DJYD-KABUM-17-TSA-007

Previous Text Back to Volume PageNext Text

Wylie title	gnod sbyin shan pa dmar nag gi phrin las
Location	bdud 'joms rin po che bka' 'bum Volume 17, Text 7, Pages 101-117 (Folios 51a1 to 59a3)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Gnod sbyin shan pa dmar nag gi phrin las. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 17: 101-117. Kalimpong: Dupjung Lama, 1979-1985.
Side notes	Recto: shan dmar   Verso: srung ma'i phrin las
More details More details
Genre	Activity Manual - las byang  ·  Activity Practices - las tshogs
Colophon	།འདི་ནི་བདུད་འཇོམས་ཟབ་གཏེར་གྱི་བཀའ་སྲོལ་ཉིད་གཙོ་བོ་བྱས་ནས་བཀོད་མོད་ཀྱི། ལས་འབྲེལ་རྩལ་དང་། རཏྣ་གླིང་པའི་ཤན་དམར་ཡང་དོན་གྱིས་ཆུ་བོ་གཅིག་འདྲེས་སུ་འགྱུར་བ་ཡིན་ཅིང་། སྲོག་དབང་གི་ཆོ་ག་གཏེར་གཞུང་བཞིན་ཤེས་པར་བྱའོ།།
	'di ni bdud 'joms zab gter gyi bka' srol nyid gtso bo byas nas bkod mod kyi/___las 'brel rtsal dang /___rat+na gling pa'i shan dmar yang don gyis chu bo gcig 'dres su 'gyur ba yin cing /___srog dbang gi cho ga gter gzhung bzhin shes par bya'o//

Tibetan Text

[edit]

༄༅། [51a] །གནོད་སྦྱིན་ཤན་པ་དམར་ནག་གི་ཕྲིན་ལས་ནི། སྦྱོར་བའི་ཆོས་རྣམས་སྔོན་དུ་འགྲོ་བས། དངོས་གཞི་མདུན་བསྐྱེད་བསང་སྦྱང་། སྟོང་པའི་ངང་ལ་མདུན་གྱི་ས་གཞི་དུར་ཁྲོད་འཇིགས་སུ་རུང་བ། རོ་གསར་རྙིང་སྣ་ཚོགས་ཕུང་པོར་སྤུངས་ཤིང་གཅལ་དུ་བཀྲམ་པ། ཁྲག་གིས་སྦགས་པའི་རོ་ལང་དང་ཤ་ཟ་རྣམས་དགོད་ཅིང་གར་རྩེ་བ། མ་རུངས་པའི་སྲོག་ཆགས་གདུག་པ་ཅན་རྣམས་ངུ་འབོད་ཀྱི་སྒྲ་དང་བཅས་པས་ལང་ལོང་དུ་འཕྱོ་ཞིང་རོ་ལ་ཟ་བ། མི་སྲུན་ལས་ཀྱི་བཤན་པ་འབུམ་སྡེ་ཀུན་ཏུ་རྒྱུ་ཞིང་ཉམས་པ་ཅན་རྣམས་འགུགས་འཆིང་གསོད་གཅོད་ཀྱི་ལས་བྱེད་པ། སྟེང་ན་དུག་གི་སྤྲིན་ནག་འཁྲིགས་པའི་གསེབ་ནས་འབྲུག་སྒྲ་དྲག་པོ་དང་བཅས་ཏེ་གནམ་ལྕགས་ཐོག་གི་བུ་ཡུག་འཚུབས་པ། ཕྱོགས་ཐམས་ཅད་ནས་མེ་རླུང་དམར་ནག་དྲག་ཏུ་འབར་ཞིང་འཁྲུགས་པའི་མཐའ་ལྕགས་རི་ནག་པོས་ཡོངས་སུ་བསྐོར་བ། དེའི་དབུས་སུ་བྷྲཱུྃ་ལས་དབང་དྲག་རོལ་པའི་ཕོ་བྲང་ཆེན་པོ་དྲག་པོའི་རྒྱན་དང་བཀོད་པ་ཚད་མེད་པས་སྤྲས་པ། ནང་ཁྲག་ཞག་གི་རྒྱ་མཚོ་རྦ་ཀློང་འཁྲུགས་པའི་དབུས་སུ་བཻཌཱུརྱའི་བྲག་དང་སྣ་ཚོགས་པདྨའི་ཟེའུ་འབྲུ་ཉི་མ་དང་དགྲ་བགེགས་ཕོ་མོ་གཅལ་དུ་བཀྲམ་པའི་ [51b] གདན་ལ་རབ་འཇིགས་ཟངས་ཀྱི་ཁྱུང་དམར་སྤུ་གྲིའི་སྒྲོ་གཤོག་ཅན་རྔམས་སྟབས་སུ་འཕུར་ལྡིང་གཡོ་བའི་སྟེང་དུ་ཧཱུྃ་ཡིག་དམར་ནག་ཀྵཿཧྲཱིཿས་མཚན་པ་ཅན་ཡོངས་སུ་གྱུར་པ་ལས། གནོད་སྦྱིན་ཤན་པ་ཆེན་པོ་སྐུ་མདོག་དམར་ནག་དུས་མཐའི་མེ་ལྟར་འབར་ཞིང་འཇིགས་སུ་རུང་བ། ཞལ་གཅིག་ཕྱག་བཞི་པ། ཤིན་ཏུ་ཁྲོས་པའི་ཞལ་གདངས་ཤིང་རྣོ་དཀར་གྱི་མཆེ་བ་གཙིགས་པ། དམར་ལ་ཟླུམ་པའི་སྤྱན་གསུམ་སྡང་མིག་ཏུ་གཡོ་བ། སྨར་ལས་མེའི་ཚྭ་ཚྭ་འཕྲོ་ཞིང་སྨིན་མར་བསྐལ་པའི་གློག་སྟོང་འཁྱུག་པ། ཕྱག་གཡས་དང་པོས་རལ་གྲི་མེ་འབར་བ་ཀླད་ལ་ཕྱར་ཞིང་གཡོན་དང་པོས་གདུག་པ་ཅན་གྱི་དོན་སྙིང་དང་རྒྱུ་ཞགས་འཛིན་པ། འོག་མ་གཉིས་ཀྱིས་རྡོ་རྗེས་མཚན་པའི་གྲི་གུག་དང་ཐོད་པ་ཁྲག་གིས་བཀང་བ་ཐུགས་ཀར་སྟེང་འོག་ཏུ་འཛིན་པས་ཡུམ་ལ་འཁྱུད་པ། ཁྲག་གི་རལ་པ་གྱེན་དུ་བརྫེས་ཤིང་ཐོད་པ་སྐམ་པོ་ལྔས་དབུ་རྒྱན་དང་། རློན་པ་ཁྲག་འཛག་པ་ལྔ་བཅུས་དོ་ཤལ་བྱས་པ། དར་དམར་གསེར་བཀྲའི་བེར་ཆེན་གསོལ་ཞིང་སྟག་གི་ལྤགས་པའི་ཤམ་ཐབས་ཅན། རུས་པ་དང་སྦྲུལ་གྱི་ཆུན་པོ་སོགས་དུར་ཁྲོད་འཇིགས་པའི་ཆ་བྱད་ཡོངས་སུ་རྫོགས་པ། ཞབས་གཉིས་རོལ་པའི་སྟབས་ཀྱིས་ [52a] བཞུགས་པའི་པང་དུ་ཡུམ་མཆོག་གསོད་བྱེད་སྙིང་འབྱིན་མ་དམར་མོ་གཡས་ལྕགས་ཀྱུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་དགྲ་བོའི་དོན་སྙིང་ཞལ་དུ་སྟོབ་པ། གཅེར་བུ་ཕྱག་རྒྱ་ལྔས་སྤྲས་ཤིང་ཞབས་གཉིས་ཡབ་ཀྱི་སྐེད་ལ་འཁྲིལ་བ། གཉིས་ཀའང་གཏུམ་རྔམས་བཟོད་པར་དཀའ་བའི་ཚུལ་ཅན་དྲག་པོའི་གད་རྒྱང་འབྲུག་སྟོང་ལྡིར་བ་ལྟར་སྒྲོགས་པས་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ། ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་བཞུགས་པའོ། །དེའི་ཕྱི་རོལ་གྱི་ཤར་དུ་རྒྱལ་ཆེན་སྟག་གི་གདོང་ཅན་དཀར་པོ། ལྷོ་རུ་གཤིན་རྗེ་གཟིག་གི་གདོང་ཅན་སྔོན་པོ། ནུབ་ཏུ་བཙན་རྗེ་དོམ་གྱི་གདོང་ཅན་དམར་ནག །བྱང་དུ་བདུད་པོ་འབྲོང་གི་གདོང་ཅན་ནག་པོ། ཤར་ལྷོར་སྲིན་པོ་ནེ་ཙོའི་གདོང་ཅན་དུད་ཁ། ལྷོ་ནུབ་ཏུ་ལྷ་མོ་རྨ་བྱའི་གདོང་ཅན་ལྗང་ནག །ནུབ་བྱང་དུ་གཟའ་བདུད་ཤང་ཤང་གདོང་ཅན་དུད་ཁ། བྱང་ཤར་དུ་ཀླུ་བདུད་གསེར་མག་གདོང་ཅན་མཐིང་ནག །ཐམས་ཅད་ཀྱང་གཡས་རང་མདོག་གི་དར་མདུང་ཕྱར་ཞིང་གཡོན་སྙིང་དང་རྒྱུ་ཞགས་ཐོགས་པ། དར་བེར་གྱོན་ཅིང་སྟག་ [52b] རལ་གཟིག་ཤུབ་བཅང་སྟེ་རྟ་ལ་ཞོན་པ། དེ་མཐར་ལས་བྱེད་ཕོ་ཉ་སྡེ་བརྒྱད་ཤ་ཟ་བཤན་པའི་དམག་ཚོགས་བསམ་གྱིས་མི་ཁྱབ་པས་བསྐོར་ཞིང་ཐམས་ཅད་ཀྱང་ཁྲོ་གཏུམ་འཇིགས་པའི་གཟུགས་ཅན། ཕྲིན་ལས་རབ་འབྱམས་ཐོགས་མེད་དུ་བསྒྲུབ་པའི་ཚུལ་གྱིས་གནས་པའོ། །ཞེས་གསལ་གདབ། སྤྱན་འདྲེན་པ་ནི། དེ་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་དང་རང་གི་སྙིང་གའི་འོད་ཟེར་གྱིས་བསྐུལ་བས། འོག་མིན་ལྕང་ལོ་ཅན་དང་ཧེ་ཆེན་བརྡལ་བའི་དུར་ཁྲོད་སོགས་རང་བཞིན་གྱི་གནས་ནས་གནོད་སྦྱིན་ཆེན་པོ་འཁོར་དང་བཅས་པ་སྐད་ཅིག་གིས་སྤྱན་དྲངས་པར་བསམ་ཞིང་། ཤ་ཆེན་དང་གུ་གུལ་སོགས་སྦྱར་བའི་སྤོས་བསྲེག །རྐང་གླིང་གིས་དྲངས་པའི་རོལ་མོའི་སྒྲ་དང་། གདུང་བའི་དབྱངས་ཀྱི་ང་རོའི་འགྱུར་བ་དང་བཅས། ཧཱུྃ༔ སྔོན་གྱི་བསྐལ་པ་དང་པོ་ལ། རི་བོ་མ་ལ་ཡ་ཡི་རྩེར༔ རྡོ་རྗེ་འཛིན་པའི་སྤྱན་སྔ་རུ༔ བསྟན་པ་བསྲུང་བར་ཞལ་བཞེས་པའི༔ གནོད་སྦྱིན་དྲག་པོ་མཐུ་རྩལ་ཅན༔ བསྟན་པ་བསྲུང་ཕྱིར་གནས་འདིར་བྱོན༔ གླིང་བཞི་སྲིད་པའི་ཕོ་བྲང་ནས༔ ཕུང་བྱེད་དམར་ནག་གཤེགས་སུ་གསོལ༔ སློབ་དཔོན་པདྨའི་སྤྱན་སྔ་རུ༔ དགྲ་བགེགས་བསྒྲལ་ [53a] བར་ཞལ་བཞེས་པའི༔ དྲེགས་པའི་སྡེ་དཔོན་མཐུ་བོ་ཆེ༔ སྲོག་བདུད་ཆེན་པོ་གཤེགས་སུ་གསོལ༔ མཐུ་རྩལ་རི་རབ་ཐལ་བར་རློག༔ རྫུ་འཕྲུལ་ནམ་མཁའི་མཐའ་དང་མཉམ༔ སྐད་ཅིག་སྟོང་གསུམ་རྩིས་ལ་འདེབས༔ ཆེ་བཙན་དྲེགས་པ་བྲན་དུ་ཁོལ༔ ཤིན་ཏུ་མི་བསྲུན་དགྲ་བོའི་གཤེད༔ དམར་པོ་མི་སྲུན་གཤེགས་སུ་གསོལ༔ ཞེས་དང་། གཞན་ཡང་། ཧཱུྃ་ཀྵཿརྣམ་དག་ཆོས་དབྱིངས་སྤྲོས་བྲལ་ངང་ཉིད་ལས། །ཡེ་ཤེས་ཐུགས་རྗེ་ཁྲོས་པའི་གར་བསྒྱུར་བ། །རྡོ་རྗེ་ཐེག་པའི་བསྟན་སྲུང་མཐུ་བོ་ཆེ། །གནོད་སྦྱིན་འཁོར་བཅས་གནས་འདིར་སྤྱན་འདྲེན་ནོ། །པདྨ་དབང་གི་ཕོ་ཉ་དྲག་རྩལ་ཅན། །མ་རུང་ཞིང་བཅུའི་སྲོག་བདག་བཤན་པ་ཁྱོད། །ལྕང་ལོ་ཅན་དང་ཧེ་ཆེན་བརྡལ་བ་སོགས། །དགྱེས་རྒུར་རོལ་པའི་གནས་ནས་ད་ཚུར་གཤེགས། །སྔོན་ཚེ་གསང་བདག་པདྨའི་སྤྱན་སྔ་རུ། །ཇི་ལྟར་ཞལ་བཞེས་ཐུགས་དམ་མ་གཡེལ་བར། །གསང་ཆེན་བསྟན་དང་བསྟན་འཛིན་སྡེ་དང་བཅས། །སྐྱོང་བའི་ཕྲིན་ལས་མཛད་ཕྱིར་ད་ཚུར་བྱོན། །དམ་ཚིག་གནས་འདིར་རིག་འཛིན་བདག་ཅག་གིས། ། [53b] རྩེ་གཅིག་གདུང་བའི་ཡིད་ཀྱིས་ཁྱོད་འབོད་ན། །ཡབ་ཡུམ་སྤྲུལ་འཁོར་བཀའ་སྡོད་ཕོ་ཉར་བཅས། །གློག་ལྟར་མྱུར་བའི་ཤུགས་ཀྱིས་གཤེགས་སུ་གསོལ། །ཨེ་ཧེ་མ་རུ་ཙེ་ས་པ་རི་ཝཱ་ར་ཨེ་ཧྱ་ཧི་བཛྲ་ས་མ་ཡ་ཛཿཛཿཧཱུཾ་བཾ་ཧོཿ ཞེས་སྤྱན་དྲངས་པས་ནམ་མཁའ་ལ་སྤྲིན་ཕུང་གཏིབས་པ་བཞིན་བྱོན་པར་བསམ། བཞུགས་སུ་གསོལ་བ་ནི། ཧཱུྃ། དུར་ཁྲོད་རོལ་པའི་དཀྱིལ་འཁོར་ཆེན་པོ་འདིར། །པད་ཉི་དགྲ་བགེགས་བསྣོལ་བའི་གདན་སྟེང་དུ། །རབ་འཇིགས་དཔའ་བོ་འཁོར་དང་བཅས་པ་རྣམས། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །བཛྲ་ས་མ་ཡ་ཏིཥྛནྟུ། ཞེས་བསྐྱེད་པའི་དམ་ཚིག་པ་དང་དབྱེར་མེད་དུ་བཞུགས་པར་བསམ། དམ་ལ་བཞག་པ་ནི། རང་ཉིད་ཡི་དམ་གྱི་སྙེམས་པ་བརྟན་པོས་གནོད་སྦྱིན་འཁོར་བཅས་ཀྱི་སྤྱི་བོར་རྡོ་རྗེ་བཞག་བདུད་རྩི་ལྗགས་ལ་བསྟིམ་པར་མོས་ཏེ། ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ། དབང་དྲག་གནོད་སྦྱིན་ཆེན་པོ་འཁོར་དང་བཅས་པ་རྣམས་ཀྱིས་ཁྲག་འཐུང་ཁྲོ་བོའི་རྒྱལ་པོ། སློབ་དཔོན་པདྨ་ཐོད་ཕྲེང་། འབྲོག་བན་ཁྱེའུ་ཆུང་ལོ་ཙཱ། གར་དབང་བདུད་འཇོམས་དཔའ་བོ་ནས་འཁོར་ལོའི་མགོན་པོ་རྩ་བའི་བླ་མའི་བར་དུ་བྱོན་པའི་རྩ་བ་དང་བརྒྱུད་པར་བཅས་ [54a] པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས། སོགས་ཀྱིས་དམ་ཚིག་གི་གཉེར་གཏད་པས་ཅི་བསྒོ་བའི་ལས་ཐམས་ཅད་ངོ་འཐོན་དུ་བསྒྲུབ་པའི་བཀའ་ནོད་པར་བསམ། ཕྱག་བྱ་བ་ནི། ཧཱུྃ། སངས་རྒྱས་བསྟན་པ་གཉན་པོ་སྲུང་མཛད་ཅིང་། །གདུག་པའི་དགྲ་བགེགས་མ་ལུས་ཚར་གཅོད་པའི། །གནོད་སྦྱིན་ཆེན་པོ་འཁོར་དང་བཅས་པ་ལ། །རྩེ་གཅིག་དང་བའི་ཡིད་ཀྱིས་ཕྱག་འཚལ་ལོ། །ཨ་ཏི་པུ་ཧོཿ པྲ་ཏཱིཙྪ་ཧོཿ ཞེས་ཕྱག་བྱ། མཆོད་པ་འབུལ་བ་ནི། ཧཱུྃ། འཇིགས་བྱེད་དབང་དྲག་ཆེན་པོ་འཁོར་བཅས་ལ། །དགྱེས་པའི་མཆོད་སྤྲིན་རྒྱ་མཚོ་འབུལ་བ་ནི། །ཉམས་པའི་སྙིང་ཁྲག་མཆོད་ཡོན་རྒྱ་མཚོར་འཁྱིལ། །དུག་ཁྲག་མྱོས་བྱེད་ཞབས་བསིལ་རྫིང་བུར་གཏམས། །དབང་པོ་སྣ་ལྔའི་མེ་ཏོག་ཚར་དུ་དངར། །སྣ་ཚོགས་ཤ་ཆེན་གསུར་དུད་སྤྲིན་ཕུང་གཡོ། །ཞུན་ཆེན་མར་ནག་སྒྲོན་མེ་འོད་དུ་འབར། །མཁྲིས་ཆེན་ཁྲག་ཞག་དྲི་ཆབ་རྦ་ཀློང་འཁྲིགས། །ཤ་རུས་དོན་སྙིང་ཞལ་ཟས་ལྷུན་པོར་སྤུངས། །ཐོད་རྔ་དྲག་པོའི་རོལ་མོས་ས་གསུམ་གཡོ། །རྩ་བརྒྱད་ཡན་ལག་སྟོང་སྦྱར་མ་ད་ན། །ཁམས་གསུམ་ཆགས་པ་བསྡུས་པའི་ [54b] དམར་ཆེན་ཁྲག །མཆོག་གི་ལོངས་སྤྱོད་འདོད་རྒུའི་བ་ལིཾ་ཏ། །ཕུང་པོ་མ་ཚང་མེད་པའི་དམ་ཚིག་རྫས། །རབ་འབྱམས་ནམ་ཁའི་ཁྱོན་ཀུན་བཀང་སྟེ་འབུལ། །བརྩེ་བས་བཞེས་ནས་མཐུན་པའི་དངོས་གྲུབ་སྩོལ། །ཨེ་ཧེ་མ་རུ་ཙེ་ས་པ་རི་ཝཱ་ར་མ་ཧཱ་ཤ་ཤཱ་ན་པཱུ་ཙ་ཨརྒྷཾ། པཱདྱཾ། པུཥྤཾ། དྷུཔཾ། དིཔཾ། གྷནྡྷཾ། ནཻདྱཾ། ཤཔྡ་པྲ་ཏཱིཙྪ་སྭཱ་ཧཱ། ཞེས་ཉེར་སྤྱོད་དང་། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། ཞེས་སྨན་རཀ་སྟོབ། བྱེ་བྲག་ཏུ གནོད་སྦྱིན་འཁོར་བཅས་ཀྱི་ལྗགས་རྡོ་རྗེའི་སྦུ་གུས་གཏོར་མའི་བཅུད་དྲངས་ཏེ་གསོལ་བས་ཚིམ་ཞིང་དགྱེས་པར་བསམ་ལ། རྩ་སྔགས་ཀྱི་མཐར། ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་བཏགས་པ་བདུན་ནམ་གསུམ་གྱི་གཏོར་མ་ཕུལ་ཏེ། བསྟན་སྲུང་དྲེགས་པའི་གཙོ་བོ་དྲག་ཤུལ་མཐུ་སྟོབས་ཀྱི་དབང་ཕྱུག་གནོད་སྦྱིན་ཆེན་པོ་ཤན་པ་དམར་ནག །ཡུམ་མཆོག་གསོད་བྱེད་སྙིང་འབྱིན་མ། བཀའ་ཉན་ལས་མཁན་སྡེ་བརྒྱད། སྤྲུལ་པ་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་སངས་རྒྱས་ཀྱི་བསྟན་པ་སྲུངས། སོགས་ཀྱིས་ཕྲིན་ལས་གསོལ། བསྟོད་པ་བྱ་བ་ནི། ཧཱུྃ། བདེ་ཆེན་དབང་གི་རྒྱལ་པོ་ཧེ་རུ་ཀ ། གདུལ་དཀའ་འདུལ་ཕྱིར་འབར་བའི་སྐུར་བཞེངས་པ། །མཐུ་རྩལ་ཐོགས་ [55a] མེད་ཁམས་གསུམ་སྲོག་གི་བདག །འཇིགས་བྱེད་གནོད་སྦྱིན་ཁྱོད་ལ་ཕྱག་འཚལ་བསྟོད། །དུར་ཁྲོད་བདག་པོ་ཤ་ཟ་སྲིན་པོའི་གཟུགས། །གནོད་སྦྱིན་སྲིན་པོ་ཚོགས་པའི་སྲས་གཅིག་པོ། །སྐུ་མདོག་དམར་ནག་ཁྲོ་བོའི་ཚུལ་འཆང་བ། །འཇིགས་པའི་མེ་འོད་འཕྲོ་ལ་ཕྱག་འཚལ་བསྟོད། །རལ་པ་དམར་ནག་སྲིད་པའི་རྩེ་མོར་འཁྱིལ། །ཐོད་སྐམ་རིན་ཆེན་འབར་བས་དབུ་ལ་བརྒྱན། །ཁྲོས་པའི་སྡང་མིག་ཕྱོགས་མཚམས་ཀུན་ཏུ་བལྟ། །ཤངས་ནས་དུད་སྤྲིན་འཁྲིགས་ལ་ཕྱག་འཚལ་བསྟོད། །རྔམས་པའི་ཞལ་གདངས་ར་བརྣོན་མཆེ་བ་གཙིགས། །གྲྭ་ནས་ཁྲག་འཛག་དུག་གི་ཁ་རླངས་འཐུལ། །གློག་དམར་འཁྱུག་པ་ལྟ་བུའི་ལྗགས་བསྐྱོད་པས། །དམ་ཉམས་སྙིང་ཁྲག་འཐུང་ལ༴ ཕྱག་བཞི་གཡས་གཉིས་རལ་གྲི་གྲི་གུག་གིས། །སྲིད་གསུམ་གདུག་པའི་སྲོག་རྩ་དམར་པོ་གཅོད། །གཡོན་གཉིས་སྙིང་ཞགས་ཐོད་པ་ཁྲག་ཅན་གྱིས། །བསྟན་དགྲའི་ཤ་རུས་གསོལ་ལ༴ གླང་ཆེན་ཀོ་རློན་མི་ལྤགས་གཡང་གཞི་གསོལ། །སྟག་ཤམ་ང་རྒྱལ་དྲེགས་པ་དབང་དུ་བསྡུད། །དར་དམར་འཇོལ་བེར་ཐོད་སྦྲུལ་རིན་ཆེན་སོགས། །དྲག་པོའི་ཆ་ [55b] ལུགས་རྫོགས་ལ༴ གསང་བའི་དགྱེས་སྤྱོད་གསོད་བྱེད་སྙིང་འབྱིན་མ། །ལྕགས་ཀྱུ་ཐོད་ཁྲག་འཛིན་དང་གཉིས་མེད་རྩེ། །དྲག་པོའི་ང་རོ་འབྲུག་གི་སྒྲ་བསྒྲགས་པས། །ཁམས་གསུམ་གཡོ་ཞིང་འཁྲུག་ལ༴ མེ་ཁྱུང་དམར་པོ་སྤུ་གྲེའི་སྒྲོ་གཤོག་ཅན། །ཆིབས་ནས་སྟོང་གསུམ་སྐད་ཅིག་ཡུད་ཀྱིས་བསྐོར། །གླིང་བཞིར་རྒྱུག་ཅིང་མཚོན་གཟེར་དགྲ་ལ་འདེབས། །མྱུར་མགྱོགས་བླ་རྐུན་ཆེན་པོ་ཁྱོད་ལ་བསྟོད། །མཁའ་ལ་སྐྱོད་ཚེ་སྟོང་གསུམ་ཁུ་སྒྲས་འགེངས། །དུར་ཁྲོད་དམག་ཚོགས་བསྡུས་ནས་དགྲ་བོ་སྒྲོལ། །གར་ཕེབས་ས་རུ་མི་རོ་རགས་སུ་འཚེར། །སྲོག་བདུད་ལས་ཀྱི་བཤན་པ་ཁྱོད་ལ་བསྟོད། །ལས་ལ་བསྐུལ་ཚེ་སྡེ་བརྒྱད་བྲན་དུ་བཀོལ། །དམ་ཉམས་བསྒྲལ་ནས་རྣལ་འབྱོར་ཕྲིན་ལས་མཛོད། །གར་རྦད་ས་རུ་དམ་ཉམས་ཐལ་བར་བརླག །ཕུང་བྱེད་མི་ཟན་ཁྱོད་ལ༴ རབ་འཇིགས་སྤྲུལ་པའི་ཕོ་ཉ་ལས་མཁན་བརྒྱད། །བཀའ་ཉན་སྣང་སྲིད་ལྷ་སྲིན་དྲེགས་པའི་སྡེ། །ཤ་ཟ་བཤན་པའི་དམག་དཔུང་རླུང་ལྟར་འཚུབས། །གནོད་སྦྱིན་འཁོར་དང་བཅས་ལ་ཕྱག་འཚལ་བསྟོད། ཅེས་བསྟོད། བཟླས་པ་བྱ་བ་ནི། གནོད་སྦྱིན་ཆེན་པོའི་ [56a] ཐུགས་ཀར་ཉི་མ་ལ་གནས་པའི་ཡིད་བཞིན་གྱི་ནོར་བུ་དབང་གི་རྒྱལ་པོའི་ནང་ཁོངས་སུ་ཧཱུྃ་ཡིག་དམར་ནག་ཀྵཿཧྲཱིཿས་མཚན་པ་ཅན་གྱི་མཐར་སྔགས་ཀྱི་ཕྲེང་བས་བསྐོར་བ། བདག་གི་ཐུགས་ཀའི་འོད་ཀྱིས་བསྐུལ་བས་སྔོན་གྱི་དམ་ཚིག་དྲན་ཏེ་ཅི་འདོད་པའི་ཕྲིན་ལས་རབ་འབྱམས་ཐོགས་མེད་དུ་བསྒྲུབ་པར་མོས་ལ། གོང་གནོན་གྱི་བཟླས་པ་ཅི་རིགས་སྔོན་དུ་འགྲོ་བས། ཨེ་ཧེ་མ་རུ་ཙེ་གུ་ཎ་ཧྲཱི་ཏྲི་ཧཱུྃ་ཛཿ ཞེས་བཟླ། འདི་ནི་ཐུན་མོང་རྒྱུན་གྱི་བསྙེན་སྔགས་ཏེ་སྤྱི་ཙམ་དུ་འདི་ཁོ་ནས་ཆོག་ལ། ལས་ཁྱད་པར་བ་དང་འབྲེལ་བ་སྤུ་གྲི་གཅིག་ཤུར་ལ་སོགས་པའི་སྔགས་ཐུན་མོང་མ་ཡིན་པ་རྣམས་མན་ངག་ལས་ཤེས་སོ། །བཟླས་པའི་མཐར། ཨེ་ཧེ་མ་རུ་ཙེ་ས་པ་རི་ཝཱ་ར་ཨརྒྷཾ་སོགས་ནས། ཤཔྡའི་བར་དང་། མ་ཧཱ་པཉྩ་ཨ་མྲྀ་ཏ་ཁཱ་ཧི། ཞེས་མཆོད། ཧཱུྃ། བདེ་ཆེན་དབང་གི་རྒྱལ་པོ་ཧེ་རུ་ཀ ། གདུལ་དཀའ་འདུལ་ཕྱིར་འབར་བའི་སྐུར་བཞེངས་པ། །མཐུ་རྩལ་ཐོགས་མེད་ཁམས་གསུམ་སྲོག་གི་བདག །འཇིགས་བྱེད་གནོད་སྦྱིན་འཁོར་དང་བཅས་ལ་བསྟོད། །ཐུགས་རྗེ་ཐུགས་དམ་གཉན་པོ་མ་གཡེལ་བར། །ཟབ་གསང་བསྟན་པ་དར་ཞིང་རྒྱས་པ་དང་། །ཕྲིན་ལས་རྣམ་བཞི་ལྷུན་གྱིས་གྲུབ་པ་ཡིས། །རྣལ་འབྱོར་བསམ་པའི་རེ་བ་ [56b] ཡོངས་གང་མཛོད། །ཅེས་བསྟོད་ཅིང་ཕྲིན་ལས་གསོལ། ཐུགས་དམ་སྐོང་བ་ནི། བསྐང་རྫས་བྱིན་གྱིས་བརླབས་ལ། ཧཱུྃ། ཁྲག་འཐུང་ཧེ་རུ་ཀ་དཔལ་དཔའ་བོ་ཆེ། །སྙིང་རྗེ་ཆེན་པོས་མི་བཟད་ཁྲོས་པའི་གར། །འཇིགས་བྱེད་གནོད་སྦྱིན་ཆེན་པོ་འཁོར་བཅས་ཀྱི། །ཐུགས་དམ་གཉན་པོ་དབྱིངས་སུ་བསྐང་བར་བགྱི། །ཆོས་དབྱིངས་འགྱུར་མེད་བདེ་བ་ཆེན་པོའི་གཤིས། །མ་འགགས་རང་བྱུང་ཀུན་བཟང་རྣམ་རོལ་ལས། །ཡོངས་ཤར་འདོད་ཡོན་རྒྱ་མཚོའི་སྤྲིན་ཕུང་གིས། །མཁའ་ལམ་དོག་པོར་བྱས་པས་ཐུགས་དམ་བསྐང་། །ཚིལ་ཆེན་དམ་རྫས་སྤོས་ཀྱི་དུད་སྤྲིན་དང་། །དབང་མདོག་དར་གྱི་གཡབ་མོ་ལྷབ་ལྷུབ་གཡོ། །གདུང་བའི་ང་རོས་འབོད་བསྐུལ་སྙན་བརྗིད་གདངས། །རོལ་མོའི་སྒྲ་དང་སྦྱར་བས་ཐུགས་དམ་བསྐང་། །དུར་ཁྲོད་ཐོད་མཁར་ཞིང་གི་བླ་བྲེ་བྲེས། །རྒྱུ་མའི་དྲྭ་ཕྱེད་ཙིཏྟའི་འཕྱང་འཕྲུལ་རྒྱན། །མི་མགོའི་ཏོག་དང་རོ་སྐྲའི་རྔ་ཡབ་སོགས། །འཇིགས་རུང་གནས་ཀྱི་བཀོད་པས་ཐུགས༴ ཁྲག་གི་ཨརྒྷཾ་དུག་ཆུའི་ཞབས་བསིལ་རྒྱུན། །དབང་ལྔའི་མེ་ཏོག་ཚིལ་གསུར་ཞུན་མེ་སྦར། །མཁྲིས་པའི་དྲི་ཆབ་ཤ་རུས་ཞལ་ཟས་སྤུངས། །རྐང་གླིང་དུར་ཁྲོད་རོལ་མོས་ཐུགས་དམ༴ [57a] དངོས་གྲུབ་འགུགས་པའི་ལྕགས་ཀྱུ་རྣམ་པ་ལྔ། །ཡེ་ཤེས་གསལ་བའི་སྒྲོན་མེ་ལྔ་དང་སྦྱར། །བྱང་ཆུབ་སེམས་དངོས་འཆི་མེད་ར་སཱ་ཡ། །ཛ་གད་དཔའ་བོའི་བཅུད་ཀྱིས༴ འབྱུང་བ་བཅུད་བསྡུས་རྔམས་དང་གདུང་བའི་དམར། །པདྨ་མུ་ལ་གུ་ཧྱ་རཀྟ་ཆེ། །ཞིང་བཅུའི་སྲོག་རྩ་བཅད་པའི་སྙིང་གི་ཁྲག །ལྦུ་ཕྲེང་དོ་ཤལ་གཡོ་བས༴ ལྕང་ལོར་བཅས་པའི་བྷནྡྷའི་སྣོད་ཡངས་པར། །ཉམས་པའི་ཤ་རུས་ལས་བྱུང་དམར་གྱི་བཤོས། །འདོད་རྒུ་འཇོ་བའི་རྟེན་གྱི་དམ་ཚིག་རྫས། །ལྷུན་པོའི་གཏོས་ལྟར་སྤུངས་པས་ཐུགས༴ རྟེན་རྫས་སྒྲུབ་རྫས་མཆོད་རྫས་སྐོང་བའི་རྫས། །མཐུན་པའི་དམ་རྫས་ཡིད་འཕྲོས་སྤྱན་གཟིགས་དཀོར། །བལྟ་བས་མི་ངོམས་ལྷ་མིའི་འབྱོར་པའི་ཕུལ། །གྲངས་མེད་འདོད་རྒུར་འཆར་བས༴ གནམ་ལྕགས་རལ་གྲི་མེ་རིའི་ཚྭ་ཚྭ་འཕྲོ། །རེག་ན་གཅོད་པའི་གྲི་གུག་རྣོ་ངར་ཅན། །དམ་ཉམས་དགྲ་བོའི་དོན་སྙིང་རྒྱུ་རློན་ཞགས། །ཐོད་པ་ཁྲག་གིས་བཀང་བས༴ གསེར་གྱི་ཧ་རིས་བཀྲ་བའི་དར་དམར་བེར། །དཔའ་བོའི་རྟགས་ཀྱི་མཚན་མ་དུར་ཁྲོད་ཆས། །ཟགས་ཀྱི་བྱ་ཁྱུང་སྤུ་ [57b] གྲིའི་སྒྲོ་གཤོག་ཅན། །རྔམས་བརྗིད་རྒྱན་དང་བཞོན་པས་ཐུགས༴ དམ་ཚིག་བྲིས་སྐུ་སྔགས་ཀྱི་ཕྱག་རྒྱ་ཆེ། །ཡབ་ཡུམ་སྲོག་འཁོར་བླ་རྡོ་བྱ་དམར་སྙིང་། །བླ་རྟེན་ཕུར་བུ་དམ་རྫས་ལེ་བརྒན་དར། །ཁྱད་འཕགས་གསང་བའི་རྟེན་གྱིས་ཐུགས༴ སྣང་སྟོང་རྩ་གནས་སྒྱུ་འཕྲུལ་ཕྱག་རྒྱའི་སྤྲིན། །གྲགས་སྟོང་རླུང་སྔགས་མི་ཤིགས་ན་དའི་དབྱངས། །རིག་སྟོང་ཐིག་ལེ་འོད་གསལ་བདེ་བ་ཆེ། །མཉམ་རྫོགས་ཁྱབ་བརྡལ་རོལ་པས་ཐུགས་དམ་བསྐང་། །སྣང་ཆ་བསྟན་སྲུང་དྲེགས་པའི་ཚུལ་ཤར་ཡང་། །ཆོས་ཉིད་མི་འགྱུར་ཐིག་ལེ་ཉག་གཅིག་ཀློང་། །དོན་དམ་འདུ་འབྲལ་མེད་པའི་དམ་ཚིག་གིས། །གཉིས་མེད་དགྱེས་པ་ཆེན་པོ་བསྐང་གྱུར་ཏེ། །རྟག་རུ་གཡེལ་བ་མེད་པའི་ཕྲིན་ལས་ཀྱིས། །མི་འབྲལ་ལུས་དང་གྲིབ་བཞིན་འགྲོགས་ནས་ཀྱང་། །རྣལ་འབྱོར་བདག་གིས་ཇི་ལྟར་གསོལ་བའི་དོན། །རེ་བའི་འབྲས་བུ་དུས་འདིར་མཆིས་པར་མཛོད། །ཅེས་བསྐང་། བཤགས་པ་བྱ་བ་ནི། ཧཱུྃ། རྒྱལ་བ་ཀུན་གྱི་མཐུ་སྟོབས་དྲག་པོའི་སྐུ། །གཏུམ་ཆེན་གནོད་སྦྱིན་ཆེན་པོར་རྣམ་རོལ་པ། །ཡབ་ཡུམ་བཀའ་སྡོད་འཁོར་དང་བཅས་ [58a] པ་རྣམས། །ཐུགས་རྗེ་བརྩེ་བས་བདག་ལ་དགོངས་སུ་གསོལ། །བདག་ནི་གསང་སྔགས་དཀྱིལ་འཁོར་སྒོར་ཞུགས་ནས། །འདའ་དཀའི་དམ་ཚིག་གཉན་པོ་གཉེར་བླངས་ཏེ། །ཚུལ་བཞིན་སྒྲུབ་པར་ཁས་བླངས་དམ་བཅས་ཀྱང་། །མི་ཤེས་རྨོངས་པས་འགལ་འཁྲུལ་ནོངས་གྱུར་ཏེ། །ཐུགས་དང་འགལ་བར་གྱུར་པ་ཅི་མཆིས་པ། །གནོང་འགྱོད་དྲག་པོས་མཐོལ་ཞིང་འཆགས་བགྱིད་ན། །འགྱུར་མེད་ཚངས་པ་མཆོག་གི་དངོས་གྲུབ་སྩོལ། །ཞེས་དང་ཡི་གེ་བརྒྱ་པ་མང་དུ་བཟླ། ཕྲིན་ལས་གསོལ་བ་ནི། ཧཱུྃ། དབང་དྲག་གནོད་སྦྱིན་ཆེན་པོ་འཁོར་བཅས་ལ། །ཕྲིན་ལས་གཉན་པོ་གསོལ་ཞིང་བསྐུལ་བ་ནི། །གསང་སྔགས་བསྟན་པ་དར་ཞིང་རྒྱས་པ་དང་། །དཀོན་མཆོག་གསུམ་གྱི་དབུ་འཕང་དགུང་དུ་བསྟོད། །ཁྱད་པར་རྣལ་འབྱོར་བདག་ཅག་དཔོན་སློབ་ལ། །ཉིན་གྱི་བྱ་ར་མཚན་གྱི་མེལ་ཚེ་དང་། །རྟག་ཏུ་ཁ་འཛིན་སྡོང་གྲོགས་མ་གཡེལ་བར། །ཉེས་པ་སྟོང་བསྣོལ་ལེགས་པ་བརྒྱ་དང་སྤྲོད། །བསྟན་པའི་སྤྱི་དགྲ་བླ་མའི་སྐུ་དགྲ་དང་། །རྣལ་འབྱོར་སྡང་དགྲ་ [58b] གསོད་ལ་མཐུ་མ་ཆུང་། །མདོར་ན་བདག་གི་རེ་འབྲས་གང་ཡིན་པ། །གེགས་མེད་མྱུར་དུ་འགྲུབ་པའི་ཕྲིན་ལས་མཛོད། །ཅེས་འདོད་པའི་ཕྲིན་ལས་ནན་ཏན་དུ་གསོལ་ལོ། །མཐར་གཏོར་མ་སྟོབ་པ་ནི། ཧཱུྃ། ཧེ་ཆེན་བརྡལ་བའི་དུར་ཁྲོད་ནས། །གནོད་སྦྱིན་ཆེན་པོ་མཐུ་རྩལ་ཅན། །སྔོན་གྱི་ཐུགས་དམ་ཇི་བཞིན་དུ། །ལྷ་སྲིན་དམག་ཚོགས་ཁྲོམ་དང་བཅས། །ཧ་ཧ་ཧཱུྃ་ཧཱུྃ་སྒྲ་སྒྲོགས་ཤིང་། །གནས་འདིར་གཤེགས་ལ་གྲོགས་སུ་དགོངས། །ཟག་མེད་འདོད་ཡོན་བདུད་རྩི་ཡི། །དམ་རྫས་མཆོག་གི་གཏོར་མ་འདི། །སྔར་བཅོལ་ལེགས་པའི་བརྡའ་རུ་འབུལ། །ཕྱི་བཅོལ་ལས་ཀྱི་གསོས་སུ་འབུལ། །དགྱེས་ཤིང་ཚིམ་པར་རོལ་ནས་ཀྱང་། །དེང་འདིར་བཅོལ་བའི་ཕྲིན་ལས་མཛོད། །གསང་སྔགས་བསྟན་པ་ཁྱོད་ཀྱིས་སྲུངས། །རིག་འཛིན་དབུ་འཕང་ཁྱོད་ཀྱིས་བསྟོད། །རྣལ་འབྱོར་སྡོང་གྲོགས་ཁྱོད་ཀྱིས་མཛོད། །མི་མཐུན་བར་ཆད་ཁྱོད་ཀྱིས་སོལ། །མཐུན་རྐྱེན་ལེགས་ཚོགས་ཁྱོད་ཀྱིས་སྤེལ། །འདོད་རྒུ་དབང་དུ་ཁྱོད་ཀྱིས་སྡུས། །གདུག་ཅན་དགྲ་བགེགས་ཁྱོད་ཀྱིས་ཐུལ། །གྲགས་པའི་རུ་མཚོན་ཁྱོད་ཀྱིས་ཕྱོར། །མདོར་ན་བདག་གི་བསམ་པའི་དོན། ། [59a] བཅོལ་བའི་ལས་རྣམས་མ་ལུས་པ། །ཐོགས་མེད་ཡུད་ཀྱིས་བསྒྲུབ་ནས་ཀྱང་། །ཕྱོགས་ལས་རྣམ་པར་རྒྱལ་བར་མཛོད། །ཅེས་ཕུལ་ལ་ཕྲིན་ལས་བཅོལ། སླར་ཡང་གཏང་རག་གི་མཆོད་བསྟོད་སོགས་རྗེས་ཀྱི་བྱ་བ་རྣམས་སྤྱི་དང་མཐུན་ནོ། །འདི་ནི་བདུད་འཇོམས་ཟབ་གཏེར་གྱི་བཀའ་སྲོལ་ཉིད་གཙོ་བོ་བྱས་ནས་བཀོད་མོད་ཀྱི། ལས་འབྲེལ་རྩལ་དང་། རཏྣ་གླིང་པའི་ཤན་དམར་ཡང་དོན་གྱིས་ཆུ་བོ་གཅིག་འདྲེས་སུ་འགྱུར་བ་ཡིན་ཅིང་། སྲོག་དབང་གི་ཆོ་ག་གཏེར་གཞུང་བཞིན་ཤེས་པར་བྱའོ།། ༎