TTDL-ZABTER-03-GA-030

Previous Text Back to Volume PageNext Text

Wylie title	zab gsang mkha' 'gro'i snying thig las: dpal rdo rje sems dpa'i dbang chog rdo rjer smin byed:
Location	bdud 'joms gling pa zab gter Volume 3, Text 30, Pages 317-327 (Folios 1a1 to 6a1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las dpal rdo rje sems dpa'i dbang chog rdo rjer smin byed. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 317-327. Thimphu, Bhutan: Lama Kuenzang Wangdue, 2004.
Side notes	Recto: dbang chog   Verso: bdud 'joms bla ma rdor sems
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur
Cycle	དཔལ་རྡོ་རྗེ་སེམས་དཔའི་སྒྲུབ་སྐོར་ (dpal rdo rje sems dpa'i sgrub skor)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rdo rje sems dpa'
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་གསུམ་བར་དུ་བཀའ་རྒྱ་བྱས་མཐར་རང་སློབ་དད་དམ་ལྡན་པ་པདྨ་རྣམ་རྒྱལ་གྱིས་བསྐུལ་ངོར་སྨར་མདོ་བཀྲ་ཤིས་དགའ་འཁྱིལ་དུ་གཏན་ལ་ཕབ་པའི་ཡི་གེ་པ་ནི་མཁས་གྲུབ་རྒྱ་མཚོའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di yang khrag 'thung bdud 'joms rdo rjes gter nas bton te mi lo nyer gsum bar du bka' rgya byas mthar rang slob dad dam ldan pa pad+ma rnam rgyal gyis bskul ngor smar mdo bkra shis dga' 'khyil du gtan la phab pa'i yi ge pa ni mkhas grub rgya mtsho'o/_/dge'o/_/dge'o/_/dge'o/_/sarba mang+ga laM//

Tibetan Text

[edit]

ཧྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ དཔལ་རྡོ་རྗེ་སེམས་དཔའི་དབང་ཆོག་རྡོ་རྗེར་སྨིན་བྱེད་བཞུགས་སོ༔

ཧྂ༎༔ (བརྡ་ཡིག་) བསྐལ་པ་རྩུབ་འགྱུར་ཐ་མའི་ཚེ༔ ཡང་གསང་སྒོར་ཞུགས་སྐྱེས་བུ་རྣམས༔ ཉམས་པ་བདུད་ལས་རིང་བའི་ཕྱིར༔ དཔལ་ལྡན་རྡོ་རྗེ་སེམས་དཔའ་ཡི༔ དབང་གི་སྨིན་ནས་གྲོལ་བའི་ཕྱིར༔ ཐུགས་རྗེས་ལྡན་པའི་སློབ་དཔོན་གྱིས༔ དད་དམ་ལྡན་པའི་བུ་སློབ་ལ༔ དབང་བསྐུར་བྱེད་པའི་ཐབས་ཟབ་མོ༔ དང་པོ་དབང་ཆས་ལེགས་གྲུབ་ནས༔ དལ་ཞལ་ཕྱེས་ནས་ལྷ་གཞུང་བསྲང་༔ དེ་ནས་ལས་བུམ་བསྐྱེད་ཆོག་ལ༔ ཧཱུྃ༔ བུམ་པ་བརྡལ་ཁྱབ་གཞལ་ཡས་སུ༔ པདྨ་འདབ་བརྒྱད་ཟླ་རྒྱས་སྟེང་༔ ཧཱུྃ་ལས་བཅོམ་ལྡན་རྡོ་རྗེ་སེམས༔ དཀར་གསལ་ཞི་འཛུམ་མཚན་དཔེས་སྤྲས༔ ཕྱག་གཡས་རྡོ་རྗེ་ཐུགས་ཀར་བསྣམས༔ གཡོན་པས་དྲིལ་བུ་དཀུ་ལ་བརྟེན༔ ཞབས་གཉིས་ཕྱེད་པའི་སྐྱིལ་ཀྲུང་བཞུགས༔ དར་དང་རིན་ཆེན་རྒྱན་གྱི་སྤྲས༔ ཡེ་ཤེས་འོད་ལྔའི་ཀློང་དུ་བཞུགས༔ དམ་ཚིག་ཡེ་ཤེས་གཉིས་སུ་མེད༔ ཐུགས་ཀར་ཧཱུྃ་ལ་ཡིག་བརྒྱས་བསྐོར༔ བསྒོམ་པ་ཙམ་གྱི་དངོས་གྲུབ་ཐོབ༔ ཆོས་ཉིད་ནམ་མཁའ་མཛོད་ཀྱིས་མཆོད༔ ཨོཾ་བཛྲ་ཨ་རྒྷཾ་ནས༔ ཤཔྡའི་བར་གྱི་མཆོད༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ཡེ་ཤེས་ཡོན་ཏན་རྒྱ་མཚོའི་གཏེར༔ ཐུགས་རྗེ་ཐབས་ཀྱི་སྒྱུ་འཕྲུལ་ངོམས༔ རྡོ་རྗེ་དེ་བཞིན་གཤེགས་ལ་བསྟོད༔ བདག་ཉིད་རྡོ་རྗེ་སེམས་དཔའི་ཐུགས་ཀའི་འོད་ཟེར་གཟུངས་ཐག་ལ་བརྒྱུད་དེ་མདུན་བསྐྱེད་བུམ་ལྷའི་ཐུགས་ཀར་ཕོག༔ ཐུགས་དམ་གྱི་རྒྱུད་རབ་ཏུ་བསྐུལ་ཏེ་སྐུ་ཡི་ཆ་ཐམས་ཅད་ནས་དག་བྱེད་ཡེ་ཤེས་ཀྱི་བདུད་རྩི་འོ་རྒྱུན་ལྟ་བུར་བབས་ནས་བུམ་པ་མེར་གྱི་གང་བའི་འོད་ཀྱིས་སེམས་ཅན་གྱི་ལས་ཉོན་བག་ཆགས་ཐམས་ཅད་སངས་ཀྱིས་དག་ནས་སྣང་སྲིད་དག་པ་རབ་འབྱམས་ཀྱི་རོལ་པར་གྱུར༔ ཨོཾ་བཛྲ་སཏྭ་ས་མ་ཡ་སོགས་ཡིག་བརྒྱ་ཅི་མང་བཟླས༔ མཐར་མཆོད་ཅིང་བསྟོད་དེ༔ བུམ་པའི་ལྷ་འོད་དུ་ཞུ་ནས་བུམ་ཆུ་ལ་ཐིམ་པས་བག་ཆགས་དག་བྱེད་ཀྱི་ནུས་པ་དང་ལྡན་པར་དམིགས༔ དེ་ནས་སློབ་མ་གྲལ་དུ་འཁོད༔ ཁྲུས་བྱ་བགེགས་བསྐྲད་སྲུང་འཁོར་བསྒོམ༔ མཎྜལ་ཕུལ་ཞིང་སྐྱབས་སེམས་འབོག༔ དེ་ནས་གསོལ་བ་འདེབས་པ་ནི༔ ཀྱཻ་ཧོཿསངས་རྒྱས་ཐམས་ཅད་འདུས་པའི་དཔལ༔ བླ་མེད་བླ་མ་མཆོག་ཁྱོད་ཀྱིས༔ དཔལ་ལྡན་རྡོ་རྗེ་སེམས་དཔའ་ཡི༔ སྨིན་གྲོལ་དབང་མཆོག་བདག་ལ་སྩོལ༔ ལན་གསུམ༔ དེ་ནས་བླ་མས༔ ཀྱཻ་ཧོཿལས་དང་སྐལ་བཟང་སྐྱེས་བུ་ཁྱོད༔ གསང་སྔགས་ཟབ་མོའི་སྒོར་ཞུགས་ནས༔ ཡང་དག་ལམ་ལ་འཇུག་འདོད་ན༔ སྨིན་གྲོལ་དབང་མཆོག་སྟེར་བར་བགྱི༔ དེ་ནས་དབང་གི་སྣོད་རུང་བྱ་བ་སྡོམ་པ་དང་དམ་ཚིག་སྦྱིན་པ་ལ༔ སྡོམ་པ་གསུམ་གྱི་དམ་བཅའ་བཟུང་བ་ནི༔ ཀྱཻ་ཧོ་སྐལ་ལྡན་རིགས་ཀྱི་བུ༔ སྨིན་གྲོལ་དབང་གི་སྣོད་རུང་ཕྱིར༔ སྡོམ་གསུམ་རིམ་པར་བཟུང་བ་ཡི༔ དམ་ཚིག་གཉན་པོ་སྲུང་ནུས་སམ༔ ཞེ་དམ་བྱ་ཞིང་རྗེས་ཟློས་མཛོད༔ དེ་ནས་སློབ་མས༔ ཧོཿརིག་འཛིན་བླ་མ་ལྷའི་སྤྱན་སྔར༔ སོ་སོར་ཐར་པའི་སྡོམ་པ་དང་༔ བྱང་སེམས་སྔགས་ཀྱི་བསླབ་དམ་ཚིག༔ མ་ལུས་བདག་གིས་ཡོངས་སུ་བཟུང་༔ དེ་ནས་དམ་ཆུ་ཐོགས་ལ༔ ཧཱུྃ༔ འདི་ནི་དམ་ཚིག་རྡོ་རྗེའི་ཆུ༔ བསྲུང་ན་ཚེ་འདིར་སངས་རྒྱས་ཐོབ༔ ཉམས་ན་སྙིང་བསྲེགས་དམྱལ་བར་ལྟུང༔ སློབ་མ་ཁྱོད་ཀྱིས་མ་བརྗེད་ཟུངས༔ ས་མ་ཡ་ན་ར་ཀན༔ ཅེས་བསྐྱལ་བཅུག་སྟེ་མནའ་ཆུ་ལྕེ་ལ་བཞག༔ ཧཱུྃ༔ དམ་ཚིག་བདུད་རྩི་འོད་ལྔའི་རང་བཞིན་དུ་གྱུར་ཏེ་སྙིང་གི་དཀྱིལ་དུ་སོང་ནས་ཀུན་རྫོབ་རྒྱུ་ཡི་ངོ་བོ་རྡོ་རྗེ་འོད་འབར་བའི་ལྟེ་བར་དོན་དམ་འབྲས་བུའི་ཐིག་ལེ་འོད་ལྔའི་རང་བཞིན་ཅན་གནས་པའི་བྱིན་བརླབས་ཀྱིས་དམ་སྡོམ་བསླབ་པ་ལ་གནས་ཤིང་འཛིན་པར་གྱུར༔ བཛྲ་ས་མ་ཡ་ཏིཥྛཿདེ་ནས་མིག་དར་བཀབ་ལ༔ ཨོཾ་ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ༔ དེ་ནས་མེ་ཏོག་ཐོགས་ལ༔ ཨ་ཁཾ་ཝི་ར་ཧཱུྃ༔ དེ་ནས་སློབ་མ་ལྷར་བསྐྱེད་པ་ནི༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་སོགས༔ འཁོར་འདས་ཀྱི་ཆོས་ཐམས་ཅད་སྟོང་ཞིང་བདག་མེད་པའི་རང་བཞིན་ཅན་དུ་རིག་སྟེ༔ སྟོང་པའི་ངང་ལས་བདག་མདུན་གསལ་སྣང་སྒྱུ་མ་ལྟ་བུའི་ཏིང་འཛིན་གྱི་བྱིན་རླབས་ཆེན་པོའི་མཐུས་སློབ་མའི་རྒྱུད་ཀྱི་ནད་གདོན་སྡིག་སྒྲིབ་བག་ཆགས་གདོས་བཅས་ཤ་ཁྲག་གི་ཕུང་པོ་དང་བཅས་པ་ཐམས་ཅད་འཇའ་ཚོན་ནམ་མཁའ་ལ་ཡལ་བ་ལྟར་ཆོས་ཉིད་སྟོང་པ་ཉིད་ཀྱི་དབྱིངས་སུ་ཡལ་བར་གྱུར༔ སྟོང་པའི་ངང་ལས་སོགས་གཞུང་ལྟར་ལྷར་བསྒོམ༔ ཡེ་ཤེས་དབབ་བསྟིམ་དང་༔ ཏིཥྛ་བཛྲ་གྱིས་བརྟན་པར་བྱས༔ དེ་ནས་མེ་ཏོག་དོར་བ་ནི༔ ཧཱུྃ༔ སློབ་མའི་རིག་པའི་མེ་ཏོག་འདི༔ སྔོན་ནས་ལས་འབྲེལ་གང་ཡོད་པའི༔ ལྷག་པའི་ལྷ་དེར་དབབ་པ་རུ༔ གསང་སྔགས་བདེན་པས་བྱིན་གྱིས་རློབས༔ བཛྲ་པུཥྤེ་པྲ་ཏཱིཙྪ་ཧོཿདེ་ནས་མིག་དར་བསལ་བ་ནི༔ ཧཱུྃ༔ ཁྱོད་ཀྱི་མི་ཤེས་མ་རིག་སྒྲིབ༔ ཡེ་ཤེས་ཐུགས་རྗེ་བསལ་ནས་ཀྱང་༔ རང་སྣང་ལྷུན་གྲུབ་བདེ་ཆེན་གྱིས༔ དཀྱིལ་འཁོར་ཡོངས་རྫོགས་མཐོང་བར་ཤོག༔ ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ དེ་ནས་བུམ་དབང་བསྐུར་བ་ནི༔ དང་པོ་བུམ་པ་ཐོགས་ལ༔ ཧཱུྃ༔ བཀྲ་ཤིས་བུམ་པ་ལྷའི་གཞལ་ཡས༔ ལྷ་དང་གཉིས་མེད་བདུད་རྩི་ཡིས༔ སྐལ་ལྡན་བུ་ལ་དབང་བསྐུར་རོ༔ བུམ་པ་སྐུ་ཡི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རྡོར་སེམས་ཡབ་ཡུམ་གྱི་སྐུ་ཐོགས་ལ༔ ཧཱུྃ༔ དུས་གསུམ་སངས་རྒྱས་འདུས་པའི་སྐུ༔ རྡོ་རྗེ་སེམས་དཔའ་ཡབ་ཡུམ་གྱིས༔ སྐལ་ལྡན་བུ་ལ་དབང་བསྐུར་རོ༔ བསྐྱེད་པ་སྐུ་ཡི་དབང་ཐོབ་ཤོག༔ ཨོཾ་སརྦ་ཏ་ཐཱ་སོགས༔ དེ་ནས་རྣམ་སྣང་ཡབ་ཡུམ་ཐོགས་ལ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ སྐུ་གསང་འདུས་པ་རྣམ་སྣང་མཛད༔ སྐལ་ལྡན་བུ་ལ་དབང་བསྐུར་རོ༔ དེ་བཞིན་རིགས་ཀྱིས་སྐུ་ཐོབ་ཤོག༔ ཨོཾ་སརྦ་ཏ་ཐཱ་སོགས༔ དེ་ནས་རིན་འབྱུང་ཡབ་ཡུམ་གཏད་ལ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ ཡོན་ཏན་གསང་འདུས་རིན་འབྱུང་གནས༔ སྐལ་ལྡན་བུ་ལ་དབང་བསྐུར་རོ༔ རིན་ཆེན་རིགས་ཀྱི་སྐུ་ཐོབ་ཤོག༔ ཨོཾ་སརྦ་ཏ་ཐཱ༴དེ་ནས་སྣང་མཐའ་ཡབ་ཡུམ་གྱི་སྐུ་གཏད་ལ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ གསུང་གསང་འདུས་པ་སྣང་མཐའ་ཡས༔ སྐལ་ལྡན་བུ་ལ་དབང་བསྐུར་རོ༔ པདྨ་རིགས་ཀྱི་སྐུ་ཐོབ་ཤོག༔ ཨོཾ་སརྦ་ཏ་ཐཱ༴དེ་ནས་དོན་འགྲུབ་ཡབ་ཡུམ་གྱི་སྐུ་གཏད་ལ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ ཕྲིན་ལས་གསང་འདུས་དོན་ཡོད་གྲུབ༔ སྐལ་ལྡན་བུ་ལ་དབང་བསྐུར་རོ༔ ཀརྨ་རིགས་ཀྱི་སྐུ་ཐོབ་ཤོག༔ ཨོཾ་སརྦ་ཏ་ཐཱ༴དེ་ནས་མི་བསྐྱོད་རྡོ་རྗེ་གཏད་ལ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ ཐུགས་གསང་འདུས་པ་མི་བསྐྱོད་དཔལ༔ སྐལ་ལྡན་བུ་ལ་དབང་བསྐུར་རོ༔ རྡོ་རྗེ་རིགས་ཀྱི་སྐུ་ཐོབ་ཤོག༔ ཨོཾ་སརྦ་ཏ་ཐཱ༴དེ་ནས་སྒོ་མ་རྣམ་བཞིའི་སྐུ་གཏད་ལ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ ཚད་མེད་ཕྲིན་ལས་སྒོ་མ་བཞིས༔ སྐལ་ལྡན་བུ་ལ་དབང་བསྐུར་རོ༔ ཕྲིན་ལས་རབ་འབྱམས་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་ས་ཏྭ་ཛཿཧཱུྃ་བཾ་ཧོ༔ ཨ་བྷི་ཥིཉྩ་ཨོཾ༔ དེ་ནས་གསང་དབང་བསྐུར་བ་ནི༔ བྷནྡྷ་བདུད་རྩི་ཐོགས་ལ༔ ཧཱུྃ༔ བྷནྡྷ་བདུད་རྩི་གསུང་གི་བཅུད༔ ཡེ་ཤེས་འོད་ཟེར་དྲྭ་བ་འཁྲིགས༔ སྐལ་ལྡན་ཁྱོད་ཀྱི་ངག་ཏུ་བླུད༔ རྡོ་རྗེའི་གསུང་གི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་ཝཱཀ་ཨ་བྷི་ཥིཉྩ་ཨཱཿདེ་ནས་སྔགས་འཁོར་ཐོགས་ལ༔ ཧཱུྃ༔ གསང་སྔགས་རིག་སྔགས་གཟུངས་སྔགས་ཀུན༔ སྙིང་པོ་གཅིག་དྲིལ་སྔགས་འཁོར་ལོས༔ སྐལ་ལྡན་བུ་ལ་དབང་བསྐུར་རོ༔ བཟླས་པ་སྔགས་ཀྱི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་ཝཱཀ་ཨ་བྷི་ཥིཉྩ་ཨཱཿདེ་ནས་ཤེར་དབང་བསྐུར་བ་ནི༔ ཧཱུྃ༔ རྡོ་རྗེ་འཁོར་ལོ་རིན་པོ་ཆེ༔ པདྨ་རྒྱ་གྲམ་ཐུགས་ཀྱི་གདངས༔ སྐལ་ལྡན་བུ་ལ་དབང་བསྐུར་རོ༔ ཤེས་རབ་ཡེ་ཤེས་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་མེ་ལོང་ཐོགས་ལ༔ ཧཱུྃ༔ མེ་ལོང་ཡེ་ཤེས་རྒྱ་མཚོའི་གདངས༔ དུས་གསུམ་རྒྱལ་བའི་ཐུགས་གསང་རྫོགས༔ སྐལ་ལྡན་བུ་ལ་དབང་བསྐུར་རོ༔ རྡོ་རྗེ་ཐུགས་ཀྱི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཚིག་དབང་བསྐུར་བ་ནི༔ འཇའ་ཤེལ་གཏད་ལ༔ ཧཱུྃ༔ ལྷུན་གྲུབ་དྭངས་ཤེལ་འོད་ཐིག་གསལ༔ རྒྱལ་ཀུན་ཐུགས་ཀྱི་གསང་ཆེན་ལམ༔ སྐལ་ལྡན་བུ་ལ་དབང་བསྐུར་རོ༔ ཀ་དག་ཚིག་གི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་སརྦ་ཛྙཱ་ན་ཨ་བྷི་ཥིཉྩ་ཨཱཿདེ་ནས་རིག་པའི་རྩལ་དབང་བསྐུར་བ་ནི༔ ཐིག་ལེ་སྟོང་པའི་སྒྲོན་མ་གཏད་ལ༔ ཧཱུྃ༔ ཉག་གཅིག་ཐིག་ལེ་སྤྲོས་མཐའ་བྲལ༔ རྣམ་ཐར་གསུམ་ལྡན་ཆོས་ཀྱི་སྐུས༔ སྐལ་ལྡན་བུ་ལ་དབང་བསྐུར་རོ༔ རིག་པ་རྩལ་གྱི་དབང་ཐོབ་ཤོག༔ ཨ་ཨ་ཨ་ཕཊ༔ དེ་ནས་གཏོར་མ་ཐོགས་ལ༔ ཧཱུྃ༔ བརྡལ་ཁྱབ་དབྱིངས་ཀྱི་གཏོར་མ་ལ༔ ལྷུན་གྲུབ་བདེ་ཆེན་བཀོད་པ་རྫོགས༔ སྐལ་ལྡན་བུ་ལ་དབང་བསྐུར་རོ༔ བསྒྲུབ་དང་དཀྱིལ་འཁོར་ཐམས་ཅད་ལ༔ དབང་བསྒྱུར་དབང་མཆོག་ཐོབ་པར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སཏྭ་སརྦ་མཎྜ་ལ་བ་ལིངྟ་ཨ་བྷི་ཥིཉྩ་ཧཱུྃ༔ དེ་ནས་མཐའ་བརྟེན་བཀྲ་ཤིས་རྟགས་བརྒྱད་གཏད་ལ༔ ཧཱུྃ༔ བཀྲ་ཤིས་རྟགས་བརྒྱད་འདི་གཏད་པས༔ མཚན་དང་དཔེ་བྱད་རྫོགས་པ་ཡི༔ སྤྲུལ་པའི་སྐུ་མཆོག་རབ་ཐོབ་ནས༔ གདུལ་བྱ་འདུལ་བའི་དབང་ཐོབ་ཤོག༔ སརྦ་མངྒ་ལཾ་ཨ་བྷི་ཥིཉྩ་ཧཱུྃ༔ དེ་ནས་རྒྱལ་སྲིད་སྣ་བདུན་གཏད་ལ༔ ཧཱུྃ༔ ཁམས་གསུམ་ཆོས་ཀྱི་རྒྱལ་པོའི་སྲིད༔ སྐལ་ལྡན་སྐྱེས་བུ་ཁྱོད་ལ་གཏད༔ དོན་གཉིས་ལྷུན་གྲུབ་རོལ་པ་ཡིས༔ འཁོར་བ་དོང་སྤྲུགས་དབང་ཐོབ་ཤོག༔ མ་ཎི་རཏྣ་ཨ་བྷི་ཥིཉྩ་ཧཱུྃ༔ ས་མ་ཡ༔ ལྟ་དགོངས་ལྡན་པའི་སློབ་དཔོན་གྱིས༔ དད་དམ་ལྡན་པའི་སློབ་བུ་ལ༔ དབང་འདི་སུ་ཡིས་བསྐུར་གྱུར་ན༔ དཀྱིལ་འཁོར་ཡོངས་ཀྱི་རྩ་དབང་ཐོབ༔ མཆོག་གི་དངོས་གྲུབ་འབད་མེད་ཐོབ༔ རྣམ་མཁྱེན་ས་ལས་ཕྱིར་མི་ལྡོག༔ འདི་ཐོབ་སྐལ་བཟང་སྐྱེས་བུ་རྣམས༔ དམ་ཚིག་སྲོག་གི་གཏའ་རུ་ཟུངས༔ སྒྲུབ་པ་མ་གཡེལ་རྩེ་གཅིག་འབུང་༔ སྙིང་པོའི་ཡང་ཐིག་གནད་དུ་བསྣུན༔ གསང་ཆེན་འོད་གསལ་མྱུར་བའི་ལམ༔ སྣང་བཞིའི་ས་ལམ་གཅིག་ཆོད་ལ༔ གཞོན་ནུ་བུམ་སྐུར་བྱང་ཆུབ་མཛོད༔ འདི་ནི་ཟབ་གསང་བླ་ན་མེད༔ བཀའ་སྲུང་གནོད་སྦྱིན་ཆེན་པོར་གཉེར༔ སྣོད་མིན་ལག་ཏུ་མ་བཏང་ཤིག༔ ས་མ་ཡ༔ རྒྱ་རྒྱ་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་གསུམ་བར་དུ་བཀའ་རྒྱ་བྱས་མཐར་རང་སློབ་དད་དམ་ལྡན་པ་པདྨ་རྣམ་རྒྱལ་གྱིས་བསྐུལ་ངོར་སྨར་མདོ་བཀྲ་ཤིས་དགའ་འཁྱིལ་དུ་གཏན་ལ་ཕབ་པའི་ཡི་གེ་པ་ནི་མཁས་གྲུབ་རྒྱ་མཚོའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།