DJYD-KABUM-23-A-023

Previous Text Back to Volume PageNext Text

Wylie title	nor bdag a pa ra tsit+ta'i sbyin sreg gi cho ga 'dod rgu lhun grub
Location	bdud 'joms rin po che bka' 'bum Volume 23, Text 23, Pages 379-386 (Folios 1a1 to 4b2)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Nor bdag a pa ra tsit+ta'i sbyin sreg gi cho ga 'dod rgu lhun grub. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: 379-386. Kalimpong: Dupjung Lama, 1979-1985.
Side notes	Recto: sbyin sreg   Verso: bdud 'joms a pa ra tsit+ta
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Fire Offerings - sbyin sreg
Deity	A pa ra tsit+ta
Colophon	།ནོར་གྱི་བདག་པོའི་སྦྱིན་སྲེག་གི་ཆོ་ག་འདོད་རྒུ་ལྷུན་གྲུབ་ཅེས་བྱ་བ་འདི་ནི། ཀོང་པོ་ང་ཕོད་ནས་མཁྱེན་རྟོགས་ཡོན་ཏན་གྱི་བདག་ཉིད་སློབ་དཔོན་ངག་དབང་ཨོ་རྒྱན་བསྟན་འཛིན་གྱི་གསུང་བསྐུལ་ནན་ཆགས་སུ་གནང་བའི་བཞེད་སྐོང་དུ། སྙོམས་ལས་པ་འཇིགས་བྲལ་ཡེ་ཤེས་རྡོ་རྗེས་གཏེར་གཞུང་གི་དགོངས་པ་མན་ངག་གིས་གསལ་བར་བགྱིས་ཏེ་དཀར་པོའི་ཕྱོགས་ཀྱི་འགྲུབ་པའི་སྦྱོར་བ་དང་ལྡན་པའི་ཕྱི་དྲོའི་ཐུན་གཅིག་ལ་རང་གནས་བདེ་ཆེན་ཆོས་འཁོར་གླིང་དུ་སྦྱར་བ་དགེ་ལེགས་སུ་གྱུར་ཅིག། །།སརྦ་མངྒ་ལཾ།།
	nor gyi bdag po'i sbyin sreg gi cho ga 'dod rgu lhun grub ces bya ba 'di ni/___kong po nga phod nas mkhyen rtogs yon tan gyi bdag nyid slob dpon ngag dbang o rgyan bstan 'dzin gyi gsung bskul nan chags su gnang ba'i bzhed skong du/___snyoms las pa 'jigs bral ye shes rdo rjes gter gzhung gi dgongs pa man ngag gis gsal bar bgyis te dkar po'i phyogs kyi 'grub pa'i sbyor ba dang ldan pa'i phyi dro'i thun gcig la rang gnas bde chen chos 'khor gling du sbyar ba dge legs su gyur cig/___//sarba mang+ga laM//

Tibetan Text

[edit]

༄༅། །ནོར་བདག་ཨ་པ་ར་ཙིཏྟའི་སྦྱིན་སྲེག་གི་ཆོ་ག་འདོད་རྒུ་ལྷུན་གྲུབ་ཅེས་བྱ་བ་བཞུགས་སོ། །

༄༅། །ཨོཾ་སྭསྟི། ཁྱོད་མཚན་ཉི་གཞོན་ཡིད་མཁར་ཤར་བའི་མོད། །ཉམ་ཐག་དབུལ་བའི་མུན་འཐུག་མཐར་མཛད་པ། །གནོད་སྦྱིན་ནོར་གྱི་བདག་པོ་དེར་བཏུད་ན། །མཉེས་བྱེད་སྦྱིན་སྲེག་ཆོ་ག་བརྗོད་པར་བྱ། །འདི་ལ་གཉིས། རྒྱས་པ་དང་། དབང་ངོ་། །དང་པོ་ནི། ཟླ་བ་ཡར་ངོའམ་ཉིན་ཕྱེད་ཀྱི་དུས་ནགས་ཚལ་སོགས་ཤིས་པའི་གནས་སུ་མེ་ཐབས་དྲི་དང་བ་བྱུང་གིས་བྱུགས་པར་མཎྜལ་གྲུ་བཞི་རིན་པོ་ཆེའི་དབྱིབས་ཅན་བྲིས་པའི་ཁར་ཤུག་པ་སོགས་འོ་མ་ཅན་གྱི་ཤིང་སྐམ་པོས་གྲུ་བཞིར་བརྩིག །རང་གི་གཡས་སུ་སྟེགས་བུར་གཏོར་མ་ཁ་ཟས་བཟང་རྒུས་བརྒྱན་པ་དང་མཆོད་པ། ཁྱད་པར་ཤུག་པ་དང་ཙན་དཀར་སོགས་མདོག་བཟང་ལ་དྲི་ཞིམ་པའི་ཡམ་ཤིང་ [2a] དང་ཞུན་མར། བསྲེག་རྫས་ནས། གྲོ། འབྲས། རིན་པོ་ཆེ། ཤ། མར། ཞོ། འོ་མ། ཀ་ར། བུ་རམ། སྦྲང་རྩི་རྣམས་ཡུང་བ་སེར་པོ། ལྡོང་རོས། གུར་གུམ་རྣམས་ཀྱི་ཁུ་བས་སེར་པོར་ཁ་བསྒྱུར། དགང་གཟར་བླུགས་སོགས་དགོས་པའི་ཡོ་བྱད་རྣམས་ཚོགས་པར་བྱས་ལ། སྤྲོ་ཞིང་དགའ་བའི་སེམས་ཀྱིས་བྱང་དུ་ཕྱོགས་པར་བཟང་པོའི་སྟབས་ཀྱིས་འདུག་སྟེ། བདག་བསྐྱེད་བཟླས་པའི་བར་འགྲུབ་མཚམས། བསྲེག་རྫས་རྣམས། རཾ་ཡཾ་ཁཾ་གིས་བསང་སྦྱང་། སྟོང་པའི་ངང་ལས་རིན་ཆེན་སྣོད་མཆོག་ཏུ། །འབྲུ་གསུམ་འོད་ཞུ་མཆོད་རྫས་བསྲེག་རྫས་ཚོགས། །ངོ་བོ་ཟག་མེད་བདུད་རྩིའི་རང་བཞིན་ལ། །རྣམ་པ་འདོད་ཡོན་རྒྱ་མཚོས་ཁམས་ [2b] གང་གྱུར། ཨོཾ་ཨཱཿཧཱུཾ། ཞེས་ལན་གསུམ་གྱིས་བརླབས་ནས། རིན་པོ་ཆེའམ་དགོན་པ་ལས་བྱུང་བའི་མེ་སྦར་ལ། ཨོཾ་ཨགྣ་ཡེ་ཛྭ་ལ་རཾ། ཞེས་དང་། མར་ཁུས་ཀྱང་གསོ། ཐབ་ཤུ་ནྱ་ཏའི་སྔགས་ཀྱིས་བསང་སྦྱང་། སྟོང་པའི་ངང་ལས་རང་གི་མདུན་དུ་ནི། །རྒྱས་པའི་ཐབ་ཁུང་སེར་པོ་མཚན་ཉིད་ཀུན། །ཡོངས་རྫོགས་འོད་ཟེར་རབ་ཏུ་འཕྲོ་བའི་དབུས། །རིན་ཆེན་མཛེས་ཁྲི་པདྨ་ཉི་ཟླའི་སྟེང་། །ཧཱུཾ་ཡིག་དཀར་པོ་མཆོག་ཏུ་འབར་བ་ལས། །ཞེས་པ་ནས་བསྟོད་པའི་བར་སྒྲུབ་ཐབ་ལྟར་སྦྱར་ལ། རྫས་རྣམས་བསྲེག་པའི་བདུད་རྩི་དྭངས་མའི་བཅུད། །ཞལ་དུ་དྲངས་པས་དགྱེས་ཤིང་ཚིམས་གྱུར་ནས། །འཛད་མེད་འདོད་རྒུའི་རིན་ཆེན་གཏེར་ཆེན་པོ། །ཆར་ལྟར་ཕབ་ནས་བདག་ལ་སྩལ་བར་གྱུར། །ཅེས་གསལ་བཏབ་སྟེ། དགང་བླུགས་ཀྱི་མར་ཁུ། ཨོཾ་ཨ་པ་ར་ཙིཏྟ་ཡཀྵ་ཧཱུཾ༔ ཨ་མྲྀ་ཏྲ་ཁཱ་ཧི༔ ཞེས་ལན་བདུན་གྱིས་ཕུལ། དེ་ནས་བསྲེག་རྫས་རྣམས། ཨོཾ་ཨ་པ་ར་ཙིཏྟ་ཡཀྵ་ཧཱུཾ༔ སརྦ་རཏྣ་སིདྡྷི་ཧཱུཾ༔ ཞེས་པས་རིམ་པར་ཐབ་ཏུ་འབུལ་ཞིང་། བདག་གི་མཆོད་རྫས་དམ་པ་འདི་བཞེས་ལ། །ཚེ་དང་ནོར་དང་བསོད་ནམས་ལོངས་སྤྱོད་སོགས། །མངོན་པར་འདོད་པའི་དོན་རྣམས་མ་ལུས་པ། །འབད་མེད་མྱུར་དུ་འཕེལ་བར་མཛད་དུ་གསོལ། །ཞེས་འདོད་དོན་གསོལ། [3a] དེ་ལྟ་བུའི་ཚུལ་གྱིས་རྫས་རྣམས་རྫོགས་པ་དང་། གོང་ལྟར་དགང་བླུགས་ལན་བདུན་ཕུལ་མཐར། མཆོད་བསྟོད་མདོར་བསྡུས་དང་། རྩ་སྔགས་ལ་གཏོར་སྔགས་བཏགས་པ་བདུན་གྱིས་གཏོར་མ་ཐབ་ཏུ་ཕུལ་ཏེ། གནོད་སྦྱིན་ནོར་ལྷའི་ཚོགས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་ཕྲིན་ལས་བཅོལ། ཧོཿ བདག་གིས་མ་འབྱོར་མ་རྙེད་ཅིང་། སོགས་དང་ཡིག་བརྒྱས་ནོངས་པ་བཤགས། ཧོཿ ཡེ་ཤེས་དབྱིངས་ནས་དྲངས་པའི་ལྷ༔ རང་བཞིན་གནས་སུ་གཤེགས་ནས་ཀྱང་༔ བདག་ཅག་སྒྲུབ་མཆོག་འཁོར་བཅས་ཀྱི༔ འདོད་དོན་སྤེལ་བའི་བྱེད་པོ་མཛོད༔ བཛྲ་མུཾ༔ ཞེས་ཡེ་ཤེས་པ་གཤེགས། དམ་ཚིག་པ་རང་ཉིད་ལ་བསྡུ། ཨོཾ་ཨ་མྲྀ་ཏེ་ཧཱུཾ་ཕཊ༔ ཁྲོ་བོ་བགེགས་མཐར་བྱེད་ཀྱི་བྱིན་གྱིས་བརླབས་ནས་སྦྱིན་སྲེག་གི་ལྷག་མ་ཟ་བའི་བགེགས་རྣམས་གཞོམ་པར་གྱུར། སྒྲུབ་ཐབས་ལྟར་བསྔོ་སྨོན་དང་ཤིས་བརྗོད་ཇི་ལྟར་རིགས་པས་མཐའ་བརྒྱན། ཐལ་བ་མཛོད་དུ་སྦའོ། ། ༈ གཉིས་པ་དབང་གི་སྦྱིན་སྲེག་ནི། ཟླ་བ་མར་ངོའམ་ཕྱི་དྲོའི་དུས་སུ་ཆུ་བོ་འདུས་པའི་མདོ་ལ་སོགས་པའི་གནས་སུ་མེ་ཐབ་དྲི་དང་བ་བྱུང་གིས་བྱུགས་པར་མཎྜལ་ཟླ་གམ་དུ་བྲིས་པའི་ཁར་ཙནྡན་དམར་པོའམ་འོམ་བུ་ཤིང་ལ་སོགས་པས་ཟླ་གམ་དུ་བརྩིགས། མཆོད་གཏོར་སྔར་ལྟར་ལས། ཁྱད་པར་འོམ་བུ་ [3b] སོགས་དམར་ལ་དྲི་ཞིམ་པའི་ཡམ་ཤིང་དང་། འབྲི་མོག་གིས་བསྒྱུར་བའི་མར་ཁུ། རྒྱ་སྐྱེགས་ཀྱིས་བྲིས་པའི་བསྒྲུབ་བྱའི་ལིངྒ། ཨུག་ཆོས་སོགས་མེ་ཏོག་དམར་པོའི་རིགས་གང་འཛོམས། གོང་དུ་སྨོས་པའི་བསྲེག་རྫས་རྣམས་ལ་ཨ་བར་སྐྱུར་གསུམ། རྩ་བ་ལྔ། དབང་ལག་རྣམས་ཀྱི་ཁུ་བ་དང་མཚལ་ལ་སོགས་པས་དམར་པོར་ཁ་བསྒྱུར། དགང་བླུགས་སོགས་དགོས་ཆས་ཚོགས་པར་བསགས་ལ། ཆགས་ཤིང་གདུང་བའི་སེམས་ཀྱིས་བྱང་དུ་ཕྱོགས་པར་སྐྱིལ་ཀྲུང་གིས་འདུག་སྟེ། བདག་བསྐྱེད་སྔོན་དུ་འགྲོ་བས་བསྲེག་རྫས་སྔར་ལྟར་བརླབ། སྨད་འཚོང་མའམ་རང་འདོད་པའི་ལག་ནས་བྱུང་བའི་མེ་སྦར་ལ། ཨོཾ་ཨགྣ་ཡེ་ཛྭ་ལ་རཾ། ཞེས་དང་། མར་ཁུས་གསོ། ཐབ་ཤུ་ནྱ་ཏས་བསང་སྦྱང་། སྟོང་པའི་ངང་ལས་རང་གི་མདུན་དུ་ནི། །དབང་གི་ཐབ་ཁུང་དམར་པོ་མཚན་ཉིད་ཀུན། །ཡོངས་རྫོགས་འོད་ཟེར་རབ་ཏུ་འཕྲོ་བའི་དབུས། །རིན་ཆེན་མཛེས་ཁྲི་པདྨ་ཉི་ཟླ་དང་། །ཧཱུཾ་ཡིག་དཀར་པོ་མཆོག་ཏུ་འབར་བ་ལས། །ཞེས་པ་ནས་བསྟོད་པའི་བར་སྒྲུབ་ཐབས་ལྟར་སྦྱར་ལ། རྫས་རྣམས་བསྲེག་པའི་བདུད་རྩི་དྭངས་མའི་བཅུད། །ཞལ་དུ་དྲངས་པས་དགྱེས་ཤིང་ཚིམས་གྱུར་ནས། །དེ་ཡི་ཐུགས་ལས་འོད་དམར་ལྕགས་ཀྱུ་དང་། །ཞགས་པའི་དབྱིབས་ཅན་དཔག་ཏུ་མེད་པ་འཕྲོས། །བསྒྲུབ་བྱའི་སྙིང་ [4a] གར་ཞུགས་པས་སེམས་རྒྱུད་བསྐུལ། །དབང་མེད་ཡིད་ཆགས་མེ་ལྷའི་མདུན་དུ་བཀུག །སླར་ཡང་མེ་ཉིད་ཆེར་འབར་གཟི་བརྗིད་ཀྱིས། །རེག་པས་བསྒྲུབ་བྱ་ཆགས་པས་ཡིད་མྱོས་ཏེ། །རང་དབང་མེད་པར་བདག་གི་དབང་འདུས་གྱུརེ། །ཅེས་གསལ་བཏབ་ལ་དགང་བླུགས་ཀྱི་མར་ཁུ་ལན་བདུན་ཕུལ་མཐར། བསྲེས་རྫས་རྣམས། ཨོཾ་ཨ་པ་ར་ཙིཏྟ་ཡཀྴ་ཧཱུཾ༔ ཆེ་གེ་མོ་ཝཱ་ཤཾ་ཀུ་རུ་ཧྲཱིཿསྭཱ་ཧཱ༔ ཞེས་པས་ཐབ་ཏུ་རིམ་པར་ཕུལ་ཞིང་། བདག་གི་མཆོད་རྫས་དམ་པ་འདི་བཞེས་ལ། །ས་གསུམ་འགྲོ་བ་སྤྱི་དང་ཁྱད་པར་དུ། །ཆེ་གེའི་རླུང་སེམས་སྣང་བ་ཐམས་ཅད་ཀུན། །འབད་མེད་དབང་དུ་འདུ་བར་མཛད་དུ་གསོལ། །ཞེས་འདོད་དོན་གསོལ། །དེ་ལྟ་བུའི་ཚུལ་གྱིས་གྲངས་རྫོགས་པ་ན། དགང་བླུགས་འབུལ་ཞིང་མཆོད་བསྟོད་གཏོར་འབུལ་ཕྲིན་བཅོལ་ནོངས་བཤགས་གཤེགས་བསྡུ་བསྔོ་སྨོན་ཤིས་བརྗོད་རྣམས་གོང་དུ་སྨོས་པ་ལྟར་མཐར་དབྱུང་། ཐལ་བ་རི་རྩེའམ་ཆུ་བོ་ཆེན་པོའི་གཞུང་དུ་སྦྱང་ངོ་། །དེ་ལྟར་མེ་ཡི་ལས་ལ་བརྟེན་ནས་ཀྱང་། །འདོད་པའི་དངོས་གྲུབ་བདེ་བླག་བསྒྲུབ་པའི་ཐབས། །གསལ་བར་བརྗོད་དགེས་རྣམ་མང་ཡིད་ཅན་འགྲོ། །དབུལ་ཕོངས་སྡུག་བསྔལ་རྒྱུ་འབྲས་ཀུན་བྲལ་ཤོག །ནོར་གྱི་བདག་པོའི་སྦྱིན་སྲེག་གི་ཆོ་ག་འདོད་རྒུ་ལྷུན་གྲུབ་ཅེས་བྱ་བ་འདི་ནི། ཀོང་པོ་ང་ཕོད་ནས་ [4b] མཁྱེན་རྟོགས་ཡོན་ཏན་གྱི་བདག་ཉིད་སློབ་དཔོན་ངག་དབང་ཨོ་རྒྱན་བསྟན་འཛིན་གྱི་གསུང་བསྐུལ་ནན་ཆགས་སུ་གནང་བའི་བཞེད་སྐོང་དུ། སྙོམས་ལས་པ་འཇིགས་བྲལ་ཡེ་ཤེས་རྡོ་རྗེས་གཏེར་གཞུང་གི་དགོངས་པ་མན་ངག་གིས་གསལ་བར་བགྱིས་ཏེ་དཀར་པོའི་ཕྱོགས་ཀྱི་འགྲུབ་པའི་སྦྱོར་བ་དང་ལྡན་པའི་ཕྱི་དྲོའི་ཐུན་གཅིག་ལ་རང་གནས་བདེ་ཆེན་ཆོས་འཁོར་གླིང་དུ་སྦྱར་བ་དགེ་ལེགས་སུ་གྱུར་ཅིག། །།སརྦ་མངྒ་ལཾ།། །།