TTDL-ZABTER-07-JA-056

Previous Text Back to Volume PageLast text in volume.

Wylie title	mkha' 'gro gsang ba'i gab thig las: ye shes mkha' 'gro'i me mchod 'dod 'jo'i dpal phreng:
Location	bdud 'joms gling pa zab gter Volume 7, Text 56, Pages 629-631 (Folios 1a1 to 2a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Mkha' 'gro gsang ba'i gab thig las ye shes mkha' 'gro'i me mchod 'dod 'jo'i dpal phreng. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: 629-631. Thimphu, Bhutan: Lama Kuenzang Wangdue, 2004.
Side notes	Recto: me mchod   Verso: bdud 'joms mkha' 'gro mtsho rgyal
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Fire Offerings - sbyin sreg
Cycle	མཁའ་འགྲོ་གསང་བའི་གབ་ཐིག་ (mkha' 'gro gsang ba'i gab thig)
Deity	ye shes mtsho rgyal
Colophon	ཞེས་པ་འདི་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་སུམ་ཅུ་རྩ་དགུའི་བར་དུ་བཀའ་རྒྱས་བཏབ་མཐར་སྤྲུལ་པའི་སྐུ་མཆོག་སྣ་ཚོགས་རང་གྲོལ་གྱིས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པ་ནི་པདྨ་ནོར་བུའོ། །དགེའོ། །དགེའོ། །དགེའོ།།
	zhes pa 'di bdud 'joms rdo rjes gter nas bton te mi lo sum cu rtsa dgu'i bar du bka' rgyas btab mthar sprul pa'i sku mchog sna tshogs rang grol gyis nan du bskul ngor gtan la phab pa'i yi ge pa ni pad+ma nor bu'o/_/dge'o/_/dge'o/_/dge'o//

Tibetan Text

[edit]

(བརྡ་ཡིག་) མཁའ་འགྲོ་གསང་བའི་གབ་ཐིག་ལས༔ ཡེ་ཤེས་མཁའ་འགྲོའི་མེ་མཆོད་འདོད་འཇོའི་དཔལ་ཕྲེང་ཞེས་བྱ་བ་བཞུགས་སོ༔ (བརྡ་ཡིག་) ན་མོ་གུ་རུ་པདྨ་ཀ་ར་ཡེ༔ མཁའ་འགྲོ་བསྒྲུབ་པའི་རྣལ་འབྱོར་གྱིས༔ བསྙེན་བསྒྲུབ་ཚད་ཐེམ་རྫོགས་པའི་མཐར༔ ཁ་བསྐང་མེ་མཆོད་འདིར་བརྩོན་བྱ༔ ལག་ཏུ་ལེན་པའི་རིམ་པ་ལ༔ འབྲུ་སྣ་ཟས་སྣ་འབྱོར་ཚོགས་བསགས༔ དྲི་བཟང་ཆུ་ཡིས་སྦགས་བྱས་ཏེ༔ བཟང་དྲུག་སྨན་གྱི་སྦོད་དང་བསྲེ༔ ཉེར་སྤྱོད་འདོད་ཡོན་སྨན་གཏོར་རཀ༔ བྱང་སེམས་དཀར་དམར་དང་བཅས་པ༔ མཆོད་པའི་རྫས་སུ་བཤམས་བྱས་ཏེ༔ བརྐོ་ཐབ་བམ་ནི་བརྩིགས་ཐབ་ལ༔ ལས་མཐུན་ཤིང་ནི་འབུད་ཤིང་སྟེ༔ དཀར་ཕྱོགས་སྐྱོང་ལ་དཀར་མཆོད་དང་༔ བགེགས་ལ་ལན་ཆགས་འབྲས་ཆན་དང་༔ བསྐྲད་དང་རྡོ་རྗེའི་སྲུང་འཁོར་མཐར༔ དང་པོ་བསྲེག་རྫས་བྱིན་གྱིས་བརླབ་པ་ལ༔ སརྦ་དྷརྨ་ག་ག་ན་སྭ་བྷཱ་ཝ་བི་ཤུདྡྷེ་ཨཱཿམཆོད་རྫས་ཡོ་བྱད་ཐམས་ཅད་སྟོང་པ་ཉིད་དུ་གྱུར༔ སྟོང་པའི་ངང་ལས་མཆོད་པའི་རྫས་དང་སྣོད་བཅུད་འབྱུང་བའི་ངོ་བོ་རྣམས་ཚུར་འདུས་པ་ལས་བྱུང་བའི་བདེ་སྟོང་ཟག་པ་མེད་པའི་ཡེ་ཤེས་ཀྱི་བདུད་རྩི་ལ་རྣམ་པ་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་རྒྱ་མཚོ་མ་ཚང་བ་མེད་པ་དཔག་ཡས་ནམ་མཁའི་ཁྱོན་དང་མཉམ་པར་གྱུར༔ ན་མཿསརྦ་ཏ་ཐཱ་ག་ཏ་སོགས༔ ནམ་མཁའ་མཛོད་སྔགས་ལན་བདུན་བརྗོད༔ མཐར་ཨོཾ་ཨཱཿཧཱུྃ་ལན་གསུམ༔ ཨོཾ་སྭ་བྷཱ་ཝ་སོགས༔ མེ་ཐབ་མི་དམིགས་པ་སྟོང་པའི་ཉིད་དུ་གྱུར༔ སྟོང་པའི་ངང་ལས༔ ལས་གཞུང་ལས༔ ཨཱཿགཟུང་དང་འཛིན་པས་སོགས༔ རྟེན་དང་བརྟེན་པ་བསྐྱེད་ཅིང་དབྱིངས་ནས་སྤྱན་དྲངས་ལ་བསྟིམ༔ དེ་ནས་བྱོན་སྐྱེམས་འབུལ་བ་ལ༔ རྩ་སྔགས་མཐར༔ ཨ་མྲྀ་ཏ་ཁཱ་ཧི༔ ལན་བདུན་ནམ་ཉེར་གཅིག་གིས་ཕུལ༔ མཐར་བཞུགས་སུ་གསོལ་ཞིང་ཕྱི་ནང་གསང་བ་ཁྱད་པར་གྱི་མཆོད་པ་རྣམས་ཚང་བར་འབུལ༔ མཐར་བསྟོད་པ་བྱ༔ དེ་ནས་བསྲེག་རྫས་འབུལ་བ་ལ༔ ཧོཿམ་གཅིག་ཡེ་ཤེས་ཀྱི་མཁའ་འགྲོ་མའི་ལྷ་ཚོགས་ཁྱེད་རྣམས་ཀྱིས་དངོས་སུ་འབྱོར་པ་དང་ཡིད་ཀྱིས་སྤྲུལ་པའི་མཆོད་རྫས་འབུལ་བ་འདི་དག་བཞེས་ནས་བདག་ཅག་སྒྲུབ་པ་པོའི་རྒྱུད་བྱིན་གྱིས་བརླབས་ཏེ་ཚོགས་གཉིས་ཡོངས་སུ་རྫོགས་ཤིང་སྒྲིབ་གཉིས་བག་ཆགས་དག་ནས་སྐུ་གཉིས་མངོན་དུ་གྱུར་པའི་དངོས་གྲུབ་དམ་པ་སྩལ་དུ་གསོལ༔ རྩ་སྔགས་མཐར༔ སརྦ་ག་ཎ་པཱུ་ཛ་ཧོཿལས་བཞིའི་ཤམ་བུ་གང་རུང་དང་བཅས་པས་བསྲེག་རྫས་རྣམས་ཕུལ་ཞིང་དམིགས་པའི་ལྡེ་ཁ་བསྒྱུར་རོ༔ ཅི་མང་བརྗོད་མཐར༔ གོང་བཞིན་ཕྱི་ནང་གསང་མཆོད་འབུལ་མཐར་བསྟོད་པ་བྱ༔ ཁ་བསྐང་བཤགས་པ་བྱ་ཞིང་དངོས་གྲུབ་བླངས༔ གཤེགས་སྐྱེམས་འབུལ་བ་བྱོན་སྐྱེམས་ལྟར་རོ༔ དེ་ནས་གཤེགས་སུ་གསོལ་བ་ནི༔ ཧཱུྃ༔ ཆོས་དབྱིངས་ངང་ལས་ལྷུན་གྲུབ་རྩལ༔ རོལ་པ་ཆེན་པོའི་ཡེ་ཤེས་ལྷ༔ སྤྲོས་མཐའ་བྲལ་བའི་དབྱིངས་སུ་གཤེགས༔ བྱིན་རླབས་ཡེ་ཤེས་མེ་དཔུང་གིས༔ སྦྱིན་སྲེག་ཟ་བའི་གདོན་བསྲེག་གྱུར༔ རཾ་ཛྭ་ལ་རཾ་པ་ཡེ་སྭཱ་ཧཱ༔ མཐར་ནི་བསྔོ་སྨོན་རྒྱ་ཡིས་གདབ༔ མེ་ཏོག་འཐོར་ཞིང་ཤིས་པ་བརྗོད༔ གནད་དེས་ལྷག་ཆད་ཁ་བསྐང་དང་༔ ཚོགས་གཉིས་རྫོགས་ཤིང་ཕྲིན་ལས་འགྲུབ༔ ཁ་ཙམ་ཚིག་ཙམ་མ་ཡིན་པར༔ བསྐྱེད་དང་དམིགས་པའི་གནད་ལྡན་མཆོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་སུམ་ཅུ་རྩ་དགུའི་བར་དུ་བཀའ་རྒྱས་བཏབ་མཐར་སྤྲུལ་པའི་སྐུ་མཆོག་སྣ་ཚོགས་རང་གྲོལ་གྱིས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པ་ནི་པདྨ་ནོར་བུའོ། །དགེའོ། །དགེའོ། །དགེའོ།།