TTDL-ZABTER-08-NYA-006

Previous Text Back to Volume PageNext Text

Wylie title	zab gsang mkha' 'gro'i snying thig las: lha chen rnam pa gsum gyi srog gtad yid bzhin 'khor lo:
Location	bdud 'joms gling pa zab gter Volume 8, Text 6, Pages 39-43 (Folios 1a1 to 3a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las lha chen rnam pa gsum gyi srog gtad yid bzhin 'khor lo. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 39-43. Thimphu, Bhutan: Lama Kuenzang Wangdue, 2004.
Side notes	Recto: srog gtad   Verso: bdud 'joms bka' srung lha chen
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Protector Entrustment Rituals- srog gtad
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	lha chen rnam gsum
Colophon	ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་ཀྱིས་གཏེར་ནས་བཏོན་ཏེ་མི་ལོ་ཉེར་གཉིས་བར་དུ་བཀའ་རྒྱས་བཏབ་ནས་མཐར་འོད་གསལ་རྫོགས་པ་ཆེན་པོའི་རྣལ་འབྱོར་པ་བསོད་ནམས་བཀྲ་ཤིས་ཀྱིས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པ་ནི་ཧོར་གྱི་བླ་མ་བློ་བཟང་རྡོ་རྗེའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di ni khrag 'thung bdud 'joms rdo rje khro lod kyis gter nas bton te mi lo nyer gnyis bar du bka' rgyas btab nas mthar 'od gsal rdzogs pa chen po'i rnal 'byor pa bsod nams bkra shis kyis nan du bskul ngor gtan la phab pa'i yi ge pa ni hor gyi bla ma blo bzang rdo rje'o/_/dge'o/_/dge'o/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་རྣམ་པ་གསུམ་གྱི་སྲོག་གཏད་ཡིད་བཞིན་འཁོར་ལོ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) བསྐལ་པའི་མར་གཤམ་སྙིགས་མའི་དུས༔ དམ་ལྡན་སྐྱེས་བུ་རྣམས་ཀྱི་དོན༔ ལྷ་ཆེན་གཙུག་ན་ཟླ་བ་ཡི༔ སྲོག་དབང་ཟབ་མོ་བསྟན་པར་བྱ༔ འདི་ཡི་ལག་ལེན་རིམ་པ་ལ༔ དབང་རྫས་ཐམས་ཅད་དཀྱུས་བཞིན་བཀོད༔ དང་པོ་ལས་གཞུང་བསྲང་བྱས་ནས༔ དྲང་སྲོང་ལྷ་ཡི་བླ་མ་ཡི༔ སྐུ་གསུང་ཐུགས་ཡོན་ཕྲིན་ལས་ཀུན༔ ཡོངས་འདུས་ཡོངས་རྫོགས་རྒྱ་ཡིས་བཏབ༔ དེ་ནས་སློབ་མ་གྲལ་འཁོད་ཅིང་༔ ཁྲུས་བྱས་བགེགས་བསྐྲད་སྲུང་འཁོར་བསྒོམ༔ དང་པོ་ཞུ་བ་ལ༔ ཀྱཻ༔ བླ་མ་རྡོ་རྗེ་འཛིན་ཁྱོད་ཀྱིས༔ བདག་ཅག་བདེ་ལེགས་མཛད་པའི་ཕྱིར༔ དྲང་སྲོང་ལྷ་ཡི་བླ་མ་ཡི༔ སྲོག་གི་དབང་མཆོག་བསྐུར་དུ་གསོལ༔ ལན་གསུམ་མཐར༔ གཏོར་མ་ལྷ་ཆེན་དངོས་སུ་གསལ་ལ༔ དམ་ཆུ་ཐོགས་ལ༔ ཧཱུྃ༔ རྡོ་རྗེ་ཅན་སོགས་རྒྱལ་ཀུན་གྱི༔ དམ་ཚིག་གཉན་པོ་མནའ་ཡི་ཆུ༔ ལྷ་ཆེན་ཁྱོད་ཀྱི་ལྕེ་ལ་བཞག༔ བདག་དང་སྒྲུབ་པའི་སྐལ་ལྡན་ལ༔ ཕ་མ་བུ་ཚ་ཇི་བཞིན་སྐྱོངས༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ ས་མ་ཡ༔ ཞེས་མེ་དང་ཆུ་བྲབ་སྟེ་གཏོར་མ་ལྷ་ཆེན་དངོས་སུ་གསལ་བ་ལག་ཏུ་ཐོགས་ལ༔ ཀྱཻ༔ རྡོ་རྗེ་ཅན་སོགས་རྒྱལ་ཀུན་གྱི༔ བཀའ་དང་དམ་ཚིག་གཅིག་དྲིལ་ཏེ༔ བསྒོ་བའི་བཀའ་ཡིན་ཁྱོད་ཀྱིས་ལོངས༔ སྐལ་བཟང་སྐྱེས་བུ་འདི་ཉིད་ལ༔ ལྷ་ཆེན་འཁོར་བཅས་འགོ་བ་དང་༔ འཁོར་ཞིང་འགྲོགས་པར་མཛད་དུ་གསོལ༔ དམ་ལ་མ་འདའ་ས་མ་ཡ༔ ཞེས་བརྗོད་པས་སློབ་མ་ལ་ཐིམ་པས་སློབ་མ་ལྷ་ཆེན་དངོས་སུ་གྱུར་པར་བསམ༔ སླར་ཡང་ལྷ་ཆེན་བསྐྱེད་ཆོག་གིས་བསྐྱེད༔ སྤྱན་འདྲེན་གྱིས་བསྟིམ༔ ཏིཥྛ་བཛྲ་གྱིས་བརྟན་པར་བྱས༔ དེ་ནས་དམ་ཆུ་ཐོགས་ལ༔ ཀྱཻ༔ རྡོ་རྗེ་ཅན་སོགས་རྒྱལ་ཀུན་གྱི༔ གསང་བ་ཆེན་པོ་མནའ་ཡི་ཆུ༔ ལྷ་མི་དབྱེར་མེད་ངག་ཏུ་བླུད༔ ཡིད་ལ་དྲན་ཅིང་བསྒྲུབ་ཙམ་གྱིས༔ དེ་མ་ཐག་ཏུ་དེའི་མདུན་སར༔ ལྷ་ཆེན་འཁོར་བཅས་མཆིས་གྱུར་ཏེ༔ ཕྲིན་ལས་རབ་འབྱམས་ཡོངས་སུ་སྒྲུབས༔ ས་མ་ཡ་ན་ར་ཀན༔ ཞེས་བསྐྱལ་བཅུག་གོ༔ དམ་ཚིག་གི་བདུད་རྩི་དེ་སྙིང་གར་བབ་པས་ཙིཏྟ་རིན་པོ་ཆེའི་སྦུབས་སུ་ཀུན་རྫོབ་བྱང་ཆུབ་སེམས་ཀྱི་ངོ་བོ་རྡོ་རྗེ་སྔོན་པོ་འོད་འབར་བའི་ལྟེ་བར་དོན་དམ་བྱང་ཆུབ་སེམས་ཀྱི་ངོ་བོ་འོད་ལྔའི་ཐིག་ལེ་ཧཱུྃ་གིས་མཚན་པ་ཅན་དུ་གྱུར་ནས་དམ་ཚིག་གཉན་པོའི་སྲོག་ཐོབ་པར་གྱུར༔ དེ་ནས་ལྕགས་ཀྱུ་ལག་གཡས་སུ་གཏད་ལ༔ ཧཱུྃ༔ ལྷ་ཆེན་ཆེ་གེ་ཆེན་པོ་ལ༔ དབང་གི་ལྕགས་ཀྱུ་འདི་གཏད་པས༔ ཁམས་གསུམ་དབང་དུ་སྡུད་པ་དང་༔ ཕྲིན་ལས་རབ་འབྱམས་ཡོངས་འགྲུབ་ཤོག༔ སརྦ་ཨ་བྷི་ཥིཉྩ་ཧཱུྃ༔ དེ་ནས་ཞགས་པ་ལག་གཡོན་དུ་གཏད་ལ༔ ཧཱུྃ༔ ལྷ་ཆེན་ཆེ་གེ་ཆེན་པོ་ལ༔ དབང་གི་ཞགས་པ་འདི་གཏད་པས༔ སྣང་སྲིད་མ་ལུས་དབང་སྡུད་ཅིང་༔ སྐྱེ་འགྲོ་བྲན་དུ་ཁོལ་བར་ཤོག༔ སརྦ་ཨ་བྷི་ཥིཉྩ་ཧཱུྃ༔ དེ་ནས་གཏེར་བུམ་གཏད་ལ༔ ཧཱུྃ༔ ལྷ་ཆེན་ཆེ་གེ་ཆེན་པོ་ལ༔ གཏེར་གྱི་བུམ་བཟང་འདི་གཏད་པས༔ ལོངས་སྤྱོད་བདེ་སྐྱིད་ཕུན་ཚོགས་ཀྱི༔ འཛད་མེད་གཏེར་ལ་དབང་ཐོབ་ཤོག༔ སརྦ་ཨ་བྷི་ཥིཉྩ་ཧཱུྃ༔ དེ་ནས་སྲོག་འཁོར་གཏད་ལ༔ ཧཱུྃ༔ ལྷ་ཆེན་ཆེ་གེ་ཆེན་པོ་ལ༔ སྲོག་གི་འཁོར་ལོ་འདི་གཏད་པས༔ ཡབ་ཡུམ་སྤྲུལ་འཁོར་སྡེ་དང་དཔུང་མ་ལུས་བསྒྲུབས་ལ་དབང་ཐོབ་ཤོག༔ སརྦ་ཨ་བྷི་ཥིཉྩ་ཧཱུྃ༔ དེ་ནས་སྲོག་ཡིག་རྣམ་དྲུག་གཏད་ལ༔ ཧཱུྃ༔ སྲོག་གི་སྙིང་པོ་འདི་གཏད་པས༔ ལྷ་ཆེན་ཆེ་གེ་་ཆེན་པོ་ཡི༔ ཡབ་ཡུམ་སྤྲུལ་འཁོར་དཔུང་བཅས་ཀྱི༔ སྲོག་ལ་དབང་བསྒྱུར་དབང་ཐོབ་ཤོག༔ སརྦ་ཨ་བྷི་ཥིཉྩ་ཧཱུྃ༔ དེ་ནས་སྐུ་གཟུགས་གཏད་ལ༔ ཧཱུྃ༔ ལྷ་ཆེན་དབང་པོའི་སྐུ་གཏད་པས༔ ལྷ་དབང་རྒྱལ་དང་དེ་ཡི་ཡུམ༔ སྤྲུལ་འཁོར་ནོར་བདག་དཔལ་མགོན་གྱི༔ སྐུ་ལ་དབང་བསྒྱུར་དབང་ཐོབ་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་བཟླས་པའི་སྔགས་གཏད་ལ༔ ཧཱུྃ༔ གསུང་གི་སྙིང་པོ་འདི་གཏད་པས༔ ལྷ་དབང་རྒྱལ་དང་དེ་ཡི་ཡུམ༔ སྤྲུལ་འཁོར་ནོར་བདག་དཔལ་མགོན་གྱི༔ གསུང་ལ་དབང་བསྒྱུར་དབང་ཐོབ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ་ཨཱཿདེ་ནས་ལིངྒ་གཏད་ལ༔ ཧཱུྃ༔ གསང་སྙིང་ལིངྒ་འདི་གཏད་པས༔ ལྷ་དབང་རྒྱལ་དང་དེ་ཡི་ཡུམ༔ སྤྲུལ་འཁོར་ནོར་བདག་དཔལ་མགོན་གྱི༔ ཐུགས་ལ་དབང་བསྒྱུར་དབང་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་མེ་ཏོག་རྣམ་ལྔ་གཏད་ལ༔ ཧཱུྃ༔ མེ་ཏོག་སྣ་ཚོགས་པདྨོ་སྦྱིན༔ ལྷ་དབང་རྒྱལ་དང་དེ་ཡི་ཡུམ༔ དགའ་བདེ་ལོངས་སྤྱོད་ཕུན་ཚོགས་ཀྱི༔ ཡོན་ཏན་དཔལ་གྱི་དབང་ཐོབ་ཤོག༔ རྩ་སྔགས༔ སརྦ་རཏྣ་ཨ་བྷི་ཥིཉྩ་ཨཱཿདེ་ནས་ནོར་བུ་མཐིང་ནག་གཏད་ལ༔ ཧཱུྃ༔ རིན་ཆེན་ནོར་བུ་འདི་གཏད་པས༔ ལྷ་དབང་རྒྱལ་དང་དེ་ཡི་ཡུམ༔ ཕྲིན་ལས་ཐོགས་མེད་དབང་ཐོབ་ནས༔ ཕ་རོལ་དགྲ་དཔུང་གཞོམ་པར་ཤོག༔ རྩ་སྔགས༔ སརྦ་ཀརྨ་ཨ་བྷི་ཥིཉྩ་ཧཱུྃ༔ དེ་ནས་རྒྱལ་སྲིད་གཏད་ལ༔ ཧཱུྃ༔ འཁོར་ལོས་བསྒྱུར་བ་རྒྱལ་པོའི་སྲིད༔ སྐལ་ལྡན་བུ་ལ་གཏད་པ་ཡིས༔ ལྷ་ཆེན་འཁོར་ལོས་སྒྱུར་རྒྱལ་གྱི༔ དཔལ་ལ་དབང་བསྒྱུར་དབང་ཐོབ་ཤོག༔ རྩ་སྔགས༔ སརྦ་ཨ་མ་མ་ཎི་རཏྣ་ཨ་བྷི་བིཉྩ་ཧཱུྃ༔ དེ་ནས་སྨོན་ལམ་གདབ་པ་ནི༔ ཧོཿ ལྷ་ཆེན་ཆེ་གེ་མོའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ལ་དབང་བསྒྱུར་བའི་དབང་དང་དཔལ་དང་མཐུ་ནུས་ཐམས་ཅད་སློབ་མ་འདི་ལ་ཐོབ་པར་གྱུར་ཅིག༔ སྨོན་འགྲུབ་བདེན་བརྗོད་ཀྱང་ནན་དུ་བྱ༔ ཤིས་པ་བརྗོད༔ འདི་ཐོབ་སྐལ་ལྡན་སྐྱེ་བུ་ཡིས༔ སྒྲུབ་པ་ཙམ་གྱིས་ངེས་པར་འགྲུབ༔ སྙིང་ཉེ་བརྩེ་དང་གདུང་བར་འཁོར༔ བསམ་པའི་དོན་ཀུན་ངེས་པར་འགྲུབ༔ དབང་ཕྱུག་འདོད་རྒྱལ་ཚོགས་བདག་གི༔ སྤྱི་དབང་ཟབ་མོ་འདི་ཁོ་ན༔ ཁྱབ་བདག་བླ་ན་མེད་པ་ཡིན༔ བཀའ་སྲུང་གནོད་སྦྱིན་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེ་ཁྲོ་ལོད་ཀྱིས་གཏེར་ནས་བཏོན་ཏེ་མི་ལོ་ཉེར་གཉིས་བར་དུ་བཀའ་རྒྱས་བཏབ་ནས་མཐར་འོད་གསལ་རྫོགས་པ་ཆེན་པོའི་རྣལ་འབྱོར་པ་བསོད་ནམས་བཀྲ་ཤིས་ཀྱིས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པ་ནི་ཧོར་གྱི་བླ་མ་བློ་བཟང་རྡོ་རྗེའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།