TTDL-ZABTER-07-JA-042

Previous Text Back to Volume PageNext Text

Wylie title	zab gsang mkha' 'gro'i snying thig las: yum chen rdo rje phag mo'i cha lag gsol 'debs byin rlabs char 'bebs:
Location	bdud 'joms gling pa zab gter Volume 7, Text 42, Pages 553-554 (Folios 1a1 to 1b5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las yum chen rdo rje phag mo'i cha lag gsol 'debs byin rlabs char 'bebs. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: 553-554. Thimphu, Bhutan: Lama Kuenzang Wangdue, 2004.
Side notes	Recto: gsol 'debs   Verso: bdud 'joms mkha' 'gro phag mo
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Supplications - gsol 'debs
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rdo rje phag mo
Colophon	ཞེས་པ་འདིའང་རིག་མ་དཔལ་གྱི་ལྷ་མོའི་ངོ་སྐལ་དུ་བདུད་འཇོམས་རྡོ་རྗེས་མཁའ་འགྲོའི་བརྡ་རིས་ལས་དག་པར་ཕབ་པའོ། །དགེའོ།།
	zhes pa 'di'ang rig ma dpal gyi lha mo'i ngo skal du bdud 'joms rdo rjes mkha' 'gro'i brda ris las dag par phab pa'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ཡུམ་ཆེན་རྡོ་རྗེ་ཕག་མོའི་ཆ་ལག་གསོལ་འདེབས་བྱིན་རླབས་ཆར་འབེབས་བཞུགས༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) རྣམ་གསུམ་དད་པའི་གདུང་ཤུགས་ཀྱིས༔ ན་མོ༔ ཀ་དག་ཆོས་སྐུའི་སྟོན་པ་ཀུན་ཏུ་བཟང་༔ ལྷུན་གྲུབ་ལོངས་སྐུ་རིགས་ལྔ་གངས་ཆེན་མཚོ༔ རྡོ་རྗེ་འཆང་དབང་དཔལ་ལྡན་རྡོ་རྗེ་སེམས༔ དགོངས་བརྒྱུད་བླ་མ་རྣམས་ལ་གསོལ་བ་འདེབས༔ ཡེ་ཤེས་མཁའ་འགྲོ་འགྲུབ་པར་བྱིན་གྱིས་རློབས༔ གཞོན་ནུ་བུམ་པའི་སྐུ་བརྙེས་དགའ་རབ་རྗེ༔ ཡེ་ཤེས་སྒྱུ་མའི་སྐུ་བརྙེས་ཤྲཱི་སེང་༔ གདུལ་དཀའ་འདུལ་མཛད་མཚོ་སྐྱེས་རྡོ་རྗེ་སོགས༔ བརྡ་བརྒྱུད་བླ་མ་རྣམས་ལ་གསོལ་བ་འདེབས༔ ཡེ་ཤེས་མཁའ་འགྲོ༴ པདྨ་ཀ་ར་རྗེ་འབངས་ཉེར་ལྔ་དང་༔ བརྒྱུད་གསུམ་ཆུ་བོ་གཅིག་འདྲེས་བླ་མ་རྗེ༔ སྙན་བརྒྱུད་བླ་མ་རྣམས་ལ༴ ཡེ་ཤེས་མཁའ་འགྲོ༴ ཀ་དག་ཆོས་སྐུ་ཡུམ་ཆེན་ཀུན་བཟང་མོ༔ ལྷུན་གྲུབ་རང་གདངས་རྡོ་རྗེ་ཕག་མོའི་སྐུ༔ ཐུགས་རྗེ་ཐབས་ཀྱིས་འགྲོ་འདུལ་ཡུམ་ཆེན་ལྔ༔ སྐུ་གསུམ་མཁའ་འགྲོའི་ཚོགས་ལ༴ ཡེ་ཤེས་མཁའ་འགྲོ༴ གནས་ཡུལ་དུར་ཁྲོད་ཀུན་གྱི་དབང་ཕྱུག་མོ༔ འབུམ་ཕྲག་ཡངས་པའི་མཁའ་འགྲོ་མ་ཚོགས་ལ༔ རྣམ་གསུམ་དད་པའི་སྒོ་ནས་གསོལ༴ ཡེ་ཤེས་འོད་སྐུ་གྲོལ་བར་བྱིན༴ གནོད་སྦྱིན་ཆེན་པོ་ཤན་པ་དམར་ནག་དང་༔ དྲང་སྲོང་གཟའ་མཆོག་ཆེན་པོ་རྡོ་རྗེ་ལེགས༔ བཀའ་སྲུང་དྲེགས་པའི་ཚོགས་ལ་གསོལ༴ ཕྱི་ནང་བར་ཆད་ཞི་བའི་ཕྲིན་ལས་མཛོད༔ དེ་ལྟར་གསོལ་བ་བཏབ་པའི་བྱིན་རླབས་ཀྱིས༔ སྒྲུབ་པའི་མཐུན་རྐྱེན་ལེགས་ཚོགས་ཡོངས་འབྱོར་ཏེ༔ སྒོ་གསུམ་རྡོ་རྗེ་གསུམ་དུ་སྨིན་གྲོལ་ཅིང༔ ཚེ་གཅིག་སངས་རྒྱས་འཁོར་བ་དོང་སྤྲུགས་ཤོག༔ ས་མ་ཡ༔ དེ་ལྟར་གསོལ་བ་བཏབ་པའི་ཡོན་ཏན་གྱིས༔ ཚེ་འདིར་མི་མཐུན་རྒུད་པ་ཀུན་སེལ་ཏེ༔ འདི་ཕྱིའི་དགེ་ལེགས་ཡོན་ཏན་འབད་མེད་འགྲུབ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདིའང་རིག་མ་དཔལ་གྱི་ལྷ་མོའི་ངོ་སྐལ་དུ་བདུད་འཇོམས་རྡོ་རྗེས་མཁའ་འགྲོའི་བརྡ་རིས་ལས་དག་པར་ཕབ་པའོ། །དགེའོ།།