DJYD-KABUM-13-PA-006

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 13, Text 6, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །ཟབ་གསང་རྫོགས་པ་ཆེན་པོའི་ཡང་ཟབ་མྱུར་ལམ་འཕོ་ཆེན་

གདམས་པའི་དོན་འགྲེལ་མན་ངག་རོལ་མཚོ་ ཞེས་བྱ་བ་བཞུགས་སོ། །

(1བ)ཟབ་གསང་རྫོགས་པ་ཆེན་པོའི་ཡང་ཟབ་མྱུར་ལམ་འཕོ་ཆེན་གདམས་པའི་དོན་འགྲེལ་མན་ངག་རོལ་མཚོ་ཞེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ངོ་བོ་གདོད་ནས་སྤྲོས་པ་ཀུན་བྲལ་འགྱུར་བ་མེད་པ་ཆོས་ཀྱི་སྐུ། །རང་བཞིན་མ་འགག་སྒྱུ་འཕྲུལ་དྲྭ་བའི་འཁོར་ལོར་ལྷུན་གྲུབ་ལོངས་སྤྱོད་རྫོགས། །ཐུགས་རྗེའི་རོལ་རྩལ་རྒྱུན་མི་འཆད་པའི་ཕྲིན་ལས་ཡོངས་ཤར་སྤྲུལ་པའི་སྐུ། །སྐུ་གསུམ་དབྱེར་མེད་རང་རིག་བླ་མ་མཚོ་སྐྱེས་རྡོ་རྗེ་སྙིང་དབུས་རོལ། །དགོངས་པ་ཆོས་ཉིད་ནམ་མཁའི་མཛོད་ཁང་ནས། །ངེས་གསང་གདམས་ཟབ་ནོར་བུའི་གཏེར་ཕྱུངས་ཏེ། །སྐལ་ལྡན་གདུལ་བྱའི་དཔལ་(2ན)དུ་སྣང་མཛད་པ། །རིག་འཛིན་བདུད་འཇོམས་གླིང་པས་བདག་བློ་སྐྱོངས། །དམ་པའི་མན་ངག་ཟབ་དོན་བདུད་རྩིའི་བཅུད། །མཁྱེན་རབ་ཐུགས་ཀྱི་བུམ་པར་ལེགས་གཏམས་ནས། །སྐལ་བ་ཇི་བཞིན་གཞན་ལ་འགྱེད་མཁས་པ། །མཚུངས་མེད་བླ་མ་རྣམས་ལ་ཕྱག་འཚལ་ལོ། །ཐེག་པའི་ཡང་རྩེ་རྫོགས་པ་ཆེན་པོའི་ཆོས། །ཐུན་མིན་སྙིང་ཐིག་མཐར་ཐུག་ངེས་པའི་དོན། །རྡོ་རྗེ་སྙིང་པོའི་གསེང་ལམ་མན་ངག་ཆེའི། །དོན་འགྲེལ་ཟབ་དོན་སྙིང་པོ་འདི་ན་དབྱེ། །དེ་ལ་འདིར་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོའི་དགོངས་པ་ཐེག་བརྒྱད་བློའི་གྲུབ་མཐས་མ་རེག་པས་ཀུན་གྱི་རྩེ་མོར་ཕྱིན་པ་ཡེ་ཤེས་རང་སྣང་བའི་ངོ་བོར་(2བ)སངས་རྒྱས་པའི་རང་བཞིན་དུ་སྟོན་པའི་ཐོད་རྒལ་གྱི་གྲུབ་མཐའ་ཚིག་དང་ཡིད་དཔྱོད་ལ་མི་ལྟོས་པར་མངོན་སུམ་རང་ཐོག་ཏུ་ངོ་སྤྲོད་པའི་གདམས་པ་ཟབ་མོ་འདི་ཉིད་གསལ་བར་བྱེད་པ་ལ་དོན་གསུམ་སྟེ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་ནོ། ། དང་པོ་ཐོག་མར་དགེ་བ་ཀླད་ཀྱི་དོན་ལའང་གསུམ། མཚན་སྨོས་པ། མཆོད་པར་བརྗོད་པ། བརྩམས་པར་དམ་བཅའ་བའོ། །དང་པོ་མཚན་སྨོས་པ་ལའང་གང་ལས་བྱུང་བའི་གཞི། དེ་ལས་བྱུང་བའི་ཆོས་ཀྱི་མཚན་དང་གཉིས་ལས། དང་པོ་གང་ལས་བྱུང་བའི་གཞི་ནི། མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ལས། ཞེས་པའི་སྤྱིར་ན་སྒྲ་ཡི་ཚུལ་ལ་སྒྲ་གཅིག་དོན་མང་པོར་འཇུག་པ་སོགས་མཐའ་ཡས་པ་འདི་ཞེས་མཚོན་དུ་མི་བཏུབས་ཀྱང་དྲང་ཐད་དུ་བསྒྱུར་ན། མ་ཧཱ་ནི་ཆེན་པོ། ཨ་ཏི་ནི་ཤིན་ཏུ། ཡོ་ག་ནི་ཐེག་པའི་ཚུལ་དུ་འཇུག་སྟེ། གོང་འོག་མཚམས་སྦྱར་ན། ཡོ་ག་ལ་སོགས་པ་ཐེག་པ་འོག་མ་མཚན་བཅས་ཀྱི་ཆ་ཐམས་ཅད་ལས་རྣམ་པར་གྲོལ་བ་མཚན་མེད་ཤིན་ཏུ་རྣལ་འབྱོར་ཐེག་བརྒྱད་བློའི་གྲུབ་མཐའ་ལས་འདས་པས་ཀུན་གྱི་རྩེ་མོའམ་ཆེན་པོར་གྱུར་པ་སངས་རྒྱས་པའི་ལམ་ཐམས་ཅད་འདིར་རྫོགས་ཤིང་འདིར་བགྲོད་བྱེད་ཀྱི་ཆ་རྐྱེན་དུ་གྱུར་(3ན)པས་ཟབ་ཅིང་རྒྱ་ཆེ་བའི་ཆོས་ཕུན་སུམ་ཚོགས་པ་འདི་ཉིད་བསླབ་པ་དང་སྦྱངས་པའི་རིམ་པ་ལ་མ་ལྟོས་པར་ཆོས་ཉིད་དེ་བཞིན་ཉིད་ཀྱི་གནས་ལུགས་མངོན་དུ་གྱུར་ཏེ་ཐུགས་རྒྱུད་དགོངས་པའི་དབྱིངས་ནས་རང་རྡོལ་དུ་བྱུང་བའོ། ། གཉིས་པ་དེ་ལས་བྱུང་བའི་ཆོས་ཀྱི་མཚན་ནི། ཟབ་གསང་རྫོགས་པ་ཆེན་པོའི་ཡང་ཟབ་བཅུད་ཀྱི་དྭངས་མ་མྱུར་ལམ་འཕོ་བ་ཆེན་པོའི་གདམས་པ་མ་བསྒོམ་སངས་རྒྱས་བཞུགས་སོ༔ ཞེས་པ་སྟེ། དེ་ཡང་ཤིན་ཏུ་གཏིང་ཟབ་ཅིང་རྒྱ་ཆེ་ལ་གསང་བ་ཟབ་མོ་གཉིས་དང་ལྡན་པའི་ཆོས་ནི་རྫོགས་པ་ཆེན་པོ་སྟེ། དེ་ལ་ཡང་སེམས་ཀློང་མན་ངག་གི་སྡེ་གསུམ་དུ་ཡོད་པ་ལས་འདིར་ཕྱི་མ་ཕྱི་མའི་ཡང་ཟབ་བཅུད་ཀྱི་དྭངས་མ་ལམ་གཞན་ལས་ཁྱད་པར་འཕགས་པ་ཚེ་གཅིག་གིས་ནང་དབྱིངས་གཞོན་ནུ་བུམ་སྐུར་གྲོལ་བའི་མྱུར་ལམ། མ་དག་སྙིགས་མའི་སྣང་བ་དྭངས་མ་འོད་གསལ་ཆེན་པོར་བཙན་ཐབས་སུ་འཕོ་བ་ལས་གཞན་པའི་བསྒོམ་རྒྱུ་རྡུལ་ཙམ་ཡང་མེད་པར་ཡེ་ཤེས་རང་སྣང་བའི་ངོ་བོར་སངས་རྒྱས་པའི་གདམས་པ་ཁྱད་པར་ཅན་དེ་ལྟ་བུ་ཞིག་འདི་ན་ཡོད་ཅེས་པའོ། ། གཉིས་པ་མཆོད་པར་བརྗོད་པ་ནི། རྡོ་རྗེ་ཕུང་པོའི་གྲོང་ཁྱེར་གྱི༔ སྒྱུ་འཕྲུལ་རོལ་པར་རང་ཤར་བའི༔ ཞི་ཁྲོ་རྡོ་(3བ)རྗེ་དབྱིངས་ཀྱི་ལྷར༔ མི་ཕྱེད་དད་པས་གུས་ཕྱག་འཚལ༔ ཞེས་པ་སྟེ། རྒྱུད་གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཅེས་དང་། གཞན་ཡང་། བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །ཞེས་པ་ལྟར་རང་ལུས་རྡོ་རྗེ་ཕུང་པོའི་གྲོང་ཁྱེར་ཉིད། ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ། ཡན་ལག་སྒོ་སྐྱོང་ཕོ་མོ་སོགས་རྒྱལ་བ་ཞི་ཁྲོའི་དཀྱིལ་འཁོར་གྱི་རང་བཞིན་ཏེ། དེ་ཡང་འཕྲལ་དང་སླད་ཀྱིས་བྱུང་བ་མ་ཡིན་པར་ཡེ་ཤེས་སྒྱུ་འཕྲུལ་གྱི་རོལ་པ་ཡེ་ནས་རང་བྱུང་རང་ཤར་དུ་གནས་པའི་ཚུལ། ཨོ་རྒྱན་ཆེན་པོས། ཡེ་ནས་རྒྱལ་བའི་དཀྱིལ་འཁོར་སྟེ། །རྩ་ཁམས་ལུས་ཀྱི་གཞལ་ཡས་སུ། །རྒྱལ་བ་ཞི་ཁྲོའི་དཀྱིལ་འཁོར་ལྷ། །མ་བཙལ་ལྷུན་གྱིས་གྲུབ་པའོ། །ཞེས་གསུངས། དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཡེ་སངས་རྒྱས་པའི་བདག་ཉིད་ཅན་དང་། སོ་སོ་རང་རིག་པའི་ཡེ་ཤེས་གཉིས་དབྱེར་མེད་རོ་གཅིག་ཏུ་ཤེས་པ་ནི་བླ་ན་མེད་པའི་ཕྱག་འཚལ་བ་སྟེ། རིམ་ལྔ་ལས། ཇི་ལྟར་ཆུ་ལ་ཆུ་བཞག་དང་། །མར་ཉིད་ལ་ནི་མར་(4ན)བཞག་ལྟར། །རང་གི་ངང་གི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །ཞེས་གསུངས་པ་ལྟར་རོ། ། གསུམ་པ་བརྩམ་པར་དམ་བཅའ་བ་ནི། ཨྸགྒནྼསྨརྒྱནྡ་རྒྱ་རྒྱརྒྱ༔ བདག་འདྲ་རིག་འཛིན་རྡོ་རྗེ་གཤོག་རྒོད་ངས༔ ཚེ་སྔོན་ཚོགས་སྨོན་ལས་འཕྲོ་དུས་འཛོམས་པའི༔ སྐལ་བཟང་སྐྱེས་བུ་ཁོ་ནའི་སྐལ་བ་རུ༔ མྱུར་ལམ་འཕོ་ཆེན་གདམས་པ་འདི་བསྟན་བྱ༔ ཞེས་པ་སྟེ། རང་སྣང་གི་སྟོན་པ་བདག་འདྲ་ཀུན་བཟང་མཚོ་སྐྱེས་རྡོ་རྗེའམ་རིག་འཛིན་རྡོ་རྗེ་གཤོག་རྒོད་རྩལ་གྱིས། ཚེ་རབས་ཐོག་མ་མེད་པའི་སྔོན་རོལ་ནས་ཚོགས་རྒྱ་ཆེན་པོས་བསགས་ཤིང་སྨོན་ལམ་རྒྱ་ཆེན་པོ་བཏབ་སྟེ་ཟབ་གསང་རྫོགས་པ་ཆེན་པོའི་ཆོས་ལ་ལས་འབྲེལ་བཞག་སྟེ་སྔོན་སྦྱངས་ཀྱི་ལས་འཕྲོ་སད་པའི་སྐྱེས་བུ་སྐལ་བ་བཟང་པོ་ཁོ་ནའི་སྤྱོད་ཡུལ་དུ། གྲངས་མེད་གསུམ་སོགས་ཡུན་རིང་ལ་མ་ལྟོས་པར་ཚེ་ལུས་གཅིག་གིས་མངོན་འཚང་རྒྱ་བའི་མྱུར་ལམ་འཕོ་བ་ཆེན་པོའི་གདམས་པ་འདི་ཉིད་བསྟན་པར་བྱའོ། །དེ་ལ་བསྟན་བྱའི་ཡུལ་གྱི་མཚན་ཉིད་ནི། དད་པ་དང་སྙིང་རྗེ་ཆེ་བ། བློ་བརྟན་ཅིང་སྒྲུབ་པ་ལ་བརྩོན་པ། ཤེས་རབ་དང་དག་སྣང་ཆེ་བ། ཉོན་མོངས་དང་ལོག་རྟོག་ཆུང་བ། ཁོག་ཡངས་ཤིང་གཞུང་བཟང་བ། གསང་(4བ)ཐུབ་ཅིང་ངང་ཚུལ་བཟང་བ། ཟོལ་ཟོག་མེད་ཅིང་སྙིང་རུས་ཆེ་བ། བླ་མ་ལ་གུས་པས་བཀའ་བཞིན་དུ་བསྒྲུབ་པ། འཇིག་རྟེན་ལ་ཞེན་པ་ལོག་ཅིང་དམ་ཚིག་དང་སྡོམ་པ་ལ་གནས་པ་སྟེ། རིག་པ་རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །ཕུ་དུད་ཆེ་ཞིང་གསང་སྔགས་སྤྱོད། །རྟོག་མེད་སེམས་ལ་གཡེང་བ་མེད། །དམ་ཚིག་ལྡན་ཅིང་སྒྲུབ་ལ་བརྩོན། །ཞེས་གསུངས་པ་ལྟར་སྣོད་དང་ལྡན་པའི་སློབ་མ་དེ་ལྟ་བུ་རྣམས་ལ་ནི་གདམས་པ་ཟབ་མོ་སྦྱིན་པར་བྱ་ཞིང་། དེ་ལས་ལོག་པ་སྣོད་ངན་གྱི་མཚན་ཉིད་ནི། དྲིན་མི་བཟོ་ཞིང་ཤེས་རིག་ཆུང་བ། གསར་ངེས་དང་ཁ་གསག་ཆེ་བ། མདུན་དུ་བསྟོད་ཅིང་ལྐོག་ཏུ་གཤེ་བ། ཁ་མཁས་ཤིང་ལག་དམ་པ། བཟང་ཆུང་ཞིང་གཡོ་སྒྱུ་ཆེ་བ། བླ་མའི་བཀའ་གཅོག་ཅིང་བསྒོ་བ་ལ་མི་ཉན་པ། ཡོན་ཏན་མི་མཐོང་ཞིང་སྐྱོན་ལ་རྟོག་པ། དབྱེན་གཅུག་དང་ཕྲ་མ་ལ་དགའ་བ། རང་བསྟོད་དང་བྱས་ཡུས་རྩོད་པ། རིགས་རྒྱུད་དང་སྤྱོད་པ་ངན་པ། སྡོམ་པ་དང་དམ་ཚིག་འཆལ་བ། མཐོང་ན་སྐྱུག་ལོག་ཅིང་འགྲོགས་ན་ཞེ་སུན་པ་སྟེ། ཀློང་གསལ་ལས། སྣོད་དང་མི་ལྡན་སློབ་མ་ནི། །ཤེས་ཆུང་ཁ་གསག་གདོང་ལྟས་ཆེ། །མ་མཁས་ལག་དམ་གཡོ་སྒྱུ་ཆེ། །བླ་མའི་(5ན)གསུངས་གཅོག་དྲིན་ལ་རྩོད། །ཡོན་ཏན་མི་མཐོང་སྐྱོན་ལ་རྟོག །རིགས་བརྒྱུད་ངང་རྒྱུད་ངན་པ་དང་། །བཀའ་དྲིན་ཁྱད་གསོད་རང་ལ་བསྟོད། །སྡོམ་དང་དམ་ཚིག་ཉམས་ལེན་འཆལ། །སློབ་མ་མ་བརྟག་སློབ་དཔོན་དགྲ། །ཉམས་སུ་མི་ལེན་གང་ཟག་ལ། །རྫོགས་པ་ཆེན་པོའི་དབང་པོ་ནི། །དོན་དམ་གདམས་པ་བསྟན་མི་བྱ། །ཞེས་སོགས་གསུངས་པ་ལྟར་ངེས་པར་སྤང་ཞིང་གདམས་པའི་མི་བསྟན་པ་ཉིད་དེ། གལ་ཏེ་བསྟན་ན་གདམས་པ་འཆལ་ནས་བྱིན་རླབས་ཆུང་དུ་འགྲོ་ཞིང་མཁའ་འགྲོའི་བཀའ་ཆད་འབྱུང་སྟེ་མཐར་ཐུག་དམྱལ་བར་འགྲོ་བའི་ཚུལ། ཀློང་གསལ་ལས། ཡང་གསང་བཅུད་ཀྱི་བདུད་རྩི་ནི། །སྣོད་ངན་རྣམས་སུ་བླུགས་གྱུར་ན། །སྣོད་འཆག་བཅུད་འབོ་དམྱལ་བར་འགྲོ། །ཞེས་སོ། །དེས་ན་སྣོད་མིན་ལོག་ལྟ་ཅན་རྣམས་ལ་ནི་གདམས་པ་དངོས་སུ་སྤེལ་བ་ལྟ་ཅི། ཐ་ན་རླུང་ཕྱོགས་ཙམ་ཡང་བསྒྲག་ཏུ་མི་རུང་བ་སོགས་ཤུགས་ཀྱིས་བསྟན་པ་ཡིན་ནོ། ། གཉིས་པ་བར་དུ་དགེ་བ་བགཞུང་གི་དོན་ལ་གཉིས། སྔོན་དུ་འགྲོ་བའི་ཆོས་དང་། དངོས་གཞིའི་རིམ་པའོ། །དང་པོ་སྔོན་དུ་འགྲོ་བའི་ཆོས་ལའང་གཉིས། སྤྱིའི་སྔོན་འགྲོ་དང་། བྱེ་བྲག་གི་སྔོན་འགྲོའོ། ། དང་པོ་སྤྱིའི་སྔོན་འགྲོ་ནི། སྒོ་འདི་ཉམས་སུ་(5བ)ལེན་པའི་སྐྱེས་བུ་ཡིས༔ འཁོར་འདས་སྟོང་ཉིད་ཆེན་པོར་འུབ་ཆུབ་པའི༔ རོལ་པ་ཆེན་པོར་མངའ་དབང་བསྒྱུར་བ་དང་༔ ཇི་ལྟ་ཇི་སྙེད་ཤེས་རབ་ཆེན་པོ་ཡིས༔ གནས་ལུགས་ཡིན་ལུགས་མངོན་བྱེད་བརྟན་ཐོབ་མཐར༔ ཞེས་པ་སྟེ། དེ་ལ་སྒོ་འདི་ཉམས་སུ་ལེན་པའི་སྐྱེས་བུ་རྣམས་ཀྱིས་འདི་ལྟར་གཏན་ལ་ཕབ་དགོས་ཏེ། དང་པོ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་མིང་མེད་པ་ལ་མིང་དུ་བཏགས། དངོས་པོ་མེད་པ་ལ་དངོས་པོར་བཟུང་། ཕན་གནོད་མེད་པ་ལ་ཕན་གནོད་དུ་སྣང་ཞིང་། རེ་དོགས་ཀྱི་བློ་རྒྱུན་ཆད་མེད་པར་སྐྱེས་ཏེ་གཟུང་བའི་ཡུལ་དུ་འཁྲུལ་པའི་ཚུལ་ནི། དཔེར་ན་རྨི་ལམ་དུ་བདེ་སྡུག་དང་འཇིགས་སྐྲག་ལ་སོགས་ཇི་ཙམ་རྨིས་ཀྱང་ཉིང་འཁྲུལ་གྱི་སྣང་བ་ལས་གཅིག་ཀྱང་མི་བདེན། མི་བདེན་བཞིན་དུ་རྨི་ལམ་ཉིད་རྨི་ལམ་དུ་ངོ་མ་ཤེས་པས་བདེ་སྡུག་ལ་སོགས་པ་མྱོང་བ་ལྟར། ད་ལྟའི་སྣང་བ་འདི་དག་ཀྱང་མི་བདེན་བཞིན་དུ་རང་སེམས་འཁྲུལ་པའི་སྣང་ངོར་ཤར་བ་ལས་གཞན་དུ་བདེན་པར་གྲུབ་པ་རྡུལ་ཙམ་ཡང་མེད། ནང་འཛིན་བྱེད་ཀྱི་སེམས་དེ་ཡང་བདེན་པར་གྲུབ་བམ་སྙམ་ནམ་ཡིན་ཏེ། དང་པོ་བྱུང་བའི་ཁུང་། བར་དུ་གནས་པའི་ས། ཐ་མ་འགྲོ་བའི་ཡུལ་ལས་འདས་པའོ། །སེམས་ཞེས་བྱ་བ་དོན་ལ་རྣམ་རྟོག་ཝལ་གྱིས་(6ན)ཤར་ནས་སང་གིས་ཡལ་སྙམ་བྱེད་པ་འདི་མ་གཏོགས་ཅི་ཡང་མེད་དེ། དཔེར་ན་ནམ་མཁའི་སྟོང་པའི་ངང་ལས་སྤྲིན་ཐོལ་གྱིས་ཤར། འདི་སོང་མེད་པ་སྟོང་པའི་ངང་དུ་ཡལ་བ་ལྟར་གནས་ལུགས་སྟོང་པའི་ངང་ལས་རྣམ་རྟོག་གི་འགྱུ་བ་ཤར། འགྱུ་བ་དེ་ཉིད་སྟོང་པའི་ངང་དུ་རང་ཡལ་དུ་སོང་བ་ལ་སྐྱེ་འགག་གྲངས་སུ་བཏབ་པས་ཐམས་ཅད་འཁྲུལ། སྟོང་པ་ཅི་ཡང་མེད་པ་ལ་ཐོལ་སྐྱེས་ཀྱི་ཤེས་པ་སྐད་ཅིག་མས་ངའམ་བདག་ཏུ་འཛིན་པ་ལས་གང་ཟག་གི་བདག་བྱུང་བའོ། །དེས་ན་དེ་དག་ཐམས་ཅད་སོ་སོར་རྟོག་པའི་ཤེས་རབ་ཀྱིས་གཏན་ལ་ཕབ་ནས་སྟོང་ཉིད་ཆེན་པོ་གཅིག་གི་རོལ་པར་འུབ་ཏུ་འདུས་ཤིང་ཡོངས་སུ་ཆུབ་པ། དཔེར་ན་སྣོད་བཅུད་ནམ་མཁའ་གཅིག་གི་རོལ་པ་བཞིན་དུ་སྟོང་ཉིད་ཆེན་པོ་གཅིག་གི་རོལ་པར་མངའ་དབང་བསྒྱུར་བ་ནི་ཇི་ལྟར་བ་མཁྱེན་པའི་ཤེས་རབ་དང་། དེའི་གནས་ལུགས་དང་ཡིན་ལུགས་མངོན་དུ་གྱུར་བ་ནི་ཇི་སྙེད་པ་གཟིགས་པའི་ཤེས་རབ་སྟེ། ཤེས་རབ་དེ་གཉིས་རྒྱུད་ལ་བརྟན་པ་ནི་ཤིན་ཏུ་གལ་ཆེའོ། ། གཉིས་པ་བྱེ་བྲག་གི་སྔོན་འགྲོ་ལ་གཉིས། སྦྱོར་བ་གནས་ཀྱི་གནད་དང་། རུ་ཤན་དངོས་ལ་འཇུག་པའོ། ། དང་པོ་སྦྱོར་བ་གནས་ཀྱི་གནད་ནི། སྒོ་གསུམ་མངོན་ཞེན་ལྡོག་ཕྱིར་དབེན་པའི་ས༔ མི་ཡི་རྒྱུ་འགྲུལ་མཐོང་ཚོར་(6བ)མེད་པ་རུ༔ ཕྱིན་ཏེ་སྡེ་བརྒྱད་ཟོ་དོར་དྲེགས་པ་ཅན༔ བདེན་པའི་སྟོབས་དང་སྔགས་དང་ཕྱག་རྒྱས་བ་ཀུག༔ སྐྱེམས་དང་གཏོར་མ་འདོད་རྒུར་བསྒྱུར་ཏེ་ཕུལ༔ འགལ་རྐྱེན་བཟློག་ཅིང་མཐུན་རྐྱེན་བསྒྲུབ་པ་དང་༔ ས་ལམ་བར་ཆད་སེལ་བའི་གྲོགས་སུ་བསྐུལ༔ གླུད་དང་ལན་ཆགས་འབྲས་ཆན་བཏང་ནས་སུ༔ བགེགས་དང་ལོག་འདྲེན་བར་ཆད་བསྐྲད་བྱས་ཏེ༔ བསྲུང་བའི་འཁོར་ལོ་རིམ་པ་ལྔ་རུ་བསྐྱེད༔ ཞེས་པ་སྟེ། ལས་དང་བག་ཆགས་ཀྱིས་བསྐྱེད་པའི་སྒོ་གསུམ་གྱི་བྱ་བར་མངོན་ཞེན་ལྡོག་པ་དང་། གསང་སྔགས་ཀྱི་སྤྱོད་པ་ཟབ་མོ་གསང་ཐབས་སུ་སྦྱང་ཕྱིར་མི་སོགས་གཞན་གྱི་རྒྱུ་འགྲུལ་དང་མཐོང་ཚོར་མེད་པའི་གནས་དབེན་པར་ཕྱིན་ཏེ། ཡུལ་དེའི་སྡེ་བརྒྱད་ཟོ་དོར་དྲེགས་པ་ཅན་རྣམས་སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པའི་སྟོབས་ཀྱིས་བཀུག་ནས། སྐྱེམས་དང་གཏོར་མ་སྦྱངས་སྤེལ་བསྒྱུར་གསུམ་གྱི་སྒོ་ནས་འདོད་རྒུར་སྤྲུལ་ཏེ། དེ་དག་གི་དབང་པོ་དྲུག་ཆུ་སྣོད་ལྟ་བུ་དབྱིངས་སུ་མ་ཞིག་གི་བར་དུ་འདོད་ཡོན་གྱི་ལོངས་སྤྱོད་གཟའ་སྐར་མཆེད་པ་ལྟར་རྒྱུན་མི་འཆད་པའི་རང་བཞིན་དུ་དམིགས་ནས་ཕུལ་བས། གྱ་ཚོམ་གྱི་སྤྱོད་པ་ལ་ཀོ་ལོང་དང་ཕྲག་དོག་མི་བྱེད་པར་འགལ་རྐྱེན་ཐམས་ཅད་བཟློག་ཅིང་མཐུན་རྐྱེན་བསྒྲུབ་པ་དང་ས་ལམ་གྱི་བར་ཆད་སེལ་བའི་གྲོགས་སུ་བསྐུལ་ཏེ་(7ན)ཕྲིན་ལས་བཅོལ། གང་དག་དཀར་པོ་དགེ་བའི་ལས་བསྒྲུབ་པ་ལ་བར་དུ་གཅོད་པའི་གདོན་བགེགས་ཀྱི་རིགས་ལ་གླུད་དང་ཆང་བུ་འབྲས་ཆན་སོགས་ཀྱི་ཚིམས་པར་བྱས་ནས་སོ་སོ་རང་རང་གི་གནས་སུ་སོང་ཞིག་ཅེས་བཀའ་བསྒོ། གལ་ཏེ་བཀའ་དང་དམ་ལ་མི་གནས་པ་རྣམས་རང་ཉིད་ཡི་དམ་ལྷར་གསལ་བའི་ཐུགས་ཀ་ནས་ཁྲོ་ཆུང་ཐུན་མཚོན་མེ་དཔུང་གི་ཚོགས་སྤྲོས་ཏེ་མཐའི་ལྕགས་རི་ནག་པོའི་རྒྱབ་ཏུ་བསྐྲད། ཚུར་འདུས་ཡེ་ཤེས་ལྔའི་རང་གདངས་ལས་གྲུབ་པའི་སྲུང་བའི་འཁོར་ལོ་རིམ་པ་ལྔའི་ནང་དུ་ཚུད་དེ་གནས་པར་བསམ་མོ། །ལེའུའི་སྐབས་བསྡུ་བ་ནི། དེ་དག་སྔོན་འགྲོའི་རིམ་པའི་ལེའུ་སྟེ་དང་པའོ༔ ས་མ་ཡ༔ གུ་ཧྱ༔ གཉིས་པ་རུ་ཤན་དངོས་ལ་འཇུག་པ་ལ་གསུམ། ཕྱི་ལུས་ཀྱི་རུ་ཤན། ནང་ངག་གི་རུ་ཤན། གསང་བ་ཡིད་ཀྱི་རུ་ཤན་དབྱེ་བའོ། །དང་པོ་ཕྱི་ལུས་ཀྱི་རུ་ཤན་དབྱེ་བ་ལའང་གཉིས། སྤྱིར་རིགས་དྲུག་གི་གནས་སྦྱངས་བྱ་བ་དང་། བྱེ་བྲག་རང་ལུས་རྡོ་རྗེར་སྦྱངས་པའོ། དང་པོ་རིགས་དྲུག་གི་གནས་སྦྱངས་བྱ་བ་ལའང་གཉིས། ཕྱི་འགྲོ་དྲུག་གི་སྐྱེ་གནས་སྦྱང་བ་དང་། ནང་རིགས་དྲུག་གི་ས་བོན་སྦྱངས་པའོ། །དང་པོ་ཕྱི་འགྲོ་དྲུག་གི་སྐྱེ་གནས་སྦྱངས་པ་ལའང་། འགྲོ་དྲུག་གི་སྤྱོད་པ་བྱ་བ། དཀོན་མཆོག་གསུམ་གྱི་(7བ)སྤྱོད་པ་བྱ་བ། ཐ་མ་འབྱོངས་པའི་ཚད་བསྟན་པ་དང་གསུམ་ལས། དང་པོ་འགྲོ་དྲུག་གི་སྤྱོད་པ་བྱ་བ་ནི། དེ་ནས་འཁོར་འདས་རུ་ཤན་འབྱེད་པ་ལ༔ ཕྱི་དང་ནང་དང་གསང་བ་རྣམ་གསུམ་ལས༔ དང་པོ་ཕྱི་ལྟར་རུ་ཤན་དབྱེ་བ་ལ༔ བླ་མ་སྤྱི་བོར་བསྒོམ་ཞིང་དབང་བཞི་བླང་༔ འགྲོ་བའི་དོན་དུ་བྱང་ཆུབ་སེམས་མཆོག་བསྐྱེད༔ ཚེ་རབས་དུ་མའི་ལས་ངན་བག་ཆགས་ཀྱི༔ རྒྱུ་དང་འབྲས་བུ་སྡུག་བསྔལ་མྱོང་འགྱུར་ཀུན༔ སྦྱངས་ཏེ་རྣམ་མཁྱེན་ས་རུ་བགྲོད་སྙམ་ཞིང༔ དམྱལ་བ་ཡི་དྭགས་དུད་འགྲོ་རྣམ་གསུམ་དང་༔ ལྷ་མིན་ལྷ་དང་མི་དང་རྣམ་པ་གསུམ༔ མས་རིམ་བཞིན་དུ་ཡུལ་དང་སྡུག་བསྔལ་རྣམས༔ ཡིད་ལ་བྱས་ཏེ་སྡུག་བསྔལ་བློ་ཐོག་ཏུ༔ བླང་ཞིང་ལུས་དང་ངག་གི་རྣམ་འགྱུར་གྱིས༔ བྱ་སྤྱོད་རྣམ་པ་སྣ་ཚོགས་རིམ་བཞིན་སྤྱད༔ སླར་ཡང་ཡས་རིམ་དེ་ལྟར་ཡང་ཡང་བསྐྱར༔ དཀའ་ཚེགས་སྐྱོ་ངལ་གཅེས་འཛིན་ཁྱད་བསད་དེ༔ ལུས་ཀྱི་མཆོང་རྒྱུག་འགྲེ་ལྡོག་བྱ་བ་དང་༔ ངག་གི་ཀྭི་བསྭོ་ཅ་ཅོ་སྣ་ཚོགས་དང་༔ ཡིད་ཀྱི་དུག་ལྔ་དུག་གསུམ་རྣམ་རྟོག་ཚོགས༔ བཙན་ཐབས་ཉིད་དུ་སློང་བར་བྱ་བ་སོགས༔ མདོར་ན་ཡིད་ལ་གང་དྲན་སྤྱོད་པ་སྤྱོད༔ ཅེས་པ་སྟེ། དེ་ཡང་ཐལ་འགྱུར་ལས། འཁོར་འདས་རུ་ཤན་(8ན)མ་ཕྱེ་ན། །ཁམས་གསུམ་ལུས་ངག་ཡིད་ཀྱིས་ཀྱང་། །འབྲེལ་བ་ཆོད་པར་མི་འགྱུར་པས། །འཁོར་འདས་རུ་ཤན་དབྱེ་བར་བྱ། །ཞེས་པས། དང་པོ་ལུས་འདི་མ་རིག་པ་ལས་བསྐྱེད་པས་རྒྱུན་དུ་འཁོར་བར་འཁྱམས་ཏེ། ད་ཕན་ཆད་འཁོར་བར་མི་འཁྱམས་པར་བྱ་བའི་ཕྱིར་ལུས་དང་འཁོར་བ་རུ་ཤན་དབྱེ་བ་ནི། འདས་རྗེས་ལས། ལུས་ཀྱི་སྔོན་འགྲོ་བྱ་བའི་ཕྱིར། །རིགས་དྲུག་སྤྱོད་པ་སྣ་ཚོགས་སྤྱད། །ཅེས་པས་ཐོག་མར་རང་རྒྱུད་ལ་བྱིན་རླབས་འཇུག་ཕྱིར་བླ་མའི་རྣལ་འབྱོར་བསྒོམ་ཏེ་གསོལ་བ་ཕུར་ཚུགས་སུ་བཏབ་ཅིང་དབང་བཞི་བླངས་ཏེ། ད་ནི་སེམས་ཅན་ཐམས་ཅད་ཀྱི་དོན་དུ་ཚེ་རབས་ཐོག་མ་མེད་པའི་དུས་ནས་བསགས་པའི་ལས་དང་བག་ཆགས་རྒྱུ་ཉོན་མོངས་དུག་ལྔ་དུག་གསུམ་གྱིས་བསྐྱེད་པའི་འབྲས་བུ་ངན་སོང་གསུམ་སོགས་སྡུག་བསྔལ་མྱོང་འགྱུར་ཐམས་ཅད་ད་ལྟ་ཉིད་དུ་སྦྱངས་ཏེ་རྣམ་མཁྱེན་རྫོགས་པའི་སངས་རྒྱས་ཀྱི་ས་རུ་བགོད་པར་བྱའོ་སྙམ་དུ་སེམས་བསྐྱེད་ནས། དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་བཀོལ་སྤྱོད། མི་སྐྱེ་རྒ་ན་འཆི། ལྷ་མིན་འཐབ་རྩོད། ལྷ་འཕོ་ལྟུང་གི་སྡུག་བསྔལ་རྣམས་རང་གི་རྒྱུད་ཐོག་ཏུ་བསམ་ལ། དེ་དག་གི་བདེ་སྡུག་གི་སྤྱོད་པ་དང་རྣམ་འགྱུར་སོགས་དཀའ་ཚེགས་སྐྱོ་ངལ་(8བ)མེད་པར་བྱ། དེ་བཞིན་དུ་ངག་གིས་ཀྱང་ཐལ་འགྱུར་ལས། མདོར་ན་འགྲོ་བ་དྲུག་གི་སྐད། །སེམས་ཀྱི་དྲན་བསམ་ངག་གིས་བརྗོད། །ཅེས་པ་ལྟར་ཅ་ཅོའི་སྒྲ་སྐད་སྣ་ཚོགས་བླང་དོར་མེད་པར་སྒྲོགས་ཤིང་། ཡིད་ཀྱིས་ཀྱང་། འདས་རྗེས་ལས། ཡིད་ཀྱི་སྔོན་འགྲོ་བྱ་བའི་ཕྱིར། །རིགས་དྲུག་སྡུག་བསྔལ་བློ་ལ་བླངས། །ཞེས་དང་། སངས་རྒྱས་སྲས་གཅིག་ལས། དགའ་དང་མི་དགའ་བདེ་སྡུག་བསྔལ། །འདོད་ཆགས་ཞེ་སྡང་གཏི་མུག་དང་། །དགེ་དང་མི་དགའ་ལ་སོགས་པའི། །བསམ་སྦྱོར་རྣམ་པ་སྣ་ཚོགས་བྱ། །ཞེས་པས་དུག་གསུམ་གྱི་རྣམ་རྟོག་སྣ་ཚོགས་བཙན་ཐབས་སུ་སློང་བར་བྱས་པས་སྒོ་གསུམ་ངལ་དུབ་ཀྱི་རྣམ་པ་ཤར་ཚེ་དེའི་ངོ་བོ་ལ་བལྟ་ཞིང་ངལ་གསོ། ཡང་དེ་ལྟར་ཡས་མས་རིམ་བཞིན་དུ་བསྐྱར་རོ། ། གཉིས་པ་དཀོན་མཆོག་གསུམ་གྱི་སྤྱོད་པ་བྱ་བ་ནི། མཐར་ཡང་རང་ཉིད་ཤཱཀྱ་ཐུབ་པར་བསྒོམ༔ ས་གནོན་མཉམ་གཞག་སྐྱིལ་ཀྲུང་གིས་འདུག་སྟེ༔ རིགས་དྲུག་སེམས་ཅན་གཅིག་ཀྱང་མ་ལུས་པ༔ བྱང་སེམས་ཉན་རང་འཁོར་གྱི་རིམ་པར་གྱུར༔ དེ་དག་རང་རང་རྒྱུད་དང་མཐུན་པ་ཡི༔ གང་འདུལ་ཆོས་འཁོར་བསྐོར་བར་བསམ་ནས་སུ༔ ཤེར་ཕྱིན་སྙིང་པོ་ལ་སོགས་འདོན་པར་བྱ༔ ཞེས་པ་སྟེ། འདས་རྗེས་ལས། དཀོན་མཆོག་གསུམ་གྱི་(9ན)སྤྱོད་པ་བྱ། །ཞེས་པས། མཐར་རང་ཉིད་ཤཱཀྱ་ཐུབ་པར་གསལ་ཏེ་ལག་གཉིས་ས་གནོན་དང་མཉམ་གཞག །རྐང་པ་སྐྱིལ་ཀྲུང་གིས་འདུག་སྟེ་རིགས་དྲུག་གི་སེམས་ཅན་ཐམས་ཅད་ཉན་རང་བྱང་སེམས་ཀྱི་ཚོགས་སུ་གྱུར་པ་ལ་རང་རྒྱུད་དང་བསྟུན་པའི་ཆོས་འཁོར་བསྐོར་བར་བསམ་ཞིང་ཤེར་ཕྱིན་སྙིང་པོ་སོགས་འདོན་པར་བྱའོ། ། གསུམ་པ་འབྱོངས་པའི་ཚད་བསྟན་པ་ནི། ཁམས་གསུམ་འཁོར་བའི་གནས་ཡུལ་སྣང་བ་ཀུན༔ སྒྱུ་མ་སྨིག་རྒྱུ་རྨི་ལམ་ཇི་བཞིན་དུ༔ ཤེས་ནས་མངོན་ཞེན་ལྡོག་ཚེ་འབྱོངས་པའི་ཚད༔ ཅེས་པ་སྟེ། དེ་ལྟར་འབད་པས་ཁམས་གསུམ་འཁོར་བའི་སྣང་བ་ཐམས་ཅད་སྒྱུ་མ་དང་སྨིག་སྒྱུ་རྨི་ལམ་ལྟ་བུར་ཤེས་ནས་མངོན་ཞེན་ལྡོག་ཚེ་འབྱོངས་པའི་ཚད་ཡིན གཉིས་པ་ནང་རིགས་དྲུག་གི་ས་བོན་སྦྱང་བ་ལ་གསུམ། སྦྱང་གཞི་རིགས་དྲུག་གི་ས་བོན། སྦྱོངས་བྱེད་རྡོ་རྗེའི་འབྲུ་གསུམ། ཐ་མ་འབྱོངས་པའི་རྟགས་བསྟན་པའོ། །དང་པོ་སྦྱང་གཞི་རིགས་དྲུག་གི་ས་བོན་ནི། དེ་ནས་ནང་ལྟར་རུ་ཤན་དབྱེ་བ་ལ༔ སྤྱི་མགྲིན་སྙིང་ག་ལྟེ་བ་གསང་གནས་དང་༔ རྐང་མཐིལ་རྣམས་སུ་རིམ་པ་བཞིན་དུ་ནི༔ ལྷ་དང་ལྷ་མིན་མི་དང་(9བ)བྱོལ་སོང་དང༔ ཡི་དྭགས་དམྱལ་བའི་ས་བོན་རིམ་པ་བཞིན༔ ཨ་དཀར་སུ་སེར་ནྲི་ལྗང་ཏྲི་དམར་ནག༔ པྲེ་ཡིག་ཐལ་སྐྱ་དུ་ཡིག་ནག་པོ་རྣམས༔ རང་མདོག་བག་ཆགས་ཐིག་ལེའི་ཀློང་དུ་བསྐྱེད༔ འོད་འཕྲོས་འགྲོ་དྲུག་སོ་སོའི་སྡུག་བསྔལ་དང་༔ སྡིག་སྒྲིབ་བག་ཆགས་གནས་ཡུལ་དང་བཅས་པ༔ མ་ལུས་བསྡུས་ཏེ་ས་བོན་རྣམས་ལ་བསྟིམ༔ ཞེས་པ་སྟེ། དེའང་བག་ཆགས་ཀྱི་ལུས་འདི་གྲུབ་ཙམ་ནས་རིགས་དྲུག་ཏུ་འཕེན་བྱེད་ཀྱི་ས་བོན་རྒྱུན་ཆགས་སུ་གནས་པ་དེའི་སྟེང་དུ་ལས་སྔ་མའི་རྗེས་ཆགས་ཤིང་ཕྱི་མ་ཉེ་བར་ལེན་པའི་རྐྱེན་བྱེད་པས་འཆི་བའི་ཚེ་ཡི་གེ་རྩ་ཁམས་དེ་རྣམས་གང་དུ་རླུང་སེམས་འདུས་པ་ལས་དེ་དང་དེར་འཕེན་པར་བྱེད་པའི་ཕྱིར། ད་ལྟ་ལམ་གྱི་གནས་སྐབས་ན་སྦྱོངས་ཚུལ་ཁྱད་དུ་འཕགས་པ་འདི་ནི་བླ་ན་མེད་པའི་ཐེག་པ་འདིའི་ཁྱད་ཆོས་ཡིན་ནོ། །དེ་ལ་དབྱེ་བ་དངོས་ནི། འདས་རྗེས་ལས། ལུས་འདི་མ་རིག་རྒྱུས་བསྐྱེད་ཕྱིར། །རིགས་དྲུག་ས་བོན་ཉིད་དུ་གནས། །ཞེས་སོ། །ས་བོན་དྲུག་ཇི་ལྟར་གནས་ན། ཀློང་གསལ་ལས། སྤྱི་བོ་མགྲིན་པ་སྙིང་ག་དང་། །ལྟེ་བ་གསང་བ་རྐང་མཐིལ་དུ། །ཨ་སུ་ནྲྀ་ཏྲི་པྲེ་དུ་གནས། །ཞེས་པ་ལྟར་རང་གི་ལུས་ཀྱི་སྤྱི་བོར་ཨ་དཀར་པོ་ལ་ལྷའི་བག་ཆགས། མགྲིན་པར་སུ་སེར་པོ་ལ་ལྷ་མ་ཡིན་གྱི་བག་ཆགས། (10ན)སྙིང་ག་རྀནྲ་ལྗང་གུ་ལ་མིའི་བག་ཆགས། ལྟེ་བར་ཏྲི་དམར་ནག་ལ་དུད་འགྲོའི་བག་ཆགས། གསང་བར་པྲེ་ཐལ་སྐྱ་ལ་ཡི་དྭགས་ཀྱི་བག་ཆགས། རྐང་མཐིལ་དུ་དུ་ནག་པོ་ལ་དམྱལ་བའི་བག་ཆགས་རྣམས་འདུས་པའི་ངོ་བོ་རང་མདོག་གི་ཐིག་ལེའི་ཀློང་དུ་ཡོད་པར་བསྒོམ། དེ་དག་ལས་འོད་འཕྲོས་པས་འགྲོ་དྲུག་སོ་སོའི་སྡུག་བསྔལ་སྡིག་སྒྲིབ་བག་ཆགས་གནས་ཡུལ་དང་བཅས་པ་ཐམས་ཅད་བསྡུས་ཏེ་ས་བོན་རྣམས་ལ་ཐིམ་པར་བསམ་མོ། ། གཉིས་པ་སྦྱོངས་བྱེད་རྡོ་རྗེའི་འབྲུ་གསུམ་ནི། སྦྱོངས་བྱེད་རྡོ་རྗེ་གསུམ་གྱི་ས་བོན་ནི༔ དཔྲལ་བར་ཨོཾ་དཀར་མགྲིན་པར་ཨཱ༔ དམར་པོ༔ སྙིང་གར་ཧཱུྃ་མཐིང་ལམ་ནི་འོད་འཕྲོས་པས༔ བླ་མ་རྒྱལ་བ་སྲས་དང་བཅས་རྣམས་ཀྱི༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀུན༔ བསྡུས་ཏེ་ཡི་གེ་འབྲུ་གསུམ་ལ་ཐིམ་པས༔ འོད་དང་འོད་ཕུང་བསྐལ་པའི་མེ་ལྟར་འབར༔ ས་བོན་དྲུག་པོ་བག་ཆགས་དང་བཅས༔ རྩྭ་སྦུར་ཕྲ་མོར་དུས་མཐའི་མེ་མཆེད་བཞིན༔ རིམ་བཞིན་བསྲེགས་ཏེ་རྗེས་ཤུལ་ལྷག་མེད་དུ༔ སོང་མཐར་འོད་ཕུང་མེ་ཡི་རང་བཞིན་ཅན༔ ཆེར་མཆེད་ཁམས་གསུམ་སྲིད་པ་ཐམས་ཅད་ཀུན༔ སྐུ་གསུམ་མཉམ་བརྡལ་རོལ་པར་བསྲེག་བྱས་ཏེ༔ འཁྲུལ་མི་ཤེས་(10བ)པའི་དབྱིངས་སུ་བརྟན་ཐོབ་བསམ༔ མཐར་ནི་སྤྲོས་པ་བྲལ་བའི་དབྱིངས་སུ་བཞག༔ བསྔོ་བ་དང་ནི་སྨོན་ལམ་རྒྱ་ཡིས་གདབ༔ འབྲུ་གསུམ་རྡོ་རྗེའི་བཟླས་པ་བདུན་འབུམ་བསྐྱལ༔ ཞེས་པ་སྟེ། སྔ་མ་ལས། རིག་པ་སྐུ་གསུམ་དངོས་ཡིན་ཕྱིར། །སྐུ་གསུམ་ཡི་གེ་གསུམ་དུ་ཤར། །ཡི་གེ་རྩལ་སྦྱང་རུ་ཤན་དབྱེ། །ཞེས་པས། སྦྱོངས་བྱེད་རིག་པའི་ཡེ་ཤེས་རྡོ་རྗེ་གསུམ་གྱི་རང་བཞིན་ཡི་གེའི་རྣམ་པར་ཤར་བ་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། སྙིང་གར་ཧཱུྃ་མཐིང་ནག་རྣམས་བཀྲག་མདངས་གཟི་བརྗིད་དང་ལྡན་པར་བསྒོམ། དེ་ལས་འོད་ཟེར་འཕྲོས་པས་བླ་མ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་བྱིན་ཐམས་ཅད་བསྡུས་ཏེ་འབྲུ་གསུམ་ལ་ཐིམ། འབྲུ་གསུམ་བཟླས་པའི་རྐྱེན་གྱི་དེ་ལས་བྱུང་བའི་འོད་ཟེར་གྱིས་རིགས་དྲུག་གི་ས་བོན་བག་ཆགས་དང་བཅས་པ་རྩ་སྦུར་ཕྲ་མོ་ལ་དུས་མཐའི་མེ་མཆེད་པ་ལྟར་ཐུལ་ཐུལ་བསྲེགས་ཏེ་རྗེས་ཤུལ་ལྷག་མ་མེད་པར་སོང་མཐར་འོད་ཕུང་མེ་ཡི་རང་བཞིན་ཅན་དེ་ཉིད་ཆེར་མཆེད་ནས་ཕྱི་སྣང་བ་སྣོད་ཀྱི་འཇིག་རྟེན་ནང་གཡོ་བ་བཅུད་ཀྱི་སེམས་ཅན་བར་འདོད་ཡོན་ལྔ་ཡི་ལོངས་སྤྱོད་རང་ལུས་ཕུང་ཁམས་སྐྱེ་མཆེད་དང་བཅས་པ་དངོས་མེད་དུ་བསྲེག་ནས། འདོད་ཁམས་སྤྲུལ་སྐུའི་(11ན)རོལ་པ། གཟུགས་ཁམས་ལོངས་སྐུའི་རོལ་པ། གཟུགས་མེད་ཁམས་ཆོས་སྐུའི་རོལ་པ་སྟེ་སྐུ་གསུམ་མཉམ་བརྡལ་ཆོས་དབྱིངས་འཁྲུལ་མི་ཤེས་པའི་དབྱིངས་སུ་བརྟན་པ་ཐོབ་པར་བསམ་ལ། ཨོཾ་ཨཱཿཧཱུྃ་འབུམ་ཕྲག་བདུན་བཟླའོ། ཐུན་མཐར་སྤྲོས་དང་བྲལ་བའི་ངང་དུ་མཉམ་པར་བཞག་ཅིང་བསྔོ་སྔོན་བྱའོ། ། གསུམ་པ་ཐ་མ་འབྱོངས་པའི་རྟགས་བསྟན་པ་ནི། ནམ་མཁའ་གཡའ་དག་ཉི་ཟླ་ཤར་བ་དང་༔ མཁའ་ལ་འཕུར་དང་དུང་དང་རོལ་མོ་སྒྲོགས༔ ཉམས་དང་རྟོགས་པའི་ཡོན་ཏན་གསར་དུ་སྐྱེ༔ དེ་དག་སྒྲིབ་པ་དག་པའི་ལྟས་སུ་འབྱུང་༔ ཞེས་པ་སྟེ་འབྱོངས་པའི་རྟགས་སུ་ནམ་མཁའ་གཡའ་དག་པ། ཉི་ཟླ་ཤར་བ། མཁའ་ལ་འཕུར་བ། དུང་དང་རོལ་མོ་སྒྲོགས་པ་སོགས་སྒྲིབ་པ་དག་པའི་ལྟས་སྣ་ཚོགས་དངོས་ཉམས་རྨི་ལམ་ཅི་རིགས་པར་འབྱུང་ཞིང་། ཉམས་རྟོགས་ཀྱི་ཡོན་ཏན་གསར་དུ་སྐྱེ་བ་དང་ཐ་མལ་གྱི་འཛིན་ཞེན་ཤུགས་ལ་འདག་པར་གྱུར་ཏེ། ཀློང་གསལ་ལས། རུ་ཤན་ནང་ལྟར་སུས་དབྱེ་བ། །འཁྲུལ་རྒྱུ་འཁོར་བའི་ས་བོན་སྟོངས། །ཞེས་དང་། དེ་ལྟར་ས་བོན་མ་ཟད་ན། །འཁོར་བའི་འབྲེལ་ཐག་ཆོད་མི་འགྱུར། །ཞེས་གསུངས་པས་རྒྱུ་ས་བོན་ཟད་ན་དེས་བསྐྱེད་ཀྱི་འབྲས་བུ་མི་འབྱུང་བ་བཞིན་(11བ)ནོ། །ལེའུའི་སྐབས་བསྡུ་བ་ནི། རུ་ཤན་ནང་ལྟར་དབྱེ་བའི་ལེའུ་སྟེ་གསུམ་པའོ༔ ས་མ་ཡ༔ གུ་ཧྱ༔ གཉིས་པ་རང་ལུས་རྡོ་རྗེར་སྦྱངས་པ་ལ་གཉིས། རྡོ་རྗེར་སྦྱང་བ་དངོས་དང་། ཕན་ཡོན་བསྟན་པའོ། །དང་པོ་རྡོ་རྗེར་སྦྱང་བ་དངོས་ནི། གསང་བ་ལྟར་དུ་རུ་ཤན་དབྱེ་བ་ལ༔ ལུས་ཀྱི་བྱ་བ་རྡོ་རྗེར་སྦྱང་བ་ནི༔ རང་ལུས་གནམ་ལྕགས་རྡོ་རྗེ་མེ་འབར་བ༔ རྩེ་གསུམ་ཡར་རྩེ་སྐུ་གསུམ་མཚོན་བྱེད་ལ༔ མར་རྩེ་ངོ་བོ་རང་བཞིན་ཐུགས་རྗེ་གསུམ༔ སྐེད་པ་ལྷུན་གྲུབ་ཐབས་ཤེས་ཟུང་འཇུག་མཚོན༔ གསལ་ཞིང་ཐལ་མོ་སྤྱི་བོར་སྦྱར་བྱས་ཏེ༔ གྲུ་མོ་བསྒྲེང་ཞིང་རྐང་མཐིལ་ཁ་སྦྱར་ཏེ༔ པུས་མོ་བསྒྲད་ཅིང་གཞན་དུ་མི་ཡེངས་པར༔ དམིགས་པའི་གནད་ལ་འབད་ཅིང་གསལ་བར་བྱ༔ དཀའ་ཞིང་ངལ་དུབ་སྡོད་མི་ཚུགས་པའི་དུས༔ གན་རྐྱལ་ལོག་སྟེ་སྔར་བཞིན་དམིགས་གསལ་འབད༔ ཙོག་པུར་འདུག་སྟེ་སྔར་བཞིན་ཕྱག་རྒྱ་དང་༔ དམིགས་པའི་གནད་བཟུང་དེ་ལྟར་རེས་མོས་བསྐྱར༔ རྡོ་རྗེ་ཚྭ་ཚྭ་སྐར་ལྟར་འཁྲུགས་པ་ཡིས༔ སྔོན་ལས་འཕྲལ་རྐྱེན་ངན་པའི་རྒྱུས་བསྐྱེད་པའི༔ བར་ཆད་གདོན་བགེགས་རྣམ་རྟོག་བག་ཆགས་ཀུན༔ རྡུལ་དུ་བརླག་ཅིང་ཡུལ་མེད་ཆེན་པོར་བསྲེགས༔ ཞེས་པ་སྟེ། ཐལ་འགྱུར་ལས། (12ན)རྡོ་རྗེའི་སྐྱིལ་མོ་ཀྲུང་བཅས་ཏེ། །ལུས་སྦྱངས་སེམས་ལ་ཕན་པའོ། །ཞེས་པས། དེ་ལ་རྡོ་རྗེའི་སྐྱིལ་ཀྲུང་ནི་རྐང་མཐིལ་གཉིས་སྤྲད་དེ་ལུས་དྲང་པོར་བསྲང་། པུས་མོ་བསྒྲད་ཅིང་གྲུ་མོ་བརྒྱངས་ནས་ལག་པ་གཉིས་སྤྱི་བོར་མ་རེག་པར་ཐལ་མོ་སྦྱར། སེམས་གཞན་དུ་མི་ཡེངས་པར་རང་ལུས་གནམ་ལྕགས་ཀྱི་རྡོ་རྗེ་སྔོན་པོ་མེ་འབར་བར་བསྒོམ་སྟེ། དེ་ཡང་ཡར་རྩེ་གསུམ་ནི་སྐུ་གསུམ་དང་། མར་རྩེ་གསུམ་ནི་ངོ་བོ་རང་བཞིན་ཐུགས་རྗེ་གསུམ་མཚོན་ཞིང་། སྐེད་པ་གཅིག་ཏུ་འདྲིལ་བ་ཐབས་ཤེས་ཟུང་འཇུག་གི་མཚོན་བྱེད་དུ་ཤེས་པར་བྱའོ། །དེས་དཀའ་ཞིང་སྡོད་མི་ཚུག་པའི་དུས་སུ་མཉམ་པ་ཉིད་ཀྱི་འདུག་སྟངས་གན་རྐྱལ་དུ་ལོག་སྟེ་སྔར་བཞིན་བྱ་བ་དང་། ཡང་མི་འགྱུར་རྡོ་རྗེའི་འདུག་སྟངས་ཙོག་པུར་འདུག་སྟེ་སྔར་བཞིན་ཕྱག་རྒྱ་དང་དམིགས་གསལ་ལ་འབད་པ་རྣམས་རེས་མོས་སུ་བསྐྱར། བར་སྐབས་སུ་རྡོ་རྗེ་ལས་མེ་ཡི་ཚྭ་ཚྭ་སྐར་ལྟར་འཁྲུགས་པས་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་བར་ཆད་གདོན་བགེགས་རྣམ་རྟོག་བག་ཆགས་དང་བཅས་པ་རྡུལ་དུ་བརླག་ཅིང་ཡུལ་མེད་ཆེན་པོར་བསྲེགས་པར་བསམ་མོ། ། གཉིས་པ་ཕན་ཡོན་བསྟན་པ་ནི། གནད་དེས་ཕྱི་ནང་བར་ཆད་གེགས་སེལ་བྱེད༔ མཐར་ཐུག་ལུས་ཀྱང་སྐུ་ཡི་(12བ)རོལ་པར་འཕོ༔ རྡོ་རྗེར་མཐོང་སྟེ་བགེགས་རྣམས་ཉེ་མི་ནུས༔ ཞེས་པ་སྟེ། དེ་ལྟར་སྦྱངས་པའི་དགོས་པ་གནས་སྐབས་སུ་གདོན་བགེགས་རྣམས་ཀྱིས་རང་ལུས་རྡོ་རྗེ་སྔོན་པོ་མེ་འབར་བར་མཐོང་ནས་ཕྱི་ནང་གསང་བའི་བར་ཆད་ཞི་བ་དང་། མཐར་ཐུག་ལུས་སྐུ་རྡོ་རྗེ་སྤྲུལ་པའི་སྐུར་གོ་འཕོས་པའི་དགོས་པ་ཡོད་དོ། །ལེའུའི་སྐབས་བསྡུ་བ་ནི། ལུས་ཀྱི་རུ་ཤན་དབྱེ་བའི་ལེའུ་སྟེ་བཞི་པའོ༔ ས་མ་ཡ༔ གུ་ཧྱ༔ གཉིས་པ་ནང་ངག་གི་རུ་ཤན་དབྱེ་བ་ལ་བཞི། རྒྱས་གདབ་པ། རྩལ་སྦྱང་བ། མཉེན་བཙལ་བ། ལམ་དུ་གཞུག་པའོ། །དང་པོ་རྒྱས་གདབ་པ་ལའང་། ཕྱི་སྣང་བར་རྒྱས་གདབ་པ་དང་། ནང་ཕུང་པོ་ལ་རྒྱས་གདབ་པ་གཉིས་ལས། དང་པོ་ཕྱི་སྣང་བ་ལ་རྒྱས་གདབ་པ་ནི། དེ་ནས་ངག་སྦྱངས་པའི་རིམ་པ་ནི༔ རང་ཉིད་གསང་བ་ཕྱག་ན་རྡོ་རྗེར་བསྒོམ༔ ལུས་དང་བསྟུན་ཏེ་སྐུ་དང་སྲོག་སྙིང་གི༔ ཁ་དོག་དཀར་སེར་དམར་དང་མཐིང་གར་བསྒོམ༔ དང་པོ་ཕྱི་ཡི་སྣང་བར་རྒྱས་གདབ་པ༔ ཐུགས་ཀའི་ཧཱུྃ་ལས་ཧཱུྃ་ཡིག་དཔག་མེད་པ༔ ཁ་ནས་ཐོན་ཏེ་སྣོད་བཅུད་བརྟན་གཡོ་ཀུན༔ ན་བུན་འཐིབ་བཞིན་གང་ནས་མ་ལུས་པ༔ ཐམས་ཅད་ཡི་གེ་ཧཱུྃ་དུ་ཞུ་བསམ་ཞིང་༔ སྐད་ཆེར་སྙན་ལ་རིང་བས་ཧཱུྃ་གླུ་གྱེར༔ ཞེས་པ་སྟེ། དེ་ལ་ཐལ་འགྱུར་ལས། (13ན)ངག་ནི་ཧཱུྃ་ཞེས་གནས་པ་ལ། །རྒྱས་གདབ་པ་དང་རྩལ་སྦྱོངས་ཉིད། །མཉེན་བཙལ་ལམ་དུ་ཞུག་པ་ཡིས། །དེ་ལྟར་ངག་སྦྱངས་སེམས་ལ་ཕན། །ཞེས་པས་དང་པོ་རང་ཉིད་གསང་བདག་ཕྱག་ན་རྡོ་རྗེ་སྐུ་མདོག་སྔ་དྲོ་དཀར་པོ། ཉིན་གུང་སེར་པོ། དགུང་མོ་དམར་པོ། སྲོད་ལ་མཐིང་ནག་ཞལ་གཅིག་ཕྱག་གཉིས་ཀྱི་གཡས་པས་གནམ་ལྕགས་ཀྱི་རྡོ་རྗེ་ནམ་མཁར་ཕྱར་བ་གཡོན་པས་སྦྲུལ་ཞགས་ཐུགས་ཀར་འཛིན་ཅིང་ཞབས་གཉིས་པད་ཟླ་ཉི་མའི་གདན་ལ་གྱད་ཀྱི་འདོར་སྟབས་སུ་འགྱིང་བའི་སྐུ་ལ་དུར་ཁྲོད་ཆས་བརྒྱད་ཀྱིས་བརྒྱན་པར་གསལ་བའི་ཐུགས་ཀར་པད་ཟླ་ཉི་མའི་གདན་ལ་གནམ་ལྕགས་ཀྱི་རྡོ་རྗེའི་ལྟེ་བར་ཧཱུྃ་ཡིག་དུས་དང་བསྟུན་པའི་ཁ་དོག་ཅན་ལས་ཧཱུྃ་ཡིག་དཔག་ཏུ་མེད་པ་འཕྲོས། ཁ་ནས་ཐོན་ཏེ་སྣོད་བཅུད་ཀྱི་ཁམས་ཐམས་ཅད་ན་བུན་འཐིབ་པ་བཞིན་དུ་གང་བར་བསམ་ལ། ཧཱུྃ་ཧཱུྃ་ཧཱུྃ་ཞེས་སྙན་ལ་རིང་བར་བརྗོད་པས་སྣང་བ་ཐམས་ཅད་ཧཱུྃ་གི་རང་བཞིན་དུ་སོང་བར་བསམ་ཞིང་མ་ཡེངས་པར་བྱའོ། །དེས་ནི་ཕྱི་སྣང་བར་རང་བཞིན་མེད་པར་གྲོལ་བའི་དགོས་པ་ཡོད་དོ། ། གཉིས་པ་ནང་ཕུང་པོ་ལ་རྒྱས་གདབ་པ་ནི། སླར་ཡང་རང་གི་ལུས་ལ་རྒྱས་གདབ་ནི༔ བརྟན་གཡོའི་ཧཱུྃ་དུ་གྱུར་པ་ཐམས་ཅད་དང་༔ སྤྲོས་པའི་ཧཱུྃ་རྣམས་ཚུར་འདུས་ཁ་(13བ)ནས་ཞུགས༔ ལུས་གང་ལུས་པོའི་ཧཱུྃ་ཡིག་རྡུལ་ཕྲན་གྱི༔ ཆ་ཙམ་འཚོགས་པའི་ཕུང་པོར་གསལ་ཏེ་གྱེར༔ མཐར་ནི་འཇའ་ཚོན་ནམ་མཁར་ཡལ་ལྟར་བསྡུ༔ ཞེས་པ་སྟེ སླར་ཡང་བརྟན་གཡོ་ཧཱུྃ་དུ་གྱུར་པ་དག་དང་ཕར་འཕྲོས་པའི་ཧཱུྃ་རྣམས་གཅིག་བྱུང་གཉིས་བྱུང་གིས་ཚུར་འདུས། ཁ་ནས་ཞུགས་ཏེ་ལུས་ཀྱི་ནང་ཐམས་ཅད་ཧཱུྃ་ཡིག་རྡུལ་ཕྲན་གྱི་ཆ་ཙམ་ཚོགས་པས་གང་བར་བསམ་ལ། ཧཱུྃ་ཞེས་རིང་བར་བརྗོད་ཅིང་མཐར་འཇའ་ཚོན་ནམ་མཁར་ཡལ་བ་ལྟར་སྤྲོས་པ་དང་བྲལ་བའི་དབྱིངས་སུ་བསྡུའོ། །དེས་ལུས་ཀྱི་འབྱུང་བ་དག་ལྟེ་གདོས་བཅས་ཟག་མེད་དུ་གྲོལ་བའི་དགོས་པ་ཡོད་དོ། ། གཉིས་པ་རྩལ་སྦྱང་བ་ལ། ཕྱི་སྣང་བ་ལ་རྩལ་སྦྱང་བ་དང་། ནང་ཕུང་པོ་ལ་རྩལ་སྦྱང་བ་གཉིས་ལས། དང་པོ་ཕྱི་སྣང་བ་ལ་རྩལ་སྦྱང་བ་ནི། དེ་ནས་ཕྱི་ཡི་དངོས་པོ་ཐམས་ཅད་ཀུན༔ སྟོང་པར་བཤིག་པའི་རྩལ་ཆེན་སྦྱང་བ་ལ༔ རང་གི་སྙིང་གའི་ཧཱུྃ་མཐིང་ཁྲུ་གང་ཙམ༔ རྣོ་མྱུར་ཤུགས་དང་ལྡན་པ་ཞིག་འཕྲོས་ཏེ༔ མདུན་གྱི་རི་བྲག་ཐོག་རེག་རིམ་བཞིན་དུ༔ ཕྱི་ཐལ་ནང་ཐལ་ཟང་ཐལ་གྱིས་འབིག་ནས༔ གཞན་ཡང་རི་བྲག་དངོས་པོ་ཐོག་རེག་གི༔ རི་ཐང་རྫས་དང་དངོས་པོར་གྲུབ་བོ་ཅོག༔ ཕྱི་ཐལ་ནང་ཐལ་ཕུག་ཅིང་སྟོང་པར་སྦྱངས༔ སྣང་སྲིད་སྟོང་དབྱིངས་ནམ་(14ན)མཁའི་རང་བཞིན་དུ༔ གསལ་བཞིན་ཧཱུྃ་སྒྲ་དྲག་ལ་བཅད་ཐོན་བརྗོད༔ ཅེས་པ་སྟེ། རང་གི་སྙིང་ག་ནས་ཧཱུྃ་མཐིང་ནག་ཁྲུ་གང་བ་རྣོ་མྱུར་གྱི་ཤུགས་དང་ལྡན་པ་ཞིག་འཕྲོས་ཏེ། རི་བྲག་ལ་སོགས་དངོས་པོ་ཐོག་རེག་གི་རྣམ་པ་ཅན་ཕྱི་ཐལ་ནང་ཐལ་གྱིས་ཕུག་ཅིང་སྣང་སྲིད་སྟོང་དབྱིངས་ནམ་མཁའི་རང་བཞིན་དུ་གྱུར་པར་བསམ་ལ་ཧཱུྃ་སྒྲ་དྲག་ལ་བཅད་ཐོན་པར་བརྗོད། དེས་སྣང་བ་བདེན་མེད་དུ་ཤེས་པའི་དགོས་པ་ཡོད་དོ། ། གཉིས་པ་ནང་ཕུང་པོ་ལ་རྩལ་སྦྱང་བ་ནི། སླར་ཡང་རང་གི་ལུས་ལ་རྩལ་སྦྱང་བ༔ ཧཱུྃ་དེ་ཚུར་འདུས་ལུས་ཀྱི་ཕྱི་ནང་ཀུན༔ ཕྱི་ཐལ་ནང་ཐལ་སྐོར་ཚེར་མེད་པར་ཕུག༔ མཐར་ནི་སྟོང་གཟུགས་འོད་ཀྱི་ཕུང་པོར་བསྒོམ༔ ཞེས་པ་སྟེ་ཡང་ཧཱུྃ་དེ་ཚུར་བྱུང་རང་གི་ལུས་ཕྱི་ཐལ་ནང་ཐལ་སྐོར་ཚེར་མེད་པར་ཕུག་སྟེ་རྡུལ་ཕྲན་དུ་དག་ནས། མཐར་སྟོང་གཟུགས་འོད་ཀྱི་ཕུང་པོར་གྱུར་པར་བསམ་ལ་ཧཱུྃ་དྲག་ལ་ཐུང་བར་བརྗོད། དེས་ནི་ནང་ཕུང་པོའི་ནད་གདོན་ཞི་བ་དང་ལུས་འོད་གསལ་དུ་གྲོལ་བའི་དགོས་པ་ཡོད་དོ། ། གསུམ་པ་མཉེན་བཙལ་བ་ནི། དེ་ནས་མཉེན་བཙལ་མདུན་དུ་ཤིང་བུ་བཙུགས༔ རང་གི་སྙིང་གར་ཧཱུྃ་ཞིག་བསྒོམ་བྱས་ཏེ༔ མེ་ལས་མེ་སྟག་ཆད་པ་ཇི་བཞིན་དུ༔ ཧཱུྃ་ལས་ཧཱུྃ་ཡིག་ལུ་གུ་རྒྱུད་དུ་འབྲེལ༔ ཁ་(14བ)ནས་ཐོན་ཏེ་ཤིང་བུའི་རྩར་སླེབ་ནས༔ གཡས་འཁོར་གྱིས་ནི་སྦྲུལ་འཁྱུད་ལྟར་དཀྲིས་ཏེ༔ ཧཱུྃ་ཡིག་སྔ་མ་དམིགས་རྟེན་རྩེར་ཕྱིན་ལ༔ ཤེས་པ་གཏད་དེ་ཧཱུྃ་གླུ་དལ་གྱིས་བརྗོད༔ སླར་ཡང་ལུགས་སུ་ལྡོག་སྟེ་སྙིང་གར་བསྡུ༔ ཞེས་པ་སྟེ། མདུན་དུ་ཤིང་བུ་ལ་སོགས་པའི་མཚན་མ་བཙུགས་ལ། རང་གི་སྙིང་གར་ཧཱུྃ་མཐིང་ནག་ཞིག་བསྒོམ། དེ་ལས་ཧཱུྃ་དེ་འདྲ་བ་འོད་ཟེར་གྱི་ཐག་པས་སྦྲེལ་བ་མང་པོ་ཁ་ནས་ཐོན་ཏེ་དམིགས་རྟེན་གྱི་རྩ་བ་ནས་སྦྲུལ་འཁྱུད་པ་ལྟར་གཡས་བསྐོར་དུ་དཀྲིས་ཏེ་ཧཱུྃ་ཡིག་སྔ་མ་རྩེ་མོར་འགྲེང་སྟབས་སུ་གནས་པ་ལ་ཤེས་པ་མདུང་ཚུགས་སུ་གཏད་ནས་ཧཱུྃ་གླུ་དལ་བར་སྙན་པའི་དབྱངས་ཀྱིས་བརྗོད། སླར་ཡང་རིམ་བཞིན་བཤིག་ནས་གཅིག་ལ་གཅིག་ཐིམ་གྱི་མཐར་རང་གི་སྙིང་གར་བསྡུས་ཏེ་ངལ་གསོ་བར་བྱའོ། །དེས་ནི་དམིགས་པ་གང་དུའང་བསྒྱུར་བཏུབ་པའི་དགོས་པ་ཡོད་དོ། ། བཞི་པ་ལམ་དུ་གཞུག་པ་ནི། དེ་ནས་ལམ་དུ་ཞུགས་པའི་རིམ་ལ༔ རང་ལུས་ཧཱུྃ་ཡིག་མཐོ་གང་ཙམ་དུ་གསལ༔ སྲིན་བུའི་འགྲོས་ཀྱིས་ས་སྟེང་ཀུན་ཏུ་འགྲོ༔ རིགས་དྲུག་གནས་ཉུལ་འོད་ཀྱིས་འགྲོ་ཀུན་བསྒྲལ༔ སླར་ཡང་དཔག་ཆེན་མདའ་འཕང་ཇི་བཞིན་དུ༔ དབུས་ཕྱོགས་སྟུག་པོ་བཀོད་དང་ཤར་མངོན་དགའ༔ ལྷོ་ཕྱོགས་དཔལ་ལྡན་ཞིང་དང་(15ན)ནུབ་བདེ་ཆེན༔ བྱང་ཕྱོགས་ལས་རབ་རྫོགས་པའི་ཞིང་ཁམས་སུ༔ ཕྱིན་ནས་དེ་བཞིན་གཤེགས་པ་རིགས་ལྔ་ལ༔ བསྐོར་བ་བྱ་ཞིང་ཕྱག་འཚལ་མཆོད་པ་འབུལ༔ དབང་ཞུ་ལུང་ནོད་སངས་རྒྱས་ལུང་བསྟན་ཐོབ༔ དེ་དག་ཀུན་ལ་ཧཱུྃ་གླུ་དལ་གྱིས་བརྗོད༔ མཐར་ནི་བསྔོ་བ་སྨོན་ལམ་རྒྱ་ཡིས་བཏབ༔ ཞེས་པ་སྟེ། རང་ལུས་ཧཱུྃ་ཡིག་མཐིང་ག་མཐོ་གང་བ་གཅིག་གསལ་ལ། ཕར་འཁྱོགས་ཚུར་འཁྱོགས་སྲིན་བུའི་འགྲོས་ཀྱིས་མཐོང་ཡུལ་གྱི་རི་ལ་སོགས་པ་ནས་མི་མཐོང་བའི་ས་ཕྱོགས་རིགས་དྲུག་གི་ཡུལ་དང་བཅས་པ་ན་མགྲོན་པོ་དོན་གཉེར་བ་བཞིན་ཞུགས་ནས་ཧཱུྃ་གི་འོད་ཀྱིས་འགྲོ་བའི་སྡུག་བསྔལ་སྦྱངས་ཞིང་འཁྲུལ་མི་ཤེས་པའི་དབྱིངས་སུ་བསྒྲལ། སླར་ཡང་དཔག་ཆེན་གྱི་མདའ་འཕང་བ་བཞིན་དུ་དབུས་ཕྱོགས་སྟུག་པོ་བཀོད་པའི་ཞིང་ཁམས་སུ་སངས་རྒྱས་རྣམ་པར་སྣང་མཛད་ཤར་ཕྱོགས་མངོན་པར་དགའ་བའི་ཞིང་ཁམས་སུ་རྡོ་རྗེ་སེམས་དཔའ། ལྷོ་ཕྱོགས་དཔལ་ལྡན་མཛེས་པའི་ཞིང་ཁམས་སུ་རིན་ཆེན་འབྱུང་ལྡན། ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྣང་བ་མཐའ་ཡས། བྱང་ཕྱོགས་ལས་རབ་རྫོགས་པའི་ཞིང་ཁམས་སུ་བཅོམ་ལྡན་དོན་ཡོད་གྲུབ་པ་བཅས་ཀྱི་མདུན་དུ་ཕྱིན་ཏེ་ཕྱག་དང་བསྐོར་བ་ལན་(15བ)གསུམ་བྱས། མཆོད་པ་ཕུལ་ཏེ་ཟབ་པ་དང་རྒྱ་ཆེ་བའི་དབང་ལུང་ནོད། སངས་རྒྱས་ཀྱི་ལུང་བསྟན་ཐོབ་སྟེ་སླར་ལྡོག་པར་བསམ་ལ་ཧཱུྃ་དལ་ལ་རིང་བར་བརྗོད། མཐར་བསྔོ་སྨོན་གྱི་རྒྱས་གདབ་བོ། །དེས་ནི་ཡུལ་གྱི་བག་ཆགས་སྦྱངས་ཤིང་ཞིང་ཁམས་འབྱོངས་པའི་རྟེན་འབྲེལ་དང་ངག་སྒྲིབ་དག་སྟེ་གསུང་རྡོ་རྗེ་ལོངས་སྤྱོད་རྫོགས་སྐུར་གྲོལ་བའི་དགོས་པ་ཡོད་དོ། །ལེའུའི་སྐབས་བསྡུ་བ་ནི། དེ་དག་ངག་གི་རུ་ཤན་དབྱེ་བའི་ལེའུ་སྟེ་ལྔ་པའོ༔ ས་མ་ཡ༔ གུ་ཧྱ༔ གསུམ་པ་གསང་བ་ཡིད་ཀྱི་རུ་ཤན་དབྱེ་བ་ལ་གསུམ། རྣལ་དུ་དབབ་པ། སོར་གཞུག་པ། ཡོན་ཏན་བསྟན་པའོ། །དང་པོ་རྣལ་དུ་དབབ་པ་ནི། ཡིད་ཀྱི་རུ་ཤན་དབྱེ་བའི་རིམ་པ་ལ༔ མི་ཡི་རྒྱུ་འགྲུལ་མེད་པའི་གནས་དབེན་པར༔ ལུས་ནི་དུར་ཁྲོད་མི་རོ་ལྟ་བུ་རུ༔ གཡོ་འགུལ་མེད་པར་ཅི་བདེར་གནས་པ་དང༔ ངག་ནི་ལྐུག་པ་ལྟ་བུར་ཇི་བཞིན་དུ༔ སྨྲ་བརྗོད་བཟླས་པ་ཐམས་ཅད་སྤངས་ནས་བཞག༔ སེམས་ནི་སྤྲིན་མེད་ནམ་མཁའ་ཇི་བཞིན་དུ༔ བཅས་བཅོས་མེད་པར་ལྷོད་དེ་ཤིག་གེར་བཞག༔ ཅེས་པ་སྟེ། སྒྲོན་མེ་འབར་བ་ལས། འཁོར་འདས་རུ་ཤན་ཕྱེ་ནས་ནི། །ལུས་ངག་ཡིད་གསུམ་རྣལ་དུ་དབབ། །ཅེས་དང་འདས་རྗེས་ལས། དེ་ནས་ལུས་ངག་ཡིད་གསུམ་པོ། །རྣལ་དུ་དབབ་(16ན)ལ་མཁས་པར་བྱ། །ཞེས་པས་དེའང་ལུས་ཀྱི་གནད་བཟང་ངན་བླང་དོར་ལས་འདས་པ་དུར་ཁྲོད་ཀྱི་མི་རོ་བཞིན་དུ་ཅི་བདེར་བཞག །ངག་སྨྲ་བརྗོད་བཟླས་པ་ཐམས་ཅད་སྤངས་ཏེ་ལྐུག་པ་ལྟར་བཞག །ཡིད་དྲན་བསམ་ཐམས་ཅད་བཀག་ལ་བཅས་བཅོས་མེད་པར་སྤྲིན་མེད་ཀྱི་ནམ་མཁའ་ལྟར་ལྷོད་དེ་ཤིག་གེར་འཇོག་པ་སྟེ་བྱ་བ་དང་བྱེད་པ་མེད་པའི་ངང་དུ་གནས་པའོ། །དེའང་ལུས་རྣལ་དུ་ཕེབས་པས་མི་འགུལ། ངག་རྣལ་དུ་ཕེབས་པས་སྨྲ་མི་འདོད། ཡིད་རྣལ་དུ་ཕེབས་པས་འཕྲོ་འདུའི་རྟོག་པ་རང་སར་ཞི་བའོ། །དེས་ནི་འབྱུང་བ་མི་འཁྲུགས་ཤིང་ནད་རྐྱེན་མི་འབྱུང་བས་རང་བཞིན་གྱི་བསམ་གཏན་ལ་གནས་པའི་དགོས་པ་ཡོད་དོ། ། གཉིས་པ་སོར་གཞུག་པ་ནི། དེ་མཐར་རྣམ་སྣང་མཛད་ཀྱི་ཆོས་བདུན་ནས༔ ལྟ་སྟངས་སྣ་རྩེར་ཕབ་སྟེ་སྡོད་པ་དང་༔ སླར་ཡང་སྐྱིལ་ཀྲུང་དང་བཅས་མཉམ་གཞག་སྟེ༔ མིག་ནི་བར་སྣང་ཁམས་སུ་ཧ་རེ་བལྟ༔ དེ་ནས་ལངས་ཏེ་གྱད་ཀྱི་འདོར་སྟབས་བསྒྲད༔ སྡིགས་མཛུབ་སྟེང་གི་ནམ་མཁར་འཕང་ནས་སུ༔ ཤེས་པ་ནམ་མཁར་མདུང་ཚུགས་ཀྱིས་གཏད་དེ༔ ཧཱུྃ་སྒྲ་བསྒྲགས་ཤིང་མིག་ཀྱང་ནམ་མཁར་བསྒྲད༔ ཡང་གཅིག་སྡིགས་མཛུབ་གཡོན་གྱི་ནམ་(16བ)མཁར་འཕང་༔ མིག་དང་ཤེས་པ་མཁའ་གཏད་རུ་ལུ་བསྒྲགས༔ དེ་བཞིན་སྔོན་འགྲོའི་སྤྱོད་པ་ཐམས་ཅད་ཀུན༔ ཞག་གྲངས་བརྒྱད་བཅུར་གནད་དུ་བསྣུན་ཏེ་བྱ༔ ཞེས་པ་སྟེ། དེའང་འདས་རྗེས་ལས། ཉན་ཐོས་བྱང་སེམས་ཁྲོ་བོ་ཡི། །ལྟ་སྟངས་ཉིད་ཀྱིས་སོར་ཡང་གཞུག །དེས་ནི་གསུམ་པོ་སོར་ཆུད་ནས། །ཉམས་ལེན་ཉིད་ལ་བརྩོན་པར་འགྱུར། །ཞེས་པས་དང་པོ་ཉན་ཐོས་ཀྱི་ལྟ་སྟངས་ནི། རྐང་པ་རྡོ་རྗེའི་སྐྱིལ་ཀྲུང་བཅའ། ལག་པ་ཁུ་ཚུར་བརླ་སྟེང་དུ་བཞག །རྒལ་ཚིག་དྲང་པོར་བསྲངས། དཔུང་པ་རྒོད་གཤོག་ལྟར་བརྒྱངས། ལྕེ་ཡ་རྐན་ལ་སྦྱར། མགྲིན་པ་ལྕགས་ཀྱུ་ལྟར་དགུག །མིག་སྣ་རྩེའི་ཐད་ཀྱི་ནམ་མཁར་གདངས་ཟུམ་མཉམ་པར་བཞག་པ་ནི་རྣམ་སྣང་གི་ཆོས་བདུན་ཞེས་བྱ་བ་ཡིན་ལ། དེ་ཉིད་ཧ་ཅང་བསྡམ་མ་དྲག་པ་དང་ལྷོད་མ་དྲག་པའི་རན་པར་བཅའ་ཞིང་རྟོག་པ་བཟོ་མི་འཆོས་པར་བཞག་གོ ། དེ་སྐད་དུ་ཀློང་གསལ་ལས། ཉན་ཐོས་ཞི་བའི་ལྟ་སྟངས་ཀྱིས། །ལུས་ངག་ཡིད་གསུམ་རྣལ་དུ་ཕེབས། །ཞེས་སོ། ། གཉིས་པ་བྱང་ཆུབ་སེམས་དཔའི་ལྟ་སྟངས་ནི། སྐྱིལ་ཀྲུང་དང་བཅས་མིག་བར་སྣང་ལ་ཧད་པོར་བལྟ་ཞིང་སེམས་གང་དུ་ཡང་མི་གཡོ་བ་སྟེ། དེ་ཉིད་ལས། བོ་དྷི་ས་ཏྭའི་ལྟ་སྟངས་ཀྱིས། །རྣལ་ཕེབས་བདེ་བ་(17ན)ཉིད་ཐོབ་འགྱུར། །ཞེས་སོ། །གསུམ་པ་ཁྲོ་བོའི་ལྟ་སྟངས་ནི། ལངས་ཏེ་རྐང་པ་གྱད་ཀྱི་འདོར་སྟབས་སུ་བསྒྲད། སྡིགས་མཛུབ་སྟེང་གི་ནམ་མཁའ་ལ་འཕང་། མིག་དང་ཤེས་པ་མདུང་ཚུགས་སུ་གཏད་དེ་ཧཱུྃ་ཧཱུྃ་ཧཱུྃ་ཞེས་དྲག་ལ་ཐུང་བར་བརྗོད། ཡང་སྡིགས་མཛུབ་སོགས་གོ་ལྡོག་ཏེ་ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཞེས་དྲག་པོར་བརྗོད་ལ་སྣང་བའི་རྫུན་ཕུག་བརྡིབ་པའི་བརྟུལ་ཞུགས་ལ་རྩལ་སྦྱངས་ཤིང་སེམས་སྤྲོས་པ་དང་བྲལ་བར་བཞག་གོ ། དེ་སྐད་དུ་ཀློང་གསལ་ལས། ཁྲོ་བོ་ཉིད་ཀྱི་ལྟ་སྟངས་ཀྱིས། །རྣལ་ཕེབས་ཡོན་ཏན་གསུམ་ཡང་འགྲུབ། །ཅེས་ཉན་ཐོས་ཀྱི་ལྟ་སྟངས་ཀྱིས་ལུས་ངག་ཡིད་གསུམ་མི་གནས་པ་གནས་པར་བྱེད། བྱང་ཆུབ་སེམས་དཔའི་ལྟ་སྟངས་ཀྱིས་གནས་པ་བརྟན་པར་བྱེད། ཁྲོ་བོའི་ལྟ་སྟངས་ཀྱིས་བརྟན་པ་གྲོལ་བར་བྱེད་དོ། །དེ་ལྟར་སྔོན་འགྲོའི་སྤྱོད་པ་ཐམས་ཅད་ཞག་གྲངས་བརྒྱད་ཅུ་སོགས་ལ་བསྣུན་པ་གནད་དམ་པའོ། ། གསུམ་པ་ཡོན་ཏན་བསྟན་པ་ནི། དེ་མཐུས་གནས་སྐབས་བར་ཆད་གེགས་སེལ་ཞིང་༔ མཐར་ཐུག་སྒོ་གསུམ་མ་དག་སྐྱོན་བྲལ་ནས༔ རྡོ་རྗེ་གསུམ་གྱི་རོལ་པར་སྨིན་གྲོལ་བྱེད༔ ཅེས་པ་སྟེ། དེ་ལྟར་སྦྱངས་པའི་དགོས་པ་གནས་སྐབས་སུ་གེགས་དང་བར་ཆད་ཐམས་ཅད་སེལ་ཞིང་། མཐར་(17བ)ཐུག་སྒོ་གསུམ་མ་དག་པའི་སྐྱོན་དང་བྲལ་ཏེ་དག་པ་རྡོ་རྗེ་གསུམ་གྱི་རོལ་པར་སྨིན་ཅིང་གྲོལ་བར་བྱེད་དོ། །ལེའུའི་སྐབས་བསྡུ་བ་ནི། ཡིད་ཀྱི་རུ་ཤན་དབྱེ་བའི་ལེའུ་སྟེ་དྲུག་པའོ༔ ས་མ་ཡ༔ གུ་ཧྱ༔ གཉིས་པ་དངོས་གཞིའི་རིམ་པ་ཉམས་སུ་ལེན་ཚུལ་ལ་དྲུག །སྒོ་གསུམ་གྱི་གནད་གཟིར་བ། གནད་གསུམ་གྱིས་འོད་གསལ་བལྟ་བ། སྒྲོན་མའི་རྣམ་པར་བཞག་པ། ཇི་ལྟར་ཉམས་སུ་ལེན་ཚུལ། ལམ་རྟགས་སྣང་བཞིའི་ས་མཚམས། མཐའ་རྟེན་གྱི་མན་ངག་བསྟན་པའོ། །དང་པོ་སྒོ་གསུམ་གྱི་གནད་གཟིར་བ་ལའང་། ལུས་ཀྱི་གནད། ངག་གི་གནད། ཡིད་ཀྱི་གནད་དང་གསུམ་ལས། དང་པོ་ལུས་ཀྱི་གནད་ནི། དངོས་གཞིའི་ཉམས་སུ་ལེན་པའི་རིམ་པ་ལ༔ འདུག་སྟངས་རྣམ་པ་གསུམ་གྱི་གནད་མཆིས་པའི༔ ཞེས་པ་སྟེ། དང་པོ་ལུས་འདུག་སྟངས་ཀྱི་ཆིངས་ཀྱིས་མ་བཅིང་ན་དབྱིངས་དང་ཐིག་ལེ་རླུང་གི་ཆ་དང་བཅས་པ་ལུས་ཀྱི་རྩ་ཁམས་ཐམས་ཅད་དུ་འཐོར་ནས་མངོན་དུ་མི་འགྱུར་བ། དཔེར་ན་སྦྲུལ་མ་གཅུས་ན་རྐང་ལག་མི་མངོན་པ་ལས་གཅུས་ན་སྣང་བ་བཞིན་དུ་ལུས་ཀྱི་གནད་འདི་ཤིན་ཏུ་གཅེས་ཏེ། ཀློང་གསལ་ལས། རིག་པ་ལུས་ལ་གནས་གྱུར་ཀྱང་། །འཁྲུལ་འཁོར་དག་གིས་མ་གཅུན་ན། །ཡེ་ཤེས་དབང་པོར་སྣང་མི་ནུས། །ཞེས་སོ། ། དེ་ལ་གནད་(18ན)དངོས་ནི། བཞུགས་སྟངས་གསུམ་དང་གཟིགས་སྟངས་གསུམ་ལས་མི་འདའ་བར་བྱེད་པ་སྟེ། ཐལ་འགྱུར་ལས། ལུས་ནི་སྐུ་གསུམ་བཞུགས་སྟངས་ལས། །རྒྱུན་དུ་འདའ་བར་མི་བྱའོ། །ཞེས་དང་། མུ་ཏིག་ཕྲེང་བ་ལས། ལུས་ཀྱི་གནད་ནི་རྣམ་གསུམ་སྟེ། །སེང་གེའི་ཚུལ་དང་གླང་ཆེན་དང་། །དྲང་སྲོང་ལྟ་བུར་ཤེས་པར་བྱ། །ཞེས་པས་དང་པོ་སྤྲུལ་སྐུའི་བཞུགས་སྟངས་ནི། དང་པོ་རྐང་མཐིལ་སར་ཕབ་པུས་བྲང་སྦྱར༔ ལག་པའི་སོར་བསྣོལ་པུས་མོར་འཁྱུད་པ་དང་༔ དཔུང་བསྣོལ་མཆན་ཁུང་འཆད་པའི་མཐིལ་དང་སྤྲད༔ ཡང་ཅིག་ལྐོག་མ་ལག་རྒྱབ་ཁ་སྦྱར་ཏེ་༔ པུས་མོའི་སྟེང་དུ་གྲུ་མོ་བཙུག་ནས་སྡོད༔ དེ་ལ་སྤྲུལ་སྐུའི་ལམ་ཁྱེར་བྱ་བ་གནད༔ ཅེས་པ་སྟེ། དེ་ལ་རྐང་པའི་ལོང་བུ་གཤིབས་ཏེ་ཙོག་པར་འདུག་ཅིང་ལག་པའི་སོར་མོ་བསྣོལ་བ་པུས་མོར་འཁྱུད་པ་དང་། ཡང་ལག་པ་བསྣོལ་ཏེ་མཆན་ཁུང་དང་ལག་མཐིལ་སྤྲད་དེ་སྡོད་པ་དང་། ཡང་ལྐོག་མ་དང་ལག་རྒྱབ་ཁ་སྦྱར་ཏེ་གྲུ་མོ་པུས་སྟེང་དུ་བཙུག་ནས་སྡོད་པའོ། ། གཉིས་པ་ལོངས་སྐུའི་བཞུགས་སྟངས་ནི། རྐང་མཐིལ་ཕྱིར་ཕུལ་ཁ་སྦུབས་པུས་བྲང་སྦྱར༔ གྲུ་མོ་སར་བཙུག་ལག་མཐིལ་འགྲམ་པ་བཏེགས༔ ལོངས་སྤྱོད་རྫོགས་སྐུའི་ལམ་ཁྱེར་བྱ་བ་གནད༔ ཅེས་པ་(18བ)སྟེ། ལུས་ཁ་སྦུབས་ཏེ་པུས་བྲང་སྦྱར་ནས་རྐང་པ་ཕྱིར་ཕུལ་གྲུ་མོ་གཉིས་ས་ལ་བཙུག་སྟེ་ལག་མཐིལ་གཉིས་ཀྱིས་ཨོལ་ཀོ་བསྟེན་ལ་སོར་མོ་འགྲམ་པ་ལ་སྦྱར་ཏེ་སྡོད་པའོ། ། གསུམ་པ་ཆོས་སྐུའི་བཞུགས་སྟངས་ནི། ཡང་གཅིག་རྐང་གཉིས་མདུན་དུ་མཐིལ་སྤྲད་པའི༔ དབུས་སུ་རྡོ་རྗེ་ཁུ་ཚུར་སར་བཙུགས་ཏེ༔ རྒལ་རྒྱུད་དྲང་པོར་བསྲང་སྟེ་སྡོད་པ་ལ༔ ཆོས་སྐུའི་ལམ་ཁྱེར་བྱ་བ་གནད་དུ་ཤེས༔ ཞེས་པ་སྟེ། རྐང་མཐིལ་གཉིས་སྤྲད་དེ་པུས་མོ་ཕྱིར་བསྒྲད་པའི་ནང་དུ་ལག་པ་རྡོ་རྗེའི་ཁུ་ཚུར་ས་ལ་བཙུག་ཅིང་རོ་སྟོད་སེང་གེ་ལྟར་སིང་ངེ་བ་ལ་མཇིང་པ་ཡུད་ཙམ་གྱེན་དུ་བཏོད་དེ་འདུག་གོ ། དེ་བཞིན་དུ་གཟིགས་སྟངས་ཡང་གསུམ་སྟེ། ལྟ་སྟངས་འདུག་སྟངས་དང་པོར་སྣ་རྩེར་ཕབ༔ གཉིས་པ་གཡས་གཡོན་མདུན་ཐད་དྲང་པོར་བལྟ༔ གསུམ་པ་གྱེན་དུ་བཟློག་སྟེ་བལྟ་བ་ཡིན༔ ཞེས་པ་སྟེ། ཐལ་འགྱུར་ལས། རྒྱང་ཞག་འགུལ་བ་མེད་པ་གནད། །འདི་དུས་ལྟ་སྟངས་གསུམ་དང་སྦྱར། །ཞེས་པས་དེ་ལ་བཞུགས་སྟངས་དང་པོར་གཟིགས་སྟངས་ཐུར་དུ་ཕབ་པས་ཀུན་གཟིགས་ཀྱི་སྤྱན་དབྱེ་བ་འགྱུར། བཞུགས་སྟངས་གཉིས་པར་གཟིགས་སྟངས་ཟུར་ལ་གཏད་པས་ཀུན་མཁྱེན་གྱི་སྤྱན་དབྱེ་བར་འགྱུར། བཞུགས་སྟངས་གསུམ་པར་གཟིགས་སྟངས་གྱེན་དུ་ལྡོག་(19ན)པས་ཀུན་ཁྱབ་ཀྱི་སྤྱན་དབྱེ་བར་འགྱུར་རོ། །དེ་ལྟར་བྱས་པའི་ཡོན་ཏན་ནི། ཐལ་འགྱུར་ལས། ཆོས་སྐུའི་བཞུགས་སྟངས་སེང་གེ་ཡིས། །འཁྲུལ་པའི་འཇིགས་པ་ཀུན་བྲལ་ནས། །རྡོ་རྗེའི་མིག་གིས་མཐོང་བར་འགྱུར། །ལོངས་སྤྱོད་རྫོགས་སྐུའི་བཞུགས་སྟངས་ནི། །གླང་ཆེན་ཉལ་བ་ལ་བརྟེན་ནས། །ཆོས་ཉིད་དོན་ལ་ལོངས་སྤྱོད་དེ། །པདྨའི་སྤྱན་གྱིས་མཐོང་བར་འགྱུར། །སྤྲུལ་པ་སྐུ་ཡི་བཞུགས་སྟངས་ནི། །དྲང་སྲོང་ཙོག་པུ་ལ་བརྟེན་ནས། །ཆོས་ཉིད་སྣང་བར་རང་སྤྲུལ་ནས། །ཆོས་ཀྱི་མིག་གིས་མཐོང་བར་འགྱུར། །ཞེས་སོ། །དེ་ལྟར་མ་གཟིར་བའི་སྐྱོན་ནི། ཀློང་གསལ་ལས། ལུས་ཀྱི་གནད་ཀྱིས་མ་གཟིར་ན། །འབྱུང་ཚད་རླུང་ནི་མི་ཟིན་ཅིང་། །དེ་བཞིན་ལུས་ལ་དྲོད་མི་སྐྱེ། །རིག་པ་དངོས་སུ་སྣང་མི་ནུས། །ཞེས་སོ། །དེ་ལྟར་བཞུགས་སྟངས་གསུམ་པོ་ཧ་ཐང་བསྡམས་ཆེ་བ་མ་ཡིན་པར་ཆ་སོ་སོ་ནས་ལྷོད་ཆགས་པ་དང་རང་ལ་གང་བདེ་བ་དང་རན་པ་ཉིད་སྡོད་པ་ལས་གསུམ་ཀ་རྫོགས་དགོས་པ་ནི་མ་ཡིན་ནོ། ། གཉིས་པ་ངག་གི་གནད་ནི། ཐལ་འགྱུར་ལས། ངག་ནི་བསླབ་དང་གནས་པ་དང་། །ལ་བཟླ་བ་ཉིད་བརྟེན་པར་བྱ། །ཞེས་པས་འཁྲུལ་པའི་གཏམ་འགག་ཅིང་བརྗོད་མེད་ཀྱི་དོན་རྒྱུད་ལ་སྐྱེ་ཕྱིར་དང་པོ་སྨྲ་བཅད་(19བ)ཡུན་ཐུང་བ་ལ་བསླབ། དེ་ནས་རིང་བར་བསླབ། དེ་ནས་ཆོས་སྤྱོད་ཙམ་ལས་ཚིག་གཅིག་ཀྱང་མི་སྨྲ། མཐར་བརྗོད་པ་མཐའ་དག་བཀག་ལ་ལྐུག་པ་ལྟར་གནས་པར་བྱའོ། །དེའི་ཡོན་ཏན་ནི། ཀློང་གསལ་ལས། དེ་ལྟར་ངག་གནད་སུས་གཟིར་བ། །ངག་གི་རྐྱེན་ཟད་མྱ་ངན་འདས། །ཞེས་སོ། །དེ་ལྟར་མ་བྱས་པའི་སྐྱོན་ནི། དེ་ཉིད་ལས། ངག་གི་གནད་ནི་མ་གཟིར་ན། །བརྗོད་མེད་དོན་ནི་མི་རྟོགས་ཤིང་། །འཁྲུལ་པའི་གཏམ་གྱིས་དོན་ལ་བསྒྲིབ། །ཅེས་སོ། །གསུམ་པ་ཡིད་ཀྱི་གནད་ནི། ཀློང་གསལ་ལས། སེམས་ཉིད་ཕྱི་ཡི་མཁའ་ལ་གཏད། །ནང་གི་སྒྲོན་མ་མངོན་དུ་སྣང་། །ཞེས་པས། ཕྱིའི་དབྱིངས་ནམ་མཁའ་སྟོང་པ་ལ་མིག་དང་སེམས་མ་ཡེངས་པར་བལྟས་པས། ཕྱིའི་དབྱིངས་ནམ་མཁའ་སྟོང་པ་ལ་ནང་གི་དབྱིངས་རྣམ་པར་དག་པའི་སྒྲོན་མ་རིག་པ་སྟོང་གསལ་དུ་འཆར་རོ། །དེའི་ཡོན་ཏན་ནི། ཀློང་གསལ་ལས། དེ་ལྟར་སེམས་ཀྱི་གནད་གཟིར་བས། །སྐུ་གསུམ་རིག་པ་སྟོང་པར་འཆར། །ཞེས་སོ། །མ་གཟིར་བའི་སྐྱོན་ནི། དེ་ཉིད་ལས། དེ་ལྟར་སེམས་ཀྱི་གནད་མེད་ན། །རིག་པ་ཡུལ་ལ་ལྡོག་པར་འགྱུར། །ཞེས་སོ། ། གཉིས་པ་གནད་གསུམ་གྱིས་འོད་གསལ་ལྟ་བ་ལ། འཆར་བྱེད་སྒོ་ཡི་གནད། འཆར་གཞི་ཡུལ་གྱི་གནད། ཇི་ལྟར་འཆར་བ་(20ན)རླུང་གི་གནད་དང་གསུམ་ལས། དང་པོ་འཆར་བྱེད་སྒོ་ཡི་གནད་ནི། སྒོ་གནད་མིག་ནི་ཕྱེད་བཙུམ་ཟིམ་བུར་བལྟ། ཞེས་པ་སྟེ། དེ་ཡང་མིག་ཧར་གྱིས་ཕྱེས་ཏེ་བལྟས་པས་མིག་གི་རྣོ་ཉམས་ཤིང་འོད་གསལ་གྱི་སྣང་བ་མངོན་དུ་མི་འགྱུར་བས་ན་ཕྱེད་བཙུམ་གྱིས་བལྟ་བར་བྱ་བ་ཡིན་ལ། སྒོའི་གནད་འབྱོངས་པའི་ཚད་ཡུལ་ལ་ཇི་ཙམ་གཏད་ཀྱང་ཚུགས་པའོ། །གཉིས་པ་འཆར་གཞི་ཡུལ་གྱི་གནད་ནི། འོད་གསལ་འཆར་སླ་བའི་ཆེད་དུ་ཉིན་མོ་ཉི་མ་ལ་གྲུ་གང་རེག་པའི་སར་བལྟ་བ་དང་། མཚན་མོ་ཡང་མིག་ལ་ཚ་བའི་སྐྱོན་བསལ་བ་དང་འོད་གསལ་ལ་བརྟན་པ་ཐོབ་ཕྱིར་ཟླ་བ་ལའང་དེ་བཞིན་དུ་བལྟ་ཞིང་། མར་མེའི་སྟེང་དུ་བལྟས་པས་དང་པོ་དམར་སེར་རྩའི་ཆུན་པོ་གཤིབ་པ་ལྟ་བུ་ལས་མི་མཐོང་། བར་དུ་དབྱིངས་སྣང་དང་ཐིག་ལེ་འགུལ་འཕྲིག་གི་རྣམ་པར་འཆར་བ་ཡིན། ཐ་མ་དབྱིངས་སྣང་མཛེས་ཤིང་དྭངས་ལ་གསལ་བ་རྒྱ་ཆེ་བར་སྣང་བའོ། །གཞན་ཡང་། ཡི་གེ་མེད་པ་ལས། མིག་ནི་ནམ་མཁའི་ཁམས་སུ་བལྟ། །ཞེས་དང་། ཀློང་གསལ་ལས། རྐྱེན་བྲལ་གསུམ་ལ་གསལ་བར་འགྱུར། །ཞེས་པས། ཡུལ་རྐྱེན་དང་བྲལ་བ་ནམ་མཁའ་སྟོང་པ། དབང་པོ་རྐྱེན་དང་བྲལ་བ་ཆུའི་སྒྲོན་མ། གནས་རྐྱེན་དང་བྲལ་བ་དྭངས་ཤིང་མཐོ་ལ་དབེན་པའི་གནས་སུ་(20བ)སྔ་གྲོ་ནུབ་དང་ཕྱི་དྲོ་ཤར་ཕྱོགས་སུ་བལྟས་ཏེ་སྡོད་པ་དང་། དཀར་ཁུང་དང་གསལ་ལ་ལམ་ལ་བལྟས་པས་ཆོག་པ་ཡིན་ནོ། ། གསུམ་པ་ཇི་ལྟར་འཆར་བ་རླུང་གི་གནད་ནི། རླུང་གནད་མཆུ་སོ་ཅུང་ཟད་མ་རེག་པའི༔ བར་ནས་དབུགས་ཀྱི་འབྱུང་འཇུག་དལ་བར་བསླབ༔ ཅེས་པ་སྟེ། དེ་ཡང་རླུང་ཞེས་བྱ་བ་ནི་གྱ་གྱུ་ཅན་རྣམ་རྟོག་གི་བཞོན་པར་གྱུར་ནས་བདེ་བར་གཤེགས་པའི་སྙིང་པོ་ཅན་ཡང་བསླུ་བར་འགྱུར་བས་ན་དེའི་རྒྱུ་འགག་པར་བྱེད་པའི་ཐབས་སུ་མཆུ་སོ་གཉིས་བག་ཙམ་མ་རེག་པ་བྱས་ཏེ། རླུང་སྣ་ལས་མི་གཏོང་བར་ཁ་ནས་དལ་བུས་འབྱུང་འཇུག་བྱེད་པ་ལ་བསླབ་པ་དང་ཡུད་ཙམ་ཕྱི་རུ་འདུ་བར་བྱའོ། །དེ་སྐད་དུ་ཀློང་གསལ་ལས། ཕྱི་ཡི་རླུང་ནི་དལ་ཞིང་སྙོམས། །ཡུད་ཙམ་ཕྱི་རུ་འདུས་པ་ཡིས། །རླུང་གི་འགྲོ་འོང་ཆད་པར་འགྱུར། །ཞེས་སོ། །དེའི་གནད་ཀྱང་། ཤེས་པ་མངོན་གྱུར་ངང་ལ་གཡོ་མེད་སྡོད༔ དེ་དག་རླུང་རིག་དལ་བའི་གནད་དུ་མཆོག༔ ཅེས་པ་སྟེ། རིག་པ་གཡོ་མེད་ཀྱི་ངང་དུ་འདུག་པ་ནི་རླུང་རིག་དལ་བའི་གནད་མཆོག་ཏུ་གྱུར་པ་ཡིན་ནོ། ། ད་ནི་མི་འགུལ་བ་གསུམ་གྱིས་གཞི་བཟུངས་ཏེ་ལུས་ངག་ཡིད་གསུམ་གྱི་བྱ་བ་དགུ་ཕྲུགས་སུ་བཏང་དགོས་པར་གདམས་པ་ནི། ལུས་མི་འགུལ་བར་དུར་ཁྲོད་རོ་བཞིན་སྡོད༔ ངག་ནི་མི་འགུལ་ལྐུག་པ་ལྟ་བུར་སྡོད༔ ཤེས་པ་མི་(21ན)གཡོ་མངོན་གྱུར་ངང་དུ་བཞག༔ སྒོ་གསུམ་བྱ་བ་དགུ་ཕྲུགས་གནད་དུ་ཤེས༔ ཞེས་པ་སྟེ། དེ་ལྟར་ཉམས་སུ་ལེན་པའི་དུས་སུ་ལུས་མི་འགུལ་བ་དུར་ཁྲོད་ཀྱི་མི་རོ་ལྟ་བུར་སྡོད་པ་དང་། ངག་སྨྲ་བཅད་ལས་མི་འགུལ་བར་ལྐུག་པ་བཞིན་སྡོད་པ་དང་། སེམས་མ་བཅོས་པར་ཤེས་པ་འོད་གསལ་དུ་མཆེད་པ་མངོན་དུ་བྱེད་པའི་ངང་ལས་མི་འགུལ་བར་སྡོད་པའོ། །གཞན་ཡང་ལུས་ངག་ཡིད་གསུམ་གྱི་བྱ་བ་མ་བཏང་ན་ཉམས་ལེན་ལ་མི་གནས་པས་དགུ་ཕྲུགས་སུ་བཏང་སྟེ། ཀློང་གསལ་ལས། མངོན་སུམ་གནད་དུ་དབབ་པའི་ཕྱིར། །ཕྱི་ནང་གསང་བའི་བྱ་བ་ནི། །ལུས་ངག་ཡིད་ཀྱིས་དགུ་ཕྲུགས་བཏང་། །ཞེས་པས། དེ་ལ་ལུས་ཀྱི་གསུམ་ནི། ཕྱི་འཇིག་རྟེན་གྱི་བྱ་བ་ཚོང་སོ་ནམ་ལ་སོགས་སྣ་ཚོགས་པ་དང་། ནང་དམན་པའི་དགེ་བ་ཕྱག་དང་བསྐོར་བ་སོགས་དང་། གསང་བ་རྣམ་གཡེང་དང་འདུ་འཛི་སྤངས་ཏེ་གཅིག་པུར་གནས་པའོ། །ངག་གི་གསུམ་ནི། ཕྱི་འཇིག་རྟེན་གྱི་འཁྲུལ་གཏམ་སྣ་ཚོགས། ནང་བཟླས་བརྗོད་ཁ་འདོན། གསང་བ་སྨྲ་བརྗོད་ཇི་སྙེད་པ་བཀག་ནས་ལྐུག་པ་ལྟ་བུར་གནས་པའོ། །ཡིད་ཀྱི་གསུམ་ནི། ཕྱི་འཇིག་རྟེན་གྱི་འཁྲུལ་རྟོག་སྣ་ཚོགས། ནང་ཆོས་སྤྱོད་བློ་སྦྱོང་སྣ་ཚོགས། གསང་བ་རྣམ་རྟོག་འཕྲོ་འདུ་སྣ་ཚོགས་བཀག་ནས་དྲན་བསམ་(21བ)རྣམ་རྟོག་དང་བྲལ་བར་གནས་པའོ། །དེ་ལྟར་བྱ་བ་བཏང་བའི་ཕན་ཡོན་ནི། ཀློང་གསལ་ལས། ལུས་ངག་འཁྲུལ་པ་རྒྱུན་ཆད་ནས། །ཡེ་ཤེས་རྒྱུད་ལ་གནས་པར་འགྱུར། །ཞེས་སོ། །མ་བཏང་བའི་སྐྱོན་ནི། དེ་ཉིད་ལས། བྱར་མེད་རྒྱུད་ལ་མ་གནས་ན། །རིག་པའི་དོན་ལ་རིག་པ་མེད། །ཅེས་སོ། །ལེའུའི་སྐབས་བསྡུ་བ་ནི། སྒོ་གསུམ་གྱི་གནད་བཤད་པའི་ལེའུ་སྟེ་བདུན་པའོ༔ ས་མ་ཡ༔ གུ་ཧྱ༔ གསུམ་པ་སྒྲོན་མེའི་རྣམ་བཞག་བསྟན་པ་ལ། གནས་ལུགས་གཞིའི་སྒྲོན་དྲུག །རྣལ་འབྱོར་ལམ་གྱི་སྒྲོན་བཞི། དེ་དག་རང་བྱུང་དུ་གནས་པའི་ཚུལ་བསྟན་པ་གསུམ་ལས། དང་པོ་གནས་ལུགས་གཞིའི་སྒྲོན་དྲུག་བསྟན་པ་ནི། གནས་ལུགས་གཞི་ཡི་སྒྲོན་མ་རྣམ་པ་དྲུག༔ ལུས་ཀྱི་དྭངས་མ་ཙིཏྟ་ཤ་ཡི་སྒྲོན༔ རྩ་ཡི་དྭངས་མ་ཀ་ཏི་ཤེལ་གྱི་སྦུག༔ སྒོ་ཡི་དྭངས་མ་རྒྱང་ཞགས་ཆུ་ཡི་སྒྲོན༔ འདི་གསུམ་སྣོད་ཀྱི་སྒྲོན་མ་རྣམ་གསུམ་སྟེ༔ ཕྱི་འབྱུང་དྭངས་མ་ནང་དབྱིངས་རྣམ་དག་དང་༔ ནང་འབྱུང་དྭངས་མ་ཐིག་ལེ་སྟོང་སྒྲོན་དང་༔ འཆར་གཞི་ཤེས་རབ་རང་བྱུང་སྒྲོན་མ་རྣམས༔ བཅུད་ཀྱི་སྒྲོན་མ་རྣམ་པ་གསུམ་ཞེས་བྱ༔ ཞེས་པ་སྟེ། དེ་ཡང་སྤྱིར་ཐེག་པ་འདི་རང་ལམ་གྱི་རྩ་དང་ཐིག་ལེའི་བཤད་པ་ཞིག་ཡོད་པ་ཨ་ཏིའི་ཨ་ནུ་ཞེས་བྱ་བ་ཡིན་པས་དེའི་ངང་(22ན)ཚུལ་ཤེས་དགོས་ཏེ། མ་དག་པའི་ཉོན་མོངས་རླུང་སེམས་རགས་པ་མངོན་གྱུར་གྱི་སྒོ་ཁ་དང་། ཕྲ་བ་ལྐོག་གྱུར་གྱི་སྒོ་སྣ་བུག་གཉིས་ཡིན་ཏེ། དེའི་རྒྱུ་ཚུལ་གློ་བ་ནི་རྩ་གྲོ་སོག་གི་སྦུ་གུ་ཙམ་ཞིག་འབྱུང་འཇུག་གི་རླུང་གིས་གང་བ་ལས་འཕེལ་བ་ཆེར་མཆེད་ན་ཚ་བའི་ནད་དང་། བྲི་བར་གྱུར་ན་གྲང་བའི་ནད་འབྱུང་ལ། དྲང་པོར་རྒྱུ་ཚེ་ཚ་གྲང་ཆ་སྙོམས་པར་འགྱུར་བ་དང་། སེམས་ཀྱི་རང་བཞིན་ཆོས་ཉིད་ཀྱི་གདངས་སྐྱེས་བུ་ཕྱེ་བོ་འདྲ་བ་དེ་རླུང་རྟ་རྒོད་ལོང་བ་ལྟ་བུ་དང་འདྲེས་ནས་རྣམ་པར་རྟོག་པ་རྩལ་སྒོ་ལྔའི་ཡུལ་ལ་ཤར་ནས་ལས་དང་ཉོན་མོངས་པའི་བྱེད་ལས་ཅན་ཏེ། དུར་ཁྲོད་ཕུང་པོར་རོལ་པ་ལས། སེམས་ཀྱི་ངོ་བོ་ཡེ་ཤེས་ཏེ། །དེ་ལ་གཟུང་འཛིན་རྩལ་དུ་ཤར། །དབུགས་ལ་རྟ་བྱས་རྐྱེན་དང་འཕྲད། །ཅེས་སོ། །སྐབས་འདིར་བྱེ་བྲག་ཏུ་བཤད་པར་བྱ་བ་སྒྲོན་མ་རྣམ་པ་དྲུག་གི་དང་པོ་སྣོད་ཀྱི་སྒྲོན་མ་རྣམ་པ་གསུམ་ནི། ཐལ་འགྱུར་ལས། ཙིཏྟ་རིན་ཆེན་གཞལ་ཡས་ན། །ཞེས་པ་ལྟར་ལུས་ཀྱི་དྭངས་མ་ཙིཏྟ་ཤའི་སྒྲོན་མའི་སྦུབས་སུ། དཀར་འཇམ་རྩའི་སྒྲོན་མ་ཀ་ཏི་ཤེལ་གྱི་སྦུ་གུ་ཅན་ནི། གསེར་ཕྲེང་ལས། རིན་ཆེན་རྒྱ་མཚོར་འབྲེལ་བའི་རྩ། །དཀར་འཇམ་ཁོག་པ་སྟོང་པ་ནི། །ཐིག་ལེ་ཁྲག་གིས་མ་གོས་པར། །ཡེ་ཤེས་ཆེན་པོ་དེ་ནས་རྒྱུ། །ཞེས་པ་ལྟར་ལུས་(22བ)དང་པོ་ཆགས་པའི་དུས་ན་ཆུའི་བྱེད་ལས་ཀྱིས་ཆགས་པའི་བསྐྱེད་བྱེད་ཀྱི་རྩའི་མདུད་པ་ན་སྒྲོན་མའི་སྤྱན་དང་འབྱུང་བའི་སྤྱན་གཉིས་སྔོན་དུ་ཆགས་ནས་འབྱུང་བའི་སྤྱན་ལས་ཕུང་པོར་གྲུབ་ཅིང་། སྒྲོན་མའི་སྤྱན་ལས་ཡེ་ཤེས་ཀྱི་འོད་སྣང་གསལ་བྱེད་མིག་གི་ཨ་འབྲས་ཀྱི་དཀྱིལ་ན་རྩ་བ་མེན་གྱི་རྭ་འདྲ་བ་རྩ་བ་ཕྲ་ཞིང་རྩེ་མོ་ཡངས་པ་གཉིས་ཆགས་ཏེ། དེ་ལ་དཀར་ནག་ཕྱེད་མ་ཆུའི་རང་བཞིན་དྭངས་ལ་གསལ་བ་བྱུང་བས་རྒྱང་ཞགས་ཆུའི་སྒྲོན་མ་ཞེས་བྱ་བ་སྟེ། ངེས་ཚིག་ནི་རིག་ཆའི་གདངས་ཕྱི་རོལ་གྱི་ཡུལ་ལ་མཐོང་བས་རྒྱང་ཞེས་བྱ་ལ། མཐོང་བ་དེ་ཡང་སྐྱེས་བུ་ཡོད་མེད་ཀྱི་རྗེས་སུ་འཆིང་གྲོལ་བྱེད་པ་ན་ཞགས་པའི་སྒྲ་ཞུགས་པའོ། ། གཉིས་པ་བཅུད་ཀྱི་སྒྲོན་མ་རྣམ་པ་གསུམ་ནི། དབྱིངས་རྣམ་པར་དག་པའི་སྒྲོན་མ་ཞེས་བྱ་བ་འབྱུང་ལྔའི་སྙིགས་མ་དྭངས་མར་འཕོས་པའི་འོད་ལྔ་སྟེ། དེ་ཡང་མཁར་སྣང་གི་དྭངས་མ་མཐིང་ག་དང་སྔོ་སྐྱ། ཆུར་སྣང་གི་དྭངས་མ་དཀར་པོ་དང་སྐྱ་བོ། མེར་སྣང་གི་དྭངས་མ་དམར་པོ་དང་ཁམ་པ། སར་སྣང་གི་དྭངས་མ་སེར་པོ་དང་སེར་ནག །རླུང་སྣང་གི་དྭངས་མ་ལྗང་གུ་དང་ལྗང་སྐྱ། དེ་དག་དང་པོ་མ་དག་པའི་སྣང་བ་ལ་ཁ་དོག་ཇི་ལྟར་སྣང་བ་དེ་བཞིན་དབྱིངས་སུ་འཕོ་བའི་ཚེ་ཡང་སྣང་བའོ། །ངེས་ཚིག་ནི་འབྱུང་ལྔའི་དྭངས་མ་འོད་ལྔར་སྣང་བས་དབྱིངས་དང་། དངོས་ཞེན་(23ན)དག་པས་རྣམ་པར་དག་པ། དེ་ལ་བརྟེན་ནས་རྡོ་རྗེ་ལུ་གུ་རྒྱུད་ཀྱི་སྣང་བ་གསལ་བས་ན་སྒྲོན་མ་ཞེས་བྱའོ། །ཐིག་ལེ་སྟོང་པའི་སྒྲོན་མ་ཞེས་བྱ་བ་ནི་ནང་འབྱུང་ལྔ་པོ་དྭངས་མར་འཕོས་པ་སྟེ། སེམས་ཀྱི་དྭངས་མ་མཐིང་ག །ཁྲག་གི་དྭངས་མ་དཀར་པོ། ཤའི་དྭངས་མ་སེར་པོ། དྲོད་ཀྱི་དྭངས་མ་དམར་པོ། དབུགས་ཀྱི་དྭངས་མ་ལྗང་གུ་སྟེ། དྭངས་མ་དེ་དག་མུ་ཁྱུད་ཀྱི་རྣམ་པར་སྣང་བས་ན་ཐིག་ལེ་སྟེ་དོན་ལ་ཟླུམ་པོ་གྲྭ་ཟུར་མེད་པ་རྨ་བྱའི་སྒོ་ང་ལྟ་བུ་ཞིག་གོ ། ངེས་ཚིག་ནི། མུ་ཏིག་ཕྲེང་བ་ལས། ཐིག་ནི་འགྱུར་བ་ཡོད་མ་ཡིན། །ལེ་ནི་ཁྱབ་ཅིང་ཡུལ་ལ་སྣང་། །སྟོང་པ་དངོས་པོ་མཚན་མ་མེད། །སྒྲོན་མས་མུན་སེལ་སྣང་བར་འགྱུར། །ཞེས་སོ། །དེ་ཡང་སྙིང་དབུས་ཀ་ཏི་ཤེལ་སྦུག་གི་ནང་ན་ཡོད་པ་ནང་གི་དབྱིངས་ཐིག་དང་། གཟིགས་སྟངས་ཀྱིས་གཅུན་པས་ཕྱིར་སྣང་བ་གདངས་ཀྱི་དབྱིངས་ཐིག་སྟེ་གཉིས་སུ་བཞེད་པ་ཡིན་ནོ། །ཤེས་རབ་རང་བྱུང་གི་སྒྲོན་མ་ཞེས་བྱ་བ་ནི། སྟོང་གསལ་འགག་པ་མེད་པའི་རིག་པ་བདེ་གཤེགས་སྙིང་པོ་སྒྲོན་མ་ལྔ་ཡི་འཆར་གཞིར་ཡེ་ནས་འབྲལ་མེད་དུ་གནས་པའོ། །སྣང་ཚུལ་གཟིགས་སྟངས་ཀྱིས་གཅུན་པས་ནང་གི་རིག་པ་ཤིན་ཏུ་དྭངས་ལ་ཡུལ་མེད་པ་ཞིག་ཉམས་སུ་མྱོང་བ་ཡིན། དེའི་རྩལ་ལས་ཡུལ་ཤེས་ཀྱི་(23བ)ཤེས་རབ་རྣོ་ལ་མྱུར་བ་དང་ཚིག་དོན་ཀློང་རྡོལ་དུ་འབྱུང་བ་རྣམས་སོ། །ངེས་ཚིག་ནི། མུ་ཏིག་ཕྲེང་བ་ལས། ཤེས་པས་ཆོས་རྣམས་གཅིག་ཅར་རྟོགས། །རབ་ནི་ཀུན་གྱི་རྩེ་མོར་གྱུར། །རང་ནི་གཞན་ལྟོས་ཆོས་དང་བྲལ། །བྱུང་བས་མ་བཀག་ལྷུག་པར་སྣང་། །སྒྲོན་མས་འཆར་བྱེད་སྒོ་མ་འགགས། །ཞེས་སོ། ། གཉིས་པ་རྣལ་འབྱོར་ལམ་གྱི་སྒྲོན་བཞི་བསྟན་པ་ནི། མདོར་ན་རྒྱང་ཞགས་ཆུ་ཡི་སྒྲོན་མ་དང་༔ ནང་དབྱིངས་རྣམ་པར་དག་པའི་སྒྲོན་མ་དང་༔ ཐིག་ལེ་སྟོང་པའི་སྒྲོན་མ་ཞེས་བྱ་དང་༔ ཤེས་རབ་རང་བྱུང་སྒྲོན་མ་དང་བཅས་པ༔ རྣལ་འབྱོར་ལམ་གྱི་སྒྲོན་མ་རྣམ་བཞི་སྟེ༔ ཞེས་བཤད་མ་ཐག་པའི་སྣོད་ཀྱི་སྒྲོན་མ་རྣམ་གསུམ་ལ་མིང་གསུམ་དུ་བརྗོད་ཀྱང་། དོན་ལ་རྩ་བ་སྙིང་། སྡོང་པོ་རྩ། འབྲས་བུ་མིག་སྟེ་གསུམ་ཀ་གཅིག་ཏུ་འདུ་ཕྱིར་རྒྱང་ཞགས་ཆུའི་སྒྲོན་མ་དང་། བཅུད་ཀྱི་སྒྲོན་མ་རྣམ་གསུམ་བཅས་བཞི་པོ་ནི་རྣལ་འབྱོར་ལམ་གྱི་སྒྲོན་མ་རྣམ་བཞི་ཞེས་གནད་གཅིག་ཏུ་བསྡུས་ཏེ་ཉམས་སུ་ལེན་པ་ཡིན་ནོ། ། གསུམ་པ་དེ་དག་རང་བྱུང་དུ་གནས་པའི་ཚུལ་བསྟན་པ་ནི། ཡེ་ནས་གནས་ལུགས་གཞི་ཡི་སྒྲོན་མ་དྲུག༔ སེམས་ཅན་ཀུན་ལ་རང་བྱུང་གནས་པ་ལ༔ མངོན་དུ་མ་གྱུར་བག་ལ་ཉལ་ནས་སོང་༔ ཞེས་པ་སྟེ། རང་ཤར་ལས། ཐིག་ལེ་(24ན)སྟོང་པའི་སྒྲོན་མ་དང་། །རིག་པ་དབྱིངས་ཀྱི་སྒྲོན་མ་དང་། །ཤེས་རབ་རང་བྱུང་སྒྲོན་མ་དང་། །རྒྱང་ཞགས་ཆུ་ཡི་སྒྲོན་མ་རྣམས། །སེམས་ཅན་ཀུན་ལ་གནས་པའོ། །ཞེས་པ་ལྟར། གནས་ལུགས་གཞིའི་སྒྲོན་མ་རྣམ་པ་དྲུག་པོ་སེམས་ཅན་ཀུན་ལ་ཡེ་ནས་རང་བྱུང་དུ་གནས་ཀྱང་ཤེས་རབ་ཀྱི་མིག་ལྡོངས་ཏེ་མངོན་དུ་མ་གྱུར་པའོ། །ལེའུའི་སྐབས་བསྡུ་བ་ནི། གཞི་དང་ལམ་གྱི་སྒྲོན་མའི་ངང་ཚུལ་བསྟན་པའི་ལེའུ་སྟེ་བརྒྱད་པའོ༔ ས་མ་ཡ༔ གུ་ཧྱ༔ བཞི་པ་ཇི་ལྟར་ཉམས་སུ་ལེན་པའི་ཚུལ་བསྟན་པ་ལ་བཞི། འོད་གསལ་མངོན་དུ་བྱེད་པ། ཉམས་ལེན་སྲང་དུ་འཛུད་པ། ལམ་གྱི་གོལ་ས་བསྟན་པ། མྱུར་ལམ་གཞན་ལས་ཁྱད་པར་འཕགས་ཚུལ་ལོ། །དང་པོ་འོད་གསལ་མངོན་དུ་བྱེད་པ་ལའང་། འོད་གསལ་དངོས་དང་། ཉམས་ལེན་གྱི་གནད་བཤད་པ་གཉིས་ལས། དང་པོ་འོད་གསལ་དངོས་ལ་བསླབ་པ་ནི། ད་ནི་ཚུལ་བཞིན་ཤེས་པའི་ཤེས་རབ་ཀྱིས༔ མངོན་གྱུར་སྙིགས་མ་དྭངས་མར་སྦྱོང་བའི་ཐབས༔ བརྒྱུད་གསུམ་རིག་འཛིན་བླ་མ་དམ་པ་དང་༔ ཕྱོགས་བཅུ་དུས་བཞིའི་རྒྱལ་བ་སྲས་དང་བཅས༔ འོད་ཕུང་འཇའ་སྤྲིན་ལྟ་བུའི་རྣམ་པ་རུ༔ ཐིབས་ཀྱིས་བྱུང་ནས་མིག་གི་ཨ་འབྲས་ནས༔ ཀ་ཏིའི་ལམ་ (24བ)ཞུགས་དབྱིངས་ཐིག་རོལ་པར་ཐིམ༔ ཆེར་མཆེད་རང་ལུས་ཕུང་ཁམས་སྐྱེ་མཆེད་དང་༔ ཕྱི་ནང་སྣོད་བཅུད་དངོས་པོ་ཐམས་ཅད་ཀུན༔ འོད་ཕུང་རྣམ་ལྔའི་རོལ་པར་མེར་གྱིས་ཞུ༔ ཐམས་ཅད་དག་དབྱིངས་དྭངས་མའི་རོལ་པ་རུ༔ གསལ་ཞིང་ཡུན་གཅིག་མཉམ་པར་བཞག་པའི་མཐར༔ བསམ་བྱ་བསྒོམ་དམིགས་ཐམས་ཅད་ཆམ་བཞག་སྟེ༔ འོད་གདངས་མངོན་གྱུར་ལམ་བྱེད་བྱར་མེད་སྡོད༔ ཕྱི་ཡི་ནམ་མཁའ་སྟོང་དབྱིངས་ལས་གཞན་པའི༔ འོད་གདངས་ཅི་ཤར་གང་སྣང་ཐམས་ཅད་ཀུན༔ ནང་དབྱིངས་རྣམ་པར་དག་པའི་སྒྲོན་མ་སྟེ༔ བཟང་ངན་རེ་དོགས་ཡིད་དཔྱོད་བཅས་བཅོས་སོགས༔ སྤངས་ཏེ་མངོན་གྱུར་ངང་ལ་ཆམ་གྱིས་བཞག༔ ཅེས་པ་སྟེ། ད་ནི་འཁོར་འདས་ཀྱི་ཆོས་ཐམས་ཅད་སོ་སོར་རྟོག་པའི་ཤེས་རབ་ཀྱིས་གཏན་ལ་ཕབ་སྟེ་བདག་མེད་རྟོགས་པའི་ཤེས་རབ་མངོན་དུ་གྱུར་ནས། མ་དག་སྙིགས་མའི་སྣང་བ་དྭངས་མ་འོད་གསལ་དུ་སྦྱོངས་པའི་ཐབས་ཟབ་མོ་ནི། དེ་ཡང་ཐོག་མར་བླ་མའི་རྣལ་འབྱོར་ལམ་གྱི་སྲོག་ཏུ་བཟུང་སྟེ་མོས་གུས་ཕྱག་རྒྱ་ཆེན་པོའི་ལམ་ཁྱེར་དང་མ་བྲལ་བའི་ངང་ནས་དབང་བཞི་བླངས་ཤིང་ཐུགས་ཡིད་བསྲེ་བ་ནི་རང་རྒྱུད་ལ་རྟོགས་པའི་ཡེ་ཤེས་ཁྱད་པར་ཅན་སྐྱེ་བའི་ཐབས་(25ན)རྨད་དུ་བྱུང་བ་ཡིན་པས་གཞུང་འདི་ཉིད་ཀྱི་བླ་མའི་རྣལ་འབྱོར་བྱིན་རླབས་ཆར་འབེབས་ལྟར་ནན་ཏན་དུ་བྱའོ། །དེ་ནས་རང་གི་སྙིང་ག་ནས་འོད་ཟེར་འཕྲོས་པས་དགོངས་བརྡ་སྙན་བརྒྱུད་ཀྱི་བླ་མ་རིག་འཛིན་གྱི་ས་ལ་བཞུགས་པ་རྣམས་དང་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་རྣམས་ཀྱི་ཐུགས་རྒྱུད་བསྐུལ། དབང་བྱིན་དངོས་གྲུབ་ཡེ་ཤེས་ཡོན་ཏན་ཐམས་ཅད་འོད་ཕུང་ཁ་དོག་ལྔ་ལྡན་འཇའ་ཡི་སྤྲིན་ཕུང་ལྟ་བུའི་རྣམ་པར་ཐིབས་ཀྱིས་བྱུང་། མིག་གི་ཨ་འབྲས་ནས་ཞུགས་རྩ་ཀ་ཏི་ཤེལ་གྱི་སྦུ་གུ་ཅན་གྱི་ལམ་བརྒྱུད་ནས་ནང་དབྱིངས་རྣམ་དག་གི་སྒྲོན་མར་ཐིམ་པས། འོད་མདངས་དེ་ཉིད་ཆེར་མཆེད་ནས་རང་ལུས་ཕུང་ཁམས་སྐྱེ་མཆེད་ཕྱི་ནང་སྣོད་བཅུད་ཐམས་ཅད་ལན་ཚྭ་ཆུ་རུ་ཞུ་བ་བཞིན་དུ་འོད་ཕུང་རྣམ་ལྔའི་རོལ་པར་མེར་གྱིས་ཞུ་ནས་ཐམས་ཅད་དག་དབྱིངས་དྭངས་མའི་རོལ་པར་འབྱམས་ཀླས་པའི་ངང་དུ་བསམ་བྱ་བསྒོམ་དམིགས་དང་བྲལ་བར་བཞག་སྟེ། ཕྱིའི་དབྱིངས་ནམ་མཁའ་སྟོང་གསལ་ལ་གོ་འབྱེད་པའི་དཀྱིལ་དུ་རིག་པ་ཐིམ་འགྲོ་བ་ལྟ་བུར་གཏད་པས། འོད་གདངས་སྔོ་རེ་བ་ཤིན་ཏུ་དག་པ་ཞིག་ཐོག་མར་སྣང་ལ། དེ་ལས་སྣང་བ་མཆེད་པའི་ཚུལ་དུ་འོད་ལྔའི་གདངས་ཁ་དོག་ལ་ཟ་འོག་ཁ་ཕྱེ་བ་ལྟ་བུར་འཇའ་ཡི་སྣམ་(25བ)བུ་གྱེན་བསྒྲེང་དང་རྩིབ་ཤར་གྱི་རྣམ་པར་སྣང་བ་ནི་ནང་དབྱིངས་ཕྱིར་གསལ་བ་དབྱིངས་རྣམ་པར་དག་པའི་སྒྲོན་མ་སྟེ། ཐལ་འགྱུར་ལས། དབྱིངས་ནི་ཕྱི་དང་ནང་དུ་སྟེ། །ཕྱི་ནི་སྤྲིན་བྲལ་མཁའ་ལ་འཛིན། །ནང་དབྱིངས་སྒྲོན་མ་དག་ཏུའོ། །ཞེས་སོ། །དེ་ལྟར་དབྱིངས་ཀྱི་ཀློང་དུ་ཐིག་ལེ་སྟོང་པའི་སྒྲོན་མ་ཀོ་མའི་ཆུ་ལ་རྡོ་བོར་བའི་རི་མོའི་རྣམ་པ་ལྟར་ཐིག་ཟླུམ་འོད་ལྔའི་མུ་ཁྱུད་ཅན་ལ་སོགས་པར་སྣང་ཞིང་། དེ་དག་གི་གོ་མཚམས་སུ་ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་ཅེས་བྱ་བ་མུ་ཏིག་བསྟར་ལ་རྒྱུས་པའམ་གསེར་ཀྱི་སྐུད་པ་ལྡིང་བ་ལྟར་སྣང་བ་ལ་ཤེས་རབ་ཀྱི་གདངས་ཞེས་བྱ་སྟེ། དེ་དག་དང་པོའི་གནས་སྐབས་ཕྲ་ཞིང་འཁྱོག་ལ་འགྲོ་འོང་གི་རྣམ་པ་ཅན་དུ་སྣང་ཞིང་རེས་གསལ་བ་དང་རེས་མི་གསལ་བ་སོགས་འབྱུང་བས། དེ་དག་གང་ལ་ཡང་བཟང་པོ་ཞེས་བླང་བྱ་ངན་པ་ཞེས་དོར་བྱ་ཨེ་འཆར་སྙམ་པའི་རེ་བ་མི་འཆར་སྙམ་པའི་དོགས་པ་སོགས་ཡིད་དཔྱོད་བཅས་བཅོས་ཐམས་ཅད་སྤངས་ཏེ་དབྱིངས་རིག་མི་འགྱུར་བའི་ངང་དུ་འཇོག་པ་གནད་དམ་པ་ཡིན། དེ་ལྟར་དབྱིངས་ཐིག་གི་སྣང་བ་དེ་དག་ཕྱི་ནས་ཤར་བ་མ་ཡིན་ཏེ། བལྟ་བ་ཕྱིར་བལྟས་ཀྱང་མཐོང་བ་ནང་མཐོང་བ་ཡིན་པའི་ཚུལ་རང་ལས་གཞན་གྱིས་མི་མཐོང་བ་དེས་སྟོན་ལ། དབྱིངས་ཕྱི་རུ་བཟུངས་རིག་པ་ནང་དུ་ (26ན)བཟུངས་ཏེ། ཕྱི་ནང་རང་རྒྱུད་དུ་མི་གོལ་བར་དབྱིངས་རིག་དབྱེར་མེད་ཀྱི་རོལ་པར་ཞེན་པ་མེད་པའི་བརྟུལ་ཞུགས་ལ་བསླབ་པར་བྱའོ། ། གཉིས་པ་ཉམས་ལེན་གྱི་གནད་བཤད་པ་ནི། སྤྱིར་ན་འགྲོ་དྲུག་འཁྲུལ་པའི་སྣང་བ་རྣམས༔ ཤེས་པ་དང་པོ་ཡུལ་གྱི་རྣམ་པར་མཆེད༔ རྣམ་རྟོག་ཕྱི་མས་ཨ་འཐས་ཉེར་ལེན་པའི༔ ཕྱི་ནང་སྣོད་བཅུད་འདོད་ཡོན་ལྔ་རུ་འཐས༔ མངོན་པར་ཞེན་པའི་རྐྱེན་གྱིས་འཁྲུལ་པར་འཕྱན༔ ལམ་འདིར་བསྟེན་པས་ཤེས་པ་དང་པོ་ཉིད༔ དག་དབྱིངས་དྭངས་མ་ཉིད་དུ་གོ་འཕོས་ཏེ༔ མ་དག་བསྐལ་པ་དབྱིངས་སུ་འཇིག་པ་ཡིན༔ གནད་དེ་ཤེས་པ་ཡང་དག་གནད་ཀྱི་མཆོག༔ ཅེས་པ་སྟེ། དེ་ལ་སྤྱིར་འགྲོ་བ་རྣམས་ཀྱི་ཤེས་པ་དང་པོ་ཉིད་ཕྱི་ནང་སྣོད་བཅུད་འདོད་ཡོན་གྱི་ཡུལ་དུ་རྣམ་པར་མཆེད་པ་ལ། རྣམ་རྟོག་ཕྱི་མས་ཨ་འཐས་ཉེ་བར་བླངས་ཏེ་མངོན་པར་ཞེན་པའི་རྐྱེན་གྱིས་འཁྲུལ་པའི་འཁོར་ལོར་ཁ་འཕྱན་པ་ཡིན་ལ། ཐོད་རྒལ་གྱི་ལམ་འདིར་བསྟེན་པའི་ཤེས་པ་དང་པོ་འོད་གསལ་དྭངས་མ་ཉིད་དུ་གོ་འཕོས་པས་ན་མ་དག་སྙིགས་མའི་བསྐལ་པ་དབྱིངས་སུ་འཇིག་པ་ཡིན་པའི་ཚུལ་ཤེས་པ་ནི་གནད་ཀྱི་མཆོག་ཏུ་བཟུང་བར་བྱའོ། །ལེའུའི་སྐབས་བསྡུ་བ་ནི། འབྱུང་བ་དྭངས་སྙིགས་ཀྱི་ཚུལ་བསྟན་པའི་ལེའུ་སྟེ་དགུ་པའོ༔ ས་(26བ)མ་ཡ༔ གུ་ཧྱ༔ གཉིས་པ་ཉམས་ལེན་སྲང་དུ་འཛུད་པའི་ཚུལ་ནི། འོག་གི་ལེའུ་བཅུ་གསུམ་པ་རུ་འཆད་པར་འགྱུར་བ་ཡིན་ནོ། །གསུམ་པ་ལམ་གྱི་གོལ་ས་བསྟན་པ་ནི། དེ་ལྟར་ཚུལ་བཞིན་རྟོགས་པར་མ་གྱུར་ན༔ ཇི་ལྟར་བསྒོམ་ཀྱང་གཟུང་འཛིན་ལམ་དུ་གོལ༔ དེ་ཕྱིར་ཁྲེགས་ཆོད་ལྟ་བ་གཏན་ཕབ་ནས༔ འཁོར་འདས་རང་སྣང་ཉིད་དུ་རྟོགས་ནས་སླར༔ རང་སྣང་སྣང་ཙམ་ཉིད་ནས་སྟོང་པ་ཉིད༔ ངོ་བོ་སྟོང་ལ་རང་བཞིན་རང་གསལ་ཅན༔ སྟོང་དང་གསལ་བ་ཡ་མ་བྲལ་བ་སྟེ༔ དཔེར་ན་རྙོགས་མ་དྭངས་པའི་ཆུ་བཞིན་དུ༔ ཆུ་དང་དྭངས་གསལ་ཐ་དད་མ་གྲུབ་པ༔ དེ་བཞིན་གཟུགས་བརྙན་སྣ་ཚོགས་འཆར་རུང་བ༔ ཆུ་ཉིད་ཀྱིས་ནི་གཟུགས་བརྙན་སྣང་བ་ལས༔ ཆུ་ལས་གཞན་པའི་གཟུགས་བརྙན་མེད་བཞིན་དུ༔ སེམས་ཉིད་སྟོང་པའི་རང་བཞིན་གསལ་བ་ལས༔ སྣ་ཚོགས་སྣང་བའི་ཆོས་ཀུན་ཤར་བ་སྟེ༔ སྣང་བ་སེམས་མིན་སེམས་ལས་གཞན་མ་ཡིན༔ ནམ་མཁའ་ཉིད་ཀྱིས་འཇའ་ཚོན་སྣང་བ་བཞིན༔ རྒྱུ་རྐྱེན་འཕྲད་པས་རྟེན་ཅིང་འབྲེལ་འབྱུང་སྟེ༔ ཤེས་པ་དང་པོ་ཡུལ་དུ་གྱུར་པ་ལ༔ རླུང་གི་འགྱུ་འཕྲིག་གཡོ་བའི་ཆོ་འཕྲུལ་སྟེ༔ མ་རིག་རྐྱེན་གསུམ་འཐས་པའི་བྱེད་ལས་ཀྱིས༔ གཞི་ཡི་རང་(27ན) མདངས་ལྷུམས་སུ་བསྒྲིབ་པ་ལས༔ འོད་ཀྱི་གདངས་ལྔ་ཤར་ལ་དངོས་འཛིན་གྱི༔ བག་ཆགས་འཐས་པས་འབྱུང་བ་ལྔ་རུ་བསྒྲིབ༔ མདངས་ལྔ་དྭངས་མར་བསྒྲིབ་པས་ནང་འབྱུང་ལྔ༔ ནང་འབྱུང་སྙིམས་མར་འཐས་པའི་ཕྱི་འབྱུང་ལྔ༔ ལུགས་སུ་འབྱུང་སྟེ་འཁོར་བར་འདུ་བྱེད་ཅིང་༔ ལུགས་སུ་ལྡོག་ཏེ་སྟོང་ཁྱབ་དབྱིངས་སུ་འཇིག༔ ཅེས་པ་སྟེ། འདི་ལྟར་འཁོར་བར་འཁྱམས་པའི་གཞི་ནི་མ་རིག་པ་ལས་བྱུང་སྟེ། དེ་ཡང་ཤེས་པ་དང་པོ་ཡུལ་དུ་གྱུར་པ་ལ་འཛིན་པ་ལས་རླུང་གཡོ་བའི་ཆོ་འཕྲུལ་ལས་བརྟན་ཅིང་འཐས་པར་བྱས་པ་ནི་རྒྱུའི་མ་རིག་པ། རྒྱུ་དེ་ཉིད་ལས་འཕྲལ་བྱུང་གི་བག་ཆགས་སྣ་ཚོགས་འདུས་པ་ནི་སྣ་ཚོགས་འདུས་པའི་མ་རིག་པ། དེ་དག་དུས་འཛོམ་པ་ལས་འཁོར་བ་ཡོངས་སུ་གྲུབ་པ་ནི་དེ་མ་ཐག་པའི་མ་རིག་པ་སྟེ། དེ་དག་གི་བྱེད་ལས་ཀྱི་ངོ་བོ་ཤེས་རབ་དང་རྩལ་ཡེ་ཤེས་བསྒྲིབ་པས་གཞིའི་ངང་མདངས་ཀྱི་སྐུ་དང་ཡེ་ཤེས་ཐམས་ཅད་ནང་མདངས་སུ་ནུབ་ནས་འཁོར་བའི་སྣང་སེམས་ཐམས་ཅད་ཤར་བ་སྟེ། དེ་ཡང་ཡེ་ཤེས་ལྔ་མ་རིག་པས་བསྒྲིབ་པའི་ཕྱི་གདངས་འོད་ལྔར་སྣང་བ་ནི་ནང་འབྱུང་དང་འབྱུང་ལྔའི་དྭངས་མ་འབྱུང་ཆེན། དེ་རྣམས་དངོས་འཛིན་བདེན་ཞེན་འཐས་པས་མ་དག་པའི་(27བ)འབྱུང་ལྔར་སྣང་བ་ལ་ཕྱི་འབྱུང་དང་འབྱུང་ཕྲན་སྙིགས་མའི་སྣང་བ་ཞེས་བྱ་སྟེ། འཁྲུལ་པའི་གཞི་དེ་དག་གི་རྩལ་ལས་རྣམ་པར་ཤེས་པ་དང་ཉོན་མོངས་པའི་ཚོགས་རྣམས་མཆེད་དུ་འཁྲུལ་པ་ཡིན་ནོ། །དེ་ལྟར་འཁྲུལ་པའི་རྩ་བ་གཟུང་འཛིན་གཉིས་པོ་སྔར་བཤད་པ་ལྟར་གཏན་ལ་ཕབ་སྟེ་སྣང་སྲིད་འཁོར་འདས་ཀྱི་ཆོས་རྣམས་རང་བཞིན་རྫོགས་པ་ཆེན་པོར་ལ་བཟླ་བར་བྱ་སྟེ། དེ་ཡང་ངོ་བོ་ཀ་དག་གི་ཡེ་ཤེས་རྒྱུ་རྐྱེན་གྱིས་འདུས་མ་བྱས་པས་རྒྱ་ཆད་ཕྱོགས་ལྷུང་དང་བྲལ་བ། རང་བཞིན་འོད་གསལ་བའི་ཡེ་ཤེས་གཏིང་གསལ་སྒྲིབ་གཡོགས་དང་བྲལ་བའི་འཁོར་འདས་ཁྱབ་པར་བརྡལ་བ། ཐུགས་རྗེ་ཀུན་ཁྱབ་ཀྱི་ཡེ་ཤེས་འགག་པ་མེད་པས་འཁོར་འདས་ཀྱི་འཆར་གཞིར་གནས་པའོ། །དེའང་གདོད་མའི་གནས་ལུགས་སྟོང་གསལ་སྤྲོས་པ་དང་བྲལ་བའི་རང་བཞིན་གང་དུའང་མ་གྲུབ་པ་མེ་ལོང་ལྟ་བུ་ལ། དེ་ཉིད་རིག་པ་དང་མ་རིག་པའི་རྣམ་པར་གཏོད་བྱེད་སོ་སོར་ཤར་བས། འཁོར་འདས་ཀྱི་གཟུགས་བརྙན་ཐ་དད་དུ་སྣང་། ཇི་ལྟར་སྣང་ཡང་ཆོས་ཉིད་ཀ་དག་གི་ངང་ལས་མ་འདས་ཤིང་། གདོད་མའི་གཞི་མེ་ལོང་ལྟ་བུ་བཟང་ངན་གང་དུའང་འགྱུར་བ་མེད་དེ། མགོན་པོ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་(28ན)དང་། ཡོན་ཏན་རིན་པོ་ཆེའི་མཛོད་ལས། ཤེས་བྱ་སྣང་བས་མ་བཅིངས་སྟོང་པའི་དངོས། །སྟོང་པ་རང་བཞིན་གསལ་བའི་སྙིང་པོ་ནི། །རིག་པར་བཞུགས་པའི་སྐུ་དང་ཡེ་ཤེས་ཁམས། །འདུ་འབྲལ་མེད་པ་ཉི་མའི་སྙིང་པོ་བཞིན། །ཞེས་པས། སྤྱིར་ཤེས་བྱའི་གཤིས་སྣང་བའི་ཡུལ་དང་མ་འདྲེས་པ་ནི་ཕུང་པོ་ལྔའི་ཉེ་བར་ལེན་པས་རང་བཞིན་གྱི་རྣམ་པར་སྟོང་པ་ཉིད་ཡིན་ལ། དེ་ལྟར་སྟོང་པའི་མཚན་ཉིད་ཀྱང་ཐལ་བྱུང་གི་སྟོང་རྐྱང་དུ་བལྟ་བ་མ་ཡིན་པར་རང་བཞིན་འོད་གསལ་བའི་བདག་ཉིད་ཅན་ཏེ། ཤེས་རབ་སྙིང་པོ་ལས། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་སོ། །དེས་ན་འཁོར་འདས་ཀྱི་ཆོས་ཐམས་ཅད་རྟོག་པས་སྒྲོ་བཏགས་པ་ཙམ་ལས་རང་ངོར་སྐྱོན་གྱིས་བྲི་བ་དང་ཡོན་ཏན་གྱིས་གང་བ་གཉིས་ཀ་མེད་པས་ན། འདིར་རང་བཞིན་རྫོགས་པ་ཆེན་པོའི་ལམ་སྤྲོས་བྲལ་རང་བྱུང་གི་ཡེ་ཤེས་འཆིང་གྲོལ་ལས་འདས་པའི་སྙིང་པོ་རིག་པའི་བདག་ཉིད་ཅན་ལ་སྐུ་དང་ཡེ་ཤེས་ཀྱི་ཆོས་ཁམས་མ་ལུས་པ་ཉི་མ་དང་འོད་ཟེར་གྱི་ཚུལ་དུ་གདོད་ནས་ཡེ་རྫོགས་ཆེན་པོ་ལས་མི་འདའ་བ་ནི་གྲུབ་པའི་མཐའ་ཆེན་པོ་ཡིན་ནོ། །དེ་(28བ)ལྟ་བུའི་གནས་ལུགས་ལ་ངེས་པ་རྙེད་པར་མ་གྱུར་ན་ཇི་ལྟར་བསྒོམ་ཀྱང་གཟུང་འཛིན་གྱི་ལམ་དུ་གོལ་བར་འགྱུར་ཏེ། ཇི་སྐད་དུ། ཁྲེགས་ཆོད་གདིང་དང་མ་ལྡན་ན། །ཐོད་རྒལ་ཤར་ཡང་གཟུང་འཛིན་ཅན། །ཞེས་པའང་གནད་འདི་ལ་དགོངས་ནས་གསུངས་པ་ཡིན་པས་དང་པོ་ཁྲེགས་ཆོད་ཀྱི་ལྟ་བས་སྣང་སྲིད་འཁོར་འདས་ཐམས་ཅད་རིག་པ་གཅིག་ཏུ་ཐག་ཆོད་ཅིང་ངང་མངོན་དུ་གྱུར་པ་ལ་བསླབ་པ་ནི་གནད་ཀྱི་ཡང་གཅེས་དམ་པ་ཡིན་པར་ཤེས་པར་བྱའོ། ། བཞི་པ་མྱུར་ལམ་གཞན་ལས་ཁྱད་དུ་འཕགས་ཚུལ་ནི། ངང་ཚུལ་རྟོགས་པའི་ཤེས་རབ་ཡེ་ཤེས་ཀྱིས༔ མ་དག་འཁོར་བའི་སྣང་ཞེན་ཐམས་ཅད་ཀུན༔ དག་དབྱིངས་དྭངས་མ་ཉིད་དུ་གོ་འཕོས་པའི༔ འཕོ་བ་ཆེན་པོའི་མྱུར་ལམ་ལ་བརྟེན་པས༔ དུས་གསུམ་རྒྱལ་དང་རྒྱལ་སྲས་ཐམས་ཅད་ཀྱི༔ ཐུགས་གསང་ཆོས་ཉིད་རོལ་པའི་ཀློང་ཆེན་པོ༔ མངོན་གྱུར་གྲོལ་ཐོབ་མྱུར་ལམ་སྙིང་པོའི་ཆོས༔ ལམ་དང་སྒྲུབ་པ་གཞན་ལས་ཁྱད་དུ་འཕགས༔ ཞེས་པ་སྟེ། དེ་ལྟར་ཚུལ་བཞིན་རྟོགས་པའི་ཤེས་རབ་དང་ཡེ་ཤེས་ཆེན་པོས་མ་དག་འཁོར་བའི་སྣང་ཞེན་ཐམས་ཅད་འོད་གསལ་དྭངས་མའི་དབྱིངས་སུ་འཕོ་བའི་གདམས་པ་འདི་ཉིད། འདས་པའི་སངས་རྒྱས་རྣམས་ཀྱི་གཤེགས་ཤུལ། (29ན)མ་འོངས་པའི་སངས་རྒྱས་རྣམས་ཀྱིས་བསྒྲུབ་བྱ། ད་ལྟའི་སངས་རྒྱས་རྣམས་ཀྱི་བགྲོད་པ་གཅིག་པུའི་ལམ། གདོད་མའི་སངས་རྒྱས་ཀུན་ཏུ་བཟང་པོའི་དགོངས་པའི་ཀློང་ཆེན་མངོན་དུ་གྱུར་པ་ལ་གྲོལ་བའི་ཐ་སྙད་བཏགས་པ། ཐེག་པ་གཞན་དང་ལམ་མྱུར་བུལ་ཤིང་རྟ་དང་ཉི་ཟླའི་འགྲོས་ལྟར་ཁྱད་པར་ཆེ་བ་མན་ངག་ཨ་ཏི་ཡོ་གའི་ཟབ་ཆོས་འདི་ཉིད་ཁྲེགས་ཆོད་ལས་ཀྱང་ཁྱད་འཕགས་ཀྱི་ཆེ་བ་བདུན་དང་ལྡན་པ་སྟེ། དེ་ཡང་ཁྲེགས་ཆོད་ཀྱིས་རྡོ་རི་བྲག་ལ་སོགས་འཁྲུལ་སྣང་གི་ཡུལ་དག་པར་མི་ནུས་ལ། ཐོད་རྒལ་གྱིས་སྣང་བ་འོད་ལྔར་བྱེད་ལས་ཁྱད་པར་འཕགས། ཁྲེགས་ཆོད་དུ་རྩ་རླུང་འཛིན་རྩོལ་ཅན་བསྟེན་པས་གེགས་དང་གོལ་ས་མང་བ་ལས། ཐོད་རྒལ་གྱིས་དོན་དམ་ཡེ་ཤེས་ཀྱི་རྩ་རླུང་འཛིན་རྩོལ་ལས་འདས་པ་ལམ་དུ་བྱས་པས་དུག་གསུམ་གྱི་ལས་རླུང་རང་མལ་དུ་གསོད་པས་ཁྱད་པར་འཕགས། ཁྲེགས་ཆོད་ཀྱི་སྐྱོན་དང་ཡོན་ཏན་ལྐོག་ཏུ་གྱུར་པ་ལས། ཐོད་རྒལ་གྱིས་ཆོས་ཉིད་བསམ་གྱིས་མི་ཁྱབ་པའི་གདངས་མངོན་དུ་མཐོང་བས་ཁྱད་པར་འཕགས། ཁྲེགས་ཆོད་ཀྱི་ལམ་བློ་དང་ཡིད་དཔྱོད་ཀྱི་ཡུལ་དུ་སོང་བས་ལམ་བསྒྲོད་འཕགས་ཤིན་ཏུ་བུལ་བ་ལས། ཐོད་རྒལ་དུ་སྐུ་དང་ཡེ་ཤེས་ཀྱི་རོལ་པ་མ་བསྒོམ་རང་བྱུང་ལྷུན་གྲུབ་ཀྱི་ངང་དུ་(29བ)ཡིན་པས་ས་ལམ་གཅིག་ཆར་དུ་བརྒལ་བས་ཁྱད་པར་འཕགས། རིག་པ་ཡེ་ནས་འོད་གསལ་དུ་གསུངས་པ་ཁྲེགས་ཆོད་ཀྱིས་སྟོང་གསལ་ཙམ་ལས་བལྟར་མེད་དུ་ཐག་གཅོད་པ། ཐོད་རྒལ་དུ་གནད་གཅུན་པས་ཡེ་ཤེས་ཀྱི་མཐོང་ཕྱེ་སྟེ་ཆོས་ཉིད་ཟེར་གདངས་ལ་མཐོང་བའི་ཁྱད་པར་འཕགས། ཁྲེགས་ཆོད་དུ་དབང་པོ་དྲུག་གི་སྒོམ་དག་པ་འཁྲུལ་སྣང་ལ་ཞེན་པ་སྤོང་བའི་དྭངས་འཚོལ་བ་ལ། ཐོད་རྒལ་དུ་དག་པ་འོད་གསལ་གྱི་སྒོ་ཡེ་ཤེས་ཀྱི་རླུང་གིས་ཕྱེ་བས་ཕྱི་ནང་ཟང་ཐལ་གྱི་དབང་པོས་དབྱིངས་དང་ཡེ་ཤེས་འདུ་འབྲལ་མེད་པའི་སྒྲོན་མ་བཞིའི་སྣང་བ་ལ་ལོངས་སྤྱོད་པའི་ཁྱད་པར་འཕགས། ཁྲེགས་ཆོད་དུ་བརྩོན་འགྲུས་སྙིང་སྟོབས་དྲག་པོས་ཉམས་སུ་ལེན་པའི་སྐྱེས་བུ་གྲོལ་པའི་ས་ལ་ཕེབས་ནའང་ལུས་རྡུལ་ཕྲན་དུ་དེངས་པ་ལས་འོད་གསལ་དུ་མི་སྨིན་པ་ལས། ཐོད་རྒལ་གྱིས་སྤྱན་དང་མངོན་ཤེས་རྫུ་འཕྲུལ་རླབས་པོ་ཆེའི་བདག་ཉིད་འཇའ་ལུས་འཕོ་བ་ཆེན་པོའི་སྐུར་སངས་རྒྱས་པར་འགྱུར་བའི་ཁྱད་པར་འཕགས་པ་སྟེ། ཡོན་ཏན་དེ་དག་དང་ལྡན་པའི་ཐེག་མཆོག་བླ་ན་མེད་པ་འདི་ཉིད་ཀྱི་དོན་ཐེག་པ་གཞན་གྱིས་མི་མཐོང་སྟེ། སྒྲོན་མ་སྣང་བྱེད་ལས། དཔེར་ན་རི་རྒྱལ་རྩེར་ཕྱིན་ན། །དམའ་བའི་ལུང་རྣམས་མཐོང་བ་བཞིན། །འོག་མའི་རྒྱུད་དོན་ཇི་བཞིན་མཐོང་། །(30ན)འོག་མས་གོང་མ་མཐོང་བ་མེད། །ཅེས་པ་ལྟར་མན་ངག་འདིས་ནི་ཐམས་ཅད་མཐོང་ཞིང་གྲོལ་བར་འགྱུར་བའི་ཚུལ་ཤེས་རབ་ཀྱི་མིག་ལྡན་དག་གི་རྟོགས་པར་བྱའོ། ། ལྔ་པ་ལམ་རྟགས་སྣང་བཞིའི་ས་མཚམས་བསྟན་པ་ལ། ཆོས་ཉིད་མངོན་སུམ་གྱི་སྣང་བ། ཉམས་སྣང་གོང་འཕེལ་གྱི་སྣང་བ། རིག་པ་ཚད་ཕེབས་ཀྱི་སྣང་བ། ཆོས་ཉིད་ཟད་པའི་སྣང་བ་དང་བཞི་ལས། དང་པོ་ཆོས་ཉིད་མངོན་སུམ་གྱི་སྣང་བ་ནི། དེ་ལྟར་རྩེ་གཅིག་ཉམས་ལེན་གནད་བསྣུན་པའི༔ བསྐྱེད་རིམ་ལྷུར་ལེན་བློ་ཡིས་འཆོས་པ་དང༔ ཁྲེགས་ཆོད་ལྟ་བུར་ལྐོག་ཏུ་མ་གྱུར་པར༔ ཤེས་རབ་མིག་ལ་ཡེ་ཤེས་སྤྱན་ཚུད་པའི༔ གཞི་ཡི་རང་བཞིན་ཡེ་ཤེས་ལྔ་ཡི་གདངས༔ དྭངས་མ་འོད་ལྔའི་ཆོས་ཉིད་མངོན་སུམ་དུ༔ སྣང་ཞིང་མངོན་གྱུར་ངང་ལ་ཆམ་བཞག་པས༔ སྒོ་གསུམ་གཡོ་མེད་ངང་དུ་བརྟན་ཐོབ་པས༔ རྡོ་རྗེ་གསུམ་གྱི་བྱིན་རླབས་ཞུགས་པ་ཡི༔ ལྟས་མཚན་ཚུལ་བཞིན་འབྱུང་སྟེ་ཆོས་ཉིད་ཀྱི༔ བདེན་པ་མངོན་དུ་མཐོང་ཞིང་རྣམ་གྲོལ་གྱིཿ ས་དང་ལམ་གྱི་དང་པོར་སླེབས་པ་ཡིན༔ ཁྲེགས་ཆོད་ལྟ་བ་ཇི་བཞིན་རྟོགས་ནས་སུ༔ ལམ་འདིའི་གནད་འགགས་ཇི་ལྟ་བ་བཞིན་དུ༔ ཤེས་ཏེ་ཕྱི་ཡི་རྐྱེན་གསུམ་ལ་བརྟེན་ནས༔ རྩེ་གཅིག་སྙིང་པོའི་སྒྲུབ་ལ་བརྩོན་(30བ)པའི་མི༔ ཟླ་བ་དྲུག་གི་ངེས་པར་བརྟན་ཐོབ་ཅིང་༔ མངོན་སུམ་སྣང་བ་མཐོང་བའི་ཡོན་ཏན་གྱིས༔ ཕྱིན་ཆད་འཁོར་བར་མི་ལྡོག་གདེངས་ཐོབ་བོ༔ ཞེས་པ་སྟེ། དེ་ལྟར་ཉིན་མོ་ཆོས་སྐུའི་རྟེན་ཉི་མ། མཚན་མོ་ལོངས་སྐུའི་རྟེན་ཟླ་བ། ནང་ནུབ་སྤྲུལ་སྐུའི་རྟེན་ཨ་ལོ་ཀེར་བལྟས་ནས་ཉམས་ལེན་གནད་དུ་བསྣུན་པས། བསྐྱེད་རིམ་ལྟར་བཅས་བཅོས་དང་ཁྲེགས་ཆོད་ལྟར་མུན་བསྒོམ་མ་ཡིན་པར་ཤེས་རབ་ཀྱི་མིག་ལ་ཡེ་ཤེས་ཀྱི་སྤྱན་ཚུད་དེ། གཞི་ཡི་རང་བཞིན་ཡེ་ཤེས་ལྔའི་རང་གདངས་མངོན་སུམ་དབང་པོའི་སྒོ་རུ་སྣང་བའི་ཕྱིར་ཆོས་ཉིད་མངོན་སུམ་ཞེས་བྱ་བ་སྟེ། དེའི་ཕྱི་རྟགས་སུ་དབྱིངས་སྣང་ཡོལ་བ་བཀྲམ་པ་ལྟ་བུར་ལྷུན་ཆགས་ཤིང་ངང་བརྟན་པ་དང་། ཐིག་ལེ་འོད་ཟླུམ་ཐིག་ཕྲན་གྱི་རྣམ་པ་ཉ་མིག་ཙམ་ལས་མཐེབ་སྐོར་ཙམ་དུ་སྣང་ཞིང་། དེ་དག་གི་གོ་མཚམས་སུ་རིག་པ་རྡོ་རྗེ་ལུག་རྒྱུད་རྟ་རྔའི་ཉག་ཕྲན་ཙམ་པ་རྩ་གནད་ཀྱིས་གྲོལ་བའི་རྟགས་སུ་ཕྲ་ཞིང་འཁྱོགས་པ་ཐིག་ལེའི་གནད་ཀྱིས་གྲོལ་བའི་རྟགས་སུ་འཁྱོགས་འཚམས་སུ་ཐིག་ལེ་ཕྲ་མོ་ཟུང་འབྲེལ་ཡོད་པ། རླུང་གནད་ཀྱིས་གྲོལ་བའི་རྟགས་སུ་འགྲོ་འོང་གི་རྣམ་པ་ཅན་གསེར་སྐུད་ལྟ་བུའི་འོད་དང་ལྡན་པར་འཆར་རོ། །ནང་རྟགས་སུ་བུམ་དབང་གི་ནུས་པ་ལུས་ཀྱི་གདོས་པ་ལ་ཐེབས་པས་ལུས་དཀའ་ཞིང་ངལ་(31ན)བའི་རྣམ་པས་འགུལ་སྙིང་མི་འདོད་པར་སྡོད་པ་རུས་སྦལ་མཁར་གཞོང་དུ་བཅུག་པ་ལྟ་བུ་དང་། ངག་སྨྲ་བརྗོད་མི་འདོད་པར་ལྐུག་པ་ལྟར་གནས་པ་དང་། སེམས་ཀྱི་རྣམ་རྟོག་དུམ་བུར་འཕྲོ་བའི་རྒྱུན་ཆད་ནས་གར་གཏད་དུ་སྡོད་ཚུགས་པ་མཁའ་འགྲོ་རྙི་ལ་ཟིན་པ་ལྟ་བུའོ། །འདིའི་དུས་སུ་ཕྱིན་ཆད་འཁོར་བར་མི་ལྡོག་པའི་གདེངས་ཐོབ་པས་མདོ་ལམ་གྱིས་དང་པོ་དང་། མ་དག་འཁྲུལ་པའི་སྣང་སེམས་ཐམས་ཅད་དྭངས་མ་འོད་གསལ་གྱི་རང་བཞིན་དུ་རྣམ་པར་སྨིན་ཏེ་མ་རིག་པ་རིག་པར་འཕོས་པས་ན་སྔགས་ལམ་དུ་རྣམ་པར་སྨིན་པའི་རིག་འཛིན་དོན་གྱིས་ཐོབ་པ་ཡིན། སྐབས་འདིར་འཆི་བའི་དབང་དུ་གྱུར་ནས་བར་ཆད་ནའང་རང་བཞིན་སྤྲུལ་པར་དབུགས་འབྱིན་པ་ནི། ཕྱིའི་དབྱིངས་སྣང་གི་རྟགས་དང་པོ་ཙམ་མཐོང་བས་མ་ཡིན་པར་ནང་དུ་ཤེས་རབ་ཀྱི་མིག་རྡུལ་དང་བྲལ་བའི་བདེན་པ་མཐོང་བའི་གནད་ཀྱིས་ཡིན་ཏེ། ཀློང་གསལ་ལས། རིག་པ་མངོན་སུམ་མཐོང་བ་ནི། །བདེན་པ་མཐོང་བའི་གནད་ཀྱིས་སུ། །ཁམས་གསུམ་ལྡོག་པ་མ་ཡིན་ནོ། །ཞེས་སོ། །ལེའུའི་སྐབས་བསྡུ་བ་ནི། ཆོས་ཉིད་མངོན་སུམ་དུ་མཐོང་བའི་ཚུལ་དངས་ཐོབ་པའི་ལེའུ་སྟེ་བཅུ་པའོ༔ ས་མ་ཡ༔ གུ་ཧྱ༔ གཉིས་པ་ཉམས་གོང་འཕེལ་གྱི་སྣང་བ་ནི། གསང་(31བ)སྔགས་ཐེག་ཆེན་སྤྱོད་པའི་རྣལ་འབྱོར་གྱིས༔ དེ་ལྟར་རྣལ་མའི་དོན་ལ་རྩེ་གཅིག་ཏུ༔ གནད་དུ་བསྣུན་པའི་ཕྱི་རྟགས་འོད་གསལ་གྱི༔ དབྱིངས་དང་ཐིག་ལེ་རིམ་བཞིན་གོང་འཕེལ་གྱི༔ ཚུལ་དུ་སྣང་སྟེ་གྲུ་ཆད་རྣམ་པ་ནས༔ དབྱིངས་སྣང་མཆོད་རྟེན་མདུང་རྩེ་རལ་གྲི་དང་༔ འཁོར་ལོ་རྡོ་རྗེ་པདྨ་རི་ལྡེ་དང་༔ མེ་ལོང་སྤྲིན་དཔུང་ལྟ་བུའི་རྣམ་པར་མཆེད༔ ཐིག་ལེ་ཉ་མིག་ཙམ་ནས་རིམ་པ་བཞིན༔ མཐེབ་གོར་དང་ནི་ཁམ་ཕོར་རྡ་ཆུང་དང་༔ ཤིང་རྟའི་འཕང་ལོ་ཕུབ་ཀྱི་རྦ་འཁོར་དང༔ ཤིན་ཏུ་ཆེ་བ་འདོམས་ཀྱིས་འཁོར་ཙམ་གྱི༔ བར་དུ་མཆེད་པ་འོད་ལྔའི་མུ་ཁྱུད་ཅན༔ མི་གཡོ་མི་འགུལ་ལྷན་ནེར་གནས་པ་སྣང་༔ རྡོ་རྗེ་ལུག་རྒྱུད་རྟ་རྔའི་ཉག་ཕྲན་ཙམ༔ གསེར་སྐུད་ལྟ་བུར་འོད་དང་ལྡན་པ་ལ༔ ཕྲ་ཞིང་འཁྱོགས་ལ་འགྲོ་འོང་རྣམ་པ་རུ༔ ཆོས་ཉིད་མངོན་སུམ་དུས་སུ་སྣང་བ་ནས༔ གོང་འཕེལ་དུས་སུ་ཅུང་ཟད་བརྟན་གྱུར་ཏེ༔ མུ་ཏིག་ཕྲ་མོ་བསྟར་ལ་བརྒྱུས་པ་བཞིན༔ སྨིན་ཏེ་རིམ་བཞིན་ཆེར་འཕེལ་ཇེ་བརྟན་འགྱུར༔ མཐར་ནི་ས་རྡོ་རི་བྲག་གཟུགས་བརྙན་ཀུན༔ མ་དག་སྣང་བ་རྡུལ་ཙམ་མི་མངོན་པར༔ དྭངས་མ་འོད་དང་འཇའ་ཚོན་རྣམ་པར་སྣང༔ དེ་ནི་ཕྱི་ཡི་འཕེལ་ཚད་རྫོགས་པ་ཡིན༔ ནང་རྟགས་ལུས་དང་རྩ་ཁམས་འཁྲུག་པ་ལས༔ གྱེན་རྒྱུ་སྲོག་འཛིན་མེ་(32ན)མཉམ་ཁྱབ་བྱེད་དང་༔ ཐུར་སེལ་རླུང་འཕེལ་འགྲིབ་བྱུང་བ་ཡི༔ བྱེད་ལས་བདེ་སྡུག་ན་ཚ་ཟུག་རྡུ་དང་༔ ཟ་ཟི་བྱ་སྤྱོད་མ་ངེས་སྣ་ཚོགས་ཀྱི༔ སྤྱོད་པ་བྱེད་ཅིང་བརྟན་གནས་མེད་པ་ཡིན༔ ངག་ཀྱང་སྨྱོན་པ་རང་ཚིག་རྡོལ་བ་བཞིན༔ གླུ་དང་མགུར་མ་ལ་སོགས་ཆོས་ཚིག་དང་༔ འཇིག་རྟེན་ཐ་མལ་པ་ཡི་འཆོལ་ཚིག་རྣམས༔ མ་བསམ་བཞིན་དུ་རང་རྡོལ་འབྱུང་འགྱུར་ཏེ༔ སེམས་ཀྱང་སྨྱོན་པའུར་གྱིས་བསླང་བ་ལྟར༔ གཏད་མེད་འཛིན་མེད་བྱུང་རྒྱལ་ངང་གྱུར་ཏེ༔ འདུག་ཚེ་སྡོད་སྙིང་མི་འདོད་སྡོད་མི་ཚུགས༔ འགྲོ་ཚེ་འགྲོ་སྙིང་མི་འདོད་འདུག་པར་བསམ༔ ཉོན་ཡིད་བསླང་ནས་དུག་ལྔ་རེས་མོས་སུ༔ ཤིན་ཏུ་དྲག་ལ་ཤུགས་ཆེ་བ་རུ་ལྡང་༔ རེས་འགའ་སྙིང་རྗེ་ངེས་འབྱུང་རྩལ་འབར་ཏེ༔ དུ་སྙིང་འདོད་ཅིང་བཟོད་མེད་སྡུག་བསྔལ་འཆར༔ མ་དག་བསྐལ་པ་དབྱིངས་སུ་འཇིག་པའི་ལུས༔ མ་ངེས་ཉམས་སྣང་ཆལ་མ་ཆོལ་མར་འབྱུང་༔ ལྷ་འདྲེའི་ཆོ་འཕྲུལ་ཐན་དང་ལྟས་ངན་སྣང་༔ མོ་རྩིས་སྨན་དཔྱད་ཀུན་ཀྱང་རབ་ཏུ་འཁྲུགས༔ དེ་དག་བདེན་མེད་ཉམས་ཀྱི་སྣང་བ་རུ༔ ཤེས་ཏེ་བདེན་ཞེན་མེད་པར་འཇོག་ནུས་ན༔ སྒྱུ་མ་རྨི་ལམ་ལྟ་བུར་རིམ་བཞིན་ཡལ༔ འདི་ཡི་ཡོན་ཏན་མངོན་སུམ་སྣང་བའི་དུས་(32བ)རང་བཞིན་སྤྲུལ་པའི་སྐུ་རུ་དབུགས་འབྱིན་འགྱུར༔ གྲུ་ཆད་རྣམ་པར་ཤར་བའི་དུས་སྐབས་སུ༔ བར་དོ་མེད་པར་གྲོལ་འགྱུར་གདོན་མི་ཟ༔ འཕེལ་ཚད་རྫོགས་ཚེ་ལོངས་སྤྱོད་རྫོགས་སྐུར་གྲོལ༔ མདོར་ན་ས་མཚམས་འདི་ལ་བབས་པའི་ཚེ༔ འཁོར་བར་མི་ལྡོག་སྲིད་ལས་རྣམ་པར་རྒྱལ༔ ཞེས་པ་སྟེ། དེ་ཡང་གོང་བཞིན་ཉམས་ལེན་ལ་གནད་དུ་བསྣུན་པས་ནང་དུ་ཆོས་ཉིད་ཀྱི་ངོ་བོ་སྟོང་པར་མཐོང་བས། དེའི་གདངས་རང་བཞིན་གསལ་བའི་ཡེ་ཤེས་ཕྱི་རོལ་དུ་མི་འགྱུར་བར་གོང་དུ་འཕེལ་བས་ན་ཉམས་གོང་འཕེལ་ཏེ། ཕྱི་རྟགས་སུ་འོད་སྣང་ཆེར་མཆེད་དེ་དབྱིངས་སྣང་འོད་ལྔ་རྩིབས་ཤར་དང་། གྱེན་འགྲེང་དང་། ཟླུམ་འཁྲིགས་དང་། དྲྭ་བ་དྲ་ཕྱེད། མིག་མང་རིས། མཆོད་རྟེན། མདུང་རྩེ། པདྨ་སྟོང་ལྡན། རེ་ལྡེ། མེ་ལོང་། སྤྲིན་དཔུང་། རལ་གྲི། འཁོར་ལོ། རྡོ་རྗེ་ལྟ་བུ་སོགས་རྣམ་པ་མ་ངེས་པར་སྣང་ལ། ཐིག་ལེ་མཐེབ་སྐོར་ཙམ་ནས། ཁམ་ཕོར། རྔ་ཆུང་། ཤིང་རྟའི་འཕང་ལོ། ཕུབ་ཀྱི་རྦ་འཁོར། ཆེ་བ་འདོམས་ཀྱིས་འཁོར་ཙམ་དུ་འཕེལ་ཞིང་། རིག་པ་མུ་ཏིག་ཕྲ་མོ་བསྟར་ལ་བརྒྱུས་པ་ལྟར་རིམ་བཞིན་ཇེ་འཕེལ་དུ་འགྲོ་ཞིང་འདབ་ཆགས་འཕུར་སྐྱེན་པ་དང་། རི་དྭགས་རྩིབས་ལ་རྒྱུག་པ་དང་། ཤ་ར་ཎ་དལ་གྱིས་འགྲོ་བ་དང་། བུང་བ་མེ་ཏོག་ལ་ལྡིང་བ་ལྟ་བུར་(33ན)ཇེ་དལ་དུ་འགྲོ་བ་ནི་ཅུང་ཟད་གོམས་པ་དང་། བར་དུ་གོམས་པའི་ཐ་སྙད་བཏགས་ཅིང་། མཆོག་ཏུ་གོམས་པའི་ཚད་ནི་གང་དུ་བལྟས་པའི་སྟོང་ཁམས་འོད་གསལ་གྱི་སྣང་བས་ཁྱབ་ཅིང་འགུལ་འཕྲིགས་མེད་པར་གནས་པ་སྟེ། སྒྲོན་མ་སྣང་བྱེད་ལས། སྣང་བ་ཐམས་ཅད་ཐིག་ལེ་རུ། །ཤར་ནས་དཀྲིག་གི་གནས་པ་ན། །མཆོག་ཏུ་གོམས་པའི་ཚད་ཡིན་ནོ། །ཞེས་སོ། །ནང་རྟགས་སུ་གསང་དབང་གི་ནུས་པ་རྩ་རླུང་ལ་ཐེབས་པའི་ལྟས་སུ་ལུས་དང་རྩ་ཁམས་ཐམས་ཅད་འཁྲུགས་ཏེ། སྙིང་ག་ནས་མགྲིན་པའི་བར་གྱི་ནང་རོལ་ཐམས་ཅད་ན་ཞིང་གྱེན་རྒྱུའི་རླུང་འཕེལ་བས་དང་ཀ་འགག་ནས་དབུགས་ཀྱི་རྒྱུ་ལམ་མི་བདེ་ཞིང་ཟས་སྐོམ་ཕྱིར་འཕེན་པ་སོགས་དང་། སྲོག་འཛིན་གྱི་རླུང་འཁྲུགས་པས་སེམས་ལས་སུ་མི་རུང་ཞིང་སྙིང་ན་བ་དང་། མེ་མཉམ་གྱི་རླུང་འཕེལ་བས་ལུས་ལ་ཚ་དྲོད་དྲག་པོ་འབར་ཞིང་འགྲིབ་ཚེ་གྲང་བས་གདུང་བ་དང་། ཁྱབ་བྱེད་ཀྱི་རླུང་འཕེལ་བས་ལུས་སྐྲངས་ཏེ་ཤ་རྒྱས་པ་དང་། འགྲིབ་ཚེ་མདངས་ཉམས་ནས་ཤ་སྐམ་པ་སོགས་དང་། ཐུར་སེལ་གྱི་རླུང་ལྡང་བས་དྲི་ཆུ་དང་གཤང་ལྕི་འགག་པ་དང་། འགྲིབ་ཚེ་རང་བཞིན་གྱིས་འཛག་པ་སོགས་མདོར་ན་མི་བདེ་བའི་ཟུག་རྔུ་སྣ་ཚོགས་འཆར་བ་དང་། ལུས་སྒེག་ཆོས་ངོ་ཚ་དང་བྲལ་ཏེ་སྐྱེས་(33བ)བུ་ཆང་གིས་མྱོས་པ་ལྟ་བུར་བྱ་སྤྱོད་སྣ་ཚོགས་པས་སྡོད་མི་ཚུགས་པ་དང་། ངག་ཀྱང་སྨྱོན་པའི་ཅ་ཅོ་སྒྲོགས་པ་ལྟར་གླུ་དང་མགུར་མ་འཆོལ་ཚིག་ལ་སོགས་མ་ངེས་པའི་ཚིག་རང་རྡོལ་དུ་འབྱུང་བ་དང་། སེམས་ཀྱང་གཟའ་གཏད་མེད་པར་སྨྱོན་པ་འུར་ལངས་པ་ལྟར་གཏད་མེད་རྒྱ་འབྱམས་སུ་ཡན་པའོ། །གཞན་ཡང་འདུག་ཚེ་འགྲོ་སྙིང་འདོད་ཅིང་འགྲོ་ཚེ་སྡོད་སྙིང་འདོད་པ་དང་། ཉོན་ཡིད་བསླང་ནས་དུག་ལྔའི་རྟོག་པ་དྲག་ལ་ཤུགས་ཆེ་བའི་རེས་མོས་སུ་ལྡང་ཞིང་། འགའ་ཞིག་ངེས་འབྱུང་དང་སྙིང་རྗེའི་རྩལ་འབར་ནས་སྡུག་བསྔལ་གྱི་སྣང་བ་བཟོད་མེད་དུ་སྐྱེས་ཏེ་ངུ་སྙིང་འདོད་པ་དང་། ཕྱི་སློང་ལྷ་འདྲེའི་ཆོ་འཕྲུལ། ནང་སློང་ལུས་ཀྱི་ན་ཚ། གསང་སློང་སེམས་ཀྱི་བདེ་སྡུག་ལ་སོགས་མ་ངེས་པའི་ཉམས་རྟགས་སྣ་ཚོགས་ཆལ་ཆོལ་དུ་སྣང་ཞིང་། དེའི་ཚེ་མོ་རྩིས་སྨན་དཔྱད་བྱས་པས་ཤིན་ཏུ་འཁྲུགས་པའི་མཚན་མ་སོགས་འབྱུང་བས། འདིའི་དུས་སུ་དེ་དག་བདེན་མེད་ཉམས་ཀྱི་རྫུན་རིས་སུ་ཤེས་ནས་བདེན་ཞེན་སྤངས་ཏེ་རང་སར་བཞག་པས་སྒྱུ་མ་དང་རྨི་ལམ་ལྟ་བུར་ཡལ་དུ་འགྲོ་བ་ཡིན། དེ་རྣམས་ནི་མ་དག་སྙིགས་མའི་བསྐལ་པ་འོད་གསལ་དྭངས་མའི་དབྱིངས་སུ་འཇིག་པའི་ལྟས་སོ། །འདིའི་དུས་སུ་མདོ་ལམ་གྱི་ས་ལྔ་པ་དང་། འཁོར་བར་སྐྱེ་འཆིའི་སྣང་བ་(34ན)ཐམས་ཅད་ཆོད་པས་སྔགས་ལམ་དུ་ཚེ་དབང་རིག་འཛིན་གྱི་ས་ཐོབ་པ་ཡིན་ནོ། །སྐབས་འདིར་མཚམས་ཆད་ནའང་གྲུ་ཆད་ཀྱི་རྣམ་པར་ཤར་བའི་དུས་སུ་ཚོམ་བུའི་སྣང་བ་ལ་གྲོལ་ནས་བར་དོ་མེད་པར་རང་བཞིན་སྤྲུལ་པར་དབུགས་འབྱིན། འཕེལ་ཚད་རྫོགས་ཚེ་ཆོས་ཉིད་བར་དོར་ལོངས་སྤྱོད་རྫོགས་སྐུར་གྲོལ་བ་སྟེ། ཀློང་གསལ་ལས། སྐུ་ཤར་ཉམས་གྱི་འཕེལ་རྫོགས་ན། །བར་དོའི་སྣང་བ་འདིར་ཆོད་པས། །ལོངས་སྤྱོད་ངོས་ཟིན་བར་དོ་སྟོངས། །ཞེས་སོ། །སྐུ་ཤར་བ་གོང་འཕེལ་རྫོགས་པའི་རྟགས་སུ་བཤད་པས་ཚད་ཕེབས་ཀྱི་མགོ་ཟིན་པ་ཡང་དོན་གྱིས་བསྟན་ནོ། །ལེའུའི་སྐབས་བསྡུ་བ་ནི། གོང་འཕེལ་དང་ཕན་ཡོན་བསྟན་པའི་ལེའུ་སྟེ་བཅུ་གཅིག་པའོ༔ ས་མ་ཡ༔ གུ་ཧྱ༔ གསུམ་པ་རིག་པ་ཚད་ཕེབས་ཀྱི་སྣང་བ་ནི། དེ་ལྟར་ཡང་ཡང་སྦྱངས་པའི་སྟོབས་བསྐྱེད་པས༔ རིག་པ་བཅུད་དུ་སྨིན་ཅིང་ཚད་ལ་ཕེབས༔ ཕྱི་རྟགས་དབྱིངས་སྣང་གཞལ་ཡས་ཁང་དུ་མཆེད༔ ཐིག་ལེ་ལྔ་ཚོམ་ཤར་བའི་ནང་དབུས་སུ༔ རིགས་ལྔའི་ཕྱག་རྒྱ་ཡར་ཕྱེད་གདོང་ཕྱེད་དུ༔ སྣང་ཞིང་ཆེར་སྨིན་སྐུ་རྐྱང་ཚང་བར་འཆར༔ མཐར་ནི་ཚོམ་བུ་ལྔ་ལྔར་ཤར་བའི་ནང་༔ རྣམ་སྣང་རྡོར་སེམས་རིན་འབྱུང་སྣང་མཐའ་ཡས༔ (34བ)དོན་ཡོད་གྲུབ་པ་ཡུམ་དང་བཅས་པ་ལ༔ འཁོར་ཀྱང་སེམས་དཔའ་སེམས་མ་བཞི་བཞིར་བཅས༔ མཛེས་ཤིང་སྐྱེ་མཆེད་རྒྱན་རྫོགས་རྣམ་པར་འཆར༔ རྡོ་རྗེ་ལུག་རྒྱུད་དཀར་སེར་དམར་ལྗང་གུ༔ མུ་ཏིག་བསྟར་ལ་རྒྱུས་པ་ལྟ་བུ་རུ༔ དྲྭ་བ་དྲྭ་ཕྱེད་རྣམ་པར་འཆར་བ་ཡིན༔ ནང་རྟགས་ལུས་ནི་ཟང་ཐལ་དྲི་མེད་ཀྱིས༔ དངོས་པོ་ཐོག་རེག་ཀུན་ལ་ཐོགས་པ་མེད༔ ངག་ནི་ཆོས་ཚིག་གཏམ་རྒྱུད་གླུ་མགུར་མ༔ རང་རྡོལ་བྱུང་སྟེ་གཞན་སྣང་དགེ་ལ་སྦྱོར༔ སེམས་ཉིད་ཡེ་ཤེས་ལྔ་རུ་གོ་འཕོས་ཏེ༔ སྤྲུལ་བསྒྱུར་སྐྱེ་འཇུག་རྣམས་ལ་རང་དབང་བསྒྱུར༔ འདི་དུས་གདུལ་བྱ་ཐེར་འབུམ་དང་བཅས་པ༔ རྣམ་མཁྱེན་རྫོགས་པའི་སངས་རྒྱས་ས་རུ་གྲོལ༔ ཞེས་པ་སྟེ། དེ་ལ་རིག་པའི་ཡོན་ཏན་འཕེལ་བའི་ཆ་སྟོབས་སུ་གྱུར་པ་ལས་སྣང་བ་འོད་གསལ་དུ་སྨིན་ཅིང་ཚད་ལ་ཕེབས་པ་སྟེ། ཕྱི་རྟགས་སུ་དབྱིངས་ཀྱི་སྣང་བ་གཞལ་ཡས་ཁང་ལྟ་བུའི་ཀློང་དུ་ཐིག་ལེ་ལྔ་ཚོམ་གྱི་ནང་དུ་རྒྱལ་བ་རིགས་ལྔའི་སྐུ་དང་པོ་ཡར་ཕྱེད་དང་གདོང་ཕྱེད་དུ་སྣང་ཞིང་། བར་དུ་སྐུ་རྐྱང་དང་ཚང་བར་འཆར་བ་དང་། མཐར་རྣམ་སྣང་དཀར་པོ། རྡོར་སེམས་མཐིང་ག །རིན་འབྱུང་སེར་པོ། སྣང་མཐའ་དམར་པོ། དོན་གྲུབ་ལྗང་གུ་རྣམས་རང་རང་རིགས་ཀྱི་ཡུམ་དང་སེམས་དཔའ་(35ན)སེམས་མ་བཞི་བཞིར་བཅས་པ་མཛེས་ཤིང་རྒྱན་རྫོགས་ཀྱི་རྣམ་པར་གཙོ་དང་འཁོར་གྱི་ཚོམ་བུ་ཐ་དད་པའི་དཀྱིལ་འཁོར་མུ་ཁྱུད་ཀྱི་ར་བ་དང་བཅས་པ་འཆར་ཞིང་། རིག་གདངས་རྡོ་རྗེ་ལུག་རྒྱུད་དཀར་སེར་དམར་ལྗང་དྲྭ་བ་དྲྭ་ཕྱེད་ཀྱི་རྣམ་པར་འཆར་རོ། །འདིའི་དུས་སུ་སྣང་བ་ཐམས་ཅད་དབྱིངས་དང་ཐིག་ལེ་ལྷ་སྐུའི་རོལ་པར་སྨིན་ཏེ་འབྱུང་ལྔའི་སྣང་བ་དབྱིངས་སུ་ནུབ་ནས་སྣང་སྲིད་དག་པ་རབ་འབྱམས་སུ་འཆར་བའི་གནས་སྐབས་ཡིན། ནང་རྟགས་སུ་ཤེར་དབང་གི་ནུས་པ་སེམས་དང་ཐིག་ལེ་རུ་ཕེབས་པས་རླུང་སེམས་གཉིས་ལ་རང་དབང་ཐོབ་ནས་གྲུབ་པ་བརྒྱད་ལ་མངའ་བརྙེས་པ་དང་། ལུས་འོད་གསལ་དུ་སྨིན་ནས་རི་བྲག་སོགས་ཐོག་རེག་གི་གནས་རྣམས་སུ་ཟང་ཐལ་དུ་འགྲོ་བ་གླང་པོ་ཆེ་འདམ་དུ་ཚུད་ཀྱང་རང་སྟོབས་ཀྱིས་བརྒལ་ནུས་པ་ལྟ་བུ་དང་། ངག་རྡོ་རྗེ་གསུང་གི་རོལ་པར་སྨིན་ཅིང་དག་ནས་ཅི་སྨྲས་ཐམས་ཅད་གྲུལ་བུམ་གྱིས་ཕྲུ་གུས་གླུ་ལེན་པ་ལྟར་གཞན་གྱི་རྣ་བར་སྙན་ཅིང་རྒྱུད་ལ་ཕན་ཐོགས་པ་དང་། རྒྱུ་རྐྱེན་ལ་མི་ལྟོས་པར་ཡང་དག་པའི་རྒྱུད་ལུང་མན་ངག་གི་ཆོས་ཚིག་ཐམས་ཅད་རང་རྡོལ་དུ་འབྱུང་། སེམས་ཉིད་ཡེ་ཤེས་ལྔ་རུ་གོ་འཕོས་ཏེ་རིག་པ་རང་ཐོག་ཏུ་སད་ཅིང་ཤེས་རབ་དང་ཡེ་ཤེས་ཀྱི་སྤྱན་ཚུད་པས་སྣང་སྲིད་འཁོར་འདས་ཐམས་(35བ)ཅད་རྒྱ་མཚོ་ལ་གཟའ་སྐར་བཀྲ་བ་ལྟར་གསལ་འགྲིབ་མེད་པའི་མངོན་ཤེས་ཀྱིས་གཟིགས་ཤིང་ངར་འཛིན་མེད་པ་དང་། སྤྲུལ་བསྒྱུར་སྐྱེ་འཇུག་ལ་རང་དབང་བསྒྱུར་བས་གདུལ་བྱ་ཐེར་འབུམ་དང་བཅས་རྣམ་མཁྱེན་གྱི་ས་རུ་སྒྲོལ་བའོ། །འདི་དུས་སུ་མདོ་ལམ་གྱིས་བརྒྱད་པ་དང་། སྔགས་ལམ་དུ་ཕྱག་རྒྱ་ཆེན་པོའི་རིག་འཛིན་ཞེས་བྱ་བ་ཐོབ་པའོ། །འདིར་བར་དོ་མེད་པར་རང་གྲོལ་བ་སྟེ། ཀློང་གསལ་ལས། རིག་པ་ཚད་ཕེབས་སྣང་བ་ཡིས། །ཕྱི་ནང་གཟུང་འཛིན་གདོས་བཅས་གྲོལ། །ཞེས་སོ། །ལེའུའི་སྐབས་བསྡུ་བ་ནི། རིག་པ་ཚད་ཕེབས་ཀྱི་ཚུལ་བསྟན་པའི་ལེའུའི་སྟེ་བཅུ་གཉིས་པའོ༔ ས་མ་ཡ༔ གུ་ཧྱཿ འདིར་གོང་དུ་སྨྲོས་པ་ཉམས་ལེན་སྲང་དུ་འཛུད་པའི་ཚུལ་བཤད་པ་ལ། སྤྲོས་བཅས་ཐུན་བཞིའི་རྣལ་འབྱོར། སྤྲོས་མེད་ཉིན་མཚན་ཁ་སྦྱར། བར་སྐབས་འཆི་བ་སྦྱངས་པ་དང་གསུམ་ལས། དང་པོ་སྤྲོས་བཅས་ཐུན་བཞིའི་རྣལ་འབྱོར་ལ་བསླབ་པ་ནི། ཀློང་གསལ་ལས། དགེ་སྦྱོར་སྲང་དུ་འཇུག་པའི་ཕྱིར། །ཐུན་བཞིའི་རྣལ་འབྱོར་ཉིད་ལ་བསླབ། །ཅེས་པས། དེ་ཡང་ཐོ་རངས་དང་པོ་ལ་བླ་མའི་རྣལ་འབྱོར་བསྒོམ། བར་པ་ལ་ཁྲེགས་ཆོད་བསྐྱང་། ཐ་མ་ལ་བདེ་སྟོང་གཏུམ་མོ་བསྒོམ། ནམ་ལངས་ནས་ཉི་ཤར་གྱི་བར་ལ་ཁ་(36ན)ཏོན་སོགས་བྱའོ། །ཉི་ཤར་ནས་གུང་གི་བར་ཐོད་རྒལ་བསྒོམ། གུང་ལ་ཆོས་སྤྱོད་ཀྱི་རིགས་བྱ། ཕྱི་དྲོ་ལ་ཐོད་རྒལ་བལྟ། དགོང་མོར་གཏོར་བསྔོས་སོགས་བྱ། སྲོད་ཐུན་དང་པོར་འཆི་བ་མི་རྟག་པ་བསྒོམ། བར་པ་ལ་བསྐྱེད་རིམ་དང་བཟླས་པ་བྱ། གུང་ཐུན་ལ་གཉིད་འོད་གསལ་དུ་སྦ་བའི་ཏིང་ངེ་འཛིན་ལ་འཇུག །ཐམས་ཅད་ལ་ཐུན་མགོར་སེམས་བསྐྱེད། ཐུན་དངོས་དམིགས་མེད། ཐུན་འཇུག་བསྔོ་སྨོན་ཏེ་དམ་པ་གསུམ་གྱིས་ཟིན་པར་བྱའོ། ། གཉིས་པ་སྤྲོས་མེད་ཉིན་མཚན་ཁ་སྦྱར་ལ་བསླབ་པ་ནི། བསྐལ་མང་གོང་ནས་བསོད་ནམས་རྒྱ་ཆེན་པོ༔ བསགས་དང་སྨོན་ལམ་བཟང་པོའི་སྟོབས་ལྡན་ཏེ༔ ཐེག་ཆེན་ཆོས་ལ་ལས་འབྲེལ་བཞག་པ་ཡི༔ སྐྱེས་བུ་སྐལ་པ་བཟང་པོ་ཉིན་སྐར་ཙམ༔ སྲིད་ན་ཉིན་མཚན་ཁ་སྦྱར་རིམ་པས་སྦྱངས༔ ཞེས་པ་སྟེ། འོད་གསལ་ཐོད་རྒལ་ཉག་གཅིག་ལ་བསླབ་པར་འདོད་པའི་སྤྱོད་ཡུལ་ཡིན་ཏེ། སྒྲོན་མ་སྣང་བྱེད་ལས། ཉིན་མཚན་ཁ་སྦྱོར་རིམ་ཐོབ་བཞིན། །ཞེས་སོ། །དེ་ཡང་ཇི་ལྟར་བསྒོམ་ན། ཉིན་དུས་འོད་གསལ་སྣང་བ་མངོན་བྱེད་ཅིང་༔ ཞེས་ཉིན་མོ་བྱ་བ་དགུ་ཕྲུགས་སུ་བཏང་ནས་ལུས་བཞུགས་སྟངས་དང་གཟིགས་སྟངས་ལས་མི་འགྱུར་བར་འོད་གསལ་གྱི་སྣང་བ་མངོན་དུ་བྱེད་པ་ལ་(36བ)བསླབ། མཚན་མོ་ཆ་གསུམ་དུ་བྱས་པའི་སྲོད་ལ་དབང་པོ་གནད་དུ་བསྡུ་བ་ནི། མཚན་མོ་ཉལ་ཚེ་ཤེས་བྱ་བུམ་པར་བསྡུ༔ ལུས་ནང་དབུ་མ་མཚན་ཉིད་བཞི་ལྡན་བསྒོམ༔ ལྟེ་བར་ཨ་ཐུང་དམར་པོ་གསལ་བ་ལས༔ གཏུམ་མོ་ཡེ་ཤེས་མེ་ལྕེ་རབ་མཆེད་པས༔ འཁོར་ལོ་བཞི་ཁྱབ་སྤྱི་བོའི་ཧཾ་ལ་ཕོག༔ ཧཾ་ལས་བདེ་སྟོང་བདུད་རྩིའི་ཆུ་རྒྱུན་བྱུང་༔ ལྟེ་བའི་ཨ་ཐུང་ཉིད་ལ་ཕོག་པ་ལས༔ མེ་དང་བདུད་རྩི་གཉིས་མེད་རབ་མཆེད་དེ༔ ནད་གདོན་ལས་ཉོན་སྡིག་སྒྲིབ་བག་ཆགས་བསྲེགས༔ རང་ལུས་འོད་ཀྱི་ཕུང་པོར་གསལ་བའི་དབུས༔ དབུ་མའི་སྦུབས་དང་མེ་ལ་ཤེས་པ་གཏད༔ གཞན་དུ་མི་འགྱུར་དེའི་ངང་གཉིད་ནས་སླར༔ ཞེས་པ་སྟེ། དྲང་སྲོང་གི་འདུག་སྟངས་དང་བཅས་རང་ལུས་འོད་ཀྱི་ཕུང་པོར་གསལ་བའི་དབུས་སུ་རྩ་དབུ་མ་དེ་ཉིད་ཕྱི་དཀར་ལ་ནང་དམར་བ་བར་མཐིང་ག་ཆུ་ཤིང་གི་སྡོང་པོ་ལྟར་དྲང་བ། པདྨའི་འདབ་མ་ལྟར་སྲབ་པ། རྒྱ་ཚོས་ཀྱི་ཁུ་བ་ལྟར་སྣུམ་པ། ཏིལ་གྱི་མར་མེ་ལྟར་གསལ་བ་སྟེ་མཚན་ཉིད་བཞི་དང་ལྡན་པ། ཡར་སྣེ་སྤྱི་བོར་ཚངས་པའི་བུ་གར་ཟུག་ཅིང་མར་སྣེ་ལྟེ་འོག་སོར་བཞིའི་ཐད་དུ་ཁ་ཟུམ་པ། གཡས་སུ་རོ་མ་དཀར་མོ་དང་གཡོན་དུ་རྐྱང་མ་དམར་མོ་གཉིས་ཀྱི་མར་སྣེ་ལྟེ་འོག་ཏུ་དབུ་མར་ཟུག་ཅིང་ཡར་སྣེ་རྣ་ལྟ་གནས་གུག་སྟེ་སྣ་བུག་(37ན)གཉིས་སུ་ཟུག་པ། རྩ་གསུམ་པོའི་འདུས་མདོར་ཤེས་རབ་སྟོང་ཉིད་ཡུམ་གྱི་ངོ་བོ་ཨ་ཐུང་དམར་པོ་རེག་བྱ་ཚ་བ་མེ་ཡི་རང་བཞིན་ཅན་སྐྱེར་ཚེར་བཅད་པ་ལྟ་བུའི་རྩེ་མོར་ནྰད་དང་བཅས་པ་གསལ། སྤྱི་བོ་ཚངས་པའི་བུ་གར་ཐབས་མཆོག་བདེ་ཆེན་ཡབ་ཀྱི་ངོ་བོ་ཧཾ་ཡིག་དཀར་པོ་མགོ་ཐུར་བསྟན་དུ་ཡོད་པར་བསྒོམ། རང་གི་སྣ་རྩེའི་ཐད་ཀྱི་ནམ་མཁར་སོར་བཅུ་གཉིས་ཀྱི་མཚམས་སུ་ཕྱོགས་བཅུའི་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་ཐམས་ཅད་འདུས་པའི་ངོ་བོ་འོད་ཕུང་ལྗང་ནག་རླུང་གི་རང་བཞིན་ཅན་དུ་གསལ་ལ། སྣ་བུག་ནས་རླུང་རྡུབས་པ་དང་མཉམ་དུ་འོད་ཕུང་དེ་སྤོས་རིང་གི་དུད་པ་ལྟར་བྱུང་ནས་རོ་རྐྱང་གི་ལམ་བརྒྱུད་དེ་ལྟེ་བའི་ཨ་ཐུང་ལ་ཕོག་པའི་རྐྱེན་གྱིས་མེ་འབར་ཏེ་ལྟེ་བ་ནས་སྙིང་ག་མགྲིན་པ་སྤྱི་བོའི་བར་གྱི་རྩ་འཁོར་རྣམས་ཁྱབ། ཧཾ་ལ་ཕོག་པས་བདེ་སྟོང་ཟག་པ་མེད་པའི་ཡེ་ཤེས་ཀྱི་བདུད་རྩི་ངང་ནར་གྱིས་བྱུང་སྟེ་སྤྱི་མགྲིན་སྙིང་ག་ལྟེ་བ་རྣམས་སུ་བབས་པས། སྒྲིབ་བཞི་དག །དབང་བཞི་ཐོབ་ཅིང་། དགའ་བཞིའི་ཡེ་ཤེས་རྒྱུད་ལ་སྐྱེས། བདུད་རྩི་ལྟེ་བའི་ཨ་ཐུང་ལ་ཕོག་པས་མེའི་གསོས་བྱས་ཏེ་བྱིན་རླབས་ཡེ་ཤེས་ཀྱི་རླུང་། གཏུམ་མོ་ཡེ་ཤེས་ཀྱི་མེ། བདེ་སྟོང་ཡེ་ཤེས་ཀྱི་བདུད་རྩི་གསུམ་དབྱེར་མེད་དུ་གྱུར་པ་ཆེར་མཆེད་དེ། ཚེ་རབས་(37བ)ཐོག་མ་མེད་པ་ནས་བསགས་པའི་སྒྲིབ་བག་ཆགས་ནད་གདོན་གཟུང་འཛིན་གཉིས་སུ་སྣང་བའི་རྟོག་ཚོགས་ཐམས་ཅད་ལྷག་མེད་དུ་བསྲེགས་ཏེ་རང་ལུས་དབུ་མ་མེ་དང་བཅས་པས་སྟོང་ཁམས་ཁྱབ་པར་བསྒོམ་ལ་བདེ་སྟོང་གི་ངང་དུ་བཞག །སླར་ཡང་དེ་ཉིད་ཇེ་ཕྲར་སོང་ནས་རང་ལུས་དང་དབུ་མ་སྔར་བཞིན་དུ་གྱུར་པར་བསམ་ཞིང་གཞན་དུ་མི་ཡེངས་པར་ཨ་ཐུང་ལ་སེམས་གཏད་དེ་གཉིད་ལོག་པར་བྱའོ། ། གུང་ལ་ཤེས་བྱ་བུམ་པར་བསྡུ་བ་ནི། ནམ་ཕྱེད་ལོངས་སྐུའི་འདུག་སྟངས་ལ་བརྟེན་ཏེ༔ སྣ་རྩེར་ཐིག་ལེ་དཀར་པོ་ཞིག་གསལ་ཏེ༔ རང་གི་ལུས་ངག་ཡིད་གསུམ་འོད་དུ་ཞུ༔ ཆུ་ཉིད་ལ་ནི་ཆུ་བཞག་ཇི་བཞིན་དུ༔ སྣ་རྩེའི་ཐིག་ལེ་ཉིད་ལ་ཐིམ་བྱས་ཏེ༔ ཐིག་ལེ་མངོན་བྱེད་ངང་ནས་ཐུན་ཆུང་བཟུང༔ མཐར་ནི་དབུ་མ་སྔར་བཞིན་གསལ་བཏབ་སྟེ༔ སྙིང་གར་ཨ་དཀར་གསལ་འཚེར་འོད་འབར་བསྒོམ༔ དབུ་མའི་ཡར་སྣེ་དེ་བཞིན་ཨ་དཀར་པོ༔ དེ་གཉིས་བར་དུ་ཨ་དཀར་བཅུ་དགུ་ནི༔ འོད་དང་འོད་ཟེར་འབར་བའི་རང་བཞིན་ཅན༔ དཔེར་ན་ཉི་མའི་དཀྱིལ་འཁོར་ལྟ་བུར་གསལ༔ བརྒྱུད་གསུམ་བླ་མ་རྒྱ་མཚོ་མ་ལུས་པ༔ འོད་ཕུང་སྤྲིན་དཀར་རྣམ་པར་བསྡུས་ཏེ་ཐིམ༔ ཨ་ནི་རིམ་བཞིན་དང་པོ་མས་རིམ་དུ༔ གཉིས་པ་ཐིམ་སྟེ་གཉིས་ཀྱི་འོད་ (38ན)བཀྲག་མདངས་༔ འབར་བཞིན་རིམ་བསྡུས་སྙིང་གའི་ཨ་ལ་ཐིམ༔ ཨ་དཀར་ཉེར་གཅིག་བཀྲག་མདངས་གཟི་བརྗིད་འདུས༔ དབུ་མའི་ནང་ཀུན་འོད་ཀྱིས་གང་བ་ལ༔ ཤེས་པ་གཏད་དེ་གཉིད་དུ་ཕྱོགས་ནས་སུ༔ ཞེས་པ་སྟེ། གླང་ཆེན་ཉལ་སྟབས་དང་བཅས་དང་པོ་སྣ་རྩེར་ཐིག་ལེ་དཀར་པོ་ཞིག་གསལ་ཏེ་རང་གི་ལུས་ངག་ཡིད་གསུམ་འོད་དུ་ཞུ་ནས་མཆུ་ལ་ཆུ་ཐིམ་པ་བཞིན་དུ་སྣ་རྩེའི་ཐིག་ལེ་ལ་ཐིམ་པར་བསམ་ལ་ཅུང་ཟད་མཉམ་པར་བཞག །སླར་ཡང་རང་ལུས་དང་དབུ་མ་སྔར་བཞིན་གསལ་ལ་སྙིང་གར་ཨ་དཀར་པོ་བཀྲག་མདངས་འཚེར་བ་གཅིག་དང་། ཚངས་བུག་ཏུ་ཨ་དཀར་པོ་གཅིག །དེ་གཉིས་ཀྱི་བར་ཨ་ཝ་དྷུ་ཏིའི་ནང་ན་ཨ་དཀར་བཅུ་དགུ་ཤེལ་གྱི་ཕྲེང་བ་བརྒྱུས་པ་ལྟར་གསལ་བ་ལས་འོད་ཟེར་འཕྲོས། བརྒྱུད་གསུམ་རིག་འཛིན་གྱི་བླ་མ་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་ཐམས་ཅད་འོད་ཕུང་སྤྲིན་དཀར་འཁྲིགས་པ་ལྟ་བུའི་རྣམ་པར་བསྡུས་ཏེ་ཐིམ་པའི་རྐྱེན་གྱིས་སྤྱི་བོའི་ཨ་དེ་འོག་གི་ཨ་ལ་ཐིམ་པས་གཉིས་ཀྱི་བཀྲག་མདངས་འབར། དེ་བཞིན་མས་རིམ་དུ་གཅིག་ལ་ཐིམ་གྱིས་མཐར་སྙིང་གའི་ཨ་གཅིག་ཏུ་གྱུར་པ་ལ་ཨ་ཉེར་གཅིག་གི་བཀྲག་མདངས་འབར་ཞིང་ཉི་མ་སྟོང་ལས་ལྷག་པའི་གཟི་བརྗིད་ཅན་དུ་གསལ་བའི་འོད་ཟེར་གྱིས་(38བ)བདག་ལུས་སྣང་སྲིད་ཐམས་ཅད་མུན་ཁང་དུ་ཉི་མ་ཤར་བ་ལྟར་འོད་ལམ་མེར་སོང་བར་བསམ་ཞིང་ཨ་ལ་ཤེས་པ་གཏད་དེ་གཉིད་ལོག་པར་བྱའོ། །དེ་ནི་གཉིད་འོད་གསལ་དུ་སྦ་བའི་གནད་ཡིན་ནོ། ། དེ་ནས་ཐོ་རངས་འབྱུང་ཁམས་དག་སྦྱོར་གྱི་གནད་ནི། ཐོ་རངས་འབྱུང་ཁམས་དག་སྦྱོར་བྱེད་པ་ལ༔ དང་པོ་མལ་ནས་ལངས་ཏེ་ཧ་ཞེས་སྒྲས༔ དབུགས་རིང་གསུམ་འཕང་དུག་གསུམ་ལས་ཀྱི་རླུང༔ ཁམས་ནག་དམར་དང་ནག་པོའི་རྣམ་པར་ཐོན༔ སྙིང་གའི་ཨ་ལས་མེ་ལས་མེ་སྟག་བཞིན༔ སྨིན་མཚམས་ཐད་ཀྱི་ནམ་མཁའ་སོར་ལྔའི་མཚམས༔ དང་པོ་ཨ་མཐིང་ནམ་མཁའི་རང་བཞིན་དུ༔ གཉིས་པ་ཨ་དཀར་ཆུ་ཡི་སྙིང་པོར་བསྒོམ༔ གསུམ་པ་སེར་པོ་ས་ཡི་རང་བཞིན་དང་༔ བཞི་པར་དམར་པོ་མེ་ཡི་སྙིང་པོ་དང་༔ ལྔ་པ་ལྗང་གུ་རླུང་གི་སྙིང་པོ་རྣམས༔ གསལ་ཏེ་ཤེས་པ་མིག་ལ་གཏད་ནས་སུ༔ མིག་ནི་ཨ་ཡིག་ཉིད་ལ་གཏད་དེ་སྡོད༔ མཐར་ནི་ཨ་ལས་རང་མདོག་འོད་འཕྲོས་ཏེ༔ རང་ལུས་ཕུང་ཁམས་སྣོད་བཅུད་སྣང་བ་ཀུན༔ འོད་ཞུ་མདུན་གྱི་ཨ་ཡིག་ཉིད་ལ་ཐིམ༔ ཨ་ཡིག་འོད་ཞུ་ནམ་མཁའ་ཆུ་དང་ནི༔ ས་མེ་རླུང་རྣམས་དྭངས་མར་འོད་དུ་ཞུ༔ ནམ་མཁས་གར་ཁྱབ་འབྱུང་བའི་ཁ་དོག་གི༔ འབྱུང་བའི་རྣམ་པར་(39ན)བརྡལ་ཁྱབ་ཆེན་པོར་གསལ༔ དེའི་ངང་མཉམ་པར་བཞག་ཅིང་མཐར་ནི་ཡང༔ དམིགས་མེད་ངང་བཞག་བསྔོ་སྨོན་རྒྱ་ཡིས་བཏབ༔ ཅེས་པ་སྟེ། ཐོ་རངས་མལ་ནས་ལངས་མ་ཐག་ཏུ་ཧ་ཞེས་དབུགས་རིང་བ་གསུམ་བུས་ལ། དང་པོས་འདོད་ཆགས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་རླུངས་ཁམ་ནག་གི་རྣམ་པར་ཐོན་པར་བསམ། གཉིས་པས་ཞེ་སྡང་གི་སྒོ་ནས་བསགས་པའི་སྡིག་སྒྲིབ་ཐམས་ཅད་རླུང་དམར་ནག་གི་རྣམ་པར་ཐོན་པར་བསམ། གསུམ་པས་གཏི་མུག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་རླུང་སྔོ་ནག་གི་རྣམ་པར་ཐོན་པར་བསམ་ལ། རང་ལུས་ཕྱི་ནང་གསལ་འགྲིབ་དང་བྲལ་བཟང་ཐལ་འོད་ཀྱི་རང་བཞིན་དུ་གསལ་ཞིང་སེང་གེའི་འདུག་སྟངས་དང་བཅས། སྙིང་གའི་ཨ་ལས་ཨ་མཐིང་ནག་ཞིག་ཆད་དེ་སྨིན་མཚམས་ཐད་ཀྱི་ནམ་མཁའ་ལ་ལིང་ངེར་འདུག་པར་བསྒོམ། ཤེས་པ་མིག་ལ་གཏད་མིག་ཨ་ཡིག་ལ་གཏད་དེ་མ་བཅོས་པར་བཞག །མཐར་ཨ་ལས་འོད་ཟེར་བྱུང་སྟེ་རང་ལ་ཕོག་པས་ནད་གདོན་སྡིག་སྒྲིབ་བག་ཆགས་གདོས་བཅས་ཀྱི་ཕུང་པོ་དང་བཅས་པ་སངས་ཀྱིས་དག་ནས་འོད་ཕུང་མཐིང་ག་ཞིག་ཏུ་གྱུར་ཏེ་མདུན་གྱི་ཨ་ལ་ཐིམ་པས་གཉིས་མེད་དུ་གྱུར། ཡང་དེ་ལས་འོད་ཟེར་འཕྲོས་པས་(39བ)ཕྱི་ནང་སྣོད་བཅུད་ཐམས་ཅད་འོད་དུ་ཞུ་ནས་ཨ་ལ་ཐིམ་པས་ཨ་ཡིག་དང་བཅས་པ་ནམ་མཁའ་སྔོ་ནག་གི་རང་བཞིན་དུ་གྱུར་པར་བསམ་ལ་འོད་གདངས་དེ་གའི་ངང་དུ་ཅིག་ནས་མཉམ་པར་འཇོག་ཅིང་མཐར་དམིགས་མེད་ཀྱི་ངང་ནས་བསྔོ་སྨོན་བྱའོ། ། གཉིས་པ་ཨ་དཀར་ཆུ་ཡི་སྙིང་པོ། གསུམ་པ་ཨ་སེར་ས་ཡི་རང་བཞིན། བཞི་པར་ཨ་དམར་མེ་ཡི་སྙིང་པོ། ལྔ་པར་ཨ་ལྗང་རླུང་གི་རང་བཞིན་ཅན་དུ་བསྒོམ་པ་ལས་རང་མདོག་གི་འོད་ཟེར་འཕྲོ་བ་སོགས་རིགས་བགྲེས་ཏེ་སྦྱངས་པ་ལ་བརྩོན་ནོ། ། གསུམ་པ་བར་སྐབས་སུ་འཆི་བ་སྦྱངས་པའི་མན་ངག་ནི། བར་སྐབས་འཆི་བ་སྦྱངས་པའི་མན་ངག་ནི༔ ལུས་ནི་སེང་གེའི་ཉལ་སྟབས་ཀྱིས་གནས་ཤིང་༔ འཆི་བའི་དུས་བབས་ཡིད་ལ་བྱས་ནས་སུ༔ ཤེས་པ་མིག་དང་མིག་ནི་ནམ་མཁར་བལྟ༔ ནམ་མཁའ་རྣམ་པར་དག་པའི་མཁའ་ཀློང་དུ༔ ད་ནི་མྱ་ངན་འདའོ་བསམ་ནས་སྡོད༔ ཡང་གཅིག་གླང་ཆེན་ཉལ་སྟབས་ཀྱིས་སྡོད་ཅིང་༔ བདག་ནི་ངེས་པར་འཆི་བའི་དུས་བབ་ཀྱི༔ དུས་དེ་ཡི་དལ་བྱས་ནས་ཞེན་ཆགས་སྤངས༔ ལོངས་སྤྱོད་རྫོགས་སྐུའི་ཞིང་ཁམས་ཡིད་བྱེད་ཅིང་༔ གོང་བཞིན་ཤེས་པ་མིག་ལ་གཏད་ནས་སུ༔ མིག་གི་དབྱིངས་སྣང་མངོན་དུ་བྱེད་པ་དང་༔ མ་དག་སྣང་བ་དག་དབྱིངས་དྭངས་མ་རུ༔ གོ་འཕོས་ཟུང་(40ན)འཇུག་ཆེན་པོར་འབྱམས་ཀླས་བཞག༔ སླར་ཡང་དྲང་སྲོང་ཙོག་པུ་གྱིས་སྡོད་ཅིང་༔ མ་དག་འཁོར་བའི་སེམས་དང་སྣང་བ་ཀུན༔ རྨི་ལམ་དབྱིངས་སུ་སད་པ་ཇི་བཞིན་དུ༔ རང་བཞིན་སྤྲུལ་སྐུའི་ཞིང་ཁམས་ཡིད་བྱེད་ཅིང་༔ དབྱིངས་སྣང་མངོན་བྱེད་སྤྲོས་པ་བྲལ་བར་བཞག༔ གནད་དེས་འཆི་བ་འོད་གསལ་ཆེན་པོར་འཕོ༔ རང་བཞིན་རྣམ་དག་ཞིང་དུ་འཕོ་ནུས་འགྱུར༔ ཞེས་པ་སྟེ། ལུས་སེང་གེའི་ཉལ་སྟབས་དང་བཅས་ད་ནི་བདག་འཆི་བའི་དུས་ལ་བབ་པ་ཡིན་པས་ནམ་མཁའ་རྣམ་པར་དག་པའི་ཀླུང་དུ་མྱ་ངན་ལས་འདའ་བར་བྱའོ་སྙམ་དུ་ཤེས་པ་མིག་ལ་གཏད་ཅིང་མིག་ནམ་མཁའ་ལ་གཏད་དུ་དབྱིངས་རིག་མི་འགྱུར་བའི་ངང་དུ་མཉམ་པར་འཇོག །ཡང་གླང་ཆེན་ཉལ་སྟབས་དང་བཅས་ཆགས་འཛིན་ཞེན་སེམས་ཐམས་ཅད་སྤངས་ནས་འཆི་བའི་དུས་བབ་ཡིད་ལ་བྱས་ཏེ་མ་དག་སྙིགས་མའི་སྣང་བ་དག་དབྱིངས་དྭངས་མར་གོ་འཕོས་ནས་སྐུ་དང་ཐིག་ལེའི་རོལ་པར་འབྱམས་ཀླས་པར་བསམ་ལ་དབྱིངས་སྣང་མི་འགྱུར་བའི་ངང་དུ་བཞག །ཡང་དྲང་སྲོང་ཙོག་པུར་འདུག་སྟེ་མ་དག་འཁྲུལ་པའི་སྣང་སེམས་ཐམས་ཅད་རྨི་ལམ་དབྱིངས་སུ་སད་པ་ལྟར་རང་བཞིན་སྤྲུལ་པའི་ཞིང་ཁམས་སུ་མཆེད་པར་བསམ་ལ་དབྱིངས་སྣང་མངོན་དུ་བྱས་ཏེ་སྤྲོས་པ་དང་(40བ)བྲལ་བར་བཞག་གོ ། དེ་ལྟར་གནད་དུ་བསྣུན་པས་སྔ་མས་ཆོས་ཀྱི་སྐུར་སངས་རྒྱས། བར་པས་ལོངས་སྤྱོད་རྫོགས་སྐུར་དབུགས་འབྱིན། ཐ་མས་རང་བཞིན་སྤྲུལ་སྐུའི་ཞིང་དུ་འཕོ་བར་འགྱུར་རོ། །ལེའུའི་སྐབས་བསྡུ་བ་ནི། འབྱུང་བ་ཟད་པའི་སྐྱེ་མཆེད་འགྲུབ་པ་དང་འཆི་བ་སྦྱངས་པའི་མན་ངག་བསྟན་པའི་ལེའུ་སྟེ་བཅུ་གསུམ་པའོ༔ ས་མ་ཡ༔ གུ་ཧྱ༔ བཞི་པ་ཆོས་ཉིད་ཟད་པའི་སྣང་བ་ལ། ཆོས་ཟད་བློ་འདས་ཀྱི་ཚུལ་དང་། གཞོན་ནུ་བུམ་སྐུར་གྲོལ་ཚུལ་གཉིས་ལས། དང་པོ་ཆོས་ཟད་བློ་འདས་ཀྱི་ངང་ཚུལ་བསྟན་པ་ནི། དེ་ལྟར་སྦྱངས་པའི་ཡོན་ཏན་མཐར་ཕྱིན་ཏེ༔ རིགས་ལྔའི་ཚོམ་བུར་རང་མདོག་རེས་མོས་སུ༔ ཤར་ནས་འོད་ཟེར་ཆེན་པོའི་དབང་ནོད་དེ༔ ཆོས་ཅན་སྣང་བ་ཆོས་ཉིད་ཆེན་པོ་རུ༔ ཟད་པས་མི་འཇིགས་གདེངས་ཆེན་བཞི་ཐོབ་སྟེ༔ སྤྲོས་བྲལ་རྣམ་ཐར་གསུམ་ལྡན་བཙུན་མོའི་མཁར༔ ཁྱབ་བརྡལ་ཕྱོགས་ལྷུང་བྲལ་བའི་ངང་དུ་འབྱམས༔ ལུས་ནི་དུར་ཁྲོད་མི་རོ་ཇི་བཞིན་དུ༔ འཇིགས་པའི་ཡུལ་དང་འཇིགས་དང་དོགས་པ་མེད༔ ངག་ནི་བྲག་ལ་བྲག་ཆ་སྣང་བ་བཞིན༔ སྒྲ་རྣམས་ཀུན་གྱི་རྗེས་སུ་ཟློས་པ་ལ༔ འཛིན་དང་ཞེན་པ་མེད་པ་རང་རྡོལ་འོང་༔ ཡིད་དང་འཛིན་རྟོག་ཡེ་ཤེས་དབྱིངས་སུ་ཞིག༔ ཆབ་རོམ་གྲང་ལྷག་སྤུན་ཐག་(41ན)དང་བྲལ་ཚེ༔ ཆུ་ཡི་རང་བཞིན་ཉིད་དུ་ཞིག་པ་བཞིན༔ གཟུང་འཛིན་གཉིས་ཀྱི་སྤུན་ཐག་དང་བྲལ་ཏེ༔ གདོད་མ་གཞི་ཡི་ངང་དུ་འབྱམས་ཀླས་སོ༔ ཞེས་པ་སྟེ། ཐལ་འགྱུར་ལས། ཆོས་ཉིད་ཟད་པའི་སྣང་བ་ནི། །ཉམས་ཀྱི་སྣང་བ་སྟོང་ནས་ནི། །ལུས་ཟད་དབང་པོའི་ཡུལ་ཡང་ཟད། །རྟོག་ཚོགས་འཁྲུལ་པ་རང་གྲོལ་ནས། །བརྗོད་གཞིའི་ཚིག་དང་བྲལ་བའོ། །ཞེས་པས། ཕྱི་འཁྲུལ་སྣང་གི་ཆ་དང་ནང་འཁྲུལ་རྟོག་སེམས་དང་སེམས་བྱུང་གི་བག་ཆགས་ཐམས་ཅད་ཟད་པ་དང་གསང་བ་འོད་གསལ་གྱི་སྣང་བ་ཐམས་ཅད་ཀྱང་ཆོས་ཉིད་བརྗོད་དུ་མེད་པའི་དབྱིངས་སུ་ཟད་པས་ན་ཆོས་ཉིད་ཟད་པ་སྟེ། དེ་ལྟར་ཟད་པའི་རང་བཞིན་ལ་ཟད་ལུགས་གཉིས་ཀྱི། རིམ་གྱིས་ཟད་པ་ནི། སྣང་བཞི་ཚད་དུ་ཕྱིན་པ་གང་ཡིན་པ་དང་། བློ་མཆོག་གཅིག་ཅར་བ་རེ་ཙམ་ནི་མངོན་སུམ་གྱི་སྣང་བ་ཉིད་གོམས་སུ་བཅུག་པས་གོང་འཕེལ་དང་ཚད་ཕེབས་ཀྱི་རིམ་པ་ལ་མི་ལྟོས་པར་ཟད་པའང་ཡོད་དོ། །དེ་ལ་ཕྱི་རྟགས་སུ་དབྱིངས་དང་ཐིག་ལེ་ཟད་པའི་སྔ་ཐོག་ཏུ་དབྱིངས་ཀྱི་སྣང་བ་མཐིང་གའི་ཀློང་དུ་ཐིག་ལེ་མཐིང་ག་བསེ་ཕུབ་ཙམ་གྱི་ནང་དུ་མི་བསྐྱོད་པ་ཡབ་ཡུམ་གཙོ་བོར་བཞུགས་པའི་འཁོར་སེམས་དཔའ་སེམས་མ་བཞི་དང་བཅས་པ་ལྔ་ཚོམ་དུ་ཤར་བའི་བར་མཚམས་སུ་རྡོ་རྗེ་ལུ་(41བ)གུ་རྒྱུད་མཐིང་ནག་མུ་མེན་གྱི་ཕྲེང་བ་བསྟར་ལ་བརྒྱུས་པ་ལྟར་འཆར་ཞིང་། སྐུ་དེ་དག་གི་ཐུགས་ཀ་ནས་འོད་ཟེར་མཐིང་གའི་སྣམ་བུ་རང་གི་སྙིང་གར་ཟུག་པའི་ཐིག་ལེ་མཐིང་ག་བཻཌཱུརྱའི་ཕོར་པ་ཁ་སྦུབས་པ་ལྟ་བུ་བརྩེགས་མར་བྱས་པ་འཆར་རོ། །དེ་རྫོགས་པའི་རྗེས་སུ་དབྱིངས་སྣང་དཀར་གསལ་གྱི་ཀློང་དུ་ཐིག་ལེ་དཀར་པོ་བསེ་ཕུབ་ཙམ་གྱི་ནང་དུ་རྣམ་སྣང་ཡབ་ཡུམ་གཙོ་བོར་བཞུགས་པའི་འཁོར་སེམས་དཔའ་སེམས་མ་བཞི་དང་བཅས་པ་ལྔ་ཚོམས་སུ་ཤར་བའི་གོ་མཚམས་སུ་རྡོ་རྗེ་ལུ་གུ་རྒྱུད་ཤེལ་གྱི་ཕྲེང་བ་བརྒྱུས་པ་ལྟར་འཆར་ཞིང་། སྐུ་དེ་དག་གི་ཐུགས་ཀ་ནས་འོད་ཀྱི་སྣམ་བུ་དཀར་པོ་རང་གི་སྙིང་གར་ཟུག་པའི་སྟེང་དུ་ཐིག་ལེ་དཀར་པོ་དུང་གི་ཕོར་པ་ཁ་སྦུབས་པ་ལྟ་བུ་བརྩེགས་མར་བྱས་པ་འཆར་རོ། །དེ་རྫོགས་པའི་རྗེས་སུ་དབྱིངས་སྣང་སེར་པོའི་ཀློང་དུ་ཐིག་ལེ་སེར་པོ་བསེ་ཕུབ་ཙམ་གྱི་ནང་དུ་རིན་འབྱུང་ཡབ་ཡུམ་གཙོ་བོར་བཞུགས་པའི་འཁོར་སེམས་དཔའ་སེམས་མ་བཞི་དང་བཅས་པ་ལྔ་ཚོམས་སུ་ཤར་བའི་བར་མཚམས་སུ་རྡོ་རྗེ་ལུ་གུ་རྒྱུད་གསེར་གྱི་ཕྲེང་བ་ལྟ་བུར་ཆེ་བ་འོད་དང་ལྡན་པ་འཆར་ཞིང་། སྐུ་དེ་དག་གི་ཐུགས་ཀ་ནས་འོད་ཟེར་སེར་པོའི་སྣམ་བུ་རང་གི་སྙིང་གར་ཟུག་པའི་སྟེང་དུ་ཐིག་ལེ་སེར་པོ་གསེར་གྱི་ཕོར་པ་ཁ་སྦུབས་པ་ལྟ་བུ་བརྩེགས་མར་བྱས་པ་འཆར་རོ། །དེ་(42ན)རྫོགས་པའི་རྗེས་སུ་དབྱིངས་སྣང་དམར་པོའི་ཀློང་དུ་ཐིག་ལེ་དམར་པོ་བསེ་ཕུབ་ཙམ་གྱི་ནང་དུ་སྣང་མཐའ་ཡབ་ཡུམ་གཙོ་བོར་བཞུགས་པའི་འཁོར་སེམས་དཔའ་སེམས་མ་བཞི་དང་བཅས་པ་ལྔ་ཚོམས་སུ་ཤར་བའི་གོ་མཚམས་སུ་རྡོ་རྗེ་ལུ་གུ་རྒྱུད་བྱི་རུའི་ཕྲེང་བ་བརྒྱུས་པ་ལྟར་འཆར་ཞིང་། ལྷ་དེ་དག་གི་ཐུགས་ཀ་ནས་འོད་ཀྱི་སྣམ་བུ་དམར་པོ་རང་གི་སྙིང་གར་ཟུག་པའི་སྟེང་དུ་ཐིག་ལེ་དམར་པོ་བྱི་རུའི་ཕོར་པ་ཁ་སྦུབས་པ་ལྟ་བུ་བརྩེགས་མར་བྱས་པ་འཆར་རོ། །དེ་རྫོགས་པའི་རྗེས་སུ་དབྱིངས་སྣང་ལྗང་གུའི་ཀློང་དུ་ཐིག་ལེ་ལྗང་གུ་བསེ་ཕུབ་ཙམ་གྱི་ནང་དུ་དོན་གྲུབ་ཡབ་ཡུམ་གཙོ་བོར་བཞུགས་པའི་འཁོར་བྱང་ཆུབ་སེམས་དཔའ་སེམས་མ་བཞི་དང་བཅས་པ་ལྔ་ཚོམས་སུ་ཤར་བའི་གོ་མཚམས་སུ་རྡོ་རྗེ་ལུ་གུ་རྒྱུད་གཡུ་ཡི་ཕྲེང་བ་ལྟར་དཀྲིས་ཤིང་འཁྱུད་པའི་རྣམ་པར་འཆར་ཞིང་། སྐུ་དེ་དག་གི་ཐུགས་ཀ་ནས་འོད་ཟེར་ལྗང་གུའི་སྣམ་བུ་རང་གི་སྙིང་གར་ཟུག་པའི་སྟེང་དུ་ཐིག་ལེ་ལྗང་གུ་གཡུ་ཡི་ཕོར་པ་ཁ་སྦུབས་པ་ལྟ་བུ་བརྩེགས་མར་བརྒྱན་པ་འཆར་རོ། །འོད་དེ་དག་ཤར་མ་ཐག་ཏུ་འོད་ཟེར་ཆེན་པོའི་དབང་ནོད་དེ་དུང་ཁང་དུ་ཁྲག་འཐུང་རོལ་པའི་དཀྱིལ་འཁོར་ཐམས་ཅད་སྟེང་ཕྱོགས་ཀྱི་རྣམ་པར་སྣང་བའི་ཚེ་ན་སྣོད་བཅུད་སྣང་བ་ཐམས་ཅད་འོད་གསལ་དུ་(42བ)དེངས་ནས་རང་ལུས་ཀྱང་འོད་ཀྱི་ཀློང་དུ་ལག་པའི་སོར་མོ་བཀྲམ་པ་ཙམ་ལས་མི་སྣང་ངོ་། །དེ་ནས་འོད་གསལ་གྱི་སྣང་བ་སྐུ་དང་ཐིག་ལེ་ཐམས་ཅད་སྤྲིན་ཕུང་དབྱིངས་སུ་ཡལ་བ་ལྟར་རིམ་གྱིས་ཡལ་ནས་དག་དང་མ་དག་པའི་སྣང་བ་ཐམས་ཅད་ཟད་པ་སྟེ། དོན་དམ་པར་གནམ་སྟོང་གི་ཟླ་བ་ཅི་ཡང་མེད་པ་ལྟར་སྣང་ཡང་རང་གི་ངོ་བོ་ཆེར་སོང་བ་དང་ཆུང་དུ་སོང་བ་གང་ཡང་མེད་པས་རང་གདངས་དབྱིངས་སུ་ནུབ་པ་ཤེལ་འོད་ནང་དུ་ནུབ་པ་ལྟ་བུའོ། །ནང་རྟགས་སུ་ཚིག་དབང་གིས་སེམས་དག་པས་ཀུན་གཞིའི་སྒྲིབ་པ་དབྱིངས་སུ་དེངས་ནས་མ་རིག་པ་གཞི་ལ་སངས། ཉོན་ཡིད་ཀྱི་ངར་འཛིན་རང་སར་ཞི་བས་གཟུང་འཛིན་གྱི་འཆིང་བ་གྲོལ། ཡུལ་འཛིན་གྱི་ཤེས་པ་ངོ་བོར་གྲོལ་བས་བློ་ཡི་ཟུང་ཟད། ཚོགས་བརྒྱད་ཀྱི་རྟོག་པ་ཡེ་ཤེས་སུ་འཕོས་ཏེ་སེམས་དང་སེམས་བྱུང་གི་རྟོག་པ་ཟད། མཆེད་གཞིའི་སེམས་རྟོག་ཟད་པས་མཆེད་པ་རང་ཡལ། ཡུལ་འཛིན་གྱི་ཤེས་པ་ཟད་པས་གཟུང་བའི་ཡུལ་ཟད། བདག་འཛིན་གྱི་རྒྱ་གྲོལ་ཏེ་ཟག་བཅས་ཀྱི་ཕུང་པོ་ཟད་པའོ། །འདིའི་དུས་སུ་ལུས་དུར་ཁྲོད་ཀྱི་མི་རོ་རྟོག་མེད་ལྟ་བུའི་སྲོག་གཅོད་ཀྱི་གཤེད་མ་སྟོང་གིས་བསྐོར་ཀྱང་བག་ཚ་ཅུང་ཟད་ཙམ་ཡང་མེད་པ་དང་། ངག་བྲག་ཆ་ལྟ་བུར་སོང་ནས་སྒྲ་ཐམས་ཅད་རྗེས་སུ་(43ན)ཟློ་བ་དང་། སེམས་འཇའ་ཚོན་ནམ་མཁའ་ལ་ཡལ་བ་ལྟར་རིག་པ་གདོད་མའི་མགོན་པོའི་དབྱིངས་སུ་འབྱམས་ཀླས་པའོ། །དེ་ལྟར་ཆོས་ཉིད་ཟད་པའི་དུས་སུ་མདོ་ལམ་གྱི་ས་བཅུ་པ་ལས་ཆེར་འཕགས་ཤིང་སྔགས་ལམ་དུ་ལྷུན་གྲུབ་རིག་འཛིན་གྱིས་མཆོག་དོན་གྱིས་ཐོབ་པ་ཡིན་ནོ། །ལེའུའི་སྐབས་བསྡུ་བ་ནི། ཆོས་ཟད་བློ་འདས་ཆེན་པོའི་ཚུལ་བསྟན་པའི་ལེའུ་སྟེ་བཅུ་བཞི་པའོ༔ ས་མ་ཡ༔ གུ་ཧྱ༔ གཉིས་པ་གཞོན་ནུ་བུམ་སྐུར་གྲོལ་ཚུལ་ནི་༔ སླར་ཡང་ཤེས་སྒྲིབ་ཕྲ་བའི་ཕྲ་བ་ཉིད༔ དབྱིངས་སུ་ཞིག་ཏེ་དྲི་མ་དང་བྲལ་ནས༔ ཇི་ལྟ་མཁྱེན་པའི་ཡེ་ཤེས་ཆེན་པོ་ཡི༔ ཆོས་ཉིད་དེ་བཞིན་ཉིད་ལ་མངའ་དབང་བསྒྱུར༔ ཇི་སྙེད་གཟིགས་པའི་ཡེ་ཤེས་མངོན་གྱུར་ཏེཿ སྐུ་དང་ཡེ་ཤེས་རོལ་པར་འབྱམས་ཀླས་པས༔ འཕོ་ཆེན་དང་ནི་འཇའ་ལུས་ཆེན་པོ་རུ༔ ཡང་དག་རྫོགས་པའི་སངས་རྒྱས་ཐོབ་པ་ཡིན༔ ཞེས་པ་སྟེ། ད་དུང་ཡང་ཤེས་སྒྲིབ་ཕྲ་བའི་ཕྲ་བ་བག་ལ་ཉལ་བ་ལངས་ཏེ་མཁའ་ལ་གློག་འཁྱུག་པས་སྣང་བ་སྟོན་པ་བཞིན་དུ་རང་ལུས་འོད་ཀྱི་ཀློང་དུ་འོད་ལུས་ལག་སོར་བཀྲག་པ་ཙམ་དུ་སྣང་སྟེ། སྣང་སེམས་སྐབས་འབྱེད་ཅིང་གཏམ་དང་ཆོས་ཚིག་སྔར་བཞིན་སྨྲ་བའི་སྐབས་(43བ)འགའ་མཆིས་ཤིང་། དེ་ནས་ཞག་བཅུ་འམ་ཟླ་བ་གཅིག་གམ་བདུན་ནམ་བཅུ་གཉིས་ནས་ཤེས་སྒྲིབ་ཕྲ་བའི་ཕྲ་བ་དབྱིངས་སུ་དྭངས་ནས་ཇི་ལྟ་བ་མཁྱེན་པའི་ཡེ་ཤེས་ཀྱི་རྩལ་རྫོགས་ཏེ་ཀ་དག་གཞིའི་ཆོས་སྐུ་ལ་མངའ་དབང་བསྒྱུར། ཇི་སྙེད་པ་གཟིགས་པའི་ཡེ་ཤེས་ཀྱི་རྩལ་རྫོགས་པས་ལྷུན་གྲུབ་སྐུ་དང་ཡེ་ཤེས་ཀྱི་རོལ་པ་ལ་མངའ་དབང་བསྒྱུར་ཏེ་འཕོ་ཆེན་གཞོན་ནུ་བུམ་སྐུར་སངས་རྒྱས་སྟེ། དེ་ཡང་སྐྱེ་འཆི་བ་སྒྲེས་རྒུད་ཐམས་ཅད་ལས་འདས་པས་གཞོན་ནུ། རང་ཉིད་ཡེ་ཤེས་ཀྱི་ཕུང་པོ་ལས་ཕྱི་རྒྱ་མ་རལ་བས་བུམ་པ། ཡེ་ཤེས་ཡོན་ཏན་ཐམས་ཅད་ཕུན་སུམ་ཚོགས་པས་སྐུ་ཡང་དག་པའོ། །དེ་ལྟར་གྲོལ་བའི་དུས་སུ་དྭངས་མའི་ལུས་དེ་ནམ་མཁའ་ནམ་མཁའ་ལ་ཐིམ་པ་ལྟར་ཚེ་ཚད་ལ་མི་ལྟོས་པར་ཆོས་དབྱིངས་སྤྲོས་པ་དང་བྲལ་བའི་ངང་དུ་འབྱམས་ཀླས་པ་ནི་འཕོ་བ་ཆེན་པོའི་སྐུ་རུ་གྲོལ་བ་ཡིན། ལུས་ལ་འོད་ཁྲིགས་ཤིང་འོད་ཀྱི་ངང་དུ་ཡལ་བ་དང་། མཁའ་ལ་འཇའ་སྤྲིན་འཁྲིགས་པའི་འོད་ཀྱིས་སྣམ་བུས་དཀྲིས་ཤིང་འཇའ་ཚོན་གྱི་ངང་དུ་ཡལ་བ་ནི་འཇའ་ལུས་ཆེན་པོ་སྟེ། དེ་གཉིས་ནི་ལུས་སེམས་མ་བྲལ་བར་སངས་རྒྱས་པའོ། །ཡང་ལུས་སེམས་བྲལ་རྗེས་འཇའ་དང་འོད་ཀྱི་ངང་དུ་ཕུང་པོ་ལྷག་མ་མེད་པར་ཡལ་བ་ནི་འཇའ་ལུས་ཆུང་དུ་དང་། ཞག་གྲངས་བདུན་(44ན)ཕྲག་ཚུན་ཆད་དུ་ལུས་ཀྱི་ལྟོས་པ་ཇེ་ཆུང་དུ་སོང་ནས་མཐར་སྐྲ་སེན་ཙམ་ལས་ལུས་རྡུལ་ཕྲན་དུ་དེངས་པ་ནི་འཕོ་བ་ཆུང་ངུ་ཞེས་བྱ་སྟེ། སྔ་མ་དབང་རབ་དང་བར་པ་གཉིས་དབང་འབྲིང་ཕྱི་མ་གཉིས་དབང་པོ་ཐ་མའི་གྲོལ་ལུགས་ཡིན་ནོ། ། དྲུག་པ་མཐའ་རྟེན་གྱི་མན་ངག་བསྟན་པ་ནི། ཀློང་གསལ་ལས། མཐའ་རྟེན་མན་ངག་རྣམ་པ་བཞི། །གོང་མའི་རྒྱབ་ཏུ་མེད་ཐབས་མེད། །ཅེས་པས། འདི་ལ་མི་འགུལ་བ་གསུམ་གྱིས་གཞི་བཅའ་བ། སྡོད་པ་གསུམ་གྱིས་ཚད་བཟུང་བ། ཐོབ་པ་གསུམ་གྱིས་གཟེར་གདབ་པ། གདིང་བཞིས་གྲོལ་ཚད་བསྟན་པ་དང་བཞི་ལས། དང་པོ་མི་འགུལ་བ་གསུམ་གྱིས་གཞི་བཅའ་བ་ནི། ཐལ་འགྱུར་ལས། མི་འགུལ་གསུམ་ལ་གཞི་བཅས་པས། །རླུང་སེམས་གནད་དུ་ཕེབས་པའོ། །ཞེས་པས། ལུས་བཞུགས་སྟངས་ལས་མི་འགུལ་བས་རྩ་རླུང་རང་དལ། མིག་གཟིགས་སྟངས་ལས་མི་འགུལ་བས་སྣང་བའི་འཕེལ་འཛིན། སེམས་བཟོ་མེད་ལས་མི་འགུལ་བས་དབྱིངས་རིག་འདུ་འབྲལ་མེད་པའི་དགོས་པ་ཡོད་དོ། ། གཉིས་པ་སྡོད་པ་གསུམ་གྱིས་ཚད་བཟུང་བ་ནི། སྔ་མ་ལས། སྡོད་པ་གསུམ་གྱིས་ཚད་བཟུང་བས། །རྨི་ལམ་ལྡོག་དང་ལུས་ངག་ཡིད། །རྟགས་དང་ཚད་ནི་ངོས་བཟུང་བའོ། །(44བ)ཞེས་པས། ལུས་བྱ་བ་ལ་མི་གནས་པར་སྡོད་པས་འཁོར་བའི་འཁྲུལ་རྟོག་འགག །རླུང་འཕེལ་མེད་དུ་སྡོད་པས་རྣམ་རྟོག་གཡོ་བའི་རྐྱེན་ཟད། སྣང་བ་འདར་འཕྲིག་མེད་པར་སྡོད་པས་ཞིང་ཁམས་ཚད་ལ་ཕེབས་པར་བྱེད་དོ། །སྐབས་འདིར་ཚད་རྨི་ལམ་གྱིས་བཟུང་བ་ནི། གསང་བ་སྒྲ་རྒྱུད་ལས། རབ་ལ་འཆར་དང་འབྲིང་གིས་ཤེས། །ཐ་མ་འགྱུར་བ་ངེས་པ་སྟེ། །ཞེས་པ་ལྟར་དབང་རྣོན་བརྩོན་འགྲུས་ཅན་རབ་ལ་རྨི་ལམ་དབྱིངས་སུ་དག་ནས་འོད་གསལ་དུ་འཆར། འབྲིང་གི་རྨི་ལམ་རྨི་ལམ་དུ་ཤེས་ཏེ་སྤྲུལ་བསྒྱུར་གྱིས་འདའ། ཐ་མ་བག་ཆགས་ངན་པའི་རྨི་ལམ་རྒྱུན་ཆད་ནས་བཟང་པོ་ཤ་སྟག་རྨི་བའོ། ། ཞར་ལ་བར་ཆད་བདུད་ཀྱི་རྟགས། འཕེལ་འགྲིབ་ཉམས་ཀྱི་རྟགས། མི་འགྱུར་གསང་བའི་རྟགས་གསུམ་སྟོན་པ་ལ། དང་པོ་བར་ཆད་བདུད་ཀྱི་རྟགས་ནི། སྔར་བཤད་པ་པའི་ཉམས་སྣང་གོང་འཕེལ་གྱི་སྐབས་སུ་བར་ཆད་བདུད་ཀྱི་རྟགས་སྣ་ཚོགས་འབྱུང་སྟེ། ཕ་རོལ་གྱི་སེམས་ཤེས་པ་སྙམ་བྱེད་པ་དང་། ལུས་སྣ་ཚོགས་སུ་སྤྲུལ་ནུས་པའི་སྣང་བ་དང་། གྲིབ་མ་དང་མེ་ལོང་ལ་གཟུགས་བརྙན་གཉིས་སུ་འཆར་བ་རྣམས་བྱུང་ན་གུ་གུལ་གྱི་དུད་པས་བདུག་ཅིང་བདུད་རྩི་ཆེ་ཆུང་གིས་ལུས་བཀྲུས་ཏེ་ཡན་ལག་ལ་ལྡེར་ཚོ་རྙིང་པའི་འདག་པ་བྱུག་པས་སེལ་ལོ། །གཞན་(45ན)ཡང་བགེགས་ཡི་དམ་གྱི་གཟུགས་སུ་བརྫུ་བ་དང་། སྣ་ཚོགས་ལས་ཀྱི་མཁའ་འགྲོ་མ་རྣམས་ཡེ་ཤེས་ཀྱི་མཁའ་འགྲོར་བརྫུས་ནས་གཟུགས་སྟོན་པ་དང་ལུང་སྟོན་པ་སོགས་འབྱུང་བས། དེ་ལ་བདེན་ཞེན་སྐྱེས་ནས་བསྒྲུབ་ན་བདག་ཉིད་མཁའ་འགྲོའི་དབང་དུ་གྱུར་ནས་འཁོར་བ་མཐའ་མེད་དུ་འཁྲུལ་པ་ཡིན་པས། དེའི་དུས་སུ་འཁོར་འདས་རང་སྣང་ལས་མི་གཞན་པའི་ཚུལ་ཤེས་ཏེ་ཞེན་མེད་ཀྱི་ངང་དུ་བཞག་པས་མཁའ་འགྲོ་མ་བདག་གི་དབང་དུ་གྱུར་ནས་གསང་བ་མཆོག་གི་དངོས་གྲུབ་མ་བཙལ་རང་བབས་སུ་ཐོབ་པར་འགྱུར་རོ། །གཞན་ཡང་རང་ཡི་དམ་དྲག་པོ་བསྒོམ་ནས་དྲག་སྔགས་བཟླས་པས་ཀྱང་བར་ཆད་ཐམས་ཅད་ངེས་པར་སེལ་བ་ཡིན་ནོ། ། གཉིས་པ་འཕེལ་འགྲིབ་ཉམས་ཀྱི་རྟགས་ནི། རླུང་སེམས་འདུས་ཚུལ་གྱི་རྐྱེན་ལས་ཡིད་བརྟན་མི་རུང་བའི་ཏིང་འཛིན་གློ་བུར་དུ་སྐྱེ་བ་དང་། ནམ་མཁར་ལྷ་སྐུ་དང་འོད་སྣང་འཁྲིགས་པ་སོགས་མ་ངེས་པར་བྱུང་ན། རེས་འགའ་ཆུ་ཡི་དཀྱིལ་དུ་འདུག །ཤིང་གི་བྱང་བུ་སོར་བཅུ་དྲུག་པའི་བར་དུ་མཇིང་པ་ལྟམས་ནས་ལུས་ལ་ཙནྡན་གྱི་མར་ཁུས་བཀུ་མཉེ་བྱ་ཞིང་བསིལ་བའི་ཁ་ཟས་བསྟེན། སྐྱེ་མེད་ཀྱི་སྙིང་པོ་ཨ་བསྒྲངས་པ་སོགས་ཀྱིས་ཡང་དག་པའི་ལམ་དུ་སོར་ཆུད་པར་འགྱུར་རོ། ། གསུམ་པ་མི་འགྱུར་(45བ)གསང་བའི་རྟགས་ནི། ཕྱི་འབྱུང་བ་ལ་རང་དབང་བསྒྱུར་བས་ཇི་ལྟར་བསྒྱུར་ཀྱང་བསྒྱུར་བཏུབ་པ་དང་། ནང་འབྱུང་བ་ལ་རང་དབང་བསྒྱུར་པས་ལུས་ལ་གཉེར་མ་མེད་ཅིང་མེ་ལོང་གི་བྱད་ལྟར་དྭངས་པ་དང་། སྐྲ་དཀར་ནག་པོར་འགྱུར་ཞིང་སོའུ་སྐྱེ་བ་དང་། ལུས་ལ་རིགས་ལྔའི་ཕྱག་རྒྱ་དང་ཡི་གེ་བཀྲ་ཞིང་སྐྲ་སེན་སྐྱེ་བའི་རྒྱུན་ཆད་མེད་པ་དང་། ཕྱི་ནང་གི་སྲིན་བུ་ཐམས་ཅད་གྲོལ་བའི་རྟགས་སུ་ཤིག་སྲོ་མི་འབྱུང་བ་དང་། ལུས་ཤིང་བལ་ལྟར་ཡངས་ཤིང་དབུགས་ཀྱི་འགྲོ་འོང་མི་མངོན་པ་དང་། སྙིང་རྗེ་ཚད་མེད་པ་སྐྱེ་ཞིང་ཉོན་མོངས་པ་རང་རྒྱུད་དུ་མི་འཆར་བ་རྣམས་ནི་ཡང་དག་པའི་ལམ་མཐར་ཕྱིན་པའི་རྟགས་གོར་མ་འཕྱུག་པའོ། ། གསུམ་པ་ཐོབ་པ་གསུམ་གྱིས་གཟེར་གདབ་པ་ནི། ཀློང་གསལ་ལས། ཐོབ་པ་གསུམ་གྱིས་གཟེར་གདབ་པས། །ཟག་བཅས་ཕུང་པོ་མི་སྣང་བའོ། །ཞེས་པས། སྣང་བ་ལ་རང་དབང་ཐོབ་པས་སྣང་སྲིད་གཏེར་དུ་བསྒྱུར་ཀྱང་འགྱུར་བ་དང་། སྐྱེ་བ་ལ་རང་དབང་ཐོབ་པས་སེམས་ཅན་སུམ་སྟོང་ལ་རིག་པ་གཏད་པས་སྤྲུལ་པའི་སྐུ་སུམ་སྟོང་འབྱུང་ཞིང་འགྲོ་དོན་བྱེད་པ་དང་། སྒྲོལ་བ་ལ་རང་དབང་ཐོབ་པས་མཚམས་མེད་ལྔ་སྤྱོད་པའི་སྡིག་པ་ཆེ་ལའང་རིག་པ་གཏད་པ་ཙམ་གྱིས་སྒྲོལ་ནུས་པའོ། བཞི་པ་གདིང་བཞིའི་གྲོལ་ཚད་བསྟན་པ་ནི། རིན་ཆེན་སྤུངས་པ་(46ན)ལས། མི་འགྱུར་ལྟ་བའི་གདིང་ཆེན་བཞིས། །མ་རྟོག་ཡེ་ཤེས་ཚད་ཀྱང་གཟུང་། །ཞེས་པས། རང་རིག་གདོད་མའི་མགོན་པོའི་གོ་འཕང་མངོན་དུ་གྱུར་པ་དེ་ལས་ཡུལ་རྐྱེན་ལ་མི་ལྟོས་པའི་ཕྱིར་སངས་རྒྱས་སུམ་སྟོང་གི་ཞལ་མཐོང་ཡང་དད་པ་ཅུང་ཟད་ཀྱང་མེད་པའི་གདིང་ཐོབ། རང་གཞི་ཆོས་སྐུ་མཚན་མ་དང་བྲལ་བའི་དབྱིངས་སུ་སད་པས་བདུད་དང་གཤེད་མ་འབུམ་གྱིས་བསྐོར་ཀྱང་བག་ཚ་བ་མེད་པའི་གདིང་ཐོབ། རང་ངོར་རང་གདིང་ཐོབ་པ་ལས་མྱང་འདས་རང་མཚན་མ་མེད་པའི་དོན་གཤིས་ཐོག་ཏུ་ཕེབས་པས་རྒྱུ་འབྲས་རྣམ་སྨིན་ལ་མི་རེ་བའི་གདིང་ཐོབ། རང་ངོ་གདོད་ནས་འཁྲུལ་མི་ཤེས་པའི་ངང་དུ་གྲོལ་བས་འཁོར་བ་དང་ངན་སོང་ལ་དོགས་པ་མེད་པའི་གདིང་ཐོབ་པའོ། །དེ་ལྟར་རྣམ་པ་བཞི་ཚད་དུ་འཁྱོལ་ནས་མྱ་ངན་འདས་པ་ལའང་ཡང་དག་པར་རྫོགས་པའི་སངས་རྒྱས་དང་། མངོན་པ་རྫོགས་པར་སངས་རྒྱས་པ་ལ་གཉིས་ལས། སྔ་མ་ནི་གོང་དུ་སྨོས་པ་ལྟར་ཕུང་པོ་ལྷག་མ་མེད་པར་གྲོལ་བ་དང་། ཕྱི་མ་ནི་འོད་དང་། སྒྲ་དང་། ས་གཡོ་བ་དང་། མི་ཤིགས་པའི་གདུང་དང་རིང་སྲེལ་རྣམས་གདུལ་བྱའི་ལྷག་མ་གྲོལ་བའི་ཆེད་དུ་སྣང་བའོ། །དེ་ཡང་ཆོས་ཀྱི་སྐུ་གཡོ་བ་མེད་པ་སྐུ་དང་ཡེ་ཤེས་ཀྱི་རོལ་པར་འབྱམས་ཀླས་པ་ལས་གཟུགས་ཀྱི་སྐུ་གང་(46བ)ལ་གང་འདུལ་ཐབས་སྣ་ཚོགས་ཀྱི་སྒོ་ནས། འགྲོ་ཁམས་རྒྱ་མཚོ་མ་སྟོངས་ཀྱི་བར་དུ་འགྲོ་བའི་དོན་མཛད་པ་ནི་ཟླ་བ་དང་ཆུ་ཟླ་ལྟ་བུ་ཡིན་ནོ། ། ད་ནི་གནད་ཀྱི་འགག་དོན་བཤད་པས་མཐའ་བསྡུ་བ་ནི། ལམ་འདིར་འཇུག་པའི་སྐྱེས་བུ་ལས་ཅན་རྣམས༔ མི་ལོ་བཅུ་གཉིས་བར་མ་ཆད་པ་རུ༔ ཉམས་ལེན་གནད་དུ་བསྣུན་པ་གང་སུ་དག༔ འཇའ་ལུས་ཆོས་སྐུ་འགྲུབ་པའི་གཏན་ཚིག་གོ༔ ཞེས་པ་སྟེ། ཟབ་གསང་ཐེག་མཆོག་རྒྱལ་པོའི་ལམ་འདིར་བཞུགས་པའི་སྐྱེས་བུ་སྔོན་སྦྱངས་ཀྱི་ལས་འཕྲོ་དང་ལྡན་པ་དག་གིས། མི་ལོ་བཅུ་གཉིས་བར་མ་ཆད་པར་ཉམས་སུ་བླངས་པས་འཇའ་ལུས་ཆོས་ཀྱི་སྐུ་ངེས་པར་འགྲུབ་པ་ནི་མི་བསླུ་བའི་གཏན་ཚིག་ཀུན་བཟང་རྡོ་རྗེ་འཆང་གི་བཀའ་ཚད་མའོ། །ལེའུའི་སྐབས་བསྡུ་བ་ནི། ཆོས་ཟད་བློ་འདས་ཆེན་པོའི་ས་ལ་ཕེབས་པའི་མཐར་ཟླ་བ་གཅིག་གམ་བདུན་ནམ་བཅུ་གཉིས་ནས་སངས་རྒྱས་ཚུལ་བསྟེན་པའི་ལེའུ་སྟེ་བཅོ་ལྔ་པའོཿ ས་མ་ཡ༔ གུ་ཧྱ༔ དེ་ལྟར་དབང་པོ་རབ་དང་སྦྱངས་བརྩོན་ཕུལ་དུ་གྱུར་པ་རྣམས་ཀྱི་ཚེ་གཅིག་གིས་གདོད་མའི་གྲོལ་གཞིར་དབུགས་འབྱིན་པའི་ཐབས་བསྟན་པ་སོང་ནས། བརྩོན་འགྲུས་སྐལ་པ་འབྲིང་དང་ཐ་མར་གྱུར་པ་རྣམས་ཀྱིས་ཉམས་སུ་ལེན་བྱ་བར་དོ་རྣམ་པ་གསུམ་དང་སྐྱེ་བ་སྤྲུལ་སྐུའི་ཞིང་དུ་ངལ་གསོ་བའི་(47ན)ཚུལ་གནས་ལུགས་རང་བྱུང་གི་རྒྱུད་སོགས་གཞུང་གཞན་དུ་བལྟ་བར་བྱའོ། ། གསུམ་པ་ཐ་མར་དགེ་བ་མཇུག་གི་དོན་ལ་གསུམ། ཟབ་ཆོས་གཉན་པོ་གཉེར་དུ་གཏད་པ། གསང་བ་ཆེན་པོའི་རྒྱས་བཏབ་པ། གང་གིས་གཏན་ལ་ཕབ་པའི་མཛད་བྱང་ངོ་། །དང་པོ་ཟབ་ཆོས་གཉན་པོ་གཉེར་དུ་གཏད་པ་ནི། བཀའ་སྲུང་དྲེགས་པ་གནོད་སྦྱིན་དམར་ནག་དང་༔ དབང་ཕྱུག་མ་ཧཱ་དེ་ཝ་ཉིད་ལ་གཏད༔ ཆོས་འདི་ཉམས་སུ་ལེན་པའི་སྐྱེས་བུ་རྣམསཿ ཀ་དག་ཀུན་ཏུ་བཟང་པོའི་ས་རུ་སྐྱོལ༔ བཀའ་ལོག་བསྟན་དགྲ་གདུག་པའི་སྙིང་ཁྲག་རོལ༔ དམ་ཉམས་ལག་ཏུ་མ་ཤོར་ཨ་ཐམ་རྒྱཿ ཞེས་པ་སྟེ། བསྟན་སྲུང་དྲེགས་པའི་གཙོ་བོ་གནོད་སྦྱིན་ཤན་པ་དམར་ནག་དང་དབང་ཕྱུག་མ་ཧཱ་དེ་ཝ་གཉིས་ལ་གཉེར་དུ་གཏད་དེ། ཟབ་ཆོས་འདི་ཉིད་ཉམས་སུ་ལེན་པའི་སྐྱེས་བུ་དག་གི་མི་འདོད་པའི་འགལ་རྐྱེན་ས་ལམ་གྱི་བར་ཆད་ཐམས་ཅད་སོལ་ལ་མཐུན་རྐྱེན་ཕྲིན་ལས་རབ་འབྱམས་ཐོགས་མེད་དུ་སྒྲུབས་ཏེ་ཀ་དག་ཀུན་ཏུ་བཟང་པོའི་ས་རུ་གྲོལ་བའི་སྡོང་གྲོགས་གཉན་པོ་མཛད་པ་དང་། བཀའ་འགལ་དམ་ལོག་བསྟན་དགྲ་གདུག་པ་ཅན་རྣམས་ཀྱི་སྙིང་ཁྲག་དམར་པོ་ཧུབ་ཀྱིས་རོལ་པ་དེ་ལྟ་བུའི་དམ་ཉམས་ཀྱི་ལག་ཏུ་མ་ཤོར་བར་སྲུངས་ཤིག་ཅེས་ཐ་ཚིག་བསྒོས་པའོ། ། གཉིས་པ་(47བ)གསང་བ་ཆེན་པོའི་རྒྱས་བཏབ་པ་ནི། ས་མ་ཡ༔ རྒྱ་རྒྱ་རྒྱ༔ གསང་རྒྱཿ ཟབ་རྒྱཿ གུ་ཧྱཿ ཨྠྀིཿ ཞེས་པ་སྟེ། རྡོ་རྗེའི་དམ་ཚིག་གཉན་པོ་སྐུ་གསུང་ཐུགས་ཀྱི་རྒྱ་དང་། གསང་ཆེན་གཉིས་ལྡན་གྱི་རྒྱ་དང་། ཟབ་པ་ཆོས་ཀྱི་དབྱིངས་ཀྱི་རྒྱས་བཏབ་པའོ། ། གསུམ་པ་གང་གི་གཏན་ལ་ཕབ་པའི་མཛད་བྱང་ནི། ཅེས་པ་འདི་ཉིད་སྨོན་ལམ་ལས་ཀྱིས་འབྲེལ་བའི་སྐྱེས་བུ་མངོན་དགའ་དང་དགེ་དཔལ་དང་ངག་ཕྲིན་རྣམས་ཀྱིས་ཡང་ཡང་ནན་དུ་བསྐུལ་བའི་ངོར༔ ཡུལ་སྐྱོངས་རྫ་རྒྱལ་འཕན་པོའི་ཉེ་འདབས་སུ་རང་བཞིན་རྫོགས་པ་ཆེན་པོའི་རྣལ་འབྱོར་པ་བདུད་འཇོམས་རྡོ་རྗེས་ཡིག་མེད་མཁའ་འགྲོའི་གསང་མཛོད་ལས་བསྒྱུར་བའི་ཡི་གེ་པ་ནི་མངོན་པར་དགའ་བོ༔ ཞེས་པ་སྟེ། དེ་ལྟར་ཡང་ཟབ་བཅུད་ཀྱི་དྭངས་མ་འདི་ཉིད་རྒྱལ་དབང་པདྨ་མི་ཡི་ཟོལ་འཛིན་གཏེར་ཆེན་བདུད་འཇོམས་རྡོ་རྗེ་ཁྲོ་ལོད་རྩལ་གྱི་ཐུགས་གསང་འོད་གསལ་ནམ་མཁའི་སྒྲོམ་བུར་སྨོན་ལམ་ཟབ་མོའི་རྒྱས་བཏབ་པ་ཉིད་ཕྱིས་གདུལ་བྱ་འདུལ་བའི་དུས་ལ་བབ་པ་ན་སྔོན་སྨོན་ལས་ཀྱིས་འབྲེལ་བའི་སློབ་བུ་དག་གིས་བསྐུལ་བའི་རྐྱེན་ལས། བསྒོམ་བྱུང་གི་ཤེས་རབ་ཀློང་ནས་རྡོལ་བའི་ཟབ་ཆོས་ཡི་གེ་མེད་པའི་སྐོར། འཁོར་འདས་ཀྱི་ཆོས་ཐམས་ཅད་ཀློང་ཆེན་ཀུན་ཏུ་བཟང་མོའི་མཁའ་རུ་འགྲོ་འོང་གི་རྣམ་པ་ལྟར་(48ན)དུ་སྣང་བ་མཁའ་འགྲོ་གསང་བའི་མཛོད་ཆེན་དགོངས་པའི་གཏེར་རྒྱ་ཟབ་མོ་ལེགས་པར་བཀྲལ་ཏེ་གཏན་ལ་ཕབ་པར་མཛད་པའོ། །

སླར་སྨས་པ། དེ་ལྟར་ཡེ་ཤེས་ཀློང་ཆེན་ཡངས་མཛོད་ནས། །བྱུང་བའི་ཐེག་མཆོག་ཟབ་དོན་བདུད་རྩིའི་བཅུད། །ལེགས་བཤད་མན་ངག་རོལ་མཚོར་བསྐྱིལ་བ་འདི། །སྐལ་བཟང་གདུལ་བྱའི་ཚོགས་ཀྱིས་བརྟེན་བྱ་ཡིན། །ས་ལམ་མང་པོའི་ཡུན་ལ་མ་ལྟོས་པར། །ཚེ་ལུས་གཅིག་གིས་ནང་དབྱིངས་ཆོས་སྐུ། །ངེས་འགྲུབ་མྱུར་ལམ་སྙིང་པོ་འདི་ལྟ་བུར། །འཕྲད་པ་དེ་ཡང་སྔོན་གོམས་བརྟས་ལས་བྱུང་། རྟོག་གེས་རྒྱུད་བསླད་མཁས་རློམ་ཟོལ་ཟོག་ཅན། །སྙིང་པོའི་བསྟན་ལ་བཀུར་འདེབས་སྒྲོ་འདོགས་མཁན། །མེ་ཏོག་མདའ་ཅན་དུག་གིས་ཟིན་པ་ཡི། །ལྟོ་འགྲོས་ཅན་གྱི་རིགས་ལ་འདི་མ་འཚལ། །སྔོན་དགེའི་སྙིང་ཁམས་མཐོ་བའི་སྐྱེས་བུ་རྣམས། །དོན་བརྒྱུད་བྱིན་རླབས་ཕབ་ཀྱིས་ལེགས་དྲན་པའི། །མན་ངག་བདུད་རྩིའི་ཉིང་ཁུ་འདི་གསོལ་ལ། །ཆོས་ཟད་དབྱིངས་སུ་མྱོས་པའི་དགའ་སྟོན་མཛོད། །ཁོ་བོའི་སྟོང་ཉིད་ལྟ་བའི་ན་ཕྲ་ཞིང་། །སྣང་བཞིར་བསྒོམ་པའི་རྩལ་ཆེན་མ་རྫོགས་ཀྱང་། །སྔོན་སྦྱངས་མཐུ་ལ་ངེས་ཤེས་ཅུང་རྙེད་དེ། །འདི་ལྟའི་(48བ)ཟབ་དོན་སྨྲ་བའི་སྤོབས་པ་ཐོབ། །དེ་ལྟ་ནའང་རང་བློ་རྨོངས་པའི་དྲིས། །ནོངས་པར་གྱུར་པའི་ཉེས་པ་གང་མཆིས་པ། །ལྷག་པའི་ལྷ་དང་ཌྰ་ཀི་ཆོས་སྐྱོང་ཚོགས། །ཡེ་ཤེས་སྤྱན་ལྡན་རྣམས་པ་བཟོད་པར་གསོལ། །འདིར་རྟེན་ལེགས་བྱས་དགེ་བའི་དངོས་པོ་དེས། །གསང་ཆེན་བསྟན་པའི་སྙིང་པོ་འོད་སྟོང་ཅན། །མི་ནུབ་གདུལ་བྱའི་མཁའ་ལ་རྟག་འཆར་ཏེ། །ཕན་བདེའི་པདྨོ་རྒྱས་པའི་བཙས་སུ་ཤོག །གདམས་ངག་འདི་ཡང་ཞུས་ལོ་ཐོབ་ལོ་ཙམ། །མ་ཡིན་ཚུལ་བཞིན་ཉམས་སུ་བླང་ནས་ཀྱང་། །རང་གཞན་དོན་གཉིས་འགྲུབ་པའི་གང་ཟག་གིས། །ནོར་འཛིན་ཀུན་ཁྱབ་སྲིད་མཐར་གནས་གྱུར་ཅིག །འདི་སྨྲ་པོ་ཡང་ཚེ་རབས་ཐམས་ཅད་དུ། །ཟབ་དོན་མན་ངག་གཏེར་གྱི་སྒྲོམ་བཟུང་ནས། །རླབས་ཆེན་ཕྲིན་ལས་མཁའ་དང་མཉམ་པ་ཡིས། །འགྲོ་ཀུན་གཞོན་ནུ་བུམ་སྐུའི་སར་འགོད་ཤོག །དེ་ལྟར་ཟབ་གསང་རྫོགས་པ་ཆེན་པོའི་ཡང་ཟབ་མྱུར་ལམ་འཕོ་ཆེན་གདམས་པའི་དོན་འགྲེལ་མན་ངག་རོལ་མཚོ་ཞེས་བྱ་བ་འདི་ནི། སངས་རྒྱས་གཉིས་པ་པདྨ་སཾ་བྷ་ཝའི་རྗེས་སུ་ཞུགས་པའི་སྐལ་བཟང་ཅན། སྤྲུལ་མིང་པ་འཇིགས་བྲལ་ཡེ་ཤེས་རྡོ་རྗེས་རང་ལོ་བཅུ་དགུར་སོན་པ་རྔ་ཆེན་གྱི་ལོ། ནག་ཟླའི་དམར་ཕྱོགས་མཁའ་འགྲོ་འདུ་(49ན)བའི་ཚེས་ལ་པདྨོ་རྣམ་པར་བཀོད་པའི་གྲོང་ཁྱེར་མཁན་པ་ལྗོངས་ཀྱི་ཆོས་གྲྭར་སྤེལ་བ་སྟེ། འདིས་ཀྱང་འོད་གསལ་རྡོ་རྗེ་སྙིང་པོའི་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །།། སརྦ་དཱ་མངྒ་ལཾ། །། །