TTDL-ZABTER-07-JA-018

Previous Text Back to Volume PageNext Text

Wylie title	zab gsang mkha' 'gro'i snying thig las: mkha' 'gro'i gsang ba ye shes kyi rtsa sgrub thugs kyi sgrom bu:
Location	bdud 'joms gling pa zab gter Volume 7, Text 18, Pages 273-276 (Folios 1a1 to 2b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las mkha' 'gro'i gsang ba ye shes kyi rtsa sgrub thugs kyi sgrom bu. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: 273-276. Thimphu, Bhutan: Lama Kuenzang Wangdue, 2004.
Side notes	Recto: rtsa sgrub   Verso: bdud 'joms mkha' 'gro gsang ye
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཐུགས་སྒྲུབ་ཡེ་ཤེས་ཉི་མ་ (thugs sgrub ye shes nyi ma)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	mkha' 'gro gsang ba ye shes
Colophon	ཞེས་པ་འདི་ནི་སྔགས་བཙུན་མ་ཆོས་ཀྱི་སྒྲོན་མས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེ་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་བློ་བཟང་རྡོ་རྗེས་སོ། །དགེའོ། །དགེའོ། །དགེའོ།།
	zhes pa 'di ni sngags btsun ma chos kyi sgron mas bskul ngor khrag 'thung bdud 'joms rdo rje mkha' 'gro'i brda ris las dag par phab pa'i yi ge pa ni blo bzang rdo rjes so/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ མཁའ་འགྲོའི་གསང་བ་ཡེ་ཤེས་ཀྱི་རྩ་སྒྲུབ་ཐུགས་ཀྱི་སྒྲོམ་བུ་བཞུགས༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) མ་འོངས་དུས་ཀྱི་ཐ་མ་ལ༔ ཟབ་ལམ་བསྒོམ་པའི་སྐྱེས་བུ་རྣམས༔ མ་དག་སྒོ་གསུམ་འཁོར་བའི་ལམ༔ སྐུ་གསུམ་དབྱིངས་སུ་རབ་འཕོས་ནས༔ རྡོ་རྗེ་གསུམ་གྱི་གྲོང་འཇུག་གནད༔ གང་ལ་བརྟེན་པས་ངེས་པར་གྲོལ༔ དེ་ཕྱིར་འདི་ནི་བླ་ན་མེད༔ དཀྱིལ་འཁོར་གཏོར་མ་མི་དགོས་སོ༔ གདན་གསུམ་རྫོགས་པའི་དཀྱིལ་འཁོར་ལྷ༔ ཡེ་ཡིན་ངོ་ཤེས་ཙམ་གྱིས་ཆོག༔ དེ་ཕྱིར་མཁའ་འགྲོ་ལས་དབང་མོའི༔ བསྒོམ་བཟླས་འདི་ལ་བརྩོན་མཛོད་ཅིག༔ དང་པོ་སྐྱབས་སུ་འགྲོ་བ་ནི༔ ན་མོ༔ རང་རིག་དོན་གྱི་བླ་མ་ལ༔ འདུ་འབྲལ་མེད་པར་སྐྱབས་སུ་མཆི༔ ཡུལ་མེད་ཟང་ཐལ་ཆོས་ཀྱི་དབྱིངས༔ འཁོར་གསུམ་དག་པའི་བྱང་སེམས་བསྐྱེད༔ དེ་ནས་བགེགས་བསྐྲད་སྲུང་འཁོར་ནི༔ ཧཱུྃ༔ བདག་རྟོག་ཁམས་གསུམ་འཁོར་བའི་འདྲེ༔ བདག་མེད་སྟོང་ཉིད་ཆེན་པོར་ཕཊ༔ སྣང་སྲིད་ཆོས་སྐུའི་ཡོ་ལངས་ལ༔ བསྲུང་བྱ་སྲུང་བྱེད་ཡེ་སངས་རྒྱས༔ དེ་ནས་བྱིན་ཆེན་འབེབས་པ་ལ༔ ཧཱུྃ༔ གདན་གསུམ་དཀྱིལ་འཁོར་མངོན་གྱུར་དུ༔ ཡེ་ཤེས་མཁའ་འགྲོའི་བྱིན་ཆེན་ཕོབ༔ དེ་ནས་མཆོད་རྫས་བྱིན་བརླབ་ནི༔ ཨོཾ་ཨཱཿཧཱུྃ༔ ཡུལ་དྲུག་འདོད་ཡོན་མི་ཟད་གཏེར༔ རང་བྱུང་མཆོད་པའི་སྤྲིན་དུ་ཤར༔ དེ་ནས་ལྷ་བསྐྱེད་པ་ནི༔ ཧཱུྃ༔ སྣང་ཞིང་སྲིད་པའི་ཆོས་རྣམས་ཀུན༔ སྒྱུ་མའི་འཁྲུལ་འཁོར་ཞིག་པ་ལྟར༔ ཆོས་ཉིད་དག་མཉམ་ཆེན་པོར་སངས༔ གདལ་ཁྱབ་དབང་གི་གཞལ་ཡས་སུ༔ མ་ཆགས་སྐྱོན་བྲལ་པད་ཉིའི་སྟེང་༔ རང་རིག་གསང་བ་ཡེ་ཤེས་མ༔ ཐབས་ཤེས་མཚོན་བྱེད་ཕྱག་གཉིས་ན༔ སྣང་བ་དབང་སྡུད་གྲི་གུག་དང་༔ ཁམས་གསུམ་ཁྲག་རོལ་དུང་ཁྲག་བསྣམས༔ མཐའ་གཉིས་ལས་འདས་ཞབས་གཉིས་ཀྱིས༔ གར་ཐབས་མཛད་ཅིང་རཱུ་ཏྲ་གནོན༔ དཔའ་བོར་ཡབ་མཚོན་ཁ་ཊྭཱྃ་ཀ༔ འཁོར་འདས་དབང་སྡུད་ཁ་དོག་དམར༔ སྐུ་གསུམ་ལྷུན་གྲུབ་སྤྱན་གསུམ་ལྡན༔ སྲིད་ལས་རབ་དབེན་ཞལ་འཛུམ་མདངས༔ དོན་གཉིས་མཚོན་པའི་ཤངས་བུག་དང་༔ བདེན་གཉིས་ཟུང་འཇུག་སྙན་གཉིས་ལྡན༔ རྟོག་ཚོགས་རང་གྲོལ་དབུ་སྐྲ་མཐིང་༔ སྐྱོན་བྲལ་མཛེས་སྡུག་གཞོན་ནུའི་ཚུལ༔ བདེ་དང་སྟོང་པའི་ཡེ་ཤེས་འབར༔ ཕུང་ལྔ་རིགས་ལྔ་ཁམས་ལྔ་ཡུམ༔ དབང་པོ་སེམས་དཔའ་ཡུལ་སེམས་མ༔ ཡན་ལག་སྒོ་སྐྱོང་ཡབ་ཡུམ་དང་༔ རྩ་ཐིག་རླུང་གི་རོལ་པ་ལ༔ རྒྱུད་སྡེ་རྒྱ་མཚོའི་དཀྱིལ་འཁོར་རྫོགས༔ དེ་ནས་སྤྱན་འདྲེན་པ་ནི༔ ཧཱུྃ༔ ཆོས་ཉིད་ནམ་མཁའི་ཀློང་མཛོད་ནས༔ ཡེ་རྫོགས་དཀྱིལ་འཁོར་ཆེན་པོར་གཤེགས༔ དེ་ནས་བཞུགས་སུ་གསོལ་བ་ནི༔ མ་འགགས་སྐུ་དང་ཡེ་ཤེས་ཆེ༔ མངོན་གྱུར་ཆེན་པོར་བཞུགས་སུ་གསོལ༔ དེ་ནས་ཕྱག་འཚལ་བ་ནི༔ ན་མོ༔ བདེ་གཤེགས་སྙིང་པོ་སངས་རྒྱས་དཔལ༔ མཁའ་འགྲོའི་དབྱིངས་ལ་ཕྱག་འཚལ་ལོ༔ དེ་ནས་མཆོད་པ་འབུལ་བ་ནི༔ ཧཱུྃ༔ སྣང་སྲིད་སྣང་བའི་གཏེར་ཆེན་པོ༔ ཕྱི་ནང་གསང་མཆོད་མཆོག་ཏུ་འབུལ༔ མ་ཧཱ་པཉྩ་པཱུ་ཙ་ཧོཿ དེ་ནས་བསྟོད་པ་ནི༔ ཨཱཿ གནས་ལུགས་ཆོས་སྐུའི་མཁའ་འགྲོ་མ༔ ལྷུན་གྲུབ་ལོངས་སྐུ་རྒྱན་དུ་ངོམས༔ རང་གྲོལ་སྤྲུལ་སྐུ་རྩལ་དུ་ཤར༔ གསང་བ་ཡེ་ཤེས་ཆེན་པོར་བསྟོད༔ དེ་ནས་འཛབ་དམིགས་ནི༔ དེ་ཡི་ཐུགས་ཀར་ཀུན་བཟང་མོའི༔ ཐུགས་གསང་ཧྲཱིཿལ་སྔགས་ཀྱིས་བསྐོར༔ བཟླས་པས་རྒྱལ་བ་སྲས་དང་བཅས༔ ཡེ་ཤེས་གཅིག་ཏུ་དྲིལ་ཏེ་བསྒྲུབ༔ ཨོཾ་གུ་ཧྱ་ཛྙཱ་ན་ཌཱ་ཀི་ནཱི་བཾ་ཧ་རི་ནི་ས་སིདྡྷི་ཧཱུྃ༔ འདི་ལྟར་བསྒོམ་བཟླས་བྱེད་པའི་མི༔ ཚེ་འདིར་རིག་འཛིན་ས་ཐོབ་འགྱུར༔ བྱི་རུ་དང་ནི་རཱ་ག་ཡི༔ ཕྲེང་བ་རྙེད་དང་མེ་ཏོག་འཐུ༔ མཁའ་ལ་འཕུར་དང་རི་རྩེར་དབེན༔ འདི་དག་གྲུབ་པའི་མཚན་མ་ཡིན༔ ཉམས་རྟོགས་ཡོན་ཏན་གློ་བུར་འཕེལ༔ ཆོས་ཉིད་བདེན་པ་མཐོང་གྱུར་ན༔ མཆོག་གི་གྲུབ་རྟགས་བླ་ན་མེད༔ བསྒྲུབ་དུས་སྒོ་གསུམ་ཡེ་ཤེས་ལྷའི༔ སྐུ་གསུང་ཐུགས་སུ་གསལ་བ་དང་༔ སྔགས་སྒྲ་གཏམ་གྱིས་མ་ཆོད་གནད༔ འདི་ནི་སྔར་མ་གྲགས་པའི་ཆོས༔ ཟབ་ཁྱད་སྲོག་གི་ཡང་ཐིག་ཡིན༔ སྔགས་སྲུང་ཨེ་ཀ་ཛ་ཊཱིས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ བརྡ་ཐིམ༔ ཞེས་པ་འདི་ནི་སྔགས་བཙུན་མ་ཆོས་ཀྱི་སྒྲོན་མས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེ་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་བློ་བཟང་རྡོ་རྗེས་སོ། །དགེའོ། །དགེའོ། །དགེའོ།། །།