TTDL-ZABTER-13-PA-095

Previous Text Back to Volume PageNext Text

Wylie title	chos nyid nam mkha'i klong mdzod las: dpal ldan sngags kyi srung ma las myur 'grub sla drag shul stobs dang ldan pa'i ma chen sha za hor mo'i bskul ba gnam lcags thog mda':
Location	bdud 'joms gling pa zab gter Volume 13, Text 95, Pages 349-351 (Folios 1a1 to 2a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las dpal ldan sngags kyi srung ma las myur 'grub sla drag shul stobs dang ldan pa'i ma chen sha za hor mo'i bskul ba gnam lcags thog mda'. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 349-351. Thimphu, Bhutan: Lama Kuenzang Wangdue, 2004.
Side notes	Recto: drag bskul   Verso: bdud 'joms srung ma sha za hor mo
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Invocations - bskul ba
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Sha za hor mo
Colophon	ཞེས་པ་འདི་སློབ་བུ་དམ་པ་མཁྱེན་རབ་རྒྱ་མཚོ་ལ་སོགས་པའི་སློབ་བུ་འགས་ནན་དུ་བསྐུལ་ངོར་བདུད་འཇོམས་པས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di slob bu dam pa mkhyen rab rgya mtsho la sogs pa'i slob bu 'gas nan du bskul ngor bdud 'joms pas chos nyid nam mkha'i mdzod las bsgyur ba'o/_/dge'o/_/dge'o/_/dge'o/_/sarba mang+ga laM//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ དཔལ་ལྡན་སྔགས་ཀྱི་སྲུང་མ་ལས་མྱུར་འགྲུབ་སླ་དྲག་ཤུལ་སྟོབས་དང་ལྡན་པའི་མ་ཆེན་ཤ་ཟ་ཧོར་མོའི་བསྐུལ་བ་གནམ་ལྕགས་ཐོག་མདའ་བཞུགས༔ ན་མོ་གུ་རུ་པདྨ་ཀ་ར་ཤྲཱི་ཧེ་རུ་ཀ་ན་མ་ཧོཿ བ་ལིང་ཤ་དང་ཁྲག་སྐྱེམས་བཤམས༔ གདོང་ལ་ཁྲག་བྱུགས་སྐྲ་བསིགས་ཏེ༔ འཇིགས་པའི་ང་རོས་སྡང་སེམས་བསྐྱེད༔ དེ་ནས་དྲག་ཏུ་བསྐུལ་བ་ལ༔ ཀྱཻ༔ ཕྱོགས་ཕྱོགས་དག་ཀྱང་ཕ་ཀི་ན༔ ཉི་མ་ནུབ་ཕྱོགས་ཕ་ཀི་ན༔ བོད་ཀྱི་ཡུལ་གྱི་ཕ་མཐའ་དང་༔ བལ་པོའི་ཡུལ་གྱི་ཚུར་མཐའ་རུ༔ ཁྲག་མཚོ་རྦ་རླབས་གནམ་དུ་འཕྱོ༔ དུག་དང་མུན་པའི་ན་བུན་འཐུལ༔ ཆོ་སྒྲ་སོད་རྒྱོབ་འབྲུག་སྟོང་ལྟར༔ དྲག་ཅིང་ལྡིར་བའི་རང་སྒྲ་ཡིས༔ ཤིན་ཏུ་འཇིགས་ཤིང་ཡ་ངའི་གནས༔ གནས་དེར་སུ་བཞུགས་སུ་མ་བཞུགས༔ མི་སྲུན་ཤ་ཟ་ཧོར་མོ་དང་༔ འཁོར་དུ་སྤྲུལ་པ་ཤ་ཟ་མོ༔ རང་འདྲ་བརྒྱད་ཀྱིས་བསྐོར་ཞིང་འདུད༔ བཞེངས་ཤིག་བཞེངས་ཤིག་ད་བཞེངས་ཤིག༔ ཁྲག་མཚོ་ཁོལ་མའི་ཀློང་ནས་བཞེངས༔ དུག་རླངས་འཕྱོ་བའི་ཀློང་ནས་བཞེངས༔ མཁའ་ལ་འཇའ་ཚོན་ཤར་བ་བཞིན༔ ནམ་མཁའ་སྟོང་པའི་དབྱིངས་ནས་བཞེངས༔ བཞེགས་ཤིག་བཞེངས་ཤིག་ད་བཞེངས་ཤིག༔ ཤ་ཟ་ཆེན་མོ་ད་བཞེངས་ཤིག༔ ཁྲག་འཐུང་ཆེན་མོ་ད་བཞེངས་ཤིག༔ མ་བདུད་རྒྱལ་མོ་ད་བཞེངས་ཤིག༔ སྲོག་གཅོད་མ་མོ་ད་བཞེངས་ཤིག༔ དབུགས་ལེན་མ་མོ་ད་བཞེངས་ཤིག༔ ཐན་བདག་མ་མོ་ད་བཞེངས་ཤིག༔ ལྟས་ངན་འཕྲུལ་གྱི་བདག་མོ་ཁྱོད༔ སྐད་ཅིག་ཉིད་ལ་གཤེགས་སུ་གསོལ༔ མྱུར་བ་ཉིད་དུ་གཤེགས་སུ་གསོལ༔ ཤ་ཁྲག་དམར་གྱི་གཏོར་མ་དང་༔ གསེར་སྐྱེམས་རྒྱུག་ཆང་འདི་བཞེས་ལ༔ དགྲ་བོའི་ཡུལ་དུ་ད་རྒྱུག་ཅིག༔ དམ་ཉམས་དགྲ་བོ་ཆེ་གེ་མོའི༔ མིག་སོགས་དབང་པོའི་སྒོ་འཕྲུལ་ཅིག༔ ལྟས་ངན་ཐན་གྱི་ཡོ་ལངས་ཐོངས༔ མིང་ནས་བོས་ལ་སྐྲ་ནས་འཐེན༔ བུད་མེད་ཚོགས་ཀྱི་ངུ་འབོད་གྱིས༔ འུག་པ་ཧ་ཧ་རྒོད་དུ་ཆུག༔ ནམ་མཁའི་བྱ་ཡི་ཐན་སྣ་ཐོངས༔ ས་གཞི་སྲོག་ཆགས་སྣ་ཚོགས་ཀྱི༔ ཐན་དང་ལྟས་ངན་སྣ་ཚོགས་སྟོན༔ གཟུགས་དང་སྒྲ་སོགས་མི་རུང་བའི༔ ཐན་ལྟས་སྣ་ཚོགས་སྣང་བར་གྱིས༔ རྣམ་རྟོག་བཙན་ཐབས་ཉིད་དུ་སློང་༔ མངོན་སུམ་ཁྱོད་ཀྱི་གཟུགས་སྟོན་ལ༔ དཀོར་ཆ་ཟས་ནོར་གང་ཡང་རུང་༔ ཁྱོད་ཀྱི་ཤེས་བཞིན་ཁྱེར་ཤོག་གྱིས༔ འོ་དོད་ལྷང་ལྷང་འབོད་པར་གྱིས༔ ང་ཡིས་བརྗོད་པའི་ཚིག་དེ་དག༔ རྡོ་རྗེ་འཆང་དང་པདྨ་འབྱུང་༔ རིག་འཛིན་བརྒྱུད་པ་དང་བཅས་པའི༔ བཀའ་དང་ཐ་ཚིག་གཉན་པོ་རྣམས༔ དཔང་དུ་བཙུགས་ཏེ་གཏའ་རུ་བཞག༔ མ་འདའ་བཛྲ་ས་མ་ཡ༔ མ་མོ་ཤ་ཟ་ཧོར་མོ་ཆོ་ཆོ་རྒྱུག་རྒྱུག་བྷྱོ་བྷྱོ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་ཚོགས་ཀྱི་བདེན་པས་བསྐུལ་ཞིང་རྦད་ཚིག་དེ་དག་ཆུད་མི་ཟ་བར་འགྲུབ་པར་ཤོག་ཅིག༔ ཅེས་གཏོར་མ་ཐུན་གྱིས་བྲབ་པ་དང་དུས་མཉམ་དུ་ཐལ་མོ་བརྡབ༔ སྐྲ་བསིགས༔ བྲང་བརྡུངས་ཏེ༔ གཏོར་མ་དགྲ་ཕྱོགས་སུ་འཕང་༔ དེ་ཡིས་བསམ་དོན་ངེས་པར་འགྲུབ༔ བསྒྲུབ་ནས་འགྲུབ་རྟགས་ཐོན་པ་ཡི༔ རྣལ་འབྱོར་དག་གི་སྤྱོད་ཡུལ་ལོ༔ བཀའ་སྲུང་དྲེགས་པ་སྡེ་བརྒྱད་ཀྱིས་སྲུངས་ཤིག༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་སློབ་བུ་དམ་པ་མཁྱེན་རབ་རྒྱ་མཚོ་ལ་སོགས་པའི་སློབ་བུ་འགས་ནན་དུ་བསྐུལ་ངོར་བདུད་འཇོམས་པས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།