TTDL-ZABTER-08-NYA-039

Previous Text Back to Volume PageNext Text

Wylie title	zab gsang mkha' 'gro'i snying thig las: lha dbang 'dod pa'i rgyal po'i sgrub pa khams gsum dbang bsgyur:
Location	bdud 'joms gling pa zab gter Volume 8, Text 39, Pages 329-345 (Folios 1a1 to 9a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las lha dbang 'dod pa'i rgyal po'i sgrub pa khams gsum dbang bsgyur. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 329-345. Thimphu, Bhutan: Lama Kuenzang Wangdue, 2004.
Side notes	Recto: sgrub pa   Verso: bdud 'joms bka' srung ma 'dod rgyal
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་སྨོན་ལམ་ལས་འཕྲོ་འཛོམས་པའི་སྐྱེས་མཆོག་མཁྱེན་རབ་རྒྱ་མཚོ་དང་རིགས་སྲས་རིག་འཛིན་ནོར་བུས་ཡང་ཡང་བསྐུལ་ངོར་བདག་འདྲ་དཔའ་བོ་བདུད་འཇོམས་རྡོ་རྗེས་མ་རྒྱུད་མཁའ་འགྲོའི་བརྡ་རང་གྲོལ་དུ་བྱུང་སྟེ་དག་པར་ཕབ་པའི་ཡི་གེ་པ་ནི་ལུང་ཟིན་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang smon lam las 'phro 'dzoms pa'i skyes mchog mkhyen rab rgya mtsho dang rigs sras rig 'dzin nor bus yang yang bskul ngor bdag 'dra dpa' bo bdud 'joms rdo rjes ma rgyud mkha' 'gro'i brda rang grol du byung ste dag par phab pa'i yi ge pa ni lung zin phun tshogs bkra shis so/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ལྷ་དབང་འདོད་པའི་རྒྱལ་པོའི་སྒྲུབ་པ་ཁམས་གསུམ་དབང་བསྒྱུར་བཞུགས་སོ༔

ཐྂ༎༔ ན་མོ་གུ་རུ་མཱུ་ཁྱོ་པདྨ་ཀ་ར་ན་མ་ཧོཿ (བརྡ་ཡིག་) ལྔ་བརྒྱ་དུས་ཀྱི་ཐ་མ་ལ༔ ང་ཡི་བརྒྱུད་འཛིན་སྐྱེས་བུ་རྣམས༔ དབུ་འཕང་དམའ་ཞིང་ཉམ་ཐག་དུས༔ ཡི་དམ་གཞན་གྱིས་སྐྱོབ་དཀའ་བས༔ ཕུར་པ་ཕྲིན་ལས་གདུལ་བྱར་ལེགས༔ བཀའ་སྲོང་གཞན་གྱིས་སྐྱོབ་པར་དཀའ༔ དེ་ལས་གསུང་གི་གསང་བ་ཉིད༔ དབང་ཕྱུག་འདོད་པའི་རྒྱལ་པོ་སྟེ༔ གཏོར་མ་ནོར་བུའི་དབྱིབས་འདྲ་ལ༔ ལྕགས་ཀྱུས་མཚན་པ་རྒྱན་དུ་བྱ༔ འཇའ་ཚོན་འོད་ཀྱི་གུར་ཁང་ཕུབ༔ ཕྱོགས་བཞིར་དུས་བཞིའི་ལྷ་མོ་ནི༔ ལྷ་བཤོས་བཀས་པ་ལྟ་བུ་བཞི༔ ཕྱག་རྒྱ་བཞི་པོ་རྒྱན་དུ་བཏགས༔ བཀྲ་ཤིས་རྫས་བརྒྱད་བསགས་པ་དང་༔ རྟགས་བརྒྱད་རིས་སུ་བྲིས་ནས་སུ༔ བསྒྲུབ་པའི་རྟེན་དུ་བཙུགས་ནས་སུ༔ མཆོད་རྫས་འབྱོར་ཚོགས་ཅི་རིགས་བཤམས༔ སྭ་བྷཱ་ཝས་སྟོང་པར་སྦྱང་༔ སྟོང་པའི་ངང་ལས་རང་ཉིད་ལྷར་གསལ་བའི་ཐུགས་ཀ་ནས་འོད་དང་འོད་ཕུང་དམར་པོ་དཔག་ཏུ་མེད་པ་འཕྲོས་པས་འོད་དམར་པད་མ་རཱ་གའི་ཁ་དོག་ལྟ་བུ་ལས་གྲུབ་པའི་འོད་ཕུང་བསྐལ་པའི་མེ་ལྟ་བུ་འབར་བའི་དབུས་སུ་པདྨ་རཱ་ག་ལས་གྲུབ་པའི་གཞལ་ཡས་ཁང་དབྱིབས་ཟླ་གམ་སྒོ་གཅིག་པ༔ རྒྱ་ཆེ་ཞིང་ཁྱོན་ཡངས་པ་དབྱིབས་མཛེས་ཤིང་བཀོད་ལེགས་པའི་དབུས་སུ་པདྨ་རཱ་གའི་ཁྲི་ཡངས་ཤིང་རྒྱ་ཆེ་བ་ཟླ་གམ་པའི་སྟེང་དུ༔ པདྨ་དང་ཉི་མ་ཟླ་ཕྱེད་ཀྱི་གདན་ལ༔ བདག་ཡི་དམ་གྱི་ཐུགས་ཀ་ནས་ཡི་གེ་ཨཱཾཿདམར་པོ་འོད་འབར་བ་གཅིག་འཕྲོས་ཏེ་བབས་པ་ལས༔ རྒྱལ་བ་སྲས་དང་སྲུང་མར་བཅས་པ་ཐམས་ཅད་ལ་མཉེས་པའི་མཆོད་པ་ཕུལ༔ རྟེན་དང་བརྟེན་པའི་དཀྱིལ་འཁོར་ཐམས་ཅད་ཚུར་འདུས་ཨཱཾཿལ་ཐིམ༔ མར་འཕྲོས་སྐྱེ་འགྲོ་གཟུགས་ཡོད་དང་གཟུགས་མེད་ཐམས་ཅད་ཀྱི་མཐུ་སྟོབས་ནུས་པ་རྩལ་ཤུགས་དང་བཅས་པ་རྣམས་དང་༔ ཉི་ཟླ་ནོར་བུ་འབྱུང་བ་བཞིའི་བཅུད་དང་གཟི་བྱིན་ནུས་པ་ཐམས་ཅད་བསྡུས་ཏེ་ཨཱཾཿལ་ཐིམ༔ ཨཱཾཿཡོངས་སུ་གྱུར་པ་ལས༔ བརྡལ་ཁྱབ་སྟོང་ཉིད་ཀྱི་ངོ་བོ༔ ཀུན་སྣང་གསལ་ཁྱབ་ཀྱི་བདག་ཉིད༔ འདོད་པ་ཁམས་ཀྱི་བྱེད་པོ༔ སྲིད་དང་སྲིད་མིན་གྱི་བཀྱེ་བསྡུ་དབང་ཆེན་འདོད་པའི་རྒྱལ་པོ༔ ཁམས་གསུམ་དབང་དུ་སྡུད་པའི་མཚོན་བྱེད་སྐུ་མདོག་པདྨ་རཱ་ག་ལྟར་དམར་ཞིང་༔ སྲིད་གསུམ་དབྱིངས་སུ་གཞིག་ནུས་པའི་མཚོན་བྱེད་ནག་པོའི་མདངས་ཆགས་པ༔ འཁོར་འདས་དུ་མ་རོ་གཅིག་ཏུ་གཟིགས་པའི་མཚོན་བྱེད་སྤྱན་གཅིག་པུས་བར་སྣང་ཁམས་སུ་གཟིགས་པ༔ ཁྲོ་གཉེར་སྡུད་ཅིང་ཞལ་འཛུམ་ཞིང་བཞད་པ༔ སྙན་རྒྱན་ནོར་བུ་ཀེ་ཀེ་རུ་ལས་བྱས་པ༔ ནག་ལ་སྣུམ་པའི་དབུ་སྐྲ་རྟིང་རྩེར་སླེབས་པ༔ ཕྱག་གཡས་གྲི་གུག་འབར་བས་ཁམས་གསུམ་གྱི་བློ་ཡིད་ཐམས་ཅད་འགུག་ཅིང་༔ གཡོན་པས་དབང་གི་ཞགས་པ་དམར་པོས་སྣང་སྲིད་ཐམས་ཅད་བྲན་དུ་འཆིངས་ཤིང་སྡོམ་པ༔ ཞབས་གཉིས་འདོར་སྟབས་སུ་བཞེངས་ནས་གསང་བའི་རྡོ་རྗེ་བསྒྲེང་བ༔ གཅེར་བུ་ཡིད་བཞིན་གྱི་ནོར་བུ་དབང་གི་རྒྱལ་པོའི་དོ་ཤལ་བྱས་ཤིང་པདྨ་དམར་པོའི་ཐོད་གདེངས་དང་ཨུཏྤལ་དམར་པོའི་སེ་རལ་ཁར་ཐོགས་པ༔ འོད་ཕུང་དམར་པོ་བསྐལ་པའི་མེ་ལྟར་འབར་བའི་ཀློང་དུ་སྲིད་གསུམ་སྣང་བར་བྱེད་པ༔ གཡོན་དུ་ཨེ་ལས་སྐྱེས་པའི་ཡུམ་གནམ་སྨན་མ་སྐུ་མདོག་དམར་མོ་གཅེར་བུ་གོས་རྒྱན་མེད་པ༔ ཕྱག་གཡས་པས་ཁམས་གསུམ་འཁོར་ལོས་སྒྱུར་བ༔ གཡོན་པས་རོ་བརྒྱའི་དཔལ་གྱིས་བརྗིད་པའི་ཞལ་ཟས་ཡབ་ལ་སྟོབ་པའི་ཚུལ་གྱིས་བཏེགས་པ༔ ཞབས་གཉིས་ཡབ་ཀྱི་སྐེད་པར་འཁྲིལ་ལ་ཁད་པ༔ པདྨ་དམར་པོའི་ཕྲེང་བའི་དོ་ཤལ་དང་ཆུན་འཕྱངས་རབ་ཏུ་མཛེས་པ༔ མཐོང་བས་ཡིད་འཕྲོག་ཅིང་དྲན་པ་ཙམ་གྱིས་དགའ་བདེའི་ཉམས་བསྐྱེད་ནུས་པའི་བདག་ཉིད་ཅན་དུ་བསྐྱེད་དོ༔ ཤར་དུ་འབྱུང་བ་དཔྱིད་ཀྱི་རྒྱལ་མོ་སྐུ་མདོག་ཐལ་སྐྱ་གཡས་པས་རླུང་གི་བ་དན་དང་༔ གཡོན་པས་ལྕགས་ཀྱུ་འཛིན་པ༔ ལྷོ་རུ་འབྱུང་བ་དབྱར་གྱི་རྒྱལ་མོ་སྐུ་མདོག་ལྗང་མོ་གཡས་པས་ཁ་དོག་སྣ་ཚོགས་པའི་མེ་ཏོག་དང་༔ གཡོན་པས་ཉི་ཟེར་གྱི་ཞགས་པ་འཛིན་པ༔ ནུབ་ཏུ་སྲིད་པ་སྟོན་གྱི་རྒྱལ་མོ་སྐུ་མདོག་སེར་མོ་གཡས་འབྲས་ཀྱི་སྙེ་མ་དང་༔ གཡོན་ལྕགས་སྒྲོགས་བསྣམས་པ༔ བྱང་དུ་སྲིད་པ་དགུན་གྱི་རྒྱལ་མོ་སྐུ་མདོག་ཆར་སྤྲིན་ལྟ་བུ༔ ཕྱག་གཉིས་རྩྭ་ཕྱག་དང་དྲིལ་བུ་བསྣམས་པའོ༔ ཀུན་ཀྱང་དར་སྣ་ལྔ་དང་རིན་པོ་ཆེའི་རྒྱན་གྱིས་སྤྲས་པ་གཞོན་ནུ་བཅུ་དྲུག་ལོན་པའི་ལང་ཚོ་འཆང་ཞིང་མཚན་དཔེ་རྫོགས་ཤིང་མཛེས་སྡུག་ལྟ་བའི་ཆོག་མི་ཤེས་པར་བསྐྱེད་དོ༔ ཧཱུྃ༔ སྟེང་ཕྱོགས་ནམ་མཁའི་དབྱིངས་རུམ་ནས༔ བཻ་ཌཱུར་སྔོན་པོའི་གཞལ་ཡས་སུ༔ རིན་ཆེན་བཻ་ཌཱུར་ཁྲི་ཡི་ཁར༔ མ་ཧཱ་དཱེ་ཝ་ནམ་མཁའི་མདོག༔ ཕྱག་གཡས་འཁོར་ལོ་གཡོན་མེ་ལོང་༔ ཁམས་གསུམ་ལྷ་ལ་མངའ་དབང་བྱེད༔ ཤར་ཕྱོགས་དུང་གི་གཞལ་ཡས་ནས༔ རིན་ཆེན་དུང་གི་ཁྲི་སྟེང་དུ༔ མ་ཧཱ་དཱེ་ཝ་དཀར་གསལ་མཛེས༔ ཕྱག་ན་རྡོ་རྗེ་ལྕགས་ཀྱུ་བསྣམས༔ སྲིད་པ་ཤར་ཕྱོགས་མངའ་དབང་བྱེད༔ ལྷོ་ཕྱོགས་གསེར་གྱི་གཞལ་ཡས་དབུས༔ རིན་ཆེན་གསེར་གྱི་ཁྲི་སྟེང་དུ༔ མ་ཧཱ་དཱེ་ཝ་གསེར་གྱི་མདོག༔ ཕྱག་གཡས་ནོར་བུ་གཡོན་ཞགས་པ༔ སྲིད་པ་ལྷོ་ཕྱོགས་མངའ་དབང་བྱེད༔ ནུབ་ཕྱོགས་རཱ་གའི་གཞལ་ཡས་དབུས༔ པདྨ་རཱ་གའི་ཁྲི་སྟེང་དུ༔ མ་ཧཱ་དཱེ་ཝ་དམར་གསལ་མཛེས༔ ཕྱག་གཡས་པདྨ་དམར་པོ་དང་༔ གཡོན་པས་ནོར་བུ་དབང་རྒྱལ་བསྣམས༔ སྲིད་པ་ནུབ་ཕྱོགས་མངའ་དབང་བྱེད༔ བྱང་དུ་གཡུ་ཡི་ཁང་བཟང་དབུས༔ ཨིནྡྲ་ནཱི་ལའི་ཁྲི་སྟེང་དུ༔ མ་ཧཱ་དཱེ་ཝ་ལྗང་གསལ་མཛེས༔ གཡས་ན་སྣ་ཚོགས་རྡོ་རྗེ་དང་༔ གཡོན་པས་ཡིད་བཞིན་ནོར་བུ་ནི༔ ཕ་རོལ་དཔུང་འཇོམས་ལྗང་སྔོན་བསྣམས༔ བྱང་ཕྱོགས་སྲིད་པར་མངའ་དབང་བསྒྱུར༔ ཀུན་ཀྱང་བག་དྲོ་ལྷུན་ཆགས་པ༔ ཞི་མ་ཁྲོ་འཛུམ་འོད་ཕུང་འབར༔ རང་རང་རིགས་ཀྱི་ཡུམ་རྣམས་ནི༔ ཁ་དོག་ཡབ་དང་མཚུངས་པ་ལ༔ འགུགས་འཆིངས་རྨོངས་མྱོས་ཕྱག་རྒྱ་དང་༔ གཡོན་རྣམས་རོ་བརྒྱའི་ཞལ་ཟས་ཐོགས༔ མཚམས་བཞིར་སྤྲུལ་པའི་དབང་ཕྱུག་ནི༔ སྨུག་འཛིན་དཀར་པོ་འབྲུག་ལ་ཞོན༔ ཕྱག་གཡས་བེ་ཅོན་གཡོན་ནེའུ་ལེ༔ ཛམ་ལྷ་སེར་པོ་ནོར་བུ་ཐོགས༔ གཡོན་པས་ནོར་སྐྱུག་ནེའུ་ལེ་འཛིན༔ ཛམ་དམར་ཞལ་གསུམ་ཕྱག་དྲུག་པ༔ གཡས་ཞལ་དཀར་ལ་གཡོན་ཞལ་སྔོ༔ གཡས་གཉིས་ལྕགས་ཀྱུ་གྲི་གུག་དང་༔ གཡོན་གཉིས་ཞགས་པ་ལྕགས་སྒྲོག་འཛིན༔ མཐའ་གཉིས་ནོར་གཞོང་ནེའུ་ལེ་བསྣམས༔ ཛམ་ནག་ཞལ་གཅིག་ཕྱག་གཉིས་པ༔ ཕྱག་གཡས་ཐོད་ཁྲག་གཡོན་ནེའུ་ལེ༔ ཀུན་ཀྱང་རིན་ཆེན་རྒྱན་གྱིས་སྤྲས༔ ཞབས་གཉིས་གྱད་ཀྱི་འདོར་སྟབས་བསྒྲད༔ གཟུགས་ཐུང་གཟི་བརྗིད་རབ་ཏུ་འབར༔ ཞི་མ་ཁྲོ་འཛུམ་སྤྱན་གསུམ་པ༔ སྒོ་བཞིར་ཆོས་སྐྱོང་རྒྱལ་ཆེན་བཞི༔ གོ་ཁྲབ་རྨོག་གསོལ་བསེ་ཕུབ་འཆང་༔ དཀར་སྔོ་དམར་དང་སེར་བའི་མདོག༔ རང་རྟགས་ཕྱག་མཚན་སྣ་ཚོགས་བསྣམས༔ སྣང་སྲིད་ཟིལ་གྱིས་གནོན་པར་བསྐྱེད༔ དེ་ལྟར་གསལ་བའི་ལྷ་རྣམས་ཀྱི༔ སྤྱི་བོར་ཨོཾ་ང་མགྲིན་པར་ཨཱཿཐུགས་སྲོག་ཧཱུྃ་གི་ཁོང་གསེང་དུ༔ རང་རང་རིགས་ཀྱི་སྲོག་ཡིག་ལས༔ འོད་ཟེར་དཀར་དམར་མཐིང་གསུམ་འཕྲོས༔ གར་བཞུགས་དག་པའི་ཕོ་བྲང་ནས༔ ལྷ་དབང་འདོད་རྒྱལ་གཙོ་འཁོར་བཅས༔ ཁ་བ་བུ་ཡུག་འཚུབས་པ་བཞིན༔ སྤྱན་དྲངས་གཉིས་སུ་མེད་པར་གྱུར༔ དེ་ནས་སྤྱན་འདྲེན་བྱ་བ་ནི༔ ཧཱུྃ་ཧྲཱིཿཀུན་ཁྱབ་བརྡལ་བ་དག་པའི་ཞིང་༔ ལྷུན་གྲུབ་རང་གསལ་ཕོ་བྲང་དབུས༔ པདྨ་རཱ་གའི་ཁྲི་སྟེང་ནས༔ ལྷ་དབང་འདོད་པའི་རྒྱལ་པོ་དང་༔ དགྱེས་བསྐྱེད་ཨུ་མ་གནམ་སྨན་ཡུམ༔ སྒྲུབ་པ་པོ་ཡིས་འབོད་ལགས་ཀྱི༔ མ་ཐོགས་གནས་འདིར་གཤེགས་སུ་གསོལ༔ བླ་རྡོ་དག་ལ་བརྟེན་བཅས་ནས༔ ཕྲིན་ལས་ལྷུན་གྱིས་གྲུབ་པར་མཛོད༔ ཧཱུྃ་ཧྲཱིཿལྷུན་གྲུབ་འགྱུར་བ་མེད་པའི་གནས༔ རང་བྱུང་རཏྣའི་གཞལ་ཡས་ཁང་༔ མཛེས་པ་ལྷ་ཡི་ད་ལ་ནས༔ སྲིད་པ་དུས་བཞིའི་རྒྱལ་མོ་བཞི༔ རང་རང་རིགས་ཀྱི་འཁོར་དང་བཅས༔ སྒྲུབ་པའི་གནས་འདིར་གཤེགས་སུ་གསོལ༔ དམ་ཚིག་རྟེན་ལ་བརྟེན་བཅས་ནས༔ དངོས་གྲུབ་བསྒྲུབ་པའི་ཕོ་ཉ་མཛོད༔ ཧཱུྃ་ཧྲཱིཿའདོད་ཁམས་གཟུགས་ཁམས་གཟུགས་མེད་ཁམས༔ འདུད་ཅིང་དབང་བསྒྱུར་ཕོ་བྲང་ནས༔ མ་ཧཱ་དཱེ་ཝ་མཆེད་ལྔ་དང་༔ འདོད་འབྱུང་གཏེར་གྱི་གཞལ་ཡས་ནས༔ ནོར་གཏེར་ཛམ་ལྷ་རིགས་བཞི་དང་༔ རང་རང་རིགས་ཀྱི་གཡོག་འཁོར་བཅས༔ སྒྲུབ་པ་པོ་ཡིས་འབོད་ལགས་ན༔ མ་ཐོགས་མྱུར་དུ་གཤེགས་སུ་གསོལ༔ སྒྲུབ་རྫས་རྟེན་ལ་བརྟེན་བཅས་ཏེ༔ འདོད་རྒུའི་ཆར་ཆེན་དབབ་ཏུ་གསོལ༔ ཧཱུྃ་ཧྲཱིཿསུམ་ཅུ་རྩ་གསུམ་ལྷ་ཡུལ་ན༔ སྨོན་ལམ་སྟོབས་ཀྱིས་བསྟན་སྲུང་བ༔ རྒྱལ་ཆེན་སྡེ་བཞི་གཡོག་འཁོར་བཅས༔ སྒྲུབ་པ་པོ་ཡིས་འབོད་ལགས་ན༔ མ་ཐོགས་མྱུར་དུ་གཤེགས་སུ་གསོལ༔ དམ་ཚིག་རྟེན་ལ་བརྟན་བཞུགས་ནས༔ མཐའ་དམག་དུས་འཁྲུག་བཟློག་པ་དང་༔ ཕྲིན་ལས་བསྒྲུབ་པའི་ཕོ་ཉ་མཛོད༔ ཨོཾ་མ་ཧཱ་དཱེ་ཝ་ལོ་ཀི་ཤྭ་ར་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛཿཛཿཧཱུྃ་བཾ་ཧོཿ དེ་ནས་བཞུགས་སུ་གསོལ་བ་ནི༔ ཧཱུྃ་ཧྲཱིཿདགོས་འདོད་ཀུན་འབྱུང་རཏྣའི་གཏེར༔ བླ་རྡོ་སྲོག་འཁོར་བརྟེན་རྫས་ལ༔ ལྷ་དབང་འདོད་པའི་རྒྱལ་པོ་ནི༔ འཁོར་དང་བཅས་པ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧཱུྃ་ཧྲཱིཿའཇིག་རྟེན་ཁམས་ལ་དབང་བསྒྱུར་བའི༔ ལྷ་དབང་འདོད་རྒྱལ་གཙོ་འཁོར་བཅས༔ བསྟན་པ་བསྲུང་བའི་ཕོ་ཉ་ལ༔ ལྷ་ཕྱག་འཚལ་ལོ་བརྩེ་བས་སྐྱོངས༔ ན་མོ་ན་མ་ཧོཿ དེ་ནས་མཆོད་པ་འབུལ་བ་ནི༔ ཧཱུྃ་ཧྲཱིཿལྷ་ཡི་དབང་ཕྱུག་ལྷའི་བླ་མ༔ དྲང་སྲོང་འདོད་པའི་རྒྱལ་པོ་དང་༔ དགྱེས་བསྐྱེད་ཨུ་མ་ཡུམ་འཁོར་བཅས༔ ཐུགས་དམ་བསྐང་ཕྱིར་མཆོད་སྤྲིན་ནི༔ ལྷ་རྫས་ཀུན་ཚང་ཨརྒྷཾ་དང་༔ མཛེས་པའི་ཀུ་མུད་འདབ་འབྲས་ལྡན༔ དྲི་ཞིམ་ངད་ལྡན་བདུག་པ་སྤོས༔ གསལ་བྱེད་དབང་གི་སྒྲོན་མེ་དང་༔ བདེ་བའི་དྲི་ཆབ་ཟིལ་མངར་ལྡན༔ རོ་ལྡན་ཞལ་ཟས་རི་ལྟར་སྤུངས༔ རྐང་གླིང་ཐོད་རྔ་སྙན་པའི་སྒྲས༔ གསོལ་ལོ་མཆོད་དོ་ཐུགས་དམ་བསྐང་༔ མཛེས་པའི་གཟུགས་འཛིན་ཨ་དཪྴ༔ སྙན་པའི་གྲགས་སྟོང་ཏམྦུ་ར༔ ཞིམ་མངར་དྲི་ཆབ་གནྡྷེ་གན༔ རོ་ལྡན་དགྱེས་བསྐང་ར་ས་ཡན༔ ལྷ་རྫས་རེག་བྱ་པཉྩ་ལི༔ མཁའ་དབྱིངས་རྣམ་པར་དག་པ་ཡིས༔ གསོལ་ལོ་མཆོད་དོ་ཐུགས་དམ་བསྐང་༔ རྩ་བརྒྱད་སྟོང་ལ་སྦྱར་བའི་སྨན༔ ཆགས་པ་བསྒྲལ་བའི་རཀྟ་དང་༔ འདོད་འབྱུང་དཔལ་གྱི་གཏོར་ཆེན་པོ༔ དཔའ་བོ་ཡབ་ཡུམ་སྦྱོར་བའི་སྐྱེམས༔ དུག་ལྔ་དུག་གསུམ་རཱུ་ཏྲ་ཀུན༔ བསྒྲལ་བའི་ཤ་ཁྲག་སྐྱེམས་ཕུད་ཀྱིས༔ གསོལ་ལོ་མཆོད་དོ་ཐུགས་དམ་བསྐང་༔ ཛ་གད་ཇ་ཆང་སྐྱེམས་ཕུད་དང་༔ རིན་ཆེན་སྣ་ལྔའི་ཕྱེ་མར་དང་༔ དར་ཟབ་གོས་ཀྱི་རིགས་བྱེད་དང་༔ འབྲུ་སྨན་རྣམ་པ་སྣ་ཚོགས་སོགས༔ མཆོད་པའི་ཡོ་བྱད་བསམ་ཡས་པས༔ གསོལ་ལོ་མཆོད་དོ་ཐུགས་དམ་བསྐང་༔ ཤ་རྐྱང་མ་ཧེ་འདོད་འཇོའི་བ༔ སྟག་སེང་དོམ་དྲེད་གཟིག་སྤྱང་འཕར༔ བསེ་རུ་རྣ་རྒོ་རུ་རུ་ཎ༔ ཁྱུང་ཆེན་རྨ་བྱ་དེ་ཕོ་དང་༔ འབྲུག་སྦྲུལ་ཆུ་གནས་རིགས་བྱེད་ཀྱིས༔ གསོལ་ལོ་མཆོད་དོ་ཐུགས་དམ་བསྐང་༔ བཙན་པའི་གོ་དང་སྲ་བའི་གོས༔ རྣོ་ངར་མཚོན་ཆ་སྣ་ཚོགས་དང་༔ གསེར་དངུལ་རིན་པོ་ཆེ་ཡི་རིགས༔ འདོད་ཡོན་ནམ་མཁའི་མཛོད་ཆེན་པོས༔ གསོལ་ལོ་མཆོད་དོ་ཐུགས་དམ་བསྐང་༔ དགྱེས་པར་བསྐང་བའི་བྱིན་རླབས་ཀྱིས༔ འདོད་རྒུའི་ཆར་ཆེན་དབབ་ཏུ་གསོལ༔ ཨོཾ་མ་ཧཱ་དཱེ་ཝ་ཨུ་མ་དཱེ་ཝི་སརྦ་ས་པ་རི་ཝཱ་ར་མ་ཧཱ་ཨརྒྷཾ་པཱདྱཾ་སོགས་ཤཔྟ་རཱུ་པ་སོགས་སྤཪྴེ་དྷརྨ་པཉྩ་རཀྟ་བ་ལིཾ་ཏ་ཏ་ན་ག་ཎ་མ་ཧཱ་པཉྩ་པཱུ་ཛ་ཨེ་དཾ་རཏྣ་ཁ་ཁ་ཁཱ་ཧི་ཁཱ་ཧི༔ དེ་ནས་བསྟོད་པ་བྱ་བ་ནི༔ ཧཱུྃ་ཧྲཱིཿཁམས་གསུམ་ཀུན་ལ་དབང་བསྒྱུར་ཞིང་༔ ལྷ་དབང་དྲང་སྲོང་ལྷའི་བླ་མ༔ འདོད་པའི་རྒྱལ་པོ་ཡེ་ཤེས་སྐུའི༔ ཡོན་ཏན་རྨད་བྱུང་དྲན་པས་བསྟོད༔ དགྱེས་བསྐྱེད་ནམ་མཁའ་དབང་ཕྱུག་མ༔ ལྷ་ཀླུ་དྲང་སྲོང་འཁོར་གྱིས་འདུད༔ དགྱེས་ཆགས་དགའ་བདེའི་ཉམས་འགྱུར་ཅན༔ ཨུ་མ་ཡུམ་ལ་ཕྱག་འཚལ་བསྟོད༔ འབྱུང་བ་བཞི་ལ་དབང་བསྒྱུར་ཞིང་༔ ཕན་དང་བདེ་བའི་དཔལ་སྤེལ་མ༔ སྲིད་པ་དུས་བཞིའི་དབང་མོ་ཆེ༔ འགུགས་འཆིང་སྡོམ་མྱོས་མ་བཞིར་བསྟོད༔ ཁམས་གསུམ་སྲིད་པའི་སྲོག་བདག་པོ༔ མ་ཧཱ་དཱེ་ཝ་མཆེད་ལྔ་དང་༔ དགྱེས་བསྐྱེད་ཨུ་མ་ཡུམ་བཅས་ལ༔ གུས་པས་བཏུད་དེ་ཕྱག་འཚལ་བསྟོད༔ ཟས་ནོར་ལོངས་སྤྱོད་ནོར་གྱི་བདག༔ སྒྲུབ་པ་པོ་ཡི་བསམ་པའི་དོན༔ གེགས་མེད་སྩོལ་མཛད་དམ་ཚིག་ཅན༔ ཛམ་ལྷ་རིགས་བཞིར་ཕྱག་འཚལ་བསྟོད༔ དགའ་ན་གདོད་མའི་ས་ལ་སྦྱོར༔ ཁྲོས་ཚེ་སྲིད་གསུམ་རྨང་ནས་བཤིག༔ འཁོར་འདས་ཡོངས་ཀྱི་བྱེད་པ་པོ༔ མ་ཧཱ་དཱེ་ཝ་ཁྱོད་ལ་བསྟོད༔ སྒྲུབ་པའི་ཉམས་རྟོགས་ཡོན་ཏན་བསྐྱེད༔ སྨོན་པའི་རེ་འབྲས་གེགས་མེད་སྩོལ༔ ཡིད་བཞིན་ནོར་བུ་ལྷ་ཆེན་པོ༔ འཁོར་དང་བཅས་ལ་ཕྱག་འཚལ་བསྟོད༔ བདག་རྨོངས་འཁྲུལ་པའི་དབང་གྱུར་ཏེ༔ ལྷ་ཁྱོད་ཐུགས་དང་འགལ་བའི་ལས༔ ཅི་བགྱིས་འགྱོད་སེམས་དྲག་པོས་བཤགས༔ དག་ཅིང་སོར་ཆུད་དངོས་གྲུབ་སྩོལ༔ དེ་ནས་འཛབ་ཀྱི་འཁྲུལ་འཁོར་ནི༔ དབང་ཕྱུག་མ་ཧཱ་དཱེ་ཝའི་ཐུགས་ཀར་ཡིད་བཞིན་གྱི་ནོར་བུ་འོད་འབར་བའི་ཁོང་གསེང་དུ་ཟླ་བའི་དལ་སྟེང་དུ་ཧྲཱིཿཡིག་དམར་པོ་འོད་འབར་བ་ལ་རྩ་བའི་སྔགས་ཀྱིས་བསྐོར་བར་བསྒོམ༔ ཡུམ་གྱི་ཐུགས་ཀར་པདྨའི་དལ་སྟེང་དུ་སྲོག་ཡིག་ཧྲཱིཿབཾཿལ་སྔགས་ཀྱིས་གཡོན་དུ་འཁོར་བར་བསྒོམ༔ འཁོར་རྣམས་ཀྱི་ཐུགས་ཀར་རང་རང་རིགས་ཀྱི་སྲོག་ཡིག་གི་མཐར་རྩ་བའི་སྔགས་ཀྱིས་བསྐོར་བར་བསྒོམ༔ བཟླས་པ་ཙམ་གྱིས་ཁོང་རྣམས་ལ་དམ་ཚིག་གཉན་པོའི་སྲོག་ཐོབ་ནས་བདག་སྒྲུབ་པ་པོའི་ཕྲིན་ལས་རབ་འབྱམས་ཐམས་ཅད་ཐོགས་མེད་དུ་བསྒྲུབ་པར་བསམ༔ ཁྱད་པར་དུ་འཁོར་འདས་བརྟན་གཡོའི་ཁམས་ཀྱི་ཟས་ནོར་ལོངས་སྤྱོད་འདོད་རྒུའི་ཆར་ཆེན་པོ་བབ་ནས་སྒྲུབ་པ་པོའི་གནས་ཁང་བང་མཛོད་ཐམས་ཅད་མེར་མེར་ཏིང་ཏིང་གང་བར་བསམ་ལ༔ ཨོཾ་མ་ཧཱ་དཱེ་ཝ་ཨ་པ་ར་ཙིཏྟ་ཨ་ནྲྀ་ཏྲི་ཨ་ཀཪྵ་ཡ་བསྡུས་བསྡུས་སིདྡྷི་ཕ་ལ་ཧཱུྃ༔ ཡབ་སྔགས་འབུམ་ཐེར་གཅིག་ཏུ་བཟླ༔ ཨོཾ་ཛྙཱ་ན་ཨུ་མ་དཱེ་ཝི་སརྦ་རཏྣ་བ་སུ་ཁ་དྷེ་སིདྡྷི་ཕ་ལ་བྷྲཱུྃ༔ ཡུམ་སྔགས་ཁྲི་ཕྲག་ལྔ་རུ་བཟླ༔ ཨོཾ་ཛྙཱ་ན་དཱེ་ཝི་ཧ་རི་ནི་ས་སརྦ་སིདྡྷི་བསྡུས་བསྡུས་པཱ་ཤཾ་ཀུ་རུ་སྟྭཾ༔ སྔགས་ཀྱི་གྲངས་ཚད་ཁྲི་ཕྲག་གསུམ༔ ཨོཾ་བུདྡྷ་བཛྲ་རཏྣ་པདྨ་ཀརྨ་མ་ཧཱ་དཱེ་ཝ་སརྦ་སིདྡྷི་བསྡུས་བསྡུས་པཱ་ཤཾ་ཀུ་རུ་སྟྭཾ༔ འཁོར་སྔགས་ཁྲི་ཕྲག་གསུམ་གྱིས་བསྒྲུབ༔ ཨོཾ་ཨཱཪྻ་ཛམ་བྷ་ལ་ཧ་རི་ནི་ས་རཏྣ་སིདྡྷི་བསྡུས་བསྡུས་པཱ་ཤཾ་ཀུ་རུ་བྷྲཱུྃ༔ སྔགས་ཀྱི་གྲངས་ཚད་གོང་ལྟར་རོ༔ སྐབས་སུ་གསོལ་མཆོད་ཅི་འགྲུབ་གཏོང་༔ དེ་ནས་གཡང་འགུགས་ཕྲིན་བཅོལ་ནི༔ ཧཱུྃ་ཧྲཱིཿཆོས་དབྱིངས་མི་འགྱུར་ནམ་མཁའི་ཀློང་༔ ཀུན་ཁྱབ་བདེ་བའི་ད་ལ་ནས༔ ཁམས་གསུམ་དབང་སྡུད་ལྷ་ཆེན་པོ༔ འདོད་པའི་རྒྱལ་པོ་གཏེར་གྱི་བདག༔ དགྱེས་བསྐྱེད་གནམ་སྨན་ཨུ་མ་ཡུམ༔ འབྱུང་བ་དུས་བཞིའི་དབང་མོ་ཆེ༔ རིགས་ལྔའི་མ་ཧཱ་དཱེ་ཝ་དང་༔ དགའ་བཞིའི་འབྱུང་གནས་ཡུམ་མཆོག་ལྔ༔ ཛམ་ལྷ་རིགས་བཞི་ནོར་གྱི་བདག༔ འཁོར་དང་བཅས་པ་མ་ལུས་པ༔ གནས་འདིར་སྤྱན་འདྲེན་གཤེགས་སུ་གསོལ༔ དཀར་གསུམ་འོ་མའི་རྒྱ་མཚོ་དང་༔ གཡང་བཤོས་ནོར་བུའི་མཆོད་པ་འབུལ༔ བཀྲ་ཤིས་རྫས་རྟགས་རྒྱལ་སྲིད་བདུན༔ ངོ་མཚར་ཡིད་འོང་བཀོད་པ་ནི༔ དཔག་ཡས་ནམ་མཁའི་ཁྱོན་བཀང་སྟེ༔ དབང་ཕྱུག་འཁོར་དང་བཅས་ལ་འབུལ༔ སྐུ་གསུང་ཐུགས་ཡོན་ཕྲིན་ལས་བསྐང་༔ རྣལ་འབྱོར་སྒྲུབ་མཆོག་བདག་ཅག་ལ༔ ལྷ་ཀླུ་མི་ཡི་ཕྱྭ་གཡང་སྩོལ༔ ཆེ་གྲགས་སྟོབས་ཀྱི་ཕྱྭ་གཡང་སྩོལ༔ བཙན་ཕྱུག་འཕན་དར་ཕྱྭ་གཡང་སྩོལ༔ ཟས་ནོར་ལོངས་སྤྱོད་ཕྱྭ་གཡང་སྩོལ༔ དར་ཟབ་འབྲུ་སྨན་ཕྱྭ་གཡང་སྩོལ༔ ནུབ་མེད་ཚེ་ཆོས་ཕྱྭ་གཡང་སྩོལ༔ བཀྲ་ཤིས་རིགས་རྒྱུད་ཕྱྭ་གཡང་སྩོལ༔ འདུ་བ་གསུམ་གྱི་ཕྱྭ་གཡང་སྩོལ༔ འབར་བ་གསུམ་གྱི་ཕྱྭ་གཡང་སྩོལ༔ འབྱོར་དྲུག་རྒྱས་པའི་ཕྱྭ་གཡང་སྩོལ༔ མོས་བཞི་དབང་སྡུད་ཕྱྭ་གཡང་སྩོལ༔ ནད་མུག་མཚོན་འཁྲུག་ཞི་བ་དང་༔ དགྲ་བགེགས་རྡུལ་བརླག་ཕྱྭ་གཡང་སྩོལ༔ འབྱུང་ལྔའི་དྭངས་བཅུད་སིབ་སིབ་བསྡུས༔ སྒྲུབ་པ་པོ་ཡི་དཔལ་དུ་སྩོལ༔ ཟབ་གསང་བསྟན་པ་དར་ཞིང་རྒྱས༔ སྐྱེ་རྒུས་དམ་པ་ཆོས་བཞིན་སྤྱོད༔ ནད་མུག་མཚོན་གྱི་བསྐལ་པ་ཞི༔ རྫོགས་ལྡན་གསར་པའི་ལང་ཚོ་ཡིས༔ འཛམ་གླིང་ཀུན་ཁྱབ་དངོས་གྲུབ་སྩོལ༔ དེ་ནས་དབང་སྡུད་བཟླས་སྔགས་ནི༔ ཨོཾ་མ་ཧཱ་དཱེ་ཝ་ཨ་པ་ར་ཙིཏྟ་ས་མ་ཡ་ཛ་ཛཿཨུ་མ་དཱེ་ཝི་ག་ག་ཧྲཱིང་༔ ཧ་རི་ནི་ས་པཱ་ཤཾ་སྟྭཾ༔ བུདྡྷ་བཛྲ་རཏྣ་པདྨ་ཀརྨ་མ་ཧཱ་དཱེ་ཝ་ཨུ་མ་དཱེ་ཝི་བྷྲཱུྃ༔ ཨཱཪྻ་ཛམ་བྷ་ལ་ཧ་རི་ནི་ས་སརྦ་སིདྡྷི་ཧཱུྃ༔ སརྦ་རཏྣ་བ་སུ་ཁ་དྷེ་ན་ན་ཨ་ནྲྀ་ཏྲི་ཨ་ཀཪྴ་ཡ་བསྡུས་བསྡུས་སིདྡྷི་ཕ་ལ་ཁུག་སྐྱོལ༔ ཅི་འགྲུབ་བརྗོད་ལ་བཀྲ་ཤིས་མེ་ཏོག་འཐོར༔ བརྟེན་བཞུགས་བྱ་ཞིང་འདོད་དོན་གསོལ་བ་གདབ༔ གནད་དེས་སྒྲུབ་པའི་མཐུན་རྐྱེན་ཕུན་སུམ་ཚོགས༔ ཐེ་ཚོམ་མེད་དོ་རྡོ་རྗེ་རྒྱལ་པོའི་བཀའ༔ ས་མ་ཡ༔ གུ་ཧྱ་རྒྱ༔ བརྡ་ཡིག་༠༠༠༠༠༠༣༤༤༔ ཤིན་ཏུ་ཟབ་པ་ཡང་སྙིང་འདུས་པའི་སྐོར༔ སྒྲུབ་པའི་མཐུན་རྐྱེན་སྤེལ་བའི་ཡིད་བཞིན་ནོར༔ བསམ་འཕེལ་འདོད་པའི་རྒྱལ་པོའི་སྒྲུབ་ཐབས་ཉིད༔ གྲུབ་ཆེན་འབྲོག་མི་ལོ་ཙཱ་ཁྱོད་ལ་སྦྱིན༔ ད་དུང་མ་སྤེལ་རིན་ཆེན་བརྡ་ལ་ཐོབ༔ མ་འོངས་སྙིགས་མ་ལྔ་ཡི་དུས་སྐབས་སུ༔ ང་སྤྲུལ་བདུད་འཇོམས་རྡོ་རྗེ་དང་འཕྲད་ནས༔ བསྟན་པའི་འགྲོ་དོན་བསམ་མི་ཁྱབ་པ་འབྱུང་༔ ལས་ཅན་དབེན་ཁྲོད་འཛིན་པ་ཐམས་ཅད་ལ༔ འདི་ཉིད་སྦྱིན་པས་མཐུན་རྐྱེན་ཕུན་སུམ་ཚོགས༔ བཀའ་གསང་ཐུབ་པར་སྲུངས་ཤིག་དམའ་རུ་རྩེ༔ བཀའ་ལོག་ལག་ཏུ་མ་ཤོར་དམ་ཚིག་ཅན༔ ས་མ་ཡ༔ རྒྱ་རྒྱ་རྒྱ༔ ཞིང་པདྨ་འོད་དུ་ཨ་ཐམ་རྒྱ༔ གུ་ཧྱ༔ ཨྠིྀ༔ ཞེས་པ་འདི་ཡང་སྨོན་ལམ་ལས་འཕྲོ་འཛོམས་པའི་སྐྱེས་མཆོག་མཁྱེན་རབ་རྒྱ་མཚོ་དང་རིགས་སྲས་རིག་འཛིན་ནོར་བུས་ཡང་ཡང་བསྐུལ་ངོར་བདག་འདྲ་དཔའ་བོ་བདུད་འཇོམས་རྡོ་རྗེས་མ་རྒྱུད་མཁའ་འགྲོའི་བརྡ་རང་གྲོལ་དུ་བྱུང་སྟེ་དག་པར་ཕབ་པའི་ཡི་གེ་པ་ནི་ལུང་ཟིན་ཕུན་ཚོགས་བཀྲ་ཤིས་སོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།