DJYD-KABUM-13-PA-004

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 13, Text 4, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །ཟབ་གསང་མཁའ་འགྲོའི་སྙིང་ཐིག་གི་འཕོ་བའི་གདམས་པ་མ་

བསྒོམས་སངས་རྒྱས་ཀྱི་ཁྲིད་ཡིག་བདེ་བ་ཅན་དུ་བགྲོད་པའི་ ཤིང་རྟ་ཞེས་བྱ་བ་བཞུགས་སོ། །

(1བ)ཁྱབ་བདག་བླ་མ་མགོན་པོ་འོད་དཔག་ཏུ་མེད་པའི་ངོ་བོར་བཞུགས་པ་ལ་ཕྱག་འཚལ་ལོ། །འདྲེན་པ་གཟི་བརྗིད་མཐའ་ཡས་བདེ་ལྡན་མགོན། །རྒྱལ་བ་རྒྱ་མཚོའི་རིགས་བདག་དེར་བཏུད་ནས། །མ་བསྒོམས་སངས་རྒྱས་མྱུར་ལམ་འཕོ་བའི་ཁྲིད། །ཐར་འདོད་སྐལ་བཟང་ངལ་གསོའི་སྐྱེས་སུ་སྦྱིན། །དེའང་གསང་ཆེན་རྡོ་རྗེ་ཐེག་པའི་རྒྱུད་དང་མན་ངག་ཀུན་གྱི་མཐར་ཐུག་དངོས་གཞིའི་ཉམས་ལེན་གྱི་ཆ་ལག་མ་བསྒོམས་པར་འཚང་རྒྱ་བར་བྱེད་པའི་གདམས་པ་ཟབ་མོ། སྙིགས་དུས་ཀྱི་སེམས་ཅན་ཚེ་ཐུང་ལ་ཉོན་མོངས་པ་རགས་པས་བསྐྱེད་རྫོགས་ཀྱི་གདམས་པ་ཐོབ་(2ན)ཀྱང་རྣམ་པར་གཡེང་བའི་དབང་དུ་གྱུར་ཏེ་ཉམས་ལེན་འཕྲོ་ཅན་གྱུར་པ་དང་། སྡིག་པོ་ཆེ་མཚམས་མེད་པ་ལྔ་ལ་སྤྱོད་པའི་གང་ཟག་ཞིག་ཡིན་ཀྱང་། ལམ་འདི་དང་འཕྲད་ན་བཙན་ཐབས་སུ་གྲོལ་བར་འགྱུར་ཏེ། ཕུར་པའི་བཤད་རྒྱུད་ལས། འཆི་བ་ཞེས་ནི་རྣམ་རྟོག་སྟེ། མཁའ་སྤྱོད་གནས་སུ་འཁྲིད་པར་བྱེད། །ཅེས་དང་། རྡོ་རྗེ་གདན་བཞིའི་རྒྱུད་ལས། ཉེས་པ་ཀུན་གྱིས་གོས་པ་ནི། །འཕོ་བའི་སྦྱོར་བ་བྱས་པས་གྲོལ། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་སྒྲོལ། །ཅེས་དང་། དམ་པས། འཆི་བ་འཆི་བ་མ་ཡིན་ཏེ། །རྣལ་(2བ)འབྱོར་སངས་ཆུང་རྒྱ་བ་ཡིན། །ཞེས་སོ། །དེས་ན་དེ་ལྟ་བུའི་གདམས་པ་ལ་གཉིས་ཏེ། ཉམས་ལེན་སྦྱོང་བ་དང་། ལས་ལ་སྦྱར་བའོ། ། སྔ་མ་ལ་ཡང་། སྔོན་འགྲོ། དངོས་གཞི། རྗེས་གསུམ་གྱི། དང་པོ་སྔོན་འགྲོ་ནི། དབེན་པའི་གནས་སུ་རྣམ་པར་གཡེང་བ་ཐམས་ཅད་སྤངས་ནས་བདེ་ཞིང་རྒྱབ་ཅུང་ཟད་མཐོ་བ་ལ་ལུས་རྣམ་སྣང་གི་ཆོས་བདུན་དང་ལྡན་པས་ལེགས་པར་འཁོད་ནས། སྐྱབས་སུ་འགྲོ་བ་དང་བྱང་ཆུབ་ཀྱི་སེམས་རྣམ་པ་གཉིས་བསྒོམ་ཞིང་། བསགས་སྦྱོང་གི་ལས་དང་བླ་མའི་རྣལ་འབྱོར་ལ་བརྟེན་ནས་ཟབ་ལམ་འཕོ་བའི་གདམས་པ་མྱུར་དུ་འབྱོངས་པར་གསོལ་བ་གདབ་བོ། ། གཉིས་པ་དངོས་གཞི་ནི། འདི་ལྟར་དམིགས་འདོན་ཟུང་དུ་འཇུག་པས། ཨོཾ་སྭ་བྷྰ་ཝ་ཤུདྡྷཿསརྦ་དྷ་རྨྰཿསྭ་བྷྰ་ཝ་ཤུདྡྷོ་྅ཧཾཿ ཞེས་བརྗོད་པ་ཙམ་གྱིས་འཁོར་འདས་ཀྱི་བསྡུས་པའི་ཆོས་ཐམས་ཅད་རྣམ་པར་དག་པའི་སྟོང་པ་ཆེན་པོའི་བདག་ཉིད་ངའོ་སྙམ་དུ་མཉམ་པར་བཞག །སྟོང་པའི་ངང་ལས་གནས་ཡུལ་འོག་མིན་པདྨོ་བདེ་བ་ཅན་གྱི་ཞིང་ཁམས་ཆེན་པོར་ཡོངས་སུ་དག་པའི་དབུས་སུ་སྣ་ཚོགས་པདྨ་འདབ་བརྒྱད་དགྱེས་པའི་ཟེའུ་འབྲུར་ཟླ་བའི་དཀྱིལ་འཁོར་གྱི་སྟེང་དུ་རང་གི་གཞི་ལུས་(3ན)འདི་ཉིད་ཆུ་ལས་ཉ་ལྡང་བའི་ཚུལ་དུ་རྗེ་བཙུན་རྡོ་རྗེ་འབྱོར་མའི་སྐུར་གྱུར་པ་ནི། སྐུ་མདོག་པདྨ་རཱ་གའི་ལྷུན་པོ་ལ་ཉི་མའི་འོད་ཀྱིས་འཁྱུད་པ་ལྟ་བུའི་གཟི་བརྗིད་ཅན། ཕྱག་གཡས་ཟངས་ཀྱི་གྲི་གུག་རྡོ་རྗེ་རྩེ་ལྔའི་ཡུ་བ་ཅན་ནམ་མཁར་འཕྱར་ཞིང་། གཡོན་ཐོད་པ་བདུད་བཞིའི་ཁྲག་གིས་བཀང་བ་ཐུགས་ཀར་བསྣམས་པ། བཅུ་དྲུག་ལོན་པའི་ཉམས་ལྡན་ལང་ཚོ་གསར་པས་མཛེས་པའི་ནུ་འབུར་ཟུང་གིས་སྒེག་ཅིང་གསང་བའི་པདྨོ་རྒྱས་པ། ཤིན་ཏུ་ཆགས་ཤིང་འཛུམ་པ་ལས་ཀྱང་ཡིད་ཙམ་ཁྲོ་བའི་ཉམས་ཀྱི་མཆེ་བའི་མྱུ་གུ་བཞི་ཅུང་ཟད་གཙིགས་པ། སྤྱན་གསུམ་ཕྱོགས་བཅུར་གཡོ་བས་གདུག་པ་ཅན་རྣམས་བག་འཁུམ་པར་བྱེད་པ། དབུ་སྐྲ་ཕྱེད་བཅིངས་པའི་ལྷག་མ་རྒྱབ་ཏུ་སིལ་བུར་གྲོལ་བ། དབུ་ལ་ཐོད་སྐམ་རིན་པོ་ཆེའི་རྩེ་བྲན་ཅན་ལྔས་བརྒྱན་ཅིང་སྐུ་ལ་རུས་པའི་རྒྱན་དྲུག་གིས་མཛེས་པར་སྤྲས་པ། དྲི་མ་མེད་པའི་འོད་ཟེར་ཚད་མེད་པར་འཕྲོ་བའི་ཀློང་དུ་ཞབས་གཉིས་འདོར་སྟབས་སུ་བཞེངས་པ། སྣང་ལ་རང་བཞིན་མེད་པ་སྟོང་གསལ་འོད་ཀྱི་གུར་ཁང་དུ་གསལ་བའི་ལུས་དབུས་སུ་རྩ་དབུ་མ་བྱང་ཆུབ་ཀྱི་རྒྱུད་ལམ་ཕྱི་དཀར་ལ་ནང་དམར་བ་བར་བསྔོ་བ། སྦོམ་ཕྲ་མདའ་(3བ)སྨྱུག་འབྲིང་པོ་ཙམ། ཆུ་ཤིང་གི་སྡོང་པོ་ལྟར་དྲང་བ། པདྨའི་འདབ་མ་ལྟར་སྲབ་པ། རྒྱ་ཚོས་ཀྱི་ཁུ་བ་ལྟར་སྣུམ་པ། ཏིལ་ཞུན་གྱི་མར་མེ་ལྟར་གསལ་བ་སྟེ་མཚན་ཉིད་བཞི་དང་ལྡན་པ། ཡར་སྣ་སྤྱི་བོའི་ཚངས་པའི་བུ་གར་ཐལ་གྱིས་ཟུག་ཅིང་། མར་སྣ་ལྟེ་འོག་གཉེར་པོ་ཆེ་ལ་ཟུག །སྙིང་གའི་ཐད་དུ་སྨྱུག་ཚིག་ལྟ་བུར་འགགས་པའི་ནང་གི་སྟེང་དུ་རླུང་སེམས་རྣམ་པར་ཤེས་པའི་ངོ་བོ་འོད་ཀྱི་ཐིག་ལེ་ཁ་དོག་ལྔ་ལྡན་བྱ་མ་གསར་གྱི་སྒོ་ང་ཙམ་པ་གསལ་འཚེར་སྣུམ་ལ་འདྲིལ་བ་ཡང་ཞིང་གཡོ་བ་འཕུར་ལ་ཁད་པའི་རྣམ་པ་ཅན། དབུ་མའི་ཡར་སྣ་ཚངས་བུག་རྒྱ་མཐོང་ཁ་ཕྱེ་བ་ལྟ་བུའི་སྟེང་དུ། ངོ་བོ་དྲིན་ཅན་རྩ་བའི་བླ་མ་ཉིད་རྣམ་པ་སངས་རྒྱས་འོད་དཔག་ཏུ་མེད་པ་སྐུ་མདོག་པདྨ་རཱ་གའི་ལྷུན་པོ་ཉི་མ་འབུམ་གྱིས་འཁྱུད་པ་ལྟ་བུ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། སྐུ་ལ་ཆོས་གིས་རྣམ་གསུམ་ཀླུབས་ཤིང་། ཕྱག་གཉིས་ལྟེ་འོག་མཉམ་གཞག་གི་ཕྱག་རྒྱ་མཛད་པ། པདྨ་དང་ཟླ་བའི་གདན་ལ་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐུ་ལ་རྒྱལ་བའི་དཀྱིལ་འཁོར་ཐམས་ཅད་ཡོངས་སུ་རྫོགས་ཤིང་རྩ་བརྒྱུད་ཀྱི་བླ་མ་སྐྱབས་གནས་མ་ལུས་(4ན)པ་འདུས་པའི་བདག་ཉིད་ཅན་འདྲེན་པའི་དེད་དཔོན་ཆེན་པོར་མངོན་སུམ་བཞིན་དུ་བཞུགས་པར་མོས་ཤིང་། དེ་ཉིད་གཞུང་ཚིག་གིས་གསལ་འདེབས་པར་འདོད་ན། ཨེ་མ་ཧོཿ རང་སྣང་རྣམ་དག་དོན་གྱི་འོག་མིན་ཞིང་༔ རང་ལུས་རྣལ་འབྱོར་དམར་མོ་གྲི་ཐོད་ཅན༔ ཞི་འཛུམ་དོར་སྟབས་མཚན་དཔེའི་ལང་ཚོས་མཛེས༔ སྐུ་དབུས་དབུ་མ་མདའ་སྨྱུག་འབྲིང་པོ་ཙམ༔ སྙིང་གའི་གནས་ནས་སྤྱི་བོར་ཐ་ལེར་ཟུག༔ རིགས་ཀྱི་བདག་པོ་སངས་རྒྱས་འོད་དཔག་མེད༔ དམར་གསལ་མཉམ་གཞག་སྐྱིལ་ཀྲུང་པད་ཟླར་བཞུགས༔ ཞི་འཛུམ་མཚན་དཔེ་རབ་རྫོགས་སྤྲུལ་སྐུའི་ཆས༔ སྐུ་ལ་བཀོད་པ་རྒྱལ་བའི་དཀྱིལ་འཁོར་རྫོགས༔ སྙིང་དབུས་རིག་པ་དྭངས་མའི་ཐིག་ལེར་གསལ༔ དབུ་མའི་ལམ་ནས་སྐར་མདའ་རྒྱུག་པ་བཞིན༔ སངས་རྒྱས་འོད་དཔག་མེད་པའི་ཐུགས་ཀར་འཕོ༔ ཞེས་གསལ་བཏབ་ལ། མོས་གུས་ཀྱི་གདུང་བ་དྲག་པོ་ཁ་ཙམ་ཚིག་ཙམ་མ་ཡིན་པར་ཞེ་ཐག་པ་ནས་འདི་སྐད་དུ། ཆོས་སྐུ་ཀུན་བཟང་སྣང་བ་མཐའ་ཡས་ལ། །བཟོད་མེད་གདུང་ཤུགས་དྲག་པོས་གསོལ་བ་འདེབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །བདག་(4བ)ནི་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །དེ་བཞིན་དུ་འགྲེལ་ལ། ལོངས་སྐུ་གར་དབང་ཐུགས་རྗེ་ཆེན་པོ་ལ། །བཟོད་མེད༴ ཟབ་ལམ༴ བདག་ནི༴ བདེ་བ༴ སྤྲུལ་སྐུ་སློབ་དཔོན་པདྨ་འབྱུང་གནས་ལ། །བཟོད་མེད༴ ཟབ་ལམ༴ བདག་ནི༴ བདེ་བ༴ རྒྱལ་ཡུམ་ཌྰ་ཀི་ཡེ་ཤེས་མཚོ་རྒྱལ་ལ། །བཟོད་མེད༴ ཟབ་ལམ༴ བདག་ནི༴ བདེ་བ༴ གྲུབ་ཆེན་འབྲོག་བན་ཁྱེའུ་ཆུང་ལོ་ཙྰ་ལ། །བཟོད་མེད༴ ཟབ་ལམ༴ བདག་ནི༴ བདེ་བ༴ གཏེར་སྟོན་རིག་འཛིན་བདུད་འཇོམས་གླིང་པ་ལ། །བཟོད་མེད༴ ཟབ་ལམ༴ བདག་ནི༴ བདེ་བ༴ ཁྱབ་བདག་འགྱུར་མེད་ངེས་དོན་དབང་པོ་ལ། །བཟོད་མེད༴ ཟབ་ལམ༴ བདག་ནི༴ བདེ་བ༴ མཚུངས་མེད་དྲིན་ཆེན་རྩ་བརྒྱུད་བླ་མ་ལ། །བཟོད་མེད༴ ཟབ་ལམ༴ བདག་ནི༴ བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་ངག་འདོན་ཅུང་ཟད་རྒྱས་པར་སྤྲོས་པ་དང་། རྩ་གཞུང་ནི། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་འགྲོ་བའི་མགོན་པོ་པདྨ་འབྱུང༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ ཟབ་ལམ་༴ བདག་ནི༴ བདེ་བ༴ མཚུངས་མེད་དྲིན་ཆེན་རྩ་བརྒྱུད་བླ་མ་ལ། །བཟོད་མེད༴ ཟབ་ལམ༴ བདག་ནི༴ བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་ངག་འདོན་ཅུང་ཟད་རྒྱས་པར་སྤྲོས་པ་དང་། རྩ་གཞུང་ནི། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་འགྲོ་བའི་མགོན་པོ་པདྨ་འབྱུང༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ ཟབ་ལམ་(5ན)འཕོ་བ་འབྱོངས་པར་བྱིན་གྱིས་རློབས༔ ཞེས་གསོལ་འདེབས་རྒྱས་བསྡུས་གང་ནུས་མཐར། རྣམ་ཤེས་ཐིག་ལེ་དེ་ཉིད་དབུ་མའི་ནང་བརྒྱུད་སྐར་མདའ་འཕང་བ་ལྟར་སངས་རྒྱས་ཀྱི་ཐུགས་ཀར་འཕོས་པར་མོས་ཤིང་རླུང་དམིགས་སེམས་གསུམ་གྱེན་དུ་གཏད་ལ་ཕཊ་སྒྲ་བདུན་ནམ་ཉེར་གཅིག་སོགས་ཀྱིས་སྦར། འདིར་གཞན་ཡང་འཕོ་བ་འཇའ་ཚུགས་མ་དང་བསམ་པ་ལྷུན་འགྲུབ་མའི་འཕོ་བའི་གསོལ་འདེབས་སོགས་སྦྱར་བར་འདོད་ཀྱང་རུང་སྟེ་གདམས་པའི་ཆུ་བོ་གཅིག་ཏུ་འདྲེས་པ་ཡིན་ནོ། །དེ་ལྟར་ཡང་ཡང་སྦྱངས་པས་འབྱོངས་པའི་རྟགས་སུ་རབ་དྲན་མེད་དུ་འགྲོ་བ་དང་། འབྲིང་སྤྱི་བོ་ཟ་ཞིང་འབུར་བ་དང་། ཤུ་རྡོག་འབྱུང་བ་དང་། ཆུ་སེར་འཛག་པ་དང་། རླུང་གྱེན་དུ་བརྩེག་ཅིང་ནང་དུ་གནོན་དཀའ་བ་དང་། ཤེས་པ་གནད་དུ་མི་ཕེབས་པར་ཡེད་ཡེད་པ་སོགས་བྱུང་ན་འཇག་མ་འཛུགས་པ་སོགས་ཀྱིས་ཚད་ལ་འབེབས་པར་བྱ་ཞིང་། རྟགས་མངོན་སུམ་མ་བྱུང་གི་བར་དུ་བསྐྱར་ལ་འབད་པར་བྱའོ། ། གསུམ་པ་རྗེས་ནི། ཐུན་མཚམས་སུ་ཊ་ཞེས་པའི་སྒྲས་རླུང་དམིགས་སེམས་གསུམ་སྙིང་གར་ཕབ། དེ་མ་ཐག་སྤྱི་བོའི་རིགས་བདག་སྣང་མཐའ་འོད་དམར་པོའི་རྣམ་པར་མེར་གྱིས་ཞུ་(5བ)ནས་དབུ་མའི་ལམ་བརྒྱུད་སྙིང་དབུས་སུ་ཐིམ་པས་འཆི་མེད་ཚེ་ཡི་རིག་འཛིན་བརྙེས། ཚངས་བུག་གསེར་གྱི་རྡོ་རྗེ་རྒྱ་གྲམ་གྱིས་བཀག་པར་བསམ་ཞིང་ཚེ་བསྙེན་གང་འགྲུབ་བཟླས་མཐར། འཁོར་གསུམ་ཡོངས་སུ་དག་པའི་བསྔོ་བས་རྒྱས་གདབ་ཅིང་གནས་ལུགས་མ་བཅོས་པའི་ངང་དུ་མཉམ་པར་བཞག །རྟགས་ཐོན་ནས་མ་ཤིའི་བར་དུ་ཉིན་མཚན་གུང་གི་ཐུན་ལ་དམིགས་པ་མ་བརྗེད་ཙམ་དང་གསོལ་འདེབས་མ་ཆག་ཙམ་མ་གཏོགས་འབད་པ་ཆེར་བྱས་ན་དུས་མ་ཡིན་པར་ཚེའི་དུས་བྱེད་པར་འགྱུར་ཉེན་ཆེ་བས་མི་བྱ། ཚེ་སྒྲུབ་ལ་འབད་ཅིང་སྨོན་ལམ་གྱི་རིམ་པ་ལ་བརྩོན་པར་བྱའོ། ། གལ་ཏེ་སྦྱང་དུས་དྲན་མེད་དུ་བརྒྱལ་བ་སོགས་བྱུང་ན། རྐང་མཐིལ་བརྡུང་བ་དང་། དྲོད་བདུགས་ཀྱིས་གསོ་བ་སོགས་བྱ་ཞིང་། དམིགས་པ་རྐང་པ་གཉིས་མཉམ་པར་གཤིབས་ཏེ་ལངས་པའི་མཐིལ་དུ་གསེར་གྱི་རི་རབ་ལྕི་ཞིང་འཐས་པ་རེས་མཐུར་དུ་འཐེན་པར་བསམ་ལ་གོམ་པས་བཅག་པ་དང་རྐང་མཐིལ་ལ་ཤེས་པ་དྲིལ་བས་སེལ་བར་ངེས་སོ། ། གཉིས་པ་ལས་ལ་སྦྱར་བ་ལ་གཉིས། གཞན་ཕན་འགྲོ་དོན་གྱི་ཚུལ་དང་། རང་ཉིད་འཕོ་བའི་ཚུལ་ལོ། །དང་པོ་ནི། འགྲོ་བ་གང་ཡང་རུང་བ་ལས་ཀྱི་མཐའ་ཟད་(6ན)ཤི་བར་གྱུར་པ་ན། དྲོད་མཐའ་ནས་དབུས་སུ་འདྲིལ་ཞིང་སྙིང་གའི་དྲོད་སྟོད་དུ་འཕྱུར་བ། ཡན་ལག་བཞིའི་འཕར་རྩ་འཕྲོ་ཆད་ཅིང་། རྦ་རླབས་གཉིས་ཀྱང་ཅུང་ཟད་རེ་ཙམ་ལས་ཆེར་འཕར་དུ་མི་བཏུབ་ལ། ཕྱི་དབུགས་ཆད་ནས་ཅུང་ཟད་སོང་བའི་ནང་དབུགས་ཀྱང་ཆད་མ་ཐག་པའི་མོད་དེ་ཉིད་ལ་ཕུང་པོ་བསྒུལ་བསྐྱོད་དང་འཕུར་བསུབ་མ་བྱས་པའི་སྐབས་དེར། ཚེ་འདས་དེའི་རྣ་བར་མཆུ་གཏད་དེ་སྐད་ཆེན་པོས་མིང་ནས་བོས་ལ། ཁྱོད་ཤི་བ་ཡིན་ནོ། །ཞེས་ལན་གསུམ་བརྡ་སྤྲད་དེ། ཁྱོད་ཚོ་འདིའི་སྣང་བ་ནི་ནུབ། ཕྱི་མའི་སྣང་བ་ནི་མ་ཤར། ད་ལྟ་བར་དོ་ཆོས་ཉིད་ཀྱི་ངང་དུ་གནས་པ་ལགས་པས་ངོ་ཤེས་པར་གྱིས་ཤིག །དེ་ཡང་ཁྱོད་འཆི་བའི་ཚེ་གཟུགས་ཀྱི་ཕུང་པོ་ཐིམ་པས་ཉམ་ཆུང་ཞིང་ནུས་པ་ཟད། མེ་ལོང་ལྟ་བུའི་ཡེ་ཤེས་ཐིམ་པས་སེམས་མི་གསལ་ཞིང་རབ་རིབ་ཏུ་འགྱུར། ས་ཁམས་ཐིམ་པས་ལུས་སྐམ་ཞིང་རེངས། མིག་དབང་ཐིམ་པས་མིག་མི་གསལ་ཞིང་བཞིན་འགྱུར། གཟུགས་ཁམས་ཐིམ་པས་ལུས་ཀྱི་མདངས་ཉམས། ཚོར་བའི་ཕུང་པོ་ཐིམ་པས་ལུས་ཀྱི་ཚོར་བ་ཆུང་། མཉམ་ཉིད་ཡེ་ཤེས་ཐིམ་པས་ཚོར་བ་གསུམ་མི་དྲན། ཆུ་ཁམས་ཐིམ་པས་ལུས་ཀྱི་(6བ)རྡུལ་ཁ་ཆུ་ལ་སོགས་པ་སྐམ། རྣ་བའི་དབང་པོ་ཐིམ་པས་ཕྱི་ནང་གི་སྒྲ་མི་གསལ། སྒྲ་ཐིམ་པས་རང་གི་ལུས་ཀྱི་སྒྲ་མི་ཐོས། འདུ་ཤེས་ཀྱི་ཕུང་པོ་ཐིམ་པས་སེམས་ཅན་རྣམས་མི་དྲན། སོར་རྟོག་ཡེ་ཤེས་ཐིམ་པས་ཉེ་དུ་ལ་སོགས་མི་དྲན། མེ་ཁམས་ཐིམ་པས་ཟས་མི་འཇུ། སྣ་ཡི་དབང་པོ་ཐིམ་པས་སྟེང་རླུང་དལ་གྱིས་འགྲོ། དྲི་ཐིམ་པས་རང་གི་དྲི་མི་བྲོ། འདུ་བྱེད་ཀྱི་ཕུང་པོ་ཐིམ་པས་རང་གི་བྱ་བ་ཐམས་ཅད་འཇུག་པར་མི་འགྱུར། བྱ་གྲུབ་ཡེ་ཤེས་ཐིམ་པས་བྱ་བ་དང་དགོས་པ་མི་དྲན། རླུང་ཐིམ་པས་རླུང་གི་གནས་ནས་འཕོ། ལྕེ་དབང་ཐིམ་པས་ཐུང་ཞིང་སྦོམ་པར་འགྱུར། རོ་ཐིམ་པས་རོ་དྲུག་ཉམས་སུ་མི་མྱོང་། དེ་དག་ནི་རགས་པ་ཉི་ཤུ་ཐིམ་ཚུལ་ལོ། ། དེ་ནས་ཕྲ་བ་ནང་གི་འབྱུང་བ་བཞི་ཐིམ་ཚུལ་ནི། ས་ཆུ་ལ་ཐིམ་པས་ཕྱི་རྟགས་ལུས་བསྒུལ་བསྐྱོད་མི་ནུས་ཤིང་ཟུངས་མི་ཐུབ། ལུས་ས་ལ་བྱིང་བ་སྙམ་བྱེད་པ་འཐེན་ཟེར་བ་སོགས་འབྱུང་། ནང་རྟགས་ཤེས་པ་དུ་བ་ལྟ་བུ་བན་བུན་ལང་ལོང་འཆར། ཆུ་མེ་ལ་ཐིམ་པས་ཕྱི་རྟགས་ཁ་ཆུ་དང་སྣ་ཆུ་ལ་སོགས་སྐམ། ནང་རྟགས་ཤེས་པ་སྨིག་རྒྱུ་ལྟ་བུ་གཡོ་ཞིང་མི་བརྟན་པ་འབྱུང་། ཆུ་མེ་ལ་ཐིམ་པས་ལུས་ཀྱི་དྲོད་ཆུང་དུ་འགྲོ་ཞིང་མཐའ་ནས་(7ན)སྡུད། ནང་རྟགས་སྲིན་བུ་མེ་ཁྱེར་ལྟ་བུ་གསལ་ལམ་པ་འབྱུང་། རླུང་རྣམ་པར་ཤེས་པ་ལ་ཐིམ་པས་ཕྱི་རྟགས་དབུགས་རིང་རྒྱུ་ཞིང་ནང་དུ་སྡུད་མི་ཐུབ། ཅུང་ཟད་རེ་སྡུད་ཀྱང་ཐུང་ལ་རྩུབ་པར་སྡུད། ནང་རྟགས་མར་མེ་རླུང་གིས་མ་བསྐྱོད་པ་ལྟ་བུའི་གསལ་ལམ་པ་འབྱུང་། དེ་དག་ནི་ཕྲ་བ་འབྱུང་བཞི་ཐིམ་ཚུལ་ལོ། ། དེ་ནས་དེའི་མོད་ལ་སྣང་མཆེད་ཐོབ་གསུམ་ཐོབ་ཚུལ་ནི། རྣམ་པར་ཤེས་པ་སྣང་བ་ལ་ཐིམ་པས་སྤྲིན་མེད་པའི་ནམ་མཁའ་ལ་ཟླ་འོད་ཤར་བ་ལྟ་བུའི་སྣང་བ་དཀར་ལམ་པ་འབྱུང་། ཞེ་སྡང་ལས་གྱུར་པའི་ཀུན་རྟོག་སོ་གསུམ་འགགས། སྣང་བ་མཆེད་པ་ལ་ཐིམ་པས་ནམ་མཁའ་ལ་ཉི་མ་ཤར་བ་ལྟ་བུའི་སྣང་བ་དམར་ལམ་པ་འབྱུང་། འདོད་ཆགས་ལས་གྱུར་པའི་ཀུན་རྟོག་བཞི་བཅུ་འགགས། མཆེད་པ་ཉེར་ཐོབ་ལ་ཐིམ་པས་ནམ་མཁའ་དག་པ་ལ་མུན་མཚམས་ཀྱི་སྨག་གིས་ཁྱབ་པ་ལྟ་བུའི་སྣང་བ་ནག་ལམ་པ་འབྱུང་ཞིང་དྲན་པ་ཉམས་ཏེ་ནག་ཐོམ་གྱིས་དྲན་མེད་དུ་འགྲོ། གཏི་མུག་ལས་གྱུར་པའི་ཀུན་རྟོག་བདུན་འགགས། དེ་ནས་དྲན་མེད་སངས་པ་ན་ཟླ་འོད་དང་ཉི་འོད་དང་མུན་པའི་སྨག་སྟེ་ནམ་མཁའ་བསླད་བྱེད་ཀྱི་རྐྱེན་དང་བྲལ་བའི་ཐོ་རེངས་དུས་ཀྱི་(7བ)ནམ་མཁའ་གཡའ་དག་པ་ལྟ་བུ་ཞིག་འཆར་ཏེ་དེ་ནི་འཆི་བའི་འོད་གསལ་དངོས་གཞི་ཡིན་པས་ངོས་ཟིན་པར་གྱིས་ལ་དེའི་ངང་དུ་མཉམ་པར་ཞོག་ཅིག །ཅེས་ངོ་སྤྲོད་ལ། ཆོས་པ་ཉམས་མྱོང་ཅན་ཐུགས་དམ་ལ་བཞུགས་པའི་རིགས་ཡིན་ན་སྐབས་འདིར་ཁོ་རང་གི་ཉམས་ལེན་དང་མཚམས་པའི་ངོ་སྤྲོད་བྱས་ལ་བཞག །སོ་སོ་སྐྱེ་བོ་ཕལ་པ་ཡིན་ན། སྐབས་འདིར་བར་དོ་དངོས་མིན་པས་ལས་ཀྱིས་ཁ་བསྒྱུར་དུ་མི་བཏུབ་ཅིང་ཕྱི་མའི་སྣང་བ་མི་འཆར། ཚེ་འདིའི་སྣང་བ་ནུབ་པའི་སྐབས་ཡིན་པས་འཕོ་བ་ཐེབས་སླ་ཞིང་། དུས་འདི་ལས་འགྱང་ན་བར་དོ་གཉིས་པ་ཕན་ཆད་ནས་ལས་ཀྱིས་བསྒྱུར་དུ་བཏུབ་ཅིང་རིམ་གྱིས་ཕྱི་མའི་སྣང་བ་འཆར་བས་འཕོ་བ་ཐེབས་བུལ་ཆུང་དུ་འགྲོ་བ་ཡིན་པས་སྐབས་འདིར་འཕོ་བ་གདབ་པ་ཤིན་ཏུ་གལ་ཆེའོ། ། དེ་ལ་གདབ་པའི་ཐབས་ནི། དེ་ལྟར་ཁྱོད་ཀྱིས་ཐིམ་རིམ་ངོ་མ་ཤེས་ཤིང་འོད་གསལ་གྱི་ངང་ལ་མཉམ་པར་འཇོག་མི་ཐུབ་པར་འདུག་ན་ཁྱོད་རང་སེམས་གཞན་དུ་མ་ཡེངས་པར་དམིགས་པ་འདི་བཞིན་རྩེ་གཅིག་ཏུ་སྒོམས་ཤིག །ཨོཾ་སྭ་བྷྰ་ཝ་སོགས་སྔར་སྦྱངས་པའི་དུས་ལྟར་དང་། མཇུག་ཏུ། ཕཊ་ཀྱི་བརྡ་སྦྱར་བའི་དུས་ཁྱོད་རང་གི་རྣམ་པར་ཤེས་པའི་ངོ་བོ་ཐིག་ལེ་དེ་ཉིད་ལུས་ལ་ཕྱི་མིག་མ་(8ན)བལྟས་པར་སངས་རྒྱས་འོད་དཔག་མེད་ཀྱི་ཐུགས་ཀར་འཕོས་ཤིག །ཅེས་ཐིམ་རིམ་དང་དམིགས་པ་རྣམས་ཚིག་ཟུར་མ་ཉམས་ཤིང་གསལ་གདངས་ཐོན་པར་དལ་བུས་ངོ་སྤྲད་ལ། གསོལ་འདེབས་ཀྱི་ཚེ་བདག་ནི་ཅེས་པའི་མལ་དུ་ཚེ་འདས་འདི་ནི་ཞེས་འདོན་པ་བསྒྱུར། དམིགས་ཡུལ་ལ་བཟོད་དུ་མེད་པའི་སྙིང་རྗེ་ཆེན་པོས་དྲངས་པའི་སེམས་རྩེ་གཅིག་ཏུ་གཏད་ནས་འཕོ་བ་བཏབ་པས། རང་ཉིད་གྲོགས་བཅས་མགོ་ན་བ་དང་། དམིགས་ཡུལ་གྱི་ཐོད་པ་གོགས་པ་དང་འབུར་བ་ཚེག་སྒྲ་འབྱིན་པ་དང་། ཁྲག་དང་ཆུ་སེར་འབབས་པ་སོགས་རྟགས་དངོས་སུ་འོང་བས་མ་བྱུང་གི་བར་དུ་བསྐྱར་ལ་གདབ། རྟགས་ཐོན་ནས་བསྔོ་བ་དང་སྨོན་ལམ་གྱིས་མཚམས་སྦྱར་བར་བྱའོ། །

གཉིས་པ་རང་དོན་དུ་ལས་ལ་སྦྱར་བའི་ཚུལ་ནི། རང་ཉིད་འཆི་བའི་རྟགས་ཚང་ཞིང་དེ་ཉིད་ཀྱང་འཆི་བསླུའི་ཆོ་ག་སོགས་ཀྱིས་མ་བཟློག་པར་ངེས་པར་འཆི་བ་ལ་ཉེ་བའི་ཚེ་འཕོ་བར་བྱ་ཞིང་། འཆི་ལྟས་ཀྱི་ངེས་པ་བརྟན་པོ་མ་མཐོང་བར་བབ་ཅོལ་དུ་འཕོ་ན་རང་ཉིད་ཀྱི་ལྷ་རྣམས་བསད་པའི་ཉེས་པ་སོགས་ཀྱིས་དམྱལ་བར་སྐྱེ་བར་གསུངས་པས་དུས་མིན་དུ་འཕོ་མི་རུང་ངོ་། །དེ་ལ་ལྟས་བརྟགས་པའི་ཚུལ་(8བ)ནི་གཞན་ལས་འབྱུང་བ་ལྟར་ཤེས་པར་བྱ་ཞིང་། འཆི་ལྟས་བྱུང་ན་འཆི་བ་བསླུ་བའི་ཐབས་སྣ་ཚོགས་བྱ། དེས་ཀྱང་མ་བཟློག་པར་ངེས་པར་འཆི་བའི་མཚན་མ་བརྟན་པོ་མཐོང་ན་རང་གི་ནོར་རྫས་རྣམས་བསོད་ནམས་གསོག་པའི་ཕྱོགས་སུ་བཏང་། འཁོར་དང་ལོངས་སྤྱོད་ལ་ཆགས་ཞེན་སྤང་། དམ་ཚིག་ཉམས་ཆག་བྱུང་བ་ལ་བཤགས་སྡོམ་དྲག་པོ་བྱ། ཡི་དམ་གྱི་བྲིས་སྐུ་སོགས་མདུན་དུ་བཀྲམ་ལ་ལྷའི་རྣལ་འབྱོར་ཅི་རིགས་བསྒོམ། ཡི་དམ་དང་བཀའ་སྲུང་ལ་གཏོར་མ་ཕུལ་ཏེ་འཆི་བ་ལམ་དུ་ལོངས་པར་གསོལ་བ་དྲག་ཏུ་གདབ། ཆགས་སྡང་སོགས་དུག་ལྔའི་རྟོག་པ་མཚམས་སྦྱོར་ངན་པ་ཐམས་ཅད་སྤངས་ལ་སྨོན་ལམ་བཟང་པོ་བཏབ། འོག་མིན་ནམ་གསང་སྔགས་སྤྱོད་པའི་རིག་འཛིན་གྱི་ཞིང་ཁམས་ཡིད་ལ་བྱ་ཞིང་། དེར་འཕོ་བའི་འཕེན་པ་དྲག་པོ་ཡང་བྱ། དེ་ནས་འཆི་བ་ལ་ཤིན་ཏུ་ཉེ་བའི་རྟགས་ཤར་བ་ན་ལས་སྦྱོར་དངོས་ནི། ལུས་གནད་སོགས་སྔར་སྦྱོང་བའི་སྐབས་ལྟར་བྱ་ཞིང་། གལ་ཏེ་ནད་ཀྱིས་མནར་བ་སོགས་ལུས་གནད་སྔར་ལྟར་འདུག་པར་དཀའ་ན་གྲོགས་ཀྱིས་སྐྱོར་བའམ། ཡང་ན་སེང་གེའི་ཉལ་སྟབས་བྱ་སྟེ། མགོ་བྱང་དུ་བསྟན། གློ་གཡས་ས་ལ་ཕབ། (9ན)ལག་གཡས་འགྲམ་པ་གཡས་ལ་སྦྱར། ལག་གཡོན་བརླ་གཡོན་པའི་སྟེང་དུ་སྦུབས་ལ་བརྐྱང་། རྐང་པ་གཡས་འོག་དང་གཡོན་སྟེང་དུ་བཞག་པའི་ལོང་བུ་བརྩེགས་ཏེ་བརྐྱང་། བག་ཙམ་བསྐུམ་ལ་འཕོས་ཀྱང་ངེས་པར་རུང་ལ། དམིགས་པ་སྔར་ལྟར་ལས་རང་གི་ཚངས་བུག་རྒྱ་མཐོང་ཁ་ཕྱེ་བ་ལྟར་སྐྱ་སེང་ངེ་ཡོད་པ་རིགས་བདག་གི་འོག་སྒོ་དང་ཁ་སྦྱར་བར་བསྒོམ་ལ་རྣམ་པར་ཤེས་པའི་ངོ་བོ་ཐིག་ལེ་དེ་ཉིད་དབུ་མའི་ནང་བརྒྱུད་ནས་སངས་རྒྱས་འོད་དཔག་མེད་ཀྱི་ཐུགས་ཀར་འཕོ་བར་དམིགས་པས་སྐྲ་གྱེན་དུ་ཐེན་ལ་ཕཊ་དྲག་པོ་ཉེར་གཅིག་གིས་ཚངས་བུག་ནས་སྐར་མདའ་འཕངས་པ་ལྟར་སངས་རྒྱས་ཀྱི་ཐུགས་ཀར་འཕོས་པའི་སྦྱོར་བ་བྱས་པས། འཕོ་ནུས་པའི་རྟགས་སུ་ཤེས་པ་ནག་ཐུམ་བྱེད་ཅིང་དབུགས་ནང་དུ་མི་འདུས་པར་ཕྱིར་ནར་གྱིས་འགྲོ། སྤྱི་གཙུག་ན་བ་དང་གཡའ་བ་འབྱུང་། དེ་ལྟར་མ་བྱུང་ན་རེ་ཞིག་ཚུར་དྲངས་ལ་ངལ་གསོས་ཏེ། སླར་ཡང་དམིགས་པ་གསལ་བཏབ་ལ་ཧིག་དྲག་པོ་སོགས་ཀྱིས་འཕོ། རྟགས་བྱུང་ན་གོང་ལྟར་ཕཊ་ཉེར་གཅིག་གིས་འཕོ། དེས་མ་འཕོས་ན་ཉེར་གཉིས་ནས་ཉེར་ལྔའི་བར་བརྗོད་པས་ངེས་པར་(9བ)འཕོ་སྟེ། མཐར་མགོན་པོ་འོད་དཔག་མེད་ཀྱང་རང་ཉིད་གང་འདོད་པའི་ཞིང་དེའི་སངས་རྒྱས་ཀྱི་ཐུགས་ཀར་ཐིམ་པར་བསམ་པའམ། ཡང་ན་འོད་གསལ་རྫོགས་པ་ཆེན་པོའི་ངང་དུ་བསྡུ། ཡང་རང་ཉིད་ནད་དྲག་པོས་མནར་བ་སོགས་ཀྱིས་ཕཊ་སྒྲ་འབྱིན་པར་མི་ནུས་ན། རང་གིས་དམིགས་པ་དང་རླུང་དམིགས་སེམས་གསུམ་གྱེན་ཏུ་གཏད་ལ་འཕོ་བའི་འདུན་པ་དྲག་ཏུ་བྱ། གྲོགས་ཀྱིས་ཕཊ་དྲག་པོ་ཉེར་ལྔ་འམ་ཧིཀ་དྲག་པོ་ཉེར་ལྔ་སོགས་ཀྱིས་བསྐུལ་ཡང་རུང་སྟེ། དུས་ངེས་མེད་དུ་འཕོ་བ་སྦྱོང་བའི་སྐབས་ལས་འཆི་ཁར་འཕོ་བ་ལྷག་པར་ཐེབས་སླ་བར་བཤད་པའི་ཕྱིར་རོ། །གཞན་དེ་ལྟར་མི་ཤེས་པའི་མིའམ་དུད་འགྲོ་རྣལ་འབྱོར་པས་དམིགས་པ་ཁོ་ན་མ་གཏོགས་པ་ཡུལ་དེ་ལ་བརྡ་མ་སྤྲད་ཀྱང་ཐེབས་པ་མྱོང་བས་གྲུབ་ཅིང་། དེ་ཙམ་མི་ནུས་པ་ལ་ཡང་ཤི་བའི་ཚེ་སྤྱི་གཙུག་ལ་རེག་ཅིང་། སངས་རྒྱས་སྨན་པའི་རྒྱལ་པོ་དང་དེ་བཞིན་གཤེགས་པ་རིན་ཆེན་གཙུག་ཏོར་ཅན་གྱི་མཚན་ནས་བརྗོད་པ་ཙམ་གྱིས་ཀྱང་རྒྱལ་བའི་སྲས་པོ་བརྒྱད་ཀྱིས་བདེ་བ་ཅན་དུ་ཁྲིད་པར་གསུངས་ལ། མིན་ཀྱང་སུམ་ཅུ་རྩ་གསུམ་པའི་ལྷའམ་བདེ་འགྲོ་གཞན་དུ་ངེས་པར་སྐྱེ་བར་གསུངས་སོ། །(10ན)མྱུར་ལམ་སྙིང་པོ་མ་བསྒོམ་སངས་རྒྱས་ཆོས། །འཕོ་བའི་ཉམས་ལེན་ཤིན་ཏུ་གསལ་བྱས་པ། །འདི་ལས་འགྲོ་ཀུན་འཆི་བ་ལམ་ལོངས་ཏེ། །རང་གྲོལ་བདེ་ཆེན་རྒྱལ་བའི་གནས་ཐོབ་ཤོག །ཅེས་པའང་འཕགས་ཡུལ་ཟ་ཧོར་མཚོ་པདྨ་ཅན་ཕྱོགས་ཀྱི་དགེ་སྦྱོང་རྣལ་འབྱོར་སྤྱོད་པ་བསྟན་འཛིན་ཆོས་འཕེལ་གྱིས་བསྐུལ་བའི་ངོར། གཏེར་གཞུང་རྩ་བའི་དགོངས་དོན་བླ་མའི་མན་ངག་གིས་གསལ་བར་བྱས་ཏེ་རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ལས་ཡི་གེ་པ་ནི་རྣལ་འབྱོར་པ་རིག་བཟང་རྡོ་རྗེས་བགྱིས་པ་སྟེ། འདིས་ཀྱང་འབྲེལ་ཚད་འཆི་བ་ལམ་དུ་ལོངས་པའི་རྒྱུར་གྱུར་ཅིག། །།