TTDL-ZABTER-03-GA-032

First text in volume.Last text in volume.

Wylie title	zab gsang mkha' 'gro'i snying thig las: dpal rdo rje sems dpa'i sgrub pa las: byin 'bebs dngos grub gter mdzod:
Location	bdud 'joms gling pa zab gter Volume 3, Text 32, Pages 331-332 (Folios 1a1 to 1b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las dpal rdo rje sems dpa'i sgrub pa las byin 'bebs dngos grub gter mdzod. In Sprul pa'i gter chen bdud 'joms gling pa'i zab gter gsang ba'i chos sde, Vol. 3: 331-332. Thimphu, Bhutan: Lama Kuenzang Wangdue, 2004.
Side notes	Recto: byin 'bebs   Verso: bdud 'joms bla ma rdor sems
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Descent of Blessings - byin 'bebs
Cycle	དཔལ་རྡོ་རྗེ་སེམས་དཔའི་སྒྲུབ་སྐོར་ (dpal rdo rje sems dpa'i sgrub skor)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rdo rje sems dpa'
Colophon	ཞེས་པ་འདི་ཡང་ཁྲག་འཐུང་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་མཐར་པདྨ་རྣམ་རྒྱལ་གྱིས་ནན་དུ་བསྐུལ་ངོར་ལྷ་ལུང་བདེ་ཆེན་གླིང་དུ་དག་པར་ཕབ་པའི་ཡི་གེ་པ་ནི་རྣལ་འབྱོར་ཨོ་རྒྱན་རྡོ་རྗེའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di yang khrag 'thung rdo rje gro lod rtsal gyis gter nas bton te mthar pad+ma rnam rgyal gyis nan du bskul ngor lha lung bde chen gling du dag par phab pa'i yi ge pa ni rnal 'byor o rgyan rdo rje'o/ /dge'o/ /dge'o/ /dge'o/ /sarba mang+ga laM//

Tibetan Text

[edit]

ཧྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ དཔལ་རྡོ་རྗེ་སེམས་དཔའི་སྒྲུབ་པ་ལས༔ བྱིན་འབེབས་དངོས་གྲུབ་གཏེར་མཛོད་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) རྩེ་གཅིག་མོས་གུས་དྲག་པོ་ཡི༔ རང་སྣང་ཡེ་ཤེས་དཀྱིལ་འཁོར་དུ༔ བྱིན་གྱིས་བརླབས་ཅིང་མངོན་གྱུར་ཕྱིར༔ དམིགས་གསལ་ངང་ནས་འདི་གར་འཇུག༔ ཧཱུྃ༔ སྤྲོས་བྲལ་ཆོས་སྐུའི་ཀློང་ཡངས་ནས༔ ཀུན་ཏུ་བཟང་པོའི་དབང་བྱིན་ཕོབ༔ ལྷུན་གྲུབ་ལོངས་སྐུའི་ཕོ་བྲང་ནས༔ རིགས་ལྔ་ཡབ་ཡུམ་དབང་བྱིན་ཕོབ༔ གདུལ་བྱ་རང་སྣང་སྒྱུ་འཕྲུལ་ཀློང་༔ སྤྲུལ་སྐུའི་སྟོན་འཁོར་དབང་བྱིན་ཕོབ༔ གཞོན་ནུའི་བུམ་སྐུའི་གཞལ་ཡས་སུ༔ དགའ་རབ་རྡོ་རྗེའི་དབང་བྱིན་ཕོབ༔ འཕོ་བ་ཆེན་པོའི་ཀློང་མཛོད་ནས༔ ཤྲཱི་སིང་ཧའི་དབང་བྱིན་ཕོབ༔ ཡེ་ཤེས་སྒྱུ་མ་ཟང་ཐལ་སྐུ༔ པད་འབྱུང་ཡབ་ཡུམ་དབང་བྱིན་ཕོབ༔ གདུལ་བྱའི་མོས་ངོར་སྒྱུ་འཕྲུལ་སྣང་༔ རྗེ་འབངས་ཉེར་ལྔའི་དབང་བྱིན་ཕོབ༔ འཁོར་འདས་དག་མཉམ་གཞལ་ཡས་ནས༔ དྲིན་ཅན་བླ་མའི་དབང་བྱིན་ཕོབ༔ སྒྲུབ་པའི་ཡུལ་གནས་བརྟན་གཡོ་ཀུན༔ ཞིང་དང་ཡེ་ཤེས་ལྷར་བྱིན་ཕོབ༔ སྒྲུབ་ཁང་སྒྲུབ་མཆོག་མཆེད་ལྕམ་དྲལ༔ གཞལ་ཡས་ལྷ་རུ་དབང་བྱིན་ཕོབ༔ ཕུང་ཁམས་དབང་ཡུལ་ཡན་ལག་ལ༔ གདན་གསུམ་ལྷ་ཡི་དབང་བྱིན་ཕོབ༔ མ་དག་ལུགས་འབྱུང་འཁོར་བའི་ཆོས༔ བདག་མེད་རོལ་པར་ལུགས་ལྡོག་ནས༔ གདོད་མའི་ཡེ་གཞི་ཡེ་ཤེས་ངང་༔ མངོན་གྱུར་ཆེན་པོར་དབང་བྱིན་ཕོབ༔ གུ་རུ་དྷེ་ཝ་ཌཱ་ཀི་ནཱི་སརྦ་ས་མ་ཡ་ཨ་ཝེ་ཤ་ཡ་ཨ་ཨ༔ ས་མ་ཡ༔ འདི་ལྟར་དུས་གསུམ་བརྩོན་བྱས་ནས༔ སྒྲུབ་པ་བྱེད་པའི་སྐྱེས་བུ་ཀུན༔ རྣམ་མཁྱེན་རྫོགས་པའི་བྱང་ཆུབ་ཏུ༔ འཚང་རྒྱ་བ་ལ་ཐེ་ཚོམ་མེད༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ ཨྠིྀ༔ ཞེས་པ་འདི་ཡང་ཁྲག་འཐུང་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་མཐར་པདྨ་རྣམ་རྒྱལ་གྱིས་ནན་དུ་བསྐུལ་ངོར་ལྷ་ལུང་བདེ་ཆེན་གླིང་དུ་དག་པར་ཕབ་པའི་ཡི་གེ་པ་ནི་རྣལ་འབྱོར་ཨོ་རྒྱན་རྡོ་རྗེའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།