DJYD-KABUM-09-TA-009

Previous Text Back to Volume PageNext Text

Wylie title	gter gsar sman bla'i rjes gnang gi cho ga byin rlabs chu rgyun
Location	bdud 'joms rin po che bka' 'bum Volume 9, Text 9, Pages 371-377 (Folios 1a1 to 4a5)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Gter gsar sman bla'i rjes gnang gi cho ga byin rlabs chu rgyun. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 9: 371-377. Kalimpong: Dupjung Lama, 1979-1985.
Side notes	Recto: rjes gnang   Verso: bdud 'joms sman bla
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Permission to Invoke (anujñā) - rjes gnang
Cycle	དགོངས་གཏེར་སྨན་བླ་ (dgongs gter sman bla)
Deity	sman bla
Colophon	།ཅེས་པའང་དགེ་བའི་བཤེས་གཉེན་རཏྣའི་མཚན་ཅན་གྱིས་བསྐུལ་བ་ལས་ཤཱཀྱའི་དགེ་བསྙེན་བྱང་སེམས་རིག་པ་འཛིན་པ་བློ་གྲོས་དྲི་མེད་ཕན་བདེའི་འོད་ཟེར་རམ་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ་ལེགས་སུ་གྱུར་ཅིག །སརྦ་དཱ་མངྒ་ལཾ། །
	/ces pa'ang dge ba'i bshes gnyen rat+na'i mtshan can gyis bskul ba las shAkya'i dge bsnyen byang sems rig pa 'dzin pa blo gros dri med phan bde'i 'od zer ram 'jigs bral ye shes rdo rjes bris pa dge legs su gyur cig__/sarba dA mang+ga laM/

Tibetan Text

[edit]

༄༅། །གཏེར་གསར་སྨན་བླའི་རྗེས་གནང་གི་ཆོ་ག་བྱིན་རླབས་ཆུ་རྒྱུན་ཅེས་བྱ་བ་བཞུགས་སོ། །ངོ་མཚར་བསམ་ཡས་སྨོན་ལམ་མཐུ་གྲུབ་པས། །མཁའ་མཉམ་འགྲོ་ཀུན་སྒྲོལ་མཛད་བཅོམ་ལྡན་འདས། །སངས་རྒྱས་སྨན་གྱི་བླ་མར་གུས་བཏུད་ནས། །རྗེས་གནང་བྱིན་རླབས་ཆུ་རྒྱུན་འདི་ན་སྦྲེང་། འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། མཎྜལ་ལ་མེ་ཏོག་གི་ཚོམ་བུ་ལྷ་གྲངས་བཀོད་པའི་མདུན་དུ་བུམ་པ་མགུལ་ཆིངས་སྔོན་པོ་ཉེར་ལྔའི་བཅུད་ལྡན་ཁ་རྒྱན་ཅན་བཀོད་ལ་མཐར་ཉེར་སྤྱོད་ཕྲེང་ཚར་དུ་བཤམས། ཆོ་ག་ལྟར་སྐྱབས་སེམས་དང་ཚད་མེད་བཞིའི་མཐར། བདག་བསྐྱེད་ནི། ཨོཾ་སྭ་བྷཱ་ཝ་ས་བསང་སྦྱང་། སྟོང་པའི་ངང་ལས་ས་ཕྱོགས་ལྟ་ན་སྡུག་གི་ཞིང་ཁམས་ཀྱི་བཀོད་པ་ཕུན་སུམ་ཚོགས་པའི་དབུས་སུ་པདྨ་དང་ཟླ་བའི་གདན་ལ་རང་ཉིད་སྐད་ཅིག་གིས་བཅོམ་ལྡན་འདས་སྨན་གྱི་བླ་སྐུ་མདོག་མཐིང་སྔོན་བཻཌཱུརྻའི་མདངས་ཅན་ཕྱག་གཡས་མཆོག་སྦྱིན་ཨ་རུ་ར་དང་གཡོན་མཉམ་གཞག་ལྷུང་བཟེད་རྣམ་པར་རྒྱལ་བས་བཀང་བ་བསྣམས་པ། སྤྲུལ་སྐུའི་ཆ་ལུགས་མཚན་དཔེ་ཡོངས་སུ་རྫོགས་ཤིང་ཆོས་གོས་རྣམ་གསུམ་གསོལ་བ། ཞབས་རྡོ་རྗེའི་ [1b] སྐྱིལ་ཀྲུང་དུ་བཞུགས་པའི་ཐུགས་ཀར་ཧཱུྃ་མཐིང་གི་མཐར་གཟུངས་སྔགས་ཀྱིས་གཡས་སུ་བསྐོར་བ་ལས་འོད་ཟེར་འཕྲོས་པས་དོན་གཉིས་ཡིད་བཞིན་དུ་བསྒྲུབ་པར་མོས་ལ། ན་མོ་བྷ་ག་ཝ་ཏེ་སོགས་བཟླས་པ་ཅི་ནུས་བྱ། དེ་ནས། ན་མོ། བདེན་པ་གཉིས་ཀྱི་སོགས་མཆོད་པ་བྱིན་རླབས་ནས་མདུན་བསྐྱེད་བསྟོད་ཕྱག་གི་བར་དུ་བཏང་། བཟླས་པའི་འགོར། མདུན་བསྐྱེད་བཅོམ་ལྡན་འདས་ཀྱི་ཐུགས་ཀར་ཧཱུྃ་མཐིང་གི་མཐར་གཟུངས་སྔགས་ཀྱིས་གཡས་སུ་བསྐོར་བ་ལས་འོད་ཟེར་འཕྲོས་པས་དོན་གཉིས་ཡིད་བཞིན་དུ་བསྒྲུབ་པར་མོས་ཤིང་། གཟུངས་རིང་ཐུང་གི་བཟླས་པ་ཅི་འགྲུབ་དང་། བུམ་པ་རང་བྱུང་གཞལ་ཡས་ཁང་པ་རུ། །བཅོམ་ལྡན་སྨན་བླ་འཁོར་བཅས་གསལ་བ་ཡི། །སྐུ་ལས་དུག་གསུམ་ནད་སེལ་བདུད་རྩིའི་རྒྱུན། །བབས་པས་བུམ་པ་བདུད་རྩིས་གང་བར་གྱུར། །ཅེས་དམིགས་ལ་བཟླས་པ་ཅི་འགྲུབ་བྱས་པའི་མཐར། ཨོཾ་ཨཱཿཧཱུྃ། ལྷ་འོད་དུ་ཞུ་བ་བུམ་ཆུ་དབྱེར་མེད་གྱུར་པརབསམ། དཀོན་མཆོག་རིན་ཆེན་སོགས་སྨོན་ལམ་བྱའོ། །གཉིས་པ་ནི། སློབ་མ་རྣམས་ཁྲུས་ནས་དབྱུང་སྟེ་གྲལ་དུ་འཁོད་ཅིང་མེ་ཏོག་བཀྲམ་བསྡུ་བྱས་ལ། འོ། མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ [2a] ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ཏེ་རྣམ་གྲོལ་གཏན་གྱི་བདེ་བ་ལ་འགོད་པར་བྱ། དེའི་ཆེད་དུ་སངས་རྒྱས་སྨན་གྱི་བླ་མའི་རྗེས་གནང་ཟབ་མོ་ནོད་ཅིང་ལམ་ཉམས་སུ་བླང་བར་བགྱིའོ་སྙམ་དུ་བསམ་པ་བྱང་ཆུབ་སེམས་ཀྱི་ཀུན་སློང་གསལ་བཏབ་སྟེ་གསན་པར་ཞུ། དེ་ཡང་བཅོམ་ལྡན་འདས་སྨན་གྱི་བླ་བཻཌཱུརྻ་འོད་ཀྱི་རྒྱལ་པོ་གཙོ་བོར་གྱུར་པའི་བདེ་བར་གཤེགས་པ་བདུན་གྱི་ཐུགས་བསྐྱེད་དང་སྨོན་ལམ་ངོ་མཚར་ཁྱད་དུ་འཕགས་པའི་མཐུ་ལས་མཚན་ཐོས་པ་དང་གཟུངས་སྔགས་བཅང་བ་ཙམ་གྱིས་ཀྱང་གནས་སྐབས་དང་མཐར་ཐུག་གི་ཕན་ཡོན་དགོས་པ་ཚད་མེད་པ་དང་ལྡན་པར་བདག་ཅག་གི་སྟོན་པ་ཐུགས་རྗེ་ཅན་དེས་མདོ་སྡེ་དག་ལས་ཡང་ཡང་བསྔགས་པར་མཛད་པ་འདི་ལ་མདོ་སྔགས་བཀའ་གཏེར་གྱི་ཕྱོགས་སུ་སྒྲུབ་ཐབས་རྗེས་གནང་གི་རིམ་པ་ཅི་རིགས་པར་བྱོན་པ་ལས། སྐབས་སུ་བབས་པ་འདི་ནི་རྩོད་བྲལ་སྤྲུལ་པའི་གཏེར་ཆེན་རིག་འཛིན་བདུད་འཇོམས་རྡོ་རྗེའི་ཟབ་གཏེར་ལས་བྱོན་པའི་ལུགས་ཀྱི་བྱིན་རླབས་རྗེས་གནང་གི་ཆོ་ག་ཟབ་མོ་བསྒྲུབ་པར་བགྱི་བ་ལ་བདག་ཉིད་ཀྱིས་བགྱི་འོས་སྔོན་དུ་གྲུབ་ཟིན་པ་ལགས་པས་ཁྱེད་རང་རྣམས་ཀྱི་ངོ་སྐལ་ [2b] དུ་བབ་པ་མཎྜལ་འབུལ་བའི་བྱ་བ་ལ་འཇུག་པར་ཞུ།ཞེས་མཎྜལ་འབུལ་དུ་གཞུག །ཕྱག་ཐལ་མོ་མེ་ཏོག་དང་བཅས་ཏེ་མི་ཕྱེད་གུས་པ་ཆེན་པོས་གསོལ་བ་འདེབས་པ་འདིའི་རྗེས་ཟློས་མཛོད། །དུས་གསུམ་སངས་རྒྱས་ཐམས་ཅད་དང་། ལྷག་པའི་ལྷ་ཡི་ངོ་བོ་ཉིད། །དཔལ་ལྡན་བླ་མའི་བཀའ་དྲིན་གྱིས། །མ་ལུས་ཀྱི་རྗེས་གནང་སྩལ་དུ་གསོལ། །ལན་གསུམ། དེ་ནས་ཐེག་པ་ཆེན་པོའི་ལམ་གྱི་གཞི་བསྒྲུབ་པའི་སླད་དུ་འདུན་པ་འདི་བཞིན་དུ་མཛོད། །སློབ་དཔོན་དང་མདུན་བསྐྱེད་ཐ་མི་དད་པ་བཅོམ་ལྡན་འདས་སྨན་བླ་བདེ་གཤེགས་མཆེད་བརྒྱད་ལ་སངས་རྒྱས་བྱང་སེམས་ཆོས་སྐྱོང་བའི་སྲུང་མ་རྒྱ་མཚོས་བསྐོར་ཏེ་བཞུགས་པའི་སྤྱན་སྔར་བདག་གཞན་སེམས་ཅན་ཐམས་ཅད་དེང་ནས་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད་ཅིང་སྤྱོད་པ་ལ་ཚུལ་བཞིན་སློབ་པའི་འདུན་པ་དང་བཅས་ཏེ་འདིའི་རྗེས་ཟླསོ་མཛོད། ན་མོ༔ བདག་དང་མཐའ་ཡས་སོགས་ལན་གསུམ། བསགས་སྦྱོང་ཀུན་གྱི་སྙིང་པོ་ཡན་ལག་བདུན་པ་སོ་སོའི་དམིགས་དོན་གསལ་ཐོབ་ལ་འདིའི་རྗེས་བཟློས་མཛོད། ན་མོ༔ བདག་དང་མཁའ་མཉམ་སོགས་ཡན་ལག་བདུན་པ་ལན་གསུམ། དེ་དག་གི་རྒྱུད་སྣོད་རུང་དུ་བྱས་ནས་རྗེས་གནང་ [3a] དངོས་ལ་གསུམ་ལས། དང་པོ་སྐུའི་རྗེས་སུ་གནང་བའི་སླད་དུ་དམིགས་པ་འདི་བཞིན་དུ་མཛོད། བླ་མ་དང་མདུན་བསྐྱེད་དབྱེར་མ་མཆིས་པས་རིན་པོ་ཆེའི་བུམ་པ་ཡེ་ཤེས་བདུད་རྩིའི་ཆུ་རྒྱུན་གྱིས་གང་བ་བསྣམས་ཏེ་ཁྱེར་རང་རྣམས་ཀྱི་སྤྱི་བོ་ནས་དབང་བསྐུར་བར་མོས་ཤོག །ཧཱུྃ། བཅོམ་ལྡན་བདེ་གཤེགས་སྨན་གྱི་བླའི། །བྱིན་རླབས་རང་བཞིན་བདུད་རྩིའི་ཆུས། །སྐལ་ལྡན་ཁྱེད་ལ་དབང་བསྐུར་བས། །བག་ཆགས་དྲི་མ་ཀུན་བྱང་ཤོག གཟུངས་སྔགས་མཐར། ན་མཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ།ཞེས་བུམ་པ་སྤྱི་བོར་བཞག་ཅིང་བུམ་ཆུ་སྦྱིན། ཞེས་གསུངས་ཤིང་དབང་བསྐུར་བས་སྒྲིབ་གཉིས་བག་ཆགས་དང་བཅས་པ་དག་ནས་སྐད་ཅིག་གིས་ཁྱེད་རང་བཅོམ་ལྡན་འདས་ཀྱི་སྐུར་གྱུར་པ་ནི། སྐུ་མདོག་མཐིང་སྔོན་བཻཌཱུརྻའི་མདངས་ཅན་ཕྱག་གཡས་མཆོག་སྦྱིན་ཨ་རུ་ར་དང་གཡོན་མཉམ་གཞག་ལྷུང་བཟེད་རྣམ་པར་རྒྱལ་བས་བཀང་བ་བསྣམས་པ། སྤྲུལ་སྐུའི་ཆ་ལུགས་མཚན་དཔེ་ཡོངས་སུ་རྫོགས་ཤིང་ཆོས་གོས་རྣམ་གསུམ་གསོལ་བ། ཞབས་རྡོ་རྗེའི་སྐྱིལ་ཀྲུང་གིས་པད་ཟླའི་གདན་ལ་བཞུགས་ཤིང་འོད་ཟེར་མཐའ་ཡས་མུ་མེད་པར་འཕྲོ་བའི་སྐུ་ཅན་དུ་ལམ་གྱིས་གྱུར་པར་མོས་མཛོད། [3b] གཉིས་པ་གསུང་གི་རྗེས་སུ་གནང་བའི་སླད་དུ་དམིགས་པ་འདི་བཞིན་དུ་མཛོད། བླ་མ་དང་མདུན་བསྐྱེད་གཉིས་སུ་མེད་པའི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་བཻཌཱུརྻ་ཞུན་མའི་མདངས་ཅན་བྱུང་། ཁྱེད་རང་ལྷར་གསལ་བའི་ཐུགས་ཀའི་ཧཱུྃ་ཡིག་གི་མཐར་འཁོད་པར་མོས་ལ་གཟུངས་སྔགས་འདིའི་རྗེས་ཟློས་ལན་གསུམ་མཛོད། གཟུངས་སྔགས་ཚར་གསུམ་རྗེས་ཟློས་བྱར་གཞུག །དང་པོས་བྱིན་གྱིས་བརླབ། གཉིས་པས་བརྟན་པར་བྱས། གསུམ་པས་གསུང་རིགས་སྔགས་ཀྱི་ནུས་པ་རྒྱུད་ལ་ཞུགས་པར་མོས་ཤིག །གསུམ་པ་ཐུགས་ཀྱི་རྗེས་སུ་གནང་བའི་སླད་དུ་དམིགས་པ་འདི་བཞིན་དུ་མཛོད། བླ་མ་བཅོམ་ལྡན་འདས་མོས་གུས་དྲག་ཏུ་བྱས་པའི་རྐྱེན་གྱིས་མདུན་བསྐྱེད་འོད་དུ་ཞུ་ནས་ཁྱེད་རང་ལ་ཐིམ། ཁྱེད་རང་ལྷར་གསལ་པ་འོད་དུ་ཞུ་ནས་དབྱིངས་སུ་ཡལ་ཏེ་བཅོམ་ལྡན་འདས་ཀྱི་ཐུགས་དང་རང་སེམས་དབྱེར་མེད་སྤྲོས་བྲལ་འོད་གསལ་ཆེན་པོའི་ངང་ལ་མཉམ་པར་འཇོག་མཛོད།ཅེས་ངོ་སྤྲོད། དེ་དག་གིས་བཅོམ་ལྡན་སྨན་གྱི་བླ་མའི་སྐུ་གསུང་ཐུགས་ཀྱི་རྗེས་གནང་ཟབ་མོ་ལེགས་པར་ཐོབ་པ་ཡིན་པས་དེང་ཕྱིན་ཆད་སྐུ་ཕྱག་རྒྱ་བསྒོམ་པ། གསུང་རིགས་སྔགས་བཟླ་བ། ཐུགས་ཡེ་ཤེས་ [4a] ཆེན་པོ་རྣལ་འབྱོར་དུ་བྱེད་པ་ལས་མི་འདའ་བར་མཛོད་ཅིག །ཇི་སྐད་བསྒོས་པའི་ཐ་ཚིག་རྣམས་ཚུལ་བཞིན་དུ་བསྲུང་ངོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་དམ་ཚིག་ལས་དང་། གཏང་རག་ལུས་འབུལ་དགེ་བསྔོ་བཅས་སྤྱི་ལྟར་བྱས་ལ་སློབ་མ་གྱེས། གསུམ་པ་ནི། སློབ་དཔོན་གྱིས་མཆོད་བསྟོད་འདོད་གསོལ་ནོངས་བཤགས་དང་། མདུན་བསྐྱེད་རྟེན་ཡོད་མེད་དང་བསྟུན་པའི་བརྟན་བཞུགས་གཤེགས་གསོལ་གང་འོས་བྱ། བདག་བསྐྱེད་འོད་གསལ་དུ་བསྡུ་ཞིང་སླར་ཡང་སྣང་སྟོང་སྒྱུ་མའི་སྐུར་ལྡང་ལ་དགེ་བསྔོ་ཤིས་བརྗོད་མཐར་དབྱུང་བས་གྲུབ་བོ། །རང་བཟོ་མ་ཡིན་གཞུང་གི་དགོངས་པར་འབྱོར། །དོན་མེད་མ་ཡིན་གཞན་ལ་སྨན་མཐོང་ནས། །གསལ་བདེར་སྤེལ་འདིས་འབྲེལ་བཅས་འགྲོ་བ་ཀུན། །ལྟ་ན་སྡུག་གི་ཞིང་དུ་དབུགས་འབྱིན་ཤོག །ཅེས་པའང་དགེ་བའི་བཤེས་གཉེན་རཏྣའི་མཚན་ཅན་གྱིས་བསྐུལ་བ་ལས་ཤཱཀྱའི་དགེ་བསྙེན་བྱང་སེམས་རིག་པ་འཛིན་པ་བློ་གྲོས་དྲི་མེད་ཕན་བདེའི་འོད་ཟེར་རམ་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ་ལེགས་སུ་གྱུར་ཅིག །སརྦ་དཱ་མངྒ་ལཾ། །