DJYD-KABUM-11-DA-007

Previous Text Back to Volume PageNext Text

Wylie title	phur pa bdud 'joms gnam lcags spu gri'i rdzogs rim rtsa rlung thig le'i man ngag gi lhan thabs lag khrid dpal chen dgyes pa'i zhal lung
Location	bdud 'joms rin po che bka' 'bum Volume 11, Text 7, Pages 279-343 (Folios 1a1 to 33a1)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Phur pa bdud 'joms gnam lcags spu gri'i rdzogs rim rtsa rlung thig le'i man ngag gi lhan thabs lag khrid dpal chen dgyes pa'i zhal lung. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 11: 279-343. Kalimpong: Dupjung Lama, 1979-1985.
Side notes	Recto: lag khrid   Verso: gnam lcags spu gri
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Contemplative Guide Books and Instructional Manuals - khrid yig  ·  Practical Instructions - lag len - len thabs  ·  Completion Stage - rdzogs rim
Cycle	དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲི་ (dpal rdo rje phur bu bdud 'joms gnam lcags spu gri)
Parent Cycle	ཐུགས་སྒྲུབ་གསང་བ་རྒྱ་ཅན་ (thugs sgrub gsang ba rgya can)
Deity	rdo rje phur pa
Colophon	།ཅེས་པའང་སྒོམ་དོན་ཞལ་ཤེས་སྙན་བརྒྱུད་ཀྱི་མན་ངག་དང་འཁྲུལ་འཁོར་ལག་ལེན་གྱི་གནད་མི་འཆུག་པར་བྱ་བའི་ཕྱིར་སྔར་བཀོད་པའི་ཁྲིད་ཡིག་གི་ཆ་ལག་ལྷན་ཐབས་ཀྱི་ཚུལ་དུ། ཆགས་ཆེན་ཕོ་ཉའི་བརྟུལ་ཞུགས་རང་དབང་དུ་རྩེན་པའི་ཀུན་ཏུ་རྒྱུ་འཇིགས་བྲལ་ཡེ་ཤེས་རྡོ་རྗེས་རང་ལོ་ལྔ་བཅུ་ང་བཞིའི་མཐར་ཐུག་པ་རབ་འབར་ཙཎྜ་ལཱིའི་ཁམས་ལྡན་མཁའ་ལྡིང་གི་ལོ་རྒྱལ་གྱི་ཉ་བའི་ཡར་ངོ་ཧཾ་ཡིག་ཟླ་ཞུན་བདུད་རྩིའི་གོང་བུ་གང་བ་རྒྱས་པའི་ལང་ཚོ་མཆོག་ཏུ་ངོམས་པ་ན། ས་ལ་སྤྱོད་པའི་ཞིང་ཁམས་འབྲས་མོ་གཤོངས་ཀྱི་བྱེ་བྲག་ཀ་པཱ་ལ་སྤུངས་པར་གྲགས་པའི་རི་སུལ་བཀྲ་ཤིས་དགའ་བ་འཁྱིལ་བའི་སྐྱེད་མོས་ཚལ་ཆེན་པོར་སྦྱར་བ་ལས། ཐོག་མའི་གླེགས་བམ་དུ་འབེབས་པ་པོ་ནི་ལྷོ་མོན་སྐྱིད་པའི་ལྗོངས་ཀྱི་སྔགས་བན་ཆོས་གྲགས་རྒྱ་མཚོས་བགྱིས་པའོ། །འདིས་ཀྱང་ཟབ་ལམ་གྱི་ཕྲིན་ལས་མི་ནུབ་བརྟག་ཅིང་ཁྱབ་སྟེ་སྐལ་ལྡན་རྣམས་ཟུང་འཇུག་དགའ་བཞིའི་ཡེ་ཤེས་མངོན་དུ་བྱེད་པའི་རྒྱུར་གྱུར་ཅིག །མ་ཧཱ་སུ་ཁ་སིདྡྷི་རསྟུ༎
	ces pa'ang sgom don zhal shes snyan brgyud kyi man ngag dang 'khrul 'khor lag len gyi gnad mi 'chug par bya ba'i phyir sngar bkod pa'i khrid yig gi cha lag lhan thabs kyi tshul du/___chags chen pho nya'i brtul zhugs rang dbang du rtsen pa'i kun tu rgyu 'jigs bral ye shes rdo rjes rang lo lnga bcu nga bzhi'i mthar thug pa rab 'bar tsaN+Da lI'i khams ldan mkha' lding gi lo rgyal gyi nya ba'i yar ngo haM yig zla zhun bdud rtsi'i gong bu gang ba rgyas pa'i lang tsho mchog tu ngoms pa na/___sa la spyod pa'i zhing khams 'bras mo gshongs kyi bye brag ka pA la spungs par grags pa'i ri sul bkra shis dga' ba 'khyil ba'i skyed mos tshal chen por sbyar ba las/___thog ma'i glegs bam du 'bebs pa po ni lho mon skyid pa'i ljongs kyi sngags ban chos grags rgya mtshos bgyis pa'o/___/'dis kyang zab lam gyi phrin las mi nub brtag cing khyab ste skal ldan rnams zung 'jug dga' bzhi'i ye shes mngon du byed pa'i rgyur gyur cig____/ma hA su kha sid+d+hi rastu/

Tibetan Text

[edit]

༄༅། །ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་གི་ལྷན་ཐབས་ལག་ཁྲིད་དཔལ་ཆེན་དགྱེས་པའི་ཞལ་ལུང་ཞེས་བྱ་བ་བཞུགས་སོ། །

༄༅། །ཨོཾ་སྭསྟི། །མཁའ་ཁྱབ་བདེ་ཆེན་སྒྱུ་དྲྭའི་ཟློས་གར་གྱིས། །དངོས་ཀུན་མི་ཤིགས་ཐིག་ལེར་སྡོམ་མཛད་མགོན། །ཧེ་རུ་ཀ་དཔལ་བླ་མར་གུས་བཏུད་ནས། །མཆོག་གསང་མན་ངག་ཟབ་མོའི་ལྷན་ཐབས་དབྱེ། །དེ་ལ་འདིར་ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་གི་ལྷན་ཐབས་ལག་ཁྲིད་ཅུང་ཟད་གསལ་བར་བྱེད་པ་ལ་གཉིས་ཏེ། སྤྱིའི་གོ་དོན་མདོ་ཙམ་སྨོས་པ་དང༌། སྐབས་ཀྱི་ལག་ཁྲིད་དངོས་འཆད་པའོ། །དང་པོ་ལ་བཞི། ལུས་འགྲུབ་པའི་རྒྱུ་རྐྱེན། གནས་པ་རྩ། གཡོ་བ་རླུང༌། བཀོད་པ་ [2a] ཐིག་ལེ་བྱང་ཆུབ་སེམས་ཀྱི་མཚན་ཉིད་དོ། །དང་པོ་ལུས་འགྲུབ་པའི་རྒྱུ་རྐྱེན་ནི། རྡོ་རྗེ་ཐེག་པའི་རྟེན་ཁྱད་པར་དུ་འཕགས་པ་འཛམ་བུའི་གླིང་པའི་མི་ཁམས་དྲུག་ལྡན་གྱི་ལུས་འདི། དྲི་མ་དང་བཅས་པའི་སེམས་ཀྱིས་འདུ་བྱས་ཤིང་ལས་མངོན་པར་བསྒྲུབས་པས་རྒྱུ་བྱས། ཕ་མའི་འདུ་འཕྲོད་ཀྱིས་རྐྱེན་བྱས་ཏེ། དེ་གསུམ་ཚོགས་པ་ཉི་ཟླ་སྒྲ་གཅན་ཞེས་བཏགས་པའི་ཕ་མའི་ཁུ་ཁྲག་བར་དོའི་རྣམ་ཤེས་དང་བཅས་པ་ལས་ལུས་ངག་ཡིད་གསུམ་བསྐྱེད། བར་དོའི་ཤེས་པ་དེས་ཕ་མ་གཉིས་ཀྱི་རེག་པ་སྲ་བ་དེ་ཉམས་སུ་མྱོང་བས་སའི་ཁམས་ [2b] གྲུབ་ཅིང༌། དེ་བཞིན་དུ་བྱང་སེམས་ཁུ་བ་གཤེར་བའི་རང་བཞིན་ཆུ། བསྐྱོད་པ་ལས་དྲོད་སྐྱེ་བ་མེ། རྩ་གནས་ཐམས་ཅད་ལས་བྱང་སེམས་གཡོ་བ་རླུང༌། བདེ་བ་ནམ་མཁའི་ཁམས་ཏེ་འབྱུང་བ་ལྔ། རྣམ་པར་ཤེས་པ་ཡེ་ཤེས་ཀྱི་ཁམས་དང་དྲུག་འདུས་པ་ལས་ལུས་གྲུབ་པ་སྟེ། མའི་མངལ་དུ་ས་བཅུའི་རང་བཞིན་གྱི་ཟླ་བ་ངོ་བཅུར་གནས་པའི་ཚེ་རྩའི་གཙོ་མོ་གསུམ་ནས་བརྩམས་ཏེ་སྟོང་ཕྲག་ལྔ་བཅུ་རྩ་བཞི་དང༌། བཙས་ནས་ཟླ་བ་གསུམ་པ་ན་རྩ་སྟོང་ཕྲག་བདུན་ཅུ་རྩ་གཉིས་རྫོགས་པས་ལུས་ཆགས་པའི་གནས་སྐབས་རྫོགས་པའོ། །གཉིས་པ་གནས་པ་རྩའི་མཚན་ཉིད་ནི། དེ་ལྟར་ལུས་ཀྱི་དབུས་གསང་གནས་ནས་གཙུག་གཏོར་གྱི་བར་དུ་རྩ་ཨ་ཝ་དྷུ་ཏི་སྲོག་ཤིང་གི་ཚུལ་དུ་ཡར་སྣ་སྨིན་མཚམས་སུ་ཟུག་པ། དེའི་གཡས་ན་རོ་མ་དང༌། གཡོན་ན་རྐྱང་མ་གཉིས་ཡར་སྣ་སྣ་བུག་ཏུ་ཟུག་སྟེ་སྨིན་མཚམས་ནས་སུམ་གཤིབས་ཀྱི་ཚུལ་དུ་སོང་བའི་འཁོར་ལོ་བཞིའམ་ལྔའི་ལྟེ་བར་སོ་སོར་མདུད་པའི་ཚུལ་གྱིས་ནང་འབྲེལ་བར་གནས་ལ། ལྟེ་བའི་འོག་ནས་རྩ་གསུམ་འདྲེས་ཤིང་དབུ་མའི་མར་སྣ་དུང་ཅན་མ་གཡས་ངོས་སུ་སོང་སྟེ་ཁུ་བ། རྐྱང་མ་དབུས་སུ་སོང་སྟེ་དྲི་ཆུ། རོ་མ་གཡོན་དུ་སོང་སྟེ་ཁྲག་དང་དྲི་ [3a] ཆེན་འབྱིན་སྡོམ་གྱི་ལས་བྱེད། སྤྱི་མགྲིན་སྙིང་ལྟེ་གསང་བའི་འཁོར་ལོ་ལྔ་ཀའི་ལྟེ་བ་དྷཱུ་ཏི་ནས་ཕྱོགས་བཞིར་འབྱུང་བཞིའི་ནུས་པ་འཛིན་པའི་རྩ་འདབ་བཞི་བཞི་གྱེས་ཤིང༌། སྙིང་གར་དེ་བཞི་ལས་གཉིས་རེ་གྱེས་པས་བརྒྱད། མགྲིན་པར་དེ་ལས་གཉིས་གཉིས་གྱེས་པས་བཅུ་དྲུག སྤྱི་བོར་དེ་ལས་གཉིས་གཉིས་གྱེས་པས་སོ་གཉིས། ལྟེ་བར་སྙིང་ག་ལྟར་གྱེས་པ་བརྒྱད་ཀྱི་བཞི་ལས་གཉིས་རེ་གྱེས་པས་འཕོ་བའི་རྩ་བཅུ་གཉིས་དང༌། དེའི་སྔར་གྱེས་པ་བརྒྱད་ལས་ལྔ་ལྔ་དང་མ་གྱེས་པ་བཞི་ལས་དྲུག་རེ་གྱེས་པས་དྲུག་ཅུ་རྩ་བཞི། གསང་བར་སྙིང་ག་བཞིན་གཉིས་རེ་གྱེས་པས་བརྒྱད་དོ། །དེའང་སྤྱི་བོ་སྐུའི་འཁོར་ལོའམ་བདེ་བ་ཆེན་པོའི་རྟེན་ཧཾ་ཡིག་བཞུགས་པས་བདེ་ཆེན་འཁོར་ལོ། མགྲིན་པར་གསུང་གི་འཁོར་ལོའམ་རོ་དྲུག་མྱོང་བའི་ཕྱིར་ལོངས་སྤྱོད་འཁོར་ལོ། སྙིང་ཐུགས་སམ་ཆོས་ཀྱི་འཁོར་ལོ། ལྟེ་བ་ནི་ལུས་ཐོག་མར་བསྐྱེད་པ་དང་སྤྲུལ་པའི་གནས་སམ་ཁམས་གསུམ་ལ་ཁྱབ་པས་སྤྲུལ་པའི་འཁོར་ལོ། གསང་བ་ནི་བདེ་བ་འཛིན་ཅིང་སྐྱོང་བས་བདེ་སྐྱོང་གི་འཁོར་ལོར་གྲགས་ཏེ། དེ་རྣམས་ལ་འཁོར་ལོར་བརྗོད་པའང་རྩིབས་ལ་སོགས་པ་དབྱིབས་མཚུངས་པ་ [3b] དང༌། དེ་དང་དེར་བྱེད་པ་བཅིངས་པ་ལས་རྟོག་པ་གཅོད་པའི་ཕྱིར་འཁོར་ལོ་དང་བྱེད་ལས་མཚུངས་པས་ཀྱང་དེ་སྐད་ཅེས་བྱའོ། །རྩ་དེ་དག་ལས་ཀྱང་ཕྱེ་ན་ནང་གི་གནས་ཉེར་བཞི་དང་ཡུལ་སོ་བདུན་དང༌། རོ་རྐྱང་དབུ་མ་གསུམ་གྱི་རིག་འཛིན་པའི་རྩ་སྟོང་ཕྲག་ཉི་ཤུ་རྩ་བཞི་པ་ཚོ་གསུམ་ལ་སྟོང་ཕྲག་བདུན་ཅུ་རྩ་གཉིས། དེ་རྣམས་ལས་གྱེས་པ་ནི་བསམ་གྱིས་མི་ཁྱབ་པ་སྟེ། བ་སྤུའི་གྲངས་ཇི་སྙེད་པའི་རྩའི་གྲངས་ཀྱང་དེ་སྙེད་དོ། །གཞན་ཡང་དབུ་མའི་ཡར་སྣར་གཙུག་ཏོར་འཁོར་ལོ་བསྣན་པ་སོགས་མང་ཉུང་མཐའ་གཅིག་ཏུ་མ་ངེས་པར་གསུངས་ཤིང༌། མདོར་ན་རྣལ་འབྱོར་པས་ཤེས་པར་བྱ་བའི་རྩ་སྟོང་ཕྲག་བདུན་ཅུ་རྩ་གཉིས་དང༌། དེ་རྣམས་ཀྱི་གཙོ་བོར་གྱུར་པ་འཁོར་ལོའི་རྩ་དང༌། དེ་རྣམས་ལས་ཀྱང་གཙོ་བོར་གྱུར་པའི་རྩ་སུམ་ཅུ་རྩ་གཉིས་ལ་སོགས་པ་བཤད་ལ། འཁོར་ལོ་དྲུག་གིས་རླུང་སེམས་ཀྱི་དྭངས་མ་འཛིན་ཅིང༌། སྙིགས་མས་ནད་སྐྱེད་པར་བྱེད་དེ། གཙུག་ཏོར་དང་དཔྲལ་བས་བད་ཀན། མགྲིན་སྙིང་གིས་མཁྲིས་ནད། ལྟེ་གསང་གི་ཕྱི་སྐོར་གྱིས་རླུང་ནད། གསང་བའི་ནང་སྐོར་གྱིས་འདུས་པའི་ནད་བསྐྱེད་དོ་ཞེས་འབྱུང་ངོ༌། །དེ་ཡང་ལུས་ལ་རགས་ཕྲ་ཤིན་ཏུ་ཕྲ་ [4a] བའི་ལུས། དེ་རྣམས་ཀྱི་ཆོས་ཉིད་དོན་དམ་ཡེ་ཤེས་ཀྱི་རྩ་ནི་རང་རིག་པའི་རྣམ་པར་ཤར་བའི་ཕྱིར་ཐ་མལ་གྱི་རྩ་ཐམས་ཅད་ལ་ཁྱབ་བྱེད་དུ་བཞུགས་པས་ཡེ་ཤེས་ཀྱི་དབུ་མ་ཆེན་པོ་ཞེས་ཀྱང་གྲགས་ལ། དེ་ཉིད་རྣམ་པ་ཐམས་ཅད་པ་ཡིན་པས་ཀུན་རྫོབ་ཀྱི་རྩ་ཡང་དེའི་རྗེས་སུ་འགྲོ་བའི་ཕྱིར། རྣལ་འབྱོར་པའི་སེམས་ཀྱིས་རྣམ་པ་གར་གཏད་དེ་དང་འདྲ་བར་ཐ་མལ་པའི་རྩ་རྣམས་ཀྱིས་ཀྱང་བྱ་བ་བྱེད་པས་ན་རྒྱུད་སྡེ་ཐ་དད་ལས་གསུངས་པའི་རྩའི་རྣམ་བཞག་མི་འདྲ་བ་རྣམས་ཀྱང་མི་འགལ་བའི་གནད་ཤེས་པར་བྱའོ། །གསུམ་པ་གཡོ་བ་རླུང་གི་མཚན་ཉིད་ནི། སྤྱིར་ལུས་ཅན་རྣམས་ཀྱི་ངག་གི་ཆོས་དང༌། ཕྱི་རོལ་དུ་དབུགས་སྲང་ཆུ་ཚོད་ཞག་སོགས་དུས་ཀྱི་ཆོས་རྣམས་ཀྱི་འཆར་གཞིར་གྱུར་པ་ནི་དོན་དམ་ཡེ་ཤེས་ཀྱི་རླུང་ངམ་སྲོག་ཆེན་པོའི་རླུང་ཞེས་བྱ་སྟེ། འཇམ་དཔལ་སྒྱུ་དྲྭ་ལས། སྲོག་ཆེན་པོ་སྟེ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག ། ཚིག་ཀུན་རབ་ཏུ་གསལ་བར་བྱེད། ཅེས་གསུངས་པས། རླུང་མཐའ་དག་གི་གཤིས་ལ་རྒྱུན་མི་ཆད་པར་ཁྱབ་པ་རྒྱུ་རྒྱུད་ཀྱི་རྟེན་དུ་གྱུར་པ་ཡིན་ལ། དེའི་གློ་བུར་གྱི་དྲི་མ་ཀུན་ [4b] གཞིའི་རྣམ་ཤེས་ཀྱི་རང་བཞིན་ཡུལ་ལ་གཡོ་བནི་ལས་ཀྱི་རླུང་སྟེ། དེ་ལ་ཕུང་པོ་ལྔའི་རྟེན་བྱེད་པ་རྩ་བའི་རླུང་ལྔ་ནི། སྲོག་འཛིན། གྱེན་རྒྱུ། ཁྱབ་བྱེད། མེ་མཉམ། ཐུར་སེལ་ལྔ་སྟེ། བྱེད་ལས་ཀྱང་རིམ་པ་བཞིན། སྲོག་གནས་པ་དང༌། དབུགས་དབྱུང་རྔུབ་དང༌། ལུས་གནས་པ་དང༌། དྲོད་འབེབས་པ་དང༌། འགྲོ་འདུག་གཤང་གཅི་ཁུ་གསུམ་འབྱིན་སྡོམ་དང་བཅས་པའི་བྱ་བ་བྱེད་ལ། གལ་ཏེ་ལོག་ན། བརྒྱལ་སྨྱོ་ཤི་བ་སོགས་དང༌། སྟོད་ནད་དང༌། ཞ་རེངས་ཀྱི་ནད་དང༌། ཕོ་བའི་ནད་དང༌། སྨད་ཀྱི་ནད་རྣམས་བསྐྱེད་ཅིང༌། དེ་དག་ལུས་ཀྱི་དབུས་དང༌། སྟོད་དང༌། པགས་པའི་མཐར་ཐུག་པ་དང༌། ཞུ་བའི་མཚམས་དང༌། ལྟེ་བ་མན་ཆད་གནས་པར་བཤད། ཡན་ལག་གི་རླུང་ལྔ་ནི། རྒྱུ་བ། རྣམ་པར་རྒྱུ་བ། ཡང་དག་རྒྱུ་བ། རབ་ཏུ་རྒྱུ་བ། ངེས་པར་རྒྱུ་བ་སྟེ། དབང་པོ་ལྔ་ལ་གནས་ཤིང་གཟུགས་བསྐྱེད་པ་སོགས་ཀྱི་བྱ་བ་བྱེད་པ་དང༌། བྱེ་བྲག་ཏུ་སྣར་རྒྱུ་བའི་རླུང་ནི་ཉིན་ཞག་ཕྲུགས་རེ་ལ་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུལ། དེ་ཡང་འཕོ་བ་བཅུ་གཉིས་པའི་དབང་དུ་བྱས་ན། ལྟེ་བའི་རྩ་འདབ་དྲུག་ཅུ་ [5a] རེ་བཞི་ལས། སྔར་དྲུག་ཏུ་གྱེས་པའི་ཡ་གྱལ་བཞི་པོ་དབུ་མའི་འཕོ་བ་ཡིན་པའི་ཕྱིར། དཀྱིལ་འཁོར་མི་འབབས་པས་སྟོང་པའི་རྩ་བཞི་ཞེས་བྱའོ། །དེ་ལྷག་དྲུག་ཅུ་པོ་ནས་རྒྱུ་ཚུལ་ནི། བ་སྤུའི་མཐར་ཐུག་པའི་རྩ་ལམ་ནས་རྩ་འཁོར་གྱི་རླུང་རྣམས་ལྟེ་བའི་རླུང་དང་འདྲེས་ཏེ་རོ་རྐྱང་གི་ལམ་ལས་སྣ་སྒོར་འབབ་པ། དེ་ཡང་འབྱུང་བ་ལྔ་གཡས་གཡོན་སྡུད་པ་བསྐྱེད་ཀྱི་རིམ་པས་འཕོ་བ་རེ་ལ་དབྱུག་གུ་ལྔ་རེ། དབྱུག་གུ་རེ་ལ་དབུགས་སུམ་བརྒྱ་དྲུག་ཅུ་སྟེ། འཕོ་བ་རེ་ལ་དབུགས་སྟོང་བརྒྱད་བརྒྱ་པ་རེ་རྒྱུ་ནའང༌། དེའི་སྟེང་ན་སྟོང་པའི་རྩ་བཞིའི་དབྱེ་བས་དབུགས་གཅིག་གི་ཕྱེད་བཅས་སོ་གཉིས་ཆ་རེ་ཡེ་ཤེས་ཀྱི་རླུང་ཡིན་ལ། དེ་བསགས་པས་དབྱུག་གུ་རེ་ལ་དབུགས་བཅུ་གཅིག་དང་བཞི་ཆ་གཅིག འཕོ་བ་རེ་ལ་ང་དྲུག་རྐང་བཅས། ཉིན་ཞག་གཅིག་ལ་དྲུག་བརྒྱ་དོན་ལྔ་རྣམས་རྒྱུ་ཞིང༌། དེ་ཆུ་ཚོད་དུ་དྲིལ་ན། ཆུ་ཚོད་གཅིག ། ཆུ་སྲང་ང་གཉིས། དབུགས་གསུམ། དེ་ཟླ་བ་གཅིག་ཏུ་བསགས་པས་ཆུ་ཚོད་ང་དྲུག་དང༌། ཆུ་ཆུང་བཅོ་ལྔ། དེ་བཅུ་གཉིས་སུ་ཟློས་པས་ཞག་བཅུ་གཅིག་དང༌། ཆུ་ཚོད་བཅོ་ལྔ་རྣམས་ལོ་གཅིག་གི་ཡེ་རླུང་གི་ [5b] གྲངས་ཏེ་ཕྱི་རོལ་དུ་ཟླ་ཤོལ་གྱི་རྒྱུར་འགྱུར་ལ། སྐྱེས་བུ་ལོ་བརྒྱ་པའི་ཡེ་རླུང་བསྡོམས་པས་ལོ་གསུམ་ཕྱོགས་གསུམ་དུ་ལོངས་པ་སོགས་རྒྱུད་སྡེ་རྣམས་ལས་རྒྱ་ཆེར་གསུངས། ཁ་དོག་ནི་ས་ཆུ་མེ་རླུང་ནམ་མཁའ་རིམ་པར་སེར་དཀར་དམར་ནག་སྔོན་པོ། ཚད་ཀྱང་ལྟེ་འོག་སོར་བཞི་ནས་བརྒྱུད་དེ་སྣ་རྩེ་ལས་སོར་བཅུ་གཉིས་ནས་བཅུ་དྲུག་གི་བར་དུ་འགྲོ་བ་ཡིན་ནོ། །རླུང་དེ་དག་ལས་སྣ་སྒོར་རྒྱུ་བ་དང་སྒུལ་སྐྱོད་བྱེད་པའི་རླུང་སོགས་རགས་པ། ལུས་ནང་དུ་མི་གཡོ་ཞིང་འཁོར་བའི་རང་བཞིན་འབྱུང་ལྔའི་རླུང་དང༌། རྣམ་འགྱུར་རླུང་བཅུ། རྣམ་རྟོག་སྣ་ཚོགས་གཡོ་བའི་བཞོན་པ་རྣམས་འབྲིང་པོ། སྣང་བཞིའི་བཞོན་པར་གྱུར་པའི་རླུང་རྣམས་ཕྲ་བ། ཁྱད་པར་འོད་གསལ་གྱི་བཞོན་པའི་རླུང་ནི་ཤིན་ཏུ་ཕྲ་བ་ཡིན་ལ། དེ་ཡང་མན་ངག་ཐ་དད་པ་ལས་རླུང་གི་རྣམ་བཞག་མི་འདྲ་བ་བྱུང་བ་རྣམས་ཀྱང༌། ཡེ་ཤེས་ཀྱི་རླུང་རྣམ་པ་ཐམས་ཅད་པ་ཡིན་པས་དེའི་རྗེས་སུ་འགྲོ་བའི་ཕྱིར་གནད་གཅིག་ཏུ་འདུ་བ་ཡིན་ནོ། །དེས་ན་རླུང་བཅིངས་པས་རགས་པའི་ལས་རླུང་ཉིད་ཀྱང་ཡེ་ཤེས་ཀྱི་རླུང་དུ་གྱུར་ནས་ཡོན་ཏན་བསྐྱེད་པར་གསུངས་སོ། །བཞི་པ་བཀོད་པ་ཐིག་ལེ་བྱང་ཆུབ་སེམས་ཀྱི་མཚན་ཉིད་ནི། རྒྱུ་རྒྱུད་ཀྱི་རྟེན་དུ་ [6a] གྱུར་པ་སྟོང་གསལ་འགག་མེད་ཀྱི་ངོ་བོར་བཞུགས་པ་ནི་ཡེ་ཤེས་སྙིང་པོའི་ཐིག་ལེའམ་དོན་དམ་མི་ཤིགས་པའི་ཐིག་ལེ་ཡིན་ལ། ཀུན་རྫོབ་རྒྱུའི་ཐིག་ལེ་ནི་ཁམས་དཀར་དམར་གཉིས་ལས་དྭངས་སྙིགས་གཉིས་སུ་གྱུར་ཏེ། སྤྱི་བོར་ཕ་ལས་ཐོབ་པའི་དཀར་ཆ་ཧཾ་གི་རང་བཞིན་དང༌། ལྟེ་འོག་རྩ་གསུམ་འདུས་མདོར་མ་ལས་ཐོབ་པའི་དམར་ཆ་ཨ་ཐུང་གི་རང་བཞིན་ཏེ། ལས་ཀྱི་དཀར་ཆ་དང་དམར་ཆ་ཐམས་ཅད་ཀྱི་བདག་པོར་གྱུར་པ། དབུ་མའི་ཆ་ལ་བརྟེན་པ། རྣམ་ཤེས་ཀྱི་རྟེན་བྱེད་པའོ། །དེ་ལས་ཀྱང་དྭངས་སྙིགས་གཉིས་སུ་གྱུར་ཏེ་མངལ་དུ་མའི་རྩ་དང་འབྲེལ་བས་བསྐྱེད་ཅིང༌། བཙས་ནས་བཟའ་བཏུང་རྣམས་ཕོ་བར་བད་ཀན་གྱིས་མྱགས་པར་བྱེད། མཁྲིས་པས་མདོག་འགྱུར། རླུང་མེ་མཉམ་སྟེ་མེ་དྲོད་སྦར་བས་བཞུ་ཞིང་མྱགས་པར་བྱས་པའི་དྭངས་མ་མཆིན་པར་ཁྲག་ཏུ་གྱུར་ཏེ་རྩལ་བརྒྱུད་ནས། དེ་ཤ །རིམ་པར་ཚིལ། རུས། རྐང༌། བྱང་སེམས། དེས་སྟོབས་དང་མདངས་སུ་གྱུར་ལ། དེ་རྣམས་ཀྱི་སྙིགས་མ་ནི་རིམ་བཞིན་དུ། དྲི་ཆེན་དང༌། མཁྲིས་པ་དང༌། པགས་པ་དང༌། རྨེན་བུ་དང༌། སོ་སེན་དང༌། སྦུབས་ཀྱི་དྲི་མ་ [6b] མཆིལ་སྣབ་ལ་སོགས་པ་དང༌། དགའ་བའི་མཐར་འཛག་པ་སྟེ། ལུས་ཟུངས་བདུན་ཞེས་གྲགས་ཤིང༌། དེ་དག་གི་རྣམ་དབྱེ་རྒྱས་པར་ཕྱེ་ན་བྱེ་བ་ཕྲག་བདུན་ཅུ་རྩ་གཉིས་སོགས་རྩ་ཇི་སྙེད་པར་རླུང༌། རླུང་ཇི་སྙེད་པར་ཐིག་ལེས་ཁྱབ་པར་གསུངས། མདོར་ན་ཐིག་ལེ་མཐའ་དག་ཁུ་རྡུལ་མུན་གསུམ་དུ་འདུ་ཞིང༌། དེ་གསུམ་གྱིས་ཆགས་སྡང་རྨོངས་གསུམ་སྐྱེད་པ་ལས། རང་བཞིན་བརྒྱད་ཅུའི་རྟོག་པ་དང༌། དེས་ལབ་བསགས་ནས་འཁོར་བའི་འཁྲུལ་སྣང་གི་སྡུག་བསྔལ་སྣ་ཚོགས་བྱུང་བ་ཡིན་ལ། དེ་གསུམ་འགྱུར་མེད་དུ་བཅིངས་པ་ལས་འཁོར་བ་ལྡོག་པར་འགྱུར་ཞིང༌། ཐིག་ལེ་ཐམས་ཅད་ཀྱི་རྩ་བ་ཆོས་ཉིད་མི་ཤིགས་པའི་ཐིག་ལེ་ནི་རྣམ་པ་ཐམས་ཅད་པ་ཡིན་པས། བརྟགས་པ་དང་མ་བརྟགས་པའི་ཐིག་ལེའི་རྣལ་འབྱོར་ཇི་སྙེད་པ་ཀུན་ཀྱང་དངོས་བརྒྱུད་གང་རུང་གི་སྒོ་ནས་ཡང་དག་པའི་ལམ་དུ་འགྲོ་བའི་གནད་ཀྱང་ཤེས་པར་བྱའོ། །དེ་ལྟར་རྡོ་རྗེའི་ལུས་ལ་གནད་དུ་བསྣུན་པ་ལ་དེའི་གནས་ལུགས་ཤེས་པ་གལ་ཆེ་སྟེ། དེའི་རྒྱུ་མཚན་ཕྲ་བའི་ལུས་ངག་ཡིད་གསུམ་གདོད་མ་ནས་རྡོ་རྗེ་མི་ཤིགས་པ་གསུམ་གྱི་ལྷར་རྣམ་པར་དག་ལ། དེ་གསུམ་ཡང་དོན་དམ་པའི་རིགས་དྲུག་གི་ལྷ་ཡབ་ཡུམ་གྱི་བདག་ཉིད་འབྱུང་ལྔ་ [7a] སེམས་ཀྱི་དྭངས་མ་དྲུག་པོ་ཡང་གཉིས་གཉིས་ཟུང་དུ་འཇུག་པ་ལས། ས་ཆུའི་དྭངས་མ་སྐུ་རྡོ་རྗེ། མེ་རླུང་གི་དྭངས་མ་གསུང་རྡོ་རྗེ། མཁའ་སེམས་ཀྱི་དྭངས་མ་ཐུགས་རྡོ་རྗེར་བཞུགས་ཤིང༌། དེ་གསུམ་ལྡོག་ཆས་ཕྱེ་བ་ཙམ་ལས་དོན་དམ་པར་སྐུ་གསུང་ཐུགས་རྡོ་རྗེ་མཉམ་པ་ཉིད་དེ་སྦྱང་གཞི། དེའི་རང་མདངས་ཀུན་རྫོབ་སྣང་ངོའི་ཆ་ནས་རྐྱང་མ་རོ་མ་དབུ་མ་གསུམ་ཁུ་རྡུལ་རླུང་གི་རྟེན་དང༌། རླུང་སེམས་འཇུག་པ་གཅིག་པས་སེམས་ཀྱི་རྟེན་ཡང་ཡིན་ལ། དེ་ཉིད་རགས་པ་གྲུབ་པ་ན་རྩ་ལས་ལུས། རླུང་ལས་ངག །ཐིག་ལེ་ལས་སེམས་ཀྱི་ཆོས་གྲུབ་པ་ནི་སྦྱང་བྱ་འཁྲུལ་པའི་སྒོ་གསུམ་ཡིན་ཅིང༌། དེ་སྦྱོང་བྱེད་དབང་གོང་མ་གསུམ་དང་འབྲེལ་བའི་ཟབ་ལམ་ཁྱད་པར་ཅན་རྣམས་ཀྱིས་བྱེད་པ་བཅིང་ཞིང་འོད་གསལ་དུ་སྦྱངས་པས་གློ་བུར་གྱི་སྒྲིབ་པ་ཐམས་ཅད་གདོད་མའི་ཡེ་ཤེས་སུ་ཐིམ་པ་ན། སྦྱངས་འབྲས་སྒྲིབ་བྲལ་བདེ་བ་ཆེན་པོས་ཁྱབ་བྱེད་དུ་བྱས་པའི་སྐུ་གསུམ་པོ་འགྲུབ་པར་འགྱུར་བ་ཡིན་ནོ། །གཉིས་པ་སྐབས་ཀྱི་ལག་ཁྲིད་དངོས་འཆད་པ་ལ་གཉིས། མཐུན་པའི་རྐྱེན་གྱིས་གཞི་བཟུང་བ་དང༌། རྩ་བའི་ལག་ཁྲིད་དངོས་སོ། །དང་པོ་མཐུན་པའི་རྐྱེན་གྱིས་གཞི་བཟུང་པ་ནི། སྤྱིར་ [7b] སྒྲུབ་པའི་གནས། འཚོ་བ་ཟས། ལམ་གྱི་གྲོགས་སོགས་གཞུང་མཐུན་མཚན་ཉིད་ཚང་བ་དང༌། ཁྱད་པར་གསང་སྤྱོད་གསང་སྒྲོགས་ཀྱི་ཉེས་པ་འགོག་ཕྱིར་གཞན་གྱིས་མཐོང་ཚོར་མེད་པའི་དབེན་གནས་ས་གཞི་ཁོད་སྙོམས་པར། རླུང་ར་རྒྱ་ཁྱོན་འཚམས་ཤིང་ཁོར་ཡུག་ཀུན་ནས་ར་བས་ལེགས་པར་བསྐོར་ལ་ཡོལ་བ་སོགས་ཀྱི་ལྟ་གསེང་མེད་པར་བྱ། རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར་བར་གསུངས་པ་བཞིན། ཉམས་སུ་ལེན་པ་པོ་རབ་ཏུ་བྱུང་བའི་དགེ་སློང་རིག་པ་འཛིན་པ་ཡིན་ན། ཕྱི་ལྟར་རྟགས་དང་ཆ་ལུགས་འདུལ་བའི་ཚུལ་ཁོ་ན་གཙོ་བོར་བཏོན་ཏེ་གསང་བའི་དམ་རྫས་ཡོ་བྱད་མཐའ་དག་གསང་ཐབས་སུ་འཆང་བ་དང༌། དེ་ལས་གཞན་པ་རྣམས་ཀྱིས་བརྟུལ་ཞུགས་ལམ་དུ་སློང་ཕྱིན་སྔགས་པའི་ཆ་ལུགས་གོས་དཀར་ལྕང་ལོའི་ཚུལ་ལ་བསླབ་པར་བྱ་སྟེ། གནས་ལུགས་མ་བཅོས་པའི་བརྡར་རལ་པ་མ་བཅོས་ལྕང་ལོ། འཁོར་འདས་ཀྱི་འཛིན་ཞེན་དག་པ་མཚོན་པའི་དུང་གི་རྣ་རྒྱན་ཟུང་ལྡན། ཤེས་རབ་བདེ་བ་ཆེན་པོ་མཚོན་ཕྱིར་ཁ་ཊྭཱྃ་རྩེ་གསུམ། རིག་པ་དྲི་མས་མ་གོས་པ་མཚོན་ཕྱིར་རས་གཟན་དཀར་པོ། འོད་གསལ་ཉིན་མཚན་ཁོར་ཡུག་ཏུ་འདྲེས་བ་ [8a] མཚོན་པའི་སྒོམ་ཐག་དམར་ཁྲ། གཙང་དམེའི་རྟོག་པ་དག་ཅིང་ཏིང་ངེ་འཛིན་གྱི་བཟའ་བཏུང་ལ་རོལ་པ་མཚོན་པའི་ཀ་པཱ་ལ་མཚན་ལྡན་བཅས་བཅང་ཞིང༌། བྱེ་བྲག་རླུང་གི་ཡོ་བྱད་ཁྱད་པར་བ་ལ། འབེབས་གདན་ནི། འབོལ་སྲབ་འཐུག་རན་པ་རྒྱར་འདོམ་གང་ངམ་མཐོ་ལྔ་ལས་མི་ཆུང་བའི་ཁར་ཀོ་སྟན་འཇམ་ཞིང་མཉེན་ལྡན་ཁོད་སྙོམས་པ་འདི་དང༌། ཨང་རག་ནི། མཛེས་ཤིང་ཡིད་དུ་འོང་བ་རྒྱལ་མཚན་གྱི་དབྱིབས་སུ་བྱ་བར་གསུངས་པ་བཞིན་ཆེ་ཆུང་གི་ཚད་རང་རང་གི་གཟུགས་ཚད་དང་འཚམས་པ་ལས་ངོས་བཟུང་ཆེར་མ་མཆིས་ཀྱང༌། སྤྱིར་བཏང་ཙམ་དུ་གོང་བ་སོར་བཞི། འཇའ་གཉིས་སྒྲིག་སོར་རེ་རེ། ཤམ་བུ་གོང་འོག་གཉིས་བརྩེགས་སོར་ལྔ་རེ་ཙམ་དང༌། འདོམ་པ་བར་གྱི་རྟ་སྣམ་རས་བར་ཚང་ཅན་བྱས་པ་རྒྱབ་ཕྱོགས་ཀྱི་ཤམ་བུའི་འོག་ནས་ཐིག་གུ་གཉིས་གཤིབས་སུ་དྲུབ་སྟེ་གསང་གནས་ཀྱི་ཐད་དུ་སྣལ་མ་འུར་མཐིལ་འདྲ་བ་ཞིག་སྲད་བུ་བསྣོལ་མཚམས་སུ་འོང་བར་བྱས་ལ། མདུན་ངོས་ཀྱི་སྣེ་གཉིས་སྐ་རགས་ཀྱི་ཚུལ་དུ་ཤམ་བུ་སྟེང་མའི་འོག་ནས་དཀྲིས་ཤིང་མི་ལྷོད་པར་བྱ། སྒོམ་ཐག་ནི། སྣམ་རས་དམར་པོ་ཞེང་སོར་དྲུག་གམ་ [8b] བཞིའི་ཚད་ཅན་གཉིས་ཁ་སྦྱར་བའམ། ཡང་ན་ཞེང་གཅིག་ཉིས་ལྟེབས་ཀྱིས་ནང་ཁོངས་སྟོང་དུ་བྱས་པའི་ངོས་ལ་རས་དཀར་གྱི་སྐུད་པས་རྩ་གསུམ་མཚོན་དོན་ལྟ་བུ་དྲུབ་ཅིང་མཛེས་པར་བྱ། རིང་ཐུང་གི་ཚད་སྲིད་དུ་བཞི་ལྟེབས་བྱས་ནས་རང་གི་མགོ་ལ་དཀྲིས་པའི་ལྷག་མ་སོར་བརྒྱད་རིང་ཚད་དང༌། སོར་བཞི་ཐུང་ཚད་ཡིན་པས་གང་བདེར་བྱས་ལ་བཅང་ངོ༌། །གཉིས་པ་རྩ་བའི་ལག་ཁྲིད་དངོས་ལ། དངོས་གཞིའི་ཉམས་ལེན་རླུང་དང༌། གཏུམ་མོ། ཞུ་བདེའི་རྣལ་འབྱོར་རྣམས་ནི་མན་ངག་རྩ་བའི་གཞུང་དང་སྦས་དོན་ཉམས་ཁྲིད་ལས་ཤེས་པར་བྱ་ཞིང༌། འདིར་གེགས་སེལ་བོགས་འདོན་འཁྲུལ་འཁོར་གྱི་ལག་ཁྲིད་གཏེར་གཞུང་གི་དགོངས་པ་ཞལ་ཤེས་སྙན་བརྒྱུད་བཞིན་འགྲོལ་བ་ལ། ཐོག་མར་སྔོན་འགྲོ་ལུས་སྦྱོང་ཡན་ལག་ལྔ་ལས། དང་པོ་རྣམ་སྣང་ནི། འདི་ལྟར་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་སྟོང་ཉིད་ཆེན་པོར་ཡལ་བའི་ངང་ནས་སྐད་ཅིག་གིས་སྣང་སྲིད་འོག་མིན་སྟུག་པོ་བཀོད་པའི་ཞིང་ཁམས་མཚན་ཉིད་ཡོངས་སུ་རྫོགས་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་པདྨ་ཉི་ཟླའི་གདན་ལ་ཆུ་ལས་ཉ་ལྡང་བའི་ཚུལ་དུ་རང་ཉིད་གཟུགས་ཕུང་གནས་སུ་ [9a] དག་པའི་ངོ་བོ་རྣམ་པར་སྣང་མཛད་དཀར་གསལ་ཞི་འཛུམ་མཚན་དཔེས་མཛེས་པ། ཕྱག་གཉིས་ཐུགས་ཀར་བྱང་ཆུབ་མཆོག་གི་ཕྱག་རྒྱ་ཅན། ལོངས་སྤྱོད་རྫོགས་པའི་ཆས་ཀྱིས་སྤྲས་ཤིང༌། ཞབས་རྡོ་རྗེའི་སྐྱིལ་མོ་ཀྲུང་གིས་འཇའ་འོད་ཟེར་ཐིག་གི་ཀློང་དུ་བཞུགས་པ། སྐུ་དབུས་རྩ་གསུམ་འཁོར་ལོ་ལྔ་ལྡན་གྱི་སྙིང་གའི་ཐད་ཀྱི་དབུ་མའི་ནང་དུ་རྒྱལ་ཀུན་སྐུའི་བྱིན་རླབས་འདུས་པའི་ངོ་བོ་ཨོཾ་ཡིག་དཀར་པོ་གསལ་འཚེར་འབར་བ། དེ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས་པས་རང་གཞན་རྣམས་ཀྱི་ཚེ་རབས་ཀུན་ཏུ་ཉོན་མོངས་པ་གཏི་མུག་གི་སྒོ་ནས་བསགས་པའི་ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་སངས་ཀྱིས་དག་པར་བསམ་ལ། ལག་གཉིས་རྡོ་རྗེའི་ཁུ་ཚུར་བརླ་རྩ་ནས་པུས་སྟེང་བར་ཐུར་དུ་ཤད་ཅིང༌། དེ་ནས་སྦུབས་ཚུལ་གྱིས་སྟ་ཟུར་གཡས་གཡོན་ནས་གྱེན་དུ་ཤད་དེ་ནུ་སྟེང་སླེབས་པ་ན་གདོང་ཐད་ཀྱི་ནམ་མཁར་ཤུགས་ཀྱིས་འཕེན། ཡང་ཁུ་ཚུར་བུས་སྟེང་དུ་བཞག་པ་སྟ་ཟུར་གཡས་གཡོན་ནས་གྱེན་དུ་ཤད་དེ་འཕེན་པ་སྔར་ལྟར་ལན་གསུམ་སོང་རྗེས། ལག་གཉིས་ཐལ་མོ་ནང་བསྐོར་ཐོག་མཐེབ་མཛུབ་སོ་སོར་རྩེ་སྤྲད་ཅིང་ [9b] གཞན་རྣམས་བརྐྱང་བཞིན་ལག་གཡས་གྱེན་དང་གཡོན་པ་འོག་ཏུ་བཀན་པ་བྱང་ཆུབ་མཆོག་གི་ཕྱག་རྒྱ་སྙིང་གར་བཅའ། དེ་མ་ཐག་ལག་གཉིས་ཐལ་མོ་པད་སྦུབ་ཀྱིས་ཕྲག་པ་སོ་སོའི་ཐད་ཀར་སེ་གོལ་གཏོག །ཡང་དེ་ཐོག་ནས་ཐལ་མོ་ནང་བསྐོར་གྱིས་བྱང་ཆུབ་མཆོག་གི་ཕྱག་རྒྱ་དང་སེ་གོལ་གཏོག་པ་བཅས་ལན་གསུམ་ཚང་ནས། རྡོ་རྗེའི་ཆོས་བདུན་ཐོག་རླུང་བཏང༌། ལྷར་སྣང་མི་དམིགས་པར་བསྡུས་ཏེ་ཆོས་དབྱིངས་ཡེ་ཤེས་མངོན་དུ་གྱུར་པར་བསམ་ལ་མཉམ་པར་བཞག །གཉིས་པ་རྡོར་སེམས་ནི། སྣོད་བཅུད་མངོན་པར་དགའ་བའི་ཞིང་ཁམས་སུ་གསལ་བའི་དབུས་སུ་གླང་པོས་བཏེགས་པའི་རིན་པོ་ཆེའི་ཁྲི་པདྨ་ཉི་ཟླའི་གདན་ལ་རང་ཉིད་རྣམ་ཤེས་ཀྱི་ཕུང་པོ་གནས་སུ་དག་པའི་ངོ་བོ་རྡོ་རྗེ་མི་བསྐྱོད་པ་མཐིང་གསལ་ས་གནོན་མཉམ་གཞག་སྐྱིལ་ཀྲུང་ལོངས་སྐུའི་ཆས་ཅན་གྱི་སྐུ་དབྱིངས་རྩ་གསུམ་འཁོར་ལོ་ལྔ་ལྡན་གྱི་དབུ་མའི་ནང་ཁོངས་སྙིང་གའི་ཐད་དུ་རྒྱལ་ཀུན་ཐུགས་ཀྱི་ངོ་བོ་ཧཱུྃ་ཡིག་མཐིང་གས་མཚན་པ། དེ་ལས་འོད་ཟེར་མཐིང་ག་དཔག་ཏུ་མེད་པ་འཕྲོས་པས་རང་གཞན་རྣམས་ཀྱི་ཉོན་མོངས་པ་ཞེ་སྡང་གིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་སངས་ཀྱིས་དག་པར་བསམ་ [10a] ལ། སྔར་བཞིན་ལག་གཉིས་ཁུ་ཚུར་པུས་སྟེང་ནས་ཤད་དེ་གདོང་ཐད་དུ་ཤུགས་ཀྱིས་འཕང་རྗེས། ལག་གཡས་ཕྱི་ནས་བྱས་པའི་ཁུ་ཚུར་སྙིང་གར་བསྣོལ་ཏེ་ཕྱིར་བཀྲོལ་བ་དང་ཆབ་གཅིག་སྐྱིལ་ཀྲུང་ཡང་ཐར་གྱིས་བཤིག །འདི་མན་གྱི་སྐྱིལ་ཀྲུང་བཤིག་ཚུལ་ཐམས་ཅད་འདིས་འགྲེ། དེ་མ་ཐག་རྐང་མཐིལ་གཉིས་ཁ་སྦྱར་ལ་པུས་མོ་ཕྱིར་བགྲད་ཅིང་ལག་གཉིས་ཁུ་ཚུར་ནུ་སྟེང་ནས་གདོང་ཐད་ཀྱི་མདུན་མཁར་འཕང༌། དེ་ཐོག་ནས་ཐལ་མོ་ནང་དུ་བསྐོར་ལ་གུང་མོ་གཉིས་བརྐྱང་བ་རྩེ་སྤྲད་ཅིང་ལྷག་མ་རྣམས་བསྣོལ་བ་རྡོ་རྗེ་རྩེ་གཅིག་གི་རྒྱ་སྤྱི་བོར་འཇོག །དེ་ནས་ཐལ་མོ་གཉིས་ཁ་སྦུབ་བཞིན་མདུན་དུ་བརྐྱང་བ་དང་ལྷན་གཅིག་ཏུ་རྐང་པ་ཡང་མདུན་དུ་ཤུགས་ཀྱིས་བརྐྱང༌། ཡང་ཐལ་མོ་ནང་བསྐོར་ཐོག་སྤྱི་བོར་རྡོ་རྗེའི་རྒྱ་བཅའ་བ་དང་ལྷན་དུ་རྐང་མཐིལ་གཉིས་ཁ་སྦྱར་ཏེ་བསྐུམ། དེ་མ་ཐག་རྐང་ལག་མདུན་དུ་བརྐྱང་བ་སོགས་ལན་གསུམ་རྫོགས་པ་དང༌། ཆོས་བདུན་ཐོག་ལྷར་སྣང་བསྡུས་ཏེ་མེ་ལོང་ཡེ་ཤེས་མངོན་དུ་གྱུར་པར་བསམ་ལ་ངལ་གསོ། །གསུམ་པ་རིན་འབྱུང་ནི། སྣོད་བཅུད་དཔལ་དང་ལྡན་པའི་ཞིང་ཁམས་སུ་གསལ་བའི་དབུས་སུ་རྟ་མཆོག་གིས་བཏེགས་པའི་ [10b] རིན་པོ་ཆེའི་ཁྲི་པདྨ་ཉི་ཟླའི་གདན་ལ་རང་ཉིད་ཚོར་ཕུང་གནས་སུ་དག་པའི་ངོ་བོ་རིན་ཆེན་འབྱུང་ལྡན་སེར་གསལ་མཆོག་སྦྱིན་མཉམ་གཞག་སྐྱིལ་ཀྲུང་ལོངས་སྐུའི་ཆས་ཅན་གྱི་སྐུ་དབྱིངས་སྙིང་ག་དབུ་མའི་ནང་ཁོངས་སུ་རྒྱལ་ཀུན་ཡོན་ཏན་གྱི་ངོ་བོ་སྭཱ་ཡིག་སེར་པོས་མཚན་པ། དེ་ལས་འོད་ཟེར་སེར་གསལ་དཔག་ཏུ་མེད་པ་འཕྲོས་པས་རང་གཞན་རྣམས་ཀྱི་ཉོན་མོངས་པ་ང་རྒྱལ་གྱིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་སངས་ཀྱིས་དག་པར་བསམ་ཞིང༌། སྔར་བཞིན་ལག་གཉིས་ཁུ་ཚུར་གདོང་ཐད་དུ་ཤུགས་ཀྱིས་འཕང་རྗེས། ལག་གཡོན་སྟེང་དང་གཡས་པ་འོག་ཏུ་བྱས་ཏེ་ལག་ངར་མདུན་དུ་བསྣོལ་བའི་ཐལ་མོ་ཕན་ཚུན་གཡས་གཡོན་གྱི་མཆན་ཁུང་སོ་སོར་བཅུག་ནས་གྲུ་མོ་གཉིས་ཐད་ཀར་བརྒྱང་ལ་སྐེད་པ་ཡན་ཆད་ཀྱི་ལུས་སྟོད་གཡས་སུ་ལན་གསུམ་གཅུ། ཡང་ཁུ་ཚུར་གཉིས་ནང་བསྐོར་གྱིས་གདོང་ཐད་དུ་འཕང་ནས་སྔར་བཞིན་ལག་གཡས་གཡོན་སྟེང་འོག་གོ་བརྗེས་ཏེ་བསྣོལ་བའི་ཐལ་མོ་ཕན་ཚུན་མཆན་ཁུང་དུ་བཅུག་ཅིང་གྲུ་མོ་བརྒྱང་བཞིན་ལུས་སྟོད་གཡོན་དུ་ལན་གསུམ་གཅུ། དེ་ནས་ལག་གཉིས་ཐལ་མོ་གདོང་ཐད་དུ་འཕང་སྟེ་ཐལ་མོ་གཡོན་པ་སྔོན་དུ་འགྲོ་བའི་པད་སྦུབ་བསྐོར་ [11a] བཞིན་པས་གཡོན་ལྟེ་འོག་མཉམ་གཞག་དང༌། གཡས་ཐལ་མོ་གྱེན་དུ་བཀན་པ་མཆོག་སྦྱིན་རྒྱ་པུས་མོ་གཡས་སྟེང་དུ་བཞག་བཞིན་ལུས་སྟོད་ཤུགས་ཀྱིས་འཐེན་ཅིང་བསྲང༌། ཡང་ཐལ་མོ་གཉིས་ནང་བསྐོར་གྱིས་གདོང་ཐད་དུ་འཕང་ནས་ཕྱག་རྒྱ་བཅའ་བ་དང་ལུས་ཤུགས་འཐེན་པ་བཅས་གོང་བཞིན་ལན་གསུམ་བསྐྱར་བས་ལུས་ཀྱི་རྩ་མདུད་ཐམས་ཅད་ཁྲོལ་མར་ཞིག་པར་མོས། མཐར་ཆོས་བདུན་ཐོག་ལྷར་སྣང་བསྡུ་ཞིང་མཉམ་ཉིད་ཡེ་ཤེས་མངོན་དུ་གྱུར་པར་བསམ། །བཞི་པ་སྣང་མཐའ་ནི། སྣོད་བཅུད་བདེ་བ་ཅན་གྱི་ཞིང་དུ་གསལ་བའི་དབུས་སུ་རྨ་བྱས་བཏེགས་པའི་རིན་པོ་ཆེའི་ཁྲི་པདྨ་ཉི་ཟླའི་གདན་ལ་རང་ཉིད་འདུ་ཤེས་ཀྱི་ཕུང་པོ་གནས་སུ་དག་པའི་ངོ་བོ་སྣང་བ་མཐའ་ཡས་དམར་གསལ་ཕྱག་གཉིས་མཉམ་བཞག་སྐྱིལ་ཀྲུང་ལོངས་སྐུའི་ཆས་ཅན་གྱི་སྐུ་དབྱིངས་སྙིང་ག་དབུ་མའི་ནང་ཁོངས་སུ་རྒྱལ་ཀུན་གསུང་གི་ངོ་བོ་ཨཱཿཡིག་དམར་པོས་མཚན་པ། དེ་ལས་འོད་ཟེར་དམར་གསལ་དཔག་ཏུ་མེད་པ་འཕྲོས་པས་རང་གཞན་རྣམས་ཀྱི་ཉོན་མོངས་པ་འདོད་ཆགས་ཀྱིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་སངས་ཀྱིས་དག་པར་བསམ་པ་དང༌། [11b] ཁྱད་པར་ཕྱག་མཐིལ་གཉིས་ཉི་མའི་དཀྱིལ་འཁོར་དུ་གསལ་བ་དེ་ཉིད་གང་ལ་རེག་པ་ཙམ་གྱིས་ལུས་ཀྱི་གྲང་བའི་ནད་དང་ཆུ་སེར་རྒྱས་པ་ཐམས་ཅད་བ་མོ་ལ་ཉི་ཟེར་ཕོག་པ་ལྟར་བཅོམ་ནས་མེའི་རང་བཞིན་དུ་སྒྱུར་བྱེད་ཀྱི་ནུས་པ་དང་ལྡན་པར་བསམ་ལ། སྔར་བཞིན་ཁུ་ཚུར་གདོང་ཐད་དུ་འཕང་མ་ཐག་ཐལ་མོ་གཉིས་ཐག་སྒྲ་དང་བཅས་སྦྱར་ཏེ་ཕན་ཚུན་དྲག་ཏུ་མཉེ་ཞིང་བསྐོར་ཏེ་འཕུར། དེ་ནས་པད་བསྐོར་བཅས་ཐལ་མོ་གཡས་པས་དཔྲལ་བའི་ཕྱོགས་དང་གཡོན་པས་སྣ་དང་མཁུར་ཚོས་མན་ཆད་ཀྱི་བཞིན་རས་འཕུར་ཞིང༌། དེ་ཐོག་ནས་ལག་གཡས་པས་མགོའི་ལྟག་པའི་ཕྱོགས་དང་གཡོན་པས་མཚོག་མ་རྣམས་འཕུར། ཡང་པད་སྐོར་བཅས་ལག་གཉིས་སོ་སོས་རྣ་བ་དང་འགྲམ་པ་གཡས་གཡོན་འཕུར་ཞིང་མཉེ། དེ་རྗེས་པད་སྐོར་གྱིས་ཐལ་མོ་གཉིས་ཐག་སྒྲ་དང་བཅས་ཕོ་བར་སྦྱར་ལ་འཕུར་ཞིང༌། ལག་གཡོན་ཕྲག་པ་གཡས་དང་ལག་གཡས་མཆན་ཁུང་གཡས་ནས་བརྒྱུད་དེ་ལག་རྒྱབ་ཀྱིས་རྩིབས་ལོགས་རྒྱབ་ཕྱོགས་རྣམས་ཤད་པ་དང༌། ལག་གཉིས་དེ་ཐོག་ནས་མ་བཏེགས་པར་ཤད་བཞིན་ཕྱི་འགྲོས་ཀྱིས་ལག་གཡས་ཕྲག་པ་གཡོན་ངོས་སུ་འགྲོ་ཞིང་ལག་གཡོན་གཡོན་ཕྱོགས་ཀྱི་མཆན་ཁུང་ནས་ [12a] བརྒྱུད་དེ་གོང་བཞིན་རྒྱབ་ལོགས་སུ་ཤད། ཡང་ཕྱི་འགྲོས་ཀྱིས་སྔར་ལྟར་སྟོད་དང་མཆན་ཁུང་རེས་མོས་སུ་འཕུར་བ་བཅས་ལན་གསུམ་སོང་རྗེས། ལག་གཉིས་ཁུ་ཚུར་ནང་བསྐོར་གདོང་ཐད་དུ་འཕང་ལ་པད་སྐོར་སྔོན་འགྲོས་ལག་གཡོན་ཁུ་ཚུར་མདུན་མཁར་བརྐྱང་སྟེ་གཡས་པའི་ཐལ་མོས་གཡོན་གྱི་དཔུང་མགོ་ནས་ལག་རྒྱབ་བར་དང༌། མཆན་ཁུང་ནས་མཁྲིག་མའི་བར་ཐུར་དུ་ཤད་པ་ལན་གསུམ། ཡང་ལག་གཉིས་ཁུ་ཚུར་མདུན་མཁར་འཕང་རྗེས་པད་སྐོར་བཅས་གཡས་གཡོན་གོ་བརྗེས་ཏེ་ལག་གཡོན་གྱི་ཐལ་མོས་ལག་གཡས་ཕྱོགས་ཤད་པ་ལན་གསུམ། དེ་ནས་པད་སྐོར་བཅས་ལག་གཡས་སྔོན་དུ་བྱས་ཏེ་སྟ་ཟུར་གཡས་ནས་ཐུར་དུ་ཤད་པ་ལན་གསུམ། ཡང་པད་སྐོར་གྱིས་ལག་གཡོན་སྔོན་དུ་བྱས་ཏེ་སྟ་ཟུར་གཡོན་ནས་ཐུར་དུ་ཤད་པ་ལན་གསུམ་མཐར། ལག་གཉིས་ཁུ་ཚུར་སྙིང་གར་བསྣོལ་ཏེ་བཀྲོལ་བ་དང་ཆབ་གཅིག་སྐྱིལ་ཀྲུང་ཡང་བཤིག་ནས་པད་སྐོར་གྱིས་བརླ་གཡས་པ་ཐུར་དང་གྱེན་དུ་ཤད་པ་གསུམ་རེ། གཡོན་ཕྱོགས་སུའང་དེ་ལྟར་ལན་གསུམ་སོང་རྗེས། ཁུ་ཚུར་གཉིས་ནང་བསྐོར་གྱིས་ནུ་སྟེང་དུ་བཞག་ལ་མཆན་ཚག་བརྡབ་པ་དང་ཆབ་གཅིག་འཕར་སྟངས་ཀྱིས་ [12b] གཡས་ཕྱོགས་ཀྱི་རྐང་ལག་གཉིས་ཤུགས་ཀྱིས་བསྒྲེང༌། ལག་གཡས་རྐང་པའི་རྒྱུད་དུ་བརྐྱང་པ་ཁུ་ཚུར་ངར་གདོང་ལ་མ་རེག་ཙམ་དང༌། ལག་གཡོན་ཁུ་ཚུར་ནུ་སྟེང་གཡོན་དུ་མ་རེག་ཙམ་གྱིས་རོ་སྟོད་གཡོན་དུ་ཅུང་ཟད་གཅུ། དེ་ཐོག་ནས་ལག་གཉིས་ཐལ་མོ་ནང་བསྐོར་གྱིས་ངར་གདོང་སྒྲེང་ཕྱོགས་སུ་ལག་གཡས་སྔོན་དུ་འགྲོ་བས་པུས་མོ་ནས་བོལ་གོང་སོར་རྩེ་བར་དུ་མར་ཤད་ཅིང༌། མཐིལ་དང་རྟིང་པ་ནས་སྒྱིད་ཁུང་བར་དུ་ཡར་ཤད་པ་བཅས་ལན་གསུམ་རེ། ཡང་སྔར་བཞིན་ཁུ་ཚུར་གཉིས་ནུ་སྟེང་ནས་མཆན་ཚག་བརྡབ་པ་དང་བཅས་ཆབ་གཅིག་འཕར་སྟངས་ཀྱིས་རྐང་ལག་གཡོན་པ་གཉིས་བསྒྲེང་ཞིང་ཤད་ཚུལ་གོང་བཞིན་ལན་གསུམ་རེ། འདི་དག་གི་སྐབས་སུ་ལུས་ཀྱི་ཆ་ཐམས་ཅད་དྲོད་ཀྱིས་ཁྱབ་པར་བསམ་ཞིང༌། མཐར་ཆོས་བདུན་ཐོག་ལྷར་སྣང་བསྡུས་ཏེ་སོར་རྟོག་ཡེ་ཤེས་མངོན་དུ་གྱུར་པར་བསམ། །ལྔ་པ་དོན་གྲུབ་ནི། སྣོད་བཅུད་ལས་རབ་རྫོགས་པའི་ཞིང་དུ་གསལ་བའི་དབུས་སུ་ཤང་ཤང་གིས་བཏེགས་པའི་རིན་པོ་ཆེའི་ཁྲི་པདྨ་ཉི་ཟླའི་གདན་ལ་རང་ཉིད་འདུ་བྱེད་ཀྱི་ཕུང་པོ་གནས་སུ་དག་པའི་ངོ་བོ་དོན་ཡོད་གྲུབ་པ་ལྗང་གསལ་སྐྱབས་སྦྱིན་མཉམ་གཞག་སྐྱིལ་ཀྲུང་ལོངས་ [13a] སྐུའི་ཆས་ཅན་གྱི་སྐུ་དབྱིངས་དབུ་མའི་ཡར་སྣེར་ཧཾ་ཡིག་དངུལ་ཆུའི་མདོག་ཅན་མགོ་བོ་ཐུར་བསྟན་དུ་གནས་པ། སྙིང་གའི་ཐད་ཀྱི་དབུ་མའི་ནང་ཁོངས་སུ་རྒྱལ་ཀུན་ཕྲིན་ལས་ཀྱི་ངོ་བོ་ཧཱ་ཡིག་ལྗང་གུས་མཚན་པ་ལས་འོད་ཟེར་ལྗང་གསལ་དཔག་ཏུ་མེད་པ་འཕྲོས་པས་རང་གཞན་རྣམས་ཀྱི་ཉོན་མོངས་པ་ཕྲག་དོག་གིས་ཀུན་ནས་བསླངས་པའི་སྡིག་སྒྲབ་བག་ཆགས་ཐམས་ཅད་སངས་ཀྱིས་དག་པར་བསམ་ཞིང༌། སྔར་བཞིན་ཁུ་ཚུར་གདོང་ཐད་ལན་གསུམ་འཕང་བའི་རྗེས་སུ་ཐལ་མོ་གཡས་པ་སྔོན་དུ་འགྲོ་བའི་ནང་བསྐོར་གྱིས་ལག་གཡས་མཐེ་བོང་བཀུག་ལ་སོར་མོ་གཞན་རྣམས་གཤིབ་སྟེ་བསྒྲེང་བ་སྐྱབས་སྦྱིན་རྒྱ་སྙིང་གར་གཏོད་ཅིང་གཡོན་ལྟེ་འོག་མཉམ་གཞག་བྱས་ལ། ལུས་གྱེན་དུ་ཤུགས་ཀྱིས་ལན་གསུམ་འཐེན་བཞིན་ཤེས་པ་སྤྱི་བོའི་ཧཾ་ལ་གཏད་དེ་མགོ་བོ་གཡོན་དུ་ལན་གསུམ་བསྐོར་ཞིང༌། དེབ་བཞིན་གཡས་སུ་ལན་གསུམ་བསྐོར་བ་དང༌། ཕྱིར་ལྟག་པར་དགྱེ་ཞིང་ནང་དུ་ཨོལ་ཀོ་ལ་བརྡབ་པ་ལན་གསུམ། ཡང་ལག་གཉིས་ཐལ་མོ་གདོང་ཐད་དུ་འཕང་ནས་ཐལ་མོ་ནང་བསྐོར་གྱིས་སྐྱབས་སྦྱིན་མཉམ་གཞག་ལུས་འཐེན་མགོ་སྐོར་སོགས་གོང་བཞིན་ལན་གསུམ་རྫོགས་མཐར། སྐྱིལ་ཀྲུང་ལུས་སྤྲུགས་ཞེས་ [13b] ལག་གཉིས་ཁུ་ཚུར་སྙིང་གར་བསྣོལ་ནས་ལུས་ཕྱིར་དགྱེ་བ་དང་ལྷན་དུ་འཕོང་བཙུགས་ལ་སྐྱིལ་ཀྲུང་ཡར་བཏེགས། དེ་ནས་ལག་གཉིས་ཁུ་ཚུར་བསྣོལ་བ་བཀྲོལ་ཏེ་རྒོད་གཤོག་ལྟར་ཕྱིར་བརྒྱངས་ཤིང་ལུས་མདུན་དུ་རྒུ་བ་དང་མཉམ་དུ་པུས་མོ་གཉིས་སར་བཙུགས་ཏེ་འཕོང་བཏེགས། ཡང་ལག་གཉིས་ཁུ་ཚུར་སྙིང་གར་བསྣོལ་བ་སོགས་གོང་ལྟར་ལན་གསུམ་སོང་རྗེས། འབེབས་སྟན་གྱི་ཁར་ཁྲུ་གང་ཙམ་འཕགས་པའི་འབེབས་ཆུང་གསུམ་དང༌། དེ་བས་ཀྱང་བཏེགས་ཅི་ནུས་སུ་འཕར་བའི་བར་འབེབས་གསུམ་དང༌། ལངས་ཏེ་ལུས་སྲང་བའི་འབེབས་ཆེན་གསུམ་བཅས་རྫོགས་པ་དང༌། ལག་གཉིས་ཁུ་ཚུར་ནང་བསྐོར་ཐུར་དུ་བཀྲོལ་བ་དང་ཆབ་གཅིག་རྩ་འདར་ཐོན་པར་ངག་ནས་ཧ་ཞེས་དྲག་ལ་བཅད་ཐོན་པ་གསུམ་བརྗོད་བཞིན་སྤྲུགས་པས་ལུས་རྡུལ་ཕྲན་འཐོར་བ་ལྟར་ཞིག་བར་བསམ། དེ་ནས་ལྷར་སྣང་བསྡུས་ཏེ་བྱ་གྲུབ་ཡེ་ཤེས་མངོན་དུ་གྱུར་པར་བསམ་ལ་ངལ་གསོ། །དེ་རྣམས་ཀྱིས་སྔོན་འགྲོ་ཡན་ལག་ལྔ་སྦྱོང་གི་རིམ་པ་གྲུབ་བོ། །དེ་ནས་དངོས་གཞིའི་འཁྲུལ་འཁོར་ལ་རྣམ་གྲངས་ཉི་ཤུ་ཐམ་པ་ཡོད་པ་ལས། དང་པོ་གཙོ་བོ་ནི། སྣང་སྲིད་སྣོད་བཅུད་འོག་མིན་མེ་རི་འབར་བའི་ཞིང་ཁམས་ [14a] དུར་ཁྲོད་དྲག་པོའི་མཚན་ཉིད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་ཟླ་ཉི་ལྷ་ཆེན་ཕོ་མོ་བསྣོལ་བའི་གདན་ལ་རང་ཉིད་དཔལ་རྡོ་རྗེ་གཞོན་ནུ་མཐིང་ནག་ཞལ་གཅིག་ཕྱག་གཉིས་པ། གཡས་གསེར་གྱི་རྡོ་རྗེ་རྩེ་དགུ་པ་གདེངས་ཤིང་གཡོན་གནམ་ལྕགས་ཀྱི་ཕུར་པ་འདྲིལ་བ། ཞབས་ཟུང་གྱད་ཀྱི་འདོར་སྟབས་སུ་བསྒྲད་པས་དྲེགས་པ་ཕོ་མོའི་མགོ་བོ་དང་ནུ་མ་ནས་བརྫིས་པ། གར་གྱི་ཉམས་དགུ་རྫོགས་ཤིང་དུར་ཁྲོད་ཀྱི་ཆས་བརྒྱད་ཀྱིས་སྤྲས་པ། ཡེ་ཤེས་མེ་དཔུང་འབར་བའི་ཀློང་དུ་བཞུགས་པའི་སྐུ་དབུས་རྩ་གསུམ་འཁོར་ལོ་ལྔ་དང་ལྡན་པའི་སྤྱི་བོར་ཧཾ་དང་ལྟེ་བར་ཨ་ཐུང་བཅས་གསལ་བརྟན་འབར་བར་བསྒོམ་ཞིང༌། འཁྲུལ་འཁོར་གར་གྱི་རོལ་པས་ལུས་ཀྱི་རྩ་མདུད་ཐམས་ཅད་ཁྲལ་ཁྲོལ་དུ་ཞིག་པར་བསམ་ལ། སྔར་བཞིན་ཁུ་ཚུར་བསྐོར་རྒྱང་བསྣོལ་འགྲོལ་བཅས་སྐྱིལ་ཀྲུང་བཤིགས་ཏེ། རྐང་མཐིལ་གཉིས་ས་ལ་ཕབ་ནས་པུས་བྲང་སྦྱར་བ་དང་ཡར་ལངས་ཏེ་ལག་གཉིས་ཁུ་ཚུར་སྟ་ཟུར་ནས་ཤད་བཞིན་ལུས་ཅུང་ཟད་ཡར་འཐེན་ཉམས་ཀྱིས་ནུ་སྟེང་ནས་གདོང་ཐད་ཀྱི་ནམ་མཁར་ཤུགས་ཀྱིས་འཕེན། དེ་མ་ཐག་འཕར་སྟངས་དང་ཆབ་གཅིག་ལག་གཉིས་ནང་བསྐོར་གྱིས་ཁུ་ཚུར་ནུ་ [14b] སྟེང་སོ་སོར་བཞག་བཞིན་རྐང་པ་གཡས་བརྐྱང་པའི་གྱད་ཀྱི་འདོར་སྟབས་བགྲད། ཁུ་ཚུར་གཉིས་གཡས་ཕྱོགས་ཀྱི་བར་སྣང་དུ་ཤུགས་ཀྱིས་འཕང་ལ་དེ་ཐོག་ནས་ལག་གཡོན་གཞུ་རྒྱུད་འཐེན་ཚུལ་གྱིས་བཀུག་ནས་ཁུ་ཚུར་ཕྱིར་བསྟན་ནུ་སྟེང་གཡོན་དུ་འཇོག དེ་ནས་འཕར་སྟངས་ཀྱིས་གྱད་སྟབས་བསྡུ་བ་དང་ཆབ་གཅིག་ལག་གཉིས་ཁུ་ཚུར་ནུ་སྟེང་སོ་སོར་འཇོག །ཡང་འཕར་སྟངས་ཀྱིས་རྐང་པ་གཡོན་བརྐྱང་པའི་གྱད་སྟབས་བགྲད་ལ། ལག་གཉིས་ཁུ་ཚུར་གཡོན་ཕྱོགས་ཀྱི་བར་སྣང་དུ་འཕང་ནས་ལག་གཡས་གཞུ་རྒྱུད་འཐེན་ཚུལ་གྱིས་བཀུག་སྟེ་ཁུ་ཚུར་ནུ་སྟེང་གཡས་སུ་འཇོག སླར་འཕར་སྟངས་ཀྱིས་གྱད་སྟབས་བསྡུས་ལ་ལག་གཉིས་ཁུ་ཚུར་ནུ་སྟེང་དུ་འཇོག ཡང་གཡས་ཕྱོགས་སུ་སྔར་བཞིན་གྱིས་གཡས་གཡོན་སྤེལ་མ་ལན་གསུམ་སོང་རྗེས། འཕར་གྱིས་བསྡུས་ནས་རྐང་པ་གཤིབས་ཐོག་ལུས་དྲང་པོར་བསྲང་ལ་ཁུ་ཚུར་གཉིས་སྟ་ཟུར་ནས་ཡར་ཤད་དེ་ནུ་ཐད་ནས་སྡིགས་མཛུབ་མགོ་བོའི་སྟེང་གི་ནམ་མཁར་འཕང་བ་ལན་གསུམ། དེ་ནས་འཕར་སྟངས་བཅས་རྐང་པ་གཡོན་བརྐྱང་བའི་གྱད་ཀྱི་འདོར་སྟབས་བགྲད་ལ། ལག་གཉིས་ཁུ་ཚུར་ནང་བསྐོར་གྱིས་ནུ་སྟེང་ནས་སྡིག་མཛུབ་ [15a] དཔུང་པ་གཡས་གཡོན་ཐད་ཀའི་ནམ་མཁར་འཕང་རྗེས། ཐལ་མོ་གཉིས་ནང་བསྐོར་སྙིང་གའི་ཐད་དུ་ཁ་སྦྱར་ཏེ་ཕུར་པ་ཕྱོགས་མཚམས་སུ་འདྲིལ་ཞིང་མདུན་དུ་འདེབས་ཚུལ་བྱས་ལ་ཐལ་མོ་ཁ་ཕྱེ། ཡང་ལག་གཉིས་ཁུ་ཚུར་ནང་བསྐོར་གྱིས་གཡས་གཡོན་དུ་སྡིགས་མཛུབ་འཕང་ཞིང་ཕུར་པ་འདྲིལ་ཚུལ་བཅས་གོང་བཞིན་ལན་གསུམ་བསྐྱར། འདི་རྣམས་ཀྱི་སྐབས་སུ་རྐང་པའི་འཕར་སྟངས། ལག་པའི་བསྐོར་སྟངས། མིག་གི་ལྟ་སྟངས་སོགས་ཀྱི་རྣམ་འགྱུར་མཛེས་ཤིང་རྔམས་བརྗིད་ཐོན་པར་བྱ་བ་གནད་དོ། །མཐར་འཕར་སྟངས་ཀྱིས་གྱད་སྟབས་བསྡུས་ལ་འབེབས་ཆེན་གསུམ་བརྡབ་པས་མ་དག་སྙིགས་མའི་ལུས་ཀྱི་རྩ་རླུང་ཐིག་ལེའི་ཁམས་རྣམས་དྭངས་མ་འོད་ཀྱི་རང་བཞིན་དུ་ཞིག་སྟེ་བདེ་སྟོང་བསམ་གྱིས་མི་ཁྱབ་པའི་ཡེ་ཤེས་མངོན་དུ་གྱུར་པར་བསམ་ལ་ངལ་གསོ། །གཉིས་པ་སྒྲོལ་ཡུམ་ནི། སྣོད་བཅུད་དག་པ་མཁའ་སྤྱོད་ཀྱི་ཞིང་ཁམས་ཆེན་པོའི་དབུས་སུ་པད་ཉི་བམ་རོའི་གདན་ལ་རང་ཉིད་ཤེས་རབ་དབྱིངས་ཀྱི་ངོ་བོ་སྒྲོལ་ཡུམ་ཨེ་ཀ་ཛ་ཊཱི་སྨུག་ནག་དཔྲལ་བར་ཡེ་ཤེས་ཀྱི་སྤྱན་གཅིག་དམར་ཟླུམ་སྡང་མིག་ཏུ་གཟིར་ཞིང༌། ཞལ་རབ་ཏུ་གདངས་པ་ [15b] ལས་ཟླ་ཚེས་ལྟ་བུའི་མཆེ་བ་གཅིག་ཐུར་དུ་གཙིགས་པ། དབུ་སྐྲ་རལ་པའི་ཁྲོད་ན་ལྕགས་ཀྱི་རལ་པ་ཉག་གཅིག་གྱེན་དུ་གཟིངས་པ། བྲང་ན་བདུད་རྩིའི་རྒྱུན་འཛག་པའི་ནུ་མ་གཅིག་འཕྱང་བ། ཕྱག་གཡས་ཞིང་གི་རྒྱལ་མཚན་ཀླད་ལ་འཕྱར་ཞིང་གཡོན་སྡིགས་མཛུབ་བརྐྱང་པའི་རྩེ་ལས་ལྕགས་ཀྱི་སྤྱང་མོ་ཁྲ་ཐབས་སུ་འགྱེད་པ། ཞབས་གཡས་བསྐུམ་པ་གསང་བར་གཏད་ཅིང་གཡོན་བརྐྱང་པའི་གར་སྟབས་ཀྱིས་ཡེ་ཤེས་མེ་དཔུང་འབར་བའི་ཀློང་ན་བཞུགས་པའི་སྐུ་དབྱིངས་རྩ་གསུམ་འཁོར་ལོ་ལྔ་དང་བཅས་པ་གསལ་བཏབ་ལ། སྐྱིལ་ཀྲུང་བཤིགས་ནས་ཧར་གྱིས་ལངས་ལ་ཁུ་ཚུར་གཉིས་རྐང་པའི་བོལ་གོང་ནས་ཤད་དེ་ནུ་ཐད་ནས་སྟེང་གི་ནམ་མཁར་འཕང་བ་ལན་གསུམ། དེ་ནས་རྐང་པ་གཡས་བསྐུམ་པའི་གར་སྟབས་བྱས་ལ་ལག་གཡོན་ཁུ་ཚུར་དཀུར་བརྟེན། ལག་གཡས་སྡིགས་མཛུབ་ནང་བསྐོར་གྱིས་གཡས་ཕྱོགས་ཀྱི་ནམ་མཁར་འཕང་བ་ལན་གསུམ། དེ་བཞིན་རྐང་སྟབས་དང་ལག་གཡས་གཡོན་གོ་ལྡོག་སྟེ་སྡིགས་མཛུད་གཡོན་གྱི་ནམ་མཁར་ལན་གསུམ་འཕང་རྗེས། རྒུར་འཐེན་ཐོག་འབེབས་གསུམ་བརྡབ་པས་ལུས་ཀྱི་རྩ་མདུད་ཐམས་ཅད་ཁྲལ་ཁྲོལ་དུ་ཞིག་པར་བསམ་ཞིང་ལྷར་སྣང་ [16a] བསྡུས་ལ་ངལ་གསོ། །དེ་ནས་ཀཱི་ལ་རིགས་ལྔ་ལས། གསུམ་པ་བཛྲ་ཀཱི་ལ་ཡ་ནི། སྣང་སྲིད་ཞི་བ་ལྷུན་གྱིས་གྲུབ་པའི་དཀྱིལ་འཁོར་མེ་ལོང་ཡེ་ཤེས་ཀྱི་རང་གདངས་འོད་ཟེར་དཀར་པོ་འཕྲོ་བའི་དབུས་སུ་པདྨ་ཟླ་ཉིའི་གདན་ལ་རང་ཉིད་བཛྲ་ཀཱི་ལ་ཡ་སྐུ་མདོག་དཀར་གསལ་ཞལ་གཅིག་ཕྱག་གཉིས་པ། ཞལ་གདངས་ལྗགས་འདྲིལ་མཆེ་བ་གཙིགས་ཤིང་སྤྱན་གསུམ་སྡང་མིག་བགྲད་པ། སྨར་སྨིན་མེའི་ཚྭ་ཚྭ་འཕྲོ་ཞིང་དབུ་སྐྲ་དམར་སེར་འཁྱིལ་བ། ཕྱག་གཡས་པས་གནམ་ལྕགས་ཀྱི་རྡོ་རྗེ་རྩེ་དགུ་པ་ནམ་མཁར་འཕྱར་ཞིང་གཡོན་ཞི་བའི་དངུལ་ཕུར་འདྲིལ་བ། སྐུའི་ལྟེ་བ་མན་ཆད་རྒྱ་མདུད་དང་ཆུ་སྲིན་གྱི་ཁ་ནས་ཐོན་པའི་དངུལ་གྱི་ཕུར་དབལ་ཟུར་གསུམ་རྣོ་ངར་དང་ལྡན་པ་ལོག་འདྲེན་གྱི་སྙིང་གར་ཟུག་པ། གཅེར་བུ་སྒེག་ཅིང་དཔའ་བའི་ཉམས་ཅན་ཡེ་ཤེས་ཀྱི་མེ་དཔུང་འབར་བའི་ཀློང་ན་བཞུགས་པའི་སྐུ་དབྱིངས་རྩ་གསུམ་འཁོར་ལོ་ལྔ་ལྡན་གྱི་སྙིང་ག་དབུ་མའི་ནང་ཁོངས་སུ་རྒྱལ་ཀུན་ཐུགས་རྡོ་རྗེ་མི་བསྐྱོད་པའི་ངོ་བོ་ཧཱུྃ་ཡིག་དཀར་པོ་བཀྲག་མདངས་འཚེར་བ། དེ་ལས་འོད་ཟེར་ཧཱུྃ་གི་རྡུལ་ཕྲན་གྲངས་མེད་པ་འཕྲོས་པས་སྙིང་གའི་རྩ་འདབ་ཐམས་ཅད་གང་ནས་ཞེ་སྡང་འཁྲུལ་བའི་ཕུང་པོ་དང་རྩའི་མདུད་ [16b] པ་ཐམས་ཅད་བཙན་ཐབས་ཉིད་དུ་ཞིག་པར་བསམ་ཞིང༌། ལངས་ཏེ་ཁུ་ཚུར་གཉིས་སྟ་ཟུར་གཡས་གཡོན་ནས་གྱེན་དུ་ཤད་དེ་ནུ་ཐད་སླེབས་པ་ན་སྟ་ཟུར་ནས་ཐུར་དུ་འཕེན་པ་ལན་གསུམ་མཐར། འཕར་སྟངས་ཀྱིས་རྐང་པ་གཉིས་རྟིང་པ་སྤྲད་པའི་སོར་མོ་རྣམས་སར་བཙུག་ལ་པུས་མོ་ཕྱིར་བགྲད། ལག་པ་གུང་མོ་གཉིས་བརྐྱང་པ་རྩེ་སྤྲད་ལྷག་མ་རྣམས་བསྣོལ་བ་རྡོ་རྗེ་རྩེ་གཅིག་གི་རྒྱ་སྤྱི་བོར་འཇོག་ཅིང་གྲུ་མོ་གཉིས་ཐད་ཀར་བརྒྱངས་པའི་རྡོ་རྗེའི་ལུས་རྒྱ་བྱས་ལ་སྐེད་པ་ཉག་བྱེད་བཞིན་གྱེན་དུ་ལན་གཅིག་འཐེན། དེ་ནས་འཕར་སྟངས་ཀྱིས་རྐང་པ་གཡས་བརྐྱང་པའི་གྱད་ཀྱི་འདོར་སྟབས་བགྲད། ལག་གཡོན་སྡིགས་མཛུབ་དཀུར་བརྟེན། གཡས་སྡིགས་མཛུབ་ནང་བསྐོར་གྱིས་ནུ་ཐད་ནས་གཡས་ཕྱོགས་ཀྱི་ནམ་མཁར་ལན་གསུམ་འཕེན་ཅིང་ལྟ་སྟངས་སྡང་མིག་གཟིར་ལ་འཕར་བསྡུ། ཡང་འཕར་སྟངས་ཀྱིས་རྡོ་རྗེའི་ལུས་རྒྱ་སྔར་ལྟར་བྱས་ལ་སྐེད་པ་ཉག་བཞིན་གྱེན་འཐེན་གཅིག ཡང་འཕར་སྟངས་ཀྱིས་རྐང་པ་གཡོན་བརྐྱང་པའི་གྱད་སྟབས་བགྲད། ལག་གཡས་སྡིགས་མཛུབ་དཀུར་བརྟེན། གཡོན་སྡིགས་མཛུབ་ནང་བསྐོར་ནུ་ཐད་ནས་གཡོན་ཕྱོགས་ཀྱི་ནམ་མཁར་ལན་གསུམ་འཕེན་ཅིང་ལྟ་སྟངས་གཟིར་ལ་འཕར་བསྡུ། [17a] ཡང་འཕར་སྟངས་ཀྱིས་རྡོ་རྗེའི་ལུས་རྒྱ་བྱས་ཏེ་ལུས་ཤུགས་ཀྱིས་གྱེན་དུ་འཐེན་པའི་སྐེད་ཉག་ལན་གསུམ་མཐར། རྐང་པ་གཡས་པ་ཕྱི་ནས་བྱས་ཏེ་བསྣོལ་བའི་སོར་མོ་རྣམས་ས་ལ་བཙུག ལག་གཡོན་ཁུ་ཚུར་གཡས་ཀྱི་ནུ་སྟེང་དུ་བཞག ལག་གཡས་ཁུ་ཚུར་བརྐྱང་བ་གཡོན་གྱི་རྒྱབ་ལོགས་སུ་ཤུགས་ཀྱིས་འཕེན་པ་དང་ཆབ་གཅིག་རྐང་པའང་གཅུ་བཞིན་བསྐོར་ནས་འབེབས་བརྡབ། ཡང་རྐང་ལག་གོ་ལྡོག་སྟེ་གཡས་ཀྱི་རྒྱབ་ལོགས་སུ་ཤུགས་ཀྱིས་གཅུས་ནས་བསྐོར་བཞིན་འབེབས་བརྡབ། དེ་ལྟར་རྡོ་རྗེའི་གཅུས་འབེབས་གཡས་གཡོན་སྤེལ་བ་ལན་གསུམ་བརྡབ་པས་ཞེ་སྡང་འཁྲུལ་པའི་འཁོར་ལོ་མེ་ལོང་ཡེ་ཤེས་ཀྱི་དབྱིངས་སུ་བཤིགས་ཏེ་སྙིང་ག་ཆོས་ཀྱི་འཁོར་ལོའི་རྩ་མདུད་རྣམས་ཡོངས་སུ་གྲོལ་བར་བསམ། །བཞི་པ་རཏྣ་ཀཱི་ལ་ཡ་ནི། སྣང་སྲིད་རྒྱས་བ་ལྷུན་གྱིས་གྲུབ་པའི་དཀྱིལ་འཁོར་མཉམ་ཉིད་ཡེ་ཤེས་ཀྱི་རང་གདངས་འོད་ཟེར་སེར་པོ་འཕྲོ་བའི་དབུས་སུ་པདྨ་ཟླ་ཉིའི་གདན་ལ་རང་ཉིད་རཏྣ་ཀཱི་ལ་ཡ་སེར་ནག་གཡས་རིན་པོ་ཆེའི་བེ་ཅོན་དང་གཡོན་རྒྱས་པའི་གསེར་ཕུར་འདྲིལ་བ། སྐུ་སྨད་གསེར་ཕུར་རྣོ་དབལ་ཅན་སྐུ་དབྱིངས་རྩ་གསུམ་འཁོར་ལོ་ལྔ་ལྡན་དུ་ [17b] གསལ་ལ། རླུང་སྦྱོར་འཁྲུལ་འཁོར་གྱིས་གཅུན་པས་གདོད་ནས་གྲུབ་པའི་རྩ་རླུང་ཐིག་ལེའི་ཁམས་རྣམས་ཨོཾ་དཀར་ཨཱཿ་དམར་ཧཱུྃ་མཐིང་གི་རོལ་པར་གནས་གྱུར། དེའང་རྩ་དག་པ་སྤྲུལ་སྐུ། རླུང་དག་པ་ལོངས་སྐུ། ཐིག་ལེ་དག་པ་ཆོས་སྐུ་སྟེ་རྡོ་རྗེ་གསུམ་གྱི་རང་བཞིན་མངོན་དུ་བྱས་པར་བསམ་ཞིང༌། ལངས་ཏེ་ལུས་བསྲང་ཞིང་ལག་གཉིས་སྡིགས་མཛུབ་སྟ་ཟུར་གཉིས་ནས་གྱེན་དུ་ཤད་དེ་ནུ་སྟེང་ནས་སྟེང་གི་ནམ་མཁར་ཤེད་བསྐྱེད་ལ་འཕང་བ་ལན་གསུམ། དེ་ནས་ལག་གཉིས་མཐེབ་མཛུབ་བཀུག་པ་སོ་སོར་རྩེ་སྤྲད་ཅིང་གཞན་རྣམས་ལྷན་དུ་བརྐྱང་སྟེ་རྩེ་སྤྲད་པ་ནོར་བུ་མིག་གསུམ་པའི་རྒྱ་བཅས་ལ། རིམ་པར་སྤྱི་བོ། མགྲིན་པ། སྙིང་ག །ལྟེ་བ། གསང་གནས་རྣམས་སུ་གཏུག །ཕྱག་རྒྱ་ཕྲལ་ཏེ་ལག་གཉིས་ཁུ་ཚུར་མཆན་ཁུང་སོ་སོར་བཅུག་གྲུ་མོ་ཐད་ཀར་བརྒྱངས་ཏེ་ལུས་སྟོད་གཡས་སུ་ལན་གསུམ་གཅུ། དེ་བཞིན་གཡོན་དུ་ལན་གསུམ་གཅུས་མཐར། ཁུ་ཚུར་གཉིས་གདོང་ཐད་དུ་འཕང་བ་དང་ཆབ་གཅིག་དལ་གྱིས་མདུད་དུ་རྒུ་བཞིན་ངག་ནས་ཧ་ཞེས་དལ་ལ་རིང་བ་བརྗོད་པས་ནང་གི་རླུང་དུག་ཐམས་ཅད་ཕྱིར་དབྱུང་ཞིང་ཁུ་ཚུར་བོལ་བོང་ཁར་སྦུབ། སླར་རྐང་པའི་བར་ནས་ཡར་བརྒྱུད་དེ་ཤད་ [18a] བཞིན་ལུས་བསྲང་ལ་ངག་གི་སྒྲ་མི་མངོན་པར་ཧཱུྃ་ཞེས་པས་ཡེ་ཤེས་ཀྱི་རླུང་ནང་དུ་དལ་གྱིས་རྔུབ་ལ། ཁུ་ཚུར་གཉིས་སྙིང་ག་ནས་སྨིན་མཚམས་ཐད་ཀྱི་ནམ་མཁར་འཕང་བ་དང་ཆབ་གཅིག་ངག་ནས་ཧཾ་ཞེས་རྩ་རླུང་ནང་དུ་ཤུགས་ཀྱིས་དྲངས་པའི་སྟོང་འདྲེན་དྲག་པོ་བྱ། དེའི་ཚེ་ཤེས་པ་སྤྱི་བོའི་ཧཾ་ལ་གཏད་དེ་ལུས་ཀྱི་རྩ་ཆེན་རྩ་ཆུང་རྩ་ཕྲན་ཐམས་ཅད་དབུ་མ་ཉིད་དུ་སྡུད་པར་བསམ། ཡང་སྔར་ལྟར་ཐུར་དུ་རྒུ་བཞིན་ཧ་ཞེས་རླུང་དུག་དབྱུང་བ་དང༌། ཧཱུྃ་ཞེས་གྱེན་དུ་བསྲང་སྟེ་ཡེ་ཤེས་ཀྱི་རླུང་རྔུབ་ཅིང༌། ཧཾ་ཞེས་སྟོང་འདྲེན་བྱ་བ་བཅས་ལན་གསུམ་བསྐྱར་རྗེས། འཕར་སྟངས་ཀྱིས་རྐང་པ་གྲུ་གང་ཙམ་གྱི་སར་བགྲད་པ་བགྲད་ཆེན་གྱི་འབེབས་གསུམ་བརྡབ་པས་ང་རྒྱལ་འཁྲུལ་པའི་འཁོར་ལོ་མཉམ་ཉིད་ཡེ་ཤེས་ཀྱི་དབྱིངས་སུ་བཤིགས་ནས་ལྟེ་བ་སྤྲུལ་པའི་འཁོར་ལོའི་རྩ་མདུད་ཐམས་ཅད་ཡོངས་སུ་གྲོལ་བར་བསམ། །ལྔ་པ་པདྨ་ཀཱི་ལ་ཡ་ནི། སྣང་སྲིད་དབང་ཆེན་ལྷུན་གྱིས་གྲུབ་པའི་དཀྱིལ་འཁོར་སོར་རྟོག་ཡེ་ཤེས་ཀྱི་རང་གདངས་འོད་ཟེར་དམར་པོ་འཕྲོ་བའི་དབུས་སུ་རང་ཉིད་པདྨ་ཀཱི་ལ་ཡ་དམར་གསལ་གཡས་པདྨ་དམར་པོའི་སྡོང་བུ་དང་གཡོན་དབང་གི་ཟངས་ཕུར་འདྲིལ་བ། [18b] སྐུ་སྨད་ཟངས་ཕུར་རྣོ་དབལ་ཅན་སྐུ་དབྱིངས་རྩ་གསུམ་འཁོར་ལོ་ལྔ་ལྡན་གྱི་སྙིང་གའི་ཐད་ཀྱི་དབུ་མའི་ནང་ཁོངས་སུ་ཨོཾ་དཀར་ཨཱཿ་དམར་ཧཱུྃ་མཐིང་གསུམ་བརྩེགས་མར་གནས་པ། དེ་ལས་འོད་ཟེར་རྃ་ཡིག་དམར་པོ་རྡུལ་ཕྲན་ལྟ་བུས་མཚན་པ་གྲངས་མེད་མེ་ལས་མེ་སྟག་ཆད་པ་བཞིན་དུ་འཕྲོས་ཏེ་ལུས་ཀྱི་རྩ་ཆེན་རྩ་ཆུང་རྩ་ཕྲན་ཐམས་ཅད་ཏིལ་གྱི་གང་བུ་ཕུར་པ་ལྟར་གང་བར་བསམ། སྣ་བུག་གཉིས་ནས་བྱིན་རླབས་ཡེ་ཤེས་ཀྱི་རླུང་ནང་དུ་རྔུབ་པ་རྩ་གནས་ཀྱི་རྃ་ཡིག་ཀུན་ལ་ཕོག་པས། མེ་རླུང་འཐབ་པའི་བྱེད་ལས་ཀྱིས་མ་དག་སྙིགས་མའི་རྩ་རླུང་ཐིག་ལེའི་ཁམས་རྣམས་སྟོང་གསལ་ཀུན་ཁྱབ་ཡེ་ཤེས་གསུམ་ལྡན་གྱི་རོལ་བར་ལྷག་མེད་དུ་བསྲེགས་ནས་དྭངས་མ་འོད་ཕུང་དཀར་དམར་མཐིང་གའི་རྣམ་པར་གྱུར་ཏེ་རང་ལུས་འོད་ཕུང་ཡེ་ཤེས་མེ་དཔུང་འབར་བའི་རང་བཞིན་ཅན་དུ་གསལ་ཞིང༌། སྣ་ཚོགས་གར་གྱི་རོལ་པས་ཁམས་གསུམ་ན་གནས་པའི་སེམས་ཅན་རྣམས་ཀྱི་སྣང་སེམས་ལ་རང་དབང་བསྒྱུར་ནས་ཟག་མེད་བདེ་བ་ཆེན་པོའི་ས་ལ་བཙན་ཐབས་སུ་སྦྱོར་བར་དམིགས་ལ། ལངས་ཏེ་ཁུ་ཚུར་བསྐོར་རྒྱང་གིས་ལག་གཉིས་སྙིང་གར་བསྣོལ་བ་དང་ཆབ་གཅིག་འཕར་སྟངས་ཀྱིས་རྐང་པ་གཉིས་རྟིང་པ་སྤྲད་དེ་སོར་ [19a] མོ་རྣམས་སར་བཙུག་པུས་མོ་ཕྱིར་བགྲད་ལ་གཞོག་གཡས་སུ་ལན་གསུམ་རྒུ། དེ་བཞིན་གཡོན་དུ་ལན་གསུམ་རྒུ་བའི་མཐར། འཕར་སྟངས་ཀྱིས་རྐང་པ་གཡས་བརྐྱང་པའི་འདོར་སྟབས་བགྲད། ལག་གཡོན་སྡིགས་མཛུབ་དཀུར་བརྟེན། གཡས་སྡིགས་མཛུབ་ནང་བསྐོར་གྱིས་ནུ་སྟེང་ནས་གཡས་ཕྱོགས་ཀྱི་ནམ་མཁར་ལན་གསུམ་འཕེན་ལ་འཕར་བསྡུ། ཡང་འཕར་སྟངས་ཀྱིས་རྐང་པ་གཡོན་བརྐྱང་པའི་འདོར་སྟབས་བགྲད། ལག་གཡས་སྡིགས་མཛུབ་དཀུར་བརྟེན། གཡོག་སྡིགས་མཛུབ་ནང་བསྐོར་ནུ་སྟེང་ནས་གཡོན་ཕྱོགས་ཀྱི་ནམ་མཁར་ལན་གསུམ་འཕང་ལ། འཕར་གྱིས་སྔར་བཞིན་བསྡུ། སླར་ཡང་འཕར་སྟངས་ཀྱིས་རྐང་པ་གཡོན་བརྐྱང་པའི་འདོར་སྟབས་བགྲད། ལག་གཉིས་སྡིགས་མཛུབ་ནང་བསྐོར་གྱིས་ནུ་སྟེང་སོ་སོ་ནས་སྨིན་མཚམས་ཐད་ཀྱི་ནམ་མཁར་ལན་གསུམ་འཕང༌། དེ་ནས་ལག་གཉིས་པད་བསྐོར་གྱིས་སྙིང་གའི་ཐད་དུ་ཐལ་མོ་སྦྱར་ཏེ་ཕུར་པ་འདྲིལ་ཞིང་འདེབས་ཚུལ་བྱས་ལ་ཐལ་མོ་དབྱེ། ཡང་པད་སྐོར་དང་ཕུར་འདེབས་ལན་གསུམ་བསྐྱར་ནས་འཕར་བསྡུས་ལ། ལག་གཉིས་ [19b] ཐལ་མོ་ཁ་སྦུབས་གཤིབས་ཏེ་ལུས་རྒུར་སྟབས་ཀྱིས་མདུན་དུ་གོམ་ཆུང་གསུམ་རྒྱུག་ཐོག་ནས་ཕྱིར་འཕར་གྱིས་རྒུར་འབེབས་གསུམ་བརྡབ། དེའི་ཚེ་སྔར་གྱི་སྙིང་གའི་ཨོཾ་ཡིག་འོད་དཀར་པོའི་རྣམ་པས་རྩ་ལ་ཐིམ། ཨཱཿཡིག་འོད་དམར་པོའི་རྣམ་པས་རླུང་ལ་ཐིམ། ཧཱུྃ་ཡིག་འོད་མཐིང་གའི་རྣམ་པས་ཐིག་ལེ་ལ་ཐིམ་པས་རླུང་ལྔ་ལོག་པ་རང་མལ་དུ་བསད། ཐིག་ལེ་དག་པ་སངས་རྒྱས། རླུང་དག་པ་དམ་ཆོས། རྩ་དག་པ་དགེ་འདུན། དེ་བཞིན་དུ་ཐིག་ལེ་ཆོས་སྐུ་དང་མཁའ་འགྲོ། རླུང་ལོངས་སྐུ་དང་ཡི་དམ། རྩ་སྤྲུལ་སྐུ་དང་བླ་མའི་རོལ་བར་ཚིག་རྫོགས་སུ་གྲུབ་པར་གསལ་ཞིང༌། དེ་ལྟར་རྡོ་རྗེའི་གར་སྟབས་བསྒྱུར་བས་འདོད་ཆགས་འཁྲུལ་པའི་འཁོར་ལོ་སོར་རྟོག་ཡེ་ཤེས་ཀྱི་དབྱིངས་སུ་བཤིགས་ཏེ་མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་རྣམས་ཡོངས་སུ་གྲོལ་བར་བསམ། །དྲུག་པ་ཀརྨ་ཀཱི་ལ་ཡ་ནི། སྣང་སྲིད་དྲག་པོ་ལྷུན་གྱིས་གྲུབ་པའི་དཀྱིལ་འཁོར་བྱ་གྲུབ་ཡེ་ཤེས་ཀྱི་རང་གདངས་འོད་ཟེར་ལྗང་ཀུ་འཕྲོ་བའི་དབུས་སུ་རང་ཉིད་ཀརྨ་ཀཱི་ལ་ཡ་ལྗང་ནག་གཡས་གནམ་ལྕགས་ཀྱི་རྡོ་རྗེ་རྒྱ་གྲམ་དང་གཡོན་དྲག་པོའི་ལྕགས་ཕུར་འདྲིལ་བ། སྐུ་སྨད་ལྕགས་ཕུར་རྣོ་དབལ་ཅན་སྐུ་དབྱིངས་རྩ་གསུམ་ [20a] འཁོར་ལོ་ལྔ་ལྡན་གྱི་སྙིང་གའི་ཐད་ཀྱི་དབུ་མའི་ནང་ཁོངས་སུ་ཨོཾ་ཡིག་མཐིང་གའི་མཐའ་སྐོར་མདུན་དུ་ཧཱུྃ་དཀར་པོ་གཡས་སུ་ཏྲཱྃ་སེར་པོ་རྒྱབ་ཏུ་ཧྲཱིཿ དམར་པོ་གཡོན་དུ་ཨཱཿལྗང་ཀུ་རྣམས་སྣུམ་འདྲིལ་འོད་ཕུང་གསལ་འཚེར་འབར་བ། དེ་ལས་འོད་ཟེར་ཁ་དོག་ལྔ་ལྡན་དཔག་ཏུ་མེད་པ་འཕྲོས་པས་ལུས་ཀྱི་ནང་ཐམས་ཅད་ཁྱབ་སྟེ་མ་དག་རྩ་རླུང་ཐིག་ལེའི་ཁམས་རྣམས་དག་དབྱིངས་དྭངས་མ་སྐུ་ལྔ་ཡེ་ཤེས་ལྔའི་རོལ་པར་སྨིན། ཡིག་འབྲུ་ལྔ་ལས་དེ་འདྲ་བ་མང་དུ་མཆེད་དེ་དབུས་དང་མདུན་རྒྱབ་གཡས་གཡོན་གྱི་རྩ་ཁམས་ཡོངས་ལ་ཁྱབ་པས་རྩའི་དྲྭ་བ་ཇི་སྙེད་པ་ཐམས་ཅད་ཡེ་ཤེས་འཁོར་ལོའི་རང་བཞིན་དུ་དག་པར་བསམ་ཞིང༌། རླུང་འབྱིན་འཇུག་གནས་གསུམ་སྔགས་ཀྱི་རང་བཞིན་དུ་ལ་བཟླ་བའི་ཕྱིར། ཨོཾ་གྱིས་རྔུབ་ཅིང་ནང་དུ་འཇུག་པ་དང༌། ཨཱཿ་ཡིས་དབུ་མར་འདྲེན་ཅིང་ཅི་གནས་སུ་འཇོག ཧཱུྃ་གིས་རྩ་ཁམས་རྣམས་སུ་གཞིལ་ཏེ་དལ་བུས་ཕྱི་རོལ་དུ་དབྱུང་བ་སྟེ། དེ་ལྟར་རྡོ་རྗེའི་བཟླས་པ་ལན་དགུའམ་གསུམ་སོགས་སྐབས་དང་བསྟུན་ནས་བསྐྱར་རྗེས། སྐྱིལ་ཀྲུང་བཤིགས་ཏེ་འཕར་སྟངས་ཀྱིས་གཡས་སུ་ཉལ་ལ་ལག་གཡས་ཁུ་ཚུར་ནུ་སྟེང་གཡོན་དུ་བཞག་ཅིང་རྐང་ [20b] གཡས་བསྐུམ། རྐང་ལག་གཡོན་ཟུང་གི་སོར་མོ་རྣམས་ཕྲལ་ཏེ་ཤུགས་ཀྱིས་བར་སྣང་དུ་ལན་གསུམ་འཕངས་པས་གཡོན་ཕྱོགས་ཀྱི་རྩ་མདུད་རྣམས་ཁྲོལ་མར་ཞིག་པར་བསམ། ཡང་འཕར་སྟངས་ཀྱིས་གཡོན་ཕྱོགས་སུ་སྔར་བཞིན་ཉལ་ཏེ་རྐང་ལག་གཡས་བཟུང་ལན་གསུམ་འཕངས་པས་དེ་ཕྱོགས་ཀྱི་རྩ་མདུད་ཐམས་ཅད་གྲོལ་བར་བསམ་པ་དང༌། སླར་ཡང་འཕར་སྟངས་ཀྱིས་གན་རྐྱལ་དུ་ཉལ་ནས་རྐང་ལག་བཞི་ཀ་ནམ་མཁར་འཕང་བའི་ཤུགས་ཀྱིས་ལུས་འཕར་སྟངས་དང་བཅས་པ་ལན་གསུམ་བྱ། དེ་ནས་རྐང་མཐིལ་གཉིས་ཁ་སྦྱར་ལ་པུས་མོ་ཕྱིར་བགྲད། ལུས་བསྲང་སྟེ་ལག་གཉིས་ཁུ་ཚུར་ཁ་སྦུབས་སུ་པུས་སྟེང་དུ་བཞག འོག་རླུང་བསྐུམ་ལ་ཅུང་ཟད་ནང་དུ་རྒུ་བཞིན་ངག་ནས་ཧཾ་ཞེས་པའི་སྒྲས་རྒྱུ་ཞབས་ནང་རོལ་རྣམས་སྒལ་པ་ལ་དྲག་ཏུ་སྦྱར། ལྕེ་ཡ་རྐན་ལ་སྒྲིལ། མིག་གྱེན་དུ་ལྡོག །ཤེས་པ་སྤྱི་བོའི་ཧཾ་ལ་གཏད་དེ་ལུས་ཤུགས་ཀྱིས་གྱེན་དུ་འཐེན་བཞིན་མགོ་ལྕོག་ལན་གསུམ་དང༌། ཡང་ཧཾ་ཞེས་སྔར་ལྟར་སྟོང་འདྲེན་མགོ་ལྕོག་ལན་གསུམ་རྫོགས་མཐར་ཧར་གྱིས་ལངས་ཏེ་ལུས་བསྲང་ནས་ལག་གཉིས་ཐལ་མོ་ནང་བསྐོར་གྱིས་གཡས་ཕྱོགས་སུ་ཕུར་པ་འདྲིལ་ཚུལ་བྱས་པས་ཞེ་སྡང་རྒྱལ་པོའི་ [21a] སྡེ་ཚོགས་རྡུལ་དུ་བརླག་པར་བསམ་ཞིང་ཐལ་མོ་དེ་ཕྱོགས་སུ་དབྱེ། དེ་བཞིན་གཡོན་ཕྱོགས་སུ་འདྲིལ་བས་འདོད་ཆགས་མོ་གདོན། མདུན་ངོས་སུ་འདྲིལ་བས་གཉན་དང་ས་བདག །འོག་ཏུ་ས་ལ་གདབ་ཚུལ་གྱིས་གཏི་མུག་ཀླུ་གདོན། སྟེང་དུ་འཕྱར་ཞིང་འདྲིལ་བས་ལྷ་གདོན་སྡེ་བརྒྱད་ཐམས་ཅད་བརླག་པར་བསམ། དེ་ནས་ཁུ་ཚུར་སྐོར་རྒྱང་ཐོག་སྔར་བཛྲ་ཀཱི་ལ་ཡའི་སྐབས་བཞིན་རྡོ་རྗེའི་ལུས་རྒྱ་བྱས་ལ་ལུས་ཀུན་ཤུགས་ཀྱིས་གྱེན་དུ་ལན་གསུམ་འཐེན་མཐར། རྡོ་རྗེའི་ཐོག་འབེབས་ལན་གསུམ་བརྡབ་པས། ཕྲག་དོག་འཁྲུལ་པའི་འཁོར་ལོ་བྱ་གྲུབ་ཡེ་ཤེས་ཀྱི་དབྱིངས་སུ་བཤིགས་ཏེ་གསང་གནས་བདེ་སྐྱོང་འཁོར་ལོའི་རྩ་མདུད་རྣམས་ཡོངས་སུ་གྲོལ་བར་བསམ། །བདུན་པ་བུདྡྷ་ཀཱི་ལ་ཡ་ནི། སྣང་སྲིད་བདེ་ཆེན་ལྷུན་གྱིས་གྲུབ་པའི་དཀྱིལ་འཁོར་ཆོས་དབྱིངས་ཡེ་ཤེས་ཀྱི་རང་གདངས་འོད་ཟེར་མཐིང་ག་འཕྲོ་བའི་དབུས་སུ་རང་ཉིད་བུདྡྷ་ཀཱི་ལ་ཡ་མཐིང་ནག་གཡས་གནམ་ལྕགས་ཀྱི་འཁོར་ལོ་རྩིབས་བརྒྱད་པ་དང་གཡོན་རི་རབ་ཀྱི་ཕུར་བུ་འདྲིལ་བ། སྐུ་སྨད་ལྕགས་སྲེགས་ཀྱི་ཕུར་བུ་རྣོ་དབལ་ཅན། སྐུ་དབྱིངས་རྩ་གསུམ་འཁོར་ལོ་ལྔ་ལྡན་གྱི་སྤྱི་བོའི་ [21b] རྩ་འཁོར་གྱི་དབུས་སུ་ཆོས་འཁོར་རྩིབས་བརྒྱད་པའི་ལྟེ་བར་ཐིག་ལེ་དཀར་པོ་ཧཾ་ཡིག་གིས་མཚན་པ་དང་། གསང་གནས་ཀྱི་འཁོར་ལོའི་དབུས་སུ་ཐིག་ལེ་སམར་པོ་ཨ་ཤད་ཀྱིས་མཚན་པ་བཅས་གསལ་ལ། རླུང་ཁུག་གསུམ་བཟུང་བའི་ཚེ་ཨ་ཤད་ལས་མེ་ཁྱུར་གྱིས་འབར་བ་ཡར་མཆེད་དེ་སྤྱི་བོའི་ཧཾ་ལ་རེག་པས་དེ་ལས་བྱང་སེམས་བདུད་རྩིའི་རྒྱུན་སྨྱུག་སྦུབས་ནས་ཆུ་དྲངས་པ་ལྟར་ཐིག་ལེ་བཅུ་དྲུག་མགྲིན་པར་བབས་པས་དགའ་བའི་ཡེ་ཤེས་རྒྱུད་ལ་སྐྱེས། ཡང་རླུང་ཁུག་གསུམ་གྱིས་དེའི་ཕྱེད་ཆ་ཐིག་ལེ་བརྒྱད་སྙིང་གར་བབས་པས་མཆོག་དགའི་ཡེ་ཤེས། ཡང་རླུང་ཁྲག་གསུམ་གྱིས་དེའི་ཕྱེད་ཆ་ཐིག་ལེ་བཞི་ལྟེ་བར་བབས་པས་ཁྱད་པར་གྱི་དགའ་བའི་ཡེ་ཤེས། ཡང་རླུང་ཁུག་གསུམ་གྱིས་དེའི་ཕྱེད་ཆ་ཐིག་ལེ་གཉིས་གསང་བར་བབས་པས་ལྷན་ཅིག་སྐྱེས་དགའི་ཡེ་ཤེས་རྒྱུད་ལ་སྐྱེས། དེ་ནས་ཐིག་ལེ་གཅིག་གསང་གནས་ཀྱི་གཏུམ་མོའི་ཨ་ཤད་ལ་ཕོག་པས་མེ་འབར་བའི་སྟེང་དུ་སྣུམ་ཁོལ་མ་བླུགས་པ་ལྟར་བདེ་སྟོང་ཡེ་ཤེས་ཀྱི་མེ་ཆེར་འབར་བའི་ཤུགས་ཀྱིས་གསང་གནས་ཀྱི་དྭངས་མའི་ཐིག་ལེ་དེ་ཉིད་སྤྲུལ་བའི་འཁོར་ལོར་ལུགས་སུ་ལྡོག་པས་དགའ་བའི་ཡེ་ཤེས། དེ་བཞིན་དུ་ཆོས་ཀྱི་འཁོར་ལོར་ [22a] ལྡོག་པས་མཆོག་དགའ། ལོངས་སྤྱོད་འཁོར་ལོར་ལྡོག་པས་ཁྱད་དགའ། བདེ་ཆེན་འཁོར་ལོར་ལྡོག་པས་ལྷན་ཅིག་སྐྱེ་ས་དགའི་ཡེ་ཤེས་སྐྱེས་བརྟན་གོང་འཕེལ་དུ་བྱས། མེ་དང་ཐིག་ལེ་གཉིས་སུ་མེད་པར་མཆེད་དེ་སྒོ་གསུམ་ཡོངས་ལ་ཁྱབ་པས་བདེ་སྟོང་ཟག་པ་མེད་པའི་ཡེ་ཤེས་ཉམས་སུ་མྱོང་བར་བསམ་ཞིང༌། ལངས་ཏེ་ཁུ་ཚུར་བསྐོར་རྒྱང་ཐོག་ཐལ་མོ་གཉིས་ཐག་སྒྲ་དང་བཅས་བརྡབ་ལ་ལག་གཡོན་འོག་དང་གཡས་སྟེང་དུ་བྱས་ཏེ་བསྣོལ་ཞིང་ལག་རྒྱབ་སྤྲད་པའི་སོར་མོ་རྣམས་ཕན་ཚུན་སྦྲེལ་བ་འཁོར་ལོའི་རྒྱ་ཕྲག་པ་གཡས་ཀྱི་སྟེང་ནས་གཡས་སུ་ལན་གསུམ་བསྐོར། དེ་ནས་འཕར་སྟངས་ཀྱིས་རྐང་པ་གཡས་བརྐྱང་པའི་གྱད་སྟབས་བཅས་ལག་གཡོན་སྡིགས་མཛུབ་དཀུར་བརྟེན། གཡས་སྡིགས་མཛུབ་ནུ་ཐད་ནས་ནང་བསྐོར་གྱིས་ས་ལ་གཟིར་བའི་ཚུལ་དུ་འཕང་བ་དང་སྦྲགས་ཕཊ་དྲག་པོ་བརྗོད་པས་ཉོན་མོངས་པ་བརྒྱད་ཁྲི་བཞི་སྟོང་གིས་ཀུན་ནས་བསླངས་པའི་གདོན་བགེགས་གནོད་བྱེད་ཐམས་ཅད་ཡུམ་སངས་རྒྱས་སྤྱན་མའི་མཁའ་རུ་གཏོར་བར་བསམ། ཡང་འཕར་བསྡུས་ལ་ཁུ་ཚུར་བསྐོར་རྒྱང་ཐོག་ཐལ་བརྡབ་བཅས་ [22b] ལག་གཡས་འོག་དང་གཡོན་སྟེང་དུ་བྱས་པའི་ལག་རྒྱབ་བསྣོལ་ལ་སྔར་བཞིན་འཁོར་ལོའི་རྒྱ་བྱས་པ་ཕྲག་པ་གཡོན་གྱི་སྟེང་ནས་གཡོན་དུ་ལན་གསུམ་བསྐོར་ཞིང༌། འཕར་སྟངས་ཀྱིས་རྐང་གཡོན་བརྐྱང་པའི་གྱད་སྟབས་དང་ལག་གཡས་སྡིགས་མཛུབ་དཀུར་བརྟེན། གཡོན་སྡིགས་མཛུབ་ནང་བསྐོར་ནུ་ཐད་ནས་མདུན་གྱིས་གཞིར་གཟིར་ཏེ་ཕཊ་བརྗོད། དེ་ལྟར་གཡས་གཡོན་སྤེལ་མ་ལན་གསུམ་སོང་ནས་འཕར་བསྡུ། དེ་ནས་འཕར་སྟངས་ཀྱིས་རྐང་པ་གཉིས་ཕན་ཚུན་མཐོ་གང་ཙམ་བགྲད་པའི་བགྲད་ཆུང་གི་འབེབས་གསུམ་དང༌། འབེབས་གདན་གྱི་ཕྱོགས་བཞི་དབུས་ལྔར་རིམ་བཞིན་བསྐོར་ཏེ་འབེབས་ཆུང་རེ་བརྡབ་པས་གཏི་མུག་འཁྲུལ་པའི་འཁོར་ལོ་ཆོས་དབྱིངས་ཡེ་ཤེས་སུ་བཤིགས་ཏེ་སྤྱི་བོ་བདེ་ཆེན་གྱི་འཁོར་ལོའི་རྩ་མདུད་རྣམས་ཡོངས་སུ་གྲོལ་བར་བསམ། ། ༈ དེ་ནས་ཁྲོ་བོ་བཅུའི་འཁྲུལ་འཁོར་ལས། བརྒྱད་པ་ཧཱུྃ་ཀཱ་ར་ནི། སྣང་སྲིད་རབ་འཇིགས་དུར་ཁྲོད་འབར་བའི་ཞིང་ཁམས་ཆེན་པོའི་དབུས་སུ་པདྨ་ཟླ་ཉིའི་གདན་ལ་རང་ཉིད་ཁྲོ་ཆེན་ཧཱུྃ་ཀཱ་ར་མཐིང་ནག་ཁྲོ་བོའི་ཆས་ཅན། ཕྱག་གཉིས་མདའ་གཞུ་འགེང་ཞིང་ཞབས་ཟུང་གྱད་ཀྱི་འདོར་སྟབས་སུ་བཞུགས་པ། [23a] སྐུ་དབྱིངས་རྩ་གསུམ་འཁོར་ལོ་ལྔ་ལྡན་དུ་གསལ་ལ། ལངས་ཏེ་ཁུ་ཚུར་བསྐོར་རྒྱང་གིས་སྡིགས་མཛུབ་ནམ་མཁར་འཕང་ལ་ཧཱུྃ་ཞེས་རླུང་ལྟེ་འོག་ཏུ་མནན། དེ་ཐོག་ནས་ལུས་རྒུ་བཞིན་སྡིགས་མཛུབ་སྦུབས་པ་རྐང་པའི་བོལ་གོང་ལ་མ་རེག་ཙམ་ནས་ཧུ་ཞེས་སྟོང་འདྲེན་དང་བཅས་རྐང་པའི་བར་ནས་གྱེན་དུ་ཤད་དེ་སྙིང་གའི་ཐད་ནས་སྟེང་གི་ནམ་མཁར་འཕང་བ་ལན་གསུམ། དེ་ནས་འཕར་སྟངས་ཀྱིས་གཡོན་བརྐྱང་པའི་གྱད་སྟབས་བགྲད་ལ་ལག་གཉིས་ཁུ་ཚུར་གཡོན་ཕྱོགས་སུ་འཕང་བའི་ཐོག་ལག་གཡོན་སྡིགས་མཛུབ་ཀྱིས་གཞུ་འཛིན་ཚུལ་དང་གཡས་སྡིགས་མཛུབ་ནང་བསྟན་མདའ་འགེང་པ་གཞུ་རྒྱུད་ཤུགས་ཀྱིས་འཐེན་ཅིང་འཕང་བའི་ཚུལ་བྱས་ལ་འཕར་བསྡུ། ཡང་འཕར་སྟངས་ཀྱིས་གོང་བཞིན་གྱད་སྟབས་མདའ་གཞུ་འགེངས་ཚུལ་བཅས་ལན་གསུམ་སོང་ནས། རྐང་པ་ཁྲུ་གང་ཙམ་དུ་བགྲད་པའི་བགྲད་ཆེན་གྱི་འབེབས་གསུམ་བརྡབ་པས་སྟེང་ཕྱོགས་ལྷ་གདོན་གྱི་གནོད་གདུག་འཁྲུལ་པའི་འཁོར་ལོ་ཐམས་ཅད་བཤིགས་པར་བསམ། །དགུ་པ་རྣམ་རྒྱལ་ནི། རང་ཉིད་རྣམ་པར་རྒྱལ་བ་དཀར་པོ་གཡས་ཏྲི་ཤུལ་དང་གཡོན་ཕུར་བུ་འཛིན་པར་གསལ་ལ། ལངས་ [23b] ཏེ་ཁུ་ཚུར་སྦུབས་རྒྱང་ལན་གསུམ་འཕང་རྗེས། འཕར་སྟངས་ཀྱིས་རྐང་པ་གཡོན་བརྐྱང་པའི་གྱད་སྟབས་བགྲད། ལག་གཉིས་མཛུབ་མོ་དང་སྲིན་ལག་ནང་དུ་བསྐུམ་ཞིང་གཞན་གསུམ་བརྐྱང་པ་ཏྲི་ཤུལ་གྱི་རྒྱ་སྙིང་གར་བསྣོལ་ནས་འགྲོལ་བ་དང་སྦྲགས་གཡས་གཡོན་སོ་སོའི་དཔུང་པའི་ཐད་ཀྱི་བར་སྣང་ལ་བསྣུན་ཚུལ་བྱ། ཡང་སྙིང་གར་བསྣོལ་ཏེ་གཡས་གཡོན་དུ་བསྣུན་ཚུལ་གོང་བཞིན་ལན་གསུམ་བསྐྱར་རྗེས། འཕར་བསྡུས་ལ་འབེབས་ཆེན་གསུམ་བརྡབ་པས་ཤར་ཕྱོགས་དྲི་ཟའི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། །བཅུ་པ་གཤིན་རྗེ་གཤེད་ནི། རང་ཉིད་གཤིན་རྗེ་གཤེད་མཐིང་སེར་གཡས་དགྲ་སྟྭ་དང་གཡོན་ཕུར་བུ་འཛིན་པར་གསལ་ལ། ལངས་ཏེ་ལག་གཉིས་ཁུ་ཚུར་རྐང་པའི་བོལ་གོང་ནས་གྱེན་དུ་ཤད་དེ་ནུ་སྟེང་ཐད་ཀྱི་ནམ་མཁར་འཕང་བ་ལན་གསུམ་རྗེས། སྡིགས་མཛུབ་ཁ་ཕྱིར་བསྟན་སྤྱི་བོར་བསྣོལ་ཞིང་བཀྲོལ་ནས་ཐལ་མོ་པད་སྦུབས་ཀྱིས་རྣ་བའི་ཐད་གཡས་གཡོན་སོ་སོར་སེ་གོལ་རེ་གཏོགས་པ་ལན་གསུམ་མཐར། འཕར་སྟངས་ཀྱིས་རྐང་པ་གཡོན་བརྐྱང་པའི་གྱད་སྟབས་བགྲད། ལག་གཉིས་ནུ་སྟེང་ནས་སྡིགས་མཛུབ་ནང་བསྐོར་གྱིས་གཡས་ [24a] ནམ་མཁར་བསྒྲེང་ཞིང་གཡོན་ས་ལ་གཟིར་བ་དང་ཆབ་གཅིག་ལྟ་སྟངས་གཟིར། ཡང་འཕར་སྟངས་ཀྱིས་བསྡུས་ལ་སླར་ཡང་གྱད་སྟབས་སྡིགས་མཛུབ་ལྟ་སྟངས་བཅས་གོང་བཞིན་ལན་གསུམ་བསྐྱར་རྗེས། རྒུར་འབེབས་གསུམ་བརྡབ་པས་ལྷོ་ཕྱོགས་གཤིན་རྗེའི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། བཅུ་གཅིག་པ་རྟ་མགྲིན་ནི། རང་ཉིད་རྟ་མགྲིན་དམར་ནག་གཡས་རལ་གྲི་དང་གཡོན་ཕུར་བུ་འཛིན་པར་གསལ་ལ། ལངས་ཏེ་ལག་གཉིས་ཁུ་ཚུར་ནང་བསྐོར་གྱིས་སྟ་ཟུར་གཡས་གཡོན་ནས་ཐུར་དུ་འཕང་ལ་ལུས་སྟོད་རྒྱབ་ཏུ་དགྱེ་ཞིང་མདུན་དུ་རྒུ་བ་ལན་གསུམ་སྤེལ་མཐར། མགོ་བོ་གཡས་བསྐོར་གསུམ་དང་གཡོན་བསྐོར་གསུམ། དེ་ནས་འཕར་སྟངས་ཀྱིས་རྐང་པ་གཡོན་བརྐྱང་པའི་གྱད་སྟབས་བྱས་ལ། མཆན་རྡེབ་དང་བཅས་ཁུ་ཚུར་གཉིས་ནུ་ཐད་ནས་མདུན་མཁར་འཕང་རྗེས། ལག་གཉིས་གུང་མོ་དང་སྲིན་ལག་གཉིས་བརྐྱང་པ་རྩེ་སྤྲད་མཛུབ་མོ་དང་མཐེའུ་ཆུང་ཕན་ཚུན་བསྣོལ། མཐེ་བོང་གཉིས་བསྒྲེང་བའི་རྟ་རྒྱ་སྤྱི་བོར་བཞག་སྟེ་ལུས་སྟོད་གྱེན་དུ་ཅུང་ཟད་འཐེན་བཞིན་ཨི་ཧི་ཧི་ཞེས་འཚེར་སྐད་བསྒྲག ཡང་ [24b] འཕར་བསྡུས་ཏེ་ཁུ་ཚུར་སྟ་ཟུར་ནས་ཐུར་དུ་འཕང་པ་སོགས་གོང་བཞིན་ལན་གསུམ་བསྐྱར་རྗེས། འཕར་བསྡུས་ལ་ལུས་གན་རྐྱལ་ཐོག་རྐང་ལག་བཞི་ནམ་མཁར་ཤུགས་ཀྱིས་འཕེན་པའི་སྒལ་འབེབས་གསུམ་བརྡབ་པས་ནུབ་ཕྱོགས་ཆུ་ལྷའི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། །བཅུ་གཉིས་པ་བདུད་རྩི་འཁྱིལ་བ་ནི། རང་ཉིད་བདུད་རྩི་འཁྱིལ་བ་ལྗང་ནག་གཡས་རྡོ་རྗེ་རྒྱ་གྲམ་དང་གཡོན་ཕུར་བུ་འཛིན་པར་གསལ་ལ། ཧར་གྱིས་ལངས་ཏེ་ལུས་བསྲང་ཐོག་ལག་གཉིས་ཁུ་ཚུར་གདོང་རྒྱང་ནམ་མཁར་འཕང་བ་ལན་གསུམ་མཐར། རྐང་པ་བརླ་གཡས་གཡོན་བསྣོལ་སྟབས་ཀྱིས་ལངས་ལ། ལག་གཉིས་གུང་མོ་གཉིས་བརྐྱང་པ་རྩེ་སྤྲད་ལྷག་མ་རྣམས་བསྣོལ་བ་རྡོ་རྗེ་རྩེ་གཅིག་པའི་རྒྱ་སྐེད་པའི་ཐད་ནས་གཡས་ཀྱི་རྒྱབ་ཏུ་ལན་གསུམ་དང༌། གཡོན་གྱི་རྒྱབ་ཏུ་ལན་གསུམ་ཤུགས་ཀྱིས་འཕང༌། ཡང་རྐང་པ་གཤིབས་ཏེ་ཁུ་ཚུར་གདོང་རྒྱང་སོགས་གོང་བཞིན་ཚར་གསུམ་བསྐྱར་རྗེས། རྡོ་རྗེའི་ཐོག་འབེབས་ལན་གསུམ་བརྡབ་པས་བྱང་ཕྱོགས་གནོད་སྦྱིན་གྱི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། །བཅུ་གསུམ་པ་དབྱུག་སྔོན་ནི། རང་ [25a] ཉིད་དབྱུག་པ་སྔོན་པོ་མཐིང་སྐྱ་གཡས་དབྱུག་ཏོ་དང་གཡོན་ཕུར་བུ་འཛིན་པར་གསལ་ལ། ལངས་ཏེ་ཁུ་ཚུར་ནང་བསྐོར་མཆན་ཚག་བཅས་ནུ་སྟེང་ནས་གདོང་ཐད་དུ་འཕང་བ་ལན་གསུམ་སོང་ནས། འཕར་སྟངས་ཀྱིས་རྐང་པ་གཡས་བརྐྱང་པའི་གྱད་སྟབས་བགྲད་ལ་སྡིགས་མཛུབ་གཡོན་དཀུར་བརྟེན། གཡས་སྡིགས་མཛུབ་ནང་བསྐོར་གྱིས་གཡས་ཕྱོགས་ཀྱི་ནམ་མཁར་འཕང་བ་ལན་གསུམ་མཐར་འཕར་བསྡུ། ཡང་འཕར་སྟངས་ཀྱིས་གཡོན་བརྐྱང་པའི་གྱད་སྟབས་དང་བཅས་སྡིགས་མཛུབ་གཡས་དཀུར་བརྟེན། གཡོན་ནང་བསྐོར་གྱིས་འཕང་བ་སོགས་གཡས་གཡོན་སྤེལ་མ་ལན་གསུམ་བསྐྱར་རྗེས། འཕར་བསྡུས་ལ་ལག་གཉིས་ཁུ་ཚུར་སྟ་ཟུར་ནས་གྱེན་དུ་ཤད་དེ་གདོང་ཐད་ཀྱི་ནམ་མཁར་ལན་གསུམ་འཕང་མཐར། བགྲད་ཆུང་གི་འབེབས་གསུམ་བརྡབ་བཞིན་ཕཊ་གསུམ་བརྗོད་པས་ཤར་ལྷོ་མེ་ལྷའི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། བཅུ་བཞི་པ་མི་གཡོ་བ་ནི། རང་ཉིད་མི་གཡོ་བ་ལྗང་ནག་གཡས་སྤུ་གྲི་དང་གཡོན་ཕུར་བུ་འདྲིལ་བར་གསལ་ལ། ལངས་ཏེ་ལག་གཉིས་ཁུ་ཚུར་ནང་བསྐོར་གྱིས་སྦུབས་ཏེ་སྟ་ཟུར་ [25b] གཡས་གཡོན་ནས་ཐུར་དུ་འཕང་བ་ལན་གསུམ། དེ་མ་ཐག་རྐང་པ་གཡས་ཀྱི་པུས་མོ་སར་བཙུག །གཡོན་མདུན་དུ་བརྐྱང་པའི་མཐིལ་ས་ལ་ཕབ་ཅིང་པུས་མོ་རོང་ངེ་བྱ། ལག་གཡོན་སྡིགས་མཛུབ་དཀུར་བརྟེན། གཡས་སྡིགས་མཛུབ་ནུ་ཐད་ནས་ནང་བསྐོར་གྱིས་གཡས་ཀྱི་ནམ་མཁར་འཕང་བ་ལན་གསུམ། ཡང་འཕར་སྟངས་ཀྱིས་ལངས་ཏེ་པུས་མོ་གཡོན་པ་སར་བཙུག །རྐང་གཡས་མདུན་དུ་ཕབ་ཅིང༌། ལག་གཡས་སྡིགས་མཛུབ་དཀུར་བརྟེན་ནས་གཡོན་གྱི་སྡིགས་མཛུབ་གཡོན་ཕྱོགས་སུ་འཕང་བ་ལན་གསུམ་མཐར། འཕར་སྟངས་ཀྱིས་ལངས་ཏེ་པུས་མོ་གཉིས་ཀ་སར་བཙུག །ལག་གཉིས་ནུ་ཐད་སྡིགས་མཛུབ་ནང་བསྐོར་གྱིས་མདུན་མཁར་འཕང་བ་ལན་གསུམ་སོང་ནས། ལངས་ཏེ་ལག་གཉིས་ཐལ་མོ་བཀན་ནས་སྟེང་གི་ནམ་མཁར་ཤུགས་ཀྱིས་བསྒྲེང་བ་དང་ཆབ་གཅིག་ལུས་གྱེན་དུ་འཕར་བ་ལ་བཏེགས་འབེབས་ཞེས་སུ་གྲགས་པ་ལན་གསུམ་དང༌། ལངས་སྟབས་སུ་ཕྱིར་དགྱེ་བ་དང་ནང་དུ་རྒུ་བ་གཉིས་ཀྱི་བར་ནས་འབབ་པ་དགྱེ་རྒུ་བར་འབེབས་སུ་གྲགས་པ་ལན་གསུམ་བརྡབ་པས་ལྷོ་ནུབ་སྲིན་པོའི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། [26a] བཅོ་ལྔ་པ་འདོད་རྒྱལ་ནི། རང་ཉིད་འདོད་པའི་རྒྱལ་པོ་དམར་གསལ་གཡས་བ་དན་དང་གཡོན་ཕུར་བུ་འཛིན་པར་གསལ་ལ། ལངས་ཏེ་ཁུ་ཚུར་བསྐོར་རྒྱང་ལན་གསུམ་འཕང་མཐར། ཁུ་ཚུར་གཉིས་ནུ་སྟེང་ནས་ནང་བསྐོར་སྦུབས་བཞིན་གཡོན་པས་གཡས་པ་དེད་པའི་ཚུལ་གྱིས་རྒྱབ་ལོགས་གཡས་སུ་ཤེད་བསྐྱེད་དེ་འཕེན་པ་གསུམ་དང༌། ཡང་གཡས་པས་གཡོན་པ་དེད་ཚུལ་གྱིས་རྒྱབ་ལོགས་གཡོན་དུ་འཕེན་པ་གསུམ་སོང་ནས། འཕར་སྟངས་ཀྱིས་རྐང་པ་གཡས་བརྐྱང་པའི་གྱད་སྟབས་བགྲད། ལག་གཡོན་སྡིགས་མཛུབ་དཀུར་བརྟེན། གཡས་སྡིགས་མཛུབ་དཔུང་མགོའི་ཐད་ནས་ནང་བསྐོར་གྱིས་དཔུང་པ་གཡོན་པའི་སྟེང་ནས་རྒྱབ་ཀྱི་ཕྱོགས་སུ་གཟིར་བ་ལན་གསུམ་མཐར་འཕར་བསྡུ། ཡང་འཕར་སྟངས་ཀྱིས་གོང་བཞིན་རྐང་ལག་གཡས་གཡོན་གོ་ལྡོག་སྤེལ་མ་ལན་གསུམ་བསྐྱར་རྗེས། ཁུ་ཚུར་བསྐོར་རྒྱང་སྔོན་དུ་འགྲོ་བས་འབེབས་ཆེན་གསུམ་བརྡབ་པས་ནུབ་བྱང་རླུང་ལྷའི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། །བཅུ་དྲུག་པ་ཁམས་གསུམ་རྣམ་རྒྱལ་ནི། རང་ཉིད་ཁམས་གསུམ་རྣམ་རྒྱལ་སེར་སྐྱ་གཡས་རྡོ་རྗེ་ [26b] དང་གཡོན་ཕུར་བུ་འཛིན་པར་གསལ་ལ། ལག་གཉིས་ཁུ་ཚུར་ནང་དུ་བསྐོར་བཞིན་ལངས་ཏེ་ནུ་སྟེང་ནས་གདོང་ཐད་དུ་འཕང༌། ཡང་འཕོང་ས་ལ་མ་རེག་ཙམ་དུ་སྡོད་མ་ཐག་ཁུ་ཚུར་ནང་དུ་བསྐོར་བཞིན་ལངས་ཏེ་འཕང་བ་དེ་འདྲ་ལན་གསུམ་སོང་ནས། འཕར་སྟངས་ཀྱིས་སྡིགས་མཛུབ་གཉིས་ནུ་ཐད་ནས་སྟེང་གི་ནམ་མཁར་འཕང༌། ཡང་འཕར་སྟངས་བཅས་གཡོན་བརྐྱང་པའི་གྱད་སྟབས་བགྲད་ལ་སྡིགས་མཛུབ་གཡས་གཡོན་སོ་སོའི་བར་སྣང་དུ་འཕེན། ཡང་འཕར་སྟངས་ཀྱིས་རྐང་པ་གཉིས་གཤིབས་ཏེ་སྡིགས་མཛུབ་སྟ་ཟུར་གཡས་གཡོན་ནས་ཐུར་དུ་འཕང་ལ་ལུས་ཤུགས་ཀྱིས་གྱེན་དུ་འཐེན་ཚུལ་བྱས་མཐར། འབེབས་ཆེན་གསུམ་བརྡབ་པས་བྱང་ཤར་དབང་ལྡན་གྱི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། །བཅུ་བདུན་པ་སྟོབས་ཆེན་ནི། རང་ཉིད་སྟོབས་པོ་ཆེ་ནག་པོ་གཡས་ཐོ་བ་དང་གཡོན་ཕུར་བུ་འཛིན་པར་གསལ་ལ། རྐང་པ་གཉིིས་སྐྱིལ་ཀྲུང་མ་ཤིགས་པར་ལག་གཉིས་ཁུ་ཚུར་བསྐོར་རྒྱང་ཐོག་སྡིགས་མཛུབ་ནང་སྐོར་གྱིས་གཡས་དཀུར་བརྟེན་ཅིང་གཡོན་གྱི་སྡིགས་མཛུབ་གཡོན་ཕྱོགས་སུ་ལན་གསུམ་འཕེན་བཞིན་ལྟ་སྟངས་ [27a] གཟིར། ཡང་སྡིགས་མཛུབ་ནང་བསྐོར་ཐོག་ལག་གཡས་གཡོན་གོ་བརྗེས་ཏེ་གཡས་སུ་ལྟ་སྟངས་བཅས་སྡིགས་མཛུབ་འཕང་བ་ལན་གསུམ། དེ་ནས་ཁུ་ཚུར་གཉིས་ནང་བསྐོར་གྱིས་པུས་སྟེང་དུ་བཞག་ལ་སྟོང་འདྲེན་དྲག་པོས་ལྟེ་བའི་རླུང་ཤུགས་ཀྱིས་གྱེན་དུ་འཐེན་ཅིང་ལྟ་སྟངས་སྟེང་གི་ནམ་མཁར་གཏོད། སླར་ཡང་སྡིགས་མཛུབ་ནང་བསྐོར་གྱིས་གཡས་གཡོན་དུ་འཕང་བ་སྟོང་འདྲེན་བཅས་གོང་བཞིན་ལན་གསུམ་ཚང་ནས། ལག་གཡོན་ཁུ་ཚུར་དཀུར་བརྟེན་ཅིང་གཡས་ཀྱི་ཐལ་མོ་ནང་བསྐོར་བཅས་གཡས་ཕྱོགས་ཀྱི་ས་གཞིར་ལན་གསུམ་བརྡབ། དེ་བཞིན་གོ་བརྗེས་ཏེ་གཡོན་གྱི་ཐལ་མོས་གཡོན་གྱི་ས་གཞིར་ལན་གསུམ་བརྡབ་རྗེས། སྐྱིལ་ཀྲུང་བཤིགས་ཏེ་འབེབས་ཆུང་གསུམ། བར་འབེབས་གསུམ། འབེབས་ཆེན་གསུམ་བཅས་བརྡབ་པས་འོག་ཕྱོགས་བདག་གི་གནོད་གདུག་འཁྲུལ་འཁོར་ཐམས་ཅད་བཤིགས་པར་བསམ། །བཅོ་བརྒྱད་པ་ཕག་མོ་ནི། སྣང་སྲིད་དག་པ་མཁའ་སྤྱོད་འོག་མིན་གྱི་ཞིང་ཁམས་ཆེན་པོར་རང་ཉིད་རྡོ་རྗེ་ཕག་མོ་མཐིང་ནག་སྐུ་གཅེར་མོ་རུས་པའི་རྒྱན་ཅན། ཕྱག་གཡས་གྲི་གུག་རྣ་ལྟག་གཡས་ཀྱི་ཐད་སོར་འཕྱར་ཞིང་གཡོན་ [27b] ཐོད་ཁྲག་ཐུགས་ཀར་བསྣམས་པ། སྤྱི་བོར་ཕག་ཞལ་ནག་པོ་གྱེན་དུ་ངུར་བ། ཞབས་གཉིས་འདོར་སྟབས་ཀྱིས་པདྨ་ཉི་ཟླའི་གདན་ལ་འགྱིང་བའི་སྐུར་གསལ་ལ། ལངས་ཏེ་ཁུ་ཚུར་བསྐོར་རྒྱང་ཐོག་འཕར་སྟངས་ཀྱིས་རྐང་གཡས་མདུན་དུ་བརྐྱང་བའི་འདོར་སྟབས་བྱ། ལག་གཡོན་སྙིང་གར་ཐོད་ཁྲག་འཛིན་ཚུལ་དང༌། གཡས་སྡིགས་མཛུབ་གྲི་གུག་འཛིན་ཚུལ་གྱིས་རྣ་ལྟག་གཡས་ནས་ནང་དུ་བསྐོར་ཏེ་གཡས་ཕྱོགས་ཀྱི་ནམ་མཁར་འཕང་བ་ལན་གསུམ་སོང་ནས་འཕར་བསྡུ། ཡང་འཕར་སྟངས་ཀྱིས་གཡོན་བརྐྱང་པའི་འདོར་སྟབས་བགྲད། གཡས་གྲི་གུག་སྙིང་གར་འཛིན་ཚུལ་དང༌། གཡོན་ཐོད་ཁྲག་འཛིན་རྒྱ་དཔུང་པ་གཡོན་པའི་སྟེང་ནས་བསྐོར་ཏེ་བཟེད་ཅིང་ཞལ་དུ་རོལ་ཚུལ་གྱིས་རྩིབས་ལོགས་གཡོན་དུ་གཏུག་པ་ལན་གསུམ་སོང་ནས་འཕར་བསྡུ། དེ་ནས་ལག་གཡོན་ཁུ་ཚུར་དཀུར་བརྟེན་ཅིང་ལུས་གཡས་ཕྱོགས་སུ་རྒུར་ཏེ་ཐལ་མོ་ནང་བསྐོར་བཅས་རྐང་ལག་གཡས་པ་གཉིས་ཀྱི་མཐིལ་ས་ལ་བརྡབ་པ་ལན་གསུམ། ཡང་གོ་བརྗེད་ཏེ་རྐང་ལག་གཡོན་པ་གཉིས་ས་ལ་བརྡབ་པ་ལན་གསུམ་སོང་ནས། ལག་གཉིས་སྲིན་ལག་མཐེའུ་ཆུང་གཉིས་བརྐྱང་པ་རྩེ་སྤྲད་གུང་མཛུབ་ཕན་ཚུན་ [28a] བསྣོལ་ཞིང་མཐེ་བོང་གཉིས་བསྒྲེང་སྟེ་ཅུང་ཟད་བཀུག་པའི་ཕག་ཞལ་རྒྱ་སྤྱི་བོར་བཞག་ལ་ལུས་སྟོད་དགྱེ་རྒུ་བྱེད་བཞིན་ངུར་ཚུལ་གྱིས་ཝ་ར་ཧི་ཞེས་ལན་གསུམ་བརྗོད་མཐར། བགྲད་ཆུང་གི་འབེབས་གསུམ་བརྡབ་པས་ཁམས་གསུམ་སྣང་སྲིད་ཐམས་ཅད་ཡུམ་ཆེན་ཕག་མོའི་ཐུགས་གསང་ཆོས་ཉིད་ཆེན་པོར་འུབ་ཆུབ་པར་བསམ། །བཅུ་དགུ་པ་འཁོར་ལོ་རྒྱས་འདེབས་ནི། སྣང་སྲིད་འོག་མིན་ཆོས་དབྱིངས་བདེ་བ་ཆེན་པོའི་དཀྱིལ་འཁོར་དུ་རང་ཉིད་ཡུམ་ཆེན་འཁོར་ལོ་རྒྱས་འདེབས་མ་མཐིང་ནག་གཅེར་མོ་ཁྲོ་ཆགས་སྒེག་པའི་ཉམས་ཅན། ཕྱག་གཡས་ཁ་ཊྭཱཾ་རྩེ་གསུམ་འཕྱར་ཞིང་གཡོན་ཐོད་ཁྲག་ཐུགས་ཀར་འཛིན་པ། ཞབས་གཡས་བསྐུམ་གཡོན་བརྐྱང་པའི་གར་སྟབས་ཀྱིས་པདྨ་ཟླ་ཉིའི་གདན་ལ་རོལ་པ། སྐུ་དབྱིངས་རྩ་གསུམ་འཁོར་ལོ་ལྔ་ལྡན་གྱི་སྤྱི་བོའི་རྩ་འཁོར་གྱི་དབུས་སུ་སངས་རྒྱས་རིགས་ཀྱི་ཡུམ་དབྱིངས་ཕྱུག་མ་མཐིང་ག དེ་བཞིན་དུ་མགྲིན་པར་པདྨ་རིགས་ཀྱི་ཡུམ་གོས་དཀར་མོ་དམར་མོ། སྙིང་གར་རྡོ་རྗེ་རིགས་ཀྱི་ཡུམ་མཱ་མ་ཀི་དཀར་མོ། ལྟེ་བར་རིན་ཆེན་རིགས་ཀྱི་ཡུམ་སངས་རྒྱས་སྤྱན་མ་སེར་མོ། གསང་བར་ལས་ཀྱི་རིགས་ [28b] ཀྱི་ཡུམ་དམ་ཚིག་སྒྲོལ་མ་ལྗང་མོ་རྣམས་ཀྱི་སྐུ་དབྱིངས་སུ་ཞིང་ཁམས་ལྔའི་བཀོད་པ་མཚོ་ལ་གཟའ་སྐར་བཀྲ་བ་བཞིན་མ་འདྲེས་ཡོངས་སུ་རྫོགས་པར་གསལ་ལ། ལངས་ཏེ་ཁུ་ཚུར་བསྐོར་རྒྱང་ཐོག་རྐང་པ་གཡས་བསྐུམ་པའི་རྟིང་པ་གསང་བར་གཏད། གཡོན་བརྐྱང་པ་གདན་ལ་བརྫིས་ཏེ་ལག་གཡོན་སྙིང་གར་ཐོད་ཁྲག་འཛིན་ཚུལ་དང༌། གཡས་སྡིགས་མཛུབ་ནང་བསྐོར་གྱིས་གཡས་ཕྱོགས་ཀྱི་ནམ་མཁར་བསྒྲེང་ཞིང་ལྟ་སྟངས་གཟིར་བ་ལན་གསུམ། ཡང་གོ་བརྗེས་ཏེ་གཡོན་བསྐུམ་པའི་གར་སྟབས་དང་། གཡས་སྡིགས་མཛུབ་སྙིང་གར་གཏོད་ཅིང༌། གཡོན་གྱི་སྡིགས་མཛུབ་སྒྲེང་བ་ལྟ་སྟངས་བཅས་ལན་གསུམ་ཚང་ནས། རྐང་པ་གཉིས་གཤིབས་ལ་ལུས་བསྲང༌། ལག་གཉིས་པད་སྐོར་བཅས་སྔར་བཞིན་འཁོར་ལོའི་རྒྱ་བཅས་ཏེ་གཡས་སུ་བསྐོར་བཞིན་སྤྱི་བོར་གཏུག་པ་ལན་གསུམ་མཐར་འཕར་སྟངས་ཅུང་ཟད་ཀྱིས་རྒྱ་བཤིག །ཡང་པད་སྐོར་བཅས་ཐལ་མོ་ཁོང་སྟོང་དུ་བྱས་པའི་སོར་མོ་རྣམས་ཁ་གྱེས་པ་པདྨའི་རྒྱ་བཅས་ལ་གཡོན་དུ་བསྐོར་བཞིན་མགྲིན་པར་གཏུགས་པ་ལན་གསུམ་ནས་འཕར་གྱིས་བཤིག །ཡང་པད་སྐོར་བཅས་ཐལ་མོ་ཁ་སྦྱར་བའི་སྲིན་ལག་གཉིས་བསྣོལ། གུང་མོ་མཐེ་བོང་ [29a] ཐེའུ་ཆུང་བཅས་བརྐྱང་པ་རྩེ་སྤྲད། མཛུབ་མོ་གཉིས་ཐད་ཀར་བརྐྱང་པ་རྡོ་རྗེ་རྩེ་ལྔའི་རྒྱ་གཡས་སུ་བསྐོར་བཞིན་སྙིང་གར་གཏུག་པ་ལན་གསུམ་ནས་འཕར་གྱིས་བཤིག །པད་པད་སྐོར་བཅས་གུང་མོ་སྲིན་ལག་མཐེའུ་ཆུང་གསུམ་པོ་བརྐྱང་པ་རྩེ་སྤྲད། མཐེབ་མཛུབ་སོ་སོར་རྩེ་སྤྲད་པ་ནོར་བུ་མིག་གསུམ་པའི་རྒྱ་གཡས་སུ་བསྐོར་བཞིན་ལྟེ་བར་གཏུགས་པ་ལན་གསུམ་ནས་འཕར་གྱིས་བཤིག །ཡང་པད་སྐོར་བཅས་མཐེ་བོང་མཛུབ་མོ་མཐེའུ་ཆུང་བཅས་རྩེ་སྤྲད་པའི་ནང་དུ་གུང་སྲིན་གཉིས་གཤིབས་ཏེ་བསྣོལ་བ་རྒྱ་གྲམ་གྱི་རྒྱ་གཡོན་དུ་བསྐོར་བཞིན་གསང་བར་གཏུག་པ་ལན་གསུམ་ནས་འཕར་གྱིས་བཤིག །དེ་ནས་ཁུ་ཚུར་གཉིས་ནང་བསྐོར་གྱིས་སྟ་ཟུར་གཡས་གཡོན་དུ་བརྐྱང་ལ་ལུས་མདུན་དུ་རྒུ་ཞིང་རྒྱབ་ཏུ་དགྱེ་བ་ལན་གསུམ་མཐར། གན་རྐྱལ་དུ་ལོག་ནས་རྐང་ལག་བཞི་ཤུགས་ཀྱིས་ནམ་མཁར་ལན་གསུམ་འཕང༌། དེ་མ་ཐག་རྡོ་རྗེ་སྐྱིལ་ཀྲུང་བཅས་ལ་ལག་གཉིས་ཐལ་མོ་གཡས་གཡོན་གྱི་སར་བཙུགས་ནས་དེའི་ཤུགས་ཀྱིས་སྐྱིལ་ཀྲུང་ཡར་བཏེགས་པ་དང་མར་གདན་ཁར་བརྡབ་པ་ལན་གསུམ་གྱི་རྗེས། སྐྱིལ་ཀྲུང་བཤིགས་ཏེ་འབེབས་ཆུང་གསུམ་བརྡབ་མཐར་ངག་ [29b] ནས་ཧ་དྲག་པོ་དང་བསྟུན་ལུས་རྩ་འདར་ཐོན་པར་སྤྲུགས་པས་ཉོན་མོངས་བརྒྱད་ཁྲི་བཞི་སྟོང་གི་འཁྲུལ་འཁོར་མ་ལུས་པ་བཤིགས་ཤིང་ལུས་ཀྱི་རྩ་མདུད་ཐམས་ཅད་གྲོལ། ཁམས་གསུམ་བརྟན་གཡོའི་དངོས་ཀུན་ཡེ་ཤེས་ལྔའི་རོལ་པར་ལྷུན་གྱིས་རྫོགས་པར་བསམ། དེའང་ཐབས་ཀྱི་སྣང་ཆ་ཐམས་ཅད་ཤེས་རབ་སྟོང་པ་ཉིད་ཀྱི་དབྱིངས་སུ་བཤིགས་པའི་དོན་གྱིས་ཡུམ་འཁོར་ལོ་རྒྱས་འདེབས་མའི་འཁྲུལ་འཁོར་རྗེས་སུ་བྱུང་བ་ཡིན་ནོ། །ཉི་ཤུ་པ་གོ་བགོ་ཞིང་རྒྱས་གདབ་པ་ནི། སླར་ཡང་རང་ཉིད་གཙོ་འཁོར་གཅིག་དྲིལ་གྱི་ངོ་བོ་རྡོ་རྗེ་གཞོན་ནུ་སྔར་བཞིན་དུ་གསལ་ལ། སྙིང་ག་ནས་འོད་ཟེར་དཀར་སེར་དམར་ལྗང་མཐིང་ག་རྣམས་རིམ་བཞིན་འཕྲོས་པ་ཕྱོགས་བཞི་དབུས་ལྔའི་ཞིང་ཁམས་རྣམས་སུ་ཕོག །རིགས་ལྔའི་སངས་རྒྱས་རྟེན་དང་བརྟེན་པར་བཅས་པ་འོད་ཕུང་དཀར་སེར་དམར་ལྗང་མཐིང་གའི་རྣམ་པར་བསྡུས་ཏེ་རང་གི་ལུས་ལ་ཕྱག་མཚན་རྣམ་ལྔའི་རང་བཞིན་ཅན་གྱི་གོ་ཁྲབ་ཞུ་ལུགས་སུ་རིམ་བཞིན་བགོས་པར་བསམ་ཞིང༌། ལངས་ཏེ་ཁུ་ཚུར་བསྐོར་རྒྱང་ཐོག་ལག་གཉིས་ཐལ་མོ་ནང་བསྐོར་གྱིས་མཛུབ་མོ་དང་མཐེའུ་ཆུང་བརྐྱང༌། གུང་སྲིན་མཐེ་བོང་ [30a] གསུམ་སོ་སོར་རྩེ་སྤྲད་པ་ལྕགས་སྒྲོགས་ལྟར་སྦྲེལ་བ་གོ་ཆའི་རྒྱ་བཅིང་ལ་ཕྲག་གོང་ནས་གཡས་སུ་བསྐོར་མཐར། ལག་གཉིས་སོ་སོའི་སྲིན་ལག་དང་མཐེའུ་ཆུང་བཀུག་པས་མཐེ་བོང་མནན་གོང་མཛུབ་གཉིས་བརྐྱང་སྟེ་དཔུང་པ་སོ་སོའི་ཐད་ནས་ནང་བསྐོར་གྱིས་ཕྱིར་བསྟན་དུ་བཀན་པ་གོ་བགོ་བའི་ཚུལ་བྱས་པས་ལུས་ལ་རྡོ་རྗེའི་གོ་ཁྲབ་དཀར་པོ་བགོས་ཤིང༌། དེ་ལས་རྡོ་རྗེའི་ཚྭ་ཚྭ་དཔག་མེད་འཕྲོས་པས་ལོག་འདྲེན་གདོན་བགེགས་ཐམས་ཅད་ཚར་བཅད་པར་བསམ། ཡང་འཕར་སྟངས་བཅས་གདོང་ལྷོར་ཕྱོགས་ཏེ་ཁུ་ཚུར་བསྐོར་རྒྱང་གིས་ཕྱག་རྒྱ་སྔར་བཞིན་བསྐོར་བས་རིན་པོ་ཆེའི་གོ་ཁྲབ་སེར་པོ་བགོས་པར་མོས་ཤིང༌། དེ་ལས་དུར་ཕག་མགོ་དགུ་པའི་ཚྭ་ཚྭ་འཕྲོས་པས་ཁམས་གསུམ་གྱི་གདུག་པ་ཅན་ཐམས་ཅད་ཟོས་པར་བསམ། ཡང་འཕར་བཅས་ནུབ་ཏུ་ཕྱོགས་ཏེ་ཁུ་ཚུར་བསྐོར་རྒྱང་གིས་ཕྱག་རྒྱ་སྔར་བཞིན་བསྐོར་བས་པདྨའི་གོ་ཁྲབ་དམར་པོ་བགོས་པར་མོས་ཤིང༌། དེ་ལས་མེ་ཁྱུང་གི་ཚྭ་ཚྭ་གྲངས་མེད་འཕྲོས་པས་ཀླུ་གཉན་ས་བདག་གི་ཚོགས་རྣམས་རྡུལ་དུ་བརླག་པར་བསམ། ཡང་འཕར་བཅས་བྱང་དུ་ཕྱོགས་ཏེ་ཁུ་ཚུར་བསྐོར་རྒྱང་གིས་ཕྱག་རྒྱ་སྔར་བཞིན་བསྐོར་ [30b] བས་རྒྱ་གྲམ་གྱི་གོ་ཁྲབ་ལྗང་ཀུ་བགོས་པར་མོས་ཤིང༌། དེ་ལས་ལྕགས་སྡིག་གི་ཚྭ་ཚྭ་དཔག་མེད་འཕྲོས་པས་རྒྱལ་འགོང་དམ་སྲིའི་ཚོགས་རྣམས་ལྷག་མེད་དུ་རོལ་པར་བསམ། སླར་ཡང་འཕར་བཅས་ཤར་དུ་ཕྱོགས་ཏེ་ཁུ་ཚུར་བསྐོར་རྒྱང་གིས་ཕྱག་རྒྱ་སྔར་བཞིན་བསྐོར་བས་འཁོར་ལོའི་གོ་ཁྲབ་སྔོན་པོ་བགོས་པར་མོས་ཤིང༌། དེ་ལས་ཁྲོ་ཆུང་མཚོན་ཐོགས་ཀྱི་ཚྭ་ཚྭ་སྐར་ལྟར་འཕྲོས་པས་གླག་ལྟ་བར་དུ་གཅོད་པའི་གདོན་བགེགས་ཀྱི་ཚོགས་རྣམས་དཔག་ཚད་རྒྱང་གྲགས་ཚུན་ཆད་དུ་ཉེ་ཞིང་རྒྱུ་བའི་གནས་མེད་པར་བསམ། །དེ་ནས་སྒོམ་བཞིའི་ཕྱག་རྒྱ་ནི། རང་ཉིད་རྡོ་རྗེ་གཞོན་ནུ་སྐུ་མདོག་དཀར་པོར་བསྐྱེད་ལ་ཤར་དུ་གདོང་ཕྱོགས་ཏེ་འཕར་སྟངས་ཀྱིས་རྐང་པ་གཡས་བརྐྱང་པའི་འདོར་སྟབས་བགྲད། ལག་གཉིས་སྡིགས་མཛུབ་བྱས་པའི་གཡས་ཀྱི་མཛུབ་མོ་ཅུང་བཀུག་པས་གཡོན་གྱི་མཐེའུ་ཆུང་དང་སྦྲེལ་བ་ལྕགས་ཀྱུའི་རྒྱ་བཅས་ལ། ལྟ་སྟངས་གཟིར་བ་དང་བཅས་ཛཿཞེས་བརྗོད་པས་སྣང་སྲིད་ཐམས་ཅད་རང་དབང་མེད་པར་བྲན་དུ་བཀོལ་ཏེ་ལྕགས་ཀྱུ་དཀར་མོའི་ཀློང་དུ་རྒྱས་བཏབ་པར་བསམ་ཞིང་ལག་གཉིས་ཐལ་མོ་པད་སྦུབས་ཀྱིས་ནུ་ཐད་སོ་སོ་ནས་སེ་གོལ་གཏོགས། ཡང་ལྕགས་ཀྱུའི་རྒྱ་སོགས་ [31a] ལན་གསུམ་ཚང་ནས་འཕར་བསྡུ། སླར་ཡང་འཕར་སྟངས་ཀྱིས་གདོང་ལྷོར་ཕྱོགས་པས་གོང་བཞིན་འཁོད་དེ། རང་ཉིད་རྡོ་རྗེ་གཞོན་ནུ་སྐུ་མདོག་སེར་པོར་བསྐྱེད་ལ་ལག་གཉིས་སྡིགས་མཛུབ་རྒྱབ་སྤྲད་མཐེའུ་ཆུང་དང་མཛུབ་མོ་སྦྲེལ་བ་ཞགས་པའི་རྒྱ་འཆིང་བཞིན་ལྟ་སྟངས་བཅས་ཧཱུྃ་ཞེས་བརྗོད་པས་སྣང་སྲིད་ཐམས་ཅད་བྲན་དུ་བཅིང་ཞིང་འཁོར་དུ་བཀོལ་ནས་ཞགས་པ་སེར་མོའི་ཀློང་དུ་རྒྱས་བཏབ་པར་བསམ་ལ་སེ་གོལ་གཏོགས་པ་བཅས་ལན་གསུམ། ཡང་འཕར་སྟངས་ཀྱིས་གདོང་ནུབ་ཏུ་ཕྱོགས་ཏེ་རྐང་པ་གཡོན་བརྐྱང་པའི་འདོར་སྟབས་བྱ། རང་ཉིད་རྡོ་རྗེ་གཞོན་ནུ་སྐུ་མདོག་དམར་པོར་བསྐྱེད་ལ་ལག་གཉིས་སྡིགས་མཛུབ་བཀན་པའི་མཐེའུ་ཆུང་དང་མཛུབ་མོ་ཕན་ཚུན་སྦྲེལ་བ་ལྕགས་སྒྲོགས་ཀྱི་རྒྱ་འཆིང་བཞིན་ལྟ་སྟངས་བཅས་བྃ་ཞེས་བརྗོད་པས་ཁམས་གསུམ་སྣང་སྲིད་ཐམས་ཅད་དབང་དུ་བསྡུས་ནས་ལྡང་མེད་དུ་སྤ་བཀོང་ཞིང་བློ་ཡིད་རྨོངས་པར་བྱས་ཏེ་ལྕགས་སྒྲོག་དམར་མོའི་ཀློང་དུ་རྒྱས་བཏབ་པར་བསམ་ལ་སེ་གོལ་གཏོགས་པ་བཅས་ལན་གསུམ། ཡང་འཕར་སྟངས་ཀྱིས་གདོང་བྱང་དུ་ཕྱོགས་པས་གོང་བཞིན་འཁོད་དེ། རང་ཉིད་རྡོ་རྗེ་གཞོན་ནུ་ལྗང་གུར་ [31b] བསྐྱེད་ལ་ལག་གཉིས་སྡིགས་མཛུབ་ནང་བསྟན་མཁྲིག་མ་སྙིང་གར་བསྣོལ་ཏེ་འཁྱུད་སྟབས་དྲིལ་བུས་མྱོས་པའི་རྒྱ་འཆིང་ཞིང་ལྟ་སྟངས་བཅས་ཧོཿ ཞེས་བརྗོད་པས་སྣང་སྲིད་ཁམས་ཀྱི་གནོད་བྱེད་གདུག་པ་ཅན་ཐམས་ཅད་ཀྱི་སྟོབས་ཤུགས་ནུས་རྩལ་མ་ལུས་པ་བཅོམ་ནས་བདེ་བ་ཆེན་པོའི་ངང་དུ་བློ་ཡིད་མྱོས་པར་བྱས་ཤིང་དྲིལ་བུ་ལྗང་མོའི་ཀློང་དུ་རྒྱས་བཏབ་པར་བསམ་ལ་སེ་གོལ་གཏོགས་པ་བཅས་ལན་གསུམ། དེ་ནས་འཕར་སྟངས་ཀྱིས་མདུན་དུ་ཕྱོགས་ཏེ་ཁུ་ཚུར་བསྐོར་རྒྱང་སྔོན་དུ་འགྲོ་བས་རྡོ་རྗེའི་ཐོག་འབེབས་གསུམ་བརྡབ་ནས། སླར་བཤིགས་པ་དང་ཆབ་གཅིག་ཁམས་གསུམ་ལས་རྣམ་པར་རྒྱལ་བའི་བརྡར་རྡོ་རྗེའི་གད་རྒྱང་ཧ་ཧེ་ཧོ་ཞེས་བརྗོད་ཅིང་ལུས་སྤྲུགས་རྩ་འདར་ཐོན་པར་བྱ། མཐར་སྒོ་གསུམ་མ་བཅོས་རང་བབས་གཉུག་མའི་ངང་དུ་ངལ་གསོ་ཞིང་དགེ་རྩ་ཟག་མེད་ཆོས་ཀྱི་དབྱིངས་སུ་བསྔོས་ཏེ་སྨོན་ལམ་ཟབ་མོས་རྒྱས་གདབ། ཤིས་པ་རྒྱ་ཆེར་བརྗོད་པས་དགེ་ལེགས་ཀྱི་སྣང་བས་ཁྱབ་པར་བྱའོ། །དེ་ལྟར་འཁྲུལ་འཁོར་གྱི་སྐབས་ཀུན་ཏུ་རླུང་ཁུག་ཆེན་པོ་རེ་ལ་འཁྲུལ་འཁོར་རེ་རེ་རྫོགས་བར་བྱ་དགོས་པ་ཡིན་ཀྱང༌། ལས་དང་པོ་པས་འཁྲུལ་འཁོར་རེའི་ཡུན་ལ་རླུང་ནང་དུ་འཛིན་མི་ཐུབ་ [32a] པ་བྱུང་ན་ཕྱིར་དབྱུང་བ་ལས་འོས་མེད་ཅིང༌། དེའང་ཁ་ནས་ནམ་དུའང་དབྱུང་མི་རུང་སྟེ་སྲོག་རྩར་ལས་ཀྱི་རླུང་ཞུགས་ན་སྨྱོ་བའི་ཉེན་ཡོད་པར་བཤད་པས། དེས་ན་ཁ་སྣའི་རླུང་བསྡམ་ཞིང་སྟེང་རླུང་ལྟེ་འོག་ཏུ་ཤུགས་ཀྱིས་མནན་ལ་རིམ་བཞིན་སྣ་ནས་དལ་བུས་དབྱུང་ཞིང༌། དེ་མ་ཐག་ནང་དུ་རྔུབ་སྟེ་སྔར་ལྟར་བཟུང༌། གཞན་ཡང་ལུས་གཅུ་བ་དང་དགྱེ་རྒུ་མ་ནོར་བ། སྡིགས་མཛུབ་དང་ཁུ་ཚུར་མ་ནོར་བ། ལུས་སྤྲུགས་དང་རྩ་འདར་མ་ནོར་བ། འདོར་སྟངས་དང་གྱད་སྟབས་མ་ནོར་བ། ལྟ་སྟངས་དང་སྟངས་སྟབས་མ་ནོར་བ། གདེངས་པ་གདབ་ཚུལ་མ་ནོར་བ། གཟིར་བ་དང་འཕེན་པ་མ་ནོར་བ། གདོང་རྒྱང་དང་བསྐོར་རྒྱང་མ་ནོར་བ་དང༌། འབེབས་ཀྱི་ཚེ་ཉྭ་ཤ་བརླ་ཤ་འཕོང་ཤ་གསུམ་པོ་འབེབས་གདན་གྱི་ཁར་ཤིགས་སེ་འོང་བར་བྱས་ཏེ་བརྡབ། རྐང་པའི་འཕར་སྟངས། ལག་པའི་བསྐོར་སྟངས། མིག་གི་ལྟ་སྟངས་སོགས་ཀྱི་རྣམ་འགྱུར་གང་ཡང་མཛེས་ཤིང་མཉེན་ལྕུག་རྔམས་བརྗིད་ཐོན་པར་བྱ་བ་དང༌། གཙོ་བོར་བསྐྱེད་རིམ་དམིགས་པའི་གནད་ལ་རྩེ་གཅིག་ཏུ་སློབ་ཅིང༌། ཐོག་མཐའ་ཀུན་ཏུ་གནས་ལུགས་རིག་སྟོང་མ་བཅོས་པའི་ངང་ [32b] དུ་ལ་བཟླ་བ་ནི་གནད་ཀྱི་ཡང་གཅེས་གལ་པོ་ཆེར་ཤེས་པར་བྱའོ། །རྡོ་རྗེ་ལུས་ཀྱི་རྣལ་འབྱོར་ལ་བརྟེན་ནས། །བདེ་མཆོག་དྭངས་མའི་ཡེ་ཤེས་སྒྲུབ་པའི་ཚུལ། །གསལ་བར་བརྗོད་འདིས་རྣམ་མང་སྐལ་བཟང་ཚོགས། །གྲུབ་གཉིས་འདོད་རྒུར་འཇོ་བའི་དཔལ་གྱུར་ཅིག །ཅེས་པའང་སྒོམ་དོན་ཞལ་ཤེས་སྙན་བརྒྱུད་ཀྱི་མན་ངག་དང་འཁྲུལ་འཁོར་ལག་ལེན་གྱི་གནད་མི་འཆུག་པར་བྱ་བའི་ཕྱིར་སྔར་བཀོད་པའི་ཁྲིད་ཡིག་གི་ཆ་ལག་ལྷན་ཐབས་ཀྱི་ཚུལ་དུ། ཆགས་ཆེན་ཕོ་ཉའི་བརྟུལ་ཞུགས་རང་དབང་དུ་རྩེན་པའི་ཀུན་ཏུ་རྒྱུ་འཇིགས་བྲལ་ཡེ་ཤེས་རྡོ་རྗེས་རང་ལོ་ལྔ་བཅུ་ང་བཞིའི་མཐར་ཐུག་པ་རབ་འབར་ཙཎྜ་ལཱིའི་ཁམས་ལྡན་མཁའ་ལྡིང་གི་ལོ་རྒྱལ་གྱི་ཉ་བའི་ཡར་ངོ་ཧཾ་ཡིག་ཟླ་ཞུན་བདུད་རྩིའི་གོང་བུ་གང་བ་རྒྱས་པའི་ལང་ཚོ་མཆོག་ཏུ་ངོམས་པ་ན། ས་ལ་སྤྱོད་པའི་ཞིང་ཁམས་འབྲས་མོ་གཤོངས་ཀྱི་བྱེ་བྲག་ཀ་པཱ་ལ་སྤུངས་པར་གྲགས་པའི་རི་སུལ་བཀྲ་ཤིས་དགའ་བ་འཁྱིལ་བའི་སྐྱེད་མོས་ཚལ་ཆེན་པོར་སྦྱར་བ་ལས། ཐོག་མའི་གླེགས་བམ་དུ་འབེབས་པ་པོ་ནི་ལྷོ་མོན་སྐྱིད་པའི་ལྗོངས་ཀྱི་སྔགས་བན་ཆོས་གྲགས་རྒྱ་མཚོས་བགྱིས་པའོ། །འདིས་ཀྱང་ཟབ་ལམ་གྱི་ཕྲིན་ལས་ [33a] མི་ནུབ་བརྟག་ཅིང་ཁྱབ་སྟེ་སྐལ་ལྡན་རྣམས་ཟུང་འཇུག་དགའ་བཞིའི་ཡེ་ཤེས་མངོན་དུ་བྱེད་པའི་རྒྱུར་གྱུར་ཅིག །མ་ཧཱ་སུ་ཁ་སིདྡྷི་རསྟུ༎ །།