TTDL-ZABTER-09-TA-041

Previous Text Back to Volume PageNext Text

Wylie title	zab gsang mkha' 'gro'i snying thig las: btsan rgod srog sgrub pad+ma dkar po'i smad cha 'dod 'byung dpag bsam rgyas pa:
Location	bdud 'joms gling pa zab gter Volume 9, Text 41, Pages 287-296 (Folios 1a1 to 5b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las btsan rgod srog sgrub pad+ma dkar po'i smad cha 'dod 'byung dpag bsam rgyas pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 9: 287-296. Thimphu, Bhutan: Lama Kuenzang Wangdue, 2004.
Side notes	Recto: srog sgrub smad cha   Verso: bdud 'joms bka' srung btsan rgod skya gcig
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་སྤྲང་བན་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་བྲག་ནས་བཏོན་ཏེ་སྨར་སྟོད་འབྲོས་ཕུག་མཁའ་འགྲོའི་གནས་མཆོག་དབེན་པའི་ཁྲོད་དུ་དག་པར་ཕབ་པའི་ཡི་གེའི་རིས་བྱེད་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།།
	zhes pa 'di yang sprang ban bdud 'joms rdo rjes gser smad rnga la stag rtse'i g.yas logs brag nas bton te smar stod 'bros phug mkha' 'gro'i gnas mchog dben pa'i khrod du dag par phab pa'i yi ge'i ris byed phun tshogs bkra shis so/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བཙན་རྒོད་སྲོག་སྒྲུབ་པདྨ་དཀར་པོའི་སྨད་ཆ་འདོད་འབྱུང་དཔག་བསམ་རྒྱས་པ་བཞུགས་སོ༔

ཐྂ༎༔ (བརྡ་ཡིག་) ན་མོ་གུ་རུ་པདྨ་ཀ་ར་ཡེ༔ བདག་འདྲ་རིག་འཛིན་རྡོ་རྗེ་ཐོད་ཕྲེང་ངས༔ མ་འོངས་ལས་ཅན་བུ་ཡི་དོན་ཆེད་དུ༔ བཙན་རྒོད་སྲོག་སྒྲུབ་པདྨ་དཀར་པོ་ཡི༔ སྨད་ཆ་འདོད་འབྱུང་དཔག་བསམ་རྒྱས་པ་བསྟན༔ འདི་ཉིད་ཉམས་སུ་ལེན་པའི་རྣལ་འབྱོར་གྱིས༔ ལེགས་ཉེས་ཤན་འབྱེད་བཀྲ་མོའི་ལག་ལེན་ནི༔ ཟངས་ལྕགས་ཤྭའམ་ཁྱི་དམར་རྐང་གི་ཤྭ༔ ཡང་ན་བཙན་ཤིང་དམར་པོའི་ཤྭ་བྱས་ཏེ༔ ལེབ་བདུན་ལ་ནི་ཡིག་འབྲུ་བདུན་པོ་བྲི༔ ནཱཿ གཿ ཙནཿ ཏྲིཿ ཡེཿ སྭཱཿ ཧཱཿ བསྒྲུབ་པའི་རྟེན་ལ་ཤྭ་བཞག་སྟེ༔ བཀྲ་མོའི་དུས་སུ་ལག་ཏུ་བླངས༔ དེ་ནས་བཀྲ་མོ་ཤན་འབྱེད་སྨོས༔ ཧེ་ཀའི་བསྭོ་བསྭོ༔ བཙན་དམར་རོལ་པ་སྐྱ་གཅིག༔ སྲོག་བདུད་ཤན་པ་ཀུས་འདེབས༔ ཀུས་ཤེས་བཀྲ་བའི་མོ་ལྷ༔ ཤཱཀྱའི་བསྟན་སྲུང་ཆེན་པོ༔ ཨོ་རྒྱན་བཀའ་ཡི་སྲུང་མ༔ ཁྱོད་སྟོང་གསུམ་གང་ན་གནས་ཀྱང་༔ སྐད་ཅིག་ཉིད་ལ་འདིར་གཤེགས༔ ཐ་ཚིག་གཉན་གྱིས་འབོད་དོ༔ གཡར་དམ་གཉན་ལ་མ་འདའ༔ དམ་ཚིག་དབང་གིས་འདིར་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿ བདག་གིས་བཀྲ་བའི་མོ་འདི་ཅིའི་ཕྱིར་ན་བཏབས་པ་ཡིན་པས༔ མོ་འདི་རང་གཞུང་གི་བརྟགས་དཔྱད་མ་ནོར་བར་བཟང་ངན་གཉིས་ཤན་ཕྱེས༔ གབ་བརྐུང་མེད་པར་གསལ་བར་ཕོབ་ཅིག༔ ཨོཾ་ནཱ་ག་ཙནྟྲི་ཡཀྴ་ཀྲོ་ཏ་ཧཱུྃ་བཛྲ་ས་མ་ཡ་ཛ་ཛཿ བཀྲ་མོ་གསལ་བར་ཕོབ་ཅིག༔ ལན་གྲངས་བརྒྱའམ་ཉེར་གཅིག་བཟླས༔ དེ་ཚེ་རང་ཉིད་ཡི་དམ་ལྷའི༔ བསྐྱེད་པ་དང་ནི་མི་འབྲལ་བར༔ མེ་དཔུང་ཀློང་དུ་བསྐྱེད་དེ་འདེབས༔ ཤྭ་ནི་དར་དམར་སྟེང་དུ་འཕེན༔ དང་པོ་ནཱཿལ་བབ་གྱུར་ན༔ གཞི་ལ་དགེ་ཞིང་ནོར་ཡང་འཕེལ༔ སྲོག་ཕྱྭར་བཟང་ཞིང་ནད་པར་བཟང་༔ བློ་ཕྱྭ་ལམ་འགྲོ་དོན་ཡང་འགྲུབ༔ སྟེར་རྙེད་ཇག་ལ་ནོར་དང་འཕྲད༔ ཨི་ཐོན་ཐོན་དང་ཨི་འཕྲད་འཕྲད༔ རྟ་ཕྱྭ་བཟང་ཞིང་དགྲ་ཡང་མེད༔ གཉིས་པ་གཿལ་བབ་གྱུར་ན༔ ཀུན་ལ་ངན་སྟེ་ཉེས་པ་ཆེ༔ གསུམ་པ་ཙནཿལ་བབ་གྱུར་ན༔ གཞི་ལ་བཟང་སྟེ་ནོར་ཕྱར་བཟང་༔ མགྲོན་པོ་མི་འོང་སྲིད་ཀྱང་འཕེལ༔ སྲོག་ཕྱྭ་བརྟན་ཏེ་ནད་པ་འཚོ༔ རྟ་ཕྱྭ་ལ་བཟང་དགྲ་ཡང་མེད༔ ཀུན་ལ་ཤིན་ཏུ་བཟང་བའི་མཆོག༔ བཞི་པ་ཏྲིཿལ་བབ་གྱུར་ན༔ གཞི་ལ་འབྲིང་སྟེ་ནོར་ལ་ངན༔ སྲིད་བྱུང་འཆི་སྟེ་སྲོག་ཕྱྭར་ངན༔ ནད་པར་འབྲིང་སྟེ་བློ་ཕྱྭར་བཤོལ༔ ཨི་འོང་ན་ཡང་སྒོར་མེད་ན༔ མི་འོང་འཇིགས་ཆེ་དགྲ་ཕྱྭ་རྒོད༔ རྟ་ལ་འབྲིང་སྟེ་གང་ལའང་འབྲིང་༔ ལྔ་པ་ཡེཿལ་བབ་གྱུར་ན༔ གཞི་ཕྱྭར་ངན་སྟེ་ནོར་ལ་འབྲིང་༔ དོན་ཕྱྭར་དོན་འགྲུབ་བློ་ཕྱྭར་ལེགས༔ སྲིད་ལ་ངན་སྟེ་སྲོག་ཕྱྭར་བཟང་༔ ནད་པ་ལ་ངན་རྟ་ཕྱྭར་བཟང་༔ ཨི་འོང་འོང་སྟེ་ཨི་འཕྲད་འཕྲད༔ དྲུག་པ་སྭཱཿལ་བབ་གྱུར་ན༔ གཞི་ཕྱྭ་ནོར་ཕྱྭ་བློ་དོན་ཕ༔ ནད་པ་སྲོག་ཕྱྭ་རྟ་ཕྱྭ་སྲིད༔ ཀུན་ལ་ངན་སྟེ་ཉེས་པ་ཆེ༔ ཨི་འོང་ན་ཡང་མི་འོང་སྟེ༔ ཨི་འཕྲད་ན་ཡང་ངེས་པར་འཕྲད༔ བདུན་པ་ཧཱ༔ ལ་བབ་གྱུར་ན༔ ཀུན་ལ་བཟང་སྟེ་དགེ་བའོ༔ ས་མ་ཡ༔ དེ་ནས་དགྲ་བོ་བསྒྲལ་འདོད་ན༔ ཧོམ་དུ་མིང་རུས་བྲིས་ལ་བཅུག༔ བསྐུལ་ཞིང་འགུགས་གཞུག་བྱེད་པ་ནི༔ དཀོན་མཆོག་གསུམ་དང་རྩ་བ་གསུམ༔ བསྟན་བསྲུང་དམ་ཅན་རྒྱ་མཚོ་ཡི༔ བྱིན་རླབས་དམ་ཚིག་བདེན་པའི་མཐུས༔ དམ་ཉམས་དགྲ་བོ་ཆེ་གེ་མོ༔ གཟུགས་བྱང་ལིངྒ་འདི་ལ་ཁུག༔ ཁུག་སྟྭཾ་བཛྲ་ཨཾ་ཀུ་ཤ་ཡ་ཛཿ ནམ་གྱི་སྲོད་ལ་ལན་བརྒྱ་བརྗོད༔ དེ་ནས་གྲུ་གུ་དམར་པོསབཅིངས༔ ཧོཿ བཙན་རྒོད་ཤན་པ་རྫུ་འཕྲུལ་ཅན༔ ཁྱོད་ཀྱི་དམ་ཚིག་དུས་ལ་བབ༔ ཡིད་ལ་བརྣག་པའི་དགྲ་བོ་འདི༔ བཙག་ཞགས་དམར་པོ་གྲུ་ཆིངས་ཀྱིས༔ ནཱ་ག་ཙནྟྲི་ཡཀྴ་ཡཀྴ་ས་མ་ཡ༔ དགྲ་བོ་ཆེ་གེ་མོ་ཆིངས་ཆིངས་རྦད་ཐུལ༔ དེ་ནས་མཚོན་གྱིས་གཟིར་བྱས་ཏེ༔ ཧོཿ བཙན་རྒོད་ཆེན་པོའི་དུས་ལ་བབ༔ ཁྱོད་ཀྱི་དམ་ཚིག་དུས་ལ་བབ༔ དམ་ཉམས་དགྲ་བོ་ཆེ་གེ་མོར༔ སྲོག་གཅོད་མཚོན་་ཆ་ངར་མས་ཐོབ༔ རྗེས་ཤུལ་ཙམ་ཡང་མེད་པར་གྱིས༔ ཐལ་བའི་རྡུལ་དུ་བརླག་པར་གྱིས༔ ནཱ་ག་ཙནྟྲི་ཡཀྴ་ཡཀྴ་ས་མ་ཡ་དགྲ་བོ་ཆེ་གེ་མོའི་ཚེ་བླ་སྲོག་གསུམ་ཧུར་ཐུམ་རྦད་རྦད་ནན་ནན་ཕྱེ་མ་རྡུལ་ཕྲན་རློག་རློག་རྦད་ནན་སོད༔ བཙན་དམར་སྲོག་གི་སྤུ་གྲི་ལ༔ བརྟེན་པའི་དགྲ་བོའི་སྲོག་འབྱིན་གྱི༔ དྲག་འཁོར་མེ་དབལ་དམར་པོ་ལ༔ མུ་ཁྱུད་རིམ་པ་བཞི་བསྐོར་ཏེ༔ ལྟེ་བར་ཙ་ཡིག་ཅེས་བྲིས་ཏེ༔ དེ་མཐར་ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ དེ་ཡི་ཕྱི་རིམ་མུ་ཁྱུད་ལ༔ ནཱ་ག་ཙནྟྲི་ཡཀྴ་ཡཀྴ་ས་མ་ཡ་ནྲྀ་ཏྲི་ཤ་ཏྲུཾ་མཱ་ར་ཡ་ཧཱུྃ་ཕཊ༔ དེ་མཐར་འཁོར་ལོ་རྩིབས་བདུན་ལ༔ ནཱཿ གཿ ཙནཿ ཏྲིཿ ཡཀྴཿ ཀྲོཿ ཏཿ ཧཱུྃ༔ བྲིས་ལ་རྩིབས་མཆན་ལ༔ དགྲ་བོའི་བླ་ཁུག་རྦད༔ དགྲ་བོའི་ཚེ་ཁུག་རྦད༔ དགྲ་བོའི་སྲོག་ལ་རྦད༔ དགྲ་བོའི་དབང་ཐང་ཁུག་རྦད༔ དགྲ་བོའི་བསོད་ནམས་ཁུག་རྦད༔ དགྲ་བོའི་རྣམ་ཤེས་ཁུག་རྦད༔ དགྲ་བོའི་རླུང་རྟ་ཁུག་རྦད༔ དེའི་ཕྱི་རིམ་མུ་ཁྱུད་ལ༔ ནཱ་ག་ཙནྟྲི་ཡཀྴ་ཀྲོ་ཏ་ས་མ་ཡ་དགྲ་བོ་ཆེ་གེ་མོ་ཁུག་རྦད་ནན་སོད་སོད་ཧུར་ཐུམ་ཛ་ཐུམ་རི་ལི་ལི་རྦད་ནན༔ ཞེས་བྲིས་དེ་མཐར་རྡེའུ་ཁྲམ་ཤིང་དང་༔ མེ་འབར་ཆུ་རིས་བྲིས་ཏེ་བརྩེགས༔ བཙན་བསྒྲུབ་བསྐུལ་བའི་མཐར་བཙུག་གོ༔ དེས་ནི་དགྲ་བོ་ངེས་པར་ཐུབ༔ བཙན་རྒོད་རོལ་པ་ཆེན་པོ་ཡི༔ འཁུ་ཞིང་ཕྲག་དོག་གཅོད་པ་ནི༔ ཧོཿ བཙན་རྒོད་རོལ་པ་ཆེན་པོ་ཁྱོད༔ སངས་རྒྱས་བསྟན་སྲུང་ཡིན་སྲིད་ན༔ ཁྱོད་ལ་དམ་ཚིག་མེད་དམ་ཅི༔ ཡོད་ན་དགའ་མགུ་ཅི་ལ་ཆེ༔ རྣལ་འབྱོར་སྲུང་མ་མིན་ནམ་ཅི༔ ཡིན་ན་དམ་ཚིག་འཁུ་ཞིང་ལྡོག་པ་མེད༔ བདག་གི་ཁྱོད་ལ་མཆོད་གསོལ་བཞིན༔ མི་སྲུན་བགེགས་ལ་བྱས་གྱུར་ཀྱང་༔ ཕ་ལྟར་བརྩེ་ཞིང་མ་ལས་གདུང་༔ དམ་ཚིག་བཀའ་བསྒོས་དཔང་ལ་ཡོད༔ བདེ་གཤེགས་བདེན་པ་འགྱུར་མེད་དེ༔ རྒྱལ་བའི་བཀའ་གཉན་མི་འདས་བསྲུང་༔ དེས་ན་ཁྱོད་ཀྱང་ཕྲག་མ་དོག༔ གོང་མ་གཡེལ་ལ་ལས་མ་འགྱང་༔ སངས་རྒྱས་བསྟན་བསྲུང་དམ་ཅན་ལ༔ རུ་ང་ཕྲག་དོག་ག་ལ་ཡོད༔ བདག་ཀྱང་དམ་ལ་གནས་པའི་ཕྱིར༔ ཕྱིར་ཡང་མི་སྤངས་ཁྱོད་མཆོད་བསྟོད༔ མ་ལྟར་བརྩེ་བའི་གྲོགས་མཛོད་ལ༔ སྲིང་ལྟར་གདུང་བའི་ཕྲིན་ལས་སྒྲུབས༔ སྔར་གྱི་ཆད་ཉམས་འགལ་འཁྲུལ་བཤགས༔ དམར་གཏོར་སྐྱེམས་དང་མཐུན་རྫས་ཀྱིས༔ ཁྱོད་ཀྱི་ཐུགས་དམ་བསྐང་གྱུར་ཅིག༔ སླན་ཆད་འཁུ་ལྡོག་མ་བྱེད་ཅིག༔ རུ་མ་ང་ལ་ཕྲག་མ་དོག༔ བདག་གིས་མ་རིག་མ་ཤེས་པའི༔ ཉེས་བྱས་ཤོར་ཡང་ཕྲག་མ་དོག༔ བཀའ་ནི་སྟོན་པའི་བཀའ་ཡིན་ནོ༔ མ་འདའ་དམ་ཚིག་དཔང་ལ་ཡོད༔ བདག་ལ་སྡང་བའི་དགྲ་བྱུང་ན༔ ཕ་ཁུ་ཡིན་ཀྱང་སོད་ལ་ཤོག༔ མ་སྲུ་ཡིན་ཡང་སྒྲོལ་ལ་ཤོག༔ བཛྲ་ས་མ་ཡ་བཛྲ༔ མྱུར་དུ་བྲན་ལ་འཁོར་བའི་ཕྱིར༔ ཐ་ཚིག་གཉན་གྱིས་འབོད་པ་ནི༔ ཧོཿ བཙན་རྒོད་ཤན་པ་སྐྱ་གཅིག་ཁྱོད༔ འབོད་དོ་དམ་ཚིག་གཉན་གྱིས་འབོད༔ བདག་ནི་རྣལ་འབྱོར་དམ་ཚིག་ཅན༔ དམ་ལ་གནས་ཤིང་ལྷ་ལ་འཕྲེང་༔ ཁྱོད་ནི་ཆོས་སྐྱོང་དམ་ཚིག་ཅན༔ སྟོན་པ་ཤཱཀྱ་ཐུབ་པའི་བཀའ༔ རིག་འཛིན་པདྨ་འབྱུང་གནས་བཀའ༔ གསང་བདག་ཕྱག་ན་རྡོ་རྗེའི་བཀའ༔ རིག་འཛིན་དཔའ་བོ་མཁའ་འགྲོའི་བཀའ༔ བཀའ་དང་དམ་ཚིག་གཉན་གྱིས་འབོད༔ བཀའ་དང་ཐ་ཚིག་གཉན་གྱིས་བསྒྲུབ༔ མ་འགྱང་མ་གཡེལ་ད་ལྟ་རུ༔ བདག་གི་གྲོགས་མཛོད་ཕྲིན་ལས་སྒྲུབས༔ ཁྱོད་ཀྱང་དམ་ལ་མ་འདའ་བར༔ བདག་ལ་མ་བུ་བཞིན་དུ་སྐྱོང་༔ བདག་ཀྱང་དམ་ལ་མ་འདའ་བར༔ ཁྱོད་མཆོད་བསྒྲུབ་ཅིང་བསྟོད་བགྱིའོ༔ རུ་ང་ཕྲག་དོག་མ་མཛད་པར༔ ཕྲིན་ལས་སྒྲུབས་ཤིག་ས་མ་ཡ༔ ལན་གསུམ་བརྗོད་ཅིང་གསོལ་མཆོད་བྱ༔ དེ་ནས་ཕྲིན་ལས་བཅོལ་བ་ནི༔ ཧོཿ བཙན་རྒོད་ཆེན་པོ་རྫུ་འཕྲུལ་ཅན༔ ཁྱོད་ལ་ཕྲིན་ལས་བཅོལ་བ་ནི༔ བདག་གི་ཟས་ནོར་རྒྱས་པར་མཛོད༔ སྡང་བའི་དགྲ་བོ་བྱུང་དུས་སུ༔ སྔོན་དུ་བདག་ལ་བྱ་ཐོངས་ཤིག༔ ནད་དང་ཟུག་རྡུ་བྱུང་དུས་སུ༔ འཚོ་བའི་སྨན་ཐོངས་བགེགས་དང་ཕྲོལ༔ བདག་གི་ཡིད་ལ་བརྣག་པའི་དགྲ༔ ལོ་དང་ཟླ་བར་མ་བཞག་པར༔ ཞག་དང་ཟ་མར་མྱུར་དུ་སོད༔ བདག་གི་ཡིད་ལ་གང་འདོད་ཀུན༔ འབད་མེད་ལྷུན་གྱིས་གྲུབ་པར་མཛོད༔ བཛྲ་ས་མ་ཡ༔ བཙན་ལ་བརྟེན་པའི་དབང་སྡུད་ནི༔ ཧོཿ བཙན་རྒོད་ཤན་པ་ཆེན་པོ་ཁྱོད༔ དམ་ཚིག་གཉན་གྱིས་ད་བསྐུལ་ལོ༔ དམ་ཚིག་དབང་གིས་འཕྲིན་ལས་སྒྲུབས༔ བདག་གི་ཡིད་ལ་འདོད་པའི་དོན༔ དགྲ་བོ་ཆེ་གེ་དབང་བསྡུས་ཤིག༔ ནཱ་ག་ཙནྟྲི་ཡཀྵ་ཡཀྵ་ས་མ་ཡ་ཆེ་གེ་མོ་པཱ་ཤཾ་ཀུ་རུ་ཡེ་སྭཱ་ཧཱ༔ བཅོལ་ཞིང་གཉེར་གཏད་བྱེད་པ་ནི༔ ཧོཿ བཙན་རྒོད་ཤན་པ་ཆེན་པོ་ཁྱོད༔ བདག་ལ་གསན་ཅིང་དགོངས་སུ་གསོལ༔ བདག་གི་རྟ་ཕྱུགས་ཟས་ནོར་ཀུན༔ དགྲ་འདྲེའི་དབང་དུ་མ་བཏང་ཞིག༔ མི་ལ་ན་ཚ་མ་བཏང་ཞིག༔ ཕྱུགས་ལ་གོད་ཁ་མ་བཏང་ཞིག༔ སྲུངས་ཤིག་སྐྱོབས་པར་མ་གཡེལ་ཅིག༔ དགྲ་དང་ཟིན་གཉིས་འཐབ་པའི་ཚེ༔ དགྲ་བོའི་མི་རྟ་ཆོམ་ལ་ཕོབ༔ རང་གི་བུ་རྟའི་ཁ་འཛིན་མཛོད༔ ཕམ་ཁ་དམ་ཉམས་དགྲ་ལ་ཐོབ༔ དགེ་རྒྱལ་མཚན་གསུམ་བདག་ལ་སྤྲོད༔ བདག་ཉིད་གཅིག་པུར་གནས་པའི་ཚེ༔ འབད་དང་རྩོལ་བ་མི་དགོས་པར༔ ཟས་དང་ནོར་གྱི་ཆར་པ་ཕོབ༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ དཀོན་མཆོག་རྩ་གསུམ་དཔང་ལ་བཞུགས༔ བཛྲ་ས་མ་ཡ་བཛྲ༔ ཉམས་སུ་ལེན་པའི་གང་ཟག་ལ༔ མ་ཡི་བུ་སྡུག་བཞིན་དུ་སྐྱོང་༔ ཕྲིན་ལས་ཐོགས་མེད་འགྲུབ་འགྱུར་རོ༔ མདོ་སྔགས་སྲུང་མ་ཐམས་ཅད་ལ༔ འདི་ལས་འགྲུབ་ཐག་ཉེ་བ་ནི༔ གཅིག་ཀྱང་མེད་དོ་ཡོད་རེ་ཀན༔ བུད་མེད་ཡེ་ཤེས་མཚོ་རྒྱལ་ངས༔ གུ་རུའི་བཀའ་བཞིན་ཡི་གེར་བྲིས༔ མ་མོ་སྲིད་པའི་རྒྱལ་མོས་སྲུངས༔ དམ་ཉམས་ལག་ཏུ་མ་བཏང་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་སྤྲང་བན་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་བྲག་ནས་བཏོན་ཏེ་སྨར་སྟོད་འབྲོས་ཕུག་མཁའ་འགྲོའི་གནས་མཆོག་དབེན་པའི་ཁྲོད་དུ་དག་པར་ཕབ་པའི་ཡི་གེའི་རིས་བྱེད་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།།