DJYD-KABUM-23-A-007

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 23, Text 7, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །གཏེར་ཁ་དགུ་འདུས་བཀའ་བརྒྱད་སྒྲུབ་ཆེན་ཁོག་

 དབུབ་ཀྱི་ཆ་ལག་དཀྱིལ་འཁོར་ཐིག་ཚོན་གྱི་ལག་ལེན་

མཐོང་བས་དོན་རྟོགས་བཞུགས་སོ། །

（1བ）ཨོཾ་སྭསྟི། གཏེར་ཁ་དགུ་འདུས་ཀྱི་སྒྲུབ་ཆེན་ཁོག་དབུབ་དང་འབྲེལ་བའི་དཀྱིལ་འཁོར་གྱི་བྱ་བ་ལ་གཉིས། ཐིག་གདབ་པ་དང་། ཚོན་དགྱེ་བའོ། །དང་པོ་ཐིག་གདབ་པ་ལ་གཉིས། ཡེ་ཐིག་དང་། ལས་ཐིག་གོ། ། དང་པོ་ནམ་མཁའ་ལ་ཡེ་ཤེས་ཀྱི་ཐིག་གདབ་པ་ནི། ཚུལ་བཞིན་འདུ་བྱས་པའི་ཐིག་སྐུད་ཐོགས་ལ། སློབ་དཔོན་ནུབ་དང་སློབ་མ་ཤར་དུ་གནས་པས་འཁོད་དེ། བདག་ཉིད་ཆེ་མཆོག་ཧེ་རུ་ཀར་གསལ་བའི་ཐུགས་ཀའི་ཧཱུཾ་ལས་རྃ་ཡྃ་ཁྃ་འཕྲོས། སློབ་མ་ལ་ཕོག །སྡིག་སྒྲིབ་ཐམས་ཅད་བསྲེགས་ཤིང་སྦྱངས་ཏེ་（2ན）གནམ་ཞལ་དབྱིངས་ཕྱུག་མར་གསལ། ཡབ་ཀྱི་གནས་ལྔར་རྣམ་སྣང་སོགས་རིགས་ཀྱི་ཡབ་ལྔ་དང་། ཡུམ་གྱི་གནས་ལྔར་སྤྱན་མ་སོགས་རིགས་ཀྱི་ཡུམ་ལྔས་མཚན་པར་གྱུར། ཞེས་དང་། ཧཱུཾ། བཀྲ་ཤིས་མཚན་ལྡན་གཟུངས་མ་ཡུམ༔ ཁ་ནས་ཨུཏྤལ་དྲི་ལྡང་ཞིང་༔ སྐད་ཀྱང་ངང་པ་གཞོན་ནུ་འདྲ༔ སྙན་པར་སྨྲ་ཞིང་ཚུལ་དང་ལྡན༔ མཉེན་ལྕུག་འཁྲིལ་བ་དབྱེར་མི་ཕྱེད༔ རྡོ་རྗེ་ལས་ཀྱི་དོན་གྲུབ་མ༔ གསང་བ་རྡོ་རྗེའི་ཐིག་འདེབས་པའི༔ ལས་རྣམས་མ་ལུས་ཀུན་བྱོས་ཤིག༔ བྷྲཱུྃ་ཛྙཱ་ན་ཏིཥྛ་མཎྜལ་ལ་（2བ）སྭཱ་ཧཱ། ཞེས་བརྗོད་པས་ལུས་ཀྱི་རིགས་ལྔ་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་སྤྲིན་ཡུམ་གྱི་མཁའ་ལས་འཐོན་པ་ཐིག་ལ་ཕོག་པས་དངོས་པོའི་རྟོག་པ་སྦྱངས་ནས་ཡེ་ཤེས་ལྔའི་རང་བཞིན་དུ་གསལ་བར་བསམ་ལ། ཐིག་སྐུད་ནུབ་ནས་ཤར་དུ་བསྐྱངས་པའི་ཐིག་སྣ་ཡུམ་གྱི་ལག་ཏུ་གཏད་དེ་ཅུང་ཟད་བསྒྲིལ་བའི་ཚུལ་བྱས་ནས། ཧཱུྃ། སྟོང་གསུམ་མཎྜལ་ཡུམ་གྱི་ས་གཞི་ལ༔ ཐུགས་རྗེ་འགྱུར་མེད་ཡབ་ཀྱི་ཐིག་ཏབ་པས༔ སྲིད་པ་དཀྱིལ་འཁོར་འབྱམས་ཀླས་དབྱིངས་སུ་གསོལ༔ བསྒྲུབ་པའི་ལྷ་དགུའི་བཞུགས་གནས་ལྷུན་གྱིས་གྲུབ༔ བྷྲཱུྃ་ཛྙཱ་ན་མཎྜལ་སྭཱ་ཧཱ༔ ཞེས་བརྗོད་དེ་རྡོ་རྗེ་དང་བཅས་པའི་མཐེ་བོང་དང་གུང་མོས་ཐིག་སྐུད་བཟུང་བ་འོག་ནས་གྱེན་དུ་གཅུས་ཏེ་སེ་གོལ་གྱིས། ནུབ་ཤར་ལྷོ་བྱང་ཚངས་ཐིག་གཉིས། མེ་རླུང་སྲིད་དབང་ཟུར་གྱི་ཐིག ། མེ་དབང་རླུང་སྲིན་ཤར་ནུབ་གྲྭ། །རླུང་དབང་མེ་སྲིན་བྱང་དང་ལྷོའི། །གྲྭ་ཡི་ཐིག་ཡིན་སློབ་དཔོན་དང་། །སློབ་མའི་གནས་ཏེ་རིམ་བཞིན་ནོ། །ཞེས་སྡོམ་ཚིག་ལྟར་ཐིག་ཆེན་བརྒྱད་གདབ་ཅིང་། འགྲོ་ཚུལ་སྤྱི་ལྟར་ཚངས་ལོགས་རྒྱབ་འགྲོས་དང་། ཟུར་ཐིག་ལ་རྒྱབ（3ན）འགྲོས་སྤངས་ཏེ་གཡས་བསྐོར་ཁོ་ནས་གནམ་ཐིག་བཏབ་པས་སྔགས་དང་ཐིག་གི་སྒྲས་སངས་རྒྱས་ཐམས་ཅད་སད་པར་བྱས། ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བར་བསམ་ཞིང་། སློབ་དཔོན་ནུབ་ཏུ་གནས་པས་སྲད་བུ་བསྡུ། གཉིས་པ་ལས་ཐིག་ནི། དེ་བཞིན་དུ་ས་ལའང་གདབ་སྟེ། དང་པོ་ཤར་ནུབ་ཚངས་ཐིག་གདབ། དབུས་ནས་ཕྱོགས་བཞིར་མཚན་མ་བྱ། ཤར་ནུབ་ཚངས་ནས་གཉིས་པ་དང་། ཕྱོགས་བཞིའི་ཚངས་ནས་ཟུར་ཐིག་བཙལ། །ཚངས་པའི་ཐིག་གི་ཕྱོགས་བཞི་རུ། །ཆ་ཆེན་དགུ་དགུ་བཅོ་བརྒྱད་ལས། །རྩ་བའི་བརྒྱད་ཆ་སྒོ་ཡིན་ཏེ། །སྒོ་ཡི་བཞི་ཆ་ཆ་ཕྲན་ནོ། །ཆ་ཆེན་དྲུག་པའི་ཕྱི་མཐའ་ནས། ལོགས་ཐིག་བཞི་གདབ་མདའ་ཡབ་ཐིག ། མདའ་ཐིག་ནས་ནི་ལྟེ་བའི་བར། །ཟུར་ཐིག་བཞི་པོ་ཆ་གསུམ་བགོས། །སུམ་ཆ་ཕྱི་མའི་སྟེང་བཟུང་ནས། །ལོགས་ཐིག་བཞི་གདབ་རྩ་བའི་ཐིག ། མདའ་ཐིག་དང་ནི་རྩ་བའི་བར། །ཕྱེད་བགོས་རེ་རེའང་བཞི་བཞིར་བགོས། །ནང་མ་དབུས་དོར་མཐའ་གཉིས་གདབ། །རྩིག་པ་འདོད་སྣམ་ཕ་གུ་འབྱུང་། །ཕྱི་མ་ཕྱེད་གདབ་ཕྱི་མ་བསིལ། །དྲྭ་ཕྱེད་ཤར་བུ་མདའ་（3བ）ཡབ་འབྱུང་། །དེ་ནས་ནང་གི་རྩ་ཐིག་ནས། །རྟ་བབ་ཕྱི་ཐིག་བར་དུ་ནི། །ལོགས་བཞིའི་ཚངས་ཐིག་གཡས་གཡོན་དུ། །ཆ་ཆེན་གཉིས་གཉིས་གདབ་པར་བྱ། །ནང་མ་ཕྱེད་གདབ་ཕྱི་མ་ཕྱེད། །ཕྱི་མ་ཆ་བཞིར་བགོ་བར་བྱ། །སྒོ་ཁྱུད་སྒོ་འགྲམ་སྒོ་ལོགས་དང་། །རྩིག་མུན་ཀ་བ་ཀ་རྒྱན་འབྱུང་། རྟ་བབ་སྣམ་བུ་བརྒྱད་མ་ནི། །མདའ་ཕྱིར་ཆ་ཆེན་གསུམ་བཅད་པའི། །ནང་མ་གཉིས་པོ་བཞི་བཞིར་བགོས། །རྟ་བབ་སྣམ་བུ་བརྒྱད་ཡིན་ནོ། །ཕྱི་མ་དབུས་དོར་མཐའ་གཉིས་གདབ། །པདྨ་ཆོས་འཁོར་གདུགས་ཀྱིས། །རྟ་བབ་ཕྱི་མཐའི་རིམ་པ་ནི། །ཀ་རྒྱན་མཐའ་རུ་ཆ་ཕྲན་བསྣན། །རྟ་རྐང་ཀ་རྒྱན་མཐའ་དང་མཉམ། ཆུ་སྐྱེས་དང་ནི་སྒྲོམ་བུ་གཉིས། །དེ་ལས་ཆ་ཕྲན་གཅིག་གིས་རིང་། །ཟར་ཚག་དེ་ལས་གཉེར་ཀྱིས་ཐུང་། སྣ་འཆད་དེ་ལས་གཅིག་གིས་རིང་། །ཆུན་འཕྱང་དེ་ལས་གཉིས་ཀྱིས་ཐུང་། །ཤར་བུ་དེ་ལས་གཅིག་གིས་རིང་། །དེ་ལས་ཁྱུང་མགོ་གཅིག་འཕྱར་རོ། །པདྨ་འཁོར་ལོ་གདུགས་གསུམ་པོའི། །རྒྱ་ཚད་ཆ་ཕྲན་གཉིས་རེ་སྟེ། །པདྨའི་གཡས་གཡོན་ཆ་ཕྲན་ཕྱེད། །དོར་སར་རི་དྭགས་རེ་རེ་བྲི། །གླང་རྒྱབ་མིག་གསུམ་（4ན）བསྐོར་ཚུལ་ནི། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་འཇོམས་པ་ནས་བཟུང་སྟེ། ཆ་ཕྲན་གཉིས་ཀྱིས་དབུས་མ་བསྐོར། །མུན་པ་པ་ཏིའི་ཕྱི་ཐིག་དང་། །ཚངས་ཐིག་འཛོམས་པའི་གཡས་གཡོན་དུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཉིས་ཀྱིས་གཡས་གཡོན་བསྐོར། །དེ་རྣམས་ཕྱི་རུ་ཆ་རེ་བསྐོར། །སྣ་ཚོགས་རྡོ་རྗེའི་རྭ་བསྐོར་ཚུལ། །སྣམ་བུ་གསུམ་པའི་ཕྱི་ཐིག་དང་། །ཚངས་ཕྱིར་གཉིས་ཕྱིན་འཛོམས་པ་ནས། །བཟུང་སྟེ་ཀ་རྒྱན་རྩེ་ནས་བསྐོར། །དེ་ནས་འཕྲེད་གཉིས་ཕྱི་རུ་གཅིག །ཕྱིན་ཏེ་སྔ་མའི་ཚད་དེས་བསྐོར། །དབུས་རྭ་རྩ་བའི་རྒྱ་ཚད་དུ། །ཆ་ཆེན་གཅིག་ཡིན་མི་མངོན་ཡང་། །རིམ་ཕྲ་རྩེ་མོ་ཆ་ཕྲན་གཉིས། །པད་འཁར་གདུགས་ཀྱི་འོག་ཏུ་བྲི། ཁོར་ཡུག་གདུགས་ཀྱི་རྩེ་མོ་ནས། །ཆ་ཆེན་ཕྱེད་པ་ལན་གཉིས་དང་། །ཆ་ཆེན་གཅིག་དང་དེ་ཕྱེད་དང་། །ཆ་ཆེན་ཕྱེད་དང་ཆ་ཆེན་གཅིག །བསྐོར་བས་ནང་ནས་རིམ་པ་བཞིན། །བཀའ་སྡོད་ས་དང་པདྨ་དང་། །དུར་ཁྲོད་འཁོར་ལོ་རྩིབས་སྟོང་པ། །རྡོ་ར་མེ་རི་རྣམས་སུ་འགྱུར། །ལྟེ་བའི་ལྷ་གནས་（4བ）བསྐོར་ཚུལ་ནི། །རྩ་ཐིག་ནང་དུ་ཆ་ཆེན་རེ། །དོར་བ་གྲུ་ཆད་ཐིག་ཏུ་འགྱུར། །ཚངས་ཐིག་དང་ནི་གྲུ་ཚད་ཐིག ། འཛོམས་པའི་གཡས་གཡོན་ཐིག་རྒྱུད་དུ། །ཆ་མཉམ་གསུམ་བགོས་མཚན་མ་བྱ། །མཚན་མ་ནང་མའི་སྟེང་བཟུང་ནས། །ཐིག་བཞི་བསྣོལ་བཏབ་ལིང་ཚེ་དགུ། །ཐིག་བཞི་གྲུ་ཐིག་བཅས་པ་ཡི། །ཕྱི་ནང་ཆ་ཕྲན་ཕྱེད་རེ་གདབ། །མིག་མང་རིས་བྲི་རྡོ་རྗེའི་གདུང་། །རྩ་བའི་ཚངས་ཟུར་ཐིག་རྣམས་ནི། །སོ་སོའི་ཚངས་ཐིག་དང་པོ་སྟེ། །ཕྱོགས་བཞིའི་དཀྱིལ་འཁོར་ཟུར་ནས་ཟུར། །གདུང་བཞི་བསྣོལ་མཚམས་སྟེང་དྲང་གདབ། །ཕྱོགས་བཞིའི་དཀྱིལ་འཁོར་རྩ་ཐིག་གྲུབ། །ཟུར་གྱི་ལིང་ཚེ་བཞི་པོ་ཡི། །ཟུར་ནས་ཟུར་དུ་ལོགས་བཞིན་གཏུབ། །མཚམས་དཀྱིལ་ཚངས་ཐིག་གཉིས་པ་འབྱུང་། །དེ་དག་དབུས་ཀྱི་བྱ་རྗེས་སྟེང་། །བསྣོལ་ཏེ་བརྐྱངས་ནས་ཕྱོགས་བཞིར་གདབ། །ཕྱོགས་དཀྱིལ་ཚངས་ཐིག་གཉིས་པ་དང་། མཚམས་ཀྱི་སོ་སོའི་ཟུར་ཐིག་འགྱུར། །ལིང་ཚེ་དགུ་པོ་རང་རང་གི། །གདུང་ཐིག་ལ་རེག་ཟླུམ་པོར་བསྐོར། །དེ་ནང་ཆ་ཕྲན་རེ་བསྐོར་བས། །སོ་སོའི་དམ་ཅན་ཁོར་ཡུག་འབྱུང་། །（5ན）ཁོར་ཡུག་དང་ནི་རང་རང་གི། །ཟུར་ཐིག་འཕྲད་པའི་སྟེང་བཟུང་ནས། །ངོས་གཞིར་ཐིག་གདབ་མདའ་ཐིག་ཡིན། །དེ་ནས་དཀྱིལ་འཁོར་དབུས་མ་ཡི། །མདའ་ཐིག་ནས་ནི་ལྟེ་བའི་བར། །སུམ་ཆའི་ཕྱི་གདབ་རྩ་ཐིག་གོ། །དེ་དང་མདའ་ཐིག་བར་ཕྱེད་བགོ། །ཆ་ཆེན་གཉིས་འབྱུང་ནང་མ་དེ། །དབུས་དོར་མཐའ་གཉིས་གདབ་པར་བྱ། །ཕྱི་མ་ཕྱེད་གདབ་ཕྱི་མ་ཕྱེད། །སྒོ་ནི་ཚངས་ཐིག་གཡས་གཡོན་དུ། །ཆ་ཆེན་རེ་གདབ་དེ་ཕྱེད་པའོ། །དེ་མཐར་ཆ་ཕྲན་གཅིག་རེ་གདབ། །དེ་ནས་རྩ་ཐིག་བར་དུ་ནི། །ཆ་ཆེན་གཉིས་གདབ་གྲུ་ཆད་ཐིག །སོ་སོའི་དབུས་ནས་གྲུ་ཐིག་བར། །ཚད་མཉམ་ཟླུམ་ཐིག་གཉིས་བསྐོར་བའི། །རེ་རེའི་ནང་དུ་ཆ་ཆུང་བསྐོར། །ལྟེ་བའི་མུ་ཁྱུད་ནང་ཐིག་དང་། །ནུབ་ཀྱི་ཚངས་ཐིག་འཕྲད་པ་ནས། །དབུས་ཚད་གཡས་གཡོན་མཚན་མ་བྱ། །དེ་གཉིས་ཤར་ཕྱིན་ནང་ཐིག་དང་། །སྦྲེལ་བས་ཆོས་འབྱུང་རྩེ་ཤར་བསྟན། །སོ་སོའི་ལྟེ་བ་ཆོས་འབྱུང་དང་། །མུ་ཁྱུད་རྩིབས་བཞི་རྩིབས་རྟེན་ནོ། །དེ་ལྟར་ནང་དཀྱིལ་དགུ་པོ་ནི། །རྟ་བབ་སྤངས་པའི་སྒོ་རྫོགས་ཡིན། །ཞེས་པ་ལྟར་ （5བ）དུ་མ་འཁྲུལ་གདབ། །

གཉིས་པ་ཚོན་གྱི་དགྱེ་ཚུལ་ནི། །ཚོན་སྣ་ལྔ་པོ་རང་མདོག་གི། །རིགས་བསྡེབས་དབུས་དང་ཕྱོགས་བཞིར་བཀྲམ། །དེ་ལ་མདོག་གི་དབྱེ་བ་བཞིན། །ཨོཾ་ཧཱུྃ་སྭཱ་ཨཱྃཿཧཱ་རྣམས་བཀོད། །རྡུལ་ཚོན་ལ་བཀོད་པའི་ཡིག་འབྲུ་ལྔ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་རྡུལ་ཚོན་ལ་ཐིམ། ཡེ་ཤེས་ལྔའི་རང་བཞིན་གྱི་རིན་པོ་ཆེའི་རྡུལ་ཕྲ་རབ་ཏུ་གྱུར་པར་བསམ་ཞིང་། ཨོཾ་ཧཱུཾ་སྭཱ་ཨཱྃཿཧཱ། འབྲུ་ལྔ་བརྒྱ་རྩ་ལ་སོགས་པ། །བརྗོད་པས་བྱིན་གྱིས་བརླབས་བྱས་ཏེ། །ཇི་ལྟར་དགྱེ་བའི་ཚོན་ཐོབ་ལ། །ཁང་དཀྱིལ་ཕོ་བྲང་དགུ་པོ་ཡི། །ཚོན་ནི་ལྟེ་བའི་ཆོས་འབྱུང་རྣམས། །དབུས་མཐིང་ཤར་ནས་གཡས་བསྐོར་དུ། །མཐིང་ག་སྔོན་པོ་སེར་པོ་དཀར། །དམར་མཐིང་ལྗང་ཁུ་ནག་པོའོ། །ཟླ་གམ་དམར་པོ་མུ་ཁྱུད་ལྗང་། །རྩིབས་བཞི་སྔོ་ལ་གོང་རས་དམར། །མུ་ཁྱུད་གཞི་ནག་ཐོད་ཕྲེང་དཀར། །གྲུ་ཆད་ལྗང་ལ་ཕྱོགས་མཚམས་ཀྱི། །དཀྱིལ་འཁོར་ཤར་སྒོ་ནང་བསྟན་ནོ། །སྒོ་ཕྱམས་ཕྱོགས་མདོག་ཚར་གསུམ་གྱི། རྩིག་པ་ནང་ནས་དཀར་（6ན）དམར་སྔོ། །ཕྱི་རོལ་དམ་ཅན་ཁོར་ཡུག་ནག ། གཞན་རྣམས་ཕྱི་དཀྱིལ་ཇི་བཞིན་ནོ། །རྡོ་རྗེའི་གདུང་མཐིང་འོག་གཞི་སྔོ། །སྒོ་དང་ཕྱམས་བཅས་ཕྱོགས་ཀྱི་མདོག ། རྩིག་པ་ནང་ནས་རིམ་པ་བཞིན། །སྔོ་དཀར་སེར་དམར་ལྗང་བ་འོ། །འདོད་སྣམ་དམར་ལ་ཕ་གུ་སེར། །དྲྭ་བ་གཞི་ནག་དྲྭ་བ་དཀར། །ཤར་བུ་གཞི་སྔོ་ཟར་ཚགས་དཀར། །མདའ་ཡབ་དཀར་པོ་མཆོད་རྟེན་རིས། །མུན་པ་པ་ཏི་གླང་རྒྱབ་ནག ། ཀ་བ་ཕྱོགས་མདོག་རྒྱན་མཛེས་ཚོན། །རྟ་བབ་བརྒྱད་རྣམས་གོ་རིམ་བཞིན། །རྟ་རྐང་གཞི་སྔོ་རྡོ་རྗེ་སེར། །ཆུ་སྐྱེས་དམར་ལ་སྒྲོམ་མཛེས་ཚོན། །ཟར་ཚགས་དཀར་ལ་གཞི་མ་ནག ། སྣ་འཕྱང་སེར་པོ་ཕ་གུ་འདྲ། །སྒྲིལ་འཆང་དཀར་ལ་གཞི་མ་ནག ། ཤར་བུ་དཀར་ལ་གཞི་མ་སྔོ། །རྒྱ་ཕུབ་ཁྱུང་མགོ་མཐིང་ཁའོ། །པདྨ་དམར་ལ་འཁོར་ལོ་དང་། །རི་དྭགས་གསེར་མདོག་གདུགས་དཀར་པོ། །འོག་གཞིའི་རྩིབས་དང་མུ་ཁྱུད་བཅས། །ཕྱོགས་མདོག་ཕྱི་ཕྱམས་ལྗང་གུ་སྟེ། །བཀའ་སྡོད་ས་ནི་ཁྲག་མཚོ་རིས། །པདྨ་མཛེས་ཚོན་ཡུལ་གྱི་གྲངས། །དུར་ཁྲོད་གཞི་ནག་ཁྱད་ཆོས་རྣམས། །（6བ）འཆོལ་མེད་ཕྱག་ལེན་བཞིན་དུ་བྲི། །རྩིབས་སྟོང་འཁོར་ལོ་སེར་པོ་སྟེ། །རྡོ་ར་གཞི་ནག་རྡོ་རྗེ་ནི། །དཀར་རམ་ཡང་ན་སེར་པོ་བྱ། །མེ་རི་སྣ་ཚོགས་གནས་ཀྱི་གྲངས། །སྒོ་དང་སྒོ་ཁྱུད་མཚམས་རྣམས་སུ། །ཟླ་ཕྱེད་རྡོ་རྗེ་རེ་རེ་བྲི། །རྟ་བབ་དང་ནི་མདའ་ཡབ་ཀྱི། །ཁོར་ཡུག་རྒྱལ་མཚན་བ་དན་སོགས། །སྒོ་ཡི་ཕྱི་རོལ་ཏཱ་ལ་དང་། །དཔག་བསམ་ལྗོན་པའི་ཤིང་གིས་བརྒྱན། །རིན་པོ་ཆེ་ཡི་ཕུང་པོ་དང་། །ཁྲུས་ཀྱི་རྫིང་བུ་བཅས་པ་རྣམས། །ཕྱོགས་རེར་གཉིས་རེ་སྤེལ་མར་བྲི། །ཕྱི་དཀྱིལ་རིན་ཆེན་གཞལ་ཡས་ཁང་། །རྒྱན་དང་བཀོད་པས་སྤྲས་པ་ཡི། །ལྟེ་བའི་ལྷ་གནས་རྣམས་སུ་ནི། །སྐུ་འམ་ཕྱག་མཚན་ས་བོན་ནམ། །རང་མདོག་ཐིག་ལེ་ཅི་རིགས་བྱ། །ཕྱི་ཡི་གྲྭ་བཞིར་ལྷོ་ནུབ་གཟུགས། །མེ་ལོང་ནུབ་བྱང་སྒྲ་པི་ཝང་། །བྱང་ཤར་དྲི་ཆུའི་དུང་ཞལ་དང་། །ཤར་ལྷོར་རེ་མཆོག་ཞལ་ཟས་བཅས། །མཛེས་པའི་ཚོན་གྱིས་བྲི་བྱ་ཞིང་། །ཚོན་རྩི་མི་ཐུག་མི་སྲབ་ཅིང་། །མ་འདྲེས་ཆད་དང་ཡོ་བ་སོགས། །སྤངས་ཏེ་སྒྲིན་པོའི་བློ་ཡིས་བྲི། །ཐིག་ཚོན་བྱ་བ་ཟིན་པ་ན། །བཛྲ་མུཿཞེས་བརྗོད་པ་ཡིས། །ཡེ་ཤེས་（7ན）པ་ཉིད་གཤེགས་གསོལ་བྱ། །དེ་ལྟར་ཚོམ་བུ་དགུའི་དཀྱིལ་འཁོར། །ཇི་ལྟར་བྲི་བའི་ལག་ལེན་འདི། །མཁས་གྲུབ་རིག་འཛིན་གོང་མ་ཡི། །མན་ངག་ཕྱག་བཞེས་ཇི་ལྟ་བར། །འཇིགས་བྲལ་ཡེ་ཤེས་རྡོ་རྗེས་བྲིས། །སྐལ་བཟང་འདུས་པའི་ཚོམ་བུ་རྣམས། །བརྡ་ཡི་དཀྱིལ་འཁོར་འདིར་བརྟེན་ནས། །དོན་དམ་ཡེ་ཤེས་དཀྱིལ་འཁོར་ཆེ། །མངོན་སུམ་མཐོང་བའི་རྒྱུར་གྱུར་ཅིག ། །།