TTDL-ZABTER-11-DA-035

Previous Text Back to Volume PageNext Text

Wylie title	gnyan khrod brgya rtsa'i zin bris
Location	bdud 'joms gling pa zab gter Volume 11, Text 35, Pages 499-501 (Folios 1a1 to 2a5)
Author	བདུད་འཇོམས་གཏེར་སྲས་དྲི་མེད་འོད་ཟེར་
Citation	Bdud 'joms gter sras dri med 'od zer. Gnyan khrod brgya rtsa'i zin bris. In Sprul pa'i gter chen bdud 'joms gling pa'i zab gter gsang ba'i chos sde, Vol. 11: 499-501. Thimphu, Bhutan: Lama Kuenzang Wangdue, 2004.
Side notes	Recto: gnyan zin   Verso: bdud 'joms khros ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Notes - zin bris
Deity	khros ma nag mo
Colophon	།དེ་ལྟར་བདུད་གཅོད་ཟབ་མོ་ལ་བརྟེན་ནས། །གཉན་ཁྲོད་བརྒྱ་རྩ་འགྲིམ་པའི་ཞལ་ཤེས་རྒྱུན། །མི་ཉམས་ཕྱིར་དུ་འདི་ལྟར་བྲི་དགོས་ཞེས། །རྡོ་རྗེའི་མཆེད་པོ་དུ་མའི་བཀས་བསྐུལ་ངོར། །རྨོངས་བླུན་བྷུ་སུ་ཀུ་པ་དྲི་མེད་པས། །ལྷག་བསམ་དག་པས་བྲིས་པའི་དགེ་བ་ཡིས། །འགྲོ་ཀུན་ཡུམ་ཆེན་གོ་འཕང་ཐོབ་པར་ཤོག། དགེའོ།།
	de ltar bdud gcod zab mo la brten nas/__/gnyan khrod brgya rtsa 'grim pa'i zhal shes rgyun/__/mi nyams phyir du 'di ltar bri dgos zhes/__/rdo rje'i mched po du ma'i bkas bskul ngor/__/rmongs blun b+hu su ku pa dri med pas/__/lhag bsam dag pas bris pa'i dge ba yis/__/'gro kun yum chen go 'phang thob par shog/__dge'o//

Tibetan Text

[edit]

༄༅། །བླ་མ་ལ་ཕྱག་འཚལ་ལོ། །མ་ཅིག་ཁྲོས་མ་ནག་མོའི་དཀྱིལ་འཁོར་དུ་དབང་བསྐུར་ལེགས་པར་ནོད་ནས། ཁྲོས་མའི་ནང་མཚམས་ཚུལ་བཞིན་དུ་གྲུབ་མཐར། གཉན་ཁྲོད་བརྒྱ་རྩ་འགྲིམ་པ་ལ། སྒོ་ཐེམ་མཚམས་སུ་ཞག་གསུམ། མིག་མཐོང་གང་དུ་སྔ་ཚད་རྫོགས་པར་བསྡད་འཕྲལ། འགྲོ་ཆས་རྣམས་ཚོགས་བྱས་ལ། བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་འགྲོ་བས་འགྲོ་ལུགས་རྣམ་བཞིའི་སྒོ་ནས་འགྲོ། གཉན་སའི་འགོ་བོ་མཐོང་ཚེ་སྔ་ནོན་དང་པོ་འཕེན། དེ་ནས་གཉན་མིག་ཏུ་སླེབས་པ་དང་མཉམ་དུ་གཡང་གཞི་བརྡབ་ཆོགསྔོན་དུ་འགྲོ་བས། ཟིལ་གནོན་གཉིས་པ་བྲོ་ར་ཕུར་ཁྱེར་དང་བཅས་པ་སོང་འཕྲལ། ཐུན་ཆུང་གཅིག་བཟུང་། ཕྱོགས་ནས་ས་བླངས་ཏེ་ཐབ་ཁ་བཙུགས། མེ་གཏོང་། ཇ་བཞེས་འཕྲལ། ཁྲོས་མའི་དཀྱིལ་འཁོར་གྲུབ་པར་བྱས་ཏེ། སྔོན་འགྲོ་ནས་བཟུང་ཆོས་སྤྱོད་རྒྱུན་སྲོལ་ལྟར་འདོན། མཆོད་རྫས་བྱིན་རླབས། སྐྱབས་ཡུལ་བསྐྱེད་པ། ལས་བྱང་བསྙེན་པ་སྒྲུབ་པ་ལས་སྦྱོར་མཆོད་བསྟོད་དགེ་བསྔོས་བཅས་གྲུབ་འཕྲལ། གསོལ་ཁ། བཤགས་པ་ཆེ་ཆུང་གང་རུང་རྫས་བསྐང་། དམ་ཚིག་ཉམས་ཆག་སོགས། བྱང་ཆུབ་ཤོག༔ ཚོགས་ཆུང་བཅུ། བཤགས་ཆུང་གང་རུང་གི་མཐར། ནམ་མཁའི་མཐར་ཐུག་སོགས། ཕྱིན་པར་ཤོགཚོགས་བསྐང་ཆད་བརྟན་བཀྲ་ཤིས་ཡན་སོང་མཐར། མེ་གཏོང་། ཇ་གསོལ། དམིགས་པ་དམ་བཅའ་གསལ་འདེབས་བཅས་ནན་དུ་བྱ། དམར་འགྱེད་འདོན། དེ་ནས་དམ་བཅའ་གསལ་འདེབས་བཅས་གཉིད་དུ་ཕྱོགས་ཚེ་ཤེས་བྱ་བུམ་པར་བསྡུ། ནམ་གུང་ནག་འགྱེད་མཐར། གཉིད་འོད་གསལ་དུ་སྦ། ཐོ་རངས་རླུང་རོ་དགུ་ཕྲུགས་སུ་བསལ། དཀར་འགྱེད་འདོན། ཐུན་ཆུང་གཅོད། ནམ་ལངས་པ་དང་མཉམ་དུ་མེ་གཏོང་། ཇ་གསོལ། ར་བ་བསྡུ། བཙོན་བཀྲོལ། རྟེན་བཞེངས། ཕོག་གཏད། ཐབ་ཤུལ་མི་མངོན་པར་ཕྱོགས་སུ་བསྐྱལ། གནས་བཅོལ། མིག་མཐོང་གང་ཙམ་ཕྱིན་ནས་ཁྱུང་མཚམས་བཅད། དེ་ནས་སློང་མོ་སོགས་བྱེད་དགོས་ན་དམིགས་མེད་བརྗོད་བྲལ་དུ་འཇོག་ནས་འགྲོ། །ཐག་ཉེ་སར་དུར་ཁྲོད་སོགས་སུ་འགྲོ་ན་སྔ་ནོན་འཕེན། ཞག་ཁ་ཤས་འདུག་ན་ཐུན་བཞིའམ་དྲུག་བྱ། སློང་ཚད་ཆེ་འབྲིང་ཆུང་གསུམ་གང་བྱུང་ཡང་འགྱེད་གཏོང་། རྒྱུན་དུ་མེ་མཆོད་འཛོམ་ཚེ་ལྷག་མའི་མགོར་བྱ། རྒྱུན་དུ་མ་འཛོམ་ཀྱང་། ཚེས་བརྒྱད། བཅུ། བཅོ་ལྔ། བཅོ་བརྒྱད། ཉེར་ལྔ། གནམ་སྟོང་དྲུག་ཏུ་མེ་མཆོད་རེ་གཏོང་། བརྒྱ་རྩ་ཁ་གང་ཚེ་གནས་གཅིག་ཏུ་ཞག་བདུན་བར་དུ་བསྡད་ནས། ཚོགས་སྟོང་། སྦྱིན་སྲེག་སྟོང་ལེགས་པར་བྱ་དགོས། ནད་དྲག་པོས་མནར་བ་དང་། སློང་མ་བྱུང་བ་དང་། དགྲ་སོགས་ཀྱིས་རྒོལ་བ་བྱུང་ཚེ་མཐའ་གཏད་ཟབ་མོ་བྱ་བ་ལས་གང་ཐོད་ཐོད་དུ་མི་བྱའོ། །སློང་བྱུང་ཚུལ་སོགས་གཞན་ལ་མི་སྨྲ་རེ་དོགས་མི་བྱེད་པ་གནད་ཡིན་ནོ། །རབ་ཚད་སློང་ཆོད་གསུམ་གང་རུང་མ་བྱུང་བར་དུ་སྡོད་དགོས་ཀྱང་། དེང་སང་དེ་ལྟར་བྱེད་པ་དཀའ་ཡང་ཞག་བརྒྱ་དང་བརྒྱད་དུ་འགྲོ་དགོས་ངེས་པའོ། །དེ་ལྟར་བདུད་གཅོད་ཟབ་མོ་ལ་བརྟེན་ནས། །གཉན་ཁྲོད་བརྒྱ་རྩ་འགྲིམ་པའི་ཞལ་ཤེས་རྒྱུན། །མི་ཉམས་ཕྱིར་དུ་འདི་ལྟར་བྲི་དགོས་ཞེས། །རྡོ་རྗེའི་མཆེད་པོ་དུ་མའི་བཀས་བསྐུལ་ངོར། །རྨོངས་བླུན་བྷུ་སུ་ཀུ་པ་དྲི་མེད་པས། །ལྷག་བསམ་དག་པས་བྲིས་པའི་དགེ་བ་ཡིས། །འགྲོ་ཀུན་ཡུམ་ཆེན་གོ་འཕང་ཐོབ་པར་ཤོག །དགེའོ།། །།