TTDL-ZABTER-12-NA-076

Previous Text Back to Volume PageNext Text

Wylie title	chos nyid nam mkha'i klong mdzod las: dpal chen rdo rje gzhon nu'i sgrub pa'i cha lag: mdun bskyed rdo rje'i phreng ba:
Location	bdud 'joms gling pa zab gter Volume 12, Text 76, Pages 431-434 (Folios 1a1 to 2b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las dpal chen rdo rje gzhon nu'i sgrub pa'i cha lag mdun bskyed rdo rje'i phreng ba. In Sprul pa'i gter chen bdud 'joms gling pa'i zab gter gsang ba'i chos sde, Vol. 12: 431-434. Thimphu, Bhutan: Lama Kuenzang Wangdue, 2004.
Side notes	Recto: sgrub pa'i cha lag   Verso: bdud 'joms phur pa
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Rdo rje phur pa
Colophon	ཞེས་པ་འདི་ནི་སྨོན་ལམ་ལས་ཀྱིས་འབྲེལ་བའི་སྐྱེས་བུ་ཆེ་མཆོག་ཞེས་བྱ་བས་བསྐུལ་ངོར་རིག་འཛིན་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ།།
	zhes pa 'di ni smon lam las kyis 'brel ba'i skyes bu che mchog zhes bya bas bskul ngor rig 'dzin bdud 'joms rdo rjes chos nyid nam mkha'i mdzod las bsgyur ba'o/_/dge'o/_/dge'o/_/dge'o//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ དཔལ་ཆེན་རྡོ་རྗེ་གཞོན་ནུའི་སྒྲུབ་པའི་ཆ་ལག༔ མདུན་བསྐྱེད་རྡོ་རྗེའི་ཕྲེང་བ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ དཔལ་ཆེན་རྡོ་རྗེ་གཞོན་ནུ་ཡི༔ སྒྲུབ་པ་ཉམས་སུ་ལེན་པའི་ཚེ༔ དངོས་གྲུབ་ཀུན་གྱི་འབྱུང་གནས་མཆོག༔ མདུན་བསྐྱེད་རྡོ་རྗེའི་ཕྲེང་བ་བསྟན༔ སྒྲུབ་པའི་རྟེན་དང་རྫས་དཀྱིལ་འཁོར༔ སྤྱི་དང་མཐུན་པ་ཉིད་དུ་བྱ༔ སྟོང་ཉིད་ལྟ་བའི་ཆོ་འཕྲུལ་གྱིས༔ ནམ་མཁའ་རྣམ་དག་དབྱིངས་སུ་བཤིག༔ མཁའ་ལས་འཇའ་ཚོན་ཤར་བ་བཞིན༔ རྟེན་དང་བརྟེན་པའི་དཀྱིལ་འཁོར་བཞེངས༔ དེ་ནས་ལྷ་བསྐྱེད་རིམ་པ་ནི༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ༔ ཧཱུྃ༔ རང་ཉིད་ཡེ་ཤེས་སྒྱུ་འཕྲུལ་ལྷའི༔ རྟེན་དང་བརྟེན་པའི་དཀྱིལ་འཁོར་བཞེངས༔ ཟླ་བ་ཆུ་ཟླ་ཇི་བཞིན་དུ༔ བཀོད་པ་རབ་རྫོགས་ཞིང་ཁམས་སུ༔ ཡེ་ཤེས་ལྔ་ཡི་གཞལ་ཡས་དབུས༔ བྱོལ་སོང་གཙོ་བརྒྱད་ཀྱིས་བཏེགས་པའི༔ རིན་ཆེན་ཁྲི་སྟེང་པད་ཟླ་དང་༔ ཉི་སྟེང་བདུད་ཆེན་བསྣོལ་བའི་ཁྲིར༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་མཐིང་ནག༔ ཞལ་གདངས་ལྗགས་འདྲིལ་མཆེ་བ་གཙིགས༔ ཁྲོ་གཉེར་སྡུད་ཅིང་སྤྱན་དགུ་བསྒྲད༔ དབུ་སྐྲ་ཁམ་ནག་མེ་ལྟར་འབར༔ ཐོད་སྐམ་དབུ་རྒྱན་ཅོད་པན་མཛེས༔ གཡས་གཉིས་གསེར་གྱི་རྡོ་རྗེ་ནི༔ རྩེ་དགུ་དང་ནི་རྩེ་ལྔ་ཕྱར༔ གཡོན་གཉིས་ཁ་ཊྭཱྃ་མེ་དཔུང་བསྣམས༔ མཐའ་གཉིས་རི་རབ་ཕུར་པ་འདྲིལ༔ ཞབས་བཞི་གྱད་ཀྱི་འདོར་སྟབས་བསྒྲད༔ རྡོ་རྗེ་རིན་ཆེན་གཤོག་པ་གདེངས༔ ཐབས་ཤེས་ཉི་ཟླའི་སྙན་རྒྱན་མཛེས༔ སྦྱོར་ཡུམ་འཁོར་ལོ་རྒྱས་འདེབས་འཁྲིལ༔ ཕྱག་གཡས་ཁ་ཊྭཱྃ་གཡོན་ཐོད་ཁྲག༔ ཞབས་གཡོན་ཡབ་ཀྱི་སྐེད་ལ་འཁྱུད༔ གཡས་པས་འཁོར་བའི་སྒོ་འཕར་གནོན༔ གཡང་གཞི་གཟིག་ཤམ་རུས་རྒྱན་གསོལ༔ ཐབས་མཆོག་རྡོ་རྗེ་སྲིན་པོ་ཡི༔ དཔྲལ་བར་ཐལ་ཆེན་ཚོམ་བུ་དང་༔ མཁུར་ཚོས་རཀྟའི་ཐིག་ལེ་བྱུག༔ ཞལ་ལ་ཞག་གི་ཟོ་རིས་མཛེས༔ སྨ་ར་སྨིན་མར་མེ་སྟག་འཕྲོ༔ སྐུ་སྟོད་གླང་ཆེན་ཀོ་རློན་དང་༔ མི་ལྤགས་གཡང་གཞི་ལྷུབ་ཆེན་གསོལ༔ སྐུ་སྨད་སྟག་ལྤགས་ཤམ་ཐབས་དང་༔ མགོ་ཕྲེང་སྦྲུལ་ཆུན་རྒྱན་དུ་འཆང་༔ བསྐལ་བ་དུས་མཐའི་མེ་ལྟར་འབར༔ གཡས་སུ་བུདྡྷ་ཀཱི་ལ་མཐིང་༔ གཡོན་དུ་སྒྲོལ་ཡུམ་ཨེ་ཀ་ཛ༔ མཐིང་ནག་མིག་དང་མཆེ་བ་གཅིག༔ རལ་གཅིག་སྲིད་པའི་རྩེ་རུ་བརྫེས༔ ཕྱག་གཉིས་ཞིང་དབྱུག་དགྲ་སྙིང་བསྣམས༔ ཞབས་གཅིག་ཞིང་བཅུའི་བསྟན་དགྲ་གནོན༔ གཅེར་བུ་མི་མགོའི་ཕྲེང་བས་སྤྲས༔ ཤར་དུ་རྡོ་རྗེ་ཀཱི་ལ་དཀར༔ ལྷོ་རུ་རཏྣ་ཀཱི་ལ་སེར༔ ནུབ་ཏུ་པདྨ་ཀཱི་ལ་དམར༔ བྱང་དུ་ཀརྨ་ཀཱི་ལ་ལྗང་༔ ཀུན་ཀྱང་གཡས་གཉིས་རྡོ་རྗེ་དང་༔ གཡོན་གཉིས་ཁ་ཊྭཱྃ་མེ་དཔུང་བསྣམས༔ མཐའ་གཉིས་རི་རབ་ཕུང་པ་འདྲིལ༔ སྐུ་སྨད་དབལ་ཕུར་ངར་ལྡན་གྱིས༔ དུག་ལྔའི་རང་གཟུགས་དགྲ་བགེགས་འབིགས༔ ཕྱོགས་བཅུར་ཡེ་ཤེས་ཁྲོ་བོ་བཅུ༔ རབ་འཇིགས་རྔམས་བརྗིད་ཁྲོ་གཏུམ་ཞིང་༔ གསོད་གཅོད་མཚོན་ཆ་ངར་ལྡན་བསྣམས༔ རང་རང་རིགས་ཀྱི་ཡུམ་དང་འཁྲིལ༔ སྤྲུལ་པ་ཟ་གསོད་ལས་ལ་འགྱེད༔ སྒོ་བཞིར་ལས་ཀྱི་སྒོ་མ་བཞི༔ དཀར་སེར་དམར་ལྗང་མགོ་བརྙན་ཅན༔ འགུགས་འཆིང་སྡོམ་མྱོས་ཕྱག་རྒྱ་བསྣམས༔ དཀྱིལ་འཁོར་ཕྱི་ཁྱམས་འཁོར་ཡུག་ཏུ༔ ཤྭ་ན་མ་བཞི་རེ་ཏཱི་བཞི༔ བསྭེ་མོ་མཆེད་བཞི་སྐྱེས་བུ་བཞི༔ དྲེགས་པ་སྡེ་བརྒྱད་འཁོར་དང་བཅས༔ མཚོ་ལ་གཟའ་སྐར་བཀྲ་བ་བཞིན༔ མ་འདྲེས་ཡོངས་རྫོགས་ཆེན་པོར་བསྐྱེད༔ ཡེ་ཤེས་སྒྱུ་འཕྲུལ་རོལ་བའི་ལྷའི༔ སྤྱི་བོར་ཟླ་སྟེང་ཨོཾ་དཀར་པོ༔ མགྲིན་པར་པདྨར་ཨཱཿདམར་པོ༔ ཐུགས་ཀར་ཉི་སྟེང་ཧཱུྃ་མཐིང་ལས༔ འོད་དང་འོད་ཟེར་རབ་འཕྲོས་པས༔ ཕྱོགས་བཅུའི་རྒྱལ་བ་སྲས་བཅས་དང་༔ ཁྱད་པར་འོག་མིན་ཆོས་དབྱིངས་ནས༔ ཡེ་ཤེས་རོལ་པའི་རྟེན་བརྟེན་ལ༔ སྤྱན་དྲངས་གཉིས་སུ་མེད་པར་གྱུར༔ གུ་རུ་དྷེ་ཝ་ཌཱཀྐི་ནཱི་བཛྲ་ཀཱི་ལི་ཀཱི་ལ་ཡ་སརྦ་དྷརྨ་པཱ་ལ་ཀྵེ་ཊ་པཱ་ལ་ལོ་ཀ་པཱ་ལ་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ ལན་གསུམ་མཐར༔ སྤྱན་འདྲེན་ལ་སོགས་གཞུང་ལ་འཇུག༔ དེ་ལྟར་བསྐྱེད་རིམ་གནད་ལྡན་པས༔ དངོས་གྲུབ་རྣམ་གཉིས་མཆོག་གི་ནོར༔ རིང་པོར་མི་ཐོགས་མྱུར་ཐོབ་འགྱུར༔ བཀའ་སྲུང་ཁྱབ་འཇུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདི་ནི་སྨོན་ལམ་ལས་ཀྱིས་འབྲེལ་བའི་སྐྱེས་བུ་ཆེ་མཆོག་ཞེས་བྱ་བས་བསྐུལ་ངོར་རིག་འཛིན་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ།།