TTDL-ZABTER-16-MA-017

Previous Text Back to Volume PageNext Text

Wylie title	dag snang ye shes drwa ba las: smon lam rnam dag chos nyid lam bzang:
Location	bdud 'joms gling pa zab gter Volume 16, Text 17, Pages 59-61 (Folios 1a1 to 2a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las smon lam rnam dag chos nyid lam bzang. In Sprul pa'i gter chen bdud 'joms gling pa'i zab gter gsang ba'i chos sde, Vol. 16: 59-61. Thimphu, Bhutan: Lama Kuenzang Wangdue, 2004.
Side notes	Recto: smon lam   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Prayers - smon lam
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཅེས་པ་འདི་ཡང་འོད་གསལ་རྫོགས་པ་ཆེན་པོའི་རྣལ་འབྱོར་མ་བདེ་ཆེན་མཚོས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ།།
	ces pa 'di yang 'od gsal rdzogs pa chen po'i rnal 'byor ma bde chen mtshos nan du bskul ngor khrag 'thung bdud 'joms rdo rjes chos nyid nam mkha'i mdzod las bsgyur ba'o/_/dge'o/_/dge'o/_/dge'o//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ སྨོན་ལམ་རྣམ་དག་ཆོས་ཉིད་ལམ་བཟང་བཞུགས༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་)དུས་རྣམ་ཀུན་ཏུ་སྨོན་ལམ་ནི༔ བརྩོན་པས་བར་ཆད་གེགས་ལས་གྲོལ༔ ན་མོ༔ དཀོན་མཆོག་རིན་པོ་ཆེ་རྣམ་པ་གསུམ་དང་རྩ་གསུམ་སྐུ་གསུམ་རྒྱལ་བ་སྲས་དང་བཅས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་ད་ལྟ་ཉིད་དུ་བདག་གི་རྒྱུད་ལ་འཕོ་བར་ཤོག་ཅིག༔ ཡོངས་སུ་རྫོགས་པར་ཤོག་ཅིག༔ བསྐྱེད་པ་མ་ཧཱ་ཡོ་གའི་སྒོ་རུ་ཞུགས་པ་ཙམ་གྱིས་སྒོ་གསུམ་རྡོ་རྗེ་གསུམ་གྱི་རོལ་པར་དག་ཅིང་སྨིན་ནས་གྲོལ་བར་ཤོག་ཅིག༔ ལུང་ཨ་ནུ་ཡོ་གའི་སྒོ་རུ་ཞུགས་པ་ཙམ་གྱིས་དབྱིངས་དང་ཡེ་ཤེས་གཉིས་སུ་མེད་པའི་ངང་དུ་གྲོལ་བར་ཤོག་ཅིག༔ གཞི་ཁྲེགས་ཆོད་ཀྱི་གདམས་པ་ཉམས་སུ་བླངས་པ་ཙམ་གྱིས་བདག་མེད་རྣམ་པ་གཉིས་ཀྱི་དོན་རྟོགས་ནས་ཆོས་ཉིད་ཀྱི་བདེན་པ་མངོན་སུམ་དུ་མཐོང་བར་ཤོག་ཅིག༔ ཟབ་གསང་རྫོགས་པ་ཆེན་པོའི་ལྟ་སྒོམ་ཕྱིན་ཅི་མ་ལོག་པ་རྒྱུད་ལ་སྐྱེ་བར་ཤོག་ཅིག༔ རྟོགས་པར་ཤོག་ཅིག༔ གོལ་ས་དང་ནོར་ས་ཤོར་ས་ལ་སོགས་པའི་བར་ཆད་དང་རྐྱེན་ངན་ཐམས་ཅད་ཀྱི་དབང་དུ་སྐད་ཅིག་ཙམ་ཡང་མི་འགྱུར་བར༴ རིག་པ་ལ་རང་དབང་ཐོབ་སྟེ་རྟོགས་པ་ནམ་མཁའ་དང་མཉམ་པར༴ འོད་གསལ་ཐོད་རྒལ་ཆེན་པོའི་གསང་ལམ་ཟབ་མོའི་སྒོ་རུ་ཞུགས་པ་ཙམ་གྱིས་ཆོས་ཉིད་མངོན་སུམ་གྱི་ཉམས་རྟོགས་ཕྱིན་ཅི་མ་ལོག་པར་རྒྱུད་ལ་སྐྱེ་བར༴ རྟོགས་ནས་མཐར་ཕྱིན་པར༴ ས་ལམ་གྱི་ཡོན་ཏན་ནར་སོན་ཏེ་ཉམས་སྣང་གོང་འཕེལ་གྱི་ལམ་རྟགས་དང་ཡོན་ཏན་ཚང་ལ་མ་ནོར་བ་ཅི་བཞིན་དུ་བདག་གི་རྒྱུད་ལ་སྐྱེ་ཞིང་འབྱུང་བར༴ སླར་ཡང་སྣང་རིག་བཅུད་དུ་སྨིན་ནས་རིག་པ་ཚད་ཕེབས་ཀྱི་སྣང་བའི་ཉམས་རྟགས་ཡོན་ཏན་ཐམས་ཅད་བདག་གི་རྒྱུད་ལ་འཁྲུངས་ཤིང་སྐྱེ་བར༴ དེ་དུས་ཉམས་དང་རྟོགས་པ་ཕྱིན་ཅི་མ་ལོག་པ་རྒྱུད་ལུང་མན་ངག་ཐམས་ཅད་དང་མཐུན་པ་ཞིག་འབྱུང་བར༴ སྐྱེ་བར༴ རྟོགས་པར༴ ལམ་གྱི་ཡོན་ཏན་ཡོངས་སུ་ཚང་བ་སྤྱན་དང་མངོན་ཤེས་རྫུ་འཕྲུལ་རླབས་པོ་ཆེ་ཐམས་ཅད་འབྱུང་བར༴ ཐོབ་པར༴ འགྲུབ་པར༴ ཕྱི་ནང་གསང་བའི་བར་ཆད་དང་རྐྱེན་ངན་གྱི་དབང་དུ་མི་འགྱུར་བར༴ བདག་མཐོང་བ་དང་ཐོས་པ་དང་དབང་ལུང་མན་ངག་གི་འབྲེལ་བ་དང་གཏམ་དང་ཚིག་གི་འབྲེལ་བ་ཡན་ཆད་ཀྱི་སྐྱེ་འགྲོ་ཕོ་མོ་ཐམས་ཅད་རྣམ་པར་གྲོལ་བའི་སྟོབས་དབང་ཡོན་ཏན་ཐམས་ཅད་དང་ལྡན་པར༴ ཉམས་རྟོགས་ཡོན་ཏན་ཐམས་ཅད་མཐའ་རུ་ཕྱིན་ནས་འོད་ཟེར་གྱི་སྣང་བ་ཆེན་པོའི་དབང་ནོད་དེ་མཐར་ཆོས་ཅན་གྱི་སྣང་བ་ཆོས་ཉིད་ཀྱི་དབྱིངས་སུ་ཟད་ནས་གྲོལ་བར༴ སླར་ཡང་ཤེས་སྒྲིབ་ཕྲ་མོ་དབྱིངས་སུ་དག་ནས་ཡེ་ཤེས་ཀྱི་མཐོང་ཕྱེས་ཏེ༔ སྐུ་དང་ཡེ་ཤེས་ཡོན་ཏན་ཐམས་ཅད་མངོན་དུ་གྱུར་ནས་གཞོན་ནུ་བུམ་པའི་སྐུ་རུ་གྲོལ་བར་ཤོག༴ འཇའ་ལུས་འཕོ་བ་ཆེན་པོའི་སྐུ་ཡང་དག་པར་རྫོགས་པའི་སངས་རྒྱས་ཐོབ་པར༴ ཆོས་ཉིད་ཀྱི་ཤུགས་དང་རླབས་ཆེན་པོས་ཁམས་གསུམ་གྱི་འཁོར་བ་དོང་ནས་སྤྲུགས་པར་ཤོག་ཅིག༔ དེ་མཐར་སྨོན་ལམ་འགྲུབ་པའི་སྔགས་དང་བདེན་ཚིག་ཅི་མང་བརྗོད་པ་གནད་དུ་གཅེས་སོ༔ ཡང་དག་ལམ་དུ་ཞུགས་པ་ཡི༔ རྣལ་འབྱོར་ཕོ་མོ་ཐམས་ཅད་ཀུན༔ རྟག་ཏུ་འདིར་བརྩོན་རྣམ་མཁྱེན་གྱི༔ ལམ་དུ་གྲོལ་བར་གདོན་མི་ཟ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཅེས་པ་འདི་ཡང་འོད་གསལ་རྫོགས་པ་ཆེན་པོའི་རྣལ་འབྱོར་མ་བདེ་ཆེན་མཚོས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ།།