TTDL-ZABTER-08-NYA-034

Previous Text Back to Volume PageNext Text

Wylie title
Location	bdud 'joms gling pa zab gter Volume 8, Text 34, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: . Thimphu, Bhutan: Lama Kuenzang Wangdue, 2004.
Side notes	Verso: bdud 'joms srung ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

Tibetan Text

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ ཟབ་ཆོས་བཀའ་ཡི་སྲུང་མ༔ ལྷ་ཆེན་གཙུག་ན་ཟླ་བའི་རྩ་སྒྲུབ་དངོས་གྲུབ་དཔལ་ཕྲེང་བཞུགས་སོ༔ བརྡ་ཡིག་༠༠༠༠༠༠༣༠༠༔ ན་མོ་གུ་རུ་པདྨ་ཀ་ར་ཡེ༔ མ་འོངས་བསྐལ་པ་རྩུབ་འགྱུར་དུས༔ པདྨའི་བརྒྱུད་འཛིན་སྐྱེས་བུ་རྣམས༔ དབུ་འཕང་མཐོ་ཞིང་དཔལ་རྒྱས་ཕྱིར༔ ལྷ་ཆེན་གཙུག་ན་ཟླ་བ་ཡི༔ རྩ་སྒྲུབ་དངོས་གྲུབ་དཔལ་ཕྲེང་ཟུངས༔ དཀྱིལ་འཁོར་བཀོད་ལེགས་མཛེས་ལྡན་པ༔ ཟླ་གམ་དབང་གི་ཁ་ཏོག་ཅན༔ དེ་དབུས་སྒྲུབ་རྫས་སྲོག་འཁོར་མཐར༔ གཏེར་བུམ་རིན་ཆེན་སྣ་ཚོགས་དང་༔ འབྲུ་སྨན་ཟས་ཚོགས་འབྱོར་ཚད་ཀྱིས༔ བསྐོར་ཏེ་དར་དམར་ལྡིང་གུར་ཕུབ༔ སྒྲུབ་གཏོར་གཙོ་འཁོར་ཆེ་གྲངས་བཅའ༔ འབྱོར་ཚོགས་འདོད་ཡོན་སྣ་ཚོགས་དང་༔ ཁྱད་པར་དཀར་གསུམ་གཏོར་མ་བཤམས༔ རང་ཉིད་ཡི་དམ་ལྷག་པའི་ལྷའི༔ བསྒོམ་བསྒྲུབ་སྔོན་སོང་གནད་དུ་གཅེས༔ དེ་ནས་ལྷ་བསྐྱེད་རིམ་པ་ནི༔ ཧཱུྃ༔ བདག་ཉིད་ཡི་དམ་ལྷ་ཡི་སྐུར་བསྒོམ་པའི༔ མདུན་དུ་རིན་ཆེན་རི་རབ་ཆེན་པོའི་རྩེར༔ རཱ་གའི་གཞལ་ཡས་རྒྱ་ཆེ་ཁྱོན་ཡངས་པར༔ བཀོད་ལེགས་ཟླ་གམ་དབང་གི་ཁ་ཏོག་འབར༔ དེ་དབུས་རིན་ཆེན་སྣ་ཚོགས་ཁྲི་ཡི་ཁར༔ འོད་འབར་རབ་དཀར་ཟླ་ཕྱེད་གདན་སྟེང་དུ༔ ཧྲཱིཿལས་འདོད་ཁམས་དབང་ཕྱུག་ཚོགས་ཀྱི་བདག༔ དམར་གསལ་ཆེ་བརྗིད་སྟོབས་ལྡན་གླང་པོའི་གདོང་༔ ཟླ་ཕྱེད་དབང་རྒྱལ་ནོར་བུ་གཙུག་ན་མཛེས༔ ཕྱག་གཡས་ལྕགས་ཀྱུས་སྣང་སྲིད་དབང་སྡུད་ཅིང་༔ གཏེར་བུམ་མཆན་བརྟེན་དགོས་འདོད་ཆར་དུ་འབེབས༔ གཡོན་པས་ཞགས་འཛིན་སྲིད་པ་བྲན་དུ་བཅིངས༔ བག་དྲོ་ལྷུན་ཆགས་གཟི་བརྗིད་འོད་ཕུང་འབར༔ ཞབས་གཉིས་གྱད་སྟབས་ལིང་ག་གྱེན་དུ་བསྒྲེང་༔ ཤིན་ཏུ་ཆགས་པའི་གོས་དང་རྒྱན་ཆ་སྤངས༔ བདེ་སྟོང་ཉམས་རྒྱས་འདོད་པའི་རོ་ལ་གདུང་༔ དགའ་བའི་མདངས་ལྡན་ཆགས་པའི་ཟིལ་པ་འཁྲིགས༔ གཟུགས་མེད་སྙོམས་འཇུག་དབང་པོ་སྟོང་པའི་བདག༔ གཟུགས་ཁམས་གསལ་བའི་དབང་པོ་བདེ་བ་ཆེ༔ འདོད་ཁམས་འདོད་པའི་རྒྱལ་པོར་ལྷུན་གྱིས་གྲུབ༔ བདེ་སྟེར་ལྷ་མོ་ཨུ་མ་དཱེ་ཝི་ནི༔ དམར་སེར་སྤྲེའུའི་གཟུགས་ངོམས་གཡས་ནོར་བུ༔ གཡོན་པས་སྟོབས་བསྐྱེད་སྨན་གྱི་རིལ་བུ་སྟོབ༔ བདེ་བའི་ཉམས་ལྡན་དགའ་བའི་བཞིན་མདངས་ངོམས༔ འདོད་པའི་ངང་ལྡན་ཆགས་པའི་ཟིལ་པ་འཁྲིགས༔ ཤར་དུ་འགུགས་བྱེད་དམར་མོས་ལྕགས་ཀྱུ་དང་༔ གཡོན་པས་རིན་ཆེན་དུང་གི་ཕྲེང་བ་འདྲེན༔ ལྷོ་རུ་འཆིང་བྱེད་དམར་མོས་ཉི་ཟེར་ཞགས༔ གཡོན་པས་ཡིད་བཞིན་ནོར་བུ་བསམ་འཕེལ་བསྣམས༔ ནུབ་ཏུ་སྡོམ་བྱེད་དམར་མོས་ལྕགས་སྒྲོག་དང་༔ གཡོན་པས་ནོར་བུ་དབང་གི་རྒྱལ་པོ་བསྣམས༔ བྱང་དུ་མྱོས་བྱེད་དམར་མོས་དྲིལ་བུ་དང་༔ གཡོན་པས་ནོར་བུ་ཕ་རོལ་དཔུང་འཇོམས་བསྣམས༔ ཀུན་ཀྱང་ཞི་འཛུམ་རིན་ཆེན་ཕྲེང་བས་སྤྲས༔ ཡིད་འཕྲོག་མཛེས་ལྡན་དགྱེས་ཆགས་ལང་ཚོས་འཁྱུད༔ ཕྱི་རིམ་འཁོར་ཡུག་དཔལ་མགོན་བདུན་ཅུ་ལྔ༔ སྣང་སྲིད་དྲེགས་པ་ཕོ་མོའི་འཁོར་གྱིས་བསྐོར༔ བར་མཚམས་འདོད་རྒུའི་ལོངས་སྤྱོད་སྤྲིན་བཞིན་གཏིབས༔ ཕྱི་ནང་འདོད་ཡོན་སྤེལ་བའི་ལྷ་མོའི་ཚོགས༔ ཞིང་རྡུལ་གྲངས་དང་མཉམ་པས་བསྐུར་ཞིང་མཆོད༔ སྣང་སྲིད་སྐྱེ་འགྲོའི་བློ་ཡིད་སེམས་གསུམ་ལ༔ དབང་བསྒྱུར་ཕྲིན་ལས་རབ་འབྱམས་ཡོངས་སུ་གྲུབ༔ རང་སྲོག་སྙིང་པོ་ལས་ནི་འོད་འཕྲོས་པས༔ ཡེ་ཤེས་དང་ནི་འཇིག་རྟེན་ལས་གྲུབ་པའི༔ བཀའ་སྲུང་དྲེགས་པའི་ཚོགས་རྣམས་ཐམས་ཅད་དང་༔ ཁྱད་པར་ལྷ་ཆེན་ཚོགས་བདག་ཡབ་ཡུམ་འཁོར༔ དམ་ཚིག་གཉན་པོའི་མཐུ་དང་སྟོབས་ཀྱིས་བསྡུས༔ སྤྱན་དྲངས་བསྐྱེད་པའི་ལྷ་ལ་གཉིས་མེད་བསྟིམ༔ དེ་ནས་འབོད་པ་ནི༔ ཧཱུྃ་ཧྲཱིཿསུམ་ཅུ་རྩ་གསུམ་ལྷ་གནས་སུ༔ བདེ་ལྡན་དབང་གི་གཞལ་ཡས་ནས༔ སྣང་སྲིད་སྐྱེ་འགྲོ་ཡོངས་ཀྱི་བདག༔ ཚོགས་ཀྱི་བདག་པོ་གཤེགས་སུ་གསོལ༔ འཕྲུལ་དགའ་ལྷ་ཡི་གནས་མཆོག་ཏུ༔ ཏིང་འཛིན་འཕྲུལ་གྱི་ཕོ་བྲང་ནས༔ འདོད་པའི་རྒྱལ་པོ་བདེ་བ་ཆེ༔ སྤྲུལ་འཁོར་དང་བཅས་གཤེགས་སུ་གསོལ༔ གཞན་འཕྲུལ་དབང་བྱེད་ལྷ་གནས་སུ༔ འདོད་ཡོན་དཔག་བསམ་ཡིད་ལས་སྐྱེས༔ དགའ་བདེ་འཕྲུལ་གྱི་བདག་པོ་སྟེ༔ དབང་ཕྱུག་ཆེན་པོ་གཤེགས་སུ་གསོལ༔ སྣང་སྲིད་དབང་ཕྱུག་འདོད་པའི་རྒྱལ༔ ལྷ་དང་ནོར་སྲུང་དཔལ་མགོན་ཚོགས༔ ཐམས་ཅད་ཐམས་ཅད་ཁྱོད་ལ་འདུད༔ སྔོན་ཚེ་སྤྱི་དཔལ་ཆེན་པོ་དང་༔ གསང་བདག་ཕྱག་རྡོར་པད་འབྱུང་སོགས༔ དུས་གསུམ་རྒྱལ་བ་སྲས་བཅས་ཀྱིས༔ དམ་ཚིག་གཉན་པོ་དེ་ཡིས་འབོད༔ མ་ཐོགས་མྱུར་དུ་གཤེགས་སུ་གསོལ༔ བདག་ནི་རྣལ་འབྱོར་སྒྲུབ་པ་པོས༔ དམ་ཚིག་དཔང་དུ་བཞག་ནས་སུ༔ གླུ་དབྱངས་རོལ་མོའི་སྒྲ་ཡིས་འབོད༔ སྐད་ཅིག་ཉིད་དུ་གཤེགས་སུ་གསོལ༔ ཨོཾ་མ་ཧཱ་དཱེ་ཝ་ལོ་ཀི་ཤྭ་ར་ག་ཎ་པ་ཏི་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛཿདེ་ནས་བརྟན་བཞུགས་གསོལ་བ་ནི༔ ཧྲཱིཿདྲང་སྲོང་ལྷ་ཡི་བླ་མ་འཁོར་དང་བཅས༔ འདོད་རྒུའི་དཔལ་ཡོན་འབྱུང་བའི་གནས་སུ་བརྟན༔ མི་འབྲལ་བརྟེན་པའི་རྫས་ལ་བརྟན་བཞུགས་ནས༔ དཔག་བསམ་ཤིང་དང་ནོར་བུ་འདོད་འཇོ་བཞིན༔ འཛད་མེད་དངོས་གྲུབ་སྣ་ཚོགས་རྟག་ཏུ་སྩོལ༔ སྣང་སྲིད་སྐྱེ་འགྲོ་དབང་སྡུད་བྲན་དུ་ཁོལ༔ མི་འབྲལ་བྱམས་བརྩེ་སྲུང་སྐྱོབས་མཛད་བཞུགས་གསོལ༔ ག་ཎ་པ་ཏི་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧྲཱིཿསྲིད་གསུམ་དབང་ཕྱུག་ཆེན་པོ་ཚོགས་ཀྱི་བདག༔ ལེགས་ལྡན་འདོད་རྒྱལ་ཡབ་ཡུམ་སྲས་འཁོར་ལ༔ བདག་གི་ཅི་འདོད་བསམ་བཞིན་འགྲུབ་པ་དང་༔ སངས་རྒྱས་བསྟན་པ་བསྲུང་ཕྱིར་ཕྱག་འཚལ་ལོ༔ དེ་ནས་མཆོད་པ་འབུལ་བ་ནི༔ ཧྲཱིཿདངོས་འབྱོར་ཡིད་ཀྱིས་རྣམ་སྤྲུལ་པའི༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟ་ག་ཎ་ཚོགས༔ ཚོགས་ཀྱི་བདག་པོ་མཉེས་ཕྱིར་འབུལ༔ དར་ཟབ་ཟ་འོག་གཅན་གཟན་དང་༔ གསེར་དངུལ་ཟངས་ལྕགས་ནོར་བུ་དང་༔ གཟུགས་འགྲོས་རྣམ་པ་སྣ་ཚོགས་དང་༔ བླ་རྡོ་རྟེན་གཏོར་ཆེན་པོ་སོགས༔ ཚོགས་ཀྱི་བདག་པོ་དགྱེས་ཕྱིར་འབུལ༔ ཕྱེ་མར་ཟས་སྣ་སྣ་ཚོགས་དང་༔ དཀར་གསུམ་མངར་གསུམ་གཏོར་མ་དང་༔ ཇ་ཆང་གསེར་སྐྱེམས་ལ་སོགས་པ༔ བཟའ་བཅའ་བཏུང་བ་ལྡག་གཞིབ་ཟས༔ ཚོགས་ཀྱི་བདག་པོ་མཉེས་ཕྱིར་འབུལ༔ གཞན་ཡང་མཐུན་རྫས་སྒྲུབ་རྫས་དང་༔ བརྟེན་རྫས་མཆོད་རྫས་བསྐང་རྫས་སོགས༔ མ་ཚང་མེད་པའི་ལོངས་སྤྱོད་ཚོགས༔ ཚོགས་བདག་འཁོར་དང་བཅས་ལ་འབུལ༔ སྐད་ཅིག་མི་འབྲལ་གྲོགས་མཛད་ལ༔ འདོད་རྒུའི་དཔལ་ཡོན་ཕུན་ཚོགས་མཛོད༔ མ་ཧཱ་དཱེ་ཝ་ལོ་ཀི་ཤྭ་ར་ག་ཎ་པ་ཏི་སརྦ་ས་པ་རི་ཝཱ་ར་ཨརྒྷཾ་ནས་ཤཔྟ་རཱུ་པ་སོགས་མ་ཧཱ་པཉྩ་རཀྟ་བ་ལིང་ཏ་ག་ཎ་ཙཀྲ་པཱུ་ཛ་ཧོཿདེ་ནས་བསྟོད་པ་ནི༔ ཧྲཱིཿཐུགས་རྗེའི་གཏེར་ཆེན་མགོན་པོ་སྤྱན་རས་གཟིགས༔ གང་འདུལ་ཐབས་མཁས་སྤྲུལ་བསྒྱུར་རོལ་པ་ལས༔ ཁམས་གསུམ་དབང་མཛད་བདག་པོའི་སྐུར་བཞེངས་པ༔ དྲང་སྲོང་ལྷ་ཡི་བླ་མ་ཁྱོད་ལ་བསྟོད༔ སྲིད་རྩེ་མི་གཡོ་ཏིང་འཛིན་དབང་པོ་ཆེ༔ གཟུགས་ཁམས་དགའ་བདེའི་རོལ་པ་འཕྲུལ་གྱི་བདག༔ འདོད་ཁམས་འདོད་པའི་རྒྱལ་པོ་བདེ་བ་ཆེ༔ ཁམས་གསུམ་དབང་ཕྱུག་ཁྱོད་ལ་ཕྱག་འཚལ་བསྟོད༔ སྲིད་པ་ལེགས་ཉེས་ཀུན་གྱི་བྱེད་པོ་ཆེ༔ དབང་གི་ཁ་ཏོག་འབར་བའི་གཟི་འོད་ཀྱིས༔ ལྷར་བཅས་སྐྱེ་རྒུའི་བློ་དང་ཡིད་འཕྲོག་ཅིང་༔ ཁྱུ་མཆོག་རབ་གཞོན་གླང་པོའི་གདོང་ངོམས་པ༔ ཁམས་གསུམ་ཁུར་དུ་བོར་ཞིང་སྟོབས་ཀྱིས་བསྒྱུར༔ ཐུགས་རྗེའི་གཏེར་ཆེན་ཟླ་བ་ནོར་བུའི་ཐོད༔ གདུལ་བྱའི་ཁམས་སུ་ཡེ་ཤེས་གསལ་མདངས་ངོམས༔ སྣང་བ་དབང་དུ་བསྡུས་པའི་ལྕགས་ཀྱུ་ཡིས༔ སྲིད་གསུམ་བློ་ཡིད་འགུགས་ཤིང་ཁ་ལོ་བསྒྱུར༔ ཐམས་ཅད་བྲན་དུ་བཅིངས་པའི་ཞགས་པ་ཡིས༔ ཁམས་གསུམ་མ་ལུས་ཡོངས་ལ་མངའ་དབང་བསྒྱུར༔ དགོས་འདོད་ཡིད་བཞིན་འབྱུང་བའི་གཏེར་བུམ་འཆང་༔ སྒྲུབ་ལ་དངོས་གྲུབ་འབད་མེད་རྒྱུན་སྩོལ་མཛོད༔ ཆགས་བདེ་རྒྱས་པའི་གོས་དང་རྒྱན་སྤང་ཞིང་༔ མཐོང་ཐོས་དྲན་རེག་དགའ་བདེའི་རོས་མྱོས་བྱེད༔ འདོད་པའི་རྒྱལ་པོ་བདེ་དྲོད་ཟིལ་པ་འཁྲིགས༔ གཟི་བྱིན་རླབས་ཀྱིས་ཐམས་ཅད་དམ་ལ་འདུད༔ ཆགས་པའི་རྡོ་རྗེ་མཁའ་ལ་བསྒྲེང་བ་ཡིས༔ ཤེས་རབ་ཨུ་མའི་བདེ་ཆེན་ཀློང་ནས་གཡོ༔ སྲིད་ཞིའི་བདེ་བ་མཁའ་རུ་སྡུད་པ་ལས༔ ཟག་མེད་བདེ་བའི་རོ་ལ་རོལ་བ་པོ༔ འགྲན་བྲལ་ཚོགས་ཀྱི་བདག་པོ་ཁྱོད་ལ་བསྟོད༔ ཁྱོད་ཀྱི་འདོད་བདེ་གཡོ་བའི་རྩལ་དང་ཤུགས༔ འགུགས་འཆིང་སྡོམ་མྱོས་ལས་ཀྱི་ཕོ་ཉར་ཤར༔ མ་ངེས་སྣ་ཚོགས་བསྒྱུར་བའི་རྫུ་འཕྲུལ་ལས༔ དཔལ་མགོན་དྲེགས་པ་འཁོར་གྱི་རོལ་པར་ཤར༔ ལྷ་ཆེན་གར་གྱི་དབང་ཕྱུག་ཁྱོད་ལ་བསྟོད༔ བདག་གིས་ཁྱོད་བསྒྲུབ་བསྟོད་པའི་ཡོན་ཏན་གྱིས༔ སངས་རྒྱས་བསྟན་དང་བསྟན་འཛིན་སྡེ་སྐྱོངས་ལ༔ ལོག་འདྲེན་དགྲ་བགེགས་རྩད་ནས་གཅོད་པ་དང་༔ བདག་གི་འདོད་དོན་མ་ལུས་ཡོངས་འགྲུབ་མཛོད༔ དེ་ནས་འཛབ་དམིགས་ནི༔ ལྷ་ཆེན་ཚོགས་ཀྱི་བདག་པོའི་ཐུགས་ཀར་ཟླ་ཕྱེད་ཀྱི་སྟེང་དུ་ཡིད་བཞིན་གྱི་ནོར་བུ་དབང་གི་རྒྱལ་པོའི་ནང་ཁོངས་སུ་ཐུགས་སྲོག་ཧྲཱིཿཡིག་དམར་པོ་དང་༔ ཡུམ་གྱི་ཐུགས་ཀར་ཉི་མའི་གདན་ལ་ཡི་གེ་ཧྲཱིཿཡིག་དམར་པོ༔ འཁོར་རྣམས་ཀྱི་ཐུགས་ཀར་རང་རང་རིགས་ཀྱི་སྲོག་ཡིག་ཕྲ་མོའི་མཐར་དེ་དག་གི་གསང་སྔགས་རིག་སྔགས་གཟུངས་སྔགས་ཐམས་ཅད་སྔགས་འདི་ཁོ་ནར་གྱུར་ཏེ་འཁོར་བར་བསམ༔ བཟླས་པ་ཙམ་གྱིས་དམ་ཚིག་གཉན་གྱི་སྲོག་ཐོབ་སྟེ་མི་འབྲལ་གྲོགས་སུ་འཁོར་ཞིང་ཕྲིན་ལས་རབ་འབྱམས་ཐམས་ཅད་ཐོགས་མེད་བསྒྲུབ་པར་བསམ༔ ཨོཾ་མ་ཧཱ་དཱེ་ཝ་ལོ་ཀི་ཤྭ་ར་ག་ཎ་པ་ཏི་ས་མ་ཡ་ཧྲཱིཾ་ཛཿདེ་ཡིས་འབོད་པ་གནད་དུ་བསྣུན༔ སྒྲུབ་པ་ལས་སྦྱོར་གབ་བྱང་ལྟར༔ ལྷ་ཆེན་ཚོགས་ཀྱི་བདག་པོ་ཡི༔ སྒྲུབ་པ་ཀུན་གྱི་ཡང་སྙིང་འདི༔ འབོད་དང་བསྙེན་སྒྲུབ་ལས་སྦྱོར་གྱིས༔ གནད་བསྣུན་གང་གིས་བསྒྲུབ་གྱུར་ཀྱང་༔ སྐྱེས་པའམ་ནི་བུད་མེད་ཀྱི༔ གཟུགས་སུ་སྤྲུལ་ནས་ཞལ་སྟོན་ཅིང་༔ ཕྲིན་ལས་བསྒྲུབ་པར་གདོད་མི་ཟ༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་རང་སློབ་དམ་པ་ཧོར་གྱི་བླ་མ་ཚོགས་མཆོག་གིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཤོག་སེར་ལས་དག་པར་ཕབ་པའི་ཡི་གེ་པ་ནི་ཡོངས་གྲུབ་རིག་པའི་རྡོ་རྗེའོ།།དགེའོ།།དགེའོ།།དགེའོ།།།།