TTDL-ZABTER-10-THA-041

Previous Text Back to Volume PageNext Text

Wylie title	chos nyid nam mkha'i klong mdzod las: mkha' 'gro 'dus pa'i dur gcod rdo rje'i khong gseng gi lam bzang:
Location	bdud 'joms gling pa zab gter Volume 10, Text 41, Pages 327-335 (Folios 1a1 to 5a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las mkha' 'gro 'dus pa'i dur gcod rdo rje'i khong gseng gi lam bzang. In Sprul pa'i gter chen bdud 'joms gling pa'i zab gter gsang ba'i chos sde, Vol. 10: 327-335. Thimphu, Bhutan: Lama Kuenzang Wangdue, 2004.
Side notes	Recto: dur gcod   Verso: bdud 'joms khros ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Severance Texts - gcod gzhung
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	khros ma nag mo
Colophon	ཞེས་པ་འདི་ཡང་འཁོར་འདས་འུབ་ཆུབ་རོལ་པའི་རྣལ་འབྱོར་པ་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་པདྨ་བཀྲ་ཤིས་སོ།།
	zhes pa 'di yang 'khor 'das 'ub chub rol pa'i rnal 'byor pa bdud 'joms rdo rjes chos nyid nam mkha'i klong mdzod las zhal bshus te dag par phab pa'i yi ge pa ni pad+ma bkra shis so//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ མཁའ་འགྲོ་འདུས་པའི་དུར་གཅོད་རྡོ་རྗེའི་ཁོང་གསེང་གི་ལམ་བཟང་ཞེས་བྱ་བ་བཞུགས་སོ༔

ཕྚ༔ (བརྡ་ཡིག་) ན་མོ་གུ་རུ་པདྨ་ཀ་ར་ཡེ༔ མཁའ་འགྲོ་འདུས་པའི་གསེང་ལམ་ལ༔ དང་པོ་བགེགས་བསྐྲད་སྲུང་འཁོར་བསྒོམ༔ ཁྲུས་ཀྱིས་སྦྱངས་ཏེ་སྐྱབས་སོང་ནས༔ འགྲོ་བའི་དོན་དུ་བྱང་སེམས་བསྐྱེད༔ ཕཊ༔ ཁྱོད་ལུས་རྡོ་རྗེ་རྣལ་འབྱོར་མ༔ དཀར་གསལ་གྲི་གུག་ཐོད་ཁྲག་བསྣམས༔ པད་ཉིའི་གནད་ལ་གར་སྟབས་རོལ༔ གཅེར་བུ་པད་དཀར་ཕྲེང་བས་བརྒྱན༔ འཇའ་ཚོན་འོད་ལྔའི་ཀློང་དུ་གསལ༔ ལུས་ནང་ཨ་ཝ་དྷུ་ཏི་ནི༔ དཀར་འཇམ་ཁོག་པ་སྟོང་པར་གསལ༔ མར་སྣ་བདེ་སྐྱོང་འཁོར་ལོར་འགགས༔ ཡར་སྣ་ཚངས་པའི་བུ་གར་ཕྱེས༔ གསང་བར་ལས་ཀྱི་མཁའ་འགྲོ་ལྗང་༔ ལྟེ་བར་རིན་ཆེན་མཁའ་འགྲོ་སེར༔ སྙིང་གར་རྡོ་རྗེ་མཁའ་འགྲོ་མཐིང་༔ མགྲིན་པར་པདྨ་མཁའ་འགྲོ་དམར༔ སྤྱི་བོར་སངས་རྒྱས་མཁའ་འགྲོ་དཀར༔ གཙུག་ཏོར་འཁོར་ལོར་ཁྲོས་མ་ནག༔ གཙུག་རྒྱན་རྡོ་རྗེ་ཕག་མོ་དམར༔ རིགས་བདག་ཀུན་ཏུ་བཟང་མོ་མཐིང་༔ རིགས་ལྔ་ཡེ་ཤེས་མཁའ་འགྲོ་ལྔའི༔ ཕྱག་ན་གྲི་ཐོད་ཁ་ཊྭཱྃ་ཀ༔ གཅེར་བུ་གར་སྟབས་མཚན་དཔེས་སྤྲས༔ བདེ་སྐྱོང་འཁོར་ལོའི་མར་འོག་ཏུ༔ པདྨ་འདབ་བརྒྱད་གྱེས་པའི་སྟེང་༔ རྣམ་ཤེས་ངོ་བོ་ཐིག་ལེ་ནི༔ དཀར་དམར་མདངས་ལྡན་མཐེ་བོང་ཙམ༔ འོད་ཀྱིས་བླ་ཡིད་སེམས་གསུམ་བཅས༔ ཁབ་ལེན་རྡོ་དང་ལྕགས་འཕྲད་བཞིན༔ བསྡུས་ཏེ་དྭངས་མའི་ཐིག་ལེར་ཐིམ༔ རང་ཉིད་ཡེ་ཤེས་མཁའ་འགྲོ་མའི༔ སྣ་བུག་གཉིས་ནས་ཡེ་ཤེས་རླུང་༔ ཁ་དོག་ལྗང་སེར་རབ་འཕྲོས་པས༔ གདན་འོག་ནས་བཏེགས་དབང་མེད་སྤར༔ མཁའ་འགྲོ་ལྔ་ཡི་ཐུགས་དང་འདྲེས༔ སྐུ་གསུམ་མཁའ་འགྲོའི་དགོངས་ཀློང་རྡོལ༔ ཀུན་ཏུ་བཟང་མོའི་བྷ་གར་སངས༔ ཕཊ་སྒྲ་བརྒྱད་ཀྱིས་སྐྱེ་མེད་ངང་༔ མཉམ་པར་བཞག་ཅིང་སླར་ཡང་འདི༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ ཀུན་བཟང་རྡོར་འཆང་དགའ་རབ་རྗེ༔ ཤྲཱི་སེང་པད་འབྱུང་བི་མ་ལ༔ བླ་མ་རྣམས་ལ་གསོལ་བ་འདེབས༔ ཟབ་ལམ་འཕོ་བའི་ཆོས་སྒོ་ཕྱེས༔ རྣམ་ཤེས་དག་པའི་ཞིང་དུ་དྲོངས༔ ཕཊ་སྒྲ་བརྒྱད་ཀྱིས་ཡང་ཡང་སྤར༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ ཆོས་སྐུ་དབྱིངས་ཀྱི་ཡུམ་ཆེན་མོ༔ ལོངས་སྐུ་རྡོ་རྗེ་ཕག་མོའི་ཞལ༔ སྤྲུལ་སྐུ་ཁྲོས་མ་ནག་མོ་ལ༔ གསོལ་བ་འདེབས་སོ་ཐུགས་རྗེས་བཟུང་༔ ཟབ་ལམ་འཕོ་བའི་ཆོས་སྒོ་ཕྱེས༔ རྣམ་ཤེས་དག་པའི་ཞིང་དུ་དྲོངས༔ ཕཊ་སྒྲ་བརྒྱད་ཀྱིས་ཡང་ཡང་སྤར༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ སངས་རྒྱས་མཁའ་འགྲོ་མུན་སེལ་མ༔ པདྨ་མཁའ་འགྲོ་ཆགས་བྲལ་བ༔ རྡོ་རྗེ་མཁའ་འགྲོ་རྟོགས་གྲོལ་རྒྱས༔ རིན་ཆེན་མཁའ་འགྲོ་ཡོན་ཏན་བདག༔ ལས་ཀྱི་མཁའ་འགྲོ་དོན་གྲུབ་མ༔ མ་ཡུམ་ཆེན་ལྔ་ལ་གསོལ་བ་འདེབས༔ ཟབ་ལམ་འཕོ་བའི་ཆོས་སྒོ་ཕྱེས༔ རྣམ་ཤེས་དག་པའི་ཞིང་དུ་སྤོར༔ ཕཊ་སྒྲ་བརྒྱད་ཀྱིས་ཡང་ཡང་སྤར༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ ལས་ཀྱི་རིགས་ཀྱི་མཁའ་འགྲོ་ལ༔ འདུ་བྱེད་ཕུང་པོ་ཡོན་དུ་འབུལ༔ ཕྲག་དོག་འཁྲུལ་འཁོར་དབྱིངས་སུ་སྒྲོལ༔ བྱ་གྲུབ་ཡེ་ཤེས་ཀློང་དུ་སྤོར༔ དོན་གྲུབ་རྒྱལ་པོའི་སྲས་སུ་ཟུངས༔ ཕཊ༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ རིན་ཆེན་རིགས་ཀྱི་མཁའ་འགྲོ་ལ༔ ཚོར་བའི་ཕུང་པོ་ཡོན་དུ་འབུལ༔ ང་རྒྱལ་ཉོན་འཁྲུལ་འཁོར་ལོ་ཤིག༔ མཉམ་ཉིད་ཡེ་ཤེས་དབྱིངས་སུ་སྤོར༔ རིན་ཆེན་འབྱུང་ལྡན་སྲས་སུ་ཟུངས༔ ཕཊ༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ རྡོ་རྗེ་རིགས་ཀྱི་མཁའ་འགྲོ་ལ༔ རྣམ་ཤེས་ཕུང་པོ་ཡོན་དུ་འབུལ༔ ཞེ་སྡང་འཁྲུལ་འཁོར་དབྱིངས་སུ་ཟློག༔ མེ་ལོང་ཡེ་ཤེས་ཀློང་དུ་སྤོར༔ མི་བསྐྱོད་རྡོ་རྗེའི་སྲས་སུ་ཟུངས༔ ཕཊ༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ པདྨ་རིགས་ཀྱི་མཁའ་འགྲོ་ལ༔ འདུ་ཤེས་ཕུང་པོ་ཡོན་དུ་འབུལ༔ འདོད་ཆགས་ཉོན་འཁྲུལ་དབྱིངས་སུ་སྒྲོལ༔ སོར་རྟོག་ཡེ་ཤེས་ཀློང་དུ་སྤོར༔ སྣང་བ་མཐའ་ཡས་སྲས་སུ་ཟུངས༔ ཕཊ༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ སངས་རྒྱས་རིགས་ཀྱི་མཁའ་འགྲོ་ལ༔ གཟུགས་ཀྱི་ཕུང་པོ་ཡོན་དུ་འབུལ༔ གཏི་མུག་འཁྲུལ་འཁོར་དབྱིངས་སུ་སྒྲོལ༔ ཆོས་དབྱིངས་ཡེ་ཤེས་ཀློང་དུ་སྤོར༔ རྣམ་པར་སྣང་མཛད་སྲས་སུ་ཟུངས༔ ཕཊ༔ ཀྱཻ༔ ཁྱབ་བདག་སྤྱི་དཔལ་བླ་མ་མཁྱེན༔ སྐུ་གསུམ་ཡེ་ཤེས་མཁའ་འགྲོ་ལ༔ ཚེ་འདས་སྒོ་གསུམ་ཡོན་དུ་འབུལ༔ ཁམས་གསུམ་འཁོར་བའི་འཁྲུལ་འཁོར་ཤིག༔ སྐུ་གསུམ་ལྷུན་གྲུབ་ཀློང་དུ་སྤོར༔ ཀུན་ཏུ་བཟང་མོའི་སྲས་སུ་ཟུངས༔ བདེ་ཆེན་འགྱུར་མེད་ས་ཐོབ་ཤོག༔ ཕཊ་ཕཊ་ཕཊ༔ མཐར་ནི་བམ་རོ་མཆོད་སྦྱིན་བྱ༔ ཁྱད་པར་དམར་འགྱེད་བྱ་བ་ལ༔ ཕཊ་ཕཊ་ཕཊ༔ ལྷ་ཡི་རྒྱལ་པོ་གཡག་དཀར་ཞོན༔ སྡེ་ཚོགས་བྱེ་བ་འབུམ་དང་བཅས༔ དངུལ་སྒ་དུང་ཁྲབ་ལམས་སེ་ལམ༔ ཤ་ཁྲག་རུས་ཀླད་ལེན་དུ་ཤོག༔ ཕཊ་ཕཊ་ཕཊ༔ གཤིན་རྗེའི་རྒྱལ་པོ་མ་ཧེ་ཆིབས༔ སྡེ་ཚོགས་བྱེ་བ་འབུམ་དང་བཅས༔ ལྕགས་ཁྲབ་ལྕགས་སྒ་ལམས་སེ་ལམ༔ ཤ་ཁྲག་དམར་འགྱེད་ལེན་དུ་ཤོག༔ ཕཊ་ཕཊ་ཕཊ༔ མ་མོའི་རྒྱལ་པོ་འབྲུག་ལ་ཞོན༔ སྡེ་ཚོགས་བྱེ་བ་འབུམ་དང་བཅས༔ མི་མགོའི་སྒ་དང་མི་ལྤགས་གོས༔ ཁྱེད་ཅག་ཤ་ཁྲག་མགྲོན་ལ་ཤོག༔ ཕཊ་ཕཊ་ཕཊ༔ བདུད་རྒྱལ་ནག་པོ་རྟ་ནག་ཆིབས༔ གནམ་ལྕགས་སྒ་སྲབ་ཁྲབ་རྨོག་ཅན༔ སྡེ་ཚོགས་བྱེ་བ་འབུམ་དང་བཅས༔ ཤ་ཁྲག་སྟོན་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ སྲིན་རྒྱལ་མི་སེར་རྟ་སེར་ཅན༔ གསེར་ཁྲབ་གསེར་སྒ་ལྷངས་སེ་ལྷང་༔ སྡེ་ཚོགས་བྱེ་བ་འབུམ་དང་བཅས༔ ཤ་ཁྲག་སྟོན་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ བཙན་རྒྱལ་མི་དམར་རྟ་དམར་ཅན༔ ཟངས་ཁྲབ་ཟངས་སྒ་ཁྲབ་རྨོག་བགོས༔ སྡེ་ཚོགས་བྱེ་བ་འབུམ་དང་བཅས༔ ཤ་ཁྲག་སྟོན་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ གནོད་སྦྱིན་རྒྱལ་པོ་སྟག་ལ་ཆིབས༔ ཟངས་ཀྱི་སྒ་སྲབ་ཝངས་སེ་ཝང་༔ སྡེ་ཚོགས་བྱེ་བ་འབུམ་དང་བཅས༔ ཤ་ཁྲག་དམར་གཡོས་མགྲོན་ལ་ཤོག༔ ཕཊ་ཕཊ་ཕཊ༔ ཀླུ་རྒྱལ་མི་སྔོན་ཆུ་སྲིན་ཞོན༔ གཡུ་དང་སྦྲུལ་གྱི་སྒ་ཆ་ཅན༔ སྡེ་འཁོར་བྱེ་བ་འབུམ་དང་བཅས༔ ཤ་ཁྲག་སྟོན་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ རྒྱལ་པོ་པེ་ཧར་སེང་གི་ཆིབས༔ གསེར་གྱི་སྒ་སྲབ་ལམས་སེ་ལམ༔ སྡེ་འཁོར་བྱེ་བ་འབུམ་དང་བཅས༔ ཤ་ཁྲག་དམར་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ གཟའ་བདུད་རྟ་ནི་མོག་པ་ཞོན༔ ཆུ་སྲིན་སྒ་ཆ་འཇིགས་པ་ཅན༔ སྡེ་འཁོར་བྱེ་བ་འབུམ་དང་བཅས༔ ཤ་ཁྲག་དམར་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ རྡོ་རྗེ་ལེགས་པ་སེང་གེ་ཆིབས༔ ཟངས་ལྕགས་འདྲེས་མའི་སྒ་ཆ་ཅན༔ སྡེ་འཁོར་བྱེ་བ་འབུམ་དང་བཅས༔ ཤ་ཁྲག་དམར་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ ཕོ་གདོན་རྒྱལ་འགོང་ཐམས་ཅད་ནི༔ བླ་བཙུན་ཆས་ཅན་ཆོས་གོས་དམར༔ བར་སྣང་ཐམས་ཅད་དམར་ཐིབས་ཁེངས༔ ཤ་ཁྲག་དམར་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ མོ་གདོན་འདྲེ་མོའི་སྡེ་ཚོགས་ནི༔ བུད་མེད་ནག་མོ་ཉམས་པའི་ཆས༔ ས་གཞི་བཤུག་སྒྲ་ཤུགས་ཀྱིས་ཁེངས༔ ཤ་ཁྲག་དམར་འགྱེད་མགྲོན་ལ་ཤོག༔ ཕཊ་ཕཊ་ཕཊ༔ སྣང་སྲིད་ལྷ་འདྲེ་ཕོ་མོའི་ཚོགས༔ ནམ་མཁར་སྐར་ལྟར་བཀྲ་ཞིང་ཤོག༔ བར་སྣང་སྤྲིན་ལྟར་འཐིབ་ལ་ཤོག༔ ས་གཞིར་རླུང་ལྟར་འཚུབས་ཤིང་ཤོག༔ ཞི་ཞིང་དུལ་བའི་སེམས་ཀྱིས་ཤོག༔ ཅ་ཅོ་བཤུགས་སྒྲ་དིར་དིར་ཤོག༔ ཤ་ལ་དགའ་བས་ཤ་ལ་ཟོ༔ ཁྲག་ལ་རྔམས་པས་ཁྲག་ལ་རོལ༔ རྐང་རུས་འདོད་པས་རྐང་རུས་རོལ༔ ལྷག་མ་མེད་པར་སྦྱིན་གྱི་ཁྱེར༔ རྗེས་ཤུལ་ཙམ་ཡང་མ་བཞག་ཅིག༔ ཕཊ་ཕཊ་ཕཊ༔ ས་མ་ཡ༔ འགྱེད་དམིགས་བསྡུ་བསྐྲད་གཞན་ལས་ཤེས༔ སྦྱངས་པ་སྔོན་སོང་རྣལ་འབྱོར་གྱིས༔ གཞན་རྗེས་བཟུང་བ་འདིར་བརྩོན་བྱ༔ སྡིག་ཅན་བཙན་ཐབས་གཟུད་པའི་ཐབས༔ ནམ་མཁའ་གོ་འབྱེད་འདི་བསྔགས་སོ༔ བསྐྱེད་དང་རྫོགས་པའི་རིམ་པ་གནད༔ བཟླས་བརྗོད་ཁ་འབྱམས་ཡང་མ་ཡིན༔ གོ་དོན་འཛོལ་དུ་མ་ཤོར་རེམ༔ གཟའ་བདུད་ཀླུ་བཙན་མ་གཤིན་གྱིས༔ སྲུངས་ཤིག་བཛྲ་ས་མ་ཡ༔ དམ་ཉམས་བཀའ་ལོག་སྙིང་ཁྲག་རོལ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ བརྡ་ཐིམ༔ ཞེས་པ་འདི་ཡང་འཁོར་འདས་འུབ་ཆུབ་རོལ་པའི་རྣལ་འབྱོར་པ་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་པདྨ་བཀྲ་ཤིས་སོ།། །།