DJYD-KABUM-23-A-014

Previous Text Back to Volume PageNext Text

Wylie title	zab gsang mkha' 'gro'i snying thig gi yang gsang tshe sgrub dngos grub 'dod 'byung gi las byang khrigs su bsdebs pa 'chi med bdud rtsi'i za ma tog
Location	bdud 'joms rin po che bka' 'bum Volume 23, Text 14, Pages 201-253 (Folios 1a1 to 27a6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Zab gsang mkha' 'gro'i snying thig gi yang gsang tshe sgrub dngos grub 'dod 'byung gi las byang khrigs su bsdebs pa 'chi med bdud rtsi'i za ma tog. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: 201-253. Kalimpong: Dupjung Lama, 1979-1985.
Side notes	Recto: las byang   Verso: bdud 'joms tshe sgrub
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Manual - las byang
Cycle	ཚེ་སྒྲུབ་དངོས་གྲུབ་འདོད་འབྱུང་ (tshe sgrub dngos grub 'dod 'byung)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	tshe dpag med
Colophon	།དེ་ལྟར་ཟབ་གསང་མཁའ་འགྲོའི་སྙིང་ཐིག་གི་ཡང་གསང་ཚེ་སྒྲུབ་དངོས་གྲུབ་འདོད་འབྱུང་གི་ལས་བྱང་ཁྲིགས་སུ་བསྡེབས་པ་འཆི་མེད་བདུད་རྩིའི་ཟ་མ་ཏོག་ཅེས་བྱ་བ་འདིའང་། བཀའ་གསང་རྫོགས་པ་ཆེན་པོ་མཁའ་འགྲོ་སྙིང་ཐིག་གི་རིག་པ་འཛིན་པ་བླ་མ་ཚེ་དབང་ལྷ་རྒྱལ་ནས་བསྐུལ་བའི་ངོར། ཚེ་ལམ་འཛིན་པའི་སྔགས་བརྒྱུད་པ་རྒན་པོ་འཇིགས་བྲལ་ཡེ་ཤེས་རྡོ་རྗེས་རང་ལོ་བརྒྱད་ཅུ་གྱ་གཉིས་པ་ཤིང་མོ་གླང་གི་ལོ་རྒྱལ་གྱི་ཟླ་བའི་དུས་ཚེས་བཟང་པོ་ལ་ཡིད་འོང་དགའ་བ་འཁྱིལ་བའི་ལྗོངས་ཀྱི་བསྟི་གནས་ཉམས་དགའ་བར་བག་ཕེབས་པར་གནས་པའི་སྐབས་ཤིག་ཏུ་སྦྱར་བ་ལས། ཐོག་མའི་ཡི་གེ་པ་ནི་བློ་གསལ་རིན་ཆེན་ཕུན་ཚོགས་དང་། མཐའ་འདོམས་མཇུག་སྡུད་པ་ནི་མོན་གྱི་སྔགས་བན་ཀུན་བཟང་དབང་འདུས་ཀྱིས་བགྱིས་པ་སྟེ། འདིས་ཀྱང་འགྲོ་བ་རྣམས་དུས་མ་ཡིན་པའི་འཆི་བའི་འཇིགས་པ་ལས་སྐྱོབ་སྟེ་འཆི་མེད་རྟག་པ་དམ་པའི་གོ་སར་མྱུར་དུ་དབུགས་དབྱུང་བའི་རྒྱུར་གྱུར་ཅིག །སརྦ་དཱ་མངྒ་ལཾ།།
	/de ltar zab gsang mkha' 'gro'i snying thig gi yang gsang tshe sgrub dngos grub 'dod 'byung gi las byang khrigs su bsdebs pa 'chi med bdud rtsi'i za ma tog ces bya ba 'di'ang /___bka' gsang rdzogs pa chen po mkha' 'gro snying thig gi rig pa 'dzin pa bla ma tshe dbang lha rgyal nas bskul ba'i ngor/___tshe lam 'dzin pa'i sngags brgyud pa rgan po 'jigs bral ye shes rdo rjes rang lo brgyad cu gya gnyis pa shing mo glang gi lo rgyal gyi zla ba'i dus tshes bzang po la yid 'ong dga' ba 'khyil ba'i ljongs kyi bsti gnas nyams dga' bar bag phebs par gnas pa'i skabs shig tu sbyar ba las/___thog ma'i yi ge pa ni blo gsal rin chen phun tshogs dang /___mtha' 'doms mjug sdud pa ni mon gyi sngags ban kun bzang dbang 'dus kyis bgyis pa ste/___'dis kyang 'gro ba rnams dus ma yin pa'i 'chi ba'i 'jigs pa las skyob ste 'chi med rtag pa dam pa'i go sar myur du dbugs dbyung ba'i rgyur gyur cig___/sarba dA mang+ga laM//

Tibetan Text

[edit]

༄༅། །ཟབ་གསང་མཁའ་འགྲོའི་སྙིང་ཐིག་གི་ཡང་གསང་ཚེ་སྒྲུབ་དངོས་གྲུབ་འདོད་འབྱུང་གི་ལས་བྱང་ཁྲིགས་སུ་བསྡེབས་པ་འཆི་མེད་བདུད་རྩིའི་ཟ་མ་ཏོག་ཅེས་བྱ་བ་བཞུགས་སོ། །

༄༅། །ཨོཾ་ཨ་ཡུརྫྙཱ་ན་སིདྡྷི་རསྟུ། འཆི་མེད་བདུད་རྩིའི་རྒྱུན་བཟང་རབ་འཇོ་བས། །སྐལ་བཟང་སྲོག་གི་བདེ་ཆེན་ཡེ་ཤེས་ཆེ། །བསྐྱེད་མཛད་བླ་མ་ཚེ་མཐའ་ཡས་མགོན་གྱིས། །དེང་འདིར་འཆི་བདག་ལས་རྒྱལ་ཤིས་པ་སྩོལ། འཆི་མེད་རིག་འཛིན་པདྨའི་ཐུགས་ཀྱི་བཅུད། །མཁའ་འགྲོའི་སྙིང་ཐིག་མན་ངག་ལས་བྱོན་པ། །ཡང་ཟབ་ཚེ་སྒྲུབ་དངོས་གྲུབ་འདོད་འབྱུང་གི། །ལས་བྱང་འཆི་མེད་དགའ་སྟོན་འབྱེད་ལ་སྤྲོ། །དེའང་དབང་གིས་རྒྱུད་སྨིན་ཅིང་དད་པ་དང་དམ་ཚིག་རྣམ་པར་དག་པ་རྣམས་ཀྱིས་ཚུལ་འདིའི་ཉམས་ལེན་ལ་（2ན）འཇུག་པ་ན། ཉི་མ་བྱང་བགྲོད་ལྷའི་ཉིན་མོ་སོགས་ཟླ་བ་ཡར་གྱི་ངོ་དུས་ཚེས་ཤིན་ཏུ་དགེ་བའི་ཆར། གང་དུ་བསྒྲུབ་པའི་གནས་རང་དབང་དང་ལྡན་ཅིང་སྡིག་ཅན་ཉམས་གྲིབ་ཅན་གྱི་རླངས་མ་ཕོག་པ་ཤིན་ཏུ་ཉམས་དགའ་བའི་གནས་ཁང་གཙང་ཞིང་མཛེས་པར་བྱས་པའི་གུང་དུ་དམ་ཚིག་གི་བྲིས་སྐུ་བཀྲམ་པའི་མདུན་སྟེགས་གཙང་ཞིང་ཁོད་སྙོམས་པར་བརྡལ་བ་ལ་དམ་ཚིག་གི་དཀྱིལ་འཁོར་རྡུལ་ཚོན་ནམ་རས་བྲིས་ཀྱི་དཀྱིལ་འཁོར་དབུས་སུ་གཙོ་བོ་ཡབ་ཡུམ་དང་། ཕྱོགས་བཞིར་རིགས་བཞིའི་ཚེ་བདག ། གཙོ་བོའི་མདུན་དང་མཚམས་བཞིར་དམ་ཚིག་གི་མཁའ་འགྲོ་མགྱོགས་མ་ལྔ། སྒོ་བཞིར་སྒོ་སྲུང་མ་བཞི་བཅས། གཞན་སྒོ་གྲུ་རྟ་བབ་བཞི་དང་ཁོར་ཡུག་རྡོ་ར་མེ་རི་སོགས་གཞལ་ཡས་ཁང་ཞི་བའི་དཀྱིལ་འཁོར་སྤྱི་ལྟར་བྲིས་པ་ལེགས་པར་（2བ）བཀྲམ་པའམ་མ་འབྱོར་ན་མཎྜལ་ལ་འབྲུ་དཀར་དྲི་བཟང་དང་སིནྡྷུ་རས་བྲན་པས་ཚོམ་བུ་ལྷ་གྲངས་བཀོད། དེའི་དབུས་སུ་མཉྫིའི་ཁར་རིན་པོ་ཆེའི་བུམ་པ་སྐྱོན་མེད་རྒྱུན་གྱི་ཆུ་གཙང་སོ་ལྔའི་རྫས་སྦྱར་གྱིས་སུམ་གཉིས་བཀང་བ་ཁ་རྒྱན་མགུལ་ཆིངས་གཟུངས་རྡོར་བཅས་བརྟན་པོར་བཀོད། དེའི་མདུན་དུ་པད་སྣོད་ལ་མངར་གསུམ་ཆོས་སྨན་ཚེ་རྫས་ཀྱི་བྲུས་པའི་ཟན་ལས་ཚེ་འབྲང་བུམ་གཟུགས་ཁ་རྒྱན་མེ་ཏོག་ལོ་འབྲས་ཀྱིས་བརྒྱན་པ། དེའི་གཡས་སུ་ཚེ་རིལ་རིན་པོ་ཆེའི་འབུམ་པའམ་ཀ་པཱ་དུམ་བུ་གཅིག་པར་སྨན་གྱི་རྒྱལ་པོ་ཨ་བར་སྐྱུར་གསུམ། བཟང་པོ་དྲུག །འཆི་མེད་བདུད་རྩིའི་ཤིང་ལྔ་ཞེས། རི་ཤུག །བྲག་མཚེ། སུར་དཀར། འོམ་བུ། མཁན་དཀར་ལྔ་དང་། འབྲུ་ལྔའི་ཕྱེ་མངར་གསུམ་ཆང་དང་སྦྱར་བའི་ཕྱེ་ཟན་ལས་ཚེ་རིལ་ཡུངས་དཀར་འབྲུ་དགུ་གཅིག་ཏུ་དྲིལ་བའི་ཚད་ཙམ་སྐམ་ཐག་ཆོད་པ་ན་མཚལ་གྱིས་ཁ་དོག་དམར་པོར་བསྒྱུར་བས་བཀང་བ། གཡོན་དུ་ཀ་པཱ་ལའམ་རིན་པོ་ཆེའི་སྣོད་དུ་ཆང་གི་ཉིང་ཁུ་སྣ་གང་འཛོམ་མངར་གསུམ་དང་བྱང་སེམས་བདུད་རྩིའི་ཕབ་རྒྱུན་གྱིས་བྲན་པ་ཁེབས་དང་ལྡན་པ། རྒྱབ་ཏུ་ཚེ་མདའ་རྒོད་སྒྲོ་མ་ངར་ལྕགས་ཀྱི་མདེའུ་ཅན་གྱི་མགུལ་དུ་དར་ཚོན་སྣ་ལྔ་དང་། དངུལ་དཀར་གྱི་མེ་ལོང་དང་གསེར་གཡུ་བྱེ་རུ་དུང་དང་མུ་ཏིག་རྣམས་བརྒྱུས་པ་ཅན་བཏགས་པ་བཅས་པད་གདན་ནམ་སྣོད་བཟང་འབྲུ་དཀར་གྱིས་བཀང་བར་བརྟན་པོར་བཙུགས། དེ་དག་གི་མདུན་ནམ་རྒྱབ་ཕྱོགས་གང་བདེར་རྩ་བའི་མཆོད་གཏེར་དམར་ཟླུམ་པད་འདབ་ཅན་ཤིང་ལོ་མེ་ཏོག་འབྲས་（3ན）བུས་བརྒྱན་པ་དར་གདུགས་དམར་པོ་ཅན། གཡས་གཡོན་དུ་སྲུང་མ་ཕོ་རྒྱུད་མོ་རྒྱུད་གཏེར་སྲུང་གཞི་བདག་གི་མཆོད་གཏོར་རྣམས་དང་། གཡས་གཡོན་དུ་སྨན་རཀ ། དཀྱིལ་འཁོར་གྱི་བྱང་ཤར་མཚམས་འཛིན་མེ་ཏོག་ནས་བརྩམས་ཆུ་གཉིས་ཉེར་སྤྱོད་གཡས་བསྐོར་དུ་བཤམས། གཞན་ཡང་སྔོན་རྗེས་ཀྱི་གཏོར་མ། ཚོགས་གཏོར་སོགས་ཆོ་གར་དགོས་ཤིང་མཁོ་བའི་ཡོ་བྱད་རྣམས་གྲབས་སུ་ཚུད་པར་བྱས་ནས། ཆོ་ག་དངོས་ལ། སྔོན་དུ་འགྲོ་བའི་ལས་རིམ། དངོས་གཞི་ལྷ་སྔགས་ཏིང་འཛིན། རྗེས་ཀྱི་ལས་རིམ་གསུམ་གྱིས་བསྡུས་པ་ལས། དང་པོ་ལའང་རྣམ་གྲངས་བདུན་ལས། དང་པོ་སྐྱབས་སུ་འགྲོ་བ་ནི། བླ་མ་རིག་འཛིན་རྩ་གསུམ་ཚེ་ལྷའི་དཀྱིལ་འཁོར་གྱི་ལྷ་ཚོགས་མདུན་གྱི་ནམ་མཁར་བཛྲ་ས་མ་ཛཿ（ས་སད་པར་མོས་ལ།） ན་མོ༔ བདག་དང་མཐའ་ཡས་སེམས་ཅན་ཀུན༔ བྱང་ཆུབ་སྙིང་པོར་མཆིས་ཀྱི་བར༔ ཚེ་དཔག་མེད་མགོན་དཀྱིལ་འཁོར་ལ༔ དད་གུས་མོས་པས་སྐྱབས་སུ་མཆི༔ （ཞེས་ལན་གསུམ་གྱིས་སྐྱབས་སུ་འགྲོ། གཉིས་པ་སེམས་བསྐྱེད་པ་ནི།） ཧོཿ མར་གྱུར་མཁའ་མཉམ་སེམས་ཅན་རྣམས༔ འཆི་མེད་མགོན་པོའི་གོ་འཕང་དུ༔ འགོད་ཕྱིར་བྱང་ཆུབ་སེམས་མཆོག་བསྐྱེད༔ དོན་གཉིས་ལྷུན་གྲུབ་གདིང་ཐོབ་ཤོག༔ （3བ）（ཅེས་ལན་གསུམ་གྱིས་སེམས་བསྐྱེད།） （གསུམ་པ་ཚོགས་བསགས་པ་ནི།） ན་མོ༔ སྐུ་དང་ཡེ་ཤེས་བདག་ཉིད་ལ༔ རབ་ཏུ་གུས་པས་ཕྱག་འཚལ་ལོ༔ ལུས་དང་ལོངས་སྤྱོད་མཆོད་པ་འབུལ༔ ཚེ་རབས་བསགས་པའི་སྡིག་པ་བཤགས༔ རྣམ་དཀར་དགེ་ལ་རྗེས་ཡི་རངས༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་མདའ་བཞུགས་ས་གསོལ༔ དགེ་རྩ་འགྲོ་བ་ཡོངས་ལ་བསྔོ༔ བླ་མེད་བྱང་ཆུབ་མྱུར་ཐོབ་ཤོག༔ （ཅེས་ཚོགས་བསགས་མཐར།） ཛཿཧཱུྃ་བྃ་ཧོཿ（ས་ཚོགས་ཞིང་རྣམས་རང་ལ་ཐིམ་པར་མོས།） （བཞི་པ་བགེགས་ལ་བཀའ་བསྒོ་བ་ནི།） རང་ཉིད་སྐད་ཅིག་གིས་དབང་ཆེན་རྟ་མཆོག་འབར་བའི་སྐུར་གྱུར། གཏོར་མ་རྃ་ཡྃ་ཁྃ་（གིས་བསྲེག་གཏོར་སྦྱང་།） སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་བཅུད་ཕུན་སུམ་ཚོགས་པར་བལྟས་ལ། ཨོཾ་ཨཱཿཧཱུྃ་ཧོཿ（ས་བྱིན་བརླབ།） སརྦ་བྷུ་ཏ་ཨ་ཀརྵ་ཡ་ཛ༔ （ས་མགྲོན་རྣམས་བཀུག་པ་ལ） སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྣ་དཾ་བ་ལིནྟེ་སྭཱ་ཧཱ། （ཞེས་ལན་གསུམ་གྱིས་གཏོར་མ་（4ན）བསྔོས་ཏེ།） ཧཱུྃ༔ ང་ནི་ཆོས་ཉིད་དོན་གྱི་ལྷ༔ སྒྱུ་འཕྲུལ་རོལ་པའི་རྣམ་འགྱུར་ངོམས༔ མ་རིག་གཟུང་འཛིན་རུ་དྲ་ཀུན༔ བདག་མེད་སྟོང་པའི་དབྱིངས་སུ་ཕཊ༔ ཨོཾ་སུམྦྷ་ནི་སུམྦྷ་ནི་ཧཱུྃ༔ གྲྀཧྞ་གྲྀཧྞ་ཧཱུྃ༔ གྲྀཧྞ་པ་ཡ་གྲྀཧྞ་པ་ཡ་ཧཱུྃ༔ ཨ་ན་ཡ་ཧོ༔ བྷ་ག་ཝ་ན༔ བིདྱ་རཱ་ཛ་ཡ་ཧཱུྃ་ཕཊ༔ （ཅེས་ཧཱུྃ་བཞིའི་སྔགས་དང་ཡུངས་ཐུན་གྱིས་བསྐྲད།） （ལྔ་པ་སྲུང་མཚམས་བཅད་པ་ནི།） ཧཱུྃ་ཧྲཱིཿ འཁོར་འདས་དག་མཉམ་ཆེན་པོ་ལ༔ བགེགས་དང་རུ་དྲའི་མིང་ཡང་མེད༔ སེམས་དང་སེམས་བྱུང་རྣམ་རྟོག་བགེགས༔ རང་གྲོལ་ཆེན་པོར་མཚམས་བཅད་དོ༔ བཛྲ་རཀྵ་རཀྵ་ཧཱུྃ་བྷྲཱུྃ༔ （ཞེས་པས་མཚམས་བཅད།） （དྲུག་པ་བྱིན་དབབ་པ་ནི། སྤོས་དང་རོལ་མོ་སོགས་ཀྱིས་གཟི་བྱིན་བསྐྱེད་ལ།） ཧཱུྃ་ཧྲཱིཿ རང་སྣང་དོན་གྱི་འོག་མིན་ནས༔ སྐུ་དང་ཡེ་ཤེས་ལྷུན་གྲུབ་མདངས༔ འཆི་མེད་མགོན་པོའི་སྐུར་བཞེངས་ལ༔ དབང་དང་དངོས་གྲུབ་བྱིན་ཕོབ་ཅིག༔ ཨོཾ་ཨ་མི་དྷེ་ཝ་ཨཱ་ཡུཿསིདྡྷི་ཧཱུཾ༔ སརྦ་ས་མ་ཡ་ཛཿཛཿཨ་བེ་ཤ་ཡ་ཨ་ཨཱཿ （ཞེས་བྱིན་དབབ།） （བདུན་པ་མཆོད་རྫས་བྱིན་གྱིས་བརླབ་པ་ནི།） （4བ）རྃ་ཡྃ་ཁྃ་（གིས་བསང་སྦྱང་།） བདག་གི་ཐུགས་ཀ་ནས་རྃ་ཁྃ་ཡྃ་འཕྲོས་པ་ཡེ་ཤེས་ཀྱི་མེ་རླུང་ཆུར་གྱུར་པས་མཆོད་རྫས་ཀྱི་ཉེས་སྐྱོན་དྲི་མ་ཐམས་ཅད་བསྲེགས་གཏོར་བཀྲུས་ཏེ་སྟོང་པར་སྦྱངས། སྟོང་པའི་ངང་ལས་གནས་ཁང་འོག་མིན་བདེ་ཆེན་འབར་བའི་གཞལ་མེད་ཁང་ཕུན་སུམ་ཚོགས་པར་རིན་པོ་ཆེ་དང་པདྨ་ལ་སོགས་པའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་ཕྱི་ནང་གསང་བའི་མཆོད་པའི་ཡོ་བྱད་འདོད་པའི་ཡོན་ཏན་སོ་སོའི་མཚན་ཉིད་ཐམས་ཅད་ཡོངས་སུ་རྫོགས་པ་འཆི་མེད་ཚེ་ལྷའི་དཀྱིལ་འཁོར་གྱི་འཁོར་ལོའི་ཞིང་ཀུན་ཏུ་ཁྱབ་པར་འཆར་བས་ནམ་མཁའ་རབ་འབྱམས་གང་བ་རྣམས་སུ་གྱུར་པར་བསམ་ཞིང་། ཨོཾ་བཛྲ་ཨརྒྷཾ་ཨཱཿཧཱུྃ༔ པཱདྱཾ་ཨཱ་ཧཱུྃ༔ པུཥྤེ་ཨཱཿཧཱུྃ༔ དྷུ་པེ་ཨཱཿཧཱུྃ༔ ཨཱ་ལོ་ཀེ་ཨཱ་ཧཱུ༔ གནྔྷེ་ཨཱཿཧཱུྃ༔ ནཻ་ཝི་དྱཱ་ཨཱཿཧཱུྃ༔ ཤཔྡ་ཨཱཿཧཱུྃ༔ ཨོཾ་རཱུ་པ་ཨཱཿཧཱུྃ༔ ཤཔྡ་ཨཱཿཧཱུྃ༔ གནྔྷེ་ཨཱཿཧཱུྃ༔ ར་ས་ཨཱཿཧཱུྃ༔ སྤརྴེ་ཨཱཿཧཱུྃ༔ ངྷརྨ་ཨཱཿཧཱུྃ༔ ཨོཾ་ཨཱཿཧཱུྃ་མ་ཧཱ་བོ་ངྷི་ཙིཏྟ་ག་ཎི་གུ་ཧྱ་སརྦ་པཱུ་ཛ་ཧོ༔ （ཞེས་དང་། བདུད་རྩི་བསང་སྦྱང་།） སྟོང་པའི་ངང་ལས་རང་བྱུང་བྷནྔྷ་（5ན）འབར་བའི་སྣོད་དུ་ཤ་ལྔ་བདུད་རྩི་ལྔ་རྣམ་པར་དག་པ་ཡེ་ཤེས་ལྔའི་རང་བཞིན་ཟག་མེད་ཀྱི་བདུད་རྩིའི་རྒྱ་མཚོས་གང་བར་（བསམ་ལ།） ཨོཾ་ཨཱཿཧཱུྃ་མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ （ལན་བདུན། རཀྟ་བསང་སྦྱང་།） སྟོང་པའི་ངང་ལས་དུང་ཆེན་བདེ་བ་ཆེན་པོའི་སྣོད་དུ་ཆགས་མེད་རཀྟའི་རྒྱ་མཚོ་རྦ་ཀློང་འཁྲུགས་པ་ལ་ཁམས་གསུམ་གྱི་རཀྟ་ཐམས་ཅད་བསྡུས་ཤིང་ཐིམ་པར་（བསམ་ལ།） ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ༔ （ལན་བདུན། གཏོར་མ་བསང་སྦྱང་།） སྟོང་པའི་ངང་ལས་གཏོར་གཞོང་པདྨ་འདབ་མ་སྟོང་ལྡན་གྱི་སྙིང་པོར་གཏོར་མ་ཟག་མེད་འདོད་ཡོན་ལྔ་ལྡན་གྱི་ཕུང་པོ་བསམ་གྱིས་མི་ཁྱབ་པ་ནམ་མཁའ་མཛོད་ཀྱི་གཏེར་དུ་གྱུར་པར་（བསམ་ལ།） ཨོཾ་ཨཱཿཧཱུྃ་མ་ཧཱ་བ་ལིཾ་ཏ་བ་ལ་བ་ཏེ་གུ་ཧྱ་ས་མ་ཡ་ཧཱུྃ་ཧྲཱི་ཋཱ༔ （ལན་བདུན། སྤྲོས་པ་བསྡུ་ན་ཐུན་མོང་དུ་བྱིན་གྱིས་བརླབ་པ་ནི།） ཨོཾ་ཨཱཿཧཱུྃ༔ གཟུང་དང་འཛིན་པས་བསྡུས་པ་ཡི༔ འདོད་ཡོན་ལྔ་ཡི་ཡུལ་སྣང་ཀུན༔ ཡེ་ཤེས་ཆེན་པོས་རྒྱས་གདབ་ནས༔ ཕྱི་ནང་མཆོད་པའི་སྤྲིན་དུ་ཤར༔ ཨོཾ་ཨཱཿཧཱུྃ༔ བཛྲ་སྥ་ར་ཎ་ཁཾ༔ （ཞེས་མཁའ་ཁྱབ་ཏུ་སྤེལ་ལོ། དེ་དག་ནི་（5བ）སྔོན་འགྲོའི་རིམ་པའོ། །） （གཉིས་པ་དངོས་གཞིའི་ཆོས་ལ་རྣམ་གྲངས་བརྒྱད་ལས། དང་པོ་རྟེན་དང་བརྟེན་པའི་དཀྱིལ་འཁོར་གསལ་གདབ་པ་ནི།） ཨ༔ གདོད་ནས་འཁོར་འདས་ཆོས་རྣམས་ཀུན༔ མ་བཅོས་སྟོང་ཉིད་སྤྲོས་མཐའ་བྲལ༔ རྣམ་ཐར་གསུམ་ལྡན་བཙུན་མོའི་མཁའ༔ ཆོས་ཉིད་ཆེན་པོར་དག་མཉམ་རིག༔ ཨོཾ་ངྷརྨ་ཀཱ་ཡ་ཨོཾ༔ ཧཱུྃ༔ ཆོས་ཉིད་ཀློང་ཆེན་བརྡལ་བ་ལས༔ མཁྱེན་ཅིང་གཟིགས་པའི་ཡེ་ཤེས་ཤར༔ ཁྱབ་བྱེད་ཤེས་རབ་མངོན་གྱུར་ཏེ༔ ཀུན་ཁྱབ་རང་གསལ་ཀུན་ཏུ་སྣང་༔ ཨཱ་སམྦྷོ་ཀཱ་ཡ་ཨཱཿཧྲཱིཿ ཆོས་དབྱིངས་མཚན་མ་བྲལ་བ་ལས༔ བདག་རྟོག་འཁོར་བ་བསྒྲལ་བའི་ཕྱིར༔ ཐབས་ཀྱིས་གཟུགས་སྐུར་ངོམས་པ་ལ༔ རིག་པ་རྒྱུ་ཡི་ཡི་གེར་ཤར༔ ཧཱུྃ་ནི་རྨ་ཀཱ་ཡ་ཧྲཱིཿ ཧྲཱིཿལས་འོད་ཟེར་རབ་འཕྲོས་པས༔ རྒྱལ་བ་མཆོད་ཅིང་འཁོར་བ་བསྒྲལ༔ འཁོར་འདས་དྭངས་བཅུད་གཟི་བྱིན་ཀུན༔ ཚུར་འདུས་རྒྱུ་ཡི་ཡི་གེར་ཐིམ༔ སླར་ཡང་འོད་ཟེར་རབ་འཕྲོས་པས༔ སྣང་བ་སྣོད་ཀྱི་འཇིག་རྟེན་ཀུན༔ ལྷུན་གྲུབ་བཀོད་པ་རབ་རྫོགས་པའི༔ བདེ་བ་（6ན）ཆེན་པོའི་ཞིང་ཁམས་སུ༔ གཡོ་བ་བཅུད་ཀྱི་སྐྱེ་འགྲོ་ཀུན༔ རྨི་ལམ་དབྱིངས་སུ་སད་པ་ལྟར༔ ཆོས་ཉིད་རོལ་པའི་རང་རྩལ་ལས༔ ཡེ་ཤེས་སྒྱུ་འཕྲུལ་གར་དུ་རོལ༔ སྐུ་དང་ཡེ་ཤེས་གཟི་བྱིན་ལས༔ འོད་ལྔ་མཚོན་ཆའི་སྲུང་གུར་དབུས༔ ཡེ་ཤེས་ལྔ་རྫོགས་གཞལ་ཡས་ཁང་༔ གྲུ་བཞི་སྒོ་བཞི་མཚན་ཉིད་ལྡན༔ ཡངས་ཤིང་རྒྱ་ཆེ་དཔངས་མཐོ་བ༔ ཕྱི་ནང་སྒྲིབ་གཡོགས་མེད་པལ༔ འཇའ་ཚོན་འོད་ཀྱི་རང་བཞིན་ཅན༔ འདོད་ཡོན་མཆོད་པའི་སྤྲིན་ཕུང་འཁྲིགས༔ དེ་དབུས་རྨ་བྱས་བཏེགས་པའི་ཁྲིར༔ པདྨ་ཟླ་བའི་གདན་སྟེང་དུ༔ ཧྲཱིཿལས་རང་ཉིད་ཚེ་དཔག་མེད༔ དམར་གསལ་ཞལ་གཅིག་ཕྱག་གཉིས་པ༔ མཉམ་བཞག་ཚེ་ཡི་བུམ་པ་བསྣམས༔ ཞི་འཛུམ་མཚན་དཔེ་འོད་ཕུང་འབར༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ཐོར་ཚུགས་དབུ་རྒྱན་ཅོད་པན་དང་༔ སྙན་ཆ་རིན་ཆེན་མགུལ་ཆུ་དང་༔ ཕྲེང་བ་དོ་ཤལ་གདུ་བུས་སྤྲས༔ སྟོད་གཡོགས་སྨད་དཀྲིས་སྐུ་རེག་དང་༔ པང་ཁེབས་ལ་སོགས་ན་（6བ）བཟས་བརྒྱན༔ གཉིས་མེད་ཡུམ་མཆོག་གོས་དཀར་མོ༔ ཕྱག་ན་མདའ་དར་ཚེ་བུམ་བསྣམས༔ ཞབས་གཉིས་ཡབ་ཀྱི་སྐེད་ལ་འཁྱུད༔ ཤིན་ཏུ་ཆགས་པས་རྒྱན་གོས་སྤངས༔ བདེ་ཆེན་འབར་བའི་ཟིལ་པ་འཁྲིགས༔ དཀྱིལ་འཁོར་ཚོམ་བུའི་ཕྱི་རིམ་ན༔ ཤར་དུ་རྡོ་རྗེ་ཚེ་དཔག་མེད༔ མཐིང་གསལ་ལོངས་སྤྱོད་རྫོགས་པའི་སྐུ༔ སྐྱིལ་ཀྲུང་མཉམ་བཞག་ཚེ་བུམ་བསྣམས༔ མཱ་ཀཱི་དཀར་མོ་ཡུམ་དང་སྦྱོར༔ ལྷོ་རུ་རཏྣ་ཚེ་དཔག་མེད༔ སེར་གསལ་ལོངས་སྤྱོད་རྫོགས་པའི་སྐུ༔ སྐྱིལ་ཀྲུང་མཉམ་བཞག་ཚེ་བུམ་བསྣམས༔ སངས་རྒྱས་སྤྱན་མ་སེར་མོ་འཁྱུད༔ ནུབ་ཏུ་སངས་རྒྱས་ཚེ་དཔག་མེད༔ དཀར་གསལ་ལོངས་སྤྱོད་རྫོགས་པའི་སྐུ༔ སྐྱིལ་ཀྲུང་མཉམ་བཞག་ཚེ་བུམ་བསྣམས༔ ནམ་མཁའི་དབྱིངས་ཕྱུག་མཐིང་གར་སྦྱོར༔ བྱང་དུ་ཀརྨ་ཚེ་དཔག་མེད༔ ལྗང་གསལ་ལོངས་སྤྱོད་རྫོགས་པའི་སྐུ༔ སྐྱིལ་ཀྲུང་མཉམ་བཞག་ཚེ་བུམ་བསྣམས༔ དམ་ཚིག་སྒྲོལ་མ་ལྗང་མོས་འཁྱུད༔ ཀུན་ཀྱང་ཞི་འཛུམ་མཚན་དཔེས་སྤྲས༔ ཡུམ་རྣམས་（7ན）རང་མདོག་མདའ་དར་དང་༔ གཡོན་པས་ཚེ་ཡི་བུམ་པ་བསྣམས༔ དབུས་དང་མཚམས་བཞིར་འབྱུང་ལྔའི་ལྷ༔ ཚེ་ཡི་ལྷ་མོ་མགྱོགས་མ་ལྔ༔ མཐིང་དཀར་སེར་དམར་ལྗང་འོད་འབར༔ རང་མདོག་དར་གྱི་ན་བཟའ་གསོལ༔ གཡས་རྣམས་ལས་མདོག་མདའ་དར་དང་༔ གཡོན་རྣམས་ཚེ་ཡི་བུམ་པ་བསྣམས༔ བཞེངས་པའི་སྟབས་ཀྱིས་པད་ཟླར་འཁོད༔ སྒོ་བཞིར་ལས་ཀྱི་ལྷ་མོ་བཞི༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ གཡོན་རྣམས་རང་མདོག་མདའ་དར་བསྣམས༔ དཀར་སེར་དམར་ལྗང་པད་ཟླར་བཞེངས༔ ཀུན་ཀྱང་སྣང་སྟོང་རོལ་པའི་ངང་༔ ཡེ་ཤེས་འོད་དང་འོད་ཟེར་འབར༔ འཁོར་འདས་མ་ལུས་ཡོངས་ཁྱབ་སྟེ༔ དག་མཉམ་ཆེན་པོར་ལྷུན་གྱིས་གྲུབ༔ གནས་གསུམ་ཡི་གེ་འབྲུ་གསུམ་གསལ༔ དེ་ལས་འོད་ཟེར་རབ་འཕྲོས་པས༔ ནུབ་ཕྱོགས་བདེ་བ་ཅན་ལ་སོགས༔ སྐུ་གསུམ་རྒྱལ་བའི་ཞིང་ཁམས་ནས༔ སངས་རྒྱས་བྱང་སེམས་རིག་འཛིན་ཚོགས༔ འཆི་མེད་མགོན་པོའི་རྣམ་རོལ་དུ༔ （7བ） སྤྱན་དྲངས་གཉིས་སུ་མེད་པར་གྱུར༔ （ཞེས་དཀྱིལ་འཁོར་དམ་ཚིག་གི་འཁོར་ལོ་གསལ་གདབ་བོ། །） （གཉིས་པ་ཡེ་ཤེས་ཀྱི་འཁོར་ལོ་སྤྱན་འདྲེན་པ་ནི། སྤོས་དང་རོལ་མོ་སོགས་ཀྱིས་གཟི་བྱིན་བསྐྱེད། གདུང་བའི་དབྱངས་བཅས་ཏེ།） ཧྲཱིཿ ནུབ་ཕྱོགས་བདེ་ཆེན་པདྨ་འོད༔ དོན་གྱི་འོག་མིན་ཆེན་པོ་ནས༔ བཅོམ་ལྡན་མགོན་པོ་ཚེ་དཔག་མེད༔ གཉིས་མེད་རོལ་པའི་བཙུན་མོ་དང་༔ ཡེ་ཤེས་སྒྱུ་འཕྲུལ་རོལ་པའི་འཁོར༔ མ་ལུས་སྤྱན་འདྲེན་གཤེགས་སུ་གསོལ༔ དཀྱིལ་འཁོར་འདི་ལ་བྱིན་ཆེན་ཕོབ༔ སྒྲུབ་རྫས་འདི་ལ་བཅུད་ཅིག་བསྐྱིལ༔ ཚེ་བུམ་འདི་ལ་དབང་བྱིན་བསྡུས༔ ཚེ་མདའ་འདི་ལ་ཚད་ཅིག་སྟོན༔ རིལ་བུ་འདི་ལ་བྱིན་ནུས་བསྐྱེད༔ སྒྲུབ་མཆོག་བདག་ལ་བྱིན་གྱིས་རློབས༔ ཚེ་དང་ཡེ་ཤེས་གཟི་བྱིན་ཕོབ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ན་མོ་ཨ་མི་དྷེ་ཝ་ཨཱ་ཡུཿསིདྡྷི་ཧཱུྃ་ཧྲཱིཿ སརྦ་ཏ་ཐཱ་ག་ཏ་ཀཱ་ཡ་ཛྙཱ་ན་པཉྩ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ （ཞེས་ཡེ་ཤེས་ཀྱི་འཁོར་ལོ་སྤྱན་དྲངས།）

（གསུམ་པ་དམ་ཡེ་དབྱེར་མེད་དུ་བཞུགས་སུ་གསོལ་བ་ནི།）   ཧཱུྃ་ཧྲཱིཿ    ཕུང་ཁམས་གཤེགས་པ་གཤེགས་མའི་གདན༔   དབང་（8ན）ཡུལ་སེམས་དཔའ་སེམས་མའི་གདན༔   མུ་བཞི་ཡེ་ཤེས་སྒོ་སྐྱོང་གདན༔   གཉིས་མེད་རོལ་པར་བརྟན་བཞུགས་གསོལ༔   དབྱིངས་དང་ཡེ་ཤེས་དབྱེར་མེད་ངང་༔   རང་གྲོལ་མཆོག་གི་དངོས་གྲུབ་སྩོལ༔   བཛྲ་ས་མ་ཡ་ཏིཥྛ་ལྷན༔   （ཞེས་བཞུགས་སུ་གསོལ།）     

（བཞི་པ་ཕྱག་འཚལ་བ་ནི།） ཧཱུྃ༔ གདོད་ནས་ལྷན་ཅིག་སྐྱེས་པའི་ལྷ༔ གཉིས་མེད་ལྷུན་རྫོགས་རི་ག་པའི་ངང་༔ སྒྱུ་འཕྲུལ་གར་གྱི་རྣམ་རོལ་པའི༔ འཆི་མེད་མགོན་པོར་ཕྱག་འཚལ་ལོ༔ ཕུང་ལྔ་གནས་དག་སྐུ་ལྔའི་གདངས༔ བདེ་གཤེགས་ལྔ་ལ་ཕྱག་འཚལ་ལོ༔ ཁམས་ལྔ་གནས་དག་སྟོང་པའི་གདངས༔ ཡུམ་ཆེན་ལྔ་ལ་ཕྱག་འཚལ་ལོ༔ འབྱུང་ཆེན་ལྔ་ཡི་དྭངས་མ་ཉིད༔ མགྱོགས་མ་ལྔ་ལ་ཕྱག་འཚལ་ལོ༔ མཐའ་བཞིའི་འཛིན་རྟོག་བསྒྲལ་བ་ལས༔ སྒོ་མ་བཞི་ལ་ཕྱག་འཚལ་ལོ༔ ཨ་ཏི་པཱུ་ཧོཿ པྲ་ཏཱིཙྪ་ཧོཿ （ཞེས་ཕྱག་བྱ།） （ལྔ་པ་མཆོད་པ་འབུལ་བ་ལ་བཞི་ལས། དང་པོ་ཕྱི་མཆོད་འབུལ་བ་ནི།） ཧཱུྃ༔ སྣང་སྲིད་སྣོད་བཅུད་མ་ལུས་ཀུན༔ གདོད་ནས་རང་བྱུང་ཀློང་ཆེན་མཁར༔ མ་བཅོས་ངང་གིས་（8བ）རང་ཤར་བ༔ མཆོད་པའི་ཕྱག་རྒྱར་གར་བསྒྱུར་ཏེ༔ ཉེར་སྤྱོད་ལྷ་མོའི་རྣམ་རོལ་རྩེ༔ འཆི་མེད་མགོན་པོའི་དཀྱིལ་འཁོར་དུ༔ ཚོགས་གཉིས་རྫོགས་ཕྱིར་འབུལ་ལགས་ཀྱིས༔ བཞེས་ནས་མཆོག་གི་དངོས་གྲུབ་སྩོལ༔ ཨོཾ་བཛྲ་ཨརྒྷཾ་པཱདྱཾ་པུཥྤེ་དྷུ་པེ་ཨཱ་ལོ་ཀེ་གནྔྷེ་ནཻ་ཝིདྱཱ་ཤཔྡ་པྲ་ཏཱིཙྪ་པཱུ་ཛ་ཧོཿ （གཉིས་པ་ནང་མཆོད་འབུལ་བ་ནི།） ཨོཾ་ཨཱཿཧཱུྃ༔ གཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ འདོད་ཡོན་མཆོད་པའི་བྱེ་བྲག་ཀུན༔ འཆི་མེད་ཚེ་ཡི་དཀྱིལ་འཁོར་དུ༔ ཚོགས་གཉིས་རྫོགས་ཕྱིར་འབུལ་ལགས་ཀྱིས༔ བཞེས་ནས་མཆོག་གི་དངོས་གྲུབ་སྩོལ༔ ཨོཾ་ཨཱཿབཛྲ་རཱུ་པ་ཤཔྡ་གནྡྷེ་ར་ས་སྤརྴེ་དྷརྨ་པྲ་ཏཱིཙྪ་པཱུ་ཛ་ཧོཿ （གསུམ་པ་གསང་མཆོད་འབུལ་བ་ནི།） ཧཱུྃ༔ རྩ་བརྒྱད་སྟོང་སྦྱར་བདུད་རྩི་སྨན༔ འཁོར་བ་ཡོངས་སྒྲོལ་རཀྟའི་མཚོ༔ སྣང་སྲིད་བཅུད་དྲིལ་བ་ལིཾ་ཏ༔ འཆི་མེད་ཚེ་ཡི་དཀྱིལ་འཁོར་དུ༔ ཚོགས་གཉིས་རྫོགས་ཕྱིར་འབུལ་ལགས་ཀྱི༔ བཞེས་ནས་མཆོག་གི་དངོས་གྲུབ་སྩོལ༔ ཨོཾ་ཨཱཿཧཱུྃསརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ （བཞི་པ་སྦྱོར་（9ན）མཆོད་འབུལ་བ་ནི།） ཧཱུྃ༔ གསང་བ་མཆོག་གི་བཅུད་འཛིན་ཅིང་༔ བདེ་སྟོང་སྦྱོར་བའི་ཕོ་ཉ་མོ༔ རིག་མ་དཀར་དམར་མཐིང་སེར་ལྗང་༔ དཀྱིལ་འཁོར་ལྷ་ཚོགས་དགྱེས་ཕྱིར་འབུལ༔ བཞེས་ནས་མཆོག་གི་དངོས་གྲུབ་སྩོལ༔ ཨོཾ་མནྟྲ་གུ་ཧྱ་མུ་དྲ་པཱུ་ཛ་ཧོཿ ཧཱུྃ༔ སྣང་བ་ཐབས་མཆོག་རྒྱལ་པོ་ཡིས༔ སྟོང་ཉིད་རྡོ་རྗེ་བཙུན་མོའི་མཁར༔ ཟུང་འཇུག་ཆེན་པོར་སྦྱོར་བ་ལས༔ བདེ་སྟོང་ཡེ་ཤེས་བཅུད་དུ་འཁྱིལ༔ དཀྱིལ་འཁོར་ལྷ་ཚོགས་དགྱེས་ཕྱིར་འབུལ༔ འགྲོ་བའི་དོན་ཕྱིར་བཞེས་སུ་གསོལ༔ གསང་བ་མཆོག་གི་དངོས་གྲུབ་སྩོལ༔ མ་ཧཱ་བོ་དྷི་ཙིཏྟ་སརྦ་པཱུ་ཛ་ཧོཿ （ཞེས་ཕྱི་ནང་གསང་བའི་མཆོད་པ་རྣམས་འབུལ་ལོ༔ ） （དྲུག་པ་བསྟོད་པ་བྱ་བ་ནི། ལྷ་ཚོགས་རྣམས་ཀྱི་ཆེ་བའི་ཡོན་ཏན་རྗེས་སུ་དྲན་པའི་སྒོ་ནས།） ཧཱུྃ་ཧྲཱིཿ གདོད་ནས་ཆོས་སྐུ་སྤྲོས་དང་མཚན་མ་བྲལ༔ ལྷུན་གྲུབ་སྐུ་དང་ཡེ་ཤེས་རང་བྱུང་བའི༔ གདངས་ལས་གདུལ་བྱ་རྗེས་སུ་བཟུང་བའི་ཕྱིར༔ འཁོར་བའི་སྒོ་དང་བསྟུན་པའི་གཟུགས་སྐུར་ངོམས༔ གང་འདུལ་ཐབས་ཀྱིས་འདུལ་བའི་ཐུགས་རྗེ་ཅན༔ （9བ）མགོན་པོ་ཚེ་དཔག་མེད་ལ་ཕྱག་འཚལ་བསྟོད༔ དཀར་གསལ་རབ་མཛེས་འོད་ཀྱི་ཕུང་པོ་འབར༔ རྒྱལ་བ་རྒྱ་མཚོའི་སྐུ་ཡི་གསང་ཆེན་རྫོགས༔ ཞི་བའི་ཕྲིན་ལས་མ་ལུས་ལྷུན་གྱིས་གྲུབ༔ སངས་རྒྱས་ཚེ་དཔག་མེད་ལ་ཕྱག་འཚལ་བསྟོད༔ དམར་གསལ་རབ་མཛེས་འོད་ཀྱི་ཕུང་པོ་འབར༔ རྒྱལ་བ་རྒྱ་མཚོའི་གསུང་གི་གསང་ཆེན་རྫོགས༔ དབང་གི་ཕྲིན་ལས་མ་ལུས་ལྷུན་གྱིས་གྲུབ༔ པདྨ་ཚེ་དཔག་མེད་ལ་ཕྱག་འཚལ་བསྟོད༔ མཐིང་གསལ་རབ་མཛེས་འོད་ཀྱི་ཕུང་པོ་འབར༔ རྒྱལ་བ་རྒྱ་མཚོའི་ཐུགས་ཀྱི་གསང་ཆེན་རྫོགས༔ རབ་འབྱམས་ཕྲིན་ལས་ཡོངས་ལ་མངའ་དབང་བསྒྱུར༔ རྡོ་རྗེ་ཚེ་དཔག་མེད་ལ་ཕྱག་འཚལ་བསྟོད༔ སེར་གསལ་རབ་མཛེས་འོད་ཀྱི་ཕུང་པོ་འབར༔ རྒྱལ་བ་རྒྱ་མཚོའི་ཡོན་ཏན་གསང་ཆེན་རྫོགས༔ རྒྱས་པའི་ཕྲིན་ལས་མ་ལུས་ལྷུན་གྱིས་གྲུབ༔ རཏྣ་ཚེ་དཔག་མེད་ལ་ཕྱག་འཚལ་བསྟོད༔ ལྗང་གསལ་རབ་མཛེས་འོད་ཀྱི་ཕུང་པོ་འབར༔ རྒྱལ་བ་རྒྱ་མཚོའི་ཕྲིན་ལས་གསང་ཆེན་རྫོགས༔ དྲག་པོའི་ཕྲིན་ལས་མ་ལུས་ལྷུན་གྱིས་གྲུབ༔ ཀརྨ་（10ན）ཚེ་དཔག་མེད་ལ་ཕྱག་འཚལ་བསྟོད༔ ཐབས་ཆེན་འབྱུང་བ་སྙིགས་མའི་རང་བཞིན་ཅན༔ དྭངས་མ་ཤེས་རབ་ཆེན་པོར་བདེ་རོལ་པའི༔ སྟོང་ཉིད་དབྱིངས་ཀྱི་ལྷ་མོའི་རྣམ་རོལ་རྩེ༔ གསང་བའི་ཡུམ་ཆེན་ལྔ་ལ་ཕྱག་འཚལ་བསྟོད༔ ཀ་དག་ཀུན་ཏུ་བཟང་མོའི་རྣམ་རོལ་གར༔ གདུལ་བྱའི་དཔལ་དུ་གར་བསྒྱུར་མགྱོགས་མ་ལྔ༔ ཕྲིན་ལས་རྣམ་བཞིར་དབང་སྒྱུར་སྒོ་སྐྱོང་བཞི༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ （ཅེས་བསྟོད་དོ། །） （བདུན་པ་ཛཔྲ་དགོངས་ལ། འདིར་དབང་དང་སྒྲུབ་མཆོད་སོགས་ཀྱི་སྐབས་སུ་ཛཔྲ་ཁང་དབྱེ་བར་བྱ་སྟེ། རྩ་སྔགས་ལ་ཕཊ་ཛཿབཏགས་པས་ཛཔྲ་ཁང་ཕྱེ་ལ། མདུན་བསྐྱོད་ཀྱི་གོ་སར། རང་དང་ཡེ་ཤེས་ཀྱི་དཀྱིལ་འཁོར་མེ་རི་འདབ་འབྱར་གྱི་ཚུལ་དུ་ཞལ་སྤྲོད་དེ་བཞུགས་པར་མོས་ཏེ། ཐོག་མར་ཛཔྲ་བསྐུལ་ནི།） ཧཱུྃ་ཧྲཱིཿ ཆོས་དབྱིངས་སྐྱེ་འགགས་འགྱུར་མེད་ཞིང་ཁམས་ནས༔ ཆོས་སྐུའི་དཀྱིལ་འཁོར་རྒྱ་མཚོའི་ཐུགས་དམ་བསྐུལ༔ གཞི་དང་སྙིང་པོ་མེ་ཏོག་བརྒྱན་པའི་ཞིང་༔ ལོངས་སྐུ་རྒྱལ་བ་རྒྱ་མཚོའི་ཐུགས་རྒྱུད་བསྐུལ༔ སྟོང་གསུམ་མི་མཇེད་འཇིག་རྟེན་རྒྱ་མཚོ་（10བ）ནས༔ སྤྲུལ་སྐུའི་དཀྱིལ་འཁོར་རྒྱ་མཚོའི་ཐུགས་དམ་བསྐུལ༔ ཡེ་ཤེས་དབྱིངས་སུ་ཐ་དད་མ་གྲུབ་ཀྱང་༔ ཀུན་རྫོབ་གདུལ་བྱའི་མོས་ངོར་རྣམ་རོལ་གར༔ གང་འདུལ་མཛད་པ་ཕྲིན་ལས་སྣ་ཚོགས་བསྒྱུར༔ གསུང་སྙན་ཡན་ལག་དྲུག་ཅུའི་ཚངས་དབྱངས་ཀྱིས༔ སྔགས་ཀྱི་སྒྲ་སྒྲོགས་འཁོར་བའི་འཁྲུལ་འཁོར་གཞིག༔ ཐུགས་ནི་མི་གཡོ་བརྡལ་ཁྱབ་ཆེན་པོའི་ངང་༔ ཡེ་ཤེས་རླབས་ཆེན་གཡོ་བའི་གཟི་བྱིན་གྱིས༔ འཁོར་འདས་དག་མཉམ་ཆེན་པོར་རོལ་པར་མཛོད༔ སྒྲུབ་པའི་རིག་འཛིན་མཆེད་དང་ལྕམ་དྲལ་ཚོགས༔ མ་ལུས་ཡང་གསང་དཀྱིལ་འཁོར་ཆེན་པོ་འདིར༔ བརྟེན་ནས་སྒོ་གསུམ་རྡོ་རྗེ་གསུམ་གྱི་ངང་༔ དག་སྨིན་གྲོལ་ཐོབ་བྱིན་གྱིས་བརླབ་མཛོད་ཅིག༔ མ་གཡེལ་དམ་ཚིག་ཐུགས་དམ་གནད་ནས་བསྐུལ༔ བརྒྱུད་འཛིན་རྗེས་སུ་བཟུང་བའི་དུས་ལ་བབས༔ དབྱིངས་དང་དགོངས་པ་དབྱེར་མེད་རོ་གཅིག་ངང་༔ ལྷ་སྔགས་ཏིང་འཛིན་རོལ་པར་དགོངས་མཛོད་ལ༔ གྲུབ་རྟགས་དངོས་གྲུབ་མཚན་མ་མྱུར་དུ་སྟོན༔ ཕྲིན་ལས་དུས་ལ་བབ་བོ་ས་མ་ཡ༔ （11ན）ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ་ཨཱཿ ཛཿཧཱུྃ་ཨ༔ （ཞེས་བསྐུལ་ཏེ། ཛཔྲ་དགོངས་དངོས་ལ་བསྙན་སྒྲུབ་ལས་གསུམ་ལས།） （དང་པོ་བསྙེན་པ་ནི།） ཧཱུྃ༔ རང་ཉིད་བཅོམ་ལྡན་ཚེ་དཔག་མེད༔ ཐབས་ཤེས་མཉམ་སྦྱོར་ལོངས་སྤྱོད་རྫོགས༔ ཐུགས་ཀར་ཡེ་ཤེས་འོད་ཀློང་དུ༔ རཱ་གའི་བུམ་པ་དམར་གསལ་གྱི༔ ལྟེ་བར་དྭངས་མའི་ཐིག་ཀློང་དུ༔ པདྨ་ཟླ་རྒྱས་ལྟེ་བ་དུ༔ ཐུགས་སྲོག་ངོ་བོ་ཧྲཱིཿདམར་གསལ༔ མཐའ་མར་སྔགས་ཕྲེང་གཡས་སུ་འཁོར༔ འོད་འཕྲོས་རྒྱལ་བ་མཆོད་པས་མཉེས༔ སེམས་ཅན་ཀུན་གྱི་སྒྲིབ་པ་སྦྱངས༔ དབང་བྱིན་དངོས་གྲུབ་ཐམས་ཅད་དང་༔ ཚེ་བསོད་བཀྲག་མདངས་ནུས་བཅུད་ཀུན༔ ཚུར་འདུས་སྲོག་གི་སྙིང་པོར་བསྟིམ༔ ཚེ་དཔལ་ཡེ་ཤེས་འབར་བར་བསྒོམ༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཧཱུྃ༔ （ཞེས་གཙོ་བོར་བཟླ།） （གཉིས་པ་སྒྲུབ་པ་ནི།） ཧཱུྃ༔ རང་ཉིད་འཆི་མེད་མགོན་པོ་ཡི༔ ཐུགས་སྲོག་སྔགས་ཀྱི་འཁོར་ལོ་ལས༔ འོད་དང་འོད་ཟེར་རབ་འཕྲོས་པས༔ སྣོད་ཀྱི་འཇིག་རྟེན་པདྨ་འོད༔ བཅུད་ཀྱི་（11བ）སེམས་ཅན་ཚེ་དཔག་མེད༔ སྒྲ་གྲགས་སྔགས་ཀྱི་རོལ་པ་ཆེ༔ དྲན་རྟོག་ཆོས་ཉིད་རོལ་པའི་ངང་༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ་ཨཱཿ སླར་ཡང་འོད་ཟེར་རབ་འཕྲོས་པས༔ དུས་གསུམ་རྒྱལ་བ་སྲས་བཅས་ཀྱི༔ དབང་བྱིན་དངོས་གྲུབ་མ་ལུས་དང་༔ སྣོད་བཅུད་ཀུན་གྱི་ཚེ་དཔལ་ཀུན༔ འོད་ཟེར་ཁ་དོག་ལྔ་ལྡན་གྱི༔ རྣམ་པར་བསྡུས་ཏེ་སྔགས་སུ་བསྟིམ༔ ཚེ་བསོད་ཡེ་ཤེས་འབར་བར་བསྒོམ༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ་ཨཱཿ རང་ཉིད་ཚེ་དཔག་མེད་མགོན་གྱི༔ སྤྱི་བོ་ནས་བཟུང་རྐང་མཐིལ་ཡན༔ ཕྲ་རབ་རྡུལ་གྱི་ཆ་ཙམ་གྱི༔ ཕྱག་རྒྱ་ཕྲ་མོ་ཚོགས་པ་ཡི༔ འཇའ་ཚོན་འོད་ཀྱི་ཕུང་པོར་གསལ༔ ཀུན་ཀྱང་སྔགས་སྒྲ་སྒྲོགས་པ་ཡིས༔ འཇིག་རྟེན་ཁམས་ཀུན་གཡོ་བར་བསྒོམ༔ འཁོར་འདས་གཉིས་ཀྱི་དྭངས་མ་བཅུད༔ མ་ལུས་འོད་ཀྱི་རྣམ་པར་བསྡུས༔ སྲོག་གི་འཁོར་ལོར་རོ་གཅིག་དྲིལ༔ འཁོར་འདས་ཀུན་གྱི་སྲོག་ཐོབ་བསམ༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ་ཨཱཿ （12ན）ཧཱུྃ་ཧྲཱིཿ རང་ཉིད་ལྷར་གསལ་ཐུགས་ཀ་རུ༔ སྲོག་གི་སྙིང་པོ་གསལ་བ་ལས༔ སྔགས་ཀྱི་འཁོར་ལོ་མགལ་མེ་ལྟར༔ ཐབས་ཤེས་ཞལ་བརྒྱུད་གསང་ལམ་ནས༔ བརྒྱུད་འཁོར་བདེ་སྟོང་ཡེ་ཤེས་འབར༔ འོད་འཕྲོས་བརྟན་གཡོ་ཐམས་ཅད་ཀུན༔ གཞལ་ཡས་ལྷ་སྔགས་རོལ་པར་གྱུར༔ ཕྱོགས་བཅུའི་རྒྱལ་བ་སྲས་བཅས་མཆོད༔ འཁོར་འདས་ཡོངས་ཀྱི་ཚེ་བསོད་བཅུད༔ བསྡུས་ཏེ་སྲོག་གི་སྙིང་པོར་བསྟིམ༔ རྡོ་རྗེའི་ཚེ་མཆོག་བརྙེས་པར་བསམ༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ་ཨཱཿ （ཞེས་སྒྲུབ་པའི་དམིགས་གནད་ཁག་བཞི་པོ་རེ་རེ་བཞིན་དུ་གྲངས་སྙོམས་པར་བཟླ།） （གསུམ་པ་ལས་སྦྱོར་ནི། དམིགས་བསལ་བསྙེན་སྒྲུབ་ཀྱི་སྐབས་སུ་དུས་བཞིའི་ཉམས་ལེན་ལས་བཞི་ལྷུན་གྲུབ་ལྟར་བྱ་ཞིང་། སྤྱིར་བཏང་དུ་ཚེ་འགུགས་བསྐུལ་བས་ཁྱབ་བོ། །） （བརྒྱད་པ་ཚེ་འགུགས་པ་ནི། སྤོས་བཏུལ་ལ་མདའ་དར་གཡབ་ཅིང་།） ཧཱུྃ་ཧྲཱིཿ སྣང་སྲིད་བདེ་ཆེན་པདྨ་འོད༔ མི་འགྱུར་གསང་ཆེན་གཞལ་ཡས་སུ༔ བཅོམ་ལྡན་མགོན་པོ་ཚེ་དཔག་མེད༔ དམར་གསལ་ལོངས་སྐུ་ཡུམ་དང་སྦྱོར༔ པདྨ་རཱ་གའི་བུམ་པ་（12བ）འཛིན༔ སྣང་སྟོང་བདེ་ཆེན་རོལ་པའི་སྩལ༔ འོད་དང་འོད་ཟེར་དཔག་མེད་འཕྲོས༔ ནམ་མཁའི་ཁམས་ནས་བཅུད་བསྡུས་ལ༔ སེམས་ཀྱི་ཁམས་ནས་ཡལ་བའི་ཚེ༔ མི་འགྱུར་རིག་པའི་ཀློང་དུ་བསྐྱིལ༔ མི་ནུབ་འཕེལ་རྒྱས་རྒྱ་ཡིས་ཐོབ༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ ཤར་ཕྱོགས་མངོན་དགའི་ཞིང་ཁམས་ནས༔ བཅོམ་ལྡན་རྡོ་རྗེ་ཚེ་དཔག་མེད༔ སྟོང་ཉིད་མཱ་ཀཱི་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ འབྱུང་བ་ཆུ་ཡི་བཅུད་བསྡུས་ལ༔ ཁྲག་གི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐེབས༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ ལྷོ་ཕྱོགས་དཔལ་ལྡན་ཞིང་ཁམས་ནས༔ བཅོམ་ལྡན་རཏྣ་ཚེ་དཔག་མེད༔ སྟོང་ཉིད་སྤྱན་མ་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ འབྱུང་བ་ས་ཡི་བཅུད་བསྡུས་（13ན）ལ༔ ཤ་ཡི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐེབས༔ ཚེ་བསོད་དཔལ་ཡོན་འདིར་སྩོལ྄ཅིག༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ ནུབ་ཕྱོགས་བདེ་ཆེན་པདྨ་བཀོད༔ བཅོམ་ལྡན་པདྨ་ཚེ་དཔག་མེད༔ སྟོང་ཉིད་གོས་དཀར་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ མེ་ཡི་ཁམས་ནས་བཅུད་བསྡུས་ལ༔ དྲོད་ཀྱི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐོབ༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ བྱང་ཕྱོགས་ལས་རབ་ཞིང་ཁམས་ནས༔ བཅོམ་ལྡན་ཀརྨ་ཚེ་དཔག་མེད༔ སྟོང་ཉིད་སྒྲོལ་མ་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ འབྱུང་བ་རླུང་གི་བཅུད་བསྡུས་ལ༔ དབུགས་ཀྱི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐོབ༔ ཚེ་བསོད་དཔལ་ཡོན་འདིར་（13བ）སྩོལ་ཅིག༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ་ཛཿ འགུགས་བྱེད་ལས་ཀྱི་ཕོ་ཉ་མོ༔ སྙིང་རྗེའི་མགྱོགས་མ་ལྕགས་ཀྱུ་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ ཤར་ཕྱོགས་དྲི་ཟ་མེ་ལྷའི་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་ཧཱུྃ༔ འཆིང་བྱེད་ལས་ཀྱི་ཕོ་ཉ་མོ༔ བྱམས་པའི་མགྱོགས་མ་ཞགས་པ་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ ལྷོ་ཕྱོགས་གཤིན་རྗེ་སྲིན་པོའི་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་བྃ༔ སྡོམ་བྱེད་ལས་ཀྱི་ཕོ་ཉ་མོ༔ དགའ་བའི་མགྱོགས་མ་ལྕགས་སྒྲོག་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ ནུབ་ཕྱོགས་ཆུ་བདག་རླུང་ལྷའི་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་ཧོཿ འབེབས་བྱེད་ལས་ཀྱི་ཕོ་ཉ་མོ༔ བཏང་སྙོམས་མགྱོགས་མ་དྲིལ་བུ་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ བྱང་ཕྱོགས་གནོད་སྦྱིན་དབང་ལྡན་ཚེ༔ （14ན）བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ་ཨཱཿ ལྷུན་གྲུབ་ལས་ཀྱི་ཕོ་ཉ་མོ༔ ནམ་མཁའི་དབྱིངས་ཕྱུག་དཔལ་མོ་བཙུན༔ ཡེ་ཤེས་རྩལ་ཆེན་ཤུགས་ཕྱུངས་ལ༔ སྟེང་འོག་ཚངས་པ་ས་བདག་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་སུཾ༔ ལེགས་ཉེས་སྟངས་འཛིན་ཕོ་ཉ་མོ༔ སྣོད་བཅུད་བདག་མོ་དཔལ་འབར་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ སྣོད་བཅུད་འབྱུང་བའི་བཅུད་ཚེ་དཔལ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཕ་ལ་ཧཱུྃ༔ （ཞེས་དང་། གྲངས་གསོག་ན་ཚེ་འགུགས་ཐུགས་རྗེའི་ལྕགས་ཀྱུ་བྱ་སྟེ།） ན་མོ༔ དཀོན་མཆོག་རྩ་གསུམ་ཆོས་སྐྱོང་བདེན་པ་དང་༔ ཆོས་ཉིད་རྣམ་དག་རྒྱུ་འབྲས་ཟབ་མོའི་མཐུས༔ རྒྱལ་བ་སྲས་བཅས་མཁྱེན་བརྩེ་ནུས་དཔལ་དང་༔ ཁམས་གསུམ་སྣོད་བཅུད་（14བ）བཀྲག་མདངས་ཚེ་དཔལ་ཀུན༔ མ་ལུས་ལུས་པ་མེད་པར་འདིར་ཁུག་ཅིག༔ བདག་གི་ཚེ་བསོད་དཔལ་ཡོན་བཅུད་དུ་དྲིལ༔ འཆི་མེད་མགོན་པོའི་གོ་འཕང་མྱུར་ཐོབ་ཤོག༔ ཨོཾ་ཚེ་བྷྲཱུཾ་གཡུ་བྷྲཱུཾ་གཡུ་ཚེ་བྷྲཱུཾ་ཨཱ་ཡརྫྙཱ་ན་གཡུ་ཚེ་བྷྲཱུཾ༔ （ཞེས་གྲངས་ཅི་མང་གསོག །མཐར་རྒྱས་གདབ་པ་ནི།） ཧཱུྃ་ཧྲཱིཿ དུས་གསུམ་རྒྱལ་བ་ཐམས་ཅད་ཀྱི༔ སྐུ་ཡི་ས་བོན་ཨོཾ་དཀར་པོ༔ སྤྱི་བོ་ནས་ཞུགས་ལུས་ལ་ཐིམ༔ རྡོ་རྗེ་སྐུ་ཡིས་རྒྱས་གདབ་བོ༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུཾ༔ ཨཱཿ གསུང་གི་ས་བོན་ཨཱཿདམར་པོ༔ མགྲིན་པ་ནས་ཞུགས་ངག་ལ་ཐིམ༔ རྡོ་རྗེ་གསུང་གིས་རྒྱས་གདབ་བོ༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུཾ༔ ཨཱཿཧཱུཾ་བྷཱུཾ༔ ཧཱུྃ༔ ཐུགས་ཀྱི་ས་བོན་ཧཱུྃ་མཐིང་ནག༔ སྙིང་ག་ནས་ཞུགས་ཡིད་ལ་ཐིམ༔ རྡོ་རྗེ་ཐུགས་ཀྱིས་རྒྱས་གདབ་བོ༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུཾ༔ ཕྱོགས་བཅུའི་རྒྱལ་བ་སྲས་བཅས་ཀྱི༔ ཡེ་ཤེས་ཡོན་ཏན་ཚེ་དཔལ་ཀུན༔ གསེར་མདོག་འོད་ཀྱི་རྣམ་པར་བསྡུས༔ བདག་གི་（15ན）གནས་ལྔ་ནས་བཞུགས་ཏེ༔ ཡེ་ཤེས་ཡོན་ཏན་ཚེ་དཔལ་བསྐྱེད༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུཾ༔ ཧཱུྃ༔ སྣོད་བཅུད་འབྱུང་བའི་ཚེ་དཔལ་བསྐྱེད༔ ལྷ་འདྲེས་བརྐུས་དང་འཁྱམས་པའི་ཚེ༔ འོད་ཀྱི་རྣམ་པར་འུབ་ཏུ་འདུས༔ བདག་གི་སྒོ་གསུམ་ལ་ཐིམ་པས༔ མི་ཤིགས་རྡོ་རྗེས་རྒྱས་གདབ་བོ༔ ཨོཾ་བཛྲ་ཨཱ་ཡུ་ཥེ་སྭཱ་ཧཱ༔ ཧཱུྃ་ཧྲཱིཿ ཆོས་དབྱིངས་ཡེ་ཤེས་ངོ་བོ་ཉིད༔ མི་ཤིགས་རྡོ་རྗེའི་གོ་ཁྲབ་མཁྲེགས༔ ཡེ་ཤེས་མེ་ལྕེའི་དྲྭ་བ་འཁྲིགས༔ འགྱུར་མེད་རང་བྱུང་ལྷུན་གྲུབ་བོ༔ ཨོཾ་ངྷརྨ་ངྷ་ཏུ་བཛྲ་རཀྵ་རཀྵ་ཧཱུྃ་བྷྲཱུཾ་སྭཱ་ཧཱ༔ （ཞེས་རྒྱས་གདབ་བོ། །དེ་དག་ནི་དངོས་གཞིའི་ལས་རིམ་མོ། །） （གསུམ་པ་རྗེས་ཀྱི་ལས་རིམ་ལ་གསུམ། ཐུན་མོང་དུ་ཚེ་གེགས་བསལ་ཞིང་བསོད་ནམས་སྤེལ་བའི་ཕྱིར་ཚོགས་སྐོང་གི་རིམ་པ། རྗེས་དངོས་གཞི་གྲོལ་བའི་གྲུབ་འབྲས་ལ་ལོངས་སྤྱོད་པ། ཆོ་གའི་རྗེས་ཀྱི་བྱ་བ་མཐར་དབྱུང་བའོ། །） （དང་པོ་ནི། ཐབས་ཤེས་ཀྱི་དམ་རྫས་གཙོ་བོར་གྱུར་པའི་ཚོགས་ཀྱི་ཡོ་བྱད་ལྗོན་འབྲས་བཟང་པོ་སོགས་ལོངས་སྤྱོད་གྱ་ནོམ་པ་དང་། ལྷག་པར་འབྲུ་མར་རྩི་མར་གང་འབྱོར་གྱི་སྣང་གསལ་མར་མེ་གང་མང་སྦར། ཚོགས་（15བ）རྫས་ལ་བདུད་རྩིས་བྲན་ཏེ།） ཨོཾ་སརྦ་དྲ་བྱཾ་ཤོ་ངྷ་ནི་ཧཱུྃ་ཕཊ༔ ཧཱུྃ་ཧྲཱིཿ རང་ཉིད་ཡེ་ཤེས་ལྷ་ཡི་ཐུགས་ཀ་ནས༔ འབྱུང་བའི་སྙིང་པོ་རྃ་ཡྃ་ཁྃ་གསུམ་འཕྲོས༔ རྃ་ལས་མེ་འབར་རྣམ་པར་རྟོག་སྒྲིབ་བསྲེགས༔ ཡྃ་ལས་རླུང་བྱུང་འཁོར་བའི་བག་ཆགས་གཏོར༔ ཁྃ་ལས་ཆུ་བྱུང་གཉིས་འཛིན་དྲི་མ་སྦྱངས༔ རྃ་ཡྃ་ཁྃ༔ སླར་ཡང་སྙིང་པོ་འབྲུ་གསུམ་རབ་ཏུ་འཕྲོས༔ ཨོཾ་གྱིས་སྐུ་ཡི་བདུད་རྩི་ཁ་དོག་དཀར༔ ཨཱཿཡིས་གསུང་གི་བདུད་རྩི་དམར་གསལ་འཁྱིལ༔ ཧཱུཾ་གིས་ཐུགས་ཀྱི་བདུད་རྩི་མཐིང་གར་འཁྱིལ༔ ཨོཾ་ཨཱཿཧཱུྃ༔ （ལན་གསུམ།） གསང་བའི་སྙིང་པོ་འབྲུ་གསུམ་རབ་འཕྲོས་པའ༔ འདོད་ཡོན་མི་ཟད་རྒྱན་གྱི་འཁོར་ལོར་སྤེལ༔ ཁམས་གསུམ་འཁོར་བའི་རྒྱ་མཚོ་མ་སྟོངས་བར༔ རྒྱལ་བའི་ཞིང་ཁམས་རྒྱ་མཚོ་ཇི་སྙེད་དུ༔ མཆོད་སྤྲིན་རྒྱ་མཚོ་རྒྱུན་མི་ཆད་པར་སྤྲོས༔ ཧ་ཧ་ཧྲཱིཿ （ཞེས་བྱིན་བརླབས། ཚོགས་ཞིང་སྤྱན་དྲང་བ་ནི།） ཧཱུྃ་ཧྲཱིཿ སྲིད་ལས་དཔག་ཚད་བརྒྱད་ཁྲི་འདས་པའི་ཚལ༔ གཞི་དང་སྙིང་པོ་མེ་ཏོག་བརྒྱན་པའི་ཞིང་༔ བདེ་ཆེན་པདྨ་བཀོད་པའི་གཞལ་（16ན）ཡས་ནས༔ རིགས་འདུས་བདག་ཉིད་འཆི་མེད་མགོན་པོ་ལ༔ ཚེ་དབང་རིག་འཛིན་དཔའ་བོ་དཔའ་མོས་བསྐོར༔ དམ་ཚིག་ཐུགས་རྗེ་དབང་གིས་སྐུར་བཞེངས་ལ༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ དབུས་ཕྱོགས་སྟུག་པོ་བཀོད་པའི་གཞལ་ཡས་ནས༔ བཅོམ་ལྡན་རྣམ་སྣང་རྒྱལ་པོ་ཚེ་དཔག་མེད༔ སངས་རྒྱས་རིགས་ཀྱི་དཔའ་བོ་མཁའ་འགྲོས་བསྐོར༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ ཤར་ཕྱོགས་མངོན་པར་དགའ་བའི་ཞིང་ཁམས་ནས༔ བཅོམ་ལྡན་མི་འགྱུར་རྡོ་རྗེ་ཚེ་དཔག་མེད༔ རྡོ་རྗེ་རིགས་ཀྱི་དཔའ་བོ་མཁའ་འགྲོས་བསྐོར༔ ཞལ་ཟས་ཚོགས་ལ་སྤྱན་འདྲེན༴ ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས༔ བཅོམ་ལྡན་རིན་ཆེན་རྒྱལ་པོ་ཚེ་དཔག་མེད༔ རིན་ཆེན་རིགས་ཀྱི་དཔའ་བོ་མཁའ་འགྲོས་བསྐོར༔ ཞལ་ཟས་ཚོགས་ལ༴ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ བཅོམ་ལྡན་སྣང་བ་མཐའ་ཡས་ཚེ་དཔག་མེད༔ པདྨ་རིགས་ཀྱི་（16བ）དཔའ་བོ་མཁའ་འགྲོས་བསྐོར༔ ཞལ་ཟས་ཚོགས་ལ༴ བྱང་ཕྱོགས་ལས་རབ་རྫོགས་པའི་ཞིང་ཁམས་ནས༔ བཅོམ་ལྡན་དོན་གྲུབ་རྒྱལ་པོ་ཚེ་དཔག་མེད༔ ཕྲིན་ལས་རིགས་ཀྱི་དཔའ་བོ་མཁའ་འགྲོས་བསྐོར༔ ཞལ་ཟས་ཚོགས་ལ༴ འབྱུང་ལྔ་རྣམ་པར་དག་པའི་དབྱིངས་ཆེན་མོ༔ ཚེ་ཡི་ལྷ་མོ་མགྱོགས་མ་རྣམ་ལྔ་ལ༔ འབུམ་ཕྲག་ཡངས་པའི་མཁའ་འགྲོ་མ་ཡིས་བསྐོར༔ ཞལ་ཟས་ཚོགས་ལ༴ ཕྱོགས་ལས་རྣམ་པར་རྒྱལ་བའི་ཕོ་བྲང་ནས༔ ལྷ་ཡི་བླ་མ་ཚོགས་ཀྱི་བདག་པོ་ལ༔ འཇིག་རྟེན་སྲིད་པ་རྒྱ་མཚོའི་འཁོར་གྱིས་བསྐོར༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛ༔ （ཞེས་ཚོགས་མགྲོན་ནམ་མཁའ་གང་བར་སྤྱན་དྲངས་ལ། ཚོགས་ཀྱི་ཆ་དང་པོ་ཕུད་ཀྱི་ཚུལ་དུ་འབུལ་བ་ནི།） ཧཱུྃ་ཧྲཱིཿ དུས་གསམ་རྒྱལ་བའི་སྤྱི་གཟུགས་ཚེ་མཐའ་ཡས༔ རིགས་ཀུན་བདག་ཉིད་རིགས་ལྔ་གངས་ཆེན་མཚོ༔ འབྱུང་བ་རྣམ་དག་དབྱིངས་ཀྱི་ཡུམ་ཆེན་ལྔ༔ ཚད་མེད་ཕྱག་རྒྱའི་ལྷ་མོ་མགྱོགས་མ་ལྔ༔ བསྙེན་སྒྲུབ་དཀྱིལ་འཁོར་ལྷ་ཚོགས་མ་ལུས་ལ༔ ཞལ་（17ན）ཟས་ཚོགས་ཀྱི་མཆོད་པ་དམ་པ་འབུལ༔ གཟི་བྱིན་དབང་དང་དངོས་གྲུབ་མྱུར་དུ་སྩོལ༔ གུ་རུ་དེ་ཝ་ངྷཱ་ཀི་ནཱི་སརྦ་ག་ཎ་ཙཀྲ་ལ་ཁཱ་ཧི༔ （ཞེས་འབུལ། ཆ་བར་པ་ཉམས་ཆག་བཤགས་ཤིང་ཐུགས་དམ་བསྐང་བའི་ཆེད་དུ་འབུལ་བ་ནི༔ ） ཧོཿ དཀྱིལ་འཁོར་ལྷ་ཚོགས་མ་ལུས་དགོངས་སུ་གསོལ༔ བདག་ཅག་མ་རིག་འཁྲུལ་པའི་དབང་གྱུར་ཏེ༔ སྒོ་གསུམ་བག་མེད་དམ་ཚིག་ཉམས་ཆག་སྒྲིབ༔ མི་འཆབ་མི་སྦེད་གནོང་འགྱོད་དྲག་པོ་ཡིས༔ ཞལ་ཟས་ཚོགས་འབུལ་བསྐང་ཞིང་བཤགས་པར་བགྱི༔ མི་སྒྲིབ་ཚངས་པའི་དངོས་གྲུབ་སྩལ་དུ་གསོལ༔ ཨོཾ་ག་ཎ་ཙཀྲ་སཏྭ་ས་མ་ཡ་（སོགས་ཡིག་བརྒྱ་བཟླས་པས་ཉམས་ཆག་བཤགས་ནས། ཚོགས་རྫས་མཆོད་སྐོང་གི་རྫས་འདོད་ཡོན་གྱི་ལོངས་སྤྱོད་ནམ་མཁའ་གང་བར་སྤྲོས་ཏེ།） ཧཱུྃ་ཧྲཱིཿ འོག་མིན་ཆོས་དབྱིངས་ཕོ་བྲང་ནས༔ ཀུན་ཏུ་བཟང་པོའི་ཐུགས་དམ་བསྐང་༔ མི་འགྱུར་གཞོམ་བྲལ་ཐིག་ལེའི་སྐུ༔ རྡོ་རྗེ་སེམས་དཔའི་ཐུགས་དམ་བསྐང་༔ གཞོན་ནུ་བུམ་སྐུར་རྫོགས་སངས་རྒྱས༔ དགའ་རབ་རྡོ་རྗེའི༴ ཀ་དག་དབྱིངས་སུ་ལྷུན་འབྱམས་རོལ༔ ཤྲཱི་（17བ）སེངྷའི༴ ཡེ་ཤེས་སྒྱུ་མ་ཟང་ཐལ་སྐུ༔ པདྨ་འབྱུང་གནས༴ འཕོ་བ་ཆེན་པོའི་དབྱིངས་སུ་གཤེགས༔ ཡེ་ཤེས་མཚོ་རྒྱལ༴ སྐུ་གསུམ་ལྷུན་གྲུབ་གདིང་ཆེན་ཐོབ༔ ཁྱེའུ་ཆུང་ལོ་ཙཱའི༴ དཀྱིལ་འཁོར་ཡོངས་ཀྱི་ཁྱབ་བདག་དཔལ༔ རྩ་བའི་བླ་མའི༴ ཐུགས་དམ་བསྐང་བའི་དམ་རྫས་ནི༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟ་གསང་བའི་རྫས༔ སྦྱོར་སྒྲོལ་ཏན་གན་རྨད་བྱུང་རྫས༔ ལུས་དང་ལོངས་སྤྱོད་ཚོགས་ཀྱིས་བསྐང་༔ སྡོམ་དང་བསླབ་པ་དམ་ཉམས་བཤགས༔ ཧཱུྃ་ཧྲཱིཿ ལྷུན་གྲུབ་གསང་ཆེན་གཞལ་ཡས་ནས༔ འཆི་མེད་མགོན་པོའི༴ ཤར་ཕྱོགས་མངོན་དགའི་ཞིང་ཁམས་ནས༔ མི་བསྐྱོད་རྡོ་རྗེའི༴ ལྷོ་ཕྱོགས་དཔལ་ལྡན་ཞིང་ཁམས་ནས༔ རིན་ཆེན་འབྱུང་ལྡན༴ ནུབ་ཕྱོགས་བདེ་ཆེན་ཞིང་ཁམས་ནས༔ སྣང་བ་མཐའ་ཡས༴ བྱང་ཕྱོགས་ལས་རབ་ཞིང་ཁམས་ནས༔ དོན་ཡོད་གྲུབ་པའི༴ ཁྱབ་བརྡལ་ནམ་མཁའི་དབྱིངས་ཆེན་མོ༔ གསང་བ་ཡེ་ཤེས༴ མཉེན་པ་ཆུ་ཡི་དབྱིངས་（18ན）ཆེན་མོ༔ མཱ་མ་ཀཱི་ཡི༴ སྲ་བ་ས་ཡི་དབྱིངས་ཆེན་མོ༔ སངས་རྒྱས་སྤྱན་མའི༴ དྲོ་བ་མེ་ཡི་དབྱིངས་ཆེན་མོ༔ ན་བཟའ་དཀར་མོའི༴ བསྐྱོད་པ་རླུང་གི་དབྱིངས་ཆེན་མོ༔ དམ་ཚིག་སྒྲོལ་མའི༴ སྙིང་རྗེས་ཁམས་གསུམ་འགུགས་བྱེད་མ༔ ལྕགས་ཀྱུ་མ་ཡི༴ བྱམས་པས་འགྲོ་ཀུན་སྐྱོབ་བྱེད་མ༔ ཞགས་པ་མ་ཡི༴ དགའ་བས་འགྲོ་ཀུན་རྗེས་འཛིན་མ༔ ལྕགས་སྒྲོག་མ་ཡི༴ བཏང་སྙོམས་འཁོར་བ་དོང་སྤྲུགས་མ༔ དྲིལ་བུ་མ་ཡི༴ དཀྱིལ་འཁོར་བར་ཁྱམས་འཁོར་ཡུག་ཏུ༔ སྒྱུ་འཕྲུལ་རོལ་པའི༴ ཕྲིན་ལས་ལས་ཀྱི་སྒོ་བཞི་རུ༔ སྒོ་སྐྱོང་ཚོགས་ཀྱི༴ ཐུགས་དམ་བསྐང་བའི་དམ་རྫས་ནི༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟ་གསང་བའི་རྫས༔ སྦྱོར་སྒྲོལ་ཏན་གན་རྨད་བྱུང་རྫས༔ ལུས་དང་ལོངས་སྤྱོད་ཚོགས་ཀྱིས་བསྐང་༔ སྡོམ་དང་བསླབ་པ་དམ་ཉམས་བཤགས༔ ཧཱུྃ་ཧྲཱིཿ དུར་ཁྲོད་ཧེ་ཆེན་བརྡལ་བ་ནས༔ གནོད་སྦྱིན་ཆེན་པོའི༴ ནམ་མཁའ་ཡངས་（18བ）པའི་ཀློང་དཀྱིལ་ནས༔ གཟའ་བདུད་ནག་པོའི༴ སུམ་ཅུ་རྩ་གསུམ་ལྷ་གནས་སུ༔ ལྷ་ཆེན་ཚོགས་བདག༴ རྒྱལ་བའི་བཀའ་ཡི་གཉེར་འཛིན་པ༔ བཀའ་སྲུང་གཉན་པོའི༴ ལེགས་ཉེས་གཉིས་ཀྱི་སྟངས་འཛིན་པ༔ སྲིད་པའི་རྒྱལ་མོའི༴ བོད་ཁམས་སྐྱོང་ཞིང་བསྟན་ལ་གདུང་༔ བརྟན་མ་བཅུ་གཉིས་ཐུགས༴ ཐུགས་དམ་བསྐང་བའི་དམ་རྫས་ནི༔ ཉེར་སྤྱོད་བདུན་དང་འདོ་ཡོན་ལྔ༔ སྨན་གཏོར་རཀྟ་གསང་བའི་རྫས༔ སྦྱོར་སྒྲོལ་ཏན་གན་རྨད་བྱུང་རྫས༔ ལུས་དང་ལོངས་སྤྱོད་ཚོགས་ཀྱིས་བསྐང་༔ སྡོམ་དང་བསླབ་པ་དམ་ཉམས་བཤགས༔ ཧོཿ ཕྱོགས་བཅུ་སྤྲུལ་པའི་ཞིང་ཁམས་སུ༔ གང་འདུལ་མཛད་ལ་རྗེས་ཡི་རང་༔ འགྲོ་བའི་རིགས་བརྒྱུད་དང་བསྟུན་པའི༔ ཐེག་པའི་ཆོས་འཁོར་བསྐོར་བར་བསྐུལ༔ ཁམས་གསུམ་འཁོར་བ་མ་སྟོང་བར༔ མྱ་ངན་མི་འདའ་བཞུགས་གསོལ་འདེབས༔ དུས་གསུམ་བསགས་པའི་དགེ་རྩ་ཀུན༔ བླ་མེད་མཆོག་གི་རྒྱུ་རུ་བསྔོ༔ ནམ་མཁའི་མཐའ་མཉམ་སེམས་ཅན་ཀུན༔ （19ན）སྐུ་གསུམ་དབྱིངས་སུ་སངས་རྒྱས་ཤོག༔ （ཅེས་ཐུགས་དམ་བསྐང་ངོ་། །ཆ་ཐ་མ་ཚེ་གེགས་འབྱུང་པོ་བསྒྲལ་བསྟབ་ཀྱི་ཚུལ་དུ་འབུལ་བ་ནི།） ཆ་གསུམ་པ་དེའི་འདོད་ཡོན་གྱི་ལྷ་མོ་ཧཱུཾ་གིས་རང་ལ་བསྡུས་ནས། ནྲྀ་ཏྲི་བཛྲ་ཨཾ་ཀུ་ཤ་ཛཿ ཛཿཧཱུྃ་བྃ་ཧོཿ （ཞེས་ཚེ་གེགས་འབྱུང་པོ་ཐམས་ཅད་བཀུག་ཅིང་བསྟིམ་ནས་ཕུར་བུས་གཟིར་ཞིང་གདབ་ལ།） ཧཱུྃ་ཧྲཱིཿ དུས་གསུམ་སངས་རྒྱས་ཡོངས་འདུས་ཆེ་བའི་མཆོག༔ མངོན་སྤྱོད་མཐུ་ལྡན་པདྨ་ཧེ་རུ་ཀ༔ དྲག་པོའི་ཕྲིན་ལས་མྱུར་མཛད་དུས་ལ་བབ༔ མ་གཡེལ་དམ་ཚིག་མཉན་པོ་གནད་ནས་བསྐུལ༔ ཕྱི་དགྲ་ཀླ་ཀློ་ལྟ་ལོག་རྡུལ་དུ་རློགས༔ ནང་དགྲ་བསྟན་བཤིག་བཀའ་ལོག་དམ་ཉམས་སོད༔ གསང་དགྲ་བསླུ་བྱེད་དམ་སྲི་འབྱུང་པོ་ཐུལ༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ ཕུང་ཁམས་སྐྱེ་མཆེད་ཐལ་བ་རྡུལ་དུ་རློགས༔ ཨོཾ་བཛྲ་ཀྲོ་ངྷ་ཧྱ་གྲཱྀ་ཝ་ཧྲཱིཿནྲྀ་ཏྲི་སརྦ་ཤ་ཏྲུཾ་མཱ་ར་ཡ་རྦད་སོད༔ （ཅེས་རྣམ་ཤེས་སྤར་བའི་ཕུང་པོ་བདུད་རྩིར་སྦར་ལ།） ཧཱུྃ་ཧྲཱིཿ མ་རིག་ལོག་རྟོག་བསྒྲལ་བ་ཡི༔ ཕུང་ཁམས་སྐྱེ་མཆེད་དབང་ཡུལ་བཅས༔ དཀྱིལ་འཁོར་ལྷ་ཚོགས་ཞལ་དུ་བསྟབ༔ （19བ）རྗེས་ཤུལ་ལྷག་མ་མེད་པར་རོལ༔ རུ་ཏྲ་ཧ་ལ་པཉྩ་ཁཱ་ཧི༔ （ཞེས་བསྒྲལ་བསྟབ་བྱའོ། །） （གཉིས་པ་དངོས་གཞི་གྲོལ་བའི་གྲུབ་འབྲས་ལ་ལོངས་སྤྱོད་པ་ལའང་གཉིས་ལས། དང་པོ་བདག་དོན་དུ་དངོས་གྲུབ་བླང་བ་ལ། ཐོག་མར་དངོས་གྲུབ་བསྡུ་བའི་ཛཔྲ་དགོངས་ནི། སླར་ཡང་ཚེ་རྫས་རྣམས་ལ་དམིགས་ཏེ།） ཚེ་ཡི་རིག་འཛིན་ཆོས་སྲུང་ཚོགས་རྣམས་ཀྱིས། །འཁོར་འདས་ཀུན་གྱི་ཚེ་ཡི་དངོས་གྲུབ་ཀུན། །དཀར་དམར་འོད་ཀྱི་རྣམ་པ་ཅན་དུ་བསྡུས། །ཚེ་ཡི་རྫས་རྣམས་ཀུན་ལ་ཐིམ་པ་ཡིས། །འཆི་བ་མེད་པའི་བདུད་རྩིའི་མཆོག་ཏུ་གྱུར། །（ཞེས་དམིགས་ལ། སྩ་སྔགས་ཤམ་དུ།） ཨོཾ་བྷྲཱུཾ་ཚེ་བྷྲཱུཾ་གཡུ་བྷྲཱུཾ་གཡུ་ཚེ་བྷྲཱུཾ་ཨཱ་ཡུརྫྙཱ་ན་གཡུ་ཚེ་བྷྲཱུཾ༔ （ཞེས་བཏགས་པ་བརྒྱ་རྩ་ལས་མི་ཉུང་བ་བཟླས་མཐར། སྤོས་དང་རོལ་མོས་གཟི་བྱིན་བསྐྱེད་དེ་ཚེའི་བྱིན་འབེབས་དངོས་གྲུབ་སྦྲང་ཆར་བཏང་ལ་དངོས་གྲུབ་བསྐུལ། དེ་ནས་སྒྲུབ་རྫས་རྣམས་སྤྱི་བོར་བླངས་ལ།） ཧཱུྃ༔ དཀྱིལ་འཁོར་ལྷ་ཚོགས་མ་ལུས་དགོངས་སུ་གསོལ༔ སྒྲུབ་པའི་རིག་འཛིན་རྣལ་འབྱོར་བདག་ཉིད་ཀྱིས༔ བསྙེན་སྒྲུབ་ལས་སྦྱོར་དུས་འདིར་མཐར་སོན་ཏེ༔ དམ་བཅའ་ཚད་དུ་ཕྱིན་པའི་གནས་སྐབས་འདིར༔ མ་（20ན）གཡེལ་ཐུགས་རྗེ་བརྩེ་བ་ཆེན་པོ་ཡིས༔ དབང་བྱིན་དངོས་གྲུབ་མ་ལུས་འདིར་སྩོལ་ཅིག༔ （ཅེས་དང་།） ཧྲཱིཿ ནམ་མཁའི་མཐའ་ཁྱབ་སྐུ་མངའ་འགྲན་དུ་མེད༔ འགྱུར་མེད་སྐུ་ཡི་དངོས་གྲུབ་སྩལ་དུ་གསོལ༔ འགྲོ་དྲུག་སྒྲོལ་མཛད་ཆོས་ཀྱི་འབྲུག་སྒྲ་སྒྲོགས༔ འགགས་མེད་གསུང་གི་དངོས་གྲུབ༴ ཡེ་ཤེས་རྡོ་རྗེ་སྤྲོས་བྲལ་འགྱུར་བ་མེད༔ འཁྲུལ་མེད་ཐུགས་ཀྱི༴ ས་གཞི་ལྟ་བུར་ཡོན་ཏན་ཟད་མི་ཤེས༔ ཡོན་ཏན་ལྷུན་གྲུབ༴ ཆོ་འཕྲུལ་སྣ་ཚོགས་འགྲན་མེད་ཉི་ཟླའི་ཚུལ༔ ཕྲིན་ལས་འགྲོ་འདུལ༴ འཆི་མེད་ཚེ་ཡི་དངོས་གྲུབ༴ འཛད་མེད་ནོར་གྱི༴ ཐུན་མོང་ཡིད་བཞིན༴ བླ་མེད་མཆོག་གི་དངོས་གྲུབ་སྩལ་དུ་གསོལ༔ རྒྱལ་བ་ཐུགས་རྗེའི་རང་བཞིན་ལ༔ རྟག་པར་བསྐུལ་ཏེ་མི་འཚལ་ཏེ༔ ད་ལྟ་ཐུགས་དམ་གནད་ནས་བསྐུལ༔ སྒྲུབ་པའི་ཞག་གྲངས་ཐེམས་ལགས་སོ༔ རྡོ་རྗེ་སྲིན་པོའི་ནམ་ལངས་སོ༔ ཛཔྲ་བསྙེན་ཀུན་ཀྱང་ཐེམས་ལགས་སོ༔ དབང་བཞི་བསྐུར་བའི་དུས་ལ་བབ༔ བྱིན་ཆེན་འབེབས་（20བ）པའི་དུས་ལ་བབ༔ དངོས་གྲུབ་སྩོལ་བའི་དུས་ལ་བབ༔ དབང་ཆེན་རྣམས་ཀྱི་དབང་བསྐུར་ཅིག༔ བྱིན་ཆེན་རྣམས་ཀྱིས་བྱིན་ཕོབ་ཅིག༔ དངོས་གྲུབ་ཆེན་པོ་སྩོལ་རེ་རན༔ ཚེ་ཡི་དངོས་གྲུབ་མ་ལུས་ཀུན༔ སྒྲུབ་མཆོག་རྣམས་ལ་སྩལ་དུ་གསོལ༔ ཨོཾ་པུཎྱེ་པུཎྱེ༔ མ་ཧཱ་པུཎྱེ༔ ཨ་པ་རི་མི་ཏ་ཨཱ་ཡུརྫྙཱ་ན་སརྦ་རཱུ་པ་སིདྡྷི་སྭཱ་ཧཱ༔ ཀཱ་ཡ་སིདྡྷི་ཨོཾ༔ ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ སརྦ་སིདྡྷི་ཕ་ལ་ཧོཿ （ཞེས་ཚེ་རྟེན་བུམ་པ་དང་ཚེ་འབྲང་གནས་གསུམ་དུ་རེག་ཅིང་བུམ་བཅུད་བདུད་རྩི་མྱང་། དེ་ནས་ཐབས་ཤེས་ཀྱི་ཚེ་རྫས་ལག་གཡས་གཡོན་དུ་བླངས་ལ་མ་ནོར་བར་ལོངས་སྤྱོད། ཚེ་མདའ་གནས་ལྔར་གཏུག་ཅིང་། རྒྱས་གདབ་པ་ནི།） ཨོཾ་བྷྲཱུཾ་ཏྲ་ཏྲ་ཤག༔ མུ་དྲ་ཧོཿ ཏིཥྛ་ལྷན༔ ཞེས་བདུན་ནམ་ཉེར་གཅིག་ཙམ་བཟླས་ནས། སྙིང་པོ་བསྐྱོད་པར་མི་ནུས་ཏེ༔ རྡོ་རྗེ་འཆང་གི་ཚེ་གཡང་འདི༔ སྤྲོས་པས་སྟོང་གསུམ་བཀྲག་དང་ལྡན༔ བསྡུས་པས་ཐུགས་སྲོག་ནྲྀ་ལ་ཐིམ༔ བསྲུངས་པས་ལུས་ལ་གཟི་མདངས་བསྐྱེད༔ བཅིངས་པས་རྡོ་རྗེ་ལུ་གུ་རྒྱུད༔ མི་ཤིགས་རྡོ་རྗེའི་ལྕགས་སྒྲོག་འདྲ༔ མི་འགྱུར་（21ན）དབྱིངས་སུ་ཚེ་སྦའོ༔ ཆོས་དབྱིངས་ཀློང་དུ་ཚེ་སྦས་པས༔ དུས་གསུམ་སངས་རྒྱས་དགྲར་ལངས་ཀྱང་༔ དེ་ལ་བཟུང་ཞིང་སྤྱད་དུ་མེད༔ བློ་འདས་འཆི་མེད་དགོངས་པའོ༔ ཨ་ཨ་ཨཿ （ཞེས་རྒྱས་གདབ་ལ་མཉམ་པར་བཞག །ཚོགས་ཀྱི་དགའ་སྟོན་ལ་ལོངས་སྤྱོད་ཅིང་ཤིས་པ་རྒྱ་ཆེར་བརྫོད་པས་དགེ་ལེགས་སུ་བྱའོ། །） （གཉིས་པ་གཞན་དོན་དབང་བསྐུར་བའི་རིམ་པ་ནི། སློབ་མ་ཐུན་མོང་མ་ཡིན་པ་ལ་གཏེར་གཞུང་གི་དབང་ཆོག་གསང་ཆེན་བཅུད་དྲིལ་ལྟར་མཚམས་སྦྱོར་དང་བཅས་ཏེ་འདིར་དབང་བསྐུར་བྱ་བ་ཡིན་ཅིང་། སློབ་མ་དད་སྦྱིན་ཐུན་མོང་བ་ལ་དངོས་གྲུབ་སྦྱིན་པའི་ཆེད་དུ་སྒྲུབ་རྟེན་བུམ་པ་དང་ཚེ་འབྲང་གནས་གསུམ་དུ་རེག་ཅིང་།） ཧོཿ བདེ་མཆོག་བདེ་སྤྱོད་ནམ་མཁའི་ཀློང་ཡངས་ནས༔ རྒྱལ་བའི་དཀྱིལ་འཁོར་སྲས་བཅས་ཐུགས་དམ་ཅན༔ རིགས་འདུས་ཚེ་ཡི་ལྷ་ཚོགས་འཁོར་བཅས་ཀྱི༔ སྐུ་གསུང་ཐུགས་དང་མཉམ་སྤྱོད་དངོས་གྲུབ་མཆོག༔ ཕྲིན་ལས་རྣམ་བཞི་ལྷུན་གྱིས་གྲུབ་པའི་དཔལ༔ བུམ་པ་བཟང་པོ་དཔག་བསམ་ནོར་བུའི་ཚུལ༔ ད་ལྟ་ཉིད་དུ་བདག་ལ་སྩལ་དུ་གསོལ༔ འགྱུར་མེད་སྐུ་ཡི་དངོས་གྲུབ་སྩལ་དུ་གསོལ༔ （21བ）འགགས་མེད་གསུང་གི་དངོས་གྲུབ་སྩལ་དུ་གསོལ༔ འཁྲུལ་མེད་ཐུགས་ཀྱི་དངོས་གྲུབ༴ ཡོན་ཏན་རེ་སྐོང་༴ ཕྲིན་ལས་འགྲོ་འདུལ༴ འཆི་མེད་ཚེ་ཡི༴ འཛད་མེད་ནོར་གྱི༴ བརྒྱུད་འཛིན་རིགས་ཀྱི༴ དམ་པ་ཆོས་ཀྱི༴ བླ་མེད་མཆོག་གི་དངོས་གྲུབ་སྩལ་དུ་གསོལ༔ ཀཱ་ཡ་སིདྡྷི་ཨོཾ༔ ཝཱ་ཀ་སིདྡྷི་ཨཱཿཙིཏྟ་སིདྡྷི་ཧཱུྃ༔ ཨཱ་ཡུརྫྙཱ་ན་སརྦ་སིདྡྷི་ཕ་ལ་ཧོཿ （ཞེས་ཚེ་ཆུ་ཚེ་རིལ་ཚེ་ཆང་སོགས་ལ་ལོངས་སྤྱད་དུ་གཞུག །མདའ་དར་གྱིས་སྔར་བཞིན་རྒྱས་གདབ་ལ་ཤིས་པ་བརྗོད་པས་བདེ་ལེགས་སུ་བྱའོ། །གང་ལྟར་ཡང་མཐར་དགའ་སྟོན་ཚོགས་ཀྱི་དམ་རྫས་བརྡ་དང་བརྡ་ཡི་འབུལ་ལེན་དང་བཅས་ནང་གི་སྲེག་བླུག་ཏུ་ཚིམ་པར་ལོངས་སྤྱད་པའི་མཐར།） ཚོགས་འཁོར་ཕུལ་བའི་བསོད་ནམས་ཀྱིས༔ མི་ཟད་གཏེར་ལ་ལོངས་སྤྱོད་ཅིང་༔ ཡེ་ཤེས་སྣང་བར་གསལ་ནས༔ ཀ་དག་ཆེན་པོའི་ས་ཐོབ་ཤོག༔ （ཅེས་སྨོན་ལམ་གདབ། ཚོགས་ཀྱི་ལྷག་མ་བསྡུས་ཏེ་ཕུད་ལྷག་བསྲེས་པར་བདུད་རྩིའི་ཁ་ཕྲུ་བཏབ་ཅིང་༔ ） ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲིཿ（ས། ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བལྟས་ལ།） ཨེ་ཨཱ་རལླི་ཧྲཱིཾ་ཧྲཱིཾ་（22ན）ཛཿ（ས་མགྲོན་སྤྱན་དྲངས་ཏེ།） ཧཱུྃ༔ སྔོན་ཚེ་ཀུན་ཏུ་བཟང་པོ་ནས་བཟུང་སྟེ༔ རྒྱལ་བ་རིག་འཛིན་རྒྱ་མཚོའི་སྤྱན་སྔ་རུ༔ ཁས་བླངས་དམ་བཅས་མནའ་བོར་གཉེར་བླངས་པའི༔ བཀའ་ཉན་དྲེག་ས་པ་ལྷག་སྐྱོང་ཕོ་མོའི་ཚོགས༔ སྐད་ཅིག་ཉིད་དུ་འདིར་གཤེགས་ལྷག་ལ་རོལ༔ ཟབ་གསང་མཁའ་འགྲོའི་སྙིང་ཐིག་གཉན་པ་ཡི༔ བསྟན་དང་བསྟན་འཛིན་རྟག་སྐྱོངས་འཕེལ་རྒྱས་མཛོད༔ ལོག་པར་འདྲེན་པའི་བསྟན་དགྲ་རྡུལ་དུ་རློག༔ བཀའ་དང་དམ་ལས་མ་འདའ་ས་མ་ཡ༔ ཨུཙྪིཥྚ་ད་ལིཾ་ཏ་ལ་ཁཱ་ཧི༔ （ཞེས་ཕྱི་རོལ་ཟ་ལམ་དུ་བསྐྱལ་ལོ། །） （གསུམ་པ་ཆོ་གའི་རྗེས་ཀྱི་ལས་རིམ་མཐར་དབྱུང་བ་ལ་ལྔ་ལས། དང་པོ་གཏོར་མ་བསྐྱང་བ་ལ། ཐོག་མར་ཐུགས་དམ་བསྐུལ་བ་ནི།） ཧཱུྃ་ཧྲཱིཿ གཞི་དབྱིངས་རྣམ་དག་དོན་གྱི་འོག་མིན་ཞིང་༔ གཞི་སྣང་ལོངས་སྐུའི་བཀོད་པ་ལྷུན་གྲུབ་དཔལ༔ ཡོངས་རྫོགས་བདག་ཉིད་མགོན་པོ་ཚེ་མཐའ་ཡས༔ སྒྱུ་འཕྲུལ་རོལ་པ་རིགས་ལྔ་རིགས་བརྒྱ་སོགས༔ གདུལ་དཀའ་ཐབས་ཀྱིས་འདུལ་ཕྱིར་སྣ་ཚོགས་གར༔ ཞིང་དང་སྟོན་འཁོར་མཛད་པ་（22བ）དཔག་ཡས་སྟོན༔ ཡེ་ཤེས་དབྱིངས་སུ་གཉིས་མེད་རོལ་པ་ཆེ༔ ཡེ་ཡིན་སྙིང་པོའི་དོན་ལས་རིང་དགོངས་ཏེ༔ གཉིས་སྣང་མུན་པའི་ཁྲོད་དུ་ཉམ་ཐག་གི༔ སྡུག་བསྔལ་གདུང་བས་རྟག་མྱོས་ཁུར་མ་བཟོད༔ དེ་ལས་འབྲོས་ཕྱིར་འབད་པས་དེ་རྒྱུ་བསྒྲུབས༔ རང་བྱས་ལས་ཀྱི་མཐའ་ལ་ཐུག་དུས་མེད༔ ད་ནི་སྐྱབས་དང་སྐྱེལ་མ་མ་མཆིས་པས༔ བདེ་གཤེགས་རྒྱལ་བ་རྒྱ་མཚོར་སྐྱབས་འཚོལ་ཞིང་༔ སྐད་ཅིག་མི་འབྲལ་རྟེན་གྱི་མཆོག་ཏུ་ཁུར༔ ཐུགས་རྗེས་ཡལ་བར་དོར་ན་སུ་ལ་རེ༔ བསྐུལ་ལོ་བསྐུལ་ལོ་དུས་གསུམ་བདེ་གཤེགས་རྣམས༔ བཞེངས་ཤིག་ཆོས་ཀྱི་དབྱིངས་ལས་སྐུར་བཞེངས་ཤིག༔ ཕྱི་དགྲ་སྲིད་པའི་དགྲ་གདོན་བགེགས་ཚོགས་སྒྲོལ༔ ནང་དགྲ་ལོག་འདྲེན་བདུད་དང་དམ་སྲི་ཐུལ༔ གསང་དགྲ་ཉོན་མོངས་བརྒྱད་ཁྲིའི་འཁྲུལ་འཁོར་ཟློག༔ ཡེ་ཤེས་དབྱིངས་སུ་བཞེངས་བཞུགས་མི་མངའ་ཡང་༔ སོ་སྐྱེ་གཉིས་འཛིན་རེ་བའི་བློ་སེམས་ཀྱིས༔ དད་མོས་དྲག་པོས་ཐུགས་དམ་རྒྱུད་བསྐུལ་ལོ༔ ཐུགས་བསྐྱེད་རྣམ་དག་ནམ་（23ན）མཁའི་ཀློང་ཆེན་ནས༔ མཁྱེན་བརྩེ་ནུས་པའི་རྩལ་ཤུགས་མྱུར་དུ་ཕྱུངས༔ བདག་རྒྱུད་འཁོར་བར་འཆིང་བའི་རྒྱུ་དང་རྐྱེན༔ ཆོས་ཟད་བློ་འདས་ཆེན་པོའི་དབྱིངས་སུ་ཤིག༔ གབ་གསང་གཉན་པོའི་རང་ཞལ་མངོན་གྱུར་ནས༔ འཕོ་མེད་ཕྱག་རྒྱ་ཆེན་པོའི་ས་ལ་སྐྱོལ༔ ཧཱུྃ་ཛཿ འཁོར་འདས་འུབ་ཆུབ་རོལ་པའི་དབྱིངས་ཆེན་མོ༔ ཉག་གཅིག་སྟོང་ཆེན་དབང་མོ་ཨེ་ཀ་ཛ༔ ལྷུན་གྲུབ་རྫོགས་ལྡན་གཉིས་མེད་རོལ་པ་ཆེ༔ ཐབས་ཀྱི་སྐུར་བཞེངས་ལེགས་ལྡན་ཧེ་རུ་ཀ༔ བདེ་སྟོང་སྙོམས་འཇུག་རོལ་པའི་གདངས་ཆེན་པོ༔ ལོག་རྟོག་འཇོམས་ཕྱིར་སྲས་མཆོག་རཱ་ཧུ་ལ༔ ཡེ་ཤེས་རྩལ་ལས་ཕྲིན་ལས་ཡོངས་གྲུབ་ཆེ༔ དབང་ཆེན་སྟོབས་ལྡན་གནོད་སྦྱིན་ཤན་པ་ཆེ༔ ཁམས་གསུམ་སྐུ་གསུང་ཐུགས་སུ་མངའ་དབང་བསྒྱུར༔ སྲིད་པའི་མེས་པོ་ལྷ་ཆེན་ཚོགས་ཀྱི་བདག༔ གསང་ཆེན་བསྟན་པའི་སྲུང་མ་དམ་ཚིག་ཅན༔ བསྐུལ་ལོ་ཐུགས་དམ་གཉན་པོའི་དུས་ལ་བབ༔ སངས་རྒྱས་བསྟན་དང་བསྟན་（23བ）འཛིན་བུ་སློབ་སྐྱོངས༔ སྣང་སྲིད་དྲེགས་པ་དབང་བསྡུས་བཀའ་ནན་ཐོབ༔ རབ་འབྱམས་ཕྲིན་ལས་མ་ལུས་ལྷུན་གྲུབ་ཅིང་༔ མི་སྲུན་ཞིང་བཅུའི་དགྲ་སྡེ་ཐལ་བར་རློག༔ རྣལ་འབྱོར་ཡིད་ལ་འདོད་དོན་ཡོངས་འགྲུབ་མཛོད༔ （ཅེས་ཐུགས་དམ་བསྐུལ། ཆད་མདོ་བཏང་བ་ནི། གཏོར་མ་འབྲུ་གསུམ་གྱིས་བྱིན་བརླབ་ལ།） ཧཱུྃ་བྷྱོ༔ སྔོན་ཚེ་འདས་དུས་བསྐལ་པའི་དང་པོ་ལ༔ འོག་མིན་གསང་བ་མཆོག་གི་ཕོ་བྲང་དུ༔ གདོད་མའི་མགོན་པོ་ཀུན་ཏུ་བཟང་པོ་ཡིས༔ ལྷུན་གྲུབ་རོལ་པའི་འཁོར་ལ་དགོངས་བརྒྱུད་ཚེ༔ ཡེ་ཤེས་དབྱིངས་ཀྱི་བཀའ་སྲུང་རྒྱ་མཚོ་ཡིས༔ སངས་རྒྱས་བསྟན་དང་བསྟན་འཛིན་སྐྱོང་བ་དང་༔ ཕྱི་ནང་བར་ཆད་སྲུང་ཟློག་དམ་བཅས་བཞིན༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཟབ་གསང་མཁའ་འགྲོའི་སྙིང་ཐིག་གཉན་པོ་ཡི༔ བསྟན་དང་བསྟན་འཛིན་སྡེ་སྐྱོངས་དགེ་ལེགས་སྤེལ༔ བསྟན་ལ་སྡང་བའི་དགྲ་བགེགས་ཐལ་བར་རློག༔ ཧཱུྃ༔ དེ་འོག་བར་གྱི་དུས་ཚིགས་གཉིས་པ་ལ༔ རི་བོ་གནམ་ལྕགས་འབར་བའི་（24ན）རྩེ་མོ་ནས༔ བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀས༔ བདུད་པོ་མ་ཏྲཾ་རུ་དྲ་བསྒྲལ་བའི་ཚེ༔ དྲེགས་པ་ཅན་གྱི་འཁོར་ཚོགས་ཕོ་མོ་ཡིས༔ གསང་སྔགས་བསྟན་དང་བསྟན་འཛིན་སྐྱོང་བ་དང་༔ ཕྲིན་ལས་རབ་འབྱམས་བསྒྲུབ་པར་ཁས་བླངས་བཞིན༔ དམ་ཚིག་དྲན་མཛོད་དམར་གྱི་གཏོར་མ་ལོངས༔ ཟབ་གསང་མཁའ་འགྲོའི་སྙིང་ཐིག་གཉན་པོ་ཡི༔ བསྟན་དང་བསྟན་འཛིན་སྡེ་སྐྱོངས་དགེ་ལེགས་སྤེལ༔ བསྟན་ལ་སྡང་བའི་དགྲ་བགེགས་ཐལ་བར་རློག༔ ཧཱུྃ༔ དེ་འོག་དུས་ཚིགས་གསུམ་པར་བབས་པའི་ཚེ༔ སྐུ་གསུམ་སྟོན་པ་རིམ་བཞིན་བྱོན་ནས་སུ༔ བརྡ་ཚིག་བརྒྱུད་པའི་གསང་མཛོད་ཕྱེས་པའི་ཚེ༔ ཡེ་ཤེས་འཇིག་རྟན་སྲུང་མ་ཐམས་ཅད་ཀྱིས༔ གསང་སྔགས་བསྟན་དང་༴ ཕྲིན་ལས་རབ་འབྱམས༴ དམ་ཚིག་དྲན་མཛོད༴ ཟབ་གསང་མཁའ་འགྲོའི༴ བསྟན་དང་བསྟན་འཛིན༴ བསྟན་ལ་སྡང་བའི་དགྲ་བགེགས་ཐལ་བར་རློག༔ ཧཱུྃ༔ དེ་འོག་དུས་ཚིགས་བཞི་པའི་ཐ་མ་ལ༔ རིག་འཛིན་ཆེན་པོ་པདྨ་འབྱུང་（24བ）གནས་ཀྱིས༔ གཉིས་མེད་སྒྱུ་འཕྲུལ་རོལ་པའི་རིག་འཛིན་ལ༔ ཟབ་གསང་གཉན་པོའི་གཏད་རྒྱ་བཀྲོལ་བའི་ཚེ༔ དྲེགས་པའི་གཙོ་མཆོག་གཟའ་བདུད་རྒྱལ་པོ་དང་༔ ཁམས་གསུམ་དབང་ཕྱུགས་ཚོགས་ཀྱི་བདག་པོ་སོགས༔ ཕོ་རྒྱུད་མོ་རྒྱུད་བཀའ་སྲུང་རྒྱ་མཚོ་ཡིས༔ གསང་སྔགས་བསྟན་དང་༴ ཕྲིན་ལས་རབ་འབྱམས༴ དམ་ཚིག་དྲན་མཛོད༴ ཟབ་གསང་མཁའ་འགྲོའི༴ བསྟན་དང་བསྟན་འཛིན༴ བསྟན་ལ་སྡང་བའི་དགྲ་བགེགས་ཐལ་བར་རློག༔ ཧཱུྃ༔ ད་ལྟ་བརྒྱུད་འཛིན་རྣལ་འབྱོར་བདག་ཅག་གིས༔ ཟབ་གསང་གཉན་པོའི་དཀྱིལ་འཁོར་ཞལ་ཕྱེས་ཏེ༔ རིམ་གཉིས་ཟབ་མོའི་ལམ་མཆོག་ལྷུར་བླངས་ནས༔ བཀའ་དམ་ལ་གནས་བསྟན་སྲུང་རྒྱ་མཚོ་ལ༔ ཆད་མདོ་དམར་གྱི་གཏོར་མ་འདི་འབུལ་གྱི༔ བཞེས་ནས་སྔོན་གྱི་ཐ་ཚིག་དྲན་མཛོད་ལ༔ ཟབ་གསང་མཁའ་འགྲོའི༴ བསྟན་དང་བསྟན་འཛིན༴ བསྟན་ལ་སྡང་བའི་དགྲ་བགེགས་ཐལ་བར་རློག༔ ཧཱུྃ༔ ཡེ་ཤེས་དང་ནི་འཇིག་རྟེན་སྲུང་མའི་ཚོགས༔ མ་གཡེལ་མ་འགྱངས་དམ་ཚིག་གཉན་གྱིས་འབོད༔ མྱུར་མགྱོགས་（25ན）མཐུ་དང་རྫུ་འཕྲུལ་སྟོབས་དབང་གིས༔ འདིར་གཤེགས་ཤ་ཁྲག་དམར་གྱི་གཏོར་མ་ལོངས༔ སྒྲུབ་པའི་རྣལ་འབྱོར་བདག་གི་སྲུང་མ་མཛོད༔ སངས་རྒྱས་བསྟན་དང་བསྟན་འཛིན་སྡེ་སྐྱོངས་ཤིག༔ ཆོས་སྲིད་བསྟན་པའི་མངའ་ཐང་འཕེལ་རྒྱས་མཛོད༔ ཕྱི་དགྲ་ཀླ་ཀློ་བདུད་ཀྱི་རྒོལ་ངན་བཟློག༔ ནང་དགྲ་བན་བོན་འཁྲུགས་རྩོད་རྒོལ་ངན་བཟློག༔ གསང་དགྲ་བར་ཆད་ཡུལ་རྐྱེན་ངན་པ་བཟློག༔ མི་མཐུན་དགྲ་འདྲེས་རྒོལ་ངན་རྡུལ་དུ་རློག༔ བཀའ་དང་དམ་ལས་མ་འདའ་ས་མ་ཡ༔ （ཞེས་ཐ་ཚིག་བསྒྲགས་ལ་གཏོར་མ་ཕྱི་རོལ་དུ་ཕུལ་བའི་གཏོར་གཞོང་སྨན་ཕུད་ཀྱིས་བཤལ་བ་བརྟན་གཏོར་ལ་བྲན་ཅིང་། བརྟན་མ་བསྐྱང་བ་ནི།） ཧཱུྃ་བྷྱོ༔ དབྱིངས་ཕྱུག་ཆེན་མོ་བཀྲ་ཤིས་ཚེ་རིང་མའི༔ བྲན་དང་བཀའ་ཉན་མ་མོ་བརྟན་མའི་ཚོགས༔ སྔོན་ཚེ་དཔལ་ཆེན་པདྨ་ཐོད་ཕྲེང་གིས༔ བཀའ་བསྒོས་དམ་བཞག་དབང་བསྐུར་མཚན་གསོལ་ནས༔ བསྟན་དང་བསྟན་འཛིན་སྐྱོང་བར་ཁས་བླངས་བཞིན༔ འདིས་གཤེགས་བཤལ་ཆུའི་གཏོར་མ་འདི་ལོངས་ལ༔ ཕྲིན་ལས་རབ་འབྱམས་མ་ལུས་ཡོངས་གྲུབ་མཛོད༔ དམ་ཚིག་གཉན་ལས་མ་འདའ་ས་མ་ཡ༔ （ཞེས་ཕྱི་རོལ་དུ་ཕུལ། （25བ）རྟ་བྲོ་བརྡུང་བ་ནི། གཏོར་སྣོད་ཁ་སྦུབས་པའི་འོག་ཏུ་དགྲ་བགེགས་བཀུག་ཅིང་རྡོ་རྗེས་རྒྱ་གྲམ་དུ་མནན་ལ།） ཧཱུྃ༔ བླ་མེད་གསང་ཆེན་རོལ་པའི་དཀྱིལ་འཁོར་དུ༔ ཡེ་ཤེས་རྔམས་པ་གར་གྱི་རྣམ་རོལ་པས༔ མ་རིག་ལོག་རྟོག་འདུལ་བའི་བྲོ་ར་འཁྲབ༔ དུག་གསུམ་སྐུ་གསུམ་དབྱིངས་སུ་སྒྲིལ་བའི་བྲོ༔ དུག་ལྔ་ཡེ་ཤེས་ལྔ་རུ་བཏུལ་བའི་བྲོ༔ འཁོར་བ་མྱང་འདས་ཆེན་པོར་སྒྲོལ་བའི་བྲོ༔ གཟུང་འཛིན་རུ་དྲའི་མགོ་ལ་ཆམས་སེ་ཆེམ༔ བདག་མེད་མཉམ་པ་ཉིད་ཀྱི་དབྱིངས་སུ་བྲུབ༔ མ་ཤོར་མ་ལྡང་རྡོ་རྗེ་ཐེག་པའི་རྒྱ༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སུཾ་ལཾ༔ སྟྭཾ་བྷ་ཡ་ནན༔ （ཞེས་བྲོ་བརྡུང་ངོ་། །） （གཉིས་པ་དཀྱིལ་འཁོར་པ་ལ་གཏང་རག་འབུལ་ཞིང་ནོངས་པ་བཟོད་པར་གསོལ་བ་ནི། མཆོད་པ་ཁ་གསོས་ལ།） བཛྲ་སྥ་ར་ཎ་ཁཾ་（གིས་སྤེལ་ཞིང་།） ཧཱུྃ་ཧྲཱིཿ སྣང་བའི་བཀོད་པ་རབ་འབྱམས་རྒྱ་མཚོ་ན༔ འདོད་ཡོན་ལོངས་སྤྱོད་རང་ཤར་མི་ཟད་གཏེར༔ བློ་ཡིས་བླངས་ཏེ་དཀྱིལ་འཁོར་ལྷ་ལ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ མ་ཧཱ་སརྦ་ག་ཎ་པཱུ་ཛ་ཧོཿ （ཞེས་མཆོད་ཅིང་།） ཧཱུྃ་ཧྲཱིཿ དུས་གསུམ་རྒྱལ་བ་མ་ལུས་ཡོངས་འདུས་དཔལ༔ སྐུ་（26ན）གསུམ་ལྷུན་གྲུབ་མགོན་པོ་ཚེ་མཐའ་ཡས༔ ཁམས་གསུམ་འགྲོ་བ་སྐྱོབ་ཕྱིར་སྐུར་སྟོན་པ༔ འཁོར་འདས་སྤྱི་དཔལ་མཆོག་ལ་ཕྱག་འཚལ་བསྟོད༔ （ཅེས་བསྟོད། བཟོད་གསོལ་ནོངས་པ་བཤགས་པ་ནི།） ཆོ་ག་ལྷག་ཆད་གྱུར་པ་དང་༔ མ་འབྱོར་བ་དང་ཉམས་པ་དང་༔ བསྐྱེད་རྫོགས་བཟླས་བརྗོད་ཉུངས་པ་རྣམས༔ འཆི་མེད་ལྷ་ཚོགས་བཟོད་པར་གསོལ༔ （ཞེས་དང་ཡི་གེ་བརྒྱ་པ་བཟླའོ། །） （གསུམ་པ་དཀྱིལ་འཁོར་བསྡུ་བ་ནི། མདུན་བསྐྱེད་དང་འབྲེལ་ན། མདུན་རྟེན་གྱི་ཡེ་ཤེས་པ།） འདིར་ནི་གཟུགས་དང་ལྷན་ཅིག་ཏུ་（སོགས་ཀྱིས་རྟེན་ལ་བསྟིམ། གཞན་དུ་དམ་ཡེ་མ་ཕྱེ་བར་ཏིང་ངེ་འཛིན་གྱི་དཀྱིལ་འཁོར་དུ་བསྡུ་བ་ནི།） ཧཱུྃ༔ སྣང་སྲིད་མ་ལུས་བདག་བསྐྱེད་ལྷ་ལ་བསྡུ༔ བདག་བསྐྱེད་ཐུགས་སྲོག་སྔགས་ཀྱི་འཁོར་ལོར་བསྡུ༔ དེ་ཡང་ཧྲཱིཿདང་ཧྲཱིཿཡིག་དབྱིངས་སུ་བསྡུ༔ ཁྱབ་བརྡལ་རྫོགས་པ་ཆེན་པོར་འབྱམས་ཀླས་སོ༔ ཨ་ཨ་ཨ༔ （ཞེས་རྟག་མཐའ་བསལ། སླར་ཡང་སྐད་ཅིག་དྲན་རྫོགས་སུ་དཀྱིལ་འཁོར་གསལ་བཏབ་ལ།） ཧཱུྃ༔ ཆོས་ཉིད་མཁའ་ལས་ལྷུན་གྲུབ་རོལ་པའི་རྩལ༔ ཡེ་ཤེས་རྔམས་པའི་སྒྱུ་འཕྲུལ་（26བ） ལྷ་རུ་ལྡང་༔ དོན་དམ་མི་ཤིགས་ངོ་བོ་རྡོ་རྗེ་ཡིས༔ སྲ་མཁྲེགས་རྡོ་རྗེའི་གོ་ཁྲབ་ཞུ་ལུགས་བགོས༔ ཨོཾ་ཨ་མི་ངྷེ་ཝ་ཨཱ་ཡུརྫྙཱ་ན་མ་ཧཱ་པུཎྱེ་སརྦ་སིདྡྷི་ཧཱུྃ༔ བཛྲ་རཀྵ་རཀྵ་ཧཱུྃ་བྷྲཱུཾ༔ （ཞེས་ཆད་མཐའ་བསལ་ཞིང་ཐུན་མཚམས་ཀྱི་རྣལ་འབྱོར་བསྐྱང་།） （བཞི་པ་དགེ་ཚོགས་བསྔོ་ཞིང་སྨོན་ལམ་གདབ་པ་ནི།） ཧཱུྃ༔ བདག་གིས་དུས་གསུམ་བསགས་པའི་དགེ་རྩ་ཀུན༔ མ་གྱུར་འགྲོ་བ་སེམས་ཅན་ཡོངས་ལ་བསྔོ༔ ཀུན་ཀྱང་གདོད་མའི་གཞི་དབྱིངས་ཆེན་པོ་རུ༔ ཕྱམ་གཅིག་རྫོགས་པའི་སངས་རྒྱས་ཐོབ་གྱུར་ཅིག༔ （ཅེས་སྨོན་ལམ་གདབ།）

（ལྔ་པ་བཀྲ་ཤིས་བརྗོད་པ་ནི། མེ་ཏོག་ཆར་དུ་བསྙིལ་ལ།） ཨོཾཿ རྡོ་རྗེའི་སྐུ་ནི་སྐྱེ་འཆི་བགྲེས་རྒུད་བྲལ༔ ཨཱཿ ཚངས་པའི་གསུང་དབྱངས་ཡན་ལག་དྲུག་ཅུའི་གདངས༔ ཧཱུྃ༔ རྡོ་རྗེའི་ཐུགས་མཆོག་སྤྲོས་པའི་མཐའ་དང་བྲལ༔ ཡོན་ཏན་ཕྲིན་ལས་རྨད་བྱུང་འདོད་རྒུའི་གཏེར༔ རྒྱལ་བ་རྒྱ་མཚོའི་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདིར་བདེ་ལེགས་ཤོག༔ （ཅེས་སོགས་ཤིས་པ་རྒྱ་ཆེར་བརྗོད་ལ་མེ་ཏོག་གི་ཆར་དབབ་པས་བདེ་ལེགས་ཀྱི་སྣང་བས་ཡོངས་སུ་ཁྱབ་པར་བྱའོ། །དེ་ལྟར་ཟབ་གསང་མཁའ་འགྲོའི་སྙིང་ཐིག་ལས། །（27ན）བྱོན་པའི་ཚེ་སྒྲུབ་དངོས་གྲུབ་འདོད་འབྱུང་གི ། ལས་བྱང་འཇུག་བདེའི་ཁྲིགས་སུ་བསྡེབས་འདིས་ཀྱང་། །སྐལ་བཟང་གདུལ་བྱར་འཆི་མེད་བདུད་རྩིའི་རྒྱུན། །ཅི་དགར་འཇོ་བའི་ཟ་མ་ཏོག་ཉིད་དུ། །གྱུར་ཏེ་རང་དང་གཞན་ལ་ཕན་བདེའི་དཔལ། །ངོ་མཚར་བླ་ན་མེད་པའི་རྒྱུར་གྱུར་ཏེ། །བཀྲ་ཤིས་སྣང་བས་ས་གསུམ་ཁྱབ་གྱུར་ཅིག །དེ་ལྟར་ཟབ་གསང་མཁའ་འགྲོའི་སྙིང་ཐིག་གི་ཡང་གསང་ཚེ་སྒྲུབ་དངོས་གྲུབ་འདོད་འབྱུང་གི་ལས་བྱང་ཁྲིགས་སུ་བསྡེབས་པ་འཆི་མེད་བདུད་རྩིའི་ཟ་མ་ཏོག་ཅེས་བྱ་བ་འདིའང་། བཀའ་གསང་རྫོགས་པ་ཆེན་པོ་མཁའ་འགྲོ་སྙིང་ཐིག་གི་རིག་པ་འཛིན་པ་བླ་མ་ཚེ་དབང་ལྷ་རྒྱལ་ནས་བསྐུལ་བའི་ངོར། ཚེ་ལམ་འཛིན་པའི་སྔགས་བརྒྱུད་པ་རྒན་པོ་འཇིགས་བྲལ་ཡེ་ཤེས་རྡོ་རྗེས་རང་ལོ་བརྒྱད་ཅུ་གྱ་གཉིས་པ་ཤིང་མོ་གླང་གི་ལོ་རྒྱལ་གྱི་ཟླ་བའི་དུས་ཚེས་བཟང་པོ་ལ་ཡིད་འོང་དགའ་བ་འཁྱིལ་བའི་ལྗོངས་ཀྱི་བསྟི་གནས་ཉམས་དགའ་བར་བག་ཕེབས་པར་གནས་པའི་སྐབས་ཤིག་ཏུ་སྦྱར་བ་ལས། ཐོག་མའི་ཡི་གེ་པ་ནི་བློ་གསལ་རིན་ཆེན་ཕུན་ཚོགས་དང་། མཐའ་འདོམས་མཇུག་སྡུད་པ་ནི་མོན་གྱི་སྔགས་བན་ཀུན་བཟང་དབང་འདུས་ཀྱིས་བགྱིས་པ་སྟེ། འདིས་ཀྱང་འགྲོ་བ་རྣམས་དུས་མ་ཡིན་པའི་འཆི་བའི་འཇིགས་པ་ལས་སྐྱོབ་སྟེ་འཆི་མེད་རྟག་པ་དམ་པའི་གོ་སར་མྱུར་དུ་དབུགས་དབྱུང་བའི་རྒྱུར་གྱུར་ཅིག །སརྦ་དཱ་མངྒ་ལཾ།། །།）