TTDL-ZABTER-01-KA-027

Previous Text Back to Volume PageNext Text

Wylie title	zab gsang mkha' 'gro'i snying thig las: bla ma drag po bde chen rgyal po'i gsang sgrub kun khyab ye shes:
Location	bdud 'joms gling pa zab gter Volume 1, Text 27, Pages 267-270 (Folios 1a1 to 2b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bla ma drag po bde chen rgyal po'i gsang sgrub kun khyab ye shes. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: 267-270. Thimphu, Bhutan: Lama Kuenzang Wangdue, 2004.
Side notes	Recto: gsang sgrub   Verso: bdud 'joms gu ru drag po
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	བླ་མ་དྲག་པོ་བདེ་ཆེན་རྒྱལ་པོ་ (bla ma drag po bde chen rgyal po)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་ཁྲག་འཐུང་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་མི་ལོ་ཉེར་གཅིག་བར་དུ་བཀའ་རྒྱ་བྱས་མཐར་ཨ་སྤོ་སྡོང་གི་བནྡེ་ཀུན་བཟང་བསྟན་འཛིན་གྱིས་བསྐུལ་ངོར་གཏན་ལ་ཕབ་པའོ། །དགེའོ། །དགེའོ། །དགེའོ།།
	zhes pa 'di yang khrag 'thung rdo rje gro lod rtsal gyis gter nas bton te mi lo nyer gcig bar du bka' rgya byas mthar a spo sdong gi ban+de kun bzang bstan 'dzin gyis bskul ngor gtan la phab pa'o/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བླ་མ་དྲག་པོ་བདེ་ཆེན་རྒྱལ་པོའི་གསང་སྒྲུབ་ཀུན་ཁྱབ་ཡེ་ཤེས་བཞུགས་སོ༔ (བརྡ་ཡིག་) ན་མོ་གུ་རུ་པདྨ་ཀ་ར་ཡེ༔ མ་འོངས་ལྔ་བརྒྱའི་སྙིགས་མ་ལ༔ པདྨའི་བརྒྱུད་འཛིན་ལས་ཅན་གྱི༔ ཡང་དག་སྙིང་པོ་ལྷུར་ལེན་ཚེ༔ ཕྱི་ནང་བར་ཆད་གེགས་སྒྲོལ་ཞིང་༔ སྡེ་བརྒྱད་དྲེགས་པ་བྲན་ཁོལ་ཕྱིར༔ རྟག་ཏུ་འདི་ལ་བརྩོན་པར་གྱིས༔ ལག་ཏུ་ལེན་པའི་རིམ་པ་ནི༔ སྐྱབས་སེམས་སྔོན་སོང་བགེགས་ཀྱང་བསྐྲད༔ རྡོ་རྗེའི་སྲུང་བའི་གུར་ཁང་བསྒོམ༔ དེ་ནས་གཞལ་ཡས་ལྷ་བསྐྱེད་ནི༔ ཧཱུྃ་ཧཱུྃ་ཧཱུྃ༔ འཁོར་འདས་དག་མཉམ་ཆོས་ཀྱི་དབྱིངས༔ སྣང་བ་ལྷུན་གྲུབ་བདེ་ཆེན་ཞིང་༔ བཀོད་པ་འཕྲུལ་གྱི་གཞལ་ཡས་དབུས༔ པད་ཉི་རྒྱལ་བསེན་སྡེ་བརྒྱད་སྟེང་༔ བདག་ཉིད་བདེ་གཤེགས་ཡོངས་འདུས་དཔལ༔ དབང་དྲག་བདེ་ཆེན་རྒྱལ་པོའི་སྐུ༔ དམར་ནག་ཞལ་གཅིག་ཕྱག་གཉིས་པ༔ ཕྱག་གཡས་གནམ་ལྕགས་རྡོ་རྗེ་ཕྱར༔ གཡོན་པས་ལྕགས་སྡིག་མགོ་དགུ་འཛིན༔ ཞལ་གདངས་ལྗགས་འདྲིལ་མཆེ་བ་གཙིགས༔ དམར་ཟླུམ་སྤྱན་གསུམ་སྡང་མིག་གཡོ༔ སྨ་ར་སྨིན་མར་མེ་ཞགས་འཕྲོ༔ དབུ་སྐྲ་དམར་སེར་སྲིད་རྩེར་འབར༔ ཐོད་སྐམ་ལྔ་ཡིས་དབུ་ལ་བརྒྱན༔ ཐོད་ཕྲེང་ཚར་གསུམ་སྦྲུལ་ཆུན་བརྒྱན༔ གླང་ཆེན་མི་ལྤགས་སྟོད་གཡོགས་དང་༔ སྟག་ལྤགས་ཤམ་ཐབས་གོས་སུ་ཀླུབ༔ ཐལ་ཚོམ་ཁྲག་ཐིག་ཞག་གིས་བྱུག༔ ཞབས་གཉིས་གྱད་ཀྱི་འདོར་སྟབས་བགྲད༔ ཅོད་པན་སྙན་ཆ་སྦྲུལ་གདུབ་གསོལ༔ ཡེ་ཤེས་མེ་དཔུང་ཀློང་དུ་བསྐྱེད༔ རབ་འབྱམས་རྒྱལ་བའི་དཀྱིལ་འཁོར་ལྷ༔ ཏིལ་གྱི་གོང་བུ་ཕྱུར་བ་བཞིན༔ དྲག་པོའི་སྐུ་ཡི་ཀློང་དུ་རྫོགས༔ གནས་གསུམ་རྡོ་རྗེ་སྙིང་པོ་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམས༔ དེ་ནས་སྤྱན་འདྲེན་པ་ནི༔ ཧཱུྃ༔ ཆོས་ཉིད་གདལ་ཁྱབ་མཁའ་ཀློང་ལས༔ ལྷུན་གྲུབ་བདེ་ཆེན་རྒྱལ་པོ་བཞེངས༔ ལྷན་སྐྱེས་ཡེ་ཤེས་ཆེན་པོར་བཞུགས༔ གཉིས་མེད་རྟོགས་པས་བརྡ་ཕྱག་འཚལ༔ བཛྲ་ས་མ་ཡ་ཛ་ཛཿསྟྭཾ༔ ན་མོ་པུ་རུ་ཤ་ཡ་ཧོཿ དེ་ནས་མཆོད་འབུལ་ནི༔ ཧཱུྃ༔ སྣང་བ་སྣ་ཚོགས་མཆོད་པའི་སྤྲིན༔ བདག་མེད་རྟོགས་པའི་ཤུགས་ཀྱིས་བརླན༔ ཡེ་ཤེས་བདུད་རྩི་བླ་ན་མེད༔ རང་རིག་ཡེ་ཤེས་ལྷ་ལ་འབུལ༔ མ་ཧཱ་ཛྙཱ་ན་པཉྩ་ཨ་མྲྀ་ཏ་སརྦ་གྷ་ཎ་པཱུ་ཛ་ཧོཿ དེ་ནས་བསྟོད་པ་བྱ་བ་ནི༔ ཧཱུྃ༔ སྤྲོས་བྲལ་བདེ་ཆེན་རྒྱལ་པོ་ཡི༔ བདག་མེད་ཤེས་རབ་རྣོ་མཚོན་གྱིས༔ བདག་རྟོག་རཱུ་ཏྲ་ཤུགས་ཀྱིས་སྒྲོལ༔ མཉམ་ཉིད་ཆེན་པོར་དག་མཉམ་རོལ༔ གཞན་གྱིས་མི་ཐུབ་དྲག་ཤུལ་ལྡན༔ ཁྱབ་བདག་ཆེན་པོ་ཁྱོད་ལ་བསྟོད༔ ཛཔ་དམིགས་ནི༔ རང་ཉིད་དྲག་པོ་བདེ་ཆེན་རྒྱལ་པོར་གསལ་བའི་ཐུགས་ཀར་ཨོ་རྒྱན་མཚོ་སྐྱེས་རྡོ་རྗེ་སྐུ་མདོག་མཐིང་ནག་རྡོ་རྗེ་དང་དྲིལ་བུ་ཐུགས་ཀར་བསྣོལ་སྟབས་སུ་འཛིན་ཅིང་ཞབས་རྡོ་རྗེ་སྐྱིལ་ཀྲུང་གིས་བཞུགས་པའི་ཐུགས་ཀར་ཉི་མའི་གདན་ལ་རྡོ་རྗེ་རྩེ་ལྔ་པའི་ལྟེ་བར་ཧཱུྃ་དམར་ནག་གི་མཐར་སྔགས་ཀྱི་ཕྲེང་བས་བསྐོར་བར་བསྒོམ༔ ཨོཾ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨཱཿཧཱུྃ་ཧཱུྃ་ཕཊ༔ དེ་ནས་སྒྲུབ་པ་ལ༔ རང་ཡི་དམ་གྱི་ཐུགས་ཀའི་སྔགས་ཕྲེང་ཉེ་བར་འཁོར་བ་ལས་འོད་འཕྲོས་རྒྱལ་བ་ཐམས་ཅད་མཆོད༔ སེམས་ཅན་ཐམས་ཅད་གདོད་མའི་གཞི་དབྱིངས་སུ་བསྒྲལ༔ དེ་དག་གི་དབང་བྱིན་ཚེ་བསོད་དཔལ་ཡོན་ཐམས་ཅད་བསྡུས་ཏེ་སྔགས་ཕྲེང་ལ་ཐིམ༔ སྣང་སྲིད་དག་པ་རབ་འབྱམས་ཀྱི་རོལ་པར་སངས་རྒྱས་པར་བསྒོམ༔ ཨོཾ་ཨཱཿཧཱུྃ་ཨརྩིག་སོགས༔ དེ་ནས་ལས་སྦྱོར་བྱ་བ་ལ༔ རང་ཉིད་དྲག་པོ་བདེ་ཆེན་རྒྱལ་པོའི་ཐུགས་ཀའི་སྔགས་ཕྲེང་དང་སྐུའི་ཆ་ཐམས་ཅད་ནས་ཁྲོ་ཆུང་ལྕགས་སྡིག་མཚོན་ཐུན་མེ་རླུང་སྣ་ཚོགས་སེར་རླུང་ལྟར་འཕྲོས་པས་དགྲ་བགེགས་གདུག་པ་ཅན་ཐམས་ཅད་བསྲེགས་གཏུབ་བྱས་ནས་རྔམས་རོལ་བྱེད་པར་བསྒོམ༔ ཨོཾ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨཿཡཿམཿདུཿརུཿཙཿཤཿནཿམཱ་ར་ཡ་ཧཱུྃ་ཕཊ༔ བཀའ་ཡི་ལྷ་སྲིན་སྡེ་བརྒྱད་སྣང་སྲིད་དྲེགས་པ་ལྷ་འདྲེ་ཐམས་ཅད་དབང་དུ་བསྡུས༔ ནུས་པས་གཟིར༔ བྲན་དུ་བཀོལ༔ འབངས་སུ་ཁས་བླངས༔ སྲོག་སྙིང་དམར་ཙར་གྱིས་སྐྱུགས་ཏེ་བདག་གི་ཐུགས་ཀའི་ཧཱུྃ་གི་ཞབས་ཀྱུ་ལ་ཐིམ་པས་ཁོ་ཡི་སྲོག་སྙིང་བདག་ལ་ཐོབ་ནས་དམ་ཚིག་ལས་འདའ་བའི་གནས་མེད་པར་བསམ༔ ཨོཾ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨཿ ཡཿ མཿ དུཿ རུཿ ཙཿ ཤཿ ནཿ མཱ་ར་ཡ་ཧཱུྃ་ཕཊ༔ ཁྱབ་བརྡལ་ནམ་མཁའི་ཁོར་ཡུག་ཀུན༔ རང་རིག་བདེ་ཆེན་རྒྱལ་པོར་གཅིག༔ བསྐྱེད་དུ་མེད་དེ་ཡེ་ནས་ཡིན༔ བསྐྱེད་རིམ་ཀུན་གྱི་གསང་ཆེན་ཏེ༔ འཁོར་འདས་ཡོངས་ཀྱི་སྲོག་དབང་བསྒྱུར༔ འདི་ནི་བླ་མེད་ཐེག་པའི་རྩེ༔ གང་གིས་ཉམས་སུ་ལེན་པའི་བུས༔ སྣང་སྲིད་སྐྱེ་འགྲོ་དབང་བསྒྱུར་ཞིང་༔ ལྷ་འདྲེ་མི་གསུམ་བྲན་དུ་ཁོལ༔ རྡོ་རྗེ་འཆང་གི་ས་ཐོབ་འགྱུར༔ འདི་ནི་སྙིང་གི་ཡང་ཏིག་སྟེ༔ བཀའ་སྲུང་གནོད་སྦྱིན་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་མི་ལོ་ཉེར་གཅིག་བར་དུ་བཀའ་རྒྱ་བྱས་མཐར་ཨ་སྤོ་སྡོང་གི་བནྡེ་ཀུན་བཟང་བསྟན་འཛིན་གྱིས་བསྐུལ་ངོར་གཏན་ལ་ཕབ་པའོ། །དགེའོ། །དགེའོ། །དགེའོ།། །།