་ཚྭ་ཚྭ་སོགས།ཆེན་པོར་བསྲེགས༔ ཞེས་པས་བསྟན་ཏེ།དེ་ལྟར་ལུས་ཀྱི་བྱ་བ་རྡོ་རྗེར་སྦྱང་བ་གསལ་དག་བརྟན་པའི་ངང་ནས།རྡོ་རྗེ་ལས་འོད་ཟེར་མེའི་ཚྭ་ཚྭ་གྲངས་མེད་པ་དུ་མ་སྐར་ལྟར་འཕྲོས་ཏེ།རང་གི་སྣང་བའི་ཡུལ་ཐམས་ཅད་དུ་ཆར་སྤྲིན་ལྟར་འཁྲིགས་ནས་ཡོངས་སུ་གང་སྟེ། །རྣམ་མཁྱེན་ཐར་པ་བྱང་ཆུབ་ཀྱི་ལམ་ལ་བར་དུ་གཅོད་པར་བྱེད་པའི་སྔོན་གྱི་ལས་དང་འཕྲལ་བྱུང་གི་རྐྱེན་དབང་ངན་པའི་སྟོབས་ཀྱི་རྒྱུས་བསྐྱེད་པའི།ཕྱི་རྐྱེན་བར་ཆད་མི་འདོད་ཉེར་འཚེ།ནང་དུ་རྐྱེན་ངན་གདོན་བགེགས་ལོག་འདྲེ།གསང་བ་མ་རིག་གཟུང་འཛིན་གྱི་བསྐྱེད་པའི་ཉོན་མོངས་པའི་རྣམ་པར་རྟོག་པའི་སྒྲིབ་པ་བག་ཆགས་དང་བཅས་པ་ཀུན་ཀྱང་ཡུལ་མེད་སྟོང་ཉིད་ཆེན་པོའི་དབྱིངས་སུ་རྗེས་ལྷག་མེད་པར་རྡུལ་ཕྲན་བཞིན་དུ་ཐལ་བར་བརླག་ཅིང་།ཡུལ་མེད་ཟང་ཐལ་ཆེན་པོ་སྐུ་གསུམ་མཉམ་ཉིད་ཀྱི་ཀློང་དུ་བསྲེགས་པར་བསམ་ནས།དམིགས་པའི་གནད་ལ་འབད་པ་ནི་གནད་ཀྱི་ཡང་གཅེས་དམ་པ་ཡིན་ནོ། །གསུམ་པ་དེ་ལྟར་སྦྱང་པའི་ཕན་ཡོན་ནི།གནད་དེས་ཕྱི་ནང་སོགས།ཉེ་མི་ནུས༔ ཞེས་པས་བསྟན་ཏེ།དེ་ལྟར་ཐབས་མཆོག་ཟབ་མོའི་ལམ་འདི་ཉིད་ཉམས་སུ་བླངས་ཏེ།ལུས་རྡོ་རྗེར་སྦྱང་བའི་གནད་དེའི་ཕན་ཡོན་གྱིས།གནས་སྐབས་སུ་ཕྱི་ནང་གསང་བའི་བར་ཆད་མཐའ་དག་ཞི་ཞིང་།ལས་དང་ཉོན་མོངས་པའི་སྡིག་སྒྲིབ་བག་ཆགས་དག།ས་ལམ་གྱི་རྐྱེན་གེགས་ཐམས་ཅད་སེལ་བར་བྱེད་ཅིང་། །ཁྱད་པར་དུ་མཐར་ཐུགས་ལུས་ཀྱང་སྤྲུལ་སྐུར་འབྱོངས་ཏེ་རྡོ་རྗེ་སྐུའི་རོལ་པར་གོ་འཕོས་པ་དང་།ལུས་རྡོ་རྗེར་མཐོང་སྟེ་ཕྱི་ནང་གི་བགེགས་ཚོགས་རྣམས་ཀྱིས་ཉེ་བར་མི་ནུས་ཤིང་བར་ཆད་ཀྱི་གཡུལ་ལས་རྒྱལ་བར་འགྱུར་རོ། །དེ་ལྟར་ལུས་ཀྱི་རུ་ཤན་དབྱེ་བ་བསྟན་པའི་ལེའུ་སྟེ་བཞི་པའོ། །ས་མ་ཡ༔ གུ་ཧྱ༔ ཞེས་དམ་མེད་ལེ་ལོ་ཅན་ལ་བཀའ་རྒྱ་བསྡམ་སྟེ།རེ་ཞིག་གསང་བ་མི་འགྱུར་བའི་དབྱིངས་སུ་གཏད་རྒྱ་བཏབ་པའི་དོན་ནོ། །། །དེ་ནས་གཉིས་པ་ངག་སྦྱང་བྱེད་པ་ལ།ཐལ་འགྱུར་ལས།ངག་ནི་ཧཱུྃ་ཞེས་གནས་པ་ལ། །རྒྱས་གདབ་པ་དང་རྩལ་སྦྱང་དང་། །མཉེན་བཙལ་ལམ་དུ་ཞུགས་པ་ཡིས། །དེ་ལྟར་ངག་སྦྱང་སེམས་ལ་ཕན། །ཞེས་པ་ལྟར།ངག་གི་རི་ཤན་དབྱེ་བའི་རིམ་པ་ནི།ལུས་གནད་ཀྱི་ཁྱད་པར།ངག་སྦྱང་གི་དབྱེ་བ།དེ་དག་གི་ཡོན་ཏན་བཤད་པ་དང་གསུམ་ལས།དང་པོ་ལུས་གནད་ཀྱི་ཁྱད་པར་ནི།རང་ཉིད་གསང་བདག་སོགས།མཐིང་གར་བསྒོམ༔ ཞེས་པས་བསྟན་ཏེ།དེ་ལ་འདིར་རང་བདེ་བའི་སར་བསམ་གཏན་གྱི་སྐྱིལ་མོ་ཀྲུང་གིས་འདུག་ཅིང་ཐོག་མར་བྱང་ཆུབ་མཆོག་ཏུ་སེམས་བསྐྱེད།དེ་ནས་རང་ལུས་གདོས་བཅས་ཀྱི་འདུ་ཕུང་དེ་དག་སྒྱུ་མའི་འཁྲུལ་འཁོར་དབྱིངས་སུ་ཞིག་པ་བཞིན་དུ་ཆོས་ཉིད་སྟོང་བའི་ངང་དུ་ཐར་གྱིས་ཞི་སྟེ།སྐད་ཅིག་གིས་ཆུ་ལས་ཆུ་སྦུར་རྡོལ་བ་བཞིན་དུ།རང་ཉིད་དཔལ་ཆེན་གསང་བའི་བདག་པོ་ཕྱག་ན་རྡོ་རྗེ་ཆོས་ཉིད་མི་འགྱུར་བའི་སྐུ་མདོག་མཐིང་ག།ཉག་གཅིག་ཞལ་གྱི་དཀྱིལ་འཁོར་ལ།སྐུ་གསུམ་མཚོན་པའི་སྤྱན་མིག་བསྒྲད་པ།ཐབས་ཤེས་ཕྱག་གཉིས།གཡས་པས་ས་དགུ་མཚོན་པའི་གནམ་ལྕགས་ཀྱི་རྡོ་རྗེ་རྩེ་དགུ་ནམ་མཁར་འཕྱར་བ།གཡོན་པས་ཉོན་མོངས་དབྱིངས་སུ་བསྒྲལ་ཕྱིར་སྦྲུལ་ཞགས་ལྗང་ཁྲ་དཀུར་བརྟེན་པ།ཁམས་གསུམ་གྱི་ལོག་རྟོག་དབྱིངས་སུ་སྤོར་ཕྱིར་ཞལ་གདངས་པ།དུག་གསུམ་རྩད་ནས་གཅོད་ཕྱིར་རྣོ་དཀར་གྱི་མཆེ་བ་གཙིགས་པ།གཉིས་འཛིན་གྱི་འཁྲུལ་པ་དག་ཕྱིར་ལྗགས་གློག་དམར་ལྟར་འདྲིལ་ཞིང་སྨར་སྨིན་འོད་འབར་བ།དབུ་སྐྲ་དམར་སེར་སྲིད་རྩེར་འཁྱིལ་ཞིང་ཐོད་སྐམ་ལྔ་ཡིས་དབུ་ལ་བརྒྱན་པ།སྐུ་ལ་དུར་ཁྲོད་ཀྱི་དཔའ་ཆས་འདོགས་པའི་རྒྱན་གཉིས་ནི།ཐོད་སྐམ་གྱི་དབུ་རྒྱན་དང་། །ཐོད་རློན་ལྔ་བཅུའི་ཕྲེང་བ།བྱུགས་པའི་རྫས་གསུམ་ནི།དཔྲལ་བར་ཐལ་ཆེན་གྱི་ཚོམ་བུ།མཁུར་ཚོས་ལ་རཀྟའི་ཐིག་ལེ།ཞལ་ལ་ཞག་གི་ཟོ་རིས།བགོ་བའི་གོས་གསུམ་ནི།སྐུ་སྟོད་ལ་གླང་ཆེན་གྱི་ལྤགས་པ།རྐེད་པར་མི་ལྤགས་ཀྱི་གཡང་གཞི།སྐུ་སྨད་ལ་སྟག་ལྤགས་ཀྱི་ཤམ་ཐབས་ཏེ།ཁྲོ་བོའི་ཆས་ཐམས་ཅད་རྫོགས་པ།ཁྲོ་ཞིང་གཏུམ་པ་གར་དགུའི་ཉམས་དང་ལྡན་པ་ཞིག་བསྒོམ་པར་བྱེད་པ་དང་།ཡང་དུས་བཞི་དང་བསྟུན་ཏེ་སྐུ་དང་སྲོག་སྙིང་གི་ཁ་དོག་བསྒྱུར་བ་ནི།སྔ་དྲོ་བག་ཆགས་ཐམས་ཅད་དང་བྲལ་བའི་བརྡར་སྐུ་མདོག་དཀར་པོ།ཉིན་གུང་ཡོན་ཏན་ལྷུན་གྱིས་གྲུབ་པའི་སེར་པོ།དགོང་མོ་བྱ་རྩོལ་བློ་ལས་འདས་པའི་དམར་པོ། །སྲོད་ལ་མ་བཙལ་རང་བྱུང་རྫོགས་པའི་མཐིང་ག་རྣམས་སུ་གསལ་ཏེ།སྐུའི་མདོག་ལྟར་སྲོག་ཡིག་ཧཱུྃ་གི་ཁ་དོག་ཀྱང་སྐབས་དང་བསྟུན་ཏེ་བསྒོམ་པར་བྱའོ། །གཉིས་པ་ངག་སྦྱང་གི་དབྱེ་བ་ལ།རྒྱས་གདབ་པ་དང་།རྩལ་སྦྱང་བ་དང་།མཉེན་བཙལ་བ་དང་།ལམ་དུ་ཞུགས་པ་སྟེ་བཞི་ལས།དང་པོ་རྒྱས་གདབ་པ་ལ།ཕྱི་དང་ནང་སྟེ།ཐོག་མར་ཕྱི་སྣང་བ་ལ་རྒྱས་གདབ་པ་ནི།དང་པོ་ཕྱི་ཡི་སོགས།ཧཱུྃ་གླུ་གྱེར༔ ཞེས་པས་བསྟན་ཏེ།དེ་ལྟར་རང་ཉིད་གསང་བའི་བདག་པོར་གསལ་བའི་ཐུགས་ཀར་པད་ཉིའི་གདན་སྲན་མ་སླེབས་པ་ཙམ་གྱི་སྟེང་དུ་གནམ་ལྕགས་ལས་གྲུབ་པའི་རྡོ་རྗེ་རྩེ་དགུ་པ་ནས་འབྲུ་ཙམ་གྱེན་ལང་དུ་གནས་པའི་ལྟེ་བར་ཉི་ཟླའི་གྭའུ་ཁ་སྦྱོར་གྱི་ནང་དུ་ཐུགས་སྲོག་ཧཱུྃ་ཡིག་སྤུ་ཤད་ཀྱིས་བྲིས་པ་ལྟ་བུ་ལ་འོད་དང་འོད་ཟེར་གྱི་བཀྲག་མདངས་འབར་བ་ཞིག་གསལ་གདབ།དེ་ནས་དང་པོ་ཕྱིའི་སྣང་བའི་ཡུལ་དངོས་པོ་མཚན་མར་འཛིན་པའི་ཆོས་ཐམས་ཅད་སྟོང་ཉིད་ཕྱག་རྒྱ་ཆེན་པོས་རྒྱས་གདབ་པར་བྱེད་པ་ལའང་།རང་གི་ཐུགས་ཀའི་ཧཱུྃ་ལས་མེ་ལས་མེ་སྟག་འཕྲོ་བ་བཞིན་དུ།ཧཱུྃ་ཡིག་གྲངས་ལས་འདས་པ་དཔག་ཏུ་མེད་པ་རིམ་པར་འཕྲོས་ཤིང་རང་གི་ཁ་ནས་ཐོན་ཏེ།ཕྱི་སྣང་བ་སྣོད་ཀྱི་འཇིག་རྟེན།ནང་གཡོ་བ་བཅུད་ཀྱི་སེམས་ཅན་ཐམས་ཅད་ལ་ཧཱུྃ་གིས་ཁྱབ་པས།སྣོད་བཅུད་བརྟན་གཡོ་ཀུན་ཀྱང་ལན་ཚྭ་ཆུ་རུ་ཞུ་བ་བཞིན་དུ་ཧཱུྃ་གི་རྣམ་པར་གྱུར་ནས།དཔེར་ན་ན་བུན་ནམ་མཁའ་ལ་འཐིབས་པ་ཇི་བཞིན་དུ་སྣོད་བཅུད་ཐམས་ཅད་ཧཱུྃ་གིས་ཡོངས་སུ་གང་བར་བསམ་ནས་དམིགས་པའི་རྒྱ་བསྐྱེད་པ་དང་།ཡང་རང་གི་སྣང་བའི་ཡུལ་དུ་གྱུར་པའི་ཕྱི་ནང་དུ་འཛིན་པའི་དངོས་པོ་ཀུན་གཅིག་ཀྱང་མ་ལུས་པར་ཆུ་ལ་ཆུ་ཐིམ་པ་ལྟར་ཐམས་ཅད་ཡི་གེ་ཧཱུྃ་གི་རང་བཞིན་དུ་འོད་དུ་ཞུ་ནས།སྣང་སྲིད་སྣོད་བཅུད་ཐམས་ཅད་ཧཱུྃ་གི་རྣམ་པར་སོང་བར་བསམ་ཞིང་དམིགས་པ་གནད་དུ་དྲིལ་ནས་ཡེངས་མེད་དུ་ཧཱུྃ་གི་གླུ་དལ་བུས་སྐད་ཆེར་སྙན་ལ་རིང་བས་ཧཱུྃ་གླུ་གྱེར་བར་བྱའོ། །གཉིས་པ་ནང་རང་ལུས་ལ་རྒྱས་གདབ་པ་ནི།སླར་ཡང་རང་གི་སོགས།ཡལ་ལྟར་བསྡུས༔ ཞེས་པས་བསྟན་ཏེ།དེ་ནས་སླར་ཡང་ནང་རང་གི་ལུས་ལ་རྒྱས་གདབ་པར་བྱེད་པ་ནི།སྣོད་བཅུད་བརྟན་གཡོ་ཐམས་ཅད་ཧཱུྃ་གི་རྣམ་རོལ་དུ་གྱུར་པ་ཐམས་ཅད་དང་།ཕར་སྤྲོས་པའི་ཧཱུྃ་རྣམས་གཅིག་ནས་གཅིག་ཏུ་རིམ་པ་བཞིན་དུ་ཚུར་འདུས་ཤིང་རང་གི་ཁ་ནས་ཞུགས་ཏེ་ལུས་ནང་མགོ་མཇུག་མེད་པར་ཧཱུྃ་གིས་གང་ནས་ལུས་པོ་ཧཱུྃ་གི་རྣམ་པར་ཞིག་སྟེ།ཕུང་པོ་ཧཱུྃ་ཡིག་གི་རྣམ་པ་ཅན་དུ་གྱུར་པ་གྲངས་ལས་འདས་པ་དཔེར་ན་ས་གཞིའི་ཁམས་སུ་རྡུལ་ཕྲན་གྱི་ཆ་ཙམ་ཚོགས་པ་ལྟ་བུར་རང་གི་སྒྱུ་མའི་ཕུང་པོ་ཧཱུྃ་ཡིག་དཔག་ཏུ་མེད་པ་གསལ་བཏབ་སྟེ།ཧཱུྃ་གླུ་གྱེར་ཞིང་དམིགས་པའི་རྩལ་སྦྱང་བར་བྱས་ལ།མཐར་ནི་ཧཱུྃ་རྣམས་གཅིག་ཏུ་བསྡུས་ཏེ།དམིགས་བསམ་གྱི་སྤྲོས་པ་བཞག་ནས་རྩ་བའི་ཧཱུྃ་ལ་ཤེས་པ་གཏད་ཅིང་ཅུང་ཟད་ངལ་གསོ།དེ་ནས་ཧཱུྃ་དེ་ཡང་འཇའ་ཚོན་ནམ་མཁའ་ལ་ཡལ་བ་ལྟར་མས་ནས་རིམ་པར་བསྡུས་ཏེ།ཆོས་དབྱིངས་སྤྲོས་པ་དང་བྲལ་བའི་ངང་མངོན་དུ་བྱེད་ཅིང་ངལ་གསོ་བར་བྱའོ། །དེའི་དགོས་པ་ནི།དེ་ལྟར་ཕྱི་སྣང་བ་ལ་རྒྱས་ཐེབས་པས་ཡུལ་ལ་མངོན་ཞེན་ལོག་ཅིང་ཡུལ་སྣང་རང་བཞིན་མེད་པའི་དོན་གཤིས་ཐོག་ཏུ་ཕེབས་པ་དང་།ནང་རང་ལས་ལ་རྒྱས་ཐེབས་པས་ལུས་ཀྱི་འབྱུང་སྙིགས་རང་སར་དག་སྟེ་གདོས་བཅས་ཟག་མེད་དུ་གྲོལ་བའི་རྒྱུ་བྱེད་དོ། །གཉིས་པ་རྩལ་སྦྱང་བ་ལ།ཕྱི་དང་ནང་སྟེ།དང་པོ་ཕྱི་སྣང་བ་ལ་རྩལ་སྦྱང་བ་ནི།དེ་ནས་ཕྱི་ཡི་སོགས།བཅད་ཐོན་བརྗོད༔ ཅེས་པས་བསྟན་ཏེ།དེ་ནས་ཕྱི་སྣང་བ་ལ་རྩལ་སྦྱང་བར་བྱེད་པ་དེ་ལ།ཕྱི་ཡུལ་གྱི་རྣམ་པར་སྣང་བའི་ས་རྡོ་རི་བྲག་རྩི་ཤིང་ནགས་ཚལ་ལ་སོགས་པའི་དངོས་པོ་ཐོག་རེག་གི་ཚུལ་དུ་སྣང་བ་ཐམས་ཅད་ཀུན་ཀྱང་། །བདེན་མེད་སྟོང་པའི་རོལ་པར་བཤིག་ཅིང་གཉིས་སུ་མེད་པའི་ཀློང་དུ་རྩལ་ཆེན་སྦྱང་བར་བྱེད་པ་ལའང་།རང་གི་སྙིང་ག་ནས་ཧཱུྃ་ཡིག་མཐིང་ནག་བཀྲག་འབར་བ་གྲུ་གང་གི་ཚད་ཙམ་ཡོད་པ་རྣོ་མྱུར་སྟོབས་ཤུགས་ཆེ་བ།རི་རབ་ཀྱང་ཐལ་བར་བརླག་པའི་ནུས་པ་དང་ལྡན་པ་ཞིག་རང་གི་ཁ་ནས་བརྒྱུད་ཅིང་མེ་སྟག་མཆེད་པ་ལྟར་ཕྱིར་འཕྲོས་པར་བསམ་སྟེ།དང་པོ་རང་གི་མདུན་ཐད་ཀྱི་ས་རྡོ་རི་བྲག་ཡུལ་སྣང་ཁང་ཁྱིམ་ལ་སོགས་པ་ཐོགས་རེག་གི་གནས་སུ་གྱུར་པ་ཐམས་ཅད་ལ།དཔེར་ན་གནམ་ལྕགས་ཀྱི་ཐོགས་ལྟར་བབས་ནས་རིམ་པ་བཞིན་དུ་སྣང་ཡུལ་ཐམས་ཅད་ཕྱི་ཐལ་ནང་ཐལ་ཟང་མ་ཐལ་གྱིས་འབིགས་ནས་དངོས་མེད་དུ་བཏང་བར་བསམ་པ་དང་།གཞན་ཡང་སེམས་དང་སྣང་བས་ཁྱབ་པའི་ཡུལ་གྱི་ས་རྡོ་རི་བྲག་ལ་སོགས་པ་ཕྱིའི་འབྱུང་བཞི་འཐས་པའི་དངོས་པོ་ཐོགས་རེག་གི་རྣམ་པར་སྣང་བ་ཐམས་ཅད་དང་།ཡུལ་དྲུག་གི་འཛིན་པའི་སྤྱོད་ཡུལ་དུ་གྱུར་པའི་རི་རབ་ཐང་དང་རྫས་དང་ཡོ་བྱད་ལ་སོགས་པ།མདོར་ན་དངོས་པོ་ཐོགས་རེག་གི་རྣམ་པར་གྲུབ་བོ་ཅོག་ཐམས་ཅད་ཀྱང་ཕྱི་ཐལ་ནང་ཐལ་ཟང་ཐལ་དུ་ཕུག་ཅིང་ཅང་མེད་སྟོང་པའི་དབྱིངས་སུ་རྩལ་སྦྱངས་ཏེ།སྣང་སྲིད་སྣོད་བཅུད་ཐམས་ཅད་རིག་སྟོང་སྤྲོས་པ་དང་བྲལ་བའི་དབྱིངས་སུ་ཁྱབ་བརྡལ་ནམ་མཁའི་རང་བཞིན་དུ་འབྱམས་ཀླས་པར་བསམ་སྟེ།དམིགས་པ་གསལ་ངར་དང་ལྡན་བཞིན་དུ་ཧཱུྃ་གི་སྒྲ་དྲག་ལ་བཅད་ཐོན་པར་བརྗོད་ཅིང་ཡང་ཡང་བསྐྱར་བར་བྱའོ། །དེ་ནས་ནང་རང་ལུས་ལ་རྩལ་སྦྱང་བ་ནི།སླར་རང་གི་སོགས།ཕུང་པོར་བསྒོམ༔ ཞེས་པས་བསྟན་ཏེ།སླར་ཡང་ནང་རང་གི་ལུས་ལ་རྩལ་སྦྱང་བར་བྱེད་པ་ལ།རང་ཉིད་ཐ་མལ་དུ་གནས་པ་ལ་ཕར་འཕྲོས་པའི་ཧཱུྃ་དེ་དག་རིམ་པར་ཚུར་འདུས་ཏེ།རང་གི་ལུས་ཀྱི་མགོའི་སྐྲ་རྩེ་མན་དང་རྐང་གི་སོར་རྩེ་ལ་ཡན་ཆད་ཀྱི་ལུས་ཀྱི་ཕྱི་ནང་བར་གསུམ་ཀུན་ཏུ་ཧཱུྃ་གིས་ཁྱབ་པས།ལུས་ཐམས་ཅད་ཕྱི་ཐལ་ནང་ཐལ་ཟང་མ་ཐལ་དུ་མཐེབ་གོར་གྱི་རྩེ་ཙམ་ཡང་མེད་པར་ཐལ་མར་ཕུག་ནས་ལུས་རྡུལ་ཕྲན་དུ་དེངས་པར་བསམ་ལ་དམིགས་པས་འབད་པར་བྱའོ། །མཐར་ནི་རང་ལུས་སྟོང་གཟུགས་འོད་ཀྱི་ཕུང་པོར་བསྒོམ་སྟེ།ཧཱུྃ་གླུ་དྲག་ལ་བཅད་ཐོན་པར་བརྗོད་པའི་ཚེ་ལུས་ཁོལ་བུར་འཕར་བ་དང་།སྐྲང་ནས་ཤ་རྡོལ་འབྱུང་བ་སོགས་ནི་རྩལ་སྦྱོང་བའི་རྟགས་སུ་ཤེས་སོ། །དེ་ལྟར་ཕྱི་སྣང་བ་ལ་རྩལ་སྦྱངས་པས་སྣང་བ་སྒྱུ་མར་མཐོང་ནས་སྣོད་བཅུད་ཐམས་ཅད་དངོས་མཚན་བདེན་པར་མ་གྲུབ་པའི་དོན་ཤེས།ནང་རང་ལུས་ལ་རྩལ་སྦྱང་པར་གནས་སྐབས་སུ་ནད་གདོན་བར་ཆད་ཞི་བ་དང་།མཆོག་ཏུ་ལུས་འོད་སྐུར་སྨིན་ཅིང་།མཐར་ཐུག་རྒྱལ་བ་རྣམས་ཀྱི་སྐུ་རྡོ་རྗེ་དང་གཉིས་སུ་མེད་པར་གྲོལ་བར་བྱེད་དོ། །གསུམ་པ་མཉེན་བཙལ་བ་ནི།དེ་ནས་མཉེན་བཙལ་སོགས།སྙིང་གར་བསྡུ༔ ཞེས་པས་བསྟན་ཏེ།དེ་ནས་མཉེན་བཙལ་བ་ལ་རང་ཉིད་བདེ་བའི་སར་སྐྱིལ་མོ་ཀྲུང་གིས་འདུག་ཅིང་།མདུན་དུ་ཤིང་བུ་ཡོ་འཁྱོག་མེད་པ་ཞིག་བཙུག་སྟེ།དེ་ལ་ཤེས་པ་གཏད་ནས་རང་གི་སྙིང་གར་རླུང་སེམས་འདུས་པའི་ངོ་བོ་ཧཱུྃ་ཡིག་མཐིང་ནག་སྤུ་ཤད་ཀྱིས་བྲིས་པ་ལྟ་བུ་གསལ་འཚེར་འོད་དང་ལྡན་པ་ཞིག་བསྒོམ་པར་བྱས་ནས་དམིགས་པ་འཇུར་ལ་དྲངས་ཏེ་བརྩོན་ནོ། །དེ་ནས་རང་གི་ཐུགས་ཀའི་ཧཱུྃ་དེ་ལས་མེ་ལས་མེ་སྟག་མཆེད་པ་ཇི་བཞིན་དུ་ཧཱུྃ་ལས་ཧཱུྃ་ཡིག་མཐིང་ནག་གྲངས་མེད་པ་རང་མདངས་ཀྱི་འོད་ཀྱི་དྲྭ་བས་ལུ་གུ་རྒྱུད་དུ་འབྲེལ་བ་མང་པོ་རང་གི་ཁ་ནས་རིམ་པར་ཐོན་ཏེ།མདུན་གྱི་དམིགས་རྟེན་ཤིང་བུའི་རྩར་སླེབས་པ་དང་མཉམ་དུ་ཐོག་མར་གྱི་ཧཱུྃ་ཡིག་དེ་གཡས་དཀྲིས་ཀྱི་ཚུལ་དུ་དམིགས་རྟེན་གྱི་རྩེར་ཕྱིན་པས་གཞན་རྣམས་ཀྱང་གཡས་བསྐོར་གྱིས་ཚུལ་དུ་ནི་དཔེར་ན་སྦྲུལ་འཁྱུད་པ་ལྟར་ཤིང་བུ་ལ་དཀྲིས་ཏེ།དམིགས་རྟེན་ཧཱུྃ་ཡིག་གིས་རོམ་མེར་གང་བར་བསམ་ལ་གསལ་གདབ།དེ་ནས་སྔ་མའི་ཧཱུྃ་ཡིག་དམིགས་རྟེན་གྱི་རྩེར་ཕྱིན་ནས་འགྲེངས་ངེར་གནས་པ་ལ་ཤེས་པ་རྩེ་གཅིག་ཏུ་གཏད་དེ་ཧཱུྃ་གི་གླུ་སྙན་ལ་རིང་བ་དལ་གྱིས་བརྗོད་པར་བྱའོ། །སླར་ཡང་དམིགས་རྟེན་གྱི་རྩེ་མོ་ནས་ཧཱུྃ་རྣམས་རིམ་བཞིན་ལུགས་སུ་ལྡོག་སྟེ།གཅིག་ལ་གཅིག་ཐིམ་གྱི་ཚུལ་དུ་རྩེམོའི་ཧཱུྃ་དང་བཅས་པ་སྙིང་གའི་ཧཱུྃ་ལ་བསྡུས་ནས་དམིགས་མེད་ཀྱི་ངང་དུ་ངལ་གསོ་བར་བྱ་སྟེ།དེ་ལྟར་ཕར་སྤྲོས་པ་དང་ཚུར་ལུགས་སུ་ལྡོག་པ་རེས་མོས་སུ་ཡང་ཡང་འབད་པར་བྱེད་དོ། །དེས་སེམས་ལ་ཤིན་ཏུ་སྦྱངས་པ་ཐོན་ནས་རྒྱུད་ལ་ཡོན་ཏན་ཁྱད་པར་ཅན་སྐྱེས་ཏེ།དམིགས་པ་གང་གཏད་དུའང་བརྒྱུར་ཐུབ་པའི་དགོས་པ་ཡོད་དོ། །བཞི་པ་ལམ་དུ་ཞུགས་པ་ནི།དེ་ནས་ལམ་དུ་སོགས།འགྲོ་ཀུན་བསྒྲལ༔ ཞེས་པས་བསྟན་ཏེ།དེ་ལ་འདིར་རང་ལུས་ཧཱུྃ་དུ་སྤྲུལ་ནས་ལམ་དུ་ཞུགས་པའི་རིམ་པ་བསྟན་པ་ལ།རང་གི་ལུས་དབང་དང་རླུང་སེམས་གསུམ་ཚོགས་པ་གཅིག་པས་ཧཱུྃ་ཡིག་མཐིང་ག་མཐོ་གང་བ་ཙམ་འོད་དང་འོད་ཟེར་འཕྲོ་བ་གཅིག་ཏུ་གསལ་ཏེ།ས་ལ་ཁྲུ་གང་ཙམ་མ་རེག་པའི་བར་ནས་སྲིན་བུའི་འགྲོས་ཀྱི་ཕར་འཁྱོག་ཚུར་འཁྱོག་གི་ལམ་དུ་ཞུགས་ཤིང་།རང་གི་མཐོང་བའི་ཡུལ་རིས་གངས་ལྗོངས་དང་།མི་མཐོང་ཞིང་རྒྱུས་ཡོད་པའི་ས་སྟེང་ཀུན་ཏུ།དཔེར་ན་འགྲོན་པོ་དོན་གཉེར་ཅན་ལམ་དུ་ཞུགས་པ་བཞིན་དུ་འགྲོ་བ་དང་།ཁྱད་པར་འགྲོ་བ་རིགས་དྲུག་གི་གནས་ཡུལ་ཀུན་རིམ་བཞིན་དུ་ཉུལ་ཏེ།ཧཱུྃ་གི་འོད་ཟེར་གྱིས་རིགས་དྲུག་སོ་སོའི་ལས་དང་ཉོན་མོངས་སྡིག་སྒྲིབ་བག་ཆགས་སྡུག་བསྔལ་དང་བཅས་པར་ཐམས་ཅད་ཉི་མས་མུན་པ་བཅོམ་པ་བཞིན་དུ་ཡུལ་མེད་ཆེན་པོར་སངས་ཀྱིས་དག་ནས།འགྲོ་ཀུན་རྣམ་པར་གྲོལ་བའི་ས་ལ་འགོད་ཅིང་།གཉིས་སྣང་འཁོར་བའི་འཛིན་པ་དབྱིངས་སུ་བསྒྲལ་ཏེ།གཉིས་མེད་མཉམ་པ་ཆེན་པོའི་དབྱིངས་སུ་ངལ་གསོ་ཞིང་།ཧཱུྃ་གླུ་སྙན་པའི་དབྱིངས་ཀྱིས་བརྗོད་ནས་དམིགས་གནད་ལ་འབད་པར་བྱའོ། །དེ་ནས་ཞིང་ཁམས་སྦྱོང་བ་ནི།སླར་ཡང་དཔག་ཆེན་སོགས།རྒྱ་ཡིས་བཏབ།ཅེས་པས་བསྟན་ཏེ།སླར་ཡང་རང་ལུས་ཧཱུྃ་དུ་བཞེངས་པ་དེ་ཉིད་དཔག་ཆེན་གྱིས་མདའ་འཕང་བ་ལྟ་བུའམ་ཁྱུང་ཆེན་མཁའ་ལ་འཕུར་བ་ཇི་བཞིན་དུ་འཕར་ནས་དབུས་ཕྱོགས་སུ་སྟུག་པོ་བཀོད་པའི་ཞིང་ཁམས་གཞལ་ཡས་ཁང་དང་བཅས་པ་གསལ་གདབ་ཅིང་། །དེ་ནས་རིམ་པ་བཞིན་དུ་ཤར་ཕྱོགས་སུ་མངོན་པར་དགའ་བའི་ཞིང་ཁམས།དེ་བཞིན་དུ་ལྷོ་ཕྱོགས་སུ་དཔལ་དང་ལྡན་པའི་ཞིང་ཁམས་དང་།ནུབ་ཕྱོགས་སུ་བདེ་ཆེན་དག་པའི་ཞིང་ཁམས།བྱང་ཕྱོགས་སུ་ལས་རབ་རྫོགས་པའི་ཞིང་ཁམས་དེ་དག་རྣམས་སུ་རིམ་གྱིས་ཕྱིན་ནས་གཞལ་ཡས་ཁང་མཇལ་བའི་དུས་སུ།བདག་གིས་དུས་གསུམ་དུ་བསགས་པའི་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་བསམ་པ་དང་།དེ་ནས་དེ་བཞིན་གཤེགས་པ་རིགས་ལྔའི་རྒྱལ་བ་འཁོར་དང་བཅས་པ་རྣམས་ལ་མོས་གུས་དྲག་པོའི་སྒོ་ནས་བསྐོར་བ་བྱ་ཞིང་།རྣམ་གསུམ་དད་པ་ཆེན་པོས་ཕྱག་འཚལ་བ་དང་།སྣང་སྲིད་ཁམས་ཀྱི་བསོད་ནམས་ལོངས་སྤྱོད་ལ་སོགས་པ་དངོས་དང་ཡིད་ཀྱི་མཆོད་པ་དཔག་ཏུ་མེད་པ་རབ་འབྱམས་ཞིང་རྡུལ་གྱི་གྲངས་དང་མཉམ་པར་སྤྲུལ་ཏེ་འབུལ་བས།བདེ་གཤེགས་སངས་རྒྱས་རིགས་ལྔས་ཐུགས་བརྩེ་བས་དགོངས་ཏེ།དགྱེས་པའི་ཞལ་མཐོང་ཞིང་སྙན་པའི་གསུང་ཐོས་ནས་དབང་ཞུ་ལུང་ནོད་དེ།མ་འོངས་པ་ན་བླ་ན་མེད་པའི་བྱང་ཆུབ་བརྙེས་ནས་དོན་གཉིས་ལྷུན་གྲུབ་ཀྱི་སངས་རྒྱས་སུ་ལུང་བསྟན་ཐོབ་པར་བསམ་ལ་དམིགས་པ་འཇུར་ལ་དྲངས་ཏེ་འབད་པ་གཅེས་སོ། །དེ་དག་རྣམས་ཀྱི་སྐབས་ཀུན་ཏུ་མ་ཡེངས་པར་ཤེས་པ་ཧཱུྃ་ལ་གཏད་དེ་ངག་ནས་ཧཱུྃ་གི་གླུ་དལ་ལ་སྙན་པའི་དབྱངས་ཀྱིས་བརྗོད་པར་བྱའོ། །དེས་ཡུལ་གྱི་བག་ཆགས་སྦྱོང་ཞིང་ལུས་ངག་ལམ་སྲོལ་དུ་ཚུད་པ་དང་།ཞིང་ཁམས་འབྱུང་པའི་དགོས་པ་ཡོད་དོ། །མཐར་ནི་བསྔོ་བ་དང་སྨོན་ལམ་རྣམ་པར་དག་པས་མཐའ་བརྒྱན་ཅིང་རྒྱ་ཡིས་བཏབ་པར་བྱེད་པ་ནི་གནད་དམ་པའོ།གསུམ་པ་དེ་དག་གི་ཕན་ཡོན་ནི་ཕྱི་སྣང་བ་ལ་རྒྱས་ཐེབས་པས་ཡུལ་སྣང་བདེན་མེད་དུ་མཐོང་ནས་གང་སྣང་ཐམས་ཅད་ཡེ་ཤེས་ཀྱི་རོལ་པར་གོ་འཕོས།ནང་སྒྱུ་ལུས་ལ་རྒྱས་ཐེབས་པས་ལུས་ཀྱི་ཞེན་པ་ལྡོག་ནས་ལུས་འོད་གསལ་དུ་གྲོལ།ཕྱི་སྣང་བ་ལ་རྩལ་སྦྱོང་པས་ངག་སྣང་བདེན་མེད་སྒྱུ་མ་རྨི་ལམ་ལྟ་བུར་ཤེས་ཏེ།སྣང་སྲིད་སྣོད་བཅུད་ཐམས་ཅད་རང་སྣང་རིག་པའི་རྩལ་ལས་གཞན་ནས་འཕྲལ་དང་སླད་ཀྱི་མ་འབྱུང་བའི་དོན་མཐོང་།ནང་རང་ལུས་ལ་རྩལ་སྦྱོང་པས་གནས་སྐབས་སུ་ལམ་འདིར་བརྩོན་པས་ནད་གདོན་བར་ཆད་ཐམས་ཅད་ཞི་བ་དང་།མཐར་ཐུག་དེའི་འབྲས་བུ་སྒྱུ་ལུས་འོད་ཀྱི་སྐུར་སྨིན་ནས་ཟག་མེད་དུ་གྲོལ་བའོ། །མཉེན་བཙལ་བས་གནས་སྐབས་སུ་རྩ་དང་རླུང་གི་སྐྱོན་རྣམས་སེལ་བ་དང་།མཐར་ཐུག་རླུང་སེམས་གཉིས་ལ་རང་དབང་འབྱོར་ནས་ཟད་པར་གྱི་ཏིང་ངེ་འཛིན་འགྲུབ་པའི་དོན་བྱེད་དོ། །ལམ་དུ་ཞུགས་པས་གནས་སྐབས་སུ་འགྲོ་བའི་དོན་འགྲུབ་པ་དང་།ཞིང་ཁམས་འབྱོངས་པའི་བག་ཆགས་རྒྱུད་ལ་བཞག་ཅིང་།མཐར་ཐུག་འཁོར་འདས་རང་སྣང་དུ་རྫོགས་པའི་དོན་གཤིས་ཐོག་ཏུ་ཕེབས་ནས་དོན་གཉིས་ལྷུན་གྲུབ་ཀྱི་མཛད་པ་ལྷུར་ལེན་བྱེད་པར་འགྱུར་རོ། །མདོར་ན་དེ་དག་གི་ཐུན་མོང་དུ་ངག་གི་སྡིག་སྒྲིབ་དག་པ་དང་།ཕྱི་ནང་གི་བར་ཆད་ཞི།ཁྱད་པར་དུ་ངག་ལོངས་སྐུ་འབྱོངས་ཏེ་གསུང་རྡོ་རྗེ་རུ་སྨིན་ཅིང་གྲོལ་བའི་དགོས་པ་ཡོད་དོ། །དེ་དག་ནི་ངག་སྦྱང་གི་རིམ་པའི་རུ་ཤན་དབྱེ་བར་བསྟན་པའི་ལེའུ་སྟེ་ལྔ་པའོ། །ས་མ་ཡ༔ གུ་ཧྱ༔ ཞེས་པས་བཀའ་རྩིས་ཀྱི་ཕྱག་རྒྱས་བཏབ་པའི་དོན་ནོ། །། །གསུམ་པ་ཡིད་ཀྱི་རུ་ཤན་འབྱེད་པའི་རིམ་པ་ལའང་སེམས་ཀྱི་རྩད་བཅད་ནས་བྱུང་གནས་འགྲོ་གསུམ་གཏན་ལ་དབབ་པ།སེམས་གསལ་སྟོང་ཟུང་འཇུག་ཏུ་ཐག་ཆོད་པར་ངོ་སྤྲོད་པ་དང་།རྣལ་དབབ་དངོས་དང་། །སོར་དུ་གཞུག་པ་སྟེ་བཞི་ལས།དང་པོ་སེམས་སྦྱོང་བསྟན་པ་ལ།ཐལ་འགྱུར་ལས།སེམས་ནི་ཐོག་མར་བྱུང་ས་དང་། །བར་དུ་གནས་ས་ཐ་མ་འགྲོ། །དེ་ལྟར་གསུམ་ལ་བརྟག་དཔྱད་ན། །སེམས་སྦྱོང་སེམས་ཀྱི་གནས་ལུགས་ཤེས། །ཞེས་པས།ཐོག་མར་རང་གི་སེམས་འདི་གང་ནས་བྱུང་བརྟག་པ་ནི།ཕྱི་འབྱུང་བཞི་སྣོད་བཅུད་ཀྱི་ཁམས་དང་།ནང་བདག་ལུས་ཕུང་པོའི་མགོ་མཇུག་བར་གསུམ།བར་འདོད་ཡོན་ཡུལ་སྣང་གི་བཀོད་པ་ལ་སོགས་པ་གང་གི་ཁོང་ནས་ང་ཡིར་འཛིན་པའི་སེམས་འདི་བྱུང་ས་གཏན་ལ་ཕབ་པ་དང་།ཡང་ན་སེམས་འདི་དངོས་པོ་ཡོད་པ་ལས་བྱུང་ངམ་དངོས་པོ་མེད་པ་ལས་བྱུང་བ་ཡིན་ནམ་བརྟག་དཔྱད་ཞིབ་པར་བྱས་ཏེ་གཏན་ལ་ཕབ་པར་བྱེད་དོ། །སེམས་དངོས་ཅན་དུ་འདོད་ན་དེའི་གཟུགས་དབྱིངས་ཁ་དོག་སོགས་ཀྱང་བདེན་གྲུབ་ཏུ་ཡོད་དགོས་པ་དང་།དངོས་མེད་སྟོང་རྐྱང་དུ་འདོད་ན་སྟོང་པ་དངོས་མེད་ཞིག་མེད་པའི་ཁམས་སུ་འགྲོ་ཚུལ་མེད་པ་ཡིན་ནོ། །དེའི་ཕྱིར་ན་སེམས་ཞེས་ཡེ་ནས་གཞི་རྩ་དང་བྲལ་ཞིང་།བྱུང་ས་དང་བྱུང་མཁན་ཞེས་དངོས་ཅན་བདེན་གྲུབ་ཅན་དུ་སྤུ་རྩེ་ཙམ་ཡང་མེད་ཅིང་།སེམས་ཀྱི་རང་བཞིན་ཡེ་ནས་སྐྱེ་འགགས་གནས་གསུམ་དང་བྲལ་བ་ཞིག་ཡིན་ནོ། །དེའི་ཕྱིར་ན་སེམས་དང་སེམས་བྱུང་ལྟར་སྣང་བའི་གཟུང་འཛིན་གྱི་ཀུན་རྟོག་ཐམས་ཅད་ཀྱང་ཡུལ་མེད་དུ་སངས་ཏེ།སེམས་ཉིད་སྨྲ་བསམ་བརྗོད་པ་ལས་འདས་པ་ཡོད་མེད་ཀྱི་ཁས་ལེན་ཐམས་ཅད་དང་བྲལ་ཞིང་།གཞི་མེད་རྩལ་བྲལ་འཁོར་འདས་ཀུན་ཁྱབ་ཀྱི་བདག་ཉིད་ཆོས་སྐུ་སྐྱེ་བ་མེད་པའི་དོན་གཤིས་ཐོག་ལ་ཕེབས་པ་ནི་སེམས་ཀྱི་མཚན་ཉིད་རང་བཞིན་མ་གྲུབ་པའི་དོན་མངོན་དུ་གྱུར་པ་ཡིན་ནོ། །གཉིས་པ་སེམས་གང་དུ་གནས་བརྟག་པ་ནི།ད་ལྟའི་སེམས་འདི་ཕྱི་རི་ཤར་ནས་སྣོད་བཅུད་ཀྱི་ཡུལ་སྣང་ཐམས་ཅད་དང་།ནང་དུ་རང་གི་ལུས་ཀྱི་མགོ་མཇུག་ཕྱི་ནང་བར་གསུམ་ཐམས་ཅད་ཀུན་ལ་བརྟག་ཅིང་དཔྱད་པའི་ཚེ་ན།སེམས་གནས་པའི་ཡུལ་མི་མཐོང་།གལ་ཏེ་གནས་ས་ཡོད་སྙམ་ན་སེམས་དེའི་གཟུགས་དབྱིབས་ཁ་དོག་ལ་སོགས་པ་དངོས་ཅན་བདེན་གྲུབ་ཏུ་ཡོད་དགོས་ཀྱང་དེ་ནི་ཡོད་པ་མ་ཡིན།དེའི་ཕྱིར་ན་སེམས་ཀྱི་མཚན་ཉིད་ཡེ་ནས་བདེན་གྲུབ་ཅན་དུ་རྡུལ་ཕྲ་རབ་ཀྱི་ཆ་ཙམ་ཡང་མེད་ཅིང།སྣང་བ་སྣང་དུས་ཉིད་ནས་དཔེར་ན་རྡོ་ཚན་གྱི་སྟེང་དུ་ཁ་བ་བབས་པ་ལྟར།ཤར་བ་རང་ས་ཉིད་ནས་རྗེས་མེད་དུ་འགྲོ་བས་ན།གནས་ས་དང་གནས་མཁན་ཞེས་གཉིས་སུ་མེད་པར་ངོ་བོ་ངེས་བཟུང་དང་བྲལ་བར་གཏན་ལ་ཕེབས་པ་ནི།གསལ་སྟོང་འགགས་པ་མེད་པའི་དོན་ཁོང་དུ་ཆུད་པའོ། །གསུམ་པ་སེམས་གང་དུ་འགྲོ་བརྟག་པ་ནི།ད་ལྟར་གྱི་སེམས་བྱུང་གནས་དང་བྲལ་ཚེ།ཡུལ་དང་ཡུལ་ཅན་ཐ་དད་དུ་གྲུབ་པ་རྡུལ་ཙམ་ཡང་མེད་ཀྱང།ད་དུང་དེ་ཙམ་གྱི་བློ་ཡིད་མི་ཚིམ་པར་འགྲོ་བའི་ཡུལ་ཞིག་ཡོད་སྙམ་ན།ཕྱི་སྣང་བ་སྣོད་ཀྱི་འཇིག་རྟེན་ས་རྡོ་རི་བྲག་ལ་སོགས་པ་དང་།ནང་རང་ལུས་མགོ་སྐྲ་རྩེ་མན་ཆད་ནས་རྐང་གི་སེན་རྩེ་ཡན་ཆད་དང་།བར་གྱི་ཕྱོགས་བཞི་མཚམས་བཞི་སྟེང་འོག་སོགས་གང་གི་ཕྱོགས་སུ་འགྲོ་བརྟག་ཅིང་དཔྱད་ནས།ཡུལ་དང་ཡུལ་དུ་འགྲོ་བའི་སེམས་དེའི་གཟུགས་དབྱིབས་སོགས་ངོས་བཟུང་ནས་དེའི་ཐོག་མཐའ་བར་གསུམ་དུ་གཏན་ལ་ཕབ་པའི་ཚེ་ན།སེམས་ཞེས་འགྲོ་མཁན་དངོས་ཅན་དང་།འགྲོ་བའི་ཡུལ་ཞེས་བདེན་པར་མ་གྲུབ་པའི་དོན་མཐོང་ཞིང་།ཕྱི་ནང་སྣོད་བཅུད་དུ་སྣང་བའི་ཡུལ་ཐམས་ཅད་སེམས་ཀྱིས་བཟོས་པར་ཐག་ཆོད་དེ་གཟུང་བ་ཆོས་ཀྱི་བདག་བདག་མེད་དུ་གཏན་ལ་ཕེབས།འགྲོ་མཁན་གྱི་སེམས་མེད་པས་ཡུལ་ཅན་རང་བཞིན་མེད་པའི་གདིང་རྙེད་ནས་ང་ཡིར་གྱི་ཤེས་པའི་རྫུན་ཕུག་སྟོང་སྟེ།སེམས་ཉིད་རིག་སྟོང་འགྲོ་འོང་དང་བྲལ་བ་ཀུན་ཁྱབ་ཀྱི་ཡེ་ཤེས་ཆེན་པོར་མངོན་དུ་གྱུར་ཅིང་།རིག་པ་སྐྱེ་འགག་གནས་གསུམ་དང་བྲལ་བའི་དོན་ཁོང་དུ་ཆུད་པས་ན།ཇི་སྐད་དུ།ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཅིག།ཅེས་པའོ། །གཉིས་པ་སེམས་གསལ་སྟོང་ཟུང་འཇུག་ཏུ་ངོ་སྤྲོད་པ་ནི།དེ་ལ་འདིར་སེམས་ཡེ་སྟོང་རྩ་བྲལ་ཀ་དག་ཆེན་པོ་ངོ་སྤྲོད་པ་ལ།མན་ངག་རྣམ་པ་བཞིའི་ཁོངས་སུ་འདུས་ཏེ།མན་ངག་རྣམ་པ་བཞི་གང་ཞེ་ན།ངོ་རང་ཐོག་ཏུ་སྤྲད་པ།ཐག་གཅིག་ཐོག་ཏུ་བཅད་པ། །གདིང་གྲོལ་ཐོག་ཏུ་བཅའ་བ།ངང་མངོན་གྱུར་དུ་འཇོག་པ་སྟེ།དེ་ལ་འདིར་ཐོག་མར་ངོ་རང་ཐོག་ཏུ་སྤྲད་པ་ལ།ད་ལྟའི་ཤེས་པ་སྨྲ་བསམ་བརྗོད་པ་དང་བྲལ་བ།བློའི་ཡིད་དཔྱོད་ལས་འདས་ཤིང་གཏིང་དཔག་དཀའ་བ།འདི་དང་འདིའོ་ཞེས་མཚན་མ་ངོས་བཟུང་དང་བྲལ་བའི་སྟོང་གསལ་འདུས་མ་བྱས་པ་འདི་ནི།རང་བྱུང་གི་ཡེ་ཤེས་ཆེན་པོ་ཆོས་སྐུ་ཀ་དག་གི་དགོངས་པ་མངོན་དུ་གྱུར་བ་ཡིན་ཏེ།ཐལ་འགྱུར་ལས།དགོངས་པ་བློ་ལས་འདས་པ་དང་། །མཚན་བཅས་རང་སར་དག་པ་དང་། །སྟོང་དང་དངོས་པོའི་མཐའ་གྲོལ་བ། །བློ་ཟད་ཡིད་ལས་འདས་པའོ། །ཞེས་པས།ད་ལྟའི་རིག་པ་བློ་ཡིས་བཅས་བཅོས་གང་ཡང་མ་བསླད་པར་ཤེས་པ་བཟོ་མེད་རང་བབས་སུ་ཆམ་བརྡལ་དུ་བཞག་པ་རང་བྱུང་གི་ཡེ་ཤེས་ཉིད་དུ་ངོ་ཤེས་ཏེ།ཆོས་སྐུ་བློ་ལས་འདས་པའི་དགོངས་པ་བཞི་ཆ་གསུམ་བྲལ་གྱི་ངང་ལས་མི་གཡོ་བར་བཞག་པ་སྟེ།དྲན་བསམ་སྔ་ཕྱི་ཐམས་ཅད་རིག་པའི་གདངས་ཡེ་ཤེས་ཀྱི་རོལ་རྩལ་དུ་ཤེས་ཏེ།ཤར་ཆ་གང་ལ་ཡང་བླང་དོར་དགག་སྒྲུབ་མི་བྱེད་པར་ཐག་གཅིག་ཐོག་ཏུ་བཅད་ནས་དེའི་ངང་དུ་སྤྲོས་པ་དང་བྲལ་བར་བཞག་པས།གང་སྣང་གང་ཤར་ཐམས་ཅད་ལྦུ་བ་ཆུར་ཐིམ་པ་ལྟ་བུར་རང་ཤར་རང་གྲོལ་དུ་འགྲོ་ཞིང་རིག་རྩལ་ཡེ་ཤེས་སུ་གོ་འཕོས་ཏེ།སྣང་སྲིད་གཞིར་བཞེངས་ཆེན་པོའི་དགོངས་པ་མངོན་དུ་གྱུར་པ་དེའི་ངང་ལས་རིག་པའི་གདིང་གྲོལ་ཐོག་དེ་ག་རུ་ཐག་བཅད་དེ་སྐུ་གསུམ་མཉམ་ཉིད་དབྱིངས་སུ་གདིང་བཅའ་བ་ལས་འབྲས་བུའི་གྲོལ་ས་འཕྲལ་དང་སླད་ཀྱི་འབྱུང་བ་མ་ཡིན་ཏེ།ཇི་སྐད་དུ།རང་སེམས་གྲོལ་བ་ཞེས་བྱ་སྟེ། །གཅིག་ནས་གཅིག་དུ་སོང་བ་མེད། །གང་གིས་བཀྲོལ་བ་མེད་པའི་སེམས། །གཞི་ནས་བྱུང་གནས་འགྲོ་འོང་མེད། །བརྟགས་པས་མ་རྙེད་རྒྱུ་མཚན་མེད། །གཞི་རྩ་མེད་པས་སྟོང་གསལ་གནས། །རང་གསལ་གནས་པའི་སེམས་དེ་ནི། །གནད་ཀྱིས་གྲོལ་བས་ཕྱོགས་རིས་མེད། །དུས་ཀྱིས་གྲོལ་བས་ལྟོས་གཞི་མེད། །འབད་མེད་གྲོལ་བས་རྩོལ་སྒྲུབ་མེད། །དེ་ལ་གདིང་གི་གྲོལ་བ་བཤད། །ཅེས་སོ། །དེ་ལྟ་བུའི་མན་ངག་ཟབ་མོའི་དགོངས་དོན་རྣམས་རང་གི་སྔོན་གྱི་སྨོན་ལམ་བཟང་པོའི་ལས་འཕྲོ་དང་།ཚོགས་གཉིས་ཀྱི་འབྲས་བུའི་མཐུ་ལ་བརྟེན་ནས་བརྒྱུད་ལྡན་བླ་མ་དམ་པས་རྗེས་སུ་བཟུང་སྟེ།སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པ་ཟབ་མོའི་བྱིན་རླབས་ལ་བརྟེན་ནས་གནས་ལུགས་ཀྱི་དོན་ཕྱིན་ཅི་མ་ལོག་པར་ངང་མངོན་དུ་གྱུར་བའི་ཚེ་ན།དེ་ལ་བློ་ཡིད་དཔྱོད་ཀྱིས་བཅས་བཅོས་གང་ཡང་མི་བྱེད་པར་བློ་འདས་འོད་གསལ་ཆེན་པོའི་དབྱིངས་སུ་ལ་བཟླ་ཞིང་།རིག་སྟོང་བརྗོད་པ་དང་བྲལ་བ་ཡེ་གཞི་ཀ་དག་གི་ཀློང་དུ་གདིང་འཆོས་པས་ན་འཁོར་འདས་དག་མཉམ་ཆེན་པོར་གྲོལ་བ་སྟེ།ཇི་སྐད་དུ།ཆོས་སྐུའི་གནས་ལུགས་རྟོགས་ན་གང་ཡང་ཡིན།ཡིད་དཔྱོད་བློ་ཡིས་བཅོས་ན་ཁམས་གསུམ་གོལ། །བློ་འདས་བརྗོད་མེད་དོན་ལ་གདིང་འཆོས་ན། །འཁོར་འདས་དག་མཉམ་ཆོས་ཀྱི་དབྱིངས་སུ་གྲོལ། །ཞེས་གསུངས་པའོ། །དེ་ལྟར་སེམས་སྦྱང་གི་རིམ་པ་ཉམས་སུ་བླངས་པས་ཐུན་མོང་དུ་ཡིད་སྒྲིབ་དག་ཅིང་མངོན་ཞེན་ལྡོག་པ་དང་།ཁྱད་པར་དུ་སེམས་ཀྱི་མཚན་ཉིད་རང་བཞིན་མེད་པར་མཐོང་ནས་རིག་སྟོང་ཡེ་ཤེས་ཆེན་པོར་གྲོལ་ཏེ།མཐར་ཐུག་རྒྱལ་བ་ཀུན་དང་གཉིས་སུ་མེད་པ་ཐུགས་རྡོ་རྗེ་གདོད་མའི་གཞི་དབྱིངས་སུ་གྲོལ་བར་བྱེད་དོ། །གསུམ་པ་རྣལ་དབབ་དངོས་བཤད་པ་ལ།མི་ཡི་རྒྱུ་འགྲུལ་སོགས།ཤིག་གེར་བཞག༔ ཅེས་པས་བསྟན་ཏེ།དེ་ལ་འདིར་རྣལ་དུ་དབབ་པར་བྱ་བ་ལ།ཐལ་འགྱུར་ལས།འདི་དུས་ལུས་ངག་སེམས་ཀྱི་གནད། །རྣལ་འབྱོར་ལྡན་པས་རྣལ་དབབ་བྱ། །ཞེས་ཁྱད་པར་ཅན་གྱི་སྔོན་འགྲོའི་སྤྱོད་པ་རྣམས་ཀྱིས་ཁམས་དང་འབྱུང་བ་འཁྲུགས་པར་གྱུར་པ་ལ།རྣལ་མ་མ་བཅོས་རང་བབས་སུ་སྐྱོང་བའི་ཕྱིར་དུ་མི་ཡི་རྒྱུ་འགྲུལ་སོགས་བསམ་གཏན་ལ་ཚེར་མ་མེད་པའི་གནས་ཉམས་དགའ་ཞིང་ཡོན་ཏན་འཕེལ་བའི་ས།སྔོན་བྱོན་གྲུབ་བརྙེས་རྣལ་འབྱོར་དམ་པ་རྣམས་ཀྱིས་བྱིན་གྱིས་བརླབས་པའི་གནས་མཆོག་དབེན་པའི་དགའ་ཚལ་དུ།ལུས་ནི་བྱ་བ་བཟང་ངན་བླང་དོར་དང་བྲལ་བ་དུར་ཁྲོད་ཀྱི་མི་རོ་རྟོག་མེད་ལྟ་བུར་གཡོ་བ་དང་འགུལ་བསྐྱོད་གང་ཡང་མེད་པར་ལུས་རང་བབས་སུ་ཅི་བདེར་གནས་པར་བྱ་བ་དང་།ངག་ནི་པི་ཝང་གི་རྒྱུན་ཐག་ཆད་པ་བཞིན་དུ་བརྗོད་བྱའི་ཡུལ་ལས་འདས་ཤིང་ལྐུག་པ་ལྟ་བུ་ཇི་བཞིན་གཞན་ཕྱིར་དུ་གཏམ་སྨྲ་བ་དང་།རང་དོན་དུ་ཚིག་བརྗོད་པ་ཁ་དོན་བཟླས་བརྗོད་ལ་སོགས་པ་ཐམས་ཅད་ལ་བརྩོན་པ་སྤངས་ནས་བརྗོད་མེད་དུ་བཞག་པ་དང་།སེམས་ནི་ཡེ་ནས་སྤྲོས་པ་དང་བྲལ་བ་དཔེར་ན་སྤྲིན་མེད་ཀྱི་ནམ་མཁའ་ཇི་བཞིན་དུ།རང་བྱུང་གི་ཡེ་ཤེས་ལ་སྤང་བླང་དགག་སྒྲུབ་སོགས་ཀྱིས་བཅས་བཅོས་གང་ཡང་མེད་པར་འོད་གསལ་བརྗོད་པ་དང་བྲལ་བའི་ངང་དུ་རང་བབ་ཀྱིས་ལྷོད་དེ།གང་ཤར་གང་སྣང་ཐམས་ཅད་ལ་བཅས་བཅོས་མེད་པར་ཡེ་འབྱམས་གཉུག་མའི་ཀློང་དེར་ཤིག་གེར་བཞག་པའི་ཚེ་ན།ཡེ་སྟོང་བརྗོད་པ་དང་བྲལ་བའི་དགོངས་པ་མངོན་དུ་གྱུར་པའོ། །དེས་འབྱུང་བ་འཁྲུགས་པའི་སྐྱོན་རྣམས་རང་སར་ཞི་ནས་སྒོ་གསུམ་གྱི་འཛིན་ཞེན་ཐད་ཀར་གྲོལ་ཞིང་།རྣལ་མ་མ་བཅོས་པའི་དོན་ཁོང་དུ་ཆུད་དེ།མཐར་ཐུག་ཆོས་སྐུ་འགྱུར་བ་མེད་པའི་དགོངས་པའི་གཏན་སྲིད་ཟིན་པའི་དགོས་པ་ཡོད་དོ། །བཞི་པ་སོར་དུ་གཞུག་པ་ནི།དེ་མཐར་རྣམ་སྣང་སོགས།བསྣུན་ཏེ་བྱ༔ ཞེས་པས་བསྟན་ཏེ།འདིར་སོར་དུ་གཞུག་པར་བྱེད་པ་ལ།འདས་རྗེས་ལས།ཉན་ཐོས་བྱང་སེམས་ཁྲོ་བོ་ཡི། །ལྟ་སྟངས་ཉིད་ཀྱིས་སོར་ཡང་གཞུག།དེས་ནི་གསུམ་པོ་སོར་ཆུད་ནས།ཉམས་ལེན་ཉིད་ལ་བརྩོན་པར་འགྱུར། །ཞེས་པས།དང་པོ་ཉན་ཐོས་ཀྱི་ལྟ་སྟངས་ལ་རྣམ་པར་སྣང་མཛད་ཀྱི་ཆོས་བདུན་དང་ལྡན་པའི་སྒོ་ནས་མིག་གི་ལྟ་སྟངས་སྣ་རྩེར་ཕབ་སྟེ།སེམས་དང་སེམས་བྱུང་གི་བྱུང་ཚོར་གྱི་རྟོགས་པ་ཐམས་ཅད་རང་སར་ཡན་ཏེ་སྡོད་པའི་ཚེ་ན་སེམས་རང་བབས་སུ་གནས་པར་བྱེད་དོ། །རྣམ་པར་སྣང་མཛད་ཀྱི་ཆོས་བདུན་ནི།རྐང་པ་གཡོན་ནང་དང་གཡས་ཕྱི་ནས་བརླ་སྟེང་དུ་བཞག་སྟེ་རྡོ་རྗེའི་སྐྱིལ་ཀྲུང་བཅའ་བ་དང་།ལག་གཉིས་ཀྱི་མཐེ་བོང་གིས་སྲིན་རྩ་མནན་ནས་མཉམ་བཞག་བཅའ་བ་དང་།སྒལ་ཚིག་མདའ་ལྟར་བསྲང་བ་དང་།ཕོ་བ་རླུང་གིས་དགང་བ་དང་།དཔུང་པ་རྒོད་གཤོག་ལྟར་བརྒྱངས་པ་དང་།མགྲིན་པ་ལྕགས་ཀྱི་ལྟར་ཅུང་ཟད་ནང་དུ་བཀུག་ནས་རང་བབས་སུ་བཞག་པ་དང་།ལྕེ་ཡ་རྐན་དུ་བཅར་བ་སྟེ་ལུས་གནད་ཆོས་བདུན་དང་ལྡན་པར་བྱའོ། །སླར་ཡང་ལུས་གནད་སྔར་བཞིན་རྡོ་རྗེ་སྐྱིལ་ཀྲུང་དང་བཅས་པར་ལག་གཉིས་མཉམ་བཞག་གི་ཕྱག་རྒྱ་བྱས་ཏེ།མིག་གཉིས་ཐད་དྲང་གི་བར་སྣང་ཁམས་ཀྱི་དབྱིངས་སུ་ཧ་རེར་བལྟ་ཞིང་།སྟོང་ཉིད་སྤྲོ་བསྡུ་དང་བྲལ་བའི་ངང་དུ་མཉམ་པར་བཞག་པའི་ཚེ་ན་སེམས་བརྟན་པར་བྱེད་དོ། །དེ་ནས་ཡར་ཧར་གྱིས་ལངས་ཏེ།ཁྲོ་བོའི་སྟངས་སྟབས་རྐང་པ་གྱད་ཀྱི་འདོར་སྟབས་སུ་བགྲད་ཅིང།ལག་གཡོན་སྡིགས་མཛུབ་དཀུར་བརྟེན།གཡས་སྡིགས་མཛུབ་ཕྲག་སྟེང་ནས་སྟེང་གི་ནམ་མཁར་ཤུགས་ཀྱིས་འཕང་ནས་དེའི་ཕྱོགས་སུ་མིག་སྡང་མིག་ཏུ་བལྟ་ཞིང་།ཤེས་པ་ཡང་ནམ་མཁར་མདུང་ཚུགས་ཀྱིས་གཏད་དེ།དྲག་པོའི་གད་རྒྱང་ཧ་ཧ་ཞེས་དྲག་ལ་བཅད་ཐོན་པར་སྒྲོགས་པ་དང་།ཧཱུྃ་སྒྲ་བསྒྲག་ཅིང་གོམ་པ་དྲག་དུ་བོར་བ་དང་། །གྱ་ཚོམ་བྱ་ཞིང་མིག་ཀྱང་ནམ་མཁའ་བགྲད་ཅིང་ལྟ་སྟངས་གཟིར་བ་དང་།སླར་ཡང་སྡིག་མཛུབ་གཡས་དཀུར་བརྟེན་ཅིང་གཡོན་གྱི་སྡིག་མཛུབ་ནམ་མཁར་འཕང་བ་དང་མཉམ་དུ།མིག་གི་ལྟ་སྟངས་དང་ཤེས་པ་ནམ་མཁར་གཏད་པ་སོགས་སྔར་ལྟར་བྱ་ཞིང་།ངག་ནས་ཧི་ཧི་ཞེས་ཁྲོ་བོའི་རྒྱང་གླུ་དྲག་ལ་བཅད་ཐོན་པར་བརྗོད་པ་དང་།ཡང་རུ་ལུ་བསྒྲག་ཅིང་གོམ་པ་དྲག་ཏུ་བོར་བ་དང་།གྱ་ཚོམ་བྱེད་པ་རྣམས་རེས་མོས་སུ་བྱའོ། །དེ་ལྟར་ཁྲོ་བོའི་ལྟ་སྟངས་དང་ལུས་གྱད་སྟབས་སོགས་བྱས་པར་སེམས་བརྟན་པ་མཐར་འཕྱིན་ནས་བརྟུལ་ཞུགས་རྩལ་ཐོན་ཏེ།མཐར་ཐུག་རིག་པ་ཆོས་ཉིད་ཀྱི་གདིང་ཆེན་པོར་དབང་འབྱོར་བ་སྟེ།ཀློང་གསལ་ལས།ཉན་ཐོས་ཞི་བའི་ལྟ་སྟངས་ཀྱིས། །ལུས་ངག་ཡིད་གསུམ་རྣལ་དུ་ཕེབ། །བོདྷི་སཏྭའི་ལྟ་སྟངས་ཀྱིས། །རྣལ་ཕེབས་བདེ་བ་ཉིད་ཐོབ་འགྱུར། །ཁྲོ་བོ་ཉིད་ཀྱི་ལྟ་སྟངས་ཀྱིས། །རྣལ་ཕེབས་ཡོན་ཏན་གསུམ་ཡང་འགྲུབ། །ཅེས་གསུངས་སོ། །དེ་བཞིན་ཕྱི་ནང་གསང་བའི་སྔོན་འགྲོའི་སྤྱོད་པའི་རིམ་པ་རྣམས་ཀྱང་ལེ་ལོ་དང་གཡེང་བ་མེད་པར་ཚུལ་བཞིན་དུ་ཉམས་སུ་བླངས་ཏེ།རང་གི་སྒོ་གསུམ་གྱི་གནད་འཆུན་པར་བྱ་ཞིང་།ལུས་ཀྱི་འདུག་སྟངས།ངག་གི་ཧཱུྃ་སྒྲ།སེམས་ཀྱི་དམིགས་བསམ་སོགས་ཐམས་ཅད་ཀུན་ལ་རང་བཟོ་དང་སླ་ཐབས་སྤངས་ནས།དེ་དག་གི་ཡོན་ཏན་དང་ཕན་ཡོན་སོགས་ལ་བློ་ཐུབ་ཡིད་ཆེས་ཀྱི་དད་མོས་དྲག་པོའི་སྒོ་ནས་ཉམས་སུ་བླངས་ཏེ།རབ་ཞག་གྲངས་བརྒྱད་ཅུར་བརྩོན་ཞིང་སྒོ་གསུམ་གྱི་མངོན་ཞེན་མ་ལྡོག་གི་བར་དུ་གནད་དུ་བསྣུན་ཏེ་འབད་པར་བྱ་བ་ནི་ཁྱད་པར་གྱི་དགོས་ཆེད་དུ་གདམས་པའོ། །དེ་དག་གི་ཡོན་ཏན་ནི།དེ་མཐུས་གནས་སྐབས་སོགས།སྨིན་གྲོལ་བྱེད༔ ཅེས་པས་བསྟན་ཏེ།དེ་ལྟར་ལམ་མཆོག་ཟབ་མོ་འདི་ལྟ་བུ་ཉམས་སུ་བླང་བ་དེའི་མཐུ་ལ་བརྟེན་ནས།གནས་སྐབས་སུ་ཕྱི་ནང་གསང་བའི་བར་ཆད་ཞི་བ་དང་།ས་དང་ལམ་གྱི་གེགས་སེལ་ཞིང་དམ་པའི་ཆོས་ཀྱི་ཡོན་ཏན་མཐའ་དག་རང་གི་རྒྱུད་ལ་ཐོབ་པ་དང་།མཐར་ཐུག་སྒོ་གསུམ་གྱི་དྲི་མ་མ་དག་པའི་ཉེས་སྐྱོན་ཐམས་ཅད་དང་བྲལ་ནས་སྒོ་གསུམ་དག་པ་རྡོ་རྗེ་གསུམ་གྱི་རང་བཞིན་དུ་གནས་སུ་འགྱུར་ཏེ།ལྷུན་གྲུབ་སྐུ་དང་ཡེ་ཤེས་ཆེན་པོའི་རོལ་པར་སྨིན་པ་དང་། །དེ་ལས་ཕྱིར་མི་ལྡོག་པར་བརྟན་པ་ཐོབ་པ་ནི་གྲོལ་བ་ཡིན་ནོ།དེ་ལྟར་ཡིད་ཀྱི་རི་ཤན་དབྱེ་བ་བསྟན་པའི་ལེའུ་སྟེ་དྲུག་པའོ། །ས་མ་ཡ།གུ་ཧྱ༔ ཞེས་པ་བཀའ་རྩིས་ཀྱི་ཕྱག་རྒྱས་བཏབ་པའི་དོན་ནོ། །དེ་ཡན་ཆད་ཀྱིས་སྒོ་གསུམ་གྱི་སྔོན་འགྲོའི་རིམ་པ་བསྟན་ཟིན་ཏོ། །། །གཉིས་པ་དངོས་གཞི་ཉམས་སུ་ལེན་པའི་རིམ་པ་ལ།རྡོ་རྗེའི་ལུས་ལ་གནས་ལུགས་སྒྲོན་མ་དྲུག་གི་འཆར་གཞི་མ་འགགས་པར་རང་བྱུང་ཇི་ལྟར་ཡོད་པའི་ཚུལ་དང་།སྒོ་གསུམ་གྱི་གནད་བཤད་པ།གནད་གསུམ་གྱིས་འོད་གསལ་ལ་བལྟ་བ།གཞི་དང་ལམ་གྱི་སྒྲོན་མའི་ངང་ཚུལ་བསྟན་པ།འབྱུང་བ་སྙིགས་མ་དྭངས་མར་སྦྱོང་བའི་ཐབས།ཚུལ་བཞིན་མ་རྟོགས་ན་གཟུང་འཛིན་གྱི་ལམ་དུ་གོལ་ཚུལ།ངང་ཚུལ་ཇི་བཞིན་དུ་རྟོགས་ན་ལམ་དང་འབྲས་བུ་གཞན་ལས་འཕགས་ཚུལ།ལམ་རྟགས་སྣང་བ་བཞིའི་ས་མཚམས།མཐའ་རྟེན་གྱིས་འཇུག་བསྡུ་བ་སྟེ་དངོས་དོན་གྱི་ས་བཅད་རྣམ་པ་དགུ་ལས།དང་པོ་རྡོ་རྗེའི་ལུས་ལ་གནས་ལུགས་སྒྲོན་མ་དྲུག་གི་འཆར་གཞི་མ་འགག་པར་རང་བྱུང་ཇི་ལྟར་ཡོད་པའི་ཚུལ་ནི།དེའང་རྡོ་རྗེའི་ལུས་འདི་གྲུབ་པའི་ཐོག་མར་མའི་མངལ་གནས་སུ་ལྟེ་བ་སྤྲུལ་པའི་འཁོར་ལོའི་རྩ་འཁོར་རྣམས་ཆགས་ཏེ།དེའི་ལྟེ་བར་སྙིགས་མ་འབྱུང་བའི་སྤྱན་དང་།དྭངས་མ་ཡེ་ཤེས་ཀྱི་སྤྱན་གཉིས་ཐིག་ལེ་ཉ་མིག་ཙམ་པ་ཟུང་འཇུག་ཏུ་ཆགས།དེའི་བྱེད་ལས་ཀྱིས་རིམ་བཞིན་སྙིང་ག་མགྲིན་པ་སྤྱི་བོ་གསང་གནས་ཀྱི་རྩ་འཁོར་རྣམས་རིམ་བཞིན་དུ་ཆགས་པ་ཡིན།དབུ་རྐྱང་རོ་གསུམ་ལྟེ་བ་ནས་འཁོར་ལོ་ལྔ་པོའི་དབུས་སུ་ཡས་མར་སྲོག་ཤིང་གི་ཚུལ་དུ་ཆགས།འབྱུང་བའི་སྤྱན་གྱིས་མ་དག་པའི་རྩ་རླུང་ཐིག་ལེའི་ཁམས་རྣམས་བསྐྱེད་པ་དང་དབང་པོའི་དྭངས་མ་མིག་གི་ཨ་འབྲས་ཀྱི་དཀྱིལ་ནས་དབང་རྟེན་དྭངས་གསལ་གཟུགས་མཐོང་བྱེད་དུ་སྐྱེ་བ་སྟེ།དེས་མ་དག་འཁྲུལ་སྣང་གི་དངོས་པོ་ཐམས་ཅད་མཐོང་བར་བྱེད་དོ། །སྒྲོན་མའི་སྤྱན་ལས་དག་པ་རྩ་རླུང་ཐིག་ལེའི་ཁམས་རྣམས་བསྐྱེད་པ་དང་།འོད་རྩ་ཤིན་ཏུ་དྭངས་པ་འཁྲུལ་པའི་སྣང་བ་མི་འཛིན་ཅིང་དག་པ་ཡེ་ཤེས་ཀྱི་སྣང་བ་འཛིན་ཏེ་འོད་གསལ་ཆོད་ཉིད་ཀྱི་སྣང་བ་མངོན་སུམ་དུ་མཐོང་བར་བྱེད་པའི་ལམ་ཡིན་ནོ། །གཉིས་པ་སྒོ་གསུམ་གྱི་གནད་བཤད་པ་ནི།འདུག་སྟངས་རྣམ་པ་སོགས།བལྟ་བ་ཡིན༔ ཞེ་པས་བསྟན་ཏེ།དེ་ལའང་དང་པོ་ལམ་མཆོག་འདི་ཉིད་ཉམས་སུ་ལེན་པར་བྱེད་པ་ལ།རྟེན་ལུས་ཀྱི་གནད་མ་གཅུན་ན།རྩ་གནད་དུ་མི་ཆུན་པ་དང་།དེ་མ་ཆུན་ན་རླུང་རིག་གཉིས་གནད་མི་ཆུན་ཞིང་།དེས་འོད་གསལ་མངོན་དུ་མི་གསལ་བའི་སྐྱོན་དེས་བཅིངས་པས་ན།མི་འགུལ་བ་གསུམ་ལ་གཞི་བཅའ་དགོས་ཏེ།དང་པོ་ལུས་འདུག་སྟངས་ལས་མི་འགུལ་བར་བྱ་བའི་གནད་དོན་ནི།དབྱིངས་དང་ཐིག་ལེ་རླུང་གི་ཆ་དང་བཅས་པ་ཐམས་ཅད་ལུས་ཀྱི་རྩ་ཁམས་རྣམས་སུ་ཁྱབ་ནས་ཡོད་པ་ལ།ལུས་གནད་མ་གཅུན་ན་དེ་དག་མངོན་དུ་མི་འགྱུར་བ།དཔེར་ན་སྦྲུལ་ལ་རྐང་ལག་ཡོད་ཀྱང་རྐྱེན་དང་མ་འཕྲད་ཚེ་མི་མངོན་པ་ལྟར།ལུས་བཞུགས་སྟངས་རྣམ་པ་གསུམ་དང་མི་འབྲལ་བར་བྱ་བ་ནི་སྒོ་གསུམ་གྱི་གནད་མཆིས་པའི།ཆོས་ཉིད་ཡིད་དཔྱོད་ལས་འདས་པའི་འོད་གསལ་མངོན་དུ་བྱེད་པ་དང་། །ཤེས་རབ་ཀྱི་མིག་ལ་ཡེ་ཤེས་ཀྱི་སྤྱན་ཐོབ་ནས་ཡེ་གདངས་ལྷུན་གྲུབ་རིན་པོ་ཆེའི་དབྱིངས་ཉིད་ལྐོག་གྱུར་མུན་བསྒོམ་ལྟ་བུའི་བློ་ཡིད་ཀྱིས་བཅས་བཅོས་མ་ཡིན་པར་མངོན་སུམ་དབང་པོའི་ཡུལ་དུ་གྱུར་པའོ། །དེའི་ཕྱིར་ན་དང་པོ་ལུས་བཞུགས་སྟངས་གསུམ་ལ་གཞི་བཅའ་དགོས་ཏེ།དེ་ལ་བཞུགས་སྟངས་དང་པོ་དྲང་སྲོང་ཙོག་པུ་བྱེད་པ་ལ།རྐང་མཐིལ་གཉིས་མཉམ་དུ་སར་ཕབ་པས་མ་དག་པའི་རླུང་གི་རྩལ་གནོན་པ་དང་།པུས་བྲང་ཁ་སྦྱར་བས་ལས་རླུང་རང་མལ་དུ་གསོད་པར་བྱེད།རྐང་པའི་ལོང་བུ་གཉིས་གཤིབས་པས་ཐབས་ཤེས་འབྲེལ་བའི་གནད་དང་།ལག་པའི་སོར་མོ་རྣམས་དྲཱ་མིག་ལྟར་བསྣོལ་ནས་པུས་མོ་ཆུའི་འཁོར་ལོ་དང་ལག་མཐིལ་མེའི་དཀྱིལ་འཁོར་གཉིས་ཁ་སྦྱར་དུ་འཁྱུད་པས་ཚ་གྲང་ཆ་སྙོམས་ཤིང་དབྱིངས་དང་རིག་པ་འདྲེས་པའི་གནད་དང་།འཇིང་པ་ཐད་དྲང་དུ་བསྲང་བས་སྒྲོན་མ་བཞིའི་གནད་འཆུན་པའི་དགོས་པ་ཡོད་དོ། །ཡང་ན་རྐང་པ་གཉིས་སྔར་བཞིན་བྱས་ཏེ།ལག་པའི་དཔུང་པ་གཉིས་བསྣོལ་ནས་མཆན་ཁུང་གཡས་གཡོན་དུ་འཆང་བའི་མཐིལ་གཉིས་ཀ་དང་སྤྲད་པ་མེ་གཉིས་འཕྲད་པས་གྲང་བའི་ནད་རིགས་སེལ་བར་བྱེད་དོ། །ཡང་ཅིག་ལྐོག་མ་མེའི་འཁོར་ལོ་དང་ལག་རྒྱབ་ཆུའི་འཁོར་ལོ་གཉིས་ཁ་སྦྱར་བས་ཚ་བའི་ནད་སེལ་ཏེ།ལུས་ཀྱི་འབྱུང་བ་ཆ་སྙོམས་པའི་ཕྱིར་པུས་མོ་གཉིས་ཀྱི་སྟེང་དུ་ལག་པའི་གྲུ་མོ་གཉིས་བཙུགས་ནས་སྡོད་པ་ནི་ལུས་ཀྱི་རྩ་མི་མཆུས་པའི་གནད་ཡོད་དོ། །དེ་ལྟར་གྱི་བཞུགས་སྟངས་ལ་བསླབ་པར་བྱེད་པ་ནི་སྤྲུལ་སྐུའི་ལམ་ཁྱེར་གྱི་ལུས་གནད་དང་།དེ་ལ་སྦྱངས་པའི་ཡོན་ཏན་ཐོབ་པར་བྱ་བའི་གནད་རྣམས་བསྟན་པ་ཡིན་ནོ།གཉིས་པ་གླང་ཆེན་འདྲིལ་སྟངས་བྱ་བ་ལོངས་སྐུའི་བཞུགས་སྟངས་ལ།རྐང་མཐིལ་གཉིས་ཀྱི་སོར་མོ་རྣམས་ཕྱིར་ཕུད་པས་གཡོ་བ་ལས་ཀྱི་རླུང་འཛིན་པའི་གནད་དང་།ཁ་སྦུབས་སུ་ཉལ་བས་ཚོགས་པའི་ཆོས་བཅར་ལ་གནོན་པའི་གནད་དང་།པུས་བྲང་གཉིས་ཆ་མཉམ་དུ་སྦྱར་བས་འབྱུང་བའི་དྲོད་འབེབས་པའི་གནད་དང་།ལག་པའི་གྲུ་མོ་གཉིས་ཀ་སར་བཙུགས་པས་དབྱིངས་ཐོག་ཏུ་རིག་པ་འདྲེན་པའི་གནད་དང་།ལག་པའི་མཐིལ་གཉིས་ཀྱིས་འགྲམ་པ་གྱེན་ལ་བཏེགས་པས་དབྱིངས་དང་རིག་པ་གཉིས་མི་འབྲལ་བའི་གནད་ཡོད་དོ། །འདི་ནི་ལོངས་སྤྱོད་རྫོགས་སྐུའི་བཞུགས་སྟངས་ལམ་ཁྱེར་དུ་བྱ་བའི་གནད་དང་།དེའི་ཡོན་ཏན་ཐོབ་པའི་ཚུལ་བཤད་པའོ། །ཡང་ཅིག་གསུམ་པ་ཆོས་སྐུ་སེང་གེའི་འདུག་སྟངས་ནི།རྐང་པ་གཉིས་མདུན་དུ་ས་ལ་ཕབ་ནས་མཐིལ་གཉིས་ཁ་སྤྲད་པས་ན་འབྱུང་བ་སྙོམས་པའི་དྲོད་ཀྱི་གནད་དང་། །ལག་གཉིས་དེའི་དབུས་སུ་སོར་མོ་རྣམས་སྒོངས་ཏེ་རྡོ་རྗེ་ཁུ་ཚུར་བྱས་ནས་མདུན་སར་བཙུགས་ཏེ་འདུག་པས་འཕྲོ་བ་ལས་ཀྱི་རླུང་ལྡོག་པའི་གནད་དང་།རོ་སྟོད་གསང་ལ་བོར་ནས་རྒལ་རྒྱུད་དྲངས་པོར་བསྲངས་ཏེ་སྡོད་པར་ཉམས་སྣང་མྱུར་དུ་འཆར་བའི་གནད་དང་།མགོ་རྩལ་འཇིང་པ་ལ་བོར་བས་དབྱིངས་རིག་འདུ་འབྲལ་མེད་པའི་གནད་དོ། །འདི་ནི་ཆོས་སྐུའི་བཞུགས་སྟངས་ཀྱི་ལམ་ཁྱེར་བྱ་བའི་གནད་དང་།དེས་ཆོས་ཉིད་འོད་གསལ་བའི་ཡེ་གདངས་མངོན་སུམ་དུ་སྣང་བའི་ཐབས་ཁྱད་པར་ཅན་ཡིན་པས་གནད་མཆོག་ཏུ་ཤེས་པར་བྱའོ། །དེ་ལྟར་གྱི་བཞུགས་སྟངས་རྣམ་གསུམ་གང་ལའང་ལུས་ཀྱི་ཆ་སོ་སོར་སྙོམས་ཤིང་ལྷོད་ཆགས་པ་དབྱིངས་དང་ཐིག་ལེའི་གནད་བརྟན་པས་ན་གང་བདེར་བྱེད་པ་ལས།བཞུགས་སྟངས་གསུམ་ཀ་དུས་གཅིག་ལ་འགྲོ་དགོས་པའི་མཐའ་མ་ངེས་སོ། །ཡང་མིག་མི་འགུལ་བ་ལྟ་སྟངས་དང་མི་འབྲེལ་བར་བྱེད་པ་དེ་ལ།འདུག་སྟངས་དང་པོ་དྲང་སྲོང་ཙོག་པུ་བྱས་ཏེ།གཟིགས་སྟངས་ཀྱང་མིག་ཅུང་ཟད་སྣ་རྩེར་ཕབ་པས།སྤྲུལ་སྐུ་ལ་ཤེས་རབ་ཀྱི་སྤྱན་མངའ་བས་ཡེ་ཤེས་ཀྱི་མཐོང་ཕྱེ་བའོ། །གཉིས་པ་ལོངས་སྐུ་ལ་ཡེ་ཤེས་ཀྱི་སྤྱན་ཡོད་པས།གཟིགས་སྟངས་ཀྱང་གཡས་སམ་གཡོན་ཕྱོགས་ཡང་ན་འཕྲེད་ཟུར་ལ་བལྟ་བ་དང་།ཡེ་ཤེས་རང་བབས་སུ་གསལ་བའི་ཕྱིར་དུ་རང་གི་མདུན་ཐད་ཀྱི་ནམ་མཁའི་མཐོངས་ལ་དྲང་པོར་བལྟ་བ་སོགས་རེས་མོས་སུ་བྱས་ཏེ།དབྱིངས་སྣང་ཇི་ལྟར་གསལ་བ་དེ་རུ་བཞག་པར་བྱེད་དོ། །གསུམ་པ་ཆོས་སྐུ་ལ་ཆོས་ཉིད་ཀྱི་སྤྱན་ཡོད་པས་ན།གཟིགས་སྟངས་ཡང་མིག་འབྲས་གྱེན་དུ་བཟློག་སྟེ།གཙུག་ཏོར་གྱི་ནམ་མཁར་བལྟས་ཚེ་ཡེ་ཤེས་ཀྱི་སྣང་བའི་མཐོང་ཕྱེ་བ་ཡིན་ནོ། །དེ་ལྟར་གྱི་བཞུགས་སྟངས་དང་གཟིགས་སྟངས་རྣམ་གསུམ་གྱི་ཡོན་ཏན་ཐོབ་ཚུལ་གྱི་ཁྱད་པར་ནི།ཐལ་འགྱུར་ལས།ཆོས་སྐུའི་བཞུགས་སྟངས་སེངྒེ་ཡིས།འཁྲུལ་པའི་འཇིགས་པ་ཀུན་བྲལ་ནས། །རྡོ་རྗེ་མིག་གིས་མཐོང་བར་འགྱུར།ལོངས་སྤྱོད་རྫོགས་སྐུའི་བཞུགས་སྟངས་ནི། །གླང་ཆེན་ཉལ་བ་ལ་བརྟེན་ནས། །ཆོས་ཉིད་དོན་ལ་ལོངས་སྤྱོད་དེ། །པདྨའི་སྤྱན་གྱིས་མཐོང་བར་འགྱུར། །སྤྲུལ་པ་སྐུ་ཡི་བཞུགས་སྟངས་ནི། །དྲང་སྲོང་ཙོག་པུ་ལ་བརྟེན་ནས། །ཆོས་སྐུའི་སྣང་བ་རང་སྤྲུལ་ནས། །ཆོས་ཀྱི་མིག་གིས་མཐོང་བར་འགྱུར། །ཞེས་སོ། །གཉིས་པ་ངག་གི་གནད་ནི་རྩ་རྒྱུད་ལས།ངག་མི་བསླབ་དང་གནས་པ་དང་།ལ་ཟླ་བ་ཉིད་བརྟེན་པར་བྱ། །ཞེས་གསུངས་པས་ན།ངག་སྨྲ་བ་མ་བཅད་ན་དེ་ལ་བརྟེན་ནས་འགྱུ་འཕྲོའི་རྟོག་ཚོགས་ཀྱི་འཁྲུལ་པ་འཕེལ་བ་དང་།དེའི་རྐྱེན་གྱིས་ཆགས་སྡང་རེ་དོགས་ཀྱི་བརྗོད་ཚིག་སྣ་ཚོགས་འབྱུང་ཞིང་ཡིད་སློང་བྱེད་ཀྱི་སྒྲིབ་པར་འགྱུར་བས་ན།ངག་གནད་སྨྲ་བཅད་བྱེད་པ་ཤིན་ཏུ་གལ་ཆེ་སྟེ།ཀློང་གསལ་ལས།དེ་ལྟར་ངག་གནད་སུས་གཟིར་བ། །ངག་གི་རྐྱེན་ཟད་མྱ་ངན་འདས།ཞེས་སོ། །གསུམ་པ་སེམས་ཀྱི་གནད་ནི་ཀློང་གསལ་ལས།སེམས་ནི་ཕྱི་ཡི་མཁའ་ལ་གཏད། །ནང་གི་སྒྲོན་མ་མངོན་དུ་སྣང་། །ཞེས་གསུངས་པས། །དེ་ཡང་གཞི་སྐྱེ་འགག་གནས་གསུམ་དང་བྲལ་བ་ཆོས་ཉིད་ནམ་མཁའི་རང་བཞིན་དུ་ངོ་ཤེས་པ་དང་།ལམ་འོད་གསལ་རིག་སྟོང་བསམ་བརྗོད་ལས་འདས་པ་མཉམ་རྫོགས་ཀློང་ཡངས་ཆེན་པོའི་ངང་མངོན་དུ་གྱུར་ཅིང་།འབྲས་བུ་བླ་ན་མེད་པ་རང་ཐོག་ཏུ་རང་སངས་པ་དཔེར་ན་དབྱིངས་དབྱིངས་ལ་ཐིམ་པ་ལྟར།རིག་པ་སྨྲ་བསམ་བརྗོད་པ་དང་བྲལ་བའི་ཆོས་ཉིད་དེ་བཞིན་ཉིད་དུ་མ་བཅོས་རང་སར་ཡན་པས་ན་ཀློང་གསལ་ལས།དེ་ལྟར་སེམས་ཀྱི་གནད་གཟིར་བས། །སྐུ་གསུམ་རིག་པ་སྟོང་པར་འཆར།ཞེས་སོ། །དོན་གསུམ་པ་གནད་གསུམ་གྱི་འོད་གསལ་ལ་བལྟ་བ་ནི།སྒོ་གནད་མིག་ནི་སོགས།དལ་བར་བསླབ༔ ཅེས་པས་བསྟན་ཏེ།དེ་ལ་འདིར་ཐོད་རྒལ་གྱི་གནད་སྒོ་ཡུལ་རླུང་རིག་ལ་ཐུག་སྟེ།ཐལ་འགྱུར་ལས།དེ་ཡང་སྒོ་དང་ཡུལ་ཉིད་དང་། །རླུང་དང་རིག་པའི་གནད་ཉིད་བསྟུན། །ཞེས་པས། །དང་པོ་འཆར་བྱེད་སྒོ་ཡི་གནད་ནི་དབང་པོའི་དྭངས་མ་མིག་ཡིན་ཏེ།དེ་ཉིད་ལྡོག་ཕབ་ཐད་དྲང་དུ་ཕྱེད་བཙུམ་ཟིམ་བུར་བལྟ་བ་དང་།ཡུལ་གྱི་གནད་ཆོས་སྐུའི་རྟེན་ཉི་མའི་འོག་ཁྲུ་གང་མ་རེག་ཙམ་དུ་སྨིན་ཕྲག་གི་ནམ་མཁར་བལྟ་བ་དང་།ལོངས་སྐུའི་རྟེན་ཟླ་བའི་དཀྱིལ་ལམ་ངོས་ལ་ཐད་དྲང་དུ་བལྟ་བ་དང་།སྤྲུལ་སྐུའི་རྟེན་ཨ་ལོ་ཀེ་དང་མན་ཤེལ་གཉིས་ལ་ཡིད་ཙམ་སྟེང་དུ་དཔེར་ན་དྲང་སྲོང་མདའ་སྲོང་ལྟ་བུས་བལྟ་བ་་ཡིན་ནོ། །གཉིས་པ་རླུང་གི་གནད་འོག་མའི་ཐེག་པ་ལྟར་ཕྱེད་བཅིང་གི་ལམ་ལ་མི་ལྟོས་པར།མཆུ་སོ་གཉིས་ཅུང་ཟད་མ་རེག་པར་བྱས་པའི་བར་ནས་དབུགས་ཀྱི་འབྱུང་འཇུག་དལ་བར་བསླབ་པར་བྱ་བ་སྟེ།རླུང་སེམས་ཡན་པའི་གནད་ཀྱིས་གྲོལ་བ་འབྱུང་སྟེ།ཅི་ཕྱིར་ཞེ་ན་མ་དག་ལས་ཉོན་བག་ཆགས་ཀྱི་རྒྱུའི་རླུང་སེམས་རགས་པ་མངོན་གྱུར་གྱི་སྒོ་ཁ་དང་།ཕྲ་བ་ལྐོག་གྱུར་གྱི་སྒོ་སྣ་བུག་གཉིས་ཡིན་ཏེ།དེའི་རྒྱུ་ཚུལ་གློ་བ་ནས་རྩ་གྲོ་སོག་གི་སྦུ་གུ་ཙམ་ནས་ལས་རླུང་གི་རྒྱུ་བས་གང་བར་གནས་པ་དེའི་འཕེལ་ཁ་ཆེར་མཆེད་པའི་རྐྱེན་གྱིས་དུག་ལྔའི་རྟོག་པ་རགས་པ་དང་ཚ་བའི་ནད་སློང་།རླུང་མར་འགྲིབ་པའི་ཚེ་གྱ་གྱུའི་རྟོགས་ཚོགས་ལུང་མ་བསྟན་དུ་མ་འབྱུང་བ་དང་།གྲང་བའི་ནད་ལྡང་བ་སོགས་རླུང་གི་འགྱུ་ཆ་ལ་བརྟེན་ནས་ཀུན་རྟོག་ཆེ་འབྲིང་ཆུང་གསུམ་མ་ངེས་གྲངས་ལས་འདས་པ་འབྱུང་ངོ་། །དེས་ནི་རྒྱུ་སེམས་ཀྱི་རང་བཞིན་ཆོས་ཉིད་ཀྱི་གདངས་སྐྱེས་བུ་འཕྱེ་བོ་ལྟ་བུ་དང་།རྐྱེན་ལས་རླུང་རྟ་རྒོད་ལོང་བ་ལྟ་བུ་གཉིས་དུས་འཛོམ་པའི་ཚེ་ན།རྟེན་འབྲེལ་གདངས་རྩལ་སྒོ་ལྔའི་ཡུལ་འཛིན་ཅིང་འཁྲུལ་པ་སྣ་ཚོགས་ཀྱི་ལས་བྱེད་དེ།དུར་ཁྲོད་ཕུང་པོ་རོལ་པ་ལས།སེམས་ཀྱི་ངོ་བོ་ཡེ་ཤེས་ཏེ།དེ་ལ་གཟུང་འཛིན་རྩལ་དུ་ཤར།དབུགས་ལ་རྟ་བྱས་རྐྱེན་དང་འཕྲད། །ཅེས་གསུངས་སོ། །སེམས་ཀྱི་རྣམ་པར་རྟོག་པའི་བཞོན་པ་ལྟ་བུར་ཞག་གཅིག་ལ་དབང་པོ་དར་ལ་བབ་པའི་རླུང་ཉི་ཁྲི་ཆིག་སྟོང་རྒྱུ་བའི་ཕྱིར་ན།རྩ་རླུང་འཛིན་རྩོལ་ཅན་གྱི་ལམ་ནས་རླུང་སེམས་བཙན་ཐབས་སུ་འཆིང་བར་བྱེད་པའི་ཐབས་ཟབ་མོ་དུ་མ་ཡོད་ཀྱང་།དེ་ཉིད་གེགས་དང་གོལ་ས་ཤིན་ཏུ་མང་བ་ཡིན་མོད།དེས་ན་ལམ་འདིའི་སྐབས་སུ་རླུང་གནད་ཁ་སྣ་གཉིས་ནས་ཆ་མཉམ་དུ་མཆུ་སོ་བག་ཙམ་ཕྱེ་བའི་བར་ནས་དབུགས་ཀྱི་འབྱུང་འཇུག་བྱས་ཏེ།བཟང་རྟོག་གི་རིགས་བླ་མ་ལ་དད་པ་ཆོས་ལ་མོས་གུས་འཁོར་བར་ངེས་འབྱུང་སེམས་ཅན་ལ་སྙིང་རྗེ་སྐྱེ་བ་སོགས་འབྱུང་ཚེ་རླུང་ནང་དུ་ཅུང་ཟད་བཟུང་སྟེ་ཕྱིར་དལ་བུས་འབུད་པ་དང་།ངན་རྟོག་གི་་རིགས་ཉོན་མོངས་ཆགས་སྡང་གིས་རྒྱུད་བསླངས་ནས་བླ་མ་དང་ཆོས་གྲོགས་ལ་ལོག་ལྟ་སྐྱེ་བ་དང་།ཆོས་ལ་དད་མོས་མེད་ཅིང་བསྒོམ་སྙིང་མི་འདོད་པ་སོགས་འབྱུང་བའི་ཚེ་ན་རླུང་ཕྱིར་འབུད་ཅིང་ནང་དུ་ཆེར་མི་འཛིན་པ་དང་། །ཁྱད་པར་བླ་མ་ལ་གསོལ་བ་འདེབས་ཤིང་དབང་བཞི་ལེན་པ་དང་།འཁོར་བ་སྡུག་བསྔལ་གྱི་རང་བཞིན་དུ་ཤེས་བཞིན་པའི་ངང་ནས་རང་རྒྱུད་ཆོས་ལ་བསྐུལ་བར་བྱེད་པའི་གནད་ལ་བསླབ་པར་བྱའོ། །གསུམ་པ་རིག་པའི་གནད་ནི།ཤེས་པ་མངོན་གྱུར་སོགས།གནད་དུ་ཤེས༔ ཅེས་པས་བསྟན་ཏེ།དབྱིངས་ཐོག་ལས་རིག་པ་གཡོ་མེད་དུ་བཞག་ཅིང་།དཔེར་ན་སྤྲིན་དང་བྲལ་བའི་ནམ་མཁའ་ལྟར།ཤེས་པ་མངོན་གྱུར་གྱི་ངང་མདངས་སྨྲར་བསམ་བརྗོད་པ་དང་བྲལ་བ་རིག་པའི་གཤིས་མ་བཅོས་རང་གསལ་ཆེན་པོའི་ངང་ལས་གཡོ་འགུལ་འཕོ་འགྱུར་མེད་པར་རིག་སྟོང་བསམ་ངོ་དང་བྲལ་བའི་དབྱིངས་སུ་ལྷན་ནེར་སྡོད་པ་ནི་མི་རྟོག་ཡེ་ཤེས་ཆེན་པོའི་དགོངས་པ་མངོན་དུ་འགྱུར་བར་བྱེད་པའོ།འདི་ལྟ་བའི་ཐབས་ཁྱད་པར་ཅན་གྱི་མན་ངག་དེ་དག་ལ་བརྟེན་ནས་མ་དག་པའི་རླུང་ལ་དག་པ་ཡེ་རླུང་གིས་རྒྱས་ཐེབས་ཏེ།དབྱིངས་ཐིག་འོད་གསལ་གྱི་སྣང་བ་གོང་དུ་འཕེལ་ཞིང་རིག་གདངས་དབྱིངས་ཀྱི་གོ་རར་དལ་བའི་གནད་གྱིས་བརྟན་པ་ཐོབ་པའི་ཐབས་ཁྱད་པར་ཅན་དུ་བསྟན་པས་ན་འདི་ཉིད་མཆོག་ཏུ་ཤེས་པར་བྱའོ།དེས་ན་ཉམས་ལེན་གནད་ཀྱི་མན་ངག་མདོར་བསྟན་པ་ནི།བྱ་བྱེད་ལས་ཀྱི་སྒོ་ལུས་ཡིན་པས་ན།དེ་ཉིད་བཞུགས་སྟངས་ལས་མི་འགུལ་བར་དཔེར་ན་དུད་ཁྲོད་ཀྱི་མི་རོ་བཞིན་དུ་རྟོག་མེད་དུ་སྡོད་པ་དང་།བརྗོད་པ་རླུང་གི་སྒོ་ངག་ཡིན་ཕྱིར་དེ་ཉིད་མི་འགུལ་བའི་གནད་བརྗོད་ཚིག་ཐམས་ཅད་ཆམ་གྱིས་བཞག་སྟེ་ལྐུག་པ་ལྟ་བུར་སྨྲ་བཅད་དུ་སྡོད་པ་དང་།རྟོག་དཔྱོད་ནམ་མཁའི་སྒོ་སེམས་ཡིན་ཕྱིར་རང་གི་ཤེས་པ་བཟོ་མི་འཆོས་པར་འོད་གསལ་མངོན་དུ་བྱ།དེས་སྣང་བཞི་ཚད་ལ་ཕེབས་ནས་རླུང་སེམས་རྒྱབ་གྱེས་ཏེ་འཁྲུལ་པའི་རྒྱུན་ཆད།རིག་པ་གཡོ་མེད་དུ་གནས་པས་ཆོས་ཉིད་ཡིད་དཔྱོད་ལས་འདས་པ་ཀ་དག་སྤྲོས་པ་དང་བྲལ་བའི་དབྱིངས་མངོན་དུ་གྱུར་ཏེ།དེའི་ངང་དུ་མ་བཅོས་རང་བབས་སུ་བཞག་ནས་སྒོ་གསུམ་གྱི་བྱ་བ་ཆེ་འབྲིང་ཆུང་གསུམ་ཐམས་ཅད་དགུ་སྤྲུགས་སུ་བཏང་ནས།ལས་ཟིན་པའི་སྐྱེས་བུ་ལྟར་བྱར་མེད་དུ་སྡོད་པ་ནི་གནད་ཁྱད་པར་ཅན་དུ་ཤེས་པར་བྱའོ། །དེ་ལྟར་སྒོ་གསུམ་གྱི་གནད་བཤད་པ་བསྟན་པའི་ལེའུ་སྟེ་བདུན་པའོ། །ས་མ་ཡ༔ ཞེས་པ་དམ་ཚིག་གིས་རྒྱས་བཏབ་པའི་དོན་དང་།གུ་ཧྱ༔ ཞེས་པ་རེ་ཞིག་དབྱིངས་སུ་གབ་པའི་དོན་ནོ། །། །བཞི་པ་གཞི་དང་ལམ་གྱི་སྒྲོན་མའི་ངང་ཚུལ་བསྟན་པ་ནི།གནས་ལུགས་གཞི་ཡི་སོགས།རྣམ་གསུམ་སྟེ༔ ཞེས་པས་བསྟན་ཏེ།དེ་ལ་འདིར་སྣོད་དང་བཅུད་ཀྱི་སྒྲོན་མའི་གནས་ཚུལ་ཅུང་ཟད་བརྗོད་ན།ཡེ་ནས་རིག་པ་བདེ་གཤེགས་སྙིང་པོ་ལྷུན་གྲུབ་རིན་པོ་ཆེའི་ངོ་བོ་རོལ་རྩལ་དུ་གནས་ལུགས་གཞི་ཡི་སྒྲོན་མ་རྣམས་པ་དྲུག་དེ་རང་བྱུང་རང་ཆས་སུ་གནས་ཏེ།དེ་གང་ཞེ་ན་དང་པོ་ལུས་ཀྱི་དྭངས་མ་ཙིཏྟ་ཤ་ཡི་སྒྲོན་མ་ཞེས་པ་རིན་པོ་ཆེའི་མཆོང་གུར་སྨུག་པོ་ལྟ་བུ།མ་དག་པ་སེམས་དང་སེམས་བྱུང་དང་།དག་པ་སྐུ་དང་ཡེ་ཤེས་རྣམས་ཀྱི་རྟེན་བྱེད་པ་ཡིན་ནོ། །དེའི་དབུས་སུ་ཡེ་ཤེས་འོད་ཀྱི་རྩ་བཞི་ནི་ཤར་དུ་ཀ་ཏི་གསེར་གྱི་རྩ་ཆེན་དང་།ལྷོར་ཀ་ཏི་ཤེལ་གྱི་སྦུ་གུ་ཅན་དང་།ནུབ་ཏུ་ཨ་ཝ་དྷུ་ཏི་རྒྱལ་མཆོག་གསེར་གྱི་ཉི་མ་དང་།བྱང་དུ་སྟོང་པ་རང་གསལ་རྣམས་འོད་ལྔ་དྭངས་པ་ཁྲག་དང་ཆུ་སེར་གྱི་རྐྱེན་དང་བྲལ་བ་སྟེ།དེ་དག་ལུས་སེམས་ཀྱི་ཚོགས་པ་ཇི་སྲིད་གནས་ཀྱི་བར་དུ་རྩའི་རྣམ་པར་གནས་པ་དང་ལུས་སེམས་ཚོགས་པ་བྲལ་ཚེ་རྩ་རྣམས་ཀྱང་འོད་ཀྱི་རང་བཞིན་དུ་དེངས་པ་ཡིན་ནོ། །དེ་ལྟར་གྱི་རྩ་བཞིའི་འདུས་མདོར་ཀུན་བཟང་གཞིའི་ཐིག་ལེ་འོད་ལྔ་མུ་ཁྱུད་ཀྱི་ཚུལ་དུ་འཁོར་ཞིང་གདངས་ཀྱི་ཐིག་ལེ་དང་ཐིག་ཕྲན་དུ་མས་བརྒྱན་པར་གནས་སོ། །རྩའི་དྭངས་མ་དཀར་འཇམ་རྩའི་སྒྲོན་མ་ཞེས་འོད་རྩ་ཀ་ཏི་ཤེལ་གྱི་སྦུ་གུ་ཅན་སྙིང་གི་རྒྱབ་ཕྱོགས་ཀྱི་རྩ་གཉིས་དབུ་མ་ནས་ཡར་སོང་སྟེ།སྙིང་རྩེ་ནས་སོར་བཞིའི་མཚམས་ནས་གཉིས་སུ་གྱེས་ཤིང་ཕྱི་ནང་གི་ཚུལ་དུ་མགྲིན་པའི་རྩའི་དྲྭ་བ་ནས་ཕྱིར་ཐོན་ཏེ།གནས་པའི་རོ་རྐྱང་གི་ལམ་བརྒྱུད་ཅིང་།རྣ་ལྟག་གཉེས་ནས་བ་མེན་གྱི་རྭའི་དབྱིབས་ལྟ་བུ་རྩ་སྣ་གུག་སྟེ།མིག་གི་ཨ་འབྲས་ལ་ཟུག་ནས་རྩ་ཁ་ཕྱེ་བར་གནས་སོ། །དེ་ཡང་ཤིན་ཏུ་དོན་རྟོགས་དཀའ་བའི་ཕྱིར་ན་རྩ་བ་ཕྲ་བ་རྟ་རྔ་བརྒྱད་བཤགས་ཀྱི་ཆ་གཅིག་གི་ཚད་ཙམ་དང་། །ཡེ་ཤེས་ལྷུན་གྲུབ་རིན་པོ་ཆེའི་གསང་ལམ་འཁོར་འདས་ཀྱི་ཆ་འཛིན་པས་ན་རྩའི་རྩེ་མོ་ཡངས་པའི་རྣམ་པར་རྗོད་པ་སྟེ།དེ་ནི་འོད་རྩའི་རྟེན་ཡིན་པའི་ཕྱིར་ན་མིང་དུ་རྩ་ཟེར་ཡང་དོན་ལ་རླུང་གི་དྭངས་མ་ཡིན་ནོ།སྒོ་ཡི་དྭངས་མ་རྐྱང་ཞགས་ནི་འཁོར་འདས་གཉིས་ཀྱི་ཆ་འཛིན་པས་དག་སྣང་དང་འཁྲུལ་སྣང་གི་མཐོང་ཕྱེ་བ་དཀར་ནག་ཕྱེད་མ་ཆུའི་དཀྱིལ་འཁོར་མིག་ཡེ་ཤེས་ཀྱི་གསང་ལམ་སྐུ་གསུམ་ལམ་སྣང་དུ་ཤར་བའི་ཆ་རྣམས་གོང་དུ་གསལ་བར་བྱེད་པའི་སྒྲོན་མ་སྟེ།ཀ་ཏིའི་ཡར་སྣ་རྣོ་བ་ཡེ་ཤེས་རྩེ་མོས་དག་པ་སྐུ་དང་ཐིག་ལེའི་སྣང་བ་རྣམས་འཛིན་པ་ཡིན་ནོ། །དེའི་ན་ཙིཏྟ་ཤའི་སྒྲོན་མ།ཀ་ཏི་ཤེལ་གྱི་སྦུ་གུ།རྒྱང་ཞགས་ཆུའི་སྒྲོན་མ་སྟེ་འདི་གསུམ་ལ་སྣོད་ཀྱི་སྒྲོན་མ་རྣམ་གསུམ་སྟེ།དེ་དག་རྩ་བ་སྙིང་།སྡོང་པོ་རྩ།འབྲས་བུ་མིག་གི་ཚུལ་དུ་ཡོད་དེ།ལམ་གྱི་དུས་སུ་གཅིག་ཏུ་བརྩི་བར་ཤེས་དགོས་ཏེ།ཇི་སྐད་དུ།སྙིང་ནས་མིག་ཏུ་འབྲེལ་བའི་རྩ། །ཀ་ཏི་ཤེལ་གྱི་སྦུ་གུ་ཅན། །ཐིག་ལེ་ཁྲག་གི་མ་གོས་པ། །ཡེ་ཤེས་ཆེན་པོ་དེ་ན་རྒྱུ། །ཞེས་གསུངས་སོ། །གཉིས་པ་བཅུད་ཀྱི་སྒྲོན་མ་གསུམ་ནི།ཕྱི་འབྱུང་དྭངས་མ་སོགས།གསུམ་ཞེས་བྱ༔ ཞེས་པས་བསྟན་ཏེ། །ཀུན་གསལ་ལས།ཙིཏྟ་རིན་ཆེན་གཞལ་ཡས་ན།སྐུ་ཡི་ཆ་ཕྲན་ཏིལ་འབྲུ་ཙམ། །འོད་ལྔའི་ཀློང་ན་རྫོགས་པར་བཞུགས། །སྦྱངས་ན་མངོན་སུམ་ལམ་དུ་འཆར། །ཞེས་གསུངས་པ་བཞིན་འོད་རྩ་ཀ་ཏི་ཤེལ་སྦུག་ཅན་གྱི་ནང་དུ། །ཕྱི་འབྱུང་ཆེན་ལྔའི་དྭངས་མ་ནང་དབྱིངས་རྣམ་དག་གི་སྒྲོན་མ་ཞེས་སྙིགས་མའི་འབྱུང་བའི་དྭངས་མའི་ངོ་བོ་གདངས་འོད་ལྔར་འཕོས་པ་ལ་དབྱིངས་དང་། །མ་དག་པའི་དངོས་འཛིན་འཁྲུལ་སྣང་ཐམས་ཅད་རྣམ་པར་དག་ཅིང་དག་དབྱིངས་དྭངས་མའི་ཀློང་དུ་རོལ་པ་ལ་སྒྲོན་མ་ཞེས་བརྗོད་དེ།དཔེར་ན་ཟ་འོག་ཁ་ཕྱེ་བ་ལྟ་བུའི་འཇའ་རིས་འོད་ལྔའི་ཀློང་ནས་དབྱིངས་སྣང་ཐིག་ལེ་དང་བཅས་པ་འཆར་བའི་གཞི་བྱེད་པ་ཡིན་ནོ། །དེ་ལ་ཆེས་ཆེར་གོམས་པའི་ཚེ་ན་ཤེས་རབ་ཀྱི་མིག་ལ་ཡེ་ཤེས་ཀྱི་མཐོང་གསལ་ནས།དབྱིངས་ཀྱི་ཁ་དོག་ཀྱང་ཕྱི་འབྱུང་ནམ་མཁའི་དྭངས་མ་བཻ་ཌཱཪྻའི་མདོག་ལྟར་མཐིང་ག།སའི་དྭངས་མ་སྦུར་ལེན་གྱི་མདོག་ལྟར་སེར་པོ།ཆུའི་དྭངས་མ་དུང་གི་མདོག་ལྟར་དཀར་པོ།མེའི་དྭངས་མ་པདྨ་རཱ་གའི་མདོག་ལྟར་དམར་པོ།རླུང་གི་དྭངས་མ་ཨིནྡྲ་ནཱི་ལའི་མདོག་ལྟར་ལྗང་བ་རྣམས་མིག་གིས་བལྟར་མི་བཟོད་པ་ལྟ་བུར་འཆར་བར་བྱེད་དོ། །དེ་ལ་ཡང་འཆར་བྱའི་རྣམ་པ་ཅུང་ཟད་དབྱེ་ན།དབྱིངས་དངོས་ནི་འོད་ལྔའི་དྲྭ་བ་དང་དྲྭ་ཕྱེད་ཟ་འོག་རིས་དང་མིག་མང་རིས་ལ་སོགས་པ་དང་།དབྱིངས་ཀྱི་སྣང་བ་འོད་ལྔ་གྱེན་འགྲེང་དང་རྩིབ་ཤར་གྲི་གུག་ཕྱག་མཚན་གྱི་རྣམ་པར་ཤར་བ་སོགས་གཞི་སྣང་གི་བཀོད་པ་བསམ་གྱིས་མི་ཁྱབ་པར་འཆར་བ་དང་།དབྱིངས་ཐིག་ནི་ཉ་མིག་ལྟ་བུའི་ཐིག་ཕྲན་འགུལ་འཕྲིག་དང་བྲལ་བ་འོད་ལྔའི་ཁ་དོག་དང་ལྡན་པ་མང་པོ་དབྱིངས་ངོས་དེར་གང་བར་འཆར་རོ། །དེ་ལྟ་བུའི་དབྱིངས་སྣང་གི་ཀློང་དུ་ནང་འབྱུང་ཕྲན་ལྔའི་དྭངས་མ་ཐིག་ལེ་སྟོང་པའི་སྒྲོན་མ་ཞེས་པ་འོད་གདངས་ཟླུམ་པོ་གྲྭ་ཟུར་ལས་འདས་པ་ཞིག་ཡིན་ཅིང་།མཐོང་སྣང་ལ་ཀོ་མོའི་ཆུ་ལ་རྡོ་འཕང་བ་ལྟ་བུའམ།རྨ་བྱའི་སྒྲོ་མདོངས་ལྟར་འོད་ལྔའི་ཐིག་ལེ་མུ་ཁྱུད་ཟླུམ་བསྐོར་གྱི་ཚུལ་དུ་འཆར་བ་ཡིན་ནོ། །དེ་ཡང་ནང་འབྱུང་སེམས་ཀྱི་དྭངས་མ་མཐིང་གི་ཁུ་བ་ལྟར་གནག་པ། །ཤའི་དྭངས་མ་གུར་གུམ་གྱི་ཁུ་བ་ལྟར་སེར་བ།ཁྲག་གི་དྭངས་མ་བ་འོ་ལྟར་དཀར་བ།དྲོད་ཀྱི་དྭངས་མ་རྒྱ་མཚལ་གྱི་མདོག་ལྟར་དམར་བ།དབུགས་ཀྱི་དྭངས་མ་སྤང་གི་མདོག་ལྟར་ལྗང་གུའི་ཁ་དོག་འཆར་རོ། །ཐིག་ལེ་སྟོང་སྒྲོན་ལ་ཡང་།གནས་པ་གཞིའི་ཐིག་ལེ་སྙིང་དབུས་ཀྱི་ཀུན་བཟང་གཞིའི་ཐིག་ལེ་དང་།རོ་རྐྱང་གི་རྩ་ལ་གནས་པའི་དཀར་ཆ་དང་དམར་ཆ་གཉིས་ལ་ཀུན་རྫོབ་རྒྱུའི་ཐིག་ལེ་ཞེས་བརྗོད་དོ། །ཆོས་ཉིད་དག་པའི་ཡེ་གདངས་དབང་པོའི་སྒོར་མངོན་སུམ་དུ་སྣང་བའི་འོད་ལྔའི་ཐིག་ལེ་ཟླུམ་སྐོར་ཤིན་ཏུ་དྭངས་ཤིང་གསལ་བ་སྟེ།རིག་སྟོང་འགྱུར་བ་མེད་པ་རང་བྱུང་རིག་པའི་རྩལ་ལམ་འབྲས་བུར་ཤར་བས་ན།ལམ་འདིར་རང་བྱུང་འབྲས་བུའི་ཐིག་ལེ་ཞེས་བརྗོད་དེ།དོན་ལ་སྙིང་དབུས་ཀྱི་སྒྲོན་མའི་གདངས་དེ་སྐུ་གསུམ་ལམ་སྣང་དུ་འཆར་བ་ཡིན་ཏེ།དེ་ལ་གོམས་སྟོབས་ཆེར་སོང་ཚེ་ཐིག་ལེ་དེ་དག་རབ་ཏུ་གནས་ཤིང་བརྟན་པར་འགྱུར་རོ། །མདོར་ན་དབྱིངས་དང་ཐི་ལེའི་འཆར་ཆ་ཐམས་ཅད་འོད་རྩ་ཀ་ཏི་ཤེལ་སྦུག་ཅན་གྱི་སྦུབས་ན་དྭངས་མ་ལྔ་འདུས་པའི་འོད་ཀློང་དུ་ཀུན་བཟང་གཞིའི་ཐིག་ལེའམ་གཉུག་མ་མི་ཤིགས་པའི་ཐིག་ལེ་གནས་པ་ལ།གཟིགས་སྟངས་ཀྱིས་གཅུན་ཏེ།ཤེས་རབ་ཀྱི་མིག་གིས་བལྟས་པས་ན།རྩའི་ནང་མངོན་དུ་གྱུར་པ་ལས་ཕྱིའི་ཡུལ་ནས་སྣང་བ་མ་ཡིན་ནོ། །དེའི་ཕྱིར་ན་དབྱིངས་སྣང་ཕྱི་རི་བཟུང་།རིག་པ་ནང་དུ་བཟུང་ནས་ཤར་ཆ་ཐམས་ཅད་གཞན་དུ་ཡོད་པར་སྣང་ན།རིག་པ་སྟོང་པའི་འོད་གསལ་དང་།ལྷུན་གྲུབ་སྣང་བའི་འོད་གསལ་གཉིས་ཡ་བྲལ་ནས་གཟུང་འཛིན་གྱི་གོལ་སྒྲིབ་ཆེན་པོ་འབྱུང་བ་ཡིན་ནོ། །དེའི་ཕྱིར་ན་རང་གི་རྩ་ནང་རང་གིས་གསལ་བ་ལས་དབྱིངས་དང་ཐིག་ལེའི་སྣང་བ་རྣམས་ཕྱི་ནས་ཤར་བ་མ་ཡིན་པའི་གནད་ཤེས་དགོས་སོ། །སྤྱིར་ལམ་འདིར་ཐོག་མར་བརྩོན་པ་རྣམས་ལ་དང་པོ་ཉིད་ནས་དབྱིངས་སྣང་མངོན་དུ་བྱས་པ་ཙམ་གྱིས་དབྱིངས་དང་ཐིག་ལེ་སོགས་ལ་ཁ་དོག་ཇི་བཞིན་པར་མི་གསལ་ཏེ།དབྱིངས་སྣང་སྐྱ་རིབ་དང་སྔོ་རིབ་སོག་ཕོན་བཅིང་བ་ལྟ་བུའམ་གཤིབས་པ་ལྟ་བུར་སྣང་དེ་ལ་བར་མ་ཆད་པར་ཡང་ཡང་བསྒོམ་པའི་ཚེ་ན།དབྱིངས་ཅུང་ཟད་བརྟན་ཅིང་ཐིག་ལེ་ཡང་མུ་ཁྱུད་ཀྱི་རྣམ་པ་ལྟ་བུར་སྣང་ངོ་། །དེ་ནས་ཡང་ཆེས་ཆེར་བསྒོམ་པའི་ཚེ་ན།ཁ་དོག་ཅུང་ཟད་བཀྲ་བའི་དབྱིངས་ཐིག་རྣམས་འདར་འཕྲིག་གི་རྣམ་པར་ཤར་བ་དང་།བར་དུ་ཇེ་བརྟན་དུ་སོང་ནས་ཐ་མ་འགུལ་འཕྲིག་མེད་པར་གནས་ཤིང་།ཁ་དོག་ཀྱང་ཇི་བཞིན་པ་གསལ་བ་སོགས་འབྱུང་ངོ་།དེ་ལྟ་བུའི་དབྱིངས་ནམ་མཁའ་རྣམ་པར་དག་པའི་ཀློང་དུ་སྒྲོན་མ་ཀུན་གྱི་འཆར་གཞི་གསང་བ་སེམས་ཀྱི་དྭངས་མ་ཤེས་རབ་རང་བྱུང་གི་སྒྲོན་མ་ཞེས་བྱ་བ་ངོ་བོ་གཞིར་གནས་ཀྱི་ཡེ་ཤེས་ཆེན་པོ་གསལ་སྟོང་འཛིན་པ་དང་བྲལ་བ་རིག་པ་བདེ་གཤེགས་སྙིང་པོའི་གནས་ལུགས་མངོན་དུ་གྱུར་པ་དེ་ཡིན་ཏེ།འདི་མེད་ན་སྒྲོན་མ་གཞན་ཐམས་ཅད་ཀྱང་མེད་པར་འགྱུར་ཞིང་།འདི་ལས་སྒྲོན་མ་གཞན་རྣམས་གོང་ལྟར་སོ་སོར་མཚོན་པར་སྣང་བའི་ཕྱིར་ན།སྒྲོན་མ་ཀུན་གྱི་ཤེས་བྱེད་ཀྱི་ཤེས་རབ་ཆེན་པོ་སྟེ།དེ་ཉིད་དབྱེ་ན་རྣམ་གྲངས་བཞིར་ཡོད་པ་ལས།བྱེད་ལས་ཀྱི་སྒོ་ནས་ཅུང་ཟད་དབྱེ་ན།དང་པོ་རྣམ་པར་གྲོལ་བའི་ཤེས་རབ་ཀྱིས་མ་རིག་པ་རིག་པའི་ཀློང་དུ་སྒྲོལ་བ་དང་།ཉོན་མོངས་པ་ལྔ་ཡེ་ཤེས་ཀྱི་ངང་དུ་སྒྲོལ་བ་སོགས་བྱེད་དོ། །རྣམ་པར་བསྐྱོད་བྱེད་ཀྱི་ཤེས་རབ་ཀྱིས་སྐུ་ལྔ་ཀ་དག་གི་དབྱིངས་དང་།རིག་པ་ཡེ་ཤེས་ཀྱི་དབྱིངས་སུ་བསྐྱོད་པར་བྱེད་དོ། །རྣམ་པར་སྡུད་བྱེད་ཀྱི་ཤེས་རབ་ཀྱི་འབྱུང་བ་ལྔ་དྭངས་མ་ལྔའི་དབྱིངས་དང་།ཕུང་པོ་ལྔ་སྐུ་ལྔའི་ཀློང་དང་།སྐུ་ལྔ་རིག་པའི་དབྱིངས་སུ་སྡུད་པ་སོགས་བྱེད་དོ། །རྣམ་པར་འབྱེད་པའི་ཤེས་རབ་ཀྱིས་རིག་དང་མ་རིག།རྟོགས་དང་མ་རྟོགས།ཉོན་མོངས་པ་དང་ཡེ་ཤེས།འཁོར་བ་དང་མྱང་འདས་སོགས་ཀྱི་སྐབས་འབྱེད་དོ། །དེ་ལྟར་གྱི་ཤེས་རབ་དེ་ལ་ངོ་བོ་དང་རྩལ་དང་གདངས་དང་གསུམ་ལས།ངོ་བོ་ནི་གཟིགས་སྟངས་ཀྱི་གནད་ལ་བརྟེན་ནས་ཐིག་ལེ་སྟོང་སྒྲོན་ལ་གཏད་པའི་ནང་གི་རིག་པ་མ་བཅོས་རང་གསལ་ཆེན་པོ་འདུས་མ་བྱས་པ་མངོན་དུ་གྱུར་པ་དེ་ཀ་ཇི་ལྟ་བ་མཁྱེན་པའི་ཆ་དང་།རྩལ་ནི་ཕྱི་གསལ་གྱི་ཤེས་རབ་དགོངས་པའི་དོན་ཀློང་བརྡོལ་དུ་འཆར་བ་ཇི་སྙེད་མཁྱེན་པའི་ཆ་ཡིན་ནོ། །གདངས་ནི་རྒྱུ་མིང་འབྲས་བུར་ཆགས་པ་རིག་གདངས་རྡོ་རྗེ་ལུ་གུ་རྒྱུད་ཅེས་བྱ་བ་གསེར་གྱི་སྐུད་པ་ལྡིང་བ་ལྟ་བུའི་འཁྱོག་མཚམས་སུ་ཐིག་ལེ་ཕྲ་མོས་བརྒྱན་པར་སྣང་ངོ་། །དེ་ཡང་རླུང་གི་གནད་ལ་བརྟེན་ནས་གྲོལ་བའི་རྟགས་སུ་འགྲོ་འོང་གི་རྣམ་པར་སྣང་བ་དང་།རྩའི་གནད་ལ་བརྟེན་ནས་གྲོལ་བའི་རྟགས་སུ་གདངས་ཕྲ་ལ་འཁྱོག་པ་དང་།ཐིག་ལེའི་གནད་ལ་བརྟེན་ནས་གྲོལ་བའི་རྟགས་སུ་འཁྱོག་མཚམས་རྣམས་སུ་ཐིག་ཕྲན་ཉ་མིག་ལྟ་བུས་བརྒྱན་པར་འཆར་བ་དེ་ག་ཡིན་ནོ། །དེའི་ཕྱིར་ན་ཐེག་པ་འདིར་རང་ལམ་གྱི་རྩ་དང་རླུང་ཐིག་གི་གནད་ཅུང་ཟད་བཤད་དགོས་པ་ཡང་ཨ་ཏིའི་ཨ་ནུ་ཞེས་བྱ་བ་ཡིན་པས་ན་དེའི་ངང་ཚུལ་ཤེས་པར་བྱའོ། །དེ་ལྟར་དབྱིངས་དང་ཐིག་ལེ་རིག་གདངས་རྣམས་ལ་བཅུད་ཀྱི་སྒྲོན་མ་རྣམ་པ་གསུམ་ཞེས་བརྗོད་པའི་དོན་ཤེས་པར་བྱ་བ་དང་།འཆར་བ་ལམ་གྱི་སྒྲོན་མ་བཞིའི་གནད་ཀྱང་།མདོར་བ་རྒྱང་ཞགས་སོགས། །ཉལ་ནས་ཡོད༔ ཞེས་པས་བསྟན་ཏེ།མདོར་ན་ཐབས་ཟབ་མོ་རྒྱང་ཞགས་ཆུའི་སྒྲོན་མ་ཞེས་སྒོའི་དྭངས་མའི་གཟིགས་སྟངས་ཀྱི་གནད་ལས། །ནང་དབྱིངས་ནམ་མཁའ་རྣམ་པར་དག་པའི་སྒྲོན་མ་ལ་གཏད་དུས།རྒྱུ་ལྷུན་གྲུབ་རིན་པོ་ཆེའི་ཡོན་ཏན་ལ་རྒྱུ་བྱས།སྒོ་ཡུལ་རླུང་རིག་གིས་གནད་གཅུན་པ་དང།ཤེས་རབ་ཀྱི་མིག་ལ་རྐྱེན་བྱས་ཏེ།རྟེན་འབྲེལ་གྱི་དབྱིངས་སྣང་དང་ཐིག་ལེ་སྟོང་པའི་སྒྲོན་མ་ལུག་རྒྱུད་དང་བཅས་པ་འཆར་རོ། །དེ་དག་དཔེར་ན་འོད་རྩ་ཀ་ཏི་ཤེལ་གྱི་སྦུ་གུ་ཅན་སྣོད་ལྟ་བུ་ལ།དབྱིངས་རྣམ་དག་གི་སྒྲོན་མ་བཅུད་ལྟ་བུ་དང་།ཐིག་ལེ་སྟོང་པའི་སྒྲོན་མ་ཞེས་བྱ་བ་དེ་སྙིང་ཁུ་མར་ལྟ་བུ་དང་དེ་ལས་ཆེས་ཆེར་ལྷག་པ་ཡང་བཅད་ལྟ་བུ་དེ་དག་ཀུན་གྱི་འཆར་གཞི་ཤེས་རབ་རང་བྱུང་གི་སྒྲོན་མ་ཞེས་བྱ་བ་རིག་པ་བདེ་གཤེགས་སྙིང་པོ་འཁོར་འདས་གཉིས་ཀྱི་སྤྱི་གཞི་ལྷུན་གྲུབ་སྐུ་དང་ཡེ་ཤེས་ཡོན་ཏན་གྱི་ཆ་དང་བཅས་པ་ཡེ་ནས་རང་བྱུང་དུ་གནས་པ་ཡིན་ནོ། །དེ་དག་མཐོང་བའི་ཡོན་ཏན་ཡང་དབྱིངས་ནམ་མཁའ་རྣམ་དག་གི་སྒྲོན་མ་མཐོང་ཚེ།རང་སྣང་དོན་གྱི་འོག་མིན་གྱི་ཞིང་ཁམས་མཐོང་བ་དང་མཉམ་པ་དང་།ཐིག་ལེ་སྟོང་པའི་སྒྲོན་མ་ནི་ལྷུན་གྲུབ་བདེ་བ་ཆེན་པོའི་གཞལ་ཡས་ཁང་མཐོང་བ་དང་མཉམ།རིག་གདངས་རྡོ་རྗེའི་ལུ་གུ་རྒྱུད་དྲུག་པ་རྡོ་རྗེ་འཆང་ཆེན་པོའི་སྐུ་མངོན་སུམ་དུ་མཐོང་བ་དང་སྐལ་བ་མཉམ་པ་ཡིན་པས་ཡིད་ཆེས་པར་བྱའོ། །དེ་ལྟར་རྣལ་འབྱོར་ལམ་གྱི་སྒྲོན་མ་རྣམ་པ་བཞི་པོ་འདི་ཡེ་ནས་འགྲོ་བ་ཀུན་གྱི་རྒྱུད་ལ་གནས་ཡོད་པས་ན།རྒྱུད་ལས།གནས་ལུགས་གཞི་ཡི་སྒྲོན་མ་དྲུག།རྣལ་འབྱོར་ལམ་གྱི་སྒྲོན་མ་བཞི། །སེམས་ཅན་རྣམས་ལ་རང་བྱུང་གནས། །ཞེས་གསུངས་པ་བཞིན་དུ།གནས་ལུགས་གཞིའི་སྒྲོན་མ་རྣམ་པ་དྲུག་དང་།རྣལ་འབྱོར་ལམ་གྱི་སྒྲོན་མ་རྣམ་པ་བཞི་དང་བཅས་པ་སེམས་ཅན་ཀུན་གྱི་གཤིས་ལ་ཡེ་ནས་རང་བྱུང་རྩོལ་མེད་དུ་གནས་ཡོད་པར་གསུངས་ནའང་།མི་རྣམས་འཁྲུལ་པའི་དབང་གིས་ང་མེད་པ་ལ་ང་རུ་བཟུང་།བདག་མེད་པ་ལ་བདག་སྣང་ཙམ་ལ་བདེན་ཞེན་གྱིས་ཀུན་ནས་དཀྲིས་པའི་དབང་གིས་མ་རིག་གཉིས་འཛིན་གྱི་སྦུབས་སུ་འཁྲུལ་ཏེ།རིག་པ་ཡེ་ཤེས་ཀྱི་ཞལ་བསྒྲིབས་ནས་གནས་ལུགས་སྒྲོན་མ་དྲུག་གི་གནས་ཚུལ་མངོན་དུ་མ་གྱུར་ཅིང་།དཔེར་ན་དབུལ་པོའི་ཁྱིམ་ན་གསེར་ཡོད་ཀྱང་དེ་ངོ་མ་ཤེས་ནས་བསྐྲེས་སྐོམ་གྱིས་གདུང་བ་ལྟར།འཆར་བ་ལམ་གྱི་གནད་རྣམས་བག་ལ་ཉལ་ནས་ལུང་མ་བསྟན་དུ་སོང་ཞིང་འཁོར་བ་ནས་འཁོར་བར་ཁ་བརྒྱུད་དེ་མ་རིག་པའི་ཡོ་ལངས་ཆེན་པོ་འབྱུང་བ་ཡིན་ནོ། །དེ་ལྟར་མ་ཡིན་པའི་ལམ་འདིར་ལས་དང་སྐལ་བ་ལྡན་པ་རྣམས་ཀྱིས་གཞི་དང་ལམ་གྱི་སྒྲོན་མ་རྣམས་གནད་གཅིག་ཏུ་དྲིལ།མདོ་གཅིག་ཏུ་བསྡུས་ཏེ།སྒོ་ཡུལ་རླུང་རིག་གི་གནད་ལ་བརྟེན་ནས་ལེ་ལོ་མེད་པར་ཉམས་སུ་བླང་བར་བྱ་བ་ནི་གནད་ཀྱི་ཡང་གཅེས་དམ་པ་ཡིན་ནོ། །དེ་ལྟར་སྦྱངས་གཞི་བདེ་གཤེགས་སྙིང་པོ། །སྦྱངས་བྱ་སྒྲོན་མ་དྲུག།སྦྱོང་བྱེད་སྒོ་ཡུལ་རླུང་རིག་གི་གནད་དང་།སྦྱངས་འབྲས་སྣང་བ་བཞི་མཐར་ཕྱིན་ཏེ།ནང་གསལ་གཞོན་ནུ་བུམ་སྐུར་སངས་རྒྱས་པར་འགྱུར་རོ། །ཞེས་གཞི་དང་ལམ་གྱི་སྒྲོན་མའི་ངང་ཚུལ་ཇི་བཞིན་པར་བསྟན་པའི་ལེའུ་སྟེ་བརྒྱད་པའོ། །ས་མ་ཡགུ་ཧྱ༔ ཞེས་པ་དམ་ཚིག་གསང་བའི་བཀའ་རྒྱས་རེ་ཞིག་དབྱིངས་སུ་རྒྱས་བཏབ་པའི་དོན་ནོ། །ལྔ་པ་འབྱུང་བ་སྙིགས་མ་དྭངས་མར་སྦྱོང་བའི་ཐབས་བསྟན་པ་ནི།ད་ནི་ཚུལ་བཞིན་སོགས།ཆམ་གྱིས་བཞག༔ ཅེས་པའི་བར་གྱིས་བསྟན་ཏེ།ད་ནི་དེ་ལྟར་འཁོར་འདས་གཉིས་ཀྱི་བསྡུས་པའི་ཆོས་ཐམས་ཅད་སོ་སོར་རྟོག་པའི་ཤེས་རབ་ཀྱིས་གཏན་ལ་ཕབ་ནས།མེད་དང་མ་གྲུབ་པའི་གནས་ཚུལ་ཇི་བཞིན་པར་ཤེས་པའི་བདག་མེད་རྟོགས་པའི་ཤེས་རབ་ཀྱི་ངང་མདངས་མངོན་དུ་གྱུར་ཅིང་།མ་དག་སྙིགས་མའི་སྣང་བ་ཐམས་ཅད་དག་དབྱིངས་དྭངས་མའི་རོལ་བར་སྦྱོང་བར་བྱེད་པའི་ཐབས་ཟབ་མོ་ཉམས་སུ་བླང་བར་བྱེད་པ་ལ།གཞི་དུས་ཀྱི་དབང་བླ་མའི་རྣལ་འབྱོར་བསྒོམ་པ་ནི།སྐད་ཅིག་གིས་ཕྱི་ནང་བསྣོད་བཅུད་བདག་ལུས་ཕུང་ཁམས་དང་བཅས་པ་ཐམས་ཅད་སྒྱུ་མའི་འཁྲུལ་འཁོར་དབྱིངས་སུ་ཞིག་པ་ལྟར་ཆོས་དབྱིངས་སྟོང་པ་ཆེན་པོའི་ངང་དུ་ཞིག་པར་བསམ།སྟོང་པའི་ངང་ལས་ཆུ་ལས་ཆུ་ལྦུར་རྡོལ་བ་བཞིན་དུ་སྐད་ཅིག་གིས་ཞིང་ཁམས་རྣམ་པར་དག་པའི་དབུས་སུ།རང་ཉིད་གཞི་ལུས་རྡོ་རྗེ་རྣལ་འབྱོར་མ་དམར་མོ་ཞལ་གཅིག་ཕྱག་གཉིས་པ་གཡས་གྲི་གུག་དང་གཡོན་པས་བྷན་ཁྲག་འཛིན་པ།ཞབས་གཉིས་མཉམ་པའི་འདོར་སྟབས་མཛད་ཅིང་སྐུ་མཚན་དཔེའི་ལང་ཚོས་མཛེས་ཤིང་བལྟ་ན་སྡུག་པ།སྐུ་གསུམ་མཚོན་ཕྱིར་སྤྱན་གསུམ་རིངས་བའི་ཚུལ་དུ་སྟེང་གི་ནམ་མཁར་གཟིགས་ཤིང་།སྐུ་ལ་དར་དང་རིན་པོ་ཆེ་དང་རུས་པའི་རྒྱན་དྲུག་གིས་སྤྲས་པ།སྣང་ལ་རང་བཞིན་མེད་པ་ཆུ་ཟླ་ལྟ་བུ།གསལ་ལ་དེར་འཛིན་དང་བྲལ་བ་འཇའ་ཚོན་ལྟ་བུའི་རྣམ་པ་གསལ་འཚེར་འོད་དུ་འབར་བ་ཞིག་ཏུ་གསལ་གདབ།དེའི་མདུན་གྱི་ནམ་མཁར་ཡེ་ཤེས་འཇའ་དང་འོད་ཕུང་འཁྲིགས་པའི་ཀློང་དུ་ཐབས་ཤེས་པདྨ་ཉི་ཟླའི་གདན་ལ།ངོ་བོ་སངས་རྒྱས་ཀུན་འདུས་ཀྱི་བདག་ཉིད་དྲིན་ཆེན་རྩ་བའི་བླ་མ་ཡིན་པ་ལ།རྣམ་པ་རིག་འཛིན་ཆེན་པོ་དགའ་རབ་རྡོ་རྗེ་སྐུ་མདོག་དཀར་གསལ་གཞོན་ཚུལ་མཚན་དང་དཔེ་བྱད་ཀྱིས་བརྒྱན་ཅིང་ལོངས་སྐུའི་ཆས་རྫོགས་པ།ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ།ཕྱག་གཉིས་གཡས་ས་གནོན་དང་གཡོན་མཉམ་བཞག་མཛད་ཅིང་།འོད་དང་འོད་ཕུང་དཔག་ཏུ་མེད་པ་འབར་བར་གསལ་བའི་སྐུ་སྟོད་ཀྱི་ཆ་ལ་རྒྱལ་བ་དགོངས་བརྒྱུད་ཀྱི་བླ་མ།སྐེད་པ་བར་གྱི་ཆ་ལ་རིག་འཛིན་བརྡ་བརྒྱུད་ཀྱི་བླ་མ།སྐུ་སྨད་ཀྱི་ཆ་ལ་གང་ཟག་སྙན་བརྒྱུད་ཀྱི་བླ་མ།གཞན་ཡང་མཐའ་བསྐོར་དུ་པཎ་གྲུབ་རིག་འཛིན་གྱི་ཚོགས་དང་།ཡི་དམ་རྒྱུད་སྡེ་བཞི་དྲུག།གནས་གསུམ་གྱི་དཔའ་བོ་མཁའ་འགྲོའི་ཚོགས་དང་བཅས་པ་ཐམས་ཅད་སྤྲིན་ཕུང་འཁྲིགས་པ་བཞིན་དུ་བཞུགས་པར་བསམ།དེ་ལྟར་གསལ་བའི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་པས།ཕྱོགས་བཅུའི་ཞིང་རབ་འབྱམས་ན་བཞུགས་པའི་སྐུ་གསུམ་རྒྱལ་བ་སྲས་བཅས་བརྒྱུད་གསུམ་རིག་འཛིན་རྒྱ་མཚོའི་ཚོགས་དང་བཅས་པ་ཐམས་ཅད་སྤྱན་དྲངས་ནས་ཆུ་ལ་ཆར་ཐིམ་པ་ལྟར་གཉིས་སུ་མེད་པར་གྱུར་ནས་སྐྱབས་ཀུན་ཡོངས་འདུས་ཀྱི་བདག་ཉིད་དུ་བཞུགས་ཏེ།བདག་སོགས་སེམས་ཅན་ཐམས་ཅད་ལ་ཞལ་གྱིས་ཕྱོགས།སྤྱན་གྱིས་གཟིགས།ཐུགས་བརྩེ་བ་ཆེན་པོས་དགོངས་ཏེ།བདག་ཅག་རྣམས་ཀྱི་འདྲེན་པའི་དེད་དཔོན་ཆེན་པོར་བཞུགས་པར་བསམ་པའི་མདུན་དུ།ཡིད་ཁྱེད་ཤེས་ཀྱི་དད་པས་གསོལ་འདེབས་བླ་མའི་རྣལ་འབྱོར་སྒྲ་དག་སྙན་པའི་དབྱངས་ཀྱིས་བརྗོད་ཅིང་།མཐར་དབང་བཞི་བླང་ནས་སྐྱབས་ཡུལ་རྣམས་བླ་མར་ཐིམ་པར་བསམ།བླ་མ་ཡང་འོད་དུ་ཞུ་ནས་རང་ལ་ཐིམ་པས་བདག་དང་སྣང་བ་ཐམས་ཅད་རྨི་ལམ་དབྱིངས་སུ་སད་པ་བཞིན་དུ་ཆོས་ཉིད་སྤྲོས་པ་དང་བྲལ་བའི་ངང་དུ་འབྱམས་ཀླས་པར་བསམ་ལ།རིག་པ་དེ་བཞིན་ཉིད་ཀྱི་གནས་ལུགས་ཀྱི་ངང་མངོན་དུ་བྱས་ཏེ་ཡུད་ཙམ་མཉམ་པར་བཞག་པ་ནི་གཞི་རང་ལ་ལམ་བྱེད་པ་དང་།སླར་ཡང་རང་གི་སྙིང་ག་ནས་འོད་ཟེར་ཁ་དོག་སྣ་ལྔའི་རྣམ་པར་ཕྱོགས་བཅུར་འཕྲོས་པས་བརྒྱུད་གསུམ་རིག་འཛིན་གྱི་བླ་མ་དམ་པ་རྣམས་དང་།ཁྱད་པར་དུ་ཕྱོགས་བཅུ་དུས་བཞིའི་བླ་མ་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་མཉེས་པའི་མཆོད་པ་ཕུལ་བས་ཐུགས་བདེ་སྟོང་གི་རོས་ཚིམས་ནས།བདག་དང་སེམས་ཅན་ཐམས་ཅད་ཀྱི་ཚོགས་རྫོགས།སྒྲིབ་པ་དག།དེ་དག་གི་ཐུགས་རྗེ་བྱིན་རླབས་དབང་དང་དངོས་གྲུབ་ཐམས་ཅད་དང་།ཁྱད་པར་ཐུགས་ཀྱི་གསང་བ་ཆེན་པོའི་ཡེ་ཤེས་ཡོན་ཏན་ཐམས་ཅད་འོད་ཕུང་ཁ་དོག་ལྔ་ལྡན་འཇའ་ཡི་སྤྲིན་དཔུང་འཁྲིགས་པ་ལྟ་བུའི་རྣམ་པ་དཔག་ཏུ་མེད་པ་ཐིབས་ཀྱིས་འདུས་ཏེ།སྤོས་རེང་གི་དུད་པ་ལྟར་བྱུང་ནས་རང་གི་དབང་པོའི་དྭངས་མ་མིག་གི་ཨ་འབྲས་ནས་བརྒྱུད་དེ་འོད་རྩ་ཀ་ཏི་ཤེལ་གྱི་སྦུ་གུ་ཅན་གྱི་ལམ་ནས་སིབ་སིབ་ཞུགས་ཏེ།ནང་དབྱིངས་འོད་གསལ་གྱི་སྒྲོན་མར་ཐིམ་པ་དང་མཉམ་དུ་བདག་ལུས་ཕུང་ཁམས་ཐམས་ཅད་འོད་ཐིག་གི་རོལ་པར་གྱུར་ཅིང༔ དེའི་ངང་དུ་དུས་གསུམ་གྱི་རྟོག་པ་ཐམས་ཅད་དང་བྲལ་ཏེ༔ སྒོ་གསུམ་མ་བཅོས་རང་བབས་ཀྱི་ངང་ནས་མིག་གཟིགས་སྟངས་ཀྱིས་གཅུན་ཏེ༔ དབྱིངས་སྣང་ལ་ཤེས་པ་ཐིམ་འགྲོ་བ་ལྟ་བུའི་ངང་དུ་རེ་ཞིག་མཉམ་པར་བཞག་གོ། །ཡང་འོད་གསལ་གདངས་དེ་ཉིད་ཆེས་ཆེར་མཆེད་ནས་ནང་རང་ལུས་ཕུང་པོ་ཁམས་དང་སྐྱེ་མཆེད་དང་བཅས་པ།མདོར་ན་ཕྱི་ནང་སྣོད་བཅུད་ལ་སོགས་པ་དངོས་པོ་རང་མཚན་གྱི་རྣམ་པར་སྣང་བའི་ཆོས་ཅན་ཐམས་ཅད་ཀུན་ཀྱང་ལྷག་མ་ཙམ་ཡང་མ་ལུས་པར་འོད་ཕུང་ཁ་དོག་རྣམ་པ་ལྔའི་རོལ་པར་ལན་ཚྭ་ཆུ་རུ་ཞུ་བ་བཞིན་དུ་ཕྱི་ནང་སྣོད་བཅུད་ཐམས་ཅད་འོད་ཀྱི་རྣམ་པར་མེར་གྱིས་ཞུ་སྟེ།སྣོད་བཅུད་དང་ཕུང་ཁམས་སྐྱེ་མཆེད་ཐམས་ཅད་དག་དབྱིངས་དྭངས་མ་ཆེན་པོའི་རོལ་པ་རུ་འབྱམས་ཀླས་པར་བཞག་ཅིང་།སྒོ་གསུམ་གྱི་གནད་གཅུན་ནས་མིག་ཕྱེད་བཙུམ་གྱིས་འོད་སྣང་གསལ་བ་ལ་བལྟ་ཞིང་དབྱིངས་མངོན་དུ་བྱས་ཏེ།ཡུན་ཅིག་མཉམ་པར་བཞག་པའི་ཚེ་ན་དང་པོ་དབྱིངས་སྣང་སྐྱ་ལམ་མེ་བའམ།སོག་ཕོན་བཅིངས་པ་ལྟ་བུ་འཆར་བ་ལས་ཇི་བཞིན་མི་གསལ་ཡང་།ཆེས་ཆེར་གོམས་འདྲིས་སོང་མཐར་རིག་པ་དབྱིངས་ཐོག་ལས་མི་གཡོ་བར་གནས་ཏེ༔ བློ་བཅོས་ཀྱི་བསམ་བྱ་དང་བསྒོམ་འཛིན་གྱི་འཆིང་བས་མ་བཅིང་བར་དམིགས་བསམ་སྤྲོས་པ་ཐམས་ཅད་ཆམ་གྱིས་བཞག་སྟེ།སྒོ་ཡུལ་རླུང་གི་གནད་ལ་བརྟེན་ནས་ཆོས་ཉིད་འོད་གསལ་བའི་ཡེ་ཤེས་ཀྱི་གདངས་དབང་པོའི་སྒོ་རུ་མངོན་དུ་གྱུར་བ་དེ་ལ་ལམ་བྱས་ཏེ།སྒོ་གསུམ་གྱི་གནད་བྱ་བ་དང་བྱེད་པ་མེད་པ་དཔེར་ན་ལས་ཟིན་པའི་སྐྱེས་བུ་བཞིན་དུ་བྱར་མེད་བྱ་བཏང་ཆེན་པོའི་ངང་དུ་སྡོད་པ་ནི་གནད་མཆོག་ཏུ་གྱུར་བ་ཡིན་ནོ། །དེ་ལྟར་སྒོ་གསུམ་བྱར་མེད་དུ་སྡོད་པའི་ཚེ་ན།ཕྱི་ཡི་དབྱིངས་སྐྱོན་གསུམ་དང་བྲལ་བའི་ནམ་མཁའ་སྟོང་པའི་དབྱིངས་དེ་ལས་མི་གཞན་པའི།ནང་དབྱིངས་ཆོས་ཉིད་ཀྱི་རོལ་པ་འོད་གདངས་ཀྱི་རྣམ་པ་ཅི་ཤར་ཡང་དེ་དག་ལ་བློས་ཡིད་དཔྱོད་སྤངས་ནས།གང་སྣང་ཐམས་ཅད་ཆོས་ཉིད་ཀྱི་ཡེ་གདངས་ཀུན་བཟང་གཞིའི་ངང་མདངས་ཕྱི་གསལ་དུ་ཤར་བ་ནང་དབྱིངས་ཀྱི་འོད་གསལ་ཡུལ་དུ་སྣང་བ་ལ།ནམ་མཁའ་རྣམ་པར་དག་པའི་སྒྲོན་མ་ཞེས་ལྷུན་གྲུབ་སྐུ་དང་ཐིག་ལེའི་འཆར་གཞི་སྟེ།དེ་ཉིད་ལ་འོད་གདངས་ཀྱི་སྣང་བ་ཇི་ལྟར་ཤར་ཡང་བཟང་པོ་ཞེས་བླང་བྱ་དང་།ངན་པ་ཞེས་དོར་བྱ་དང་།འཆར་ཆ་ཤར་གྱི་རེ་བ་དང་།མི་འཆར་གྱི་དོགས་པ་སོགས་མདོར་ན་བློ་ཡིད་དཔྱོད་ཀྱི་བཅས་བཅོས་ལ་སོགས་པ་གང་ཡང་མི་བྱེད་པར་རྒྱང་ནས་སྤངས་ཏེ།འཁོར་འདས་སྟོང་ཉིད་ཆེན་པོར་ངོ་ཤེས་པའི་ལྟ་བ་དེ་ཀའི་ངང་དུ་དབྱིངས་སྣང་ལམ་དུ་བྱེད་པ་དེ་ལས་གཞན་དུས་གསུམ་གྱི་རྟོག་པ་ཕྲ་རགས་ཐམས་ཅད་ཀྱི་རྗེས་སུ་མི་འབྲང་བར་ཆོས་ཉིད་འོད་གསལ་བའི་སྣང་བ་མངོན་དུ་གྱུར་པ་དེའི་ངང་དུ་མ་བཅོས་སྤྲོས་མེད་ཆེན་པོའི་དབྱིངས་སུ་ལ་བཟླ་བར་ཆམ་གྱིས་བཞག་པ་ནི།མྱུར་ལམ་འོད་གསལ་ཐོད་རྒལ་གྱི་མན་ངག་མཆོག་ཏུ་གྱུར་པ་ཡིན་པའི་ཕྱིར་ན།ལམ་འདིར་གེགས་དང་གོལ་ས་སོགས་གང་ཡང་མེད་པ་ཡིན་ནོ། །ཡང་།སྤྱིར་ན་འགྲོ་དྲུག་སོགས།གནད་ཀྱི་མཆོག།ཅེས་པས་བསྟན་ཏེ།དེ་ལྟར་གྱི་དགོངས་པའི་དོན་ཇི་བཞིན་པར་མ་ལོན་ཞིང་ཕྱི་རྟགས་རབ་རིབ་ཙམ་ལ་གདིང་བཅས་ཏེ།ནང་རྟགས་ཀྱི་ཡོན་ཏན་རྒྱུད་ལ་མི་སྐྱེ་བ་ནི་སྣང་བ་གཟུང་འཛིན་དུ་གོལ་ཏེ།འོད་ལྔ་ཡུལ་གྱི་འཁྲུལ་གཞིའི་རྒྱུ་བྱེད་དོ། །དེའི་ཕྱིར་ན་གཟུང་འཛིན་འཐས་པའི་རྐྱེན་གྱིས་འགྲོ་བ་དྲུག་གི་གནས་རིགས་དང་།ཁྱད་པར་ངན་སོང་སོགས་ལ་གནས་པའི་སེམས་ཅན་རྣམས་ཀྱང་རང་གི་འཁྲུལ་སྣང་གློ་བུར་དུ་ཤར་བ་དེ་ལ་ཀུན་རྟོག་ལས་རླུང་གཡོ་བའི་ཆོ་འཕྲུལ་གྱིས་སྣང་བ་ཐམས་ཅད་དངོས་མཚན་བདེན་གྲུབ་ཅན་གྱི་རྣམ་པར་འཐས་པའི་རྒྱུ་ནི།མ་རིག་པ་རྣམ་པ་གསུམ་གྱི་བྱེད་ལས་ཀྱིས་ཤེས་པ་དང་པོ་འཁྲུལ་པ་ཡུལ་གྱི་རྣམ་པར་མཆེད་པ་དེ་ལ།ང་ཡིར་འཛིན་པའི་ཤེས་པ་བག་ཉལ་དུ་ཡོད་པ་ལ་རྣམ་པར་རྟོག་པ་ཕྱི་མས་གསོས་བཏབ་སྟེ།ཡུལ་བཟང་ངན་བར་གསུམ་ཐམས་ཅད་ལ་གཉིས་འཛིན་ཨ་འཐས་ཀྱིས་བཟུང་ནས་བདེ་སྡུག་བར་མ་གསུམ་ཉེ་བར་ལེན་ཅིང་འཁྲུལ་སྣང་དངོས་པོར་འཐས་པའི་རྐྱེན་གྱིས།ཕྱི་སྣང་བ་སྣོད་ཀྱི་འཇིག་རྟེན།ནང་སྲིད་པ་བཅུད་ཀྱི་སེམས་ཅན།བར་འདོད་ཡོན་ལྔ་རུ་ཤར་བའི་ཡུལ་སྣང་འདི་དག་མཆེད་པ་ལ།གཟུང་འཛིན་འཐས་པའི་དབང་གིས་འཁྲུལ་སྣང་བདེ་སྡུག་བར་གསུམ་ཉེ་བར་ལེན་ཅིང་།ཡུལ་ལ་མངོན་པར་ཞེན་པའི་རྐྱེན་གྱིས་འཁྲུལ་པའི་འཁོར་ལོར་ཁ་འཁྱོལ་ནས་སྲིད་པར་འཕྱན་པ་ཡིན་ནོ། །དེ་ལྟར་མ་ཡིན་པའི་འོད་གསལ་གསང་བ་ཆེན་པོ་མྱུར་ལམ་ཐོད་རྒལ་གྱི་གནད་འདིར་བརྟེན་པའི་གང་ཟག་ལས་སྨོན་རྟེན་འབྲེལ་འཛོམ་པ་དག་གིས།ཤེས་པ་དང་པོ་ཉིད་ནས་འོད་གསལ་གྱི་སྣང་བ་མངོན་དུ་གྱུར་ཅིང་།མ་དག་པའི་འཁྲུལ་སྣང་ཐམས་ཅད་དག་དབྱིངས་དྭངས་མའི་རོལ་པར་འོད་གསལ་ཆོས་ཉིད་ཀྱི་ངང་དུ་གོ་འཕོས་ཏེ།ཆོས་ཅན་འཁྲུལ་པའི་སྣང་བ་མ་དག་པ་སྙིགས་མའི་བསྐལ་པ་ཐམས་ཅད་ཆོས་དབྱིངས་བརྡལ་བ་ཆེན་པོའི་ཀློང་དུ་འཁྲུལ་པ་ཀ་ནས་དག་ཅིང་དབྱིངས་སུ་འཇིག་པ་ཡིན་པའི་ཕྱིར་ན།ལམ་འདི་ཉིད་ཀྱི་གནད་དེ་དག་མ་ནོར་བར་ཚུལ་བཞིན་དུ་ཤེས་པར་བྱ་ཞིང་།སྒོ་གསུམ་གཅིག་དྲིལ་གྱི་དད་པའི་སྒོ་ནས་ཡང་ཟབ་སྙིང་པོའི་མྱུར་ལམ་འདི་ཉིད་ཉམས་སུ་བླང་བའི་གནད་ཀྱི་མན་ངག་གདམས་པ་ཀུན་གྱི་མཆོག་ཏུ་གྱུར་ཅིང་།དེས་འབྱུང་བ་ལྔ་ལ་རང་དབང་ཐོབ་ནས་དྭངས་མ་འོད་ཀྱི་སྐུ་རུ་སྨིན་པར་འགྱུར་བ་ཡིན་ནོ། །དེ་ལྟར་འབྱུང་བ་དྭངས་སྙིགས་ཀྱི་ཚུལ་བསྟན་པའི་ལེའུ་སྟེ་དགུ་པའོ། །ས་མ་ཡ༔ གུ་ཧྱ༔ ཞེས་པ་དབྱིངས་སུ་རྒྱས་བཏབ་པའི་དོན་ནོ། །། །དྲུག་པ་ཚལ་བཞིན་མ་རྟོགས་ན་གཟུང་འཛིན་གྱི་ལམ་དུ་གོལ་བའི་ཚུལ་བསྟན་པ་ནི།དེ་ལྟར་ཚུལ་བཞིན་སོགས།དབྱིངས་སུ་འཇིག༔ ཅེས་པས་བསྟན་ཏེ།དེ་ལྟར་རིག་པའི་ཡེ་ཤེས་ཀྱི་ངང་ཚུལ་ཇི་ལྟ་བ་བཞིན་དུ་མ་རྟོགས་ཤིང་ཀུན་གཞི་ལུང་མ་བསྟན་གྱི་ཁམས་ནས་འཛིན་པ་ལས་ཀྱི་རླུང་གཡོས་པའི་ཆོ་འཕྲུལ་གྱིས་སེམས་བག་ཆགས་ཀྱི་རྒྱར་འཐུམ་ནས།རིག་པ་ཡེ་ཤེས་ཆེན་པོའི་གནས་ལུགས་ཀྱི་དོན་ཇི་བཞིན་པར་མ་ཤེས་ཤིང་མ་རིག་པའི་དབང་གིས།ཕྱི་སྣང་བ་ལུང་མ་བསྟན་དུ་བཟུང་ནས་འཁྲུལ་པར་འཕྱན།ནང་རང་ལུས་ལུང་མ་བསྟན་དུ་སོང་ནས་ང་བདག་གི་འཆིང་བས་བཅིངས།བར་རང་སེམས་ལུང་མ་བསྟན་དུ་གོལ་བས་ཡེ་གནས་ཀྱི་རིག་པའི་གནས་ལུགས་མངོན་དུ་མ་གྱུར་ཅིང་།སྟོང་ཉམས་མཆོག་འཛིན་ཅན་ལ་གདིང་འཆོས་པའི་རྐྱེན་གྱིས་རིག་པའི་ཡེ་ཤེས་ལ་རྒྱང་རིང་ནས།ལམ་གྱི་གནད་ཚུལ་བཞིན་དུ་མ་མཐོང་བའི་སྐྱོན་དེས་ལམ་ཇི་ལྟར་བསྒོམ་ཀྱང་གསལ་སྟོང་མྱོང་ཞེན་ཅན་དུ་ལུས་ནས་གཟུང་འཛིན་གྱི་ལམ་དུ་འཕྱང་སྟེ།གོལ་ཤོར་ནོར་གསུམ་གྱི་ཉམས་ཀྱིས་བསླུས་ནས།རྣམ་པ་ཐམས་ཅད་མཁྱེན་པའི་ལམ་ཇི་བཞིན་པ་མངོན་དུ་གྱུར་པ་མ་ཡིན་ནོ། །དེའི་ཕྱིར་ན་དང་པོ་ལྟ་དགོངས་དང་ལྡན་པའི་དགེ་བའི་བཤེས་གཉེན་དམ་པ་བསྟེན་ནས་མཉེས་པ་གསུམ་གྱི་ཞབས་ཏོག་བསྒྲུབ་ཅིང་དམ་ཚིག་ལ་མངོན་ལྐོག་མི་བྱེད་པར་བླ་མའི་མན་ངག་ཚུལ་བཞིན་དུ་ཉམས་སུ་བླངས་ནས།སོ་སོར་རྟོག་པའི་ཤེས་རབ་ཀྱིས་གཞི་ཁྲེགས་ཆོད་ཀྱི་ལྟ་བ་གཏན་ལ་ཕབ་ནས།བདག་མེད་རྟོགས་པའི་ཤེས་རབ་མངོན་དུ་གྱུར་བར་བྱེད་ཅིང་།སྣང་སྲིད་འཁོར་འདས་ཀྱི་བསྡུས་པའི་ཆོས་ཐམས་ཅད་རང་སྣང་ལས་གཞན་ན་རྡུལ་ཙམ་ཡང་བདེན་གྲུབ་ཅན་དུ་མེད་པར་ཐག་ཆོད་དེ།ཆོས་ཉིད་རྒྱུ་འབྲས་ལས་འདས་པ་རིག་པ་སྐུ་གསུམ་མཉམ་པ་ཉིད་ཀྱི་དབྱིངས་ཇི་ལྟ་བ་བཞིན་དུ་མངོན་དུ་གྱུར་ཅིང་ངང་རྟོགས་ནས།སླར་གཞི་ལ་དབང་བསྒྱུར་ནས་སྣང་དང་སྲིད་པའི་ཆོས་ཁམས་ཐམས་ཅད་རང་སྣང་ཡེ་ཤེས་ཀྱི་རོལ་རྩལ་དུ་གོ་འཕོས་ཏེ།སྣང་བ་ཐམས་ཅད་སྣང་ཙམ་ཉིད་ནས་སྟོང་།སྟོང་ཙམ་ཉིད་ནས་སྣང་བ་སྟེ།སྣང་སྟོང་གཉིས་སུ་མེད་པའི་ཡེ་ཤེས་ཀྱི་གནས་ལུགས་དེ་བཞིན་ཉིད་ཀྱི་ངོ་བོ་སྟོང་པ་གཞི་རྩ་དང་བྲལ་བ་བློ་འདས་ཡེ་གྲོལ་ཆེན་པོ་མཚན་མ་མེད་པའི་དབྱིངས་སྤྲོས་པ་དང་བྲལ་ཞིང་།རང་བཞིན་གྱི་ཆ་འགགས་པ་མེད་པ་ལྷུན་གྲུབ་སྐུ་དང་ཡེ་ཤེས་ཀྱི་ངང་རྒྱས་ཤིང་ཡོན་ཏན་སྣ་ཚོགས་ཀྱི་འཆར་སྒོ་རང་གསལ་ཆེན་པོར་རྫོགས་ཤིང་འདུས་མ་བྱས་པ་སྟེ།དེ་ལྟར་སྐུ་གསུམ་མཉམ་རྫོགས་ཆེན་པོའི་དབྱིངས་སྟོང་ཉིད་སྤྲོས་པ་དང་བྲལ་བའི་ཡེ་གཞི་ཀ་དག་གི་གནས་ལུགས་མ་བཅོས་རང་གསལ་ཆེན་པོའི་ངང་རྟོགས་པས་ན།གཞི་དབྱིངས་སྟོང་པའི་ཆ་དང་།གཞི་རྩལ་སྣང་བའི་ཆོས་གཉིས་ཀ་ཡ་མ་བྲལ་བ་སྟོང་གསལ་འདུས་མ་བྱས་པ་སྟེ།དཔེར་ན་རྒྱ་མཚོ་ཆེན་པོ་རླབས་ཀྱིས་མ་བསྐྱོད་ཅིང་རྙོགས་མ་དྭངས་པའི་ཆུ་དྭངས་གསལ་གྱི་ཆ་ལ་གཟུགས་བརྙན་སྣ་ཚོགས་འཆར་བྱེད་ཀྱི་ནུས་པ་རང་བཞིན་དུ་ཡོད་པའི་ཕྱིར་ན།གཟའ་སྐར་དང་གཟུགས་བརྙན་གྱི་སྣང་བ་རྒྱ་ཆེ་ལ་གྲངས་མང་བ་ཇི་ལྟར་ཤར་ཡང་།ཆུ་དྭངས་གསལ་གཉིས་སུ་མེད་པའི་ཆ་ནས་སྣང་བ་ལས་དེ་གཉིས་ཐ་དད་དུ་མ་གྲུབ་ཅིང་།ཆུ་ལ་དྭངས་གསལ་གྱི་འཆར་སྒོ་འགགས་པ་མེད་ཅིང་རང་གསལ་བས་ན་གཟའ་སྐར་དང་དེ་བཞིན་དུ་གཟུགས་བརྙན་གྱི་སྣང་བ་སྣ་ཚོགས་པ་མང་པོ་འཆར་དུ་རུང་བ་དེ་ཡང་།ཆུ་དེ་ཉིད་ཀྱི་དྭངས་གསལ་གྱི་ཆ་ལས་གཟའ་སྐར་དང་གཟུགས་བརྙན་གྱི་སྣང་བ་སྣ་ཚོགས་མཆེད་པ་ལས་ཆུ་མེད་ཚེ་དྭངས་གསལ་འབྱུང་རུང་གི་རྒྱུ་མེད།དེ་མེད་ན་གཟུགས་སྣང་ཤར་བའི་ཡུལ་མེད་པའི་ཕྱིར་ན།ཆུ་ལས་གཞན་པའི་གཟུགས་བརྙན་དུ་གྲུབ་པ་མེད་པ་བཞིན་དུ།སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ཀྱི་ངོ་བོ་གཞིར་གནས་ཀྱི་རིག་པ་ཆོས་སྐུ་མཉམ་པ་ཉིད་ཀྱི་དབྱིངས་ཆེན་པོ་སྟོང་གསལ་འདུས་མ་བྱས་པའི་རང་བཞིན།གཞི་རང་གི་རང་མདངས་འོད་གསལ་བའི་ཆ་དེ་ལས་སྣ་ཚོགས་ཆོས་ཁམས་རྒྱ་མཚོའི་སྣང་བ་ཐམས་ཅད་བྱ་བས་མ་བྱས་རྩོལ་བས་མ་བསྒྲུབ་པར་གཞི་རང་གི་ཆོས་ཉིད་དུ་ཡེ་ནས་རང་བྱུང་དུ་གནས་པའི་ཕྱིར་ན་ཆོས་ཀུན་རིག་པའི་རང་རྩལ་དུ་རང་ཤར་ནས་རང་ཐོག་དུ་རང་གྲོལ་བ་སྟེ།དེས་ན་སྣང་བ་ཐམས་ཅད་སྣང་དུས་ཉིད་ནས་བདེན་མེད་སེམས་ཀྱི་རོལ་པ་རུ་སྣང་བ་ཡིན་པས།སེམས་མེད་ན་སྣང་བ་མི་འབྱུང་བ་ནི་བེམ་གཟུགས་ཀྱིས་སྟོན་ཏེ།དེའི་ཕྱིར་ན་སྣང་བ་སེམས་མིན་སེམས་ལས་གཞན་པའི་སྣང་བ་ཞིག་ཐ་དད་དུ་མེད་ཅིང་།འཁོར་འདས་གཉིས་ཀྱི་ཆ་འཛིན་པས་ན་སེམས་དང་།དེ་ལས་གཞན་པའི་སྣང་བའི་ཆོས་ཞེས་བདེན་པར་མ་གྲུབ་པ་ཡིན་པས་ན།སྣང་བ་སེམས་ཀྱི་རོལ་རྩལ་དུ་ཤེས་དགོས་ཏེ།དཔེར་ན་ནམ་མཁའ་ལ་འཇའ་ཚོན་རྣམ་པ་ཇི་ལྟར་ཤར་ཡང་ནམ་མཁའ་ལས་མ་འདས་ཤིང་ཐམས་ཅད་ནམ་མཁའ་ཉིད་ཀྱི་ཆོ་འཕྲུལ་ཡིན་ཕྱིར།འཇའ་ཚོན་གྱི་རྣམ་པ་རྒྱ་ཆེ་ལ་བཀྲག་འབར་བ་ཇི་ལྟར་སྣང་ཡང་འཇའ་ཚོན་ནམ་མཁའི་རོལ་པར་སྣང་བ་བཞིན་དུ།རྒྱུ་གཞི་དབྱིངས་དྭངས་གསལ་གྱི་ཆ་ལ་རྒྱུ་བྱས།རྐྱེན་ངར་འཛིན་གྱི་ཤེས་པ་དང་ཉེར་ལེན་གྱི་སེམས་ལ་རྐྱེན་བྱས།དེ་གཉིས་རྒྱུ་རྐྱེན་འཕྲད་པའི་རྟེན་ཅིང་འབྲེལ་འབྱུང་དུས་འཛོམ་ནས་སྣོད་བཅུད་དུ་སྣང་བ་ཐམས་ཅད་མེད་བཞིན་དུ་འབྱུང་བ་སྟེ།གཞི་ལས་གཞི་སྣང་དུ་མཆེད་པ་ལས་རིག་པའི་ཡེ་ཤེས་ཞེས་ཡུལ་གཞན་ནས་འབྱུང་བ་མ་ཡིན་ནོ། །དེའི་ན་ཤེས་རབ་ཆེན་པོའི་ཡེ་ཤེས་ནི་ཆོས་སྐུ་གཞིར་གནས་ཀྱི་རིག་པའི་རང་ཞལ་མཐོང་བར་བྱེད་པའི་མིག་ལྟ་བུ་སྟེ།དེ་དག་མ་རིག་པས་བསྒྲིབ་པའི་རྐྱེན་གྱིས་ཤེས་པ་དང་པོ་མ་དག་སྙིགས་མའི་སྣང་བ་ཡུལ་དུ་གྱུར་པ་ལ་རྒྱུ་བྱས།ལས་རླུང་གི་འགྱུ་འཕྲིག་གཡོ་བའི་ཆོ་འཕྲུལ་རྐྱེན་བྱས་ཏེ།ང་ཡིར་འཛིན་པའི་ཤེས་པ་ལ་རྒྱུ་བདག་ཉིད་གཅིག་པུའི་མ་རིག་པ་དང་།ཡུལ་སྣང་འཛིན་མ་རིག་པའི་ཤེས་པ་དེ་ལ་ལྷན་སྐྱེས་ཀྱི་མ་རིག་པ་དང་།ཡུལ་དངོས་པོར་འཛིན་ཞེན་སྐྱེས་པ་ལ་ཀུན་ཏུ་བཏགས་པའི་མ་རིག་པ་དང་།དེ་གསུམ་འཛོམ་ནས་ཡུལ་བཟང་ངན་བར་གསུམ་ཉེ་བར་ལེན་པའི་ཆ་ལ་མ་རིག་རྒྱུ་གསུམ་རྐྱེན་བཞིར་གྲགས་པ།དོན་ལ་མ་རིག་པ་རྣམ་པ་གསུམ་གྱི་བྱེད་ལས་ཀྱིས་ཡུལ་ལ་མངོན་པར་ཞེན་ཅིང་ཨ་འཐས་འཁྲུལ་པའི་སྣང་བ་ལ་ཉེ་བར་ལེན་པའི་བྱེད་ལས་ཀྱིས་སེམས་མ་རིག་པའི་སྒོང་རྒྱར་འཐུམ་ནས་གཞིའི་ངང་མདངས་འོད་གསལ་ལྷུན་གྲུབ་བསྒྲིབ་པའི་རྐྱེན་གྱིས་ཀུན་གཞིར་འཕོས།ལྷུན་གྲུབ་འོད་ལྔའི་སྣང་བ་དངོས་པོར་འཐས་པའི་མ་རིག་པས་བསྒྲིབས་པས་ཉོན་ཡིད་དུ་འཕོས།ཤེས་རབ་མ་རིག་པས་བསྒྲིབས་པས་ཡིད་ཤེས་སུ་འཕོས།ཡེ་ཤེས་མ་རིག་པས་བསྒྲིབས་པས་རྣམ་ཤེས་སུ་འཕོས།མདོར་ན་ཡང་དག་པའི་ལམ་ལ་གཉིས་འཛིན་གྱིས་བསྒྲིབ་པ་སོགས་ཀྱི་རྐྱེན་ལས།ཡེ་ཤེས་ལྔའི་རང་མདངས་འོད་ཀྱི་གདངས་ལྔ་ཕྱི་གསལ་དུ་ཤར་བ་ལ།འཛིན་པ་ལས་རླུང་གཡོ་བའི་ཆོ་འཕྲུལ་གྱིས།ཆོས་དབྱིངས་ཡེ་ཤེས་ཀྱི་གདངས་དངོས་པོར་འཐས་ནས་འོད་མཐིང་ག་རུ་འཛིན་པ་དང་།དེ་བཞིན་དུ་མེ་ལོང་ཡེ་ཤེས།མཉམ་ཉིད་ཡེ་ཤེས།སོར་རྟོག་ཡེ་ཤེས།བྱ་གྲུབ་ཡེ་ཤེས་ཀྱི་གདངས་རྣམས་ལ་བདེན་ཞེན་གྱིས་དངོས་པོར་བཟུང་ནས།འོད་གདངས་དཀར་སེར་དམར་ལྗང་གི་རྣམ་པར་སྣང་ཞིང་།དེ་དག་ལ་བག་ཆགས་འཐས་པའི་བྱེད་ལས་ཀྱིས་རྩལ་དུག་ལྔ་དང་།འབྱུང་བ་ལྔ་རུ་བསྒྲིབས་པ་སོགས་ཀྱིས་མ་དག་སྙིགས་མའི་སྣང་བ་དུ་མའི་མཆེད་གཞིར་གྱུར་པ་ཡིན་ནོ། །དེ་དག་གི་དོན་རྣམས་མདོར་བསྡུ་ན་གཞི་ཡེ་ནས་རྣམ་པར་དག་ཅིང་སྐྱོན་ཡོན་གང་གིས་ཀྱང་བསླད་མི་འཇུག་ཅིང་།སྤྲོས་པའི་མཐའ་བརྒྱད་དང་བྲལ་བ་རྣམ་པར་ཐར་པའི་སྒོ་གསུམ་དང་ལྡན་པ་སྟེ།དེའི་རང་བཞིན་འགགས་པ་མེད་པའི་ཆ་ལས་ཡེ་ཤེས་ལྔའི་རང་གདངས་འོད་ལྔ་ཕྱི་གསལ་དུ་ཤར་བ་ལ།འོད་ལྔ་རང་སྣང་དུ་མ་ཤེས་པའི་སྒྲིབ་ཆ་དེ་ལ་རྒྱུ་བདག་ཉིད་གཅིག་པུའི་མ་རིག་པ་དང་།དེ་ལས་ལས་རླུང་གཡོ་བའི་ཆོ་འཕྲུལ་གྱིས་དྭངས་མ་དངོས་པོར་བསྒྲིབ་པའི་ཁ་དོག་གི་རྣམ་པར་འཐས་པའི་བྱེད་ལས་ཀྱིས་ཕྱི་འབྱུང་ཆེན་ལྔ་རུ་གྲུབ་པས།དེས་ནང་འབྱུང་ལྔ་བསྐྱེད་པ་དང་།དེའི་བྱེད་ལས་ཀྱིས་ནང་འབྱུང་སྙིགས་མར་འཐས་པས་ཕྱི་འབྱུང་ལྔའམ།འབྱུང་ཕྲན་ནམ།སྙིགས་མར་འཐས་པའི་ཕུང་པོ་ཁམས་དང་སྐྱེ་མཆེད་ཚོགས་བརྒྱད་སེམས་སེམས་བྱུང་དང་བཅས་པ་ལུགས་སུ་འབྱུང་སྟེ།འཁོར་བ་ཡོངས་སུ་མཆེད་ནས་འཁྲུལ་པ་སྣ་ཚོགས་ཀྱི་འདུ་བྱེད་ཅིང་གནས་པ་དང་།ཡང་དེ་དག་མི་རྟག་པར་ཚོགས་བརྒྱད་ལུགས་སུ་ལྡོག་སྟེ་སྟོང་པ་ཁྱབ་བརྡལ་ཆེན་པོའི་དབྱིངས་སུ་འཇིག་པ་ཡིན་ནོ། །ལར་རྣལ་འབྱོར་ལམ་གྱི་གནས་སྐབས་དང་སྦྱར་ནས་ལུགས་འབྱུང་ལྡོག་གི་ཚུལ་བརྗོད་ན།སེམས་ལས་སེམས་བྱུང་གི་རྟོག་པ་དང་པོ་སྐྱེས་པ་དང་།བར་དུ་གནས།ཐ་མ་འགྱུར་ཏེ་ཡལ་བ་ལྟར།སེམས་ཀྱི་ཀློང་དུ་ཐིམ་པའི་བར་མ་ཆད་པ་སྟེ།དེ་ཡང་ཐིམ་ཞེས་པ་སྤྲིན་ནམ་མཁར་དེངས་པ་ལྟ་བུར།སེམས་དང་སེམས་བྱུང་གི་རྟོག་པ་གཉིས་མེད་དུ་རང་གཞིའི་ཀློང་དུ་རང་གྲོལ་བ་ཡིན་ནོ། །དེའི་ན་སེམས་ཀྱི་ངོ་བོ་སྟོང་པ་ཆོས་སྐུ།རང་བཞིན་འགགས་པ་མེད་པར་གསལ་བ་ལོངས་སྐུ།ལམ་སྣང་མངོན་དུ་བྱེད་པ་སྤྲུལ་སྐུ་སྟེ།སྐུ་གསུམ་མཉམ་པ་ཉིད་ཀྱི་དབྱིངས་སུ་གྲོལ་བའི་ས་ལ་འཕེན་པ་ཡིན་ནོ། །བདུན་པ་ངང་ཚུལ་ཇི་བཞིན་དུ་རྟོགས་ན་འབྲས་བུ་གཞན་ལས་འཕགས་ཚུལ་བསྟན་པ་ནི།ངང་ཚུལ་རྟོགས་པའི་སོགས།ཁྱད་དུ་འཕགས༔ ཞེས་པས་བསྟན་ཏེ།དེ་ལ་འདིར་ཡེ་གཞི་ཀུན་ཏུ་བཟང་པོའི་ངང་ཚུལ་ཇི་བཞིན་དུ་རྟོགས་ནས།གཞིའི་ཆོས་ཉིད་འགྱུར་བ་མེད་པ་ནམ་མཁའི་རང་བཞིན་དུ་ཤེས་པའི་ཤེས་རབ་ཆེན་པོ་སྟོབས་སུ་གྱུར་ནས།ངང་གནས་ཀྱི་ཡེ་ཤེས་མངོན་དུ་གྱུར་ཅིང་མ་རིག་པ་གཞི་ལ་སངས་ནས་གཉིས་འཛིན་གྱི་འཆིང་བ་དབྱིངས་སུ་ཞིག་སྟེ།མ་དག་པ་འཁོར་བའི་སྣང་ཞེན་གྱི་དངོས་པོར་འཐས་པ་ཐམས་ཅད་ཀུན་ཀྱང་།འོད་གསལ་ཆོས་ཉིད་ཀྱི་རོལ་པར་དག་དབྱིངས་དྭངས་མའི་འོད་གསལ་ཉིད་དུ་གོ་འཕོས་པ་དང་།ཐབས་ཟབ་མོ་སྒོ་ཡུལ་རླུང་རིག་གི་གནད་ལ་བརྟེན་ནས་ཚེ་འདིར་འཇའ་ལུས་འཕོ་བ་ཆེན་པོའི་སྐུ་འགྲུབ་པར་བྱེད་པའི་མྱུར་ལམ་འདི་ལ་བརྟེན་ནས།སྔོན་གྲུབ་པའི་དབང་ཕྱུག་རིག་འཛིན་དགའ་རབ་རྡོ་རྗེ་དང་།ཤྲཱི་སིདྷ་ལ་སོགས་དུས་གསུམ་དུ་གཤེགས་ཤིང་བཞུགས་པའི་རྒྱལ་དང་རྒྱལ་སྲས་སོགས་བྱང་ཆུབ་སེམས་དཔའ་འཕགས་པའི་ས་ན་གནས་པ་ཐམས་ཅད་ཀྱི།བགྲོད་པ་གཅིག་པུའི་ལམ་མཆོག་ཏུ་གྱུར་པ།རྒྱལ་བ་ཀུན་གྱི་མེས་པོ་ཀུན་བཟང་རྡོ་རྗེ་འཆང་ཆེན་པོའི་ཐུགས་ཀྱི་གསང་བ་བསམ་གྱི་མི་ཁྱབ་པའི་ཆོས་ཉིད་རིག་པའི་ཡེ་ཤེས་ཆེན་པོ་རྒྱུ་འབྲས་ལས་འདས་པའི་དབྱིངས་སུ།འཁོར་འདས་འུབ་ཆུབ་རོལ་པའི་ཀློང་ཆེན་པོའི་དགོངས་པ་མངོན་དུ་གྱུར་ཅིང་ཡེ་གྲོལ་ཆོས་སྐུའི་ཀློང་དུ་གདིང་ཐོབ་པ་སྟེ།འདི་ལྟ་བུའི་མྱུར་ལམ་འོད་གསལ་ཐོད་རྒལ་གྱི་གདམས་པ་ཟབ་མོ་འདི་ཉིད།དཔེར་ན་སའི་སྙིང་པོ་གསེར་ལྟ་བུ།ཆུ་ཡི་སྙིང་པོ་ལན་ཚྭ།རླུང་གི་སྙིང་པོ་ག་བུར་ལྟ་བུ་སྟེ།ལམ་དང་འབྲས་བུ་ཀུན་གྱི་སྙིང་པོ་ཡང་གསང་བླ་ན་མེད་པའི་ཆོས་ཟབ་མོ་ཚེ་འདིར་འཇའ་ལུས་འཕོ་ཆེན་དྭངས་མའི་སྐུར་སྨིན་པར་བྱེད་པའི་ཕྱིར་ན།ལམ་དང་སྒྲུབ་པ་ཀུན་ལས་འདི་ཉིད་ཁྱད་པར་བདུན་གྱིས་འཕགས་པ་ཡིན་ཏེ།དེ་ཇི་ལྟར་འཕགས་ཞེ་ན།ལམ་དང་སྒྲུབ་པ་གཞན་ལས་ལྟ་ཅི་སྨོས་ཏེ།ཐེག་པའི་ཡང་རྩེ་ནི་ཨ་ཏི་རྫོགས་པ་ཆེན་པོ་མན་ངག་སྡེའི་ཁྱད་ཆོས་གཞི་ཁྲེགས་ཆོད་ཡིན་ཀྱང་།དེ་ལས་ཀྱང་ཐེག་མཆོག་བླ་ན་མེད་པ་མྱུར་ལམ་ཐོད་རྒལ་འདི་ཉིད་ཁྱད་དུ་འཕགས་པ་ཡིན་ཏེ།ཁྲེགས་ཆོད་ཀྱི་ལམ་ནས་ས་རྡོ་རི་བྲག་ལ་སོགས་པ་མ་དག་སྙིགས་མའི་སྣང་བ་ཐམས་ཅད་སྐད་ཅིག་ལ་དག་པར་མི་ནུས་ཤིང་།ཐོད་རྒལ་གྱིས་སྣང་བ་སྣང་དུས་ཉིད་ནས་འོད་ལྔར་འཕོས་པའི་ཁྱད་པར་དང་།ཁྲེགས་ཆོད་ཀྱི་རིག་པ་འོད་གསལ་སྒྲིབ་གཡོགས་དང་བྲལ་བ་ཙམ་ལས་མི་མཐོང་།ཐོད་རྒལ་གྱིས་སྒོ་ཡུལ་རླུང་རིག་གི་གནད་རྟོགས་པས་འོད་གསལ་མངོན་སུམ་དུ་དབང་པོའི་སྒོར་མཐོང་བའི་ཁྱད་པར་དང་།ཁྲེགས་ཆོད་ཀྱིས་ཚོགས་དྲུག་གི་ཡུལ་སྣང་སྤངས་པ་ལྟར་བྱས་ཏེ་སེམས་ཀྱི་གདངས་ཚོལ་བ་དང་།ཐོད་རྒལ་གྱིས་འཁྲུལ་པའི་སྣང་བ་རང་སར་དག་ནས།དབྱིངས་དང་ཡེ་ཤེས་འདུ་འབྲལ་མེད་པའི་ངང་ནས་སྒྲོན་མ་བཞིའི་གདངས་ལ་ལོངས་སྤྱོད་པའི་ཁྱད་པར་དང་།ཁྲེགས་ཆོད་ཀྱིས་རགས་པའི་རྩ་རླུང་འཛིན་རྩོལ་ཅན་ལ་བརྟེན་ནས་གེགས་དང་གོལ་ས་མང་བ་ལ།ཐོད་རྒལ་གྱིས་རྩོལ་མེད་ཀྱི་ཡེ་ཤེས་རང་སོར་བཞག་ནས་དེ་ལ་ལམ་དུ་བྱས་པས།དུག་གསུམ་འཁྲུལ་པའི་ལས་རླུང་རང་མལ་དུ་སོད་ནས།རགས་པའི་རྩ་ཐིག་རླུང་གསུམ་དྭངས་མར་འཕོ་ནུས་པའི་ཁྱད་པར།ཁྲེགས་ཆོད་ཉམས་སུ་ལེན་པའི་སྐྱེས་བུ་རྣམས་ཀྱང་གྲོལ་བའི་ས་ལ་འཕེན་ནའང་ལུས་རྡུལ་ཕྲན་དུ་དེངས་པ་ཙམ་ལས་འོད་གསལ་དུ་མི་སྨིན།ཐོད་རྒལ་གྱིས་སྤྱན་དང་མངོན་ཤེས་རླབས་པོ་ཆེའི་བདག་ཉིད་འཇའ་ལུས་འཕོ་བ་ཆེན་པོའི་སྐུར་སངས་རྒྱས་པའི་ཁྱད་པར།ཁྲེགས་ཆོད་ལ་བརྩོན་འགྲུས་དྲག་པོའི་སྒོ་ནས་ཉམས་སུ་བླངས་ན་ཚེ་གཅིག་གིས་སངས་རྒྱས་བའི་དམ་བཅའ་ཡིན་ཏེ།ཐོད་རྒལ་གྱིས་སྒོ་ཡུལ་རླུང་གི་གནད་ལ་བརྟེན་ནས་བར་མ་ཆད་པར་བསྒོམས་ན་རབ་མི་ལོ་བདུན།འབྲིང་གི་བཅུ།ཐ་ནའང་མི་ལོ་བཅུ་གསུམ་གྱི་སངས་རྒྱས་པའི་ཁྱད་པར།ཁྲེགས་ཆོད་ཀྱིས་ཚེ་འདིར་འཕོ་ཆེན་དྭངས་མའི་སྐུ་མི་འགྲུབ་སྟེ།ཐོད་རྒལ་གྱིས་ཚེ་གཅིག་ལུས་གཅིག་འདི་ཉིད་ལ་འཇའ་ལུས་འཕོ་བ་ཆེན་པོའི་སྐུ་འགྲུབ་པའི་ཁྱད་པར་ཏེ།འདི་ལྟ་བུའི་ཁྱད་ཆོས་བདུན་གྱིས་འཕགས་པའི་མྱུར་ལམ་ཟབ་མོ་འདི་ཉིད་གང་ཟག་སྐལ་བ་དང་ལྡན་པ་རྣམས་ཀྱིས་ལེ་ལོ་དང་གཡེང་བ་མེད་པར་ཉམས་སུ་བླངས་ན།ཚེ་འདིར་འཇའ་ལུས་འོད་ཀྱི་སྐུ་རུ་སྨིན་པ་རྒྱལ་བ་རྡོ་རྗེ་འཆང་ཆེན་པོའི་བཀའ་དྲི་མ་མེད་པ་ཡིན་ནོ། །བརྒྱད་པ་ལམ་རྟགས་སྣང་བ་བཞིའི་ས་མཚམས་བསྟན་པ་ལའང་བཞི་ལས།དང་པོ་ཆོས་ཉིད་མངོན་སུམ་གྱི་སྣང་བ་ནི།དེ་ལྟར་རྩེ་གཅིག་སོགས།རྟོགས་ནས་སུ༔ ཞེས་པའི་བར་གྱིས་བསྟན་ཏེ།དེ་ལྟར་མྱུར་ལམ་ཐོད་རྒལ་གྱི་གདམས་པ་འདི་ཉིད་མི་འགུལ་བ་གསུམ་ལ་གཞི་བཅས་ཏེ།ཉིན་མོ་ཆོས་སྐུའི་རྟེན་ཉི་མ་དང་།མཚན་མོ་ལོངས་སྐུའི་རྟེན་ཟླ་བ་དང་།ནང་ནུབ་ཏུ་སྤྲུལ་སྐུའི་རྟེན་ཨ་ལོ་ཀེ་ལ་ལྟ་བ་སོགས་ཀྱིས་རྩེ་གཅིག་ཏུ་ཉམས་སུ་ལེན་ཅིང་གནད་དུ་བསྣུན་པའི་ཚེ་ན།བསྐྱེད་རིམ་ལྷུར་ལེན་བྱས་ཏེ།ཆོས་ཉིད་ཀྱི་ངང་མདངས་བློ་ཡིས་བཅོས་ནས་ལྷ་མི་གཟུགས་ཀྱི་རྣམ་པར་འཆོས་པ་ལྟ་བུ་དང་།གཞི་ཀ་དག་གི་དགོངས་པ་ཁྲེགས་ཆོད་ལྟ་བུར་ལྷུན་གྲུབ་ཀྱི་ཡོན་ཏན་ཐམས་ཅན་ཕྱི་གསལ་དུ་མེད་ལ།ནང་གསལ་དུ་ལྐོག་ཏུ་གྱུར་ནས་གནས་ཤིང་མངོན་སུམ་ཉིད་དུ་མ་གྱུར་པ་ལྟ་བུ་མ་ཡིན་ཅིང་།ལྷུན་གྲུབ་སྐུ་དང་ཡེ་ཤེས་ཀྱི་རོལ་པ་ཐམས་ཅད་མངོན་གྱུར་ཆེན་པོའི་ངང་དུ་བརྟན་པ་ཐོབ་པར་བྱེད་ཅིང་།སྐུ་གསུམ་རང་ཐོག་ཏུ་གྲོལ་བའི་ཐབས་མཆོག་ཏུ་གྱུར་པ་ཤེས་རབ་ཀྱི་མིག་ལ་ཡེ་ཤེས་ཀྱི་སྤྱན་ཚུད་པས།གདོད་མ་གཞིའི་རང་བཞིན་འགགས་པ་མེད་པའི་ཡེ་ཤེས་ལྔ་ཡི་རང་གདངས་འོད་གསལ་དྭངས་མ་ལྔའི་ཐིག་ལེ་འོད་ལྔའི་རང་བཞིན་ཅན་དུ་ཆོས་ཉིད་ཀྱི་སྣང་བ་དབང་པོའི་སྒོ་རུ་མངོན་སུམ་དུ་སྣང་ཞིང་ངང་མངོན་དུ་གྱུར་པས་ན།དེ་ཉིད་བླང་དོར་མེད་པའི་ངང་ལ་སྒོ་གསུམ་གྱི་གནད་མ་འཆོལ་བར་འོད་གདངས་མངོན་དུ་བྱས་ནས་ཆམ་གྱིས་བཞག་པས་མཚན་མ་མེད་པ་དོན་གྱི་ཞི་གནས་ཏེ།སྒོ་གསུམ་གཡོ་མེད་དུ་གནས་པས་རྟོག་པ་ཕྲ་རགས་ཐམས་ཅད་གདོད་མའི་ཡེ་གཞིའི་ཀློང་དུ་ཞི་བས་ན་ཞི་དང་།རིག་པ་རང་གི་ངང་དུ་བརྟན་པ་ཐོབ་པས་ན་གནས་པའོ། །དེ་ལྟར་སྣང་སེམས་ཐམས་ཅད་ལྷུན་གྲུབ་སྐུ་དང་ཡེ་ཤེས་ཀྱི་རོལ་པར་འཕོས་པས་ཆོས་ཉིད་འོད་གསལ་གྱི་སྣང་བ་ལྷག་པར་མཐོང་ནས་རྒྱལ་བ་རྣམས་ཀྱི་སྐུ་གསུང་ཐུགས་རྡོ་རྗེ་གསུམ་གྱི་དབང་དང་བྱིན་རླབས་དངོས་གྲུབ་ཐམས་ཅད་རང་གི་སྒོ་གསུམ་དང་ཐ་མི་དད་པར་ཞུགས་པས།ལུས་སྨིན།ངག་དག།ཡིད་འོད་གསལ་དུ་འཕོས་པའི་ལྟས་མཚན་ཚུལ་བཞིན་དུ་འབྱུང་བ་ནི།ཕྱི་རྟགས་དབྱིངས་སྣང་ཡོལ་བ་བཀྲམ་པ་ལྟ་བུའི་རྣམ་པ་ལ་ལྷུན་ཆགས་ཤིང་ངང་བརྟན་པ་དང་།ཐིག་ལེ་རྣམས་ཀྱང་ཉ་མིག་ཙམ་ནས་མཐེབ་གོར་ཙམ་གསུམ་འབྲེལ་དང་ལྔ་ལྡན་ལ་སོགས་པ་འཆར་ཞིང་།དེ་དག་གི་གོ་མཚམས་རྣམས་སུ་རིག་གདངས་རྡོ་རྗེ་ལུ་གུ་རྒྱུད་གསེར་སྐུད་ལྡིང་བ་ལྟ་བུར་འགྲོ་འོང་གི་རྣམ་པར་འཆར་བ་འབྱུང་སྟེ།དེ་ལ་ཆེས་ཆེར་གོམས་པས་དབྱིངས་དང་ཐིག་ལེའི་སྣང་བ་ཐམས་ཅད་ཇེ་བརྟན་དུ་སོང་བ་དང་།མ་དག་པ་འཁོར་བའི་ས་ནས་ཁྲེགས་ཆོད་ཆོས་ཉིད་ཀྱི་གནས་ལུགས་ཇི་ལྟ་བ་བཞིན་དུ་ཤེས་པས་ན།དོན་དམ་ཆོས་ཉིད་ཀྱི་བདེན་པ་མངོན་སུམ་དུ་མཐོང་ཞིང་རྣམ་པར་གྲོལ་བའི་ས་ཐོབ་ནས།སྔར་མ་མཐོང་བའི་ཆོས་ཉིད་འོད་གསལ་གྱི་སྣང་བ་ཡེ་ཤེས་ལྷུན་གྲུབ་རིན་པོ་ཆེའི་གདངས་ཡིད་དཔྱོད་དུ་མ་སོང་བར།མངོན་སུམ་དབང་པོའི་སྒོ་རུ་མཐོང་བའི་ཡོན་ཏན་རྣམས་བརྗོད་ལས་འདས་ཤིང་།ས་དང་ལམ་གྱི་དབྱེ་ན།མདོ་ལམ་གྱི་ས་དང་པོར་སླེབས་པ་ཡིན་ཞིང་།སྔགས་ལམ་ལྟར་ན་མ་དག་འཁྲུལ་པའི་སྣང་སེམས་ཐམས་ཅད་འོད་གསལ་ཆོས་ཉིད་ཀྱི་རང་བཞིན་དུ་རྣམ་པར་དག་ནས།ཁྲེགས་ཆོད་གཞིའི་གནས་ལུགས་ཇི་ལྟ་བ་མངོན་དུ་གྱུར་ཅིང་།ངང་ཚུལ་ཇི་བཞིན་དུ་རྟོགས་ནས་མ་རིག་པའི་སྒྲིབ་པ་དབྱིངས་སུ་སངས་ཏེ།རིག་པ་ཡེ་ཤེས་ཆེན་པོར་སྨིན་པས་ན།སྔགས་ལམ་གྱི་རྣམ་པར་སྨིན་པའི་རིག་འཛིན་གྱི་ས་དོན་གྱི་ཐོབ་པ་ཡིན་ནོ། །ཡང་།ལམ་འདིའི་གནད་འགགས་སོགས།གདིང་ཐོབ་བོ༔ ཞེས་པས་བསྟན་ཏེ།དེ་ལྟར་ཡང་གསང་བླ་ན་མེད་པའི་མྱུར་ལམ་ཟབ་མོའི་འདིའི་གནད་འགགས་རྣམས།བླ་མ་དམ་པའི་མན་ངག་གི་དགོངས་དོན་ལ་བརྟེན་ནས་ཚུལ་ཇི་ལྟ་བ་བཞིན་དུ་ཤེས་པར་བྱས་ཏེ།སྒོ་ཡུལ་རླུང་རིག་གི་གནད་ཀྱིས་ཕྱིའི་ཡུལ་རྐྱེན་ནམ་མཁའ་དང་ཉི་ཟླ་གསུམ་ལ་བརྟེན་ནས།ལེ་ལོ་དང་གཡེང་བ་མེད་པར་རྩེ་གཅིག་ཏུ་ལམ་མཆོག་ཀུན་གྱི་སྙིང་པོ་འདི་ཉིད་ཉམས་སུ་བླངས་ཏེ།སྒྲུབ་པ་ལྷུར་ལེན་ལ་བརྩོན་པའི་རིགས་ཅན་སྐྱེས་བུ་མི་མཆོག་དམ་པ་གང་མཆིས་པ་རྣམས་ཀྱིས།ལམ་མཆོག་འདི་ཉིད་ཚུལ་བཞིན་དུ་ཉམས་སུ་བླངས་ན་ཟླ་བ་དྲུག་གིས།ཕྱི་དབྱིངས་དང་ཐིག་ལེ་རིག་གདངས།ནང་བདེ་གསལ་མི་རྟོག་པའི་དགོངས་ཉམས་ལ་སོགས་པ་སྣང་ཉམས་ཤེས་ཉམས་ཀུན་ལ་ངེས་པར་བརྟན་པ་ཐོབ་ཅིང་།འོད་གསལ་ཆོས་ཉིད་ཀྱི་སྣང་བ་མངོན་སུམ་དུ་དབང་པོ་དྭངས་མའི་སྒོ་རུ་སྣང་བ་ཡིན་ནོ། །དེའི་ཕྱིར་ན་ཤེས་རབ་ཀྱི་མིག་ལ་ཡེ་ཤེས་ཀྱི་སྤྱན་ཐོབ་ནས།ལྷུན་གྲུབ་ཡེ་ཤེས་ཀྱི་གདངས་མངོན་སུམ་དུ་མཐོང་བའི་ཡོན་ཏན་གྱི་སྣང་སེམས་ཐམས་ཅད་དྭངས་མར་འཕོས་པས།ཕྱིན་ཆད་འཁོར་བར་མི་ལྡོག་པའི་གདིང་མངོན་གྱུར་དུ་ཐོབ་པས་ན།འདི་དུས་སུ་ཚེ་འཕོས་ཏེ་བར་ཆད་ནའང་སྐྱེ་བ་སྤྲུལ་པའི་སྐུ་ཐོབ་སྟེ།འཁོར་བར་མི་ལྟུང་ཞིང་ཐར་པ་ཆེན་པོའི་ལམ་སྣ་ཟིན་པར་འགྱུར་རོ། །དེ་ལྟར་ཆོས་ཉིད་མངོན་སུམ་དུ་མཐོང་བའི་ཚུལ་བསྟན་པ་དང་།དེའི་ཡོན་ཏན་གྱི་ས་ལམ་རིམ་པར་མི་ལྟོས་པར་དོན་གྱི་ཐོབ་ཚུལ་བསྟན་པའི་ལེའུ་སྟེ་བཅུ་པའོ་ཞེས་དང་།ས་མ་ཡ༔ གུ་ཧྱ༔ ཞེས་པ་དམ་ཚིག་གསང་བའི་བཀའ་རྩིས་གྱིས་རྒྱས་གདབ་པའི་དོན་ཡིན་ནོ། །། །གཉིས་པ་ཉམས་སྣང་གོང་འཕེལ་གྱི་ཚུལ་བཤད་པ་ནི།གསང་སྔགས་ཐེག་ཆེན་སོགས།རྫོགས་པ་ཡིན༔ ཞེས་པས་བསྟན་ཏེ།དེ་ལྟར་གསང་སྔགས་རྡོ་རྗེ་ཐེག་པའི་མྱུར་ལམ་ཟབ་མོ་འདི་ཉིད་ཐེག་པ་འདིར་མོས་པའི་སྐྱེས་བུ་རྣམས་ཀྱིས་ལེ་ལོ་དང་ཕྱི་བཤོལ་མེད་པར་ཉམས་སུ་བླངས་ཏེ།འདུས་བྱས་འཁོར་བའི་ཆོས་ལ་སྙིང་པོ་དང་བློ་གཏད་མེད་པའི་དོན་གོ་བ་རང་རྒྱུད་ལ་ལོན་པར་བྱས་ནས་འཁོར་བ་རིང་དུ་སྤངས་ཏེ།འོད་གསལ་གསང་བ་ཆེན་པོའི་ལམ་མཆོག་ངེས་པ་དོན་གྱི་སྙིང་པོ་དེ་ལ་སྤྱོད་པའི་སྐྱེས་བུ་སྐལ་བཟང་ལས་འཕྲོ་འཛོམ་པའི་རྣམ་འབྱོར་པ་དག་གིས།བརྒྱུད་ལྡན་བླ་མ་དམ་པའི་མན་ངག་གི་མཐུ་དང་བྱིན་རླབས་ལ་བརྟེན་ནས།འདུས་མ་བྱས་པའི་ཡེ་ཤེས་ལྷུབ་གྲུབ་རིན་པོ་ཆེའི་ལམ་གྱི་འབྲས་བུ་མཐར་ཕྱིན་གྱི་བར་དུ་བརྩོན་འགྲུས་དྲག་པོའི་སྒོ་ནས་ལམ་ཉམས་སུ་བླང་བའི་ཚེ་ན།ཕྱི་དབྱིངས་དང་ཐིག་ལེ།ནང་བདེ་གསལ་མི་རྟོག་པའི་ཡེ་ཤེས་རྣམས་གོང་ནས་གོང་དུ་འཕེལ་བར་གྱུར་རོ། །དེ་ལྟར་རིག་པ་ཡེ་ཤེས་རྣལ་མའི་དོན་ཟབ་མོ་མངོན་སུམ་དུ་མཐོང་བར་བྱེད་པའི་མན་ངག་ཁྱད་པར་ཅན་འདི་ལ།བློ་ཡིད་གཉིས་དང་ཐེ་ཚོམ་མེད་པར་རྩེ་གཅིག་ཏུ་ཉམས་སུ་བླངས་ནས་ལེ་ལོ་མེད་པར་གནད་དུ་བསྣུན་པའི་ཚེ་ན།ཕྱི་ལྟར་འོད་གསལ་གྱི་སྣང་བ་འོད་ལྔ་གྱེན་འགྲེང་དང་རྩིབ་ཤར།ཐིག་ལེ་དང་ཐིག་ཕྲན་སོགས།དབྱིངས་དང་ཐིག་ལེ།ལྷ་སྐུ་གཞལ་ཡས་ཁང་ལ་སོགས་པ་ཐམས་ཅད་རིམ་བཞིན་དུ་བསྒོམ་ཉམས་གནད་དུ་བསྣུན་པའི་སྟོབས་ཀྱིས་གོང་འཕེལ་གྱི་ཚུལ་དུ་སྣང་བ་སྟེ།དེ་ཡང་དབྱིངས་ཀྱི་སྣང་བ་ལ་གྲུ་ཆད་ཀྱིས་རྣམ་པ་ནི་གཞལ་ཡས་ཁང་གི་ལོགས་གཅིག་འཆར་བ་ལྟ་བུ་ནས།རིམ་པར་དབྱིངས་སྣང་སྣ་ཚོགས་མཆོད་རྟེན་གྱི་རྣམ་པ་ལྟ་བུ་དང་།མདུང་རྩེ་དང་།རལ་གྲིའི་དབྱིབས་ལྟ་བུ་དང་།འཁོར་ལོ་དང་།རྡོ་རྗེ།པདྨ་ལ་སོགས་པའི་རིགས་ལྔའི་ཕྱག་མཚན་གྱི་རྣམ་པ་དུ་མ་དང་།གཞན་ཡང་རེ་ལྡེ་དང་རྩིབ་གུག།མེ་ལོང་དང་།འོད་ལྔ་སྤྲིན་དཔུང་གི་རྣམ་པ་ལྟ་བུ་སོགས་དབྱིངས་ཀྱི་སྣང་བ་གྲངས་མེད་པའི་རྣམ་པར་མཆེད་པ་དང་།ཐིག་ལེའི་སྣང་བ་ཡང་ཉ་མིག་ཙམ་ནས་ཆེས་ཆེར་རིམ་པ་བཞིན་དུ་གོང་དུ་འཕེལ་བ་ནི།མཐེབ་རྩེ་དང་མཛུབ་མོའི་རྩེ་གཉིས་སྤྲད་པ་ལ་མཐེབ་གོར་དང་།དེ་ནས་ཡང་བསྒོམས་སྟོབས་ཀྱིས་ཐིག་ལེ་ཁམ་ཕོར་ཙམ་ནས་རྔ་ཆུང་གི་ཚད་ཙམ་དང་།ཡང་ཆེར་འཕེལ་ནས་ཤིང་རྟའི་འཕང་ལོ་དང་།ཕུབ་ཀྱི་རྦ་འཁོར་ཙམ་དང་།ཐིག་ལེ་ཤིན་ཏུ་ཆེ་བའི་ཚད་ནི་འདོམས་ཀྱིས་འཁོར་ཙམ་གྱི་བར་དུ་མཆེད་པ་ཡིན་ནོ། །དེ་དག་འོད་ལྔའི་ཁ་དོག་དང་ལྡན་ཞིང་གསལ་ལ་འཚེར་བ་ལྷུན་འཐུག་ཅིང་དབྱིབས་མུ་ཁྱུད་ཀྱི་རྣམ་པ་ཅན་དུ་སྣང་སྟེ།དེ་ཡང་རིག་པ་གནད་དུ་དབབ་པའི་རྟགས་སུ་དབྱིངས་དང་ཐིག་ལེ་ཐམས་ཅད་དབྱིངས་ཀྱི་གོ་ར་ལས་མི་གཡོ་བར་གནས་པ་དང་།རླུང་གི་ཆ་དག་པའི་རྟགས་སུ་དེ་དག་མི་འགུལ་ཞིང་དབྱིངས་ཀྱི་ཀློང་དུ་ལྷན་ནེར་གནས་པའི་རྣམ་པར་སྣང་བའོ། །དེ་དག་གི་སྐབས་རྣམས་སུ་རིག་གདངས་རྡོ་རྗེ་ལུག་རྒྱུད་ནི་དང་པོ་ཕྲ་ལ་འཁྱོགས་པ།དཔེར་ན་རྟ་རྔའི་ཉག་མ་གཅིག་གི་ཚད་ཙམ་ནས་རིམ་བཞིན་དེ་ཉིད་གསུམ་ཆར་འགྱུར་བའི་ཚད་ལ་ཉག་ཕྲན་ཙམ་པ་དང་།དེ་ལས་ཆེར་སྨིན་ཏེ་མུ་ཏིག་གི་ཕྲེང་བ་ལྟ་བུའམ།གསེར་གྱི་སྐུད་པ་ལྡིང་བ་ལྟ་བུ་ལ།འོད་གདངས་ཁ་དོག་ལྔ་དང་ལྡན་པ་གསལ་ལ་དྭངས་པའི་རྣམ་པར་འཆར་བ་དང་།ཡང་ཕྲ་ཞིང་འཁྱོག་པའི་རྣམ་པ་ཅན་ལ་འཁྱོག་མཚམས་རྣམས་སུ་ཐིག་ལེ་དང་ཐིག་ཕྲན་གྱིས་བརྒྱན་པ།རླུང་གི་གནད་ལ་བརྟེན་ནས་གྲོལ་བའི་རྟགས་སུ་འགྲོ་འོང་གི་རྣམ་པ་རུ་འཆར་བ་འབྱུང་བ་ཡིན་ནོ། །དེ་ལྟ་བུའི་རིག་པ་འོད་ཀྱི་གདངས་སྣང་དེ་དག་རིམ་པ་བཞིན་དུ་ཆོས་ཉིད་མངོན་སུམ་གྱི་དུས་སུ་སྐྱེན་པོས་མདའ་འཕང་བ་ལྟ་བུའམ།བུང་བ་བཅུད་ལ་འཁོར་བ་ལྟ་བུའི་རྣམ་པར་སྣང་བ་ནས་ཆེར་སྨིན་ཏེ།གོང་འཕེལ་གྱི་དུས་སུ་བྱ་རྒོད་ནམ་མཁའ་ལ་དལ་གྱིས་འགྲོ་བ་ལྟ་བུ་རིག་གདངས་ཅུང་ཟད་བརྟན་པར་འགྱུར་ཏེ།དེ་ནས་ཡང་ཉམས་ལེན་ལ་བར་མ་ཆད་པར་གནད་དུ་བསྣུན་པའི་ཚེ་ན།མུ་ཏིག་ཕྲ་མོ་བསྟར་ལ་བརྒྱུས་པ་བཞིན་དུ་རིག་གདངས་རྡོ་རྗེ་ལུ་གུ་རྒྱུད་ཆེར་སྨིན་ཏེ།གོང་ལྟར་རིམ་པ་བཞིན་དུ་ཆེར་འཕེལ་བ་དང་།ཁྱད་པར་རིག་པ་དབྱིངས་ལས་མི་གཡོ་བར་ལྷན་ནེར་གནས་ཤིང་ཇེ་བརྟན་དུ་འགྱུར་བ་ཡིན་ནོ།དེ་ལྟར་ལམ་ཚུལ་བཞིན་དུ་ཉམས་སུ་བླངས་པའི་མཐར་ཐུག་ནི་ཟད་པའི་སར་ཕྱིན་ནས།མ་དག་པའི་སྣང་བ་ས་རྡོ་རི་བྲག་ལ་སོགས་པ་ཕྱི་ནང་སྣོད་བཅུད་དུ་གཟུང་བའི་དངོས་པོ་གཟུགས་བརྙན་གྱི་རྣམ་པ་རྒྱ་ཆེ་ལ་གྲངས་མང་བ་ལྟར་སྣང་བ་ཀུན་ཀྱང་།དག་པ་ཡེ་ཤེས་ཀྱི་རོལ་པར་སྨིན་ཏེ།མ་དག་སྒྱུ་མ་ལྟ་བུའི་སྣང་བ་ཐམས་ཅད་དཔེར་ན་རྡུལ་ཕྲ་རབ་ཀྱི་ཆ་ཙམ་ཡང་མི་མངོན་པར་དག་དབྱིངས་དྭངས་མ་ཉིད་དུ་གོ་འཕོས་ཏེ།གང་ཤར་གང་སྣང་ཐམས་ཅད་འོད་ལྔ་དང་འཇའ་ཚོན་གྱི་རྣམ་པར་སྣང་ཞིང་།མ་དག་འཁྲུལ་པའི་སྣང་སེམས་ཐམས་ཅད་སྐུ་དང་ཡེ་ཤེས་ཀྱི་རོལ་པར་ཤར་བའི་ཚེ་ན།དེ་ནི་ལམ་མཐར་སོན་ནས་ཕྱི་ཡི་དབྱིངས་དང་ཐིག་ལེ་རྣམས་ཀྱི་འཕེལ་ཚད་རྫོགས་པ་ཡིན་པས་གནད་དུ་ཤེས་པར་བྱའོ། །དེ་ནས་ནང་རྟགས་འབྱུང་ཚུལ་ནི།ནང་རྟགས་ལུས་དང་སོགས།རབ་ཏུ་འཁྲུགས༔ ཞེས་པས་བསྟན་ཏེ།དེ་ལྟར་མྱུར་ལམ་ཟབ་མོ་འདི་ཉིད་ཉམས་སུ་བླང་བའི་སྟོབས་ཀྱི་མ་དག་པའི་རླུང་ལྔར་དག་པ་ཡེ་ཤེས་ཀྱི་རླུང་གིས་རྒྱས་ཐེབས་ནས་སྨིན་པའི་ཚེ་ན།ནང་རྟགས་ལུས་དང་རྩའི་ཁམས་ལ་བརྟེན་ནས་འབྱུང་སྟེ།དེའི་ན་ལུས་རྩའི་དྲྭ་བ་དང་།རྩ་རླུང་གི་གྲོང་ཁྱེར་གསུངས་པ་ལྟར།རྩ་ཁམས་འཁྲུགས་པའི་རྐྱེན་རླུང་ལྔའི་འཕེལ་གྲིབ་ལ་བརྟེན་ནས་འབྱུང་བ་ཡིན་ཏེ།དེ་ཇི་ལྟར་འབྱུང་བ་ཡིན་སྙམ་ན།ཕྱི་སློང་ལྷ་འདྲེའི་ཆོས་འཕྲུལ་ཐན་དང་ལྟས་ངན་སྣ་ཚོགས་གཟུགས་ཅན་སྣང་བའི་ཡུལ་དང་།གཟུགས་མེད་རྨི་སྣང་དང་ཡིད་ཀྱི་ཁམས་སུ་ཤར་བ་མི་སེམས་བདུད་ཀྱི་བསྒྱུར་ནས་ཆོས་མ་ཡིན་པའི་ལམ་ལ་ཁ་དྲངས་ཚེ་བདེན་པར་འཛིན་ཅིང་ལོག་ལམ་དུ་བློ་འཇུག་པ་དང་།གདམས་པ་ཟབ་མོ་ལ་ཡིད་ཆེས་མེད་ཅིང་སྐུར་འདེབས་བྱེད་པ་དང་།ཉམས་ལེན་གྱི་འཕྲོ་དོར་ནས་ཆོས་ལ་མི་བརྩོན་པ།རྨི་སྣང་ལ་བགེགས་ལྷར་བརྫུས་ནས་ལུང་སྟོན་པ་དང་།ལྷ་འདྲེའི་ཆོ་འཕྲུལ་གྱིས་སྐུ་གསུང་ཐུགས་ཀྱི་རྟེན་རྙེད་པ།དངོས་ཅན་ས་དང་རྡོ་སོགས་ལ་ལག་རྗེས་འཇོག་པ།འཇིག་རྟེན་པའི་ཆོས་ལ་བློ་འཇུག་པ་ལ་སོགས་དུ་མ་བྱུང་བའོ། །དེ་དག་གང་ལའང་ཆགས་ཞེན་རེ་དོགས་མི་བྱེད་པར་རང་བབས་སུ་བཞག་ལ།རང་གི་མདུན་གྱི་ནམ་མཁར་རྩ་བའི་བླ་མ་བསྒོམ་ཞིང་དེ་ལ་ཡིད་ཆེས་ཀྱི་དད་པའི་སྒོ་ནས་གསོལ་འདེབས་དབང་ལེན་བྱེད་ཅིང་ཉམས་ལེན་བར་མ་ཆད་པར་བརྩོན་པར་བྱའོ། །ཡང་ནང་སློང་ལུས་ཀྱི་ན་ཚ་ཞེས་པ་རླུང་ལྔའི་འཕེལ་འགྲིབ་ལ་བརྟེན་ནས་འབྱུང་ཚུལ་ནི།དེ་ཡང་གྱེན་རྒྱུའི་རླུང་ལ་ཡེ་ཤེས་ཀྱི་རླུང་གི་ནུས་པ་ཐེབས་ནས་དཀྲུགས་པའི་ཚེ།ཡར་འཕེལ་ནས་ཁོག་སྟོད་འཚང་བ་དང་ཤུགས་རིང་འདོན་པ།རྔམ་པ་འབྱུང་ཞིང་ནང་རོལ་ཐམས་ཅད་རླུང་གིས་གང་སྟེ།ན་བའམ་མི་བདེ་བའི་རྣམ་པ་མ་ངེས་པ་སྣ་ཚོགས་འབྱུང་།མར་འགྲིབ་ཚེ་ཟས་འཇུ་དཀའ་ཞིང་དབུགས་མི་བདེ་བ་སོགས་འབྱུང་ངོ། །སྲོག་འཛིན་གྱི་རླུང་ལ་ཡེ་ཤེས་ཀྱི་རླུང་གིས་རྒྱས་ཐེབས་ནས་སྨིན་པའི་ཚེ།སེམས་ལ་དགའ་སྣང་དང་སྡུག་སྣང་སོགས་གཉེན་ལ་ཆགས་པ་དང་དགྲ་ལ་སྡང་བའི་རྣམ་པས།རང་གི་སེམས་ལས་སུ་མི་རུང་བ་དུ་མ་དང་།འགྲིབ་ཚེ་དྲན་མེད་ཧད་པོར་སངས་ནས་སྨྱོན་པ་ལྟ་བུ་ཀུན་སྤྱོད་རྩུབ་པ་སོགས་འབྱུང་ངོ་། །མེ་མཉམ་གྱི་རླུང་འཁྲུགས་པའི་རྟགས་སུ་ལུས་ལ་རང་བཞིན་གྱི་ཚ་དྲོད་འབར་ཞིང་རྔུལ་ཆུ་རྡོལ་བ།དགུན་ཚ་བའི་ནད་རིགས་འབྱུང་ཞིང་།མར་འགྲིབ་ཚེ་དབྱར་གྲང་བའི་ནད་དང་སྲིན་བུ་ལྡང་བ་སོགས་འབྱུང་བ་ཡིན་ནོ། །ཁྱབ་བྱེད་ཀྱི་རླུང་གིས་རྒྱས་ཐེབས་པས་འཕེལ་ཚེ་ལུས་ཀྱི་ཤ་ཆེར་རྒྱས་པ་དང་།བཀྲག་མདངས་ཆེ་བ།མར་འགྲིབ་ཚེ་ལུས་ཀྱི་ཟོ་མདོག་ཉམས་ཤིང་འགུལ་བསྐྱོད་མི་ནུས་པ་སོགས་འབྱུང་ངོ་། །ཐུར་སེལ་གྱི་རླུང་ལ་ཡེ་ཤེས་ཀྱི་རླུང་གི་ནུས་པ་ཕོག་ནས་འཕེལ་ཚེ།དྲི་ཆུ་དང་གཤང་ལྕི་སོགས་ལོག་ནས་ཕྱིར་མི་ཐོན་པ་དང་།མར་འགྲིབ་ཚེ་རྩ་ཆུ་སོགས་རང་བཞིན་གྱིས་རྒྱུན་མི་ཆད་པར་རང་རྡོལ་དུ་འབྱུང་བ་ལ་སོགས་པའི་ཉམས་མ་ངེས་པ་སྣ་ཚོགས་སུ་འོང་བ་ཡིན་ནོ། །དེ་ལྟར་མ་དག་པའི་རླུང་ལྔར་ཡེ་ཤེས་ཀྱི་རླུང་གི་ནུས་པ་ཕོག་པའི་བྱེད་ལས་ཀྱིས་གསལ་སྣང་བདེ་བའི་ཉམས་དང་།རྩུབ་ཉམས་སྡུག་བསྔལ་གྱི་ཚོར་བ་ལུས་ལ་ན་ཚ་ཟུག་རྔུ་རླུང་མཁྲིས་བད་ཀན་ལ་སོགས་འདུ་བའི་ནད་དང་།རྩ་ཆུ་འགག་པ།ཆུ་ཁྲག་ཏུ་འགྱུར་བ་ལུས་ཀྱི་སྟོད་སྨད་གཉིས་ལ་ཚ་གྲང་གི་ནད་གཉིས་ཀས་ཐེབས་ནས་འདར་ཤོམ་བྱེད་པ།གློ་ཚད་དང་རྐང་འབམ་སྐྲང་དང་ལྦ་བ།རྨ་ཆེན་རྡོལ་བ་དང་།ལུས་ཀྱི་ཡན་ལག་ཞ་བ་ལ་སོགས་པ་འབྱུང་ཞིང་།མོ་རྩིས་དང་རྨི་ལམ་རྣམས་ཀྱང་ཤིན་ཏུ་འཁྲུགས་པར་སྣང་བ་དང་།སེམས་ཀྱང་གཏད་མེད་ཟ་ཟི་དཔེར་ན་སྐྱེས་བུ་ཆང་གིས་མྱོས་པ་ལྟ་བུ་བྱ་བ་དང་སྤྱོད་པ་ཐམས་ཅད་མ་ངེས་ཤིང་།མི་དང་དུད་འགྲོ་ལ་སོགས་པའི་སྣ་ཚོགས་ཀྱི་སྤྱོད་པ་བྱེད་ཅིང་མཐའ་གཅིག་ཏུ་མ་ངེས་པ་འབྱུང་ཞིང་།སེམས་ཀྱང་བརྟན་གནས་ཚུགས་ཐུབ་མེད་པ་ལྟ་བུར་འབྱུང་བ་ཡིན་ནོ། །དེ་དག་གང་བྱུང་ཡང་ཐམས་ཅད་ཉམས་རྫུན་པོ་ཆེའི་རང་བཞིན་དུ་ཤེས་པར་བྱས་ཏེ།ཉམས་ནད་དང་རྒྱབ་བརྟེན་འདྲེ་རུ་མི་འཛིན་པར།སྨན་དཔྱད་རིམ་གྲོ་རྣམས་ཀྱི་མཆོག་བླ་མ་དམ་པའི་མན་ངག་ལ་བརྟེན་ནས།རང་གི་ཉམས་ལེན་ལ་གདིང་ཐོབ་པར་བྱེད་པ་ནི་གནད་མཆོག་ཏུ་གཅེས་པ་ཡིན་ནོ། །མདོར་ན་རྩ་རླུང་ཐིག་ལེའི་ཁམས་ཀྱི་བྱེད་ལས་ཀྱིས་ལུས་ལ་ན་ཚ་དང་ཟུག་རྔུ་མ་ངེས་པ་སྣ་ཚོགས་འབྱུང་བ་དང་།ངག་ཀྱང་སྨྱོན་པའི་རང་ཚིག་ཐོལ་བྱུང་དུ་རྡོལ་བ་བཞིན་དུ་ཆོས་དང་མཐུན་པའི་གླུ་དང་མགུར་མ་ལ་སོགས་པའམ།གཞན་བློ་ཆོས་ལ་བསྒྱུར་ནུས་པའི་ཚིག་སྣ་ཚོགས་སྨྲ་བ་དང་།འཇིག་རྟེན་ཐ་མལ་པའི་ཚིག་གཞན་ཡིད་དགའ་བར་བྱེད་པའི་གཏམ་དང་།ཁྲོ་འཁྲུགས་སྡང་བའི་རྒྱུ་རུ་འགྲོ་བའི་འཆོལ་ཚིག་རྣམས་ཀྱང་རང་བཞིན་གྱིས་མ་བསམ་བཞིན་དུ་བཀག་འགོག་མེད་པར་རང་རྡོལ་དུ་སྨྲ་བ་སོགས་འབྱུང་བ་དང་།གཞན་ཡང་དོན་དང་འགལ་བའི་གཏམ་འགྱུར་ལྡོག་མང་བ་དུ་མ་སྨྲ་བ་སྟེ།དེ་དག་གི་སྐབས་སུ་སེམས་ཀྱང་སྨྱོན་པ་སྙིང་ནད་ཅན་ལྟ་བུར་སོང་བ་ལ།གྲོགས་གཞན་ཅུང་ཟད་འུར་བའི་རྐྱེན་གྱིས་རང་གི་སེམས་བསླང་བ་ལྟར་བྱས་ཏེ།ཤེས་པ་གཏད་སོ་དང་བྲལ་ཞིང་རྟོག་ཚོགས་གང་ཤར་ཐམས་ཅད་ལ་དགག་སྒྲུབ་དང་བླང་དོར་མེད་པར་ཤར་ཆ་དེ་གའི་དབང་དུ་སེམས་ཤོར་ནས་འཛིན་རྩོལ་མི་བཏུབ་པར་བདག་མེད་བྱུང་རྒྱལ་གྱི་ངང་དུ་ལུས་པར་གྱུར་ཏེ།དེའི་རྐྱེན་གྱིས་སྙིང་མི་དགའ་ཞིང་འདུག་མི་ཚུགས་པར་མཁུན་པ་འདེབས་པ།ཀྱི་ཧུད་ཟེར་བ།ཤུགས་འདོམ་པ་སོགས་བྱེད་ཅིང་།གནས་མལ་དུ་སྡོད་སྙིང་མི་འདོད་པའི་སྣང་བ་སྐྱེས་ནས་རང་གནས་སུ་སྡོད་མི་ཚུགས་པ་འབྱུང་བ་དང་།ཡང་དགའ་སྡུག་གི་སྣང་བ་ཟ་ཟི་རྒྱུན་མི་ཆད་པ་ལྟར་འབྱུང་ནས་དེ་ཀ་མེད་ཐབས་ལ།ཡུལ་རྒྱུས་མེད་ཞིག་ཏུ་འགྲོ་ན་དགའ་སྙམ་པ་བྱུང་ནས་འགྲོ་བར་བྱེད་ཚེ།ཡུལ་དེའི་མི་རྣམས་ཀྱིས་རང་ལ་སྡང་སེམས་སྐྱེས་འདུག་སྙམ་ནས་འགྲོ་སྙིང་མི་འདོད་ཅིང་།རང་གཅིག་པུར་འདུག་པར་སེམས་པ་ལ་སོགས་པ་བདེ་བ་དང་སྡུག་བསྔལ།ལྷ་སྣང་དང་འདྲེ་སྣང་།དག་པ་དང་མ་དག་པའི་སྣང་བ་སྣ་ཚོགས་འདི་མི་ཤར་བསམ་པ་གཅིག་ཀྱང་མེད་པ་ཡིན་པས་ན།དེ་དག་གང་ཤར་ཡང་ཐབས་ལ་མཁས་པའི་སྒོ་ནས་ཤེས་པར་བྱ་བ་གནད་གལ་ཆེ་བའོ། །གསང་སློང་སེམས་ཀྱི་དགའ་སྡུག་འབྱུང་བ་ནི་ཉོན་ཡིད་བསླང་ནས་ཉོན་མོངས་པ་དུག་ལྔའི་རྟོག་པ་རེ་མོས་སུ་ཤར་ནས།རྟོག་པ་ཤིན་ཏུ་ཤུགས་དྲག་པ་རྣམས་ནི།གཉེན་པོས་ཀྱང་མི་ཁེགས་པར་སེམས་ཉོན་མོངས་པས་ཟིལ་གྱིས་གནོན་ཏེ་སྙིང་སོགས་ན་བ་དང་།གཞན་ཡང་མཐོང་ཚོར་གྱི་རང་བཞིན་དུ་གྱུར་བའི་ཆེ་བ་མི་དང་།ཆུང་བ་སྲོག་ཆགས་ཕྲན་བུ་ཡན་ཆད་ཀྱིས་རང་ལ་གནོད་པར་བསམ་ནས།འདུག་མི་བརྟན་པ་གནད་དབེན་པ་ཞིག་ཏུ་འགྲོ་ཚེ།མི་ཡིས་རྒྱུ་འགྲུལ་མེད་ཚེ་རྟོག་པ་ཤུགས་ཆེ་བ་རེ་ལ་བརྟེན་ནས་སྡུག་བསྔལ་དྲག་པོ་གློ་བུར་དུ་འབྱུང་བ་དང་།བསྔངས་སྐྲག་ཆེན་པོ་སྐྱེས་ནས་འདུག་ཚུགས་མེད་པའི་ཀུན་རྟོག་ཤུགས་ཆེ་བ་རུ་ལྡང་ནས་བཅོས་སུ་མེད་པ་སྨྱོན་པ་ལྟ་བུ་དང་རེས་འགའ་ཡང་སྣང་སྲིད་གྲོགས་སུ་ཤར་ནས་སེམས་ལ་སྙིང་རྗེ་དང་དགའ་སྣང་ཤར་ནས་བདག་གིས་ཆོས་ཉིད་ཀྱི་དོན་ཤེས་པ་འདྲ་སྙམ་སྟེ།དགའ་བདེའི་ཉམས་ལ་ཞེན་ཅིང་གདུང་བས་གོལ་བ་དང་།ལ་ལ་སྔར་དང་མི་འདྲ་བའི་ངེས་འབྱུང་དྲག་པོ་སྐྱེས་ཏེ།སྣང་བའི་ཆོས་ཐམས་ཅད་ལ་ཞེན་འཛིན་བྲལ་བ་ལྟར་སྣང་བ་དང་།ལ་ལ་གསལ་ཉམས་ཀྱི་རྩལ་འབར་ཏེ།གནས་རིས་དྲུག་གི་སྡུག་བསྔལ་ལ་བསམ་མནོ་བྱས་ཚེ་མངོན་སུམ་དུ་སྣང་ནས་སྙིང་རྗེ་བཟོད་བླག་མེད་པར་སྐྱེས་ཏེ་ངུ་སྙིང་འདོད་པ་དང་།ཡང་དེ་དག་གི་སྡུག་བསྔལ་ཐམས་ཅད་རང་ཐོག་ལ་མྱོང་བའི་སྣང་བ་ཤར་ཞིང་བཟོད་མེད་ཀྱི་སྡུག་བསྔལ་དུ་མ་འབྱུང་བའི་རྣམ་པར་འཆར་བ་དང་།ལ་ལ་རང་གི་ཉམས་ལེན་མཐར་ཕྱིན་ཡོད་སྙམ་ནས།གཞན་དོན་ལ་སེམས་ཏེ་གཤིན་པོའི་དཀོར་དང་།གསོན་ལ་སྲུང་སྐྱོབ་དུ་རློམས་ཏེ་མི་ཚེ་གཏོ་ཡས་ལ་འདའ་བ་སོགས།མདོར་ན་རྣམ་པ་ཆོས་ལྟར་བཅོས་ཀྱང་བྱ་བ་དང་བྱེད་པ་ཐམས་ཅད་ཆོས་བརྒྱད་ཀྱི་དབང་དུ་སོང་བ་རྣམས་ནི།དཔེར་ན་འཚོ་བྱེད་ཀྱི་སྨན་འཚོལ་བ་ལ་རེག་ཕུང་གི་སྡུག་དང་འཕྲད་པ་ལྟར།རྣལ་འབྱོར་ཉམས་ལེན་ཞན་ཏེ།བདུད་ཀྱི་བར་ཆད་ཀྱི་དབང་དུ་སོང་ནས་འཁྲུལ་པའི་ཁར་འཕྱན་པ་ཡིན་ནོ། །དེའི་ཕྱིར་ན་བརྒྱུད་ལྡན་གྱི་བླ་མ་དམ་པའི་མན་ངག་གི་ངོ་སྤྲོད་སྔོན་ལ་བྱས་ཏེ།རང་གི་སྒོ་གསུམ་ལ་ཉམས་ཀྱི་རྣམ་པ་ཇི་ལྟར་འབྱུང་ཡང་ཐམས་ཅད་རང་སྣང་དུ་ཤེས་ནས་ཉམས་ཀྱི་བར་ཆད་ཀྱི་དབང་དུ་མི་བཏང་བར།དད་མོས་གདུང་ཤུགས་དྲག་པོའི་སྒོ་ནས་གདམས་པ་ཉམས་སུ་ལེན་པ་ལ་བརྩོན་པར་བྱེད་པ་ནི་གནད་ཀྱི་ཡང་གཅེས་དམ་པ་ཡིན།མདོར་ན་མ་དག་པའི་བསྐལ་པ་ལས་ཀྱི་རླུང་ལ་དག་པ་ཡེ་ཤེས་ཀྱི་རླུང་གི་ནུས་པ་ཕོག་ནས་དག་དབྱིངས་སུ་སྨིན་ཏེ།མ་དག་པའི་སྣང་བ་འོད་གསལ་ཆོས་ཉིད་ཀྱི་དབྱིངས་སུ་འཇིག་པར་བྱེད་པའི་སྔ་ལྟས་སུ་ཕྱི་ནང་གསང་གསུམ་གྱི་ཉམས་མ་ངེས་པ་སྣ་ཚོགས་སྒོ་གསུམ་གྱི་སྟེང་དུ་འབྱུང་བ་ནི།ཆོས་གཞན་གང་དུ་འཇུག་ཀྱང་དག་དབྱིངས་དྭངས་མར་འཕོས་ཏེ།ཚེ་འདིར་སངས་རྒྱས་ཐོབ་པར་དཀའ་བས་ན།བདུད་རྣམས་ཀྱིས་བར་ཆད་ཆེར་མི་བྱེད་པ་དང་།ལམ་འདི་ནི་སྐལ་ལྡན་སྐྱེས་བུའི་སྤྱོད་ཡུལ་འཇའ་ལུས་ཆོས་སྐུ་ཐོབ་པའི་མན་ངག་ཟབ་མོ་འདི་ཉིད་མཐར་ཕྱིན་ན་ཚེ་འདིར་གྲོལ་ནས་དོན་གཉིས་ཀྱི་མཛད་པ་མཐར་སོན་པས་ན།དེ་ལ་ཆོས་མིན་རང་རྒྱུད་དུ་གོལ་བའི་བདུད་དང་།ཆོས་དང་བླ་མར་སྨོད་པའི་དམ་སྲི་ལ་སོགས་པའི་བགེགས་ཀྱི་རིགས་སུ་གྱུར་པ་ཐམས་ཅད་ཀྱིས།ཐར་པ་བྱང་ཆུབ་བསྒྲུབ་པའི་ལམ་ཟབ་མོ་འདི་ལ་བར་ཆད་སྣ་ཚོགས་བྱེད་པ་ཡིན་ཏེ།དེ་ཇི་ལྟར་ཡིན་སྙམ་ན།སྤྱིར་གནས་ཉི་ཤུ་རྩ་བཞི་དང་།ཡུལ་སུམ་ཅུ་རྩ་གཉིས།དུར་ཁྲོད་ཆེན་པོ་བརྒྱད་ལ་སོགས་པ་ཕྱིའི་གནས་སུ་བསྟན་པ་རྣམས་ཀྱང་།བྱེ་བྲག་ཏུ་དེ་དག་རང་གི་སེམས་དང་སེམས་བྱུང་གི་རྩལ་ལས་མ་འདས་པའི་ཕྱིར་ན།རླུང་གི་བྱེད་ལས་ཀྱིས་དེ་དག་གི་གནས་མ་བདེ་བའི་རྣམ་པས།འཇིག་རྟེན་མཁའ་འགྲོ་དང་མཁའ་ལ་རྒྱུ་བའི་ཤུགས་འགྲོ་རྣམས་ཀྱི་ཡེ་ཤེས་ཀྱི་མཁའ་འགྲོའི་རྣམ་པར་བརྫུ་ནས།ཆོས་མིན་ལོག་པ་ཆོས་བརྒྱད་ཀྱི་ཕྱོགས་སུ་ཁ་ཁྲིད་ཅིང་དེ་དང་མཐུན་པའི་ལུང་བསྟན་བསླབ་བྱ་སོགས་ཀྱིས་མྱུར་ལམ་ཟབ་མོ་འདི་ལས་བློ་ཁ་གཞན་དུ་བསྒྱུར་བར་བྱེད་པ་སོགས་ནི་བསླུ་བ་མཁའ་འགྲོའི་རྟགས་ཡིན་པས།དེ་དུས་སུ་རང་ལུས་ལྷར་བསྒོམ་པ་དང་།ཉམས་ཀྱི་ངོ་བོ་ལྟ་བ་ཡིན་ཕྱིར་མཉམ་ཉིད་འོད་གསལ་ཆེན་པོར་བཞག་ཚེ་སེལ་བའོ། །ཡང་བར་ཆད་བདུད་ཀྱི་རྟགས་ནི།ལམ་འདིར་ཞུགས་པའི་སྐལ་ལྡན་རྣམས་ལ་བདུད་དང་དམ་སྲི་སོགས་ཀྱི་བར་ཆད་བརྩམས་ནས།ཕ་རོལ་སྐྱེ་འགྲོ་རྣམས་ཀྱི་སེམས་རྒྱུད་བདག་གིས་ཤེས་པར་སྣང་བ།རང་ལུས་ཁ་དོག་སྣ་ཚོགས་སུ་སྤྲུལ་ནུས་པ་ལྟ་བུ་དང་།མེ་ལོང་ལ་སོགས་པར་བལྟས་ཚེ་གཟུགས་བརྙན་གཉིས་སུ་སྣང་བ་དང་།ཡང་ལུས་ལ་གྲིབ་མ་གཉིས་ཡོད་པ་སོགས་སྣང་ཞིང་།ཁྱད་པར་ལྟར་སྣང་གི་རྗེས་སུ་ཁྲིད་ནས་བགེགས་ཡི་དམ་གྱི་གཟུགས་སུ་སྤྲུལ་ཏེ་ཞལ་སྟོན་པ་དང་།བསླུ་བྱེད་ཀྱི་ལུང་སྟོན་པ་སོགས་འབྱུང་བ་རྣམས་ནི་བདུད་ཀྱི་དབང་དུ་བྱེད་ཉེ་བ་ཡིན་པས།དེའི་དུས་སུ་གུ་གུལ་གྱི་དུད་པས་བདུག་ཅིང་།བདུད་རྩི་ཆེ་ཆུང་གིས་བཀྲུ་བ་དང་།ལུས་ལ་ལྡེར་ཚོ་རྙིང་པའི་འདག་པ་བྱུག་ཅིང་།ངག་ནས་ཧཱུཾ་དྲག་ལ་བཅད་ཐོན་པ་བརྗོད་བཞིན།སེམས་སྐྱེ་མེད་ཀྱི་ངང་ལ་བཞག་པས་སེལ་བར་བྱེད་དོ། །འཕེལ་གྲིབ་ཉམས་ཀྱི་རྟགས་ནི།རང་གི་རླུང་སེམས་འདུ་ཚུལ་གྱི་ཏིང་ངེ་འཛིན་གློ་བུར་དུ་སྐྱེས་པ་དང་།ཉམས་ཀྱི་སྣང་བར་ནམ་མཁའ་ནས་ལྷ་དང་ལྷ་མོ་ལ་སོགས་པའི་གཟུགས་མཐོང་བ།འོད་སྣང་མ་ངེས་པ་དམར་གོར་དང་དཀར་ལེབ་དུད་ཁུ་ལྟ་བུ་སོགས་སྣང་ཉམས་ཆལ་མ་ཆོལ་མར་ཤར་ཞིང་།དེ་ལ་ཞེན་ཅིང་ཆགས་ནས་དགའ་སྤྲོའི་སྣང་བ་རྒྱུན་མི་ཆད་པ་ལྟར་འབྱུང་སྟེ།དེའི་དུས་སུ་རང་ཆུའི་དཀྱིལ་དུ་འདུག་པ་སོགས་དང་།ལུས་ལ་མར་གྱི་བཀུ་མཉེ་བྱེད་ཅིང་།ངག་གིས་ཨཱཿམང་དུ་བརྗོད་ནས།སེམས་རྟོག་མེད་དུ་བཞག་པས་སེལ་བའོ། །མདོར་ན་ལྷན་སྐྱེས་ཀྱི་ལྷ་དང་།མཉམ་འོང་གི་བདུད་འདྲེའི་ཆོ་འཕྲུལ་དུ།ལུས་ལ་ན་ཚ་ཟུག་རྔུ་མ་ངེས་པ་སྣ་ཚོགས་གཏོང་བ་དང་།མཐོང་བའི་ཡུལ་དུ་ཐན་དང་ལྟས་ངན་སྣ་ཚོགས་འབྱུང་བ་རྣམས་ལ་ཉམས་ནད་དུ་བཟུང་ནས་མོ་རྩིས་བྱེད་པ་དང་།རྒྱབ་རྟེན་འདྲེ་རུ་མཐོང་ནས་རིམ་གྲོ་དང་སྨན་དཔྱད་སོགས་བྱས་ཀྱང་དེ་དག་ཀུན་གཅིག་གིས་ཀྱང་ཕན་པ་མེད་ཅིང་།ད་དུང་མོ་རྩིས་དང་རྨི་ལམ་ཐམས་ཅད་རབ་ཏུ་འཁྲུགས་ནས་སེམས་ཀྱི་རྣམ་པར་རྟོག་པ་ཡང་སློང་བར་བྱེད་པ་འབྱུང་ངོ་། །དེ་དག་བདེན་མེད་སོགས།རྣམ་པར་རྒྱལ༔ ཞེས་པས་བསྟན་ཏེ།དེའི་ཕྱིར་ན་ཉམས་སྣང་ཕྱི་ནང་གསང་གསུམ་དེ་དག་གི་དུས་སུ་ཉམས་ཀྱི་ཟུག་རྔུ་དང་སྣང་བ་ཆལ་ཆོལ་གྱི་དབང་དུ་མི་བཏང་བར་སྒོ་གསུམ་གྱི་བྱ་བ་དགུ་སྤྲུགས་སུ་བཞག་སྟེ།གང་ཤར་གང་སྣང་ཐམས་ཅད་བདེན་མེད་ཉམས་ཀྱི་སྣང་བ་རུ་ངེས་པར་བྱ་བ་སྟེ།དེ་ནི་སྤྱོད་པའི་ཕྱོགས་སུ་ལྟ་བ་མི་འཆོར་བར་ལྷུན་གྲུབ་འོད་གསལ་གྱི་སྣང་བ་མངོན་དུ་གྱུར་པ་དེ་གའི་ངང་དུ་གང་ཤར་ལ་བདེན་ཞེན་མེད་པར་དཔེར་ན་མེ་ལོང་དྭངས་གསལ་གྱི་ཆ་ལ་གཟུགས་བརྙན་གྱི་རྣམ་པ་ཇི་ལྟར་ཤར་ཡང་ཐམས་ཅད་མེ་ལོང་གི་རོལ་པ་ལས་མ་འདས་པ་ལྟར།རྣལ་འབྱོར་པ་རྣམས་ལམ་གྱི་སྐབས་སུ་དགའ་སྡུག་ཉམས་ཀྱི་སྣང་བ་མ་ངེས་པ་ཇི་ལྟར་ཤར་ཡང་།དེ་དག་ཐམས་ཅད་རང་གི་གཞིའི་རོལ་པ་དང་།ཡེ་ཤེས་ཀྱི་རྩལ་ལས་མ་འདས་པའི་ཕྱིར་ན།བདེ་སྡུག་ཉམས་ཀྱི་སྣང་བ་ཐམས་ཅད་ལ་རེ་དོགས་དང་དགག་སྒྲུབ་གང་ཡང་མི་བྱེད་པ།དཔེར་ན་སེངྒེས་གངས་ཟིན་པ་ལྟར་གནས་ལུགས་ཀྱི་ལྟ་བ་ཟབ་མོའི་གཏིང་མི་འཆོར་བར་ཆོས་ཉིད་བསམ་བརྗོད་དང་བྲལ་བའི་དབྱིངས་སུ་མཉམ་པར་འཇོག་ནུས་ན།ཉམས་ཀྱི་སྣང་བ་ཐམས་ཅད་བདེན་མེད་དུ་སྒྱུ་མ་དང་རྨི་ལམ་གྱི་སྣང་བ་ལྟ་བུར་རིམ་པ་བཞིན་དུ་ཆོས་ཉིད་སྟོང་པའི་དབྱིངས་སུ་འཇའ་སྤྲིན་ནམ་མཁའ་ལ་ཡལ་བ་ལྟར་སོང་ནས་འོད་གསལ་ལྷུན་གྲུབ་གྱི་སྣང་བ་ལ་གདིང་ཐོབ་སྟེ།རིག་རྩལ་ཡེ་ཤེས་སུ་སྨིན་ཏེ་མི་འགྱུར་གསང་བའི་རྟགས་རྣམས་ཀྱང་རིམ་གྱིས་འབྱུང་བ་ཡིན་ནོ།དེའི་སྐབས་སུ་ལྟ་བའི་ཕྱོགས་སུ་སྤྱོད་པ་མི་འཆོར་བར་རང་གི་སྒོ་གསུམ་གྱི་བྱ་བ་བསྡམས་ནས།སྡོམ་པ་དམ་ཚིག་རྣམས་གཅེས་པའི་སྲོག་ལྟར་བསྲུང་ཞིང་འཆོལ་རྙོག་མི་བྱེད་པ་དང་།ཟབ་མོ་དོན་གྱི་ཉམས་ལེན་ལ་ཐང་ལྷོད་མེད་པར་བརྩོན་པར་བྱེད་པ་ནི་གནད་ཀྱི་ཡང་གཅེས་དམ་པ་ཡིན་ནོ། །དེ་ལྟར་གོང་དུ་སྨོས་པ་བཞིན་ཉམས་ཀྱི་བྱེ་བྲག་བསམ་གྱིས་མི་ཁྱབ་པ་བརྗོད་པ་རྣམས་ཀྱང་རང་སྣང་ཡེ་ཤེས་ཀྱི་རྩལ་དུ་ཤེས་པར་བྱས་ཏེ།བར་ཆད་ཀྱི་དབང་དུ་མ་སོང་བར་རྩེ་གཅིག་ཏུ་ཉམས་སུ་བླང་བ་འདི་ཡི་ཡོན་ཏན་ནི་འོད་གསལ་དབྱིངས་ཐིག་གི་སྣང་བ་ཐམས་ཅད་ཆེར་འཕེལ་ནས།འོད་ལྔ་གྱེན་འགྲེང་དང་།རྩིབས་ཤར།པདྨ་དང་འཁོར་ལོ་ལ་སོགས་པ་དང་།ཡང་གྲུ་ཆད་མཁར་ཐབས་རྫོགས་པའི་བར་དང་།ཐིག་ལེ་ཆེ་བ་གནམ་ས་ཁེབས་པ་ཙམ་དང་།ཆུང་བ་ཡུངས་འབྲུའི་ཚད་ཙམ་ལྔ་ཚོམས་སུ་སྣང་བ་དང་།གཞན་ཡང་སྣང་ཡུལ་ཐམས་ཅད་འཇའ་འོད་ཐིག་ལེའི་རང་བཞིན་དུ་ཤར་ཏེ།མ་དག་པའི་སྣང་བ་མི་མཐོང་བ་ལྟ་བུར་འབྱུང་བ་ནི།ཤེས་རབ་ཀྱི་མིག་ལ་ཡེ་ཤེས་ཀྱི་སྤྱན་ཐོབ་པས།མཉམ་པར་བཞག་དང་མ་བཞག་གི་རྣམ་དབྱེ་མེད་པར་འོད་གསལ་ཆོས་ཉིད་ཀྱི་རང་མདངས་མངོན་དུ་གྱུར་པས་ན་སྙིགས་མ་དྭངས་མར་འཕོས་པ་དང་།དྭངས་མ་འོད་ལྔར་སྨིན་ནས་གོང་འཕེལ་གྱི་རྩལ་རྫོགས་འགྲོ་བ་ཡིན་ནོ། །མདོར་ན་ཕྱིའི་འོད་གསལ་གྱི་སྣང་བ་འདར་འཕྲིག་མེད་པར་གནས་ཤིང་།ཐིག་ལེ་ཡང་ཉ་མིག་ཙམ་ནས་མཐེབ་གོར་ཙམ་དུ་སྣང་བ།ཡང་ཐིག་ལེ་ཆེར་མི་གསལ་བཞིན་དུ།རིག་གདངས་རྡོ་རྗེ་ལུ་གུ་རྒྱུད་ཁྲ་འཁྲིག་གེར་མངོན་སུམ་དུ་སྣང་བ་དང་།དབྱིངས་ཀྱི་སྣང་བ་ཤིན་ཏུ་གསལ་བའི་ཀློང་དུ་འོད་གདངས་གྲུ་ཆད་ཀྱི་རྣམ་པར་སྣང་བའི་དུས་སུ་ཚེའི་དུས་འདས་ནས་བར་ཆད་ཀྱང་།རང་བཞིན་སྤྲུལ་པའི་སྐུ་རུ་དབུགས་འབྱིན་ཏེ་གྲོལ་བ་ཐོབ་པར་འགྱུར་རོ། །ཡང་དབྱིངས་ཀྱི་སྣང་བ་པདྨ་དང་འཁོར་ལོ་མཆོད་རྟེན་ལ་སོགས་པ་དང་།གཞན་ཡང་ཡིག་རིས་སྣ་ཚོགས་དང་།སྲོག་ཆགས་ལྟ་བུའི་རྣམ་པ་མ་ངེས་པ་དུ་མར་སྣང་བ་དང་།ཐིག་ལེ་མཐེབ་གོར་ཙམ་ནས་ཁམ་ཕོར་དང་རྔ་ཆུང་ཕུབ་ཀྱི་རྦ་འཁོར་ཙམ་པ་རྣམས་འོད་ལྔ་མུ་ཁྱུད་ཀྱི་རྣམ་པར་ཡོད་པ་ཐིག་ལེ་ལྔ་ལྡན་གྱི་ཀློང་དུ་ལྷ་སྐུ་གདུང་ཕྱེད་དང་།སྐུ་རྐྱང་འོད་ཁྱིམ་གྲུ་ཆད་ཀྱི་རྣམ་པར་ཤར་བ་དང་།རིག་གདངས་ཤེལ་ཕྲེང་བསྟར་ལ་བརྒྱུས་པའི་རྣམ་པ་ལྟ་བུ་དབྱིངས་ཐིག་གི་དྲྭ་བར་དལ་གྱི་འཁོར་བའི་རྣམ་པར་སྣང་བའི་དུས་སྐབས་སུ་ཚེ་དུས་བྱས་ཀྱང་བར་དོ་མེད་པར་གྲོལ་བར་འགྱུར་བ་གདོན་མི་ཟ་བ་ནི།གོང་འཕེལ་གྱི་འཕེལ་ཚད་རྫོགས་པའི་ཚེ་ན་ཆོས་ཉིད་སྐྱེ་འགགས་ལས་འདས་པར་དབང་འབྱོར་བས།བར་དོ་མེད་པར་རང་བཞིན་ལོངས་སྤྱོད་རྫོགས་སྐུའི་ཞིང་ཁམས་སུ་ངེས་པར་གྲོལ་བར་གྱུར་ཏེ།མདོར་ན་ཉམས་སྣང་གོང་དུ་འཕེལ་བའི་ཚད་རྫོགས་པའི་ས་མཚམས་འདི་ལ་བབས་པའི་ཚེ་ན།སྐྱེས་བུ་དེ་འཁོར་བར་མི་ལྡོག་ཅིང་སྐྱེ་འཆིའི་སྣང་བ་ལས་འདས་ཤིང་སྲིད་པ་ལས་རྣམ་པར་རྒྱལ་བ་སྟེ།དེ་ཡང་མདོ་ལམ་གྱི་ས་ལྔ་པ་སྦྱངས་དཀའ་བ་དང་།སྔགས་ལམ་གྱི་ཚེ་ལ་དབང་བའི་རིག་འཛིན་གྱི་ས་དོན་གྱི་ཐོབ་པར་བསྟན་པ་ཡིན་ནོ། །དེ་ལྟར་གོང་འཕེལ་གྱི་ཉམས་རྩལ་རྫོགས་ཚུལ་དང་དེ་དག་གི་ཡོན་ཏན་གྱིས་རང་བཞིན་སྤྲུལ་པའི་ཞིང་ཁམས་རྣམས་སུ་གྲོལ་བའི་ཕན་ཡོན་བསྟན་པའི་ལེའུ་སྟེ་བཅུ་གཅིག་པའོ། །ཞེས་པ་རྫོགས་ཚིགས་སུ་བསྟན་ཏེ།ས་མ་ཡ༔ གུ་ཧྱ༔ ཞེས་དམ་ཚིག་གི་བཀའ་རྒྱས་སུ་བཏབ་པའི་དོན་ནོ། །། །གསུམ་པ་རིག་པ་ཚད་ལ་ཕེབས་པའི་དོན་བསྟན་པ་ནི།དེ་ལྟར་ཡང་ཡང་སོགས།འཆར་བ་ཡིན༔ ཞེས་པས་བསྟན་ཏེ།དེ་ལྟར་སྔོན་སྨོན་ལས་འཕྲོ་འཛོམ་པའི་སྐྱེས་བུ་རྣམས་ཀྱིས་མྱུར་ལམ་ཟབ་མོ་འདི་ཉིད་ལ་བརྩོན་པ་དྲག་པོའི་སྒོ་ནས་ཡང་ནས་ཡང་དུ་ཉམས་སུ་བླངས་ཏེ་སྦྱངས་པས་ན།དེའི་ནུས་པས་སྒྲོན་མ་རྣམ་བཞིའི་སྟོབས་བསྐྱེད་པས་རིག་པ་བཅུད་དུ་སྨིན་ཅིང་།དབྱིངས་དང་ཐིག་ལེ་རིག་གདངས་རྣམས་ཚད་ལ་ཕེབས་པ་ནི་འདི་ལྟ་སྟེ།ཕྱི་རྟགས་དབྱིངས་ཀྱི་སྣང་བ་གཞལ་ཡས་ཁང་གི་རྣམ་པའམ་འོད་གདངས་དྭངས་གསལ་དུ་མཆེད་པའི་ཀློང་དུ།འོད་ལྔའི་ཐིག་ལེ་ལྔ་ཚོམ་དུ་ཤར་བའི་ནང་དབུས་སུ་བདེ་གཤེགས་རིག་ལྔའི་ཕྱག་རྒྱ་ཕྲ་མོའི་སྐུ་ཡར་ཕྱེད་སྣང་ཞིང་སྐུ་སྨད་འཇའ་སྤྲིན་ནམ་འོད་ཀྱི་རྣམ་པས་མི་མངོན་པ་དང་།ཡང་སྐུ་གདུང་ཕྱེད་བཀས་པ་ལྟར་སྣང་ཞིང་དེ་དག་བསྒོམ་སྟོབས་ཀྱིས་ཆེར་སྨིན་ཏེ།སྐུ་རྐྱང་ལོངས་སྤྱོད་རྒྱན་རྫོགས་ཀྱི་རིགས་ལྔ་རེ་རེ་བཞིན་ཚང་བར་འཆར་བ་ཡིན་པས།དེ་ལ་བར་མ་ཆད་པར་བྱས་ཏེ་སྦྱངས་པ་མཐར་ཕྱིན་ནས་རིམ་པ་བཞིན་དུ་ལྷ་ཡབ་ཡུམ་ཟུང་འབྲེལ་དུ་སྣང་བ་ནི་འདི་ལྟར་འབྱུང་སྟེ།འོད་ལྔའི་ཐིག་ལེ་ལྔ་ཚོམ་གྱི་ཀློང་དུ་རིགས་ལྔའི་ཚོམ་བུ་ལྔ་ལྔར་ཤར་བའི་ནང་དབུས་རྣམས་སུ།ལོངས་སྤྱོད་ཀྱི་རྒྱན་རྫོགས་པའི་རྣམ་པར་སྣང་མཛད་དཀར་པོ་དང་།དེ་བཞིན་དུ་རྡོ་རྗེ་སེམས་དཔའ་སྔོན་པོ།རིན་ཆེན་འབྱུང་ལྡན་སེར་པོ།སྣང་བ་མཐའ་ཡས་དམར་པོ།དོན་ཡོད་གྲུབ་པ་ལྗང་གུ་རྣམས་རང་རང་རིགས་ཀྱི་ཡུམ་དང་བཅས་པ་འཁྲིལ་སྦྱོར་དུ་སྣང་ཞིང་།དེ་དག་རིགས་དང་མཐུན་པའི་འཁོར་རྣམས་ཀྱང་སེམས་དཔའ་སེམས་མ་བཞི་བཞིས་བསྐོར་བ་དང་བཅས་པར་འཆར་ཏེ།དེ་ལྟ་བུའི་ཕྱག་རྒྱ་རྣམས་ཀྱང་སྐུ་མཛེས་ཤིང་ཡིད་དུ་འོང་བ་སྐྱེ་མཆེད་དྭངས་པས་བལྟ་བས་ཆོག་མི་ཤེས་ཤིང་།སྐུ་ལ་དར་དང་རིན་པོ་ཆེ་སྣ་ཚོགས་ཀྱི་རྒྱན་ཆས་རྫོགས་པ།འོད་དང་འོད་ཟེར་འཕྲོ་བའི་རྣམ་པར་འཆར་དང་།རིག་གདངས་རྡོ་རྗེ་ལུག་རྒྱུད་ཀྱང་ཆེར་སྨིན་པའི་ཚད་དུ་ཁ་དོག་ཀྱང་ཤེལ་ལྟར་དཀར་བ་དང་།སྦུལ་ལེན་གྱི་མདོག་ལྟར་སེར་བ།རྒྱ་མཚལ་གྱི་ཁུ་བ་ལྟར་དམར་བ།ཨིནྡྲ་ནི་ལའི་ཁ་དོག་ལྟར་ལྗང་གུ་སྟེ།དེ་དག་དཔེར་ན་མུ་ཏིག་ཕྲེང་བ་བསྟར་ལ་བརྒྱུས་པ་ལྟ་བུ་རུ་དྲྭ་བ་དང་དྲྭ་བ་ཕྱེད་པའི་རྣམ་པར་འཆར་བ་རྣམས་ནི།ཕྱིའི་དབྱིངས་ཐིག་དང་རིག་གདངས་ཀྱི་འཕེལ་ཚད་རྫོགས་ཚུལ་མདོ་ཙམ་བསྟན་པ་ཡིན་པས་གནད་མཆོག་ཏུ་ཤེས་པར་བྱའོ། །དེ་ལྟར་ཉམས་ལེན་གྱི་འཕེལ་ཚད་རྫོགས་ནས་མི་འགྱུར་གསང་བའི་རྟགས་རྣམས་འབྱུང་ཚུལ་ནི།ནང་རྟགས་ལུས་ནི་སོགས།ས་རུ་གྲོལ༔ ཞེས་པས་བསྟན་ཏེ།དེ་ལ་འདིར་རིག་པ་ཚད་དུ་ཕེབས་ནས་ནང་རྟགས་སྒོ་གསུམ་ལ་འཆར་བ་ནི།ལུས་ལ་གཉེར་མ་མེད་ཅིང་གཞོན་ཤ་ལྡན་པ།སྐྲ་དཀར་ནག་པོར་འགྱུར་ཞིང་སོའུ་སྐྱེ་བ།ལུས་ནི་རི་བྲག་ཀུན་ལ་ཟང་ཐལ་དུ་འགྲོ་ཞིང་འབྱུང་བས་མི་ཚུགས་པ།ལུས་ཤིང་བལ་ལྟར་ཡངས་ཤིང་དབུགས་ཀྱི་འགྱུ་བ་མི་ཚོར་བ་དང་།རང་ལུས་ཟང་ཐལ་དྲི་མ་མེད་པ་འོད་ཀྱི་ལུས་སུ་སྣང་ནས།རི་བྲག་ལ་སོགས་དངོས་པོ་ཐོག་རེག་གི་རྣམ་པ་ཇི་ལྟར་སྣང་བ་ཀུན་ལ་རང་བཞིན་གྱི་ཐོགས་པ་མེད་པར་ཟང་ཐལ་དུ་འགྲོ་བ་དང་།ལུས་ལ་རིགས་ལྔའི་ཕྱག་མཚན་གྱི་རྣམ་པའི་ཤ་མཚན་དང་རིས་སུ་སྣང་བ་ལ་སོགས་པ་འབྱུང་བའོ། །ངག་ནི་ཁྲོ་ཚིག་མི་འབྱུང་ཞིང་གང་སྨྲས་ཐམས་ཅད་གཞན་ཡིད་དགའ་བའི་ཚིག་དང་།ཁྱད་པར་འཁྲུལ་ཚིག་མི་སྨྲ་ཞིང་ཆོས་ཀྱི་ཚིག་དོན་སྣ་ཚོགས་མ་བསླབ་བཞིན་དུ་ཐོལ་བྱུང་དུ་སྨྲ་བ་དང་།གཞན་ཡང་སྔར་མ་ཐོས་པའི་གཏམ་རྒྱུད་གཞན་བློ་ཆོས་ལ་བསྒྱུར་ནུས་པ་དང་།ཆོས་མཐུན་གྱི་གླུ་དང་མགུར་མ་ལ་སོགས་པ་རང་རྡོལ་དུ་འབྱུང་བ་དང་།འབྱུང་བའི་སྒྲ་སྐད་དང་རིགས་དྲུག་གི་སྐད་ལ་སོགས་པ་ཤེས་པར་འབྱུང་སྟེ་གཞན་སྣང་ཡང་དག་དགེ་བའི་ལམ་ལ་སྦྱོར་ནུས་པ་འབྱུང་བ་ཡིན་ནོ། །སེམས་ཉིད་ཡེ་ཤེས་ལྔ་རུ་གོ་འཕོས་པས་སེམས་རྟགས་ལུས་ལ་འབྱུང་སྟེ།ནམ་མཁའ་ལ་བྱ་བཞིན་འཕུལ་བ་དང་།ཆུ་ལ་ཉ་ལྟར་བགྲོད་པ།བཅོས་མིན་གྱི་སྙིང་རྗེ་ངམ་ངམ་ཤུགས་ཀྱི་རྒྱུད་ལ་གནས་པ།ལུས་འབྱུང་བ་ལྔར་སྤྲུལ་ནུས་ཤིང་བསམ་པའི་ཡུལ་ཀུན་ཏུ་ཐོགས་མེད་དུ་འགྲོ་བ་སོགས་དང་།ཁྱད་པར་གཞན་སེམས་ཤེས་པ་ལ་སོགས་པའི་མངོན་པར་ཤེས་པ་ལྔ་དང་།ཐོག་རེག་གི་བཅད་པའི་ཡུལ་དང་།རྒྱལ་བའི་ཞིང་ཁམས་སོགས་མཐོང་བའི་སྤྱན་ལྔ་ཤེས་རབ་དང་ཏིང་ངེ་འཛིན་གྱི་སྒོ་བསམ་གྱིས་མི་ཁྱབ་པ་ལ་མངའ་དབང་འབྱོར་བས་སྤྲུལ་བསྒྱུར་སྐྱེ་འཇུག་རྣམས་ལ་རང་དབང་བསྒྱུར་ཏེ།སྣང་སྲིད་དག་མཉམ་ཆེན་པོར་ཤར་བ་ལས་མ་དག་པའི་སྣང་བ་རྡུལ་ཙམ་ཡང་མེད་པའོ། །འདིའི་དུས་སུ་སྔར་གྱི་རྣམ་སྨིན་རྒྱུ་དང་འབྲས་བུར་མི་ལྟོས་པར་ཡར་གྱི་ཟང་ཐལ་ཆེན་པོར་གདུལ་བྱ་ཐེར་འབུམ་དང་བཅས་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་ས་རུ་གྲོལ་བ་ཐོབ་པས་ན།རྫོགས་ཆེན་རང་ལམ་དུ་ཚད་ཕེབས་པ་དང་།མདོ་ལམ་གྱི་ས་བརྒྱད་པའི་ཡོན་ཏན་དང་།སྔགས་བསྐྱེད་པའི་ལམ་དུ་ཕྱག་རྒྱ་ཆེན་པོའི་རིག་འཛིན་ཡང་དོན་གྱི་ཐོབ་པ་ཡིན་ནོ། །ཞེས་རིག་པ་ཚད་ཕེབས་ཀྱི་དབྱིངས་ཐིག་འཆར་ཚུལ་དང་མཐར་ཕྱིན་ནས་ཡོན་ཏན་རྫོགས་པའི་གནད་གསལ་བར་བསྟན་པའི་ལེའུ་སྟེ་བཅུ་གཉིས་པའོ། །ས་མ་ཡ།གུ་ཧྱ༔ ཞེས་པ་སྐལ་མེད་ལ་བཀའ་རྒྱས་སུ་བཏབ་པའི་དོན་ཡིན་ནོ། །དེ་ལྟར་ཉིན་མོའི་རྣལ་འབྱོར་གྱི་ལམ་གྱི་རིམ་པའི་གནད་བསྡུས་མདོ་ཙམ་བསྟན་ཟིན་ཏོ། །། །དེ་དག་གི་ཆ་རྐྱེན་དུ་མཚན་མོའི་རྣལ་འབྱོར་གྱི་ལམ་རིམ་བསྟན་པར་བྱེད་པ་ལའང་།ཤེས་བྱ་བུམ་པར་བསྡུ་བ་དང་།གཉིད་འོད་གསལ་དུ་སྦ་བ།འབྱུང་ཁམས་དག་སྦྱོར་དང་གསུམ་དུ་ཡོད་པ་ལས།དང་པོ་ནི།བསྐལ་མང་གོང་ནས་སོགས།གཉིད་ནས་སླར༔ ཞེས་པས་བསྟན་ཏེ།དེ་ལ་འདིར་ལས་དང་སྐལ་བར་ལྡན་པའི་སྐྱེས་བུ་རྣམས་ཀྱིས་སྔོན་བསྐལ་པ་གྲངས་མེད་མང་པོའི་གོང་རོལ་ནས།ཚུལ་ཁྲིམས་རྣམ་པར་དག་པས་གཞི་བཟུང་།སྦྱིན་སོགས་ཕ་རོལ་ཏུ་ཕྱིན་པ་དྲུག་མཐར་ཕྱིན་པ་སྨོན་ལམ་གྱི་ཚོགས་དང་།འོད་གསལ་རྫོགས་པ་ཆེན་པོའི་ལམ་མ་ནོར་བར་ཚུལ་བཞིན་དུ་ཉམས་སུ་ལེན་པར་བྱེད་པ་འབྲས་བུ་ཡེ་ཤེས་ཀྱི་ཚོགས་ཏེ།ཚོགས་གཉིས་རྒྱ་ཆེན་པོ་བསགས་པའི་མཐུ་དང་།སྔོན་གྱི་སྨོན་ལམ་བཟང་པོའི་མཚམས་སྦྱོར་གྱི་སྟོབས་ལ་བརྟེན་ནས།བརྒྱུད་ལྡན་རིག་འཛིན་བླ་མས་རྗེས་སུ་བཟུང་སྟེ་ཐེག་པ་ཆེན་པོའི་དོན་དམ་པའི་ཆོས་ལ་ལས་འབྲེལ་བཞག་ཅིང་།ཆོས་ཉིད་ཡིད་དཔྱོད་དུ་མ་ལུས་པར་དབང་པོ་སྐྱོན་དང་བྲལ་བར་རྒྱང་ཞགས་ཆུ་ཡི་སྒྲོན་མ་སོགས་ཀྱི་གནད་ལ་བརྟེན་ནས།ཆོས་ཉིད་ཀྱི་དོན་མངོན་སུམ་རང་གནས་སུ་མཐོང་བའི་སྐྱེས་བུ་ལས་ཅན་སྐལ་བ་བཟང་པོ་ཉིན་མོའི་སྐར་མ་ཙམ་རེ་འབྱུང་སྲིད་ན།དེའི་དབང་སྐལ་དང་ལམ་གྱི་ཆ་རྐྱེན་དུ་འོད་གསལ་ཉིན་མཚན་ཁ་སྦྱར་ནས་ཐུན་དྲུག་གི་ཚུལ་དུ་ཉམས་སུ་ལེན་པའི་རིམ་པ་རྣམས་མདོ་ཙམ་བསྟན་པས་ན།དེའི་ཕྱིར་དུ་སྦྱངས་པ་མཐར་སོན་པར་བྱེད་པ་ལ།ཉིན་གྱི་དུས་སུ་སྒོ་གསུམ་གྱི་བྱ་བ་དགུ་སྤྲུགས་སུ་བཏང་ནས་ལུས་བཞུགས་སྟངས་དང་མི་འབྲལ་བར་གདམས་པ་ཉམས་སུ་བླངས་ཤིང་།འོད་གསལ་དབྱིངས་ཐིག་གི་སྣང་བ་མངོན་དུ་བྱེད་ཅིང་རིག་པ་མ་བཅོས་རང་བབས་སུ་བཞག་པ་དང་།མཚན་མོའི་ཐུན་ཆ་གསུམ་དུ་བྱས་ཏེ།སྲོད་ལ་ཉལ་ཚེ་ལུས་དྲང་སྲོང་གི་འདུག་སྟངས་དང་བཅས་ཏེ།མ་དག་པའི་རླུང་ངོ་ལན་གསུམ་བསལ་ནས་སྟེང་འོག་གི་རླུང་ཁ་སྦྱོར་བུམ་ཅན་དུ་བཟུང་སྟེ།རང་གི་གནས་ཡུལ་ཐམས་ཅད་དག་པའི་ཞིང་ཁམས་ཡིད་དུ་འོང་བ་ཞིག་ཏུ་གསལ་གདབ།རང་ལུས་འོད་ཀྱི་ཕུང་པོ་ཕྱི་ནང་གསལ་སྒྲིབ་མེད་པ་ཞིག་ཏུ་བསྒོམ་ནས།ཤེས་བྱ་བུམ་པར་བསྡུ་བའི་ཐབས་ལ་སྦྱང་བ་ནི།རང་ལུས་དྭངས་གསལ་ཕྲུ་མ་ཕུས་བཀང་བ་ལྟ་བུའི་ནང་དབུས་སུ།རྩ་དབུ་མ་མདའ་སྨྱུག་འབྲིང་པོའི་ཚད་ཙམ་ཞིག།ཆུ་ཤིང་ལྟར་དྲང་བ།པདྨའི་འདབ་མ་ལྟར་སྲབ་པ།རྒྱ་ཚོས་ཀྱི་ཁུ་བ་ལྟར་སྣུམ་པ།ཏིལ་མར་གྱི་སྒྲོན་མེ་ལྟར་གསལ་བ་སྟེ་མཚན་ཉིད་བཞི་དང་ལྡན་པ།ཕྱི་དཀར་ལ།ནང་དམར་བ།བར་མཐིང་ག།ཡར་སྣེ་སྤྱི་བོར་ཟུག་ཅིང་ཁ་ཕྱེ་བ།མར་སྣ་གསང་བར་ཚིག་གི་འགག་པ་ལྟར་ཡོད་པ། །དེའི་གཡས་སུ་རོ་མ་ཕྱི་དཀར་ལ་ནང་དམར་བ།གཡོན་དུ་རྐྱང་མ་ཕྱི་དཀར་ལ་ནང་དམར་བ།གཉིས་ཀའང་གསལ་ལ་དྭངས་པའི་རྣམ་པ་ཅན།མར་སྣ་གཉིས་ལྟེ་འོག་སོར་བཞིའི་ཐད་ནས་དབུ་མར་ཡི་གེ་ཆའི་རྣམ་པར་ཟུག་པ།ཡར་སྣེ་གཉིས་རྣ་ལྟག་གཉིས་ནས་འགུག་ཅིང་སྣ་བུག་གཉིས་སུ་ཟུག་པར་བསྒོམ་པའོ། །དེ་ལྟ་བུའི་རྩ་གསུམ་གྱི་འདུས་མདོ་དབུ་མའི་ནང་ཁོངས་ལྟེ་འོག་ཏུ་པདྨ་འདབ་བཞིའི་ལྟེ་བར།ངོ་བོ་སྟོང་ཉིད་ཤེས་རབ་ཡུམ་གྱི་རང་བཞིན་ལ།རྣམ་པ་ཨ་ཐུང་དམར་གསལ་འོད་ཀྱི་རང་བཞིན་རྩ་བ་བརྟན་པ།རྩེ་མོ་རྣོ་བའི་སྟེང་དུ་ནཱ་ད་དང་བཅས་པ་གསལ་གདབ།སྤྱི་བོར་བདེ་ཆེན་གྱི་འཁོར་ལོའི་དབུས་སུ་འོད་ཀྱི་ཐིག་ལེ་དཀར་པོའི་ཀློང་དུ།ངོ་བོ་ཐབས་མཆོག་ཏུ་མི་འགྱུར་བ་བདེ་ཆེན་ཡབ་ཀྱི་རང་བཞིན་ལ།རྣམ་པ་ཧཾ་ཡིག་དཀར་པོ་ཆུ་ཤེལ་གྱི་མདོག་ལྟར་གསལ་ལ་དྭངས་པ།མགོ་ཐུར་དུ་བསྟན་ཅིང་བདེ་སྟོང་ཡེ་ཤེས་ཀྱི་བདུད་རྩིའི་ཟིལ་པ་ཁྲོམ་པ།ངོ་བོ་བདེ་བ།རྣམ་པ་ཆུ།བྱེད་ལས་དགའ་བ་བཞིའི་ཡེ་ཤེས་བསྐྱེད་པ།རེག་བྱ་བསིལ་བ་སྟེ་མཚན་ཉིད་བཞི་ལྡན་དུ་བསྒོམ་པར་བྱ་ཞིང་།དེ་ནས་རང་གི་སྨིན་མཚམས་ནས་སོར་བཅུ་གཉིས་ཀྱི་མཚམས་སུ།ཕྱོགས་བཅུའི་རྒྱལ་བ་སྲས་དང་བཅས་པ་རྣམས་དང་།དགོངས་བརྡ་སྙན་བརྒྱུད་ཀྱི་བླ་མ་རིག་འཛིན་གྱི་ཚོགས་དང་།ཡི་དམ་རྒྱུད་སྡེ་བཞི་དྲུག།མ་གནས་གསུམ་གྱི་དཔའ་བོ་མཁའ་འགྲོ་ལ་སོགས་པའི་ཐུགས་རྗེ་བྱིན་རླབས་ཡེ་ཤེས་ཡོན་ཏན་ཐམས་ཅད་འདུས་པའི་ངོ་བོ་འོད་ཕུང་ལྗང་སྔོན་རླུང་གི་རྣམ་པར་བྱུང་བ།རང་གི་སྣ་བུག་གཉིས་ནས་དལ་བུས་རྔུབས་ཏེ།སྤོས་རིང་གི་དུད་པ་ལྟར་སྔོ་ཕྱུར་གྱིས་བྱུང་ནས་རོ་རྐྱང་གི་ལམ་བརྒྱུད་དེ་ལྟེ་འོག་གི་ཨ་ཐུང་ལ་ཕོག་པས།དེ་ལས་གཏུམ་མོ་ཡེ་ཤེས་ཀྱི་མེའི་ངོ་བོ་བདེ་བ།རྣམ་པ་མེ།བྱེད་ལས་སྤྱི་བོའི་ཟླ་བ་བཞུ་བའི་བདེ་ཆེན་སྟོང་པའི་ཡེ་ཤེས་བསྐྱེད་པ།རེག་བྱ་ཚ་བ་སྟེ་མཚན་ཉིད་བཞི་དང་ལྡན་པའི་ཡེ་ཤེས་ཀྱི་མེ་ལ།བྱིན་རླབས་ཡེ་ཤེས་ཀྱི་རླུང་གིས་གསོས་ཐེབས་ནས་མེ་ལྕེ་རབ་ཏུ་ཆེར་མཆེད་དེ།རིམ་པ་བཞིན་དུ་རང་གི་ལྟེ་བའི་རྩ་འཁོར་ཐམས་ཅད་ལ་ཁྱབ་པས།ཉོན་མོངས་པ་ང་རྒྱལ་གྱིས་བསྐྱེད་པའི་རྩ་རླུང་ཐིག་ལེའི་སྒྲིབ་པ་དང་བག་ཆགས་ཐམས་ཅད་ལྷག་མེད་དུ་བསྲེགས་པར་བསམ་ལ།རླུང་ཐུན་ཐུང་རེ་འཛིན་པ་དང་།དེ་བཞིན་དུ་སྙིང་ག་ཆོས་ཀྱི་འཁོར་ལོའི་རྩ་འཁོར་རྣམས་སུ་ཁྱབ་པས།ཉོན་མོངས་པ་གཏི་མུག་གིས་བསྐྱེད་པའི་རླུང་ཐིག་རྩའི་སྒྲིབ་པ་དང་བག་ཆགས་ངན་པ་ཐམས་ཅད་རྩྭ་ཕུང་ལ་མེ་ལྕེ་ཕོག་པ་བཞིན་དུ་ལྷག་མེད་དུ་བསྲེགས་པར་བསམ་ལ།སྔར་ལྟར་རླུང་གི་སྦྱོར་བ་ལ་བརྩོན་པར་བྱའོ། །དེ་བཞིན་དུ་ཡང་ཡེ་ཤེས་ཀྱི་མེ་ལྕེས་མགྲིན་པའི་རྩ་འཁོར་རྣམས་སུ་ཁྱབ་པས་ཉོན་མོངས་པ་འདོད་ཆགས་ཀྱི་སྒོ་ནས་བསྐྱེད་པའི་རྩ་རླུང་ཐིག་ལེའི་སྒྲིབ་པ་བག་ཆགས་དང་བཅས་པ་ཐམས་ཅད་ལྷག་མེད་དུ་བསྲེགས་པར་བསམ།ཡང་སྤྱི་བོའི་རྩ་འཁོར་རྣམས་སུ་ཁྱབ་པས།ཉོན་མོངས་པ་ཞེ་སྡང་གིས་བསྐྱེད་པའི་རྩ་ཐིག་རླུང་གསུམ་གྱི་སྒྲིབ་པ་བག་ཆགས་དང་བཅས་པ་ཐམས་ཅད་བསྲེགས་པར་བསམ་པ་སྟེ།འཁོར་ལོ་བཞི་པའི་མས་ནས་ཡས་རིམ་གྱི་ཚུལ་དུ་གཏུམ་མོ་ཡེ་ཤེས་ཀྱི་མེས་ཁྱབ་ཅིང་།ཉོན་མོངས་པའི་རྒྱུ་ས་བོན་བག་ཆགས་དང་བཅས་པ་སྦྱངས་པར་བསམ་པ་དང་།སླར་ཡང་མེ་ལྕེ་ཆེར་མཆེད་ནས་མ་དག་གདོས་བཅས་ཀྱི་ཕུང་པོ་ཁམས་དང་།ཚེ་རབས་ནས་བསགས་པའི་ནད་གདོན་སྡིག་སྒྲིབ་བག་ཆགས་ཐམས་ཅད་ལྷག་མེད་དུ་བསྲེགས་པར་བསམ་པ་དང་།མེ་ལྕེ་མར་མཆེད་ནས་གསང་གནས་ཀྱི་རྩ་འཁོར་ཐམས་ཅད་ལ་ཁྱབ་པས།ཉོན་མོངས་པ་ཕྲག་དོག་གིས་བསྐྱེད་པའི་རྩ་རླུང་ཐིག་ལེའི་སྒྲིབ་པ་བག་ཆགས་ཐམས་ཅད་བསྲེགས་པར་བསམ་ལ།སྔར་བཞིན་རླུང་ཐུན་ཐུང་རེ་བཟུང་།དེ་ལྟར་མ་དག་པའི་རྩ་རླུང་ཐིག་ལེའི་ཁམས་ཐམས་ཅད་གཏུམ་མོ་ཡེ་ཤེས་ཀྱི་མེས་བསྲེགས་ཏེ།མེ་ལྕེ་དེ་ཉིད་ཀྱི་རེག་བྱ་སྤྱི་བོའི་ཧཾ་ཡིག་ལ་ཕོག་པ་ཙམ་གྱིས་ཧཾ་ཡིག་དེ་ལས་ངོ་བོ་བདེ་སྟོང་ཟག་པ་མེད་པའི་ཡེ་ཤེས་ཀྱི་བདུད་རྩིའི་ཆུ་རྒྱུན་བ་འོའི་མདོག་ལྟ་བུ་ངང་ནར་གྱིས་བྱུང་སྟེ།མེ་དང་བདུད་རྩི་བྲོས་དེད་ཀྱི་ཚུལ་དུ་སྤྱི་བོར་ཐོན་ཚེ།ལུས་དང་རྩའི་སྒྲིབ་པ་དག།བུམ་དབང་གི་ས་བོན་ཐེབ།དགའ་བའི་ཡེ་ཤེས་རྒྱུད་ལ་སྐྱེས་པར་བསམ།མགྲིན་པར་ཁྱབ་པས་ངག་དང་རླུང་གི་སྒྲིབ་པ་དག།གསང་དབང་གི་སྣོད་དུ་གྱུར།མཆོག་དགའི་ཡེ་ཤེས་རྒྱུད་ལ་སྐྱེས་པར་བསམ།ཐིག་ལེ་སྙིང་གར་ཁྱབ་པས་ཡིད་དང་ཐིག་ལེའི་སྒྲིབ་པ་དག།ཤེར་དབང་གི་སྣོད་དུ་རུང་།ཁྱད་པར་དགའ་བའི་ཡེ་ཤེས་རྒྱུད་ལ་སྐྱེས་པར་བསམ།ལྟེ་བར་ཁྱབ་པས་ཉོན་མོངས་པ་དང་ཤེས་བྱའི་སྒྲིབ་པ་དག།ཚིག་དབང་གི་སྣོད་དུ་གྱུར།ལྷན་དགའི་ཡེ་ཤེས་རྒྱུད་ལ་སྐྱེས་པར་བསམ་སྟེ།རྗེས་ཤེས་རིག་སྟོང་བསམ་བརྗོད་དང་བྲལ་བའི་ངང་དུ་ཅུང་ཞིག་ངལ་གསོ།སླར་ཡང་མེད་དང་བདུད་རྩི་གཉིས་མེད་དུ་གྱུར་ནས་ལྟེ་བའི་ཨ་ཐུང་ཉིད་ལ་ཕོག་པ་ལས་མེ་ཆེར་ལྷབ་ཀྱིས་འབར་ཏེ་ལུས་ཐམས་ཅད་ལ་ཁྱབ་པས་རྩ་མདུད་རྣམས་ཁྲོལ་གྱིས་ཞིག་ནས་དཀར་དམར་ཐམས་ཅད་གཅིག་ཏུ་འདྲེས་ཏེ།དཀར་ཆ་དག་པ་སྐུ།དམར་ཆ་དག་པ་གསུང་།རླུང་རིག་དག་པ་ཐུགས་སུ་སྨིན་པར་བསམ་པ་དང་།བྱིན་རླབས་ཡེ་ཤེས་ཀྱི་རླུང་།གཏུམ་མོ་ཡེ་ཤེས་ཀྱི་མེ་དང་།བདེ་སྟོང་ཡེ་ཤེས་ཀྱི་བདུད་རྩི་གསུམ་གཉིས་མེད་དུ་གྱུར་པ་རྒྱ་ཆེར་རབ་ཏུ་མཆེད་དེ།དབུ་མ་མེ་དང་བཅས་པས་སྣོད་བཅུད་ཐམས་ཅད་ལ་ཁྱབ་པས་ཚེ་རབས་ཐོག་མཐའ་མེད་པ་ནས་དུག་ལྔ་དུག་གསུམ་གྱིས་བསྐྱེད་པའི་ནད་གདོན་འགལ་རྐྱེན་བར་ཆད་ཐམས་ཅད་དང་།ལས་ཉོན་སྡིག་སྒྲིབ་སྡུག་བསྔལ་བག་ཆགས་དང་བཅས་པ་ཐམས་ཅད་སྤུ་ཤད་ཕྲ་མོ་ལ་མེ་ལྕེ་ཕོག་པ་ལྟར་སྐད་ཅིག་གིས་བསྲེགས་ཏེ།སྟོང་ཁམས་ཐམས་ཅད་རང་ལུས་དབུ་མ་མེ་དང་བཅས་པས་ཁྱབ་པར་བསམ་ལ་རླུང་བཟུང་ནས་ཅུང་ཟད་མཉམ་པར་བཞག།མཐར་དེ་དག་ཇེ་ཕྲར་གྱུར་ནས་སྔར་བཞིན་ལུས་སྟོང་གསལ་འོད་ཀྱི་ཕུང་པོ་རུ་གསལ་གདབ་པའི་དབུས་ཀྱི་དབུ་མའི་མར་སྣེའི་ལྟེ་འོག་གི་སྦུབས་སུ་ཨ་ཐུང་དང་གཏུམ་མོ་ཡེ་ཤེས་ཀྱི་མེ་གཉིས་རོ་གཅིག་ཏུ་གྱུར་པ་ལ་ཤེས་པ་རྩེ་གཅིག་ཏུ་གཏད་དེ།སེམས་གཞན་དུ་མ་ཡེངས་པར་རིག་པ་འོད་གསལ་བའི་ཡེ་ཤེས་མི་འགྱུར་བ་དེའི་ངང་མངོན་དུ་བྱས་ཏེ་གཉིད་ཀྱི་རྣལ་འབྱོར་ལ་འཇུག་གོ། །དེ་ནས་དོན་གཉིས་པ་གཉིད་འོད་གསལ་དུ་སྦ་བ་ནི།ནམ་ཕྱེད་ལོངས་སྐུའི་སོགས།ཐུན་ཆུང་བཟུང་༔ ཞེས་པས་བསྟན་ཏེ།སླར་ཡང་ནམ་ཕྱེད་ཀྱི་དུས་གཉིད་ལས་ལྡང་སྟེ།ལུས་གནད་ལོངས་སྐུའི་འདུག་སྟངས་གླང་ཆེན་ཉལ་སྟབས་ལ་བརྟེན་ཏེ།སེམས་མ་བཅོས་པར་དར་ཅིག་མཉམ་པར་བཞག་མཐར།རང་གི་སྣ་རྩེ་ཐད་ཀྱི་མདུན་མཁའ་རུ་དུས་གསུམ་གྱི་སངས་རྒྱས་ཐམས་ཅད་འདུས་པའི་ངོ་བོ་དྲིན་ཆེན་རྩ་བའི་བླ་མའི་ཐུགས་རྗེ་བྱིན་རླབས་ཡེ་ཤེས་ཡོན་ཏན་ཐམས་ཅད་གཅིག་ཏུ་འདུས་པའི་རང་བཞིན།འོད་ཀྱི་ཐིག་ལེ་དཀར་པོ་གསལ་འཚེར་གཟི་བརྗིད་འབར་བ།དཔེར་ན་ཆུ་ཤེལ་གྱི་ཕུང་པོ་ལ་ཉི་མའི་འོད་དང་འཕྲད་པ་ལྟ་བུ་ཞིག་གསལ་བཏབ་སྟེ།དེ་ལས་འོད་ཟེར་དཀར་པོ་ཆུ་ཤེལ་གྱི་མདོག་ལྟར་འཕྲོས་ནས།རང་གི་ལུས་ལ་ཕོག་པ་ཙམ་གྱིས་སྒོ་གསུམ་གྱི་སྡིག་སྒྲིབ་བག་ཆགས་ཐམས་ཅད་ལྷག་མེད་དུ་བཅོམ་སྟེ།ལུས་ངག་ཡིད་གསུམ་དུ་འཁྲུལ་པའི་གཟུང་འཛིན་བག་ཆགས་དང་བཅས་པ་ཐམས་ཅད་འོད་ཀྱི་རང་བཞིན་དུ་ཞུ་ནས་ཐིག་ལེ་ལ་ཐིམ་པ།དཔེར་ན་ཆུ་ཉིད་ལ་ནི་ཆུ་བཞག་པ་ཇི་བཞིན་དུ།འོད་ཐིག་དང་རོ་གཅིག་ཏུ་གྱུར་ནས་སྣ་རྩེའི་ཐིག་ལེ་ཉིད་ལ་ཐིམ་པར་བསམ་ལ།རླུང་ཤེས་དམིགས་གནད་གཅིག་ཏུ་དྲིལ་བར་བྱས་ཏེ།རིག་པ་རང་བབ་ཀྱི་ངང་ནས་ཐིག་ལེ་མངོན་དུ་བྱེད་ཅིང་དེའི་ངང་ནས་སེམས་མ་བཅོས་པར་གནས་བཞིན་ཐུན་ཆུང་ཞིག་བཟུང་ལ་མཉམ་པར་བཞག་གོ། །ཡང་།མཐར་ནི་དབུ་མ་སོགས།ཕྱོགས་ནས་སུ༔ ཞེས་པས་བསྟན་ཏེ།དེ་ལྟར་ཐུན་ཆུང་ཞིག་ཏུ་མཉམ་པར་བཞག་མཐར།ལུས་གནད་ནི་སྔར་བཞིན་གླང་ཆེན་ཉལ་སྟབས་སུ་བཞུགས་ནས།རང་ལུས་འོད་ཀྱི་ཕུང་པོ་ཕྱི་ནང་གསལ་སྒྲིབ་མེད་པའི་དབུས་སུ་རྩ་དབུ་མ་མཚན་ཉིད་བཞི་དང་ལྡན་པ་སྔར་བཞིན་དུ་གསལ་བཏབ་སྟེ།སྙིང་གའི་ཐད་ཀྱི་དབུ་མའི་ནང་དུ་འོད་ཕུང་དཀར་པོའི་དབུས་སུ་ཨ་དཀར་དྲི་མ་མེད་པ་གསལ་ལ་འཚེར་བ་འོད་འབར་བ་ཞིག་བསྒོམ།སྤྱི་བོའི་ཚངས་བུག་དབུ་མའི་ཡར་སྣེའི་ནང་དུ་འོད་དཀར་གྱི་ཀློང་དུ་སྔར་བཞིན་ཨ་དཀར་པོ་གསལ་འཚེར་འོད་འབར་བ་ཞིག་བསྒོམ་ལ།དེ་ལྟ་བུའི་ཨ་ཡིག་གཉིས་ཀྱི་བར་དུ་འོད་ཀྱི་ཨ་དཀར་བཅུ་དགུ་བརྩེགས་མར་གནས་པ་ལ་བར་མཚམས་ཐམས་ཅད་འོད་ཀྱིས་སྦྲེལ་བར་བསམ་པ་དང་།ཨ་ཡིག་དེ་དག་རྣམས་ཀྱང་འོད་དང་འོད་ཟེར་རབ་ཏུ་འབར་བའི་རང་བཞིན་ཅན།དཔེར་ན་ཉི་མའི་དཀྱིལ་འཁོར་སྤྲིན་དང་བྲལ་བ་ལྟ་བུར་གསལ་ལ་འཚེར་བའི་རྣམ་པ་ཅན་དུ་གསལ་གདབ།དེ་དག་ལས་འོད་ཟེར་འཕྲོས་ཏེ་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་དང་།བརྒྱུད་གསུམ་རིག་འཛིན་གྱི་བླ་མ་རྣམས་དང་།ཡི་དམ་རྒྱལ་བ་རྒྱ་མཚོའི་ལྷ་ཚོགས་དང་།གནས་གསུམ་གྱི་དཔའ་བོ་མཁའ་འགྲོ་རྣམས་ཀྱི་སྐུ་གསུང་ཐུགས་ལ་མཉེས་པའི་མཆོད་པ་ཕུལ་བས།ཐུགས་བདེ་སྟོང་གི་རོས་ཚིམས།ཐུགས་རྗེ་བྱིན་རླབས་ཡེ་ཤེས་ཡོན་ཏན་དབང་བྱིན་དངོས་གྲུབ་མ་ལུས་པ་ཐམས་ཅད་འོད་ཕུང་འཇའི་སྤྲིན་དཔུང་དཀར་པོའི་རྣམ་པར་བསྡུས་ཏེ།རང་གི་སྤྱི་བོ་ནས་རིམ་བཞིན་ཨ་རྣམས་དང་སྒོ་གསུམ་ལ་ཐིམ་པས་དབང་བྱིན་དངོས་གྲུབ་ཐམས་ཅད་གཅིག་ཆར་དུ་ཐོབ་པར་བསམ།མཐར་ཨ་ཡིག་རྣམས་ནི་རིམ་པ་བཞིན་དུ་དང་པོ་ཡས་ནས་མས་རིམ་གྱི་ཚུལ་དུ་སྤྱི་བོའི་ཨ་འོད་ཀྱི་རང་བཞིན་དུ་ཞུ་ནས་ཨ་གཉིས་པར་ཐིམ་སྟེ།དེ་ཉིད་ཨ་ཡིག་གཉིས་ཀྱི་འོད་དང་བཀྲག་མདངས་དང་ལྡན་པར་བསམ།ཨ་ཡིག་གཞན་རྣམས་ཀྱང་གསལ་འཚེར་འོད་དུ་འབར་བཞིན་རིམ་གྱིས་གཅིག་གཅིག་ལ་ཐིམ་པའི་ཚུལ་གྱིས་རིམ་པར་བསྡུས་ཏེ།མཐར་སྙིང་གའི་ཐད་ཀྱི་དབུ་མའི་ནང་གི་ཨ་ལ་ཐིམ་པས།དེ་ཉིད་ཨ་དཀར་ཉེར་གཅིག་གི་བཀྲག་མདངས་དང་གཟི་བརྗིད་ཐམས་ཅད་འདུས་པའི་རང་བཞིན་ཅན་དུ་གྱུར་ནས་འོད་དང་འོད་ཟེར་འབར་བ་དབུ་མའི་ནང་ཀུན་ཀྱང་འོད་དཀར་གྱིས་གང་ཞིང་ཁྱབ་པ་དང་།ཁྱད་པར་བདག་ལུས་སྣོད་བཅུད་ཀྱི་ཁམས་ཐམས་ཅད་ལ་འོད་ཀྱིས་ཁྱབ་པས་མུན་ཁུང་དུ་སྒྲོན་མེ་བཏེགས་པ་ལྟར་ངང་ལྟེམས་ཀྱིས་སོང་བར་བསམ་ལ།གསལ་སྟོང་མྱོང་ཞེན་མེད་པའི་ངང་ནས་ཤེས་པ་གཞན་དུ་མ་ཡེངས་པར།སྙིང་གའི་ཨ་དཀར་འོད་དང་ལྡན་པ་དེ་ལ་སེམས་རྩེ་གཅིག་ཏུ་གཏད་དེ།གཉིད་དུ་ཕྱོགས་ནས་སྒོ་གསུམ་རང་བབས་སུ་བཞག་པའི་ཚེ་ན།དོན་གྱི་འོད་གསལ་ཟིན་པའི་གནད་གལ་པོ་ཆེ་ཡིན་ནོ། །དོན་གསུམ་པ་འབྱུང་ཁམས་དག་སྦྱོར་ནི།ཐོ་རངས་འབྱུང་ཁམས་སོགས།རྒྱ་ཡིས་བཏབ༔ ཅེས་པས་བསྟན་ཏེ།དེ་ལ་འདིར་ཐོ་རངས་འབྱུང་ཁམས་དག་སྦྱོར་བྱེད་པ་དེ་ལའང་ས་བཅད་རྣམ་པ་ལྔ་ཡོད་པ་ལས།ཐམས་ཅད་ཀྱི་ཐོག་མར་ཐོ་རངས་དང་པོ་མལ་ནས་ལངས་ཏེ་སེངྒེའི་འདུག་སྟངས་དང་བཅས་ངག་ནས་ཧ་ཞེས་པའི་སྒྲས་དབུགས་རིང་ཐང་གཅིག་ལ་རླུང་རོ་ཕྱིར་ལན་གསུམ་འཕང་སྟེ།དང་པོ་འདོད་ཆགས་ཀྱི་སྒོ་ནས་བསགས་པའི་ལན་ཉོན་སྡིག་སྒྲིབ་བག་ཆགས་ཐམས་ཅད་དུག་གསུམ་གྱི་རྩ་བ་ལས་ཀྱི་རླུང་ཁམ་ནག་གི་རྣམ་པར་ཐོན་པར་བསམ་པ་དང་།དེ་བཞིན་དུ་གཉིས་པར་ཉོན་མོངས་པ་ཞེ་སྡང་གི་སྒོ་ནས་བསགས་པའི་ལས་ཉོན་སྡིག་སྒྲིབ་བག་ཆགས་ལ་སོགས་པ་ཐམས་ཅད་ལས་རླུང་དམར་ནག་གི་རྣམ་པར་ཐོན་པར་བསམ་པ་དང་།ཧ་སྒྲ་གསུམ་པར་ཉོན་མོངས་པ་གཏི་མུག་གི་སྒོ་ནས་བསགས་པའི་ལས་ཉོན་སྡིག་སྒྲིབ་བག་ཆགས་ཐམས་ཅད་ལས་རླུང་ནག་པོའི་རྣམ་པར་ཐོན་ཏེ།དེ་དག་ཕྱིའི་ནམ་མཁའ་རྣམ་པར་དག་པའི་དབྱིངས་སུ་ཐིམ་པས།རང་ལུས་སྒྲིབ་བྲལ་འོད་ཀྱི་ཕུང་པོར་གྱུར་པར་བསམ་པ་དང་།སྙིང་གའི་ཐད་ཀྱི་དབུ་མའི་ནང་གི་ཨ་ཡིག་དཀར་གསལ་བཀྲག་འབར་བ་དེ་ལས་མེ་ལས་མེ་སྟག་འཕྲོ་བ་བཞིན་དུ།རང་གི་སྨིན་མཚམས་ཀྱི་ཐད་དྲངས་ཀྱི་ནམ་མཁར་སོར་ལྔའི་མཚམས་སུ།དང་པོ་ནམ་མཁའ་དག་སྦྱོར་གྱི་སྐབས་སུ་ཨ་ཡིག་མཐིང་ག་ཞིག་འཕྲོས་ཏེ།རང་གི་ཞལ་ནས་ཐོན་ཅིང་མདུན་མཁར་སྨིན་མཚམས་ཀྱི་ཐད་དུ་གནས་པ་ལ་སེམས་ཅུང་ཟད་གཏད་མཐར།ཨ་ཡིག་དེ་ལས་འོད་ཕུང་ཁ་དོག་མཐིང་གསལ་གྱི་རྣམ་པར་འབྱུང་སྟེ།རང་ལ་ཕོག་པའི་རྐྱེན་གྱིས་རང་གི་ཚེ་རབས་ནས་བསགས་པའི་ལས་ཉོན་སྡིག་སྒྲིབ་བག་ཆགས་ཐམས་ཅད་སངས་ཀྱིས་དག་ནས།བདག་ལུས་ཕུང་ཁམས་སྐྱེ་མཆེད་དང་བཅས་པ་འོད་དུ་ཞུ་ནས་ཨ་ཡིག་ལ་ཐིམ་པར་བསམ་པ་དང་།ཡང་ཨ་ལས་འོད་ཟེར་ཕྱོགས་བཅུར་འཕྲོས་པས་ཁམས་གསུམ་སྣོད་བཅུད་ཐམས་ཅད་ལ་ཕོག་པས།སྣོད་བཅུད་ཐམས་ཅད་ལན་ཚྭ་ཆུ་རུ་ཞུ་བ་བཞིན་དུ་འོད་ཕུང་མཐིང་གའི་རྣམ་པར་གྱུར་ནས་ཨ་ཡིག་ལ་ཐིམ་པར་བསམ།སླར་ཡང་བདག་ལུས་སྣོད་བཅུད་ཨ་ཡིག་དང་བཅས་པ་ཐམས་ཅད་འོད་དུ་ཞུ་ནས་དམིགས་མེད་ནམ་མཁའི་རང་བཞིན་དུ་གྱུར་པར་བསམ་ལ།མཐར་སྤྲོས་པ་དང་བྲལ་བའི་ངང་དུ་མཉམ་པར་བཞག་གོ། །དེ་བཞིན་དུ་གཉིས་པ་འབྱུང་བ་ཆུ་ཁམས་དག་སྦྱོར་ལ་རང་ལུས་དབུ་མ་ཨ་དང་བཅས་པ་སྔར་ལྟར་གསལ་ཞིང་ཨ་དེ་ལས་ཨ་ཡིག་དཀར་གསལ་ཆུའི་སྙིང་པོར་བསྒོམ་ལ།འཕྲོས་པའི་འོད་གདངས་དཀར་པོའི་རྣམ་པ་དང་།གསུམ་པ་འབྱུང་བ་ས་ཁམས་དག་སྦྱོར་ལ་ཨ་ཡིག་སེར་པོ་ས་ཡི་སྙིང་པོ་འོད་ཀྱི་རང་བཞིན་ཅན་དུ་བསྒོམ་ལ།འཕྲོས་པའི་འོད་གདངས་སེར་པོའི་རྣམ་པ་དང་།བཞི་པ་མེ་ཁམས་དག་སྦྱོར་ལ་སྙིང་གའི་ཨ་དེ་ལས་ཨ་ཡིག་དམར་པོ་མེ་ཡི་སྙིང་པོ་ཅན་སྤྲོས་པའི་འོད་གདངས་དམར་པོ་རུ་གསལ་བ་དང་།ལྔ་པ་རླུང་ཁམས་དག་སྦྱོར་ལ་ཨ་ལས་ཨ་ཡིག་ལྗང་ཁུ་རླུང་གི་སྙིང་པོ་ཅན་དང་།འོད་གདངས་ལྗང་ཁུ་གསལ་བ་མ་གཏོགས།འོད་ཟེར་སྤྲོ་བསྡུས་ཀྱི་དམིགས་པ་རྣམས་ནི་གོང་ལྟར་འབྱུང་བ་ནམ་མཁའ་དག་སྦྱོར་གྱི་སྐབས་དང་འདྲ་བ་སྟེ།ཨ་ཡིག་རྣམས་ཀྱང་འབྱུང་བ་རང་མདོག་ལྟར་གསལ་འཚེར་འོད་དུ་འབར་བའི་རང་བཞིན་དུ་བསྒོམ་སྟེ།འཕྲོ་འདུ་དམིགས་པའི་གནད་གཅུན་ཞིང་ཤེས་པ་བཟོ་མི་འཆོས་པར་མིག་གི་ལམ་ནས་ཨ་ཡིག་ལ་གཏད་ནས་སེམས་ཅི་གནས་སུ་ཡུན་ཅིག་ལ་མཉམ་པར་བཞག་ཅིང་།མིག་ནི་སྨིན་མཚམས་ཀྱི་ཐད་ཀྱི་ཨ་ཡིག་དེ་ཉིད་ལ་གཏད་དེ།འོད་ཟེར་འཕྲོ་འདུའི་དམིགས་གནད་བསྐྱང་ནས་སྡོད་པར་བྱའོ། །མཐར་ནི་ཐུན་འཇོག་ཁར་སྔར་ལྟར་ཨ་ཡིག་རྣམས་ལས་རང་མདོག་གི་འོད་ཟེར་འཕྲོས་ཏེ།རང་ལུས་ཕུང་པོ་ཁམས་དང་སྐྱེ་མཆེད་སྣང་སྲིད་སྣོད་བཅུད་སྣང་བའི་དངོས་པོ་ཀུན་ཀྱང་འོད་དུ་ཞུ་སྟེ།དེ་མ་ཐག་པར་མདུན་གྱི་ཨ་ཡིག་དེ་ཉིད་ལ་ཐིམ་མཐར།ཨ་ཡིག་ཀྱང་འོད་དུ་ཞུ་ནས་གོང་ལྟར་འབྱུང་བ་ནམ་མཁའི་རང་བཞིན་ནས།འབྱུང་བ་ཆུ་དང་།དེ་བཞིན་དུ་ས་དང་།མེ་ཡི་ཁམས་དང་།རླུང་གི་ཁམས་རྣམས་སུ་དྭངས་མའི་རང་བཞིན་དུ་འོད་དུ་ཞུ་མཐར།ནམ་མཁས་གར་ཁྱབ་འབྱུང་བ་ལྔའི་ཁ་དོག་དང་མཐུན་པའི་འོད་གདངས་ཀྱི་དབྱིབས་ནི།ནམ་མཁའི་ཁམས་དག་སྦྱོར་ལ་འོད་མཐིང་ག་ཟུར་བརྒྱད་པ་དང་།དེ་བཞིན་དུ་ཆུ་ཁམས་དག་སྦྱོར་ལ་འོད་དཀར་པོ་ཟླུམ་ལ་འཁྱིལ་བ་དང་།ས་ཁམས་དག་སྦྱོར་ལ་འོད་སེར་པོ་གྲུ་བཞི་དང་།མེ་ཁམས་དག་སྦྱོར་བ་འོད་དམར་པོ་ཟླ་གམ་དང་།རླུང་ཁམས་དག་སྦྱོར་བ་འོད་ལྗང་གུ་གཞུའི་དབྱིབས་ལྟ་བུ་སྟེ།དེ་ལྟར་འོད་གདངས་དེ་དག་གིས་ཀུན་ནས་ཁྱབ་པས་བདག་ལུས་ཕུང་ཁམས་སྣོད་བཅུད་ཐམས་ཅད་ཀྱང་འབྱུང་བ་རང་རང་གི་དྭངས་མའི་རྣམ་པར་དག་ཅིང་མ་དག་སྙིགས་མའི་སྣང་བ་དབྱིངས་སུ་འཕོས་ཏེ།སྤྲོས་མཐའ་དང་བྲལ་བ་བརྡལ་ཁྱབ་ཆོས་སྐུ་ཆེན་པོར་འབྱམས་ཀླས་ནས་མཆོག་ཏུ་མི་འགྱུར་བའི་འོད་གསལ་མངོན་དུ་གྱུར་བ་དེའི་ངང་དུ་མཉམ་པར་བཞག་ཅིང་།མཐར་ཟག་བཅས་བསྐྱེད་བསྒོམ་གྱི་དམིགས་པ་དང་།ཟག་མེད་འོད་གསལ་གྱི་ཏིང་ངེ་འཛིན་བསྒོམ་པའི་དགེ་བའི་དངོས་པོ་གང་མཆིས་པ་ཐམས་ཅད་གཅིག་ཏུ་བཟླུམས་ཏེ།མ་གྱུར་མཁའ་ཁྱབ་ཀྱི་སེམས་ཅན་རྣམས་ལ་བསྔོ་བ་ནི་དམ་པ་གསུམ་གྱི་གནད་ཡང་དག་པ་ལམ་གྱི་རྩ་བར་གྱུར་པས་ན།འཁོར་གསུམ་དམིགས་པ་མེད་པའི་ངང་དུ་མཉམ་པར་བཞག་ཅིང་མཐར་ནི་བསྔོ་བ་དང་སྨོན་ལམ་བཟང་པོའི་རྒྱ་ཡིས་བཏབ་པར་བྱའོ། །དེ་ལྟར་འབྱུང་ལྔའི་དག་སྦྱོར་གྱི་དམིགས་རིམ་རྣམས་ཞག་གྲངས་རེ་རེ་བྱས་ཏེ་ལྔའམ།ཡང་ན་ལྔ་ལྔར་སྦྱང་ནས་ཉེར་ལྔ་དང་།ཟླ་བ་ལྔ་སོགས་གང་རུང་ལ་སྦྱང་ནས་དམིགས་པ་གསལ་ངར་ཐོན་པ་གལ་ཆེ་བའི་གནད་ཤེས་པར་བྱའོ། །ཡང་བར་སྐབས་འཆི་བ་སྦྱང་བའི་མན་ངག་ལ་བསླབ་པ་ནི།བར་སྐབས་འཆི་བ་སོགས།འཕོ་ནུས་འགྱུར།ཞེས་པས་བསྟན་ཏེ།དེ་ལ་འདིར་ཁ་ཅིག་གིས་ཐོད་རྒལ་བའི་ཤེས་པ་མིག་གི་ཡེ་ཤེས་ཀྱི་གསང་ལམ་ནས་འཕོ་བར་བཞེད་པས་ན།དེའི་ཉམས་ལེན་ལ་རྩལ་ཐོན་པའི་ཕྱིར་དུ་ཉིན་མཚན་ཐུན་གྱི་བར་སྐབས་རྣམས་སུ།འཆི་བ་སྦྱང་བའི་མན་ངག་ལ་བརྩོན་པར་བྱ་བ་ནི།དང་པོ་ཆོས་སྐུའི་ལམ་སྦྱང་ལ།ལུས་ཀྱི་གནད་ནི་སེང་གེའི་འདུག་སྟངས་སམ་ཉལ་སྟབས་ཀྱིས་གནས་ཤིང་།ད་ནི་མྱ་ངན་ལས་འདའོ་སྙམ་པའི་ངང་ནས་འཆི་བའི་དུས་བབ་ཡིད་ལ་བྱས་ཏེ།འགྱུ་འཕྲོའི་སྤྲོས་པ་ཐམས་ཅད་ཆམ་གྱི་བཏང་ནས་སེམས་མ་བཅོས་པར་རང་བབས་སུ་བཞག་ཅིང་ཤེས་པ་མིག་ལ་གཏད་པ་དང་།མིག་ནི་ཧ་རེ་ནམ་མཁར་བལྟ་ཞིང་དབྱིངས་ནམ་མཁའ་རྣམ་པར་དག་པའི་མཁའ་ཀློང་དུ་ད་ནི་མྱ་ངན་ལས་འདའོ་བསམ་པའི་ངང་ནས་སེམས་སྤྲོ་བསྡུ་གང་ཡང་མེད་པའི་ངང་དུ་བར་སྣང་ལམ་དུ་བྱེད་ཅིང་སྡོད་པའི་ཚེ་ན།དབྱིངས་རིག་མི་འགྱུར་པའི་གདིང་ཐོབ་ནས་བར་དོ་མེད་པར་སངས་རྒྱས་པར་འགྱུར་རོ། །ཡང་ཅིག་གཉིས་པ་ལོངས་སྐུའི་ལམ་སྦྱང་ལ།ལུས་གནད་གླང་ཆེན་ཉལ་སྟབས་ཀྱིས་སྡོད་ཅིང་།ཡུལ་ཕྱི་ནང་ཀུན་ལ་ཆགས་འཛིན་གྱི་ཞེན་པ་ཐམས་ཅད་སྤངས་ཏེ།བདག་ནི་ངེས་པར་འཆི་བའི་དུས་ལ་བབ་པའི་གནས་སྐབས་ལ་ཐུག་པ་ཡིན་སྙམ་པའི་ངང་ནས།སྔར་བཞིན་གྱི་འཆི་བའི་དུས་དེ་ཡིད་ལ་བྱས་ནས་དངོས་པོ་གང་ལའང་ཞེན་ཆགས་འཛིན་པ་ཐམས་ཅད་སྤངས་ཏེ།ལོངས་སྤྱོད་རྫོགས་སྐུའི་ཞིང་ཁམས་ལྔ་གང་རུང་ཡིད་ལ་བྱེད་ཅིང་།གོང་བཞིན་ཤེས་པ་གཞན་དུ་མ་ཡེངས་པར་མིག་ལ་གཏད་ཅིང་བར་སྣང་ལམ་དུ་བྱས་ནས་མིག་གིས་བལྟ་སྟངས་དང་བཅས་དབྱིངས་སྣང་མངོན་དུ་བྱེད་པ་དང་།དེའི་ཚེ་ན་སེམས་ཀྱི་གདངས་མ་དག་པའི་སྣང་བ་སྣོད་བཅུད་ཐམས་ཅད་དག་དབྱིངས་དྭངས་མའི་རོལ་པ་རུ་གོ་འཕོས་ནས་སྣང་བ་ཐམས་ཅད་ཟུང་འཇུག་སྐུ་དང་ཡེ་ཤེས་ཀྱི་རང་བཞིན་དུ་སྨིན་ཏེ་སྣང་བ་ཐམས་ཅད་དབྱིངས་དང་ཐིག་ལེའི་རོལ་པ་ཆེན་པོར་འབྱམས་ཀླས་ནས།ཆོས་ཉིད་ངང་བཞག་ཆེན་པོའི་ཡེ་ཤེས་ཚད་ལ་ཕེབས་ཏེ།རང་བཞིན་ལོངས་སྐུའི་ཞིང་དུ་འཕོ་ནུས་སོ། །གསུམ་པ་སྤྲུལ་སྐུའི་ལམ་སྦྱངས་ལ།སླར་ཡང་ལུས་གནད་དྲང་སྲོང་ཙོག་པུར་གྱིས་སྡོད་ཅིག་འཆི་བའི་དུས་ཡིད་ལ་བྱས་ཤིང་།མ་དག་འཁོར་བའི་ཆ་སེམས་དང་སྣང་བས་བསྡུས་པའི་དངོས་པོ་ཀུན་ལ་ཆགས་ཞེན་འཁྲི་བ་ཐམས་ཅད་སྤངས་ཏེ།བདེན་མེད་སྒྱུ་མ་རྨི་ལམ་གྱི་རང་བཞིན་དུ་ཤེས་པའི་ངང་ནས།སྣང་བ་ཐམས་ཅད་འཇའ་ཚོན་ནམ་མཁའ་ལ་ཡལ་བ་ལྟར་ཆོས་ཉིད་སྟོང་པའི་དབྱིངས་སུ།དཔེར་ན་གཉིད་སད་པའི་རྨི་ལམ་ཇི་བཞིན་དུ་བདེན་པར་མ་གྲུབ་པར་ཤེས་བཞིན།རང་བཞིན་སྤྲུལ་པའི་ཞིང་ཁམས་ཡིད་ལ་བྱེད་ཅིང་མིག་གིས་གཟིགས་སྟངས་དང་བཅས་དབྱིངས་དང་ཐིག་ལེའི་སྣང་བ་མངོན་དུ་བྱེད་ཅིང་།རིག་པ་དབྱིངས་ཐོག་ལས་གཡོ་བ་མེད་པར་སྤྲོས་པ་དང་བྲལ་བར་བཞག་གོ། །དེ་ལྟར་ཚུལ་བཞིན་ཉམས་སུ་བླངས་པའི་གནད་དེ་ལ་བརྟེན་ནས་འཆི་བ་དང་པོ་ཀ་དག་ལ་རང་དབང་ཐོབ་པ་དང་།གཉིས་པ་རང་གདངས་ཀྱི་ཡེ་ཤེས་འོད་གསལ་ཆེན་པོ་མངོན་དུ་གྱུར་བ་དང་།གསུམ་པ་ངང་གནས་ཀྱི་ཡེ་ཤེས་ལ་དབང་འབྱོར་ནས་སྣང་ཡུལ་ཐམས་ཅད་འོད་གསལ་དུ་གོ་འཕོས་ཏེ།རང་བཞིན་རྣམ་པར་དག་པའི་ཞིང་དུ་འཕོ་ནུས་པར་འགྱུར་བ་ཡིན་ནོ། །དེ་ལྟར་འབྱུང་བ་ལྔའི་དག་སྦྱོར་ལ་བརྟེན་ནས་ཟད་པའི་སྐྱེ་མཆེད་བསྒྲུབ་པའི་ཐབས་དང་།འཆི་བ་སྦྱངས་པའི་མན་ངག་གཉིས་བསྟན་པའི་ལེའུ་སྟེ་བཅུ་གསུམ་པའོ། །ས་མ་ཡ༔ གུ་ཧྱ༔ ཞེས་པ་རེ་ཞིག་བཀའ་རྒྱས་སུ་བཏབ་པའི་དོན་ནོ། །། །ཡང་རྩ་བའི་ས་བཅད་བརྒྱད་པའི་སྐབས་ཀྱི་སྣང་བ་བཞིའི་ས་མཚམས་ཀྱི་ས་བཅད་བཞི་པ་ཆོས་ཉིད་ཟད་པའི་སྣང་བ་ནི།དེ་ལྟར་སྦྱངས་པའི་སོགས།ངང་དུ་འབྱམས༔ ཞེས་པས་བསྟན་ཏེ།དེ་ལ་འདིར་ལམ་སྣང་བ་བཞིན་རྩལ་རྫོགས་ནས་ཟད་པའི་ས་ལ་བསྐྱལ་ནས་འགགས་བསྡམས་པའི་ཚུལ་ནི།དེ་ལྟར་ལམ་འདིར་བརྩོན་འགྲུས་དང་སྙིང་སྟོབས་ཁོ་ནའི་བྱེད་ལས་ཀྱི་ཉམས་ལེན་ལ་སྣ་མི་སུན་ཅིང་།མི་ཚེ་ཆོས་ལ་སྦྱངས་པའི་སྟོབས་ཀྱིས་ནང་དོན་གྱི་ཡེ་ཤེས་མངོན་དུ་གྱུར་ནས་ལམ་གྱི་ཡོན་ཏན་གྱི་སྣང་བའི་འོད་གསལ་ལྷུན་གྲུབ་སྐུ་དང་ཐིག་ལེའི་འཕེལ་ཚད་ཐམས་ཅད་མཐར་ཕྱིན་ཏེ།ཚད་ཕེབས་ཀྱི་སྣང་བ་ཕྱི་ནང་མ་འཛོལ་བར་རང་རྒྱུད་ལ་འབྱོར་བའི་ཚེ་ན།མ་དག་པའི་དངོས་པོ་ཅི་ཡང་མི་སྣང་ཞིང་སྣང་བ་ཐམས་ཅད་འོད་གདངས་ཁོ་ནར་སྣང་བར་འགྱུར་རོ། །དེའི་སྐབས་སུ་ཐིག་ལེ་ཆེན་པོ་གཅིག་གི་ཀློང་དུ་ཐིག་ལེ་ལྔ་ཚོམས་སུ་ཤར་བའི་ནང་དུ།རིགས་ལྔའི་ཚོམ་བུ་ལོངས་སྤྱོད་ཀྱི་རྒྱན་རྫོགས་པ་ཡབ་ཡུམ་ཟུང་འབྲེལ་རང་མདོག་དང་མཐུན་པའི་འཁོར་བཞི་བཞིས་བསྐོར་བ་རེས་མོས་སུ་ཤར་བ་དང་།དེ་དག་རྣམས་ཀྱང་མཐར་དབྱིངས་དང་ཐིག་ལེ་རྣམས་ཟད་པའི་སྔ་ཐོག་ཏུ་རིགས་ལྔའི་ཚོམ་བུ་དེ་དག་གི་ཐུགས་ཀ་ནས་འོད་ཀྱི་སྣམ་བུ་རིགས་ལྔ་སོ་སོའི་རང་མདོག་དང་མཐུན་པར་བྱུང་ནས་རང་གི་སྙིང་གར་ཟུག་པའི་སྟེང་དུ།འོད་ལྔའི་ཐིག་ལེ་རིན་པོ་ཆེའི་ཕོར་པ་ཁ་སྦུབས་པ་ལྟ་བུ་བརྩེགས་མར་གནས་པའི་རྣམ་པར་འཆར་རོ། །འོད་དེ་དག་ཤར་མ་ཐག་ཏུ་ཚད་རྫོགས་པའི་མཐར་རང་ལ་ཐིམ་པས།འོད་ཟེར་ཆེན་པོའི་དབང་ནོད་པས་ཕྱི་ནང་སྣོད་བཅུད་ཐམས་ཅད་འོད་གསལ་དུ་དེངས་ནས།མཐར་དུང་ཁང་གི་ཁྲག་འཐུང་རོལ་བའི་དཀྱིལ་འཁོར་ཐམས་ཅད་འབར་བ་གར་དགུའི་ཉམས་དང་བཅས་ཏེ་སྟེང་ཕྱོགས་ཀྱི་ནམ་མཁར་སྣང་བ་དང་།དེའི་ཚེ་རང་ལུས་ཀྱང་འོད་ཀྱི་ཀློང་དུ་ལག་སོར་བཀྲམ་པ་ཙམ་ལས་མི་སྣང་ངོ། །དེ་ནས་དབྱིངས་དང་ཐིག་ལེ་སྐུ་དང་ཞིང་ཁམས་ཐམས་ཅད་ཀྱི་སྣང་བ་ཐམས་ཅད་རིམ་གྱིས་ནུབ་པ་ནི།དཔེར་ན་བཅོ་ལྔའི་ཟླ་བ་ཉ་གང་ནས་སླར་གནམ་སྟོང་གི་ཟླ་བ་དབྱིངས་སུ་ནུབ་པ་བཞིན་དུ་ནང་གསལ་ལ་ཐིམ་མོ། །མཐར་མ་རིག་པ་གཞི་ལ་སངས་ནས་ཆོས་ཅན་གྱི་སྣང་བ་དབྱིངས་སུ་དག་སྟེ།འོད་གསལ་ཆོས་ཉིད་ཆེན་པོའི་དོན་གཤིས་ཐོག་ཏུ་ཕེབས།ཕྱི་སྣང་བའི་ཡུལ་དང་།ནང་གདོས་པའི་ལུས་དང་།བར་ལས་རླུང་གི་རྒྱུ་བ་རྣམས་འོད་གསལ་གྱི་རོལ་པ་རུ་སྨིན་ཏེ།ཟད་པའི་ས་ལ་ཐུག་ནས་འཇའ་ལུས་འཕོ་བ་ཆེན་པོའི་སྐུ་མངོན་དུ་གྱུར།སེམས་འཇའ་ཚོན་ནམ་མཁའ་ལ་ཡལ་བ་ལྟར་ཆོས་ཅན་གྱི་སྣང་བ་ཆོས་ཉིད་དུ་ཟད་པས་མི་འཇིགས་པའི་གདིང་ཆེན་པོ་བཞི་ཐོབ་སྟེ།ངོ་བོ་ཀ་ནས་དག་པའི་ཡེ་ཤེས་སྤྲོས་པའི་མཐའ་བརྒྱད་དང་བྲལ་བ།རྣམ་པར་ཐར་པའི་སྒོ་གསུམ་དང་ལྡན་པ།སྟོང་དབྱིངས་རྡོ་རྗེ་བཙུན་མོའི་མཁའ་ཀློང་ཡངས་པར་ཁྱབ་བརྡལ་ཕྱོགས་ལྷུང་བྲལ་བའི་ངང་དུ་འབྱམས་ཀླས་པའོ། །ལུས་ནི་དུར་ཁྲོད་སོགས།འབྱམས་ཀླས་སོ༔ ཞེས་པས་བསྟན་ཏེ།དེ་དུས་ནང་རྟགས་སུ་ལུས་ནི་དུར་ཁྲོད་ལ་མི་རོ་འཕང་བ་ཇི་བཞིན་དུ།སྲོག་གཅོད་ཀྱི་གཤེད་མ་བརྒྱ་ཡིས་བསྐོར་ཀྱང་འཇིགས་པའི་ཡུལ་དང་བྲལ།གཉིས་སྣང་འཛིན་པའི་སེམས་ཟད་པས་འཇིགས་མཁན་གྱི་ཡུལ་སྟོང་།སྣང་སྲིད་དག་མཉམ་དུ་སངས་པས་རེ་དང་དོགས་པ་མེད་པ་དང་།ངག་ནི་རླུང་ཁམས་འཛིན་བྱེད་ཀྱི་རླུང་དག་པས་ངག་བྲག་ལ་བྲག་ཆ་སྣང་བ་བཞིན་དུ་སོང་ནས།སྒྲ་ཚིགས་བརྗོད་པ་རྣམས་ཀྱང་ཀུན་གྱི་རྗེས་སུ་ཟློས་པ་ལས་ངག་རླུང་གི་འཛིན་པ་ཟད་པས་ཚིག་དང་བརྗོད་པ་སོགས་ལ་ཞེན་པ་མེད་ཅིང་ཟད་པའི་ས་ལ་ཐུག་པ་ཡིན་ནོ། །ད་དུང་ཤེས་སྒྲིབ་ཕྲ་བའི་བག་ཆགས་བག་ལ་ཉལ་དུ་ཡོད་པས་བར་སྐབས་རེ་ལ་མཁའ་ལ་གློག་འཁྱུག་ནས་སྣང་བ་སྟོན་པ་བཞིན་དུ།སྐབས་རེ་ལ་རང་ལུས་འོད་ཀྱི་ཀློང་དུ་འོད་ལུས་ཀྱི་རྣམ་པའམ་ལག་པའི་སོར་མོ་བཀྲམ་པ་ཙམ་སྣང་སྟེ།སྣང་སེམས་ཀྱི་སྐབས་འབྱེད་ཅིང་གཏམ་དང་ཆོས་ཚིག་སོགས་བཅོས་བསྒྱུར་མེད་པར་ཐོལ་བྱུང་རང་བརྡོལ་དུ་སྨྲ་ཤེས་པ་འོང་བ་དང་།ཚིག་དབང་གི་ནུས་པ་ཀུན་གཞི་ལ་ཐེབས་པས་ཡིད་དང་ལས་རླུང་གི་འཛིན་པ་དབྱིངས་སུ་དག་ནས་ཡེ་ཤེས་ཆེན་པོར་རོལ་པར་སྨིན་ཏེ།ཆོས་ཉིད་སྤྲོས་པ་དང་བྲལ་བའི་དབྱིངས་སུ་ཞིག་པ་དཔེར་ན་ཆབ་རོམ་ལ་དྲོད་ཀྱིས་རྒྱས་ཐེབས་ནས་གྲང་ལྷག་གི་སྤུན་ཐག་དང་བྲལ་བའི་ཚེ་ན།ཆུ་ཡི་རང་བཞིན་ཉིད་དུ་ཞིག་པ་ལྟར་ཆོས་ཉིད་ཡིད་དཔྱོད་ལས་འདས་པའི་དོན་ཇི་བཞིན་ཉིད་དུ་མཐོང་ནས་གཟུང་འཛིན་གྱི་སྤུན་ཐག་དང་བྲལ་ཏེ།སྟོན་ནམ་སློང་བྱེད་ཀྱི་སྐྱོན་གསུམ་དང་བྲལ་བའི་ནམ་མཁའ་ལྟར།རིག་པ་སྨྲ་བསམ་བརྗོད་བྲལ་གྱི་ངང་ལས་གཡོ་བ་མེད་པར་གདོད་མ་གཞིའི་དབྱིངས་སུ་ཁྱབ་བརྡལ་ཕྱོགས་ཡན་ཆེན་པོའི་ངང་དུ་འབྱམས་ཀླས་སོ། །དེའི་ཕྱིར་ན་རྒྱུད་ལས།ཆོས་ཉིད་ཟད་པའི་སྣང་བ་ཡིས། །རྫོགས་ཆེན་བྱ་བྲལ་འབྲས་བུ་ཐོབ། །འདི་ལྟར་མཐའ་རུ་ཕྱིན་གྱུར་ན། །མྱང་འདས་གཞན་ནས་བཙལ་རྒྱུ་མེད། །ཅེས་གསུངས་པ་ལྟར་རོ། །དེ་ལྟར་གྱི་གདམས་པ་ཟབ་མོ་འདི་ཉིད་རང་ལམ་ནས་ཆོས་ཉིད་ཟད་པ་དང་།མདོ་ལམ་གྱི་ས་བཅུ་པ་ཆོས་ཀྱི་སྤྲིན་ཞེས་པ་དང་།སྔགས་བསྐྱེད་པའི་ལམ་གྱི་ལྷུན་གྱིས་གྲུབ་པའི་རིགས་འཛིན་ས་མཆོག་དོན་གྱི་ཐོབ་པ་ཡིན་ནོ། །ཞེས་ཆོས་ཟད་བློ་འདས་ཆེན་པོའི་ཚུལ་བསྟན་པའི་ལེའུ་སྟེ་བཅུ་བཞི་པའོ། །ས་མ་ཡ༔ གུ་ཧྱ༔ ཞེས་པ་དགོངས་པའི་ཀློང་དུ་རྒྱས་བཏབ་པའི་དོན་ནོ། །། །དགུ་པ་མཐའ་རྟེན་གྱིས་མཇུག་བསྡུ་བ་ལའང་།ཡང་དག་སངས་རྒྱས་དང་མངོན་རྫོགས་སངས་རྒྱས་ཀྱི་འབྲས་བུའི་གྲོལ་ས་བསྟན་པ་དང་།མི་འགུལ་བ་གསུམ་ལ་གཞི་བཅའ་བ།སྡོད་པ་གསུམ་གྱི་ཚད་བཟུང་བ།ཐོབ་པ་གསུམ་གྱི་གཟེར་གདབ་པ།གདིང་བཞིའི་གྲོལ་ཚད་བསྟན་པ་དང་ལྔ་ལས།དང་པོ་ནི།སླར་ཡང་ཤེས་སྒྲིབ་སོགས།ཐོབ་པ་ཡིན༔ ཞེས་པས་བསྟན་ཏེ།དེ་ལ་འདིར་ལམ་སྣང་བ་བཞིའི་ཚད་རྫོགས་མཐར་སླར་ཡང་ཤེས་སྒྲིབ་ཕྲ་བའི་ཕྲ་བ་ཉིད་གཉེན་པོ་རྡོ་རྗེ་ལྟ་བུའི་ཏིང་འཛིན་གྱིས་དབྱིངས་སུ་ཞིག་སྟེ།མ་རིག་པའི་དྲི་མའི་མཐའ་ཐམས་ཅད་དང་བྲལ་བའི་ཚེ་ན།ཇི་ལྟ་བ་མཁྱེན་པའི་ཡེ་ཤེས་ཆེན་པོའི་རྩལ་རྫོགས་ནས་གདོད་མ་གཞིའི་ཆོས་ཉིད་དེ་བཞིན་ཉིད་ལ་མངའ་དབང་བསྒྱུར་བ་དང་།ཇི་སྙེད་པ་གཟིགས་པའི་ཡེ་ཤེས་མངོན་དུ་གྱུར་ཏེ་ལྷུན་གྲུབ་སྐུ་དང་ཡེ་ཤེས་ཀྱི་རོལ་པར་འབྱམས་ཀླས་པར་འགྱུར་ཏེ།དེའང་འཕྲལ་དང་སླད་ཀྱིས་འབྱུང་བ་མ་ཡིན་པར་ཡེ་གདོད་མ་ནས་གཞི་ལ་རང་ཆས་སུ་རྫོགས་པ་ནང་དབྱིངས་གཞོན་ནུ་བུམ་སྐུར་སངས་རྒྱས་པ་ཡིན་ཏེ།དེ་ཡང་སྐྱེ་མཆི་བགྲེས་རྒུད་ཐམས་ཅད་ལས་འདས་པས་གཞོན་ནུ།ངང་ཉིད་ཡེ་ཤེས་ཀྱི་ཕུང་པོ་ལས་ཕྱི་རྒྱ་མ་རལ་བས་བུམ་པ།ཡེ་ཤེས་ཡོན་ཏན་ཐམས་ཅད་ཕུན་སུམ་ཚོགས་པས་སྐུ་ཡང་དག་པའོ། །དེའི་དུས་སུ་ཐོབ་པ་གཉིས་འབྱུང་སྟེ།སྐྱེ་བ་ལ་རང་དབང་ཐོབ་པས་འཕོ་བ་ཆེན་པོའི་སྐུར་བཞེངས་ནུས་པ་དང་།འཇུག་པ་ལ་རང་དབང་ཐོབ་ནས་སྐུའི་རྣམ་པ་དེ་ཉིད་ཀྱིས་དུས་དེར་གཞན་དོན་རླབས་པོ་ཆེ་མི་མཛད་ནའང་།དུས་གཅིག་ལ་སེམས་ཅན་སུམ་སྟོང་ལ་རིག་པ་གཏད་པའི་མོད་ལ།ལས་བཟང་ངན་ལ་མི་ལྟོས་པར་རྣམ་པར་གྲོལ་པའི་ས་ལ་སྒྲོལ་བ་མཛད་ནས་ན་བུན་ནམ་མཁའ་ལ་དེངས་པ་བཞིན་ནང་དབྱིངས་སུ་བཞུགས་ནས་སྐུ་དང་ཡེ་ཤེས་འདུ་འབྲལ་མེད་པའི་ཕྲིན་ལས་ཀྱིས་འཁོར་བ་མ་སྟོང་གི་བར་དུ།གཞན་དོན་མཛད་པའི་ཚུལ་ནི་ནང་གསལ་ཐིམ་ལ་མ་རྨུགས་པའི་གདངས་ཕྱིར་གསལ་དུ་སྣང་བ་ཡིན་ནོ།འདི་དུས་སུ་དབང་པོ་རབ་ཀྱི་རབ་རྣམས་ཚེ་ཚད་ལ་མི་ལྟོས་པར་ཆུ་ལ་ཆུ་ཐིམ་པའམ། །ནམ་མཁའ་ལ་ནམ་མཁའ་ཐིམ་པ་ལྟར།ལུས་སེམས་གཉིས་ཀ་འོད་གསལ་དུ་སྨིན་ནས་གྲོལ་བ་དུས་མཉམ་པ་དང་།རབ་ཀྱི་འབྲིང་མཁའ་ལ་འཇའ་སྤྲིན་འཁྲིགས་པའི་ངང་དུ་ཕུང་པོ་ལྷག་མེད་དུ་ཡལ་བ་དང་།རབ་ཀྱི་ཐ་མ་ལུས་སེམས་བྲལ་བའི་རྗེས་སུ་རིམ་གྱིས་ཕུང་པོའི་གདོས་པ་ཇེ་ཆུང་དུ་སོང་ནས་མཐར་ལྷག་མེད་དུ་ཡལ་བ་རྣམས་ནི་འཇའ་ལུས་ཆེན་པོ་རུ་གྲགས་པ་ཡིན་ལ།འབྲིང་གི་རབ་གཞིའི་འོད་གསལ་ཤར་བའི་གནས་སྐབས་སུ་ཞག་གྲངས་བདུན་ཚུན་ཆད་དུ་སྐྲ་སེན་གྱི་སྙིགས་མ་ཙམ་བཞག་སྟེ་ཕུང་པོ་ལྷག་མེད་དུ་ཡལ་བ་ནི་འཇའ་ལུས་ཆུང་ངུར་བརྗོད།འབྲིང་གི་འབྲིང་ནི་ལུས་ཀྱི་གདོས་པ་ཇེ་ཆུང་ལ་སོང་ནས་བཞི་ཆ་བརྒྱད་ཆ་ཙམ་དུ་འགྲོ་བ་དང་།འབྲིང་གི་ཐ་མ་རྣམས་འདས་ཚེ་ནམ་མཁའ་ལ་འོད་འཁྲིགས་པ་དང་།སྒྲ་རྣམ་པ་གཉིས་དང་།ས་གཡོ་བ་དང་།སྐུ་རྣམ་པ་གཉིས་འབྱུང་བ་དང་།གདུང་དང་རིང་བསྲེལ་ལ་སོགས་པ་འབྱུང་བ་ཡིན་ནོ། །དེ་ལྟར་སྔ་མ་གསུམ་ནི།དག་གྲོལ་མཉམ་རྫོགས་ཀྱི་ཆོས་སྐུ་ཡང་དག་རྫོགས་པའི་སངས་རྒྱས་ཞེས་ཕུང་པོ་ལྷག་མ་མེད་པར་སངས་རྒྱས་པ་ནི་ནམ་མཁའ་ལ་ནམ་མཁའ་ཐིམ་པ་ལྟར།ཆོས་དབྱིངས་སྤྲོས་པ་དང་བྲལ་བ་ཀ་དག་གཞོན་ནུའི་བུམ་སྐུའི་ངང་དུ་འབྱམས་ཀླས་པ་དང་།ཕྱི་མ་གསུམ་ནི་ཟུང་འཇུག་དབྱིངས་གྲོལ་གྱི་ཆོས་སྐུ་ཞེས་འོད་དང་སྒྲ་དང་གདུང་དང་སྐུ་དང་ས་གཡོ་བ་ལ་སོགས་པ་འབྱུང་བ་ནི་མངོན་པར་རྫོགས་པའི་སངས་རྒྱས་ཀྱི་ས་ཐོབ་པ་ཡིན་ནོ། །གཉིས་པ་ནི་མི་འགུལ་བ་གསུམ་ལ་གཞི་བཅའ་བ་ནི།ཀློང་གསལ་ལས།དེ་ལ་མཐའ་རྟེན་མན་ངག་བཞི། །གོང་མའི་རྒྱབ་ཏུ་མེད་ཐབས་མེད།ཅེས་གསུངས་པ་ལྟར།ལུས་བཞུགས་སྟངས་ལས་མི་འགུལ་བས་རྩ་རླུང་གནད་དུ་ཕེབས།མིག་གཟིགས་སྟངས་ལས་མི་འགུལ་བས་དབྱིངས་དང་ཐིག་ལེའི་འཕེལ་ཟིན།རིག་པ་དབྱིངས་ཐོག་ལས་མི་འགུལ་བས་དབྱིངས་རིག་ཟུང་དུ་ཆུད་པར་བྱེད་དོ། །གསུམ་པ་སྡོད་པ་གསུམ་གྱི་ཚད་བཟུང་བ་ནི།རྩ་རྒྱུད་ལས།སྡོད་པ་གསུམ་གྱི་ཚད་བཟུང་བས། །རྨི་ལམ་ལྡོག་དང་ལུས་ངག་ཡིད། །རྟགས་དང་ཚད་ནི་ངོས་བཟུང་བའོ། །ཞེས་པས།ཕྱིའི་སྣང་བ་སྡོད་པས་རྐྱེན་ངན་གྲོགས་སུ་འཆར།ནང་སྒྱུ་ལུས་སྡོད་པས་འཁོར་བའི་བྱ་བ་ལ་མི་འཇུག།གསང་བ་རླུང་སེམས་སྡོད་པས་རྣམ་རྟོག་འཕྲོ་འདུའི་རྒྱུན་ཆད་པ་དང་།དབྱིངས་དང་ཐིག་ལེའི་འཕེལ་རྫོགས་ནས་ཞིང་ཁམས་ཚད་ལ་ཕེབས་པར་བྱེད་དོ། །འདིའི་ཚེ་རྟགས་སྒོ་གསུམ་ལ་འཆར་བ་དང་།ཚད་རྨི་ལམ་གྱིས་བཟུང་བ་གཉིས་འབྱུང་སྟེ།དེ་ལ་དང་པོ་རྟགས་སྒོ་གསུམ་ལ་འཆར་བ་ནི།ཆོས་ཉིད་མངོན་སུམ་གྱི་དུས་སུ་བུམ་དབང་གི་ནུས་པ་ལུས་ལ་ཐེབས་པས་ལུས་རུས་སྦལ་མཁར་གཞོང་དུ་བཅུག་པ་ལྟ་བུ་དཀའ་ཞིང་ངལ་བའི་རྣམ་པས་འགུལ་སྙིང་མི་འདོད་པ་དང་།ངག་ལྐུག་པ་བཞིན་སྨྲ་སྙིང་མི་འདོད་པ་དང་།སེམས་འདབ་ཆགས་རྙི་ལ་ཐོགས་པ་ལྟར་རྣམ་པར་རྟོག་པ་དུམ་བུར་འཕྲོ་བའི་རྒྱུན་ཆད་ནས་གར་གཏད་དུ་སྡོད་ཚུགས་པ་འབྱུང་ངོ་། །གོང་འཕེལ་གྱི་དུས་སུ་ལུས་སྒེག་ཆོས་ངོ་ཚ་དང་བྲལ་བ་སྐྱེས་བུ་ཆང་གིས་མྱོས་པ་ལྟ་བུ་རྒྱན་གོས་སོགས་ཀྱི་སྤྲོས་པ་མེད་པ་དང་།གསང་དབང་གི་ནུས་པ་ངག་ལ་ཐེབས་པའི་རྟགས་སུ་ངག་སྨྱོན་པ་རང་ཚིག་བརྡོལ་བ་ལྟ་བུ་ཆོས་གཏམ་མགུར་མ་སོགས་ཐོལ་བྱུང་དུ་སྨྲ་བ་དང་།སེམས་རྩི་དུག་གིས་ལན་བདུན་ན་བའི་སྐྱེས་བུ་བཞིན་འཁོར་བ་ལ་བློ་མི་འཇུག་པའོ། །ཚད་ཕེབས་ཀྱི་དུས་སུ་ལུས་ཀྱི་གདོས་པ་དག་པའི་རྟགས་སུ་འབྱུང་བ་བཞི་ལ་མི་ཐོགས་པར་ཟང་ཐལ་དུ་འགྲོ་བ་དང་།ངག་གྲུལ་བུམ་གྱི་ཕྲུ་གུའི་དབྱངས་ལྟར་སྙན་ཅིང་ཆོས་ཚིག་སྣ་ཚོགས་ཀྱིས་གཞན་བློ་ཆོས་ལ་བསྒྱུར་ནུས་པ་དང་།ཤེར་དབང་གི་ནུས་པ་སེམས་ལ་ཐེབས་པའི་རྟགས་སུ་སེམས་རྟོག་རིག་པར་འཕོས་ཏེ།རིག་པ་ལ་རང་དབང་བསྒྱུར་ནས་ཡུལ་རྐྱེན་ལ་མི་ལྟོས་པར་སླར་འཁོར་བར་བསྐྱལ་ཀྱང་མི་ལྟུང་བའོ། །ཆོས་ཉིད་ཟད་པའི་གནས་སྐབས་གོང་དུ་སྨྲས་པ་ལྟར་རོ། །གཉིས་པ་ཚད་རྨི་ལམ་གྱིས་བཟུང་བ་ནི།གསང་བ་སྒྲ་རྒྱུད་ལས།རབ་ལ་འཆར་དང་འབྲིང་གིས་ཤེས། །ཐ་མས་འགྱུར་བ་ངེས་པ་སྟེ། །ཞེས་གསུངས་པས། །དེ་དུས་རབ་ཀྱིས་རྨི་ལམ་གྱི་འཁྲུལ་སྣང་དབྱིངས་སུ་ནུབ་ནས་འོད་གསལ་གྱི་རོལ་པར་འབྱམས་ཀླས་པ་དང་།འབྲིང་གིས་རྨི་ལམ་རྨི་ལམ་དུ་ཤེས་ནས་བདེན་ཞེན་མེད་པར་སྤྲུལ་བསྒྱུར་སོགས་ལ་དབང་བྱེད་པ་དང་།ཐ་མས་ཀྱང་བག་ཆགས་ངན་པའི་རྨི་ལམ་རྒྱུན་ཆད་ནས་བཟང་པོ་ཤ་སྟག་ཏུ་རྨིས་པ་ཡིན་ནོ། །བཞི་པ་ཐོབ་པ་གསུམ་གྱིས་གཟེར་གདབ་པ་ནི།གསང་རྒྱུད་ལས།ཐོབ་པ་གསུམ་གྱིས་གཟེར་གདབ་པས། །ཟག་བཅས་ཕུང་པོ་མི་སྣང་ངོ་། །ཞེས་གསུངས་པས།ཕྱི་སྣང་བ་ལ་དབང་ཐོབ་པས་ཡུལ་སྣང་གནས་སུ་དག་ནས་རྐྱེན་སྣང་ཞིང་ཁམས་སུ་འཆར།ནང་སྒྱུ་ལུས་ལ་དབང་ཐོབ་པས་སྒྱུ་ལུས་རྡུལ་ཕྲན་དུ་དེངས་ནས་ལུས་འོད་གསལ་དུ་གྲོལ།གསང་བ་རླུང་སེམས་ལ་དབང་ཐོབ་པས་འཁྲུལ་སྣང་འཁྲུལ་འཛིན་ཐམས་ཅད་དབྱིངས་སུ་དག་པས།མཚམས་མེད་པ་ལྔ་བྱས་པའི་སེམས་ཅན་སྡིག་པོ་ཆེ་ལའང་།རིག་པ་གཏད་པ་ཙམ་གྱིས་རྣམ་པར་གྲོལ་བའི་ས་ལ་འཕེན་པར་བྱེད་དོ། །ལྔ་པ་གདིང་བཞིའི་གྲོལ་ཚད་བསྟན་པ་ནི།རིན་ཆེན་སྤུངས་པ་ལས།མི་འགྱུར་ལྟ་བའི་གདིང་ཆེན་བཞིས། །མི་ལྡོག་ཡེ་ཤེས་ཚད་ཀྱང་བཟུང་། །ཞེས་གསུངས་པས།རང་བཞིན་ཆོས་སྐུ་གདོད་མའི་མགོན་པོ་ཡེ་སངས་རྒྱས་པའི་དོན་གཤིས་ཐོག་ཏུ་ཕེབས་ཏེ།དེ་ལས་གཞན་པའི་སངས་རྒྱས་རང་མཚན་པ་མེད་པར་ཐག་ཆོད་པས་དད་གུས་དང་དགའ་སྤྲོའི་སྣང་བ་མཉམ་པ་ཉིད་དུ་དག་པའི་གདིང་དང་།རང་ཐོག་ཏུ་རང་གྲོལ་བ་ལས་གཞན་གྱིས་བཅོས་སུ་མེད་པའི་དོན་མཐོང་ནས་རྒྱུ་འབྲས་རྣམ་སྨིན་ལ་མི་རེ་བའི་གདིང་དང་།གཞི་རང་ངོར་སངས་ནས་མྱང་འདས་རང་མཚན་པ་མ་གྲུབ་པས་ཐོབ་བྱའི་འབྲས་བུ་ལ་རེ་བ་མེད་པའི་གདིང་དང་།རིག་པ་གདོད་ནས་འཁྲུལ་བ་མེད་པའི་ངང་རང་གྲོལ་དུ་སངས་པས་འཁོར་བ་དང་ངན་སོང་ལ་དོགས་པ་མེད་པའི་གདིང་དང་བཞིའོ། །ལམ་འདིར་འཇུག་པའི་སོགས།གཏན་ཚིག་གོ༔ ཞེས་པས་བསྟན་ཏེ།དེ་ལྟར་མྱུར་ལམ་ཟབ་མོ་འདིར་འཇུག་པའི་སྐྱེས་བུ་ལས་ཅན་རྣམས་ཀྱིས་ལེ་ལོ་དང་གཡེང་བ་མེད་པར་བརྩོན་འགྲུས་དྲག་པོའི་སྒོ་ནས་ཚུལ་བཞིན་དུ་ཉམས་སུ་བླངས་ན།རབ་ཀྱིས་མི་ལོ་བཅུ་གཉིས།འབྲིང་རྩ་ལྔ།ཐ་ནའང་ཚེ་ལུས་གཅིག་ཏུ་བར་མ་ཆད་པ་རུ་ཉམས་ལེན་གནད་དུ་བསྣུན་པའི་སྐྱེས་བུ་ལས་ཅན་གང་སུ་ཡང་རུང་བ་རྣམས་ཀྱང་།མ་དག་འཁྲུལ་སྣང་དུ་མཆེད་པའི་དངོས་པོ་ཐམས་ཅད་དག་དབྱིངས་དྭངས་མའི་དབྱིངས་སུ་གོ་འཕོས་ནས་འཇའ་ལུས་འཕོ་བ་ཆེན་པོ་ཆོས་ཀྱི་སྐུར་མངོན་པར་རྫོགས་པའི་སངས་རྒྱས་སུ་འགྲུབ་པ་རྒྱལ་བ་རྡོ་རྗེ་འཆང་གི་བཀའ་ཚད་མ་ཡིན་ཏེ།འདི་ནི་མི་འགྱུར་བའི་གཏན་ཚིག་གོ་ཞེས་སོ། །དེ་ལྟར་ཚད་ཕེབས་ཀྱི་མཐའི་ཕྱི་ནང་གི་ལམ་རྟགས་རྫོགས་ཚུལ་དང་།ཆོས་ཟད་བློ་འདས་ཆེན་པོའི་སར་ཕེབས་ནས་མཐར་ཟླ་བ་གཅིག་གམ་བདུན་ནམ་བཅུ་གཉིས་ནས་ནང་གསལ་གཞོན་ནུ་བུམ་སྐུར་སངས་རྒྱས་པའི་ཚུལ་བསྟན་པའི་ལེའུ་སྟེ་བཅོ་ལྔ་པའོ། །ས་མ་ཡ༔ གུ་ཧྱ༔ ཞེས་པ་ནི་ཐེག་དམན་ཉན་ཐོས་ཀྱི་རིགས་ལ་བཀའ་རྒྱ་བསྡམ་པ་དང་།རེ་ཞིག་གསང་བ་མི་འགྱུར་བའི་དབྱིངས་སུ་རྒྱས་བཏབ་པའི་དོན་ནོ། །། །གསུམ་པ་ཐ་མར་དགེ་བ་མཇུག་གི་དོན་ནི།བཀའ་སྲུང་དྲེགས་པ་སོགས།ཨ་ཐམ་རྒྱ༔ ཞེས་པ་སོགས་ཀྱིས་བསྟན་ཏེ།དེ་ལ་འདིར་རང་སྣང་གི་སྟོན་པ་ཀུན་བཟང་མཚོ་སྐྱེས་རྡོ་རྗེའི་བཀའ་དང་ཐ་ཚིག་གཉན་པོས་སངས་རྒྱས་ཀྱི་བསྟན་པ་སྤྱི་དང་།བྱེ་བྲག་ཏུ་རང་བཞིན་རྫོགས་པ་ཆེན་པོའི་བསྟན་པ་བསྲུང་བར་ཁས་བླངས་ཤིང་སྣང་སྲིད་ཀྱི་ཁམས་ན་ཆེ་བཙན་འགྲན་ཟླ་དང་བྲལ་བ།བཀའ་སྲུང་དྲེགས་པ་ཐམས་ཅད་ཀྱི་སྤྱི་རྗེ།ཞིང་བཅུའི་དགྲ་ལ་གནོད་པ་སྟེར་ཞིང་།དམ་ལྡན་སྒྲུབ་པ་པོ་ལ་མཐུན་རྐྱེན་གྱི་དངོས་གྲུབ་སྦྱིན་པ་དང་།གཞན་སྣང་དབང་དུ་སྡུད་ཕྱིར་ཁ་དོག་དམར་ལ།བསྟན་དགྲའི་སྲོག་དབུགས་སྡུད་ཕྱིར་ནག་པོའི་ཉམས་དང་ལྡན་པའི་བཀའ་སྲུང་གནོད་སྦྱིན་ཆེན་པོ་དང་།ཁམས་གསུམ་ལ་དབང་ཞིང་།དེ་དག་གི་སྟོབས་འབྱོར་ནུས་པ་སོགས་ཀྱིས་ཕྱུག་ཅིང་།ལྷ་རྣམས་ཀྱི་ནང་ནས་བླ་ན་མེད་པ་དབང་ཕྱུག་ལྷའི་བླ་མ་མ་ཧཱ་དཱེ་ཝ་ཞེས་ལྷ་ཆེན་པོ་དེ་ཉིད་ལ་གཏད་ནས།ཆོས་འདི་ཉམས་སུ་ལེན་པའི་སྐལ་བཟང་སྐྱེས་བུ་རྣམས་གནས་སྐབས་སུ་སྐུ་ཚེ་མཛད་ཕྲིན་ཡར་ངོའི་ཟླ་བ་ལྟར་འཕེལ་ཞིང་རྒྱས་པ་དང་།མཐར་ཐུག་ཀ་དག་ཀུན་ཏུ་བཟང་པོའི་ས་རུ་མ་སྐྱོལ་གྱི་བར་དུ་འཇིགས་སར་ལམ་གྱི་སྐྱེལ་མ་ལྟ་བུར་གང་འདོད་ཀྱི་ཕྲིན་ལས་རབ་འབྱམས་འགྲུབ་པ་ལ་ཆོས་སྐྱོང་རྣམས་ཀྱིས་བསྲུང་ཞིང་བསྐྱབ་པའི་ཕྱིར་དང་།བཀའ་ལ་འགལ་ཞིང་དམ་ལས་ལོག་པའི་བསྟན་དགྲ་གདུག་པ་ཅན་རྣམས་ཀྱི་ཚེ་བླ་སྲོག་གསུམ་མི་ནོར་ལོངས་སྤྱོད་དང་བཅས་པའི་སྙིང་ཁྲག་ནང་རོལ་རྣམས་ལྷག་མེད་དུ་རོལ་ལ།དེ་ལྟ་བུའི་དམ་ཉམས་ལོག་ལྟ་ཅན་གྱི་ལག་ཏུ་གསང་ཆེན་ཟབ་རྒྱས་ཀྱི་མན་ངག་འདི་ཉིད་མ་ཤོར་ཞེས་པའི་བཀའ་དོན་དང་།དགོངས་པ་མི་འགྱུར་བའི་དབྱིངས་སུ་རྒྱས་བཏབ་པའི་དོན་གྱི་ཨ་ཐམ་རྒྱ་ཞེས་དང་།ས་མ་ཡ༔ རྒྱ་རྒྱ་རྒྱ༔ ཞེས་པ་ནི་རྡོ་རྗེའི་དམ་ཚིག་གཉན་པོ་མི་འགྱུར་བ་སྐུ་གསུང་ཐུགས་ཀྱིས་རྒྱས་བཏབ་པའི་དོན་ནོ། །ཆོས་འདི་ཉིད་བཀའ་གསང་བ་ལས་ཀྱང་ཆེས་གསང་བ་ཡང་གསང་བླ་ན་མེད་པ་ཀུན་ཏུ་བཟང་པོའི་དགོངས་བཅུད་ཟབ་མོ་ཡིན་པས་ན་གསང་རྒྱ༔ ཟབ་རྒྱ༔ གུ་ཧྱ༔ ཨྠིྀ༔ ཅེས་པ་འདི་ཉིད་སོགས།མངྒ་ལཾ་ཞེས་པ་ནི།དེ་ལྟར་གསང་ཆེན་གཉིས་དང་ལྡན་པའི་རྒྱ་དང་།ཟབ་པ་ཆོས་ཀྱི་དབྱིངས་ཀྱི་རྒྱ་སོགས་ཀྱིས་རྒྱས་བཏབ་ཅིང་།ནམ་ཞིག་གདུལ་བྱ་དང་རྟེན་འབྲེལ་དུས་ལ་བབ་པའི་ཚེ་ན་སྔོན་གྱི་སྨོན་ལམ་གྱིས་འབྲེལ་བའི་རྡོ་རྗེ་སློབ་མ་རྣམས་ཀྱིས་བསྐུལ་བའི་ཚེ།གནས་ཀྱི་ཁྱད་པར་ཡུལ་སྐྱོང་རྫ་རྒྱལ་རྡོ་རྗེ་འཕན་པོའི་ཉེ་འདབས་སུ།འོད་གསལ་རྫོགས་པ་ཆེན་པོའི་རྣལ་འབྱོར་པ་མཚན་བརྗོད་པར་དཀའ་བ་དོན་གྱི་སླད་དུ་སྨོས་ན།རིག་འཛིན་ཆེན་པོ་བདུད་འཇོམས་རྡོ་རྗེ་ཞེས།ཉོན་མོངས་བདུད་སྡེའི་དཔུང་ཚོགས་མ་ལུས་པ་འཇོམས་པར་བྱེད་པ་རྡོ་རྗེ་ལྟ་བུ་སྟེ།བསྒོམ་བྱུང་གི་ཤེས་རབ་ཀློང་ནས་རྡོལ་བའི་ཟབ་པ་དང་རྒྱ་ཆེ་བའི་གདམས་པ་འདི་ཉིད།ཡི་གེ་མེད་པའི་སྐོར་སྟོང་ཆེན་ཀུན་ཏུ་བཟང་མོའི་མཁའ་ཀློང་དུ་མཁའ་འགྲོ་གསང་བའི་མཛོད་ལས་ཞལ་བསྒྱུར་བའི་ཡི་གེ་པ་ནི་མངོན་པར་དགའ་བའོ། །དང་པོ་ཆོས་འདི་བཀའ་བཙན་པའི་དགེའོ། །བར་དུ་ཆོས་འདི་བྱིན་རླབས་ཆེ་བའི་དགེའོ། །མཐའ་མར་ཆོས་འདི་བཀྲ་ཤིས་པའི་དགེའོ། །ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པའི་དོན་སརྦ་མངྒ་ལཾ།ཞེས་པས་རྫོགས་པའོ། །༈སྨྲས་པ།དེ་ལྟར་མངོན་སུམ་ཡང་ཟབ་སྙིང་པོའི་གདམས་པ་འདི། །ཁམས་དྲུག་ལྡན་པའི་སྐྱེས་བུའི་དལ་འབྱོར་གྲུ་གཟིངས་ལ། །བརྟེན་ནས་འཁོར་བའི་སྡུག་བསྔལ་རྒྱ་མཚོ་རབ་བརྒལ་ཏེ། །རང་སྣང་དག་པ་འོག་མིན་ཉམས་དགའི་གནས་མཆོག་ཏུ། །བགྲོད་པའི་ཤིང་རྟ་མྱུར་ལམ་ཟབ་མོ་འདིར་བརྩོན་ན། །རྣམ་གྲོལ་ཡང་དག་གསང་བ་ཆེན་པོའི་ལམ་རྙེད་ནས། །ཚེ་འདི་ཉིད་ལ་གདོས་བཅས་ཕུང་པོ་འོད་གསལ་དུ། །སྨིན་ནས་འཇའ་ལུས་གཞོན་ནུ་བུམ་སྐུར་སངས་རྒྱས་ཏེ། །ཁམས་གསུམ་འཁོར་བ་དོང་སྤྲུགས་དོན་གཉིས་ལྷུན་གྲུབ་འགྱུར། །དེ་ཕྱིར་བྱར་མེད་དོན་གྱི་རྣལ་འབྱོར་རྣམས། །རྣམ་གྲོལ་ལམ་བཟང་ཐར་བའི་ཐེམ་སྐས་ལ། །འཇུག་ཕྱིར་ཡིད་བཞིན་ནོར་བུ་ལས་ལྷག་པའི། །མན་ངག་ཡང་བཅུད་ཀུན་གྱི་སྙིང་པོ་མཆོག།ཐེག་པའི་ཁྱད་ཆོས་འོད་གསལ་མྱུར་ལམ་འདི། །མཚོ་སྐྱེས་པདྨ་ལས་བྱུང་སྤྲུལ་པའི་སྐུ། །སངས་རྒྱས་གཉིས་པ་རྡོ་རྗེ་ཐོད་ཕྲེང་དང་། །དངོས་ཞལ་མི་གཉིས་བསྟན་པའི་སྒྲོན་མེ་མཆོག།ལས་ཅན་རྣམ་གྲོལ་ལམ་འགོད་དེད་དཔོན་རྗེ། །འབྲེལ་ཚད་དོན་ལྡན་གཏེར་ཆེན་ཆོས་ཀྱི་རྒྱལ། །གང་དེའི་ཐུགས་རྗེས་བརྩེ་བས་རྗེས་བཟུང་ནས། །གདམས་ཟབ་མྱུར་ལམ་གཅེས་ནོར་ཚུལ་དུ་གནང་། །སྙིང་མིག་སྲོག་ལས་ཕངས་པའི་ཟབ་ཁྱད་ཀྱང་། །ལམ་འདིར་མོས་པའི་སྐལ་བཟང་འགྲོ་དོན་ཕྱིར། །ལྷག་བསམ་དཀར་བས་ཞལ་རྒྱུན་བདུད་རྩིའི་བཅུད། །རང་བློར་འཚམས་པའི་ཉུང་བསྡུས་བརྗེད་བྱང་བཀོད། །དགེ་འདིས་ཐབས་ཤེས་འོད་གསལ་ལམ་ཟབ་མོར། །རབ་ཞུགས་འགྲོ་རྣམས་ཆོས་དབྱིངས་ཉམས་དགའི་གནས། །ལྔ་ལྡན་རྒྱལ་བའི་ཞིང་དུ་སངས་རྒྱས་ཏེ། །མི་གནས་ཆོས་སྐུའི་གཏན་སྲིད་ཟིན་གྱུར་ཅིག།རྒྱལ་བའི་བསྟན་པ་དར་ཞིང་རྒྱས་པ་དང་། །དེ་འཛིན་སྐྱེས་བུའི་སྐུ་ཚེ་ཞབས་པད་བརྟན། །འཇིག་རྟེན་ཁམས་སུ་བདེ་ལེགས་ཕུན་ཚོགས་ཤིང་། །ཆོས་འདི་བསྟན་པ་མཐར་རྒྱས་བཀྲ་ཤིས་ཤོག།ཅེས་པ་འདིའང་དུས་རིང་མོ་ནས་རྡོ་རྗེའི་སྤུན་གྲོགས་བླ་མ་མཐའ་ཡས་ཀྱི་ཡང་སྲིད་སྤྲུལ་པའི་སྐུ་ཀུན་བཟང་བསྟན་པའི་ཉི་མ་དང་།རང་སློབ་དམ་པ་ཤཱཀྱའི་དགེ་བཙུན་བྱ་བྲལ་བ་ཤེས་རབ་འོད་ཟེར་ནས་རིན་ཆེན་གཉིས་པའི་སྐྱེས་བཅས་བཀའ་བསྐུལ་སྤྱི་བོར་ཕེབས་པ་དང་།ཁྱད་པར༧སྐྱབས་རྗེ་ཐམས་ཅད་མཁྱེན་པའི་དངོས་སློབ་ལམ་འདིར་མོས་པ་ཤིན་ཏུ་ཆེ་བའི་ཤཱཀྱའི་དགེ་བཙུན་དམ་པ་སྟོབས་ལྡན་ནས་ཀྱང་ཆོས་མིན་གྱི་བྱ་བ་རྒྱང་ནས་སྤངས་ཏེ་མྱུར་ལམ་འདི་ཉིད་ལ་སྒྲུབ་པ་ལྷུར་ལེན་བྱེད་པའི་དམ་བཅའ་བཅས་ཏེ་བསྐུལ་བ་ཟབ་པ་དང་།གཞན་ཡང་རང་སློབ་དམ་པ་ཤཱཀྱའི་དགེ་བཙུན་སངས་རྒྱས་དང་།ཕན་བདེ།ཉེ་ཆར་པདྨའི་ལུང་ཟིན་ཡི་གེའི་འདུ་བྱེད་དགེ་བཙུན་ཚུལ་ཁྲིམས་རྡོ་རྗེ་དང་།རིགས་ཀྱི་མྱུ་གུ་ཆོས་དབྱིངས་སྒྲོན་མ་སོགས་ཀྱིས་ཡང་ཡང་ནན་ཆེར་བསྐུལ་བ་ལ་བརྟེན་ནས༦སྐྱབས་རྗེ་ཐམས་ཅད་མཁྱེན་པ་ཡིད་བཞིན་ནོར་བུས་དངོས་དང་རྨི་ལམ་ལྟ་བུར་གསུངས་པའི་ཞལ་རྒྱུན་རྣམས་མདོར་བསྡུས་ཙམ་བརྗེད་བྱང་གི་ཚུལ་དུ།གསེར་དགོན་དབེན་གནས་མཚམས་ཁྲོད་འོད་གསལ་ལྗོངས་ཀྱི་ཉེ་འདབས་སུ།རྗེ་ཉིད་ཀྱི་གཟུངས་མའི་ཆ་ཙམ་འཛིན་པ་སློབ་འབངས་ཀུན་གྱི་ཐ་ཤལ་བ་ཀུན་བཟང་ཆོས་ཉིད་བདེ་སྐྱོང་དབང་མོས་ཟླ༤ཚེས༢༥དགེ་བར་ཟིན་ཐོ་རུ་བཀོད་པ།ཡི་གེའི་རིས་བྱེད་ཤཱཀྱའི་དགེ་བཙུན་རང་གི་ཉེ་གནས་སྐྱེས་མཆོག་ཚུལ་ཁྲིམས་རྡོ་རྗེས་བགྱིས་པའོ། །དགེའོ། །དགེའོ། །དགེའོ།། ༈ པདྨའི་རིང་ལུགས་སྔ་འགྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པས་འཛིན་གྱུར་ཅིག།སརྦ་མངྒ་ལཾ། །