DJYD-KABUM-21-ZHA-012

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 21, Text 12, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

（271ན）གཞན་ཡང་རྗེ་བླ་མ་ཆོས་འབྱོར་རྒྱ་མཚོ་ལས། ཀློང་གསལ་གཏེར་ཆོས་ཕལ་ཆེར་གྱི་དབང་ལུང་། མགོན་པོ་ཚོགས་བདག་ཁམས་བྱོན་མའི་སྲོག་དབང་དང་། གཞུང་པོད་ཡོངས་རྫོགས་ཀྱི་ལུང་། མ་ཏི་རཏྣའི་སེང་གདོང་མའི་གཞུང་པོད་སོགས་ལུང་སྣེ་མང་། སྤོ་བོ་སྐུ་ཐང་བླ་མ་པདྨ་དབང་དྲག་ལས། ཆོས་རྗེ་གླིང་པའི་གཏེར་ཆོས་གཞུང་པོད་ཡོངས་རྫོགས་ཀྱི་ལུང་། ཀོང་ལོང་པོ་སློབ་དཔོན་གསང་སྔགས་བསྟན་འཛིན་ལས། འཇའ་ཛོན་ཧཱུྃ་ནག་སྙིང་ཐིག་གི་སྐོར། སླེའུ་ལུང་བཞད་པའི་རྡོ་རྗེའི་གསུང་འབུམ་ཕལ་ཆེར་དང་། གཡུང་མགོན་རྡོ་རྗེའི་རྣམ་ཐར། གཏད་ཧྲུལ་དང་འདུན་བཤིག་གི་མན་ངག་གབ་རྒྱ་ཅན། མན་ངག་སྙིང་གཟེར་ནག་པོའི་སྔགས་སྡེབས་སོགས་དྲག་སྔགས་སྐོར་མང་པོའི་ཁྲིད་ལུང་ལག་ལེན་བཅས། གླིང་ཚང་རྗེ་བཙུན་འཇམ་དབྱངས་ཚུལ་ཁྲིམས་དཔལ་མོ་ལས། འཆི་མེད་འཕགས་མའི་སྙིང་ཐིག་སོགས་རྗེ་མཁྱེན་བརྩེ་གོང་མའི་ཟབ་ཆོས་སྐོར་མང་པོའི་དབང་ལུང་། རྟོགས་ལྡན་ཡེ་ཤེས་དོན་ལྡན་ལས། ཀློང་ཆེན་སྙིང་ཐིག་གི་རྩ་རླུང་འཁྲུལ་འཁོར་སོགས་མན་ངག་སྙན་བརྒྱུད་ཁ་ཤས། རྟོགས་（271བ）ལྡན་ཨ་ཚང་རྡོ་རྗེ་ལས། ཆགས་མེད་རི་ཆོས་ཐེམ་ཅན་ཐེམ་མེད། གནམ་ཆོས་སྐོར་ཕལ་ཆེར་དང་། མདོས་ཆོག་སྐོར་མང་པོའི་ལུང་དང་ཕྱག་ལེན། ནང་ཆེན་གཏེར་སྟོན་དང་དགེ་བདུད་འདུལ་དྲག་སྔགས་གླིང་པ་ལས། ཉིད་ཀྱི་གཏེར་ཆོས་ཕུར་པ་བདུད་དཔུང་ཟིལ་གནོན་གྱི་དབང་ལུང་དང་། ལུང་བསྟན་སྐོར་མང་པོ་ཞིག་གི་ལུང་བཅས། གླིང་གཏེར་པདྨ་བཞད་པ་ལས། ཉིད་ཀྱི་དགོངས་གཏེར་ཚེ་ཡུམ་ཙཎྜ་ལིའི་དབང་ཁྲིད་ལུང་བཅས་ཡོངས་རྫོགས་དང་། མཁྱེན་བརྩེ་གོང་མའི་ཡང་གཏེར་སྐོར་མང་པོའི་དབང་ལུང་། མཁྱེན་བརྩེ་ཆོས་ཀྱི་བློ་གྲོས་ལས། རྗེ་གོང་མའི་དག་སྣང་ཁྲི་སྲོང་བླ་སྒྲུབ་ཀྱི་དབང་ལུང་དང་། ཡང་གཏེར་སྐོར་ཕལ་ཆེར་གྱི་དབང་བཀའ། མཁྱེན་སྤྲུལ་རབ་གསལ་ཟླ་བ་ལས། ཉིད་ཀྱི་དགོངས་གཏེར་ཚེ་སྒྲུབ་ཀྱི་ཟབ་དབང་བཀའ་ལུང་། རྭ་སྒྲེང་རི་ཁྲོད་པ་བླ་མ་ངག་དབང་བྱམས་པ་སྐལ་བཟང་ལས། བཀའ་གདམས་ཕ་ཆོས་བུ་ཆོས་ཡོངས་རྫོགས། ཇོ་བོ་རྗེའི་རྣམ་ཐར་དང་། བྱང་ཆུབ་ལམ་རིམ། བློ་སྦྱོང་སྐོར་སོགས་བཀའ་གདམས་དགེ་བའི་བཤེས་གཉེན་མང་པོའི་གསུང་སྒྲོས་ཞལ་གདམས་སྐོར་ཤིན་ཏུ་མང་པོའི་ལུང་དང་། བློ་སྦྱོང་（272ན）དོན་བདུན་མ་དང་། མཚོན་ཆ་འཁོར་ལོའི་ཁྲིད་བཀའ་བཅས། དགའ་ལྡན་ཁྲི་ཟུར་རིན་པོ་ཆེ་ལས་（འདིའི་མཚན་མ་ཤེས། རྒྱལ་དབང་བཅུ་གསུམ་པ་ལ་རྟག་པར་སྐུ་ཁྲུས་འབུལ་མཁན་དེ་ཡིན། ） སྒྲོལ་དཀར་ཚེ་དབང་། རྗེ་ཙོང་ཁ་པའི་ལམ་གྱི་གཙོ་བོ་རྣམ་གསུམ་གྱི་ཁྲིད་བཀའ་བཅས། ངོར་པ་བླ་མ་ཀུན་དགའ་རིན་ཆེན་ལས། སྤྱོད་འཇུག་ས་བཟང་འགྲེལ་པའི་བཤད་ཁྲིད། ས་སྐྱའི་ལེགས་བཤད་དང་། སྡོམ་གསུམ་རབ་དབྱེ་བཅས་ཀྱི་ལུང་། མཚུར་ཕུའི་སྒྲུབ་བླ་མཁན་ལེགས་བཤད་རྒྱ་མཚོ་ལས། ཀར་ལུགས་ཐུན་མིན་སྙན་བརྒྱུད་བདེ་མཆོག་དང་ཕག་མོ་གཉིས་ཀྱི་དབང་ཁྲིད་ལུང་བཅས་དང་། བཀའ་བརྒྱུད་མགུར་མཚོའི་ལུང་སོགས། རི་ཆེ་བླ་མ་རིན་ཆེན་ནོར་བུ་ལས། མར་མི་དྭགས་གསུམ་གྱི་རྣམ་ཐར། མི་ལའི་མགུར་འབུམ། དྭགས་པོའི་ཐར་རྒྱན། མ་གཅིག་གི་གཅོད་ཀྱི་རྣམ་བཤད། ཚ་བ་རིན་ཆེན་རྣམ་རྒྱལ་གྱི་གསུང་ལམ་རིམ་ཡེ་ཤེས་སྙིང་པོའི་འགྲེལ་པ་བཅས་ཀྱི་ལུང་། འབྲུག་གསང་གླིང་བླ་མ་མཁྱེན་རབ་ནོར་བུ་ལས། ཆོས་རྗེ་གཙང་པ་རྒྱ་རས་ཀྱི་བཀའ་འབུམ་ཐོར་བུ། ཀུན་མཁྱེན་པད་དཀར་གྱི་བཀའ་འབུམ་ཕལ་མོ་ཆེ། འབྲུག་པ་（272བ）ཀུན་ལེགས་ཀྱི་རྣམ་ཐར་སོགས་ཀྱི་ལུང་། གྲུབ་དབང་སངས་རྒྱས་ཐོགས་མེད་ཀྱི་དངོས་སློབ་རྟོགས་ལྡན་བསྟན་པ་རྒྱ་མཚོ་ལས། གྲུབ་དབང་སྙན་བརྒྱུད་སྙིང་ཐིག་རྩ་རླུང་ཟབ་ཁྲིད་བཀའ་རྒྱ་མ། འཇིགས་གླིང་བཀའ་འབུམ་པོད་དགུ་ཕལ་ཆེར་གྱི་ལུང་། ཀཿཐོག་སི་ཏུ་ཆོས་ཀྱི་རྒྱ་མཚོའི་སྐུ་མཆེད་སྤྲུལ་སྐུ་ཀུན་བཟང་ལས། སྡོམ་གསུམ་རྣམ་ངེས་ཀྱི་འགྲེལ་པ་དཔག་བསམ་སྙེ་མའི་སྟེང་ནས་བཤད་ཁྲིད་ཞིབ་རྒྱས། མི་ཕམ་གསུང་བཤེས་སྤྲིངས་འགྲེལ་པ་དང་། དཀོན་མཆོག་རྗེས་དྲན་གྱི་འགྲེལ་པའི་བཤད་ལུང་སོགས་སྣེ་མང་། བླ་མ་ཨོ་རྒྱན་རིག་འཛིན་ལས། ཞི་འཚོའི་དབུ་མ་རྒྱན་འགྲེལ་མི་ཕམ་གསུང་གི་སྟེང་ནས་བཤད་ལུང་ཞིབ་རྒྱས། རྡོར་འཇིན་བདེ་ཆེན་ཆོས་འཛིན་ལས། སློབ་དཔོན་བི་མ་ལས་མཛད་པའི་སྐྱབས་འགྲོ་ཡན་དྲུག་པའི་ཟིན་མ་ཊཱིཀ་ལོ་ཆེན་གསུང་གི་སྟེང་ནས་བཤད་ལུང་དང་། སློབ་དཔོན་ཆེན་པོའི་གསུང་ཕུར་པ་དང་མཚན་བརྗོད་ཀྱི་འགྲེལ་པ། གསང་སྔགས་ལམ་རིམ་ཆེན་མོ། སྔ་འགྱུར་བཀའ་མའི་སྐོར་ལས་སོ་དང་རོག་གི་ཡིག་ཆ་ཕལ་ཆེར་གྱི་ལུང་བཅས། བླ་སྨན་པ་དགེ་འདུན་རབ་རྒྱས་ལས། སྨན་གྱི་རྒྱུད་བཞི། （273ན）དེའི་འགྲེལ་པ་བཻཌཱུར་སྔོན་པོ། མན་ངག་ལྷན་ཐབས། དེའི་ལྡེ་མིག །ཆ་ལག་བཅོ་བརྒྱད། ཤེལ་གོང་ཕྲེང་སོགས་སྨན་དཔེ་མང་པོའི་བཤད་ལུང་དང་ལག་ཁྲིད། སྔགས་སྟོན་པདྨ་བསྟན་འཛིན་ལས། རྩིས་གཞུང་བཻཌཱུར་དཀར་པོ། ཉིན་བྱེད་སྣང་བ་བུ་ཡིག་བཅས། འབྱུང་རྩིས་ཟླ་བའི་འོད་ཟེར་སོགས་ལོ་ཆེན་དྷརྨ་ཤྲཱིའི་གསུང་རབ་རྩིས་ཀྱི་སྐོར་ཕལ་ཆེ་བའི་བཤད་ལུང་། བླ་མ་དཀོན་མཆོག་རབ་བརྟན་ལས། ལྷ་སྐུ་དང་། བདེ་གཤེགས་མཆོད་རྟེན་བརྒྱད། དཀྱིལ་འཁོར་ཁག་གི་ཐིག་ཚད་ཀྱི་རྣམ་བཞག་བཅས་རྩེ་ལེ་སོགས་ཡིག་ཆ་མང་པོའི་སྟེང་ནས་ལུང་དང་ལག་ཁྲིད་ཞིབ་པར་ནོས། གཞན་ཡང་ཆོས་འབྱུང་། རྒྱལ་རབས། སྨན་རྩིས་བཟོ་གསུམ་གྱི་ཟིན་ཏིག་རིགས། ཐ་ན་མོ་དཔེ་ཚུན་གྱི་ལུང་ཐོར་ཞུས་པའི་རྣམ་གྲངས་མང་ཡང་ཡིག་ཚོགས་ཀྱི་རྒྱུ་ལས་དགོས་པ་དེ་ཙམ་ཆེ་བར་མ་མཐོང་ནས་བཏང་སྙོམས་སུ་བཞག །ཇི་ལྟར་ཐོབ་པ་རྣམས་ཀྱི་བརྒྱུད་རིམ་རྣམ་གྲངས་ཡང་གསལ་བར་འགོད་འོས་ཀྱང་། ཞུ་ཡུལ་བླ་མ་བྱ་བཏང་གི་བརྟུལ་ཞུགས་འཛིན་པ་ཁ་ཅིག་（273བ）གསན་ཡིག་གི་ཐུགས་རྩོལ་མ་གནང་བས་གཞན་ལ་ལྟོས་དགོས་པ་མང་བས་ཡེངས་མ་ལམ་དུ་ལུས། ལུང་ཐོ་ཤོག་དྲིལ་མང་བ་ཞིག་ནི་རང་ཉིད་ཡུལ་ནས་ཡུལ་དུ་སྐྱས་འདེགས་འཕོ་བགྲོད་མང་བའི་ཞར་བ་བོར་ཟགས་སུ་སོང་ནས་དཔེ་མ་རྙེད། གྲུབ་མཐའ་གཞན་ཁག་གི་གསུང་རབ་རྣམས་ནི་རང་ཉིད་སྐལ་བ་བཟང་པོའི་བག་ཆགས་འཇོག་ཆེད་ཙམ་ལས་སོ་སོའི་བསྟན་པ་ཉིན་མོར་བརྡལ་བཞིན་པ་ལགས་ན་རྨོངས་པ་བདག་ལྟའི་ཁུར་དུ་མི་ཆེ་སྙམ་པའི་ངན་རྟོག་གིས་ནོངས་ཏེ། ཆོས་ཚན་གྱི་རྣམ་གྲངས་དང་། བརྒྱུད་པའི་གོ་རིམ་སོགས་ཕྱག་དཔེ་བཤུ་རྩོལ་མ་ནུས་པས་ད་ལྟ་འདིར་ཐོབ་ཡིག་དཀྱུས་སུ་བསྒྲིགས་པར་རྔོ་མ་ཐོགས་སོ།། །།