TTDL-ZABTER-15-BA-013

Previous Text Back to Volume PageNext Text

Wylie title	dag snang ye shes drwa ba las: 'jam dpal smra ba'i seng ge'i sgrub thabs ye shes 'od zer:
Location	bdud 'joms gling pa zab gter Volume 15, Text 13, Pages 63-65 (Folios 1a1 to 2a1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las 'jam dpal smra ba'i seng ge'i sgrub thabs ye shes 'od zer. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 63-65. Thimphu, Bhutan: Lama Kuenzang Wangdue, 2004.
Side notes	Recto: sgrub thabs   Verso: bdud 'joms 'jam dpal smra seng
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Deity	'jam dpal smra ba'i seng+ge
Colophon	ཞེས་པ་འདི་སྐལ་ལྡན་སློབ་བུ་ཡེ་ཤེས་འོད་ཟེར་གྱིས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བ་ཨོ་རྒྱན་རང་ཤར་ལ་གཏད་རྒྱའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di skal ldan slob bu ye shes 'od zer gyis bskul ngor bdud 'joms rdo rjes chos nyid nam mkha'i mdzod las bsgyur ba o rgyan rang shar la gtad rgya'o/_/dge'o/_/dge'o/_/sarba mang+ga laM//

Tibetan Text

[edit]

(བརྡ་ཡིག་) དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་སྒྲུབ་ཐབས་ཡེ་ཤེས་འོད་ཟེར་བཞུགས་སོ༔ ན་མོ་གུ་རུ་བྷྱ༔ (བརྡ་ཡིག་) དང་པོ་སྐྱབས་སུ་འགྲོ་བ་ལ༔ ན་མོ༔ སྐྱབས་ཀྱི་དམ་པ་དཀོན་མཆོག་གསུམ༔ རྩ་གསུམ་རྒྱལ་བ་རྒྱ་མཚོའི་ཚོགས༔ ཡོངས་འདུས་བདག་ཉིད་བླ་མ་དང་༔ འཇམ་དཔལ་དབྱངས་ལ་སྐྱབས་སུ་མཆི༔ ལན་གསུམ༔ དེ་ནས་སེམས་བསྐྱེད་པ་ནི༔ ཧོཿ མ་གྱུར་འགྲོ་བ་སེམས་ཅན་རྣམས༔ རྫོགས་པའི་སངས་རྒྱས་ཐོབ་བྱའི་ཕྱིར༔ འཇམ་དཔལ་སྨྲ་བའི་སེང་གེ་ཡི༔ བསྒོམ་བཟླས་ཟབ་མོ་ལྷུར་ལེན་བྱ༔ ལན་གསུམ༔ དེ་ནས་དངོས་གཞི་ལྷ་བསྐྱེད་པ་ནི༔ རང་སྣང་ལྷུན་གྲུབ་བདེ་ཆེན་ཞིང་༔ འོད་གསལ་ཆོས་སྐུའི་ཕོ་བྲང་དབུས༔ མ་ཆགས་པདྨ་ཉི་ཟླའི་སྟེང་༔ རང་ཉིད་སྐད་ཅིག་དྲན་རྫོགས་སུ༔ མཁྱེན་རབ་དབང་ཕྱུག་འཇམ་པའི་དབྱངས༔ དམར་གསལ་ལོ་བརྒྱད་གཞོན་ནུའི་ཚུལ༔ ཞི་འཛུམ་མཚན་དང་དཔེ་བྱད་རྫོགས༔ ཕྱག་གཡས་ཤེས་རབ་རལ་གྲི་དང་༔ གཡོན་པས་བརྒྱད་སྟོང་གླེགས་བམ་བསྣམས༔ ལོངས་སྤྱོད་རྒྱན་རྫོགས་སྐྱིལ་ཀྲུང་བཞུགས༔ འཇའ་འོད་ཐིག་ལེའི་ཀློང་དུ་བསྐྱེད༔ ཐུགས་ཀར་ཉི་ཟླའི་གྭའུ་རུ༔ ཧྲཱིཿ ཡིག་དམར་པོ་གསལ་འཚེར་ལ༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་བཅུད་མ་ལུས་པ༔ འོད་དམར་རྣམ་པར་ཚུར་བསྡུས་ཏེ༔ སྲོག་གི་སྙིང་པོར་བཅུད་དུ་དྲིལ༔ ཤེས་རབ་ཡེ་ཤེས་འབར་བར་བསྒོམས༔ ཨོཾ་ཧྲཱིཿདྷི་མ་མིདྷི་པཾ་མཉྫུ་ཤྲཱི་མུཾ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷི༔ སྭཱ་ཧཱདེ་ནས་བསྟོད་པ་བྱ་བ་ལ༔ ཧཱུྃ་ཧྲཱིཿ ཀ་དག་ཆོས་སྐུ་སྤྲོས་པའི་མཐའ་དང་བྲལ༔ ལྷུན་གྲུབ་འགགས་མེད་སྐུ་དང་ཡེ་ཤེས་རྫོགས༔ ཐུགས་རྗེ་ཐབས་ཀྱིས་འགྲོ་བའི་དོན་མཛད་པའི༔ མགོན་པོ་འཇམ་དཔལ་དབྱངས་ལ་ཕྱག་འཚལ་བསྟོད༔ ཅེས་ཤེས་པ་གཞན་དུ་མ་ཡེངས་བར་ལྷའི་ང་རྒྱལ་དང་འགྲོགས༔ མི་ཚིག་གིས་བར་མ་ཆད་པར་སྔགས་ཀྱི་ཕྲེང་བ་ཉེར་གཅིག་པ་སྒྲ་དག་ལྷག་ཆད་མེད་པར་བཟླ༔ སྟན་གྱི་དྲོད་མ་ཡལ་བར་ལུས་ཀྱི་འགུལ་བསྐྱོད་དང་བྱ་བ་སྦང་བར་བྱའོ༔ གནད་དེས་ཉི་ཟླ་ཤར་བ་མེ་ཏོག་འཐུ་བ་མཚོན་ཆ་གླེགས་བམ་མཐོང་བ་ནམ་མཁའ་གཡའ་དག་པ་རྣམས་རྨི་བ་དང་༔ ལྷ་ཞལ་མཐོང་བ་ཉམས་རྟོག་གློ་བུར་དུ་སྐྱེ་བ་མངོན་ཤེས་འཆར་བ་རྣམས་འགྲུབ་པའི་མཚན་མར་ངེས་པར་འབྱུང་ངོ་༔ བསྐྱེད་པའི་གནད་ལྷའི་ང་རྒྱལ་མེད་ན་ལོ་བརྒྱར་བསྒྲུབ་ཀྱང་ལྷ་གང་འགྲུབ་མི་སྲིད་པས༔ བསྒོམ་བཟླས་མ་བྲལ་བ་གནད་དུ་ཤེས་པར་གྱིས་ཤིག༔ དེ་ནས་རིང་པོར་མི་ཐོགས་པར་དངོས་གྲུབ་ཀྱི་པྲ་ལྟས་འབྱུང་ངོ་༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདི་སྐལ་ལྡན་སློབ་བུ་ཡེ་ཤེས་འོད་ཟེར་གྱིས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བ་ཨོ་རྒྱན་རང་ཤར་ལ་གཏད་རྒྱའོ། །དགེའོ། །དགེའོ། །སརྦ་མངྒ་ལཾ།།