DJYD-KABUM-16-MA-031

Previous Text Back to Volume PageNext Text

Wylie title	zab lam mkha' 'gro'i tshe sgrub kyi gsal byed tshe dbang dang bcas pa 'chi med 'dod 'jo
Location	bdud 'joms rin po che bka' 'bum Volume 16, Text 31, Pages 239-252 (Folios 1a1 to 7b6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Zab lam mkha' 'gro'i tshe sgrub kyi gsal byed tshe dbang dang bcas pa 'chi med 'dod 'jo. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 239-252. Kalimpong: Dupjung Lama, 1979-1985.
Side notes	Recto: tshe dbang   Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Longevity Empowerment - tshe dbang  ·  Longevity Rituals - tshe sgrub
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)
Colophon	།ཞེས་པའང་ཉེ་བར་མཁོ་བའི་ཡན་ལག་ཏུ་མི་རྗེ་ཚེ་དབང་རིག་འཛིན་རྣམ་པར་རྒྱལ་བའི་སྡེའི་བཞེད་པ་བཞིན། འཇིགས་བྲལ་ཡེ་ཤེས་རྡོ་རྗེས་འཇུག་པ་བདེ་བའི་གསལ་བྱེད་དུ་སྤེལ་བ་སིདྡྷི་རསྟུ༎
	zhes pa'ang nye bar mkho ba'i yan lag tu mi rje tshe dbang rig 'dzin rnam par rgyal ba'i sde'i bzhed pa bzhin/___'jigs bral ye shes rdo rjes 'jug pa bde ba'i gsal byed du spel ba sid+d+hi rastu//

Tibetan Text

[edit]

༄༅། །ཟབ་ལམ་མཁའ་འགྲོའི་ཚེ་སྒྲུབ་ཀྱི་གསལ་བྱེད་ཚེ་དབང་དང་བཅས་པ་འཆི་མེད་འདོད་འཇོ་ཞེས་བྱ་བ་བཞུགས་སོ། །

༄༅། །ན་མོ་གུ་རུ་ཛྙཱ་ན་ཌཱ་ཀི་ནཱི་ཡེ། ཟབ་ལམ་མཁའ་འགྲོའི་ཚེ་སྒྲུབ་ཀྱི་ཕྲིན་ལས་ལ་འཇུག་པར་འདོད་པས། དཀར་ཕྱོགས་ཀྱི་དུས་ཚེས་དགེ་བར་བཀྲ་ཤིས་ཡིད་འོང་གི་གནས་སུ་སྟེགས་གཙང་མར་མཎྜལ་ལ་འབྲུ་དཀར་གྱི་ཚོམ་བུ་བཀོད་པའི་ཁར། མཉྫི་ལ་ཚེའི་འབྲང་རྒྱས་བུམ་གཟུགས་མ་རྒྱན་ལྡན་བཞག་པའི་གཡས་གཡོན་དུ་ཚེ་བཅུད་ཕུར་མ་བསྲེས་པའི་ཚེ་རིལ་དང་ཚེ་ཆང་། རྒྱབ་ཏུ་ཚེ་མདའ། མདུན་དུ་སྨན་རཀ་གཏོར་གསུམ་དང་ཕྱི་མཆོད་ཕྲེང་ཚར་དུ་བཤམ། གཏོར་ཚོགས་ཀྱི་ཡོ་བྱད་ཉེ་བར་མཁོ་བ་རྣམས་དང་། ལས་བུམ་སོགས་འདུ་བྱས་ལ། ཕྲིན་ལས་ཀྱི་གཞུང་དཀྱུས་ལྟར་བསྲངས་ཏེ་བདག་མདུན་དབྱེར་མེད་དུ་བསྒོམ་པ་ལས། ལྷ་བསྐྱེད་ཀྱི་ཕྱག་མཚན། བདག་རྟོག་ [2a] རྩད་གཅོད་གྲི་གུག་དང་༔ ཞེས་པའི་ཚབས་སུ། ཚེ་བཅུད་འགུགས་པའི་མདའ་དར་དང་༔ ཞེས་བསྒྱུར། སྤྱན་འདྲེན་ནས་བསྟོད་པའི་བར་དུ་སོང་ནས། བདག་མདུན་ཡེ་ཤེས་མཁའ་འགྲོ་ཡི༔ ཐུགས་ཀར་རྒྱ་གྲམ་གྱིས་བསྡམས་པའི༔ ཉི་ཟླའི་གྭའུའི་དབུས་སུ་ཧྲཱིཿ འོད་འབར་ཉི་ཟླའི་ཁ་བྱེ་ནས༔ ནམ་མཁའི་མཐའ་ཁྱབ་སྤྲོས་པ་ཡིས། རང་གི་བླ་ཚེ་ཆད་ཉམས་དང་༔ འཁོར་འདས་བརྟན་གཡོའི་དྭངས་བཅུད་ཀུན༔ འོད་ཟེར་བདུད་རྩིའི་རྣམ་པར་བསྡུས༔ བདག་དང་སྒྲུབ་པའི་རྫས་ལ་ཐིམ༔ འཆི་མེད་ཚེ་ཡི་དངོས་གྲུབ་དང་། བདེ་ཆེན་ཡེ་ཤེས་རྒྱས་པར་ [2b] གྱུར༔ ཞེས་དམིགས་ལ། རྩ་སྔགས་ཤམ་བུར། ཨ་ཡུརྫྙཱ་ན་ཚེ་བྷྲཱུྃ༔ ཞེས་བཏགས་པ་ཅི་འགྲུབ་བཟླ། ཐུན་མཐར་ཚེ་འགུགས་པ་ནི་མདའ་དར་གཡབ་ལ། ཧྲཱིཿ པདྨ་རྣམ་པར་རྒྱས་པའི་ཞིང་༔ བདེ་ཆེན་འབར་བ་དབང་གི་དལ༔ ཟླ་གམ་ཚེ་ཡི་ཕོ་བྲང་ནས༔ འཆི་མེད་ཡེ་ཤེས་དྷཱ་ཀི་ནཱི༔ རིགས་ཀྱི་མཁའ་འགྲོ་འབུམ་ཕྲག་དང་༔ ཡང་སྤྲུལ་ཕོ་ཉ་མགྱོགས་མའི་ཚོགས༔ གྲངས་མེད་ཉི་ཟེར་རྡུལ་ལྟར་འཁྲིགས༔ དེང་འདིར་ཐུགས་དམ་རྒྱུད་བསྐུལ་ལོ༔ སྒྲུབ་མཆོག་རྣལ་འབྱོར་བདག་ཅག་གི༔ བླ་ཚེ་འཁྱམས་དང་ཡར་བ་དང་༔ འབྱུང་པོས་བརྐུས་ཤིང་འཕྲོག་པས་རྣམས༔ དྲེག་པརརང་རང་ལག་ནས་ཁུག༔ ས་ཆུ་མེ་རླུང་ནམ་མཁའི་བཅུད༔ ཤ་ཁྲག་དྲོད་དབུག་སེམས་ལ་སྟིམས༔ སྐྱེ་འགྲོའི་ཚེ་བསོད་དཔལ་ཡོན་སྟོབས༔ རྩ་གསུམ་རྒྱལ་བའི་བྱིན་རླབས་དབྱིག༔ དྲང་སྲོང་རིག་འཛིན་གྲུབ་པའི་ཚེ༔ མ་ལུས་སྒོ་གསུམ་ཐིག་ལེར་སྡུས༔ རྒས་མེད་ལང་ཚོའི་གཟི་མདངས་སྐྱེད༔ ནད་མེད་བདེ་བའི་དགའ་བ་སྤེལ༔ འཆི་མེད་རྡོ་རྗེའི་སྲོག་རྩ་ཚུགས༔ སྐྱེ་འཆི་བསྒྲེས་རྒུད་དང་བྲལ་བ༔ མི་ཤིགས་གཞོན་ནུ་བུམ་པ་སྐུའི༔ རྟག་པ་དམ་པའི་དངོས་གྲུབ་སྩོལ༔ [3a] ཞེས་ཚེ་ཛཔྲ་དང་བཅས་པས་བསྐུལ། ཐུན་མཚམས་ཀྱི་གཏོར་འབུལ་སོགས་དང་ ཚོགས་མཆོད་ཡོད་ན་བསྒྲལ་བསྟབས་ཀྱི་བར་དུ་གྲུབ་པ་དང་། ལས་བུམ་གྱི་ནང་དུ་པད་ཉིའི་གདན་ལ་དབང་ཆེན་རྟ་མགྲིན་དམར་པོ་ཐོད་དབྱུག་དང་མེ་ཞགས་འཛིན་པ་ཁྲོ་བོའི་ཆས་ཐམས་ཅད་རྫོགས་པའི་སྐུ་ལས་རྡོ་རྗེ་བདུད་རྩིའི་རྒྱུན་བབས་པས་བུམ་པ་གང་བར་མོས་ཏེ། ཨོཾ་ཧ་ཡ་གྲཱྀ་ཝ་ཧཱུྃ་ཕཊ༔ ཅེས་བརྒྱ་རྩ་བཟླས་མཐར། ལྷ་འོད་དུ་ཞུ་བ་བུམ་ཆུ་དང་དབྱེར་མེད་དུ་གྱུར་པར་བསམ། རིག་པའི་མེ་ཏོག་དོར་ལ་གནང་བ་ནོད། སློབ་མ་རྣམས་སྒོ་དྲུང་དུ་བོས་ལ། ཇི་ལྟར་བལྟམས་པ་སོགས་ཀྱིས་ལས་བུམ་གྱི་ཆུས་ཁྲུས་བྱ། ནང་དུ་ཞུགས་ནས་བགེགས་གཏོར་བྱིན་གྱིས་བརླབས་པ་བསྔོས་ཏེ་བགེགས་བསྐྲད་ཅིང་སྲུང་འཁོར་བསྒོམ། གྲལ་དུ་འཁོད་པར་མེ་ཏོག་བཀྲམ་བསྡུ་བྱས་ལ། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་འཆི་མེད་ཡེ་ཤེས་མཁའ་འགྲོའི་གོ་འཕང་ལ་འགོད་པར་བྱ། དེའི་ཆེད་དུ་ཚེའི་དབང་བསྐུར་ཟབ་མོ་གསན་པར་བགྱིའོ་སྙམ་པའི་ཐུགས་བསྐྱེད་གསལ་ཐོབ་ལ་གསན་མཛོད། དེའང་ཇི་སྐད་དུ། སློབ་དཔོན་ངག་གི་དབང་ཕྱུག་གྲགས་པས། འཁོར་བར་སྲོག་ལས་གཅེས་པ་ནི། །འགའ་ཡང་ཡོད་པར་ [3b] མ་མཐོང་བས། །དེས་ན་མྱུར་དུ་ཐབས་མང་པོས། །འཆི་བ་བསླུ་བ་ཡང་དག་བརྩམ། །ཞེས་གསུངས་པ་ལྟར། ཆོས་ལྡན་དལ་འབྱོར་གྱི་རྟེན་བཟང་ཡུན་དུ་འཚོ་བའི་ཐབས་ལ་བརྩོན་པ་ནི་འཇིག་རྟེན་འདི་ན་དོན་དུ་གཉེར་བྱའི་གཙོ་བོ་ཡིན་ལ། དེའི་ཐབས་ཚུལ་ཐུན་མོང་དང་ཐུན་མོང་མ་ཡིན་པའི་རྣམ་གྲངས་མཐའ་ཡས་པ་རྣམས་ཀྱི་ནང་ནས་མཆོག་ཏུ་གྱུར་པ་གསང་སྔགས་བླ་མེད་ཀྱི་བསྐྱེད་རྫོགས་ལ་བརྟེན་ནས་རྡོ་རྗེའི་ཚེ་སྒྲུབ་པ་རྣམས་ཡིན་ཅིང་། འདིར་དེ་དག་གི་ནང་ནས་ཟབ་པའི་ཕུལ་དུ་ཕྱིན་པ་རྒྱལ་བ་ཐམས་ཅད་སྐྱེད་པའི་ཡུམ་ཀུན་ཏུ་བཟང་མོ་ཉིད་འཆི་མེད་ཡེ་ཤེས་ཀྱི་མཁའ་འགྲོའི་སྐུར་བསྟན་པ་དབྱིངས་ཕྱུག་བདེ་ཆེན་མཚོ་རྒྱལ་ཟླ་བ་ཚེ་སྦྱིན་མའི་མན་ངག་མཁའ་འགྲོ་ཐུགས་ཀྱི་ཐིག་ལེའི་གསང་མཛོད་ཀྱི་ཆ་ཤས་ལས་འཕྲོས་པའི་ཟབ་ཆོས་དངོས་གྲུབ་ཀྱི་ཚན་ཁ་མ་བྲི། བྱིན་རླབས་ཀྱི་གཟི་བྱིན་མ་ཉམས། མཁའ་འགྲོའི་ཁ་རླངས་མ་ཡལ་བ་འདི་ཉིད་ཀྱི་སྒོ་ནས་ཚེ་དབང་བསྐུར་བ་ལ། བདག་ཉིད་སློབ་དཔོན་གྱི་བྱ་བ་རྣམས་སོང་གྲུབ་པ་ལགས་པས། ཁྱེད་རང་རྣམས་ཀྱིས་བགྱི་བར་འོས་པ་ལ་ཐོག་མར་ཚེ་དབང་ཟབ་མོ་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་མཚམས་ [4a] སྦྱར་ལ་མཎྜལ་འབུལ་དུ་གཞུག ། བླ་མ་དང་ཡེ་ཤེས་མཁའ་འགྲོ་དབྱེར་མི་ཕྱེད་པ་ལ་མོས་གུས་གདུང་ཤུགས་དྲག་པོས་ཐལ་མོ་མེ་ཏོག་དབང་བཅས་ཏེ་གསོལ་བ་འདེབས་པ་འདིའི་རྗེས་ཟློས། དགའ་ཆེན་སྟོན་པ་མཆོག་གཅིག་པུ༔ བླ་མ་འཆི་མེད་མཁའ་འགྲོ་མས༔ བདག་ལ་བརྩེ་བས་ཉེར་དགོངས་ནས༔ ཡེ་ཤེས་ཚེ་ཡི་དབང་བསྐུར་སྩོལ༔ ལན་གསུམ། དེ་ནས་རྒྱུད་རྣམ་པར་དག་པ་བྱ་བའི་སླད་དུ༔ བླ་མ་དང་འཆི་མེད་ཡེ་ཤེས་ཀྱི་མཁའ་འགྲོ་གཉིས་སུ་མེད་པ་ལ་རྩ་གསུམ་ཚེ་ཡི་ལྷ་ཚོགས་ནམ་མཁའ་གང་བའི་འཁོར་དང་བཅས་ཏེ་བཞུགས་པའི་སྤྱན་སྔར། བདག་གཞན་མཁའ་ཁྱབ་ཀྱི་ཡིད་ཅན་མཐའ་དག་འདི་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་བ་དང་། སྨོན་པ་དང་འཇུག་པའི་བསམ་སྦྱོར་བརྟན་པོས་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་བསྐྱེད་པ་དང་། གསང་སྔགས་བླ་མེད་རྡོ་རྗེ་ཐེག་པའི་སྡོམ་པ་བརྟུལ་ཞུགས་དམ་ཚིག་རྣམས་ཚུལ་བཞིན་བླངས་ནས་ལེགས་པར་བསྲུང་བར་བགྱིའོ་སྙམ་པའི་ཡིད་ཀྱིས་འདིའི་རྗེས་ཟློས། ཡེ་ཤེས་མཁའ་འགྲོ་སྐྱབས་ཀྱི་མཆོག་ཏུ་བཟུང་༔ འགྲོ་ [4b] བའི་དོན་དུ་སྨོན་འཇུག་སེམས་བསྐྱེད་ཅིང་༔ སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི༔ དམ་ཚིག་སྡོམ་པ་རྟག་ཏུ་བསྐྱང་བར་བགྱི༔ ལན་གསུམ། དེ་ནས་དབང་གི་གཞི་འགོད་པ་ལ་ཡེ་ཤེས་པ་དབབ་པའི་དོན་དུ་སྒོ་གསུམ་གྱི་གནད་གཅུན་ལ་དམིགས་པ་འདི་དག་རྩེ་གཅིག་ཏུ་སྒོམས་ཤིག །ཆོས་ཐམས་ཅད་རང་བཞིན་མི་དམིགས་པ་འོད་གསལ་སྟོང་པ་ཉིད་ཀྱི་ངང་ལས། རང་ཉིད་གནས་པའི་གོ་སར་སྣ་ཚོགས་པདྨ་ཉི་མ་ཟླ་བའི་དཀྱིལ་འཁོར་གྱི་སྟེང་དུ་རིག་པའི་ངོ་བོ་བྃ་ཡིག་དཀར་དམར་འོད་འབར་བ། དེ་ཡོངས་སུ་གྱུར་པ་ལས་ཁྱེད་རང་རྣམས་སྐད་ཅིག་གིས་འཆི་མེད་ཡེ་ཤེས་ཀྱི་མཁའ་འགྲོ་བདེ་ཆེན་མཚོ་རྒྱལ་དབང་མོ་སྐུ་མདོག་དཀར་དམར་དུང་ལ་ཕོ་ཚོས་བྱུགས་པ་ལྟ་བུ། ཞི་ཞིང་འཛུམ་ལ་རྗེས་སུ་ཆགས་པའི་ཉམས་ཅན། སྤྱན་ཟུང་ལྟ་སྟངས་ཐད་ཀར་གཟིགས་པ། ནུ་མ་འབུར་ཞིང་གསང་བའི་ཆུ་སྐྱེས་རྒྱས་པ། ཕྱག་གཡས་པས་མདའ་དར་རྣ་ལྟག་གཡས་ཀྱི་ཐད་སོར་གཡོབ་པའི་ཚུལ་གྱིས་འཛིན་ཅིང་། གཡོན་པས་ཐོད་པ་བདུད་རྩིས་བཀང་བ་དཀུ་ལ་བརྟེན་ཚུལ་གྱིས་བསྣམས་པ། དབུ་སྐྲ་ཐོར་ཚུགས་སུ་བཅིངས་པའི་རྩེ་ [5a] མོར་ནོར་བུས་བརྒྱན་ཅིང་ལྷག་མ་སིལ་བུར་གྲོལ་བ། དར་གྱི་ཅོད་པན་དང་དར་དཔྱང་ལྷབ་ལྷུབ་ཏུ་གཡོ་བ། རུས་པ་དང་རིན་པོ་ཆེ་དང་མེ་ཏོག་གི་ཕྲེང་བས་བརྒྱན་པ། ཞབས་གཉིས་མཉམ་པའི་སྟབས་ཀྱིས་འོད་ཟེར་སྣ་ཚོགས་འབར་བའི་ཀློང་ན་བཞུགས་པའི་སྤྱི་བོར་རིགས་བདག་པདྨ་གར་དབང་ལོངས་སྐུའི་ཆས་ཅན་རྡོ་དྲིལ་འཛིན་པས་མཚན་པ། སྐུའི་གནས་ཐམས་ཅད་དུ་རྩ་གསུམ་ཚེ་ལྷ་རབ་འབྱམས་ཏིལ་གྱི་གང་བུ་ཁ་ཕྱེ་བ་ལྟར་བཞུགས་པའི་གནས་གསུམ་དུ་སྐུ་གསུང་ཐུགས་རྡོ་རྗེའི་རང་བཞིན་ཨོཾ་དཀར་ཨཱཿདམར་ཧཱུྃ་མཐིང་གིས་མཚན་པ་གསལ་ཐོབ་ཅིག །སློབ་དཔོན་ཀྱང་འཆི་མེད་ཡེ་ཤེས་ཀྱི་མཁའ་འགྲོ་མར་གསལ་བ་ལ་མོས་གུས་བསྐྱེད་པས། ཐུགས་ཀ་ནས་འོད་ཟེར་གྱི་སྣང་བ་བསམ་གྱིས་མི་ཁྱབ་པར་བཅས་ [5b] པ་བྱོན་ནས་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་རློབས་པའི་མོས་འདུན་མཛོད་ཅིག །འབེབས་པའི་རྫས་དང་རོལ་མོ་དབྱངས་ཀྱི་བསྐུལ་ལ། ལས་གཞུང་གི་བྱིན་འབེབས་དང་ཚེ་བསྙེན་མཐར། བཛྲ་ཨཱ་བེ་ཤ་ཡ་ཨ་ཨ། བཏགས་པ་དྲག་ཏུ་བརྗོད་ལ་དབབ། དེ་ལྟར་དབབ་པའི་ཡེ་ཤེས་པའི་བྱིན་རླབས་ཀྱི་རྒྱུན་བརྟན་པར་གྱུར་པའི་མོས་པར་མཛོད། ཏིཥྠ་བཛྲ། རྒྱ་གྲམ་མགོར་བཞག ། དེ་ནས་ཚེ་འགུགས་པའི་སླད་དུ་དམིགས་པ་འདི་ལྟར་དུ་མཛོད། མོས་གུས་ཀྱི་སྟོབས་དང་གདུང་ཤུགས་ཀྱིས་ཐུགས་དམ་བསྐུལ་བས་སློབ་དཔོན་ཚེ་བདག་ཡེ་ཤེས་ཀྱི་མཁའ་འགྲོ་མའི་ཐུགས་ཀ་དང་ཕྱག་གཡས་པའི་མདའ་དར་ལས་ལྷ་མོ་མགྱོགས་མའི་སྤྲུལ་པ་ཡང་སྤྲུལ་ཉི་ཟེར་གྱི་རྡུལ་ལྟ་བུ་འཕྲོས། ཁྱེད་རང་གི་བླ་ཚེ་སྲོག་དབུགས་གདོན་བགེགས་ཀྱིས་བརྐུས་འཕྲོག་ཆད་ཉམས་ཡར་བ་ཐམས་ཅད་དང་། སྣོད་ཀྱི་འཇིག་རྟེན་འབྱུང་བ་བཞིའི་བཅུད་དང་དྭངས་མ། བཅུད་ཀྱི་སེམས་ཅན་ལྷ་ཀླུ་མིའི་ཚེ་བསོད་དཔལ་འབྱོར། རྩ་གསུམ་རྒྱལ་བ་སྲས་དང་བཅས་པ་རྣམས་ཀྱི་མཁྱེན་བརྩེ་ནུས་པའི་བྱིན་རླབས་ཐམས་ཅད་བདུད་རྩིའི་རྒྱུན་དང་། འཇའ་འོད་ཟེར་ཐིག་གི་རྣམ་པར་ [6a] བསྡུས་ཏེ་ཁྱེད་རང་རྣམས་ཀྱི་བ་སྤུའི་བུ་ག་ནས་ཞུགས། ལུས་ཀྱི་ནང་ཐམས་ཅད་གང་བས་འཆི་མེད་ཚེའི་དངོས་གྲུབ་ཐོབ། མདུན་གྱི་ཚེ་རྫས་རྣམས་ལ་ཐིམ་པས་རྡོ་རྗེ་ཚེའི་བཅུད་ལེན་དུ་གྱུར་པའི་མོས་པ་མཛོད། ཅེས་མདའ་དར་གཡབ་ལ། ཧྲཱིཿ པདྨ་རྣམ་པར་རྒྱས་པའི་ཞིང་༔ སོགས་ཚེ་འགུགས་གོང་བཞིན་གྱེར། དེ་ལྟར་ཚེ་འགུགས་ཤིང་བཅུད་བསྡུས་ནས། ཚེའི་བུམ་པ་འདི་ཉིད་འཆི་མེད་ཡེ་ཤེས་ཀྱི་མཁའ་འགྲོ་བདེ་ཆེན་རྒྱལ་མོའི་རྣམ་པ། ཕྱག་གཡས་པའི་མདའ་དར་ལས་ལྷ་མོ་མགྱོགས་མའི་སྤྲུལ་པ་ཉི་ཟེར་གྱི་རྡུལ་ལྟར་སྤྲོས་པས་ཁྱེད་རང་རྣམས་ཀྱི་བླ་ཚེ་ཆད་ཉམས་ཡར་བ་དང་། འབྱུང་བ་བཞིའི་དྭངས་མ། འཁོར་འདས་ཀྱི་བཅུད་དང་དགེ་མཚན་ཐམས་ཅད་འཆི་མེད་ཚེའི་བདུད་རྩི་འོད་ཟེར་ཁ་དོག་སྣ་ཚོགས་པའི་རྣམ་པར་སྤྱན་དྲངས། ཕྱག་གཡོན་གྱི་བྷནྡྷའི་ནང་དུ་ཞུགས་ཤིང་འཁྱིལ་བ་ལས་འཆི་མེད་ཚེའི་བདུད་རྩི་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་ཞུགས། ལུས་ཀྱི་ནང་ཐམས་ཅད་གང་། དུས་མ་ཡིན་པའི་འཆི་བ་བག་ཆགས་དང་བཅས་པ་བྱུང་། འཆི་མེད་ཚེ་འདི་དངོས་ [6b] གྲུབ་ཐོབ། དྭངས་མ་སྙིང་གི་དབུས་སུ་སྣ་ཚོགས་རྡོ་རྗེའི་ལྟེ་བར་ཉི་ཟླའི་གའུ་ཁ་སྦྱོར་གྱི་ནང་དུ་ཧྲཱིཿའི་ཁོག་པར་ནྲྀ་ཡིག་ཨས་མཚན་པ་ལ་ཐིམ་པས་རྡོ་རྗེའི་སྲོག་འགྲུབ་པའི་མོས་པ་མཛོད། ཚེའི་འབྲང་རྒྱས་ཐོགས་ལ། ཧཱུྃ༔ ཡེ་ཤེས་མཁའ་འགྲོ་ཚེ་ཡི་བདག༔ སྒྲིབ་པའི་དྲི་མ་ཀུན་བྲལ་བ༔ སྐྱེ་འཆི་མེད་པ་རྡོ་རྗེའི་སྐུ༔ འཆི་མེད་ཚེའི་དངོས་གྲུབ་སྩོལ༔ ཨོཾ་ཨཱ་ཡུརྫྙཱ་ན་ཚེ་བྷྲཱུྃ་ཧཱུྃ༔ ཞེས་སྤྱི་བོར་བཞག །མེ་ཏོག་འཐོར་ལ། ཚེ་མི་ཤིགས་པའི་རྡོ་རྗེར་གྱུར་ཅིག །མི་འགྱུར་བའི་གཡུང་དྲུང་དུ་གྱུར་ཅིག །མི་ནུབ་པའི་རྒྱལ་མཚན་དུ་གྱུར་ཅིག །འཆི་བ་མེད་པ་རྡོ་རྗེའི་ཚེ་ལ་མངའ་བརྙེས་པར་གྱུར་ཅིག །ཅེས་བརྗོད། ཐབས་ཀྱི་རྫས་ཚེའི་རིལ་བུ་མྱང་བས་ཐབས་བདེ་བ་ཆེན་པོ་མཆོག་ཏུ་མི་འགྱུར་བའི་ཚེ་དང་ལང་ཚོ་ལ་དབང་ཐོབ་པའི་མོས་པ་མཛོད། ཚེ་རིལ་ཐོགས་ལ། ཧོཿ ཐབས་མཆོག་བདེ་ཆེན་ཚེའི་རིལ་བུ། །མི་འགྱུར་ཡེ་ཤེས་ཐིག་ལེར་ཤར། །དེ་རིང་ཁྱོད་ཀྱིས་བཟའ་བར་བྱ། །འདི་ཟོས་ཚེ་ལ་དབང་བ་ཡི། །རིག་འཛིན་འགྲུབ་པར་གདོན་མི་ཟ། །ཞེས་ལག་གཡས་སུ་བྱིན། ཤེས་རབ་ཀྱི་རྫས་ཚེའི་ཛ་གད་མྱང་བས་ཤེས་རབ་སྟོང་པ་ཉིད་གཞོམ་ [7a] མེད་གཉུག་མའི་སྲོག་ལ་མངའ་བརྙེས་པའི་མོས་པ་མཛོད། ཚེ་ཆང་ཐོགས་ལ། ཧོཿ ཤེས་རབ་སྟོང་ཉིད་ཚེའི་བདུད་རྩི། །མི་ཤིགས་དྭངས་མའི་བཅུད་དུ་འཁྱིལ། །དེ་རིང་ཁྱོད་ཀྱིས་བཏུང་བར་བྱ། །འདི་མྱང་ཚེ་ལ་དབང་བ་ཡི། །རིག་འཛིན་འགྲུབ་པར་གདོན་མི་ཟ། །ཞེས་ལག་གཡོན་དུ་བྱིན། ཚེ་མདའ་འདི་ཉིད་སྤྱི་བོར་བཀོད་པའི་རྐྱེན་གྱིས་དེ་ལས་འཕྲོས་པའི་སྣ་ཚོགས་རྡོ་རྗེའི་རྡུལ་ཕྲ་མོ་གྲངས་མེད་པས་ཁྱེད་རང་རྣམས་ཀྱི་ལུས་རྡོ་རྗེའི་གོ་ཁྲབ་ཀྱིས་གཡོགས་ནས་ཕྱིན་ཆད་བགེགས་དང་བར་ཆད་གང་གིས་ཀྱང་མི་ཚུགས་པའི་ང་རྒྱལ་དང་བཅས། གདོད་ནས་སྐྱེ་འཆིའི་མཚན་མ་མ་གྲུབ་པའི་འཆི་མེད་གཉུག་མའི་རང་ངོ་ལ་མཉམ་པར་འཇོག་པར་ཞུ། ཚེ་མདའ་ཐོགས་ལ། བྷྲཱུྃ༔ ཚེ་ཡི་དངོས་གྲུབ་དྭངས་མའི་བཅུད། མི་ཤིགས་ཙིཏྟའི་དཀྱིལ་དུ་སྦ༔ འགྱུར་མེད་དབྱིངས་ཕྱུག་ཡུམ་གྱི་ཀློང་༔ གཞོམ་ཞིག་བྲལ་བར་རྒྱས་གདབ་བོ༔ དྷརྨ་དྷཱ་ཏུ་ཨ་ཨ་ཨ༔ ཞེས་བརྗོད་ལ་སྤྱི་བོར་རྒྱ་གྲམ་དུ་བཞག །བཀྲ་ཤིས་རྒྱས་པར་བརྗོད། ཚེ་དབང་གྲངས་གསོག་ཏུ་བསྐུར་ན། མཎྜལ། གསོལ་འདེབས། བྱིན་འབེབས། ཚེ་འགུགས་ནས་རྒྱས་གདབ་པར་བསྐྱར་བ་རྒྱས་པ། ཚེ་འགུགས་མན་ཆད་བསྐྱར་ [7b] བ་འབྲིང་པོའོ། དངོས་གཞི་ཚེ་འབྲང་ཚེ་རིལ་ཚེ་ཆང་ཙམ་བསྐྱར་བ་བསྡུས་པའི་ཕྱག་བཞེས་ཏེ་སོ་སོའི་མོས་པའམ་ལོངས་ཁྱབ་དང་བསྟུན་པས་འཐུས། མཐར། དེ་དག་གིས་འཆི་མེད་མཁའ་འགྲོའི་ཐུགས་ཐིག་དང་རྗེས་སུ་འབྲེལ་བར་ཚེའི་དབང་བསྐུར་ཟབ་མོ་ལེགས་པར་གྲུབ་པ་སྟེ། ཇི་སྐད་དུ། བསྙེན་པ་ཐེམས་པའི་རྣལ་འབྱོར་པས༔ གཞན་ལ་ཚེ་ཡི་དབང་བསྐུར་ན༔ ཚེ་ཟད་ཡིན་ཀྱང་ལོ་རེ་བསྲིང་། དུས་ཀྱི་འཆི་བའང་བཟློག་ནུས་ན༔ དུས་མིན་བར་ཆད་སྨོས་ཅི་དགོས༔ ཞེས་བསྔགས་པ་དོན་དང་ལྡན་པ་ལགས་པས་ངེས་ཤེས་དྲག་པོས་འདི་ཉིད་གཡར་དམ་དུ་འཆའ་བས་མཚོན་སྤྱི་དང་བྱེ་བྲག་གི་དམ་ཚིག་རྣམས་ཚུལ་བཞིན་བསྲུང་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས། དམ་ཚིག་ཁས་བླང་། གཏང་རག་མཎྜལ་ལུས་འབུལ། དགེ་བསྔོ་སྤྱི་ལྟར་བྱ། སློབ་དཔོན་གྱིས་ཚོགས་ལ་རོལ་ཞིང་ལྷག་མ་གཏོང་། དམ་ཅན་གཏོར་སྐྱོང་། གཏང་རག་གི་མཆོད་བསྟོད་བཟོད་གསོལ། ཡེ་ཤེས་པ་བརྟན་བཞུགས། བདག་བསྐྱེད་ཉེར་བསྡུ། བསྔོ་སྨོན་ཤིས་བརྗོད་བཅས་མཐར་དབྱུང་བས་འགྲུབ་བོ། །ཞེས་པའང་ཉེ་བར་མཁོ་བའི་ཡན་ལག་ཏུ་མི་རྗེ་ཚེ་དབང་རིག་འཛིན་རྣམ་པར་རྒྱལ་བའི་སྡེའི་བཞེད་པ་བཞིན། འཇིགས་བྲལ་ཡེ་ཤེས་རྡོ་རྗེས་འཇུག་པ་བདེ་བའི་གསལ་བྱེད་དུ་སྤེལ་བ་སིདྡྷི་རསྟུ༎ ༎