TTDL-ZABTER-06-CHA-025

Previous Text Back to Volume PageNext Text

Wylie title	zab gsang mkha' 'gro'i snying thig las: bde gshegs zhi bskul thugs rje'i rgyud bskul:
Location	bdud 'joms gling pa zab gter Volume 6, Text 25, Pages 379-383 (Folios 1a1 to 3a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bde gshegs zhi bskul thugs rje'i rgyud bskul. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: 379-383. Thimphu, Bhutan: Lama Kuenzang Wangdue, 2004.
Side notes	Recto: zhi bskul   Verso: bdud 'joms bka' brgyad gsang 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Invocations - bskul ba
Cycle	བདེ་གཤེགས་བཀའ་བརྒྱད་གསང་བ་འདུས་པ་ (bde gshegs bka' brgyad gsang ba 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad
Colophon	ཞེས་པ་འདི་ཉིད་གར་དབང་བདུད་འཇོམས་གླིང་པས་ཤོག་སེར་ལས་ཞལ་བཤུས་ཏེ་དག་པར་ཕབ་པའོ། །དགེའོ། །དགེའོ། །དགེའོ།།
	zhes pa 'di nyid gar dbang bdud 'joms gling pas shog ser las zhal bshus te dag par phab pa'o/ /dge'o/ /dge'o/ /dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བདེ་གཤེགས་ཞི་བསྐུལ་ཐུགས་རྗེའི་རྒྱུད་བསྐུལ་བཞུགས༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) དུས་གསུམ་སངས་རྒྱས་ཐམས་ཅད་ཀུན༔ དབྱེར་མེད་གཅིག་ཏུ་འདུས་པའི་དཔལ༔ ཀུན་བཟང་ཡབ་ཡུམ་ལ་བཏུད་དེ༔ ཞི་བསྐུལ་ཐུགས་རྗེའི་རྒྱུད་བསྐུལ་ནི༔ རྗེས་འཇུག་རྣམས་ཀྱི་དོན་དུ་བཀོད༔ དད་དང་མོས་གུས་དྲག་པོ་ཡིས༔ རྔ་དང་སིལ་སྙན་སྒྲ་དང་བཅས༔ སྤོས་བསྲེགས་དར་གཡབ་གདུང་དབྱངས་ཀྱིས༔ ཧཱུྃ་ཧྲཱིཿངང་ཉིད་ཆོས་ཀྱི་དབྱིངས་ལས་མ་གཡོས་ཀྱང་༔ ཐུགས་རྗེའི་སྒྱུ་འཕྲུལ་སྐུ་དང་ཡེ་ཤེས་ཤར༔ གདུག་པ་འདུལ་ཕྱིར་གང་འདུལ་སྤྲུལ་སྐུར་སྟོན༔ རྗེས་འཇུག་གདུང་ཤུགས་དྲག་པོས་ཐུགས་དམ་བསྐུལ༔ མ་གཡེལ་མ་འགྱངས་མྱུར་དུ་ལས་ལ་དགོངས༔ གདོད་མའི་སྟོང་ཆེན་ཆོས་སྐུ་ཀུན་ཏུ་བཟང་༔ གཉིས་མེད་སྟོང་གསལ་ཀུན་ཏུ་བཟང་མོ་ཡུམ༔ ཐུགས་རྗེ་བརྩེ་བ་ཆེན་པོའི་དགོངས་མཛོད་ལ༔ དམ་རྫས་བདུད་རྩི་འབར་བ་འདི་བཞེས་ཤིག༔ འཁོར་བ་དབྱིངས་སུ་སྒྲོལ་བའི་ཕྲིན་ལས་མཛོད༔ ཧཱུྃ་ཧྲཱིཿགཞི་སྣང་ཡོན་ཏན་བཀོད་པ་མཐའ་ཡས་པ༔ རྣམ་པར་སྣང་མཛད་དབྱིངས་ཕྱུག་ཡེ་ཤེས་ཡུམ༔ ཐུགས་རྗེ་བརྩེ༴ དམ་རྫས་བདུད༴ གཟུགས་ཕུང་ནམ་མཁའ་གནས་དག་ཕྲིན་ལས་མཛོད༔ ཧཱུྃ་ཧྲཱིཿཆོས་ཉིད་མི་ཤིགས་རྡོ་རྗེ་འབར་བའི་གོ༔ མི་གཡོ་མི་འགྱུར་མི་བསྐྱོད་མཱ་ཀཱི་ཡུམ༔ ཐུགས་རྗེ་བརྩེ༴ དམ་རྫས་བདུད༴ རྣམ་ཤེས་ཆུ་ཁམས་གནས་དག་ཕྲིན་ལས་མཛོད༔ ཧཱུྃ་ཧྲཱིཿ གདོད་ནས་འཁོར་འདས་གཉིས་མེད་མཉམ་ཉིད་དབྱིངས༔ སྐུ་དང་ཡེ་ཤེས་ཡོན་ཏན་ལྷུན་གྱིས་གྲུབ༔ རིན་ཆེན་ལྟ་བུར་ཆོས་ཀུན་འབྱུང་བའི་མཛོད༔ དཔལ་ལྡན་ཆོས་ཉིད་སངས་རྒྱས་སྤྱན་མ་ཡུམ༔ ཐུགས་རྗེ་བརྩེ༴ དམ་རྫས་བདུད༴ ཚོར་ཕུང་ས་ཁམས་གནས་དག་ཕྲིན་ལས་མཛོད༔ ཧཱུྃ་ཧྲཱིཿཆགས་བྲལ་སྣང་བའི་བཀོད་པ་མཐའ་ཡས་པ༔ ཟུང་འཇུག་འོད་གསལ་བདེ་ཆེན་གོས་དཀར་ཡུམ༔ ཐུགས་རྗེ་བརྩེ༴ དམ་རྫས་བདུད༴ འདུ་ཤེས་མེ་ཁམས་གནས་དག་ཕྲིན་ལས་མཛོད༔ ཧཱུྃ་ཧྲཱིཿདག་གྲོལ་རོལ་པའི་བྱ་བྱེད་གནས་དག་པ༔ མ་བཅོས་ཡེ་རྫོགས་ཡོན་ཏན་ལྷུན་གྱིས་གྲུབ༔ དོན་ཡོད་གྲུབ་པ་དམ་ཚིག་སྒྲོལ་མ་ཡུམ༔ ཐུགས་རྗེ་བརྩེ༴ དམ་རྫས་བདུད༴ འདུ་བྱེད་རླུང་ཁམས་གནས་དག་ཕྲིན་ལས་མཛོད༔ ཧཱུྃ་ཧྲཱིཿབྱང་ཆུབ་སེམས་དཔའ་ས་ལ་དབང་མཛད་པ༔ ས་ཡི་སྙིང་པོ་རྡོ་རྗེ་སྒེག་པ་མོ༔ ནམ་མཁའི་སྙིང་པོ་རྡོ་རྗེ་ཕྲེང་བ་མོ༔ སྤྱན་རས་གཟིགས་དབང་རྡོ་རྗེ་གར་དབང་མོ༔ ཐུགས་རྗེ་བརྩེ༴ དམ་རྫས་བདུད༴ རྣམ་ཤེས་དབང་ཡུལ་གནས་དག་ཕྲིན་ལས་མཛོད༔ ཧཱུྃ་ཧྲཱིཿབྱང་ཆུབ་སེམས་དཔའ་ས་ལ་དབང་མཛད་པ༔ བྱམས་པ་མཻ་ཏྲི་རྡོ་རྗེ་བདུག་པ་མོ༔ སྒྲིབ་པ་རྣམ་སེལ་རྡོ་རྗེ་མེ་ཏོག་མ༔ ཀུན་ཏུ་བཟང་པོ་རྡོ་རྗེ་ཨཱ་ལོ་ཀེ༔ འཇམ་དཔལ་དབྱངས་དང་རྡོ་རྗེ་དྲི་ཆབ་མ༔ ཐུགས་རྗེ་བརྩེ༴ དམ་རྫས་བདུད༴ དབང་པོ་དུས་བཞི་གནས་དག་ཕྲིན་ལས་མཛོད༔ ཧཱུྃ་ཧྲཱིཿ འགྲོ་བ་འདུལ་མཛད་སྤྲུལ་སྐུ་ཐུབ་པ་དྲུག༔ ཆོས་རྒྱལ་ཁ་འབར་སེང་གེ་རབ་བརྟན་དང་༔ ཐག་བཟང་རིས་དང་བརྒྱ་བྱིན་ཤཱཀྱ་ཐུབ༔ ཐུགས་རྗེ་བརྩེ༴ དམ་རྫས་བདུད༴ ཉོན་མོངས་གནས་སུ་དག་པའི་ཕྲིན་ལས་མཛོད༔ ཧཱུྃ་ཧྲཱིཿསྙིང་རྗེ་ཚད་མེད་སྒོ་མ་ལྕགས་ཀྱུ་མ༔ བྱམས་པ་ཚད་མེད་སྒོ་མ་ཞགས་པ་མ༔ དགའ་བ་ཚད་མེད་སྒོ་མ་ལྕགས་སྒྲོག་མ༔ བཏང་སྙོམས་ཚད་མེད་སྒོ་མ་དྲིལ་བུ་མ༔ ཐུགས་རྗེ་བརྩེ༴ དམ་རྫས་བདུད༴ མཐར་འཛིན་གནས་སུ་དག་པའི་ཕྲིན་ལས་མཛོད༔ ཧཱུྃ་ཧྲཱིཿསྒོ་བ་ཆེན་པོ་རྡོ་རྗེ་རྣམ་པར་རྒྱལ༔ སྒོ་བ་ཆེན་པོ་རཏྣ་གཤིན་རྗེ་གཤེད༔ སྒོ་བ་ཆེན་པོ་པདྨ་རྟ་མགྲིན་རྒྱལ༔ སྒོ་བ་ཆེན་པོ་ཁྲོ་རྒྱལ་བདུད་རྩི་འཁྱིལ༔ ཐུགས་རྗེ་བརྩེ༴ དམ་རྫས་བདུད༴ མུ་བཞི་གནས་སུ་དག་པའི་ཕྲིན་ལས་མཛོད༔ ཧཱུྃ་ཧྲཱིཿརིགས་བརྒྱ་རིགས་ལྔ་རིགས་གསུམ་རིགས་གཅིག་ལྷ༔ རྡོ་རྗེ་སེམས་དཔའ་ལྷ་ཡི་ལྷ་མཆོག་གི༔ སྐུ་གསུང་ཐུགས་ཀྱི་བཀོད་པ་མཐའ་ཡས་པ༔ སྒྱུ་འཕྲུལ་ཞི་དང་ཁྲོ་བོའི་དཀྱིལ་འཁོར་ལྷ༔ མ་བཅོས་ཐུགས་རྗེའི་ཀློང་ནས་སྐུར་བཞེངས་ཤིག༔ དམ་རྫས་བདུད་རྩི་འབར་བ་འདི་བཞེས་ལ༔ ཉོན་མོངས་འཁྲུལ་པའི་རྒྱུ་རྐྱེན་རྟེན་འབྲེལ་ལས༔ བྱུང་བའི་དགྲ་བགེགས་ལོག་འདྲེན་མ་རུངས་པ༔ ཐུགས་རྗེ་ཆེན་པོའི་མཐུ་རྩལ་ནུས་པས་ཐུལ༔ བྱད་ཕུར་རྦོད་གཏོང་ཆག་ཆེ་ཉམ་ང་དང་༔ འཇིགས་པ་ཆེན་པོ་བརྒྱད་དང་བཅུ་དྲུག་དང་༔ ལུས་ངག་ཡིད་ལ་གནོད་ཅིང་འཚེ་བའི་རིགས༔ རྩ་སྦུར་ཕྲ་མོ་མེ་ཡིས་གཞོམ་པ་བཞིན༔ རྗེས་ཤུལ་མེད་པར་ཐལ་བའི་རྡུལ་བཞིན་རློག༔ སངས་རྒྱས་བསྟན་དང་བསྟན་འཛིན་རྒྱས་པ་དང་༔ ཆོས་སྲིད་ལོངས་སྤྱོད་བསོད་ནམས་སྙན་དང་གྲགས༔ ཚེ་དང་གཟི་བྱིན་མདངས་སྟོབས་ཡོན་ཏན་ཀུན༔ ཟླ་བ་ཡར་གྱི་ངོ་བཞིན་གོང་འཕེལ་དུ༔ ནམ་ཡང་ནུབ་མེད་དར་ཞིང་རྒྱས་པར་མཛོད༔ ཕྱོགས་བཅུ་དུས་བཞི་རྒྱལ་བ་ཐམས་ཅད་ཀུན༔ ཆོས་ཉིད་གཅིག་ལས་རྣམ་འཕྲུལ་ཅིར་ཡང་སྟོན༔ གང་འདུལ་མཛད་པ་ཕྲིན་ལས་དུ་མ་ཡིས༔ གདུལ་བྱ་རྟག་འཛིན་ཅན་རྣམས་ཁ་དྲངས་ཕྱིར༔ སྣ་ཚོགས་སྤྲུལ་པ་དུ་མ་ཕྱོགས་བཅུར་འགྱེད༔ ལས་ངན་རྒྱུན་བཅད་ངན་སོང་སྐྱེ་སྒོ་ཁེག༔ དག་པའི་ཞིང་ཁམས་མངོན་དུ་གྱུར་པ་དང་༔ ཕྱིར་མི་ལྡོག་པ་ཆོས་སྐུའི་ས་ལ་སྐྱོལ༔ ཐུགས་བསྐྱེད་དམ་བཅའ་དུས་ལས་མི་འདོར་བར༔ ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད༔ ཅེས་བརྗོད་གཏོར་སྐྱེམས་གཙང་སར་གཤེགས༔ ཕྱི་ནང་མཆོད་ཚོགས་རྒྱ་ཆེར་བཤམས༔ གདུང་འཚོབ་རྒྱལ་བ་རིག་པ་འཛིན༔ གང་འདུལ་སྤྲུལ་པའི་ཚོགས་རྣམས་ཀྱང་༔ ཡེ་ཤེས་མཆོག་གི་མཆོད་པས་བརྔན༔ ཚོགས་རྫོགས་སྒྲིབ་པ་བྱང་བ་དང་༔ དོན་གཉིས་ཡིད་བཞིན་འགྲུབ་པར་འགྱུར༔ བཀའ་སྲུང་དྲེགས་པ་སྡེ་དགུར་གཉེར༔ ཐུབ་པར་སྲུངས་ཤིག་ས་མ་ཡ༔ སྐལ་བཟང་སྐྱེས་བུའི་ཚོགས་ལ་སྤྲོད༔ སྐལ་མེད་རྣམས་ལ་གསང་རྒྱས་ཐོབ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཉིད་གར་དབང་བདུད་འཇོམས་གླིང་པས་ཤོག་སེར་ལས་ཞལ་བཤུས་ཏེ་དག་པར་ཕབ་པའོ། །དགེའོ། །དགེའོ། །དགེའོ།། །།