TTDL-ZABTER-15-BA-054

Previous Text Back to Volume PageNext Text

Wylie title	dag snang ye shes drwa ba las: sgrub pa'i cha lag dbang dang dngos grub char 'bebs gter kyi bum bzang:
Location	bdud 'joms gling pa zab gter Volume 15, Text 54, Pages 237-239 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las sgrub pa'i cha lag dbang dang dngos grub char 'bebs gter kyi bum bzang. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 237-239. Thimphu, Bhutan: Lama Kuenzang Wangdue, 2004.
Side notes	Recto: dbang dngos blang ba   Verso: bdud 'joms sgrub pa'i cha lag
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Empowerment Ritual - dbang chog - dbang skur
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཞེས་པ་འདི་ཡང་སྨོན་ལམ་ལས་ཀྱིས་འབྲེལ་བའི་སྐྱེས་བུ་ཆེ་མཆོག་ཅེས་བྱ་བས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ།།
	zhes pa 'di yang smon lam las kyis 'brel ba'i skyes bu che mchog ces bya bas bskul ngor khrag 'thung bdud 'joms rdo rjes dag snang ye shes drwa ba las bsgyur ba'o/_/dge'o//

Tibetan Text

[edit]

༼བྷྂ༽༔ དག་སྣང་ཡེ་ཤེས་དྲྭ་བ་ལས༔ སྒྲུབ་པའི་ཆ་ལག་དབང་དང་དངོས་གྲུབ་ཆར་འབེབས་གཏེར་ཀྱི་བུམ་བཟང་བཞུགས་སོ༔ ན་མོ་གུ་རུ་མཱུ་ཁྱོ་པདྨ་ཀ་ར་ཡེ༔ གྲངས་མེད་བསྐལ་པའི་སྔོན་རོལ་ནས༔ གསང་སྔགས་སྒྲུབ་པ་ཟབ་མོ་ལ༔ ལས་འབྲེལ་བཟང་པོའི་རྒྱུས་བསྐྱེད་པས༔ སྒྲུབ་པ་བྱེད་པའི་སྐལ་ལྡན་གྱིས༔ རང་སྣང་དོན་གྱི་འོག་མིན་ནས༔ རང་རིག་སྒྱུ་འཕྲུལ་འཁོར་ལོ་ཡིས༔ གསང་གསུམ་རྡོ་རྗེའི་གཏེར་མཛོད་ལས༔ དབང་དང་དངོས་གྲུབ་ལེན་པ་ལས༔ དང་པོ་སྐུ་གསུང་ཐུགས་མཆོག་གི༔ དབང་དང་དངོས་གྲུབ་རྫས་བསགས་ཏེ༔ བསྒྲུབ་ཅིང་གྲུབ་པ་ཐོན་པའི་རྗེས༔ དབང་དང་དངོས་གྲུབ་བླང་བ་ལ༔ དང་པོ་གསོལ་བ་གདབ་པ་ནི༔ ཀྱེ་ཧོཿ རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་བརྒྱུད་པ་དགུ་ལྡན་བླ་མ་དགོངས་སུ་གསོལ༔ རྒྱུད་སྡེ་བཞི་དྲུག་ཐེག་དགུར་འབྲེལ་བ་ཡི༔ ཡི་དམ་ཞི་ཁྲོ་དཔའ་བོ་མཁའ་འགྲོའི་ཚོགས༔ དད་དང་དམ་ཚིགས་ཐུགས་རྗེའི་རྒྱུད་བསྐུལ་ལོ༔ ཆོས་ཀྱི་དབྱིངས་ནས་གཟུགས་ཀྱི་སྐུར་བཞེངས་ལ༔ སྒྲུབ་པའི་རྣལ་འབྱོར་བདག་ཅག་མཆེད་ལྕམ་ལ༔ དབང་དང་དངོས་གྲུབ་སྩོལ་བའི་དུས་ལ་བབ༔ ཐུགས་དམ་གནད་ནས་བསྐུལ་ལོ་ས་མ་ཛ༔ ཞེས་ལན་གསུམ་གྱིས་གསོལ་བ་བཏབ༔ དེ་ནས་དབང་དང་དངོས་གྲུབ་བླང་བ་ལ༔ ཧཱུྃ༔ བུམ་པ་སྤྲོས་བྲལ་ཆོས་སྐུའི་མཁར༔ ལྷུན་གྲུབ་བདེ་ཆེན་བཀོད་པ་རྫོགས༔ གང་འདུལ་ཐུགས་རྗེ་རོལ་གར་ངོམས༔ མི་འགྱུར་སྐུའི་གསང་མཛོད་ནས༔ བུམ་པ་སྐུ་ཡི་དབང་དངོས་གྲུབ༔ དཀར་གསལ་འོད་ཀྱི་རྣམ་པ་རུ༔ སྤྱི་བོ་ནས་ཞུགས་ལུས་ལ་ཐིམ༔ ལུས་དང་རྩ་ཡི་སྒྲིབ་པ་དག༔ བུམ་དབང་ཐོབ་ཅིང་འགྱུར་མེད་སྐུའི༔ དངོས་གྲུབ་ཀུན་ཐོབ་སྤྲུལ་པའི་སྐུའི༔ གོ་འཕང་མངོན་དུ་འགྱུར་བར་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ ཀཱ་ཡ་སིདྡྷི་ཕ་ལ་ ཧོཿ ཧཱུྃ༔ ལྷུན་གྲུབ་བདེ་ཆེན་གསང་མཛོད་ནས༔ གསང་བ་གསུང་གི་དབང་དངོས་གྲུབ༔ དམར་གསལ་འོད་ཀྱི་རྣམ་པར་བྱུང་༔ བདག་གི་མགྲིན་པ་ནས་ཞུགས་སྟེ༔ ངག་དང་རླུང་གི་སྒྲུབ་པ་དག༔ གསང་བ་གསུང་གི་དབང་དངོས་གྲུབ༔ ཡོངས་ཐོབ་ལོངས་སྐུར་སྨིན་གྲོལ་ཤོག༔ རྩ་སྔགས་མཐར༔ 'ཝཱཀ་ཨ་བྷི་ཥིཉྩ་ཨཱ༔ ཝཱཀ་སིདྡྷི་ཕ་ལ་ ཧོཿ ཧཱུྃ༔ ཀ་དག་སྤྲོས་བྲལ་ཐུགས་ཀློང་ནས༔ དབྱིངས་དང་ཡེ་ཤེས་དབྱེར་མེད་པའིཿངོ་བོ་འོད་ཐུག་མཐིང་ནག་གི༔ རྣམ་པར་རང་གི་སྙིང་གར་ཐིམ༔ ཡིད་དང་ཐིག་ལེའི་སྒྲིབ་པ་དག༔ ཐུགས་མཆོག་ཤེས་རབ་ཡེ་ཤེས་ཀྱི༔ དབང་དང་དངོས་གྲུབ་ཀུན་ཐོབ་ཅིང་༔ ཆོས་ཀྱི་སྐུ་རུ་སྨིན་གྲོལ་ཤོག༔ རྩ་སྔགས་མཐར༔ ཙིཏྟ་ཨ་བྷིཉྩ་ཧཱུྃ༔ ཙིཏྟ་པྲཛྙཱ་ཛྙཱ་ན་སརྦ་སིདྡྷི་ཕ་ལ་ ཧོཿ ཁྱབ་བདག་གདོད་མའི་མགོན་པོ་ཡི༔ སྐུ་བཞི་དང་ནི་ཡེ་ཤེས་ལྔའི༔ རྣམ་པ་འོད་ལྔ་སྤྲིན་བཞིན་དུ༔ བདག་གི་གནས་ལྔར་ཐིམ་པ་ཡིས༔ སྒྲིབ་གཉིས་བག་ཆགས་ཀུན་དག་སྟེ༔ ཀ་དག་ཚིག་དབང་ཐོབ་པ་དང་༔ དངོས་གྲུབ་མ་ལུས་ཇི་སྙེད་པ༔ ཡོངས་ཐོབ་སྐུ་བཞི་ཡེ་ཤེས་ལྔའི༔ བདག་ཉིད་ཆེན་པོའི་དཔལ་ཐོབ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཨཱ༔ སརྦ་སིདྡྷི་ཕ་ལ་ ཧོཿ ཞེས་དངོས་གྲུབ་ཀྱི་རྫས་རྣམས་སྤྱོ་བོ་མགྲིན་པ་སྙིང་ག་རྣམས་སུ་གཏུགས་ཏེ་དམིགས་གསལ་ཀྱི་གནད་དང་ལྡན་པས་དབང་དང་དངོས་གྲུབ་བླངས་ལ༔ རྩ་སྔགས་མཐར༔ བཛྲ་གུ་རུ་དྷེ་ཝ་ཌཱ་ཀི་ནཱི་ཀཱ་ཡ་ཝཱཀ་ཙིཏྟ་སརྦ་ཨ་བྷི་ཥིཉྩ་ཧཱུྃ༔ སརྦ་སིདྡྷི་ཕ་ལ་ ཧོཿ ཅི་མང་བཟླས༔ བསྐྱེད་དམིགས་གསལ་བའི་གནད་ལྡན་ན༔ དབང་དང་དངོས་གྲུབ་ཀུན་ཐོབ་ཅིང་༔ རྣམ་གྲོལ་ས་ལ་མྱུར་སླེབས་འགྱུར་༔ ས་མ་ཡ༔ བཀའ་སྲུང་རྨ་རུ་ཙེ་རྒྱལ་གྱིས་སྲུངས་ཤིག༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་སྨོན་ལམ་ལས་ཀྱིས་འབྲེལ་བའི་སྐྱེས་བུ་ཆེ་མཆོག་ཅེས་བྱ་བས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ།། །།