TTDL-ZABTER-01-KA-038

Previous Text Back to Volume PageNext Text

Wylie title	zab gsang mkha' 'gro'i snying thig las: che mchog rak+sha thod phreng rtsal: bdud 'joms rdo rje gro lod kyi: dbang chog rin chen gter bum:
Location	bdud 'joms gling pa zab gter Volume 1, Text 38, Pages 345-359 (Folios 1a1 to 8a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las che mchog rak+sha thod phreng rtsal bdud 'joms rdo rje gro lod kyi dbang chog rin chen gter bum. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: 345-359. Thimphu, Bhutan: Lama Kuenzang Wangdue, 2004.
Side notes	Recto: dbang chog   Verso: bdud 'joms gro lod
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur
Cycle	ཆེ་མཆོག་རཀྴ་ཐོད་ཕྲེང་བདུད་འཇོམས་རྡོ་རྗེ་གྲོ་ལོད་ (che mchog rak+sha thod phreng bdud 'joms rdo rje gro lod)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་གྲོ་ལོད་རྩལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མི་ལོ་བཅོ་ལྔའི་བར་བཀའ་རྒྱ་བྱས་མཐར་རྟེན་འབྲེལ་དུས་ལ་བབས་ཚེ་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ།།
	zhes pa 'di yang khrag 'thung bdud 'joms rdo rje gro lod rtsal gyis gser smad rnga la stag rtse'i g.yas logs rdo rje brag nas bton te mi lo bco lnga'i bar bka' rgya byas mthar rten 'brel dus la babs tshe smar mdo bkra shis dga' 'khyil du dag par phab pa'i yi ge pa ni phun tshogs bkra shis so/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ཆེ་མཆོག་རཀྴ་ཐོད་ཕྲེང་རྩལ༔ བདུད་འཇོམས་རྡོ་རྗེ་གྲོ་ལོད་ཀྱི༔ དབང་ཆོག་རིན་ཆེན་གཏེར་བུམ་བཞུགས༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ཆེ་མཆོག་རཀྴ་ཐོད་ཕྲེང་རྩལ༔ བདུད་འཇོམས་རྡོ་རྗེ་ཁྲོ་ལོད་ཀྱི༔ དབང་གི་དཀྱིལ་འཁོར་ཆེན་པོ་རུ༔ འཇུག་པའི་ལག་ལེན་རིམ་པ་ལ༔ སྐུ་གསུང་ཐུགས་ཡོན་ཕྲིན་ལས་ཀྱི༔ དབང་རྫས་ཐམས་ཅད་ལེགས་པར་བཤམས༔ དང་པོ་སྒྲུབ་པའི་ལས་གཞུང་བསྲང་༔ དེ་ནས་སྒྲུབ་པའི་ཛབ྄་ཁང་དབྱེ༔ ཨཱཿབདག་ཉིད་དྲག་པོའི་དཀྱིལ་འཁོར་དུ༔ གསལ་བའི་རང་གདངས་རྟེན་བརྟེན་པའི༔ དཀྱིལ་འཁོར་ཡོངས་རྫོགས་ཆེན་པོར་སྤྲོས༔ སྐུ་གསུང་ཐུགས་ཡོན་ཕྲིན་ལས་ཀུན༔ མི་ཟད་རྒྱན་གྱི་འཁོར་ལོ་ཡི༔ རོལ་པར་སྒྲུབ་རྫས་བྱིན་བརླབས་སོ༔ སྒྲུབ་སྔགས་སྟོང་ལས་མི་ཉུང་བཟླ༔ དང་པོ་སྟ་གོན་ལེགས་པར་བྱ༔ མཐར་ནི་སློབ་མ་གྲལ་དུ་འཁོད༔ ཁྲུས་བྱ་བགེགས་བསྐྲད་སྲུང་འཁོར་བསྒོམ༔ སྐྱབས་སུ་འགྲོ་ཞིང་སེམས་མཆོག་བསྐྱེད༔ དེ་ནས་མཚན་ལྡན་བླ་མ་ལ༔ དད་དམ་ལྡན་པའི་སློབ་བུ་ཡིས༔ གསེར་གྱི་མཎྜལ་ལེགས་བཀོད་ནས༔ དད་གུས་ལྡན་པས་ཞུ་བ་ནི༔ ཧོཿ བླ་མ་སངས་རྒྱས་ཀུན་འདུས་དཔལ༔ ཁྱེད་ལ་སྐྱབས་མཆི་སྡིག་པ་བཤགས༔ བདག་ནི་འཁོར་བ་ལས་བསྒྲལ་ཕྱིར༔ དབང་གི་དཀྱིལ་འཁོར་ཆེན་པོ་འདིར༔ སྨིན་ཅིང་གྲོལ་བར་མཛད་དུ་གསོལ༔ ལན་གསུམ་མཐར༔ བླ་མས༔ ཀྱེ་ཧོ་རིགས་ཀྱི་བུ་མཆོག་རྣམས༔ ཁྱེད་ཅག་དབང་གི་སྒོར་འཇུག་ན༔ དམ་ཚིག་གཉན་པོ་བསྲུང་ནུས་སམ༔ ནུས་ན་སྨིན་གྲོལ་བསྟན་པར་བགྱི༔ མི་ནུས་པ་རྣམས་ཕྱིར་དེངས་ཤིག༔ ཅེས་དམ་ཉམས་རྣམས་ཕྱིར་དབྱུང་༔ དེ་ནས་སློབ་མས་ཞུ་འབུལ་ནི༔ ཀྱེ་ཧོཿ བླ་མ་མགོན་པོ་ཆེ་བའི་མཆོག༔ དཀྱིལ་འཁོར་མངའ་བདག་དཔལ་ཆེན་པོ༔ བདག་ལ་བརྩེར་དགོངས་རྗེས་སུ་ཟུངས༔ དམ་ཚིག་གཉན་པོ་བདག་གིས་བསྲུངས༔ འགྲོ་བའི་དོན་ཡང་ཅི་ནུས་བསྒྲུབ༔ དབང་གིས་སྨིན་གྲོལ་མཛད་དུ་གསོལ༔ ཞེས་ཞུ༔ དེ་ནས་བླ་མས༔ ཀྱེ་ཧོཿ ལས་སྨོན་བསོད་ནམས་ཕུན་ཚོགས་པའི༔ སྐལ་ལྡན་སྐྱེས་བུ་དམ་པ་རྣམས༔ ཕུན་སུམ་ཚོགས་པ་ལྔ་ལྡན་གྱི༔ ཞིང་ཁམས་རྣམ་དག་དྲན་པར་གྱིས༔ འདུ་ཤེས་དག་པ་བསྟེན་མཛོད་ཉོན༔ སྨིན་གྲོལ་དབང་མཆོག་སྟོན་པར་བགྱི༔ དེ་ནས་དམ་ཆུ་སྦྱིན་པ་ནི༔ ཧཱུྃ༔ གསང་ཆེན་བདུད་རྩི་བླ་ན་མེད༔ རྡོ་རྗེའི་དམ་ཚིག་ཆེན་པོའི་བཅུད༔ སྐལ་ལྡན་ཁྱོད་ཀྱི་ལྕེ་ལ་བཞག༔ དམ་ཚིག་སྲུང་ན་དངོས་གྲུབ་ཐོབ༔ ཉམས་ན་བཀའ་ཡི་ཆད་པས་གཞོམ༔ རྡོ་རྗེ་དམྱལ་བའི་སྡུག་བསྔལ་མྱོང་༔ དེ་བས་དམ་ཚིག་གཉན་པོ་སྲུངས༔ ས་མ་ཡ་ན་ར་ཀན༔ ཅེས་བསྐྱལ་བཅུག་གོ༔ དེ་ནས་སློབ་མ་ལྷར་གསལ་ནི༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་སོགས་གཟུང་བ་དང་འཛིན་པ་གཉིས་ཀྱིས་བསྡུས་པའི་ཆོས་ཐམས་ཅད་གདོད་ནས་ཆོས་ཉིད་སྟོང་པ་ཉིད་ཀྱི་ངང་དུ་རིག་སྟེ༔ སྟོང་པའི་ངང་ལས་རང་སྣང་འོག་མིན་བདེ་ཆེན་པདྨ་བཀོད་ཀྱི་ཞིང་ཁམས་རྣམ་པར་དག་པའི་དབུས་སུ་ཡེ་ཤེས་རང་སྣང་ལྷུན་གྲུབ་ཀྱི་གཞལ་ཡས་ཁང་ཡངས་ཤིང་རྒྱ་ཆེ་བའི་དབུས་སུ་སོགས་གཞུང་བཞིན་ལྷ་བསྐྱེད་སྤྱན་འདྲེན་གྱིས་ཡེ་ཤེས་དབབ་སྟེ༔ ཏིཥྛ་བཛྲས་བརྟན་པར་བྱ༔ དེ་ནས་བུམ་དབང་བསྐུར་བ་ནི༔ དང་པོ་བུམ་པ་ཐོགས་ལ༔ ཧཱུྃ༔ རིན་ཆེན་བུམ་པ་ལྷའི་གཞལ་ཡས༔ མཚན་ཉིད་བཀོད་པ་རབ་རྫོགས་པའི༔ ནང་དུ་དོན་གྱི་རིག་སྐུ་ཉིད༔ ཆེ་མཆོག་རཀྴ་ཐོད་ཕྲེང་རྩལ༔ ཡང་ཁྲོས་རྡོ་རྗེ་གྲོ་བོ་ལོད༔ སྐུ་ཡི་རང་གདངས་དཔའ་བོ་གིང་༔ ཡེ་ཤེས་རང་རྩལ་མཁའ་འགྲོ་ལྔ༔ ངོ་བོ་ཉིད་སྐུ་པདྨ་རྒྱལ༔ སྣང་སྲིད་ཟིལ་གནོན་རྒྱལ་ཆེན་བཞི༔ བཀའ་སྡོད་ལས་ཀྱི་ཕོ་ཉ་བཞི༔ རྒྱུད་སྡེ་རྒྱ་མཚོའི་དཀྱིལ་འཁོར་བཅས༔ མ་ལུས་ལྷུན་གྲུབ་ཆེན་པོར་རྫོགས༔ སྐལ་ལྡན་ཁྱོད་ལ་དབང་བསྐུར་རོ༔ ལུས་སྒྲིབ་དག་ནས་བུམ་དབང་ཐོབ༔ སྤྲུལ་པའི་སྐུ་ཡི་གོ་འཕང་དང་༔ རྣམ་སྨིན་རིག་འཛིན་ཉེར་ཐོབ་ཤོག༔ རྩ་སྔགས་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རིགས་ཀྱི་བདག་པོའི་སྐུ་གཏད་ལ༔ ཧཱུྃ༔ ངོ་བོ་ཉིད་སྐུ་པདྨ་འབྱུང་༔ རྒྱལ་བ་རྒྱ་མཚོ་འདུས་པའི་དཔལ༔ སྐལ་ལྡན་ཁྱོད་ལ་དབང་བསྐུར་རོ༔ བསྐྱེད་པ་སྐུ་ཡི་དབང་ཐོབ་ཤོག༔ རྩ་སྔགས་མཐར༔ པདྨ་བཛྲ་རཱ་ཛ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་དྲག་པོ་ཆེན་པོའི་སྐུ་གཏད་ལ༔ ཧཱུྃ༔ འཁོར་འདས་མཉམ་པ་ཉིད་ཀྱི་ངང་༔ རང་གྲོལ་ཆེན་པོར་འཇིགས་མཛད་དཔལ༔ ཆེ་མཆོག་རྡོ་རྗེ་གྲོ་ལོད་ཀྱིས༔ སྐལ་ལྡན་བུ་ལ་དབང་བསྐུར་རོ༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་མཁའ་འགྲོ་སྡེ་ལྔ་གཏད་ལ༔ ཧཱུྃ༔ ཡེ་ཤེས་ལྔ་ཡི་རང་རྩལ་ལས༔ རང་བྱུང་མཁའ་འགྲོ་ཆེན་མོ་ལྔས༔ སྐལ་ལྡན་བུ་ལ་དབང་བསྐུར་རོ༔ རྡོ་རྗེ་སྐུ་ཡི་དབང་ཐོབ་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གིང་ཆེན་བཞིའི་སྐུ་ཐོགས་ལ༔ ཧཱུྃ༔ སྐུ་བཞིའི་རང་མདངས་ཡེ་ཤེས་སྐུ༔ དཔའ་བོ་ཆེན་པོ་གིང་ཆེན་བཞིས༔ སྐལ་ལྡན་བུ་ལ་དབང་བསྐུར་རོ༔ རྡོ་རྗེ་སྐུ་རུ་སྨིན་གྲོལ་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བཀའ་སྡོད་རྣམ་བཞི་གཏད་ལ༔ ཧཱུྃ༔ ཆོས་ཉིད་ངང་ལས་མ་གཡོས་ཀྱང་༔ བསྟན་འགྲོའི་དོན་དུ་སྐུར་བཞེངས་པ༔ བཀའ་སྡོད་ཆེན་པོ་རྣམ་བཞི་ཡིས༔ སྐལ་ལྡན་བུ་ལ་དབང་བསྐུར་རོ༔ སྐུ་ལ་དབང་བསྒྱུར་དབང་ཐོབ་ནས༔ མངོན་སྤྱོད་ལས་ཀུན་འགྲུབ་པར་ཤོག༔ རྩ་སྔགས་མཐར༔ ཧྲཱིཿཧཱུྃ་མ་མ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རྒྱལ་ཆེན་སྡེ་བཞིའི་སྐུ་གཏད་ལ༔ ཧཱུྃ༔ ངོ་བོ་སྐྱེ་མེད་ཆོས་སྐུ་ལས༔ རང་གདངས་འགྲོ་འདུལ་རྒྱལ་པོར་ཤར༔ ཆོས་སྐྱོང་རྒྱལ་ཆེན་སྡེ་བཞི་ཡིས༔ སྐལ་ལྡན་བུ་ལ་དབང་བསྐུར་རོ༔ རང་སྣང་དབང་དུ་སྡུད་པ་དང་༔ གཞན་སྣང་ཟིལ་གནོན་དབང་ཐོབ་ཤོག༔ རྩ་སྔགས་མཐར༔ བྷཻ་ཀཱ་ཡ་ཨ་བྷི་ཥིཉྩ་ཨོཾ༔ ཕྱོགས་བཅུ་དུས་གསུམ་དུ་གཤེགས་ཤིང་བཞུགས་པའི་རྒྱལ་བ་སྲས་དང་སློབ་མར་བཅས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་ཆེ་མཆོག་རྡོ་རྗེ་ཁྲོ་ལོད་ཀྱི་ལྷ་ཚོགས་རྣམས་ཀྱི་རྣམ་པར་བྱོན་ནས་སློབ་མ་རྣམས་ལ་གཉིས་སུ་མེད་པར་ཐིམ་པས་བསྐྱེད་པ་སྐུ་ཡི་དབང་ཐོབ་སྟེ་ལུས་རྡོ་རྗེ་སྐུ་ཡི་རོལ་པར་འཕོས་ཤིང་སྨིན་པར་བསམ༔ དེ་ནས་མེ་ཧོམ་གཏད་ལ༔ ཧཱུྃ༔ དྲག་པོའི་ཞལ་གྱི་ཧོམ་ཁུང་འདིས༔ སྐལ་ལྡན་བུ་ལ་དབང་བསྐུར་རོ༔ མ་རིག་འཁྲུལ་པའི་དགྲ་བགེགས་རྣམས༔ བསྟབ་བསྲེག་སྒྲོལ་བའི་དབང་ཐོབ་ཤོག༔ རྩ་སྔགས་མཐར༔ ནྲྀ་ཏྲི་ཤ་ཏྲུཾ་མཱ་ར་ཡ་ཛྭ་ལ་རཾ་ཨ་བྷི་ཥིཉྩ་ཧཱུྃ༔ དེ་ནས་ལིང་ག་ཁམས་གསུམ་གྱི་རཱུ་ཏྲར་བསྒོམ་སྟེ་བསྒྲལ་དུ་བཅུག་པ་ནི༔ ཧཱུྃ༔ ཁམས་གསུམ་འཁྲུལ་པའི་རཱུ་ཏྲ་བདུད༔ མ་ལུས་བསད་ཅིང་སྒྲོལ་བའི་དབང་༔ སྐལ་ལྡན་ཁྱོད་ལ་བསྐུར་བར་བྱ༔ མངོན་སྤྱོད་དྲག་པོའི་དབང་ཐོབ་ཤོག༔ རྩ་སྔགས༔ ནྲྀ་ཏྲི་ཤ་ཏྲུཾ་མཱ་ར་ཡ་རྦད་ཨ་བྷི་ཥིཉྩ་ཨོཾ༔ དེ་ནས་མེ་རླུང་མཚོན་ཐུན་རྣམས་གཏད་ལ༔ ཧཱུྃ༔ དྲག་པོའི་སྒྱུ་འཕྲུལ་མེ་རླུང་མཚོན༔ ཐུན་དང་ཁྲོ་ཆུང་ཁྱུང་སྡིག་སོགས༔ མངོན་སྤྱོད་དྲག་པོའི་འཁྲུལ་འཁོར་གྱིས༔ སྐལ་ལྡན་ཁྱོད་ལ་དབང་བསྐུར་རོ༔ དགྲ་བགེགས་ལོག་འདྲེན་ནད་མུག་མཚོན༔ མ་ལུས་བཟློག་བསྒྱུར་བསད་བསྲེགས་ཀྱི༔ ལས་ཀུན་ཐོགས་མེད་འགྲུབ་པར་ཤོག༔ རྩ་སྔགས་མཐར༔ ནྲྀ་ཏྲི་ཤ་ཏྲུཾ་མཱ་ར་ཡ་བྷྱོ་སརྦ་ཨ་བྷི་ཥིཉྩ་ཧཱུྃ༔ དེ་ནས་རི་རབ་ཐོགས་ལ༔ ཧཱུྃ༔ དྲག་པོའི་མཐུ་སྟོབས་རི་རབ་འདི༔ སྐལ་ལྡན་བུ་ལ་གཏད་པ་ཡིས༔ དགྲ་བགེགས་གནོད་བྱེད་མ་ལུས་པ༔ བསད་བཟློག་བྲུབ་མནན་དབང་ཐོབ་ཤོག༔ རྩ་སྔགས་མཐར༔ ནྲྀ་ཏྲི་ཤ་ཏྲུཾ་མཱ་ར་ཡ་རྦད་བྷྱོ་ནན་ཨ་བྷི་ཥིཉྩ་ཧཱུྃ༔ བུམ་དབང་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ སྔགས་ཀྱི་དབང་ནི༔ མཁའ་འགྲོ་སྡེ་ལྔ་ལ་རྩ་བའི་སྔགས་མཐར༔ བྃ་ཧ་རི་ནི་ས་ཧྲཱིཿཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གིང་ཆེན་སྡེ་བཞི་ལ༔ བཛྲ་རཏྣ་པདྨ་ཀརྨ་ཨ་བྷི་ཥིཉྩ་ཨོཾ༔ བཀའ་སྡོད་རྣམ་བཞི་ལ༔ ཨོཾ་མ་ཧཱ་དཱེ་ཝ་ཧཱུྃ༔ མ་ཧཱ་ཀཱ་ལ་ཧཱུྃ༔ ཨེ་ཀ་ཛ་ཊཱི་བྷྱོ༔ མ་པྲ་མོ་སྲོག་ཏིག་སྙིང་ཏིག་པྲ་མོ་ཧ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རྒྱལ་པོ་ཆེན་པོ་བཞི་ལ༔ ཨོཾ་བྷཻ་རུ་རཀྵ་བྷེ་རུ་དྷ་ཀ་བྷི་རུ་པཀྵ་བཻ་ཤྲ་མ་ཎ་ཀཱ་ཡ་ཨ་བྷི་ཥིཉྩ་ཨོཾ༔ ས་མ་ཡ༔ རྒྱ་རྒྱ་རྒྱ༔ དེ་ནས་གསང་དབང་བསྐུར་བ་ནི༔ བྷནྡྷ་བདུད་རྩི་གཏད་ལ༔ ཧཱུྃ༔ དུས་གསུམ་རྒྱལ་བ་ཐམས་ཅད་ཀྱི༔ གསུང་གི་བཅུད་ཆེན་བདུད་རྩི་འཁྱིལ༔ ཨ་ལི་ཀ་ལི་རང་བྱུང་ཤར༔ སྐལ་ལྡན་ཁྱོད་ཀྱི་ངག་ཏུ་བླུད༔ ངག་སྒྲིབ་དག་ནས་གསང་དབང་ཐོབ༔ ལོངས་སྤྱོད་རྫོགས་སྐུའི་གོ་འཕང་དང་༔ ཚེ་དབང་རིག་འཛིན་ཉེར་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་བསྙེན་སྒྲུབ་ལས་སྦྱོར་གྱི་སྔགས་རྣམས་ཐོགས་ལ༔ ཧཱུྃ༔ དབང་དྲག་རྒྱལ་པོ་གྲོ་བོ་ལོད༔ སྒྱུ་འཕྲུལ་དཀྱིལ་འཁོར་ལྷ་ཚོགས་ཀྱི༔ སྲོག་གི་ཡང་སྙིང་སྔགས་ཕྲེང་འདིས༔ སྐལ་ལྡན་བུ་ལ་དབང་བསྐུར་རོ༔ བཟླས་པ་སྔགས་ཀྱི་དབང་ཐོབ་ནས༔ རྩ་རླུང་གནས་སུ་དག་གྱུར་ཏེ༔ རྡོ་རྗེའི་གསུང་དུ་འཕོ་བར་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་ཧཱུྃ་ཡིག་ལྔ་ཚོམ་ཐོགས་ལ༔ ཧཱུྃ༔ ཧཱུྃ་ནི་འཁོར་འདས་ཡོངས་ཀྱི་སྲོག༔ སྐལ་ལྡན་ཁྱོད་ལ་དབང་བསྐུར་རོ༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་ཀྱི་དབང་ཐོབ་སྟེ༔ བཟླས་པ་ཙམ་གྱིས་འགྲུབ་པར་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཝཱཀ་ཨ་བྷི་ཥིཉྩ་ཨཱཿདེ་ནས་ཕྲེང་བ་གཏད་ལ༔ ཧཱུྃ༔ རིན་ཆེན་ཐོད་པའི་ཕྲེང་བ་འདི༔ སྐལ་ལྡན་བུ་ལ་གཏད་པར་བྱ༔ བཟླས་པ་སྔགས་ཀྱི་དབང་ཐོབ་ནས༔ འགྲོ་བའི་དོན་ཀུན་ཡོངས་འགྲུབ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ་ཨཱཿགསང་བའི་དབང་བསྐུར་ཟབ་མོ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ དེ་ནས་ཤེར་དབང་བསྐུར་བ་ལ༔ དང་པོ་རིག་མ་གཏད་པ་ནི༔ ཧཱུྃ༔ འཁོར་འདས་བདེ་ཆེན་ཀློང་རྒྱས་འདེབས༔ ཤེས་རབ་ཆེན་པོའི་མཁའ་དབྱིངས་སུ༔ འཁོར་འདས་མ་བཅོས་ངང་གིས་འདུས༔ འུབ་ཆུབ་རོལ་པའི་བྷ་ག་རུ༔ ཁམས་གསུམ་འཁོར་བའི་རྒྱུ་རྐྱེན་བཅོམ༔ ཀ་དག་བདེ་ཆེན་ཡུམ་ཆེན་མོས༔ སྐལ་ལྡན་ཁྱོད་ལ་དབང་བསྐུར་རོ༔ བདེ་སྟོང་ཡེ་ཤེས་ཉམས་མྱོང་ཞིང་༔ ཡིད་དང་ཐིག་ལེའི་སྒྲིབ་པ་དག༔ ཤེས་རབ་ཡེ་ཤེས་དབང་ཐོབ་ནས༔ ཆོས་སྐུའི་དགོངས་པའི་ཀློང་ཆེན་བརྡོལ༔ ཕྱག་རྒྱའི་རིག་འཛིན་ཉེར་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཧཱུྃ་དམར་གཏད་ལ༔ ཧཱུྃ༔ སངས་རྒྱས་ཀུན་གྱི་ཐུགས་གསང་ཧཱུྃ༔ སེམས་ཅན་ཀུན་གྱི་སྲོག་ཀྱང་ཧཱུྃ༔ ཆེ་མཆོག་རྡོ་རྗེ་ཁྲོ་ལོད་ཀྱི༔ ཐུགས་ཀྱི་ཡང་སྙིང་འདི་གཏད་པས༔ མ་རིག་གསུམ་གྱིས་བསྡུས་པ་ཡི༔ སེམས་དང་སེམས་བྱུང་བག་ཆགས་དག༔ ཀ་དག་ཆོས་སྐུའི་གདིང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་སྲོག་འཁོར་གཏད་ལ༔ ཧཱུྃ༔ གཞི་དབྱིངས་སྤྲོས་པ་བྲལ་བའི་ཀློང་༔ གཞི་སྣང་ལྷུན་གྲུབ་དཀྱིལ་འཁོར་ཤར༔ རིགས་ཀུན་སྲོག་གི་འཁོར་ལོ་འདིས༔ སྐལ་ལྡན་ཁྱོད་ལ་དབང་བསྐུར་རོ༔ རྟེན་འབྲེལ་འཁྲུལ་པ་ལུགས་འབྱུང་སྲིད༔ ཆོས་ཉིད་ཀློང་ཆེན་ཀུན་བཟང་མོའི༔ བྷ་ག་ཡངས་པར་ལུགས་ལྡོག་སྟེ༔ བྱང་ཆུབ་ཆེན་པོར་རྣམ་གྲོལ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་རིལ་བུ་གཏད་ལ༔ ཧཱུྃ༔ བྱང་ཆུབ་སེམས་ཀྱི་ངོ་བོ་ཉིད༔ ཡེ་ཤེས་བདུད་རྩིའི་རིལ་བུ་འདི༔ སྐལ་ལྡན་བུ་ལ་གཏད་པ་ཡིས༔ སྙིང་པོའི་བཅུད་ལ་ལོངས་སྤྱོད་ཅིང་༔ འཁོར་བ་དོང་སྤྲུགས་དབང་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ལག་པ་གཡས་སུ་གནམ་ལྕགས་ཀྱི་རྡོ་རྗེ་གཏད་ལ༔ ཧཱུྃ༔ གཞོམ་གཞིག་བྲལ་བ་གཞིའི་རྡོ་རྗེ༔ སྐལ་ལྡན་ཁྱོད་ཀྱི་ལག་ཏུ་གཏད༔ ཉོན་མོངས་འཁྲུལ་པའི་རཱུ་ཏྲ་ཀུན༔ ཡེ་ཤེས་དབྱིངས་སྒྲོལ་མཐུ་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ལྕགས་ཕུར་ལག་གཡོན་དུ་གཏད་ལ༔ ཧཱུྃ༔ སྐུ་གསུམ་ལྷུན་གྲུབ་ཕུར་པ་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ དུག་གསུམ་སྐུ་གསུམ་ཀློང་སྒྲོལ་ནས༔ མི་འཇིགས་རྡོ་རྗེའི་གདིང་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ལྕགས་སྡིག་གཏད་ལ༔ ཧཱུྃ༔ ཡེ་ཤེས་རང་རྩལ་ལྕགས་སྡིག་གིས༔ གཟུང་འཛིན་རཱུ་ཏྲའི་སྙིང་ཁྲག་འཇོམས༔ སྐལ་ལྡན་ཁྱོད་ཀྱི་ལག་ཏུ་གཏད༔ སྤྲུལ་པ་སྒྱུ་འཕྲུལ་གར་བསྒྱུར་གྱིས༔ འཁོར་བ་དབྱིངས་སྒྲོལ་དབང་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ ཤེས་རབ་ཡེ་ཤེས་དབང་བསྐུར་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ དེ་ནས་ཚིག་དབང་ཟབ་མོ་ནི༔ དང་པོ་འཇའ་ཤེལ་གཏད་ལ༔ ཧཱུྃ༔ སྐུ་དང་ཡེ་ཤེས་རང་གཟུགས་ཤར༔ ལྷུན་གྲུབ་འཇའ་ཤེལ་འདི་གཏད་པས༔ རང་བྱུང་ཡེ་ཤེས་ངང་དུ་སད༔ སྒྲིབ་གཉིས་བག་ཆགས་ཀུན་དག་ནས༔ ཀ་དག་ཚིག་གི་དབང་ཆེན་ཐོབ༔ ངོ་བོ་ཉིད་སྐུའི་དགོངས་པར་སད༔ ལྷུན་གྲུབ་རིག་འཛིན་ཉེར་ཐོབ་ནས༔ གཞོན་ནུ་བུམ་སྐུར་སངས་རྒྱས་ཤོག༔ རྩ་སྔགས༔ སརྦ་ཨ་བྷི་ཥིཉྩ་ཧྲཱིཿདེ་ནས་ཐིག་ལེ་སྟོང་པའི་སྒྲོན་མེ་གཏད་ལ་བསྲེ་འཕོ་ནི༔ ཀྱེ༔ སྐལ་ལྡན་རིགས་ཀྱི་བུ་ཁྱོད་རང་གིས་དམིགས་པ་འདི་ལྟར་དུ་མཛོད་ཅིག༔ ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་ཐུགས་རྣམ་པར་མི་རྟོག་པའི་ངོ་བོ་དང་༔ ཁྱོད་ཀྱི་ཡེ་གཞིའི་ཀ་དག་གི་ངོ་བོ་ཐིག་ལེ་ཁ་དོག་ལྔ་དང་ལྡན་པ་སྤྱི་བོ་ནས་ཞུགས་ཁྱོད་རང་གི་རིག་པ་དང་འདྲེས༔ སེམས་རིག་ཐིག་ལེ་རུ་ཞུ་ནས་གཉིས་སུ་མེད་པའི་ངང་དུ་བསྲེས་ཤིག༔ ཨ་ཨ་ཨ་ཕཊ༔ ཀྱཻ་སྐལ་ལྡན་རིགས་ཀྱི་བུ་ངོ་བོ་ཡེ་སྟོང་སྤྲོས་པ་དང་བྲལ་བ༔ རང་བཞིན་མ་འགགས་ལྷུན་གྲུབ་ཀྱི་གདངས་ཆེན༔ ཐུགས་རྗེ་རང་ཤར་རང་གྲོལ་གྱི་ངང་གནས་ཆེན་པོ༔ འདི་དག་སྐུ་གསུམ་ལྷུན་གྱིས་གྲུབ་པའི་ངོ་བོ་ཡིན་ནོ༔ འདིའི་ངང་དུ་ཞོག་ཅིག༔ མི་བསྒོམ་པར་རང་བབས་སུ་ཞོག༔ མ་འཁྲུལ་བར་ཞེན་བྲལ་དུ་ལྷོད༔ མ་འཛིན་པར་ཀ་དག་ཏུ་སྐྱོངས༔ མ་ཡེངས་པར་ལྷུན་གྲུབ་ཏུ་ཞོག༔ ཡེ་གྲོལ་ཡིན་ཏེ་ཡང་གྲོལ་མི་གཞུག༔ བརྗོད་བྲལ་ཡིན་ཏེ་མཚོན་དཔེར་མ་འཁྲུལ༔ རིག་པ་ཡིན་ཏེ་མ་རིག་པ་དང་མ་ནོར༔ ངོ་བོ་ངང་བཞག་ངང་གནས་ཡིན་ཏེ་འཁྲུལ་པ་རང་གར་འཆོལ་བ་དང་མ་ནོར་བར་དོན་དམ་མི་ཤིགས་པའི་ངོ་བོར་གདིང་ཐོབ་པར་གྱིས་ཤིག༔ དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་དབང་རྣམས་དུས་གཅིག་ཏུ་ཐོབ་པ་ནི་ཆོས་ཉིད་ཀྱི་གནས་ལུགས་མཐོང་བ་ཉིད་དོ༔ འདི་ཁོ་ནའོ༔ ཚིག་དབང་བསྐུར་བ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ དེ་ནས་མཐའ་རྟེན་རྣམ་པ་བཞིའི༔ དང་པོ་གཏོར་མ་གཏད་པ་ནི༔ ཧཱུྃ༔ བརྡལ་ཁྱབ་ཡངས་པའི་སྣོད་མཆོག་ཏུ༔ སྣང་སྲིད་གཞིར་བཞེངས་བ་ལིཾ་ཏ༔ སྐལ་ལྡན་ཁྱོད་ལ་གཏད་པ་ཡིས༔ རིགས་དང་དཀྱིལ་འཁོར་ཐམས་ཅད་ཀུན༔ བསྙེན་སྒྲུབ་བསྒོམ་བཟླས་དབང་ཐོབ་ཤོག༔ རྩ་སྔགས༔ བ་ལིཾ་ཏ་ཨ་བྷི་ཥིཉྩ་སྭཱ་ཧཱ༔ དེ་ནས་བཀྲ་ཤིས་རྫས་བརྒྱད་ཐོགས་ལ༔ ཧཱུྃ༔ དབྱིངས་དང་ཡེ་ཤེས་དབྱེར་མེད་པའི༔ ངང་དུ་དགེ་ལེགས་དཔལ་ཐོབ་ཕྱིར༔ བཀྲ་ཤིས་རྫས་བརྒྱད་འདི་གཏད་པས༔ བཀྲ་ཤིས་ཕུན་སུམ་ཚོགས་པར་ཤོག༔ མངྒ་ལཾ་ཨ་བྷི་ཥིཉྩ་སྭཱ་ཧཱ༔ དེ་ནས་བཀྲ་ཤིས་རྟགས་བརྒྱད་གཏད་ལ༔ ཧཱུྃ༔ ཆོས་སྐུ་སྐྱེ་བ་མེད་པའི་ངང་༔ གཟུགས་སྐུས་གདུལ་བྱ་འདུལ་བའི་ཕྱིར༔ མཚན་དཔེའི་བཀྲ་ཤིས་རྟགས་བརྒྱད་འདིས༔ སྐལ་ལྡན་བུ་ལ་དབང་བསྐུར་རོ༔ ཨཥྚ་མངྒ་ལཾ་ཨ་བྷི་ཥིཉྩ་སྭཱ་ཧཱ༔ དེ་ནས་རྒྱལ་སྲིད་སྣ་བདུན་གཏད་ལ༔ ཧཱུྃ༔ རང་རིག་ཆོས་སྐུའི་རྒྱལ་སྲིད་འདི༔ སྐལ་ལྡན་བུ་ལ་གཏད་པར་བྱ༔ རྣམ་མཁྱེན་རྫོགས་པའི་སངས་རྒྱས་ཀྱི༔ གོ་འཕང་མཆོག་གི་དབང་ཐོབ་ཤོག༔ མ་ཎི་རཏྣ་ཨ་བྷི་ཥིཉྩ་སྭཱ་ཧཱ༔ ཐུགས་རྗེ་ལྡན་པའི་སློབ་དཔོན་གྱིས༔ མོས་གུས་ལྡན་པའི་སློབ་མ་ལ༔ འདི་ནི་ལན་གཅིག་བསྐུར་བ་ཡིས༔ དད་པ་དམ་ཚིག་རྟག་ལྡན་ན༔ རིགས་དང་དཀྱིལ་འཁོར་ཐམས་ཅད་ཀྱི༔ སྤྱི་དབང་དམ་པ་ཐོབ་གྱུར་ནས༔ ཡང་དག་ལམ་ལས་ཕྱིར་མི་ལྡོག༔ གསང་སྔགས་དབང་གི་སྒོར་ཞུགས་ན༔ དམ་ཚིག་གཉན་པོ་གནད་དུ་ཆེ༔ དམ་དུ་བསྲུང་ན་སངས་རྒྱས་ཐོབ༔ ཉམས་ན་རྡོ་རྗེའི་དམྱལ་བར་འཚིག༔ དེ་ཕྱིར་འདི་ནི་སྲོག་ཏུ་ཟུངས༔ དམ་ལྡན་གང་ཞིག་ནད་གདོན་ཞི༔ བསམ་པ་འགྲུབ་ཅིང་འཇིགས་དང་བྲལ༔ བསྒྲུབ་པས་དངོས་གྲུབ་མི་རིང་འཐོབ༔ དབང་བསྐུར་ཟབ་མོ་འདི་ཉིད་ནི༔ མ་བརྟག་པ་ལ་བསྐུར་མི་བྱ༔ དཔའ་བོ་མཁའ་འགྲོའི་དམ་རྒྱ་ཡོད༔ བཀའ་སྲུང་ལྷ་མགོན་ཚོགས་བདག་དང་༔ དབང་ཕྱུག་མ་ཧཱ་དཱེ་ཝ་དང་༔ རྒྱལ་ཆེན་རྣམ་ཐོས་སྲས་ཀྱིས་སྲུངས༔ གསང་བ་སྐུ་གསུང་ཐུགས་ཀྱི་རྒྱ༔ དམ་ལྡན་སྐྱེས་བུའི་བསམ་དོན་སྒྲུབས༔ དམ་ཉམས་ལོག་ལྟའི་དབང་པོ་སྣུབས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེ་གྲོ་ལོད་རྩལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མི་ལོ་བཅོ་ལྔའི་བར་བཀའ་རྒྱ་བྱས་མཐར་རྟེན་འབྲེལ་དུས་ལ་བབས་ཚེ་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ།། །།