TTDL-ZABTER-08-NYA-035

Previous Text Back to Volume PageNext Text

Wylie title	zab gsang mkha' 'gro'i snying thig las: lha chen gtsug na zla ba'i bskang ba rin chen phreng mdzes:
Location	bdud 'joms gling pa zab gter Volume 8, Text 35, Pages 309-314 (Folios 1a1 to 3b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las lha chen gtsug na zla ba'i bskang ba rin chen phreng mdzes. In Sprul pa'i gter chen bdud 'joms gling pa'i zab gter gsang ba'i chos sde, Vol. 8: 309-314. Thimphu, Bhutan: Lama Kuenzang Wangdue, 2004.
Side notes	Recto: bskang ba   Verso: bdud 'joms bka' srung tshogs bdag
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mending Rituals - bskang chog
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་འདི་པ་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་གཏོན་ཏེ་མཐར་དག་པར་ཕབ་པའི་ཡི་གེ་པ་ནི་ཚོགས་མཆོག་རྡོ་རྗེའོ། །དགེའོ། །དགེའོ། །དགེའོ།།
	zhes 'di pa yang khrag 'thung bdud 'joms rdo rjes gter nas gton te mthar dag par phab pa'i yi ge pa ni tshogs mchog rdo rje'o/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ལྷ་ཆེན་གཙུག་ན་ཟླ་བའི་བསྐང་བ་རིན་ཆེན་ཕྲེང་མཛེས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) མ་འོངས་པདྨའི་བརྒྱུད་འཛིན་བུས༔ དབང་ཕྱུག་ཆེན་པོ་བསྒྲུབ་པའི་ཚེ༔ ཟས་སྣ་སྤོད་དང་སྨན་སྣ་ཚོགས༔ བཤམས་ནས་མ་དག་དྲི་བསང་སྦྱངས༔ ནམ་མཁའ་མཛོད་ཀྱི་སྔགས་བརྗོད་དེ༔ འདོད་ཡོན་ནམ་མཁའ་མཛོད་དུ་སྤེལ༔ དེ་ནས་བསྐང་གསོལ་རིམ་པ་ནི༔ ཧཱུྃ་ཧྲཱིཿ དད་པ་དང་ནི་དམ་ཚིག་གཉན་པོ་ཡིས༔ འབོད་དོ་གཤེགས་སོ་ལྷ་ཆེན་ཚོགས་ཀྱི་བདག༔ སྟེང་ཕྱོགས་སྲིད་པ་གསུམ་གྱི་རྩེ་མོ་ནས༔ ལྷ་ཆེན་སྙོམས་འཇུག་དབང་པོ་གཤེགས་སུ་གསོལ༔ དེ་འོག་གཟུགས་ཁམས་དགའ་བདེའི་གྲོང་ཁྱེར་ནས༔ ལྷ་ཆེན་ཏིང་འཛིན་དབང་པོ་གཤེགས་སུ་གསོལ༔ སུམ་ཅུ་རྩ་གསུམ་ལྷ་ཡི་ཕོ་བྲང་ནས༔ དབང་ཕྱུག་འདོད་པའི་རྒྱལ་པོ་གཤེགས་སུ་གསོལ༔ རི་རབ་ལྷུན་པོ་ནུབ་ཕྱོགས་དགའ་ཚལ་ནས༔ ལྷ་ཆེན་ཚོགས་ཀྱི་བདག་པོ་གཤེགས་སུ་གསོལ༔ འཇིགས་རུང་རྩུབ་འགྱུར་ཚལ་གྱི་དུར་ཁྲོད་ནས༔ དབང་ཕྱུག་མ་ཧཱ་ཀྲོ་ཏ་གཤེགས་སུ་གསོལ༔ ཡུམ་མཆོག་ཨུ་མ་དཱེ་ཝི་གཤེགས༴ སྲས་མཆོག་ལེགས་ལྡན་ནག་པོ་གཤེགས༴ གཙང་རིས་མགོན་པོ་འཁོར་བཅས་གཤེགས༴ ཁམས་གསུམ་སྲིད་པའི་འཁོར་ཚོགས་གཤེགས་སུ་གསོལ༔ འཁྲུལ་སྣང་འཐས་པའི་ཡུལ་ངན་ལས་དབེན་པ༔ གསལ་སྣང་དགའ་བདེའི་ལོངས་སྤྱོད་ཕུན་ཚོགས་གནས༔ གསང་ཆེན་སྒྲུབ་པའི་དཀྱིལ་འཁོར་ཆེན་པོ་འདིར༔ མི་འབྲལ་སྲོག་གི་རྟེན་འདིར་གཏན་བཞུགས་གསོལ༔ བཛྲ་ས་མ་ཡ་ཛ་ཛཿ ཏིཥྛ་ལྷན༔ ཧོཿ གསོན་ཅིག་དགོངས་ཤིག་ལྷ་ཆེན་ཚོགས་ཀྱི་བདག༔ སྔོན་ཚེ་སྤྱི་དཔལ་ཀུན་བཟང་ཧེ་རུ་ཀ༔ གསང་བའི་བདག་པོ་སྟོན་པ་བཅོམ་ལྡན་འདས༔ རིག་འཛིན་རྒྱལ་པོ་པདྨ་ཐོད་ཕྲེང་སོགས༔ བརྒྱུད་གསུམ་རིག་འཛིན་བླ་མ་དཔང་བཙུགས་ནས༔ བཀའ་དང་དམ་ཚིག་དབང་གིས་ཁྱོད་བསྒྲུབ་ཀྱིས༔ མ་འདའ་མ་གཡེལ་མ་འགྱངས་སྐད་ཅིག་གི༔ འདིར་གཤེགས་རྣལ་འབྱོར་བདག་གི་གཏན་གྲོགས་མཛོད༔ ཕྲིན་ལས་རབ་འབྱམས་བསྒྲུབ་པའི་ཕོ་ཉ་གྱིས༔ འདོད་རྒུའི་དཔལ་ཡོན་སྟེར་བའི་སྦྱིན་བདག་དང་༔ ས་ལམ་བར་ཆད་བཟློག་པའི་སྲུང་མ་མཛོད༔ རྣལ་འབྱོར་བདག་ནི་དམ་ཚིག་ལ་གནས་ཤིང་༔ གྲོགས་སུ་སྲུང་མ་གཉན་པོ་ཁྱོད་བསྟེན་གྱིས༔ དམ་ལ་མ་འདའ་མྱུར་དུ་གྲོགས་མཛོད་ཅིག༔ གལ་ཏེ་གཡེལ་ཞིང་འགྱང་བར་གྱུར་པ་ན༔ བརྒྱུད་གསུམ་རིག་འཛིན་བླ་མའི་དམ་ལས་འདས༔ སྒྲུབ་པའི་རྣལ་འབྱོར་བདག་ཀྱང་ཁྱོད་ཀྱིས་བསླུས༔ དེ་ཕྱིར་ཁྱོད་ནི་རྡོ་རྗེ་དམྱལ་བར་ལྟུང་༔ འདའ་ཀའི་དམ་ཚིག་གཉན་པོ་དེར་དགོངས་འཚལ༔ ཀྱཻ༔ དྲང་སྲོང་ལྷ་ཡི་བླ་མ་ཚོགས་ཀྱི་བདག༔ སྒྲུབ་པའི་རིག་འཛིན་བདག་གིས་ཁྱོད་བརྟེན་ནས༔ མི་འབྲལ་བྱམས་བརྩེས་རྟག་ཏུ་སྐྱོང་བ་དང་༔ ཐུགས་ཀྱིས་མི་བཞེད་ཉེས་ཀུན་བསལ་བའི་ཕྱིར༔ དོ་ནུབ་ཐུགས་དམ་གཉན་པོ་བསྐང་བར་བྱ༔ རི་དྭགས་གཡུང་དྭགས་གཟུགས་འགྲོས་སྣ་ཚོགས་པ༔ འདབ་ཆགས་སྡེར་ཆགས་རྨིག་ཆགས་ལ་སོགས་པའི༔ སྲོག་ཆགས་སྣ་ཚོགས་ལོངས་སྤྱོད་ཡུལ་དུ་བཤམས༔ དར་ཟབ་ཟ་འོག་སྟག་གཟིག་གཅན་གཟན་ལྤགས༔ ཡིད་འོང་རེག་བྱ་སྲབ་འཇམ་ཡངས་པའི་རིགས༔ གོ་ཁྲབ་སྣ་ཚོགས་མཐུན་པའི་རྫས་སུ་བཤམས༔ གསེར་དངུལ་གཡུ་དང་ཟངས་ལྕགས་མུ་མིན་མཆོང་༔ རིན་ཆེན་སྣ་ཚོགས་ནོར་གྱི་མཆོག་ཏུ་བཤམས༔ བཅུད་ལྡན་སྨན་གྱི་རིལ་བུ་བདུད་རྩིར་བསྒྱུར༔ ཉེར་སྤྱོད་བདུན་དང་འདོད་ཡོན་རྣམ་པ་ལྔ༔ སྨན་གཏོར་རཀྟ་མཆོད་པའི་རྫས་སུ་བཤམས༔ བཟའ་བ་བཅའ་བ་བཏུང་བ་ལྡག་པ་དང་༔ གཞིབ་པ་ལ་སོགས་རོ་བརྒྱ་ནུས་པ་སྟོང་༔ ལྡན་པའི་འདོད་འཇོའི་དཔལ་ཡོན་ནམ་མཁའི་མཛོད༔ མི་ཟད་རྒྱན་གྱི་འཁོར་ལོར་ཡིད་ཀྱིས་སྤེལ༔ སྲུང་མ་གཉན་པོའི་ཐུགས་དམ་བསྐང་ཕྱིར་བཤམས༔ ན་མཿསརྦ་ཏ་ཐཱ་ག་ཏ་སོགས་ནས་མཁའ་མཛོད་ཀྱི་སྔགས་ལན་གསུམ་བརྗོད༔ ཧཱུྃ་ཧྲཱིཿ ལྷ་ཆེན་སྙོམས་འཇུག་དབང་པོའི་ཐུགས་དམ་བསྐང་༔ བདེ་ལྡན་ཏིང་འཛིན་དབང་པོའི་ཐུགས་དམ་བསྐང་༔ འདོད་རྒྱལ་དབང་ཕྱུག་ཆེན་པོའི་ཐུགས་དམ་བསྐང་༔ སྲིད་གསུམ་ཚོགས་ཀྱི་བདག་པོའི་ཐུགས་དམ་བསྐང་༔ ལྷ་མོ་ཨུ་མ་དཱེ་ཝིའི་ཐུགས་དམ་བསྐང་༔ སྲས་མཆོག་ལེགས་ལྡན་ནག་པོའི་ཐུགས་དམ་བསྐང་༔ གཙང་རིས་དཔལ་མགོན་བདུན་ཅུའི་ཐུགས་དམ་བསྐང་༔ ཁམས་གསུམ་ལྷ་ཡི་འཁོར་གྱི་ཐུགས་དམ་བསྐང་༔ ལྷ་མིན་སྡེ་བརྒྱད་འཁོར་གྱི་ཐུགས་དམ་བསྐང་༔ མི་དང་གཉེན་འཁོར་བཅས་པའི་ཐུགས་དམ་བསྐང་༔ ཀླུ་དང་བྱོལ་སོང་འཁོར་ཚོགས་ཐུགས་དམ་བསྐང་༔ དམྱལ་བ་ཡི་དྭགས་འཁོར་གྱི་ཐུགས་དམ་བསྐང་༔ ཁམས་གསུམ་འཁོར་ཚོགས་ཡོངས་ཀྱི་ཐུགས་དམ་བསྐང་༔ ཕྱི་ནང་གསང་བའི་མཆོད་སྤྲིན་མི་ཟད་གཏེར༔ འདོད་ཡོན་རྒྱན་གྱི་འཁོར་ལོའི་ཐུགས་དམ་བསྐང་༔ རྟེན་རྫས་སྒྲུབ་རྫས་བསྐང་རྫས་མཆོད་རྫས་དང་༔ མཐུན་རྫས་སྣ་ཚོགས་ཐུགས་དམ་བསྐང་ཕྱིར་འབུལ༔ ཁྱད་པར་གསང་རྟེན་སྲོག་གི་འཁོར་ལོ་འདི༔ སྐད་ཅིག་མི་འབྲལ་འགྲོགས་པའི་རྟེན་དུ་འབུལ༔ ཁྱོད་ཀྱི་ཐུགས་དང་འགལ་བའི་ཉེས་ཚོགས་ཀུན༔ མི་འཆབ་མི་སྦེད་སྙིང་ནས་བཤགས་པར་བགྱི༔ མ་ཤེས་མ་རིག་པ་ལ་ཐུགས་མ་ཁྲེལ༔ བྱམས་དང་བརྩེ་གདུང་ཆེན་པོས་རྟག་སྐྱོངས་ཤིག༔ སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད༔ དགེ་འདུན་སྡེ་སྐྱོང་བསྟན་པའི་རྒྱལ་མཚན་ཚུགས༔ རྣལ་འབྱོར་བདག་གི་འདོད་དོན་ཡིད་བཞིན་སྒྲུབས༔ ཁམས་གསུམ་དབང་བསྡུས་སྲིད་གསུམ་ཟིལ་གྱིས་གནོན༔ འདོད་རྒུའི་ལོངས་སྤྱོད་དཔལ་ཡོན་ཆར་ལྟར་ཕོབས༔ རི་ལྟར་ལྷུན་ཆགས་མཚོ་ལྟར་གཏིང་ཟབ་ཅིང་༔ མི་ནུབ་རྒྱལ་མཚན་ལྟ་བུར་བརྟན་པར་མཛོད༔ བསྟན་པའི་དགྲ་བོ་ལྟ་ལོག་ཀླ་ཀློའི་སྡེ༔ ལྷ་ཡང་རུང་སྟེ་རྗེས་ཤུལ་མེད་པར་རློག༔ དམ་ཚིག་གཉན་ལ་མ་འདའ་ས་མ་ཡ༔ ཨོཾ་ས་མ་ཡ༔ ཨཱཿས་མ་ཡ༔ ཧཱུྃ་ས་མ་ཡ༔ བཛྲ་ས་མ་ཡ་ཤུདྡྷེ་ཨཱཿའདི་ལྟར་རྟག་ཏུ་བརྩོན་གྱུར་ན༔ ཉམས་ཆག་འགལ་འཁྲུལ་སོར་ཆུད་ཅིང་༔ ཕྲིན་ལས་རབ་འབྱམས་ངེས་པར་བསྒྲུབ༔ མ་ལྟར་བྱམས་བརྩེ་སྤུན་ལྟར་གདུང་༔ སྙིང་ཉེ་མི་འབྲལ་གྲོགས་བྱེད་འགྱུར༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་འདི་པ་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་གཏོན་ཏེ་མཐར་དག་པར་ཕབ་པའི་ཡི་གེ་པ་ནི་ཚོགས་མཆོག་རྡོ་རྗེའོ། །དགེའོ། །དགེའོ། །དགེའོ།། །།