TTDL-ZABTER-15-BA-112

Previous Text Back to Volume PageNext Text

Wylie title	dag snang ye shes drwa ba las: zo dor gter ri phyug po'i bsang mchod 'dod yon sprin phung:
Location	bdud 'joms gling pa zab gter Volume 15, Text 112, Pages 461-463 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las zo dor gter ri phyug po'i bsang mchod 'dod yon sprin phung. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 461-463. Thimphu, Bhutan: Lama Kuenzang Wangdue, 2004.
Side notes	Recto: bsang mchod   Verso: bdud 'joms gter ri phyug po
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Smoke Offerings - bsangs mchod - lha bsang
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཅེས་པ་འདི་ཡང་རྣལ་འབྱོར་པདྨ་རྒྱལ་ཚབ་དེའི་སློབ་འབངས་ཞིང་སྐྱོང་གཉིས་ཀྱིས་བསྐུལ་ངོར་ཁྲོ་ལོད་རྩལ་གྱིས་བྲིས་པའོ། །དགེའོ། །དགེའོ། །དགེའོ།།
	ces pa 'di yang rnal 'byor pad+ma rgyal tshab de'i slob 'bangs zhing skyong gnyis kyis bskul ngor khro lod rtsal gyis bris pa'o/_/dge'o/_/dge'o/_/dge'o//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ ཟོ་དོར་གཏེར་རི་ཕྱུག་པོའི་བསང་མཆོད་འདོད་ཡོན་སྤྲིན་ཕུང་བཞུགས༔ ༁ྃ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) བཟང་ཤིང་ཕྱེ་མར་གསུར་དུད་བཏང་༔ གསེར་སྐྱེམས་དཀར་དམར་གཏོར་མ་བཤམས༔ སྟོང་པ་ཉིད་ཀྱི་སྔགས་དང་ནི༔ ནམ་མཁའ་མཛོད་སྔགས་གསུམ་གསུམ་བརྗོད༔ ཡིད་ཀྱི་ནམ་མཁའ་མཛོད་དུ་སྤེལ༔ རང་ཉིད་ཡི་དམ་ལྷ་རུ་གསལ༔ ཟོ་དོར་གཉན་པོ་དྲན་བྱས་ནས༔ ཀྱཻ༔ ཡུལ་ནི་གསེར་ལུང་སྟོད་ཀྱི་ཆར༔ དགྲ་བླ་སྟག་གཡག་འགྱིང་བའི་སར༔ ཟངས་ལྕགས་འདྲེས་པའི་སྐུ་མཁར་ནང་༔ གཤིན་རྗེའི་ཕོ་ཉ་ནག་པོ་ཆེ༔ ཆིབས་སུ་སྟག་མོ་རི་བཀྲ་བཅིབས༔ རིན་ཆེན་གསེར་གྱི་སྒ་ཆ་འཛོམ༔ གཟིག་ལྤགས་རློན་པའི་ན་བཟའ་གསོལ༔ ཕྱག་གཡས་རལ་གྲི་འབར་བ་ཕྱར༔ གཡོན་པས་དབང་གི་ལྕགས་ཀྱུ་འཛིན༔ དབུ་ལ་རིན་ཆེན་པྲོག་ཞུ་མནབ༔ སྦྲུལ་རིག་ལྔ་ཡི་ཐོད་ཆིང་དཀྲིས༔ བྲང་དང་རྒྱབ་གཞུང་སྲུང་བའི་སྐྱབས༔ སྣ་ཚོགས་རྡོ་རྗེ་རྒྱ་གྲམ་འབར༔ དེ་ལ་དར་གྱི་དཔྱངས་ལ་འཕུར༔ ཕྱི་ལྟར་གཏེར་རི་གཡུ་རྩེ་ཞེས༔ ནང་ལྟར་གནོད་སྦྱིན་ཛམ་བྷ་ལ༔ གསང་བ་གཤིན་རྗེ་སྲོག་བདག་ནག༔ སྔོན་ཚེ་བསྐལ་པ་དང་པོ་ལ༔ ཁྲག་འཐུང་རྡོ་རྗེ་གཤོག་རྒོད་ཀྱིས༔ དམ་བཏགས་དབང་བསྐུར་མཚན་ཡང་གསོལ༔ ལས་མྱུར་རྡོ་རྗེ་སྤུ་གྲི་རྩལ༔ བསང་མཆོད་གནས་འདིར་གཤེགས་སུ་གསོལ༔ ཏིང་འཛིན་སྒྱུ་འཕྲུལ་དྲྭ་བ་ཡིས༔ བསྐྲུན་པའི་འདོད་ཡོན་ནམ་མཁའ་མཛོད༔ སྤེལ་བྱེད་བསང་གི་མཆོད་པ་འབུལ༔ བཤད་སྒྲུབ་བསྟན་པའི་མངའ་ཐང་སྤེལ༔ ཀྱཻ༔ ལས་མྱུར་རྡོ་རྗེ་དྲག་པོ་རྩལ༔ ཀླུ་ལྕམ་ཡུམ་དང་བཅས་པ་བསང་༔ ཡབ་རྗེ་རྔ་ལ་སྟག་རྩེ༴ མ་ནི་དངུལ་ཆུའི་ཀླུ་མཚོ༴ བླ་མཆོད་ལ་ཀོར་གསེར་ཐང་༴ སྐྱབས་མགོན་དབང་ཕྱུག་ཆེན་པོ༴ མེས་པོ་འབྲོང་རི་སྨུག་པོ༴ ཞང་པོ་སྡོང་ར་དཀར་པོ༴ དམག་དཔོན་ལྷ་རི་རྣོན་པོ༴ གཟི་ལྡན་བྲག་ལྷ་དཀར་པོ༴ དཀོར་མཛོད་སིལ་བའི་ཏིལ་དཀར༔ སྣ་འདྲེན་བྲག་དམར་རལ་གྲི༴ ཕྱུགས་རྫི་མེ་ལྕེ་གློག་དམར༴ མགར་བ་བྲག་ལྷ་གཏུམ་པོ༴ སོ་མཁན་སྒོ་ཐུང་མྱུར་ལྡན༴ སྒོ་སྲུང་མཁར་ལྡིང་གསེར་མིག༴ བློ ན་ཆེན་རྫ་བཀྲ་ལྷུན་པོ་བསང་༔ གཞན་ཡང་དེ་དང་དེ་འཁོར་གྱི༔ གཉན་དང་ཀླུ་བཙན་བདུད་སྨན་ཕྲན༔ བརྒྱ་དང་སུམ་ཅུའི་ཚོགས་རྣམས་བསང་༔ རྣལ་འབྱོར་ཡང་ན་དཔོན་སློབ་ཅེས་ཁ་བསྒྱུར་བདག་ཅག་འཁོར་བཅས་ཀྱི༔ དགོན་གནས་ཆོས་སྡེ་འདི་ཉིད་ཀྱི༔ མདུན་རྒྱབ་གཡས་གཡོན་ཕྱོགས་འཚམས་ལ༔ གནས་པའི་ས་བདག་སྡེ་བརྒྱད་བསང་༔ བསླུ་མེད་མཆོག་གསུམ་ཐུགས་རྗེ་དང་༔ བདེན་པ་གཉིས་ཀྱི་བདེན་སྟོབས་དང་༔ བསང་ཁྲུས་གཉན་པོའི་རྟེན་འབྲེལ་གྱིས༔ འགོ་ཞིང་སྐྱོབ་པའི་ལྷ་སྲུང་དང་༔ སྡོང་གྲོགས་བྱེད་པའི་གཞི་བདག་རྣམས༔ བཀྲ་ཤིས་དཔལ་འབར་དགའ་བདེ་དང་༔ མཐུ་རྩལ་མྱུར་མགྱོགས་སྟོབས་རྒྱས་ནས༔ དབང་ཕྱུག་བརྒྱ་བྱིན་ཚོགས་བདག་བཞིན༔ ལེགས་པའི་ཡོན་ཏན་ཕུན་ཚོགས་ཤིང་༔ དེའི་མཐུས་བདག་ཅག་འཁོར་དང་བཅས༔ ཆོས་སྲིད་མངའ་ཐང་དགའ་བདེ་རྒྱས༔ རྫོགས་ལྡན་དུས་ཀྱི་བསྐལ་པ་བཞིན༔ ཕན་ཚུན་མཐུན་པའི་དགེ་རྒྱས་ནས༔ བདེ་ལེགས་རྒྱུ་འབྲས་ལྷུར་ལེན་ཅིང་༔ བཤད་སྒྲུབ་བསྟན་དང་བསྟན་འཛིན་སྡེ༔ མི་ནུབ་རབ་ཏུ་འཕེལ་རྒྱས་ཤོག༔ བསྟན་ལ་རྒོལ་བའི་བདུད་སྡེ་དཔུང་༔ མེ་སྟག་ཆུ་རུ་ཕོག་པ་ལྟར༔ རྗེས་ཤུལ་མེད་པར་ནུབ་པར་ཤོག༔ ས་མ་ཡ༔ དེ་ལྟར་བསང་མཆོད་བྱས་གྱུར་ན༔ དགེ་ལེགས་ཡོན་ཏན་གོང་འཕེལ་བྱེད༔ ཅེས་པ་འདི་ཡང་རྣལ་འབྱོར་པདྨ་རྒྱལ་ཚབ་དེའི་སློབ་འབངས་ཞིང་སྐྱོང་གཉིས་ཀྱིས་བསྐུལ་ངོར་ཁྲོ་ལོད་རྩལ་གྱིས་བྲིས་པའོ། །དགེའོ། །དགེའོ། །དགེའོ།། །།