TTDL-ZABTER-14-PHA-013

Previous Text Back to Volume PageNext Text

Wylie title	chos nyid nam mkha'i klong mdzod las: rig 'dzin bla ma'i sman mchod zag med bdud rtsi:
Location	bdud 'joms gling pa zab gter Volume 14, Text 13, Pages 89-91 (Folios 1a1 to 2a3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las rig 'dzin bla ma'i sman mchod zag med bdud rtsi. In Sprul pa'i gter chen bdud 'joms gling pa'i zab gter gsang ba'i chos sde, Vol. 14: 89-91. Thimphu, Bhutan: Lama Kuenzang Wangdue, 2004.
Side notes	Recto: sman mchod   Verso: bdud 'joms bla ma rig 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Medicinal Pills - Offering Ritual - sman mchod
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Colophon	ཞེས་པ་འདི་ཡང་སློབ་བུ་པཎ་ཆེན་དང་ངག་དབང་ཕྲིན་ལས་གཉིས་ཀྱིས་བསྐུལ་ངོར་རིག་འཛིན་ཆོས་ཉིད་ཀློང་རྡོལ་གྱིས་ནམ་མཁའི་མཛོད་ལས་བསྒྱུར་བའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang slob bu paN chen dang ngag dbang phrin las gnyis kyis bskul ngor rig 'dzin chos nyid klong rdol gyis nam mkha'i mdzod las bsgyur ba'o/_/dge'o/_/legs so/_/sarba mang+ga laM//

Tibetan Text

[edit]

ཐྂ།༔ ཆོས་ཉིད་ནམ་མཁའི་ཀློང་མཛོད་ལས༔ རིག་འཛིན་བླ་མའི་སྨན་མཆོད་ཟག་མེད་བདུད་རྩི་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཛ་གད་རྫས་ཀྱིས་སྦགས་པ་ལ༔ ཡེ་ཤེས་བདུད་རྩིར་བྱིན་གྱིས་བརླབས༔ ལྷ་རྣམས་རིམ་བཞིན་ཡིད་བྱེད་དེ༔ ཚིག་གི་བརྗོད་བཞིན་མཆོད་ཚུལ་བྱ༔ ཨོཾ་ཨཱཿཧཱུྃ༔ ཆོས་སྐུའི་སྟོན་པ་ཀུན་ཏུ་བཟང་པོ་དང་༔ ལོངས་སྐུའི་སྟོན་པ་རིགས་ལྔ་གངས་ཆེན་མཚོ༔ སྤྲུལ་སྐུ་རིགས་གསུམ་མགོན་པོ་འཁོར་བཅས་ལ༔ ཟག་མེད་བདེ་སྟོང་བདུད་རྩིའི་མཉེས་མཆོད་འབུལ༔ ཛྙཱ་ན་པཉྩ་ཨ་མྲྀ་ཏ་པཱུ་ཛ་ཁཱ་ཧི༔ དགའ་རབ་རྡོ་རྗེ་ཤྲཱི་སིང་ཧ་དང་༔ པདྨ་ཀ་ར་ཡེ་ཤེས་མཚོ་རྒྱལ་མ༔ བི་མ་ལ་དང་ཆོས་རྒྱལ་ཡབ་སྲས་ལ༔ ཟག་མེད་བདེ་སྟོང་བདུད་རྩིའི་མཉེས་མཆོད་འབུལ༔ ཛྙཱ་ན་པཉྩ་ཨ་མྲྀ་ཏ་པཱུ་ཛ་ཁཱ་ཧི༔ རབ་འབྱམས་རྒྱལ་ཀུན་འདུས་ཞལ་མཁྱེན་བརྩེའི་གཏེར༔ རྨད་བྱུང་བརྒྱུད་གསུམ་གདམས་པའི་མཛོད་འཆང་བ༔ ཟབ་རྒྱའི་བཅུད་རོལ་རྩ་བརྒྱུད་བླ་མ་ལ༔ ཟག་མེད་བདེ་སྟོང་བདུད་རྩིའི་མཉེས་མཆོད་འབུལ༔ ཛྙཱ་ན་པཉྩ་ཨ་མྲྀ་ཏ་པཱུ་ཛ་ཁཱ་ཧི༔ རིག་འཛིན་རྒྱལ་བའི་མཐུ་ལྡན་བདུད་སྡེའི་དགྲ༔ འཇོམས་མཛད་རྡོ་རྗེའི་སྐུ་བརྙེས་གྲུབ་པའི་དབང་༔ ཟབ་གཏེར་མངའ་བདག་དྲིན་ཆེན་ཆོས་ཀྱི་རྗེ༔ ཟག་མེད་བདེ་སྟོང་༴ ཛྙཱ་ན་པཉྩ༴ རིགས་དང་དཀྱིལ་འཁོར་བདག་པོ་བླ་མ་རྗེ༔ སྐུ་ཡི་རིག་འཛིན་འཇམ་དཔལ་བཤེས་གཉེན་དང་༔ གསུང་གི་རིག་འཛིན་ཀླུ་སྒྲུབ་སྙིང་པོ་ལ༔ ཟག་མེད་བདེ་སྟོང་༴ ཛྙཱ་ན་པཉྩ༴ ཐུགས་ཀྱི་རིག་འཛིན་ཧཱུྃ་ཆེན་ཀཱ་ར་དང་༔ ཡོན་ཏན་རིག་འཛིན་རྡོ་རྗེ་ཐོད་པ་རྩལ༔ ཕྲིན་ལས་རིག་འཛིན་པྲ་ཆེན་ཧ་སྟི་ལ༔ ཟག་མེད་བདེ་སྟོང་༴ ཛྙཱ་ན་པཉྩ༴ རྦོད་གཏོང་རིག་འཛིན་དྷ་ན་སཾསྐྲྀ་ཏ༔ མཆོད་བསྟོད་རིག་འཛིན་རམྦུ་གུ་ཧྱ་དང་༔ དྲག་སྔགས་རིག་འཛིན་ཤཱནྟིཾ་གརྦྷ་ཏར༔ ཟག་མེད་བདེ་སྟོང་༴ ཛྙཱ་ན་པཉྩ༴ རྣམ་སྨིན་རིག་འཛིན་ཚེ་དབང་རིག་འཛིན་དང་༔ ཕྱག་ཆེན་རིག་འཛིན་ལྷུན་གྲུབ་རིག་པ་འཛིན༔ རིག་འཛིན་རྣམ་བཞི་འཁོར་དང་བཅས་པ་ལ༔ ཟག་མེད་བདེ་སྟོང་༴ ཛྙཱ་ན་པཉྩ༴ གྲུབ་བརྙེས་རྗེ་འབངས་ཉི་ཤུ་རྩ་ལྔ་དང་༔ དེ་འཁོར་ཡང་འཁོར་རིག་འཛིན་རྒྱ་མཚོའི་ཚོགས༔ མ་ལུས་ལུས་པ་མེད་པ་ཐམས་ཅད་ལ༔ ཟག་མེད་བདེ་སྟོང༴ ཛྙཱ་ན་པཉྩ༴ ཡེ་ཤེས་འཇིག་རྟེན་བཀའ་སྲུང་དྲེགས་པའི་སྡེ༔ རྒྱལ་ཆེན་རིགས་བཞི་ཡབ་ཡུམ་སྲས་བཅས་དང་༔ གནོད་སྦྱིན་ཤན་པ་དམར་ནག་འཁོར་བཅས་ལ༔ ཟག་མེད་བདེ་སྟོང་༴ ཛྙཱ་ན་པཉྩ༴ དེ་ལྟར་ལྷ་རྣམས་དགྱེས་པའི་བྱིན་རླབས་ལས༔ དངོས་གྲུབ་རྣམ་གཉིས་འོད་ཟེར་རྣམ་ལྔའི་ཚུལ༔ སྒོ་གསུམ་ལ་ཐིམ་རྩ་རླུང་ཐིག་ལེའི་ཁམས༔ འབྲས་བུ་སྐུ་གསུམ་ཡེ་ཤེས་མངོན་གྱུར་ཤོག༔ རྩ་སྔགས་མཐར༔ ཀཱ་ཡ་སིདྡྷི་ཨོཾ༔ ཝཱཀ་སིདྡྷི་ཨཱཿཙིཏྟ་སིདྡྷི་ཧཱུྃ༔ སརྦ་གུ་ཎ་ཀརྨ་སིདྡྷི་ཕ་ལ་ཧཱུྃ༔ དེ་ལྟར་དམིགས་གསལ་གནད་ལྡན་པས༔ ཚོགས་གཉིས་རྫོགས་ཤིང་སྒྲིབ་གཉིས་སྦྱངས༔ རྣམ་པར་གྲོལ་བའི་ལམ་ཐོབ་འགྱུར༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ཡང་སློབ་བུ་པཎ་ཆེན་དང་ངག་དབང་ཕྲིན་ལས་གཉིས་ཀྱིས་བསྐུལ་ངོར་རིག་འཛིན་ཆོས་ཉིད་ཀློང་རྡོལ་གྱིས་ནམ་མཁའི་མཛོད་ལས་བསྒྱུར་བའོ། །དགེའོ། །ལེགས་སོ། །སརྦ་མངྒ་ལཾ།། །།