DJYD-KABUM-12-NA-012

Previous Text Back to Volume PageNext Text

Wylie title	'jigs byed bdud 'dul drag mo seng gdong ma'i phrin las DA ki dgyes pa'i gad rgyang
Location	bdud 'joms rin po che bka' 'bum Volume 12, Text 12, Pages 282-327 (Folios 1a1 to 23a6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. 'jigs byed bdud 'dul drag mo seng gdong ma'i phrin las DA ki dgyes pa'i gad rgyang. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 12: 282-327. Kalimpong: Dupjung Lama, 1979-1985.
Side notes	Recto: phrin las   Verso: bdud 'joms seng gdong
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Manual - las byang
Cycle	ཐུགས་སྒྲུབ་ཡེ་ཤེས་ཉི་མ་ (thugs sgrub ye shes nyi ma)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	seng gdong ma
Colophon	།ཅེས་འཇིགས་བྱེད་བདུད་འདུལ་དྲག་མོ་སེང་གདོང་མའི་ཕྲིན་ལས་ཌཱ་ཀི་དགྱེས་པའི་གད་རྒྱང་ཞེས་བྱ་བ་འདི་ནི། གསང་སྔགས་མ་རྒྱུད་སྙིང་པོའི་ལམ་ལས་དངོས་གྲུབ་ཀྱི་སྐལ་པ་རང་དབང་དུ་སྤྱོད་པའི་རྣལ་འབྱོར་པ་ཚེ་དབང་ལྷ་རྒྱལ་གྱིས་འབད་པ་ཆེན་པོས་ཡང་དང་ཡང་དུ་བསྐུལ་བ་ལ་བརྟེན་ནས། གཏེར་གཞུང་རྩ་བའི་དགོངས་པ་མ་འཁྲུལ་བར་ལག་ལེན་རྣམ་གསལ་འཇུག་པ་བདེ་བའི་ལས་ཁྲིགས་སུ་བསྡེབས་ཏེ། དུས་ཀྱི་མཐའི་སྔགས་འཆང་འཇིགས་བྲལ་ཡེ་ཤེས་རྡོ་རྗེས་རང་ལོ་དྲུག་ཅུ་རྩ་བརྒྱད་དུ་སོན་པ་ལྕགས་མོ་ཕག་གི་ལོ་ས་ག་ཉ་བའི་ཤེས་རབ་ཀྱི་ཕྱོགས་ལ་ཀ་པཱ་ལ་ལྷུན་པོར་སྤུངས་པའི་རི་བོའི་མགུལ་དུ་སྦྱར་བ་ལས། ཐོག་མའི་ཡི་གེར་འདུ་བགྱིད་པ་པོ་ནི་སྔགས་སྐྱེས་བློ་གསལ་ལ་རིན་ཆེན་ཕུན་ཚོགས་ཀྱིས་སོ། །འདིས་ཀྱང་ལས་དང་དངོས་གྲུབ་ཐམས་ཅད་ཡིད་བཞིན་དུ་འཇོ་བའི་རྒྱུར་གྱུར་ཅིག །། །སརྦ་དཱ་མངྒ་ལཾ།། །།
	/ces 'jigs byed bdud 'dul drag mo seng gdong ma'i phrin las DA ki dgyes pa'i gad rgyang zhes bya ba 'di ni/___gsang sngags ma rgyud snying po'i lam las dngos grub kyi skal pa rang dbang du spyod pa'i rnal 'byor pa tshe dbang lha rgyal gyis 'bad pa chen pos yang dang yang du bskul ba la brten nas/___gter gzhung rtsa ba'i dgongs pa ma 'khrul bar lag len rnam gsal 'jug pa bde ba'i las khrigs su bsdebs te/___dus kyi mtha'i sngags 'chang 'jigs bral ye shes rdo rjes rang lo drug cu rtsa brgyad du son pa lcags mo phag gi lo sa ga nya ba'i shes rab kyi phyogs la ka pA la lhun por spungs pa'i ri bo'i mgul du sbyar ba las/___thog ma'i yi ger 'du bgyid pa po ni sngags skyes blo gsal la rin chen phun tshogs kyis so/___/'dis kyang las dang dngos grub thams cad yid bzhin du 'jo ba'i rgyur gyur cig___//___/sarba dA mang+ga laM//

Tibetan Text

[edit]

༄༅། །འཇིགས་བྱེད་བདུད་འདུལ་དྲག་མོ་སེང་གདོང་མའི་ཕྲིན་ལས་ཌཱ་ཀི་དགྱེས་པའི་གད་རྒྱང་ཞེས་བྱ་བ་བཞུགས་སོ། །

༄༅། །ཤྲཱི་བི་ཛ་ཡནྟུ། བདེ་ཆེན་ཤེས་རབ་དབྱིངས་ཉིད་དུ་མའི་གར། །ཞི་ཆགས་ཁྲོ་སྒེག་ཉམས་འགྱུར་འབུམ་ཕྲག་གིས། །ཚར་གཅོད་རྗེས་འཛིན་འདོད་རྒུར་སྒྱུར་མཛད་མ། །བླ་མ་འཁོར་ལོའི་གཙོ་མོས་བདག་སྐྱོངས་ཤིག །ཌཱ་ཀིའི་ཐུགས་བཅུད་ཨོ་རྒྱན་མཁན་པོའི་ལུང༌། །བདུད་འདུལ་ཁྲོས་མའི་རྒྱལ་མོ་སྒྲུབ་པའི་ཐབས། །ཟབ་གཏེར་གསང་བའི་དགོངས་དོན་མ་འཁྲུལ་བར། །རྣམ་གསལ་འཇུག་བདེའི་ཁྲིགས་སུ་བསྡེབས་འདིའོ། །དེའང་དབང་ཐོབ་དམ་ཚིག་ལ་གནས་པའི་རྣལ་འབྱོར་པ་གང་ཞིག་ཡུམ་ཆེན་མཁའ་འགྲོ་བདུད་འདུལ་སེང་གདོང་མའི་སྒྲུབ་ཐབས་ཟབ་མོ་ཉམས་སུ་ལེན་པར་འདོད་པས། བྱ་བའི་སྦྱོར་བ་དབེན་ཞིང་བཀྲ་ཤིས་ཉམས་དགའ་བའི་སྒྲུབ་གནས་སམ་རྟོགས་པས་ཆུན་ [2a] ན་དུར་ཁྲོད་མཚོ་གླིང་བྲག་སྐྱིབས་སོགས་འཇིགས་ཤིང་རྔམས་ཟིལ་ཆགས་པའི་ས་ཕྱོགས་གང་ཡང་རུང་བའི་སྒྲུབ་ཁང་དུ་དམ་ཚིག་གི་བྲིས་སྐུ་སོགས་སྒྲུབ་པའི་རྟེན་བཀྲམ་ཞིང༌། ཕྱི་ནང་གི་མཆོད་པ་གཏོར་ཚོགས་སོགས་དགོས་པའི་དམ་རྫས་མ་ཚང་བ་མེད་པར་འདུ་བྱས་ནས། ཆོ་ག་དངོས་ལ་སྔོན་འགྲོ། དངོས་གཞི། རྗེས་གསུམ་གྱིས་བསྡུས་པ་ལས། དང་པོ་སྔོན་འགྲོའི་ཆོས་ལ་རྣམ་གྲངས་བརྒྱད་ལས། དང་པོ་སྐྱབས་སུ་འགྲོ་ཞིང་སེམས་བསྐྱེད་པ་ནི། ཕྱོགས་བཅུའི་སྐྱབས་ཡུལ་ཐམས་ཅད་བདུད་འདུལ་ཡེ་ཤེས་མཁའ་འགྲོའི་དཀྱིལ་འཁོར་གྱི་འཁོར་ལོའི་རྣམ་པར་བཛྲ་ས་མཱ་ཛཿས་མདུན་མཁར་སད་པར་མོས་ལ། ན་མོཿ བདག་དང་མཐའ་ཡས་སེམས་ཅན་ཀུན༔ བྱང་ཆུབ་སྙིང་པོར་མཆིས་ཀྱི་བར༔ མཁའ་འགྲོ་མ་ཡི་དཀྱིལ་འཁོར་ལ༔ རྣམ་ [2b] གསུམ་དད་པས་སྐྱབས་སུ་མཆི༔ ཞེས་ལན་གསུམ་གྱིས་སྐྱབས་སུ་འགྲོ། ཧོཿ མ་གྱུར་མཁའ་མཉམ་སེམས་ཅན་རྣམས༔ རྣམ་གྲོལ་སྐུ་གསུམ་སར་འགོད་ཕྱིར༔ ཡེ་ཤེས་མཁའ་འགྲོ་ཁྱོད་བསྒྲུབ་ནས༔ དོན་གཉིས་འགྲུབ་པར་སེམས་བསྐྱེད་དོ༔ ཞེས་ལན་གསུམ་གྱིས་སེམས་བསྐྱེད། གཉིས་པ་ཚོགས་བསགས་པ་ནི། ཧོཿ སྐུ་གསུམ་མཁའ་འགྲོའི་གྲོང་ཁྱེར་ལ༔ རྣམ་གསུམ་དད་པས་ཕྱག་འཚལ་ལོ༔ ལུས་དང་ལོངས་སྤྱོད་མཆོད་པ་འབུལ༔ དུས་གསུམ་བསགས་པའི་སྡིག་པ་བཤགས༔ རྣམ་དཀར་དགེ་ལ་རྗེས་ཡི་རང༔ གང་འདུལ་ཆོས་འཁོར་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་འགྲོ་ཀུན་ཡོངས་ལ་བསྔོ༔ ཐམས་ཅད་ཕྱམ་གཅིག་སངས་རྒྱས་ཤོག༔ ཅེས་ཚོགས་བསགས་མཐར། ཛཿཧཱུྃ་བྃ་ཧོཿ ས་ཚོགས་ཞིང་རྣམས་རང་ལ་ཐིམ་པས་རྒྱུད་སྨིན་ཅིང་གྲོལ་བར་བསམ། གསུམ་པ་བགེགས་བསྐྲད་པ་ནི། རང་ཉིད་འཇིགས་བྱེད་བདུད་འདུལ་དྲག་མོའི་སྐུར་གྱུར། བགེགས་གཏོར་ རྃ་ཡྃ་ཁྃ་གིས་བསང་སྦྱང༌། སྟོང་པའི་ངང་ལས་བྷཱུྃ་ལས་རིན་པོ་ཆེའི་སྣོད་དུ་ཁཾ་ལས་གཏོར་མ་འདོད་པའི་ཡོན་ཏན་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧོཿ ལན་གསུམ་གྱིས་བརླབ། སརྦ་བྷུ་ཏ་ཨ་ཀརྴ་ཡ་ཛཿས་མགྲོན་དགུག ། སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་ཏེ་ [3a] སྥ་ར་ན་ཨི་མཾ་ག་ག་ཁཾ་གྲྀཧྞེ་དཾ་བ་ལིཾ་ཏ་ཡེ་སྭཱ་ཧཱ། ལན་གསུམ་གྱིས་གཏོར་མ་བསྡོས་ལ། ཧཱུྃ་ཧྲཱིཿ ང་ནི་སྤྱི་དཔལ་སེང་གདོང་མ༔ གསང་བ་ཡེ་ཤེས་དྲག་མོའི་སྐུ༔ ཁམས་གསུམ་མ་ལུས་དབང་དུ་སྡུད༔ སྲིད་གསུམ་མ་ལུས་ཟིལ་གྱིས་གནོན༔ རབ་འབྱམས་རྒྱལ་བ་བསྐྱེད་པའི་ཡུམ༔ སྤྲུལ་པའི་མཁའ་འགྲོས་ནམ་མཁའ་གང་༔ ལས་བྱེད་མཁའ་འགྲོས་བར་སྣང་གང་༔ སྒྲོལ་བྱེད་མཁའ་འགྲོས་ས་གཞི་གང་༔ ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ ཤ་འཁོན་བུ་ལོན་ལན་ཆགས་རྣམས༔ གླུད་ཀྱི་གཏོར་མ་འདི་འཇལ་གྱིས༔ མགུ་བར་གྱིས་ལ་རང་གནས་སུ༔ ད་ལྟ་ཉིད་དུ་འགྲོ་བར་གྱིས༔ གནས་འདིར་གསང་ཆེན་མཁའ་འགྲོའི་དལ༔ ད་ལྟ་ཉིད་དུ་འདེབས་འཚལ་བས༔ བཀའ་འདས་ལུས་སེམས་རྡུལ་དུ་བརླག༔ དེ་བས་ད་ལྟ་ཕྱིར་དེངས་ཤིག༔ ཧཱུྃ་བཞིའི་སྔགས་དང་གུ་གུལ་ཡུངས་ཐུན་བཅས་པས་བསྐྲད། བཞི་པ་སྲུང་མཚམས་བཅད་པ་ནི། ཧཱུྃ་ཧྲཱིཿ བདག་ཉིད་ཡེ་ཤེས་མཁའ་འགྲོ་མའི༔ ཐུགས་ལས་སྤྲོས་པའི་འོད་ཟེར་གྱིས༔ སྟེང་འོག་ཕྱོགས་མཚམས་ཐམས་ཅད་ཀུན༔ རྡོ་རྗེ་སྲུང་བའི་འཁོར་ལོར་གྱུར༔ ཨོཾ་བུདྡྷ་བཛྲ་རཏྣ་པདྨ་ཀརྨ་ཛྙཱ་ན་རཾ་ཡཾ་ཁཾ་རཀྵ་རཀྵ་སྭཱ་ཧཱ༔ ལྔ་པ་བརྡ་སྒོ་དབྱེ་བ་ནི། ཧཱུྃ་ཧྲཱིཿ རང་རིག་གདོད་ནས་ཡེ་ཤེས་མཁའ་འགྲོའི་དལ༔ [3b] མ་རིག་དབང་གིས་ཆོས་ཉིད་འཆར་སྒོ་འགགས༔ ད་ནི་རང་རིག་ཡེ་ཤེས་རྟོགས་པའི་ལྷ༔ རང་ངོ་མཇལ་ཕྱིར་ཡེ་ཤེས་འཆར་སྒོ་ཕྱེས༔ ཨོཾ་བཛྲ་པྲ་ཝེ་ཤ་ཡ་ཕཊ༔ དྲུག་པ་བརྡ་ཕྱག་འཚལ་བ་ནི། ཧཱུྃ་ཨཱཿགཟུང་འཛིན་གཉིས་མེད་ཡེ་ཤེས་ཀློང་༔ གདོད་ནས་རང་རིག་ཡུམ་ཆེན་མོ༔ རྟོག་ཚོགས་གནས་དག་མཁའ་འགྲོའི་གར༔ རང་ཞལ་མཇལ་ཕྱིར་གུས་ཕྱག་འཚལ༔ ན་མོ་པུ་རུ་ཤ་ཡ་ཧོཿ བདུན་པ་བྱིན་དབབ་པ་ནི། སྤོས་དང་རོལ་མོས་གཟི་བྱིན་བསྐྱེད་ལ། ཧཱུྃ༔ ལྷུན་གྲུབ་བདེ་བ་ཆེན་པོའི་གནས༔ རང་སྣང་རྣམ་དག་གཞལ་ཡས་ནས༔ ཆོས་སྐུ་ཡུམ་ཆེན་ཀུན་བཟང་མོ༔ ལོངས་སྐུ་མཁའ་འགྲོ་སེང་གེའི་གདོང༔ སྤྲུལ་སྐུ་ཡེ་ཤེས་མཚོ་རྒྱལ་སོགས༔ རབ་འབྱམས་ཡེ་ཤེས་མཁའ་འགྲོའི་ཚོགས༔ ཆོས་ཀྱི་དབྱིངས་ནས་སྐུར་བཞེངས་པ༔ དམ་ཚིག་དབང་གིས་གནས་འདིར་བྱོན༔ སྒྲུབ་མཆོག་རྣལ་འབྱོར་མཆེད་ལྕམ་དང་༔ ལྷུན་གྲུབ་གསང་ཆེན་དཀྱིལ་འཁོར་ལ༔ བྱིན་རླབས་ཡེ་ཤེས་བྱིན་ཕོབ་ཅིག༔ གསང་བ་གསུམ་གྱིས་དབང་བསྐུར་ཅིག༔ མཁའ་སྤྱོད་ཞིང་དུ་བྱིན་གྱིས་རློབས༔ ཨོཾ་ཨཱཿཧཱུྃ༔ ཀརྨ་ཌཱ་ཀི་ནཱི་ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛ་ཛཿ ཨཱ་བེ་ཤ་ཡ་ཨ་ཨཱཿབརྒྱད་པ་མཆོད་རྫས་བྱིན་བརླབ་པ་ནི། ཨོཾ་ཨཱཿཧཱུྃ༔ གཟུང་དང་འཛིན་པས་བསྡུས་པ་ཡི༔ [4a] ཆོས་ཀུན་རྣམ་དག་དྲི་མ་མེད། ཕྱི་ནང་གསང་བའི་མཆོད་སྤྲིན་དུ༔ ཡེ་ནས་རང་བྱུང་ལྷུན་གྲུབ་བོ༔ ཨོཾ་བཛྲ་ཨརྒྷཾ་ཨཱཿཧཱུྃ༔ ཨོཾ་བཛྲ་པཱདྱཾ་ཨཱཿཧཱུྃ༔ དེ་བཞིན་དུ་ཤཔྡའི་བར་དང༌། ཨོཾ་བཛྲ་རཱུ་པ་ཤཔྡ་གནྡྷེ་ར་ས་སྤརྴེ་པྲ་ཏཱིཙྪ་ཡེ་སྭཱ་ཧཱ༔ སྨན་ རཾ་ཡཾ་ཁཾ་གིས་བསང་སྦྱང༌། སྟོང་པའི་ངང་ལས་སྨན་སྣོད་བྷནྡྷ་འབར་བའི་གཞལ་ཡས་ཁང་དུ་བཅུད་རྫས་རིགས་ལྔ་ཡབ་ཡུམ་སྙོམས་པར་ཞུགས་ཤིང་ཞུ་བའི་བྱང་ཆུབ་སེམས་ཀྱི་རྒྱུན་ཆེན་པོ་དམ་ཡེ་གཉིས་སུ་མེད་པའི་བདུད་རྩིའི་རྒྱ་མཚོས་གང་བར་བསམ་ཞིང༌། ཨོཾ་ཨཱཿཧཱུྃ༔ མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ལན་བདུན་ནམ་གསུམ། རཀྟ་བསང་སྦྱང༌། སྟོང་པའི་ངང་ལས་དམར་གྱི་དུང་ཆེན་འབར་བའི་སྣོད་དུ་ར་ལས་ཆགས་མེད་རཀྟའི་རྒྱ་མཚོ་ཟེགས་མ་ལས་ཞིང་ཆེན་གྱི་ལྷུ་དུམ་འཁྲུགས་པ་ལ་ཁམས་གསུམ་གྱི་རཀྟ་ཐམས་ཅད་འདུས་པས་ཡོངས་སུ་གང་བར་བསམ་ཞིང༌། ཨོཾ་ཨཱཿཧཱུྃ༔ མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ༔ ལན་བདུན་ནམ་གསུམ། གཏོར་མ་བསང་སྦྱང༌། སྟོང་པའི་ངང་ལས་ལྕང་ལོར་བཅས་པའི་ཀ་པཱ་ལ་སྟོང་གསུམ་གྱི་ཁྱོན་དང་མཉམ་པའི་ནང་དུ་གཏོར་མ་ཤ་ལྔ་བདུད་རྩི་ལྔའི་རང་བཞིན་ལྷུན་པོའི་གཏོས་ལྟར་སྤུངས་ཤིང་བརྗིད་པ་ལས་འདོད་ཡོན་གྱི་མཆོད་སྤྲིན་ནམ་མཁའ་མཛོད་དུ་སྤྲོ་བའི་རང་བཞིན་ [4b] ཅན་དུ་གྱུར་བར་བསམ་ཞིང༌། ཨོཾ་ཨཱཿཧཱུྃ༔ མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་པ་ཏེ་གུ་ཧྱ་ཧྲཱི་ཤྭ་ས་མ་ཡ་ཧཱུྃ་ཧྲཱིཿཋཱ༔ ལན་བདུན་ནམ་གསུམ། ཨོཾ་ཨཱཿཧཱུྃ༔ བོ་དྷི་ཙིཏྟ་ཏ་ན་ག་ན་གུ་ཧྱ་ས་རྦ་སྭཱ་ཧཱ༔ ཞེས་ཕྱི་ནང་གསང་མཆོད་རྣམས་བྱིན་གྱིས་བརླབ། དེ་དག་རྣམས་ནི་སྔོན་འགྲོའི་ལས་རིམ་མོ། །གཉིས་པ་དངོས་གཞིའི་ཆོས་ལ་བརྒྱད་ལས། དང་པོ་དམ་ཚིག་གི་འཁོར་ལོ་བསྐྱེད་པ་ལ། ཐོག་མར་རྒྱུ་ཏིང་ངེ་འཛིན་གསུམ་གྱིས་ཁོག་དབུབ་པ་ནི། ཨ༔ སྣང་ཞིང་སྲིད་པའི་ཆོས་རྣམས་ཀུན༔ སྒྱུ་མའི་འཁྲུལ་འཁོར་ཞིག་པ་བཞིན༔ རྣམ་ཐར་གསུམ་ལྡན་བཙུན་མོའི་མཁའ༔ བརྡལ་ཁྱབ་སྤྲོས་མཐའ་བྲལ་བའི་ངང་༔ སརྦ་དྷརྨ་ག་ག་ན་ཧཱུྃ་ཨཱཿཧཱུྃ༔ འདི་ལྟར་མ་རྟོགས་སེམས་ཅན་ལ༔ དམིགས་མེད་སྙིང་རྗེ་ཆེན་པོས་བརྡལ༔ ཕྱོགས་རིས་བྲལ་བའི་བྱང་ཆུབ་སེམས༔ མངོན་གྱུར་ཆེན་པོར་རིག་པར་བྱ༔ མ་ཧཱ་སརྦ་དྷརྨ་པྲ་ཛྙཱ་ཛྙཱ་ན་ཧཱུྃ་ཨཱཿ ཧཱུྃ༔ བརྡལ་ཁྱབ་གསང་བའི་ནམ་མཁའ་ལས༔ མཁའ་ལ་འཇའ་ཚོན་ཤར་བ་བཞིན༔ ཡེ་ཤེས་ཐུགས་ཀྱི་སྒྱུ་འཕྲུལ་ནི༔ རྒྱུ་ཡི་ཡི་གེ་ཧཱུྃ་ལྗང་གསལ༔ ཧཱུྃ་ཙིཏྟ་བཛྲ་ས་མ་ཡ་ཧཱུྃ༔ གཉིས་པ་རྟེན་དང་བརྟེན་པའི་དཀྱིལ་འཁོར་བསྐྱེད་པ་ནི། ཧཱུྃ་ལས་འབྱུང་ལྔའི་ས་བོན་ནི༔ ཨེ་ཡཾ་ར་སུཾ་ཀེཾ་རཾ་འཕྲོས༔ ཨེ་ལས་སྟོང་ཆེན་ནམ་མཁའ་མཐིང་༔ ཡཾ་ལས་རླུང་གི་དཀྱིལ་འཁོར་ལྗང་༔ ར་ལས་རཀྟའི་རྒྱ་མཚོ་འཁྱིལ༔ [5a] སུཾ་ལས་ཤ་ཆེན་ས་གཞི་སྨུག༔ ཀེཾ་ལས་རུས་པའི་རི་རབ་སྟེང་༔ རཾ་ལས་བསྐལ་པའི་མེ་དཔུང་འབར༔ དེའི་དབུས་སུ་ཕྱི་ལྟར་ན་ས་གཞི་ཞིང་ལྤགས་བརྒྱངས་པ་ལྟ་བུ་ལ༔ རི་བོ་ཐམས་ཅད་ཀེང་རུས་དཀར་པོ་དང་༔ རྩི་ཤིང་ཐམས་ཅད་མདའ་མདུང་རལ་གྲི༔ ཆུ་འབབས་ཐམས་ཅད་ཁྲག་དང་རྣག་གི་རང་བཞིན༔ གཟུགས་སྣང་ཐམས་ཅད་གསོད་གཅོད་ལས་ཀྱི་ཕོ་ཉ༔ སྒྲ་གྲགས་ཐམས་ཅད་ཕཊ་ཕེཾ་སོད་རྒྱོབ་བྷྱོ་ཟློག་གི་སྒྲ་འབྲུག་སྟོང་དུས་གཅིག་ཏུ་སྒྲོགས་པ་ལྟ་བུས་འཆི་བདག་གཤིན་རྗེའི་དཔུང་ཚོགས་ཀྱང་སྤ་བཀོང་བ༔ འཇིགས་བྱེད་ཁྲོ་བོ་བཅུ་པོའང་རྒྱུ་བར་མི་ནུས་ཤིང་༔ མི་འཇིགས་འཇིགས་མེད་རྡོ་རྗེ་ཅན་ཡང་འཇིགས་པའི་གནས༔ ཐུན་མཚོན་དང་མཚོན་ཆ་སྣ་ཚོགས་སྐྱི་སེར་ལྟར་འཚུབས་པ༔ འཇིག་རྟེན་ལས་ཀྱི་ཕོ་ཉ་རྦད་འདྲེ་གདུག་པ་ཅན་ཐམས་ཅད་ཐལ་བར་བརླག་ཅིང་དུམ་བུར་གཏུབ་པ༔ ཡེ་ཤེས་མཁའ་འགྲོའི་སྤྲུལ་པའི་དུར་བྱ་ཤ་ཟན་གྱི་ཚོགས་དང་གཅན་གཟན་གྱི་ཚོགས་རྣམས་དགྲ་གདོན་བྱད་མ་རྦོད་གཏོང་ལྷ་དང་བཅས་པའི་དབུགས་ལ་ཧབ་ལེན་བྱེད་ཅིང་ཤ་ལ་རྔམས་ཟས་བྱེད་པ༔ མི་རོ་དང་རྟ་རོ་ལ་སོགས་པའི་རོ་རུལ་བ་དང་བམ་པ་དང་ཧམ་པ་སྣ་ཚོགས་གཅལ་དུ་བཀྲམ་པ༔ ཁྲག་མཚོ་དམར་ནག་རྦ་རླབས་དྲག་ཏུ་འཁྲུགས་ཤིང་ཁྲག་ལྦུ་རབ་ཏུ་བརྡོལ་བའི་ཀློང་དུ་མི་རོ་ [5b] དང་རྟ་རོ་འཕྱོ་བའོ༔ ནང་ལྟར་ན་ཡེ་ཤེས་མཁའ་འགྲོ་རང་རང་གི་སྤྱོད་ཡུལ་དུ་ཞིང་ཁམས་ཁ་དོག་ལྔ་ལྡན་དབུས་མཐིང་ནག་བཻ་ཌཱུརྱའི་ཁ་དོག་ལྟ་བུ༔ ཤར་དཀར་པོ་དུང་གི་ཁ་དོག་ལྟ་བུ༔ ལྷོ་སེར་པོ་གསེར་གྱི་ཁ་དོག་ལྟ་བུ༔ ནུབ་དམར་པོ་པདྨ་རཱ་གའི་ཁ་དོག་ལྟ་བུ༔ བྱང་ལྗང་གུ་ཨིནྡྲ་ནཱི་ལའི་ཁ་དོག་ལྟ་བུ་ལས༔ རང་མདོག་གི་འོད་དང་འོད་ཟེར་ནམ་མཁའ་ལ་འཕགས་ཤིང་རྒྱ་ཆེ་ལ་ཁྱོན་ཡངས་པ༔ སྣ་ཚོགས་པདྨོ་དང་སྨན་གྱི་སྤངས་རི་མཛེས་ཤིང་ཡིད་དུ་འོང་བའོ༔ གསང་བ་ལྟར་ན་གནས་ཨོ་རྒྱན་རང་བྱུང་གི་དུར་ཁྲོད་དང་ཨུ་ཙ་ལ་དང་གསང་ཆེན་རོལ་པ་རྣམས་གཅིག་དྲིལ་གཅིག་རྫོགས་ཀྱི་ངོ་བོའོ༔ སྲུང་བའི་འཁོར་ལོ་རིམ་དགུའི་དབུས༔ ཕྱི་ནི་ཐོད་པ་རིམ་གསུམ་ལ༔ དམར་ཆེན་ཁྲག་གི་ཞམ་ཆུ་འབེབས༔ ནང་ནི་ཡེ་ཤེས་འོད་ལྔ་ལས༔ གྲུབ་པའི་གཞལ་ཡས་ཁང་དབུས་སུ༔ གྲུ་ཆད་ལྗང་གུ་དཔངས་མཐོ་བ༔ གློ་འབུར་རིགས་བཞིའི་ཁ་དོག་འཆར༔ དེ་དབུས་པད་ཟླ་ཉི་མའི་སྟེང་༔ བྱད་མ་ལོག་ལྟ་བདུད་དཔུང་དང་༔ ལྟ་ལོག་རཱུ་ཏྲ་ཕོ་མོའི་ཚོགས༔ བསྣོལ་ཞིང་བརྩེགས་པའི་ཁྲི་ཡི་ཁར༔ རང་རིག་ཡི་གེ་ཧཱུྃ་ལྗང་བབས༔ འོད་ཟེར་ཡར་འཕྲོས་རྒྱལ་ཀུན་མཆོད༔ སྲས་བཅས་ཞིང་ཁམས་གཞལ་ཡས་ལྷ༔ འོད་ཕུང་རྣམ་པར་ཚུར་བསྡུས་ཏེ༔ རིག་པ་ཧཱུྃ་གི་ཡི་གེར་ཐིམ༔ [6a] མར་འཕྲོས་འཁོར་བ་ཆོས་སྐུར་བསྒྲལ༔ སྣང་སྲིད་དཔལ་ཡོན་ཚེ་བསོད་བཅུད༔ ཚུར་འདུས་རིག་པ་ཧཱུྃ་ལ་ཐིམ༔ ཧཱུྃ་ལས་རང་ཉིད་སྐད་ཅིག་གིས༔ གསང་བ་ཡེ་ཤེས་མཁའ་འགྲོ་མ༔ འཁོར་འདས་ཡོངས་ཀྱི་དབང་ཕྱུག་མོ༔ ཡེ་ཤེས་མཁའ་འགྲོ་སེང་གེའི་གདོང་༔ ལྗང་གསལ་རལ་པ་དམར་སེར་བརྫིས༔ ཞལ་གདངས་ལྗགས་འདྲིལ་མཆེ་བ་གཙིགས༔ སྤྱན་གསུམ་སྡང་མིག་གཡོ་ཞིང་འཁྲུགས༔ ཐོད་སྐམ་ལྔ་ཡི་དབུ་རྒྱན་དང་༔ ཉི་ཟླའི་སྙན་རྒྱན་འོད་དུ་འབར༔ ཕྱག་གཡས་གྲི་གུག་ནམ་མཁར་ཕྱར༔ གཡོན་པས་ཐོད་ཁྲག་ཐུགས་ཀར་བསྣམས༔ ཧེ་རུ་ཀ་དཔལ་སྦས་པའི་ཚུལ༔ ཁ་ཊྭཱཾ་རྩེ་གསུམ་མཆན་དུ་བརྟེན༔ ཞབས་གཉིས་གཡས་བསྐུམ་གསང་བར་གཏད༔ གཡོན་པས་རཱུ་ཏྲ་ཕོ་མོ་གནོན༔ ཐོད་ཚར་གསུམ་གྱིས་དོ་ཤལ་བྱས༔ རུས་པའི་རྒྱན་དྲུག་ཕྲེང་བས་སྤྲས༔ ཡེ་ཤེས་བསྐལ་པའི་མེ་ལྟ་བུར༔ འབར་བའི་ཀློང་ན་རང་འདྲ་བའི༔ མཁའ་འགྲོ་བྱེ་བ་འབུམ་སྡེ་འགྱེད༔ སྤྱི་བོར་འཇའ་གུར་འོད་ལྔའི་ཀློང་༔ རིགས་བདག་ཀུན་ཏུ་བཟང་མོ་མཐིང་༔ གཅེར་བུ་མཉམ་གཞག་སྐྱིལ་ཀྲུང་བཞུགས༔ ཤར་དུ་ཐུགས་ཀྱི་སྤྲུལ་པ་ལས༔ རྡོ་རྗེ་དཀར་མོ་སེང་གེའི་གདོང་༔ ཕྱག་གཡས་རྡོ་རྗེ་གྲི་གུག་ཕྱར༔ གཡོན་པས་ཐོད་ཁྲག་ཐུགས་ཀར་ [6b] བསྣམས༔ རང་འདྲ་བྱེ་བ་འབུམ་གྱིས་བསྐོར༔ ལྷོ་རུ་ཡོན་ཏན་སྤྲུལ་པ་ལས༔ རིན་ཆེན་སེར་མོ་སེང་གེའི་གདོང་༔ ཕྱག་གཡས་རིན་ཆེན་གྲི་གུག་ཕྱར༔ གཡོན་པས་ཐོད་ཁྲག་ཐུགས་ཀར་བསྣམས༔ རང་འདྲ་བྱེ་བ་འབུམ་གྱིས་བསྐོར༔ ནུབ་ཏུ་གསུང་གི་སྤྲུལ་པ་ལས༔ པདྨ་དམར་མོ་སེང་གེའི་གདོང་༔ ཕྱག་གཡས་པདྨ་གྲི་གུག་ཕྱར༔ གཡོན་པས་ཐོད་ཁྲག་ཐུགས་ཀར་བསྣམས༔ རང་འདྲ་བྱེ་བ་འབུམ་གྱིས་བསྐོར༔ བྱང་དུ་སྐུ་ཡི་སྤྲུལ་པ་ལས༔ སངས་རྒྱས་མཁའ་འགྲོ་སེང་གདོང་མཐིང་༔ ཕྱག་གཡས་འཁོར་ལོ་གྲི་གུག་ཕྱར༔ གཡོན་པས་ཐོད་ཁྲག་ཐུགས་ཀར་བསྣམས༔ རང་འདྲ་བྱེ་བ་འབུམ་གྱིས་བསྐོར༔ འབུམ་ཕྲག་ཡངས་པའི་མཁའ་འགྲོ་རྣམས༔ རུས་རྒྱན་དྲིལ་གཡེར་ཅོད་པན་དང་༔ ཐོད་པ་ཚར་གསུམ་ཕྲེང་བས་བརྒྱན༔ ཞབས་གཉིས་གར་སྟབས་ཁ་ཊྭཱཾ་ཀ༔ སེང་སྐད་སྒྲོགས་པས་ས་གསུམ་གཡོ༔ ཡེ་ཤེས་བསྐལ་པའི་མེ་དཔུང་འབར༔ པད་ཉིའི་གདན་ལ་རཱུ་ཏྲ་གནོན༔ ཕྱི་རིམ་པདྨ་འདབ་སྨད་ལས་སྐབས་སུ་འཁོར་ལོ་རྩིབས་བརྒྱད་པ་བསྒོམ་དགོས། མཆན། བརྒྱད་སྟེང་༔ ལས་བྱེད་རིགས་བཞིའི་མཁའ་འགྲོ་ནི༔ ཤར་དུ་དཀར་མོ་ཁྱུང་གདོང་མ༔ རྡོ་རྗེ་གཡས་ལ་ཐོད་ཁྲག་གཡོན༔ ལྷོ་རུ་སེར་མོ་སྡིག་པའི་གདོང་༔ བེ་ཅོན་གཡས་ལ་ [7a] ཐོད་ཁྲག་གཡོན༔ ནུབ་ཏུ་དམར་མོ་འཕར་གཏོང་མ༔ རལ་གྲི་གཡས་ལ་ཐོད་ཁྲག་གཡོན༔ བྱང་དུ་ལྗང་མོ་ཁྱི་ཡི་གདོང་༔ རྒྱ་གྲམ་གཡས་ལ་ཐོད་ཁྲག་གཡོན༔ ཀུན་ཀྱང་རྡོ་རྗེའི་གཤོག་པ་གདེངས༔ ཞབས་གཉིས་གར་སྟབས་རུས་རྒྱན་གསོལ༔ པད་ཉིའི་གདན་ལ་བྱད་མ་གནོན༔ རང་སྐད་སྒྲོགས་པས་ས་གསུམ་གཡོ༔ འཁོར་བའི་འཁྲུལ་འཁོར་དབྱིངས་སུ་འཇིག༔ ཤར་ལྷོར་དམ་ཚིག་མཁའ་འགྲོའི་གཙོ༔ དམར་ནག་དབང་དྲག་འཛོམ་པའི་ཞལ༔ འུག་གདོང་རུ་མཚོན་སྙིང་ཞགས་བསྣམས༔ ལྷོ་ནུབ་ཐམས་ཅད་མཁའ་འགྲོའི་གཙོ༔ བྱ་རོག་གདོང་ཅན་ཤ་སྐད་སྒྲོགས༔ སེར་ནག་འཁོར་ལོ་ཐོད་ཁྲག་བསྣམས༔ ནུབ་བྱང་ཤ་ཟ་མཁའ་འགྲོའི་གཙོ༔ དུར་བྱའི་གདོང་ཅན་འཇིགས་པའི་གཟུགས༔ ལྗང་ནག་གློ་སྙིང་རྒྱུ་ཞུགས་བསྣམས༔ བྱང་ཤར་འཇིག་རྟེན་མཁའ་འགྲོའི་གཙོ༔ མཐིང་ནག་སྦྲུལ་གྱི་མགོ་བོ་ཅན༔ གྲི་གུག་གཡས་ལ་ནད་རྐྱལ་གཡོན༔ ཀུན་ཀྱང་གར་སྟབས་རུས་རྒྱན་ཅན༔ བྱད་མ་གདུག་པའི་སྤྱི་ནས་གནོན༔ རྦད་འདྲེ་ཧུར་ཐུམ་གཏོང་བ་མོ༔ ཧ་ཧེ་བྷྱོ་ཟློག་ཕཊ་སྒྲ་སྒྲོགས༔ སྲིད་པ་མ་མོའི་ཚོགས་ཀྱིས་བསྐོར༔ མཁའ་ལ་ཐོགས་མེད་གོམ་གྱིས་བསྒྲོད༔ ཉིན་མཚན་དུས་དྲུག་རྣམས་སུ་རྒྱུ༔ ལེགས་ཉེས་གཉིས་ཀྱི་སྟངས་འཛིན་ཅིང་༔ དམ་ཚིག་གཉན་པོའི་ [7b] རྗེས་ཡང་གཅོད༔ མཐའ་སྐོར་གནས་མཆོག་ཉེར་བཞི་དང་༔ ཡུལ་ཆེན་སོ་གཉིས་དུར་ཁྲོད་བརྒྱད༔ ཧེ་རུ་ཀ་ཡི་གནས་བཅུ་ན༔ བཞུགས་པའི་མ་དང་མཁའ་འགྲོའི་ཚོགས༔ ལྷ་མིའི་ཁྲོམ་ཚོགས་ལྟ་བུར་བསྐྱེད༔ ཤར་སྒོར་རྡོ་རྗེ་པུ་ཤུད་གདོང་༔ ལྕགས་ཀྱུ་གཡས་ལ་གྲི་གུག་གཡོན༔ ལྷོ་སྒོར་རཏྣ་དུར་བྱའི་གདོང་༔ ཞགས་པ་གཡས་ལ་སྡིགས་མཛུབ་གཡོན༔ ནུབ་སྒོར་པདྨ་སྲིན་བྱའི་གདོང་༔ ལྕགས་སྒྲོགས་གཡས་ལ་སྤུ་གྲི་གཡོན༔ བྱང་སྒོར་ཀརྨ་ཁྲ་ཡི་གདོང་༔ དྲིལ་བུ་གཡས་ལ་མེ་དཔུང་གཡོན༔ དཀར་སེར་དམར་དང་ལྗང་གུའི་མདོག༔ ཀུན་ཀྱང་འདོར་སྟབས་རུས་རྒྱན་ཅན༔ མེ་དཔུང་དམར་ནག་འབར་འཁྲིགས་ཀློང་༔ མེ་ལས་མེ་སྟག་འཕྲོ་བ་བཞིན༔ རང་འདྲའི་སྤྲུལ་པ་དཔག་མེད་འགྱེད༔ ཉོན་མོངས་རང་གཟུགས་བདུད་བཞི་གནོན༔ དེ་ལྟར་མཁའ་འགྲོ་མ་ཡི་ཚོགས༔ ཀུན་ཀྱང་རལ་པ་གསིག་པའི་གསེབ༔ གཞན་གྱིས་མི་ཐུབ་དྲག་ཤུལ་ཅན༔ རང་འདྲའི་མཁའ་འགྲོས་སྣང་སྲིད་ཁེངས༔ དེ་ལྟར་འབུམ་ཕྲག་མཁའ་འགྲོ་མའི༔ སྤྱི་བོར་ཨོཾ་དང་མགྲིན་པར་ཨཱཿ ཐུགས་ཀར་ཧཱུྃ་དང་རང་སྲོག་ལས༔ འོད་འཕྲོས་སྐུ་གསུམ་ཞིང་ཁམས་ནས༔ རྟེན་དང་བརྟེན་པའི་དཀྱིལ་འཁོར་ལྷའི༔ ཐུགས་དམ་རྒྱུད་བསྐུལ་མཁའ་འགྲོ་མའི༔ རྣམ་པར་གཟུགས་ཀྱི་སྐུར་བཞེངས་ཏེ༔ ཁ་བ་བབས་ [8a] ལྟར་སྤྱན་དྲངས་ནས༔ ཆུ་ལ་ཆུ་བཞག་ཇི་བཞིན་དུ༔ བསྐྱེད་པའི་ལྷ་དང་གཉིས་མེད་གྱུར༔ ཅེས་གསལ་གདབ། གཉིས་པ་ཡེ་ཤེས་པ་སྤྱན་འདྲེན་པ་ནི། ཁྱད་པར་གྱི་སྤོས་དང་ཐོད་རྔ་སོགས་རོལ་མོའི་སྒྲ་དང་གདུང་བའི་དབྱངས་ཀྱིས་བསྐུལ་ཏེ། ཧཱུྃ་ཧྲཱིཿ འོག་མིན་གནས་དང་མཁའ་སྤྱོད་གནས༔ གསང་ཆེན་རོལ་པའི་དུར་ཁྲོད་ནས༔ ཆོས་སྐུ་ཡུམ་ཆེན་ཀུན་བཟང་མོ༔ ལོངས་སྐུ་མཁའ་འགྲོ་སེང་གེའི་གདོང་༔ གསང་བ་ཡེ་ཤེས་མཁའ་སྤྱོད་མ༔ སྤྲུལ་སྐུ་ཡེ་ཤེས་མཚོ་རྒྱལ་མ༔ ལས་དབང་མོ་དང་མནྡྷ་ར༔ འབུམ་ཕྲག་མཁའ་འགྲོའི་ཚོགས་དང་བཅས༔ ཡེ་ཤེས་དབྱིངས་སུ་ཐ་མི་དད༔ མ་ངེས་གང་འདུལ་ཐབས་དུ་མས༔ གདུལ་བྱ་གདུལ་དཀའ་འདུལ་མཛད་པའི༔ སྤྲུལ་དང་ཡང་སྤྲུལ་ཉིང་སྤྲུལ་དང་༔ ཡེ་ཤེས་འཇིག་རྟེན་མཁའ་འགྲོའི་ཚོགས༔ ཆོས་ཀྱི་དབྱིངས་ལས་སྐུར་བཞེངས་ལ༔ སྒྲུབ་མཆོག་བྱིན་གྱིས་རློབ་པ་དང་༔ མཆོག་ཐུན་དངོས་གྲུབ་སྩོལ་བ་དང་༔ འཁོར་བ་དབྱིངས་སུ་སྒྲོལ་བའི་ཕྱིར༔ གནས་འདིར་སྤྱན་འདྲེན་གཤེགས་སུ་གསོལ༔ དམ་ཚིག་དབང་གིས་སྤྱན་འདྲེན་ནོ༔ བརྩེ་བའི་ཐུགས་ཀྱིས་གཤེགས་སུ་གསོལ༔ མ་ཚོགས་མཁའ་འགྲོ་རྒྱ་མཚོའི་ཚོགས༔ ནམ་མཁར་སྐར་ཚོགས་ལྟར་འཁྲིགས་ཤིང་༔ བར་སྣང་སྤྲིན་ཕུང་བཞིན་འཐིབ་སྟེ༔ ས་གཞིར་ཆར་ཆེན་འབེབས་ [8b] པ་བཞིན༔ སྒྱུ་འཕྲུལ་གར་གྱིས་གཤེགས་སུ་གསོལ༔ ཨོཾ་ཀརྨ་ཌཱ་ཀི་ནཱི་སེང་ཧ་མུ་ཁ་བཾ་ཧ་རི་ནི་ས་ཛྙཱན་ས་མ་ཡ་ལོ་ཀ་ཌཱ་ཀི་ནི༔ ཨོཾ་བཛྲ་ས་མ་ཡ་ཛཿ ཨཱཿབཛྲ་ས་མ་ཡ་ཛཿ ཧཱུྃ་བཛྲ་ས་མ་ཡ་ཛཿ ཞེས་སྤྱན་དྲངས། གསུམ་པ་བཞུགས་སུ་གསོལ་བ་ནི། ཧཱུྃ་ཧྲཱིཿ གདོད་ནས་རང་རིག་ཆོས་ཀྱི་སྐུ༔ དམ་ཚིག་པ་དང་ཡེ་ཤེས་པ༔ གཉིས་མེད་ལྷུན་རྫོགས་རྡོ་རྗེའི་ངང་༔ འགྱུར་མེད་ཆོས་སྐུའི་ངོ་བོར་བཞུགས༔ བཛྲ་ས་མ་ཡ་ཏིཥྛ་ལྷན༔ བཞི་པ་ཕྱག་འཚལ་བ་ནི། ཧཱུྃ་ཧྲཱིཿ སྐྱེ་མེད་ཡེ་ཤེས་ཀུན་བཟང་མོ༔ འཁོར་འདས་དབང་བསྒྱུར་སེང་གེའི་གདོང་༔ ཕྱོགས་མེད་མཚོ་རྒྱལ་མནྡྷ་ར༔ ཡེ་ཤེས་དང་ནི་འཇིག་རྟེན་གྱི༔ མ་ཚོགས་མཁའ་འགྲོ་རྒྱ་མཚོའི་ཚོགས༔ རང་ངོར་རིག་པས་བརྡ་ཕྱག་འཚལ༔ ན་མོ་པཱུ་རུ་ཤ་ཡ་ཧོཿ ཨ་ཏི་པུ་ཧོཿ པྲ་ཏཱི་ཙྪ་ཧོཿ ལྔ་པ་མཆོད་པ་འབུལ་བ་ལ། ཐུན་མོང་ཕྱི་ཉེར་སྤྱོད་འདོད་ཡོན་གྱི་མཆོད་པ་ནི། ཧཱུྃ་ཧྲཱིཿ ངར་འཛིན་གདངས་ལས་སྐྱེས་པ་ཡི༔ གཟུང་བ་ཡུལ་གྱི་ཆོས་སོ་ཅོག༔ མཆོད་སྤྲིན་མི་ཟད་གཏེར་དུ་ཤར༔ ཉེར་སྤྱོད་བདུན་དང་འདོད་ཡོན་ལྔ༔ ཡེ་ཤེས་མཁའ་འགྲོའི་དཀྱིལ་འཁོར་ལ༔ ཚོགས་གཉིས་རྫོགས་ཕྱིར་མཆོད་པ་འབུལ༔ གསང་བ་མཆོག་གི་དངོས་གྲུབ་སྩོལ༔ ཨོཾ་བཛྲ་ཨརྒྷཾ་བཱདྱཾ་སོགས་ ཤཔྡཔཱུ་ཛ་ཧོཿ རཱུ་པ་ཤཔྡ་གནྡྷེ་ར་ས་སྤརྴེ་པཱུ་ཛ་ཧོཿ ནང་མཆོད་སྨན་རཀ་གཏོར་མ་འབུལ་བ་ནི། [9a] ཨོཾ་ཨཱཿཧཱུྃ༔ ཡེ་ཤེས་བྷནྡྷ་ཡངས་པའི་ནང་༔ རྩ་བརྒྱད་སྟོང་སྤྱར་སྨན་ཆེན་པོ༔ ཡེ་ཤེས་འོད་ཟེར་རླངས་པ་འཕྱུར༔ འདོད་ཡོན་མཆོད་པའི་སྤྲིན་ཕུང་འཁྲིགས༔ སྐུ་གསུམ་མཁའ་འགྲོའི་ཚོགས་ལ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ མ་ཧཱ་སརྦ་པཉྩ་ཨ་མྲྀ་ཏ་ལ་ཁཱ་ཧིཿ ཧཱུྃ་ཧྲཱིཿ ཡེ་ཤེས་དབྱིངས་ཀྱི་བྷནྡྷ་རུ༔ འཁོར་བ་དབྱིངས་བསྒྲལ་རཀྟ་འཁྱིལ༔ སྐུ་གསུམ་མཁའ་འགྲོའི་ཚོགས་ལ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ མ་ཧཱ་རཀྟ་ལ་ཁཱ་ཧི༔ ཧཱུྃ་ཧྲཱིཿ ཕྱི་སྣོད་འཇིག་རྟེན་གཏོར་གཞོང་དུ༔ ནང་བཅུད་སེམས་ཅན་གཏོར་མར་བཤམས༔ སྐུ་གསུམ་མཁའ་འགྲོའི་ཚོགས་ལ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ མ་ཧཱ་རཀྟ་ལ་ཁཱ་ཧི༔ གསང་བ་སྦྱོར་སྒྲོལ་གྱི་མཆོད་པ་ནི། ཧཱུྃ་ཧྲཱིཿ སྣང་བ་ཡབ་ལ་སྟོང་པ་ཡུམ༔ ཡབ་ཡུམ་སྦྱོར་བའི་བྱེད་ལས་ཀྱིས༔ བདེ་བའི་རོ་སྙོམས་མཆོད་པ་འབུལ༔ མི་བསྒྲལ་ཤུགས་ཀྱིས་སྒྲོལ་བ་ཆེ༔ འཁོར་བ་དབྱིངས་བསྒྲལ་ཤ་རུས་ཁྲག༔ སྐུ་གསུམ་མཁའ་འགྲོའི་ཚོགས་ལ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ ཨོཾ་བོ་དྷི་ཙིཏྟ་ཏ་ན་ག་ན་གུ་ཧྱ་སརྦ་པཱུ་ཛ་ཧོཿ ཞེས་མཆོད། དྲུག་པ་བསྟོད་པ་བྱ་བ་ནི། ཧཱུྃ་ཧྲཱིཿ ཆོས་སྐུའི་དབྱིངས་ན་ཀུན་བཟང་མོ༔ ལོངས་སྐུ་གསང་བ་ཡེ་ཤེས་དང་ [9b] སྤྲུལ་སྐུ་ཡེ་ཤེས་མཚོ་རྒྱལ་མ༔ སྤྲུལ་པ་གར་གྱི་སྒྱུ་འཕྲུལ་ངོམས༔ གསང་ཆེན་མཁའ་འགྲོའི་དཀྱིལ་འཁོར་ལ༔ གཉིས་མེད་ཡིད་ཀྱིས་ཕྱག་འཚལ་བསྟོད༔ རབ་འབྱམས་རྒྱལ་བའི་ཡུམ་ཆེན་མོ༔ ལོངས་སྤྱོད་རྫོགས་པའི་སྐུར་སྟོན་པ༔ མ་གཅིག་གསང་བ་ཡེ་ཤེས་ཀྱི༔ སྐུ་ཡི་སྤྲུལ་པས་འཁོར་འདས་ཁྱབ༔ གསུང་གི་ང་རོས་ཁམས་གསུམ་དབང་༔ ཐུགས་ལས་རབ་འབྱམས་མཁའ་འགྲོ་འགྱེད༔ ཡོན་ཏན་སྤྲུལ་པས་ལོག་རྟོག་འདུལ༔ ཕྲིན་ལས་གར་གྱིས་འཁོར་བ་འཇོམས༔ རང་བྱུང་ཡེ་ཤེས་མཁའ་འགྲོ་མ༔ རང་ངོར་རིག་པས་ཕྱག་འཚལ་བསྟོད༔ ཆོས་སྐུ་ཡུམ་ཆེན་ངོ་བོ་ཉིད༔ ལོངས་སྐུ་མཁའ་འགྲོ་ཀུན་གྱི་གཞི༔ སྤྲུལ་སྐུ་མཁའ་འགྲོའི་སྤྱི་རྗེ་མོ༔ རང་སེམས་ཆོས་ཉིད་རོལ་པ་རུ༔ གནས་དག་ཡེ་རིག་སྟོང་གསལ་གྱི༔ གཞི་ལས་འཇིགས་མཛད་སེང་གེའི་གདོང་༔ མ་ངེས་སྤྲུལ་པའི་ཆོ་འཕྲུལ་གྱིས༔ ལ་ལ་བུད་མེད་རྒན་མོ་ལ༔ ལུས་པོ་སྔོ་ལ་གཉེར་མ་སྡུད༔ དབུ་སྐྲ་སེར་པོ་ལྟག་པར་བཅིང་༔ ཁ་ན་སོ་མེད་ཧ་ཧ་སྒྲོགས༔ མིག་གཉིས་བགྲད་ཅིང་ཁ་མཆུ་བརྡབ༔ རྐང་པ་ས་ལ་ཁྱོར་ཞིང་འགྲོ༔ ལག་ན་རྦ་ཡི་དབྱུག་པ་ཐོགས༔ ལ་ལ་བུད་མེད་གཞོན་ནུ་མ༔ མཛེས་ཤིང་ཡིད་འོང་ཀུན་ཏུ་རྒྱུ༔ གཟུགས་མཛེས་ངོམས་ [10a] ཤིང་སྙན་པའི་སྒྲས༔ སྐྱེ་བོའི་ཚོགས་ཀྱི་བློ་ཡིད་འགུགས༔ ལ་ལ་སྔོ་སངས་ནམ་མཁའི་མདོག༔ སྒྲུབ་ལ་དགའ་ཞིང་མཐུན་རྐྱེན་བསྒྲུབ༔ ལ་ལ་ཤ་ཟ་མཆེ་གཙིགས་མ༔ རང་གི་ཁྱོ་ཡི་ཤ་ལ་ཟ༔ དེ་འདྲའི་སྣ་ཚོགས་སྤྱོད་པ་སྤྱོད༔ སྐལ་ལྡན་རྣམས་ལ་བརྡ་ཆོས་སྟོན༔ སྐལ་མེད་རྣམས་ལ་ཆད་པ་གཅོད༔ ཅིང་ཤེས་ཅིང་བྱེད་མཁའ་འགྲོའི་ཚོགས༔ དེ་དག་གང་དང་གང་ལས་སྐྱེས༔ མཁའ་འགྲོའི་གཙོ་མོ་ཁྱོད་ཀྱི་འཕྲུལ༔ ཐབས་རྣམས་དུ་མས་སྟོང་ཉིད་ཀྱི༔ དབྱིངས་སུ་སྦྱོར་བའི་མ་མ་ཆེ༔ མ་ཆེན་ཁྱོད་ལ་བདག་བསྟོད་དོ༔ ཁྱོད་ཉིད་དབྱིངས་ལས་མ་གཡོས་ཀྱང་༔ བདག་ཅག་འཁྲུལ་པ་མངོན་ཞེན་གྱིས༔ འཁྲུལ་པའི་སེམས་ཅན་སྙིང་རེ་རྗེ༔ ཐུགས་དམ་བསྐུལ་ལོ་དུས་ལ་བབ༔ མཆོག་ཐུན་དངོས་གྲུབ་སྩོལ་བ་དང་༔ གཏན་བདེའི་ས་ལ་ད་དྲོངས་ཤིག༔ བསྟོད་ཅིང་ཕྲིན་ལས་བཅོལ་བ་འདིས༔ སྣོད་མེད་ལོག་ལྟའི་དབང་གྱུར་པའི༔ འཁྲུལ་པའི་སེམས་ཅན་ཐམས་ཅད་ཀུན༔ ཚེ་འདིར་འཇིགས་དང་སྡུག་བསྔལ་ལས༔ སྒྲོལ་ནས་དག་པ་མཁའ་སྤྱོད་དུ༔ འདྲོངས་པའི་ཨ་མ་སྟོབས་ལྡན་ཁྱོད༔ མ་གཡེལ་མ་འགྱངས་གཅེས་པའི་བུ༔ ཐུགས་རྗེས་ཟུངས་ཤིག་ཐུགས་དམ་བསྐུལ༔ དུས་ལ་བབ་བོ་མ་གཡེལ་ཅིག༔ [10b] ཁྱོད་ཀྱི་ཡོན་ཏན་ཡོངས་རྫོགས་ཀྱི༔ ཚུལ་དྲན་བསྟོད་པ་བྱས་པ་འདིར༔ དགོངས་ལ་བསམ་དོན་ཡོངས་གྲུབ་མཛོད༔ ལུས་ཀྱིས་བསྟོད་དོ་ཕྱག་ཀྱང་འཚལ༔ ངག་གིས་བསྟོད་དོ་གླུ་དབྱངས་སྒྲོགས༔ སེམས་ཀྱིས་བསྟོད་དོ་ཡོན་ཏན་དྲན༔ སྐུ་གསུང་ཐུགས་ཀྱི་བསྟོད་པ་འདིས༔ མཁའ་འགྲོ་མཉེས་ཤིང་དངོས་གྲུབ་སྩོལ༔ མ་དག་སྒོ་གསུམ་རྡོ་རྗེ་གསུམ༔ རོལ་པ་ཆེན་པོར་བྱིན་གྱིས་རློབས༔ ཞེས་བསྟོད། བདུན་པ་བཤགས་པ་བྱ་བ་ནི། ཧོཿ འཁོར་འདས་སྤྱི་དཔལ་ཆེན་མོ་དགོངས༔ བདག་ནི་ཚེ་རབས་ཐོག་མེད་ནས༔ མ་རིག་ཉོན་ཤེས་དབང་གྱུར་ཏེ༔ སྒོ་གསུམ་འཁོར་བར་འཆོལ་བ་ཀུན༔ མི་འཆབ་མི་སྦེད་མཐོལ་ཞིང་བཤགས༔ དག་ཅིང་ཚངས་པར་མཛད་ནས་ཀྱང་༔ རྡོ་རྗེ་འཛིན་པའི་ས་རུ་སྐྱོལ༔ ཨོཾ་བཛྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་བཟླའོ། །བརྒྱད་པ་ཛ་པྲ་བཟླ་བ་ལ་གསུམ་ལས། དང་པོ་བསྙེན་པ་ནི། ཧཱུྃ་ཧྲཱི༔ སྒོ་གསུམ་གནས་དག་ཡེ་ཤེས་མཁའ་འགྲོ་རུ༔ རྣམ་པར་སྨིན་པའི་ཡེ་ཤེས་མཁའ་འགྲོ་མ༔ ལྗང་གསལ་གྲི་ཐོད་འཛིན་མའི་ཐུགས་ཀློང་དུ༔ ཀུན་ཏུ་བཟང་མོ་མཐིང་ནག་སྐྱིལ་ཀྲུང་བཞུགས༔ གཅེར་བུ་རྒྱན་མེད་མཉམ་གཞག་འོད་ཕུང་འབར༔ དེ་ཡི་ཐུགས་ཀར་ཉི་ཟླའི་གྭའུ་རུ༔ དྭངས་མ་ལྔ་ལྡན་ཐིག་ལེ་གསལ་འཚེར་ཀློང་༔ ཧཱུྃ་ཡིག་ལྗང་ [11a] གསལ་མཐའ་མར་སྔགས་གཡོན་འཁོར༔ འོད་ཟེར་ཡར་འཕྲོས་རྒྱལ་བ་མཆོད་པས་མཉེས༔ མཁྱེན་བརྩེ་ནུས་པའི་ཐུགས་རྗེ་བྱིན་རླབས་དང་༔ དབང་དང་དངོས་གྲུབ་འོད་ཟེར་ཚུར་འདུས་ཏེ༔ རང་ཉིད་ཡེ་ཤེས་མཁའ་འགྲོའི་ཐུགས་ཀར་ཐིམ༔ མར་འཕྲོས་འགྲོ་བའི་རྒྱུད་སྦྱངས་ཚེ་བསོད་ནམས༔ འོད་ཀྱི་རྣམ་པར་བསྡུས་ཏེ་རང་ལ་ཐིམ༔ གཟི་བྱིན་རབ་འབར་ནུས་པ་རྩལ་ལྡན་གྱིས༔ འཁོར་འདས་ཡོངས་ལ་དབང་བསྒྱུར་དབང་ཐོབ་ཅིང་༔ སྐུ་གསུམ་ཡེ་ཤེས་མཉམ་སྦྱོར་བདེ་ཆེན་ཀློང་༔ ཨོཾ་ཀརྨ་ཌཱ་ཀི་ནཱི་སེང་ཧ་མུ་ཁ་ཧཱུྃ༔ ཨཿཀཿསཿམཿརཿཙཿཤཿདཿརཿསཿམཿརཿཕཊ༔ ཞེས་བཟླ། གཉིས་པ་སྒྲུབ་པ་ནི། ཧཱུྃ་ཧྲཱིཿ གཞི་དབྱིངས་རང་ངོར་སངས་པའི་ཆོས་སྐུར་འཕོས༔ དབྱིངས་ལས་མ་གཡོས་གཟུགས་ཀྱི་སྐུར་བཞེངས་པ༔ ལོངས་སྤྱོད་རྫོགས་སྐུ་སེང་གེའི་གདོང་ཅན་མའི༔ རོལ་པའི་གར་གྱིས་རྩལ་སྣང་སྒྱུ་མའི་འཕྲུལ༔ སོ་སོའི་ཐུགས་ཀར་རང་སྲོག་ཡིག་ལ༔ སྔགས་ཕྲེང་གཡོན་དུ་འཁོར་བའི་འོད་ཟེར་གྱིས༔ རིགས་དང་དཀྱིལ་འཁོར་རྒྱལ་བ་སྲས་བཅས་པ༔ མ་ལུས་ཡེ་ཤེས་མཁའ་འགྲོའི་རྣམ་པ་རུ༔ མཚོ་ལ་ཁ་ཆར་བབས་པ་ཇི་བཞིན་དུ༔ དབྱིངས་ལས་སྐུར་བཞེངས་བདག་མདུན་རྣམས་ལ་ཐིམ༔ སྣང་གྲགས་རིག་ [11b] གསུམ་ལྷ་སྔགས་ཆོས་ཉིད་དང་༔ ཨོཾ་ཀརྨ་ཌཱ་ཀི་ནཱི་སེང་ཧ་མུ་ཁ་ཧཿརིཿནིཿསཿཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿསརྦ་སིདྡྷི་ཕ་ལ་ཧཱུྃ༔ ཞེས་བསྙེན་སྒྲུབ་ཀྱི་འགྲོས་དང་སྦྱར་ཏེ་བཟླ། གསུམ་པ་ལས་སྦྱོར་ལ་གཉིས་ལས། དང་པོ་བདག་བསྲུང་བ་ནི། རང་ཉིད་ཡེ་ཤེས་མཁའ་འགྲོ་མའི་ཐུགས་ཀ་ནས་འོད་ཟེར་འཕྲོས་པ་འབུམ་ཕྲག་ཡངས་པའི་མཁའ་འགྲོ་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པའི་ཐུགས་ཀར་ཕོག༔ དེ་དག་གི་གནས་གསུམ་ལས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུ་དུས་གསུམ་གྱི་རྒྱལ་བ་སྲས་དང་བཅས་པ་ཞི་ཁྲོ་རྡོ་རྗེ་དབྱིངས་ཀྱི་དཀྱིལ་འཁོར་ཐམས་ཅད་ཀྱི་མཐུ་སྟོབས་ནུས་པ་གཟི་བརྗིད་བྱིན་རླབས་དབང་དང་དངོས་གྲུབ་ཐམས་ཅད་བསྡུས་ཏེ་རང་ལ་ཐིམ་པས༔ ཕྲིན་ལས་རབ་འབྱམས་ཐམས་ཅད་ལ་མངའ་དབང་རྫོགས་པའི་མཐུ་དང་ནུས་པའི་དབང་བསྐུར་ཞིང་རྒྱས་གདབ་པར་བསམ་ལ། རྩ་སྔགས་ཅུང་ཟད་བཟླས་མཐར། བདག་མདུན་རྣམས་ཀྱི་ཐུགས་ཀ་ནས་འོད་དང་འོད་ཕུང་ཆབ་གཅིག་ཏུ་འཕྲོས་ཏེ་སྲུང་བའི་འཁོར་ལོ་ཡེ་ཤེས་ལྔའི་རང་བཞིན་ཅན་ཕྱི་འཁོར་ལོ་རྩིབས་སྟོང་གི་རྣམ་པ་ལ༔ ནང་གཞལ་ཡས་ཁང་ཚད་དང་མཚན་ཉིད་རྫོགས་པའི་དབུས་སུ་བདག་དང་བསྲུང་བྱ་ཐམས་ཅད་སྐུ་གསུམ་ཡེ་ཤེས་ཀྱི་མཁའ་འགྲོའི་རོལ་པར་དམིགས་ལ། ཨོཾ་ཀརྨ་ཌཱ་ཀི་ནཱི་སེང་ཧ་མུ་ཁ་ཧ་རི་ནི་ [12a] སཿཨཿཀཿསཿམཿརཿཙཿཤཿདཿརཿསཿམཿརཿཡཿཕཊ༔ བཛྲ་རཀྵ་རཀྵ་ཡེ་སྭཱ་ཧཱ༔ ཞེས་བཟླ། གཉིས་པ་བཟློག་པ་ནི། སྲུང་འཁོར་གྱི་ཕྱི་རོལ་དུ་ཟློག་པའི་འཁོར་ལོ་ནང་འོག་ཐམས་ཅད་རྡོ་རྗེའི་ས་གཞི༔ ཕྱི་ཁྱམས་གནམ་ལྕགས་ཀྱི་འཁོར་ལོ་རྩིབས་སྟོང་གཡོན་དུ་འཁོར་བས་སྲུང་ཟློག་གི་འཁོར་ལོ་སོ་འཐབ་པའི་བར་ནས་གནོད་བྱེད་ཕོ་གདོན་མོ་གདོན་ཀླུ་གདོན་བྱད་མ་རྦོད་གཏོང་ལྷ་དང་བཅས་པ་ཐམས་ཅད་དམར་ཉི་ལི་ལི་གཏུབ་ཅིང་འཐག་སྟེ༔ ལས་མཁན་ཤ་ཟ་སྲིན་མོ་རྣམས་ཀྱིས་ཧབ་ཧབ་ཟ་ཞིང་༔ མེ་དཔུང་འབར་བས་བསྲེགས༔ མཆོན་ཆ་དང་ཐུན་རྫས་སྣ་ཚོགས་ཀྱིས་གཏུབ༔ སྤུ་གྲིའི་རླུང་གིས་གཏོར་ཏེ་མཐའི་རྒྱ་མཚོའི་ཕ་མཐའ་ལྕགས་རི་ནག་པོའི་རྒྱབ་ཏུ་བསྐྲད་ནས་རྗེས་ལྷག་ཙམ་ཡང་མེད་པར་བསྒོམ་ལ། ཀཿསཿམཿརཿཙཿཤཿདཿརཿསཿམཿརཿཡཿཕཊ༔ གནོད་བྱེད་སརྦ་ཤ་ཏྲཱུཾ་མཱ་ར་ཡ་བྷྱོ་ཟློག ཅེས་ཅི་མང་བཟླས་མཐར། བདག་ཉིད་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གྱི་ཐུགས་ཀ་ནས་ལས་བྱེད་ཀྱི་ཁྲོ་མོ་ཤར་དུ་རྡོ་རྗེ་མཁའ་འགྲོ་དཀར་མོ་བྱེ་བ་འབུམ་སྡེ༔ ལྷོ་རུ་རིན་ཆེན་མཁའ་འགྲོ་སེར་མོ་བྱེ་བ་འབུམ་སྡེ༔ ནུབ་ཏུ་པདྨ་མཁའ་འགྲོ་དམར་མོ་བྱེ་བ་འབུམ་སྡེ༔ བྱང་དུ་ལས་ཀྱི་མཁའ་འགྲོ་ལྗང་མོ་བྱེ་བ་འབུམ་སྡེ༔ སྟེང་འོག་དང་མཚམས་བཞིར་ [12b] སངས་རྒྱས་མཁའ་འགྲོ་མཐིང་ནག་བྱེ་བ་འབུམ་གྱི་སྡེ་རྣམས་སྤྲོས་ཏེ༔ ཀུན་ཀྱང་སྐུ་རྔམ་བརྗིད་འཇིགས་པའི་ཆ་ལུགས་ཅན་མི་ལྤགས་ཀྱི་གཡང་གཞི་སྟོད་དུ་ཀླུབས་པ༔ གླང་ཆེན་གྱི་ཀོ་རློན་རྐེད་པར་བགོས་པ༔ སྟག་ལྤགས་རློན་པའི་ཤམ་ཐབས་སྨད་དུ་གསོལ་བ༔ སེང་གེའི་གདོང་པ་ཅན་སེང་སྐད་ཀྱིས་ས་གསུམ་གཡོ་བ༔ མི་མགོ་ཁྲག་འཛག་པ་ལྔ་བཅུའི་དོ་ཤལ་བྱས་པ༔ མེ་དཔུང་དང་ཐུན་མཚོན་གྱི་ཚྭ་ཚྭ་འཕྲོ་བ་ཤ་སྟག་གི་ལག་གཡས་ཟླ་བའི་དཀྱིལ་འཁོར་ངང་སྒ་ར་ར་གཡས་སུ་འཁོར་བ༔ གཡོན་ཉི་མའི་དཀྱིལ་འཁོར་དམར་སྒ་ར་ར་གཡོན་དུ་འཁོར་བའི་ཐལ་མོ་གཉིས་གནམ་ས་ཁེབས་པ་ཙམ་ཁ་བརྡབ་པའི་བར་དུ་གནོད་བྱེད་ཐམས་ཅད་ཐལ་རྡུལ་འཐག་པ་བཞིན་རྗེས་ཤུལ་མེད་པར་བརླག་པར་གྱུར༔ ན་མོ༔ རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་༔ སངས་རྒྱས་ཀྱི་བཀའ༴ ཆོས་ཀྱི༴ དགེ་འདུན༴ བདག་ཉིད་ཡེ་ཤེས་མཁའ་འགྲོ་མ་སེང་གེའི་གདོང་པ་ཅན་གྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི༴ གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་རྣམས་ཀྱི་བཀའ༴ དོན་དམ་ཆོས་ཉིད་ངོ་བོ་གདོད་ནས་དག་ཅིང་༴ ཀུན་རྫོབ་བསླུ་བ་ [13a] མེད་པ་རྒྱུ་འབྲས་ཟབ་མོའི་བདེན་པའི་མཐུས༔ བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་བྱད་ཁ་ཕུར་ཁ་མནན་གཏད་འཁོར་ལོ་སྦྱིན་སྲེག་ངན་སྔགས་རྒོལ་བ་ངན་པ་ཐམས་ཅད་དང་༔ རྨི་ལྟས་མཚན་མ་ངན་པ་ཐམས་ཅད་བྱད་ལས་སྦྱོར་མཁན་དང་སྡང་དགྲ་གནོད་བྱེད་ཀྱི་སྟེང་དུ་བསྒྱུར་ཅིག༔ བཟློག་པར་གྱུར་ཅིག༔ བརླག་པར་གྱུར་ཅིག༔ བསྣུབ་པར་གྱུར་ཅིག༔ མཱ་ར་ཡ་བྷྱོ་བྷྱོ༔ མཱ་ར་ཡ་ཟློག་ཟློག༔ ཨེ་ས་མ་ཡ་བྷྱོ་ཟློག་རྦད་ནན༔ ཞེས་བརྗོད་ཅིང་ཐལ་མོ་བརྡབ༔ བཟླས་པའི་མཐར་མཆོད་བསྟོད་འབུལ་བ་ནི། ཧཱུྃ་ཧྲཱིཿ ངར་འཛིན་གདངས་ལས་སྐྱེས་པ་ཡི༔ གཟུང་བ་ཡུལ་གྱི་ཆོས་སོ་ཅོག༔ མཆོད་སྤྲིན་མི་ཟད་གཏེར་དུ་ཤར༔ ཉེར་སྤྱོད་བདུན་དང་འདོད་ཡོན་ལྔ༔ ཡེ་ཤེས་མཁའ་འགྲོའི་དཀྱིལ་འཁོར་ལ༔ ཚོགས་གཉིས་རྫོགས་ཕྱིར་མཆོད་པ་འབུལ༔ གསང་བ་མཆོག་གི་དངོས་གྲུབ་སྩོལ༔ ཨོཾ་བཛྲ་ཨརྒྷཾ་པཱདྱཾ་སོགས། ཤཔྡ་རཱུ་པ་ཤཔྡ་གནྡྷེ་ར་ས་སྤརྴེ་མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཏ་ན་ག་ན་སརྦ་པཱུ་ཛ་ཧོཿ ཧཱུྃ་ཧྲཱིཿ ཆོས་སྐུའི་དབྱིངས་ན་ཀུན་བཟང་མོ༔ ལོངས་སྐུ་གསང་བ་ཡེ་ཤེས་དང་༔ སྤྲུལ་སྐུ་ཡེ་ཤེས་མཚོ་རྒྱལ་མ༔ སྤྲུལ་པ་གར་གྱི་སྒྱུ་འཕྲུལ་ངོམས༔ གསང་ཆེན་མཁའ་འགྲོའི་དཀྱིལ་ [13b] འཁོར་ལ༔ གཉིས་མེད་ཡིད་ཀྱིས་ཕྱག་འཚལ་བསྟོད༔ ཅེས་མཆོད་བསྟོད་བྱ། དེ་དག་ནི་དངོས་གཞིའི་རིམ་པའོ། །གསུམ་པ་རྗེས་ཀྱི་ལས་རིམ་ལ་བརྒྱད་ལས། དང་པོ་ཚོགས་ཀྱི་མཆོད་པ་ནི། ཐབས་ཤེས་ཀྱི་དམ་རྫས་བཟའ་བཅའ་བཏུང་བའི་དངོས་པོ་ཅི་འབྱོར་བ་བཤམ་ལ། བདུད་རྩིས་བྲན་ཅིང༌། ཨོཾ་སརྦ་དྲ་བྱཾ་ཤྭ་དྷ་ནི་ཧཱུྃ་ཕཊ༔ ཅེས་བསངས། རཾ༔ རཾ་གིས་དངོས་འཛིན་དྲི་མ་སྦྱངས༔ ཡཾ༔ ཡཾ་གིས་མི་གཙང་འབག་རྩོག་གཏོར༔ ཁཾ༔ ཁཾ་གིས་བག་ཆགས་ཐམས་ཅད་བཀྲུས༔ རཾ་ཡཾ་ཁཾ༔ ཨ་ལས་བྷནྡྷ་ཡངས་པའི་ནང་༔ ཨོཾ་ཨཱཿཧཱུྃ་ལས་མཆོད་པའི་སྤྲིན༔ སྐུ་གསུང་ཐུགས་ཀྱི་བདུད་རྩིར་གྱུར༔ སྣང་སྲིད་ཚོགས་ཀྱི་འཁོར་ལོར་བཤམས༔ སྒྱུ་མ་ལྟ་བུའི་ཏིང་འཛིན་གྱིས༔ འདོད་དགུར་འཆར་བའི་ལོངས་སྤྱོད་གཏེར༔ མི་ཟད་ནམ་མཁའ་མཛོད་དུ་སྤེལ༔ བདེ་སྟོང་ཟག་མེད་བདུད་རྩིར་གྱུར༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཡེ་སྭཱ་ཧཱ༔ ཚོགས་ཞིང་སྤྱན་འདྲེན་པ་ནི། ཧཱུྃ་ཧྲཱིཿ ཀུན་ཁྱབ་གདལ་བ་འོག་མིན་གནས༔ སྐྱེ་མེད་ཆོས་སྐུའི་གཞལ་ཡས་ཁང་༔ རང་བཞིན་རྣམ་དག་དགའ་བདེའི་གནས༔ འགགས་མེད་ལོངས་སྤྱོད་རྫོགས་སྐུའི་ཞིང་༔ མི་མཇེད་ཞིང་ཁམས་བྱེ་ཕྲག་བརྒྱ༔ དག་པ་མཁའ་སྤྱོད་གནས་མཆོག་སོགས༔ སྐུ་གསུམ་རྒྱལ་བ་བཞུགས་པའི་གནས༔ རང་སྣང་དོན་གྱི་ [14a] འོག་མིན་ནས༔ རྒྱལ་དང་རྒྱལ་སྲས་སྒྱུ་འཕྲུལ་ཚོགས༔ མཁའ་ལ་འཇའ་ཚོན་ཤར་བ་བཞིན༔ དབྱིངས་ལས་སྐུར་བཞེངས་དུས་ལ་བབ༔ ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ དུས་གསུམ་རྒྱལ་བ་བསྐྱེད་པའི་ཡུམ༔ ཆོས་སྐུ་ཡུམ་ཆེན་ཀུན་བཟང་མོ༔ ཆོས་སྐུའི་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ གསང་ཆེན་རོལ་པའི་དུར་ཁྲོད་ནས༔ མ་མོ་མཁའ་འགྲོ་བསམ་ཡས་འགྱེད༔ ལོངས་སྐུའི་མཁའ་འགྲོ་སེང་གེའི་གདོང་༔ ལོངས་སྐུའི་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན༴ རྔ་ཡབ་ཟ་བྱེད་སྲིན་པོའི་ཡུལ༔ དཔའ་བོ་མཁའ་འགྲོའི་འདུ་གླིང་ནས༔ སྤྲུལ་སྐུ་ཡེ་ཤེས་མཚོ་རྒྱལ་མ༔ སྤྲུལ་སྐུའི་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན༴ མངོན་པར་དགའ་བའི་ཞིང་ཁམས་ནས༔ མེ་ལོང་ཡེ་ཤེས་རང་མདངས་ལས༔ ཤར་ཕྱོགས་རྡོ་རྗེ་སེང་གདོང་མ༔ དཀར་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན༴ དཔལ་དང་ལྡན་པའི་ཞིང་ཁམས་ནས༔ མཉམ་ཉིད་ཡེ་ཤེས་རང་མདངས་ལས༔ ལྷོ་ཕྱོགས་རིན་ཆེན་སེང་གདོང་མ༔ སེར་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན༴ བདེ་བ་ཅན་ [14b] གྱི་ཞིང་ཁམས་ནས༔ སོར་རྟོག་ཡེ་ཤེས་རང་མདངས་ལས༔ ནུབ་ཕྱོགས་པདྨ་སེང་གདོང་མ༔ དམར་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན༴ ལས་རབ་རྫོགས་པའི་ཞིང་ཁམས་ནས༔ བྱ་གྲུབ་ཡེ་ཤེས་རང་མདངས་ལས༔ བྱང་ཕྱོགས་ཀརྨ་སེང་གེ་གདོང་མ༔ ལྗང་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན༔ གཞན་ཡང་དུར་ཁྲོད་གནས་ཡུལ་བདག༔ ཀུན་ཏུ་བཟང་མོའི་རོལ་པའི་གར༔ མ་ཚོགས་མཁའ་འགྲོ་རྒྱ་མཚོར་བཅས༔ ཚོགས་ལ་སྤྱན་འདྲེན༴ སྒྲུབ་མཆོག་བུ་ལ་དབང་བསྐུར་ཅིག༔ འཇའ་ལུས་ཆེན་པོར་བྱིན་གྱིས་རློབས༔ སྒྲུབ་ཁང་འདི་ལ་བྱིན་ཕོབ་ཅིག༔ འོག་མིན་ཞིང་དུ་བྱིན་གྱིས་རློབས༔ སྒྲུབ་རྫས་རྣམས་ལ་མདངས་ཕྱུངས་ཤིག༔ ཚོགས་རྫས་བདུད་རྩིའི་རྒྱ་མཚོ་རུ༔ བསྒྱུར་མཛོད་ཡེ་ཤེས་མཁའ་འགྲོའི་ཚོགས༔ བཛྲ་ས་མ་ཡ་ཛ་ཛཿ ཞེས་སྤྱན་དྲངས་ལ། ཚོགས་ཕུད་ཆ་གསུམ་དུ་སྤྲོས་པའི་དང་པོ་མཆོད་པའི་ཚུལ་དུ་འབུལ་བ་ནི། ཧཱུྃ་ཧྲཱིཿ བླ་མ་རིག་འཛིན་རྒྱ་མཚོ་དང་༔ ཡི་དམ་དཔའ་བོ་དཔའ་མོ་དང་༔ མ་ཚོགས་ཡེ་ཤེས་མཁའ་འགྲོ་ལ༔ ཞལ་ཟས་ཚོགས་ཀྱི་མཆོད་པ་འབུལ༔ ཐུན་མོང་མཆོག་གི་དངོས་གྲུབ་སྩོལ༔ ཨོཾ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་མ་ཧཱ་ག་ཎ་ཙཀྲ་པཱུ་ཛ་ལ་ [15a] ཁཱ་ཧི༔ འདིར་སྤྲོ་ན་ཐུགས་དམ་བསྐང་བའི་རིམ་པ་གཞན་ཡང་བྱའོ། །ཆ་བར་པ་ཉམས་ཆག་བཤགས་པའི་ཆེད་དུ་འབུལ་བ་ནི། ཧཱུྃ་ཧྲཱིཿ འདས་དང་མ་འོངས་ད་ལྟ་རུ༔ བསགས་པའི་ལས་ཉོན་བག་ཆགས་དང་༔ ཉམས་ཆགས་འགལ་འཁྲུལ་ཅི་མཆིས་པ༔ ཚོགས་ཀྱིས་བསྐང་ཞིང་བཤགས་པར་བགྱི༔ ཨོཾ་ག་ཎ་ཙཀྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་ཚར་བར་བརྗོད། ཆ་ཐ་མ་བསྒྲལ་ཞིང་བསྟབ་པ་ནི། ལིངྒ་ལོགས་སུ་བཅུས་པའམ་ཚོགས་ཟན་ཆ་གསུམ་པ་དེའི་འདོད་ཡོན་གྱི་ལྷ་མོ་ཧཱུྃ་གིས་རང་ལ་བསྡུས་ནས༔ ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ༴ ཆོས་ཀྱི༴ དགེ་འདུན་གྱི༴ གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན༴ ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན༴ ཁྱད་པར་བདུད་འདུལ་ཡེ་ཤེས་མཁའ་འགྲོ་སེང་ཧ་མུ་ཁའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ༴ བདེན་པ་ཆེན་པོའི་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ་ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུགས་པའི་ [15b] གཟུགས་ཅན་སྡང་བའི་དགྲ་དང་གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག༔ ནྲྀ་ཏྲི་བཛྲ་ཨངྐུ་ཤ་ཡ་ཛཿ ཛཿཧཱུྃ་བཾ་ཧོཿ ཞེས་བདེན་སྟོབས་ཀྱིས་བཀུག་ལ། ཧཱུྃ་ཧྲཱིཿ ང་ནི་ཡེ་ཤེས་མཁའ་འགྲོ་མ༔ གསང་བ་ཡེ་ཤེས་དྲག་མོའི་སྐུ༔ སྤྱི་དཔལ་ཆེན་མོ་སེང་གེའི་གདོང་༔ སྤྲུལ་པ་ཡེ་ཤེས་སྒྱུ་མའི་འཕྲུལ༔ ཕྲིན་ལས་ཐོག་མེད་དགྲ་བགེགས་འདུལ༔ ཐུགས་ལས་སྤྲུལ་པའི་མཁའ་འགྲོ་འགྱེད༔ ཛཿལས་མཁའ་འགྲོ་ལྕགས་ཀྱུ་མ༔ གཅིག་ལས་བརྒྱ་སྟོང་བྱེ་བ་འབུམ༔ ཁྱེད་ཀྱི་ཐུགས་དམ་དུས་ལ་བབ༔ གདུག་ཅིང་སྡང་སེམས་ལྡན་པ་རྣམས༔ ཁུག་ཅིག་བཛྲ་ཨཾ་ཀུ་ཤ་ཡ་ཛཿ ཧཱུྃཿལས་མཁའ་འགྲོ་ཞགས་པ་མ༔ གཅིག་ལས་བརྒྱ་སྟོང་༴ ཁྱེད་ཀྱི་ཐུགས་དམ༴ གདུག་ཅིང་སྡང་སེམས༴ ཆིངས་ཤིག་རཏྣ་པཱ་ཤ་ཧཱུྃ༔ བཾཿལས་མཁའ་འགྲོ་ལྕགས་སྒྲོག་མ༔ གཅིག་ལས༴ ཁྱེད་ཀྱི༴ གདུག་ཅིང་༴ སྡོམ་ཞིག་པདྨ་སྥོ་ཊ་བཾཿ ཧོཿ ལས་མཁའ་འགྲོ་དྲིལ་བུ་མ༔ གཅིག་ལས༴ ཁྱེད་ཀྱི༴ གདུག་ཅིང་༴ ཕོབ་ཅིག་ཀརྨ་གཎྜེ་ཧོཿ ཞེས་དགུག་འཆིང་སྡོམ་མྱོས་ཀྱི་ལས་བསྐུལ། ཕུར་བུ་ཐོགས་ལ། ཧཱུྃ༔ ང་ནི་གསང་བ་ [16a] ཡེ་ཤེས་མ༔ དྲག་ཁྲོས་བདུད་འདུལ་སེང་གེའི་གདོང་༔ ཕྲིན་ལས་རོལ་གར་གློག་ལྟར་འཁྱུགས༔ གསོད་བྱེད་མཁའ་འགྲོ་ལས་ལ་འགྱེད༔ ཁྱེད་ཀྱི་ཐུགས་དམ་དུས་ལ་བབ༔ བྱད་ཕུར་རྦོད་གཏོང་དབྱེ་རྨོངས་སོགས༔ དྲག་སྔགས་ལས་སྦྱོར་ཕྲ་མ་མཁན༔ གདུག་ཅིང་སྡང་སེམས་ལྡན་པ་རྣམས༔ སོད་ཅིག་ཐུལ་ཞིག་ཕྱེ་མར་རློག༔ རྣམ་ཤེས་ཆོས་ཀྱི་དབྱིངས་སུ་སྤོར༔ ཨོཾ་གུ་ཧྱ་ཛྙཱ་ན་སེང་ཧ་མུ་ཁ་ཧ་རི་ནི་ས་ར་ཙ་ཧྲིཿཡ་ཙིཏྟ་ཧྲཱིཾ་ཧྲཱིཾ་ཛ་ཛཿ དགྲ་བགེགས་སརྦ་ཤ་ཏྲཱུཾ་མཱ་ར་ཡ་ཚལ་པར་རྦད༔ དུམ་བུར་རྦད་ཧཱུྃ་ཕཊ༔ ཅེས་བསྒྲལ་བའི་སྙིགས་མ་བདུད་རྩིར་སྦར་ལ། ཧཱུྃ་ཧྲཱིཿ དུག་གསུམ་དགྲ་བགེགས་བསྒྲལ་བ་ཡི༔ ཤ་ཁྲག་རུས་པའི་ཕུང་པོར་བཅས༔ ཡེ་ཤེས་མཁའ་འགྲོའི་ཞལ་དུ་བསྟབ༔ བཞེས་ཤིག་རོལ་ཞིག་ལྷག་མེད་ཐོང་༔ མ་མ་ཧྲཱིཾ་ཧྲཱིཾ་དགྲ་བགེགས་བྱད་མའི་ཤ་ཁྲག་རུས་པ་ལ་ཁ་ཁ་ཁཱ་ཧི༔ ཞེས་བསྟབ། དེ་ནས་ཚོགས་ལ་རོལ་པ་ནི། ལས་ཀྱི་རྡོ་རྗེས་ཚོགས་རྫས་རྣམས་སློབ་དཔོན་ལ་ཕྱོགས་པས་བཟུང་སྟེ། ཀྱེ་ཧོཿ སྟོན་པ་རྡོ་རྗེ་རྒྱལ་པོ་དགོངས༔ འདོད་ཡོན་ཚོགས་འཁོར་དམ་པ་འདི༔ གཙང་དང་རྨེ་བ་གཉིས་འཛིན་བྲལ༔ བྲམ་ཟེ་གདོལ་པ་ཁྱི་དང་ཕག༔ རང་བཞིན་གཅིག་ཏུ་དགོངས་ཏེ་རོལ༔ ཞེས་དྲངས། སློབ་དཔོན་གྱིས་ [16b] པདྨའི་ཕྱག་རྒྱ་གཡས་སུ་བསྐོར་ཞིང༌། ཧོཿ རྡོ་རྗེ་མཆེད་དང་ལྕམ་དྲལ་དགོངས༔ ཚོགས་འཁོར་འདོད་ཡོན་གསང་སྔགས་རྫས༔ དངོས་གྲུབ་ཐམས་ཅད་འདི་ལས་འབྱུང་༔ ཚོགས་ཀྱི་དགའ་སྟོན་ལོངས་སྤྱོད་རོལ༔ ག་ཎ་ཙཀྲ་སིདྡྷི་ཕ་ལ་ཨ་ལ་ལ་ཧོཿ འདུས་པ་རྣམས་ལ་བྲིམས་ཏེ། ཨེ་མ༔ གསང་ཆེན་ཐེག་པ་ཆེན་པོའི་རྫས༔ རྡོ་རྗེ་གསུམ་གྱི་དངོས་གྲུབ་དེ༔ དོན་ལ་དངོས་འཛིན་མི་མངའ་ཡང་༔ ཐེག་ཆེན་ཐབས་ཀྱི་ཚུལ་དུ་རོལ༔ ཨ་ལ་ལ་ཧོཿ ཞེས་ནང་གི་སྦྱིན་སྲེག་མངོན་དུ་བྱས་ནས་ཚིམས་པར་ལོངས་སྤྱད། དེ་ནས་ལྷག་མ་ཕྱོགས་གཅིག་ཏུ་བསྡུས་ཤིང་ཕུད་ལྷག་བསྲེས་པ་ལ་དམ་ཚིག་གི་ཁ་ཕྲུ་བཏབ་ཅིང༌། ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱིཿས། ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བལྟས་ལ། ལྷག་སྡུད་ཀྱི་ཕོ་ཉ་རྣམས། ཨེ་ཨཱ་རལླི་ཧྲཱིཾ་ཧྲཱིཾ་ཛཿ ཞེས་དང་བཤུགས་པའི་སྒྲ་དྲག་པོས་སྤྱན་དྲངས་ཏེ། ཧཱུྃ་བྷྱོཿ ལྷག་ལ་དབང་བ་མ་མོའི་ཚོགས༔ སྔོན་ཚེ་དཔལ་ཆེན་སྤྱན་སྔ་རུ༔ ཁས་བླང་དམ་བཅས་ཇི་བཞིན་དུ༔ འདིར་གཤེགས་ལྷག་མའི་ལོངས་སྤྱོད་རོལ༔ བྷྱོཿ ཤར་ནས་ཞི་བའི་ལས་མཛད་མ༔ དབང་ཕྱུག་མ་བདུན་འཁོར་དང་བཅས༔ མགོ་བརྙན་རྣམ་འགྱུར་ཅིར་ཡང་སྟོན༔ ཟས་སུ་ཞིང་བཅུའི་ཤ་ལ་ཟ༔ སྐོམ་དུ་ཉམས་ [17a] པའི་ཁྲག་ལ་འཐུང་༔ གོས་སུ་མི་ལྤགས་རློན་པ་གསོལ༔ སྣ་ཚོགས་གར་གྱིས་ནམ་མཁར་འགྲོ༔ ལས་སུ་དཀྱིལ་འཁོར་མཐའ་འཛིན་སྐྱོང་༔ མ་འཁོར་དང་བཅས་པ་འདིར་གཤེགས་ཤིག༔ འདོད་ཡོན་ལྷག་མའི་ལོངས་སྤྱོད་རོལ༔ སྔོན་ཚེ་དཔལ་ཆེན་སྤྱན་སྔ་རུ༔ ཁས་བླངས་ཇི་བཞིན་ཕྲིན་ལས་མཛོད༔ བྷྱོཿ ལྷོ་ནས་རྒྱས་པའི་ལས་མཛད་མ༔ དབང་ཕྱུག་མ་བདུན་འཁོར་དང་བཅས༔ མགོ་བརྙན་རྣམ་འགྱུར་སོགས་འགྲེ། བྷྱོཿ ནུབ་ནས་དབང་གི་ལས་མཛད་མ༔ དབང་ཕྱུག་མ་བདུན་འཁོར་དང་བཅས༔ མགོ་བརྙན་སོགས་འགྲེ། བྷྱོཿ བྱང་ནས་དྲག་པོའི་ལས་མཛད་མ༔ དབང་ཕྱུག་མ་བདུན་འཁོར་དང་བཅས༔ མགོ་བརྙན་སོགས་ནས། ཁས་བླངས་ཇི་བཞིན་ཕྲིན་ལས་མཛོད༔ མཿབྷྱོཿ ཛཿཧྲཱིཾཿ་ས་མ་ཡ་ཨུཙྪིཥྚ་བ་ལིཾ་ཏ་ཁཱ་ཧི༔ ཞེས་རོལ་མོ་དང་བཅས་ཕྱི་རོལ་དུ་བསྐྱལ་ལོ། །གཉིས་པ་ཐུགས་དམ་བསྐུལ་བ་ནི། ཧཱུྃ་བྷྱོཿ ཞིང་གི་མཆོག་གྱུར་འོག་མིན་ཞིང་༔ ཆོས་དབྱིངས་སྐྱེ་མེད་ཕོ་བྲང་ནས༔ ཆོས་སྐུ་ཡུམ་ཆེན་ཀུན་བཟང་མོ༔ དྲག་ཁྲོས་རྔམས་པའི་སྐུར་བཞེངས་ཤིག༔ མངོན་སྤྱོད་མཛད་པའི་དུས་ལ་བབ༔ གསང་ཆེན་རོལ་པའི་དུར་ཁྲོད་ནས༔ ལོངས་སྐུའི་ [17b] མཁའ་འགྲོ་སེང་གེའི་གདོང་༔ དྲག་ཁྲོས་རྔམས་པའི༴ མངོན་སྤྱོད་མཛད་པའི༴ གླིང་གི་མཆོག་གྱུར་རྔ་ཡབ་གླིང་༔ དཔལ་རི་མཁའ་འགྲོ་འདུ་གླིང་ནས༔ སྤྲུལ་སྐུ་མཚོ་རྒྱལ་མནྡྷྲ་ར༔ དྲག་ཁྲོས༴ མངོན་སྤྱོད༴ ཧཱུྃ༔ མངོན་པར་དགའ་བའི་ཞིང་ཁམས་སུ༔ མེ་ལོང་ཡེ་ཤེས་གཞལ་ཡས་ནས༔ རྡོ་རྗེ་རིགས་ཀྱི་སེང་གདོང་མ༔ དྲག་ཁྲོས༴ མངོན་སྤྱོད༴ ཧཱུྃ༔ དཔལ་དང་ལྡན་པའི་ཞིང་ཁམས་སུ༔ མཉམ་ཉིད་ཡེ་ཤེས་གཞལ་ཡས་ནས༔ རིན་ཆེན་རིགས་ཀྱི་སེང་གདོང་མ༔ དྲག་ཁྲོས༴ མངོན་སྤྱོད༴ ཧཱུྃ༔ བདེ་བ་ཆེན་པོའི་ཞིང་ཁམས་སུ༔ སོར་རྟོག་ཡེ་ཤེས་གཞལ་ཡས་ནས༔ པདྨ་རིགས་ཀྱི་སེང་གདོང་མ༔ དྲག་ཁྲོས༴ མངོན་སྤྱོད༴ ཧཱུྃ༔ ལས་རབ་རྫོགས་པའི་ཞིང་ཁམས་སུ༔ བྱ་གྲུབ་ཡེ་ཤེས་གཞལ་ཡས་ནས༔ ཀརྨ་རིགས་ཀྱི་སེང་གདོང་མ༔ དྲག་ཁྲོས༴ མངོན་སྤྱོད༴ བྷྱོ༔ ཤར་ཕྱོགས་རབ་འཇིགས་དུར་ཁྲོད་ནས༔ དཀར་མོ་ཁྱུང་གདོང་སྐུ་བཞེངས་ཤིག༔ བཞེངས་ཤིག་ཆོས་ཀྱི་དབྱིངས་ནས་བཞེངས༔ བསྐུལ་ལོ་ཐུགས་དམ་གནད་ནས་བསྐུལ༔ མངོན་སྤྱོད་མཛད་པའི་དུས་ལ་བབ༔ བྷྱོ༔ ལྷོ་ཕྱོགས་གད་རྒྱང་དུར་ཁྲོད་ [18a] ནས༔ མཁའ་འགྲོ་སེར་མོ་སྡིག་པའི་གདོང་༔ བཞེངས་ཤིག༴ བསྐུལ་ལོ༴ མངོན་སྤྱོད༴ བྷྱོ༔ ནུབ་ཕྱོགས་པད་འཁྱིལ་དུར་ཁྲོད་ནས༔ མཁའ་འགྲོ་དམར་མོ་འཕར་གདོང་མ༔ བཞེངས་ཤིག༴ བསྐུལ་ལོ༴ མངོན་སྤྱོད༴ བྷྱོ༔ བྱང་ཕྱོགས་གཏུམ་དྲག་དུར་ཁྲོད་ནས༔ མཁའ་འགྲོ་ལྗང་མོ་ཁྱི་གདོང་མ༔ བཞེངས་ཤིག༴ བསྐུལ་ལོ༴ མངོན་སྤྱོད༴ བྷྱོ༔ ཤར་ལྷོ་མེ་འབར་དུར་ཁྲོད་ནས༔ དམ་ཚིག་མཁའ་འགྲོ་ཀུན་གཙོ་མོ༔ འུག་གདོང་དམར་ནག་སྐུ་བཞེངས་ཤིག༔ བཞེངས་ཤིག༴ བསྐུལ་ལོ༴ མངོན་སྤྱོད༴ བྷྱོ༔ ལྷོ་ནུབ་རི་བསྙིལ་དུར་ཁྲོད་ནས༔ ཐམས་ཅད་མཁའ་འགྲོ་ཀུན་གཙོ་མོ༔ ཁྭ་གདོང་སེར་ནག་སྐུ་བཞེངས་ཤིག༔ བཞེངས་ཤིག༴ བསྐུལ་ལོ༴ མངོན་སྤྱོད༴ བྷྱོ༔ ནུབ་བྱང་ཁྲག་མཚོ་དུར་ཁྲོད་ནས༔ ཤ་ཟ་མཁའ་འགྲོ་ཀུན་གཙོ་མོ༔ དུར་བྱའི་གདོང་ཅན་སྐུ་བཞེངས་ཤིག༔ བཞེངས་ཤིག༴ བསྐུལ་ལོ༴ མངོན་སྤྱོད༴ བྷྱོ༔ བྱང་ཤར་རླུང་གཡོས་དུར་ཁྲོད་ནས༔ འཇིག་རྟེན་མཁའ་འགྲོ་ཀུན་གཙོ་མོ༔ མཐིང་ནག་སྦྲུལ་གདོང་སྐུ་བཞེངས་ཤིག༔ བཞེངས་ཤིག༴ བསྐུལ་ [18b] ལོ༴ མངོན་སྤྱོད༴ ཛཿ དཀར་གསལ་འོད་ཐིག་ཟླུམ་འཁྱིལ་དབུས༔ སྙིང་རྗེ་ཚད་མེད་ཞི་བའི་སྐུ༔ ཤར་སྒོའི་མཁའ་འགྲོ་ལྕགས་ཀྱུ་མ༔ དྲག་ཁྲོས་རྔམས་པའི་སྐུ་བཞེངས་ཤིག༔ མངོན་སྤྱོད༴ ཧཱུྃ༔ སེར་གསལ་འོད་ཐིག་གྲུ་བཞིའི་དབུས༔ བྱམས་པ་ཚད་མེད་རྒྱས་པའི་སྐུ༔ ལྷོ་སྒོའི་མཁའ་འགྲོ་ཞགས་པ་མ༔ དྲག་ཁྲོས༴ མངོན་སྤྱོད༴ བཾཿ དམར་གསལ་འོད་ཐིག་ཟླ་གམ་དབུས༔ དགའ་བ་ཚད་མེད་དབང་གི་སྐུ༔ ནུབ་སྒོའི་མཁའ་འགྲོ་ལྕགས་སྒྲོག་མ༔ དྲག་ཁྲོས༴ མངོན་སྤྱོད༴ ཧོཿ ལྗང་གསལ་འོད་ཐིག་གྲུ་གསུམ་དབུས༔ བཏང་སྙོམས་ཚད་མེད་དྲག་པོའི་སྐུ༔ བྱང་སྒོའི་མཁའ་འགྲོ་དྲིལ་བུ་མ༔ དྲག་ཁྲོས༴ མངོན་སྤྱོད༴ བྷྱོ༔ ཁྱབ་གདལ་ཆོས་དབྱིངས་མཁའ་འགྲོ་མ༔ ཀུན་ཏུ་བཟང་མོའི་རོལ་པ་ལས༔ མཁའ་སྤྱོད་དུར་ཁྲོད་གནས་ཡུལ་དང་༔ ཧེ་རུ་ཀ་ཡི་གནས་བཅུ་ནས༔ མ་ངེས་གཟུགས་ངོམས་ཆོ་འཕྲུལ་སྟོན༔ འཇིག་རྟེན་འདས་ཀྱང་འཇིག་རྟེན་ཚུལ༔ རབ་འབྱམས་མ་མོ་མཁའ་འགྲོའི་ཚོགས༔ དབྱིངས་ནས་བཞེངས་ཤིག་ཐུགས་དམ་བསྐུལ༔ དོ་ནུབ་བརྣག་པའི་ལས་ལ་བསྐུལ༔ དོ་ནུབ་རྣལ་འབྱོར་ [19a] དཔུང་ལ་བསྐུལ༔ དོ་ནུབ་གསོད་བྱེད་ཕོ་ཉར་བསྐུལ༔ དོ་ནུབ་རྣོ་བའི་མཚོན་ཆར་བསྐུལ༔ སྙིགས་མའི་སྙིགས་མ་ལྔ་བརྒྱའི་དུས༔ དེང་དུས་བསྐལ་པའི་མར་གཤམ་འདིར༔ སྐྱབས་བྲལ་སེམས་ཅན་སུ་ལ་རེ༔ ཐུགས་རྗེའི་ཡལ་བར་དོརམི་འཚལ༔ ཐུགས་རྗེས་ཡལ་བར་དོར་བ་ན༔ ཐུགས་བསྐྱེད་རྣམ་དག་གང་ན་བཞུགས༔ མ་གཡེལ་མ་གཡེལ་མཁའ་འགྲོའི་ཚོགས༔ དོ་ནུབ་བུ་ལ་བརྩེ་བས་དགོངས༔ མ་རིག་རྐྱེན་ལས་བྱུང་བ་ཡི༔ བདུད་གཞི་དབྱིངས་སུ་གཅོད་པ་དང་༔ འཁྲུལ་པ་དབྱིངས་སྒྲོལ་ཕྲིན་ལས་མཛོད༔ ཉོན་མོངས་དུག་ལྔ་དུག་གསུམ་དང་༔ ལོག་པར་གང་ལྟ་དབྱིངས་སུ་སྒྲོལ༔ ང་བདག་གཟུང་འཛིན་ཀུན་བསླངས་པའི༔ བསླུ་བྱེད་བདུད་བགེགས་རྡུལ་དུ་རློག༔ གནོད་བྱེད་བྱད་མ་རྦོད་གཏོང་ཚོགས༔ ངན་སྔགས་ཧོམ་ཟེར་ཧོམ་ཟོར་ལས་སྦྱོར་མཁན༔ ལྷ་སྲུང་དང་བཅས་རྡུལ་དུ་རློག༔ མཐའ་དམག་དུས་འཁྲུགས་ནད་མཚོན་སོགས༔ མི་མཐུན་ཉེ་བར་འཚེ་བ་རྣམས༔ ཐལ་བའི་རྡུལ་དུ་བརླག་པ་དང་༔ རྗེས་ཤུལ་མིང་ཙམ་མེད་པར་མཛོད༔ རང་དམ་གཉན་པོ་དཔང་དུ་བཙུག༔ མ་འདའ་བཛྲ་ས་མ་ཡ༔ ཞེས་བསྐུལ། གསུམ་ [19b] པ་གཏོར་མ་བསྐྱང་བ་ནི། ཆོས་སྐྱོང་གི་གཏོར་མ་སོགས་གཏོར་གྲལ་ལས་བསྐྱོད་དེ་ ཨོཾ་ཨཱཿཧཱུཾ་གིས་བྱིན་གྱིས་བརླབ་ལ། ཧཱུྃ་བྷྱོ༔ སྔོན་ཚེ་བསྐལ་པའི་དང་པོ་ལ༔ འོག་མིན་ཆོས་དབྱིངས་ཕོ་བྲང་དུ༔ སྟོན་པ་ཀུན་ཏུ་བཟང་པོ་ཡིས༔ སྒྱུ་འཕྲུལ་ལོངས་སྐུའི་འཁོར་ཚོགས་ལ༔ གསང་སྔགས་རྡོ་རྗེ་ཐེག་པའི་ཆོས༔ སྟོན་འཁོར་དགོངས་པ་རོ་གཅིག་ངང་༔ རང་བྱུང་རང་ཤར་ཆེན་པོར་བསྟན༔ དེ་ཚེ་རང་རྩལ་དྲེགས་པ་ཅན༔ སྤྲུལ་ཏེ་བཀའ་ཡི་བསྲུང་མར་བསྐོས༔ བསྟན་པ་སྤེལ་ཞིང་བསྟན་འཛིན་སྐྱོང་༔ བསྟན་དགྲ་བསྒྲལ་བའི་གཉེར་བླངས་བཞིན༔ དམར་གྱི་གཏོར་མ་འདི་ལོངས་ལ༔ ཐ་ཚིག་བཞིན་དུ་ཕྲིན་ལས་མཛོད༔ དེ་འོག་དུས་ཚིག་གཉིས་པ་ལ༔ རང་སྣང་བཀོད་པ་ལྷུན་གྲུབ་ཏུ༔ སྤྱི་དཔལ་ཆེ་མཆོག་ཧེ་རུ་ཀས༔ བདག་ལྟའི་མ་ཊཾ་རཱུ་ཏྲ་བསྒྲལ༔ རཱུ་ཏྲའི་འཁོར་ཚོགས་དཔག་མེད་པ༔ དམ་ལ་བཏགས་ཤིང་བྲན་དུ་བཀོལ༔ ཕྲིན་ལས་བསྒྲུབ་པར་མ་ཆད་དམ༔ ཆད་བཞིན་དམར་གྱི་གཏོར་མ་ལོངས༔ རབ་འབྱམས་ཕྲིན་ལས་ཡོངས་འགྲུབ་མཛོད༔ དེ་འོག་དུས་ཚིག་གསུམ་པ་ལ༔ རི་བོ་མ་ལ་ཡ་ཡི་རྩེར༔ གསང་བདག་རྡོ་རྗེ་འཛིན་པ་ཡིས༔ ཞུ་བསྡུས་འཁོར་གྱི་རོལ་པ་ལ༔ གསང་སྔགས་ཆོས་འཁོར་ [20a] བསྐོར་བའི་ཚེ༔ བཀའ་སྲུང་དྲེགས་པའི་འཁོར་རྣམས་ཀྱིས༔ སོ་སོས་རང་གི་གཟུགས་བསྟན་ནས༔ བཀའ་ཡིས་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང་༔ ཕྲིན་ལས་བསྒྲུབ་པར་མ་ཆད་དམ༔ ཆད་བཞིན་དམར་གྱི༴ རབ་འབྱམས་ཕྲིན་ལས༴ དེ་འོག་དུས་ཚིག་བཞི་པ་ལ༔ གནས་ཡུལ་དུར་ཁྲོད་ཐམས་ཅད་དུ༔ རིག་འཛིན་རྡོ་རྗེ་ཐོད་ཕྲེང་གིས༔ གསང་སྔགས་དཀྱིལ་འཁོར་ཞལ་ཕྱེས་ཚེ༔ བསྟན་སྲུང་དམ་ཅན་རྒྱ་མཚོ་ཡིས༔ སོ་སོས༴ བཀའ་ཡི༴ བརྒྱུད་འཛིན༴ ཕྲིན་ལས༴ ཆད་བཞིན༴ རབ་འབྱམས༴ དེ་འོིག་དུས་ཚིག་ལྔ་པ་ལ༔ མུན་གླིང་བོད་ཀྱི་རྒྱལ་ཁམས་སུ༔ གསང་སྔགས་སྟོན་པ་པད་འབྱུང་གིས༔ སྐལ་ལྡན་ཕོ་མོའི་ཚོགས་རྣམས་ལ༔ རྡོ་རྗེ་ཐེག་པའི་ཆོས་བསྟན་མཛད༔ དེ་ཚེ་དམ་ཅན་རྒྱ་མཚོ་ཡིས༔ སོ་སོས༴ བཀའ་ཡི༴ བརྒྱུད་འཛིན༴ ཕྲིན་ལས༴ ཆད་བཞིན༴ རབ་འབྱམས༴ དེ་འོག་དུས་ཚིག་དྲུག་པ་ལ༔ ཤམ་པོ་གངས་ཀྱི་ར་བ་རུ༔ འབྲོག་བན་ཁྱེའུ་ཆུང་ལོ་ཙཱ་ཡིས༔ མཁའ་འགྲོའི་དཀྱིལ་འཁོར་ཞལ་ཕྱེས་ཚེ༔ བསྟན་སྲུང་དམ་ཅན་རྒྱ་མཚོ་ཡིས༔ སོ་སོས༴ བཀའ་ཡི༴ བརྒྱུད་འཛིན༴ ཕྲིན་ [20b] ལས༴ ཆད་བཞིན༴ རབ་འབྱམས༴ དེ་འོག་དུས་ཚིག་བདུན་པ་ལ༔ ཨོ་རྒྱན་ཆེན་པོའི་ཞལ་ཚབས་སུ༔ ཐུགས་རྗེའི་རང་མདངས་འགྲོ་འདུལ་དཔལ༔ རིག་འཛིན་བདུད་འཇོམས་རྡོ་རྗེ་ཡིས༔ མཁའ་འགྲོའི་དཀྱིལ་འཁོར་ཞལ་ཕྱེས་ཚེ༔ དྲེགས་པ་ལྷ་སྲིན་སྡེ་བརྒྱད་ཀྱིས༔ སོ་སོས༴ བཀའ་ཡི༴ བརྒྱུད་འཛིན༴ ཕྲིན་ལས༴ ཆད་བཞིན༴ རབ་འབྱམས༴ ད་ལྟ་གསང་ཆེན་དཀྱིལ་འཁོར་འདིར༔ སྒྲུབ་མཆོག་རྣལ་འབྱོར་བདག་ཅག་གིས༔ མཁའ་འགྲོའི་དཀྱིལ་འཁོར་ཞལ་ཕྱེས་ནས༔ བཀའ་བཞིན་དམར་གྱི་གཏོར་མ་བཤམས༔ ཡེ་ཤེས་འཇིག་རྟེན་སྲུང་མའི་ཚོགས༔ ཁྱེད་ཅག་དམ་ལས་མ་འདའ་བར༔ འདིར་གཤེགས་བཀའ་ཡི་གཏོར་མ་ལོངས༔ སྒྲུབ་མཆོག་བུ་བཞིན་སྐྱོང་བ་དང་༔ ཕྱི་ནང་བར་ཆད་སེལ་བ་དང་༔ དམ་ཚིག་བཞིན་དུ་ཕྲིན་ལས་བསྒྲུབས༔ མ་འདའ་བཛྲ་ས་མ་ཡ༔ ཞེས་ཆད་དོ་འབུལ། སྐབས་འགའ་ཞིག་གི་ཚེ་ཟོར་དུ་བསྐུལ་བར་འདོད་ན་གཏོར་མ་དེ་ཉིད་ནད་མཚོན་དུག་གི་ཕུང་པོར་བསྒྱུར་ལ། ཧཱུྃ་ཧྲཱིཿ ང་ནི་སེང་གདོང་དྲག་མོའི་སྐུ༔ སྣང་སྲིད་ཀུན་གྱི་མངའ་བདག་ཆེ༔ ཀུན་ཏུ་བཟང་མོའི་སྤྲུལ་པ་སྟེ༔ ཞེ་སྡང་རྡོ་རྗེ་དྲག་མོ་ཡིན༔ དོ་ནུབ་ང་ཡིས་འཕེན་པའི་ཟོར༔ སྡང་དགྲ་གནོད་བྱེད་སྟེང་དུ་འཕེན༔ [21a] ཕུར་པའི་དབལ་ཟོར་ཤ་ར་ར༔ ཡུངས་དཀར་རྦབ་རྒོད་སེར་ལྟར་འདྲིལ༔ ཁྲག་ཐུན་དམར་པོ་ཆུ་ལྟར་ཁོལ༔ མཚེ་ཐུན་དྲག་པོ་གློག་ལྟར་འཁྱུགས༔ དུག་ཐུན་དྲག་པོ་མུན་ལྟར་གཏིབ༔ མཚོན་ཐུན་དྲག་པོ་སྐར་ལྟར་འཁྲིགས༔ མདའ་ཐུན་དྲག་པོ་རླུང་ལྟར་འཚུབས༔ རྡོ་ཐུན་དྲག་པོ་རྦབ་ལྟར་ཉིལ༔ གཏོར་ཐུན་སེར་རླུང་ཐོག་ལྟར་འབེབས༔ སྡང་བར་བྱེད་པའི་དགྲ་ལ་བྷྱོ༔ ཟ་བར་བྱེད་པའི་འདྲེ་ལ་བྷྱོ༔ གནོད་པར་བྱེད་པའི་བགེགས་ལ་བྷྱོ༔ ཕུང་བར་བྱེད་པའི་སྲི་ལ་བྷྱོ༔ ལོག་འདྲེན་ལྟ་ལོག་སྟེང་དུ་བྷྱོ༔ བར་ཆད་གཡོ་འཁྲུགས་རྡུལ་དུ་རློག༔ མི་མཐུན་རྐྱེན་ངན་བཟློག་ཅིང་བསྒྱུར༔ རྒྱ་འདྲེ་འབྱུང་པོ་ཆོམ་ལ་ཕོབ༔ སངས་རྒྱས་བསྟན་པའི་སྤྱི་དགྲ་དང་༔ བླ་མའི་སྐུ་དགྲ་རྣལ་འབྱོར་དགྲ༔ མ་ལུས་ཐལ་བའི་རྡུལ་བཞིན་རློག༔ མིང་ཙམ་མེད་པར་བཟློག་གྱུར་ཅིག༔ རྩ་སྔགས་མཐར། གནོད་བྱེད་སརྦ་ཤ་ཏྲཱུཾ་མཱ་ར་ཡ་རྦད་རྦད་སོད༔ ཅེས་གནོད་པའི་ཕྱོགས་སུ་འཕང༌། བརྟན་མ་སྐྱོང་བ་ལ་བཤལ་ཆུའི་བདུད་རྩི་གཏོར་མར་བྲན་ཅིང་ཨོཾ་ཨཱཿཧཱུྃ་གིས་བརླབ་ནས། ཧཱུྃ་བྷྱོ༔ སྔོན་གྱི་བསྐལ་པའི་དང་པོ་ལ༔ རིག་འཛིན་རྡོ་རྗེ་ཐོད་ཕྲེང་གི༔ སྤྱན་སྔར་ཁས་བླངས་དམ་བཅས་པའི༔ ཆེ་ཞེ་མ་སྲིང་བརྟན་མའི་ཚོགས༔ མ་ལུས་འདིར་ [21b] གཤེགས་གཏོར་མ་བཞེས༔ སྔོན་གྱི་དམ་བཅའ་ཇི་བཞིན་དུ༔ སངས་རྒྱས་བསྟན་པ་གཉན་པོ་སྲུངས༔ དཀོན་མཆོག་གསུམ་གྱི་དབུ་འཕང་བསྟོད༔ སྒྲུབ་པའི་རྣལ་འབྱོར་ཕོ་མོ་ཡི༔ ཚེ་བསྲིང་སྲོག་སྐྱོབ་བར་ཆད་ཟློག༔ བསྟན་པའི་སྦྱིན་བདག་མངའ་ཐང་བསྐྱེད༔ བསྟན་དགྲ་གདུག་པའི་མགོ་འཕང་ཕོབ༔ མདོར་ན་གཟུགས་ཅན་གཟུགས་མེད་ཀྱི༔ དགྲ་བགེགས་གནོད་བྱེད་ཆོམ་ལ་ཕོབ༔ དང་པོ་རྡོ་རྗེ་འཆང་གི་བཀའ༔ བར་དུ་པདྨ་འབྱུང་གནས་དམ༔ ཐ་མ་རྣལ་འབྱོར་བདག་གི་ཚིག༔ མ་འདའ་བཛྲ་ས་མ་ཡ༔ མ་མ་ཧྲིཾ་ཧྲིཾ་ཨེ་དཾ་བ་ལིཾ་ཏ་ཁཱ་ཧི༔ ཞེས་ཕུལ། བྲོ་བརྡུང་བ་ནི། གཏོར་སྣོད་སྦུབ་པའི་འོག་ཏུ་དགྲ་བགེགས་རྣམས་ཨེ་ནྲྀ་ཏྲི་སརྦ་ཤ་ཏྲཱུཾ་བིགྷྣཱན་ཛཿཧཱུྃ་བཾ་ཧོཿ ཞེས་འགུག་གཞུག་བཅིང་མནན་བྱས་ཏེ་རྡོ་རྗེའི་རྒྱས་བཏབ་ལ། ཧཱུྃ་ཧཱུྃ༔ དབུས་ཕྱོགས་སངས་རྒྱས་མཁའ་འགྲོ་མས༔ ཆོས་དབྱིངས་ཡེ་ཤེས་བྲོ་བརྡུང་བས༔ གཏི་མུག་རཱུ་ཏྲའི་མགོ་ལ་ཆེམས༔ འཁྲུལ་མི་ཤེས་པའི་དབྱིངས་སུ་ནོན༔ ཧཱུྃ་ཧ༔ ཤར་ཕྱོགས་རྡོ་རྗེ་མཁའ་འགྲོ་མས༔ མེ་ལོང་ཡེ་ཤེས༴ ཞེ་སྡང་རཱུ་ཏྲའི་མགོ༴ འཁྲུལ་མི་ཤེས་པའི༴ ཧཱུྃ་རི༔ ལྷོ་ཕྱོགས་རིན་ཆེན་མཁའ་འགྲོ་མས༔ མཉམ་ཉིད་ཡེ་ཤེས༴ ང་རྒྱལ་རཱུ་ཏྲའི༴ འཁྲུལ་མི་ཤེས་པའི༴ ཧཱུྃ་ནི༔ ནུབ་ཕྱོགས་ [22a] ༔ པདྨ་མཁའ་འགྲོ་མས༔ སོར་རྟོག་ཡེ་ཤེས༴ འདོད་ཆགས་རཱུ་ཏའི༴ འཁྲུལ་མི་ཤེས་པའི༴ ཧཱུྃ་ས༔ བྱང་ཕྱོགས་ཀརྨ་མཁའ་འགྲོ་མས༔ བྱ་གྲུབ་ཡེ་ཤེས༴ ཕྲག་དོག་རཱུ་ཏྲའི༴ འཁྲུལ་མི་ཤེས་པའི༴ བྲོ་ནི་ཡེ་ཤེས་ལྔ་ཡི་བྲོ༔ གླུ་ནི་འགགས་མེད་རྡོ་རྗེའི་གླུ༔ ཐུགས་རྗེ་ཐབས་ཀྱིས་ལོག་རྟོག་བསྒྲལ༔ ཉོན་མོངས་བརྒྱད་ཁྲིའི་འཁྲུལ་འཁོར་བཤིག༔ ཆོས་ཕུང་བརྒྱད་ཁྲིའི་དབྱིངས་སུ་མནན༔ མ་ཤོར་སྐུ་དང་ཡེ་ཤེས་རྒྱ༔ མ་ལྡང་བདེ་བ་ཆེན་པོར་མནན༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སྭཱ་ལཾ༔ ཧཱ་ལཾ༔ སྟྭ་བྷ་ཡ་ནན༔ ཞེས་བྲོ་བརྡུང་བྱ། བཞི་པ་དངོས་གྲུབ་བླང་བ་ནི། གཏོར་མ་སོགས་མདུན་རྟེན་ལྷར་གསལ་བ་ལ་དམིགས་ཏེ། ཧོཿ སྐུ་གསུམ་ཡེ་ཤེས་མཁའ་འགྲོ་མའི༔ སྐུ་གསུང་ཐུགས་ཀྱི་ཀློང་མཛོད་ནས༔ རྡོ་རྗེ་གསུམ་གྱི་དབང་དངོས་གྲུབ༔ ད་ལྟ་ཉིད་དུ་བདག་ལ་སྩོལ༔ རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་སརྦ་ཀརྨ་སིདྡྷི་ཕ་ལ་ཧོཿ ཞེས་དངོས་གྲུབ་བླངས། ལྔ་པ་ནོངས་པ་བཤགས་པ་ནི། གཏང་རག་གི་མཆོད་བསྟོད་སྔོན་དུ་འགྲོ་བས། ཧཱུྃ་ཧྲཱིཿ འཁོར་ཚེ་ཐོག་མ་མེད་པ་ནས༔ མ་རིག་དབང་གྱུར་ཉེས་ལྟུང་ཚོགས༔ ཡེ་ཤེས་མཁའ་འགྲོའི་ཚོགས་ལ་བཤགས༔ ཚངས་པ་མཆོག་གི་དངོས་གྲུབ་སྩོལ༔ ཞེས་དང་ཡི་གེ་བརྒྱ་པ་བཟླ། དྲུག་པ་དཀྱིལ་འཁོར་བསྡུ་བ་ [22b] ནི། ཚོགས་མགྲོན་སོགས་མདུན་རྟེན་གྱི་ཡེ་ཤེས་པ་བརྟན་བཞུགས་བྱ། ཏིང་ངེ་འཛིན་གྱི་དཀྱིལ་འཁོར། ཧཱུྃ༔ སྣོད་བཅུད་མཁའ་འགྲོའི་དཀྱིལ་འཁོར་ལྷ༔ མ་ལུས་རང་གི་སྐུ་ལ་བསྡུ༔ རང་ཡང་ཐུགས་ཀའི་ཧཱུྃ་ལ་ཐིམ༔ ཧཱུྃ་ཡིག་ཆོས་དབྱིངས་ཀློང་དུ་ཨ༔ ཞེས་རྟག་མཐའ་བསལ། ཧཱུྃ་ཧྲཱིཿ སྐད་ཅིག་ཆུ་ལས་ཆུ་བུར་བཞིན༔ སྟོང་པའི་ངང་ལས་རང་རིག་ཉིད༔ འཁོར་འདས་སྤྱི་དཔལ་སེང་གདོང་མ༔ སྣང་སྲིད་ཁྱབ་བརྡལ་སྐུར་བསྒོམ་མོ༔ ཧཱུྃ་ཧཱུྃ་ཧཱུྃ་ཧྲཱིཿཕཊ༔ ཞེས་ཆད་མཐའ་བསལ། བདུན་པ་བསྔོ་སྨོན་ནི། ཧཱུྃ་ཧྲཱིཿ ཡང་གསང་མཁའ་འགྲོའི་དཀྱིལ་འཁོར་དུ༔ བསྐྱེད་རྫོགས་འབྲས་བུའི་དགེ་བསགས་པ༔ མ་ལུས་བསྡུས་ཏེ་འགྲོ་རྣམས་ཀུན༔ རྣམ་མཁྱེན་སངས་རྒྱས་འཐོབ་ཕྱིར་བསྔོ༔ སྐུ་གསུམ་མཁའ་འགྲོའི་བདེན་སྟོབས་ཀྱིས༔ བདག་དང་མཁའ་མཉམ་སེམས་ཅན་རྣམས༔ ཡང་གསང་དཀྱིལ་འཁོར་འདི་ཉིད་དུ༔ ཚོམ་བུ་གཅིག་ཏུ་སངས་རྒྱས་ཤོག༔ བརྒྱད་པ་ཤིས་པ་བརྗོད་པ་ནི། མེ་ཏོག་གི་ཆར་དབབ་ལ། ཧཱུྃ་ཧྲཱིཿ ངོ་བོ་སྐྱེ་མེད་ཆོས་སྐུའི་ཀློང་༔ རང་བཞིན་འགགས་མེད་ལོངས་སྤྱོད་རྫོགས༔ ཐུགས་རྗེ་ཐབས་ཀྱིས་སྤྲུལ་སྐུར་ཤར༔ སྐུ་གསུམ་ལྷུན་གྲུབ་བཀྲ་ཤིས་ཤོག༔ ཆོས་དབྱིངས་ཡེ་ཤེས་ཀུན་བཟང་མོ༔ རྣམ་རོལ་མ་ངེས་སྒྱུ་འཕྲུལ་གར༔ གང་འདུལ་སྤྲུལ་པའི་མཁའ་ [23a] འགྲོའི་ཚོགས༔ ཡོངས་རྫོགས་མཁའ་འགྲོའི་བཀྲ་ཤིས་ཤོག༔ ལྷུན་གྲུབ་རིགས་ལྔའི་མཁའ་འགྲོ་མ༔ དུག་ལྔ་གནས་དག་ཡེ་ཤེས་ལྔར༔ སྨིན་ཏེ་འགྲོ་རྣམས་ཞི་བདེ་རུ༔ འགོད་མཛད་ཕྲིན་ལས་བཀྲ་ཤིས་ཤོག༔ ཅེས་སོགས་ཤིས་པ་རྒྱ་ཆེར་བརྗོད་པས་དགེ་ལེགས་སུ་བྱའོ། །མི་འགྱུར་བདེ་ཆེན་དབྱིངས་ཀྱི་ཡུམ་ཆེན་མོ། །གང་འདུལ་རྣམ་འགྱུར་སྒྱུ་འཕྲུལ་རོལ་མོའི་སྤྲིན། །ཁྲོས་མ་སེང་ཞལ་ཅན་དུ་སྒྲུབ་པའི་ཐབས། །བདུད་འདུལ་པདྨའི་ཐུགས་བཅུད་འདི་ཁོ་ན། །དེ་ཡི་ཕྲིན་ལས་ཟབ་གཏེར་རྡོ་རྗེའི་གསུང༌། །འཇུག་བདེའི་ཁྲིགས་སུ་ཉེ་བར་བསྡེབས་འདིས་ཀྱང༌། །མཆོག་གསང་བསྟན་འཛིན་མཆོད་ཡོན་སྡེ་དང་བཅས། །ཡིད་སྲུབས་དཔུང་ལས་རྣམ་རྒྱལ་གཞིར་གྱུར་ཅིག །ཅེས་འཇིགས་བྱེད་བདུད་འདུལ་དྲག་མོ་སེང་གདོང་མའི་ཕྲིན་ལས་ཌཱ་ཀི་དགྱེས་པའི་གད་རྒྱང་ཞེས་བྱ་བ་འདི་ནི། གསང་སྔགས་མ་རྒྱུད་སྙིང་པོའི་ལམ་ལས་དངོས་གྲུབ་ཀྱི་སྐལ་པ་རང་དབང་དུ་སྤྱོད་པའི་རྣལ་འབྱོར་པ་ཚེ་དབང་ལྷ་རྒྱལ་གྱིས་འབད་པ་ཆེན་པོས་ཡང་དང་ཡང་དུ་བསྐུལ་བ་ལ་བརྟེན་ནས། གཏེར་གཞུང་རྩ་བའི་དགོངས་པ་མ་འཁྲུལ་བར་ལག་ལེན་རྣམ་གསལ་འཇུག་པ་བདེ་བའི་ལས་ཁྲིགས་སུ་བསྡེབས་ཏེ། དུས་ཀྱི་མཐའི་སྔགས་འཆང་འཇིགས་བྲལ་ཡེ་ཤེས་རྡོ་རྗེས་རང་ལོ་དྲུག་ཅུ་རྩ་བརྒྱད་དུ་སོན་པ་ལྕགས་མོ་ཕག་གི་ལོ་ས་ག་ཉ་བའི་ཤེས་རབ་ཀྱི་ཕྱོགས་ལ་ཀ་པཱ་ལ་ལྷུན་པོར་སྤུངས་པའི་རི་བོའི་མགུལ་དུ་སྦྱར་བ་ལས། ཐོག་མའི་ཡི་གེར་འདུ་བགྱིད་པ་པོ་ནི་སྔགས་སྐྱེས་བློ་གསལ་ལ་རིན་ཆེན་ཕུན་ཚོགས་ཀྱིས་སོ། །འདིས་ཀྱང་ལས་དང་དངོས་གྲུབ་ཐམས་ཅད་ཡིད་བཞིན་དུ་འཇོ་བའི་རྒྱུར་གྱུར་ཅིག །། །སརྦ་དཱ་མངྒ་ལཾ།། །།