TTDL-ZABTER-07-JA-039

Previous Text Back to Volume PageNext Text

Wylie title	zab gsang mkha' 'gro'i snying thig las: mkha' 'gro seng ge'i gdong can gyi skor las: 'gugs 'dren rdo rje'i lcags kyu:
Location	bdud 'joms gling pa zab gter Volume 7, Text 39, Pages 529-531 (Folios 1a1 to 2a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las mkha' 'gro seng ge'i gdong can gyi skor las 'gugs 'dren rdo rje'i lcags kyu. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: 529-531. Thimphu, Bhutan: Lama Kuenzang Wangdue, 2004.
Side notes	Recto: 'gugs 'dren   Verso: bdud 'joms mkha' 'gro seng gdong
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Longevity Summoning Rituals - tshe 'gugs
Cycle	ཐུགས་སྒྲུབ་ཡེ་ཤེས་ཉི་མ་ (thugs sgrub ye shes nyi ma)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	mkha' 'gro gsang ba ye shes
Colophon	ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་ཡིག་མེད་མཁའ་འགྲོའི་བརྡ་རིས་ལས་ཕབ་པའི་ཡི་གེ་པ་ཡང་རྣལ་འབྱོར་ངག་དབང་ཕྲིན་ལས་ཀྱིས་བྲིས་པས་གནོད་བྱེད་འགུགས་པའི་རྡོ་རྗེ་ལྕགས་ཀྱུ་རུ་འགྱུར་བར་ཤོག །དགེའོ། །ལེགས་སོ། །སརྦ་མངྒ་ལཾ།།
	zhes pa 'di ni khrag 'thung bdud 'joms rdo rjes yig med mkha' 'gro'i brda ris las phab pa'i yi ge pa yang rnal 'byor ngag dbang phrin las kyis bris pas gnod byed 'gugs pa'i rdo rje lcags kyu ru 'gyur bar shog /dge'o/ /legs so/ /sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ མཁའ་འགྲོ་སེང་གེའི་གདོང་ཅན་གྱི་སྐོར་ལས༔ འགུགས་འདྲེན་རྡོ་རྗེའི་ལྕགས་ཀྱུ་བཞུགས༔ ན་མོ་གུ་རུ་བྷྱ༔ (བརྡ་ཡིག་) འགུགས་འདྲེན་བྱེད་པའི་རིམ་པ་ལ༔ ལིང་ག་དགྲ་བོའི་བླ་ཡིད་སེམས་གསུམ་འདུས་པའི་ངོ་བོར་དམིགས་ཏེ༔ སྙིང་གའི་ནྲྀ་ལས་འོད་ཟེར་ལྕགས་ཀྱུ་ལྟ་བུར་འཕྲོས་པས་དགྲ་བགེགས་ཀྱི་སྙིང་གའི་ནྲྀ་ཏྲི་ལ་བཟུངས་ཏེ་ཉ་མོ་ལྕགས་ཀྱུས་འཐེན་པ་བཞིན་དུ་རང་དབང་མེད་པར་བཀུག་ནས་ལིང་ག་ལ་ཐིམ་པར་བསམ༔ ན་མོ༔ དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་༔ སངས་རྒྱས་ཀྱི་བཀའ༴ཆོས་ཀྱི་བཀའ༴དགེ་འདུན་གྱི་བཀའ༴ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་རྣམས་ཀྱི་བཀའ༴མཁའ་འགྲོ་སེང་གེའི་གདོང་པ་ཅན་འབུམ་ཕྲག་ཡངས་པའི་མཁའ་འགྲོ་རྣམས་ཀྱི་བཀའ༴ཡེ་ཤེས་དང་ལས་ལ་གྲུབ་པའི་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ༴དོན་དམ་ཆོས་ཉིད་ངོ་བོ་གདོད་ནས་རྣམ་པར་དག་པའི་བཀའ༴ཀུན་རྫོབ་རྟེན་འབྲེལ་བསླུ་བ་མེད་པ་རྒྱུ་འབྲས་ཟབ་མོའི་བདེན་པའི་མཐུས༔ བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་ཉི་མ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུ་ནས་བསམ་སྦྱོར་ངན་པ་ཤོམ་པའི་སྔ་དགྲ་འདས་པ༔ ད་དགྲ་དར་བ༔ ཕྱི་དགྲ་ཡིད་ལ་བཅག་པའི་གཟུགས་ཅན་སྡང་བར་བྱེད་པའི་དགྲ༔ གཟུགས་མེད་གནོད་པར་བྱེད་པའི་བགེགས༔ གནོད་པའི་སེམས་དང་ལྡན་པ༔ གདུག་པའི་སེམས་དང་ལྡན་པ༔ རྒོལ་བའི་སེམས་དང་ལྡན་པ༔ སྡང་བའི་སེམས་དང་ལྡན་པ༔ དྲག་ཤུལ་གྱི་སེམས་དང་ལྡན་པ་ཐམས་ཅད་དང་༔ བྱད་མ་རྦོད་གཏོང་གང་གནོད་ཐམས་ཅད་ཀྱི་བླ་སྲོག་རྣམ་པར་ཤེས་པ་གཟུགས་ལིང་ག་འདི་ལ་ཁུག་ཅིག༔ བསྟིམ་ཅིག༔ གཉིས་སུ་མེད་པར་གྱུར་ཅིག༔ ནྲྀཿབཛྲ་ཨཾ་ཀུ་ཤ་ཛ༔ ཏྲིཿབཛྲ་ཨཾ་ཀུ་ཤ་ཛཿརཏྣ་པཱ་ཤ་ཧཱུྃ༔ པདྨ་སྥོ་ཊ་བཾ༔ ཀརྨ་གྷཎྜེ་ ཧོཿ ཞེས་ལན་གྲངས་མང་དུ་བརྗོད༔ དེ་ནས་གྲངས་མང་བསྐྱར་དགོས་ན༔ ན་མོ༔ དཀོན་མཆོག་གསུམ་དང་རྩ་བ་གསུམ༔ འབུམ་ཕྲག་མཁའ་འགྲོའི་བདེན་པ་དང་༔ བདེན་པའི་བདེན་ཚིག་འདི་དག་གིས༔ སྡང་བའི་དགྲ་དང་གནོད་པའི་བགེགས༔ བར་དུ་གཅོད་པ་གང་ཡིན་པ༔ དམིགས་རྟེན་ལིངྒ་འདི་ལ་ཁུག༔ ཚིག་རྐང་འདི་མ་དཔེར་མི་འདུག་པས་གསར་དུ་བཙུད་པ་ཡིན༔ མཆན།དམིགས་པའི་གནད་དང་ལྡན་པའི་ངང་༔ འདི་ལྟར་གྲངས་ལྡན་བསྐྱར་གྱུར་ན༔ འདྲེན་ཅིང་འགུགས་པར་གདོན་མི་ཟ༔ དམིགས་གནད་གསུམ་གྱིས་བསྒྲལ་བར་བྱ༔ ས་མ་ཡ༔ རྒྱ་རྒྱ་རྒྱ༔ ཁ་ཐམ༔ གུ་ཧྱ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་ཡིག་མེད་མཁའ་འགྲོའི་བརྡ་རིས་ལས་ཕབ་པའི་ཡི་གེ་པ་ཡང་རྣལ་འབྱོར་ངག་དབང་ཕྲིན་ལས་ཀྱིས་བྲིས་པས་གནོད་བྱེད་འགུགས་པའི་རྡོ་རྗེ་ལྕགས་ཀྱུ་རུ་འགྱུར་བར་ཤོག །དགེའོ། །ལེགས་སོ། །སརྦ་མངྒ་ལཾ།།