TTDL-ZABTER-12-NA-009

Previous Text Back to Volume PageNext Text

Wylie title	ma hA a ti yo ga'i zab chos dgongs pa klong rdol las: sman bla'i cho ga bsod nams tshogs chen:
Location	bdud 'joms gling pa zab gter Volume 12, Text 9, Pages 27-33 (Folios 1a1 to 4a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Ma hA a ti yo ga'i zab chos dgongs pa klong rdol las sman bla'i cho ga bsod nams tshogs chen. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 27-33. Thimphu, Bhutan: Lama Kuenzang Wangdue, 2004.
Side notes	Recto: cho ga   Verso: bdud 'joms sman bla
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Ritual and Liturgical Texts - cho ga phyag len
Cycle	མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ (ma ha a ti yo ga'i zab chos dgongs pa klong rdol)
Deity	Sman bla
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།
	zhes pa 'di yang khrag 'thung bdud 'joms rdo rjes chos nyid nam mkha'i mdzod las bsgyur ba'o//

Tibetan Text

[edit]

སྱྃ༔ མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ལས༔ སྨན་བླའི་ཆོ་ག་བསོད་ནམས་ཚོགས་ཆེན་བཞུགས་སོ༔

སྱྃ༔ ན་མོ་གུ་རུ་བུདྡྷ་ཡེ༔ (བརྡ་ཡིག་) སྨན་བླའི་ཆོ་ག་བསོད་ནམས་ཚོགས་ཆེན་འདི༔ ལག་ལེན་རིམ་པ་དཀྱིལ་འཁོར་བཀོད་ལེགས་སྟེང་༔ མེ་ཏོག་ཚོམ་བུ་གཅིག་མཐར་བདུན་བཀོད་ཅིང་༔ དེ་མཐར་བརྒྱད་བསྐོར་དེ་མཐར་བཞི་བཀོད་ཅིང་༔ དེ་མཐར་བཅུ་གཉིས་བཀོད་པའི་མདུན་དྲང་པོར༔ ཞལ་ཟས་སྣང་གསལ་ཡོན་ཆབ་བདུན་བདུན་བཞག༔ ཉེར་སྤྱོད་འབྱོར་ཚོགས་མཆོད་པའི་ཡོ་བྱད་བཤམས༔ དང་པོ་སྐྱབས་འགྲོ་དང་ནི་སེམས་བསྐྱེད་ལ༔ ན་མོ༔ བདག་དང་མཐའ་ཡས་སེམས་ཅན་མ་ལུས་པ༔ སྐྱབས་གནས་དཀོན་མཆོག་གསུམ་ལ་སྐྱབས་སུ་མཆི༔ མར་གྱུར་མཁའ་མཉམ་འགྲོ་བ་སེམས་ཅན་ཀུན༔ སྨན་པའི་རྒྱལ་པོའི་གོ་འཕང་ལ་འགོད་བྱ༔ ལན་གསུམ༔ གཉིས་པ་དངོས་གཞི་ལ༔ ན་མོ༔ བདེན་པ་གཉིས་ཀྱི་བདེན་མཐུ་བྱིན་རླབས་ཀྱིས༔ མཆོད་པའི་དངོས་པོ་བཤམས་པ་འདི་དག་ནི༔ ཇི་སྲིད་འཁོར་བའི་འཇིག་རྟེན་མ་སྟོངས་བར༔ དེ་སྲིད་དེ་དག་ཚོགས་གཉིས་རྫོགས་བྱེད་ཀྱི༔ མཆོད་སྤྲིན་མི་ཟད་རྒྱན་གྱི་འཁོར་ལོ་ཡི༔ རྒྱལ་བའི་ཞིང་ཁམས་ཐམས་ཅད་ཁྱབ་གྱུར་ཅིག༔ ནམ་མཁའ་མཛོད་སྔགས་བརྗོད༔ ཧཱུྃ༔ སྣང་སྲིད་ཁམས་འདི་ལྟ་ན་སྡུག་པའི་ཞིང་༔ ནམ་མཁར་འཇའ་ཚོན་འོད་ཀྱི་དྲྭ་བ་འཁྲིགས༔ བར་སྣང་དྲི་བཟང་མཆོད་པའི་ལྷ་མོས་ཁེངས༔ ས་གཞི་འདོད་ཡོན་སྣ་ཚོགས་ཀྱིས་བརྒྱན་པའི༔ དབུས་སུ་པདྨ་འདབ་སྟོང་ཟླ་རྒྱས་སྟེང་༔ བཅོམ་ལྡན་སྨན་བླ་མཐིང་ནག་སྤྲུལ་སྐུའི་ཆས༔ ཕྱག་གཡས་མཆོག་སྦྱིན་རྣམ་རྒྱལ་ཨ་རུ་བསྣམས༔ གཡོན་པས་མཉམ་བཞག་མཛད་ཅིང་ལྷུང་བཟེད་འཛིན༔ མཚན་དཔེ་རབ་རྫོགས་རྡོ་རྗེའི་སྐྱིལ་ཀྲུང་བཞུགས༔ དེ་མཐར་བདེ་གཤེགས་བདུན་དང་ཉེ་སྲས་བརྒྱད༔ རྒྱལ་ཆེན་གནོད་སྦྱིན་སྡེ་དཔོན་བཅས་པས་བསྐོར༔ ཕྱོགས་བཅུའི་རྒྱལ་བ་སྲས་བཅས་སྤྱན་དྲངས་བསྟིམ༔ སརྦ་བུདྡྷ་བོ་དྷི་ས་ཏྭ་ས་མ་ཡ་ཛ་ཛ༔ པདྨ་ཀ་མ་ལ་ཡེ་སྟྭཾ༔ ན་མོ༔ བདག་དང་མཁའ་མཉམ་འགྲོ་བ་སེམས་ཅན་ཀུན༔ སྒོ་གསུམ་རབ་གུས་གདུང་ཤུགས་དྲག་པོ་ཡིས༔ མཚན་ལེགས་ཡོངས་གྲགས་དཔལ་ལ་ཕྱག་འཚལ་ལོ༔ སྒྲ་དབྱངས་རྒྱལ་པོའི་ཞབས་ལ༴ གསེར་བཟང་དྲི་མེད་སྣང་ལ༴ མྱ་ངན་མེད་མཆོག་དཔལ་ལ༴ ཆོས་བསྒྲགས་རྒྱ་མཚོའི་དབྱངས་ལ༴ མངོན་མཁྱེན་རྒྱལ་པོའི་ཞབས་ལ༴ བཅོམ་ལྡན་སྨན་གྱི་བླ་ལ༴ ཤཱཀྱ་ཐུབ་པའི་ཞབས་ལ༴ ཐེག་གསུམ་དམ་པའི་ཆོས་ལ༴ ཉེ་བའི་སྲས་ཆེན་བརྒྱད་ལ༴ འཕགས་པའི་དགེ་འདུན་རྣམས་ལ༴ རྒྱལ་ཆེན་གནོད་སྦྱིན་རྣམས་ལ༴ སྨན་སྐྱོང་སྲུང་མ་རྣམས་ལ་ཕྱག་འཚལ་ལོ༔ ལུས་དང་ལོངས་སྤྱོད་ཐམས་ཅད་མཆོད་པ་འབུལ༔ ཚེ་རབས་ཀུན་ཏུ་བསགས་པའི་སྡིག་ལྟུང་བཤགས༔ རྣམ་དཀར་དགེ་བའི་ཚོགས་ལ་རྗེས་ཡི་རང་༔ འགྲོ་བའི་དོན་དུ་ཆོས་འཁོར་བསྐོར་བར་བསྐུལ༔ མྱ་ངན་མི་འདའ་ཞུགས་པར་གསོལ་བ་འདེབས༔ དུས་གསུམ་བསགས་པའི་དགེ་རྩ་འགྲོ་ལ་བསྔོ༔ ཁམས་གསུམ་འཁོར་བ་སྐུ་གསུམ་ཐོབ་པར་ཤོག༔ བཅོམ་ལྡན་བདེ་གཤེགས་སྨན་པའི་རྒྱལ་པོ་ཡི༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀུན༔ ད་ལྟ་ཉིད་དུ་བདག་རྒྱུད་ལ་འཕོས་ཏེ༔ དབྱེར་མེད་རོ་གཅིག་ཆེན་པོས་སངས་རྒྱས་ཤོག༔ ན་མོ་བྷ་ག་ཝ་ཏེ་བྷཻ་ཥ་ཛྱཻ་གུ་རུ་བཻ་ཌཱཪྻུ་སོགས་ཅི་ནུས་བཟླ༔ དཀོན་མཆོག་རིན་ཆེན་གསུམ་གྱི་བདེན་སྟོབས་དང་༔ ཆོས་ཉིད་རྣམ་དག་རྒྱུ་འབྲས་ཟབ་མོ་དང་༔ མཚན་བརྗོད་ཕྱག་མཆོད་བྱས་པའི་མཐུ་བྱིན་གྱིས༔ བདེ་གཤེགས་བདུན་གྱི་སྔོན་གྱི་སྨོན་ལམ་དག༔ ཇི་སྐད་ཞལ་གྱིས་བཞེས་པ་དེ་བཞིན་དུ༔ མ་ལུས་བདག་གིས་སྐད་ཅིག་འགྲུབ་གྱུར་ཅིག༔ བདག་མཐུས་འགྲོ་ཀུན་ནད་ལས་རབ་གྲོལ་ཏེ༔ བདེ་ལྡན་ལང་ཚོ་སྟོབས་ཀྱིས་ཕྱུག་གྱུར་ཅིག༔ སྡིག་སྒྲིབ་ལས་ཉོན་བག་ཆགས་ཀུན་དག་ནས༔ ཕ་རོལ་ཕྱིན་པའི་ཡོན་ཏན་ཐོབ་གྱུར་ཅིག༔ སྡུག་བསྔལ་གསུམ་གྱི་ཟུག་རྔུ་དང་བྲལ་ནས༔ སྲིད་ཞི་ལས་འདས་གཏན་བདེ་འཐོབ་གྱུར་ཅིག༔ དབང་པོ་ཉམས་དང་སྟོབས་མེད་ཉམ་ཐག་ཀུན༔ དབང་པོའི་སྐྱོན་བྲལ་ཡོན་ཏན་ལྡན་གྱུར་ཅིག༔ འཚོ་བའི་ཚེ་ཉམས་ཚེ་ཟད་སེམས་ཅན་རྣམས༔ ཚེ་འཕེལ་ཚེ་རིང་བདེ་བས་འཚོ་གྱུར་ཅིག༔ ལོ་ལེགས་འབྲུ་འཕེལ་བཞོན་ཕྱུགས་རབ་རྒྱས་ཏེ༔ མུ་གེ་མེད་ཅིང་འཚོ་ཆས་འབྱོར་གྱུར་ཅིག༔ གནས་གོས་རྒྱན་མཚོན་སྨན་ནོར་གྱིས་དབུལ་རྣམས༔ འདོད་རྒུའི་ལོངས་སྤྱོད་ཕུན་སུམ་ཚོགས་གྱུར་ཅིག༔ ལྷ་དང་མགོན་གྱིས་སྤངས་པའི་སྐྱབས་བྲལ་ཀུན༔ དཀོན་མཆོག་གསུམ་གྱི་ཐུགས་རྗེས་སྐྱབས་གྱུར་ཅིག༔ གཉེན་བཤེས་རྩ་ལག་ཡུལ་མིས་གཙེས་པ་ཀུན༔ ཁེ་རྒྱལ་དྲེགས་པའི་སྟོབས་ཀྱིས་མཛེས་གྱུར་ཅིག༔ ཕན་ཚུན་མི་མཐུན་འཐབ་རྩོད་འགྱེད་པ་ཀུན༔ བྱམས་བརྩེས་རྒྱུད་བརླན་འདུམ་ཞིང་མཐུན་གྱུར་ཅིག༔ ལོ་ཉེས་ཕྱུག་ཉེས་སད་སེར་གོད་ཡམས་སོགས༔ ལོངས་སྤྱོད་འགྲིབ་པའི་རྐྱེན་ཀུན་ནུབ་གྱུར་ཅིག༔ མཛའ་གྲོགས་གཉེན་དང་བྲལ་བའི་སྐྱེ་འགྲོ་ཀུན༔ མྱ་ངན་སྡུག་བསྔལ་ཆེ་ལས་ཐར་གྱུར་ཅིག༔ འཇིགས་དང་ཕུང་འགྱུར་རྐྱེན་གྱིས་ཟིན་པ་ཡི༔ སྐྱེ་འགྲོ་ཐམས་ཅད་དེ་ལས་དབེན་གྱུར་ཅིག༔ སྡེ་བརྒྱད་ལྷ་འདྲེའི་བྱད་སྟེམ་ལྡང་བ་རྣམས༔ གང་གིས་མི་འཇིགས་དཔལ་དང་ལྡན་གྱུར་ཅིག༔ མོ་རྩིས་རྨི་ལྟས་མཚན་མ་ངན་མཐོང་རྣམས༔ བདེ་ལེགས་ཡོན་ཏན་རྒྱས་པའི་ལྟས་གྱུར་ཅིག༔ ལྟ་བ་ལོག་དང་ཡུལ་དབང་གྱུར་པ་རྣམས༔ ཡང་དག་ལམ་ཆུད་རང་དབང་ཕུན་ཚོགས་ཤོག༔ ངན་སོང་འཁོར་བར་འཁྱམས་པའི་སེམས་ཅན་ཀུན༔ ཕྱམ་གཅིག་བདེ་བ་ཆེན་པོའི་དཔལ་ཐོབ་ཤོག༔ བདག་གི་སྐྱེ་བ་ཚེ་རབས་ཐམས་ཅད་དུ༔ གཞན་དོན་རླབས་ཆེན་སྤྱོད་པ་འགྲུབ་གྱུར་ཅིག༔ དཀོན་མཆོག་གསུམ་དང་བདེན་པ་གཉིས་ཀྱི་མཐུས༔ སྨོན་ལམ་བཏབ་པ་དེ་དག་འགྲུབ་གྱུར་ཅིག༔ ས་མ་ཡ༔ འདི་ལྟར་ཆོ་ག་ཟབ་མོ་ལ༔ བརྩོན་ཀུན་ཡང་དག་དོན་ལྡན་ཅིང་༔ མཐར་ཐུག་རྒྱལ་བའི་སྲས་གྱུར་ཏེ༔ འགྲོ་དོན་འབད་མེད་ངེས་པར་འགྲུབ༔ རྒྱ་རྒྱ་རྒྱ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།། །།