DJYD-KABUM-16-MA-059

Previous Text Back to Volume PageNext Text

Wylie title	zab lam mtsho skyes thugs thig gi dbang bskur mtshams sbyor gyis brgyan pa pad+ma'i chun po
Location	bdud 'joms rin po che bka' 'bum Volume 16, Text 59, Pages 577-592 (Folios 1a1 to 8b4)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Zab lam mtsho skyes thugs thig gi dbang bskur mtshams sbyor gyis brgyan pa pad+ma'i chun po. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 577-592. Kalimpong: Dupjung Lama, 1979-1985.
Side notes	Recto: dbang chog   Verso: mtsho skyes thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Empowerment Ritual - dbang chog - dbang skur  ·  Procedural Outline for Rituals - mtshams sbyor
Cycle	ཟབ་ལམ་མཚོ་སྐྱེས་ཐུགས་ཐིག་ (zab lam mtsho skyes thugs thig)
Colophon	།དེ་ལྟར་དབང་བསྐུར་མཚམས་སྦྱོར་མདོར་བསྡུས་ཀྱིས་བརྒྱན་ཏེ་ངག་འདོན་བཀླག་ཆོག་ཏུ་བཀོད་པ་འདིའང་སྤྲུལ་པའི་སྐུ་མཆོག་འཇིགས་མེད་ཆོས་དབྱིངས་ནོར་བུ་དོན་གྲུབ་ཀྱི་བཞེད་པ་སྐོང་བའི་སླད་དུ། འཇིགས་བྲལ་ཡེ་ཤེས་རྡོ་རྗེས་རྒྱལ་ཟླའི་ཡར་ངོ་བཟང་པོ་གཉིས་པའི་དུས་ཚེས་དགེ་བར་སྦྱར་བའི་ཡི་གེ་པ་ནི་ཆོས་མཛད་བླ་མ་འགྱུར་མེད་བསྟན་འཛིན་རྡོ་རྗེས་མཛད་པ་སིདྡྷི་རསྟུ༎
	de ltar dbang bskur mtshams sbyor mdor bsdus kyis brgyan te ngag 'don bklag chog tu bkod pa 'di'ang sprul pa'i sku mchog 'jigs med chos dbyings nor bu don grub kyi bzhed pa skong ba'i slad du/___'jigs bral ye shes rdo rjes rgyal zla'i yar ngo bzang po gnyis pa'i dus tshes dge bar sbyar ba'i yi ge pa ni chos mdzad bla ma 'gyur med bstan 'dzin rdo rjes mdzad pa sid+d+hi rastu//

Tibetan Text

Tsagli

[edit]

༄༅། །ཟབ་ལམ་མཚོ་སྐྱེས་ཐུགས་ཐིག་གི་དབང་བསྐུར་མཚམས་སྦྱོར་གྱིས་བརྒྱན་པ་པདྨའི་ཆུན་པོ་ཞེས་བྱ་བ་བཞུགས་སོ། །

༄༅། །ཨོཾ་སྭསྟི། (ཟབ་ལམ་མཚོ་སྐྱེས་ཐུགས་ཐིག་གི་སྒོ་ནས་སློབ་མ་རྗེས་སུ་འཛིན་པར་འདོད་པས། སྦྱོར་བ་སྟེགས་བུ་ཁེབས་ལྡན་གྱི་དབུས་སུ་རིན་པོ་ཆེའི་མཎྜལ་ལ་འབྲུ་དཀར་གྱི་ཚོམ་བུ་གཅིག་བཀོད་པའི་སྟེང་དུ་མཉྫིའི་ཁར་གཏོར་མ་རིན་ཆེན་འབར་བ་སྐུ་ཙཀ་དར་གདུགས་ཀྱིས་སྤྲས་པ་དང་། མདུན་དུ་ཚེ་བུམ་འབྲང་རྒྱས། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར་རྣམས་དགོད། མཆོད་རྫས་སྨན་རཀ་གཏོར་མ་དང་ཉེར་སྤྱོད་སོགས་སྤྱི་ལྟར་བཤམས་ལ། ཕྲིན་ལས་ཀྱི་གཞུང་བསྲངས་ཏེ་བདག་མདུན་འོད་ཟེར་སྤྲོ་བསྡུའི་དམིགས་གནད་དང་བཅས་རྩ་བའི་བཟླས་པ་གང་འགྲུབ་མཐར། ) རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་དང་ལས་བྱེད་ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་སྤྲོས་པས། རང་དང་བསྒྲུབ་བྱའི་བླ་ཚེ་ཆད་（2ན）ཉམས་ཡར་བ་དང་། འབྱུང་བ་བཞིའི་དྭངས་མ། འཁོར་འདས་ཀྱི་བཅུད་དང་དགེ་མཚན་ཐམས་ཅད་འཆི་མེད་ཚེའི་བདུད་རྩི་འོད་ཟེར་ཁ་དོག་སྣ་ཚོགས་པའི་རྣམ་པར་བསྡུས་ཏེ། རང་དང་མདུན་གྱི་ཚེ་རྫས་ལ་ཐིམ་པས་རྡོ་རྗེ་ཚེའི་བཅུད་ལེན་དུ་གྱུར་པར་(མོས་ལ། ཚེ་ཛཔྲ་གང་མང་བཟླ། ལས་བུམ་རྟ་སྔགས་ཀྱིས་བརླབས། ཚོགས་ཀྱི་མཆོད་པ་དང་ཏིང་ངེ་འཛིན་གྱི་དབང་བླང་བ་བཅས་གྲུབ་ནས། སློབ་མ་རྣམས་ཁྲུས་ནས་དབྱུང་། བགེགས་བསྐྲད་ཅིང་སྲུང་འཁོར་བསྒོམས། མེ་ཏོག་བཀྲམ་བསྡུ་བྱས་ལ། ) འོ། ནམ་མཁའ་དང་མཉམ་པའི་སེམས་ཅན་ཐམས་ཅད་རིགས་འདུས་འཆི་མེད་པདྨ་ཐོད་ཕྲེང་རྩལ་གྱི་གོ་འཕང་ལ་འགོད་པར་བྱ། （2བ）དེའི་ཆེད་དུ་སྨིན་བྱེད་ཀྱི་དབང་བསྐུར་ཟབ་མོ་གསན་ཏེ་ལམ་རིམ་པ་གཉིས་ཀྱི་རྣལ་འབྱོར་ལ་བརྩོན་པར་བགྱིའོ་སྙམ་པའི་ཀུན་སློང་རྣམ་པར་དག་པ་གསལ་བཏབ་ནས་གསན་འཚལ། དེའང་གསང་ཆེན་འོད་གསལ་རྡོ་རྗེ་ཐེག་པ་ཚེ་གཅིག་གིས་འཚང་རྒྱ་བའི་ལམ་གྱི་ནང་ནས་ཟབ་པའི་སྙིང་པོར་གྱུར་པ་དབང་རྣོན་སྔོན་སྦྱངས་ལས་འཕྲོ་སད་པ་རྣམས་ཀྱི་འཇུག་སྒོར་བླ་མ་ཐུགས་ཀྱི་དཀྱིལ་འཁོར་དུ་དབང་བསྐུར་ནས་རིམ་གཉིས་ཉམས་སུ་ལེན་པའི་ཚུལ་རྒྱ་ཆེར་གསུངས་ཤིང་མཆོག་ཏུ་བསྔགས་པར་མཛད་པ་བཞིན། རྒྱལ་བ་ཐམས་ཅད་ཀྱི་གསུང་རྡོ་རྗེའི་རང་གཟུགས་སློབ་དཔོན་ཆེན་པོ་པདྨ་ཐོད་ཕྲེང་རྩལ་གྱིས་སྙིགས་མའི་སྐྱེ་འགྲོའི་གདུང་སེལ་དུ་སྩལ་བ་ཟབ་ལམ་བླ་མ་སྒྲུབ་པའི་གདམས་སྲོལ་གྱི་ཁྱད་པར་ཇི་སྙེད་ཅིག་མཆིས་པ་ལས། འདིར་འབྲོག་བན་ལོ་ཙཱ་བའི་ཐུགས་བཅུད། སྤྲུལ་པའི་རིག་འཛིན་ཆེན་པོ་འཇིགས་བྲལ་ཡེ་ཤེས་རྡོ་རྗེའམ་བདུད་འཇོམས་འགྲོ་འདུལ་གླིང་པ་རྩལ་གྱི་འོད་གསལ་དགོངས་པའི་གཏེར་མཛོད་ལས་བྱོན་པ་ཟབ་ལམ་མཚོ་སྐྱེས་ཐུགས་ཐིག་ཅེས་ངོ་མཚར་བྱིན་རླབས་ཀྱི་ཚན་ཁ་གཞན་ལས་ཁྱད་པར་དུ་གྱུར་པ་འདི་ཉིད་ཀྱི་དཀྱིལ་འཁོར་དུ་བྱིན་རླབས་རྩ་བའི་དབང་བསྐུར་ཟབ་མོ་(3ན)བསྒྲུབ་པར་བགྱི་བ་ལ། བདག་ཉིད་ཀྱི་བགྱི་འོས་རྣམས་སྔོན་དུ་གྲུབ། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་དབང་བསྐུར་གསན་པའི་ཡོན་དུ་དམིགས་ཏེ་མཎྜལ་ཞིག་འབུལ་འཚལ། (ཅེས་མཎྜལ་ཕུལ། ) ཕྱག་སྙིམ་པ་མེ་ཏོག་དང་བཅས་ཐལ་མོ་སྦྱོར་ལ་གསོལ་འདེབས་པ་འདིའི་རྗེས་ཟློས་མཛོད། ཀྱེ་ཧོཿ རིགས་བརྒྱའི་ཁྱབ་བདག་བླ་མ་རྗེ༔ བདག་ཅག་སྐལ་ལྡན་སློབ་བུ་རྣམས༔ བདེ་ཆེན་གསང་བའི་དཀྱིལ་འཁོར་དུ༔ གཞུག་ཅིང་སྨོན་པར་མཛད་དུ་གསོལ༔ (ལན་གསུམ། ) མདུན་གྱི་ནམ་མཁར་བླ་མ་འཆི་མེད་ཐོད་ཕྲེང་རྩལ་ལ་ཕྱོགས་དུས་སྐྱབས་ཡུལ་རྒྱ་མཚོས་བསྐོར་བ་མངོན་སུམ་དུ་སད་པའི་སྤྱན་སྔར་བདག་གཞན་སེམས་ཅན་ཐམས་ཅད་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བའི་འདུན་པས་འདིར་རྗེས་ཟློས། ན་མོ༔ གདོད་མའི་གནས་ལུགས་(སོགས་ལན་གསུམ། ) མཁའ་ཁྱབ་ཀྱི་སེམས་ཅན་ཐམས་ཅད་རིགས་འདུས་ཐོད་ཕྲེང་རྩལ་གྱི་གོ་འཕང་ལ་འགོད་པར་བྱ། དེའི་ཆེད་དུ་ལམ་ཟབ་མོའི་སྒོར་ཞུགས་ཏེ་ཚུལ་བཞིན་ཉམས་སུ་བླང་བར་བགྱིའོ་སྙམ་པ་སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་པ་འདིའི་རྗེས་ཟློས། ཧོཿ མ་རྟོགས་གཉིས་(3བ)འཛིན་(སོགས་ལན་གསུམ། ) སྐྱབས་ཡུལ་རྩ་གསུམ་རྒྱ་མཚོའི་སྤྱན་སྔར་བསགས་སྦྱོང་སྤེལ་གསུམ་གྱི་སྙིང་པོར་གྱུར་པ་ཚོགས་བསགས་པ་འདིའི་རྗེས་ཟློས། ཨ༔ རིག་སྟོང་ཁྱབ་བརྡལ་བླ་མ་གཤེགས༔ (སོགས་ལན་གསུམ། ) དེ་ནས་དབང་གི་གཞི་དགོད་པ་ཡེ་ཤེས་ཀྱི་བྱིན་དབབ་པའི་སླད་དུ་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། (ལས་སྔགས་དང་། ) སྭ་བྷཱ་ཝ(ས་བསང་སྦྱངས། ) ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་ཀྱི་ངང་ལས་ཆུ་ལས་ཆུ་བུར་རྡོལ་བ་བཞིན་སྐད་ཅིག་གིས་རིགས་འདུས་པདྨ་ཐོད་ཕྲེང་རྩལ་གྱི་སྐུར་གྱུར་པ་ནི། སྐུ་མདོག་དཀར་དམར་གཞོན་ནུ་ལོ་བརྒྱད་ལོན་པའི་ན་ཚོད་ཅན། མཛེས་འཛུམ་རྗེས་སུ་ཆགས་པའི་ལང་ཚོས་སྒེག་པ། གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་མཉམ་གཞག་གི་ཕྱག་རྒྱས་བདུད་རྩིའི་ཀ་པཱ་ལ་དང་འཆི་མེད་ཚེའི་བུམ་པ་བསྣམས་པ། ཞབས་རྡོ་རྗེའི་སྐྱིལ་མོ་ཀྲུང་གིས་སྣ་ཚོགས་པདྨ་ཉི་ཟླའི་གདན་ལ་བཞུགས་པ། པང་དུ་ཡུམ་མནྡྷ་ར་བ་དཀར་མོ་མདའ་དར་ཚེ་བུམ་འཛིན་པས་མགུལ་ནས་འཁྱུད་པ་དང་མཉམ་པར་སྦྱོར་ཞིང་། (4ན)དར་དང་རུས་པ་དང་རིན་པོ་ཆེ་སོགས་ལོངས་སྤྱོད་རྫོགས་པའི་རྒྱན་གྱིས་སྤྲས་པ། སྣང་སྲིད་འཇའ་ཟེར་ཐིག་ལེ་དྭངས་མར་འཁྲིགས་པའི་ཀློང་ན་ཡེ་ཤེས་སྒྱུ་མའི་སྐུ་ཅན་དུ་ལམ་གྱིས་གསལ་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་རྣམས་ཀྱིས་མཚན་པར་གསལ་ཐོབ། རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ་སློབ་དཔོན་ཉིད་དཀྱིལ་འཁོར་མངའ་བདག་རིགས་འདུས་པདྨ་ཐོད་ཕྲེང་རྩལ་དངོས་ཡིན་སྙམ་པའི་མོས་གུས་ཀྱི་གདུང་བ་དྲག་ཏུ་བསྐྱེད་པ་ལ་བརྟེན་ནས། སློབ་དཔོན་གྱི་ཐུགས་ཀ་ནས་འོད་ཟེར་གྱི་སྣང་བ་བསམ་གྱིས་མི་ཁྱབ་པ་འཕྲོས་པས་ཕྱོགས་བཅུའི་ཞིང་རབ་འབྱམས་རྣམས་དང་། ལྷོ་ནུབ་པདྨ་འོད་ཀྱི་ཕོ་བྲང་ཆེན་པོར་རྩ་གསུམ་སྒྱུ་འཕྲུལ་དྲྭ་བའི་ལྷ་ཚོགས་རྣམས་ལ་ཕོག །ཐུགས་དམ་གྱི་རྒྱུད་རང་དབང་མེད་པར་བསྐུལ་ཏེ་ཡེ་ཤེས་པའི་ལྷ་ཚོགས་སྐུ་དང་ཡིག་འབྲུ་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་ལྟར་སྤྱན་དྲངས་ཏེ་ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབ་པར་མོས་ཤིག །(ཅེས་འབེབས་རྫས་བཏུལ་ཞིང་རོལ་མོའི་སྒྲ་དང་བཅས་ཚིག་བདུན་མ་སོགས་(4བ)སྤྱན་འདྲེན་དང་རྩ་སྔགས་ལ། ) ཛྙཱ་ན་ཨ་བེ་ཤ་ཡ་ཨ་ཨ༔ (ཞེས་བཏགས་པ་མང་དུ་བརྗོད་ལ་དབབ། ) དེ་ལྟར་བྱིན་དབབས་པའི་ཡེ་ཤེས་པ་དེ་ཉིད་བྱང་ཆུབ་སྙིང་པོའི་བར་དུ་བརྟན་པར་བྱས་པར་མོས་ཤིག །ཏིཥྠ་བཛྲ། (ཞེས་མེ་ཏོག་དང་བཅས་པའི་རྡོ་རྗེ་སྤྱི་བོར་རྒྱ་གྲམ་དུ་བཀོད། ) དེ་རྣམས་ཀྱིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་ནས། དངོས་གཞིའི་དབང་བསྐུར་བའི་སླད་དུ་གཏོར་སྣོད་རང་བྱུང་པདྨ་བྷཉྫའི་གཞལ་མེད་ཁང་ཆེན་པོར་གཏོར་མ་རིགས་འདུས་འཆི་མེད་པདྨ་ཐོད་ཕྲེང་རྩལ་རབ་འབྱམས་རྩ་གསུམ་རྒྱ་མཚོའི་སྤྲིན་ཕུང་འཕྲོ་བའི་བདག་ཉིད་དུ་གསལ་བའི་དཔྲལ་བའི་ཨོཾ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་དཔྲལ་བར་ཐིམ་པས་སྐུ་བུམ་པའི་དབང་གིས་ལུས་རྡོ་རྗེ་སྐུའི་རོལ་པར་བྱིན་གྱིས་བརླབས་པའི་མོས་པ་མཛོད། (དཔལ་གྱི་གཏོར་ཆེན་བཏེགས་ལ། ) ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་(5ན)མཆོག་འདི་རུ་བྱིན་ཕོབ་ལ༔ སྒྲུབ་མཆོག་སྐལ་ལྡན་སློབ་བུ་ལ༔ བུམ་དབང་ལུས་ལ་བསྐུར་བ་དང་༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ (རྩ་སྔགས་དང་། ) ཀཱ་ཡ་ཨ་བྷི་ཥིཉྩ་ཨོཾ༔ (ཞེས་སྤྱི་བོར་བཞག །)ཡང་གཏོར་མ་ལྷར་གསལ་བའི་མགྲིན་པའི་ཨཱཿལས་འོད་ཟེར་དམར་པོ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་མགྲིན་པར་ཐིམ་པས་གསུང་གསང་བའི་དབང་གིས་ངག་རྡོ་རྗེ་གསུང་གི་རོལ་པར་བྱིན་གྱིས་བརླབ་པའི་མོས་པ་མཛོད། ཧཱུྃ༔ ཨོ་རྒྱན༴པདྨ༴ ཡ་མཚན༴ པདྨ༴ འཁོར༴ ཁྱེད་ཀྱི༴ བྱིན་གྱིས༴ གནས་མཆོག༴ སྒྲུབ་མཆོག་སྐལ་ལྡན་སློབ་བུ་ལ༔ གསང་དབང་ངག་ལ་བསྐུར་བ་དང་༔ བགེགས་དང་༴ མཆོག་དང་༴ རྩ་སྔགས་དང་༴ ཝཱ་ཀ་ཨ་བྷི་ཥིཉྩ་ཨཱཿ (ཞེས་མགྲིན་པར་བཞག །)ཡང་གཏོར་མ་ལྷར་གསལ་བའི་ཐུགས་ཀའི་ཧཱུྃ་ལས་འོད་ཟེར་མཐིང་ག་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་སྙིང་གར་ཐིམ་པས་ཐུགས་ཤེས་རབ་ཡེ་ཤེས་ཀྱི་དབང་གིས་ཡིད་རྡོ་རྗེ་ཐུགས་ཀྱི་རོལ་པར་བྱིན་གྱིས་བརླབ་པའི་མོས་པ་མཛོད། ཧཱུྃ༔ ཨོ་རྒྱན༴པདྨ༴ ཡ་མཚན༴ པདྨ༴ (5བ)འཁོར་དུ༴ ཁྱེད་ཀྱི༴ བྱིན་གྱིས༴ གནས་མཆོག༴ སྒྲུབ་མཆོག་སྐལ་ལྡན་སློབ་བུ་ལ༔ ཤེས་དབང་ཡིད་ལ་བསྐུར་བ་དང་༔ བགེགས་དང་༴ མཆོག་དང་༴ (རྩ་སྔགས་དང་། ) ཙིཏྟ་ཨ་བྷི་ཥིཉྩིཉྩ་ཧཱུྃ༔ (ས་སྙིང་གར་བཞག །)ཡང་གཏོར་མ་ལྷར་གསལ་བའི་གནས་གསུམ་ནས་འོད་ཟེར་དཀར་དམར་མཐིང་གསུམ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་གནས་བཞིར་ཐིམ་པས་དབང་བཞི་པའི་རིམ་པས་ཟུང་འཇུག་ངོ་བོ་ཉིད་སྐུའི་རོལ་པར་བྱིན་གྱིས་བརླབ་པའི་མོས་པ་མཛོད། ཧཱུྃ༔ ཨོ་རྒྱན༴ པདྨ༴ ཡ་མཚན༴ པདྨ་འབྱུང་༴ འཁོར་དུ༴ ཁྱེད་ཀྱི༴ བྱིན་གྱིས༴ གནས་མཆོག༴ སྒྲུབ་མཆོག་སྐལ་ལྡན་སློབ་བུ་ལ༔ ཚིག་དབང་སེམས་ལ་བསྐུར་བ་དང་༔ བགེགས་དང་༴ མཆོག་དང་༴ (རྩ་སྔགས་དང་། ) སརྦ་ཨ་བྷི་ཥིཉྩ་ཧཱུྃ༔ (ཞེས་གནས་བཞིར་བསྐུར། ) ཛཿཧཱུྃ་བྃ་ཧོཿ གཏོར་མའི་ལྷ་ཚོགས་དགྱེས་པ་ཆེན་པོས་འོད་དུ་ཞུ་བ་ཁྱེད་རང་རྣམས་ལ་ཐིམ་པས་ལྷ་དང་གཉིས་སུ་མེད་པར་བྱིན་གྱིས་བརླབ། གཏོར་ཟན་ཟག་མེད་ཀྱི་བདུད་རྩིར་འཁྱིལ་བ་མགྲིན་པར་མྱང་བས་མཆོག་ཐུན་མོང་གི་དངོས་གྲུབ་སྟན་ཐོག་དེ་ཉིད་དུ་ཐོབ་པར་གྱུར་པའི་མོས་པ་མཛོད། (ཅེས་གཏོར་མའི་རས་(6ན)མ་བདུད་རྩི་དང་སྦྱར་ཏེ་སྤྱིན། ) དེ་རྣམས་ཀྱིས་རྩ་བའི་དབང་བསྐུར་གྲུབ་ནས་རྗེས་འབྲེལ་བཀྲ་ཤིས་འཆི་མེད་ཚེའི་དབང་བསྐུར་བ་ལ། ཐོག་མར་ཚེ་འགུགས་ཤིང་བཅུད་བསྡུ་བའི་སླད་དུ། སློབ་དཔོན་བདེ་གཤེགས་རིགས་འདུས་འཆི་མེད་ཐོད་ཕྲེང་རྩལ་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་ཁ་དོག་ལྔ་ལྡན་དང་ལས་བྱེད་ལྷ་མོ་མགྱོགས་མའི་ཚོགས་ཉི་ཟེར་གྱི་རྡུལ་ལྟར་སྤྲོས་པས། ཁྱེད་རང་རྣམས་ཀྱི་བླ་ཚེ་ཆད་ཉམས་ཡར་བ་དང་། འབྱུང་བ་བཞིའི་དྭངས་མ། འཁོར་འདས་ཀྱི་བཅུད་དང་དགེ་མཚན་ཐམས་ཅད་འཆི་མེད་ཚེའི་བདུད་རྩི་འོད་ཟེར་ཁ་དོག་སྣ་ཚོགས་པའི་རྣམ་པར་བསྡུས་ཏེ། ཁྱེད་རང་རྣམས་དང་མདུན་གྱི་ཚེ་རྫས་ལ་ཐིམ་པས་རྡོ་རྗེ་ཚེའི་བཅུད་ལེན་དུ་གྱུར་པའི་མོས་པ་མཛོད། (མདའ་དར་གཡབ་ལ། ) ཧྲཱིཿ པདྨ་དྲྭ་བ་ཚེ་ཡི་ཞིང་༔ བདེ་བ་ཆེན་པོའི་ཕོ་བྲང་ནས༔ ཚེ་བདག་འཆི་མེད་ཐོད་ཕྲེང་རྩལ༔ རབ་འབྱམས་རྩ་གསུམ་ལྷ་ཚོགས་རྣམས༔ སྒྲུབ་ལ་དངོས་གྲུབ་མཆོག་སྩོལ་སླད༔ དབྱིངས་ནས་སྐུར་བཞེངས་བྱིན་ཆེན་ཕོབ༔ རིག་འཛིན་རྣལ་འབྱོར་བདག་ཅག་གི༔ བླ་ཚེ་ཆད་ཉམས་ཡར་(6བ)བ་ཁུག༔ སྣོད་བཅུད་འབྱུང་བའི་དྭངས་མ་བསྡུས༔ རྣལ་འབྱོར་སྲོག་གི་ཀྭ་བ་ཚུགས༔ སྐྱེ་འཆི་བགྲེས་རྒུད་དང་བྲལ་བའི༔ རྟག་པ་དམ་པའི་ཚེ་དབང་སྩོལ༔ (ཅེས་དང་རྩ་སྔགས་བརྗོད། ) ཚེའི་འབྲང་རྒྱས་འདི་ཉིད་རིགས་འདུས་འཆི་མེད་ཐོད་ཕྲེང་རྩལ་རྩ་གསུམ་འདུས་པའི་ངོ་བོར་བཞུགས་པ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་དབང་བསྐུར་བ་ལ་བརྟེན་ནས་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་སྦྱངས་ཏེ་སྐུ་རྡོ་རྗེ་འགྱུར་བ་མེད་པའི་ཚེ་དབང་ལུས་ལ་ཐོབ་པའི་མོས་པ་མཛོད། (ཚེ་འབྲང་ཐོགས་ལ། ) ཧྲཱིཿ བཀྲ་ཤིས་བུམ་པ་ཚེ་ཡི་དལ༔ ལྷ་དང་གཉིས་མེད་འོད་དུ་འབར༔ དེང་འདིར་བུ་ལ་དབང་བསྐུར་བས༔ མི་འགྱུར་རྡོ་རྗེའི་ཚེ་ཐོབ་ཤོག༔ ཨ་ཡུ་ཛྙཱ་ན་ཨ་བྷི་ཥིཉྩ་ཧཱུྃ༔ (ཞེས་སྤྱི་བོར་བཞག །)འཁོར་འདས་བརྟན་གཡོའི་དྭངས་བཅུད་ཐམས་ཅད་འཆི་མེད་བྱང་ཆུབ་སེམས་ཀྱི་བདུད་རྩིར་འཁྱིལ་བ་འདི་ཉིད་མགྲིན་པར་བཞག་ཅིང་མྱང་བ་ལ་བརྟེན་ནས་ལས་རླུང་གི་འཆིང་བ་དབུ་མའི་དབྱིངས་སུ་གྲོལ་ཏེ་གསུང་རྡོ་རྗེ་འགགས་པ་མེད་པའི་ཚེ་དབང་ངག་ལ་ཐོབ་པའི་མོས་པ་མཛོད། (ཚེ་ཆང་ཐོགས་ལ། ) ཧྲཱིཿ ཚེ་ཡི་དངོས་གྲུབ་འདུས་པའི་རྫས༔ འཆི་མེད་བདུད་རྩི་ཨ་མྲྀ་ཏ༔ སྐལ་ལྡན་བུ་ཡིས་(7ན)ལོངས་སྤྱད་པས༔ ཨ་ཡུ་ཚེ་ཡི་དབང་ཐོབ་ཤོག༔ ཨ་ཡུ་ཛྙཱན་ཨ་བྷི་ཥིཉྩི་ཧཱུྃ༔ (ཞེས་མགྲིན་པར་བཞག་ཅིང་སྦྱིན། ) སྲིད་ཞིའི་དྭངས་བཅུད་འདུས་པའི་རིལ་བུ་འཆི་མེད་ཚེ་ལྷ་འདུས་པའི་ངོ་བོ་འདི་ཉིད་སྙིང་གར་བཞག་ཅིང་མྱང་བ་ལ་བརྟེན་ནས་སྙིང་དབུས་མི་ཤིགས་དྭངས་མའི་ཐིག་ལེ་ཡེ་ཤེས་རྡོ་རྗེའི་སྲོག་དང་རོ་གཅིག་ཏུ་འདྲེས་ཏེ་ཐུགས་རྡོ་རྗེ་འཁྲུལ་པ་མེད་པའི་ཚེ་དབང་སེམས་ལ་ཐོབ་པའི་མོས་པ་མཛོད། (ཚེ་རིལ་ཐོགས་ལ། ) ཧྲཱིཿ སྲིད་ཞིའི་དྭངས་མ་བསྡུས་པ་ཡི༔ བཅུད་ལེན་ཚེ་ཡི་རིལ་བུ་འདི༔ སྐལ་ལྡན་བུ་ཡིས་ལོངས་སྤྱད་པས༔ མི་འགྱུར་ཚེ་ཡི་དཔལ་ཐོབ་ཤོག༔ ཨ་ཡུ་ཛྙཱ་ན་ཨ་བྷི་ཥིཉྩ་ཧཱུྃ༔ (ཞེས་སྙིང་གར་བཞག་ཅིང་སྦྱིན། ) དེ་ལྟར་ཚེའི་དབང་བསྐུར་བས་ཚེ་མི་ཤིགས་པའི་རྡོ་རྗེ། མི་འགྱུར་བའི་གཡུང་དྲུང་། མི་ནུབ་པའི་རྒྱལ་མཚན་དུ་བྱས་ཏེ་འཆི་བ་མེད་པའི་དངོས་གྲུབ་ཐོབ་པར་གྱུར་པ་ལ། སླར་ཡང་ཚེ་མདའ་རིན་ཆེན་འབར་བ་སྤྱི་བོར་རྒྱ་གྲམ་དུ་བཀོད་པས་ལུས་ཐམས་ཅད་རྡོ་རྗེའི་གོ་ཆས་ཞུ་ལུགས་སུ་བགོས་ཏེ་ཚེ་སྲོག་རྡོ་རྗེའི་བྲག་ལྟར་བརྟན་པར་བྱས་པ་དང་ལྷན་ཅིག་འོད་གསལ་གཉུག་མའི་ངོ་བོ་ལ་མཉམ་པར་བཞག་པས་ཅིས་ཀྱང་མི་ཆོད་མི་ཤིགས་པ་འཆི་མེད་གདོད་མའི་མགོན་པོའི་གནས་ལུགས་མངོན་དུ་གྱུར་པར་(7བ)མོས་ཤིག །ཨཿ འཁོར་འདས་ཚེ་ཡི་དྭངས་བཅུད་རྣམས༔ མི་ཤིགས་ཐིག་ལེ་ཧྲཱིཿལ་བསྡུ༔ དེའང་བརྗོད་བྲལ་ཀ་དག་ཀློང་༔ གཞོམ་གཞིག་བྲལ་བར་རྒྱས་གདབ་བོ༔ དྷརྨ་ངྷཱ་ཏུ་ཨ་ཨ་ཨ༔ (ཞེས་མདའ་དར་སྤྱི་བོར་རྒྱ་གྲམ་དུ་བཀོད། ) ཡེ་ངྷ(ས་ཐོག་དྲངས་ཤིས་བརྗོད་རྒྱས་པར་སྤེལ་ལ། ) དེ་རྣམས་ཀྱིས་ཟབ་ལམ་མཚོ་སྐྱེས་ཐུགས་ཐིག་གི་སྒོ་ནས་བྱིན་རླབས་རྩ་བའི་དབང་བསྐུར་ཚེ་དབང་དང་བཅས་པ་ལེགས་པར་གྲུབ་པ་ཡིན་པས། རྡོ་རྗེ་ཐེག་པའི་རྩ་བ་དང་ཡན་ལག་གི་དམ་ཚིག་ཐམས་ཅད་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། གཙོ་བོས་ཇི་ལྟར་(སོགས་ལན་གསུམ། གཏང་རག་གི་དོན་དུ་མཎྜལ་ཕུལ། ) སླར་ཡང་སྒོ་གསུམ་ལོངས་སྤྱོད་དང་བཅས་པ་ལྟོས་མེད་དུ་འབུལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་(སོགས་ལན་གསུམ། ) དེ་ལྟར་དབང་ཐོབ་པ་ལས་བྱུང་བའི་དགེ་བའང་མཁའ་ཁྱབ་ཀྱི་སེམས་ཅན་རྣམས་ལ་བསྔོ་བའི་རྒྱས་འདེབས་ལྷན་ཅིག་ཏུ་མཛོད། བསོད་ནམས་འདི་ཡིས་(སོགས་ཀྱིས་དགེ་བ་བསྔོས་ཏེ་སློབ་མ་རྣམས་གྱེས། སློབ་དཔོན་གྱིས་ཚོགས་ལ་རོལ་ཞིང་ལྷག་མ་དང་གཏོར་མ་བསྐྱང་། གཏང་རག་གི་མཆོད་བསྟོད་བཟོད་གསོལ་བརྟན་བཞུགས་བསྡུ་ལྡང་བསྔོ་སྨོན་ཤིས་བརྗོད་བར་མཐར་དབྱུང་བས་གྲུབ་བོ། །ཡང་ཚེ་དབང་ཁོལ་འདོན་དུ་བསྐུར་བ་འདོད་ན། སྦྱོར་བའི་སྐབས་ཚེ་འབྲང་མཎྜལ་གྱི་དབུས་སུ་འགོད་པ་ཙམ་ལས་གཞན་(8ན)རྣམས་འདྲ་ཞིང་། མཚམས་སྦྱོར་སྐབས། ) འོ། ནམ་མཁའ་དང་མཉམ་པའི་(སོགས་ནས། ) འགོད་པར་བྱ། དེའི་ཆེད་དུ་འཆི་མེད་ཚེའི་དབང་བསྐུར་ཟབ་མོ་གསན་པ་བགྱིའོ་སྙམ་པའི་ཀུན་སློང་རྣམ་པར་དག་པ་གསལ་བཏབ་ནས་གསན་འཚལ། དེའང་ཇི་སྐད་དུ། སློབ་དཔོན་ངག་གི་དབང་ཕྱུག་གྲགས་པའི་ཞལ་ནས། །འཁོར་བ་སྲོག་ལས་གཅེས་པ་ནི། །འགའ་ཡང་ཡོད་པར་མ་མཐོང་བས། །དེས་ན་མྱུར་དུ་ཐབས་མང་པོས། །འཆི་བ་བསླུ་བ་ཡང་དག་བརྩམ། །ཞེས་གསུངས་པ་ལྟར་དགེ་ལེགས་ཀྱི་ཡོན་ཏན་མ་ལུས་པ་བསྐྱེད་པའི་གཞི་མ་དལ་འབྱོར་གྱི་ལུས་རྟེན་འདི་ཉིད་ཡུན་དུ་འཚོ་བའི་ཐབས་ལ་འབད་པ་ནི་འཇིག་རྟེན་འདི་ན་དོན་དུ་གཉེར་བྱའི་གཙོ་བོ་ཡིན་ལ། དེའི་ཚུལ་ཡང་ཇི་སྙེད་གཅིག་མཆིས་པ་ལས། འདིར་འབྲོག་བན་ལོ་ཙཱ་བའི་ཐུགས་བཅུད། སྤྲུལ་པའི་རིག་འཛིན་ཆེན་པོ་འཇིགས་བྲལ་ཡེ་ཤེས་རྡོ་རྗེའམ་བདུད་འཇོམས་འགྲོ་འདུལ་གླིང་པ་རྩལ་གྱི་འོད་གསལ་དགོངས་པའི་གཏེར་མཛོད་ལས་བྱོན་པ་ཟབ་ལམ་མཚོ་སྐྱེས་ཐུགས་ཐིག་ཅེས་ངོ་མཚར་བྱིན་རླབས་ཀྱི་ཚན་ཁ་གཞན་ལས་ཁྱད་པར་དུ་གྱུར་པའི་ཆོས་སྡེ་དང་རྗེས་སུ་འབྲེལ་བར་འཆི་མེད་ཚེའི་དབང་བསྐུར་ཟབ་མོ་བསྒྲུབ་པར་བགྱི་བ་ལ། (ཞེས་(8བ)བསྒྱུར། ཡེ་ཤེས་དབབ་པའི་རྗེས་སུ། ) དེ་རྣམས་ཀྱིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་ནས། དངོས་གཞི་དབང་བསྐུར་བ་ལ། ཐོག་མར་ཚེ་འགུགས་ཤིང་བཅུད་བསྡུ་བའི་སླད་དུ་(སོགས་གོང་གི་དཀྱུས་བཞིན་ལས། མཐར། ) དེ་རྣམས་ཀྱིས་ཟབ་ལམ་མཚོ་སྐྱེས་ཐུགས་ཐིག་དང་འབྲེལ་བར་འཆི་མེད་ཚེའི་དབང་བསྐུར་ཟབ་མོ་ལེགས་པར་གྲུབ་པ་ཡིན་པས། (ཞེས་བསྒྱུར་བ་ཙམ་ཁྱད་པར་རོ། །དེ་ལྟར་དབང་བསྐུར་མཚམས་སྦྱོར་མདོར་བསྡུས་ཀྱིས་བརྒྱན་ཏེ་ངག་འདོན་བཀླག་ཆོག་ཏུ་བཀོད་པ་འདིའང་སྤྲུལ་པའི་སྐུ་མཆོག་འཇིགས་མེད་ཆོས་དབྱིངས་ནོར་བུ་དོན་གྲུབ་ཀྱི་བཞེད་པ་སྐོང་བའི་སླད་དུ། འཇིགས་བྲལ་ཡེ་ཤེས་རྡོ་རྗེས་རྒྱལ་ཟླའི་ཡར་ངོ་བཟང་པོ་གཉིས་པའི་དུས་ཚེས་དགེ་བར་སྦྱར་བའི་ཡི་གེ་པ་ནི་ཆོས་མཛད་བླ་མ་འགྱུར་མེད་བསྟན་འཛིན་རྡོ་རྗེས་མཛད་པ་སིདྡྷི་རསྟུ༎ །།)

[edit]