TTDL-ZABTER-06-CHA-012

First text in volume.Last text in volume.

Wylie title	zab gsang mkha' 'gro'i snying thig las: bde gshegs sgrub sde dgu'i gsang sgrub chu gter 'dus pa'i smad las 'khor ba yongs sgrol gyi phur gdab gud sbas:
Location	bdud 'joms gling pa zab gter Volume 6, Text 12, Pages 135-138 (Folios 1a1 to 2b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las bde gshegs sgrub sde dgu'i gsang sgrub chu gter 'dus pa'i smad las 'khor ba yongs sgrol gyi phur gdab gud sbas. In Sprul pa'i gter chen bdud 'joms gling pa'i zab gter gsang ba'i chos sde, Vol. 6: 135-138. Thimphu, Bhutan: Lama Kuenzang Wangdue, 2004.
Side notes	Recto: phur gdab   Verso: bdud 'joms bka' brgyad chu 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Practices - las tshogs
Cycle	བཀའ་བརྒྱད་བདེ་གཤེགས་ཆུ་གཏེར་འདུས་པ་ (bka' brgyad bde gshegs chu gter 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	bka' brgyad
Colophon	ཞེས་པ་འདི་ཡང་ཆོས་ཀྱི་བདག་པོ་ཕུན་ཚོགས་བཀྲ་ཤིས་ཀྱིས་བསྐུལ་ངོར་བདག་འདྲ་དཔའ་བོ་བདུད་འཇོམས་རྡོ་རྗེས་ཟབ་གསང་མཁའ་འགྲོའི་བརྡ་རིས་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་ཡོངས་གྲུབ་རིག་པའི་རྡོ་རྗེའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།།
	zhes pa 'di yang chos kyi bdag po phun tshogs bkra shis kyis bskul ngor bdag 'dra dpa' bo bdud 'joms rdo rjes zab gsang mkha' 'gro'i brda ris las zhal bshus te dag par phab pa'i yi ge pa ni yongs grub rig pa'i rdo rje'o/_/dge'o/_/dge'o/_/dge'o/_/legs so/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ བདེ་གཤེགས་སྒྲུབ་སྡེ་དགུའི་གསང་སྒྲུབ་ཆུ་གཏེར་འདུས་པའི་སྨད་ལས་འཁོར་བ་ཡོངས་སྒྲོལ་གྱི་ཕུར་གདབ་གུད་སྦས་བཞུགས་སོ༔ ན་མོ་གུ་རུ་ཤྲཱི་བཛྲ་ཀྲོ་ཏ་ཡེ༔ (བརྡ་ཡིག་) གཟུང་འཛིན་གཉིས་རྟོག་དབུ་མར་རབ་སྒྲོལ་ཞིང་༔ ཡེ་ཤེས་ཐུགས་རྗེས་འགྲོ་ལ་ཕན་བདེ་སྤེལ༔ སྟོང་ཉིད་སྙིང་རྗེས་ཞེ་སྡང་དོང་ནས་སྤྲུགས༔ བཛྲ་ཀུ་མཱ་ར་ལ་ཕྱག་འཚལ་ལོ༔ མ་འོངས་ལས་ཅན་སྐལ་བཟང་ཕོ་མོ་ཡིས༔ སངས་རྒྱས་བསྟན་པའི་དགྲ་སྡེ་བརླག་བྱའི་ཕྱིར༔ དྲག་སྔགས་ནུས་མཐུ་སྲོག་གི་གཏའ་རུ་ཟུངས༔ སྙིང་རྗེ་ཆེན་པོ་དམ་ཚིག་འདོར་མི་རུང་༔ དེ་ཕྱིར་རྫོང་འཕྲང་སྲོག་གསུམ་གནད་ལྡན་པས༔ ལས་ཕུར་ཆེན་པོ་ཐོགས་ལ་འདི་སྐད་དོ༔ ཧཱུྃ༔ ང་ནི་དཔལ་ཆེན་སྒྲུབ་སྡེ་དགུ་ཡི་ལྷ༔ བདུན་བརྒྱ་ཉེར་ལྔའི་ཚོམ་བུའི་འདུ་འཕྲོ་འཁྲིགས༔ ཕྱོགས་རིས་བྲལ་བའི་ཡེ་ཤེས་ཉི་མ་ཤར༔ བརྩེ་ཆེན་ལྕགས་ཀྱུས་དགྲ་བགེགས་སྒྲོལ་བར་བརྩམས༔ ཧཱུྃ༔ བདག་ཉིད་དཔའ་བོ་ཧེ་རུ་ཀ་དཔལ་གྱི༔ ཕྱག་གཡས་ཐབས་ཀྱི་རང་བཞིན་ཟླ་བའི་དལ༔ རྩེ་སོར་ལྔ་པོ་རྒྱལ་བ་རིགས་ལྔའི་ཀློང་༔ གཡོན་པ་ཤེས་རབ་རང་བཞིན་ཉི་མའི་དལ༔ རྩེ་སོར་ལྔ་པོ་ཡུམ་ལྔའི་དཀྱིལ་འཁོར་ཏེ༔ རིགས་ལྔ་ཡབ་ཡུམ་སྦྱོར་ལས་བྱུང་བ་ཡི༔ སྲས་མཆོག་དཔལ་ཆེན་བཛྲ་ཀུ་མཱ་ར༔ སྐུ་སྟོད་ཁྲོ་རྒྱལ་འབར་བའི་རྣམ་འགྱུར་ཅན༔ སྨད་ནི་ལྕགས་ཕུར་མེ་ཡི་ཚྭ་ཚྭ་འཕྲོ༔ དབུ་ལ་བསྐལ་པ་བཟང་པོའི་སངས་རྒྱས་རྫོགས༔ སྐེད་པར་ཚོམ་བུ་དགུ་ཡི་འདུ་འཕྲོ་འཁྲིགས༔ སྨད་ལ་གནས་གསུམ་མཁའ་འགྲོའི་སྤྲོ་བསྡུ་འགྱེད༔ ཟུར་ལ་ལས་བྱེད་ཕོ་ཉ་ཉི་རྡུལ་བཞིན༔ ལོགས་ལས་ལྕེ་སྤྱང་མང་པོ་རླུང་ལྟར་འཚུབས༔ རང་འདྲའི་གནམ་ལྕགས་ཕུར་བུ་འདུ་འཕྲོ་འཁྲིགས༔ སྐུ་འགྱིང་གསུང་བསྒྲགས་ཐུགས་ནི་གཡོས་པ་ཡིས༔ ཁམས་གསུམ་འཁོར་བ་དབྱིངས་སུ་སྒྲོལ་བར་བྱེད༔ དེ་ནས་ཉེས་བསྒྲགས་བྱ་བ་ནི༔ ཧཱུྃ༔ ངན་སོང་གསུམ་གྱི་གཞི་ཚང་ལས་ངན་འདི༔ དང་པོ་ཞེ་སྡང་ཕ་ཡི་རྒྱུ་ལས་བསྐྱེད༔ བར་དུ་འདོད་ཆགས་མ་ཡི་མངལ་ལས་བྱུང་༔ ཐ་མ་གཏི་མུག་ལས་ཀྱི་གཟུགས་ཕུང་གྲུབ༔ ཉོན་མོངས་དུག་ལྔ་མེ་ལྟར་འབར་བ་ལས༔ སངས་རྒྱས་བསྟན་པ་གཉན་པོ་བཤིག་པར་བྱེད༔ དཀོན་མཆོག་གསུམ་གྱི་དབུ་འཕང་སྨ་ཕབ་ཅིང་༔ མཚན་ལྡན་བླ་མ་དམ་པའི་སྐུ་ལ་བསྡོས༔ རྒྱུ་འབྲས་བསླུ་མེད་དགེ་བཅུ་ཁྱད་དུ་བསད༔ དབང་གྲལ་ལ་འཚང་དམ་ཚིག་ཉམས་ཆག་བསགས༔ སྒྲུབ་པའི་སྒོ་གཏོར་བཤད་སྒྲུབ་མཁོན་འཛིན་བསླང་༔ རྣམ་ཤེས་ངན་སོང་གནས་སུ་ས་བོན་ཐེབས༔ བསྒྲལ་བའི་ཞིང་བཅུ་ཚང་བའི་བདུད་སྡེ་འདི༔ ཉམས་པ་བདུན་ལ་གཏོགས་པའི་རིགས་ཡིན་པས༔ ཐུགས་རྗེའི་ཐབས་ཀྱིས་བསྒྲལ་བར་མ་བྱས་ན༔ རྡོ་རྗེའི་དམ་ཚིག་ཟབ་མོ་ཉམས་པར་གྱུར༔ ཨེ་མ༔ ཁམས་གསུམ་འཁོར་བའི་སེམས་ཅན་རྣམས༔ མ་རྟོགས་འཁྲུལ་པ་སྙིང་རེ་རྗེ༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེས་གཏམས་བྱས་ནས༔ རྣམ་པར་ཤེས་པ་ཆོས་སྐུར་བསྒོམ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་རཱུ་ཏྲ་ཨཱཿ ཕཊ༔ དེ་ནས་ཚེ་ཁྲུས་གནས་གསུམ་ནི༔ ཕུར་པ་དགྲ་བགེགས་ཀྱི་སྙིང་གར་གདབ་པས་བླའི་ངོ་བོ་ཧྲཱིཿཡིག་དཀར་པོའི་རྣམ་པར་བྱུང་སྟེ་ཕུར་པ་ལ་ཐིམ་པས་ངང་མེར་གྱིས་སོང་བར་བསམ༔ ཡང་ཕུར་པ་དགྲ་བགེགས་ཀྱི་སྙིང་གར་བཏབ་པས་གཟས་པ་པོའི་ཚེ་བསོད་ནམས་ནྲྀཿཡིག་ལྗང་གུའི་རྣམ་པར་དྲངས་ཏེ་ཁོང་གསེང་ནས་མ་དག་པའི་དྲི་མ་ཉེས་སྐྱོན་ཐམས་ཅད་དག་པར་བྱས༔ བདག་ཧེ་རུ་ཀའི་ཐུགས་ཀར་ཐིམ་པས་ཚེ་བསོད་རབ་ཏུ་རྒྱས་པར་བསམ༔ ཡང་ཕུར་པ་དགྲ་བགེགས་ཀྱི་སྙིང་གར་གདབ་པས་གཟས་པ་པོའི་ལས་ཉོན་གྱི་དྲི་མ་ཐམས་ཅད་སྐད་ཅིག་ཉིད་ལ་དག་པར་བྱས་ཏེ༔ རྣམ་པར་ཤེས་པ་ཨ་དཀར་པོའི་རང་བཞིན་དུ་གནས་པ་ཕུར་པའི་རྩེ་མོར་འུབ་ཀྱིས་རྔུབས་ཏེ་ཁོང་གསེང་ནས་དྲངས་ལ༔ མདུན་བསྐྱེད་གཙོ་བོའི་ཐུགས་ཀར་བསྟིམ་པས་སྐུ་གསུམ་ཡེ་ཤེས་ཀྱི་དགོངས་ཀློང་ཆེན་པོར་སད་པར་བསམ༔ ཨཱཿ ཕཊ༔ ཨཱཿ ཕཊ༔ ཨཱཿ ཕཊ༔ དབྱིངས་རིག་གཉིས་མེད་ཆོས་སྐུའི་ལྷུམས་སུ་བསྲེ༔ ཕུང་པོར་རྡོ་རྗེའི་མཚོན་ཆས་ཆར་ཆེན་དབབ༔ བསྒྲལ་འདྲེན་དྲག་པོས་རང་གཞན་དོན་གཉིས་འགྲུབ༔ ཐེ་ཚོམ་མེད་དོ་རྡོ་རྗེ་པདྨའི་བཀའ༔ ཤིན་ཏུ་ཟབ་པ་ཡང་སྙིང་འདུས་པའི་སྐོར༔ མ་འོངས་སྙིགས་མ་སུམ་ཅུ་ཁ་རལ་དུས༔ ང་སྤྲུལ་བདུད་འཇོམས་རྡོ་རྗེའི་དཔལ་དུ་ཤོག༔ བཀའ་ལོག་ལག་ཏུ་མ་ཤོར་དམའ་རུ་རྩེ༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་ཆོས་ཀྱི་བདག་པོ་ཕུན་ཚོགས་བཀྲ་ཤིས་ཀྱིས་བསྐུལ་ངོར་བདག་འདྲ་དཔའ་བོ་བདུད་འཇོམས་རྡོ་རྗེས་ཟབ་གསང་མཁའ་འགྲོའི་བརྡ་རིས་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་ཡོངས་གྲུབ་རིག་པའི་རྡོ་རྗེའོ། །དགེའོ། །དགེའོ། །དགེའོ། །ལེགས་སོ། །སརྦ་མངྒ་ལཾ།། །།