TTDL-ZABTER-12-NA-081

Previous Text Back to Volume PageNext Text

Wylie title	chos nyid nam mkha'i klong mdzod las: ye shes kyi mkha' 'gro rdo rje rnal 'byor ma'i dbang chog smin byed dbang gi chu rgyun:
Location	bdud 'joms gling pa zab gter Volume 12, Text 81, Pages 465-469 (Folios 1a1 to 3a1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las ye shes kyi mkha' 'gro rdo rje rnal 'byor ma'i dbang chog smin byed dbang gi chu rgyun. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 465-469. Thimphu, Bhutan: Lama Kuenzang Wangdue, 2004.
Side notes	Recto: dbang chog   Verso: bdud 'joms rdo rje rnal 'byor ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	rdo rje rnal 'byor ma
Colophon	ཞེས་པ་འདི་རྣལ་འབྱོར་བ་ཆོས་གསལ་གྱིས་བཞེད་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་སྤྲུལ་སྐུ་པདྨ་ལུང་རྟོགས་རྒྱ་མཚོའོ། །དགེའོ། །དགེའོ། །དགེའོ།།
	zhes pa 'di rnal 'byor ba chos gsal gyis bzhed ngor bdud 'joms rdo rjes nam mkha'i mdzod las bsgyur ba'i yi ge pa ni sprul sku pad+ma lung rtogs rgya mtsho'o/_/dge'o/_/dge'o/_/dge'o//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ ཡེ་ཤེས་ཀྱི་མཁའ་འགྲོ་རྡོ་རྗེ་རྣལ་འབྱོར་མའི་དབང་ཆོག་སྨིན་བྱེད་དབང་གི་ཆུ་རྒྱུན་བཞུགས༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) མཁའ་འགྲོ་བསྒྲུབ་པའི་རྣལ་འབྱོར་གྱི༔ སྒོ་གསུམ་དབང་གིས་མ་སྨིན་ན༔ བསྐལ་པར་བསྒྲུབ་ཀྱང་འབྲས་མི་འབྱིན༔ དེ་ཕྱིར་དབང་ཆོག་ཟབ་མོ་ཡི༔ སྒོར་ཞུགས་བསྐྱེད་རིམ་གནད་ལྡན་ཏེ༔ བསྒྲུབ་པས་འབྲས་བུ་མངོན་དུ་བྱེད༔ འདི་ཡི་ལག་ལེན་རིམ་པ་ལ༔ སློབ་མ་གྲལ་འཁོད་ཁྲུས་བྱ་ཞིང་༔ བགེགས་བསྐྲད་སྲུང་བའི་འཁོར་ལོ་བསྒོམ༔ དེ་ནས་གསོལ་བ་གདབ་པ་ལ༔ ཀྱཻ་ཧོཿདུས་གསུམ་སངས་རྒྱས་ཐམས་ཅད་ཀྱི༔ ཕྲིན་ལས་མངའ་བདག་ཆེ་བའི་མཆོག༔ བླ་མ་རྡོ་རྗེ་འཛིན་ཁྱོད་ཀྱིས༔ སྨིན་གྲོལ་དབང་མཆོག་བསྐུར་དུ་གསོལ༔ ལན་གསུམ་མཐར༔ དེ་ནས་སྐྱབས་སུ་འགྲོ་ཞིང་སེམས་བསྐྱེད་དེ༔ ཨོཾ་མ་ཧཱ་ཤུ་ནྱ་ཏཱ་སོགསཀོ྅་ཧཾ༔ འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་ཉིད་དེ་བཞིན་ཉིད་ཀྱི་རོལ་པར་ཞིག་སྟེ་སྟོང་པའི་ངང་ལས༔ ཞེས་སློབ་མ་ལྷར་བསྐྱེད་ལ༔ དབྱིངས་ནས་སྤྱན་དྲངས་པའི་ལྷ་ཚོགས་བསྟིམ༔ ཏིཥྛ་བཛྲ་གྱིས་བརྟན་པར་བྱ༔ དེ་ནས་བུམ་པ་ཐོགས་ལ༔ ཧོཿལྷུན་གྲུབ་བུམ་པའི་གཞལ་ཡས་སུ༔ ཡེ་ཤེས་མཁའ་འགྲོའི་དཀྱིལ་འཁོར་རྫོགས༔ སྐལ་ལྡན་བུ་ལ་དབང་བསྐུར་བས༔ བུམ་དབང་ཡོངས་སུ་རྫོགས་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རྡོ་རྗེ་རྣལ་འབྱོར་མའི་སྐུ་ཐོགས་ལ༔ ཧཱུྃ༔ གདོད་མའི་ཡེ་གཞི་ཆོས་ཀྱི་སྐུ༔ ལྷུན་གྲུབ་རྡོ་རྗེ་རྣལ་འབྱོར་མས༔ སྐལ་ལྡན་བུ་ལ་དབང་བསྐུར་བས༔ ཆོས་ཀྱི་སྐུ་རུ་སྨིན་གྲོལ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ རྡོ་རྗེ་མཁའ་འགྲོའི་སྐུ་གཏད་ལ༔ ཧཱུྃ༔ མེ་ལོང་ལྟ་བུའི་ཡེ་ཤེས་སྐུ༔ རྡོ་རྗེ་རིགས་ཀྱི་མཁའ་འགྲོ་མས༔ སྐལ་ལྡན་བུ་ལ་དབང་བསྐུར་བས༔ མེ་ལོང་ཡེ་ཤེས་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ རིན་ཆེན་མཁའ་འགྲོའི་སྐུ་གཏད་ལ༔ ཧཱུྃ༔ མཉམ་པ་ཉིད་ཀྱི་ཡེ་ཤེས་སྐུ༔ རིན་ཆེན་རིགས་ཀྱི་མཁའ་འགྲོ་མས༔ སྐལ་ལྡན་བུ་ལ་དབང་བསྐུར་བས༔ མཉམ་ཉིད་ཡེ་ཤེས་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ པདྨ་མཁའ་འགྲོའི་སྐུད་གཏད་ལ༔ ཧཱུྃ༔ སོ་སོར་རྟོག་པའི་ཡེ་ཤེས་སྐུ༔ པདྨ་རིགས་ཀྱི་མཁའ་འགྲོ་མས༔ སྐལ་ལྡན་བུ་ལ་དབང་བསྐུར་བས༔ སོར་རྟོག་ཡེ་ཤེས་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ ལས་ཀྱི་མཁའ་འགྲོའི་སྐུ་གཏད་ལ༔ ཧཱུྃ༔ བྱ་བ་གྲུབ་པའི་ཡེ་ཤེས་སྐུ༔ ལས་ཀྱི་རིགས་ཀྱི་མཁའ་འགྲོ་མས༔ སྐལ་ལྡན་བུ་ལ་དབང་བསྐུར་བས༔ བྱ་གྲུབ་ཡེ་ཤེས་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ ཤར་གྱི་སྒོ་མའི་སྐུ་གཏད་ལ༔ ཛཿཐམས་ཅད་འགུགས་བྱེད་ཕོ་ཉ་མོ༔ ཡེ་ཤེས་མཁའ་འགྲོ་ལྕགས་ཀྱུ་མས༔ སྐལ་ལྡན་བུ་ལ་དབང་བསྐུར་བས༔ སྙིང་རྗེ་ཚད་མེད་མངོན་གྱུར་ཤོག༔ རྩ་སྔགས་མཐར༔ ཀཱ་ལ་ཨ་བྷི་ཥིཉྩ་ཧཱུྃ༔ ལྷོའི་སྒོ་མའི་སྐུ་གཏད་ལ༔ ཧཱུྃ༔ ཐམས་ཅད་འཆིང་བྱེད་ཕོ་ཉ་མོ༔ ཡེ་ཤེས་མཁའ་འགྲོ་ཞགས་པ་མས༔ སྐལ་ལྡན་བུ་ལ་དབང་བསྐུར་བས༔ བྱམས་པ་ཚད་མེད་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ ནུབ་ཀྱི་སྒོ་མའི་སྐུ་གཏད་ལ༔ བཾ༔ ཐམས་ཅད་དབང་དུ་བྱེད་པ་མོ༔ ཡེ་ཤེས་མཁའ་འགྲོ་ལྕགས་སྒྲོག་མས༔ སྐལ་ལྡན་བུ་ལ་དབང་བསྐུར་བས༔ དགའ་བ་ཚད་མེད་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ བྱང་གི་སྒོ་མའི་སྐུ་གཏད་ལ༔ ཧོཿ ཐམས་ཅད་མྱོས་བྱེད་ཕོ་ཉ་མོ༔ ཡེ་ཤེས་མཁའ་འགྲོ་དྲིལ་བུ་མས༔ སྐལ་ལྡན་བུ་ལ་དབང་བསྐུར་བས༔ བཏང་སྙོམས་ཚད་མེད་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་གསང་དབང་བསྐུར་བ་ནི༔ བྷནྡྷ་བདུད་རྩི་གཏད་ལ༔ ཧོཿཡེ་ཤེས་དབྱིངས་ཀྱི་ཀ་པཱ་ལར༔ བདེ་སྟོང་བདུད་རྩི་བཅུད་དུ་འཁྱིལ༔ སྐལ་ལྡན་ཁྱོད་ཀྱི་ངག་ཏུ་བླུད༔ རྡོ་རྗེ་གསུང་གི་དབང་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཧཱུྃ༔ ཤེར་དབང་བསྐུལ་བ་ལ༔ རིག་མ་གཏད་ལ༔ ཧོཿ ཤེས་རབ་སྟོང་ཉིད་རོལ་པའི་གདངས༔ མཚན་དང་ལྡན་པའི་མཛའ་ན་མོ༔ སྐལ་ལྡན་ཁྱོད་ལ་གཏད་ཅིང་སྦྱིན༔ རྡོ་རྗེ་ཐུགས་ཀྱི་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ ཚིག་དབང་བསྐུར་བ་ལ༔ ཧོཿལྷུན་གྲུབ་སྐུ་དང་ཡེ་ཤེས་ཀྱི༔ རང་གདངས་མངོན་དུ་བྱེད་པའི་རྟེན༔ དྲི་མེད་འཇའ་ཤེལ་འདི་གཏད་པས༔ མཚན་མ་ཚིག་བྲལ་དབང་ཐོབ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཧཱུྃ༔ གཏོར་མ་གཏད་ལ༔ ཧོཿ བརྡལ་ཁྱབ་དབྱིངས་ཀྱི་གཏོར་གཞོང་དུ༔ མཁའ་འགྲོའི་དཀྱིལ་འཁོར་ཡོངས་རྫོགས་པའི༔ རང་བྱུང་ལྷུན་གྲུབ་བ་ལིང་ཏ༔ སྐལ་ལྡན་ཁྱོད་ལ་གཏད་པ་ཡིས༔ རིགས་དང་དཀྱིལ་འཁོར་ཐམས་ཅད་ལ༔ དབང་བསྒྱུར་དབང་མཆོག་རབ་ཐོབ་ནས༔ མཆོག་ཐུན་དངོས་གྲུབ་བརྙེས་པར་ཤོག༔ རྩ་སྔགས་མཐར༔ ཀཱ་ཡ་ཝཱཀ་ཙིཏྟ་བ་ལིཾ་ཏ་ཨ་བྷི་ཥིཉྩ་ཧཱུྃ༔ རིམ་གཉིས་གདིང་ལྡན་སློབ་དཔོན་གྱིས༔ དད་དམ་ལྡན་པའི་སློབ་མ་ལ༔ དབང་འདི་བསྐུར་ཏེ་ཉམས་ལེན་ན༔ ཚེ་འདིར་མཆོག་གི་དངོས་གྲུབ་ཐོབ༔ བཀའ་སྲུང་གནོད་སྦྱིན་དམར་ནག་ལ༔ གཏད་དོ་ཐུབ་པར་སྲུངས་ཤིག་རྒྱ༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་རྣལ་འབྱོར་བ་ཆོས་གསལ་གྱིས་བཞེད་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་སྤྲུལ་སྐུ་པདྨ་ལུང་རྟོགས་རྒྱ་མཚོའོ། །དགེའོ། །དགེའོ། །དགེའོ།།