DJYD-KABUM-08-NYA-001

First text in volume. Back to Volume PageNext Text

Wylie title
Location	bdud 'joms rin po che bka' 'bum Volume 8, Text 1, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །དམ་ཆོས་སྤྲུལ་སྐུའི་སྙིང་ཐིག་ལས། འཕགས་མཆོག་ནམ་མཁའི་རྒྱལ་པོའི་ལས་བྱང་ཁྲིགས་སུ་བསྡེབས་པ་ཕན་བདེའི་ཤིང་རྟ་ཞེས་བྱ་བ་བཞུགས་སོ།། །།

(1བ) འཕགས་མཆོག་ནམ་མཁའི་རྒྱལ་པོའི་ལས་བྱང་ཁྲིགས་སུ་བསྡེབས་པ་ཕན་བདེའི་ཤིང་རྟ་ཞེས་བྱ་བ། ན་མོ་གུ་རུ་ཨཱརྱ་ལོ་ཀི་ཤྭ་ར་ཡ། །མཁའ་ཁྱབ་ཕྱོགས་དུས་སྲས་བཅས་རྒྱལ་ཀུན་གྱི། །བརྩེ་ཆེན་ཐུགས་རྗེའི་རང་གཟུགས་ལྷག་པའི་ལྷ། །འཇིག་རྟེན་དབང་ཕྱུག་འཕགས་པ་ནམ་མཁའི་རྒྱལ། །བླ་མ་མཆོག་དང་དབྱེར་མེད་དེར་ཕྱག་འཚལ། །གང་གི་སྒྲུབ་ཐབས་ངོ་མཚར་ཟབ་གཏེར་བཅུད། །འཁོར་བ་དོང་སྤྲུགས་ཕྲིན་ལས་འཇུག་བདེའི་ཁྲིགས། །རྣམ་མང་འགྲོ་ལ་ཕན་བདེའི་དཔལ་སྟེར་བའི། །སྔོན་མེད་ལེགས་བཤད་ཤིང་རྟ་འདི་ན་(2ན)འདྲེན། །(དེ་ཡང་བླ་ན་མེད་པའི་དངོས་གྲུབ་མྱུར་དུ་ཐོབ་པར་འདོད་པ་རྣམས་ཀྱིས་དབང་གིས་རྒྱུད་སྨིན་པར་བྱས་ཏེ་སྡོམ་པ་དང་དམ་ཚིག་ལ་ཡང་དག་པར་གནས་པའི་སྒོ་ནས་ཟབ་མོའི་ལམ་འདི་ཁོ་ན་ལ་འཇུག་པར་བྱ་སྟེ། དེའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །) (དང་པོ་ལ་ཡོ་བྱད་ཀྱི་གཤོམ་དང་། ཆོ་གའི་སྔོན་འགྲོ་གཉིས་ཀྱི། དང་པོ་ནི། ཡིད་དུ་འོང་བའི་གནས་ཁང་མཛེས་པར་བརྒྱན་ལ་བྱིན་རླབས་ཅན་གྱི་རྟེན་བཀྲམ་པའི་མདུན་དུ་མཚན་མའི་དཀྱིལ་འཁོར་ཚུལ་བཞིན་འདུ་བྱས་པའི་སྤྱན་སྔར། ཆུ་གཉིས་ཉེར་སྤྱོད་ལྔ་ལྡན་རཀ་གཏོར་མ་སོགས་ཕྱི་ནང་གི་མཆོད་པའི་བྱེ་བྲག་ཚར་དུ་དངར་བར་བཤམ། གཞན་ཡང་ཚོགས་དང་གཏོར་མའི་ཡོ་བྱད་རོལ་མོའི་ཁྱད་པར་སོགས་ཉེ་བར་མཁོ་བའི་ཆ་རྐྱེན་རྣམས་མཐོང་(2བ)བརྒྱུད་ཀྱི་ཕྱག་ལེན་བཞིན་ཚོགས་པར་བྱའོ། །) (གཉིས་པ་ཆོ་གའི་སྔོན་འགྲོ་ལ། སྐྱབས་སེམས་ཚོགས་བསགས་སྤུང་མཚམས་བཅད། །བཤགས་སྦྱང་བྱིན་འབེབས་མཆོད་བརླབ་བོ། །ཞེས་རྣམ་གྲངས་བདུན་ལས། དང་པོ་སྐྱབས་སུ་འགྲོ་བ་ནི།) རང་གི་སྙིང་གར་པད་ཟླའི་སྟེང་དུ་ཧྲཱིཿདཀར་པོའི་འོད་ཟེར་གྱི་སྣང་བས་བླ་མ་རིག་འཛིན་འཕགས་མཆོག་ཐུགས་རྗེ་ཆེན་པོ་ནམ་མཁའི་རྒྱལ་པོའི་ལྷ་ཚོགས་ལ་ཕྱོགས་དུས་སྐྱབས་ཡུལ་རྒྱ་མཚོ་དཔག་ཏུ་མེད་པས་བསྐོར་བ་མདུན་གྱི་ནམ་མཁར་བཛྲས་མཱ་ཛཿ(ས་སད་པར་མོས་ལ། མཆོག་ཏུ་དད་པའི་ཡིད་ཀྱིས་མངོན་པར་བཏུད་དེ།) ན་མོ༔ བླ་མ་སངས་རྒྱས་འཕགས་མཆོག་སྤྱན་རས་གཟིགས༔ ཡན་ལག་བཅུ་གཉིས་མདོ་སྔགས་དམ་པའི་ཆོས༔ ཚོགས་མཆོག་ཕྱིར་མི་ལྡོག་པའི་དགེ་འདུན་ལ༔ བདག་ནི་གུས་པས་ཕྱག་འཚལ་སྐྱབས་སུ་མཆི༔ (ཞེས་ལན་གསུམ་གྱིས་སྐྱབས་སུ་འགྲོ། གཉིས་པ་སེམས་བསྐྱེད་པ་ནི། སྐྱེ་འགྲོ་ཐམས་ཅད་བྱང་ཆུབ་ཆེན་པོར་སྒྲོལ་འདོད་ཀྱི་ལྷག་བསམ་བརྟན་པོས།) ན་མོ༔ བདག་གིས་འཕགས་པའི་ལྷ་ཚོགས་བསྒྲུབ་ནས་ནི༔ མ་གྱུར་ནམ་མཁའི་མཐའ་ཁྱབ་སེམས་ཅན་རྣམས༔ བླ་མེད་ཡང་དག་ལམ་ལ་རབ་གཞུག་སྟེ༔ འགྲོ་དོན་འཁོར་བ་དོང་སྤྲུགས་སེམས་(3ན)བསྐྱེད་དོ༔ (ཞེས་ལན་གསུམ་གྱིས་སེམས་བསྐྱེད་ལ།) སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །(ཅེས་ཚད་མེད་པ་བཞི་བསྒོམ།) (གསུམ་པ་ཚོགས་བསགས་པ་ནི། སྐྱབས་ཡུལ་དུ་སད་པ་རྣམས་ཚོགས་ཀྱི་ཞིང་དམ་པར་ཤེས་པས།) དུས་གསུམ་བཞུགས་པའི་བླ་མ་ཐམས་ཅད་དང་། །ཐུགས་རྗེ་ཆེན་པོའི་དཀྱིལ་འཁོར་ལྷ་ཡི་ཚོགས། །ཕྱོགས་བཅུའི་སངས་རྒྱས་བྱང་སེམས་སྲས་དང་བཅས། །སེམས་ཅན་འཁོར་བའི་སྡུག་བསྔལ་བསལ་བའི་ཕྱིར། །རང་བཞིན་གནས་ནས་སྤྱན་འདྲེན་གཤེགས་སུ་གསོལ། །ཉི་ཟླ་པདྨའི་གདན་ལ་བརྟན་པར་བཞུགས། །ལུས་ངག་ཡིད་གསུམ་གུས་པས་ཕྱག་འཚལ་ལོ། །དངོས་འབྱོར་ཡིད་སྦྲུལ་མཆོད་པ་དམ་པ་བཞེས། །ཚེ་རབས་སྔོན་ནས་ད་ལྟ་ཡན་ཆད་དུ། །སྡིག་པའི་ལས་རྣམས་ཅི་བགྱིས་སོ་སོར་བཤགས། སྐྱེ་བོ་ཉན་ཐོས་རང་རྒྱལ་བྱང་ཆུབ་སེམས། །དུས་གསུམ་དགེ་རྩ་བགྱིད་ལ་རྗེས་ཡི་རང་། །དུས་གསུམ་སངས་རྒྱས་ཞལ་ནས་གསུངས་པ་ཡི། །ཆོས་འཁོར་སེམས་ཅན་(3བ)རྣམས་ལ་བསྐོར་དུ་གསོལ། །འགྲོ་དོན་མི་མཛད་མྱ་ངན་འདའ་བཞེད་ལ། །འགྲོ་བའི་དོན་དུ་བཞུགས་པར་གསོལ་བ་འདེབས། །བདག་གཞན་དགེ་བའི་རྩ་བ་གང་བསགས་པས། །བླ་མེད་རྫོགས་པའི་བྱང་ཆུབ་ཐོབ་པར་ཤོག །(ཅེས་ཡན་ལག་བཅུ་པས་ཚོགས་བསགས་མཐར།) ཛཿཧཱུྃ་བཾ་ཧོཿས་ཚོགས་ཞིང་རྣམས་རང་ལ་ཐིམ་པས་རྒྱུད་བྱིན་གྱིས་བརླབས་པར་(བསམ་མོ། །) (བཞི་པ་སྲུང་མཚམས་བཅད་པ་ནི།) བདག་ཉིད་སྐད་ཅིག་གིས་དཔལ་ཆེན་པོ་པདྨ་དབང་ཆེན་སྐུ་མདོག་དམར་ནག་ཤིན་ཏུ་ཁྲོས་པ་ཞལ་གསུམ་ཕྱག་དྲུག་པ༔ གཡས་ཞལ་དཀར་བ༔ གཡོན་ཞལ་སྔོ་བ༔ དབུས་ཞལ་དམར་ནག་ཏུ་འབར་བ༔ སྤྱན་གསུམ་སྡང་མིག་བར་སྣང་གི་ཁམས་སུ་གཟིགས་པ༔ སྨ་ར་སྨིན་མར་མེ་འོད་འཕྲོ་བ༔ ཞལ་གདངས་ཤིང་ལྗགས་འདྲིལ་བ༔ གནམ་ལྕགས་ཀྱི་མཆེ་བ་ཟང་ཡག་ཏུ་གཙིགས་པ༔ དབུ་སྐྲ་དམར་སེར་སྲིད་པའི་རྩེ་མོར་མེ་ལྟར་འབར་བ༔ སྐྲ་གསེབ་ན་རྟ་མགོ་ལྗང་གུ་གསུམ་གྱིས་རྟ་སྐད་ནམ་མཁའི་དབྱིངས་སུ་སྒྲོགས་པས་སྣང་སྲིད་ཐམས་ཅད་དབང་དུ་སྡུད་ཅིང་བགེགས་དཔུང་ཐམས་ཅད་ཟིལ་གྱིས་(4ན)གནོན་པ༔ ཕྱག་དྲུག་གི་གཡས་གསུམ་རྡོ་རྗེ་ཁ་ཊཱཾ་སྦྲུལ་ཞགས༔ གཡོན་གསུམ་དྲིལ་བུ་བྷན་དམར་ལྕགས་སྒྲོགས་བསྣམས་པ༔ ཞབས་བཞི་གྱད་ཀྱི་འདོར་ཐབས་སུ་བསྒྲད་པས་ས་བདག་ཀླུ་གཉན་ཐམས་ཅད་གནོན་པ༔ ཡུམ་མཆོག་ཙ་ཏི་དབང་ཕྱུག་མ་དང་གཉིས་མེད་དུ་འཁྲིལ་བ༔ དུར་ཁྲོད་ཀྱི་ཆས་བརྒྱད་དང་དཔལ་གྱི་ཆས་དགུས་བརྒྱན་པ༔ ཡེ་ཤེས་ཀྱི་མེ་དཔུང་འབར་བའི་ཀློང་དུ་ཧྲཱིཿཧྲཱིཿཞེས་པའི་སྒྲ་སྒྲོགས་པས་འཇིག་རྟེན་ཁམས་ཀྱི་བགེགས་དཔུང་ཐམས་ཅད་ཚར་གཅོད་པའི་སྐུར་གྱུར་(པར་བསམ་ལ། བགེགས་ཀྱི་གཏོར་མ།) ཨོཾ་ཧྲཱིཿཔདྨནྟ་ཀྲྀཏ་མ་ཧཱ་ཀྲོ་དྷ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ་(ཀྱིས་བསང་།) སྭབྷཱ་ཝ(ས་སྦྱང་།) སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་ཏུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་(བལྟས་ལ།) ཨོཾ་ཨཱཿཧཱུྃ་ཧོཿ(ས་བྱིན་བརླབ།) སརྦ་བྷུ་ཏ་ཨཱ་ཀརྵ་ཡ་ཛཿས་མགྲོན་བཀུག །སརྦ་བིགྷྣྰཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞ་དཾ་བ་ལིནྟ་སྭཱཧཱ། (ཞེས་ལན་གསུམ་གྱིས་གཏོར་མ་བསྔོས་ལ། བཀའ་བསྒོ་བ་ནི།) ཧཱུྃཿ གསང་(4བ)སྔགས་དོན་ལ་མི་མོས་ཤིང་༔ ཐེག་པ་མཆོག་ལ་མི་དད་པའི༔ བར་ཆད་བདུད་དང་འབྱུང་པོའི་ཚོགས༔ འདི་ན་འདུག་པའི་གནས་མེད་ཀྱི༔ སོ་སོ་རང་རང་གནས་སུ་དེངས༔ གལ་ཏེ་འགྲོ་བར་མི་བྱེད་ན༔ ཁྲོ་རྒྱལ་དབང་ཆེན་རྟ་མགྲིན་གྱིས༔ ལུས་ངག་རྡུལ་ཕྲན་བཞིན་དུ་རློག༔ ཀླད་པ་ཚལ་པ་བརྒྱ་རུ་ཁོས༔ དེ་བས་རང་རང་གནས་སུ་དེངས༔ (རྟ་སྔགས་དང་།) ཨོཾ་སུམྦྷ་ནི་(སོགས་ཧཱུྃ་བཞིའི་དྲག་སྔགས་ཡུངས་ཐུན་རོལ་མོ་སོགས་ཚམ་རྔམས་དྲག་པོས་བསྐྲད་དེ།) བདག་ཉིད་དབང་ཆེན་འབར་བའི་ཞལ་ནས་ཧཱུྃ་ཧཱུྃ་ཞེས་པའི་སྒྲ་བསྒྲགས་པས༔ སྟེང་འོག་ཕྱོགས་མཚམས་ཐམས་ཅད་ཡེ་ཤེས་ཀྱི་མེ་དཔུང་དང་འཇའ་འོད་ཡིག་འབྲུ་མཚོན་ཆ་ལ་སོགས་པ་རང་སྣང་ལས་གྲུབ་པའི་གཞལ་ཡས་ཁང་ཆེན་པོ་གཅིག་ཏུ་གྱུར་(པར་བསམ་ཞིང་།) ཧྲཱིཿཧཱུྃ༔ ང་ནི་དཔལ་ཆེན་དབང་གི་ལྷ༔ རྟ་སྐད་རྔམས་སྒྲོགས་བར་ཆད་སེལ༔ མ་རིག་རང་འཁྲུལ་སེམས་ཅན་རྣམས༔ ཉོན་མོངས་རྣམ་རྟོག་བག་ཆགས་ཀྱིས༔ ལྷ་དང་འདྲེ་བགེགས་གཉིས་སྣང་ཡང་༔ རྣམ་པར་རྟོག་པ་བགེགས་ཡིན་ནོ༔ འདྲེ་བགེགས་རང་གི་སེམས་ལས་བྱུང་༔ (5ན)སེམས་ཉིད་ཡེ་ནས་ཆོས་སྐུ་ལ༔ བགེགས་དང་བར་ཆད་མིང་ཡང་མེད༔ གཉིས་མེད་རང་གྲོལ་ཆོས་སྐུའི་མཚམས༔ འདི་ལས་སུས་ཀྱང་འདའ་མི་འགྱུར༔ ཧྲཱིཿཧྲཱིཿཧཱུྃ་ཧཱུྃ་ཕཊ་ཕཊ༔ (ཅེས་མཚམས་བཅད་དོ། །) (ལྔ་པ་བཤགས་པ་བྱ་བ་ནི། ཉེས་བྱས་ཀྱི་ཚོགས་ལ་འགྱོད་ཚངས་ཀྱི་བསམ་པ་དྲག་པོས།) ཧཱུྃ༔ བླ་མ་བདེ་གཤེགས་རྒྱལ་བ་འཁོར་བཅས་དང་༔ འཕགས་པ་སྤྱན་རས་གཟིགས་དབང་འགྲོ་བའི་མགོན༔ ཡབ་ཡུམ་སྲས་དང་འཁོར་ཚོགས་བཅས་པ་རྣམས༔ རྣལ་འབྱོར་བདག་ལ་གསན་ཅིང་དགོངས་སུ་གསོལ༔ བདག་ཅག་མ་རིག་ཉོན་མོངས་དབང་གྱུར་པས༔ སྐུ་གསུང་ཐུགས་དང་ཡོན་ཏན་ཕྲིན་ལས་སོགས༔ ཡེ་ནས་མ་བཅོས་ལྷུན་གྱིས་གྲུབ་པ་ལ༔ མ་རིག་དབང་གིས་དེ་ལྟར་མ་རྟོགས་ཏེ༔ རྩ་བ་ཡན་ལག་དམ་ཚིག་ཉམས་ཆག་ཀུན༔ འཕགས་པའི་ལྷ་ཚོགས་ཁྱེད་ལ་བཟོད་པར་གསོལ༔ བཟོད་པར་བཞེས་ལ་ཚངས་པའི་དངོས་གྲུབ་སྩོལ༔ ཨོཾ་ཨཱརྱ་ལོ་ཀི་ཤྭ་ར་ས་མ་ཡ་(སོགས་ཡི་གེ་བརྒྱ་པ་བཟླའོ། །) (དྲུག་པ་བྱིན་དབབ་པ་ནི།) ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཛཿཧཱུྃ་བཾ་ཧོཿ ས་མ་ཡ་སྟྭཾ༔ (ཞེས་(5བ)པས་ཡེ་ཤེས་ཀྱི་དཀྱིལ་འཁོར་མཁའ་ཁྱབ་ཏུ་སད་པར་མོས་ཏེ།) ཧཱུྃ་ཧྲཱིཿ རྒྱལ་བའི་ཞིང་མཆོག་རི་བོ་ཏ་ལ་དང་༔ ཕྱོགས་བཅུའི་ཞིང་ཁམས་རབ་འབྱམས་དཔག་མེད་ནས༔ བླ་མ་རིག་འཛིན་རྒྱལ་བ་རྒྱ་མཚོའི་ཚོགས༔ ཐུགས་རྗེ་ཆེན་པོ་ཡབ་ཡུམ་སྲས་འཁོར་བཅས༔ དཔའ་བོ་མཁའ་འགྲོ་བསྟན་སྲུང་རྒྱ་མཚོ་རྣམས༔ རང་རང་སོ་སོའི་གནས་ནས་སྐུ་བསྐྱོད་ལ༔ གཞལ་ཡས་དཀྱིལ་འཁོར་འདི་ལ་བྱིན་ཆེན་ཕོབ༔ སྒྲུབ་མཆོག་རྣལ་འབྱོར་རྣམས་ལ་དབང་ཞིག་བསྐུར༔ སྒྲུབ་རྫས་བདུད་རྩིའི་རྒྱ་མཚོར་བསྒྱུར་དུ་གསོལ༔ སྣང་གསལ་ཞུན་མར་འདི་ལ་མདངས་ཕྱུང་ཞིག༔ འདིར་ཚོགས་སྐལ་ལྡན་རྣམས་ལ་དངོས་གྲུབ་སྩོལ༔ སརྦ་མ་ཧཱ་གུ་རུ་ཨཱརྱ་ལོ་ཀི་ཤྭ་ར་ག་ག་རཱ་ཛ་གུ་ཧྱ་ཛྙྰན་དྷཱ་ཀི་ནཱི་ས་པ་རི་ཝཱ་ར་ཨ་བེ་ཤ་ཡ་ཨ་ཨཱ༔ (ཞེས་སྤོས་དང་རོལ་མོར་བཅས་པའི་བྱིན་དབབ་བོ། །) (བདུན་པ་མཆོད་རྫས་བྱིན་གྱིས་བརླབ་པ་ནི། རྟ་སྔགས་ཀྱིས་བསང་།) སྭབྷཱ་ཝ(ས་སྦྱང་།) སྟོང་པའི་ངང་ལས་གནས་ཁང་འོག་མིན་པདྨོ་བདེ་བ་ཆེན་གྱི་གཞལ་མེད་ཁང་ཕུན་སུམ་ཚོགས་པར་རིན་པོ་ཆེ་དང་པདྨ་ལ་སོགས་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་(6ན)ཨཱ༔ ཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་ལ་སོགས་པ་ཕྱི་ནང་གསང་བའི་མཆོད་པའི་ཡོ་བྱད་འདོད་པའི་ཡོན་ཏན་སོ་སོའི་མཚན་ཉིད་ཐམས་ཅད་ཡོངས་སུ་རྫོགས་པ་རྒྱལ་བའི་ཞིང་ཀུན་ཏུ་ཁྱབ་པར་འཆར་བའི་ནམ་མཁའ་རབ་འབྱམས་གང་བ་རྣམས་སུ་གྱུར་(པར་བསམ་ཞིང་།) ཨོཾ་བཛྲ་ཨརྒྷཾ་ཨཱ༔ ་ཧཱུྃ། (དེ་བཞིན་དུ་སྦྱར་ཏེ།) པཱདྱཾ། པུཥྤེ། དྷུ་པེ། ཨཱ་ལོ་ཀེ། གྷ་ནྡྷེ། ནཻ་ཝིདྱ། ཤཔྡ་ཨཱ༔ ཧྰུ༔ མ་ཧཱ་བོ་དྷི་ཙིཏྟ་གྷ་ན་གུ་ཧྱ་སརྦ་པཱུ་ཛ་ཧོཿ (ཞེས་དང་།) བདུད་རྩི་རྃ་ཡྃ་ཁྃ་(གིས་བསང་སྦྱང་།) སྟོང་པའི་ངང་ལས་རང་བྱུང་བྷནྡྷ་འབར་བའི་སྣོད་དུ་ཤ་ལྔ་བདུད་རྩི་ལྔ་དུག་རྣམ་པར་དག་པ་ཡེ་ཤེས་ལྔའི་རང་བཞིན་ཟག་མེད་ཀྱི་བདུད་རྩིའི་རྒྱ་མཚོས་གང་བར་བསམ་ལ། ཨོཾ་ཨཱ༔ ཧཱུྃ་མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ (ལན་བདུན་རཏྐ་བསང་སྦྱང་།) སྟོང་པའི་ངང་ལས་དུང་ཆེན་བདེ་བ་ཆེན་པོའི་སྣོད་དུ་ཆགས་མེད་རཀྟའི་རྒྱ་མཚོ་རྦ་ཀློང་འཁྲུགས་པ་ལ་ཁམས་གསུམ་གྱི་རཀྟ་ཐམས་ཅད་བསྡུས་ཤིང་ཐིམ་(6བ)པར་(བསམ་ལ།) ཨོཾ་ཨཱ༔ ཧཱུྃ༔ མ་ཧཱ་རཀྟ་ཛྭ་ལ་མ་དྷ་ལ་ཧཱུྃ་ཧྲཱིཿཋཱ༔ (ལན་བདུན། གཏོར་མ་བསང་སྦྱང་།) སྟོང་པའི་ངང་ལས་གཏོར་ཞོང་སྣོད་ཀྱི་འཇིག་རྟེན་ཡངས་པར་གཏོར་མ་བཅུད་ཀྱི་སེམས་ཅན་རང་བཞིན་རྣམ་པར་དག་པ་འདོད་ཡོན་གྱི་ཕུང་པོ་བསམ་གྱིས་མི་ཁྱབ་པའི་གཏེར་དུ་གྱུར་(པར་བསམ་ལ།) ཨོཾ་ཨཱ༔ ཧཱུྃ༔ མ་ཧཱ་བ་ལིཾ་ཏ་ཏེ་ཛྭ་ལིཾ་ཏ་བ་ལ་བ་ཏི་གུ་དྷྱ་ས་མ་ཡ་ཧཱུྃ་ཧྲཱིཿཋཱ༔ (ཞེས་ལན་བདུན་དང་།) བཛྲ་སྥ་ར་ཎ་ཁཾ་(གིས་ཀུན་ཏུ་བཟང་པོའི་མཆོད་སྤྲིན་མཁའ་ཁྱབ་ཏུ་སྤེལ་ལོ། །དེ་དག་ནི་སྔོན་འགྲོའི་ལས་རིམ་མོ། །) (གཉིས་པ་དངོས་གཞི་ལ། ལྷ་བསྐྱེད་དྲང་བསྟིམ་ཕྱག་བྱ་ཞིང་། །མཆོད་བསྟོད་ཛཔྲ་བཟླ་རྫོགས་རིམ་མོ། །ཞེས་རྣམ་གྲངས་བདུན་ལས། དང་པོ་ལྷ་བསྐྱེད་པ་ལ། རྒྱུ་ཏིང་ངེ་འཛིན་གསུམ་གྱིས་ཁོག་དབུབ་པ་ནི། ཆོས་ཐམས་ཅད་མི་དམིགས་སྤྲོས་པ་དང་བྲལ་བའི་སྟོང་པ་ཉིད་ཀྱི་ངང་ལ་མཉམ་པར་བཞག་སྟེ།) ཨ༔ ཆོས་རྣམས་ཀུན་གྱི་དེ་བཞིན་ཉིད༔ སྟོང་ཉིད་བསམ་བརྗོད་བྲལ་བ་སྟེ༔ (དེ་ལྟར་མ་རྟོགས་པའི་འགྲོ་བ་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་སྤྲོ་ཞིང་།) ཐུགས་རྗེ་ཀུན་ཏུ་སྣང་བ་ཡིས༔ སེམས་ཅན་ཡོངས་ལ་ཁྱབ་པར་བསྒོམ༔ སྟོང་ཉིད་སྙིང་རྗེ་དབྱེར་མེད་ཀྱི་རང་རྩལ་རིག་པ་ཧྲཱིཿདཀར་པོའི་རྣམ་པར་ལམ་གྱི་གསལ་ལ། སྟོང་ (7ན)ཉིད་སྙིང་རྗེའི་ངང་ཉིད་ལས༔ རང་བྱུང་རྒྱུ་ཡིས་ས་བོན་ཧྲཱིཿ ཨ་འཐས་འཁྲུལ་པའི་ཞེན་པ་བཟློག༔ སྒྱུ་མ་ལྟ་བུའི་ཏིང་འཛིན་བསྐྱེད༔ (དེ་ལས་འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ་ནི།) རང་བྱུང་རྒྱུ་ཡི་ས་བོན་ལས༔ འོད་ཟེར་རྣམ་པ་ལྔ་འཕྲོས་པས༔ ཨེ་ལས་ཆོས་ཀྱི་འབྱུང་གནས་ཏེ༔ ཡྃ་ལས་རླུང་གི་དཀྱིལ་འཁོར་ལྗང་༔ རྃ་ལས་མེ་ཡི་དཀྱིལ་འཁོར་དམར༔ བྃ་ལས་ཆུ་ཡི་དཀྱིལ་འཁོར་དཀར༔ ལྃ་ལས་གསེར་གྱི་ས་གཞི་ལ༔ བཻཌཱུར་བྱེ་མ་པདྨའི་ཚལ༔ མ་རྨོས་ལོ་ཏོག་ཡན་ལག་ི༔ བརྒྱད་ལྡན་ཁྲུས་ཀྱི་རྫིང་བུ་དང་༔ ལྟེང་ཀ་ཆུ་མིག་ཆུ་བོའི་རྒྱུན༔ དལ་གྱིས་འབབ་པའི་འཁོར་དབུས་ནས༔ ཀླུ་རྒྱལ་ཡིད་བཞིན་ནོར་བུ་འབུལ༔ བཟང་པོ་དྲུག་གི་སྨན་དྲི་འཕྲོ༔ དེ་ལྟའི་ཞིང་ཁམས་རྣམ་དག་དབུས༔ མ་ཆགས་སྣ་ཚོགས་པདྨ་སྟེང་༔ ཡི་གེ་བྷྲཱུྃ་གྱི་འཕྲོ་འདུ་ལས༔ ཕོ་བྲང་ལྔ་ལྡན་ཤེལ་ལས་གྲུབ༔ གྲུ་བཞི་སྒོ་བཞི་རྒྱན་བཀོད་མཛེས༔ རྟ་བབས་ཆོས་འཁོར་གདུག་ཏོག་དང་༔ གྲུ་ཆད་བར་ཁྱམས་སྒོ་ཁྱུད་རྫོགས༔ པདྨ་རྡོ་ར་མེ་རིས་བསྐོར༔ ཕྱི་གསལ་ནང་གསལ་དྲི་（7བ）མ་མེད༔ ངོ་མཚར་རྒྱལ་བའི་ཕོ་བྲང་གསལ༔ ཧྲཱིཿ རང་བྱུང་ལྷུན་གྲུབ་གཞལ་ཡས་དབུས༔ པདྨ་སྟོང་ལྡན་ཉི་ཟླའི་སྟེང་༔ རང་རིག་ཧྲཱིཿ ཡིག་དཀར་གསལ་ལས༔ འོད་འཕྲོས་རྒྱལ་ཀུན་མཉེས་མཆོད་ཕུལ༔ འགྲོ་དྲུག་སེམས་ཅན་ལས་སྒྲིབ་སྦྱངས༔ ཚུར་འདུས་ཧྲཱི༔ ཡིག་དཀར་གསལ་ཉིད༔ ཡོངས་གྱུར་འཕགས་མཆོག་ནམ་མཁའི་རྒྱལ༔ སངས་རྒྱས་ཀུན་འདུས་བཅུ་གཅིག་ཞལ༔ སྐུ་མདོག་དཀར་ལ་དམར་བའི་མདངས༔ རྩ་ཞལ་དཀར་པོ་འོད་འཕྲོ་བ༔ སེམས་ཅན་རྣམས་ལ་བརྩེ་བས་གཟིགས༔ གཡས་ལྗང་གཡོན་ནི་དམར་བའི་ཞལ༔ དམྱལ་བ་ཡི་དྭགས་དོང་ནས་སྤྲུགས༔ དེ་སྟེང་དབུས་ཞལ་དམར་པོ་ལ༔ གཡས་སེར་གཡོན་ནི་ལྗང་བའི་ཞལ༔ ལྷ་མིན་མི་དང་དུད་འགྲོ་ཀུན༔ རྒྱུ་དྲུག་ལམ་དགག་ཐར་ལམ་འདྲེན༔ དེ་སྟེང་དབུས་ཞལ་ལྗང་གུ་ལ༔ གཡས་དཀར་གཡོན་ནི་དམར་བའི་ཞལ༔ ལྷ་ཡི་སྐྱེ་བ་ཀུན་དགག་ནས༔ ཐམས་ཅད་བདེ་ཆེན་གནས་སུ་སྒྲོལ༔ དེ་སྟེང་ཁྲོ་ཞལ་དུད་ཀ་རྔམས༔ སྐྱེ་འགྲོ་ཀུན་འོད་ས་ལ་སྤོར༔ དེ་སྟེང་བླ་མ་འོད་དཔག་མེད༔ ལི་ཁྲིའི་（8ན）མདངས་ལྡན་བརྩེ་བའི་ཞལ༔ འགྲོ་དྲུག་པདྨ་ཅན་དུ་འགོད༔ ཆོས་སྐུ་རྩ་བའི་ཕྱག་བཞི་ལས༔ དང་པོས་ཐལ་སྦྱར་དབང་རྒྱལ་བསྣམས༔ འོག་གཡས་ཤེལ་དཀར་ཕྲེང་བ་དང་༔ གཡོན་པས་པདྨ་དཀར་པོ་འཛིན༔ ལོངས་སྐུའི་ཡན་ལག་ཉི་ཤུ་ཡི༔ གཡས་ཀྱི་ཕྱག་བཅུས་རིམ་པ་བཞིན༔ རྒྱ་གྲམ་རྡོ་རྗེ་རིན་པོ་ཆེ༔ པདྨ་རལ་གྲི་འཁོར་ལོ་དང་༔ ཨུཏྤལ་ཉི་ཟླ་པད་ཆུན་བསྣམས༔ གཡོན་གྱི་ཡན་ལག་ཕྱག་བཅུ་ན༔ ཤེས་རབ་རལ་གྲི་པུསྟ་ཀ༔ ཤེལ་ཕྲེང་སྣ་ཚོགས་རྡོ་རྗེ་དྲིལ༔ སྤྱི་བླུགས་བུམ་པ་མཁར་གསིལ་དང༔ ལྷུང་བཟེད་མཆོད་རྟ་ལེགས་པར་འཛིན༔ སྤྲུལ་སྐུའི་ཉིང་ལག་སྟོང་རྩ་གཉིས༔ མཆོག་སྦྱིན་ཕྱག་རྒྱར་ལྡན་པ་ཡི༔ ཕྱག་མཐིལ་ཞི་བའི་སྤྱན་རེ་རེ༔ འཁོར་ལོས་སྒྱུར་བའི་རྒྱལ་པོ་དང་༔ སྤྲུལ་པའི་སངས་རྒྱས་སྟོང་རྩའི་ཚུལ༔ ཞབས་བཞི་དྲང་པོར་གཤིབས་ཏེ་བཞེངས༔ རི་དྭགས་ལྤགས་པས་ནུ་གཡོན་བཀབ༔ རིགས་བཞིའི་སྦྲུལ་ཆུན་དར་ཤམ་མཛེས༔ རིན་ཆེན་དབུ་རྒྱན་སྙན་ཆ་དང་༔ ཕྱག་གདུབ་ཞབས་གདུབ་དོ་ཤལ་（8བ）སོགས་༔ ལོངས་སྤྱོད་ཆས་རྫོགས་གཟི་འོད་འབར༔ ཡུམ་ཆེན་གསང་ཡེ་དྷཱ་ཀི་ནཱི༔ དམར་མོ་ཞལ་གསུམ་ཕྱག་དྲུག་མ༔ ཁྲོ་འཛུམ་གཡས་དཀར་གཡོན་སྔོ་ཞལ༔ རྩ་ཕྱག་ཌཱ་དྲིལ་འཛིན་པས་འཁྱུད༔ གཡས་གཉིས་གྲི་གུག་ཁ་ཊྭཱྃ་ཀ༔ གཡོན་གཉིས་ནོར་བུ་ཐོད་ཁྲག་བསྣམས༔ ཞབས་གཉིས་ཡབ་ལ་དགྱེས་སྦྱོར་འཁྲིལ༔ དབུ་སྐྲ་མཐོན་མཐིང་ནོར་བུས་བརྒྱན༔ དར་དང་རིན་ཆེན་རུས་རྒྱན་སྤྲས༔ འཇའ་ཟེར་འོད་ལྔའི་ཀློང་དུ་གསལ༔ ཕྱི་རིམ་པདྨ་འདབ་བཞི་ལ། །ཤར་དུ་ཏཱྃ་ལས་སྒྲོལ་མ་ནི། ལྗང་སྔོན་མཆོག་སྦྱིན་ཨུཏྤལ་འཛིན། །ལྷོ་རུ་ཨོཾ་ལས་ནོར་འཛིན་སྲས། །དཀར་གསལ་པད་ཕྲེང་ནོར་བུ་བསྣམས། །ནུབ་ཏུ་ཏཱྃ་ལས་ཚེ་འཕེལ་མ། །དཀར་མོ་མཆོག་སྦྱིན་ཚེ་བུམ་བསྣམས། །བྱང་དུ་ཨཱ༔ ལས་གསང་སྔགས་འཛིན། །དམར་མོ་པད་ཕྲེང་ཚེ་བུམ་བསྣམས། །ལོངས་སྤྱོད་རྒྱན་རྫོགས་ཕྱེད་སྐྱིལ་བཞུགས། །དེ་ཕྱིར་པདྨའི་འདབ་མ་ལ། །ཤར་དུ་མི་བསྐྱོད་མཱ་ཀི་མཐིང་། །རྡོ་རྗེ་བུམ་འཛིན་གཉིས་མེད་འཁྲིལ། །ལྷོ་རུ་རིན་འབྱུང་སྤྱན་མ་སེར། །རིན་ཆེན་བུམ་འཛིན་གཉིས་མེད་འཁྲིལ། །ནུབ་ཏུ་སྣང་མཐའ་（9ན）གོས་དཀར་དམར། །པདྨ་བུམ་འཛིན་གཉིས་མེད་འཁྲིལ། །བྱང་དུ་དོན་གྲུབ་སྒྲོལ་མ་ལྗང་། །རྒྱ་གྲམ་བུམ་འཛིན་གཉིས་མེད་འཁྲིལ ། དབུས་མདུན་རྣམ་སྣང་དབྱིངས་ཕྱུག་དཀར། འཁོར་ལོ་བུམ་འཛིན་གཉིས་མེད་འཁྲིལ། །ཀུན་ཀྱང་ལོངས་སྐུའི་ཆ་ལུགས་ཅན། །རྡོ་རྗེའི་སྐྱིལ་ཀྲུང་པད་ཟླར་རོལ། །དེ་ཡི་ཕྱི་རིམ་འདབ་བརྒྱད་ལ། །ཤར་དུ་ས་སྙིང་མྱུ་གུ་དཀར། །ལྷོ་རུ་ནམ་སྙིང་རལ་གྲི་མཐིང་། །ནུབ་ཏུ་སྤྱན་གཟིགས་པད་འཛིན་དཀར། །བྱང་དུ་ཕྱག་རྡོར་རྡོ་རྗེ་ལྗང་། །ཤར་ལྷོར་བྱམས་པ་སྤྱི་བླུགས་སེར། །ལྷོ་ནུབ་ཀུན་བཟང་མྱུ་གུ་མཐིང་། །ནུབ་བྱང་སྒྲིབ་སེལ་པོ་ཏི་དཀར། །བྱང་ཤར་འཇམ་དཔལ་རལ་གྲི་དམར། །ལོངས་སྤྱོད་རྒྱན་རྫོགས་སེམས་སྐྱིལ་བཞུགས། །དེ་ཕྱིར་པདྨ་འདབ་བརྒྱད་ལ། །ཤར་དུ་ལཱ་སྱ་མེ་ལོང་དཀར། །ལྷོ་རུ་མཱ་ལྱ་ཕྲེང་ཐོགས་སྔོ། །ནུབ་ཏུ་གྰིརྟི་པི་ཝཾ་དམར། །བྱང་དུ་ནི་རྟི་ཅོད་པན་ལྗང་། །ཤར་ལྷོར་པུཥྤེ་ཕྲེང་བ་སྔོ། །ལྷོ་ནུབ་དྷུ་པེ་དམར་སེར་སྤོས། །ནུབ་བྱང་ཨཱ་ལོ་མར་མེ་དམར། །བྱང་ཤར་གནྡྷེ་དྲི་ཆབ་ལྗང་། །ཕྱེད་སྐྱིལ་དར་དང་རིན་ཆེན་བརྒྱན། །དེ་ཕྱིར་པདྨ་འདབ་（9བ）དྲུག་ལ། །ཤར་དུ་བརྒྱ་བྱིན་པི་ཝཾ་དཀར། །ཤར་ལྷོར་ཐག་བཟང་གོ་ཆ་སྔོ། །ལྷོ་རུ་ཤཱ་ཐུབ་གསེག་པར་སེར། །ནུབ་ཏུ་སེང་རབ་པོ་ཏི་ལྗང་། །བྱང་དུ་ཁ་འབར་སྒྲོམ་བུ་དམར། །བྱང་ཤར་ཆོས་རྒྱལ་མེ་ཆུ་ནག །ཀུན་ཀྱང་མཚན་དང་དཔེ་བྱད་རྫོགས། །ཆོས་གོས་གསུམ་གསོལ་སྤྲུལ་སྐུའི་ཆས། །བཞེངས་སྟབས་འབྱོན་ཚུལ་ཀྲོང་ངེར་བཞུགས། །དཀྱིལ་འཁོར་ཆེན་པོའི་སྒོ་བཞི་རུ། །ཤར་དུ་མི་གཡོ་སྟོབས་ཆེན་སྔོ། །ལྷོ་རུ་གཤིན་རྗེ་གཤེད་པོ་སེར། །ནུབ་ཏུ་དབང་ཆེན་རྟ་མགྲིན་དམར། །བྱང་དུ་བདུད་རྩི་འཁྱིལ་བ་ལྗང་། །གཡས་རྣམས་རྡོ་རྗེ་ཐོད་དབྱུག་དང་། །པད་དབྱུག་རྡོ་རྗེ་རྒྱ་གྲམ་ཕྱར། །གཡོན་རྣམས་བྷཉྗ་ཁྲག་བཀང་འཛིན། །འདོར་སྟབས་པད་ཉིར་བདུད་བཞི་བརྫིས། །ཁྲོ་བོའི་ཆས་ལྡན་མེ་དཔུང་འཁྲུགས། །ཕྱི་རོལ་བར་ཁྱམས་ཁོར་ཡུག་ལ༔ བདག་སྐྱོབ་ལྷ་དང་རིག་འཛིན་དང་༔ མཁའ་འགྲོ་ཆོས་སྐྱོང་དམ་ཅན་རྣམས༔ རང་རང་རྒྱན་དང་ཆ་ལུགས་ལྡན༔ དཔག་མེད་ཆར་སྤྲིན་གཏིབས་བཞིན་གསལ༔ ལྷ་ཚོགས་དེ་དག་ཐམས་ཅད་ཀྱང་༔ ཨ་འཐས་དངོས་གཟུགས་མ་ཡིན་པར༔ ཆུ་ཟླ་དང་ནི་འཇའ་ཚོན་ལྟར༔ སྣང་（10ན）ལ་རང་བཞིན་མེད་པར་གྱུར༔ （ཅེས་དམ་ཚིག་གི་དཀྱིལ་འཁོར་གསལ་བཏབ་ལ།） ལྷ་ཚོགས་རྣམས་ཀྱི་སྤྱི་མགྲིན་སྙིང་གར་ཨོཾ་ཨཱ༔ ཧཱུྃ་གིས་མཚན་པ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསུམ་གྱི་རང་བཞིན་དུ་（མོས་ཏེ།） ཨོཾ་ཨཱ༔ ཧཱུྃ་（གིས་རྒྱས་གདབ།） སླར་ཡང་ཐུགས་ཀའི་ཧྲཱིཿ ལས་འོད་འཕྲོས་པས༔ ཕྱོགས་བཅུའི་སངས་རྒྱས་རྒྱལ་བ་རིགས་ལྔ་ཡིས༔ དབང་བསྐུར་བྱིན་བརླབས་ཆུ་ལྷག་ཡར་ལུད་པས༔ རིགས་བདག་འོད་དཔག་མེད་ཀྱིས་དབུ་བརྒྱན་གྱུར༔ ཧྲཱིཿཧཱུྃ་ཏྲཱྃ་ཨོཾ་ཨཱ༔ ཨ་བྷི་ཥིཉྩ་ཧཱུྃ༔ （ཞེས་དབང་བསྐུར་ཞིང་བྱིན་གྱིས་བརླབ་བོ། །） （གཉིས་པ་སྤྱན་འདྲེན་ཅིང་བསྟིམ་པ་ནི།）རང་ཉིད་དམ་ཚིགས་སེམས་དཔའི་གནས་གསུམ་ལས་འོད་ཟེར་འཕྲོས་པས་རང་བཞིན་གྱི་གནས་མཆོག་པོ་ཏ་ལ་ནས་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་སྤྱན་དྲངས་པར་（བསམ་ལ། བདུད་རྩི་ལྔ་དང་སྦྱར་བའི་སྤོས་བཏུལ་ཞིང་རོལ་མོ་སྣ་ཚོགས་ཀྱི་སྒྲ་དང་བཅས་ཏེ།） ཧྲཱིཿ མ་ལུས་སེམས་ཅན་ཀུན་གྱི་མགོན་གྱུར་ཅིང་༔ བདུད་སྡེ་དཔུང་བཅས་མི་བཟད་འཇོམས་མཛད་ལྷ༔ དངོས་རྣམས་མ་ལུས་ཇི་བཞིན་མཁྱེན་གྱུར་པའི༔ （10བ）བཅོམ་ལྡན་འཁོར་བཅས་གནས་འདིར་གཤེགས་སུ་གསོལ༔ འཕགས་མཆོག་ཐུགས་རྗེ་ཆེན་པོ་ནམ་མཁའི་རྒྱལ༔ ཆོས་ཀྱི་དབྱིངས་ནས་འགྲོ་བའི་དོན་ཕྱིར་དུ༔ གཟུགས་ཀྱི་སྐུར་བཞེངས་ཕོ་བྲང་གཞལ་ཡས་འདིར༔ འཁོར་བ་དོང་ནས་སྤྲུགས་ཕྱིར་གཤེགས་སུ་གསོལ༔ འཕགས་མ་དུས་གསུམ་སངས་རྒྱས་ཀུན་གྱི་ཡུམ༔ ནོར་འཛིན་གསང་འཛིན་སྒྲོལ་མ་དཀར་སྔོན་དང༔ རྒྱལ་བ་རིགས་ལྔ་སེམས་དཔའ་ལྕམ་དྲལ་རྣམས༔ འཁོར་བ་དོང་ནས་སྤྲུགས་ཕྱིར་གཤེགས་སུ་གསོལ༔ འགྲོ་དྲུག་དོན་མཛད་སྤྲུལ་སྐུ་ཐུབ་པ་དྲུག༔ གང་ལ་གང་འདུལ་སྣ་ཚོགས་ཐབས་སྤྲུལ་པ༔ སངས་རྒྱས་སྟོང་རྩ་རྒྱལ་བ་འཁོར་བཅས་རྣམས༔ འཁོར་བ་དོང་ནས་སྤྲུགས་ཕྱིར་གཤེགས་སུ་གསོལ༔ སྒོ་སྐྱོང་ཁྲོ་བོ་ལྷ་དང་རིག་འཛིན་དང་༔ དཔའ་བོ་མཁའ་འགྲོ་དམ་ཅན་སྲུང་མའི་ཚོགས༔ རྒྱལ་ཆེན་སྡེ་བཞི་ནོར་ལྷ་རྒྱ་མཚོར་བཅས༔ འཁོར་བ་དོང་ནས་སྤྲུགས་ཕྱིར་གཤེགས་སུ་གསོལ༔ སརྦ་མ་ཧཱ་གུ་རུ་ཨཱརྱ་ལོ་ཀི་ཤྭ་ར་ག་ག་རཱ་ཛ་གུཧྱ་ཛྙཱ་ན་དྷཱ་ཀི་ནྰྀ་ས་པ་རི་ཝཱ་ར་ཨེ་ཨཱ་རལླི་ཧྲིཾ་ཧྲིཾ་ཕེཾ་ཕེཾ༔ （ཞེས་ལྷ་ཚོགས་རྣམས་ཆོས་ཀྱི་སྐུའི་ཀློང་（11ན）ནས་སད་དེ་ཐུགས་རྗེ་གཟུགས་སྐུའི་རོལ་པ་ནམ་མཁའ་གང་བར་སྤྱན་དྲངས་ལ།） ཧྲཱིཿརྣམ་དག་ལྷུན་གྲུབ་གཞལ་ཡས་འདིར༔ པདྨ་ཉི་ཟླའི་གདན་སྟེངས་སུ༔ ཐུགས་རྗེ་ཆེན་པོའི་ལྷ་ཚོགས་རྣམས༔ དགྱེས་ཤིང་མི་གཡོ་བརྟན་པར་བཞུགས༔ ས་མ་ཡ་ཏིཥྛ་ལྷན༔ （ཞེས་དམ་ཚིག་པ་དང་དབྱེར་མེད་དུ་བཞུགས་པར་བསམ།） གསུམ་པ་ཕྱག་བྱ་བ་ནི། ངོ་མཚར་བའི་ཡོན་ཏན་ལ་རབ་ཏུ་གུས་པའི་བློས། ཧྲཱིཿ དུས་གསུམ་རྒྱལ་བ་ཐམས་ཅད་ཀྱི༔ སྐུ་གསུང་ཐུགས་ཡོན་རིན་པོ་ཆེ༔ ཐུགས་རྗེ་ཆེན་པོའི་ལྷ་ཚོགས་ལ༔ གཉིས་སུ་མེད་པར་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོཿ （ཞེས་ཕྱག་བྱའོ། །བཞི་པ་མཆོད་པ་ལ། སྤྱི་དང་བྱེ་བྲག་ཁྱད་པར་གྱི་མཆོད་པ་དང་གསུམ་གྱི། དང་པོ་སྤྱིར་མཆོད་པ་ལ། ཆུ་གཉིས་ཉེར་སྤྱོད་ལྔ་རོལ་མོར་བཅས་འབུལ་བ་ནི། རང་གི་ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་འཕྲུལ་དགའི་འདོད་ཡོན་ལྟར་མཆོད་པར་བསམ་ལ།） འཇིག་རྟེན་འདི་འམ་འཇིག་རྟེན་གཞན་དག་ན། །ཡན་ལག་བརྒྱད་ལྡན་འོ་མ་དང་འདྲེས་པའི། །མཆོད་ཡོན་རྣམ་པ་ཇི་སྙེད་ཡོད་པ་ཀུན། །རྒྱལ་བ་རྒྱ་མཚོའི་ཚོགས་ལ་དབུལ་བར་བགྱི། །ཨོཾ་ཨཱརྱ་ལོ་ཀི་ཤྭ་ར་དྷ་ཀི་ནཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་（11བ）ཧཱ། །འཇིག་རྟེན་འདི་འམ༴ ཆུ་གཙང་དྲི་མེད་མེ་ཏོག་དང་བཅས་པའི། །ཞབས་བསིལ༴ རྒྱལ་བ་རྒྱ་མཚོའི༴ པཱདྱཾ༴ འཇིག་རྟེན༴ ཆུ་དང་ཐང་སྐྱེས་ཡིད་ལས་བྱུང་བ་ཡི། །མེ་ཏོག་རྣམ་པ༴ རྒྱལ་བ་རྒྱ་མཚོའི༴ པུཥྤེ༴ འཇིག་རྟེན༴ ལྷན་ཅིག་སྐྱེས་དང་ཡོངས་སུ་སྦྱར་བ་ཡི། །བདུག་སྤོས༴ རྒྱལ་བ་རྒྱ་མཚོའི༴ དྷུ་པེ༴ འཇིག་རྟེན༴ རིན་ཆེན་ཟླ་སྒྲོན་མེ་ལ་སོགས་པའི། །སྣང་གསལ་རྣམ་པ༴ རྒྱལ་བ༴ ཨཱ་ལོ་ཀེ༴ འཇིག་རྟེན༴ ག་བུ་ར་ཙན་དན་གུར་གུམ་སོགས་སྦྱར་བའི། །དྲི་ཆབ་རྣམ་པ༴ རྒྱལ་བ་རྒྱ་མཚོའི༴ གནྔྷེ༴ འཇིག་རྟེན༴ བཟའ་དང་བཏུང་བའི་བྱེ་བྲག་མཐའ་ཡས་པའི། །ཞལ་ཟས་རྣམ་པ༴ རྒྱལ་བ་རྒྱ་མཚོའི༴ ནཻདྱ༴ འཇིག་རྟེན༴ གླུ་དབྱངས་ཡིད་འཕྲོག་སྙན་འགྱུར་དང་ལྡན་པའི། །རོལ་མོ་རྣམ་པ༴ རྒྱལ་བ་རྒྱ་མཚོའི༴ ཤཔྡ༴ （རིན་ཆེན་བདུན་འབུལ་བ་ནི། །）ལྷ་རྫས་ལས་བྱས་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཅིང་མུ་ཁྱུད་རབ་མཉམ་བཟང་། །སྡང་བའི་དགྲ་ལས་རྣམ་པར་རྒྱལ་གྱུར་པའི། །འཁོར་ལོ་རིན་ཆེན་དམ་པ་འབུལ་བར་བགྱི། །ཨོཾ་ཙཀྲ་（12ན）རཏྣ་བཛྲ་པཱུ་ཛི་ཏེ་ཨཱ༔ ཧཱུྃ། །རིན་ཆེན་ངོ་བོ་ལྷ་རྫས་བཻ་ཌཱུརྻ། །ཀུན་ཏུ་དཔག་ཚད་ཙམ་དུ་སྣང་བྱེད་ཅིང་། །དྲི་མེད་ཉིན་མོ་ཇི་བཞིན་མཚན་དེ་བཞིན། ནོར་བུ་རིན་ཆེན་དམ་པ་དབུལ་བར་བགྱི། །ཨོཾ་མ་ཎི་རཏྣ་བཛྲ༴ གཟུགས་མཛེས་ལྟ་ན་སྡུག་ཅིང་ཚུལ་བཟང་མ། །པགས་པའི་མདོག་ལེགས་འཇམ་ཞིང་དྲི་མཆོག་ལྡན། །ཡིད་འོང་འོད་དགུའི་རེག་བྱ་དང་ལྡན་པའི། །བཙུན་མོ་རིན་ཆེན་དམ་པ་དབུལ་བར་བགྱི། ཨོཾ་སྟི་རཏྣ༴ གང་ཡང་རྒྱལ་བ་མུ་ཏིག་མདངས་ལྡན་པས། །གསེར་སོགས་མང་པོ་ཐུབ་ལ་དབུལ་བ་ལྟར། །བཟོད་ལྡན་མཚུངས་པའི་ཁྱིམ་བདག་ནོར་ལྡན་པ ། བློན་པོ་རིན་ཆེན་དམ་པ་འབུལ༴ ། ཨོཾ་པུ་རུ་ཥ་རཏྣ༴ ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཅན་རི་འདྲ་གླང་པོ་ཆེ། །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན་དམ་པ་དབུལ་བར་བགྱི། །ཨོཾ་ཧསྟི་རཏྣ༴ ཐོ་རངས་དུས་སུ་ཕྱོགས་རྣམས་མ་ལུས་པའི། །ས་རྣམས་བསྐོར་ཞིང་སླར་ཡང་ཡང་ལྡོག་བྱེད་ཅིང་། །རྨ་བྱའི་མགྲིན་པའི་སྤུ་ལྟར་ཡིད་འོང་（12བ）བའི། །རྟ་མཆོག་རིན་ཆེན་དམ་པ་དབུལ་བར་བགྱི། ཨོཾ་ཨ་ཤྭ་རཏྣ༴ འགྲོ་དང་ལྡོག་དང་ཀུན་ནས་འོང་གྱུར་པའི། །མ་ལུས་བདུད་དཔུང་འཇོམས་པར་བྱེད་པ་ལ། །དཔའ་བརྟན་འབྱོར་པའི་དཔུང་དང་བཅས་པ་ཡི། །དམག་དཔོན་རིན་ཆེན་དམ་པ་དབུལ་བར་བགྱི། །ཨོཾ་ཁཏྒ་རཏྣ་བཛྲ་པཱུ་ཛི་ཏེ་ཨཱ༔ ཧཱུྃ། （འདོད་ཡོན་ལྔ་འབུལ་བ་ནི།） ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པས། །མོས་བློས་རྒྱལ་བ་སྲས་བཅས་ལ་འབུལ་ན། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །ཨོཾ་རཱུ་པ་ཀཱ་མ་གུ་ཎ་བཛྲ་པཱུ་ཛ་ཏི་ཨཱ༔ ཧཱུྃ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་བརྗོད་སྒྲ་སྙན་ཡིད་འོང་ལྡན། །མོས་བློས་རྒྱལ་བཞེས་ཤིག༴ ཨོཾ་ཤཔྡ་ཀཱ་མ༴ ཕྱོགས་དུས་ཀུན་ན་ཙན་དན་སྦྲུལ་སྙིང་དང་། །ཨ་གར་ལ་སོགས་དབང་པོ་ཚིམ་བྱེད་དྲི། །མོས་བློས༴ བཞེས་ཤིག༴ ཨོཾ་གནྡྷེ་ཀཱ་མ༴ ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་པ། །མོས་བློས༴ བཞེས་ཤིག༴ ཨོཾ་ར་ས་ཀཱ་མ་གུ༴（13ན）ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་དབང་པོ་ཚིམ་བྱེད་པ། །མོས་བློས༴ བཞེས་ཤིག༴ ཨོཾ་སྤརྴེ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱ༔ ཧཱུྃ། （རྫས་བརྒྱད་འབུལ་བ་ནི།） ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་ཀུན་དངོས་སྤྱན་རས་གཟིགས་དབང་ལ། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། །ཨོཾ་ཨཥྚ་མངྒ་ལ་བཛྲ་པཱུ་ཛི་ཏེ་ཨཱ༔ ཧཱུྃ། （རིག་མ་བཅུ་དྲུག་འབུལ་བ་ནི།） ཀུན་ཏུ་དགའ་བ་ཉམས་བཞིའི་རྣམ་འགྱུར་ཅན། །རྡོ་རྗེ་པི་ཝཾ་གླིང་བུ་རྔ་ཐབས་བཟུང་། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བས་འཁོར་ལོར་མཆོད། ཨོཾ་ཨཱ༔ བཛྲ་ཝི་ནི་ཧཱུྃ། ཨོཾ་ཨཱ༔ བཛྲ་ཝཾ་སེ་ཏྲཱྃ། ཨོཾ་ཨཱ༔ བཛྲ་མེ་དཾ་གེ་ཧྲཱིཿ ཨོཾ་ཨཱ༔ བཛྲ་མུ་ར་ཛེ་ཨཱ༔ མཆོག་ཏུ་དགའ་བ་ཉམས་བཞིའི་རྣམ་འགྱུར་ཅན། །རྡོ་རྗེ་སྒེག་བཞད་གླུ་དང་གར་མཁན་མ། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བས་འཁོར་ལོར་མཆོད། །（13བ）ཨོཾ་ཨཱ༔ བཛྲ་ལཱ་སྱ་ཧཱུྃ། ཨོཾ་ཨཱ༔ བཛྲ་ཧ་སྱ་ཏྲཱྃ། ཨོཾ་ཨཱ༔ བཛྲ་གཱིརྟི་ཧྲཱིཿ ཨོཾ་ཨཱ༔ བཛྲ་ནཱི་རྟི་ཨཱ༔ ཁྱད་པར་དགའ་བ་ཉམས་བཞིའི་རྣམ་འགྱུར་ཅན། །མེ་ཏོག་བདུག་སྤོས་སྣང་གསལ་དྲི་ཆབ་མ། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའི་རབ་འབྱམས་གང་བས་འཁོར་ལོར་མཆོད། ཨོཾ་ཨཱ༔ བཛྲ་པུཥྤེ་ཧཱུྃ། ཨོཾ་ཨཱ༔ བཛྲ་དྷུ་པེ་ཏྲཱཾ། ཨོཾ་ཨཱ༔ བཛྲ་ཨཱ་ལོ་ཀེ་ཧྲཱིཿ ཨོཾ་ཨཱ༔ བཛྲ་གནྡྷེ་ཨཱ༔ ལྷན་སྐྱེས་དགའ་བ་ཉམས་བཞིའི་རྣམ་གྱུར་ཅན། །གཟུགས་རེག་རོ་དང་ཆོས་དབྱིངས་རྡོ་རྗེ་མ། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བས་འཁོར་ལོར་མཆོད། ཨོཾ་ཨཱ༔ བཛྲ་རཱུ་པ་ཧཱུྃ། ཨོཾ་ཨཱ༔ བཛྲ་ར་ས་ཏྲཱཾ། ཨོཾ་ཨཱ༔ བཛྲ་སྤརྴེ་ཧྲཱིཿ ཨོཾ་ཨཱ༔ བཛྲ་དྷརྨ་དྷཱ་ཏུ་ཨཱ༔ （ན་བཟའ་འབུལ་བ་ནི།） སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱོང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཨོཾ་བཛྲ་ཝས་སེ་པྲ་ཏཱིཙྪ་སྭཱཧཱ། （རྒྱན་སྣ་ཚོགས་འབུལ་བ་ནི།） རྒྱལ་བ་མཚན་དཔེའི་རང་བཞིན་རྒྱན་ལྡན་（14ན）ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང་། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་མཆོག་ཐོབ་པར་ཤོག །ཨོཾ་རཏྣ་ཨ་ལཾ་ཀ་ར་ཡེ་སྭཱཧཱ། （གཉིས་པ་བྱེ་བྲག་ཏུ་མཆོད་པ་ལས། དྲག་པོའི་མཆོད་པ་ནི། རང་བྱུང་ནང་གི་དམ་རྫས་ཀྱི་འདོད་ཡོན་ཆེན་པོས་དགྱེས་པ་མཆོག་ཏུ་བསྐྱེད་པར་བསམ་ཞིང་།）ཧྲཱིཿ འཕགས་པའི་ལྷ་ཚོགས་འཁོར་བཅས་ལ༔ རང་བྱུང་ནང་མཆོད་འབུལ་བ་ནི༔ དབང་པོ་རྣམ་ལྔའི་མེ་ཏོག་མཆོད༔ གསུར་ཆེན་བདུག་སྤོས་དྲི་ཡིས་མཆོད༔ ཞུན་ཆེན་སྣང་གསལ་མར་མེས་མཆོད༔ རྡོ་རྗེ་དྲི་ཆུའི་བྱུག་པས་མཆོད༔ བདུད་རྩི་དྲི་ཆེན་ཞལ་ཟས་མཆོད༔ རྐང་གླིང་ཐོད་པའི་རྔ་སྒྲས་མཆོད༔ དུག་གསུམ་སྐུ་གསུང་ཐུགས་སུ་མཆོད༔ དུག་ལྔ་ཡེ་ཤེས་ལྔ་རུ་མཆོད༔ སྣང་སྲིད་ཕྱག་རྒྱ་བཞི་རུ་མཆོད༔ གཉིས་སུ་མེད་པར་ཐིམ་གྱུར་ཅིག༔ ཨཱརྱ་ལོ་ཀི་ཤྭ་ར་དྷཱ་ཀི་ནཱི་ས་པ་རི་ཝཱ་ར་མ་ཧཱ་པཉྩ་པཱུ་ཛ་ཧོཿ （བདུད་རྩིའི་མཆོད་པ་ནི། སྨན་བདུད་རྩིའི་རྒྱ་མཚོ་ལས་མཐེབ་སྲིན་ཉི་ཟླའི་གྭའུས་བཅུས་ཏེ་ཕུལ་བས་ཟག་མེད་ཀྱི་རོས་ཚིམ་པར་བསམ་ཞིང་།） ཧྲཱིཿ རྩ་བརྒྱད་སྟོང་སྦྱར་ཨ་མྲྀ་ཏ༔ འཆི་（14བ）མེད་གསང་བའི་བདུད་རྩི་འདིས༔ ཐུགས་རྗེ་ཆེན་པོའི་ལྷ་ཚོགས་མཆོད༔ བརྩེར་དགོངས་དབང་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ （ཞེས་དང་།） རང་བྱུང་ཆོས་སྐུ་རྒྱལ་བའི་འོད་དཔག་མེད ། ལོངས་སྤྱོད་ཡོངས་རྫོགས་ཐུགས་རྗེ་སྤྱན་རས་གཟིགས། །སྤྲུལ་པའི་སྐུ་མཆོག་མཚོ་སྐྱེས་རྡོ་རྗེ་ལ། །སྨན་མཆོད་འབུལ་ལོ་དབང་བྱིན་དངོས་གྲུབ་སྩོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། དྷཱ་ཀིའི་གཙོ་མོ་དབྱིངས་ཕྱུག་མཁར་ཆེན་བཟའ། །འཇམ་དཔལ་དབྱངས་དངོས་ཚངས་པ་ལྷའི་མེ་ཏོག །གྲུབ་པའི་ཁྱུ་མཆོག་འབྲོག་བན་ལོ་ཙཱ་ལ། །སྨན་མཆོད༴ སརྦ༴ ཟབ་གཏེར་མངའ་བདག་བདུད་འདུལ་ནུས་ལྡན་རྩལ། །བཀའ་བབས་ཆོས་བདག་རྩ་བརྒྱུད་རིག་པ་འཛིན། །རིགས་ཀུན་ཁྱབ་བདག་དྲིན་ཅན་བླ་མ་ལ། །སྨན་མཆོད༴ སརྦ༴ ལྷག་པའི་ལྷ་མཆོག་འཕགས་པ་ནམ་མཁའི་རྒྱལ། །ཡབ་ཡུམ་སྤྲུལ་འཁོར་བཀའ་སྡོད་ཆོས་སྐྱོང་ཚོགས། །སྣང་སྲིད་རྒྱལ་བའི་དཀྱིལ་འཁོར་ཆེན་པོ་ལ། །སྨན་མཆོད༴ སརྦ༴ （ཞེས་ཕུལ་ལ།） ཨོཾ་ཨཱ༔ ཧཱུྃ་（གིས་དངོས་གྲུབ་བླང་། རཀྟའི་མཆོད་པ་ནི། འཁོར་བ་ཁྲག་གི་རྒྱ་（15ན）མཚོ་ཕུལ་བས་ཆགས་མེད་བདེ་ཆེན་གྱི་ངོ་བོར་རོལ་པར་བསམ་ཞིང་།）ཧྲཱི༔ སྲིད་གསུམ་གདུག་པ་བསྒྲལ་བའི་ཁྲག༔ འཁོར་འདས་མཉམ་ཉིད་བྷནྡྷར་བསྐྱིལ༔ བདེ་ཆེན་རཀྟའི་མཆོད་པ་ཡིས༔ ཐུགས་རྗེ་ཆེན་པོའི་ཐུགས་དམ་བསྐང་༔ མ་ཧཱ་ཏཀྟ་ཁཱ་ཧི༔ （གཏོར་མའི་མཆོད་པ་ནི། སྣོད་བཅུད་དམ་རྫས་གཏོར་མའི་འདོད་ཡོན་དུ་སྤེལ་བ་ཕུལ་བས་ཐུགས་དམ་ཡོངས་སུ་བསྐངས་པར་བསམ་ཞིང་།） ཧྲཱིཿ སྣོད་དང་བཅུད་དུ་རབ་ལྡན་ཅིང་༔ རྫས་སྡུགས་ཏིང་འཛིན་འཕྲོ་འདུ་ཡིས༔ བཟང་པོར་བྱས་པའི་གཏོར་མ་འདིས༔ ཐུགས་རྗེ་ཆེན་པོའི་ལྷ་ཚོགས་མཆོད༔ ཐུགས་དམ་བསྐང་ཕྱིར་བཞེས་སུ་གསོལ༔ མ་ཧཱ་བ་ལིཾ་ཏ་ཁཱ་ཧི༔ （གསུམ་པ་ཁྱད་པར་གྱི་མཆོད་པ་ལས། སྦྱོར་བའི་མཆོད་པ་ནི། ཡབ་ཡུམ་ཐབས་ཤེས་གཉིས་སུ་མེད་པར་སྦྱོར་བའི་བདེ་ཆེན་བྱང་ཆུབ་སེམས་ཀྱི་རོལ་མོས་དགྱེས་པར་བསམ་ཞིང་།） ཧྲཱིཿ སྣང་སྲིད་ཐབས་ཤེས་ཡབ་ཡུམ་ནི༔ དོན་དམ་འཁོར་འདས་གཉིས་མེད་སྦྱོར༔ གཉིས་མེད་བྱང་ཆུབ་སེམས་ཀྱི་རྒྱུས༔ རྒྱལ་བ་ཡབ་ཡུམ་མཉེས་གྱུར་ཅིག༔ ཛཿཧཱུྃ་ཧོཿ པདྨ་ཡོ་གི་ནི་མུ་དྲ་པྲ་བེ་ཤ་ཡ་ཕཊ （བསྒྲལ་བའི་མཆོད་པ་ནི། ཤེས་རབ་རིག་པའི་མཚོན་གྱིས་མཚན་འཛིན་འཁོར་བའི་ཆོས་ཐམས་（15བ）ཅད་དབྱིངས་སུ་བསྒྲལ་བར་བསམ་ཞིང་།） ཧྲཱིཿ སྟོང་ཉིད་དོན་རྟོགས་བློ་ཡིས་ནི༔ སྣང་སྲིད་འཁོར་འདས་གཅིག་ཏུ་བསྒྲལ༔ བློ་ངན་འཁོར་བ་རྒྱུན་བཅད་དེ༔ རྒྱལ་བའི་ཐུགས་དམ་བསྐང་གྱུར་ཅིག༔ མ་ཏྲཾ་རུ་ཏྲ་པྲ་བེ་ཤ་ཡ་ཕཊ༔ （དེ་ཁོ་ན་ཉིད་ཀྱི་མཆོད་པ་ནི། དོན་དམ་པར་འཁོར་གསུམ་ཡོངས་དག་ཆོས་ཉིད་བསམ་གྱིས་མི་ཁྱབ་པའི་ཡེ་ཤེས་སུ་རོ་མཉམ་པར་བལྟས་ལ།） ཧྲཱིཿ ཀ་དག་ཟང་ཐལ་ཆོས་ཀྱི་སྐུ༔ སྤྲོས་པ་མེད་པའི་དབྱིངས་ཀྱི་ངང༔ ནམ་མཁའ་ལ་ནི་ནམ་མཁའ་ཐིམ༔ ཡེ་མཆོད་ཆེན་པོར་བཞེས་སུ་གསོལ༔ དྷརྨ་བྷྰཏུ་མ་ཧཱ་པཱུ་ཛ་ཨཏྨ་ཀོ྅ཧཾཿ（ཞེས་མཆོད། དེ་དག་ནི་ཅུང་ཟད་སྤྲོས་པའི་ཚུལ་ཏེ། སྐབས་གཞན་དུ་དེ་ལས་བསྡུ་བར་འདོད་ན།） ཧཱུྃ་ཧྲཱིཿ ཐུགས་རྗེ་ཆེན་པོའི་ལྷ་ཚོགས་ལ༔ ལྷ་རྫས་ཕྱི་ཡི་མཆོད་པ་འབུལ༔ རང་བྱུང་ནང་གི་མཆོད་པ་འབུལ༔ གཉིས་མེད་གསང་བའི་མཆོད་པ་འབུལ༔ དམ་རྫས་བདུད་རྩིའི་མཆོད༴ བ་ལིཾ་གཏོར་མའི་མཆོད་ལ༴ རིགས་དྲུག་བསྒྲལ་བའི་ཏཀྟ༴ སྤངས་བླངས་མེད་པའི་མཆོད་པ་འབུལ༔ མཆོད་པར་འོས་པ་རྣམས་ཀྱི་ཐུགས་དམ་བསྐང་༔ བསྙེན་པར་འོས་པ་རྣམས༴ བསྒྲུབ་པར་འོས་པ༴ མ་ཧཱ་གུ་རུ་ཨཱརྱ་ལོ་ཀི་ཤྭ་ར་ག་ག་རཱ་ཛ་（16ན）གུ་ཧྱ་ཛྙཱ་ན་དྷཱ་ཀི་ནཱི་ས་པ་རི་ཝཱ་ར་ཨརྒྷཾ་（སོགས་ནས་）ཤཔྡ་པཱུ་ཛ་ཧོཿ མ་ཧཱ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་བ་ལིཾ་ཏ་ཁཱ་ཧིཿ མ་ཧཱ་རཀྟ་ཁཱ་ཧིཿ མ་ཧཱ་བོ་དྷི་ཙིཏྟ་ཧོཿ དྷརྨ་དྷཱ་ཏུ་ཧོཿ སརྦ་པཱུ་ཛ་ཧོཿ （ཞེས་མཆོད་སྤྲིན་ཐུན་མོང་དུ་འབུལ་ལོ། །） （ལྔ་པ་བསྟོད་པ་ནི། ཆེ་བའི་ཡོན་ཏན་རྗེས་སུ་དྲན་པས་རབ་ཏུ་བསྔགས་པར་འདོད་པའི་བློས་བསྐུལ་ཏེ། ཅུང་ཟད་སྤྲོ་ན།） ཧྲཱིཿ ཆོས་སྐུ་སྟོང་པའི་ངང་ཉིད་ལས། །འགྲོ་བའི་དོན་དུ་བཞེངས་པའི་སྐུ། །བདེ་གཤེགས་ཀུན་འདུས་ཐུགས་རྗེའི་གཏེར། །བཅུ་གཅིག་ཞལ་ལྡན་ཁྱོད་ལ་བསྟོད། །རྩ་བའི་ཞི་ཞལ་དཀར་པོ་སྟེ། འགྲོ་དྲུག་ལས་ཉོན་ཞི་བར་མཛད། །གཡས་ལྗང་གཡོན་ནི་དམར་བ་ཡིས། །དམྱལ་བ་ཡི་དྭགས་འདུལ་ལ་བསྟོད། །དེ་སྟེང་དབུས་ཀྱི་ཞལ་དམར་པོས། །ལྷ་མིན་སྐྱེ་གནས་རྣམ་སྦྱོང་ཞིང་། །གཡས་སེར་གཡོན་ཞལ་ལྗང་བ་ཡིས། །མི་དང་བྱོལ་སོང་འདུལ་ལ་བསྟོད། །དེ་སྟེང་དབུས་ལྗང་གཡས་གཡོན་ནི། །དཀར་དང་དམར་བས་ལྷ་རྣམས་འདུལ། ཀུན་ཀྱང་འཛུམ་ཞིང་མཛེས་པ་སྟེ། །ཆོས་སྐུ་ཞི་བའི་ཞལ་ལ་བསྟོད། །དེ་སྟེང་དྲག་པོའི་ལས་མཛད་པ། །དུད་སྤྲིན་མདོག་འདྲའི་ཞལ་གཅིག་ནི། །（16བ）འཇིགས་ཤིང་རྔམས་པས་ལོག་འདྲེན་འདུལ། །སྤྲུལ་སྐུ་ཁྲོ་བའི་ཞལ་ལ་བསྟོད། །དེ་སྟེང་བླ་མ་སྤྲུལ་པའི་སྐུ། །སངས་རྒྱས་ཀུན་འདུས་འོད་དཔག་མེད། །བརྩེ་བའི་ཞལ་གཅིག་ལི་ཁྲིའི་མདོག །རྒྱལ་བའི་གཙུག་རྒྱན་ཅན་ལ་བསྟོད། །པདྨའི་འདབ་འདྲ་དང་པོ་ཡི། །ཕྱག་གཉིས་ཐུགས་ཀར་ཐལ་སྦྱར་བར། །འགྲོ་བའི་རེ་སྐོང་དགོས་འབྱུང་གི །ཡིད་བཞིན་ནོར་བུ་བསྣམས་ལ་བསྟོད། །རྩ་ཕྱག་གཡས་ཀྱི་འོག་མ་ན། །ཤེལ་དཀར་ཕྲེང་བ་བརྒྱ་རྩ་དང་། །གཡོན་གྱི་འོག་མས་འདབ་རྒྱས་ཀྱི། །པདྨ་དཀར་པོ་བསྣམས་ལ་བསྟོད། །གཡས་ཀྱི་ལན་ལག་བཅུ་པོ་ན། །རྒྱ་གྲམ་རྡོ་རྗེ་ནོར་བུ་དང་། །པདྨ་གྲི་འཁོར་ཨུཏྤ་ལ། །ཉི་ཟླ་པད་ཆུན་བསྣམས་ལ་བསྟོད། །གཡོན་གྱི་ཡན་ལག་བཅུ་པོ་ན། །རལ་པོད་ཤེལ་ཕྲེང་སྣ་ཚོགས་རྡོར། །དྲིལ་བུ་སྤྱི་བླུགས་བུམ་མཁར་གསིལ། །ལྷུང་བཟེད་མཆོད་རྟེན་བསྣམས་ལ་བསྟོད། །ཆོས་སྐུའི་རྩ་ཕྱག་རྣམ་པ་བཞི། །ལོངས་སྐུའི་ཡན་ལག་བཅུ་ཕྲག་གཉིས། །སྤྲུལ་སྐུའི་ཉིང་ལག་སྟོང་མངའ་བའི། །ནམ་མཁའི་རྒྱལ་པོ་ཁྱོད་ལ་བསྟོད། །པདྨ་ལྟ་བུའི་ཕྱག་མཐིལ་ལ། །（17ན）ཨུཏྤ་ལ་འདྲའི་སྤྱན་མིག་ནི། །རྒྱུ་སྐར་བཞིན་དུ་རྣམ་བཀྲ་བའི། །ནམ་མཁའི་རྒྱལ་པོ༴ དབུ་ལ་རྒྱལ་བའི་གཙུག་རྒྱན་ཅན། །ཕྱག་ཞབས་གསེར་གྱི་གདུ་བུ་འཁྲོལ། །སྐུ་ལ་དྲི་ཞིམ་སྤོས་ངད་ལྡན། །ནམ་མཁའི་རྒྱལ་པོ༴ སྣ་ཚོགས་དར་གྱི་ན་བཟའ་གསོལ། །རིན་ཆེན་དུ་མའི་རྒྱན་གྱིས་སྤྲས། །བལྟ་བས་མི་ངོམས་མཛེས་པའི་སྐུ། །ནམ་མཁའི་རྒྱལ་པོ༴ རི་དྭགས་ལྤགས་པས་ནུ་མ་བཀབ། །ཡན་ལག་རིགས་བཞིའི་སྦྲུལ་གྱིས་བརྒྱན། །མཚན་དཔེའི་གཟི་བྱིན་འབར་བའི་སྐུ། །ནམ་མཁའི་རྒྱལ་པོ༴ རི་དྭགས་ལྤགས་པས་ནུ་མ་བཀབ། །ཡན་ལག་རིགས་བཞིའི་སྦྲུལ་གྱིས་བརྒྱན། །མཚན་དཔེའི་གཟི་བྱིན་འབར་བའི་སྐུ། །ནམ་མཁའི་རྒྱལ་པོ༴ གངས་རིའི་ངོས་ལྟར་མཛེས་པ་ལ། །ཅུང་ཟད་དམར་བའི་མདངས་དང་ལྡན། །ཐུགས་རྗེའི་འོད་དཀར་འཕྲོ་བའི་སྐུ། །ནམ་མཁའི་རྒྱལ་པོ༴ ལྷ་རྒྱལ་གཙུག་གི་ནོར་བུར་ནི། །ལེགས་པར་བཞེངས་པའི་ཞབས་བཞི་པོ། །པད་ཟླའི་སྟེང་དུ་འགྱིང་བའི་སྐུ། །ནམ་མཁའི་རྒྱལ་པོ༴ མི་འགྱུར་བདེ་ཆེན་སྒྱུ་མར་གར། །གསང་བ་ཡེ་ཤེས་ཤེས་རབ་ཡུམ། །ཆགས་བྲལ་ཟུང་འཇུག་ཆེན་པོར་སྦྱོར། །ཐབས་ཤེས་གཉིས་སུ་མེད་ལ་བསྟོད། །དུས་གསུམ་སངས་རྒྱས་ཐམས་ཅད་ཀྱི། །（17བ）ཐུགས་ཀྱི་སྦྲུལ་པ་རིན་པོ་ཆེ། །ཐབས་མཁས་ཐུགས་རྗེ་ལྡན་པ་ཁྱེད། །སེམས་ཅན་དོན་ལ་གཟིགས་སུ་གསོལ། །འགྲོ་བ་ཀུན་གྱི་སྐྱབས་གནས་ཁྱེད། །སྡུག་བསྔལ་དུ་མས་གཙེས་པ་ཡི། །ཉམ་ཐག་ཕོངས་པའི་སེམས་ཅན་ལ། །ཐུགས་རྗེའི་སྤྱན་གྱིས་གཟིགས་སུ་གསོལ། །མ་རིག་འཁྲུལ་པའི་སེམས་ཅན་རྣམས། །ལས་ངན་བསགས་པས་ལུས་ངན་བླངས། །ངན་སོང་གསུམ་དུ་ལྷུང་བ་རྣམས། །ཐུགས་རྗེའི་ལྕགས་ཀྱུས་བཟུང་དུ་གསོལ། །（ཞེས་དང་། དཀྱུས་སུ།） ཧྲཱིཿ ཕྱག་སྟོང་འཁོར་ལོས་བསྒྱུར་བའི་རྒྱལ་པོ་སྟོང་༔ སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་༔ གང་ལ་གང་འདུལ་དེ་ལ་དེར་སྟོན་པ༔ འཕགས་པ་སྤྱན་རས་གཟིགས་ལ་ཕྱག་འཚལ་བསྟོད༔ རང་བྱུང་གཉིས་མེད་ལྷན་ཅིག་སྐྱེས་པའི་ཡུམ༔ བདེ་སྟོང་ཟག་མེད་བདེ་བས་ཚིམས་མཛད་མ༔ དགའ་བཞིའི་དོན་གྱིས་སྣང་སྲིད་དབང་དུ་སྡུད༔ གསང་ཡེ་དྷཱ་ཀི་མ་ལ་ཕྱག་འཚལ་བསྟོད༔ འཕགས་པའི་སྲས་དང་སྲས་མོའི་ཚུལ་འཛིན་པ༔ ནོར་འཛིན་གསང་འཛིན་སྒྲོལ་མ་དཀར་སྔོན་དང་༔ རྒྱལ་བ་རིགས་ལྔ་（18ན）སེམས་དཔའ་ལྕམ་དྲལ་དང་༔ ཐུབ་དྲུག་སྤྲུལ་པའི་སྐུ་ལ་ཕྱག་འཚལ་བསྟོད༔ སངས་རྒྱས་སྟོང་རྩ་ཚད་མེད་སྒོ་བ་བཞི༔ བདག་སྐྱོབས་ལྷ་དང་རིག་འཛིན་སྲུང་མའི་ཚོགས༔ རྒྱལ་ཆེན་ནོར་ལྷ་དྲེགས་པ་ལྕམ་དྲལ་སོགས༔ བསྟོད་འོས་ཀུན་ལ་གུས་པས་བསྟོད་པར་བགྱི༔ （ཞེས་བསྟོད་དོ། །） （དྲུག་པ་ཛཔྲ་བཟླ་བ་ལ། བཟླ་བྱའི་གཞི་ནི།） རང་ཉིད་ནམ་མཁའི་རྒྱལ་པོ་ཡི༔ ཐུགས་ཀར་པདྨ་ཉི་མའི་སྟེང་༔ ཡེ་ཤེས་སེམས་དཔའ་རྟ་མགྲིན་དམར༔ རྡོ་དྲིལ་འཛིན་པ་ཁྲོ་གཏུམ་གཟུགས༔ དེ་ཡི་ཐུགས་ཀར་ཟླ་བའི་དབུས༔ ཏིང་འཛིན་སེམས་དཔའ་ཧྲཱིཿདཀར་གསལ༔ དེ་ཡི་གཡས་གཡོན་འོག་ཏུ་ནི༔ ཨོཾ་དཀར་ཨཱ༔ དམར་ཧཱུྃ་མཐིང་ག༔ འོད་ཟེར་མདངས་དང་ལྡན་པ་ཡི༔ མཐའ་སྐོར་ཡིག་དྲུག་གཡས་བསྐོར་དུ༔ འགལ་མེ་ལྟ་བུར་འཁོར་བར་གྱུར༔ （ཅེས་སེམས་དཔའ་སུམ་བརྩེགས་སྔགས་ཀྱི་ཕྲེང་བ་དང་བཅས་པ་གསལ་བཏབ། བཟླ་ཐབས་ཕྱི་ནང་གསང་བ་དེ་ཁོ་ན་ཉིད་ཀྱི་བཟླས་པ་དང་སྦྱར་བ་ལས། དང་པོ་ཕྱི་སྐུ་གསུང་ཐུགས་དང་སྦྱར་བའི་སྤྲོ་བསྡུ་བསགས་སྦྱོང་དངོས་གྲུབ་བསྡུ་བའི་དགོངས་པ་ནི།） ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་（18བ）ཕྲེང་འོད་ཟེར་དཀར་པོ་འཕྲོས༔ བདེ་གཤེགས་ཀུན་གྱི་སྐུ་ལ་ཕོག༔ སྐུ་མཆོད་མཉེས་ནས་སྐུའི་དངོས་གྲུབ༔ བདག་ལ་འདུས་ཤིང་འོད་ཟེར་དེས༔ ཁམས་གསུམ་སེམས་ཅན་ལུས་སྒྲིབ་སྦྱངས༔ སེམས་ཅན་ལུས་ཀུན་དབང་བསྡུས་ནས༔ འཕགས་པའི་སྐུ་དང་དབྱེར་མེད་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （ཞེས་ཅི་ནུས་སུ་བཟླ།） ཧྲཱིཿ སྤྱི་གཙུག་རིགས་བདག་སྨིན་མཚམས་ནས༔ སྔགས་ཕྲེང་འོད་ཟེར་དམར་པོ་འཕྲོས༔ བདེ་གཤེགས་ཀུན་གྱི་གསུང་ལ་ཕོག༔ གསུང་མཆོད་གསུང་གི་དངོས་གྲུབ་ཀུན༔ བདག་ལ་འདུས་ཤིང་འོད་ཟེར་དེས༔ ཁམས་གསུམ་སེམས་ཅན་ངག་སྒྲིབ་སྦྱངས༔ སེམས་ཅན་ངག་ཀུན་དབང་བསྡུས་ནས༔ འཕགས་པའི་གསུང་དང་དབྱེར་མེད་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （ཞེས་བཟླ།） ཧྲཱི། ཐུགས་ཀའི་དཔལ་གྱི་བེའུ་ནས༔ སྔགས་ཕྲེང་འོད་ཟེར་མཐིང་ག་འཕྲོས༔ བདེ་གཤེགས་ཀུན་གྱི་ཐུགས་ལ་ཕོག༔ ཐུགས་མཆོད་ཐུགས་ཀྱི་དངོས་གྲུབ་ཀུན༔ བདག་ལ་འདུས་ཤིང་འོད་ཟེར་དེས༔ ཁམས་གསུམ་སེམས་ཅན་ཡིད་སྒྲིབ་སྦྱངས༔ སེམས་ཅན་ཀུན་ཡིད་（19ན）དབང་བསྡུས་ནས༔ འཕགས་པའི་ཐུགས་དང་དབྱེར་མེད་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （ཞེས་བཟླ་སྟེ། ཞི་བའི་ངག་འཇམ་པོས་ཡི་གེ་བཅུ་པ་ཉིད་དལ་ཞིང་ཁུག་པ་རྨ་བྱའི་སྐད་ལྟ་བུའི་ཚུལ་གྱིས་སོ། །） （གཉིས་པ་ནང་དྲག་པོ་དང་སྦྱར་བའི་སྤྲོ་བསྡུ་དྲེགས་པ་ཚར་གཅོད་ཀྱི་དགོངས་པ་ནི།） ཧྲཱིཿ དབང་ཆེན་ཐུགས་ཀའི་སྔགས་ཕྲེང་ལས༔ ཁྲོ་ཆུང་མཚོན་ཐོགས་གྲངས་མེད་འཕྲོས༔ གང་དག་ཞི་བས་མི་ཐུལ་བའི༔ བདུད་དང་དགྲ་བགེགས་གདུག་ཚར་བཅད༔ བཀའ་སྡོད་བྲན་དུ་བཀོལ་ནས་ཀྱང༔ འཕགས་པའི་སྐུ་དང་དབྱེར་མེད་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ་ཕཊ༔ （ཅེས་ཡིག་གེ་བཅུ་གཅིག་པ་ཉིད་འུར་ཆེམས་གྲགས་པ་སེར་འབྲུག་ལྡིར་བ་བཞིན་ཅི་རིགས་སུ་བཟླའོ། །） （གསུམ་པ་གསང་བ་ལས་སྦྱོར་གྱི་ཚུལ་དུ་བཟླ་བ་ལ་གཉིས་ལས། དང་པོ་དོན་དམ་མཆོག་གི་ལས་སུ་སྦྱར་བ་ཉམས་རྟོགས་སྤོར་བའི་དགོངས་པ་ནི།） དེ་ལྟར་སྐུ་གསུམ་ལྷ་ཚོགས་ཀྱང་༔ བདག་ཉིད་ཐུགས་རྗེ་ཆེན་པོ་ལ༔ འདུས་ཏེ་རྣམ་པ་ཡོངས་ཀྱི་མེད༔ གཉིས་མེད་དོན་གྱི་ལྷར་གནས་པའོ༔ （ཞེས་པའི་དགོངས་པ་སྲོག་ཏུ་བཟུང་ནས། རྔུབ་པའི་རླུང་ལ་）ཨོཾ་ཨཱ༔ ཧཱུྃ་ཧྲཱིཿ （གནས་པའི་རླུང་ལ་ཨོཾ་མ་ཎི༔ འབྱིན་པའི་རླུང་ལ་པདྨེ་ཧཱུྃ༔ དེ་དོན་ཤེས་བྱ་རླུང་གིས་བཟླས༔ ཉམས་རྟོགས་（19བ）ཡེ་ཤེས་འབར་བར་འགྱུར༔ （ཞེས་པ་ལྟར་རླུང་སྔགས་དབྱེར་མི་ཕྱེད་པ་རྡོ་རྗེའི་བཟླས་པ་དང་སྦྱར་ནས་ཅི་ནུས་སུ་བཟླ་ཞིང་། དེས་སུན་ན་ངག་བཟླས་ཀྱང་བྱའོ། །） （གཉིས་པ་གཞན་དོན་ཕྲིན་ལས་ལས་སུ་སྦྱར་བ་འཁོར་བ་དོང་སྤྲུགས་ཀྱི་དགོངས་པ་ནི།） ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་ཕྲེང་འོད་ཟེར་དཀར་པོ་འཕྲོས༔ འགྲོ་བ་ལྷ་ཡི་གནས་སུ་ཕོག༔ འཆི་འཕོའི་སྡུག་བསྔལ་ཀུན་སྦྱངས་ནས༔ ཐམས་ཅད་འཕགས་པའི་སྐུ་རུ་གྱུར། ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་ཕྲེང་འོད་ཟེར་དམར་པོ་འཕྲོས༔ འགྲོ་བ་ལྷ་མིན་གནས་སུ་ཕོག༔ འཐབ་རྩོད་སྡུག་བསྔལ་ཀུན་སྦྱངས་ནས༔ ཐམས་ཅད་འཕགས་པའི་སྐུ་རུ་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་ཕྲེང་འོད་ཟེར་སེར་པོ་འཕྲོས༔ འགྲོ་བ་མི་ཡི་གནས་སུ་ཕོག༔ འདུ་བྱེད་སྡུག་བསྔལ་ཀུན་སྦྱངས་ནས༔ ཐམས་ཅད་འཕགས་པའི་སྐུ་རུ་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་ཕྲེང་འོད་ཟེར་མཐིང་ག་འཕྲོས༔ འགྲོ་བ་དུད་འགྲོའི་གནས་སུ་ཕོག༔ བླུན་རྨོངས་（20ན）སྡུག་བསྔལ་ཀུན་སྦྱངས་ནས༔ ཐམས་ཅད་འཕགས་པའི་སྐུ་རུ་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་ཕྲེང་འོད་ཟེར་དམར་པོ་འཕྲོས༔ འགྲོ་བ་ཡི་དྭགས་གནས་སུ་ཕོག༔ བཀྲེས་སྐོམ་སྡུག་བསྔལ་ཀུན་སྦྱངས་ནས༔ ཐམས་ཅད་འཕགས་པའི་སྐུ་རུ་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཧྲཱིཿ བདག་ཉིད་འཕགས་པའི་ཐུགས་ཀ་ནས༔ སྔགས་ཕྲེང་འོད་ཟེར་ལྗང་གུ་འཕྲོས༔ འགྲོ་བ་དམྱལ་བའི་གནས་སུ་ཕོག༔ ཚ་གྲང་སྡུག་བསྔལ་ཀུན་སྦྱངས་ནས༔ ཐམས་ཅད་འཕགས་པའི་སྐུ་རུ་གྱུར༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （ཞེས་བཟླ།） （བཞི་པ་དེ་ཁོ་ན་ཉིད་ཀྱི་ཆོས་ཉིད་དོན་གྱི་དགོངས་པས་གནས་ལུགས་བོགས་འདོན་གྱི་བཟླས་པ་ལ། སྣང་བ་ལྷ་སྐུར་རྒྱས་འདེབས་པ་ནི།） ཧྲཱིཿ སྣང་བ་ནམ་མཁའི་རྒྱལ་པོའི་སྐུ༔ གཟུང་འཛིན་བྲལ་བའི་སེམས་ལ་ལྟོས༔ སྣང་བ་ཐམས་ཅད་རང་སྣང་ཡིན༔ ཡེ་ཤེས་རིག་པ་ངོ་མཚར་ཆེ༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （སྒྲ་གྲགས་གསུང་དུ་རྒྱས་འདེབས་པ་ནི།） ཧྲཱིཿ སྒྲ་གྲགས་ནམ་མཁའི་རྒྱལ་པོའི་གསུང་༔ ཚིག་དང་བྲལ་བའི་དོན་ལ་ལྟོས༔ （20བ）གྲགས་པ་ཐམས་ཅད་རང་སྒྲ་ཡིན་༔ ཡེ་ཤེས་རིག་པ་ངོ་མཚར་ཆེ༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （རྟོག་ཚོགས་ཐུགས་སུ་རྒྱས་འདེབས་པ་ནི།） ཧྲཱིཿ དྲན་རྟོག་ནམ་མཁའི་རྒྱལ་པོའི་ཐུགས༔ ཡེ་ཤེས་ཟང་ཐལ་ངང་ལ་ཞོག༔ གྲོལ་བ་ཐམས་ཅད་རང་གྲོལ་ཡིན༔ ཡེ་ཤེས་རིག་པ་ངོ་མཚར་ཆེ༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （རང་རིག་ལྷ་དང་གཉིས་མེད་དུ་བལྟ་ཞིང་སེམས་ལས་ལྷ་ལོགས་སུ་མི་འཚོལ་བ་ནི།） ཧྲཱིཿ བལྟས་པས་ཡི་དམ་ལྷ་མི་མཐོང་༔ མ་བལྟས་བཞག་པས་ལྷ་དང་མཇལ༔ མ་བསྒྲུབ་གནས་པས་སངས་རྒྱས་འགྲུབ༔ གྲུབ་པ་མེད་དོ་ཅིར་མི་དགོངས༔ ཡེ་ཤེས་རང་བྱུང་ནམ་མཁའི་རྒྱལ༔ རང་སྣང་སྣང་བ་མཐའ་ཡས་ཡིན༔ རང་གསལ་རྟ་མགྲིན་རྒྱལ་པོ་ཡིན༔ རང་གྲོལ་གསང་ཡེ་དྷཱ་ཀི་ཡིན༔ རྟོག་བྲལ་རིགས་ཀྱི་ལྕམ་དྲལ་ཡིན༔ དུག་ལྔ་རང་གྲོལ་རྒྱལ་བ་ལྔ༔ འབྱུང་ལྔ་རྣམ་དག་ཡུམ་མཆོག་ལྔ༔ ཚོགས་བརྒྱད་གནས་དག་སེམས་དཔའ་བརྒྱད༔ ཡུལ་སྣང་རང་གྲོལ་སེམས་མ་བརྒྱད༔ ཚོགས་དྲུག་རང་གྲོལ་ཐུབ་པ་དྲུག༔ སྨྲ་བསམ་བརྗོད་མེད་སངས་རྒྱས་སྟོང་༔ ཚད་མེད་བཞི་ལྡན་སྒོ་བ་བཞི༔ ལྟ་བྱེད་རྟོག་པ་རང་སར་（21ན）གྲོལ༔ རང་བྱུང་ལྷུན་གྲུབ་ཆེན་པོའི་ངང༔ ཡེ་ཤེས་རིག་པ་ངོ་མཚར་རེ༔ ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （ཞེས་སྐབས་སུ་སྙན་པའི་དབྱངས་ཀྱི་རྟ་ལ་དྲང་ནས་ཅི་རིགས་པ་བཟླ་ཞིང་། གཞན་ཡང་།） ན་མོ་རཏྣ་ཏྲ་ཡཱ་ཡ༔ ན་མ༔ ཨཱརྻ་ཛྙཱ་ན་སཱ་ག་ར༔ བཻ་རོ་ཙ་ན་བྷྻུ་ཧ་རཱ་ཛ་ཡ༔ ཏ་ཐཱ་ག་ཏ་ཡ༔ ཨརྷ་ཏེ་སམྱཀྶཾ་བུདྡྷ་ཡ༔ ན་མཿ སརྦ་ཏ་ཐཱ་ག་ཏེ་བྷྱ༔ ཨརྷ་ཏེ་བྷྱ༔ སམྱཀྶཾ་བུདྡྷེ་བྷྱཿ ན་མཿཨཱརྱ་ཨ་ཝ་ལོ་ཀི་ཏེ་ཤྭ་ར་ཡ༔ བོདྷི་སཏྭ་ཡ༔ མ་ཧཱ་སཏྭ་ཡ༔ མ་ཧཱ་ཀ་རུ་ཎི་ཀཱ་ཡ༔ ཏདྱ་ཐའཿ ཨོཾ་དྷ་ར་དྷ་ར༔ དྷི་རི་དྷི་རི༔ དྷུ་རུ་དྷུ་རུ༔ ཨིཊྚེ་ཝིཊྚེ༔ ཙ་ལེ་ཙ་ལེ༔ པྲ་ཙ་ལེ་པྲ་ཙ་ལེ༔ ཀུ་སུ་མ་ཀུ་སུ་མ༔ ཝ་རེ་ཨི་ལི་མི་ལི༔ བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་ཨཱ་པ་ན་ཡེ་སྭཱཧཱ༔ （ཞེས་གཟུངས་རིང་དང་།） ཨཱོཾ་ཧྲཱིཿན་མཿསརྦ་མ་ཧཱ་གུ་རུ་ཨཱརྱ་ལོ་ཀི་ཤྭ་ར་ག་ག་རཱ་ཛ་གུ་ཧྱ་ཛྙཱ་ན་དྷཱ་ཀི་ནཱི་ཨ་ཡུ་ཨ་མི་དྷེ་ཝ་ཧྱ་གྲཱི་ཝ་ཧྲཱིཿ ཏཱཾ་ཨོཾ་ཏཱཾ་ཨཱ༔ ཨོཾ་ཧཱུྃ་ཏྲཱྃ་ཧྲཱིཿཨཱ༔ མཱུཾ་ལཱ་མཱ་པཱཾ་ཏཱཾ༔ ཀྵེཾ་ཏྲཱཾ་ཧྲཱིཿཛྲིཾ་མེ་ཐླྷེཾ་ཧཱུྃ་མཱུྃ༔ ཧཱུྃ་ཏྲཱཾ་ཧྲིཾ་ཨ་ཛཿཧཱུྃ་བཾ་ཧོཿ ཀྲེཾ་བྲེཾ་སྲུཾ་ཏྲུཾ་ཀྵིཾ་ཡེ༔ ས་མནྟ་བྷ་དྲ་མུ་ནི༔ ཛཿཧཱུྃ་བཾ་ཧོཿ ཨ་རལླི་ཧྲིཾ་ཧྲིཾ་སརྦ་སིདྡྷི་ཕ་ལ་ཧཱུྃ༔ （ཞེས་གཙོ་འཁོར་ཡོངས་（21བ）རྫོགས་དྲིལ་བའི་སྙིང་པོའང་ཅི་འགྲུབ་བཟླ། བཟླས་པ་རྫོགས་པ་ན།） ཨོཾ་སརྦ་མ་ཧཱ་གུ་རུ་ཨཱརྱ་ལོ་ཀི་ཤྭ་ར་ག་ག་རཱ་ཛ་གུ་ཧྱ་ཛྙཱ་ན་དྷཱ་ཀི་ནཱིས་པ་རི་ཝཱ་ར་ཨརྒྷཾ་པཱ་དྱཾ་（སོགས་ནས།） ཤཔྡ་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་བོ་དྷི་ཙིཏྟ་དྷརྨ་དྷཱ་སརྦ་པཱུ་ཛ་ཧོཿ （ཞེས་མཆོད་ཅིང་།） ཧྲཱིཿ སངས་རྒྱས་ཀུན་གྱིས་རབ་ཏུ་བསྔགས༔ ཡོན་ཏན་མཆོག་གི་གཏེར་གྱུར་པ༔ སྤྱན་རས་གཟིགས་ཞེས་མཚན་གསོལ་བའི༔ རྟག་པར་བརྩེ་ལ་ཕྱག་འཚལ་བསྟོད༔ （ཅེས་བསྟོད་དོ། །） （བདུན་པ་རྫོགས་རིམ་ནི། དེ་ལྟར་ལྷ་སྔགས་ལ་སོགས་པའི་གནས་ལུགས་སྤྲོས་པ་དང་བྲལ་བ་ངོས་བཟུང་སྟེ།） རང་རིག་ངོ་བོ་སྟོང་གསལ་འདི༔ ཀུན་བཟང་སྣང་བ་མཐའ་ཡས་ཡིན༔ རང་བཞིན་གསལ་སྟོང་རྗེན་ནེ་བ༔ འདི་ཀ་ནམ་མཁའི་རྒྱལ་པོ་ཡིན༔ གཉིས་འཛིན་མཚན་མའི་བློ་བྲལ་འདི༔ རང་གསལ་དཔའ་བོ་རྟ་མགྲིན་ཡིན༔ སྟོང་གསལ་འཛིན་བྲལ་བློ་འདས་འདི༔ གསང་བ་ཡེ་ཤེས་དྷཱ་ཀི་ཡིན༔ སྟོང་ཉིད་སྙིང་རྗེའི་ངོ་བོ་འདི༔ རིགས་ཀྱི་སེམས་དཔའ་ལྕམ་དྲལ་ཡིན༔ རང་གསལ་འོད་ལྔའི་ཟེར་ཐག་འདི༔ རྒྱལ་བ་རིགས་ལྔ་ཡབ་ཡུམ་ཡིན༔ སྨྲ་བསམ་བརྗོད་དུ་མེད་པ་འདི༔ བསྐལ་བཟང་སངས་རྒྱས་སྟོང་རྩ་ཡིན༔ རང་ཤར་རང་གྲོལ་ས་ལེ་འདི༔ རྒྱལ་བ་ཐུབ་པ་སྤྲུལ་སྐུ་དྲུག༔ རང་སེམས་སྐྱེ་བ་མེད་པ་འདི༔ བཀའ་བརྒྱུད་བླ་མ་ཀུན་འདུས་ཡིན༔ འགག་མེད་ཡེ་གྲོལ་ལྷུན་གྲུབ་（22ན）འདི༔ མཁའ་འགྲོ་དམ་ཅན་རྒྱ་མཚོ་ཡིན༔ འཛིན་མེད་མཐའ་བྲལ་དེ་ངང་ལ༔ དམིགས་པ་མེད་པའི་བསྔོ་སྨོན་གཅེས༔ （ཞེས་པའི་དགོངས་པ་གསལ་བཏབ་ལ་རང་བྱུང་རིག་པ་སྤྲོས་བྲལ་གྱི་གཤིས་ལུགས་བསྐྱང་ངོ་། །དེ་དག་ནི་དངོས་གཞི་ལས་རིམ་མོ། །） （གསུམ་པ་རྗེས་ཀྱི་ཆོ་ག་ལ། ཚོགས་བསྐུལ་གཏོར་བྲོ་དངོས་གྲུབ་བླང་། །དལ་བསྡུ་བ་བསྔོ་སྨོན་ཤིས་བརྗོད་དོ། །ཞེས་རྣམ་གྲངས་བདུན་ལས།） （དང་པོ་ཚོགས་ཀྱི་མཆོད་པ་ནི། མཱཾ་ས་དང་ཛ་གད་ཀྱིས་མཚོན་དམ་རྫས་སུ་འོས་པའི་ཡོ་བྱད་རྣམས་ལེགས་པར་བཤམས་ནས་བདུད་རྩིས་བསང་གཏོར་བྱས་ལ།） ཨོཾ་སརྦ་དྲ་བྱཾ་བི་ཤྭདྷ་ནི་ཧཱུྃ་ཕཊ༔ ཧཱུྃ་ཧྲཱིཿ རང་ཉིད་ལྷ་ཡི་ཐུགས་ཀ་ནས༔ ཚོགས་འཁོར་སྦྱོང་ཕྱིར་ཡི་གེ་འཕྲོས༔ རྃ༔ རྃ་ལས་མེ་བྱུང་དངོས་འཛིན་བསྲེག༔ ཡྃ༔ ཡྃ་ལས་རླུང་བྱུང་བག་ཆགས་གཏོར༔ ཁྃ༔ ཁྃ་ལས་ཆུ་བྱུང་གཉིས་འཛིན་བཀྲུས༔ རྃ་ཡྃ་ཁྃ་སྥ་ར་ཎ་ཧཱུྃ་ཕཊ༔ སརྦ་བི་ཤུདྡྷེ་ཧཱུྃ༔ ཧཱུྃ་ཧྲཱིཿ བདག་ཉིད་ལྷ་ཡི་ཐུགས་ཀ་ནས༔ བྱིན་གྱིས་རློབ་པའི་ཡི་གེ་འཕྲོས༔ བྷྲཱུྃ༔ བྷྲཱུྃ་ལས་བྷནྡྷའི་གཞལ་ཡས་ཁང་༔ ཧཱུྃ༔ ཧཱུྃ་གིས་རྣམ་པར་རྟོག་པ་སྦྱངས༔ ཨཱ༔ ཨཱ་ཡིས་ཡེ་ཤེས་བདུད་རྩིར་བསྒྱུར༔ ཨོཾ༔ ཨོཾ་གྱིས་འདོད་ཡོན་སྣང་སྲིད་གང་༔ ཧྲཱིཿ ཧྲཱིཿ（22བ）ཡིས་ལྷ་ཚོགས་ཐུགས་དམ་དགྱེས༔ ཨོཾ་ཨཱ༔ ཧཱུྃ༔ （ཞེས་ལན་གསུམ་གྱིས་བརླབས། ཚོགས་ཞིང་སྤྱན་འདྲེན་པ་ནི། སྦྱར་བའི་སྤོས་བསྲེག་ཅིང་ཅང་ཏེའུ་ལ་སོགས་པའི་རོལ་མོའི་སྒྲ་དང་སྦྱར་ཏེ།） ཧྲཱིཿ ཐུགས་རྗེ་ཆེན་པོ་ཡབ་ཡུམ་སྲས་འཁོར་བཅས༔ རྒྱལ་བའི་སྐུ་ལ་སྒྲིབ་སྐྱོན་མི་མངའ་ཡང་༔ འགྲོ་བའི་ཚོགས་བསགས་བསྙེན་སྒྲུབ་བགྱི་སླད་དུ༔ ཆོས་ཀྱི་དབྱིངས་ནས་སྐུར་བཞེངས་འདིར་གཤེགས་ཤིག༔ བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ （ཞེས་སྤྱན་དྲངས། ཚོགས་ཕུད་ཆ་གསུམ་དུ་སྤྲོས་པའི་དང་པོ་མཆོད་པ་ནི། ཚོགས་མཆོད་དམ་རྫས་འདོད་ཡོན་གྱི་སྤྲིན་ཕུང་ནམ་མཁའ་གང་བར་སྤེལ་ཏེ་ཕུལ་བས་དགྱེས་པར་བསམ་ལ།） ཧཱུྃ་ཧྲཱིཿ བདེ་བར་གཤེགས་སོ་བཅོམ་ལྡན་འདསཿ སངས་རྒྱས་ཀུན་གྱི་བདག་ཉིད་སྐུ༔ སྤྱན་རས་གཟིགས་དབང་ལྷ་ཚོགས་ལ༔ ཞལ་ཟས་ཚོགས་ཀྱི་མཆོད་པ་འབུལ༔ སྐུ་གསུང་ཐུགས་ཀྱི་དངོས་གྲུབ་སྩོལ༔ སརྦ་གྷ་ཎ་ཙཀྲ་པཱུ་ཛ་ལ་ཁཱ་ཧི༔ （ཞེས་མཆོད། བར་པ་བཤགས་པ་ནི། ཚོགས་རྫས་བདུད་རྩིར་དམིགས་ཏེ་ཕུལ་བས་ཐུགས་དམ་བསྐངས་ནས་མཁོན་གཅུགས་ཉེས་བྱས་ཐམས་ཅད་དག་པར་བསམ་ཞིང་།） ཧཱུྃ་ཧྲཱིཿ སྔོན་བྱུང་དུས་ནས་ད་ལྟའི་བར༔ མ་རིག་བདག་ཅག་ལུས་ངག་སེམས༔ རྩ་བ་ཡན་ལག་ཉམས་（23ན）ཆག་སོགས༔ འདོད་ཡོན་མཆོད་པས་བསྐངས་ཞིང་བཤགས༔ བཛྲ་ས་མ་ཡ་ཤུདྡྷེ་ཨ༔ （ཞེས་བཤགས། ཐ་མ་བསྒྲལ་བསྟབ་ནི། ལིང་ག་ལོགས་སུ་བཅས་པ་མེད་ན་ཚོགས་ཟན་ཆ་གསུམ་པ་དེའི་འདོད་ཡོན་གྱི་ལྷ་མོ་རང་ལ་བསྡུས་ནས།） བདག་ཉིད་དཔའ་བོ་རྟ་མཆོག་རོལ་པའི་སྐུར་གྱུར་（པར་བསམ་ལ།） ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། འཕགས་པ་ཐུགས་རྗེ་ཆེན་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ནྲྀ་ཏྲི་བཛྲ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ （ཞེས་པས་དམིགས་བྱ་མཚན་མའི་རྟེན་ལ་དགུག་བསྟིམ་བྱས་ཏེ། རྟ་མཆོག་གི་ཕུར་བུས་གཟིར་ཞིང་།） ཧཱུྃ༔ ང་ནི་རབ་འཇིགས་དབང་གི་རྒྱལ༔ རྟ་སྐད་འཚེར་ཞིང་སྲིད་གསུམ་འདུལ༔ ཁྲོ་ཚོགས་མང་པོ་སྤྲིན་ལྟར་གཏིབ༔ ཕོ་ཉ་ལས་མཁན་གློག་ལྟར་འཁྱུག༔ གནམ་ལྕགས་ཕུར་པ་མཁའ་ལ་འདྲིལ༔ （23བ）ལྕགས་ཀྱུ་ཞགས་ལ་ཀླད་ལ་བསྐོར༔ བཏབ་ན་ལྷ་ཡང་བརླག་པར་འགྱུར༔ དགྲ་བགེགས་འབྱུང་པོ་སྨོས་ཅི་དགོས༔ རོལ་ཞིག་ཆོམ་ཞིག་མཱ་ར་ཡ༔ དགྲ་བགེགས་ལྔ་ཕུང་རྡུལ་དུ་རློག༔ ཨོཾ་པདྨནྟ་ཀྲྀཏ་མ་ཧཱ་ཀྲོ་དྷ་དགྲ་བགེགས་འབྱུང་པོ་ཤ་ཏྲུཾ་མཱ་ར་ཡ་ཕཊ༔ （ཅེས་ཚེ་ཁྲུས་ཀྱི་དགོངས་པས་དྭངས་མ་དབྱིངས་སུ་བསྒྲལ་བའི་སྙིགས་མ་ཤ་ཁྲག་གི་ཕུང་པོ་བདུད་རྩིས་སྦར་ཏེ།） ཧཱུྃ་ཧྲཱིཿ དཀྱིལ་འཁོར་ལྷ་ཚོགས་ཞལ་ཕྱེས་ཤིག༔ གནོད་བྱེད་དགྲ་བགེགས་བསྒྲལ་བ་ཡི༔ ཤ་ཁྲག་རུས་གསུམ་ཞལ་དུ་བསྟབ༔ རྐང་རུས་ཀླད་པ་ནང་རོལ་བཅས༔ དུག་ལྔ་དུག་གསུམ་རྩད་བཅད་ཕྱིར༔ བཞེས་ཤིག་རོལ་ཅིག་ཁ་རཾ་ཁཱ་ཧིཿ བྷནྡྷ་ཡ་བྷནྡྷ་ཡ་ཧཱུྃ༔ （ཞེས་བསྟབ་ལ། སླར་ཡང་ཛ་གད་གསང་ནན་དུ་འབུལ་ཞིང་།） ཧཱུྃ་ཧྲཱིཿ རྒྱུ་གཉིས་རྐྱེན་སྦྱར་འབྲུ་བཅུད་འདི༔ དུག་ལྔ་སྨན་བསྒྱུར་དམ་པའི་རྫས༔ ཛ་གད་དཔའ་བོའི་བདུད་རྩི་འདིས༔ དཀྱིལ་འཁོར་ལྷ་ཚོགས་ཐུགས་དམ་བསྐང་༔ གུ་རུ་དྷེ་ཝ་དྷཱ་ཀི་ནཱི་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧིཿ （ཞེས་ཕུལ་བས་དགྱེས་ཤིང་ཚིམ་པར་བསམ། ཚོགས་ལ་རོལ་པ་ནི། ཐ་མལ་གྱི་རྟོག་པའི་འཆིང་བ་དགྲོལ་ཕྱིར་ལས་ཀྱི་རྡོ་རྗེས་འདུས་པའི་གཙོ་བོ་ལ་ཕྱག་བཅས་ཐབས་ཤེས་ཀྱི་（24ན）དམ་རྫས་བསྣོལ་མར་སྟོབ་ཅིང་།） ཀྱཻ༔ སྟོན་པ་རྡོ་རྗེ་རྒྱལ་པོ་དགོངས་སུ་གསོལ༔ འདོད་ཡོན་ཚོགས་འཁོར་དམ་པ་འདི༔ གཙང་དང་དམེ་བ་གཉིས་འཛིན་བྲལ༔ བྲམ་ཟེ་ཁྱི་དང་གདོལ་པ་ཕག༔ རང་བཞིན་གཅིག་ཏུ་དགོངས་ཏེ་རོལ༔ （ཞེས་དྲངས། ལེན་པ་པོས་པདྨའི་ཕྱག་རྒྱ་གཡས་སུ་བསྐོར་ཞིང་།） ཧོཿ ཚོགས་འཁོར་འདོད་ཡོན་གསང་སྔགས་རྫས༔ དངོས་གྲུབ་ཐམས་ཅད་འདི་ལས་འབྱུང༔ ཚོགས་ཀྱི་མཆོད་པ་རྒྱན་དུ་རོལ༔ ཨ་ལ་ལ་ཧོཿ （ཞེས་བླངས། འདུས་པ་རྣམས་ལའང་བྲིམ་སྟེ་སྦྱིན་སྲེག་མངོན་དུ་བྱས་ཏེ་ཚིམ་པར་ལོངས་སྤྱད་པའི་མཐར།） ཧྲཱི༔ རྣལ་འབྱོར་མཆེད་ལྕམ་འཁོར་བཅས་ཀྱིས༔ དུས་གསུམ་བསགས་པའི་དགེ་རྩ་རྣམས༔ ཚོགས་ཀྱི་འཁོར་ལོས་རྒྱས་བཏབ་པས༔ ཀ་དག་ཆེན་པོའི་ས་ཐོབ་ཤོག༔ （ཅེས་སྨོན་ལམ་གདབ། ལྷག་མ་གཏོང་བ་ནི། ལྷག་མ་བསྡུས་པའི་དམེ་གཏོར་དང་ཕུད་ལྷག་བསྲེས་པར་དམ་ཚིག་གི་ཁ་ཕྲུ་བཏབ་ཅིང་།） ཨོཾ་ཨཱ༔ ཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ༔ ཧྲཱིཿས། ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་（བལྟས་ལ། ལྷག་སྡུད་ཀྱི་ཕོ་ཉ་རྣམས།） ཨེ་ཨ་རལླི་ཧྲཱིཾ་ཧྲཱིཾ་ཛཿ （ཞེས་པས་ནམ་མཁའ་གང་བར་སྤྱན་དྲངས་ཏེ།） ཧཱུྃ་ཧྲཱིཿ དང་（24བ）པོ་ཕུད་ཀྱིས་མི་མཆོད་རྒྱུ༔ བླ་མ་ཡི་དམ་ཕུད་ཀྱི་བདག༔ བར་དུ་ཚོགས་ཀྱིས་མི་མཆོད་རྒྱུ༔ མ་དང་མཁའ་འགྲོ་ཚོགས་ལ་དགྱེས༔ ཐ་མ་ལྷག་མས་མི་མཆོད་རྒྱུ༔ བྲན་དང་ཕོ་ཉ་ལྷག་ལ་དབང་༔ ལྷག་མ་ཁ་ཆུས་མི་བྲན་རྒྱུ༔ ཁྱོད་དང་ངེད་གཉིས་དམ་ཚིག་གཅིག༔ རྣམ་གསུམ་གཅིག་ཏུ་མི་བསྲེ་རྒྱུ༔ ཆོས་རྣམས་ཐམས་ཅད་རྒྱུ་འབྲས་གཅིག༔ ཧཱུྃ་བྷྱོ༔ དཔལ་གྱི་བཀའ་ཉན་ལྷག་སྡུད་ནི༔ དབང་ཕྱུག་མ་སྲིང་མཁའ་འགྲོ་མ༔ འབར་མ་གིང་ལང་ཕོ་ཉའི་ཚོགས༔ རྡོ་རྗེ་རིན་ཆེན་པདྨ་ལས༔ འཇིག་རྟེན་ཤ་ཟ་དམ་ཚིག་གི༔ མཁའ་འགྲོ་འཁོར་དང་ཡང་འཁོར་དང་༔ བཀའ་སྡོད་བྲན་གཡོག་བཅས་པ་རྣམས༔ གནས་བཟང་དེ་ནི་དུར་ཁྲོད་ཉུལ༔ གོས་བཟང་དེ་ནི་གཡང་གཞི་གྱོན༔ སྐྱོག་ཟང་དེ་ནི་བྷཉྫ་ཐོགས༔ སྐྱེམས་བཟང་དེ་ནི་རཀྟ་འཐུང་༔ ཟས་བཟང་དེ་ནི་མཱཾ་ས་ཟ༔ དམ་ཚིག་བསྲུང་ཞིང་མཁའ་ལ་འགྲོ༔ དམ་ཉམས་ཞིང་བཅུའི་སྲོག་དབུགས་ལེན༔ རྣལ་འབྱོར་སྒྲུབ་པའི་དྲོད་ཉུལ་རྣམས༔ ཕམ་ཕབ་ལྷག་གཏོར་འདི་བཞེས་ལ༔ བསྟན་པ་གཉན་པོ་བསྲུང་བ་དང་༔ ཕྲིན་ལས་རྣམ་བཞི་ལ་སོགས་པའི༔ རྣལ་འབྱོར་བསམ་（25ན）དོན་མ་ལུས་པ༔ མྱུར་སྒྲུབ་བཅོལ་བའི་ཕྲིན་ལས་མཛོད༔ སརྦ་ཨུཙྪིཥྚ་བྷཀྵ་བ་ལིཾ་ཏ་ཁ་ཁ་ཁཱ་ཧི༔ （ཞེས་རོལ་མོ་དང་བཅས་པས་ཕྱི་རོལ་དུ་འབུལ་ལོ། །） （གཉིས་པ་ཐུགས་དམ་བསྐུལ་བ་ནི། ལྷ་རྣམས་ཆོས་ཀྱི་དབྱིངས་ལས་གཟུགས་སྐུ་འགྲོ་བའི་དོན་དུ་བཞེངས་པར་བསྐུལ་བས་ཐུགས་དམ་དགོངས་པ་མངོན་དུ་བསྐྱོད་པར་བསམ་ལ།） ཧཱུྃ་ཧྲཱིཿ མ་གཡེལ་མ་གཡེལ་ཀུན་བཟང་སྣང་མཐའ་ཡས༔ མ་གཡེལ་མ་གཡེལ་འཕགས་མཆོག་ནམ་མཁའི་རྒྱལ༔ མ་གཡེལ་མ་གཡེལ་ཡབ་ཡུམ་སྲས་འཁོར་ཚོགས༔ མ་གཡེལ་མ་གཡེལ་ཕོ་ཉ་ལས་མཁན་ཚོགས༔ དུས་གསུམ་སངས་རྒྱས་ཐམས་ཅད་འདུས་པའི་སྐུ༔ སྤྱན་རས་གཟིགས་དབང་ཡབ་ཡུམ་སྲས་འཁོར་བཅས༔ པོ་ཏ་ལ་ཡི་གནས་ནས་སྐུ་བསྐྱོད་ལ༔ ཕྲིན་ལས་རྣམ་བཞིས་འགྲོ་བ་འདུལ་བ་དང་༔ འཁོར་བ་དོང་ནས་སྤྲུགས་པའི་ཕྲིན་ལས་མཛོད༔ རྒྱལ་བའི་སྤྱི་མེས་ཀུན་བཟང་སྣང་མཐའ་ཡས༔ རང་རིག་བློ་འདས་ལྟ་བའི་གནས་ལུགས་ལ༔ ཡེ་གྲོལ་རྟོགས་པའི་ཐུགས་དམ་རྒྱུད་བསྐུལ་གྱི༔ ཉོན་མོངས་ལས་སྒྲིབ་མ་ལུས་ཞི་བ་དང་༔ འཁོར་བ་དོང་ནས་སྤྲུགས་པའི་ཕྲིན་ལས་མཛོད༔ （25བ）ལོངས་སྐུ་ཐུགས་ཆེན་རྒྱལ་བ་རིགས་ལྔའི་ཚོགས༔ རང་རིག་བློ་བྲལ་སྒོམ་པའི་གཤིས་ལུགས་ལ༔ མ་བཅོས་ཡེ་གྲོལ་ཐུགས་དམ་རྒྱུད་བསྐུལ་གྱི༔ རང་རིག་ཡེ་ཤེས་རྒྱས་པར་མཛད་པ་དང་༔ འཁོར་བ་དོང་ནས་སྤྲུགས་པའི་ཕྲིན་ལས་མཛོད༔ སྤྲུལ་སྐུ་ཐུབ་དྲུག་སེམས་དཔའ་ལྕམ་དྲལ་རྣམས༔ རང་རིག་རང་གྲོལ་སྤྱོད་པའི་ཆོ་རོལ་ལ༔ རང་ཤར་རང་གྲོལ་ཐུགས་དམ་རྒྱུད་བསྐུལ་གྱི༔ རང་རིག་རང་སྣང་དབང་སྡུད་མཛད་པ་དང་༔ འཁོར་བ་དོང་ནས་སྤྲུགས་པའི་ཕྲིན་ལས་མཛོད༔ ངོ་བོ་ཉིད་སྐུ་རྟ་མཆོག་དབང་གི་ལྷ༔ རང་རིག་འཁྲུལ་བྲལ་འབྲས་བུ་ཀློང་ཡངས་ལ༔ སྐུ་བཞི་རང་ཆས་ཐུགས་དམ་རྒྱུད་བསྐུལ་གྱི༔ མ་རིག་དུག་ལྔའི་དགྲ་བགེགས་བསྒྲལ་བ་དང་༔ འཁོར་བ་དོང་ནས་སྤྲུགས་པའི་ཕྲིན་ལས་མཛོད༔ བཀའ་སྲུང་དམ་ཅན་ཕོ་ཉ་ལས་མཁན་ཚོགས༔ དྲེགས་པ་ལྕམ་དྲལ་བཀའ་སྡོད་བྲན་གཡོག་རྣམས༔ མཐུ་སྟོབས་དྲག་པོའི་ཀློང་ནས་སྐུ་བསྐྱོད་ལ༔ དགྲ་བགེགས་མཐའ་ཡི་དམག་དཔུང་བཟློག་པ་དང་༔ ཐར་པའི་གེགས་བྱེད་མ་ལུས་རྡུལ་དུ་རློག༔ （ཅེས་བསྐུལ་ལོ། །） （གསུམ་པ་གཏོར་མ་བཏང་བ་ལ། ཆད་མདོ་བསྒྲག་པ་ནི། གཏེར་སྲུང་གི་（26ན）གཏོར་མ་སོགས་གཏོར་གྲལ་ནས་བླངས་ལ་རྡོ་རྗེའི་འགྲོས་ཀྱིས་ཕྱིར་བསྣུར་དུ་བཞག །སྨན་རཀ་བྲན་ཅིང་།） ཨོཾ་ཨཱ༔ ཧཱུྃ་（གིས་བདུད་རྩིར་བརླབས་ནས།） ཧཱུྃ་བྷྱོ༔ སྔོན་ཚེ་འདས་དུས་བསྐལ་པའི་དང་པོ་ལ༔ འོག་མིན་གནས་མཆོག་བདེ་ཆེན་ཕོ་བྲང་དུ༔ བཅོམ་ལྡན་དཔལ་ཆེན་པདྨ་ཧེ་རུ་ཀས༔ སྣང་སྲིད་མ་མོ་དམ་ལ་བཏགས་པའི་ཚེ༔ ཆོས་ཀྱི་དབྱིངས་ཀྱི་མཁའ་འགྲོ་ཐམས་ཅད་ཀྱིས༔ སོ་སོའི་གཟུགས་མཆོག་དམ་པ་བསྟན་ནས་ཀྱང༔ གཡར་དམ་ཅན་ལ་དངོས་གྲུབ་སྩོལ་བ་དང་༔ བཀའ་ཡི་གཏོར་མ་ལེན་པར་མ་ཆད་དམ༔ བསྟན་པ་གཉན་པོ་བསྲུང་བར་མ་ཆད་དམ༔ སྙིགས་དུས་རྣལ་འབྱོར་སྐྱོང་བར༴ ཉམ་ངའི་དགྲ་བགེགས་བསྒྲལ་བར༴ སྔོན་གྱི་ཐ་ཚིག་གཉན་པོ་རྗེས་དགོངས་ནས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་ཕྲིན་ལས་མཛོད༔ ཧཱུྃ་བྷྱོ༔ དེ་འོག་བར་གྱི་བསྐལ་པའི་དབུས་མ་ལ༔ བསམ་ཡས་བྲག་དམར་ཨཱརྱ་པཱ་གླིང་དུ༔ སློབ་དཔོན་ཆེན་པོ་པདྨ་འབྱུང་གནས་དང་༔ སློང་མ་མངའ་བདག་མཚོ་རྒྱལ་རྗེ་འབངས་ཀྱིས༔ ཡང་གསང་བླ་མེད་དཀྱིལ་འཁོར་ཞལ་（26བ）ཕྱེས་ཚེ༔ དྲེགས་པ་ཕོ་མོ་ལྷ་སྲིན་སྡེ་བརྒྱད་ཀྱིས༔ སོ་སོའི་གཟུགས་མཆོག༴ གཡར་དམ་ཅན༴ བཀའ་ཡི༴ བསྟན་པ༴ སྙིགས་དུས༴ ཉམ་པའི་དགྲ༴ སྔོན་གྱི་ཐ༴ ཤ་ཁྲག་དམར་གྱི༴ ཐུགས་དམ་རྒྱུད་བསྐུལ༴ ཧཱུྃ་བྷྱོ༔ དུས་སྐབས་འདས་པ་དེ་ཡི་འོག་རོལ་དུ༔ དཔལ་གྱི་ཡང་རྫོང་ཤེལ་གྱི་བྲག་ཕུག་ཏུ༔ སློབ་དཔོན་ཆེན་པོ་པདྨ་བདུད་འདུལ་དང་༔ སློབ་མ་མཚོ་རྒྱལ་འབྲོག་བན་ཁྱེའུ་ཆུང་གིས༔ ཡང་གསང་དོན་གྱི་དཀྱིལ་འཁོར་ཞལ་ཕྱེས་ཚེ༔ འཇིག་རྟེན་མཁའ་འགྲོ་བསྟན་སྲུང་མ་མོ་ཡིས༔ སོ་སོའི་གཟུགས༴ གཡར་དམ༴ བཀའ་ཡི༴ བསྟན་པ༴ སྙིགས་དུས༴ ཉམ་ངའི༴ སྔོན་གྱི༴ ཤ་ཁྲག༴ ཐུགས་དམ༴ ཧཱུྃ་བྷྱོ༔ ད་དུས་རྩུབ་འགྱུར་བསྐལ་པའི་ཡང་མཐའ་འདིར༔ ལྷོ་ནུབ་རྔ་ཡབ་ཟངས་མདོག་དཔལ་རི་ནས༔ སློབ་དཔོན་ཆེན་པོ་པདྨ་ཐོད་ཕྲེང་གིས༔ སློབ་མ་རིག་འཛིན་བདུད་འདུལ་རྡོ་རྗེ་ལ༔ སྤྲུལ་སྐུའི་སྙིང་ཐིག་བཀའ་གཏད་མཛད་པའི་ཚེ༔ བདུད་མགོན་ལ་སོགས་བཀའ་སྲུང་ཐམས་ཅད་ཀྱིས༔ སོ་སོའི༴ གཡར་དམ༴ བཀའ་ཡི༴ བསྟན་པ༴ སྙིགས་དུས༴ ཉམ་（27ན）ངའི༴ སྔོན་གྱི༴ ཤ་ཁྲག༴ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ （ཅེས་ཕུལ། གཏོར་གཞོང་བཤལ་བའི་བདུད་རྩིས་བརྟན་མའི་གཏོར་མར་བྲན་ལ་འབྲུ་གསུམ་གྱིས་བརླབས་ཏེ།） བྷྱོ༔ འཇིག་རྟེན་བོད་ཁམས་སྐྱོང་བ་བརྟན་མའི་ཚོགས༔ བདག་ཉིད་ཆེན་མོ་རྡོ་རྗེ་ཀུན་གྲགས་མ༔ དཔལ་ལྡན་ཧ་རི་རྡོ་རྗེ་གཡའ་མ་སྐྱོང་༔ གངས་ཀྱི་གཡུ་བུན་རྡོ་རྗེ་ཀུན་ཏུ་བཟང་༔ འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ༔ བདུད་མོ་ཆེན་མོ་དབང་ཆེན་ཁྱེད་བཞི་ཡང༔ འདིར་གཤེགས་བཀའ་ཡི་གཏོར་མ་འདི་ལོངས་ལ༔ དམ་བཅས་བཞིན་དུ་བཅོལ་བའི་ཕྲིན་ལས་མཛོད༔ ཤ་མེད་གངས་དཀར་རྡོ་རྗེ་གཡུ་སྒྲོན་མ༔ ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ༔ གསེར་ཆེན་མཁའ་ལྡིང་རྡོ་རྗེ་རླུང་མོ་རྩལ༔ རྨ་རི་རབ་འབྱམས་རྡོ་རྗེ་དྲག་མོ་རྒྱལ༔ གནོད་སྦྱིན་ཆེན་མོ་མཐུ་ཆེན་ཁྱེད་བཞི་ཡང་༔ འདིར་གཤེགས༴ དམ་བཅས༴ ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་༔ བཙན་ལ་རོལ་པའི་རྡོ་རྗེ་སྨན་གཅིག་མ༔ གཡུ་ཡི་དྲིལ་བུ་རྡོ་རྗེ་ཟུ་ལེ་མ༔ སྨན་བཙུན་ཁུག་ཆོས་རྡོ་རྗེ་གཡར་མོ་བསིལ༔ སྨན་མོ་ཆེན་མོ་བཞིན་མཛེས་（27བ）ཁྱེད་བཞི་ཡང༔ འདིར་གཤེགས་བཀའ་ཡི་གཏོར་མ་འདི་ལོངས་ལ༔ དམ་བཅས་བཞིན་དུ་བཅོལ་བའི་ཕྲིན་ལས་མཛོད༔ བྷྱོ༔ བརྟན་མ་ཆེན་མོ་ཁྱེད་རྣམས་ཀྱང༔ ན་བཟའ་ལྷབ་ལྷུབ་མཛེས་པས་ཀླུབ༔ རིན་ཆེན་རྣམ་པ་མང་པོས་སྤྲས༔ གླུ་གར་རོལ་མོའི་སྒྲ་དང་བཅས༔ ཆིབས་སུ་ཤ་རྐྱང་འབྲོང་སོགས་བཅིབས༔ བྲན་གཡོག་སྤྲུལ་པ་མང་པོས་བསྐོར༔ གར་ཡང་རྫུ་འཕྲུལ་ཐོགས་མེད་འགྱེད༔ ཟས་སུ་ཤ་ཁྲག་གསེར་སྐྱེམས་རོལ༔ ལས་སུ་བསྟན་པའི་བྱ་ར་མཛད༔ སྔོན་ཚེ་པདྨའི་སྤྱན་སྔ་རུ༔ ཁས་བླངས་དམ་བཅས་ཇི་བཞིན་དུ༔ བཀའ་ཡི་ཕམ་ཕབ་འདི་བཞེས་ལ༔ བསྟན་པ་གཉན་པོ་བསྲུང་བ་དང་༔ ནད་ཁ་ཆོད་ལ་རིམས་ཁ་བསྒྱུར༔ དགྲ་བགེགས་མཐའ་ཡི་དམག་དཔུང་བཟློག༔ བོད་ཁམས་བདེ་སྐྱིད་ཕམ་ཕབ་འདི་བཞེས་ལ༔ བསྟན་པ་གཉན་པོ་བསྲུང་བ་དང་༔ ནད་ཁ་ཆོད་ལ་རིམས་ཁ་བསྒྱུར༔ དགྲ་བགེགས་མཐའ་ཡི་དམག་དཔུང་བཟློག༔ བོད་ཁམས་བདེ་སྐྱིད་ལྡན་པ་དང་༔ རྣལ་འབྱོར་བསམ་པའི་དོན་ཇི་བཞིན༔ བཅོལ་བའི་ཕྲིན་ལས་སྒྲུབ་པར་མཛོད༔ མ་མ་ཧྲིང་ཧྲིང་པ་ལིཾ་ཏ་ཁ་ཁ་ཁཱ་ཧི༔ （ཞེས་རོལ་མོའི་སྒྲ་དང་བཅས་པས་ཕྱི་རོལ་དུ་འབུལ་ལོ། །） （བཞི་པ་བྲོ་བརྡུང་བ་ནི། གཏོར་གཞོང་ཁ་སྦུབས་པ་རི་རབ་ཏུ་གསལ་བའི་འོག་ཏུ་དགྲ་བགེགས་དམ་སྲི་ཐམས་ཅད་མནན་པར་བསམ་ལ་རྡོ་རྗེའི་རྒྱས་（28ན）བཏབ་ནས།） ཧཱུྃ་ཧྲཱིཿ རྟ་ཡི་བརྟུལ་ཞུགས་ཆེན་པོ་ཡི༔ བདག་ཉིད་ཆེན་པོའི་སྐུར་བསྒོམ་སྟེ༔ ཀུན་ཏུ་བཟང་མོའི་མཁའ་དབྱིངས་སུ༔ ཞིང་བཅུ་བསྒྲལ་བའི་ལྔ་ཕུང་ལ༔ རྩ་གསུམ་ཁྲོས་པའི་བྲོ་བརྡུངས་པས༔ ཉོན་མོངས་དུག་ལྔ་གཏན་ནས་གཅོད༔ སྐུ་གསུང་ཐུགས་ཀྱི་དཀྱིལ་འཁོར་དུ༔ དུག་གསུམ་འཇོམས་པའི་བྲོ་བརྡུངས་པས༔ སྔོན་གྱི་དམ་ཚིག་ཆེན་པོ་བསྐངས༔ མ་ཚོགས་མཁའ་འགྲོའི་དཀྱིལ་འཁོར་དུ༔ རྟ་མགྲིན་ཁྲོས་པའི་བྲོ་བརྡུངས་པས༔ རྣལ་འབྱོར་བསྐང་བའི་ཆོ་ག་རྫོགས༔ ཕྱག་བརྙན་ཚོགས་ཀྱི་དཀྱིལ་འཁོར་དུ༔ བཀའ་འདས་བསྒྲལ་བའི་བྲོ་བརྡུངས་པས༔ རུ་ཏྲ་མཐར་མནན་ཆོ་ག་རྫོགས༔ ཨོཾ་བཛྲ་ཀྲོདྷ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ （ཅེས་བྲོ་བརྡུང་ངོ་།） （ལྔ་པ་དངོས་གྲུབ་བླང་བ་ནི། སྒྲུབ་གཏོར་ལྷར་གསལ་བའི་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་ལ་ཛཔྲ་ཀྱི་དབྱངས་དྲངས་ཏེ།） ཧཱུྃ་ཧྲཱིཿ རྣམ་དག་བདེ་བ་ཆེན་པོའི་ཕོ་བྲང་ནས༔ འཕགས་མཆོག་ནམ་མཁའི་རྒྱལ་པོ་ཡབ་ཡུམ་དང་༔ སྲས་འཁོར་དམ་ཅན་རྒྱ་མཚོ་འཁོར་བཅས་ཀྱི༔ སྐུ་གསུང་ཐུགས་ཡོན་ཕྲིན་ལས་སྣ་ཚོགས་པའི༔ དཔག་ཡས་（28བ）དངོས་གྲུབ་སྣ་ཚོགས་སྩལ་དུ་གསོལ༔ ཕྲིན་ལས་གང་བརྩམས་ལྷུན་གྱིས་གྲུབ་པའི་དཔལ༔ བུམ་པ་བཟང་དང་དཔག་བསམ་ནོར་བུའི་ཚུལ༔ ཡིད་བཞིན་རེ་སྐོང་ཆེན་པོའི་དངོས་གྲུབ་ནི༔ ད་ལྟ་ཉིད་དུ་བདག་ལ་སྩལ་དུ་གསོལ༔ ཡང་དག་བླ་མེད་དོན་དམ་བཅུད་ཀྱི་གཏེར༔ འབད་མེད་དགོས་འདོད་འབྱུང་བའི་རིན་པོ་ཆེ༔ གནས་སྐབས་མཐུ་ལྡན་འབྲས་བུ་ཕུན་ཚོགས་པའི༔ མཆོག་ཐུན་དངོས་གྲུབ་དམ་པ་སྩལ་དུ་གསོལ༔ སརྦ་སིདྡྷི་ཧཱུྃ་ཨཱ༔ （ཞེས་དངོས་གྲུབ་ནོད་པའི་ལྷ་འོད་དུ་ཞུ་བའི་དམ་རྫས་ལ་ལོངས་སྤྱད་དོ། །） （དྲུག་པ་དཀྱིལ་འཁོར་བསྡུ་བ་ནི། གཏང་རག་གི་མཆོད་བསྟོད་སྔོན་དུ་འགྲོ་བས།） འཕགས་པའི་ལྷ་ཚོགས་འཁོར་བཅས་དགོངས་སུ་གསོལ༔ བདག་ཅག་མ་རིག་ལུས་ངག་ཡིད་གསུམ་གྱིས༔ མ་འབྱོར་པ་དང་ཉམས་ཆག་ཅི་མཆིས་པ༔ གནོང་འགྱོད་དྲག་པོའི་སེམས་ཀྱིས་མཐོལ་ལོ་བཤགས༔ བཟོད་པར་བཞེས་ནས་ཚངས་པའི་དངོས་གྲུབ་སྩོལ༔ （ཞེས་དང་ཡི་གེ་བརྒྱ་པ་མང་དུ་བཟླས་པས་ལྷག་ཆད་ཁ་བསྐང་། དཀྱིལ་འཁོར་དང་འབྲེལ་བ་ཡིན་ན་ཡེ་ཤེས་པ་གཤེགས་སུ་གསོལ་བའམ་རྟེན་ལ་བརྟན་བཞུགས་བྱ། དམ་ཚིག་གི་དཀྱིལ་འཁོར་）ཧཱུྃ་（ཞེས་བརྗོད་པས། རང་གི་སྙིང་གའི་འོད་ཀྱིས་ཕོག་པས་སྣོད་（29ན）བཅུད་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ། གཞལ་ཡས་ཁང་འཁོར་གྱི་ལྷ་རྣམས་ལ་ཐིམ། འཁོར་རྣམས་རིམ་གྱིས་གཙོ་བོ་ཡབ་ཡུམ་ལ་ཐིམ། ཡུམ་ཡབ་ལ་ཐིམ། དེ་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་གྱེན་རྫོགས་ནཱ་དའི་དབྱིངས་སུ་ཡལ་ཏེ་མི་དམིགས་འོད་གསལ་སྟོང་པ་ཉིད་ཀྱི་ངང་དུ་མཉམ་པར་བཞག་པས་རྟག་མཐའ་བསལ། དེ་ལས་ལྡང་བ་ན།） ཨོཾ་ཨཱ༔ ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ （ཞེས་པས། སླར་ཡང་རང་ཉིད་འཕགས་མཆོག་ནམ་མཁའི་རྒྱལ་པོ་ཡབ་ཡུམ་དུ་གསལ་བའི་གནས་གསུམ་འབྲུ་གསུམ་གྱིས་མཚན་པར་མོས་པས་ཆད་མཐའ་བསལ་ལ། ཁྱེར་སོ་གསུམ་གྱི་ཏིང་ངེ་འཛིན་ལམ་དུ་བྱས་ཏེ་ཐུན་མཚམས་ཀྱི་རྣལ་འབྱོར་ལ་འཇུག་གོ །）

（བདུན་པ་བསྔོ་སྨོན་དང་ཤིས་པ་བརྗོད་པ་ནི།） ན་མོཿ བདག་ཅག་དཔོན་སློབ་མཆེད་ལྕམ་འཁོར་བཅས་ཀྱིས༔ འཕགས་པའི་ལྷ་ཚོགས་བསྐྱེད་རྫོགས་བསྒྲུབས་པ་དང་༔ ཟག་བཅས་ཟག་མེད་དགེ་བ་ཅི་བསགས་མཐུས༔ ནམ་མཁའི་མཐའ་ཁྱབ་སེམས་ཅན་མ་ལུས་ཀུན༔ བླ་མེད་ཐེག་པ་ཆེན་པོའི་སྣོད་གྱུར་ནས༔ ཚེ་གཅིག་སངས་རྒྱས་འཁོར་བ་དོང་（29 བ）སྤྲུགས་ཏེ༔ ཀུན་བཟང་རྡོ་རྗེ་འཛིན་པའི་ས་ཐོབ་ཤོག༔ （ཅེས་དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོ་ཞིང་སྨོན་ལམ་གྱི་རྒྱས་གདབ། མེ་ཏོག་གི་ཆར་སིལ་མར་བསྙིལ་ལ།） ཧཱུྃ་ཧྲཱིཿ བསྐལ་བཟང་སངས་རྒྱས་ཀུན་གྱི་ངོ་བོ་ཉིད༔ འགྲོ་རྣམས་ཐུགས་རྗེས་སྐྱོབས་པའི་གཉེན་གཅིག་པོ༔ གང་འདུལ་ཐབས་ཀྱིས་འགྲོ་བློའི་མུན་སེལ་བ༔ བླ་མ་ནམ་མཁའི་རྒྱལ་པོའི་བཀྲ་ཤིས་ཤོག༔ སྣ་ཚོགས་ཐབས་སྤྲུལ་འགྲོ་ཀུན་སྐྱོབས་མཛད་ཅིང་༔ མཆོག་ཐུན་དངོས་གྲུབ་དམ་པ་ཆར་ལྟར་འབེབས༔ ཡེ་ཤེས་དྷཱ་ཀི་སྲས་འཁོར་སྒོ་བའི་ཚོགས༔ དཀྱིལ་འཁོར་ལྷ་ཚོགས་རྣམས་ཀྱི་བཀྲ་ཤིས་ཤོག༔ ཕྲིན་ལས་གང་བརྩམ་ཐོགས་པ་མི་མངའ་ཞིང་༔ གང་ལ་གང་འདུལ་སྤྲུལ་བསྒྱུར་སྣ་ཚོགས་འགྱེད༔ མ་ལྟར་བྱམས་ཤིང་སྲིང་ལྟར་གདུང་མཛད་པ༔ མཁའ་འགྲོ་ཆོས་སྐྱོང་རྣམས་ཀྱི་བཀྲ་ཤིས་ཤོག༔ དུས་དང་གནས་སྐབས་མ་ལུས་ཐམས་ཅད་དུ༔ སངས་རྒྱས་བསྟན་པ་རིན་ཆེན་དར་རྒྱས་ཤིང་༔ སྐྱེ་འགྲོ་ཡོངས་ལ་བདེ་སྐྱིད་འབྱུང་བ་དང་༔ བསམ་དོན་ཡིད་བཞིན་འགྲུབ་པའི་བཀྲ་ཤིས་ཤོག༔ （ཅེས་སོགས་བཀྲ་ཤིས་པའི་ཚིགས་སུ་བཅད་པ་རྒྱ་ཆེར་བརྗོད་པས་དགེ་（30ན）ལེགས་སུ་བྱའོ། །）མགོན་པོ་ཐུགས་རྗེའི་གཏེར་ཆེན་བསྒྲུབ་པའི་ཐབས། །རིག་འདུས་པདྨའི་ཞལ་ལུང་བདུད་རྩིའི་རྒྱུན། །ཉེས་རྟོག་དུག་ཆུས་བསླད་མིན་ལེགས་བཤད་ཀྱི། །ཁྲིགས་བསྡེབས་བུམ་བཟང་བཅུད་དུ་ཁོ་བོས་བླངས། །དྲི་མ་མེད་པའི་ལེགས་བྱས་ཆུ་ཤེལ་དབང་། །བསོད་ནམས་ག་བུར་རྡུལ་ཕྲེང་འཛག་པ་དེས། །གདུལ་བྱའི་ལས་ཉོན་ཚ་གདུང་རབ་བཅིལ་ནས། །ཕན་བདེའི་ཀུ་མུཏ་བཞད་པའི་དཔལ་གྱུར་ཅིག །དེ་ལྟར་འཕགས་མཆོག་ནམ་མཁའི་རྒྱལ་པོའི་གསང་སྒྲུབ་འཁོར་བ་དོང་སྤྲུགས་ཀྱི་ལས་བྱང་ཁྲིགས་སུ་བསྡེབས་པ་ཕན་བདེའི་ཤིང་རྟ་ཞེས་བྱ་བ་འདི་ནི། རིགས་དང་དཀྱིལ་འཁོར་རྒྱ་མཚོའི་ཁྱབ་བདག་གར་དབང་སངས་རྒྱས་རྡོ་རྗེ་འདུས་པ་རྩལ་གྱི་བཀའ་ལུང་ནོར་བུའི་ཅོད་པན་སྤྱི་བོའི་རྒྱན་དུ་བཅིངས་ཏེ་རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས། ཟབ་གཏེར་རྩ་བའི་གཞུང་དོན་མན་ངག་གིས་ཕྱེས་ཤིང་སྐབས་སུ་བབས་པའི་ཁ་སྐོང་དུ་འོས་པ་རྣམས་རིགས་མཐུན་གྱི་གཏེར་ཁ་དང་གསང་བ་སྤྱི་ལ་འཇུག་པའི་ཆོ་གའི་ཡན་ལག་རྣམས་ཀྱིས་མི་འགལ་བར་བརྒྱན་ཏེ། སྤྱན་རས་གཟིགས་ཀྱི་རྣལ་འབྱོར་པ་འཇིག་བྲལ་ཡེ་ཤེས་རྡོ་རྗེ་རང་ལོ་སུམ་ཅུར་སོན་པ་རབ་བྱུང་བཅུ་དྲུག་པའི་དཔལ་གདོང་ཆུ་བྱའི་ལོ་ཁྲུམ་སྟོད་ཉ་བའི་ཡར་ངོ་བཟང་པོ་གཉིས་པའི་དུས་ཚེས་དགེ་བ་ལ། སྦས་ཡུལ་པདྨ་སྦས་པའི་ཚལ་གྱི་བྱེ་བྲག་གྲུབ་པའི་བསྟི་གནས་ཆོས་སྡིངས་རིན་ཆེན་སྤུངས་ཀྱི་ཡང་དབེན་རྗེ་བཙུན་བླ་མ་མཆོག་གི་གསང་གསུམ་ཡེ་ཤེས་ཀྱི་སྣང་བས་བྱིན་（30བ）གྱིས་བརླབས་བའི་གཞལ་མེད་ཁང་དུ་ལེགས་པར་སྦྱར་བ་ལས། ཐོག་མའི་གླེགས་བམ་དུ་འབེབས་པ་པོ་ནི་རྣམ་པར་བཀྲ་བའི་བློ་གྲོས་ཀྱི་འཇུག་པ་གསལ་བ་ཕྲིན་ལས་རབ་ཏུ་དགའ་བའི་སྡེས་བགྱིས་པའོ། །འདིས་ཀྱང་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་འཕེལ་ཞིང་རྒྱས་པ་དང་སྐྱེ་འགྲོ་ཡོངས་ལ་ཕན་བདེ་རྒྱ་ཆེན་པོ་འབྱུང་བའི་རྒྱུར་གྱུར་ཅིག། །། སརྦ་མངྒ་ལཾ།། །།