DJYD-KABUM-23-A-035

Previous Text Back to Volume PageNext Text

Wylie title	mnol bsang lha chab sngon mo'i khog dbub spyi chings mdor bsdus
Location	bdud 'joms rin po che bka' 'bum Volume 23, Text 35, Pages 535-538 (Folios 1a1 to 2b2)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Mnol bsang lha chab sngon mo'i khog dbub spyi chings mdor bsdus. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: 535-538. Kalimpong: Dupjung Lama, 1979-1985.
Side notes	Recto: spyi chings   Verso: mnol bsang lha chab sngon mo
More details More details
Genre	Smoke Offerings - bsangs mchod - lha bsang
Colophon	།ཞེས་པའང་རང་གཞན་གྲོང་སྔགས་པ་རྣམས་འཇུག་བདེའི་ངག་ཁྲིགས་སུ་འཇིགས་བྲལ་ཡེ་ཤེས་རྡོ་རྗེས་བསྡེབས་པ་དགེ།
	zhes pa'ang rang gzhan grong sngags pa rnams 'jug bde'i ngag khrigs su 'jigs bral ye shes rdo rjes bsdebs pa dge/

Tibetan Text

[edit]

༄༅། །མནོལ་བསང་ལྷ་ཆབ་སྔོན་མོའི་ཁོག་དབུབ་སྤྱི་ཆིངས་མདོར་བསྡུས་བཞུགས། ན་མོ་གུ་རུ་པདྨ་ཀ་ར་ཡེ། མནོལ་བསང་ལྷ་ཆབ་སྔོན་མོ་འདི་ཉིད་ལག་ཏུ་ལེན་པ་ལ། སྦྱོར་བ་གཙང་མའི་སྟེགས་བུ་རས་དཀར་གྱི་ཁེབས་དང་ལྡན་པའི་ཁར། སྣོད་གཙང་མར་འབྲུ་སྣའི་ཕྱེ་དང་བསང་རྫས་བརྒྱ་རྩ་སོགས་འོག་གི་ཚིག་རིས་དང་མཐུན་པའི་སྨན་སྣ། དར་ཟབ་གོས་སྣ། དཀར་གསུམ་མངར་གསུམ་བཅས་མར་ཁུས་སྦགས་པས་བཀང་བ་བཤམ། མཐའ་སྐོར་དུ་འོ་ཕུད། ཆང་ཕུད། ཇ་ཕུད། ཤིང་ཏོག་བཟང་པོའི་ཁུ་བའི་རིགས། ཆུ་གཙང་དྲི་བཟང་ལྔ་ཚན་ལྔ་སྦྱར་བ་བཅས་ཀྱིས་བཀང་བའི་ཞལ་བུ་གྲལ་སྟབས་སུ་འགོད། ཕྱི་ནང་གི་ཕྱོགས་གང་བདེར་ཤིང་སྣའི་མེ་དང་། རོལ་མོའི་རིགས་བྱེད་སོགས་འདིར་མཁོ་བའི་ཡོ་བྱད་རྣམས་འདུ་བྱས་ནས། ཆོ་ག་དངོས་ལ་། འདི་ཉིད་ལྷ་བསང་རྒྱག་བརྔན་སོགས་བསང་གཞུང་གཞན་གྱི་ཁོངས་སུ་བསྒྲུབ་ན་སྔོན་རྗེས་ཀྱི་ཆོས་རྣམས་ཟུར་དུ་མི་དགོས་པས་མནོལ་བསང་དངོས་ལ་འཇུག་པས་ཆོག་ཅིང་། འདི་ཁོ་ན་སྒེར་དུ་གཏོང་སྐབས་སུ། ཐོག་མར་སྦྱོར་བའི་ཆོས་མདོར་བསྡུས་ནི། ན་མོ། བདག་སོགས་འགྲོ་ཀུན་དེང་ནས་བྱང་ཆུབ་བར། །བླ་མ་རྩ་གསུམ་ལྷ་ལ་སྐྱབས་སུ་མཆི། །གཞན་དོན་རྫོགས་པའི་སངས་རྒྱས་ཐོབ་བྱའི་ཕྱིར། །ཟབ་མོའི་རྣལ་འབྱོར་བསྒོམ་པར་སེམས་བསྐྱེད་དོ། །ཞེས་སྐྱབས་སེམས་ལན་གསུམ། ཀ་དག་ཆོས་སྐུའི་དབྱིངས་ལས་འགགས་མེད་རྩལ། །པདྨ་ཐོད་ཕྲེང་དཀར་དམར་གཞོན་ཚུལ་མཛེས། །མཚན་དཔེའི་གཟི་འབར་རྡོ་རྗེ་ཐོད་པ་བསྣམས། །མཛེས་བརྗིད་རྒྱན་དང་ཆ་བྱད་ཡོངས་སུ་རྫོགས། །དམ་ཡེ་དབྱེར་མེད་རྒྱལ་ཀུན་འདུས་པའི་གཟུགས། །འཁོར་འདས་ཀུན་གྱི་སྤྱི་དཔལ་ཆེན་པོར་གྱུར། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བརྒྱ་རྩ་སོགས་བཟླས་མཐར། བསང་རྫས་རྣམས་ལ་བསང་ཆུ་འཐོར་ཞིང་། ཨ་མྲྀ་ཏས་བསང་། སྭ་བྷཱ་ཝ་ས་སྦྱང་། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་དྲི་བཟང་གི་མཆོད་པ། རྩི་ཤིང་སྣ་ཚོགས་ཀྱི་དུད་པ། ཞལ་ཟས་ཕྱེ་མར་གྱི་འོ་སྐོལ། གསུར་གྱི་དུད་སྤྲིན་ཆེན་པོ། དུ་བ་ཡེ་ཤེས་ཀྱི་བདུད་རྩིས་ས་དང་བར་སྣང་ཐམས་ཅད་གང་བ། གཟུགས་མཛེས་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ། བཟའ་བས་མི་ཟད་པ། བཏུང་བས་མི་ཟད་པ། རྒོལ་བས་མི་སྡིགས་པ། རི་རྒྱལ་ལས་དཔངས་མཐོ་བ། རྒྱ་མཚོ་ལས་གཏིང་ཟབ་པ། ཞིང་རྡུལ་ལས་གྲངས་མང་བ། ཉི་ཟླ་ལས་འོད་གསལ་བ། རྒྱ་ཆེ་ནམ་མཁའི་མཐའ་དང་མཉམ་པ། ནད་པ་གསོ་བའི་སྨན། འཆི་བ་བསླུ་བའི་བདུད་རྩིའི་རྒྱ་ཆེན་པོར་གྱུར། ནམ་མཁའ་མཛོད་ཀྱི་སྔགས་རྒྱ་ལན་བདུན་གྱིས་བྱིན་བརླབ་ལ། བཛྲ་སྥ་ར་ཎ་ཁཾ་གིས་སྤེལ། ན་མོ། བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །སེམས་ཅན་རྣམས་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །ཐོགས་པ་མེད་པར་འབྱུང་གྱུར་ཅིག །ཅེས་བདེན་པའི་སྟོབས་བརྗོད། དེ་ནས་མནོལ་བསང་ལྷ་ཆབ་སྔོན་མོའི་གཞུང་ལ་འཇུག །སྐབས་སུ་བསང་ཁ་གསོ་ཞིང་སྐྱེམས་རིགས་རྣམས་ཐབ་ཏུ་འཐོར་ལ་མཐར་ཆགས་སུ་བཏང་མཐར། རྗེས་རིམ་ནི། འབྱུང་པོ་གང་དག་འདིར་ནི་ལྷགས་གྱུར་ཏམ། སའམ་འོན་ཏེ་བར་སྣང་འཁོད་ཀྱང་རུང་། །སྐྱེ་རྒུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །འདིར་ནི་རྒྱལ་བ་དགྲ་རྒྱལ་བདེན་གང་གིས། །ཤིན་ཏུ་བདེན་པར་གསུངས་ཤིང་རྫུན་མེད་པ། །བདེན་པ་དེས་ཀྱང་དེང་འདིར་བདེ་ལེགས་ཤོག །དེང་ཀུན་འཇིགས་པ་ཆེ་ལས་ཐར་གྱུར་ཅིག །ཅེས་སོགས་སྨོན་ལམ་གདབ་ཅིང་ཤིས་པ་བརྗོད་པས་མཐའ་བརྒྱན་པར་བྱའོ། །ཞེས་པའང་རང་གཞན་གྲོང་སྔགས་པ་རྣམས་འཇུག་བདེའི་ངག་ཁྲིགས་སུ་འཇིགས་བྲལ་ཡེ་ཤེས་རྡོ་རྗེས་བསྡེབས་པ་དགེ། །།