TTDL-ZABTER-01-KA-061

First text in volume.Last text in volume.

Wylie title	zab gsang mkha' 'gro'i snying thig las: zor las gzi byin bskyed pa:
Location	bdud 'joms gling pa zab gter Volume 1, Text 61, Pages 571-573 (Folios 1a1 to 2a1)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. zab gsang mkha' 'gro'i snying thig las zor las gzi byin bskyed pa. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: 571-573. Thimphu, Bhutan: Lama Kuenzang Wangdue, 2004.
Side notes	Recto: zor las   Verso: bdud 'joms gro lod
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Practices - las tshogs
Cycle	ཆེ་མཆོག་རཀྴ་ཐོད་ཕྲེང་བདུད་འཇོམས་རྡོ་རྗེ་གྲོ་ལོད་ (che mchog rak+sha thod phreng bdud 'joms rdo rje gro lod)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་གཅིག་བར་དུ་བཀའ་རྒྱ་བྱས་མཐར་བཀའ་བབས་རྣམས་ཀྱིས་བསྐུལ་ངོར་གཏན་ལ་ཕབ་པའི་ཡི་གེ་པ་ནི་བློ་མཆོག་ཡེ་ཤེས་རྡོ་རྗེའོ། །དགེའོ། །དགེའོ། །དགེའོ།།
	zhes pa 'di yang khrag 'thung bdud 'joms rdo rjes gter nas bton te mi lo nyer gcig bar du bka' rgya byas mthar bka' babs rnams kyis bskul ngor gtan la phab pa'i yi ge pa ni blo mchog ye shes rdo rje'o/_/dge'o/_/dge'o/_/dge'o//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ ཟོར་ལས་གཟི་བྱིན་བསྐྱེད་པ་བཞུགས་སོ༔ (བརྡ་ཡིག་) མདུན་དུ་ཐུན་ཟོར་རྣམས་བཤམས་ལ༔ ཧཱུྃ༔ དུས་གསུམ་སངས་རྒྱས་འདུས་པའི་སྐུ༔ སྤྱི་དཔལ་ཆེ་མཆོག་ཧེ་རུ་ཀ༔ འཁོར་བ་ཡོངས་སྒྲོལ་གནམ་ཞལ་ཡུམ༔ རྒྱུད་སྡེ་རྒྱ་མཚོའི་ཚོགས་དང་བཅས༔ དམ་ཚིག་ཐུགས་དམ་གནད་ནས་བསྐུལ༔ ཆོས་ཀྱི་དབྱིངས་ལས་སྐུར་བཞེངས་ལ༔ དྲག་པོ་མངོན་སྤྱོད་ཕྲིན་ལས་ཀྱིས༔ མཐུ་ནུས་སྟོབས་དང་གཟི་བྱིན་དབང་༔ ལས་ཀྱི་མཚོན་ཐུན་འདི་ལ་སྩོལ༔ ཅེས་བརྗོད་པས་སྤྱི་དཔལ་ཆེན་པོ་ལ་ཡི་དམ་རྒྱལ་བ་རྒྱ་མཚོས་བསྐོར་བ་མདུན་གྱི་ནམ་མཁར་སྤྱན་དྲངས༔ དེ་དག་གི་མཐུ་སྟོབས་ནུས་པ་ཐམས་ཅད་ཐུན་ཟོར་ལ་ཐིམ་པར་བསམ༔ སླར་ཡང་རྩ་གསུམ་རྒྱལ་བ་རྒྱ་མཚོའི་མཐུ་དང་ནུས་སྟོབས་ཐམས་ཅད་ཐུན་ཟོར་ལ་ཐིམ་པར་བསམ༔ ཧཱུྃ༔ རིག་འཛིན་རྩ་བརྒྱུད་བླ་མ་དམ་པ་རྣམས༔ དམ་ཚིག་ཐུགས་དམ་བསྐུལ་ལོ་དབྱིངས་ནས་བཞེངས༔ ཐུན་ཟོར་འདི་ལ་རྣོ་ངར་ནུས་པ་བསྐྱེད༔ དགྲ་བགེགས་མ་ལུས་སྒྲོལ་བའི་དབང་བསྐུར་གསོལ༔ ཡི་དམ་རྒྱུད་སྡེ་རྒྱ་མཚོའི་དཀྱིལ་འཁོར་ལྷ༔ དམ་ཚིག་ཐུགས་དམ་བསྐུལ་ལོ་དབྱིངས་ནས་བཞེངས༔ ཐུན་ཟོར་འདི་ལ་རྣོ་ངར་ནུས་པ་བསྐྱེད༔ དགྲ་བགེགས་མ་ལུས་སྒྲོལ་བའི་དབང་བསྐུར་གསོལ༔ མ་ཚོགས་མཁའ་འགྲོ་རྒྱ་མཚོའི་ཚོགས་རྣམས་ཀུན༔ དམ་ཚིག་ཐུགས་དམ་བསྐུལ་ལོ་དབྱིངས་ནས་བཞེངས༔ ཐུན་ཟོར་འདི་ལ་རྣོ་ངར་ནུས་པ་བསྐྱེད༔ དགྲ་བགེགས་མ་ལུས་སྒྲོལ་བའི་དབང་བསྐུར་གསོལ༔ ཡེ་ཤེས་འཇིག་རྟེན་བཀའ་སྲུང་དྲེགས་པའི་ཚོགས༔ དམ་ཚིག་ཐུགས་དམ་བསྐུལ་ལོ་དབྱིངས་ནས་བཞེངས༔ ཐུན་ཟོར་འདི་ལ་རྣོ་ངར་ནུས་པ་བསྐྱེད༔ དགྲ་བགེགས་མ་ལུས་སྒྲོལ་བའི་དབང་བསྐུར་གསོལ༔ ཡུལ་ལྷ་གཞི་བདག་གནས་གསུམ་སྲུང་མའི་ཚོགས༔ དམ་ཚིག་ཐུགས་དམ་བསྐུལ་ལོ་དབྱིངས་ནས་བཞེངས༔ ཐུན་ཟོར་འདི་ལ་རྣོ་ངར་ནུས་པ་བསྐྱེད༔ དགྲ་བགེགས་མ་ལུས་སྒྲོལ་བའི་དབང་བསྐུར་གསོལ༔ ཅེས་དྲག་སྔགས་ཀྱི་ངར་བླུད་ཅིང་ལག་ཏུ་ཐོགས་ནས་འཕངས་པ་ཙམ་གྱིས་དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་མེ་སྟག་ཆུས་བསད་པ་ལྟར་བརླག་བྱེད་ཀྱི་ནུས་པ་དང་ལྡན་པར་བསམ༔ སྟེང་དུ་དར་གྱིས་བཀབ༔ དེས་ནི་ཐུན་ཟོར་ནུས་ལྡན་བྱེད་པར་འགྱུར༔ འདི་ནི་བསྒྲུབ་ཚེ་ནུབ་རེ་བཞིན་བྱས་ཀྱང་༔ ཤིན་ཏུ་ལེགས་ཤིང་ཐོགས་མེད་རྣོ་ནུས་བསྐྱེད༔ བཀའ་སྲུང་དྲེགས་པ་དབང་ཕྱུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་གཅིག་བར་དུ་བཀའ་རྒྱ་བྱས་མཐར་བཀའ་བབས་རྣམས་ཀྱིས་བསྐུལ་ངོར་གཏན་ལ་ཕབ་པའི་ཡི་གེ་པ་ནི་བློ་མཆོག་ཡེ་ཤེས་རྡོ་རྗེའོ། །དགེའོ། །དགེའོ། །དགེའོ།། །།