TTDL-ZABTER-13-PA-066

Previous Text Back to Volume PageNext Text

Wylie title	chos nyid nam mkha'i klong mdzod las: bka' srung ma mgon lcam dral gyi gnad dbab bden tshig grub pa:
Location	bdud 'joms gling pa zab gter Volume 13, Text 66, Pages 255-257 (Folios 1a1 to 2a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las bka' srung ma mgon lcam dral gyi gnad dbab bden tshig grub pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 255-257. Thimphu, Bhutan: Lama Kuenzang Wangdue, 2004.
Side notes	Recto: gnad dbab   Verso: bdud 'joms srung ma ma mgon lcam dral
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Prayers - smon lam
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	ma mgon lcam dral
Colophon	ཅེས་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ།།
	ces khrag 'thung bdud 'joms rdo rjes chos nyid nam mkha'i mdzod las bsgyur ba'o/_/dge'o//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ བཀའ་སྲུང་མ་མགོན་ལྕམ་དྲལ་གྱི་གནད་དབབ་བདེན་ཚིག་གྲུབ་པ་བཞུགས་སོ༔ ན་མོ་གུ་རུ་རཏྣ་སིདྡྷི་ཧཱུྃ༔ ན་མོ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་བདེན་པ་དང་༔ དོན་དམ་ཆོས་ཉིད་ངོ་བོ་གདོད་ནས་དག་པའི་བདེན་པ་དང་༔ ཀུན་རྫོབ་རྒྱུ་འབྲས་བསླུ་བ་མེད་པ་རྟེན་འབྲེལ་ཟབ་མོའི་བདེན་པའི་མཐུ་དང་བྱིན་རླབས་ཀྱིས༔ ཁམས་གསུམ་སྲིད་གསུམ་བརྟན་གཡོ་འཁོར་འདས་ཀྱི་ཁམས་ལ་བརྟེན་ནས་ཡོངས་སུ་གྲུབ་པའི་བཀའ་སྲུང་མ་མགོན་ལྕམ་དྲལ་ལ་སོགས་པའི་ཆོས་སྐྱོང་དམ་ཅན་རྒྱ་མཚོའི་ཚོགས་མ་ལུས་ཤིང་ལུས་པ་མེད་པ་ཐམས་ཅད་བདག་གིས་བསྐྱེད་བསྒོམ་དམིགས་གསལ་གྱི་ལྷ་ཚོགས་འདི་རྣམས་ལ་གཉིས་སུ་མེད་པར་འདུས་ཤིང་ཐིམ་པར་གྱུར་ཅིག༔ འགྱུར་མེད་རབ་ཏུ་གནས་ཤིང་རབ་ཏུ་བརྟན་པར་གྱུར་ཅིག༔ ཡོངས་སུ་ཚངས་ཤིང་ཡོངས་སུ་རྫོགས་པར་གྱུར་ཅིག༔ ད་ནས་བཟུང་སྟེ་རྟག་ཏུ་བདག་མདུན་སར་མི་འབྲལ་བའི་གྲོགས་དང་བྲན་འབངས་ལས་བྱེད་ཀྱི་ཕོ་ཉ་རུ་འཁོར་ཞིང་མཆིས་པར་གྱུར་ཅིག༔ དུས་དེ་རིང་ནས་བཟུང་སྟེ་བདག་གིས་བཀའ་སྲུང་མ་མགོན་ལྕམ་དྲལ་གཟའ་བདུད་དུག་གི་སྤུ་གྲི་འདི་གང་ལ་རྦད་པ་ཙམ་གྱིས་ཡུལ་གཞན་ལ་མི་འབྱམས་པར་རྦད་པའི་ཡུལ་དགྲ་བགེགས་དེ་ཡི་བླ་ཚེ་སྲོག་གསུམ་ལ་ཐོག་ལྟར་དུ་འབབ་པར་གྱུར་ཅིག༔ མཐུ་སྟོབས་ནུས་པ་ཐམས་ཅད་གང་ལའང་ཐོགས་རྡུག་མེད་པར་གྱུར་ཅིག༔ གང་ལ་དམིགས་པའི་ཡུལ་དགྲ་བགེགས་གནོད་བྱེད་དེ་ཡི་ཚེ་བླ་སྲོག་གསུམ་ཐམས་ཅད་མེ་སྟག་ཆུ་ཡིས་བསད་པ་བཞིན་དུ་གསོད་པར་གྱུར་ཅིག༔ ཆུ་ཐིག་ཧུབ་ཀྱིས་བཏབ་པ་བཞིན་དུ་གཞོམ་པར་གྱུར་ཅིག༔ བ་མོ་ལ་ཉི་ཟེར་ཕོབ་པ་བཞིན་དུ་ལྷག་མེད་དུ་སྐམ་པར་གྱུར་ཅིག༔ རྩྭ་ཕུང་སྐམ་པོ་ལ་མེ་མཆེད་པ་བཞིན་དུ་བསྲེག་པར་གྱུར་ཅིག༔ ས་མཁར་ལ་སྒྱོགས་རྡོས་ཕོག་པ་བཞིན་དུ་གཏོར་བར་གྱུར་ཅིག༔ འབྲུ་དྲུག་སེར་བས་བཅོམ་པ་བཞིན་དུ་བཅོམ་པར་གྱུར་ཅིག༔ བརླག་པར་གྱུར་ཅིག༔ བསྣུབ་པར་གྱུར་ཅིག༔ རྗེས་ཤུལ་ལྷག་མེད་དུ་བརླག་པར་གྱུར་ཅིག༔ སྔགས་མཁན་རང་ལ་སླར་མི་ལོག་པར་གྱུར་ཅིག༔ བདག་གི་མཐུ་ནུས་རྦད་བསྐུལ་དམོད་དབལ་ཐམས་ཅད་བན་བོན་ཀླ་ཀློ་ལྷ་འདྲེ་གང་གིས་ཀྱང་བཟློག་མི་ཐུབ་པར་གྱུར་ཅིག༔ མི་བཟློག་པར་གྱུར་ཅིག༔ རྦད་བསྐུལ་གྱི་ཡུལ་དགྲ་བོ་གང་ཡིན་དེ་དག་ལོ་ཟླར་འགྱངས་སུ་མི་འཆོར་བར་སྐད་ཅིག་ཉིད་ལ་མར་མེ་རླུང་གིས་བསད་པ་བཞིན་དུ་བརླག་པར་གྱུར་ཅིག༔ བསད་པར་གྱུར་ཅིག༔ བདག་གིས་ཚེ་འདིར་ཁམས་གསུམ་འཁོར་བ་ཡོངས་སྒྲོལ་གྱི་མཐུ་སྟོབས་འགྲུབ་ཅིང་ཕྱི་མ་རྣམ་མཁྱེན་རྫོགས་པའི་སངས་རྒྱས་ཀུན་ཏུ་བཟང་པོ་དང་སྐལ་བ་མཉམ་པར་གྱུར་ཅིག༔ དཀོན་མཆོག་གསུམ་གྱི་བདེན་པ་དང་སངས་རྒྱས་དང་སོགས༔ བཅོམ་ལྡན་འདས་དེ་བཞིན་གཤེགས་པ་སོགས༔ དཀོན་མཆོག་གསུམ་གྱི་བདེན་པ་དང་༔ འཇམ་པའི་སོགས༔ སངས་རྒྱས་སྐུ་གསུམ་བརྙེས་པའི༴ ༈ ཕྱོགས་བཅུ་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་ལྷ་དང་དྲང་སྲོང་རིག་པ་འཛིན་པ་སྨོན་ལམ་ལ་མངའ་བརྙེས་ཤིང་བདེན་ཚིག་གྲུབ་པར་རྣམས་ཀྱིས་བདེན་པས་སྨོན་ལམ་བཏབ་པ་དེ་རྣམས་ཐམས་ཅད་ཚིག་གཅིག་ཀྱང་མ་ལུས་ཆུད་མི་ཟ་བར་དེ་རིང་ཉིད་དུ་འགྲུབ་པར་གྱུར་ཅིག༔ ཨཱ་ལི་ཀཱ་ལི་རྟེན་སྙིང་འདོན༔ དེ་དག་རིམ་བཞིན་བདུན་ཕྲག་རེ་གྲངས་བྱ༔ གནད་དེས་བཀའ་སྲུང་དྲེགས་པ་མྱུར་འགྲུབ་འགྱུར༔ སུ་ལ་མ་སྤེལ་རང་གི་སྙིང་ལ་སྦོས༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་མཁའ་འགྲོ་ལས་ཀྱི་དབང་མོས་ཁྱེད་ཀྱི་བརྒྱུད་འཛིན་རྣམས་ཀྱི་སྐལ་བར་བསྔགས་པ་ཡིན་པས་དམ་དུ་སྦོས་ལ་གནད་དུ་ཟུངས་ཤིག །ཅེས་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ།། །།