TTDL-ZABTER-15-BA-083

Previous Text Back to Volume PageNext Text

Wylie title	dag snang ye shes drwa ba las: phur srung lcam dral gyi bskang gsol yid bzhin dbang rgyal:
Location	bdud 'joms gling pa zab gter Volume 15, Text 83, Pages 341-343 (Folios 1a1 to 2a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las phur srung lcam dral gyi bskang gsol yid bzhin dbang rgyal. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 341-343. Thimphu, Bhutan: Lama Kuenzang Wangdue, 2004.
Side notes	Recto: bskang gsol   Verso: bdud 'joms srung ma phur srung
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mending Rituals - bskang chog  ·  Protector Rituals - gsol mchod
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Deity	phur srung lcam dral
Colophon	ཞེས་པ་འདིའང་བཙུན་པ་ཆེ་མཆོག་གིས་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ། །དགེའོ། །དགེའོ།།
	zhes pa 'di'ang btsun pa che mchog gis bskul ngor bdud 'joms rdo rjes dag snang ye shes drwa ba las bsgyur ba'o/_/dge'o/_/dge'o/_/dge'o//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ ཕུར་སྲུང་ལྕམ་དྲལ་གྱི་བསྐང་གསོལ་ཡིད་བཞིན་དབང་རྒྱལ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ཤ་ཁྲག་འབྲུ་སྨན་སྐྱེམས་མཆོད་བཤམས༔ ཤ་ཆེན་གསུར་གྱི་དུད་པ་བཏང་༔ རང་ཉིད་རྡོ་རྗེ་གཞོན་ནུ་ཡི༔ དཀྱིལ་འཁོར་ཕྱི་ཁྱམས་ཁོར་ཡུག་ཏུ༔ ཕུར་སྲུང་མིང་སྲིང་བཅུ་དྲུག་ནི༔ བྲན་དང་གཡོག་པོའི་ཚུལ་དུ་འདུད༔ ལྷ་མིའི་ཁྲོམ་ཚོགས་ལྟ་བུར་གསལ༔ དེ་ནས་མཆོད་གསོལ་རིམ་པ་ལ༔ ནམ་མཁའ་མཛོད་ཀྱི་སྔགས་ཀྱི་མཐར༔ ཛཿདམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ བཀའ་སྡོད་ཆེན་པོའི༴ ཕུར་སྲུང་རྒྱ་མཚོ་འཁོར་དང་བཅས༔ མི་མངོན་ཆོས་ཀྱི་དབྱིངས་ཉིད་ལས༔ བསྟན་དང་འགྲོ་དོན་མཛད་པའི་ཕྱིར༔ རྔམས་བརྗིད་འཇིགས་པའི་གཟུགས་སྐུར་བཞེངས༔ གྲུབ་པའི་རྟགས་དང་མཚན་མ་སྟོན༔ དུས་ལ་བབ་པོ་ས་མ་ཡ༔ དངོས་འབྱོར་ཡིད་ལས་སྐྱེས་པ་ཡི༔ ཏིང་འཛིན་ནམ་མཁའི་མཛོད་ཀྱི་འཕྲུལ༔ ཀུན་བཟང་མཆོད་པའི་སྤྲིན་དུ་གྱུར༔ མི་ཟད་རྒྱན་གྱི་འཁོར་ལོ་འདིས༔ དབྱིངས་ཀྱི་རྗེ་མོའི་ཐུགས་དམ་བསྐང་༔ གསོལ་ལོ་མཆོད་དོ་ཕྲིན་ལས་མཛོད༔ སྲིད་པའི་དབང་མོའི་ཐུགས་དམ་བསྐང་༔ གསོལ་ལོ་མཆོད་དོ་ཕྲིན་ལས་མཛོད༔ སྲིད་པ་ཤར་གྱི་མངའ་བདག་མོ༔ ཤྭ་ན་མུ་ཁའི་ཐུགས༴ གསོལ་ལོ་མཆོད་དོ༴ སྲིད་པ་ལྷོ་ཡི་མངའ་བདག་མོ༔ སྲི་ཀ་མུ་ཁའི་ཐུགས༴ གསོལ་ལོ་མཆོད་དོ༴ སྲིད་པ་ནུབ་ཀྱི་མངའ་བདག་མོ༔ སྲི་ལ་མུ་ཁའི་ཐུགས༴ གསོལ་ལོ་མཆོད་དོ༴ སྲིད་པ་བྱང་གི་མངའ་བདག་མོ༔ ཀུ་ཀུ་མུ་ཁའི་ཐུགས༴ གསོལ་ལོ་མཆོད་དོ༴ སྲིད་པ་དུས་བཞིའི་མངའ་བདག་མོ༔ རེ་ཏཱི་མཆེད་བཞིའི་ཐུགས༴ གསོལ་ལོ་མཆོད་དོ༴ འབྱུང་བ་ལྔ་ཡི་བདག་མོ་སྟེ༔ ས་བདག་མ་བཞིའི་ཐུགས༴ གསོལ་ལོ་མཆོད་དོ༴ མངོན་སྤྱོད་ལས་ཀྱིས་གདུག་པ་འདུལ༔ སྐྱེས་བུ་མཆེད་བཞིའི་ཐུགས༴ གསོལ་ལོ་མཆོད་དོ༴ སྲིད་པ་ཕོ་རྒྱུད་ཡོངས་ཀྱི་བདག༔ གིང་ཕོ་རྣམས་ཀྱི་ཐུགས༴ གསོལ་ལོ་མཆོད་དོ༴ སྲིད་པ་མོ་རྒྱུད་མངའ་དབང་བྱེད༔ གིང་མོ་རྣམས་ཀྱི་ཐུགས༴ གསོལ་ལོ་མཆོད་དོ༴ ཤ་ཁྲག་སྲོག་ལ་མངའ་དབང་བྱེད༔ འབར་མ་དགུ་ཡི་ཐུགས༔ གསོལ་ལོ་མཆོད་དོ༴ དཀྱིལ་འཁོར་ཀུན་གྱི་མཐའ་སྐྱོང་བྱེད༔ དབང་ཕྱུག་ཉེར་བརྒྱད་ཐུགས་དམ་བསྐང་༔ གསོལ་ལོ་མཆོད་དོ་ཕྲིན་ལས་མཛོད༔ བདག་ནི་ཕུར་པའི་རིག་འཛིན་ཏེ༔ ཁྱེད་ཅག་ཕུར་པའི་སྲུང་མ་ལ༔ ཕྲིན་ལས་གཉན་པོ་བཅོལ་བ་ནི༔ ནད་གདོན་བར་ཆད་ཞི་བ་དང་༔ ཚེ་བསོད་ཡེ་ཤེས་ཡོན་ཏན་རྒྱས༔ ཁམས་གསུམ་སྲིད་གསུམ་དབང་དུ་བསྡུས༔ སྡང་བའི་དགྲ་དང་གནོད་པའི་བགེགས༔ མ་ལུས་ཐལ་བའི་རྡུལ་དུ་རློག༔ མདོར་ན་རབ་འབྱམས་ཕྲིན་ལས་ཀུན༔ འབད་མེད་ལྷུན་གྱིས་འགྲུབ་པ་དང་༔ ཕུར་བ་བསྒྲུབ་པའི་རྣལ་འབྱོར་ལ༔ འགྲུབ་པའི་རྟགས་མཚན་བཟང་པོ་སྟོན༔ ལས་རྐྱེན་ངན་པའི་ལམ་ལས་བཟློག༔ ཐར་པ་ཆེན་པོའི་ས་རུ་སྐྱོལ༔ དུས་གསུམ་རྒྱལ་བ་སྲས་བཅས་རྣམས༔ དཔང་བཙུག་བཀའ་བསྒོ་དམ་ཚིག་དེར༔ མ་འདའ་བཀའ་ཡི་སྲུང་མ་རྣམས༔ རབ་འབྱམས་ཕྲིན་ལས་གང་བརྩམས་པ༔ མ་ཐོག་མྱུར་དུ་གྲུབ་པར་མཛོད༔ མ་འདའ་བཛྲ་ས་མ་ཡ༔ དེ་ལྟར་གྲངས་ལྡན་བསྐྱར་དེ་བྱ༔ བསྐྱེད་ཅིང་དམིགས་པའི་གནད་ལྡན་ན༔ རབ་འབྱམས་ཕྲིན་ལས་མྱུར་འགྲུབ་འགྱུར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདིའང་བཙུན་པ་ཆེ་མཆོག་གིས་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ། །དགེའོ། །དགེའོ།། །།